੮. ਕੁਮਾਰਿਭੂਤਵਗ੍ਗੋ

੧-੨-੩. ਪਠਮਕੁਮਾਰਿਭੂਤਾਦਿਸਿਕ੍ਖਾਪਦਵਣ੍ਣਨਾ

ਕੁਮਾਰਿਭੂਤਵਗ੍ਗਸ੍ਸ ਪਠਮਦੁਤਿਯਤਤਿਯਾਨਿ ਤੀਹਿ ਗਿਹਿਗਤਸਿਕ੍ਖਾਪਦੇਹਿ ਸਦਿਸਾਨੇਵ. ਯਾ ਪਨ ਤਾ ਸਬ੍ਬਪਠਮਾ ਦ੍ਵੇ ਮਹਾਸਿਕ੍ਖਮਾਨਾ, ਤਾ ਅਤਿਕ੍ਕਨ੍ਤਵੀਸਤਿਵਸ੍ਸਾਤਿ ਵੇਦਿਤਬ੍ਬਾ. ਤਾ ਹਿ ਗਿਹਿਗਤਾ ਵਾ ਹੋਨ੍ਤੁ, ਅਗਿਹਿਗਤਾ ਵਾ, ਸਮ੍ਮੁਤਿਕਮ੍ਮਾਦੀਸੁ ‘‘ਸਿਕ੍ਖਮਾਨਾ’’ਇਚ੍ਚੇਵ ਵਤ੍ਤਬ੍ਬਾ, ‘‘ਗਿਹਿਗਤਾ’’ਤਿ ਵਾ ‘‘ਕੁਮਾਰਿਭੂਤਾ’’ਤਿ ਵਾ ਨ ਵਤ੍ਤਬ੍ਬਾ. ਗਿਹਿਗਤਾਯ ਦਸਵਸ੍ਸਕਾਲੇ ਸਿਕ੍ਖਾਸਮ੍ਮੁਤਿਂ ਦਤ੍ਵਾ ਦ੍ਵਾਦਸਵਸ੍ਸਕਾਲੇ ਉਪਸਮ੍ਪਦਾ ਕਾਤਬ੍ਬਾ, ਏਕਾਦਸਵਸ੍ਸਕਾਲੇ ਦਤ੍ਵਾ ਤੇਰਸਵਸ੍ਸਕਾਲੇ ਕਾਤਬ੍ਬਾ, ਦ੍ਵਾਦਸਤੇਰਸਚੁਦ੍ਦਸਪਨ੍ਨਰਸਸੋਲ਼ਸਸਤ੍ਤਰਸਅਟ੍ਠਾਰਸਵਸ੍ਸਕਾਲੇ ਸਿਕ੍ਖਾਸਮ੍ਮੁਤਿਂ ਦਤ੍ਵਾ ਵੀਸਤਿਵਸ੍ਸਕਾਲੇ ਉਪਸਮ੍ਪਦਾ ਕਾਤਬ੍ਬਾ. ਅਟ੍ਠਾਰਸਵਸ੍ਸਕਾਲਤੋ ਪਟ੍ਠਾਯ ਚ ਪਨਾਯਂ ‘‘ਗਿਹਿਗਤਾ’’ਤਿਪਿ ‘‘ਕੁਮਾਰਿਭੂਤਾ’’ਤਿਪਿ ਵਤ੍ਤੁਂ ਵਟ੍ਟਤਿ. ਯਾ ਪਨਾਯਂ ‘‘ਕੁਮਾਰਿਭੂਤਾ’’ਤਿ ਵੁਤ੍ਤਾ ਸਾਮਣੇਰੀ, ਸਾ ‘‘ਗਿਹਿਗਤਾ’’ਤਿ ਨ ਵਤ੍ਤਬ੍ਬਾ, ‘‘ਕੁਮਾਰਿਭੂਤਾ’’ਇਚ੍ਚੇਵ ਵਤ੍ਤਬ੍ਬਾ. ਸਿਕ੍ਖਾਸਮ੍ਮੁਤਿਦਾਨਵਸੇਨ ਪਨ ਸਬ੍ਬਾਪਿ ‘‘ਸਿਕ੍ਖਮਾਨਾ’’ਤਿ ਵਤ੍ਤੁਂ ਵਟ੍ਟਤੀਤਿ.

ਪਠਮਕੁਮਾਰਿਭੂਤਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਊਨਦ੍ਵਾਦਸਵਸ੍ਸਸਿਕ੍ਖਾਪਦਵਣ੍ਣਨਾ

ਚਤੁਤ੍ਥੇ ਊਨਦ੍ਵਾਦਸਵਸ੍ਸਾਤਿ ਉਪਸਮ੍ਪਦਾਵਸੇਨ ਅਪਰਿਪੁਣ੍ਣਦ੍ਵਾਦਸਵਸ੍ਸਾ. ਪਾਚਿਤ੍ਤਿਯਨ੍ਤਿ ਉਪਜ੍ਝਾਯਾ ਹੁਤ੍ਵਾ ਵੁਟ੍ਠਾਪੇਨ੍ਤਿਯਾ ਵੁਤ੍ਤਨਯੇਨੇਵ ਦੁਕ੍ਕਟਾਨਿ ਅਨ੍ਤਰਾ, ਕਮ੍ਮਵਾਚਾਪਰਿਯੋਸਾਨੇ ਪਾਚਿਤ੍ਤਿਯਨ੍ਤਿ.

ਊਨਦ੍ਵਾਦਸਵਸ੍ਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਪਰਿਪੁਣ੍ਣਦ੍ਵਾਦਸਵਸ੍ਸਸਿਕ੍ਖਾਪਦਵਣ੍ਣਨਾ

ਪਞ੍ਚਮੇ ਸਙ੍ਘੇਨ ਅਸਮ੍ਮਤਾਤਿ ਯਸ੍ਸਾ ਸਙ੍ਘੇਨ ਪਦਭਾਜਨੇ (ਪਾਚਿ. ੧੧੩੨) ਵੁਤ੍ਤਾ ਵੁਟ੍ਠਾਪਨਸਮ੍ਮੁਤਿ ਨ ਦਿਨ੍ਨਾ. ਸੇਸਂ ਉਭਯਤ੍ਥਾਪਿ ਮਹਾਸਿਕ੍ਖਮਾਨਾਸਿਕ੍ਖਾਪਦਦ੍ਵਯਸਦਿਸਮੇਵਾਤਿ.

ਪਰਿਪੁਣ੍ਣਦ੍ਵਾਦਸਵਸ੍ਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਖੀਯਨਧਮ੍ਮਸਿਕ੍ਖਾਪਦਵਣ੍ਣਨਾ

