ਪਾਚਿਤ੍ਤਿਯਕਣ੍ਡੋ
੧. ਲਸੁਣਵਗ੍ਗੋ
੧. ਲਸੁਣਸਿਕ੍ਖਾਪਦਵਣ੍ਣਨਾ
ਪਾਚਿਤ੍ਤਿਯੇਸੁ ਲਸੁਣਵਗ੍ਗਸ੍ਸ ਤਾਵ ਪਠਮੇ ਲਸੁਣਨ੍ਤਿ ਮਗਧਰਟ੍ਠੇ ਜਾਤਂ ਆਮਕਂ ਭਣ੍ਡਿਕਲਸੁਣਮੇਵ, ਨ ਏਕਦ੍ਵਿਤਿਮਿਞ੍ਜਕਂ. ਤਞ੍ਹਿ ‘‘ਖਾਦਿਸ੍ਸਾਮੀ’’ਤਿ ਪਟਿਗ੍ਗਣ੍ਹਨ੍ਤਿਯਾ ਦੁਕ੍ਕਟਂ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਲਸੁਣਂ ਹਰਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਲਸੁਣੇ ਦ੍ਵਿਕਦੁਕ੍ਕਟਂ. ਤਸ੍ਮਿਂ ਪਨ ਅਲਸੁਣਸਞ੍ਞਾਯ, ਪਲਣ੍ਡੁਕੇ, ਭਞ੍ਜਨਕੇ, ਹਰਿਤਕੇ, ਚਾਪਲਸੁਣੇ, ਸੂਪਸਮ੍ਪਾਕੇ, ਮਂਸਸਮ੍ਪਾਕੇ, ਤੇਲਸਮ੍ਪਾਕੇ, ਸਾਲ਼ਵੇ, ਉਤ੍ਤਰਿਭਙ੍ਗੇ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਆਮਕਲਸੁਣਞ੍ਚੇਵ, ਅਜ੍ਝੋਹਰਣਞ੍ਚਾਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.
ਲਸੁਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਸਮ੍ਬਾਧਲੋਮਸਿਕ੍ਖਾਪਦਵਣ੍ਣਨਾ
ਦੁਤਿਯੇ ਸਮ੍ਬਾਧੇਤਿ ਪਟਿਚ੍ਛਨ੍ਨੋਕਾਸੇ, ਉਪਕਚ੍ਛਕੇਸੁ ਚ ਮੁਤ੍ਤਕਰਣੇ ਚਾਤਿ ਅਤ੍ਥੋ. ਸਂਹਰਾਪੇਯ੍ਯਾਤਿ ਏਤ੍ਥ ਖੁਰਸਣ੍ਡਾਸਕਤ੍ਤਰਿਆਦੀਸੁ ਯੇਨ ਕੇਨਚਿ ਸਂਹਰਾਪੇਨ੍ਤਿਯਾ ਪਯੋਗਗਣਨਾਯ ਪਾਚਿਤ੍ਤਿਯਂ, ਨ ਲੋਮਗਣਨਾਯ.
ਸਾਵਤ੍ਥਿਯਂ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਆਰਬ੍ਭ ਸਮ੍ਬਾਧੇ ਲੋਮਂ ਸਂਹਰਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਤ੍ਤਨੋ ਅਤ੍ਥਾਯ ਅਞ੍ਞਂ ਆਣਾਪੇਨ੍ਤਿਯਾ ਸਾਣਤ੍ਤਿਕਂ, ਆਪਤ੍ਤਿਭੇਦੋਨਤ੍ਥਿ. ਆਬਾਧਪਚ੍ਚਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਆਬਾਧਾਭਾਵੋ, ਸਮ੍ਬਾਧੇ ਲੋਮਸਂਹਰਣਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਭਿਕ੍ਖੁਨਿਯਾ ਸਦ੍ਧਿਂ ਏਕਦ੍ਧਾਨਮਗ੍ਗਗਮਨਸਿਕ੍ਖਾਪਦਸਦਿਸਾਨੀਤਿ.
ਸਮ੍ਬਾਧਲੋਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਤਲਘਾਤਕਸਿਕ੍ਖਾਪਦਵਣ੍ਣਨਾ
ਤਤਿਯੇ ਤਲਘਾਤਕੇਤਿ ਅਨ੍ਤਮਸੋ ਉਪ੍ਪਲਕੇਸਰੇਨਾਪਿ ਮੁਤ੍ਤਕਰਣਸ੍ਸ ਤਲਘਾਤਨੇ ਮੁਤ੍ਤਕਰਣਮ੍ਹਿ ਪਹਾਰਦਾਨੇ ਪਾਚਿਤ੍ਤਿਯਨ੍ਤਿ ਅਤ੍ਥੋ.
ਸਾਵਤ੍ਥਿਯਂ ਦ੍ਵੇ ਭਿਕ੍ਖੁਨਿਯੋ ਆਰਬ੍ਭ ਤਲਘਾਤਕਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਪੁਰਿਮਨਯੇਨੇਵ ਸਾਣਤ੍ਤਿਕਂ, ਆਪਤ੍ਤਿਭੇਦੋ ਨਤ੍ਥਿ. ਇਤੋ ਪਰਂ ਪਨ ਯਤ੍ਥ ਨਤ੍ਥਿ, ਤਤ੍ਥ ਅਵਤ੍ਵਾਵ ਗਮਿਸ੍ਸਾਮ. ਆਬਾਧਪਚ੍ਚਯਾ ਗਣ੍ਡਂ ਵਾ ਵਣਂ ਵਾ ਪਹਰਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਆਬਾਧਾਭਾਵੋ, ਮੁਤ੍ਤਕਰਣੇ ਪਹਾਰਦਾਨਂ, ਫਸ੍ਸਸਾਦਿਯਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਦਿਸਾਨੀਤਿ.
ਤਲਘਾਤਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਜਤੁਮਟ੍ਠਕਸਿਕ੍ਖਾਪਦਵਣ੍ਣਨਾ
ਚਤੁਤ੍ਥੇ ਜਤੁਮਟ੍ਠਕੇਤਿ ਜਤੁਨਾ ਕਤੇ ਮਟ੍ਠਦਣ੍ਡਕੇ. ਵਤ੍ਥੁਵਸੇਨੇਤਂ ਵੁਤ੍ਤਂ, ਕਾਮਰਾਗੇਨ ਪਨ ਉਪ੍ਪਲਕੇਸਰਮ੍ਪਿ ਪਵੇਸੇਨ੍ਤਿਯਾ ਆਪਤ੍ਤਿ.
ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਜਤੁਮਟ੍ਠਕਸਾਦਿਯਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਂ ਤਤਿਯਸਦਿਸਮੇਵਾਤਿ.
ਜਤੁਮਟ੍ਠਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਉਦਕਸੁਦ੍ਧਿਕਸਿਕ੍ਖਾਪਦਵਣ੍ਣਨਾ
ਪਞ੍ਚਮੇ ਉਦਕਸੁਦ੍ਧਿਕਨ੍ਤਿ ਮੁਤ੍ਤਕਰਣਸ੍ਸ ਧੋਵਨਂ. ਆਦਿਯਮਾਨਾਯਾਤਿ ਕਰੋਨ੍ਤਿਯਾ. ਦ੍ਵਙ੍ਗੁਲਪਬ੍ਬਪਰਮਂ ਆਦਾਤਬ੍ਬਨ੍ਤਿ ਦ੍ਵੀਸੁ ਅਙ੍ਗੁਲੀਸੁ ਏਕੇਕਂ ਕਤ੍ਵਾ ਦ੍ਵਙ੍ਗੁਲਪਬ੍ਬਪਰਮਂ ਆਦਾਤਬ੍ਬਂ. ਤਂ ਅਤਿਕ੍ਕਾਮੇਨ੍ਤਿਯਾਤਿ ਸਚੇ ਧੋਵਨਕਾਲੇ ਰਾਗਵਸੇਨ ਵਿਤ੍ਥਾਰਤੋ ਤਤਿਯਾਯ ਅਙ੍ਗੁਲਿਯਾ ਅਗ੍ਗਪਬ੍ਬਂ, ਗਮ੍ਭੀਰਤੋ ਏਕਿਸ੍ਸਾਵ ਅਙ੍ਗੁਲਿਯਾ ਤਤਿਯਪਬ੍ਬਂ ਪਵੇਸੇਤਿ ਪਾਚਿਤ੍ਤਿਯਂ.
ਸਕ੍ਕੇਸੁ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਅਤਿਗਮ੍ਭੀਰਂ ਉਦਕਸੁਦ੍ਧਿਕਂ ਆਦਿਯਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਊਨਕਦ੍ਵਙ੍ਗੁਲਪਬ੍ਬੇ ਦ੍ਵਿਕਦੁਕ੍ਕਟਂ. ਤਸ੍ਮਿਂ ਪਨ ਊਨਕਸਞ੍ਞਾਯ, ਦ੍ਵਙ੍ਗੁਲਪਬ੍ਬਪਰਮਂ ਆਦਿਯਨ੍ਤਿਯਾ, ਆਬਾਧਪਚ੍ਚਯਾ ਅਤਿਰੇਕਮ੍ਪਿ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ, ਸੇਸਂ ਤਤਿਯਸਦਿਸਮੇਵਾਤਿ.
