੯. ਪਣੀਤਭੋਜਨਸਿਕ੍ਖਾਪਦਵਣ੍ਣਨਾ

ਨਵਮੇ ਪਣੀਤਭੋਜਨਾਨੀਤਿ ਪਣੀਤਸਂਸਟ੍ਠਾਨਿ ਸਤ੍ਤਧਞ੍ਞਨਿਬ੍ਬਤ੍ਤਾਨਿ ਭੋਜਨਾਨਿ. ਯਥਾ ਹਿ ਆਜਞ੍ਞਯੁਤ੍ਤੋ ਰਥੋ ‘ਆਜਞ੍ਞਰਥੋ’ਤਿ ਵੁਚ੍ਚਤਿ, ਏਵਮਿਧਾਪਿ ਪਣੀਤਸਂਸਟ੍ਠਾਨਿ ਭੋਜਨਾਨਿ ਪਣੀਤਭੋਜਨਾਨੀਤਿ. ਯੇਹਿ ਪਨ ਪਣੀਤੇਹਿ ਸਂਸਟ੍ਠਾਨਿ, ਤਾਨਿ ‘ਪਣੀਤਭੋਜਨਾਨੀ’ਤਿ ਵੁਚ੍ਚਨ੍ਤਿ, ਤੇਸਂ ਪਭੇਦਦਸ੍ਸਨਤ੍ਥਂ ਸੇਯ੍ਯਥਿਦਂ ਸਪ੍ਪਿ ਨਵਨੀਤਨ੍ਤਿਆਦਿਮਾਹ, ਤਤ੍ਥ ਸਪ੍ਪਿਆਦੀਨਿ ਭੇਸਜ੍ਜਸਿਕ੍ਖਾਪਦੇ (ਕਙ੍ਖਾ. ਅਟ੍ਠ. ਭੇਸਜ੍ਜਸਿਕ੍ਖਾਪਦਵਣ੍ਣਨਾ) ਵੁਤ੍ਤਲਕ੍ਖਣੇਨੇਵ ਵੇਦਿਤਬ੍ਬਾਨਿ. ਮਚ੍ਛਾਦੀਸੁ ਪਨ ਸਬ੍ਬੋਪਿ ‘ਓਦਕੋ’ਤਿ (ਪਾਚਿ. ੨੬੦) ਵੁਤ੍ਤਲਕ੍ਖਣੋ ਮਚ੍ਛੋ ਮਚ੍ਛੋਯੇਵ. ਯੇਸਂ ਪਨ ਮਂਸਂ ਕਪ੍ਪਤਿ, ਤੇਸਂ ਮਂਸਞ੍ਚ ਖੀਰਦਧੀਨਿ ਚ ਇਧਾਧਿਪ੍ਪੇਤਾਨਿ. ਏਵਰੂਪਾਨਿ ਪਣੀਤਭੋਜਨਾਨੀਤਿ ਯਾਨਿ ਏਤੇਹਿ ਸਪ੍ਪਿਆਦੀਹਿ ਸਂਸਟ੍ਠਤ੍ਤਾ ‘ਪਣੀਤਭੋਜਨਾਨੀ’ਤਿ ਵੁਚ੍ਚਨ੍ਤਿ, ਤਥਾਰੂਪਾਨਿ ਪਣੀਤਭੋਜਨਾਨਿ. ਅਗਿਲਾਨੋਤਿ ਯਸ੍ਸ ਤੇਹਿ ਵਿਨਾਪਿ ਫਾਸੁ ਹੋਤਿ. ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾਤਿ ਏਤ੍ਥ ਪਨ ਯੋ ਅਗਿਲਾਨੋ ਸੁਦ੍ਧਾਨਿ ਸਪ੍ਪਿਆਦੀਨਿ ਭੇਸਜ੍ਜਤ੍ਥਾਯ ਵਿਞ੍ਞਾਪੇਤਿ, ਸੋ ਮਹਾਨਾਮਸਿਕ੍ਖਾਪਦੇਨ (ਪਾਚਿ. ੩੦੩) ਕਾਰੇਤਬ੍ਬੋ, ਮਚ੍ਛਾਦੀਨਿ ਚਤ੍ਤਾਰਿ ਵਿਞ੍ਞਾਪੇਨ੍ਤੋ ਸੂਪੋਦਨਵਿਞ੍ਞਤ੍ਤਿਯਾ (ਪਾਚਿ. ੬੧੨-੬੧੩) ਕਾਰੇਤਬ੍ਬੋ, ਸਪ੍ਪਿਆਦੀਹਿ ਸਂਸਟ੍ਠਭੋਜਨਾਨਿ ਵਿਞ੍ਞਾਪੇਨ੍ਤੋ ਇਮਿਨਾ ਕਾਰੇਤਬ੍ਬੋ. ਤਤ੍ਰਾਯਂ ਵਿਨਿਚ੍ਛਯੋ – ‘‘ਸਪ੍ਪਿਨਾ ਭਤ੍ਤਂ ਦੇਹਿ, ਸਪ੍ਪਿਂ ਆਕਿਰਿਤ੍ਵਾ ਦੇਹਿ, ਸਪ੍ਪਿਮਿਸ੍ਸਕਂ ਕਤ੍ਵਾ ਦੇਹਿ, ਸਹ ਸਪ੍ਪਿਨਾ ਦੇਹਿ, ਸਪ੍ਪਿਞ੍ਚ ਭਤ੍ਤਞ੍ਚ ਦੇਹੀ’’ਤਿ ਏਵਂ ਵਿਞ੍ਞਾਪੇਨ੍ਤਸ੍ਸ ਤਾਵ ਵਿਞ੍ਞਤ੍ਤਿਯਾ ਦੁਕ੍ਕਟਂ, ਪਟਿਗ੍ਗਹਣੇ ਦੁਕ੍ਕਟਂ, ਅਜ੍ਝੋਹਰਣੇ ਅਜ੍ਝੋਹਰਣੇ ਪਾਚਿਤ੍ਤਿਯਂ. ‘‘ਸਪ੍ਪਿਭਤ੍ਤਂ ਦੇਹੀ’’ਤਿ ਵੁਤ੍ਤੇ ਪਨ ਯਸ੍ਮਾ ਸਾਲਿਭਤ੍ਤਂ ਵਿਯ ਸਪ੍ਪਿਭਤ੍ਤਂ ਨਾਮ ਨਤ੍ਥਿ, ਤਸ੍ਮਾ ਸੂਪੋਦਨਵਿਞ੍ਞਤ੍ਤਿਯਾ ਦੁਕ੍ਕਟਮੇਵ ਹੋਤਿ. ਸਚੇ ਪਨ ‘‘ਸਪ੍ਪਿਨਾ ਭਤ੍ਤਂ ਦੇਹੀ’’ਤਿ ਵੁਤ੍ਤੇ ਭਤ੍ਤਂ ਦਤ੍ਵਾ ‘‘ਸਪ੍ਪਿਂ ਕਤ੍ਵਾ ਭੁਞ੍ਜਾਹੀ’’ਤਿ ਨਵਨੀਤਖੀਰਾਦੀਨਿ ਵਾ ਕਪ੍ਪਿਯਭਣ੍ਡਂ ਵਾ ਦੇਤਿ ‘‘ਇਮਿਨਾ ਸਪ੍ਪਿਂ ਗਹੇਤ੍ਵਾ ਭੁਞ੍ਜਾਹੀ’’ਤਿ, ਯਥਾਵਤ੍ਥੁਕਮੇਵ. ‘‘ਗੋਸਪ੍ਪਿਨਾ ਭਤ੍ਤਂ ਦੇਹੀ’’ਤਿ ਵੁਤ੍ਤੇ ਪਨ ਗੋਸਪ੍ਪਿਂ ਵਾ ਦੇਤੁ, ਤਸ੍ਮਿਂ ਅਸਤਿ ਪੁਰਿਮਨਯੇਨ ਨਵਨੀਤਾਦੀਨਿ ਵਾ, ਗਾਵਿਂਯੇਵ ਵਾ ਦੇਤੁ ‘‘ਇਤੋ ਸਪ੍ਪਿਨਾ ਭੁਞ੍ਜਾਹੀ’’ਤਿ, ਯਥਾਵਤ੍ਥੁਕਮੇਵ. ਸਚੇ ਪਨ ‘‘ਗੋਸਪ੍ਪਿਨਾ ਦੇਹੀ’’ਤਿ ਯਾਚਿਤੋ ਅਜਿਕਾਸਪ੍ਪਿਆਦੀਹਿ ਦੇਤਿ, ਵਿਸਙ੍ਕੇਤਂ. ਏਵਞ੍ਹਿ ਸਤਿ ਅਞ੍ਞਂ ਯਾਚਿਤੇਨ ਅਞ੍ਞਂ ਦਿਨ੍ਨਂ ਨਾਮ ਹੋਤਿ, ਤਸ੍ਮਾ ਅਨਾਪਤ੍ਤਿ, ਏਸ ਨਯੋ ‘‘ਅਜਿਕਾਸਪ੍ਪਿਨਾ ਦੇਹੀ’’ਤਿਆਦੀਸੁਪਿ. ‘‘ਕਪ੍ਪਿਯਸਪ੍ਪਿਨਾ ਦੇਹੀ’’ਤਿ ਵੁਤ੍ਤੇ ਅਕਪ੍ਪਿਯਸਪ੍ਪਿਨਾ ਦੇਤਿ, ਵਿਸਙ੍ਕੇਤਮੇਵ. ‘‘ਅਕਪ੍ਪਿਯਸਪ੍ਪਿਨਾ ਦੇਹੀ’’ਤਿ ਵੁਤ੍ਤੇ ਅਕਪ੍ਪਿਯਸਪ੍ਪਿਨਾਵ ਦੇਤਿ, ਪਟਿਗ੍ਗਹਣੇਪਿ ਪਰਿਭੋਗੇਪਿ ਦੁਕ੍ਕਟਮੇਵ. ਇਮਿਨਾ ਨਯੇਨ ਸਬ੍ਬਪਦੇਸੁ ਵਿਨਿਚ੍ਛਯੋ ਵੇਦਿਤਬ੍ਬੋ. ਸਚੇ ਪਨ ਸਬ੍ਬੇਹਿਪਿ ਸਪ੍ਪਿਆਦੀਹਿ ਏਕਟ੍ਠਾਨੇ ਵਾ ਨਾਨਾਟ੍ਠਾਨੇ ਵਾ ਵਿਞ੍ਞਾਪੇਤ੍ਵਾ ਪਟਿਲਦ੍ਧਂ ਏਕਤੋ ਸਮ੍ਭਿਨ੍ਨਰਸਂ ਕਤ੍ਵਾ ਤਤੋ ਕੁਸਗ੍ਗੇਨ ਏਕਬਿਨ੍ਦੁਮ੍ਪਿ ਅਜ੍ਝੋਹਰਤਿ, ਨਵ ਪਾਚਿਤ੍ਤਿਯਾਨਿ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਪਣੀਤਭੋਜਨਵਿਞ੍ਞਤ੍ਤਿਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਗਿਲਾਨੋ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਗਿਲਾਨਸ੍ਸ ਅਗਿਲਾਨਸਞ੍ਞਿਨੋ, ਵੇਮਤਿਕਸ੍ਸ ਵਾ ਦੁਕ੍ਕਟਂ. ਗਿਲਾਨਸਞ੍ਞਿਸ੍ਸ, ਗਿਲਾਨਕਾਲੇ ਵਿਞ੍ਞਾਪੇਤ੍ਵਾ ਅਗਿਲਾਨਸ੍ਸ ਭੁਞ੍ਜਤੋ, ਗਿਲਾਨਸ੍ਸ ਸੇਸਕੇ, ਞਾਤਕਪ੍ਪਵਾਰਿਤਟ੍ਠਾਨਤੋ, ਅਞ੍ਞਸ੍ਸਤ੍ਥਾਯ ਵਿਞ੍ਞਤ੍ਤੇ, ਅਤ੍ਤਨੋ ਧਨੇਨ ਗਹਿਤੇ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਪਣੀਤਭੋਜਨਤਾ, ਅਗਿਲਾਨਤਾ, ਕਤਵਿਞ੍ਞਤ੍ਤਿਯਾ ਪਟਿਲਾਭੋ, ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਅਦ੍ਧਾਨਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਪਣੀਤਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.