ਪਾਟਿਦੇਸਨੀਯਕਣ੍ਡੋ
੧. ਸਪ੍ਪਿਵਿਞ੍ਞਾਪਨਸਿਕ੍ਖਾਪਦਵਣ੍ਣਨਾ
ਪਾਟਿਦੇਸਨੀਯੇਸੁ ਪਠਮੇ ਸਪ੍ਪਿਨ੍ਤਿ ਪੁਬ੍ਬੇ ਵੁਤ੍ਤਵਿਨਿਚ੍ਛਯਂ ਪਾਲ਼ਿਆਗਤਂ (ਪਾਚਿ. ੧੨੩੦) ਗੋਸਪ੍ਪਿਆਦਿਮੇਵ. ਵਿਞ੍ਞਾਪੇਤ੍ਵਾ ਭੁਞ੍ਜੇਯ੍ਯਾਤਿ ਏਤ੍ਥ ‘‘ਵਿਞ੍ਞਤ੍ਤਿਯਾ ਪਟਿਲਦ੍ਧਂ ਭੁਞ੍ਜਿਸ੍ਸਾਮੀ’’ਤਿ ਗਹਣੇ ਦੁਕ੍ਕਟਂ, ਗਹਿਤਸ੍ਸ ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਟਿਦੇਸਨੀਯਂ.
ਸਾਵਤ੍ਥਿਯਂ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਆਰਬ੍ਭ ਸਪ੍ਪਿਂ ਵਿਞ੍ਞਾਪੇਤ੍ਵਾ ਭੁਞ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਗਿਲਾਨਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਤਿਕਪਾਟਿਦੇਸਨੀਯਂ, ਗਿਲਾਨਾਯ ਦ੍ਵਿਕਦੁਕ੍ਕਟਂ. ਯਾ ਪਨ ਗਿਲਾਨਾ ਗਿਲਾਨਸਞ੍ਞਾ, ਗਿਲਾਨਕਾਲੇ ਵਾ ਵਿਞ੍ਞਾਪੇਤ੍ਵਾ ਪਚ੍ਛਾ ਅਗਿਲਾਨਾ ਹੁਤ੍ਵਾ ਭੁਞ੍ਜਤਿ, ਗਿਲਾਨਾਯ ਵਾ ਸੇਸਕਂ, ਞਾਤਕਪ੍ਪਵਾਰਿਤਟ੍ਠਾਨਤੋ ਵਾ ਵਿਞ੍ਞਤ੍ਤਂ, ਅਞ੍ਞਸ੍ਸ ਵਾ ਅਤ੍ਥਾਯ, ਅਤ੍ਤਨੋ ਵਾ ਧਨੇਨ ਗਹਿਤਂ ਭੁਞ੍ਜਤਿ, ਤਸ੍ਸਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਵੁਤ੍ਤਲਕ੍ਖਣਸਪ੍ਪਿਤਾ, ਅਨੁਞ੍ਞਾਤਕਾਰਣਾਭਾਵੋ, ਵਿਞ੍ਞਤ੍ਤਿ, ਅਜ੍ਝੋਹਾਰੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦ੍ਧਾਨਸਦਿਸਾਨੀਤਿ.
ਸਪ੍ਪਿਵਿਞ੍ਞਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਤੇਲਵਿਞ੍ਞਾਪਨਾਦਿਸਿਕ੍ਖਾਪਦਵਣ੍ਣਨਾ
ਦੁਤਿਯਾਦੀਸੁਪਿ ਤੇਲਾਦੀਨਿ ਪੁਬ੍ਬੇ ਵੁਤ੍ਤਵਿਨਿਚ੍ਛਯਾਨਿ ਪਾਲ਼ਿਯਂ (ਪਾਚਿ. ੧੨੩੬) ਆਗਤਾਨੇਵ, ਪਾਲ਼ਿਯਂ ਅਨਾਗਤੇਸੁ ਪਨ ਅਟ੍ਠਸੁਪਿ ਦੁਕ੍ਕਟਮੇਵ. ਸੇਸਂ ਸਬ੍ਬਤ੍ਥ ਪਠਮੇ ਵੁਤ੍ਤਸਦਿਸਮੇਵਾਤਿ.
ਤੇਲਵਿਞ੍ਞਾਪਨਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ
ਭਿਕ੍ਖੁਨਿਪਾਤਿਮੋਕ੍ਖੇ
ਪਾਟਿਦੇਸਨੀਯਵਣ੍ਣਨਾ ਨਿਟ੍ਠਿਤਾ.
੧. ਪਰਿਮਣ੍ਡਲਾਦਿਸਿਕ੍ਖਾਪਦਵਣ੍ਣਨਾ
ਇਤੋ ਪਰਂ ਪਨ ਸੇਖਿਯਾਨਿ ਚੇਵ ਅਧਿਕਰਣਸਮਥਾ ਚ ਸਬ੍ਬਪਕਾਰਤੋ ਭਿਕ੍ਖੁਪਾਤਿਮੋਕ੍ਖਵਣ੍ਣਨਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਾਤਿ.
ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ
ਭਿਕ੍ਖੁਨਿਪਾਤਿਮੋਕ੍ਖਵਣ੍ਣਨਾ ਨਿਟ੍ਠਿਤਾ.
ਨਿਗਮਨਕਥਾ
ਏਤ੍ਤਾਵਤਾ ਚ –
ਵਣ੍ਣਨਂ ਪਾਤਿਮੋਕ੍ਖਸ੍ਸ, ਸੋਣਤ੍ਥੇਰੇਨ ਯਾਚਿਤੋ;
ਵਿਨਯੇ ਜਾਤਕਙ੍ਖਾਨਂ, ਕਙ੍ਖਾਵਿਤਰਣਤ੍ਥਿਕੋ.
ਆਰਭਿਂ ਯਮਹਂ ਸਬ੍ਬਂ, ਸੀਹਲ਼ਟ੍ਠਕਥਾਨਯਂ;
ਮਹਾਵਿਹਾਰਵਾਸੀਨਂ, ਵਾਚਨਾਮਗ੍ਗਨਿਸ੍ਸਿਤਂ.
ਨਿਸ੍ਸਾਯ ਸਾ ਅਯਂ ਨਿਟ੍ਠਂ, ਗਤਾ ਆਦਾਯ ਸਬ੍ਬਸੋ;
ਸਬ੍ਬਂ ਅਟ੍ਠਕਥਾਸਾਰਂ, ਪਾਲ਼ਿਯਤ੍ਥਞ੍ਚ ਕੇਵਲਂ.
ਨ ਹੇਤ੍ਥ ਤਂ ਪਦਂ ਅਤ੍ਥਿ, ਯਂ ਵਿਰੁਜ੍ਝੇਯ੍ਯ ਪਾਲ਼ਿਯਾ;
ਮਹਾਵਿਹਾਰਵਾਸੀਨਂ, ਪੋਰਾਣਟ੍ਠਕਥਾਹਿ ਵਾ.
ਯਸ੍ਮਾ ਤਸ੍ਮਾ ਅਕਤ੍ਵਾਵ, ਏਤ੍ਥ ਕਙ੍ਖਂ ਹਿਤੇਸਿਨਾ;
ਸਿਕ੍ਖਿਤਬ੍ਬਾਵ ਸਕ੍ਕਚ੍ਚਂ, ਕਙ੍ਖਾਵਿਤਰਣੀ ਅਯਂ.
ਯਥਾ ਚ ਨਿਟ੍ਠਂ ਸਮ੍ਪਤ੍ਤਾ, ਕਙ੍ਖਾਵਿਤਰਣੀ ਅਯਂ;
ਦ੍ਵਾਵੀਸਤਿ ਭਾਣਵਾਰਪਅਮਾਣਾਯ ਪਾਲ਼ਿਯਾ.
ਏਵਂ ਅਨਨ੍ਤਰਾਯੇਨ, ਨਿਟ੍ਠਂ ਕਲ੍ਯਾਣਨਿਸ੍ਸਿਤਾ;
ਅਚਿਰਂ ਸਬ੍ਬਸਤ੍ਤਾਨਂ, ਯਨ੍ਤੁ ਸਬ੍ਬੇ ਮਨੋਰਥਾਤਿ.