ਛਟ੍ਠੇ ਅਲਂ ਤਾਵ ਤੇ ਅਯ੍ਯੇ ਵੁਟ੍ਠਾਪਿਤੇਨਾਤਿ ਵੁਚ੍ਚਮਾਨਾਤਿ ਵੁਟ੍ਠਾਪਨਸਮ੍ਮੁਤਿਯਾ ਯਾਚਿਤਾਯ ਸਙ੍ਘੇਨ ਉਪਪਰਿਕ੍ਖਿਪਿਤ੍ਵਾ ‘‘ਯਸ੍ਮਾ ਬਾਲਾ ਅਬ੍ਯਤ੍ਤਾ ਚ ਅਲਜ੍ਜਿਨੀ ਚ ਹੋਤਿ, ਤਸ੍ਮਾ ਅਲਂ ਤਾਵ ਤੁਯ੍ਹਂ ਉਪਸਮ੍ਪਾਦਿਤੇਨਾ’’ਤਿ ਏਵਂ ਨਿਵਾਰੀਯਮਾਨਾ. ਪਚ੍ਛਾ ਖੀਯਨਧਮ੍ਮਨ੍ਤਿ ਪਚ੍ਛਾ ਅਞ੍ਞਾਸਂ ਬ੍ਯਤ੍ਤਾਨਂ ਲਜ੍ਜਿਨੀਨਂ ਵੁਟ੍ਠਾਪਨਸਮ੍ਮੁਤਿਂ ਦਿਯ੍ਯਮਾਨਂ ਦਿਸ੍ਵਾ ‘‘ਅਹਮੇਵ ਨੂਨ ਬਾਲਾ’’ਤਿਆਦੀਨਿ ਭਣਮਾਨਾ ਯਤ੍ਥ ਕਤ੍ਥਚਿ ਖੀਯੇਯ੍ਯ. ਪਾਚਿਤ੍ਤਿਯਨ੍ਤਿ ਏਵਂ ਖੀਯਨਧਮ੍ਮਂ ਆਪਜ੍ਜਨ੍ਤਿਯਾ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਚਣ੍ਡਕਾਲ਼ਿਂ ਆਰਬ੍ਭ ਏਵਂ ਖੀਯਨਧਮ੍ਮਂ ਆਪਜ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਪਕਤਿਯਾ ਛਨ੍ਦਾਦੀਨਂ ਵਸੇਨ ਕਰੋਨ੍ਤੀਨਂ ਖੀਯਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਵੁਟ੍ਠਾਪਨਸਮ੍ਮੁਤਿਯਾ ਯਾਚਨਂ, ਉਪਪਰਿਕ੍ਖਿਤ੍ਵਾ ਨ ਛਨ੍ਦਾਦਿਵਸੇਨ ਪਟਿਕ੍ਖਿਤ੍ਤਾਯ ‘‘ਸਾਧੂ’’ਤਿ ਪਟਿਸ੍ਸਵੋ, ਪਚ੍ਛਾਖੀਯਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਨ੍ਤਿ.

ਖੀਯਨਧਮ੍ਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭-੮. ਸਿਕ੍ਖਮਾਨਨਵੁਟ੍ਠਾਪਨਪਠਮਦੁਤਿਯਸਿਕ੍ਖਾਪਦਵਣ੍ਣਨਾ

ਸਤ੍ਤਮੇ ਸਾ ਪਚ੍ਛਾਤਿ ਸਿਕ੍ਖਮਾਨਾਯ ਉਪਸਮ੍ਪਦਾਯ ਯਾਚਿਯਮਾਨਾਯ ਸਾ ਭਿਕ੍ਖੁਨੀ ਏਵਂ ਵਤ੍ਵਾ ਲਦ੍ਧੇ ਚੀਵਰੇ ਪਚ੍ਛਾ ਅਸਤਿ ਅਨ੍ਤਰਾਯੇ ‘‘ਨੇਵ ਵੁਟ੍ਠਾਪੇਸ੍ਸਾਮਿ, ਨ ਵੁਟ੍ਠਾਪਨਾਯ ਉਸ੍ਸੁਕ੍ਕਂ ਕਰਿਸ੍ਸਾਮੀ’’ਤਿ ਧੁਰਂ ਨਿਕ੍ਖਿਪੇਯ੍ਯ, ਤਸ੍ਸਾ ਸਹ ਧੁਰਨਿਕ੍ਖੇਪੇਨ ਪਾਚਿਤ੍ਤਿਯਨ੍ਤਿ. ਅਟ੍ਠਮੇਪਿ ਏਸੇਵ ਨਯੋ.

ਉਭਯਮ੍ਪਿ ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਏਤੇਸੁ ਵਤ੍ਥੂਸੁ ਪਞ੍ਞਤ੍ਤਂ, ਦ੍ਵੀਸੁਪਿ ਸਤਿ ਅਨ੍ਤਰਾਯੇ, ਪਰਿਯੇਸਿਤ੍ਵਾ ਅਲਭਨ੍ਤਿਯਾ, ਗਿਲਾਨਾਯ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਉਭਯਤ੍ਥ ‘‘ਏਵਾਹਂ ਤਂ ਵੁਟ੍ਠਾਪੇਸ੍ਸਾਮੀ’’ਤਿ ਪਟਿਞ੍ਞਾ, ਆਕਙ੍ਖਿਤਨਿਪ੍ਫਤ੍ਤਿ, ਪਚ੍ਛਾ ਧੁਰਨਿਕ੍ਖੇਪੋ, ਅਨੁਞ੍ਞਾਤਕਾਰਣਾਭਾਵੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਮਨੁਭਾਸਨਸਦਿਸਾਨੀਤਿ.

ਸਿਕ੍ਖਮਾਨਨਵੁਟ੍ਠਾਪਨਪਠਮਦੁਤਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਸੋਕਾਵਾਸਸਿਕ੍ਖਾਪਦਵਣ੍ਣਨਾ

ਨਵਮੇ ਸੋਕਾਵਾਸਨ੍ਤਿ ਸਙ੍ਕੇਤਂ ਕਤ੍ਵਾ ਆਗਚ੍ਛਮਾਨਾ ਪੁਰਿਸਾਨਂ ਅਨ੍ਤੋਸੋਕਂ ਪਵੇਸੇਤੀਤਿ ਸੋਕਾਵਾਸਾ, ਤਂ ਸੋਕਾਵਾਸਂ. ਅਥ ਵਾ ਘਰਂ ਵਿਯ ਘਰਸਾਮਿਕਾ ਅਯਮ੍ਪਿ ਪੁਰਿਸਸਮਾਗਮਂ ਅਲਭਮਾਨਾ ਸੋਕਂ ਆਵਿਸਤਿ, ਇਤਿ ਯਂ ਆਵਿਸਤਿ, ਸ੍ਵਾਸ੍ਸਾ ਆਵਾਸੋ ਹੋਤੀਤਿ ਸੋਕਾਵਾਸਾ. ਤੇਨੇਵਸ੍ਸ ਪਦਭਾਜਨੇ (ਪਾਚਿ. ੧੧੬੦) ‘‘ਸੋਕਾਵਾਸਾ ਨਾਮ ਪਰੇਸਂ ਦੁਕ੍ਖਂ ਉਪ੍ਪਾਦੇਤਿ, ਸੋਕਂ ਆਵਿਸਤੀ’’ਤਿ ਦ੍ਵਿਧਾ ਅਤ੍ਥੋ ਵੁਤ੍ਤੋ. ਪਾਚਿਤ੍ਤਿਯਨ੍ਤਿ ਏਵਰੂਪਂ ਵੁਟ੍ਠਾਪੇਨ੍ਤਿਯਾ ਵੁਤ੍ਤਨਯੇਨੇਵ ਕਮ੍ਮਵਾਚਾਪਰਿਯੋਸਾਨੇ ਉਪਜ੍ਝਾਯਾਯ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਏਵਰੂਪਂ ਸਿਕ੍ਖਮਾਨਂ ਵੁਟ੍ਠਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ. ਅਜਾਨਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸੋਕਾਵਾਸਤਾ, ਜਾਨਨਂ, ਵੁਟ੍ਠਾਪਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਗਬ੍ਭਿਨਿਵੁਟ੍ਠਾਪਨਸਦਿਸਾਨੇਵਾਤਿ.

ਸੋਕਾਵਾਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਅਨਨੁਞ੍ਞਾਤਸਿਕ੍ਖਾਪਦਵਣ੍ਣਨਾ

