੭. ਵਿਕਾਲਭੋਜਨਸਿਕ੍ਖਾਪਦਵਣ੍ਣਨਾ

ਸਤ੍ਤਮੇ ਵਿਕਾਲੇਤਿ ਵਿਗਤੇ ਕਾਲੇ, ਮਜ੍ਝਨ੍ਹਿਕਾਤਿਕ੍ਕਮਨਤੋ ਯਾਵ ਅਰੁਣੁਗ੍ਗਮਨਾਤਿ ਅਧਿਪ੍ਪਾਯੋ. ਤਸ੍ਮਾ ਯੋ ਭਿਕ੍ਖੁ ਏਤਸ੍ਮਿਂ ਅਨ੍ਤਰੇ ਯਂਕਿਞ੍ਚਿ ਵਨਮੂਲਫਲਂ ਉਪਾਦਾਯ ਆਮਂ ਵਾ ਪਕ੍ਕਂ ਵਾ ਆਮਿਸਸਙ੍ਖੇਪਗਤਂ ਖਾਦਨੀਯਂ ਵਾ ਭੋਜਨੀਯਂ ਵਾ ਅਜ੍ਝੋਹਰਣਤ੍ਥਾਯ ਪਟਿਗ੍ਗਣ੍ਹਾਤਿ, ਤਸ੍ਸ ਪਟਿਗ੍ਗਹਣੇ ਦੁਕ੍ਕਟਂ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਚਿਤ੍ਤਿਯਂ.

ਰਾਜਗਹੇ ਸਤ੍ਤਰਸਵਗ੍ਗਿਯੇ ਭਿਕ੍ਖੂ ਆਰਬ੍ਭ ਵਿਕਾਲੇ ਭੋਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਯਾਮਕਾਲਿਕਾਦੀਨਿ ਆਹਾਰਤ੍ਥਾਯ ਪਟਿਗ੍ਗਹਣਅਜ੍ਝੋਹਾਰੇਸੁ, ਕਾਲੇ ਵਿਕਾਲਸਞ੍ਞਿਸ੍ਸ, ਵੇਮਤਿਕਸ੍ਸ ਚ ਦੁਕ੍ਕਟਂ, ਕਾਲੇ ਕਾਲਸਞ੍ਞਿਸ੍ਸ ਯਾਮਕਾਲਿਕਾਦੀਨਿ ਸਤਿ ਪਚ੍ਚਯੇ ਪਰਿਭੁਞ੍ਜਨ੍ਤਸ੍ਸ ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਰੋਮਟ੍ਠਕਸ੍ਸ ਰੋਮਟ੍ਠਂ, ਨ ਚ ਭਿਕ੍ਖਵੇ ਬਹਿਮੁਖਦ੍ਵਾਰਾ ਨੀਹਰਿਤ੍ਵਾ ਅਜ੍ਝੋਹਰਿਤਬ੍ਬ’’ਨ੍ਤਿ (ਚੂਲ਼ਵ. ੨੭੩) ਅਨੁਞ੍ਞਾਤਨਯੇਨ ਰੋਮਟ੍ਠਕਸ੍ਸਾਪਿ ਅਨਾਪਤ੍ਤਿ. ਵਿਕਾਲਤਾ, ਯਾਵਕਾਲਿਕਤਾ, ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.

ਵਿਕਾਲਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.