੧੦. ਦਨ੍ਤਪੋਨਸਿਕ੍ਖਾਪਦਵਣ੍ਣਨਾ

ਦਸਮੇ ਅਦਿਨ੍ਨਨ੍ਤਿ ਕਾਯੇਨ ਵਾ ਕਾਯਪ੍ਪਟਿਬਦ੍ਧੇਨ ਵਾ ਗਣ੍ਹਨ੍ਤਸ੍ਸ ਹਤ੍ਥਪਾਸੇ ਠਤ੍ਵਾ ਕਾਯਕਾਯਪ੍ਪਟਿਬਦ੍ਧਨਿਸ੍ਸਗ੍ਗਿਯਾਨਂ ਅਞ੍ਞਤਰੇਨ ਨ ਦਿਨ੍ਨਂ, ਅਪ੍ਪਟਿਗ੍ਗਹਿਤਕਸ੍ਸੇਤਂ ਨਾਮਂ. ਅਪ੍ਪਟਿਗ੍ਗਹਿਤਕਞ੍ਹਿ ਭਿਕ੍ਖੁਨੋ ਅਤ੍ਤਨੋ ਸਨ੍ਤਕਮ੍ਪਿ ਅਜ੍ਝੋਹਰਿਤੁਂ ਨ ਵਟ੍ਟਤਿ. ਪਟਿਗ੍ਗਹਿਤਂ ਅਨ੍ਤਮਸੋ ਵਿਸ੍ਸਾਸਿਕਸਨ੍ਤਕਮ੍ਪਿ ਵਟ੍ਟਤਿ, ਤਸ੍ਸ ਲਕ੍ਖਣਂ ਵੁਤ੍ਤਵਿਪਲ੍ਲਾਸੇਨ ਵੇਦਿਤਬ੍ਬਂ. ਸਚੇ ਹਿ ਯੋ ਕੋਚਿ ਅਨੁਪਸਮ੍ਪਨ੍ਨੋ ਅਨ੍ਤਮਸੋ ਤਿਰਚ੍ਛਾਨੋਪਿ ਭਿਕ੍ਖੁਸ੍ਸ ਵਾ ਭਿਕ੍ਖੁਨਿਯਾ ਵਾ ਹਤ੍ਥਪਾਸੇ ਠਿਤੋ ਕਾਯਾਦੀਨਂ ਅਞ੍ਞਤਰੇਨ ਦੇਤਿ, ਤਞ੍ਚੇ ਭਿਕ੍ਖੁਨਾ ਯੇਨ ਕੇਨਚਿ ਸਰੀਰਾਵਯਵੇਨ ਵਾ, ਤਪ੍ਪਟਿਬਦ੍ਧੇਨ ਵਾ, ਸਂਹਾਰਿਮੇਨ ਚ ਅਨ੍ਤਮਸੋ ਮਞ੍ਚੇਨਾਪਿ, ਧਾਰੇਤੁਂ ਸਮਤ੍ਥੇਨ ਚ ਅਨ੍ਤਮਸੋ ਅਤਤ੍ਥਜਾਤਕਰੁਕ੍ਖਪਣ੍ਣੇਨਾਪਿ, ਸੂਚਿਯਾ ਪਰਾਮਟ੍ਠਮਤ੍ਤੇਨਾਪਿ ਪਟਿਗ੍ਗਹਿਤਂ, ਪਟਿਗ੍ਗਹਿਤਮੇਵ ਹੋਤਿ. ਪਟਿਬਦ੍ਧਪ੍ਪਟਿਬਦ੍ਧਂ ਨਾਮ ਇਧ ਨਤ੍ਥਿ, ਯਮ੍ਪਿ ਨਤ੍ਥੁਕਰਣਿਯਾ ਦਿਯ੍ਯਮਾਨਂ ਨਾਸਿਕਾਯ, ਅਕਲ੍ਲਕੋ ਵਾ ਮੁਖੇਨ ਪਟਿਗ੍ਗਣ੍ਹਾਤਿ, ਸਬ੍ਬਂ ਵਟ੍ਟਤਿ, ਆਭੋਗਮਤ੍ਤਮੇਵ ਹੇਤ੍ਥ ਪਮਾਣਂ. ਪੁਬ੍ਬਾਭੋਗੇ ਚ ਸਤਿ ਪਚ੍ਛਾ ਨਿਦ੍ਦਾਯਨ੍ਤਸ੍ਸ ਪਤ੍ਤੇ ਦਿਨ੍ਨਮ੍ਪਿ ਹਤ੍ਥਪਾਸੇ ਸਤਿ ਪਟਿਗ੍ਗਹਿਤਮੇਵ ਹੋਤਿ. ਯਮ੍ਪਿ ‘‘ਪਤ੍ਤੇਨ ਪਟਿਗ੍ਗਣ੍ਹਿਸ੍ਸਾਮੀ’’ਤਿ ਨਿਸਿਨ੍ਨਸ੍ਸੇਵ ਹਤ੍ਥੇ ਪਤਤਿ, ਤਂ ਵਟ੍ਟਤਿਯੇਵ. ਅਭਿਹਟਭਾਜਨਤੋ ਪਤਿਤਰਜਮ੍ਪਿ ਵਟ੍ਟਤਿ, ਤਤ੍ਥ ਠਿਤਨਿਸਿਨ੍ਨਨਿਪਨ੍ਨਾਨਂ ਪਵਾਰਣਾਸਿਕ੍ਖਾਪਦੇ ਵੁਤ੍ਤਨਯੇਨੇਵ ਹਤ੍ਥਪਾਸੋ ਵੇਦਿਤਬ੍ਬੋ.