ਦਸਮੇ ਮਾਤਾਪਿਤੂਹੀਤਿ ਵਿਜਾਤਮਾਤਰਾ ਚ ਜਨਕਪਿਤਰਾ ਚ. ਸਾਮਿਕੇਨਾਤਿ ਯੇਨ ਪਰਿਗ੍ਗਹਿਤਾ, ਤੇਨ. ਅਨਨੁਞ੍ਞਾਤਨ੍ਤਿ ਉਪਸਮ੍ਪਦਤ੍ਥਾਯ ਅਨਨੁਞ੍ਞਾਤਂ. ਦ੍ਵਿਕ੍ਖਤ੍ਤੁਞ੍ਹਿ ਭਿਕ੍ਖੁਨੀਹਿ ਆਪੁਚ੍ਛਿਤਬ੍ਬਂ, ਪਬ੍ਬਜ੍ਜਾਕਾਲੇ ਚ ਉਪਸਮ੍ਪਦਾਕਾਲੇ ਚ, ਭਿਕ੍ਖੂਨਂ ਪਨ ਸਕਿਂ ਆਪੁਚ੍ਛਿਤੇਪਿ ਵਟ੍ਟਤਿ. ਤਸ੍ਮਾ ਯਾ ਉਪਸਮ੍ਪਦਾਕਾਲੇ ਅਨਾਪੁਚ੍ਛਾ ਉਪਸਮ੍ਪਾਦੇਤਿ, ਤਸ੍ਸਾ ਵੁਤ੍ਤਨਯੇਨੇਵ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਅਨਨੁਞ੍ਞਾਤਵੁਟ੍ਠਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ. ਅਪਲੋਕੇਤ੍ਵਾ ਵੁਟ੍ਠਾਪੇਨ੍ਤਿਯਾ, ਤੇਸਂ ਅਤ੍ਥਿਭਾਵਂ ਅਜਾਨਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਅਨਪਲੋਕਨਂ, ਅਤ੍ਥਿਭਾਵਜਾਨਨਂ, ਵੁਟ੍ਠਾਪਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਅਨਨੁਞ੍ਞਾਤਸਮੁਟ੍ਠਾਨਂ, ਕਿਰਿਯਾਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਅਨਨੁਞ੍ਞਾਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੧. ਪਾਰਿਵਾਸਿਕਸਿਕ੍ਖਾਪਦਵਣ੍ਣਨਾ

ਏਕਾਦਸਮੇ ਪਾਰਿਵਾਸਿਕਛਨ੍ਦਦਾਨੇਨਾਤਿ ਪਾਰਿਵਾਸਿਯੇਨ ਛਨ੍ਦਦਾਨੇਨ. ਤਤ੍ਥ ਚਤੁਬ੍ਬਿਧਂ ਪਾਰਿਵਾਸਿਯਂ ਪਰਿਸਪਾਰਿਵਾਸਿਯਂ ਰਤ੍ਤਿਪਾਰਿਵਾਸਿਯਂ ਛਨ੍ਦਪਾਰਿਵਾਸਿਯਂ ਅਜ੍ਝਾਸਯਪਾਰਿਵਾਸਿਯਨ੍ਤਿ.

ਤਤ੍ਥ ਪਰਿਸਪਾਰਿਵਾਸਿਯਂ ਨਾਮ ਭਿਕ੍ਖੂ ਕੇਨਚਿਦੇਵ ਕਰਣੀਯੇਨ ਸਨ੍ਨਿਪਤਿਤਾ ਹੋਨ੍ਤਿ, ਅਥ ਮੇਘੋ ਵਾ ਉਟ੍ਠਹਤਿ, ਉਸ੍ਸਾਰਣਾ ਵਾ ਕਰੀਯਤਿ, ਮਨੁਸ੍ਸਾ ਵਾ ਅਜ੍ਝੋਤ੍ਥਰਨ੍ਤਾ ਆਗਚ੍ਛਨ੍ਤਿ, ਭਿਕ੍ਖੂ ‘‘ਅਨੋਕਾਸਾ ਮਯਂ, ਅਞ੍ਞਤ੍ਰ ਗਚ੍ਛਾਮਾ’’ਤਿ ਛਨ੍ਦਂ ਅਵਿਸ੍ਸਜ੍ਜਿਤ੍ਵਾਵ ਉਟ੍ਠਹਨ੍ਤਿ, ਇਦਂ ਪਰਿਸਪਾਰਿਵਾਸਿਯਂ ਨਾਮ, ਕਿਞ੍ਚਾਪਿ ਪਰਿਸਪਾਰਿਵਾਸਿਯਂ, ਛਨ੍ਦਸ੍ਸ ਪਨ ਅਵਿਸ੍ਸਟ੍ਠਤ੍ਤਾ ਕਮ੍ਮਂ ਕਾਤੁਂ ਵਟ੍ਟਤਿ.