ਉਦਕਸੁਦ੍ਧਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਉਪਤਿਟ੍ਠਨਸਿਕ੍ਖਾਪਦਵਣ੍ਣਨਾ
ਛਟ੍ਠੇ ਭੁਞ੍ਜਨ੍ਤਸ੍ਸਾਤਿ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੁਞ੍ਜਤੋ. ਪਾਨੀਯੇਨਾਤਿ ਸੁਦ੍ਧੇਨ ਵਾ ਉਦਕੇਨ, ਤਕ੍ਕਾਦੀਸੁ ਵਾ ਅਞ੍ਞਤਰੇਨ. ਵਿਧੂਪਨੇਨਾਤਿ ਯਾਯ ਕਾਯਚਿ ਬੀਜਨਿਯਾ. ਉਪਤਿਟ੍ਠੇਯ੍ਯਾਤਿ ਯਾ ਏਤੇਸੁ ਦ੍ਵੀਸੁ ਅਞ੍ਞਤਰਂ ਗਹੇਤ੍ਵਾ ਹਤ੍ਥਪਾਸੇ ਤਿਟ੍ਠਤਿ, ਤਸ੍ਸਾ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਭੁਞ੍ਜਨ੍ਤਸ੍ਸ ਏਵਂ ਤਿਟ੍ਠਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਹਤ੍ਥਪਾਸਂ ਵਿਜਹਿਤ੍ਵਾ ਖਾਦਨੀਯਂ ਖਾਦਨ੍ਤਸ੍ਸ ਉਪਤਿਟ੍ਠਨ੍ਤਿਯਾ ਦੁਕ੍ਕਟਂ, ਅਨੁਪਸਮ੍ਪਨ੍ਨੇ ਤਿਕਦੁਕ੍ਕਟਂ. ‘‘ਇਮਂ ਪਿਵਥ, ਇਮਿਨਾ ਬੀਜਥਾ’’ਤਿ ਏਵਂ ਦੇਨ੍ਤਿਯਾ ਵਾ, ਦਾਪੇਨ੍ਤਿਯਾ ਵਾ, ਅਨੁਪਸਮ੍ਪਨ੍ਨਂ ਵਾ ਉਪਤਿਟ੍ਠਾਪਨਤ੍ਥਂ ਆਣਾਪੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਭੁਞ੍ਜਨ੍ਤਸ੍ਸ ਭਿਕ੍ਖੁਨੋ ਹਤ੍ਥਪਾਸੇ ਠਾਨਂ, ਪਾਨੀਯਸ੍ਸ ਵਾ ਵਿਧੂਪਨਸ੍ਸ ਵਾ ਗਹਣਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.
ਉਪਤਿਟ੍ਠਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਆਮਕਧਞ੍ਞਸਿਕ੍ਖਾਪਦਵਣ੍ਣਨਾ
ਸਤ੍ਤਮੇ ਵਿਞ੍ਞਤ੍ਵਾਤਿ ਅਨ੍ਤਮਸੋ ਮਾਤਰਮ੍ਪਿ ਯਾਚਿਤ੍ਵਾ. ਭੁਞ੍ਜੇਯ੍ਯਾਤਿ ਅਜ੍ਝੋਹਰੇਯ੍ਯ. ਏਤ੍ਥ ਚ ਵਿਞ੍ਞਤ੍ਤਿ ਚੇਵ ਭੋਜਨਞ੍ਚ ਪਮਾਣਂ, ਤਸ੍ਮਾ ਸਯਂ ਵਿਞ੍ਞਤ੍ਵਾ ਅਞ੍ਞਾਯ ਭਜ੍ਜਨਾਦੀਨਿ ਕਾਰਾਪੇਤ੍ਵਾ ਵਾ, ਅਞ੍ਞਾਯ ਵਿਞ੍ਞਾਪੇਤ੍ਵਾ ਸਯਂ ਭਜ੍ਜਨਾਦੀਨਿ ਕਤ੍ਵਾ ਵਾ ਪਟਿਗ੍ਗਹਣਤੋ ਪਟ੍ਠਾਯ ਯਾਵ ਦਨ੍ਤੇਹਿ ਸਂਖਾਦਨਂ, ਤਾਵ ਪੁਬ੍ਬਪ੍ਪਯੋਗੇਸੁ ਦੁਕ੍ਕਟਾਨਿ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਆਮਕਧਞ੍ਞਂ ਵਿਞ੍ਞਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਯਂ ਵਾ ਅਞ੍ਞਾਯ ਵਾ ਅਵਿਞ੍ਞਤ੍ਤਿਯਾ ਲਦ੍ਧਂ ਭਜ੍ਜਨਾਦੀਨਿ ਕਤ੍ਵਾ ਵਾ ਕਾਰੇਤ੍ਵਾ ਵਾ ਭੁਞ੍ਜਨ੍ਤਿਯਾ ਦੁਕ੍ਕਟਂ, ਅਞ੍ਞਾਯ ਵਿਞ੍ਞਤ੍ਤਿਯਾ ਲਦ੍ਧਂ ਪਨ ਸਯਂ ਭਜ੍ਜਨਾਦੀਨਿ ਕਤ੍ਵਾਪਿ ਕਾਰੇਤ੍ਵਾਪਿ ਭੁਞ੍ਜਨ੍ਤਿਯਾ ਦੁਕ੍ਕਟਮੇਵ. ਆਬਾਧੇ ਸਤਿ ਸੇਦਕਮ੍ਮਾਦੀਨਂ ਅਤ੍ਥਾਯ ਵਿਞ੍ਞਾਪੇਨ੍ਤਿਯਾ, ਅਵਿਞ੍ਞਤ੍ਤਿਯਾ ਲਬ੍ਭਮਾਨਂ ਨਵਕਮ੍ਮਤ੍ਥਾਯ ਸਮ੍ਪਟਿਚ੍ਛਨ੍ਤਿਯਾ, ਞਾਤਕਪ੍ਪਵਾਰਿਤਟ੍ਠਾਨੇ ਮੁਗ੍ਗਮਾਸਾਦਿਅਪਰਣ੍ਣਂ ਵਿਞ੍ਞਾਪੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸਤ੍ਤਨ੍ਨਂ ਧਞ੍ਞਾਨਂ ਅਞ੍ਞਤਰਸ੍ਸ ਵਿਞ੍ਞਾਪਨਂ ਵਾ ਵਿਞ੍ਞਾਪਾਪਨਂ ਵਾ, ਪਟਿਲਾਭੋ, ਭਜ੍ਜਨਾਦੀਨਿ ਕਤ੍ਵਾ ਵਾ ਕਾਰੇਤ੍ਵਾ ਵਾ ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦ੍ਧਾਨਮਗ੍ਗਸਿਕ੍ਖਾਪਦਸਦਿਸਾਨੀਤਿ.
ਆਮਕਧਞ੍ਞਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਪਠਮਉਚ੍ਚਾਰਛਡ੍ਡਨਸਿਕ੍ਖਾਪਦਵਣ੍ਣਨਾ
ਅਟ੍ਠਮੇ ਸਙ੍ਕਾਰਨ੍ਤਿ ਕਚਵਰਂ. ਵਿਘਾਸਨ੍ਤਿ ਯਂਕਿਞ੍ਚਿ ਪਰਿਭੁਤ੍ਤਾਵਸੇਸਂ ਉਚ੍ਛਿਟ੍ਠੋਦਕਮ੍ਪਿ ਦਨ੍ਤਕਟ੍ਠਮ੍ਪਿ, ਅਟ੍ਠਿਕਚਲਕੇਸੁ ਪਨ ਵਤ੍ਤਬ੍ਬਮੇਵ ਨਤ੍ਥਿ. ਤਿਰੋਕੁਟ੍ਟੇ ਵਾ ਤਿਰੋਪਾਕਾਰੇ ਵਾਤਿ ਯਸ੍ਸਕਸ੍ਸਚਿ ਕੁਟ੍ਟਸ੍ਸ ਵਾ ਪਾਕਾਰਸ੍ਸ ਵਾ ਪਰਤੋ. ਛਡ੍ਡੇਯ੍ਯ ਵਾ ਛਡ੍ਡਾਪੇਯ੍ਯ ਵਾਤਿ ਸਬ੍ਬਾਨਿਪੇਤਾਨਿ ਏਕਤੋ ਛਡ੍ਡੇਨ੍ਤਿਯਾ ਏਕਪ੍ਪਯੋਗੇ ਏਕਾਪਤ੍ਤਿ, ਸਕਿਂ ਆਣਤ੍ਤਿਯਾ ਬਹੁਕੇਪਿ ਛਡ੍ਡਿਤੇ ਏਕਾਵ.
ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਉਚ੍ਚਾਰਂ ਤਿਰੋਕੁਟ੍ਟੇ ਛਡ੍ਡਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਣਤ੍ਤਿਕਂ, ਭਿਕ੍ਖੁਸ੍ਸ ਦੁਕ੍ਕਟਂ, ਓਲੋਕੇਤ੍ਵਾ ਵਾ ਅਵਲਞ੍ਜੇ ਵਾ ਛਡ੍ਡੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਉਚ੍ਚਾਰਾਦਿਭਾਵੋ, ਅਨੋਲੋਕਨਂ, ਵਲਞ੍ਜਨਟ੍ਠਾਨਂ, ਤਿਰੋਕੁਟ੍ਟਤਿਰੋਪਾਕਾਰਤਾ, ਛਡ੍ਡਨਂ ਵਾ ਛਡ੍ਡਾਪਨਂ ਵਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤਸਦਿਸਾਨਿ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.
ਪਠਮਉਚ੍ਚਾਰਛਡ੍ਡਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਦੁਤਿਯਉਚ੍ਚਾਰਛਡ੍ਡਨਸਿਕ੍ਖਾਪਦਵਣ੍ਣਨਾ
ਨਵਮੇ ਹਰਿਤੇਤਿ ਖੇਤ੍ਤੇ ਵਾ ਨਾਲ਼ਿਕੇਰਾਦਿਆਰਾਮੇ ਵਾ ਯਤ੍ਥਕਤ੍ਥਚਿ ਰੋਪਿਮਹਰਿਤਟ੍ਠਾਨੇ. ਤਾਨਿ ਵਤ੍ਥੂਨਿ ਛਡ੍ਡੇਨ੍ਤਿਯਾ ਵਾ ਛਡ੍ਡਾਪੇਨ੍ਤਿਯਾ ਵਾ ਪੁਰਿਮਨਯੇਨੇਵ ਆਪਤ੍ਤਿ, ਤਾਦਿਸੇ ਠਾਨੇ ਨਿਸੀਦਿਤ੍ਵਾ ਅਨ੍ਤਮਸੋ ਉਦਕਂ ਪਿਵਿਤ੍ਵਾ ਮਤ੍ਥਕਚ੍ਛਿਨ੍ਨਂ ਨਾਲ਼ਿਕੇਰਮ੍ਪਿ ਛਡ੍ਡੇਨ੍ਤਿਯਾ ਆਪਤ੍ਤਿਯੇਵ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਉਚ੍ਚਾਰਾਦੀਨਿ ਹਰਿਤੇ ਛਡ੍ਡਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਭਿਕ੍ਖੁਨੋ ਦੁਕ੍ਕਟਂ, ਭਿਕ੍ਖੁਨਿਯਾਪਿ ਨਿਕ੍ਖਿਤ੍ਤਬੀਜੇ ਖੇਤ੍ਤੇ ਯਾਵ ਅਙ੍ਕੁਰੋ ਨ ਉਟ੍ਠਹਤਿ, ਤਾਵ ਦੁਕ੍ਕਟਂ, ਅਹਰਿਤੇ ਦ੍ਵਿਕਦੁਕ੍ਕਟਂ. ਤਸ੍ਮਿਂ ਪਨ ਅਹਰਿਤਸਞ੍ਞਾਯ ਛਡ੍ਡਿਤਖੇਤ੍ਤੇ ਵਾ, ਸਾਮਿਕੇ ਅਪਲੋਕੇਤ੍ਵਾ ਵਾ ਛਡ੍ਡੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸੇਸਂ ਅਟ੍ਠਮਸਦਿਸਮੇਵਾਤਿ.
