੩. ਤਤਿਯਪਾਰਾਜਿਕਵਣ੍ਣਨਾ

ਤਤਿਯੇ ਸਞ੍ਚਿਚ੍ਚਾਤਿ ਸਂਚੇਤੇਤ੍ਵਾ ਸਦ੍ਧਿਂ ਚੇਤੇਤ੍ਵਾ. ‘‘ਪਾਣੋ’’ਤਿਸਞ੍ਞਾਯ ਸਦ੍ਧਿਂਯੇਵ ‘‘ਵਧਾਮਿ ਨ’’ਨ੍ਤਿ ਵਧਕਚੇਤਨਾਯ ਚੇਤੇਤ੍ਵਾ ਪਕਪ੍ਪੇਤ੍ਵਾ. ਮਨੁਸ੍ਸਵਿਗ੍ਗਹਨ੍ਤਿ ਕਲਲਤੋ ਪਟ੍ਠਾਯ ਜੀਵਮਾਨਕਮਨੁਸ੍ਸਜਾਤਿਕਸਰੀਰਂ. ਜੀਵਿਤਾ ਵੋਰੋਪੇਯ੍ਯਾਤਿ ਕਲਲਕਾਲੇਪਿ ਤਾਪਨਮਦ੍ਦਨੇਹਿ ਵਾ ਭੇਸਜ੍ਜਸਮ੍ਪਦਾਨੇਨ ਵਾ ਤਤੋ ਵਾ ਉਦ੍ਧਮ੍ਪਿ ਤਦਨੁਰੂਪੇਨ ਉਪਕ੍ਕਮੇਨ ਜੀਵਿਤਾ ਵਿਯੋਜੇਯ੍ਯ. ਇਮਸ੍ਸ ਪਨਤ੍ਥਸ੍ਸ ਆਵਿਭਾਵਤ੍ਥਂ ਪਾਣੋ ਵੇਦਿਤਬ੍ਬੋ, ਪਾਣਾਤਿਪਾਤੋ ਵੇਦਿਤਬ੍ਬੋ, ਪਾਣਾਤਿਪਾਤੀ ਵੇਦਿਤਬ੍ਬੋ, ਪਾਣਾਤਿਪਾਤਸ੍ਸ ਪਯੋਗੋ ਵੇਦਿਤਬ੍ਬੋ. ਤਤ੍ਥ ਪਾਣੋਤਿ ਵੋਹਾਰਤੋ ਸਤ੍ਤੋ, ਪਰਮਤ੍ਥਤੋ ਜੀਵਿਤਿਨ੍ਦ੍ਰਿਯਂ. ਪਾਣਾਤਿਪਾਤੋਤਿ ਯਾਯ ਚੇਤਨਾਯ ਜੀਵਿਤਿਨ੍ਦ੍ਰਿਯੁਪਚ੍ਛੇਦਕਪਯੋਗਂ ਸਮੁਟ੍ਠਾਪੇਤਿ, ਸਾ ਚੇਤਨਾ. ਪਾਣਾਤਿਪਾਤੀਤਿ ਵੁਤ੍ਤਚੇਤਨਾਯ ਸਮਙ੍ਗਿਪੁਗ੍ਗਲੋ. ਪਾਣਾਤਿਪਾਤਸ੍ਸ ਪਯੋਗੋਤਿ ਪਾਣਾਤਿਪਾਤਸ੍ਸ ਛ ਪਯੋਗਾ ਸਾਹਤ੍ਥਿਕੋ ਨਿਸ੍ਸਗ੍ਗਿਯੋ ਆਣਤ੍ਤਿਕੋ ਥਾਵਰੋ ਵਿਜ੍ਜਾਮਯੋ ਇਦ੍ਧਿਮਯੋਤਿ. ਤਤ੍ਥ ਸਾਹਤ੍ਥਿਕੋਤਿ ਸਯਂ ਮਾਰੇਨ੍ਤਸ੍ਸ ਕਾਯੇਨ ਵਾ ਕਾਯਪ੍ਪਟਿਬਦ੍ਧੇਨ ਵਾ ਪਹਰਣਂ. ਨਿਸ੍ਸਗ੍ਗਿਯੋਤਿ ਦੂਰੇ ਠਿਤਂ ਮਾਰੇਤੁਕਾਮਸ੍ਸ ਕਾਯੇਨ ਵਾ ਕਾਯਪ੍ਪਟਿਬਦ੍ਧੇਨ ਵਾ ਉਸੁਸਤ੍ਤਿਯਨ੍ਤਪਾਸਾਣਾਦੀਨਂ ਨਿਸ੍ਸਜ੍ਜਨਂ. ਤਤ੍ਥ ਏਕੇਕੋ ਉਦ੍ਦਿਸ੍ਸਾਨੁਦ੍ਦਿਸ੍ਸਭੇਦਤੋ ਦੁਵਿਧੋ. ਤਤ੍ਥ ਉਦ੍ਦਿਸ੍ਸਕੇ ਯਂ ਉਦ੍ਦਿਸ੍ਸ ਪਹਰਤਿ, ਤਸ੍ਸੇਵ ਮਰਣੇਨ ਕਮ੍ਮਬਦ੍ਧੋ. ‘‘ਯੋ ਕੋਚਿ ਮਰਤੂ’’ਤਿ ਏਵਂ ਅਨੁਦ੍ਦਿਸ੍ਸਕੇ ਪਹਾਰਪ੍ਪਚ੍ਚਯਾ ਯਸ੍ਸ ਕਸ੍ਸਚਿ ਮਰਣੇਨ ਕਮ੍ਮਬਦ੍ਧੋ. ਉਭਯਤ੍ਥਾਪਿ ਚ ਪਹਰਿਤਮਤ੍ਤੇ ਵਾ ਮਰਤੁ, ਪਚ੍ਛਾ ਵਾ ਤੇਨੇਵ ਰੋਗੇਨ, ਪਹਰਿਤਕ੍ਖਣੇਯੇਵ ਕਮ੍ਮਬਦ੍ਧੋ. ਆਣਤ੍ਤਿਕੋਤਿ ‘‘ਅਸੁਕਂ ਨਾਮ ਮਾਰੇਹੀ’’ਤਿ ਅਞ੍ਞਂ ਆਣਾਪੇਨ੍ਤਸ੍ਸ ਆਣਾਪਨਂ.

ਤਤ੍ਥ –

ਵਤ੍ਥੁ ਕਾਲੋ ਚ ਓਕਾਸੋ, ਆਵੁਧਂ ਇਰਿਯਾਪਥੋ;

ਕ੍ਰਿਯਾਵਿਸੇਸੋਤਿ ਇਮੇ, ਛ ਆਣਤ੍ਤਿ ਨਿਯਾਮਕਾ.

ਤਤ੍ਥ ਵਤ੍ਥੂਤਿ ਪੁਗ੍ਗਲੋ. ਯਞ੍ਹਿ ਪੁਗ੍ਗਲਂ ‘‘ਮਾਰੇਹੀ’’ਤਿ ਆਣਤ੍ਤੋ ਸਚੇ ਤਮੇਵ ਮਾਰੇਤਿ, ਆਣਾਪਕਸ੍ਸ ਆਪਤ੍ਤਿ. ਅਥ ਅਞ੍ਞਂ ਮਾਰੇਤਿ, ਤਂਮਞ੍ਞਮਾਨੋ ਵਾ ਅਞ੍ਞਂ ਮਾਰੇਤਿ, ਆਣਾਪਕੋ ਮੁਚ੍ਚਤਿ. ‘‘ਇਮਂ ਮਾਰੇਹੀ’’ਤਿ ਆਣਤ੍ਤੇ ਪਨ ਆਣਾਪਕਸ੍ਸ ਦੁਕ੍ਕਟਂ. ਕਾਲੋਤਿ ਪੁਰੇਭਤ੍ਤਾਦਿਕਾਲੋ. ਸਚੇ ਹਿ ‘‘ਪੁਰੇਭਤ੍ਤਂ ਮਾਰੇਹੀ’’ਤਿ ਆਣਤ੍ਤੋ ਪੁਰੇਭਤ੍ਤਮੇਵ ਮਾਰੇਤਿ, ਆਣਾਪਕਸ੍ਸ ਆਪਤ੍ਤਿ. ਅਥ ਯਂ ਪੁਰੇਭਤ੍ਤਂ ਨਿਯਾਮਿਤਂ, ਤਤੋ ਪਚ੍ਛਾ ਵਾ ਪੁਰੇ ਵਾ ਮਾਰੇਤਿ, ਆਣਾਪਕੋ ਮੁਚ੍ਚਤਿ. ਇਮਿਨਾ ਨਯੇਨ ਸਬ੍ਬਤ੍ਥ ਵਿਨਿਚ੍ਛਯੋ ਵੇਦਿਤਬ੍ਬੋ. ਥਾਵਰੋਤਿ ਅਸਂਹਾਰਿਮੇਨ ਉਪਕਰਣੇਨ ਮਾਰੇਤੁਕਾਮਸ੍ਸ ਓਪਾਤਕ੍ਖਣਨਂ ਅਪਸ੍ਸੇਨਸਂਵਿਧਾਨਂ ਅਸਿਆਦੀਨਂ ਉਪਨਿਕ੍ਖਿਪਨਂ ਤਲ਼ਾਕਾਦੀਸੁ ਵਿਸਸਮ੍ਪਯੋਜਨਂ ਰੂਪੂਪਹਾਰੋਤਿਏਵਮਾਦਿ. ਵੁਤ੍ਤਨਯੇਨੇਵ ਚੇਤ੍ਥਾਪਿ ਉਦ੍ਦਿਸ੍ਸਾਨੁਦ੍ਦਿਸ੍ਸਭੇਦੋ ਵੇਦਿਤਬ੍ਬੋ. ਵਿਜ੍ਜਾਮਯੋਤਿ ਮਾਰਣਤ੍ਥਂ ਵਿਜ੍ਜਾਪਰਿਜਪ੍ਪਨਂ. ਇਦ੍ਧਿਮਯੋਤਿ ਕਮ੍ਮਵਿਪਾਕਜਾਯ ਇਦ੍ਧਿਯਾ ਪਯੋਜਨਂ.

ਸਤ੍ਥਹਾਰਕਂ ਵਾਸ੍ਸ ਪਰਿਯੇਸੇਯ੍ਯਾਤਿ ਏਤ੍ਥ ਹਰਤੀਤਿ ਹਾਰਕਂ, ਕਿਂ ਹਰਤਿ? ਜੀਵਿਤਂ. ਅਥ ਵਾ ਹਰਿਤਬ੍ਬਨ੍ਤਿ ਹਾਰਕਂ, ਉਪਨਿਕ੍ਖਿਪਿਤਬ੍ਬਨ੍ਤਿ ਅਤ੍ਥੋ. ਸਤ੍ਥਞ੍ਚ ਤਂ ਹਾਰਕਞ੍ਚਾਤਿ ਸਤ੍ਥਹਾਰਕਂ. ਅਸ੍ਸਾਤਿ ਮਨੁਸ੍ਸਵਿਗ੍ਗਹਸ੍ਸ. ਪਰਿਯੇਸੇਯ੍ਯਾਤਿ ਯਥਾ ਲਭਤਿ, ਤਥਾ ਕਰੇਯ੍ਯ, ਉਪਨਿਕ੍ਖਿਪੇਯ੍ਯਾਤਿ ਅਤ੍ਥੋ. ਏਤੇਨ ਥਾਵਰਪਯੋਗਂ ਦਸ੍ਸੇਤਿ. ਇਤਰਥਾ ਹਿ ਪਰਿਯਿਟ੍ਠਿਮਤ੍ਤੇਯੇਵ ਪਾਰਾਜਿਕੋ ਭਵੇਯ੍ਯ, ਨ ਚੇਤਂ ਯੁਤ੍ਤਂ. ਪਦਭਾਜਨੇ ਪਨਸ੍ਸ ਬ੍ਯਞ੍ਜਨਂ ਅਨਾਦਿਯਿਤ੍ਵਾ ਯਂ ਏਤ੍ਥ ਥਾਵਰਪਯੋਗਸਙ੍ਗਹਿਤਂ ਸਤ੍ਥਂ, ਤਦੇਵ ਦਸ੍ਸੇਤੁਂ ‘‘ਅਸਿਂ ਵਾ’’ਤਿਆਦਿ ਵੁਤ੍ਤਂ. ਮਰਣਵਣ੍ਣਂ ਵਾ ਸਂਵਣ੍ਣੇਯ੍ਯਾਤਿ ਵਾਚਾਯ ਵਾ ਤਾਲਪਣ੍ਣਾਦੀਸੁ ਲਿਖਿਤ੍ਵਾ ਵਾ ‘‘ਯੋ ਏਵਂ ਮਰਤਿ, ਸੋ ਧਨਂ ਵਾ ਲਭਤੀ’’ਤਿਆਦਿਨਾ ਨਯੇਨ ਮਰਣੇ ਗੁਣਂ ਪਕਾਸੇਯ੍ਯ. ਏਤੇਨ ਯਥਾ ‘‘ਅਦਿਨ੍ਨਾਦਾਨੇ ਆਦਿਯੇਯ੍ਯਾ’’ਤਿ ਵੁਤ੍ਤਤ੍ਤਾ ਪਰਿਯਾਯਕਥਾਯ ਮੁਚ੍ਚਤਿ, ਨਯਿਧ, ਏਵਂ ‘‘ਸਂਵਣ੍ਣੇਯ੍ਯਾ’’ਤਿ ਵਚਨਤੋ ਪਨ ਇਧ ਪਰਿਯਾਯਕਥਾਯਪਿ ਨ ਮੁਚ੍ਚਤੀਤਿ ਅਯਮਤ੍ਥੋ ਵੇਦਿਤਬ੍ਬੋ. ਮਰਣਾਯ ਵਾ ਸਮਾਦਪੇਯ੍ਯਾਤਿ ‘‘ਸਤ੍ਥਂ ਵਾ ਆਹਰਾ’’ਤਿਆਦਿਨਾ (ਪਾਰਾ. ੧੭੨) ਨਯੇਨ ਮਰਣਤ੍ਥਾਯ ਉਪਾਯਂ ਗਾਹਾਪੇਯ੍ਯ. ਏਤੇਨ ਆਣਤ੍ਤਿਕਪ੍ਪਯੋਗਂ ਦਸ੍ਸੇਤਿ. ਅਮ੍ਭੋ ਪੁਰਿਸਾਤਿ ਆਲਪਨਮੇਤਂ. ਕਿਂ ਤੁਯ੍ਹਿਮਿਨਾਤਿਆਦਿ ਸਂਵਣ੍ਣਨਾਕਾਰਨਿਦਸ੍ਸਨਂ. ਇਤਿ ਚਿਤ੍ਤਮਨੋਤਿ ਇਤਿ ਚਿਤ੍ਤੋ ਇਤਿ ਮਨੋ. ‘‘ਮਤਂ ਤੇ ਜੀਵਿਤਾ ਸੇਯ੍ਯੋ’’ਤਿਏਤ੍ਥ ਵੁਤ੍ਤਮਰਣਚਿਤ੍ਤੋ ਮਰਣਮਨੋਤਿ ਅਤ੍ਥੋ. ਏਤ੍ਥ ਚ ‘‘ਮਨੋ’’ਤਿਇਦਂ ਚਿਤ੍ਤਸ੍ਸ ਅਤ੍ਥਦੀਪਨਤ੍ਥਂ ਵੁਤ੍ਤਂ. ਤੇਨੇਵਸ੍ਸ ਪਦਭਾਜਨੇ ‘‘ਯਂ ਚਿਤ੍ਤਂ ਤਂ ਮਨੋ’’ਤਿ (ਪਾਰਾ. ੧੭੨) ਆਹ. ਚਿਤ੍ਤਸਙ੍ਕਪ੍ਪੋਤਿ ਵਿਚਿਤ੍ਤਸਙ੍ਕਪ੍ਪੋ. ਏਤ੍ਥਾਪਿ ਇਤਿ-ਸਦ੍ਦੋ ਆਹਰਿਤਬ੍ਬੋ. ‘‘ਸਙ੍ਕਪ੍ਪੋ’’ਤਿ ਚ ਸਂਵਿਦਹਨਮਤ੍ਤਸ੍ਸੇਤਂ ਨਾਮਂ, ਨ ਵਿਤਕ੍ਕਸ੍ਸੇਵ. ਤਞ੍ਚ ਸਂਵਿਦਹਨਂ ਇਮਸ੍ਮਿਂ ਅਤ੍ਥੇ ਸਞ੍ਞਾਚੇਤਨਾਧਿਪ੍ਪਾਯੇਹਿ ਸਙ੍ਗਹਂ ਗਚ੍ਛਤਿ, ਤਸ੍ਮਾ ‘‘ਇਤਿ ਚਿਤ੍ਤਸਙ੍ਕਪ੍ਪੋ’’ਤਿ ‘‘ਮਤਂ ਤੇ ਜੀਵਿਤਾ ਸੇਯ੍ਯੋ’’ਤਿਏਤ੍ਥ ਵੁਤ੍ਤਮਰਣਸਞ੍ਞੀ ਮਰਣਚੇਤਨੋ ਮਰਣਾਧਿਪ੍ਪਾਯੋਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਪਦਭਾਜਨੇਪਿ ਹਿ ਅਯਮੇਵ ਨਯੋ ਦਸ੍ਸਿਤੋ. ਏਤੇਨ ਮਰਣਚਿਤ੍ਤਾਦੀਹਿ ਵਿਨਾ ‘‘ਏਕਾਹਂ ਜੀਵਿਤਂ ਸੇਯ੍ਯੋ, ਵੀਰਿਯਮਾਰਭਤੋ ਦਲ਼੍ਹ’’ਨ੍ਤਿਆਦਿਨਾ (ਧ. ਪ. ੧੧੨) ਨਯੇਨ ਧਮ੍ਮਂ ਭਾਸਨ੍ਤਸ੍ਸ ਸਂਵਣ੍ਣਨਾ ਨਾਮ ਨ ਹੋਤੀਤਿ ਦਸ੍ਸੇਤਿ. ਅਨੇਕਪਰਿਯਾਯੇਨਾਤਿ ਨਾਨਪ੍ਪਕਾਰੇਨ ਉਚ੍ਚਾਵਚੇਨ ਕਾਰਣੇਨ. ਪੁਨ ਮਰਣਵਣ੍ਣਨ੍ਤਿਆਦਿ ਨਿਗਮਨਵਚਨਂ. ਪਾਰਾਜਿਕੋ ਹੋਤੀਤਿ ਤਙ੍ਖਣੂਪਪਨ੍ਨਮ੍ਪਿ ਮਨੁਸ੍ਸਵਿਗ੍ਗਹਂ ਵੁਤ੍ਤਨਯੇਨ ਜੀਵਿਤਾ ਵੋਰੋਪੇਨ੍ਤੋ ਪਾਰਾਜਿਕੋ ਹੋਤੀਤਿ.

ਵੇਸਾਲਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਞ੍ਞਮਞ੍ਞਂ ਜੀਵਿਤਾ ਵੋਰੋਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਮਰਣਵਣ੍ਣਂ ਵਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ਮਾਰਣਤ੍ਥਾਯ ਓਪਾਤਕ੍ਖਣਨਾਦੀਸੁ ਦੁਕ੍ਕਟਂ, ਅਨੋਦਿਸ੍ਸ ਖਤੇ ਓਪਾਤੇ ਯਸ੍ਸ ਕਸ੍ਸਚਿ ਪਤਨੇਪਿ ਦੁਕ੍ਕਟਂ, ਯਕ੍ਖਪੇਤਤਿਰਚ੍ਛਾਨਗਤਮਨੁਸ੍ਸਵਿਗ੍ਗਹਾਨਂ ਤਿਰਚ੍ਛਾਨਗਤਸ੍ਸ ਚ ਦੁਕ੍ਖੁਪ੍ਪਤ੍ਤਿਯਂ ਦੁਕ੍ਕਟਮੇਵ, ਮਨੁਸ੍ਸਜਾਤਿਕਸ੍ਸ ਦੁਕ੍ਖੁਪ੍ਪਤ੍ਤਿਯਂ ਥੁਲ੍ਲਚ੍ਚਯਂ, ਤਥਾ ਯਕ੍ਖਾਦੀਨਂ ਮਰਣੇ, ਤਿਰਚ੍ਛਾਨਗਤਮਰਣੇ ਪਨ ਪਾਚਿਤ੍ਤਿਯਂ, ਮਨੁਸ੍ਸਮਰਣੇ ਪਾਰਾਜਿਕਨ੍ਤਿ. ਇਮਿਨਾ ਨਯੇਨ ਸਬ੍ਬਤ੍ਥ ਪਯੋਗਭੇਦਵਸੇਨ ਆਪਤ੍ਤਿਭੇਦੋ ਵੇਦਿਤਬ੍ਬੋ. ਅਸਞ੍ਚਿਚ੍ਚ ਮਾਰੇਨ੍ਤਸ੍ਸ ਅਜਾਨਨ੍ਤਸ੍ਸ ਨਮਰਣਾਧਿਪ੍ਪਾਯਸ੍ਸ ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਤਤ੍ਥ ਅਸਞ੍ਚਿਚ੍ਚਾਤਿ ‘‘ਇਮਿਨਾ ਉਪਕ੍ਕਮੇਨ ਇਮਂ ਮਾਰੇਮੀ’’ਤਿ ਅਚੇਤੇਤ੍ਵਾ ਕਤੇਨ ਉਪਕ੍ਕਮੇਨ ਮੁਸਲੁਸ੍ਸਾਪਨਵਤ੍ਥੁਸ੍ਮਿਂ (ਪਾਰਾ. ੧੮੦ ਆਦਯੋ) ਵਿਯ ਪਰੇ ਮਤੇਪਿ ਅਨਾਪਤ੍ਤਿ. ਅਜਾਨਨ੍ਤਸ੍ਸਾਤਿ ‘‘ਇਮਿਨਾ ਅਯਂ ਮਰਿਸ੍ਸਤੀ’’ਤਿ ਅਜਾਨਨ੍ਤਸ੍ਸ ਉਪਕ੍ਕਮੇਨ ਵਿਸਗਤਪਿਣ੍ਡਪਾਤਵਤ੍ਥੁਸ੍ਮਿਂ (ਪਾਰਾ. ੧੮੧) ਵਿਯ ਪਰੇ ਮਤੇਪਿ ਅਨਾਪਤ੍ਤਿ. ਨਮਰਣਾਧਿਪ੍ਪਾਯਸ੍ਸਾਤਿ ਮਰਣਂ ਅਨਿਚ੍ਛਨ੍ਤਸ੍ਸ ਉਪਕ੍ਕਮੇਨ ਭੇਸਜ੍ਜਵਤ੍ਥੁਸ੍ਮਿਂ (ਪਾਰਾ. ੧੮੭) ਵਿਯ ਪਰੇ ਮਤੇਪਿ ਅਨਾਪਤ੍ਤਿ. ਏਵਂ ਅਸਞ੍ਚਿਚ੍ਚਾਤਿਆਦੀਸੁ ਵਿਨਿਚ੍ਛਯੋ ਵੇਦਿਤਬ੍ਬੋ. ਸੀਲਵਿਪਤ੍ਤਿ, ਮਨੁਸ੍ਸਜਾਤਿਕਪਾਣੋ, ਪਾਣਸਞ੍ਞਿਤਾ, ਵਧਕਚਿਤ੍ਤਂ, ਉਪਕ੍ਕਮੋ, ਤੇਨ ਮਰਣਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਅਦਿਨ੍ਨਾਦਾਨਸਮਉਟ੍ਠਾਨਂ, ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਤਤਿਯਪਾਰਾਜਿਕਵਣ੍ਣਨਾ ਨਿਟ੍ਠਿਤਾ.