੯. ਛਤ੍ਤੁਪਾਹਨਵਗ੍ਗੋ
੧. ਛਤ੍ਤੁਪਾਹਨਸਿਕ੍ਖਾਪਦਵਣ੍ਣਨਾ
ਛਤ੍ਤਵਗ੍ਗਸ੍ਸ ਪਠਮੇ ਛਤ੍ਤੁਪਾਹਨਨ੍ਤਿ ਪਦਭਾਜਨੇ (ਪਾਚਿ. ੧੧੭੮-੧੧੮੨) ਵੁਤ੍ਤਲਕ੍ਖਣਂ ਛਤ੍ਤਞ੍ਚ ਉਪਾਹਨਾਯੋ ਚ. ਧਾਰੇਯ੍ਯਾਤਿ ਪਰਿਭੋਗਵਸੇਨ ਮਗ੍ਗਗਮਨੇ ਏਕਪ੍ਪਯੋਗੇਨੇਵ ਦਿਵਸਮ੍ਪਿ ਧਾਰੇਨ੍ਤਿਯਾ ਏਕਾ ਆਪਤ੍ਤਿ. ਸਚੇ ਪਨ ਤਾਦਿਸਂ ਠਾਨਂ ਪਤ੍ਵਾ ਛਤ੍ਤਮ੍ਪਿ ਅਪਨਾਮੇਤ੍ਵਾ ਉਪਾਹਨਾਪਿ ਓਮੁਞ੍ਚਿਤ੍ਵਾ ਪੁਨਪ੍ਪੁਨਂ ਧਾਰੇਤਿ, ਪਯੋਗਗਣਨਾਯ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਆਰਬ੍ਭ ਛਤ੍ਤੁਪਾਹਨਧਾਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਗਿਲਾਨਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਛਤ੍ਤਸ੍ਸੇਵ ਉਪਾਹਨਾਨਂਯੇਵ ਵਾ ਧਾਰਣੇ ਦੁਕ੍ਕਟਂ, ਅਗਿਲਾਨਾਯ ਤਿਕਪਾਚਿਤ੍ਤਿਯਂ, ਗਿਲਾਨਾਯ ਦ੍ਵਿਕਦੁਕ੍ਕਟਂ. ਗਿਲਾਨਸਞ੍ਞਾਯ ਪਨ, ਆਰਾਮੇ ਆਰਾਮੂਪਚਾਰੇ ਧਾਰੇਨ੍ਤਿਯਾ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਉਭਿਨ੍ਨਂ ਧਾਰਣਂ, ਅਨੁਞ੍ਞਾਤਕਾਰਣਾਭਾਵੋਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.
ਛਤ੍ਤੁਪਾਹਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਯਾਨਸਿਕ੍ਖਾਪਦਵਣ੍ਣਨਾ
ਦੁਤਿਯੇ ਯਾਨੇਨਾਤਿ ਵਯ੍ਹਾਦਿਨਾ. ਏਤ੍ਥਾਪਿ ਓਰੋਹਿਤ੍ਵਾ ਪੁਨਪ੍ਪੁਨਂ ਅਭਿਰੁਹਨ੍ਤਿਯਾ ਪਯੋਗਗਣਨਾਯ ਪਾਚਿਤ੍ਤਿਯਂ. ਅਨਾਪਤ੍ਤਿਯਂ ‘‘ਆਰਾਮੇ ਆਰਾਮੂਪਚਾਰੇ’’ਤਿ ਨਤ੍ਥਿ, ਸੇਸਂ ਪਠਮੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.
ਯਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਸਙ੍ਘਾਣਿਸਿਕ੍ਖਾਪਦਵਣ੍ਣਨਾ
ਤਤਿਯੇ ਸਙ੍ਘਾਣਿਨ੍ਤਿ ਯਂਕਿਞ੍ਚਿ ਕਟੂਪਗਂ. ਧਾਰੇਯ੍ਯਾਤਿ ਕਟਿਯਂ ਪਟਿਮੁਞ੍ਚੇਯ੍ਯ. ਏਤ੍ਥਾਪਿ ਓਮੁਞ੍ਚਿਤ੍ਵਾ ਓਮੁਞ੍ਚਿਤ੍ਵਾ ਧਾਰੇਨ੍ਤਿਯਾ ਪਯੋਗਗਣਨਾਯ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਸਙ੍ਘਾਣਿਂ ਧਾਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ. ਆਬਾਧਪਚ੍ਚਯਾ ਕਟਿਸੁਤ੍ਤਂ ਧਾਰੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ, ਇਦਂ ਪਨ ਅਕੁਸਲਚਿਤ੍ਤਨ੍ਤਿ.