ਦੁਤਿਯਉਚ੍ਚਾਰਛਡ੍ਡਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਨਚ੍ਚਗੀਤਸਿਕ੍ਖਾਪਦਵਣ੍ਣਨਾ
ਦਸਮੇ ਨਚ੍ਚਨ੍ਤਿ ਅਨ੍ਤਮਸੋ ਮੋਰਨਚ੍ਚਮ੍ਪਿ. ਗੀਤਨ੍ਤਿ ਅਨ੍ਤਮਸੋ ਧਮ੍ਮਭਾਣਕਗੀਤਮ੍ਪਿ. ਵਾਦਿਤਨ੍ਤਿ ਅਨ੍ਤਮਸੋ ਉਦਕਭੇਰਿਵਾਦਿਤਮ੍ਪਿ. ਦਸ੍ਸਨਾਯਾਤਿ ਏਤੇਸੁ ਯਂਕਿਞ੍ਚਿ ਦਸ੍ਸਨਾਯ ਗਚ੍ਛਨ੍ਤਿਯਾ ਪਦੇ ਪਦੇ ਦੁਕ੍ਕਟਂ, ਯਤ੍ਥ ਠਿਤਾ ਪਸ੍ਸਤਿ ਵਾ ਸੁਣਾਤਿ ਵਾ, ਏਕਪ੍ਪਯੋਗੇ ਏਕਾਪਤ੍ਤਿ, ਤਂ ਤਂ ਦਿਸਂ ਓਲੋਕੇਨ੍ਤਿਯਾ ਪਯੋਗੇ ਪਯੋਗੇ ਆਪਤ੍ਤਿ.
ਰਾਜਗਹੇ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਆਰਬ੍ਭ ਨਚ੍ਚਾਦੀਨਿ ਦਸ੍ਸਨਾਯ ਗਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਯਂ ਤਾਨਿ ਵਤ੍ਥੂਨਿ ਕਰੋਨ੍ਤਿਯਾ, ਅਞ੍ਞਂ ਵਾ ਆਣਾਪੇਨ੍ਤਿਯਾ, ‘‘ਚੇਤਿਯਸ੍ਸ ਉਪਹਾਰਂ ਦੇਥਾ’’ਤਿ ਈਦਿਸੇਨ ਪਰਿਯਾਯੇਨ ਵਾ ਭਣਨ੍ਤਿਯਾ, ‘‘ਚੇਤਿਯਸ੍ਸ ਉਪਹਾਰਂ ਕਰੋਮਾ’’ਤਿ ਵਾ ਵੁਤ੍ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਨ੍ਤਿਯਾ ਚ ਪਾਚਿਤ੍ਤਿਯਮੇਵਾਤਿ ਸਬ੍ਬਅਟ੍ਠਕਥਾਸੁ (ਪਾਚਿ. ਅਟ੍ਠ. ੮੩੫-੮੩੭) ਵੁਤ੍ਤਂ, ਭਿਕ੍ਖੁਨੋ ਸਬ੍ਬਤ੍ਥ ਦੁਕ੍ਕਟਂ. ‘‘ਤੁਮ੍ਹਾਕਂ ਚੇਤਿਯਸ੍ਸ ਉਪਟ੍ਠਾਨਂ ਕਰੋਮਾ’’ਤਿ ਵੁਤ੍ਤੇ ਪਨ ‘‘ਉਪਟ੍ਠਾਨਕਰਣਂ ਨਾਮ ਸੁਨ੍ਦਰ’’ਨ੍ਤਿ ਈਦਿਸਂ ਪਰਿਯਾਯਂ ਭਣਨ੍ਤਿਯਾ, ਆਰਾਮੇ ਠਤ੍ਵਾ ਪਸ੍ਸਨ੍ਤਿਯਾ ਵਾ ਸੁਣਨ੍ਤਿਯਾ ਵਾ, ਤਥਾ ਅਤ੍ਤਨੋ ਠਿਤੋਕਾਸਂ ਆਗਨ੍ਤ੍ਵਾ ਪਯੋਜਿਤਂ ਪਟਿਪਥਂ ਗਚ੍ਛਨ੍ਤਿਯਾ ਸਮ੍ਮੁਖੀਭੂਤਂ ਸਲਾਕਭਤ੍ਤਾਦਿਕੇ ਸਤਿ ਕਰਣੀਯੇ ਗਨ੍ਤ੍ਵਾ, ਆਪਦਾਸੁ ਵਾ ਸਮਜ੍ਜਟ੍ਠਾਨਂ ਪਵਿਸਿਤ੍ਵਾਪਿ ਪਸ੍ਸਨ੍ਤਿਯਾ ਵਾ ਸੁਣਨ੍ਤਿਯਾ ਵਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਨਚ੍ਚਾਦੀਨਂ ਅਞ੍ਞਤਰਤਾ, ਅਞ੍ਞਤ੍ਰ ਅਨੁਞ੍ਞਾਤਕਾਰਣਾ ਗਮਨਂ, ਦਸ੍ਸਨਂ ਵਾ ਸਵਨਂ ਵਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨਿ, ਇਦਂ ਪਨ ਲੋਕਵਜ੍ਜਂ, ਅਕੁਸਲਚਿਤ੍ਤਂ, ਤਿਵੇਦਨਨ੍ਤਿ.
ਨਚ੍ਚਗੀਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਲਸੁਣਵਗ੍ਗੋ ਪਠਮੋ.
੨. ਰਤ੍ਤਨ੍ਧਕਾਰਵਗ੍ਗੋ
੧. ਰਤ੍ਤਨ੍ਧਕਾਰਸਿਕ੍ਖਾਪਦਵਣ੍ਣਨਾ
ਅਨ੍ਧਕਾਰਵਗ੍ਗਸ੍ਸ ਪਠਮੇ ਰਤ੍ਤਨ੍ਧਕਾਰੇਤਿ ਰਤ੍ਤਿਅਨ੍ਧਕਾਰੇ. ਅਪ੍ਪਦੀਪੇਤਿ ਪਜ੍ਜੋਤਚਨ੍ਦਸੂਰਿਯਅਗ੍ਗੀਸੁ ਏਕੇਕੇਨਾਪਿ ਅਨੋਭਾਸਿਤੇ. ਪੁਰਿਸੇਨਾਤਿ ਸਨ੍ਤਿਟ੍ਠਿਤੁਂ ਸਲ੍ਲਪਿਤੁਞ੍ਚ ਵਿਞ੍ਞੁਨਾ ਮਨੁਸ੍ਸਪੁਰਿਸੇਨ ਸਦ੍ਧਿਂ. ਸਨ੍ਤਿਟ੍ਠੇਯ੍ਯ ਵਾਤਿ ਹਤ੍ਥਪਾਸੇ ਠਿਤਮਤ੍ਤਾਯ ਪਾਚਿਤ੍ਤਿਯਂ. ਸਲ੍ਲਪੇਯ੍ਯਾਤਿ ਤਤ੍ਥ ਠਤ੍ਵਾ ਗੇਹਸਿਤਕਥਂ ਕਥੇਨ੍ਤਿਯਾਪਿ ਪਾਚਿਤ੍ਤਿਯਮੇਵ.
ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਏਵਂ ਸਨ੍ਤਿਟ੍ਠਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਪੁਰਿਸਸ੍ਸ ਹਤ੍ਥਪਾਸਂ ਵਿਜਹਿਤ੍ਵਾ, ਯਕ੍ਖਾਦੀਨਂ ਹਤ੍ਥਪਾਸਂ ਅਵਿਜਹਿਤ੍ਵਾਪਿ ਸਨ੍ਤਿਟ੍ਠਨ੍ਤਿਯਾ, ਸਲ੍ਲਪੇਨ੍ਤਿਯਾ ਵਾ ਦੁਕ੍ਕਟਂ, ਯਂਕਿਞ੍ਚਿ ਵਿਞ੍ਞੁਂ ਦੁਤਿਯਂ ਗਹੇਤ੍ਵਾ ਏਵਂ ਕਰੋਨ੍ਤਿਯਾ, ਅਰਹੋਪੇਕ੍ਖਾਯ, ਅਞ੍ਞਵਿਹਿਤਾਯ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਰਤ੍ਤਨ੍ਧਕਾਰਤਾ, ਪੁਰਿਸਸ੍ਸ ਹਤ੍ਥਪਾਸੇ ਠਾਨਂ ਵਾ ਸਲ੍ਲਪਨਂ ਵਾ, ਸਹਾਯਾਭਾਵੋ, ਰਹੋਪੇਕ੍ਖਤਾਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਥੇਯ੍ਯਸਤ੍ਥਸਮੁਟ੍ਠਾਨਂ, ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਤਿਵੇਦਨਨ੍ਤਿ.
ਰਤ੍ਤਨ੍ਧਕਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਪਟਿਚ੍ਛਨ੍ਨੋਕਾਸਸਿਕ੍ਖਾਪਦਵਣ੍ਣਨਾ
ਦੁਤਿਯੇ ਪਟਿਚ੍ਛਨ੍ਨੇ ਓਕਾਸੇਤਿ ਕੁਟ੍ਟਾਦੀਸੁ ਯੇਨ ਕੇਨਚਿ ਪਟਿਚ੍ਛਨ੍ਨੇ, ਇਦਮੇਵੇਤ੍ਥ ਨਾਨਤ੍ਤਂ.