ਸਚੇ ਪਨ ਦਾਯਕਪ੍ਪਟਿਗ੍ਗਾਹਕੇਸੁ ਏਕੋ ਆਕਾਸੇ ਹੋਤਿ, ਏਕੋ ਭੂਮਿਯਂ, ਭੂਮਟ੍ਠਸ੍ਸ ਸੀਸੇਨ ਆਕਾਸਟ੍ਠਸ੍ਸ ਚ ਠਪੇਤ੍ਵਾ ਦਾਤੁਂ ਵਾ ਗਹੇਤੁਂ ਵਾ ਪਸਾਰਿਤਹਤ੍ਥਂ ਯਂ ਆਸਨ੍ਨਤਰਂ ਅਙ੍ਗਂ, ਤਸ੍ਸ ਓਰਿਮਨ੍ਤੇਨ ਹਤ੍ਥਪਾਸਪ੍ਪਮਾਣਂ ਪਰਿਚ੍ਛਿਨ੍ਦਿਤਬ੍ਬਂ. ਸਚੇਪਿ ਏਕੋ ਕੂਪੇ ਹੋਤਿ, ਏਕੋ ਕੂਪਤਟੇ, ਏਕੋ ਵਾ ਰੁਕ੍ਖੇ, ਏਕੋ ਪਥਵਿਯਂ, ਵੁਤ੍ਤਨਯੇਨੇਵ ਹਤ੍ਥਪਾਸਪ੍ਪਮਾਣਂ ਪਰਿਚ੍ਛਿਨ੍ਦਿਤਬ੍ਬਂ. ਤਸ੍ਮਿਂ ਠਤ੍ਵਾ ਸਚੇਪਿ ਦ੍ਵੇ ਤਯੋ ਵਾ ਸਾਮਣੇਰਾ ਯਂ ਮਜ੍ਝਿਮੋ ਪੁਰਿਸੋ ਉਕ੍ਖਿਪਿਤੁਂ ਸਕ੍ਕੋਤਿ, ਏਵਰੂਪਂ ਭਾਰਂ ਪਵਟ੍ਟੇਨ੍ਤਾ ਭਿਕ੍ਖੁਨੋ ਭੂਮਿਯਂ ਠਪਿਤਹਤ੍ਥਂ ਆਰੋਪੇਨ੍ਤਿ, ਉਕ੍ਖਿਪਿਤ੍ਵਾ ਵਾ ਭਿਕ੍ਖੁਨੋ ਪਸਾਰਿਤਹਤ੍ਥੇ ਏਕਦੇਸੇਨਾਪਿ ਠਪੇਨ੍ਤਿ, ਤਂ ਪਟਿਗ੍ਗਹਿਤਮੇਵ ਹੋਤਿ. ਯਂ ਪਨ ਪਿਣ੍ਡਾਯ ਚਰਨ੍ਤਸ੍ਸ ਪਤ੍ਤੇ ਰਜਂ ਪਤਤਿ, ਤਂ ਅਪ੍ਪਟਿਗ੍ਗਹਿਤਮੇਵ ਹੋਤਿ, ਤਸ੍ਮਾ ਪਟਿਗ੍ਗਹੇਤ੍ਵਾਵ ਭਿਕ੍ਖਾ ਗਣ੍ਹਿਤਬ੍ਬਾ. ਅਪ੍ਪਟਿਗ੍ਗਹੇਤ੍ਵਾ ਗਣ੍ਹਨ੍ਤਸ੍ਸ ਵਿਨਯਦੁਕ੍ਕਟਂ, ਤਂ ਪਨ ਪੁਨ ਪਟਿਗ੍ਗਹੇਤ੍ਵਾ ਭੁਞ੍ਜਨ੍ਤਸ੍ਸ ਅਨਾਪਤ੍ਤਿ. ਸਚੇ ‘‘ਪਟਿਗ੍ਗਹੇਤ੍ਵਾ ਦੇਥਾ’’ਤਿ ਵੁਤ੍ਤੇ ਵਚਨਂ ਅਸ੍ਸੁਤ੍ਵਾ ਵਾ ਅਨਾਦਿਯਿਤ੍ਵਾ ਵਾ ਭਿਕ੍ਖਂ ਦੇਨ੍ਤਿਯੇਵ, ਵਿਨਯਦੁਕ੍ਕਟਾ ਮੁਚ੍ਚਤਿ, ਪੁਨ ਪਟਿਗ੍ਗਹੇਤ੍ਵਾ ਅਞ੍ਞਾ ਭਿਕ੍ਖਾ ਪਟਿਗ੍ਗਹੇਤਬ੍ਬਾ. ਸਚੇ ਮਹਾਵਾਤੋ ਤਤੋ ਤਤੋ ਰਜਂ ਪਾਤੇਤਿ, ਨ ਸਕ੍ਕਾ ਹੋਤਿ ਭਿਕ੍ਖਂ ਗਹੇਤੁਂ, ‘‘ਅਨੁਪਸਮ੍ਪਨ੍ਨਸ੍ਸ ਦਸ੍ਸਾਮੀ’’ਤਿ ਸੁਦ੍ਧਚਿਤ੍ਤੇਨ ਆਭੋਗਂ ਕਤ੍ਵਾ ਗਣ੍ਹਿਤੁਂ ਵਟ੍ਟਤਿ. ਤਂ ਅਨੁਪਸਮ੍ਪਨ੍ਨਸ੍ਸ ਦਤ੍ਵਾ ਪੁਨ ਤੇਨ ਦਿਨ੍ਨਂ ਵਾ ਤਸ੍ਸ ਵਿਸ੍ਸਾਸੇਨ ਵਾ ਪਟਿਗ੍ਗਹੇਤ੍ਵਾ ਭੁਞ੍ਜਿਤੁਂ ਵਟ੍ਟਤਿ. ਅਸ੍ਸੁਖੇਲ਼ਸਿਙ੍ਘਾਣਿਕਾਦੀਸੁ ਯਂ ਠਾਨਤੋ ਚਵਿਤ੍ਵਾ ਹਤ੍ਥੇ ਵਾ ਪਤ੍ਤੇ ਵਾ ਪਤਤਿ, ਤਂ ਪਟਿਗ੍ਗਹੇਤਬ੍ਬਂ, ਅਙ੍ਗਲਗ੍ਗਂ ਪਟਿਗ੍ਗਹਿਤਮੇਵ. ਪਤਨ੍ਤਮ੍ਪਿ ਵੋਚ੍ਛਿਨ੍ਨਞ੍ਚੇ ਅਨ੍ਤਰਾ ਨ ਗਹੇਤਬ੍ਬਂ, ਉਗ੍ਗਹਿਤਕਂ ਨਾਮ ਹੋਤਿ, ਤਂ ਪਚ੍ਛਾ ਪਟਿਗ੍ਗਹਿਤਮ੍ਪਿ ਨ ਵਟ੍ਟਤਿ. ਯਂ ਪਨ ਭੇਸਜ੍ਜਂ ਵਾ ਮੂਲਫਲਂ ਵਾ ਮਾਤਾਦੀਨਂ ਅਤ੍ਥਾਯ ਗਹੇਤ੍ਵਾ ਛਾਯਤ੍ਥਾਯ ਵਾ ਫਲਿਨਿਸਾਖਂ ਉਕ੍ਖਿਪਿਤ੍ਵਾ ਗਚ੍ਛਤਿ, ਤਤੋ ਯਂ ਇਚ੍ਛਤਿ, ਤਂ ਪੁਨ ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ. ਯੋ ਪਨ ਤਤ੍ਥ ਜਾਤਕਫਲਿਨਿਸਾਖਾਯ ਵਾ ਵਲ੍ਲਿਯਾ ਵਾ ਗਹੇਤ੍ਵਾ ਚਾਲੇਤਿ. ਤਸ੍ਸ ਤਤੋ ਲਦ੍ਧਂ ਫਲਂ ਨ ਵਟ੍ਟਤਿ, ਦੁਰੁਪਚਿਣ੍ਣਦੁਕ੍ਕਟਞ੍ਚ ਆਪਜ੍ਜਤਿ, ਅਞ੍ਞਸ੍ਸ ਤਂ ਵਟ੍ਟਤਿ, ਫਲਿਰੁਕ੍ਖਂ ਪਨ ਅਪਸ੍ਸਯਿਤੁਂ ਵਾ ਆਲਮ੍ਬਿਤੁਂ ਵਾ ਵਟ੍ਟਤਿ, ਪਟਿਗ੍ਗਹੇਤ੍ਵਾ ਠਪਿਤੇ ਯਂ ਅਞ੍ਞਂ ਅਙ੍ਕੁਰਾਦਿ ਉਪ੍ਪਜ੍ਜਤਿ, ਪਟਿਗ੍ਗਹਿਤਮੇਵ ਤਂ. ਯਾਵ ਹਿ ਹਤ੍ਥਤੋ ਮੁਤ੍ਤੇ ਨਿਰਪੇਕ੍ਖੋ ਨ ਹੋਤਿ, ਨਿਰਪੇਕ੍ਖਤਾਯ ਵਾ ਹਤ੍ਥਤੋ ਨ ਮੁਚ੍ਚਤਿ, ਤਾਵ ਨ ਪਟਿਗ੍ਗਹਣਂ ਵਿਜਹਤਿ, ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯਂ ਵੁਤ੍ਤੋ.

ਮੁਖਦ੍ਵਾਰਨ੍ਤਿ ਗਲਨਾਲ਼ਿਕਂ. ਮੁਖੇਨ ਵਾ ਹਿ ਪਵਿਟ੍ਠਂ ਹੋਤੁ, ਨਾਸਿਕਾਯ ਵਾ, ਗਲੇਨ ਅਜ੍ਝੋਹਰਣੀਯਤਾਯ ਸਬ੍ਬਮ੍ਪਿ ਤਂ ਮੁਖਦ੍ਵਾਰਂ ਪਵੇਸਿਤਮੇਵ ਹੋਤਿ. ਆਹਾਰਨ੍ਤਿ ਯਂਕਿਞ੍ਚਿ ਯਾਵਕਾਲਿਕਂ ਵਾ ਯਾਮਕਾਲਿਕਂ ਵਾ ਸਤ੍ਤਾਹਕਾਲਿਕਂ ਵਾ ਯਾਵਜੀਵਿਕਂ ਵਾ. ਸਬ੍ਬਞ੍ਹੇਤਂ ਅਜ੍ਝੋਹਰਣੀਯਤ੍ਤਾ ‘ਆਹਾਰੋ’ਤਿ ਵੁਚ੍ਚਤਿ, ਤਤ੍ਥ ਸਬ੍ਬਮ੍ਪਿ ਧਞ੍ਞਂ ਵਾ ਧਞ੍ਞਾਨੁਲੋਮਂ ਵਾ ਤਾਲਨਾਲ਼ਿਕੇਰਪਨਸਲਬੁਜਅਲਾਬੁਕੁਮ੍ਭਣ੍ਡਪੁਸ੍ਸਫਲਤਿਪੁਸਫਲਏਲ਼ਾਲੁਕਸਙ੍ਖਾਤਂ ਨਵਵਿਧਂ ਮਹਾਫਲਞ੍ਚੇਵ ਅਪਰਣ੍ਣਞ੍ਚ, ਯਞ੍ਚਞ੍ਞਂ ਵਨਮੂਲਪਤ੍ਤਪੁਪ੍ਫਫਲਾਦਿ ਆਹਾਰਤ੍ਥਂ ਫਰਤਿ, ਤਂ ਸਬ੍ਬਂ ਯਾਵ ਮਜ੍ਝਨ੍ਹਿਕਕਾਲੋ, ਤਾਵ ਪਰਿਭੁਞ੍ਜਿਤਬ੍ਬਤੋ ਯਾਵਕਾਲਿਕਂ ਨਾਮ. ਅਮ੍ਬਪਾਨਂ ਜਮ੍ਬੁਪਾਨਂ ਚੋਚਪਾਨਂ ਮੋਚਪਾਨਂ ਮਧੁਕਪਾਨਂ ਮੁਦ੍ਦਿਕਪਾਨਂ ਸਾਲੂਕਪਾਨਂ ਫਾਰੁਸਕਪਾਨਨ੍ਤਿ ਇਮਾਨਿ ਅਟ੍ਠ ਪਾਨਾਨਿ, ਯਾਨਿ ਚ ਤੇਸਂ ਅਨੁਲੋਮਾਨਿ ਵੇਤ੍ਤਤਿਨ੍ਤਿਣਿਕਮਾਤੁਲੁਙ੍ਗਕਪਿਟ੍ਠਕੋਸਮ੍ਬਕਰਮਨ੍ਦਾਦਿਖੁਦ੍ਦਕਫਲਪਾਨਾਨਿ, ਏਤਾਨਿ ਸਬ੍ਬਾਨਿ ਅਨੁਪਸਮ੍ਪਨ੍ਨੇਹਿ ਸੀਤੋਦਕੇਨ ਮਦ੍ਦਿਤ੍ਵਾ ਕਤਾਨਿ ਆਦਿਚ੍ਚਪਾਕਾਨਿ ਵਾ ਯਾਵ ਰਤ੍ਤਿਯਾ ਪਚ੍ਛਿਮਯਾਮਂ ਨਿਦਹਿਤ੍ਵਾ ਪਰਿਭੁਞ੍ਜਿਤਬ੍ਬਤੋ ਯਾਮਕਾਲਿਕਾਨਿ ਨਾਮ. ਅਵਸੇਸੇਸੁ ਅਨੁਞ੍ਞਾਤਫਲਪਤ੍ਤਪੁਪ੍ਫਰਸੇਸੁਪਿ ਏਸੇਵ ਨਯੋ. ਸਪ੍ਪਿਆਦੀਨਿ ਪਞ੍ਚ ਭੇਸਜ੍ਜਾਨਿ ਸਤ੍ਤਾਹਂ ਨਿਦਹਿਤ੍ਵਾ ਪਰਿਭੁਞ੍ਜਿਤਬ੍ਬਤੋ ਸਤ੍ਤਾਹਕਾਲਿਕਾਨਿ ਨਾਮ. ਇਦਂ ਪਨ ਯਾਵਕਾਲਿਕਾਦਿਤ੍ਤਯਂ ਕਾਲਵਿਮੁਤ੍ਤਞ੍ਚ ਉਦਕਂ ਠਪੇਤ੍ਵਾ ਅਵਸੇਸਮੂਲਫਲਾਫਲਾਦਿ ਯਂ ਨੇਵ ਖਾਦਨੀਯਤ੍ਥਂ ਨ ਭੋਜਨੀਯਤ੍ਥਂ ਫਰਤਿ, ਤਂ ਯਾਵਜੀਵਂ ਨਿਦਹਿਤ੍ਵਾ ਸਤਿ ਪਚ੍ਚਯੇ ਪਰਿਭੁਞ੍ਜਿਤਬ੍ਬਤੋ ਯਾਵਜੀਵਿਕਂ ਨਾਮ. ਆਹਰੇਯ੍ਯਾਤਿ ਪਵੇਸੇਯ੍ਯ. ਅਞ੍ਞਤ੍ਰ ਉਦਕਦਨ੍ਤਪੋਨਾਤਿ ਇਦਂ ਅਨਾਹਾਰੇਪਿ ਉਦਕੇ ਆਹਾਰਸਞ੍ਞਾਯ, ਦਨ੍ਤਪੋਨੇ ਚ ‘‘ਮੁਖਦ੍ਵਾਰਂ ਆਹਟਂ ਇਦ’’ਨ੍ਤਿ ਸਞ੍ਞਾਯ ਕੁਕ੍ਕੁਚ੍ਚਾਯਨ੍ਤਾਨਂ ਕੁਕ੍ਕੁਚ੍ਚਵਿਨੋਦਨਤ੍ਥਂ ਵੁਤ੍ਤਂ. ਉਦਕਞ੍ਹਿ ਯਥਾਸੁਖਂ ਪਾਤੁਂ, ਦਨ੍ਤਕਟ੍ਠਞ੍ਚ ਦਨ੍ਤਪੋਨਪਰਿਭੋਗੇਨ ਪਰਿਭੁਞ੍ਜਿਤੁਂ ਵਟ੍ਟਤਿ. ਠਪੇਤ੍ਵਾ ਪਨ ਇਦਂ ਦ੍ਵਯਂ ਅਵਸੇਸਂ ਅਜ੍ਝੋਹਰਣਤ੍ਥਾਯ ਗਣ੍ਹਤੋ ਗਹਣੇ ਦੁਕ੍ਕਟਂ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਚਿਤ੍ਤਿਯਂ, ਸਚੇਪਿ ਦਨ੍ਤਕਟ੍ਠਰਸੋ ਅਜਾਨਨ੍ਤਸ੍ਸ ਅਨ੍ਤੋ ਪਵਿਸਤਿ, ਪਾਚਿਤ੍ਤਿਯਮੇਵ.