ਪਰਮਵਿਸੁਦ੍ਧਸਦ੍ਧਾਬੁਦ੍ਧਿਵੀਰਿਯਪ੍ਪਟਿਮਣ੍ਡਿਤੇਨ ਸੀਲਾਚਾਰਜ੍ਜਵਮਦ੍ਦਵਾਦਿਗੁਣਸਮੁਦਯਸਮੁਦਿਤੇਨ ਸਕਸਮਯਸਮਯਨ੍ਤਰਗਹਨਜ੍ਝੋਗਾਹਣਸਮਤ੍ਥੇਨ ਪਞ੍ਞਾਵੇਯ੍ਯਤ੍ਤਿਯਸਮਨ੍ਨਾਗਤੇਨ ਤਿਪਿਟਕਪਰਿਯਤ੍ਤਿਪ੍ਪਭੇਦੇ ਸਾਟ੍ਠਕਥੇ ਸਤ੍ਥੁਸਾਸਨੇ ਅਪ੍ਪਟਿਹਤਞਾਣਪ੍ਪਭਾਵੇਨ ਮਹਾਵੇਯ੍ਯਾਕਰਣੇਨ ਕਰਣਸਮ੍ਪਤ੍ਤਿਜਨਿਤਸੁਵਿਨਿਗ੍ਗਤਮਧਉਰੋਦਾਰਵਚਨਲਾਵਣ੍ਣਯੁਤ੍ਤੇਨ ਯੁਤ੍ਤਮੁਤ੍ਤਵਾਦਿਨਾ ਵਾਦੀਵਰੇਨ ਮਹਾਕਵਿਨਾ ਪਭਿਨ੍ਨਪਟਿਸਮ੍ਭਿਦਾਪਰਿਵਾਰੇ ਛਲ਼ਭਿਞ੍ਞਾਦਿਪ੍ਪਭੇਦਗੁਣਪ੍ਪਟਿਮਣ੍ਡਿਤੇ ਉਤ੍ਤਰਿਮਨੁਸ੍ਸਧਮ੍ਮੇ ਸੁਪ੍ਪਤਿਟ੍ਠਿਤਬੁਦ੍ਧੀਨਂ ਥੇਰਵਂਸਪ੍ਪਦੀਪਾਨਂ ਥੇਰਾਨਂ ਮਹਾਵਿਹਾਰਵਾਸੀਨਂ ਵਂਸਾਲਙ੍ਕਾਰਭੂਤੇਨ ਵਿਪੁਲਵਿਸੁਦ੍ਧਬੁਦ੍ਧਿਨਾ ਬੁਦ੍ਧਘੋਸੋਤਿ ਗਰੂਹਿ ਗਹਿਤਨਾਮਧੇਯ੍ਯੇਨ ਥੇਰੇਨ ਕਤਾ ਅਯਂ ਕਙ੍ਖਾਵਿਤਰਣੀ ਨਾਮ ਪਾਤਿਮੋਕ੍ਖਵਣ੍ਣਨਾ –
ਤਾਵ ਤਿਟ੍ਠਤੁ ਲੋਕਸ੍ਮਿਂ, ਲੋਕਨਿਤ੍ਥਰਣੇਸਿਨਂ;
ਦਸ੍ਸੇਨ੍ਤੀ ਕੁਲਪੁਤ੍ਤਾਨਂ, ਨਯਂ ਸੀਲਵਿਸੁਦ੍ਧਿਯਾ.
ਯਾਵ ‘‘ਬੁਦ੍ਧੋ’’ਤਿ ਨਾਮਮ੍ਪਿ, ਸੁਦ੍ਧਚਿਤ੍ਤਸ੍ਸ ਤਾਦਿਨੋ;
ਲੋਕਮ੍ਹਿ ਲੋਕਜੇਟ੍ਠਸ੍ਸ, ਪਵਤ੍ਤਤਿ ਮਹੇਸਿਨੋਤਿ.
ਕਙ੍ਖਾਵਿਤਰਣੀ-ਅਟ੍ਠਕਥਾ ਨਿਟ੍ਠਿਤਾ.