ਸਙ੍ਘਾਣਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਇਤ੍ਥਾਲਙ੍ਕਾਰਸਿਕ੍ਖਾਪਦਵਣ੍ਣਨਾ
ਚਤੁਤ੍ਥੇ ਇਤ੍ਥਾਲਙ੍ਕਾਰਨ੍ਤਿ ਸੀਸੂਪਗਾਦੀਸੁ ਅਞ੍ਞਤਰਂ ਯਂਕਿਞ੍ਚਿ ਪਿਲ਼ਨ੍ਧਨਂ. ਇਧ ਤਸ੍ਸ ਤਸ੍ਸ ਵਸੇਨ ਵਤ੍ਥੁਗਣਨਾਯ ਆਪਤ੍ਤਿ ਵੇਦਿਤਬ੍ਬਾ.
ਸਾਵਤ੍ਥਿਯਂ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਆਰਬ੍ਭ ਇਤ੍ਥਾਲਙ੍ਕਾਰਂ ਧਾਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਆਬਾਧਪਚ੍ਚਯਾ ਕਿਞ੍ਚਿਦੇਵ ਧਾਰੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸੇਸਂ ਵੁਤ੍ਤਸਦਿਸਮੇਵਾਤਿ.
ਇਤ੍ਥਾਲਙ੍ਕਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਗਨ੍ਧਵਣ੍ਣਕਸਿਕ੍ਖਾਪਦਵਣ੍ਣਨਾ
ਪਞ੍ਚਮੇ ਗਨ੍ਧਵਣ੍ਣਕੇਨਾਤਿ ਯੇਨਕੇਨਚਿ ਗਨ੍ਧੇਨ ਚ ਵਣ੍ਣਕੇਨ ਚ. ਇਧ ਗਨ੍ਧਾਦਿਯੋਜਨਤੋ ਪਟ੍ਠਾਯ ਪੁਬ੍ਬਪਯੋਗੇ ਦੁਕ੍ਕਟਂ, ਨਹਾਨਪਰਿਯੋਸਾਨੇ ਪਾਚਿਤ੍ਤਿਯਂ. ਆਬਾਧਪਚ੍ਚਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸੇਸਂ ਚਤੁਤ੍ਥਸਦਿਸਮੇਵਾਤਿ.
ਗਨ੍ਧਵਣ੍ਣਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਵਾਸਿਤਕਸਿਕ੍ਖਾਪਦਵਣ੍ਣਨਾ
ਛਟ੍ਠੇ ਵਾਸਿਤਕੇਨਾਤਿ ਗਨ੍ਧਵਾਸਿਤਕੇਨ. ਪਿਞ੍ਞਾਕੇਨਾਤਿ ਤਿਲਪਿਟ੍ਠੇਨ. ਸੇਸਂ ਪਞ੍ਚਮਸਦਿਸਮੇਵਾਤਿ.
ਵਾਸਿਤਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਭਿਕ੍ਖੁਨਿਉਮ੍ਮਦ੍ਦਾਪਨਸਿਕ੍ਖਾਪਦਵਣ੍ਣਨਾ
ਸਤ੍ਤਮੇ ਉਮ੍ਮਦ੍ਦਾਪੇਯ੍ਯਾਤਿ ਉਬ੍ਬਟ੍ਟਾਪੇਯ੍ਯ. ਪਰਿਮਦ੍ਦਾਪੇਯ੍ਯਾਤਿ ਸਮ੍ਬਾਹਾਪੇਯ੍ਯ. ਏਤ੍ਥ ਚ ਹਤ੍ਥਂ ਅਮੁਞ੍ਚਿਤ੍ਵਾ ਉਬ੍ਬਟ੍ਟਨੇ ਏਕਾਵ ਆਪਤ੍ਤਿ, ਮੋਚੇਤ੍ਵਾ ਮੋਚੇਤ੍ਵਾ ਉਬ੍ਬਟ੍ਟਨੇ ਪਯੋਗਗਣਨਾਯ ਆਪਤ੍ਤਿਯੋ. ਸਮ੍ਬਾਹਨੇਪਿ ਏਸੇਵ ਨਯੋ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਭਿਕ੍ਖੁਨਿਯਾ ਉਮ੍ਮਦ੍ਦਾਪਨਪਰਿਮਦ੍ਦਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਗਿਲਾਨਾਯ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਇਧ ਮਗ੍ਗਗਮਨਪਰਿਸ੍ਸਮੋਪਿ ਗੇਲਞ੍ਞਂ, ਚੋਰਭਯਾਦੀਹਿ ਸਰੀਰਕਮ੍ਪਨਾਦਯੋਪਿ ਆਪਦਾ. ਸੇਸਂ ਚਤੁਤ੍ਥੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.