ਵੇਸਾਲਿਯਂ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਅਦਿਨ੍ਨਂ ਆਹਾਰਂ ਆਹਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਉਦਕਦਨ੍ਤਪੋਨਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਪਟਿਗ੍ਗਹਿਤਕੇ ਅਪ੍ਪਟਿਗ੍ਗਹਿਤਸਞ੍ਞਿਨੋ, ਵੇਮਤਿਕਸ੍ਸ ਵਾ ਦੁਕ੍ਕਟਂ. ਪਟਿਗ੍ਗਹਿਤਸਞ੍ਞਿਸ੍ਸ, ਉਦਕਦਨ੍ਤਪੋਨੇ, ਚਤ੍ਤਾਰਿ ਮਹਾਵਿਕਟਾਨਿ ਸਤਿ ਪਚ੍ਚਯੇ ਅਸਤਿ ਕਪ੍ਪਿਯਕਾਰਕੇ ਸਾਮਂ ਗਹੇਤ੍ਵਾ ਪਰਿਭੁਞ੍ਜਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਏਤ੍ਥ ਦੁਬ੍ਬਚੋਪਿ ਅਸਮਤ੍ਥੋਪਿ ਕਪ੍ਪਿਯਕਾਰਕੋ ਅਸਨ੍ਤਪਕ੍ਖੇਯੇਵ ਤਿਟ੍ਠਤਿ, ਛਾਰਿਕਾਯ ਅਸਤਿ ਸੁਕ੍ਖਦਾਰੁਂ ਝਾਪੇਤ੍ਵਾ, ਤਸ੍ਮਿਞ੍ਚ ਅਸਤਿ ਅਲ੍ਲਦਾਰੁਂ ਰੁਕ੍ਖਤੋ ਛਿਨ੍ਦਿਤ੍ਵਾਪਿ ਕਾਤੁਂ, ਮਤ੍ਤਿਕਤ੍ਥਾਯ ਚ ਪਥਵਿਂ ਖਣਿਤੁਮ੍ਪਿ ਵਟ੍ਟਤਿ, ਇਦਂ ਪਨ ਚਤੁਬ੍ਬਿਧਮ੍ਪਿ ਮਹਾਵਿਕਟਂ ਕਾਲੋਦਿਸ੍ਸਂ ਨਾਮ ਸਪ੍ਪਦਟ੍ਠਕ੍ਖਣੇਯੇਵ ਸਾਮਂ ਗਹੇਤੁਂ ਵਟ੍ਟਤਿ, ਅਞ੍ਞਦਾ ਪਟਿਗ੍ਗਾਹਾਪੇਤ੍ਵਾ ਪਰਿਭੁਞ੍ਜਿਤਬ੍ਬਂ. ਅਪ੍ਪਟਿਗ੍ਗਹਿਤਕਤਾ, ਅਨਨੁਞ੍ਞਾਤਤਾ, ਧੂਮਾਦਿਅਬ੍ਬੋਹਾਰਿਕਾਭਾਵੋ, ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.

ਦਨ੍ਤਪੋਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਭੋਜਨਵਗ੍ਗੋ ਚਤੁਤ੍ਥੋ.