੬. ਦੁਤਿਯਪਵਾਰਣਾਸਿਕ੍ਖਾਪਦਵਣ੍ਣਨਾ

ਛਟ੍ਠੇ ਅਭਿਹਟ੍ਠੁਂ ਪਵਾਰੇਯ੍ਯਾਤਿ ਅਭਿਹਰਿਤ੍ਵਾ ‘‘ਹਨ੍ਦ, ਭਿਕ੍ਖੁ ਖਾਦ ਵਾ ਭੁਞ੍ਜ ਵਾ’’ਤਿ ਏਵਂ ਪਵਾਰੇਯ੍ਯ. ਜਾਨਨ੍ਤਿ ਸੁਤ੍ਵਾ ਵਾ ਦਿਸ੍ਵਾ ਵਾ ਤਸ੍ਸ ਪਵਾਰਿਤਭਾਵਂ ਜਾਨਨ੍ਤੋ. ਆਸਾਦਨਾਪੇਕ੍ਖੋਤਿ ਆਸਾਦਨਂ ਚੋਦਨਂ ਮਙ੍ਕੁਕਰਣਭਾਵਂ ਅਪੇਕ੍ਖਮਾਨੋ. ਭੁਤ੍ਤਸ੍ਮਿਂ ਪਾਚਿਤ੍ਤਿਯਨ੍ਤਿ ਏਤ੍ਥ ਅਭਿਹਾਰੇ ਤਾਵ ਦੁਕ੍ਕਟਂ, ਸਚੇ ਸੋ ਤਂ ਗਣ੍ਹਾਤਿ, ਪੁਨ ਅਭਿਹਾਰਕਸ੍ਸ ਦੁਕ੍ਕਟਂ, ਤਸ੍ਮਿਂ ਪਨ ਭੁਞ੍ਜਨ੍ਤੇ ਅਭਿਹਾਰਕਸ੍ਸ ਤਸ੍ਸ ਅਜ੍ਝੋਹਾਰੇ ਅਜ੍ਝੋਹਾਰੇ ਦੁਕ੍ਕਟਂ, ਭੋਜਨਪਰਿਯੋਸਾਨੇ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਅਨਤਿਰਿਤ੍ਤੇਨ ਭੋਜਨੇਨ ਅਭਿਹਟ੍ਠੁਂ ਪਵਾਰਣਾਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਪਵਾਰਿਤੇ ਪਵਾਰਿਤਸਞ੍ਞਿਨੋ ਪਾਚਿਤ੍ਤਿਯਂ. ਵੇਮਤਿਕਸ੍ਸ, ਯਾਮਕਾਲਿਕਾਦੀਨਿ ਆਹਾਰਤ੍ਥਾਯ ਅਭਿਹਰਨ੍ਤਸ੍ਸ, ਤੇਸਞ੍ਚ ਪਟਿਗ੍ਗਹਣਅਜ੍ਝੋਹਾਰੇਸੁ, ਅਪ੍ਪਵਾਰਿਤੇ ਚ ਪਵਾਰਿਤਸਞ੍ਞਿਨੋ, ਵੇਮਤਿਕਸ੍ਸ ਚ ਦੁਕ੍ਕਟਂ. ਅਪ੍ਪਵਾਰਿਤਸਞ੍ਞਿਸ੍ਸ ਪਨ, ਯੋ ਚ ਅਤਿਰਿਤ੍ਤਂ ਕਾਰਾਪੇਤ੍ਵਾ ਦੇਤਿ, ‘‘ਕਾਰਾਪੇਤ੍ਵਾ ਵਾ ਭੁਞ੍ਜਾਹੀ’’ਤਿ ਦੇਤਿ, ਯੋ ਵਾ ‘‘ਅਞ੍ਞਸ੍ਸਤ੍ਥਾਯ ਹਰਨ੍ਤੋ ਗਚ੍ਛਾਹੀ’’ਤਿ ਦੇਤਿ, ਯੋ ਚ ਯਾਮਕਾਲਿਕਾਦੀਨਿ ‘‘ਸਤਿ ਪਚ੍ਚਯੇ ਪਰਿਭੁਞ੍ਜਾਹੀ’’ਤਿ ਦੇਤਿ, ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਪਵਾਰਿਤਤਾ, ਪਵਾਰਿਤਸਞ੍ਞਿਤਾ, ਆਸਾਦਨਾਪੇਕ੍ਖਤਾ, ਅਨਤਿਰਿਤ੍ਤੇਨ ਅਭਿਹਟ੍ਠੁਂ ਪਵਾਰਣਤਾ, ਭੋਜਨਪਰਿਯੋਸਾਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਨ੍ਤਿ.

ਦੁਤਿਯਪਵਾਰਣਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.