ਪਟਿਚ੍ਛਨ੍ਨੋਕਾਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਅਜ੍ਝੋਕਾਸਸਲ੍ਲਪਨਸਿਕ੍ਖਾਪਦਵਣ੍ਣਨਾ
ਤਤਿਯੇ ਅਜ੍ਝੋਕਾਸੇਤਿ ਨਾਨਂ, ਸੇਸਂ ਉਭਯਤ੍ਥਾਪਿ ਪਠਮਸਦਿਸਮੇਵਾਤਿ.
ਅਜ੍ਝੋਕਾਸਸਲ੍ਲਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਦੁਤਿਯਿਕਉਯ੍ਯੋਜਨਸਿਕ੍ਖਾਪਦਵਣ੍ਣਨਾ
ਚਤੁਤ੍ਥੇ ਰਥਿਕਾਯਾਤਿ ਰਚ੍ਛਾਯਂ. ਬ੍ਯੂਹੇਤਿ ਅਨਿਵਿਦ੍ਧਰਚ੍ਛਾਯਂ. ਸਿਙ੍ਘਾਟਕੇਤਿ ਚਚ੍ਚਰੇ. ਨਿਕਣ੍ਣਿਕਂ ਵਾ ਜਪ੍ਪੇਯ੍ਯਾਤਿ ਕਣ੍ਣਮੂਲੇ ਕਿਞ੍ਚਿ ਜਪ੍ਪੇਯ੍ਯ. ਉਯ੍ਯੋਜੇਯ੍ਯਾਤਿ ਅਨਾਚਾਰਂ ਚਰਿਤੁਕਾਮਤਾਯ ‘‘ਗਚ੍ਛ ਤ੍ਵ’’ਨ੍ਤਿ ਦੁਤਿਯਿਕਂ ਉਯ੍ਯੋਜੇਯ੍ਯ. ਪਾਚਿਤ੍ਤਿਯਨ੍ਤਿ ਪੁਰਿਮਨਯੇਨੇਵ ਤਾਵ ਸਨ੍ਤਿਟ੍ਠਨਾਦੀਸੁ ਤੀਣਿ ਪਾਚਿਤ੍ਤਿਯਾਨਿ, ਉਯ੍ਯੋਜੇਨ੍ਤਿਯਾ ਪਨ ਉਯ੍ਯੋਜਨੇ ਚ ਹਤ੍ਥਪਾਸਵਿਜਹਨੇ ਚ ਦੁਕ੍ਕਟਂ, ਵਿਜਹਿਤੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਏਵਂ ਸਨ੍ਤਿਟ੍ਠਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਂ ਪੁਰਿਮਤ੍ਤਯਸਦਿਸਮੇਵ. ਅਨਾਪਤ੍ਤਿਯਂ ਪਨ ‘‘ਨ ਅਨਾਚਾਰਂ ਆਚਰਿਤੁਕਾਮਾ, ਸਤਿ ਕਰਣੀਯੇ ਦੁਤਿਯਿਕਂ ਭਿਕ੍ਖੁਨਿਂ ਉਯ੍ਯੋਜੇਤੀ’’ਤਿ (ਪਾਚਿ. ੮੫੨) ਏਤ੍ਤਕਂ ਅਧਿਕਨ੍ਤਿ.
ਦੁਤਿਯਿਕਉਯ੍ਯੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਅਨਾਪੁਚ੍ਛਾਪਕ੍ਕਮਨਸਿਕ੍ਖਾਪਦਵਣ੍ਣਨਾ
ਪਞ੍ਚਮੇ ਪੁਰੇਭਤ੍ਤਨ੍ਤਿ ਅਰੁਣੁਗ੍ਗਮਨਂ ਉਪਾਦਾਯ ਯਾਵ ਮਜ੍ਝਨ੍ਹਿਕਂ. ਆਸਨੇਤਿ ਪਲ੍ਲਙ੍ਕਸ੍ਸੋਕਾਸਭੂਤੇ. ਸਾਮਿਕੇ ਅਨਾਪੁਚ੍ਛਾਤਿ ਤਸ੍ਮਿਂ ਕੁਲੇ ਯਂਕਿਞ੍ਚਿ ਵਿਞ੍ਞੁਂ ਮਨੁਸ੍ਸਂ ਅਨਾਪੁਚ੍ਛਾ. ਪਕ੍ਕਮੇਯ੍ਯਾਤਿ ਏਤ੍ਥ ਛਨ੍ਨਸ੍ਸ ਅਨ੍ਤੋ ਨਿਸੀਦਿਤ੍ਵਾ ਅਨੋਵਸ੍ਸਕਂ ਅਜ੍ਝੋਕਾਸੇ ਉਪਚਾਰਂ ਅਤਿਕ੍ਕਾਮੇਨ੍ਤਿਯਾ ਪਠਮਪਾਦੇ ਦੁਕ੍ਕਟਂ, ਦੁਤਿਯੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਅਨਾਪੁਚ੍ਛਾ ਪਕ੍ਕਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਪਲ੍ਲਙ੍ਕਸ੍ਸ ਅਨੋਕਾਸੇ ਦੁਕ੍ਕਟਂ, ਤਥਾ ਆਪੁਚ੍ਛਿਤੇ ਅਨਾਪੁਚ੍ਛਿਤਸਞ੍ਞਾਯ ਚੇਵ ਵੇਮਤਿਕਾਯ ਚ. ਆਪੁਚ੍ਛਿਤਸਞ੍ਞਾਯ ਪਨ, ਅਸਂਹਾਰਿਮੇ, ਗਿਲਾਨਾਯ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਪੁਰੇਭਤ੍ਤਤਾ, ਅਨ੍ਤਰਘਰੇ ਨਿਸਜ੍ਜਾ, ਆਸਨਸ੍ਸ ਪਲ੍ਲਙ੍ਕੋਕਾਸਤਾ, ਅਞ੍ਞਤ੍ਰ ਅਨੁਞ੍ਞਾਤਕਾਰਣਾ ਅਨਾਪੁਚ੍ਛਨਂ, ਵੁਤ੍ਤਪਰਿਚ੍ਛੇਦਾਤਿਕ੍ਕਮੋਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਕਥਿਨਸਦਿਸਾਨਿ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.
ਅਨਾਪੁਚ੍ਛਾਪਕ੍ਕਮਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਅਨਾਪੁਚ੍ਛਾਅਭਿਨਿਸੀਦਨਸਿਕ੍ਖਾਪਦਵਣ੍ਣਨਾ
ਛਟ੍ਠੇ ਪਚ੍ਛਾਭਤ੍ਤਨ੍ਤਿ ਮਜ੍ਝਨ੍ਹਿਕੇ ਵੀਤਿਵਤ੍ਤੇ ਯਾਵ ਸੂਰਿਯਸ੍ਸ ਅਤ੍ਥਙ੍ਗਮਾ. ਅਭਿਨਿਸੀਦੇਯ੍ਯ ਵਾਤਿ ਆਦਿਮ੍ਹਿ ਨਿਸੀਦਿਤ੍ਵਾ ਗਚ੍ਛਨ੍ਤਿਯਾ ਏਕਾ ਆਪਤ੍ਤਿ, ਅਨਿਸੀਦਿਤ੍ਵਾ ਨਿਪਜ੍ਜਿਤ੍ਵਾਵ ਗਚ੍ਛਨ੍ਤਿਯਾਪਿ ਏਕਾ, ਨਿਸੀਦਿਤ੍ਵਾ ਨਿਪਜ੍ਜਨ੍ਤਿਯਾ ਦ੍ਵੇ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਆਸਨੇ ਅਭਿਨਿਸੀਦਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਂ ਪਞ੍ਚਮਸਦਿਸਮੇਵ. ਯਥਾ ਪਨ ਤਤ੍ਥ ਅਸਂਹਾਰਿਮੇ, ਏਵਮਿਧ ਧੁਵਪਞ੍ਞਤ੍ਤੇ ਅਨਾਪਤ੍ਤੀਤਿ.
ਅਨਾਪੁਚ੍ਛਾਅਭਿਨਿਸੀਦਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਅਨਾਪੁਚ੍ਛਾਸਨ੍ਥਰਣਸਿਕ੍ਖਾਪਦਵਣ੍ਣਨਾ
ਸਤ੍ਤਮੇ ਵਿਕਾਲੇਤਿ ਅਤ੍ਥਙ੍ਗਤੇ ਸੂਰਿਯੇ. ਸੇਯ੍ਯਨ੍ਤਿ ਅਨ੍ਤਮਸੋ ਪਣ੍ਣਸਨ੍ਥਾਰਮ੍ਪਿ, ਸੇਸਂ ਛਟ੍ਠਸਦਿਸਮੇਵ.
ਇਦਂ ਪਨ ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਵਿਕਾਲੇ ਕੁਲਾਨਿ ਉਪਸਙ੍ਕਮਿਤ੍ਵਾ ਸਾਮਿਕੇ ਅਨਾਪੁਚ੍ਛਿਤ੍ਵਾ ਸੇਯ੍ਯਂ ਸਨ੍ਥਰਿਤ੍ਵਾ ਅਭਿਨਿਸੀਦਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਨਾਪਤ੍ਤਿਯਞ੍ਚੇਤ੍ਥ ਧੁਵਪਞ੍ਞਤ੍ਤਂ ਨਾਮ ਨਤ੍ਥੀਤਿ.
ਅਨਾਪੁਚ੍ਛਾਸਨ੍ਥਰਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਪਰਉਜ੍ਝਾਪਨਕਸਿਕ੍ਖਾਪਦਵਣ੍ਣਨਾ
ਅਟ੍ਠਮੇ ਦੁਗ੍ਗਹਿਤੇਨ ਦੂਪਧਾਰਿਤੇਨਾਤਿ ਯਂ ਵੁਤ੍ਤਂ, ਤਤੋ ਅਞ੍ਞਥਾ ਗਹਿਤੇਨ ਚ ਉਪਧਾਰਿਤੇਨ ਚ. ਪਰਨ੍ਤਿ ‘‘ਅਹਂ ਕਿਰਯ੍ਯੇ ਅਯ੍ਯਂ ਨ ਸਕ੍ਕਚ੍ਚਂ ਉਪਟ੍ਠਹਾਮੀ’’ਤਿਆਦਿਨਾ (ਪਾਚਿ. ੮੬੯) ਨਯੇਨ ਉਪਸਮ੍ਪਨ੍ਨਂ ਉਜ੍ਝਾਪੇਨ੍ਤਿਯਾ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਏਵਂ ਪਰਂ ਉਜ੍ਝਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨਾਯ ਤਿਕਦੁਕ੍ਕਟਂ, ਉਮ੍ਮਤ੍ਤਿਕਾਦੀਨਂਯੇਵ ਅਨਾਪਤ੍ਤਿ. ਦੁਗ੍ਗਹਿਤਤਾ, ਉਜ੍ਝਾਪਨਂ, ਯਂ ਉਜ੍ਝਾਪੇਤਿ, ਤਸ੍ਸਾ ਉਪਸਮ੍ਪਨ੍ਨਤਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਨ੍ਤਿ.