ਪੁਨ ਭਿਕ੍ਖੂ ‘‘ਉਪੋਸਥਾਦੀਨਿ ਕਰਿਸ੍ਸਾਮਾ’’ਤਿ ਰਤ੍ਤਿਂ ਸਨ੍ਨਿਪਤਿਤ੍ਵਾ ‘‘ਯਾਵ ਸਬ੍ਬੇ ਸਨ੍ਨਿਪਤਨ੍ਤਿ, ਤਾਵ ਧਮ੍ਮਂ ਸੁਣਿਸ੍ਸਾਮਾ’’ਤਿ ਏਕਂ ਅਜ੍ਝੇਸਨ੍ਤਿ, ਤਸ੍ਮਿਂ ਧਮ੍ਮਕਥਂ ਕਥੇਨ੍ਤੇਯੇਵ ਅਰੁਣੋ ਉਗ੍ਗਚ੍ਛਤਿ. ਸਚੇ ‘‘ਚਾਤੁਦ੍ਦਸਿਕਂ ਉਪੋਸਥਂ ਕਰਿਸ੍ਸਾਮਾ’’ਤਿ ਨਿਸਿਨ੍ਨਾ, ‘‘ਪਨ੍ਨਰਸੋ’’ਤਿ ਕਾਤੁਂ ਵਟ੍ਟਤਿ. ਸਚੇ ਪਨ੍ਨਰਸਿਕਂ ਕਾਤੁਂ ਨਿਸਿਨ੍ਨਾ, ਪਾਟਿਪਦੇ ਅਨੁਪੋਸਥੇ ਉਪੋਸਥਂ ਕਾਤੁਂ ਨ ਵਟ੍ਟਤਿ. ਅਞ੍ਞਂ ਪਨ ਸਙ੍ਘਕਿਚ੍ਚਂ ਕਾਤੁਂ ਵਟ੍ਟਤਿ, ਇਦਂ ਰਤ੍ਤਿਪਾਰਿਵਾਸਿਯਂ ਨਾਮ.

