੮. ਸਨ੍ਨਿਧਿਕਾਰਕਸਿਕ੍ਖਾਪਦਵਣ੍ਣਨਾ

ਅਟ੍ਠਮੇ ਸਨ੍ਨਿਧਿਕਾਰਕਨ੍ਤਿ ਕਾਰੋ ਕਰਣਂ ਕਿਰਿਯਾਤਿ ਅਤ੍ਥਤੋ ਏਕਂ, ਸਨ੍ਨਿਧਿ ਕਾਰੋ ਅਸ੍ਸਾਤਿ ਸਨ੍ਨਿਧਿਕਾਰਂ, ਸਨ੍ਨਿਧਿਕਾਰਮੇਵ ਸਨ੍ਨਿਧਿਕਾਰਕਂ, ਪਟਿਗ੍ਗਹੇਤ੍ਵਾ ਏਕਰਤ੍ਤਿਂ ਵੀਤਿਨਾਮਿਤਸ੍ਸੇਤਂ ਨਾਮਂ. ਤਸ੍ਮਾ ਏਵਂ ਸਨ੍ਨਿਧਿਕਤਂ ਯਂਕਿਞ੍ਚਿ ਯਾਵਕਾਲਿਕਂ ਵਾ ਯਾਮਕਾਲਿਕਂ ਵਾ ‘ਅਜ੍ਝੋਹਰਿਸ੍ਸਾਮੀ’ਤਿ ਗਣ੍ਹਨ੍ਤਸ੍ਸ ਪਟਿਗ੍ਗਹਣੇ ਦੁਕ੍ਕਟਂ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਚਿਤ੍ਤਿਯਂ. ਸਚੇਪਿ ਪਤ੍ਤੋ ਦੁਦ੍ਧੋਤੋ ਹੋਤਿ, ਯਂ ਅਙ੍ਗੁਲਿਯਾ ਘਂਸਨ੍ਤਸ੍ਸ ਲੇਖਾ ਪਞ੍ਞਾਯਤਿ, ਗਣ੍ਠਿਕਪਤ੍ਤਸ੍ਸ ਵਾ ਗਣ੍ਠਿਕਨ੍ਤਰੇ ਸ੍ਨੇਹੋ ਪਵਿਟ੍ਠੋ ਹੋਤਿ, ਯੋ ਉਣ੍ਹੇ ਓਤਾਪੇਨ੍ਤਸ੍ਸ ਪਗ੍ਘਰਤਿ, ਉਣ੍ਹਯਾਗੁਯਾ ਵਾ ਗਹਿਤਾਯ ਸਨ੍ਦਿਸ੍ਸਤਿ, ਤਾਦਿਸੇ ਪਤ੍ਤੇਪਿ ਪੁਨਦਿਵਸੇ ਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯਂ. ਯਂ ਪਨ ਭਿਕ੍ਖੁ ਨਿਰਪੇਕ੍ਖੋ ਸਾਮਣੇਰਾਨਂ ਪਰਿਚ੍ਚਜਿਤ੍ਵਾ ਤੇਹਿ ਨਿਹਿਤਂ ਲਭਿਤ੍ਵਾ ਭੁਞ੍ਜਤਿ, ਤਂ ਵਟ੍ਟਤਿ. ਸਯਂ ਪਟਿਗ੍ਗਹੇਤ੍ਵਾ ਅਪਰਿਚ੍ਚਤ੍ਤਮੇਵ ਹਿ ਦੁਤਿਯਦਿਵਸੇ ਕਪ੍ਪਿਯਭੋਜਨਂ ਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯਂ. ਅਕਪ੍ਪਿਯੇਸੁ ਪਨ ਮਨੁਸ੍ਸਮਂਸੇ ਥੁਲ੍ਲਚ੍ਚਯੇਨ ਸਦ੍ਧਿਂ ਪਾਚਿਤ੍ਤਿਯਂ, ਸੇਸੇਸੁ ਪਨ ਦੁਕ੍ਕਟੇਨ ਸਦ੍ਧਿਂ. ਯਾਮਕਾਲਿਕਂ ਸਤਿ ਪਚ੍ਚਯੇ ਅਜ੍ਝੋਹਰਤੋ ਪਾਚਿਤ੍ਤਿਯਂ, ਆਹਾਰਤ੍ਥਾਯ ਅਜ੍ਝੋਹਰਤੋ ਦੁਕ੍ਕਟੇਨ ਸਦ੍ਧਿਂ. ਯੋ ਪਨ ਪਵਾਰਿਤੋ ਹੁਤ੍ਵਾ ਅਨਤਿਰਿਤ੍ਤਕਤਂ ਅਜ੍ਝੋਹਰਤਿ, ਤਸ੍ਸ ਸਬ੍ਬਵਿਕਪ੍ਪੇਸੁ ਅਪਰਮ੍ਪਿ ਪਾਚਿਤ੍ਤਿਯਂ ਵਡ੍ਢਤਿ. ਸਚੇ ਵਿਕਾਲੇ ਅਜ੍ਝੋਹਰਤਿ, ਅਨਤਿਰਿਤ੍ਤਪਚ੍ਚਯਾ ਸਬ੍ਬਵਿਕਪ੍ਪੇਸੁ ਅਨਾਪਤ੍ਤਿ, ਸਤਿ ਪਚ੍ਚਯੇ ਵਿਕਾਲਪਚ੍ਚਯਾ ਯਾਮਕਾਲਿਕਾਦੀਸੁ ਚ ਅਨਾਪਤ੍ਤਿ. ਅਵਸੇਸੇਸੁ ਵਿਕਾਲਪਚ੍ਚਯਾ ਪਾਚਿਤ੍ਤਿਯਂ ਵਡ੍ਢਤਿਯੇਵ. ਭਿਕ੍ਖੁਸ੍ਸ ਪਨ ਸਨ੍ਨਿਧਿ ਭਿਕ੍ਖੁਨਿਯਾ ਵਟ੍ਟਤਿ, ਭਿਕ੍ਖੁਨਿਯਾ ਚ ਸਨ੍ਨਿਧਿ ਭਿਕ੍ਖੁਸ੍ਸ ਵਟ੍ਟਤਿ, ਭਿਕ੍ਖੁਨਿਕ੍ਖਨ੍ਧਕੇ (ਚੂਲ਼ਵ. ੪੨੧-੪੨੨) ਅਨੁਞ੍ਞਾਤਤ੍ਤਾ ਵਟ੍ਟਤੀਤਿ.

ਸਾਵਤ੍ਥਿਯਂ ਆਯਸ੍ਮਨ੍ਤਂ ਬੇਲਟ੍ਠਸੀਸਂ ਆਰਬ੍ਭ ਸਨ੍ਨਿਧਿਕਾਰਕਭੋਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਸਤ੍ਤਾਹਕਾਲਿਕ ਯਾਵਜੀਵਿਕਾਨਂ ਪਨ ਆਹਾਰਤ੍ਥਾਯ ਪਟਿਗ੍ਗਹਣੇ ਅਜ੍ਝੋਹਾਰੇ ਚ ਦੁਕ੍ਕਟਂ. ਯਥਾ ਚੇਤਾਨਿ ਆਹਾਰਤ੍ਥਾਯ ਨ ਕਪ੍ਪਨ੍ਤਿ, ਏਵਂ ਯਾਵਕਾਲਿਕਾਦੀਹਿ ਸਂਸਟ੍ਠਾਨਿਪਿ, ਵੁਤ੍ਤਞ੍ਹੇਤਂ ‘‘ਯਾਵਕਾਲਿਕੇਨ, ਭਿਕ੍ਖਵੇ, ਯਾਮਕਾਲਿਕਂ ਤਦਹੁਪਟਿਗ੍ਗਹਿਤਂ ਕਾਲੇ ਕਪ੍ਪਤਿ, ਵਿਕਾਲੇ ਨ ਕਪ੍ਪਤੀ’’ਤਿਆਦਿ (ਮਹਾਵ. ੩੦੫). ਤਸ੍ਮਾ ਸਚੇਪਿ ਤਂ ਤਂ ਤੇਨ ਤੇਨ ਸਦ੍ਧਿਂ ਸਂਸਟ੍ਠਂ ਲਭਤਿ, ਸਚੇ ਅਸਮ੍ਭਿਨ੍ਨਰਸਂ ਵਾ ਹੋਤਿ ਸੁਧੋਤਂ ਵਾ, ਯਥਾ ਇਤਰੇਨ ਸਂਸਗ੍ਗੋ ਨ ਪਞ੍ਞਾਯਤਿ, ਅਤ੍ਤਨੋ ਕਾਲਾਨੁਰੂਪੇਨ ਪਰਿਭੁਞ੍ਜਿਤੁਂ ਵਟ੍ਟਤਿ.

ਸਚੇ ਪਨ ਸਮ੍ਭਿਨ੍ਨਰਸਂ ਵਾ ਹੋਤਿ ਦੁਦ੍ਧੋਤਂ ਵਾ, ਨ ਵਟ੍ਟਤਿ. ਯਾਵਕਾਲਿਕਞ੍ਹਿ ਅਤ੍ਤਨਾ ਸਦ੍ਧਿਂ ਸਮ੍ਭਿਨ੍ਨਰਸਾਨਿ ਤੀਣਿਪਿ ਯਾਮਕਾਲਿਕਾਦੀਨਿ ਅਤ੍ਤਨੋ ਸਭਾਵਂ ਉਪਨੇਤਿ, ਯਾਮਕਾਲਿਕਂ ਦ੍ਵੇਪਿ ਸਤ੍ਤਾਹਕਾਲਿਕਾਦੀਨਿ ਅਤ੍ਤਨੋ ਸਭਾਵਂ ਉਪਨੇਤਿ, ਸਤ੍ਤਾਹਕਾਲਿਕਂ ਯਾਵਜੀਵਿਕਮੇਵ ਅਤ੍ਤਨੋ ਸਭਾਵਂ ਉਪਨੇਤਿ. ਤਸ੍ਮਾ ਤੇਨ ਤਦਹੁਪਟਿਗ੍ਗਹਿਤੇਨ ਸਦ੍ਧਿਂ ਤਦਹੁਪਟਿਗ੍ਗਹਿਤਂ ਵਾ ਪੁਰੇ ਪਟਿਗ੍ਗਹਿਤਂ ਵਾ ਯਾਵਜੀਵਿਕਂ ਸਤ੍ਤਾਹਂ ਕਪ੍ਪਤਿ, ਦ੍ਵੀਹਪ੍ਪਟਿਗ੍ਗਹਿਤੇਨ ਛਾਹਂ, ਤੀਹਪ੍ਪਟਿਗ੍ਗਹਿਤੇਨ ਪਞ੍ਚਾਹਂ…ਪੇ… ਸਤ੍ਤਾਹਪ੍ਪਟਿਗ੍ਗਹਿਤੇਨ ਤਦਹੇਵ ਕਪ੍ਪਤੀਤਿ ਵੇਦਿਤਬ੍ਬਂ. ਤਸ੍ਮਾਯੇਵ ਹਿ ‘‘ਸਤ੍ਤਾਹਕਾਲਿਕੇਨ, ਭਿਕ੍ਖਵੇ, ਯਾਵਜੀਵਿਕਂ ਤਦਹੁਪਟਿਗ੍ਗਹਿਤ’’ਨ੍ਤਿ ਅਵਤ੍ਵਾ ‘‘ਪਟਿਗ੍ਗਹਿਤਂ ਸਤ੍ਤਾਹਂ ਕਪ੍ਪਤੀ’’ਤਿ ਵੁਤ੍ਤਂ. ਕਾਲਯਾਮਸਤ੍ਤਾਹਾਤਿਕ੍ਕਮੇਸੁ ਚੇਤ੍ਥ ਵਿਕਾਲਭੋਜਨ ਸਨ੍ਨਿਧਿਭੇਸਜ੍ਜਸਿਕ੍ਖਾਪਦਾਨਂ ਵਸੇਨ ਆਪਤ੍ਤਿਯੋ ਵੇਦਿਤਬ੍ਬਾ, ਇਮੇਸੁ ਪਨ ਚਤੂਸੁ ਕਾਲਿਕੇਸੁ ਯਾਵਕਾਲਿਕਂ ਯਾਮਕਾਲਿਕਨ੍ਤਿ ਇਮਮੇਵ ਦ੍ਵਯਂ ਅਨ੍ਤੋਵੁਟ੍ਠਞ੍ਚੇਵ ਸਨ੍ਨਿਧਿਕਾਰਕਞ੍ਚ, ਸਤ੍ਤਾਹਕਾਲਿਕਂ ਯਾਵਜੀਵਿਕਞ੍ਚ ਅਕਪ੍ਪਿਯਕੁਟਿਯਂ ਨਿਕ੍ਖਿਪਿਤੁਮ੍ਪਿ ਵਟ੍ਟਤਿ, ਸਨ੍ਨਿਧਿਮ੍ਪਿ ਨ ਜਨੇਤਿ. ਅਕਪ੍ਪਿਯਕੁਟਿਯਂ ਅਨ੍ਤੋਵੁਟ੍ਠੇਨ ਪਨ ਤੇਨ ਸਦ੍ਧਿਂ ਇਤਰਦ੍ਵਯਂ ਤਦਹੁਪਟਿਗ੍ਗਹਿਤਮ੍ਪਿ ਨ ਵਟ੍ਟਤਿ, ਮੁਖਸਨ੍ਨਿਧਿ ਨਾਮ ਹੋਤਿ, ਮਹਾਪਚ੍ਚਰਿਯਂ ਪਨ ਅਨ੍ਤੋਵੁਟ੍ਠਂ ਹੋਤੀਤਿ ਵੁਤ੍ਤਂ. ਤਤ੍ਥ ਨਾਮਮਤ੍ਤਮੇਵ ਨਾਨਾਕਰਣਂ, ਆਪਤ੍ਤਿ ਪਨ ਦੁਕ੍ਕਟਮੇਵ. ਤਤ੍ਥ ਅਕਪ੍ਪਿਯਕੁਟਿ ਨਾਮ ਸਙ੍ਘਸ੍ਸ ਵਾ ਉਪਸਮ੍ਪਨ੍ਨਪੁਗ੍ਗਲਸ੍ਸ ਵਾ ਸਨ੍ਤਕਂ ਵਸਨਤ੍ਥਾਯ ਕਤਗੇਹਂ, ਤਤ੍ਥ ਸਹਸੇਯ੍ਯਪ੍ਪਹੋਨਕੇ ਪਦੇਸੇ ਵੁਟ੍ਠਂ ਯਾਵਕਾਲਿਕਞ੍ਚ ਯਾਮਕਾਲਿਕਞ੍ਚ ਸਙ੍ਘਿਕਂ ਵਾ ਉਪਸਮ੍ਪਨ੍ਨਪੁਗ੍ਗਲਸ੍ਸ ਵਾ ਸਨ੍ਤਕਂ ਅਨ੍ਤੋਵੁਟ੍ਠਂ ਨਾਮ ਹੋਤਿ, ਤਤ੍ਥ ਪਕ੍ਕਂ ਅਨ੍ਤੋਪਕ੍ਕਂ ਨਾਮ, ਯਤ੍ਥ ਕਤ੍ਥਚਿ ਪਨ ਸਯਂ ਪਕ੍ਕਂ ਸਾਮਂ ਪਕ੍ਕਂ ਨਾਮ, ਤਂ ਸਬ੍ਬਂ ਅਨਜ੍ਝੋਹਰਣੀਯਂ. ਤੇਨ ਤੇਨ ਸਦ੍ਧਿਂ ਸਂਸਟ੍ਠਮ੍ਪਿ ਤਂਗਤਿਕਮੇਵ, ਸਬ੍ਬਂ ਅਜ੍ਝੋਹਰਨ੍ਤਸ੍ਸ ਦੁਕ੍ਕਟਂ. ਤਸ੍ਮਾ ਅਨ੍ਤੋਵੁਟ੍ਠਅਨ੍ਤੋਪਕ੍ਕਮੋਚਨਤ੍ਥਂ ਭਗਵਤਾ ਚਤਸ੍ਸੋ ਕਪ੍ਪਿਯਭੂਮਿਯੋ (ਮਹਾਵ. ੨੯੫) ਅਨੁਞ੍ਞਾਤਾ, ਤਾਸਂ ਵਿਨਿਚ੍ਛਯੋ ਸਮਨ੍ਤਪਾਸਾਦਿਕਾਯਂ (ਮਹਾਵ. ਅਟ੍ਠ. ੨੯੫) ਵੁਤ੍ਤੋ. ਯਤ੍ਥ ਪਨੇਤਾ ਨ ਸਨ੍ਤਿ, ਤਤ੍ਥ ਅਨੁਪਸਮ੍ਪਨ੍ਨਸ੍ਸ ਸਨ੍ਤਕਂ ਕਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ. ਸਾਮਂ ਪਾਕਮ੍ਪਿ ਪੁਨਪਾਕਂ ਵਟ੍ਟਤਿ, ਅਸਨ੍ਨਿਧਿਕਾਰਕੇ ਸਨ੍ਨਿਧਿਕਾਰਕਸਞ੍ਞਿਨੋ, ਵੇਮਤਿਕਸ੍ਸ ਵਾ ਦੁਕ੍ਕਟਂ. ਅਸਨ੍ਨਿਧਿਕਾਰਕਸਞ੍ਞਿਨੋ, ਯਾਵਕਾਲਿਕਾਦੀਨਿ ਤੀਣਿ ਨਿਦਹਿਤ੍ਵਾ ਸਕਂ ਸਕਂ ਕਾਲਂ ਅਨਤਿਕ੍ਕਮਿਤ੍ਵਾ, ਯਾਵਜੀਵਿਕਂ ਸਦਾਪਿ ਸਤਿ ਪਚ੍ਚਯੇ ਪਰਿਭੁਞ੍ਜਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਆਮਿਸਂ, ਸਨ੍ਨਿਧਿਭਾਵੋ, ਤਸ੍ਸ ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੇਵਾਤਿ.

ਸਨ੍ਨਿਧਿਕਾਰਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.