ਪਰਉਜ੍ਝਾਪਨਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਪਰਅਭਿਸਪਨਸਿਕ੍ਖਾਪਦਵਣ੍ਣਨਾ
ਨਵਮੇ ਅਭਿਸਪੇਯ੍ਯਾਤਿ ਸਪਥਂ ਕਰੇਯ੍ਯ. ਤਤ੍ਥ ‘‘ਨਿਰਯੇ ਉਪਪਜ੍ਜਾਮਿ, ਨਿਰਯੇ ਉਪਪਜ੍ਜਤੂ’’ਤਿਏਵਮਾਦੀਨਿ ਵਦਮਾਨਾ ਨਿਰਯੇਨ ਅਭਿਸਪਤਿ ਨਾਮ, ਅਕ੍ਕੋਸਤੀਤਿ ਅਤ੍ਥੋ. ‘‘ਗਿਹਿਨੀ ਹੋਮਿ, ਗਿਹਿਨੀ ਹੋਤੂ’’ਤਿਏਵਮਾਦੀਨਿ ਵਦਮਾਨਾ ਬ੍ਰਹ੍ਮਚਰਿਯੇਨ. ਤਸ੍ਸਾ ਵਾਚਾਯ ਵਾਚਾਯ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਚਣ੍ਡਕਾਲ਼ਿਂ ਆਰਬ੍ਭ ਏਵਂ ਅਭਿਸਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨਾਯ ਤਿਕਦੁਕ੍ਕਟਂ, ਤਿਰਚ੍ਛਾਨਯੋਨਿਯਾ ਵਾ ਪੇਤ੍ਤਿਵਿਸਯੇਨ ਵਾ ਮਨੁਸ੍ਸਦੋਭਗ੍ਗੇਨ ਵਾ ਅਭਿਸਪਨੇ ਦੁਕ੍ਕਟਂ. ਅਤ੍ਥਧਮ੍ਮਾਨੁਸਾਸਨਿਪੁਰੇਕ੍ਖਾਰਾਨਂ ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਨਿਰਯੇਨ ਵਾ ਬ੍ਰਹ੍ਮਚਰਿਯੇਨ ਵਾ ਅਭਿਸਪਨਂ, ਉਪਸਮ੍ਪਨ੍ਨਤਾ, ਅਤ੍ਥਧਮ੍ਮਪੁਰੇਕ੍ਖਾਰਾਦੀਨਂ ਅਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਟ੍ਠਮਸਦਿਸਾਨੇਵਾਤਿ.
ਪਰਅਭਿਸਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਰੋਦਨਸਿਕ੍ਖਾਪਦਵਣ੍ਣਨਾ
ਦਸਮੇ ਵਧਿਤ੍ਵਾਤਿ ਹਤ੍ਥਾਦੀਹਿ ਪਹਰਿਤ੍ਵਾ, ਉਭਯਂ ਕਰੋਨ੍ਤਿਯਾਵ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਚਣ੍ਡਕਾਲ਼ਿਂ ਆਰਬ੍ਭ ਅਤ੍ਤਾਨਂ ਵਧਿਤ੍ਵਾ ਰੋਦਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਕੇਵਲਂ ਵਧਨ੍ਤਿਯਾ ਵਾ ਰੋਦਨ੍ਤਿਯਾ ਵਾ ਦੁਕ੍ਕਟਮੇਵ. ਞਾਤਿਰੋਗਭੋਗਬ੍ਯਸਨੇਹਿ ਫੁਟ੍ਠਾਯ ਕੇਵਲਂ ਰੋਦਨ੍ਤਿਯਾ ਏਵ ਨ ਵਧਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਅਤ੍ਤਾਨਂ ਵਧਨਞ੍ਚੇਵ, ਰੋਦਨਞ੍ਚਾਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਮਨੁਭਾਸਨਸਦਿਸਾਨਿ, ਇਦਂ ਪਨ ਕਿਰਿਯਮੇਵਾਤਿ.
ਰੋਦਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਰਤ੍ਤਨ੍ਧਕਾਰਵਗ੍ਗੋ ਦੁਤਿਯੋ.
੩. ਨਗ੍ਗਵਗ੍ਗੋ
੧. ਨਗ੍ਗਸਿਕ੍ਖਾਪਦਵਣ੍ਣਨਾ
ਨਗ੍ਗਵਗ੍ਗਸ੍ਸ ਪਠਮੇ ਨਗ੍ਗਾਤਿ ਅਨਿਵਤ੍ਥਾ ਵਾ ਅਪਾਰੁਤਾ ਵਾ. ਏਵਞ੍ਹਿ ਨਹਾਯਨ੍ਤਿਯਾ ਸਬ੍ਬਪ੍ਪਯੋਗੇਸੁ ਦੁਕ੍ਕਟਂ, ਨਹਾਨਪਰਿਯੋਸਾਨੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਏਵਂ ਨਹਾਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਉਦਕਸਾਟਿਕਚੀਵਰੇ ਅਚ੍ਛਿਨ੍ਨੇ ਵਾ ਨਟ੍ਠੇ ਵਾ, ‘‘ਮਹਗ੍ਘਂ ਇਦਂ ਦਿਸ੍ਵਾ ਚੋਰਾਪਿ ਹਰੇਯ੍ਯੁ’’ਨ੍ਤਿ ਏਵਰੂਪਾਸੁ ਆਪਦਾਸੁ ਵਾ ਨਹਾਯਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਨਗ੍ਗਤਾ, ਅਨੁਞ੍ਞਾਤਕਾਰਣਾਭਾਵੋ, ਨਹਾਨਪਰਿਯੋਸਾਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.
ਨਗ੍ਗਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਉਦਕਸਾਟਿਕਸਿਕ੍ਖਾਪਦਵਣ੍ਣਨਾ
ਦੁਤਿਯੇ ਸਾਵਤ੍ਥਿਯਂ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਆਰਬ੍ਭ ਅਪ੍ਪਮਾਣਿਕਾਯੋ ਉਦਕਸਾਟਿਕਾਯੋ ਧਾਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਮੇਤ੍ਥ ਸਬ੍ਬਂ ਰਤਨਵਗ੍ਗੇ ਨਿਸੀਦਨਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.
ਉਦਕਸਾਟਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਚੀਵਰਸਿਬ੍ਬਨਸਿਕ੍ਖਾਪਦਵਣ੍ਣਨਾ
ਤਤਿਯੇ ਵਿਸਿਬ੍ਬੇਤ੍ਵਾਤਿ ਦੁਸ੍ਸਿਬ੍ਬਿਤਂ ਪੁਨਸਿਬ੍ਬਨਤ੍ਥਾਯ ਵਿਸਿਬ੍ਬੇਤ੍ਵਾ. ਅਨਨ੍ਤਰਾਯਿਕਿਨੀਤਿ ਦਸਸੁ ਅਨ੍ਤਰਾਯੇਸੁ ਏਕੇਕਸ੍ਮਿਮ੍ਪਿ ਅਸਤਿ. ਅਞ੍ਞਤ੍ਰ ਚਤੂਹਪਞ੍ਚਾਹਾਤਿ ਵਿਸਿਬ੍ਬਿਤਦਿਵਸਤੋ ਪਞ੍ਚ ਦਿਵਸੇ ਅਤਿਕ੍ਕਾਮੇਤ੍ਵਾ ‘‘ਨੇਵ ਸਿਬ੍ਬਿਸ੍ਸਾਮਿ, ਨ ਸਿਬ੍ਬਾਪਨਾਯ ਉਸ੍ਸੁਕ੍ਕਂ ਕਰਿਸ੍ਸਾਮੀ’’ਤਿ ਧੁਰਂ ਨਿਕ੍ਖਿਤ੍ਤਮਤ੍ਤੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਚੀਵਰਂ ਵਿਸਿਬ੍ਬੇਤ੍ਵਾ ਨ ਸਿਬ੍ਬਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨਾਯ ਤਿਕਦੁਕ੍ਕਟਂ, ਤਥਾ ਉਭਿਨ੍ਨਮ੍ਪਿ ਅਞ੍ਞਸ੍ਮਿਂ ਪਰਿਕ੍ਖਾਰੇ. ਯਾ ਪਨ ਅਨ੍ਤਰਾਯਿਕਿਨੀ ਵਾ ਹੋਤਿ, ਪਰਿਯੇਸਿਤ੍ਵਾ ਵਾ ਕਿਞ੍ਚਿ ਨ ਲਭਤਿ, ਕਰੋਨ੍ਤੀ ਵਾ ਪਞ੍ਚਾਹਂ ਅਤਿਕ੍ਕਾਮੇਤਿ, ਤਸ੍ਸਾ ਚ, ਗਿਲਾਨਾਯ ਚ, ਆਪਦਾਸੁ ਚ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਨਿਵਾਸਨਪਾਰੁਪਨੁਪਗਚੀਵਰਤਾ, ਉਪਸਮ੍ਪਨ੍ਨਾਯ ਸਨ੍ਤਕਤਾ, ਸਿਬ੍ਬਨਤ੍ਥਾਯ ਵਿਸਿਬ੍ਬਨਂ ਵਾ ਵਿਸਿਬ੍ਬਾਪਨਂ ਵਾ, ਅਞ੍ਞਤ੍ਰ ਅਨੁਞ੍ਞਾਤਕਾਰਣਾ ਪਞ੍ਚਾਹਾਤਿਕ੍ਕਮੋ, ਧੁਰਨਿਕ੍ਖੇਪੋਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਮਨੁਭਾਸਨਸਦਿਸਾਨੀਤਿ.