ਪੁਨ ਭਿਕ੍ਖੂ ‘‘ਕਿਞ੍ਚਿਦੇਵ ਅਬ੍ਭਾਨਾਦਿਸਙ੍ਘਕਮ੍ਮਂ ਕਰਿਸ੍ਸਾਮਾ’’ਤਿ ਸਨ੍ਨਿਸਿਨ੍ਨਾ ਹੋਨ੍ਤਿ, ਤਤ੍ਰੇਕੋ ਨਕ੍ਖਤ੍ਤਪਾਠਕੋ ਭਿਕ੍ਖੁ ਏਵਂ ਵਦਤਿ ‘‘ਅਜ੍ਜ ਨਕ੍ਖਤ੍ਤਂ ਦਾਰੁਣਂ, ਮਾ ਇਦਂ ਕਮ੍ਮਂ ਕਰੋਥਾ’’ਤਿ. ਤੇ ਤਸ੍ਸ ਵਚਨੇਨ ਛਨ੍ਦਂ ਵਿਸ੍ਸਜ੍ਜੇਤ੍ਵਾ ਤਤ੍ਥੇਵ ਨਿਸਿਨ੍ਨਾ ਹੋਨ੍ਤਿ, ਅਥਞ੍ਞੋ ਆਗਨ੍ਤ੍ਵਾ ‘‘ਨਕ੍ਖਤ੍ਤਂ ਪਤਿਮਾਨੇਨ੍ਤਂ, ਅਤ੍ਥੋ ਬਾਲਂ ਉਪਜ੍ਝਗਾ (ਜਾ. ੧.੧.੪੯), ਕਿਂ ਨਕ੍ਖਤ੍ਤੇਨ ਕਰੋਥਾ’’ਤਿ ਵਦਤਿ, ਇਦਂ ਛਨ੍ਦਪਾਰਿਵਾਸਿਯਞ੍ਚੇਵ ਅਜ੍ਝਾਸਯਪਾਰਿਵਾਸਿਯਞ੍ਚ. ਏਤਸ੍ਮਿਂ ਪਾਰਿਵਾਸਿਯੇ ਪੁਨ ਛਨ੍ਦਪਾਰਿਸੁਦ੍ਧਿਂ ਅਨਾਹਰਿਤ੍ਵਾ ਕਮ੍ਮਂ ਕਾਤੁਂ ਨ ਵਟ੍ਟਤਿ, ਇਦਂ ਸਨ੍ਧਾਯ ਵੁਤ੍ਤਂ ‘‘ਪਾਰਿਵਾਸਿਕਛਨ੍ਦਦਾਨੇਨਾ’’ਤਿ. ਪਾਚਿਤ੍ਤਿਯਨ੍ਤਿ ਏਵਂ ਵੁਟ੍ਠਾਪੇਨ੍ਤਿਯਾ ਵੁਤ੍ਤਨਯੇਨੇਵ ਕਮ੍ਮਵਾਚਾਪਰਿਯੋਸਾਨੇ ਪਾਚਿਤ੍ਤਿਯਂ.

ਰਾਜਗਹੇ ਥੁਲ੍ਲਨਨ੍ਦਂ ਆਰਬ੍ਭ ਏਵਂ ਵੁਟ੍ਠਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ. ਛਨ੍ਦਂ ਅਵਿਸ੍ਸਜ੍ਜੇਤ੍ਵਾਵ ਅਵੁਟ੍ਠਿਤਾਯ ਪਰਿਸਾਯ ਵੁਟ੍ਠਾਪੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਪਾਰਿਵਾਸਿਕਛਨ੍ਦਦਾਨਤਾ, ਵੁਟ੍ਠਾਪਨਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਗਮ੍ਭਿਨਿਸਿਕ੍ਖਾਪਦਸਦਿਸਾਨੇਵਾਤਿ.

ਪਾਰਿਵਾਸਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੨. ਅਨੁਵਸ੍ਸਸਿਕ੍ਖਾਪਦਵਣ੍ਣਨਾ

ਦ੍ਵਾਦਸਮੇ ਅਨੁਵਸ੍ਸਨ੍ਤਿ ਅਨੁਸਂਵਚ੍ਛਰਂ. ਏਵਂ ਵੁਟ੍ਠਾਪੇਨ੍ਤਿਯਾਪਿ ਵੁਤ੍ਤਨਯੇਨੇਵ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਅਨੁਵਸ੍ਸਂ ਵੁਟ੍ਠਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ. ਏਕਨ੍ਤਰਿਕਂ ਵੁਟ੍ਠਾਪੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਅਨੁਵਸ੍ਸਤਾ, ਵੁਟ੍ਠਾਪਨਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਕਾਦਸਮੇ ਵੁਤ੍ਤਨਯਾਨੇਵਾਤਿ.

ਅਨੁਵਸ੍ਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੩. ਏਕਵਸ੍ਸਸਿਕ੍ਖਾਪਦਵਣ੍ਣਨਾ

ਤੇਰਸਮੇ ਏਕਨ੍ਤਰਿਕਂ ਏਕਂ ਵੁਟ੍ਠਾਪੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸੇਸਂ ਦ੍ਵਾਦਸਮੇਨ ਸਦਿਸਮੇਵਾਤਿ.

ਏਕਵਸ੍ਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਕੁਮਾਰਿਭੂਤਵਗ੍ਗੋ ਅਟ੍ਠਮੋ.