ਭਿਕ੍ਖੁਨਿਉਮ੍ਮਦ੍ਦਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮-੯-੧੦. ਸਿਕ੍ਖਮਾਨਉਮ੍ਮਦ੍ਦਾਪਨਾਦਿਸਿਕ੍ਖਾਪਦਵਣ੍ਣਨਾ
ਅਟ੍ਠਮਨਵਮਦਸਮੇਸੁਪਿ ਸਿਕ੍ਖਮਾਨਾਯ ਸਾਮਣੇਰਿਯਾ ਗਿਹਿਨਿਯਾਤਿ ਏਤ੍ਤਕਮੇਵ ਨਾਨਂ. ਸੇਸਂ ਸਤ੍ਤਮਸਦਿਸਮੇਵਾਤਿ.
ਸਿਕ੍ਖਮਾਨਉਮ੍ਮਦ੍ਦਾਪਨਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੧. ਅਨਾਪੁਚ੍ਛਾਸਿਕ੍ਖਾਪਦਵਣ੍ਣਨਾ
ਏਕਾਦਸਮੇ ਭਿਕ੍ਖੁਸ੍ਸ ਪੁਰਤੋਤਿ ਨ ਅਭਿਮੁਖਮੇਵਾਤਿ ਅਤ੍ਥੋ, ਇਦਂ ਪਨ ਉਪਚਾਰਂ ਸਨ੍ਧਾਯ ਕਥਿਤਨ੍ਤਿ ਵੇਦਿਤਬ੍ਬਂ. ਤਸ੍ਮਾ ਭਿਕ੍ਖੁਸ੍ਸ ਉਪਚਾਰੇ ਅਨ੍ਤਮਸੋ ਛਮਾਯਪਿ ‘‘ਨਿਸੀਦਾਮਿ, ਅਯ੍ਯਾ’’ਤਿ ਅਨਾਪੁਚ੍ਛਿਤ੍ਵਾ ਨਿਸੀਦਨ੍ਤਿਯਾ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਅਨਾਪੁਚ੍ਛਾ ਨਿਸੀਦਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਆਪੁਚ੍ਛਿਤੇ ਦ੍ਵਿਕਦੁਕ੍ਕਟਂ. ਤਸ੍ਮਿਂ ਆਪੁਚ੍ਛਿਤਸਞ੍ਞਾਯ, ਗਿਲਾਨਾਯ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਭਿਕ੍ਖੁਸ੍ਸ ਅਨਾਪੁਚ੍ਛਾ, ਉਪਚਾਰੇ ਨਿਸਜ੍ਜਾ, ਅਨੁਞ੍ਞਾਤਕਾਰਣਾਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਕਥਿਨਸਦਿਸਾਨਿ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.
ਅਨਾਪੁਚ੍ਛਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੨. ਪਞ੍ਹਾਪੁਚ੍ਛਨਸਿਕ੍ਖਾਪਦਵਣ੍ਣਨਾ
ਦ੍ਵਾਦਸਮੇ ਅਨੋਕਾਸਕਤਨ੍ਤਿ ‘‘ਅਸੁਕਸ੍ਮਿਂ ਨਾਮ ਠਾਨੇ ਪੁਚ੍ਛਾਮੀ’’ਤਿ ਏਵਂ ਅਕਤਓਕਾਸਂ, ਤਸ੍ਮਾ ਸੁਤ੍ਤਨ੍ਤੇ ਓਕਾਸਂ ਕਾਰਾਪੇਤ੍ਵਾ ਵਿਨਯਂ ਵਾ ਅਭਿਧਮ੍ਮਂ ਵਾ ਪੁਚ੍ਛਨ੍ਤਿਯਾ ਪਾਚਿਤ੍ਤਿਯਂ. ਸੇਸੇਸੁਪਿ ਏਸੇਵ ਨਯੋ, ਸਬ੍ਬਸੋ ਅਕਾਰਿਤੇ ਪਨ ਵਤ੍ਤਬ੍ਬਮੇਵ ਨਤ੍ਥਿ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਅਨੋਕਾਸਕਤਂ ਭਿਕ੍ਖੁਂ ਪਞ੍ਹਂ ਪੁਚ੍ਛਨਵਤ੍ਥੁਸ੍ਮਿਂ ਪਞ੍ਞਤ੍ਤਂ. ਤਤ੍ਥ ਤਤ੍ਥ ਓਕਾਸਂ ਕਾਰਾਪੇਤ੍ਵਾ ਪੁਚ੍ਛਨ੍ਤਿਯਾ, ਅਨੋਦਿਸ੍ਸ ਓਕਾਸਂ ਕਾਰਾਪੇਤ੍ਵਾ ਯਤ੍ਥ ਕਤ੍ਥਚਿ ਪੁਚ੍ਛਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਭਿਕ੍ਖੁਸ੍ਸ ਅਨੋਕਾਸਕਾਰਾਪਨਂ, ਪਞ੍ਹਂ ਪੁਚ੍ਛਨਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਦਸੋਧਮ੍ਮਸਦਿਸਾਨਿ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.
ਪਞ੍ਹਾਪੁਚ੍ਛਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੩. ਅਸਂਕਚ੍ਚਿਕਸਿਕ੍ਖਾਪਦਵਣ੍ਣਨਾ
ਤੇਰਸਮੇ ਅਸਂਕਚ੍ਚਿਕਾਤਿ ਅਧਕ੍ਖਕਉਬ੍ਭਨਾਭਿਮਣ੍ਡਲਸਙ੍ਖਾਤਸ੍ਸ ਸਰੀਰਸ੍ਸ ਪਟਿਚ੍ਛਾਦਨਤ੍ਥਂ ਅਨੁਞ੍ਞਾਤਸਂਕਚ੍ਚਿਕਵਿਰਹਿਤਾ. ਗਾਮਂ ਪਵਿਸੇਯ੍ਯਾਤਿ ਏਤ੍ਥ ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਪਰਿਕ੍ਖੇਪਂ, ਅਪਰਿਕ੍ਖਿਤ੍ਤਸ੍ਸ ਉਪਚਾਰਂ ਅਤਿਕ੍ਕਮਨ੍ਤਿਯਾ ਵਾ ਓਕ੍ਕਮਨ੍ਤਿਯਾ ਵਾ ਪਠਮਪਾਦੇ ਦੁਕ੍ਕਟਂ, ਦੁਤਿਯੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਅਸਂਕਚ੍ਚਿਕਾਯ ਗਾਮਂ ਪਵਿਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ. ਯਸ੍ਸਾ ਪਨ ਸਂਕਚ੍ਚਿਕਚੀਵਰਂ ਅਚ੍ਛਿਨ੍ਨਂ ਵਾ ਨਟ੍ਠਂ ਵਾ, ਤਸ੍ਸਾ, ਗਿਲਾਨਾਯ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਅਸਂਕਚ੍ਚਿਕਤਾ, ਵੁਤ੍ਤਪਰਿਚ੍ਛੇਦਾਤਿਕ੍ਕਮੋ, ਅਨੁਞ੍ਞਾਤਕਾਰਣਾਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.
ਅਸਂਕਚ੍ਚਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਛਤ੍ਤੁਪਾਹਨਵਗ੍ਗੋ ਨਵਮੋ.
੧੦…ਪੇ…੧੬. ਮੁਸਾਵਾਦਾਦਿਵਗ੍ਗੋ
ਮੁਸਾਵਾਦਾਦਿਸਿਕ੍ਖਾਪਦਵਣ੍ਣਨਾ
ਇਤੋ ਪਰੇਸੁ ਮੁਸਾਵਾਦਵਗ੍ਗਾਦੀਸੁ ਸਤ੍ਤਸੁ ਵਗ੍ਗੇਸੁ ਭਿਕ੍ਖੁਪਾਤਿਮੋਕ੍ਖਵਣ੍ਣਨਾਯਂ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋਤਿ.
ਸੋਲ਼ਸਮਵਗ੍ਗੋ.