ਚੀਵਰਸਿਬ੍ਬਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਸਙ੍ਘਾਟਿਚਾਰਸਿਕ੍ਖਾਪਦਵਣ੍ਣਨਾ
ਚਤੁਤ੍ਥੇ ਪਞ੍ਚ ਅਹਾਨਿ ਪਞ੍ਚਾਹਂ, ਪਞ੍ਚਾਹਮੇਵ ਪਞ੍ਚਾਹਿਕਂ. ਸਙ੍ਘਾਟੀਨਂ ਚਾਰੋ ਸਙ੍ਘਾਟਿਚਾਰੋ, ਪਰਿਭੋਗਵਸੇਨ ਵਾ ਓਤਾਪਨਵਸੇਨ ਵਾ ਸਙ੍ਘਟਿਤਟ੍ਠੇਨ ‘ਸਙ੍ਘਾਟੀ’ਤਿ ਲਦ੍ਧਨਾਮਂ ਤਿਚੀਵਰਂ, ਉਦਕਸਾਟਿਕਾ, ਸਂਕਚ੍ਚਿਕਾਤਿ ਇਮੇਸਂ ਪਞ੍ਚਨ੍ਨਂ ਚੀਵਰਾਨਂ ਪਰਿਵਤ੍ਤਨਨ੍ਤਿ ਅਤ੍ਥੋ. ਅਤਿਕ੍ਕਾਮੇਯ੍ਯ ਪਾਚਿਤ੍ਤਿਯਨ੍ਤਿ ਛਟ੍ਠੇ ਅਰੁਣੁਗ੍ਗਮਨੇ ਏਕਸ੍ਮਿਂ ਚੀਵਰੇ ਵੁਤ੍ਤਨਯੇਨ ਅਪਰਿਵਤ੍ਤਿਤੇ ਏਕਾ ਆਪਤ੍ਤਿ, ਪਞ੍ਚਸੁ ਪਞ੍ਚ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਚੀਵਰਂ ਨਿਕ੍ਖਿਪਿਤ੍ਵਾ ਸਨ੍ਤਰੁਤ੍ਤਰੇਨ ਜਨਪਦਚਾਰਿਕਂ ਪਕ੍ਕਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਪਞ੍ਚਾਹਾਨਤਿਕ੍ਕਨ੍ਤੇ ਦ੍ਵਿਕਦੁਕ੍ਕਟਂ. ਤਸ੍ਮਿਂ ਪਨ ਅਨਤਿਕ੍ਕਨ੍ਤਸਞ੍ਞਾਯ, ਪਞ੍ਚਮਂ ਦਿਵਸਂ ਪਞ੍ਚ ਚੀਵਰਾਨਿ ਨਿਵਾਸੇਨ੍ਤਿਯਾ ਵਾ ਪਾਰੁਪਨ੍ਤਿਯਾ ਵਾ ਓਤਾਪੇਨ੍ਤਿਯਾ ਵਾ, ਗਿਲਾਨਾਯ, ‘‘ਇਦਂ ਮੇ ਚੀਵਰਂ ਮਹਗ੍ਘਂ ਈਦਿਸੇ ਚੋਰਭਯੇ ਨ ਸਕ੍ਕਾ ਧਾਰੇਤੁ’’ਨ੍ਤਿ ਏਵਰੂਪਾਸੁ ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਪਞ੍ਚਨ੍ਨਂ ਚੀਵਰਾਨਂ ਅਞ੍ਞਤਰਤਾ, ਪਞ੍ਚਾਹਾਤਿਕ੍ਕਮੋ, ਅਨੁਞ੍ਞਾਤਕਾਰਣਾਭਾਵੋ, ਅਪਰਿਵਤ੍ਤਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਕਥਿਨਸਦਿਸਾਨੀਤਿ.
ਸਙ੍ਘਾਟਿਚਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਚੀਵਰਸਙ੍ਕਮਨੀਯਸਿਕ੍ਖਾਪਦਵਣ੍ਣਨਾ
ਪਞ੍ਚਮੇ ਚੀਵਰਸਙ੍ਕਮਨੀਯਨ੍ਤਿ ਸਙ੍ਕਮੇਤਬ੍ਬਂ ਚੀਵਰਂ, ਅਞ੍ਞਿਸ੍ਸਾ ਸਨ੍ਤਕਂ ਅਨਾਪੁਚ੍ਛਾ ਗਹਿਤਂ ਪੁਨ ਪਟਿਦਾਤਬ੍ਬਂ ਪਞ੍ਚਨ੍ਨਂ ਅਞ੍ਞਤਰਂ ਚੀਵਰਨ੍ਤਿ ਅਤ੍ਥੋ. ਧਾਰੇਯ੍ਯਾਤਿ ਸਚੇ ਤਂ ਨਿਵਾਸੇਤਿ ਵਾ ਪਾਰੁਪਤਿ ਵਾ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਭਿਕ੍ਖੁਨਿਯਾ ਚੀਵਰਂ ਆਦਾਯ ਅਨਾਪੁਚ੍ਛਾ ਪਾਰੁਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨਾਯ ਤਿਕਦੁਕ੍ਕਟਂ. ਯਾ ਪਨ ਤਾਯ ਵਾ ਦਿਨ੍ਨਂ, ਤਂ ਵਾ ਆਪੁਚ੍ਛਾ, ਅਚ੍ਛਿਨ੍ਨਨਟ੍ਠਚੀਵਰਿਕਾ ਵਾ ਹੁਤ੍ਵਾ, ‘‘ਇਦਂ ਮੇ ਚੀਵਰਂ ਮਹਗ੍ਘਂ ਈਦਿਸੇ ਚੋਰਭਯੇ ਨ ਸਕ੍ਕਾ ਧਾਰੇਤੁ’’ਨ੍ਤਿ ਏਵਰੂਪਾਸੁ ਆਪਦਾਸੁ ਵਾ ਧਾਰੇਤਿ, ਤਸ੍ਸਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਚੀਵਰਸਙ੍ਕਮਨੀਯਤਾ, ਉਪਸਮ੍ਪਨ੍ਨਾਯ ਸਨ੍ਤਕਤਾ, ਅਨੁਞ੍ਞਾਤਕਾਰਣਾਭਾਵੋ, ਧਾਰਣਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਕਥਿਨਸਦਿਸਾਨਿ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.
ਚੀਵਰਸਙ੍ਕਮਨੀਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਗਣਚੀਵਰਸਿਕ੍ਖਾਪਦਵਣ੍ਣਨਾ
ਛਟ੍ਠੇ ਗਣਸ੍ਸਾਤਿ ਭਿਕ੍ਖੁਨਿਸਙ੍ਘਸ੍ਸ. ਚੀਵਰਲਾਭਨ੍ਤਿ ਵਿਕਪ੍ਪਨੁਪਗਮ੍ਪਿ ਪਚ੍ਛਿਮਂ ਲਭਿਤਬ੍ਬਂ ਚੀਵਰਂ. ਅਨ੍ਤਰਾਯਂ ਕਰੇਯ੍ਯਾਤਿ ਯਥਾ ਤੇ ਦਾਤੁਕਾਮਾ ਨ ਦੇਨ੍ਤਿ, ਏਵਂ ਪਰਕ੍ਕਮੇਯ੍ਯ. ਪਾਚਿਤ੍ਤਿਯਨ੍ਤਿ ਸਚੇ ਤਸ੍ਸਾ ਵਚਨੇਨ ਤੇ ਨ ਦੇਨ੍ਤਿ, ਭਿਕ੍ਖੁਨਿਯਾ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਗਣਸ੍ਸ ਚੀਵਰਲਾਭਨ੍ਤਰਾਯਕਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਞ੍ਞਸ੍ਮਿਂ ਪਰਿਕ੍ਖਾਰੇ ਦੁਕ੍ਕਟਂ, ਸਮ੍ਬਹੁਲਾਨਂ ਪਨ ਏਕਭਿਕ੍ਖੁਨਿਯਾ ਵਾ ਚੀਵਰਲਾਭੇਪਿ ਦੁਕ੍ਕਟਮੇਵ. ‘‘ਸਮਗ੍ਘਕਾਲੇ ਦਸ੍ਸਥਾ’’ਤਿ ਏਵਂ ਆਨਿਸਂਸਂ ਦਸ੍ਸੇਤ੍ਵਾ ਨਿਵਾਰੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਵਿਕਪ੍ਪਨੁਪਗਪਚ੍ਛਿਮਤਾ, ਸਙ੍ਘਸ੍ਸ ਪਰਿਣਤਭਾਵੋ, ਵਿਨਾ ਆਨਿਸਂਸਦਸ੍ਸਨੇਨ ਅਨ੍ਤਰਾਯਕਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੀਤਿ.
ਗਣਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਪਟਿਬਾਹਨਸਿਕ੍ਖਾਪਦਵਣ੍ਣਨਾ
ਸਤ੍ਤਮੇ ਧਮ੍ਮਿਕਂ ਚੀਵਰਵਿਭਙ੍ਗਨ੍ਤਿ ਸਮਗ੍ਗੇਨ ਸਙ੍ਘੇਨ ਸਨ੍ਨਿਪਤਿਤ੍ਵਾ ਕਰੀਯਮਾਨਂ ਚੀਵਰਵਿਭਙ੍ਗ. ਪਟਿਬਾਹੇਯ੍ਯਾਤਿ ਪਟਿਸੇਧੇਯ੍ਯ, ਏਵਂ ਪਟਿਸੇਧੇਨ੍ਤਿਯਾ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਧਮ੍ਮਿਕਂ ਚੀਵਰਵਿਭਙ੍ਗਂ ਪਟਿਬਾਹਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਧਮ੍ਮਿਕੇ ਵੇਮਤਿਕਾਯ, ਅਧਮ੍ਮਿਕੇ ਧਮ੍ਮਿਕਸਞ੍ਞਾਯ ਚੇਵ ਵੇਮਤਿਕਾਯ ਚ ਦੁਕ੍ਕਟਂ. ਉਭਯਤ੍ਥ ਅਧਮ੍ਮਿਕਸਞ੍ਞਾਯ, ਆਨਿਸਂਸਂ ਦਸ੍ਸੇਤ੍ਵਾ ਪਟਿਬਾਹਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਚੀਵਰਵਿਭਙ੍ਗਸ੍ਸ ਧਮ੍ਮਿਕਤਾ, ਧਮ੍ਮਿਕਸਞ੍ਞਿਤਾ, ਵਿਨਾ ਆਨਿਸਂਸੇਨ ਪਟਿਬਾਹਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੇਵਾਤਿ.
ਪਟਿਬਾਹਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਚੀਵਰਦਾਨਸਿਕ੍ਖਾਪਦਵਣ੍ਣਨਾ
ਅਟ੍ਠਮੇ ਸਮਣਚੀਵਰਨ੍ਤਿ ਕਪ੍ਪਕਤਂ ਨਿਵਾਸਨਪਾਰੁਪਨੁਪਗਂ, ਏਵਰੂਪਂ ਠਪੇਤ੍ਵਾ ਪਞ੍ਚ ਸਹਧਮ੍ਮਿਕੇ ਮਾਤਾਪਿਤਰੋ ਚ ਯਸ੍ਸ ਕਸ੍ਸਚਿ ਗਹਟ੍ਠਸ੍ਸ ਵਾ ਪਬ੍ਬਜਿਤਸ੍ਸ ਵਾ ਪਰਿਚ੍ਚਜਿਤ੍ਵਾ ਦੇਨ੍ਤਿਯਾ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਅਗਾਰਿਕਸ੍ਸ ਸਮਣਚੀਵਰਦਾਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਭਿਕ੍ਖੁਨੋ ਦੁਕ੍ਕਟਂ. ਮਾਤਾਪਿਤੂਨਂ ਪਰਿਚ੍ਚਜਿਤ੍ਵਾਪਿ, ਅਞ੍ਞੇਸਂ ਤਾਵਕਾਲਿਕਮੇਵ ਦੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸਮਣਚੀਵਰਤਾ, ਠਪੇਤ੍ਵਾ ਸਹਧਮ੍ਮਿਕੇ ਚ ਮਾਤਾਪਿਤਰੋ ਚ ਅਞ੍ਞੇਸਂ ਦਾਨਂ, ਅਤਾਵਕਾਲਿਕਤਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤਸਦਿਸਾਨੀਤਿ.
ਚੀਵਰਦਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਕਾਲਅਤਿਕ੍ਕਮਨਸਿਕ੍ਖਾਪਦਵਣ੍ਣਨਾ
ਨਵਮੇ ਦੁਬ੍ਬਲਚੀਵਰਪਚ੍ਚਾਸਾਯਾਤਿ ਦੁਬ੍ਬਲਾਯ ਚੀਵਰਪਚ੍ਚਾਸਾਯ, ‘‘ਸਚੇ ਸਕ੍ਕੋਮ ਦਸ੍ਸਾਮਾ’’ਤਿ ਏਤ੍ਤਕਮਤ੍ਤਂ ਸੁਤ੍ਵਾ ਉਪ੍ਪਾਦਿਤਾਯ ਆਸਾਯਾਤਿ ਅਤ੍ਥੋ. ਚੀਵਰਕਾਲਸਮਯਂ ਅਤਿਕ੍ਕਾਮੇਯ੍ਯਾਤਿ ਵਸ੍ਸਂਵੁਟ੍ਠਭਿਕ੍ਖੁਨੀਹਿ ਕਾਲਚੀਵਰੇ ਭਾਜਿਯਮਾਨੇ ‘‘ਆਗਮੇਯ੍ਯਾਥ, ਅਯ੍ਯੇ, ਅਤ੍ਥਿ ਸਙ੍ਘਸ੍ਸ ਚੀਵਰਪਚ੍ਚਾਸਾ’’ਤਿ ਵਤ੍ਵਾ ਤਂ ਚੀਵਰਵਿਭਙ੍ਗਂ ਚੀਵਰਕਾਲਂ ਅਤਿਕ੍ਕਾਮੇਯ੍ਯ, ਤਸ੍ਸਾ ਅਨਤ੍ਥਤੇ ਕਥਿਨੇ ਵਸ੍ਸਾਨਸ੍ਸ ਪਚ੍ਛਿਮਮਾਸਂ, ਅਤ੍ਥਤੇ ਕਥਿਨੇ ਕਥਿਨੁਬ੍ਭਾਰਦਿਵਸਂ ਅਤਿਕ੍ਕਾਮੇਨ੍ਤਿਯਾ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਦੁਬ੍ਬਲਚੀਵਰਪਚ੍ਚਾਸਾਯ ਚੀਵਰਕਾਲਸਮਯਂ ਅਤਿਕ੍ਕਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਦੁਬ੍ਬਲਚੀਵਰੇ ਵੇਮਤਿਕਾਯ, ਅਦੁਬ੍ਬਲਚੀਵਰੇ ਦੁਬ੍ਬਲਚੀਵਰਸਞ੍ਞਾਯ ਚੇਵ ਵੇਮਤਿਕਾਯ ਚ ਦੁਕ੍ਕਟਂ. ਉਭਯਤ੍ਥ ਅਦੁਬ੍ਬਲਚੀਵਰਸਞ੍ਞਾਯ, ਕਿਞ੍ਚਾਪਿ ‘ਨ ਸਕ੍ਕੋਮਾ’ਤਿ ਵਦਨ੍ਤਿ, ‘‘ਇਦਾਨਿ ਪਨ ਤੇਸਂ ਕਪ੍ਪਾਸੋ ਵਾ ਉਪ੍ਪਜ੍ਜਿਸ੍ਸਤਿ, ਸਦ੍ਧੋ ਵਾ ਪੁਰਿਸੋ ਆਗਮਿਸ੍ਸਤਿ, ਤਸ੍ਮਿਂ ਆਗਤੇ ਅਦ੍ਧਾ ਦਸ੍ਸਨ੍ਤੀ’’ਤਿ ਏਵਂ ਆਨਿਸਂਸਂ ਦਸ੍ਸੇਤ੍ਵਾ ਨਿਵਾਰੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਦੁਬ੍ਬਲਚੀਵਰਤਾ, ਦੁਬ੍ਬਲਸਞ੍ਞਿਤਾ, ਵਿਨਾ ਆਨਿਸਂਸੇਨ ਨਿਵਾਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੀਤਿ.
ਕਾਲਅਤਿਕ੍ਕਮਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਕਥਿਨੁਦ੍ਧਾਰਸਿਕ੍ਖਾਪਦਵਣ੍ਣਨਾ
ਦਸਮੇ ਧਮ੍ਮਿਕਂ ਕਥਿਨੁਦ੍ਧਾਰਨ੍ਤਿ ਸਬ੍ਬਾਸਂ ਭਿਕ੍ਖੁਨੀਨਂ ਅਕਾਲਚੀਵਰਂ ਦਾਤੁਕਾਮੇਨ ਉਪਾਸਕੇਨ ਯਤ੍ਤਕੋ ਅਤ੍ਥਾਰਮੂਲਿਕੋ ਆਨਿਸਂਸੋ, ਤਤੋ ਅਧਿਕਂ ਵਾ ਸਮਕਂ ਵਾ ਦਤ੍ਵਾ ਯਾਚਿਤੇਨ ਸਮਗ੍ਗੇਨ ਭਿਕ੍ਖੁਨਿਸਙ੍ਘੇਨ ਯਂ ਕਥਿਨਂ ਞਤ੍ਤਿਦੁਤਿਯਕਮ੍ਮੇਨ ਅਨ੍ਤਰਾ ਉਦ੍ਧਰੀਯਤਿ, ਤਸ੍ਸ ਸੋ ਉਦ੍ਧਾਰੋ ‘ਧਮ੍ਮਿਕੋ’ਤਿ ਵੁਚ੍ਚਤਿ, ਏਵਰੂਪਂ ਕਥਿਨੁਦ੍ਧਾਰਨ੍ਤਿ ਅਤ੍ਥੋ. ਪਟਿਬਾਹੇਯ੍ਯਾਤਿ ਨਿਵਾਰੇਯ੍ਯ, ਤਸ੍ਸ ਏਵਰੂਪਂ ਕਥਿਨੁਦ੍ਧਾਰਂ ਨਿਵਾਰੇਨ੍ਤਿਯਾ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਕਥਿਨੁਦ੍ਧਾਰਂ ਪਟਿਬਾਹਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਂ ਸਤ੍ਤਮੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.
ਕਥਿਨੁਦ੍ਧਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਨਗ੍ਗਵਗ੍ਗੋ ਤਤਿਯੋ.
੪. ਤੁਵਟ੍ਟਵਗ੍ਗੋ
੧. ਏਕਮਞ੍ਚਤੁਵਟ੍ਟਨਸਿਕ੍ਖਾਪਦਵਣ੍ਣਨਾ
ਤੁਵਟ੍ਟਵਗ੍ਗਸ੍ਸ ਪਠਮੇ ਤੁਵਟ੍ਟੇਯ੍ਯੁਨ੍ਤਿ ਨਿਪਜ੍ਜੇਯ੍ਯੁਂ. ਤਾਸੁ ਪਨ ਏਕਾਯ ਵਾ ਨਿਪਨ੍ਨਾਯ ਅਪਰਾ ਨਿਪਜ੍ਜਤੁ, ਦ੍ਵੇਪਿ ਵਾ ਸਹੇਵ ਨਿਪਜ੍ਜਨ੍ਤੁ, ਦ੍ਵਿਨ੍ਨਮ੍ਪਿ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਦ੍ਵਿਨ੍ਨਂ ਏਕਮਞ੍ਚੇ ਤੁਵਟ੍ਟਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਚੇ ਪਨ ਏਕਾਯ ਨਿਪਨ੍ਨਾਯ ਏਕਾ ਨਿਸੀਦਤਿ, ਉਭੋ ਵਾ ਨਿਸੀਦਨ੍ਤਿ, ਤਾਸਂ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਏਕਮਞ੍ਚਤਾ, ਦ੍ਵਿਨ੍ਨਂ ਤੁਵਟ੍ਟਨਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.
