੯. ਸੋਕਾਵਾਸਸਿਕ੍ਖਾਪਦਵਣ੍ਣਨਾ

ਨਵਮੇ ਸੋਕਾਵਾਸਨ੍ਤਿ ਸਙ੍ਕੇਤਂ ਕਤ੍ਵਾ ਆਗਚ੍ਛਮਾਨਾ ਪੁਰਿਸਾਨਂ ਅਨ੍ਤੋਸੋਕਂ ਪਵੇਸੇਤੀਤਿ ਸੋਕਾਵਾਸਾ, ਤਂ ਸੋਕਾਵਾਸਂ. ਅਥ ਵਾ ਘਰਂ ਵਿਯ ਘਰਸਾਮਿਕਾ ਅਯਮ੍ਪਿ ਪੁਰਿਸਸਮਾਗਮਂ ਅਲਭਮਾਨਾ ਸੋਕਂ ਆਵਿਸਤਿ, ਇਤਿ ਯਂ ਆਵਿਸਤਿ, ਸ੍ਵਾਸ੍ਸਾ ਆਵਾਸੋ ਹੋਤੀਤਿ ਸੋਕਾਵਾਸਾ. ਤੇਨੇਵਸ੍ਸ ਪਦਭਾਜਨੇ (ਪਾਚਿ. ੧੧੬੦) ‘‘ਸੋਕਾਵਾਸਾ ਨਾਮ ਪਰੇਸਂ ਦੁਕ੍ਖਂ ਉਪ੍ਪਾਦੇਤਿ, ਸੋਕਂ ਆਵਿਸਤੀ’’ਤਿ ਦ੍ਵਿਧਾ ਅਤ੍ਥੋ ਵੁਤ੍ਤੋ. ਪਾਚਿਤ੍ਤਿਯਨ੍ਤਿ ਏਵਰੂਪਂ ਵੁਟ੍ਠਾਪੇਨ੍ਤਿਯਾ ਵੁਤ੍ਤਨਯੇਨੇਵ ਕਮ੍ਮਵਾਚਾਪਰਿਯੋਸਾਨੇ ਉਪਜ੍ਝਾਯਾਯ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਏਵਰੂਪਂ ਸਿਕ੍ਖਮਾਨਂ ਵੁਟ੍ਠਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ. ਅਜਾਨਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸੋਕਾਵਾਸਤਾ, ਜਾਨਨਂ, ਵੁਟ੍ਠਾਪਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਗਬ੍ਭਿਨਿਵੁਟ੍ਠਾਪਨਸਦਿਸਾਨੇਵਾਤਿ.

ਸੋਕਾਵਾਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.