ਉਦ੍ਦਿਟ੍ਠਾ ਖੋ ਅਯ੍ਯਾਯੋ ਛਸਟ੍ਠਿਸਤਾ ਪਾਚਿਤ੍ਤਿਯਾ ਧਮ੍ਮਾਤਿ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਾ ਸਾਧਾਰਣਾ ਸਤ੍ਤਤਿ, ਅਸਾਧਾਰਣਾ ਛਨ੍ਨਵੁਤੀਤਿ ਏਵਂ ਛਸਟ੍ਠਿਸਤਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ
ਭਿਕ੍ਖੁਨਿਪਾਤਿਮੋਕ੍ਖੇ
ਸੁਦ੍ਧਪਾਚਿਤ੍ਤਿਯਵਣ੍ਣਨਾ ਨਿਟ੍ਠਿਤਾ.
ਤਤ੍ਰਾਯਂ ਸਙ੍ਖੇਪਤੋ ਅਸਾਧਾਰਣਸਿਕ੍ਖਾਪਦੇਸੁ ਸਮੁਟ੍ਠਾਨਵਿਨਿਚ੍ਛਯੋ – ਗਿਰਗ੍ਗਸਮਜ੍ਜਾ ਚਿਤ੍ਤਾਗਾਰਸਿਕ੍ਖਾਪਦਂ ਸਙ੍ਘਾਣੀ ਇਤ੍ਥਾਲਙ੍ਕਾਰੋ ਗਨ੍ਧਵਣ੍ਣਕੋ ਵਾਸਿਤਕਪਿਞ੍ਞਾਕੋ ਭਿਕ੍ਖੁਨਿਆਦੀਹਿ ਉਮ੍ਮਦ੍ਦਨਪਰਿਮਦ੍ਦਨਾਤਿ ਇਮਾਨਿ ਦਸ ਸਿਕ੍ਖਾਪਦਾਨਿ ਅਚਿਤ੍ਤਕਾਨਿ ਲੋਕਵਜ੍ਜਾਨਿ ਅਕੁਸਲਚਿਤ੍ਤਾਨਿ. ਅਯਂ ਪਨੇਤ੍ਥ ਅਧਿਪ੍ਪਾਯੋ, ਵਿਨਾਪਿ ਚਿਤ੍ਤੇਨ ਆਪਜ੍ਜਿਤਬ੍ਬਤ੍ਤਾ ਅਚਿਤ੍ਤਕਾਨਿ, ਚਿਤ੍ਤੇ ਪਨ ਸਤਿ ਅਕੁਸਲੇਨੇਵ ਆਪਜ੍ਜਿਤਬ੍ਬਤ੍ਤਾ ਲੋਕਵਜ੍ਜਾਨਿ ਚੇਵ ਅਕੁਸਲਚਿਤ੍ਤਾਨਿ ਚਾਤਿ. ਅਵਸੇਸਾਨਿ ਸਚਿਤ੍ਤਕਾਨਿ ਪਣ੍ਣਤ੍ਤਿਵਜ੍ਜਾਨੇਵ. ਚੋਰਿਵੁਟ੍ਠਾਪਨਂ ਗਾਮਨ੍ਤਰਂ ਆਰਾਮਸਿਕ੍ਖਾਪਦਂ ਗਬ੍ਭਿਨਿਵਗ੍ਗੇ ਆਦਿਤੋ ਪਟ੍ਠਾਯ ਸਤ੍ਤ, ਕੁਮਾਰਿਭੂਤਵਗ੍ਗੇ ਆਦਿਤੋ ਪਟ੍ਠਾਯ ਪਞ੍ਚ ਪੁਰਿਸਾਦਿਸਂਸਟ੍ਠਂ ਪਾਰਿਵਾਸਿਕਛਨ੍ਦਦਾਨਂ ਅਨੁਵਸ੍ਸਵੁਟ੍ਠਾਪਨਂ ਏਕਨ੍ਤਰਿਕਵੁਟ੍ਠਾਪਨਨ੍ਤਿ ਇਮਾਨਿ ਏਕੂਨਵੀਸਤਿ ਸਿਕ੍ਖਾਪਦਾਨਿ ਸਚਿਤ੍ਤਕਾਨਿ ਪਣ੍ਣਤ੍ਤਿਵਜ੍ਜਾਨਿ. ਅਵਸੇਸਾਨਿ ਸਚਿਤ੍ਤਕਾਨਿ ਲੋਕਵਜ੍ਜਾਨੇਵਾਤਿ.