ਏਕਮਞ੍ਚਤੁਵਟ੍ਟਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਏਕਤ੍ਥਰਣਤੁਵਟ੍ਟਨਸਿਕ੍ਖਾਪਦਵਣ੍ਣਨਾ
ਦੁਤਿਯੇ ਏਕਂ ਅਤ੍ਥਰਣਞ੍ਚੇਵ ਪਾਵੁਰਣਞ੍ਚ ਏਤਾਸਨ੍ਤਿ ਏਕਤ੍ਥਰਣਪਾਵੁਰਣਾ, ਸਂਹਾਰਿਮਾਨਂ ਪਾਵਾਰਤ੍ਥਰਣਕਟਸਾਰਕਾਦੀਨਂ ਏਕਂ ਅਨ੍ਤਂ ਅਤ੍ਥਰਿਤ੍ਵਾ ਏਕਂ ਪਾਰੁਪਿਤ੍ਵਾ ਤੁਵਟ੍ਟੇਨ੍ਤੀਨਮੇਤਂ ਅਧਿਵਚਨਂ. ਪਾਚਿਤ੍ਤਿਯਨ੍ਤਿ ਤਂਯੇਵ ਅਤ੍ਥਰਿਤ੍ਵਾ ਤਂ ਪਾਰੁਪਿਤ੍ਵਾ ਨਿਪਜ੍ਜਨ੍ਤੀਨਂ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਏਵਂ ਤੁਵਟ੍ਟਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਤ੍ਥਰਣੇ ਵਾ ਪਾਵੁਰਣੇ ਵਾ ਏਕਸ੍ਮਿਂ ਦੁਕ੍ਕਟਂ, ਨਾਨਤ੍ਥਰਣਪਾਵੁਰਣੇ ਦ੍ਵਿਕਦੁਕ੍ਕਟਂ. ਤਸ੍ਮਿਂ ਪਨ ਨਾਨਤ੍ਥਰਣਪਾਵੁਰਣਸਞ੍ਞਾਯ, ਵਵਤ੍ਥਾਨਂ ਦਸ੍ਸੇਤ੍ਵਾ ਨਿਪਜ੍ਜਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸੇਸਂ ਪਠਮਸਦਿਸਮੇਵਾਤਿ.
ਏਕਤ੍ਥਰਣਤੁਵਟ੍ਟਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਅਫਾਸੁਕਰਣਸਿਕ੍ਖਾਪਦਵਣ੍ਣਨਾ
ਤਤਿਯੇ ਅਫਾਸੁਨ੍ਤਿ ‘‘ਇਮਿਨਾ ਇਮਿਸ੍ਸਾ ਅਫਾਸੁ ਭਵਿਸ੍ਸਤੀ’’ਤਿ ਅਨਾਪੁਚ੍ਛਾ ਪੁਰਤੋ ਚਙ੍ਕਮਨਟ੍ਠਾਨਨਿਸ੍ਸਜ੍ਜਾਦਯੋ ਵਾ ਉਦ੍ਦਿਸਉਦ੍ਦਿਸਾਪਨਪਰਿਪੁਚ੍ਛਨਸਜ੍ਝਾਯਂ ਵਾ ਕਰੋਨ੍ਤਿਯਾ ਚਙ੍ਕਮਨੇ ਨਿਵਤ੍ਤਨਗਣਨਾਯ, ਠਾਨਾਦੀਸੁ ਪਯੋਗਗਣਨਾਯ, ਉਦ੍ਦੇਸਾਦੀਸੁ ਪਦਗਣਨਾਯ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਸਞ੍ਚਿਚ੍ਚ ਅਫਾਸੁਕਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨਾਯ ਤਿਕਦੁਕ੍ਕਟਂ, ਨ ਅਫਾਸੁਕਾਮਤਾਯ, ਆਪੁਚ੍ਛਾ ਪੁਰਤੋ ਚਙ੍ਕਮਨਾਦੀਨਿ ਕਰੋਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਉਪਸਮ੍ਪਨ੍ਨਤਾ, ਅਫਾਸੁਕਾਮਤਾ, ਅਫਾਸੁਕਰਣਂ, ਅਨਾਪੁਚ੍ਛਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਕਿਰਿਯਾਕਿਰਿਯਂ, ਦੁਕ੍ਖਵੇਦਨਨ੍ਤਿ.
ਅਫਾਸੁਕਰਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਨਉਪਟ੍ਠਾਪਨਸਿਕ੍ਖਾਪਦਵਣ੍ਣਨਾ
ਚਤੁਤ੍ਥੇ ਦੁਕ੍ਖਿਤਨ੍ਤਿ ਗਿਲਾਨਂ. ਸਹਜੀਵਿਨਿਨ੍ਤਿ ਸਦ੍ਧਿਵਿਹਾਰਿਨਿਂ. ਨੇਵ ਉਪਟ੍ਠਹੇਯ੍ਯਾਤਿ ਤਸ੍ਸਾ ਉਪਟ੍ਠਾਨਂ ਸਯਂ ਵਾ ਅਕਰੋਨ੍ਤਿਯਾ, ਪਰੇਹਿ ਵਾ ਅਕਾਰੇਨ੍ਤਿਯਾ ਧੁਰਂ ਨਿਕ੍ਖਿਤ੍ਤਮਤ੍ਤੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਦੁਕ੍ਖਿਤਂ ਸਹਜੀਵਿਨਿਂ ਅਨੁਪਟ੍ਠਾਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਨ੍ਤੇਵਾਸਿਨਿਯਾ ਵਾ ਅਨੁਪਸਮ੍ਪਨ੍ਨਾਯ ਵਾ ਦੁਕ੍ਕਟਂ, ਦਸਸੁ ਅਞ੍ਞਤਰਨ੍ਤਰਾਯੇ ਸਤਿ ਪਰਿਯੇਸਿਤ੍ਵਾ ਅਲਭਨ੍ਤਿਯਾ, ਗਿਲਾਨਾਯ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਗਿਲਾਨਤਾ, ਸਦ੍ਧਿਵਿਹਾਰਿਤਾ, ਅਨੁਞ੍ਞਾਤਕਾਰਣਾਭਾਵੋ, ਉਪਟ੍ਠਾਨੇ ਧੁਰਨਿਕ੍ਖੇਪੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਮਨੁਭਾਸਨਸਦਿਸਾਨੀਤਿ.
ਨਉਪਟ੍ਠਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਨਿਕ੍ਕਡ੍ਢਨਸਿਕ੍ਖਾਪਦਵਣ੍ਣਨਾ
ਪਞ੍ਚਮੇ ਉਪਸ੍ਸਯਂ ਦਤ੍ਵਾਤਿ ਸਕਵਾਟਬਦ੍ਧਂ ਅਤ੍ਤਨੋ ਪੁਗ੍ਗਲਿਕਵਿਹਾਰਂ ਦਤ੍ਵਾ. ਨਿਕ੍ਕਡ੍ਢੇਯ੍ਯਾਤਿ ਬਹੂਨਿਪਿ ਦ੍ਵਾਰਾਨਿ ਏਕਪ੍ਪਯੋਗੇਨ ਨਿਕ੍ਕਡ੍ਢੇਨ੍ਤਿਯਾ ਏਕਾ ਆਪਤ੍ਤਿ, ਨਾਨਾਪਯੋਗੇਹਿ ਪਯੋਗਗਣਨਾਯ ਆਪਤ੍ਤਿਯੋ, ਆਣਤ੍ਤਿਯਮ੍ਪਿ ਏਸੇਵ ਨਯੋ. ਸਚੇ ਪਨ ‘‘ਇਮਞ੍ਚਿਮਞ੍ਚ ਦ੍ਵਾਰਂ ਅਤਿਕ੍ਕਾਮੇਹੀ’’ਤਿ ਆਣਾਪੇਤਿ, ਏਕਾਯ ਆਣਤ੍ਤਿਯਾ ਏਵ ਦ੍ਵਾਰਗਣਨਾਯ ਆਪਤ੍ਤਿਯੋ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਏਤਾਦਿਸੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਕਵਾਟਬਦ੍ਧਤੋ ਦੁਕ੍ਕਟਂ, ਅਨੁਪਸਮ੍ਪਨ੍ਨਾਯ ਤਿਕਦੁਕ੍ਕਟਂ, ਸਕਵਾਟਬਦ੍ਧਤੋ ਵਾ ਅਕਵਾਟਬਦ੍ਧਤੋ ਵਾ ਉਭਿਨ੍ਨਮ੍ਪਿ ਪਰਿਕ੍ਖਾਰਨਿਕ੍ਕਡ੍ਢਨੇ ਦੁਕ੍ਕਟਮੇਵ, ਸੇਸਂ ਸਙ੍ਘਿਕਵਿਹਾਰਨਿਕ੍ਕਡ੍ਢਨਸਿਕ੍ਖਾਪਦੇ ਵੁਤ੍ਤਨਯਮੇਵਾਤਿ.
ਨਿਕ੍ਕਡ੍ਢਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਸਂਸਟ੍ਠਸਿਕ੍ਖਾਪਦਵਣ੍ਣਨਾ
ਛਟ੍ਠਂ ਉਤ੍ਤਾਨਪਦਤ੍ਥਮੇਵ. ਸਾਵਤ੍ਥਿਯਂ ਚਣ੍ਡਕਾਲ਼ਿਂ ਆਰਬ੍ਭ ਸਂਸਟ੍ਠਵਿਹਾਰਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਮੇਤ੍ਥ ਪਠਮਅਰਿਟ੍ਠਸਿਕ੍ਖਾਪਦੇ ਵੁਤ੍ਤਵਿਨਿਚ੍ਛਯਸਦਿਸਮੇਵਾਤਿ.
ਸਂਸਟ੍ਠਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਅਨ੍ਤੋਰਟ੍ਠਸਿਕ੍ਖਾਪਦਵਣ੍ਣਨਾ
ਸਤ੍ਤਮੇ ਅਨ੍ਤੋਰਟ੍ਠੇਤਿ ਯਸ੍ਸ ਵਿਜਿਤੇ ਵਿਹਰਤਿ, ਤਸ੍ਸ ਰਟ੍ਠੇ. ਅਸਤ੍ਥਿਕਾ ਚਾਰਿਕਨ੍ਤਿ ਵਿਨਾ ਸਤ੍ਥੇਨ ਗਚ੍ਛਨ੍ਤਿਯਾ, ਗਾਮਨ੍ਤਰਗਣਨਾਯ, ਅਗਾਮਕੇ ਅਰਞ੍ਞੇ ਅਦ੍ਧਯੋਜਨਗਣਨਾਯ ਪਾਚਿਤ੍ਤਿਯਂ.