੭. ਗਬ੍ਭਿਨੀਵਗ੍ਗੋ
੧. ਗਬ੍ਭਿਨੀਸਿਕ੍ਖਾਪਦਵਣ੍ਣਨਾ
ਗਬ੍ਭਿਨਿਵਗ੍ਗਸ੍ਸ ਪਠਮੇ ‘‘ਗਬ੍ਭਿਨੀ’’ਤਿ ਜਾਨਿਤ੍ਵਾ ਉਪਜ੍ਝਾਯਾਯ ਵੁਟ੍ਠਾਪੇਨ੍ਤਿਯਾ ਗਣਪਰਿਯੇਸਨਾਦੀਸੁ ਚ ਞਤ੍ਤਿਕਮ੍ਮਵਾਚਾਦ੍ਵਯੇ ਚ ਦੁਕ੍ਕਟਂ, ਕਮ੍ਮਵਾਚਾਪਰਿਯੋਸਾਨੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਗਬ੍ਭਿਨਿਂ ਵੁਟ੍ਠਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਗਬ੍ਭਿਨਿਯਾ ਵੇਮਤਿਕਾਯ ਅਗਬ੍ਭਿਨਿਯਾ ਗਬ੍ਭਿਨਿਸਞ੍ਞਾਯ ਚੇਵ ਵੇਮਤਿਕਾਯ ਚ ਦੁਕ੍ਕਟਂ. ਉਭੋਸੁ ਅਗਬ੍ਭਿਨਿਸਞ੍ਞਾਯ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਗਬ੍ਭਿਨਿਤਾ, ‘ਗਬ੍ਭਿਨੀ’ਤਿ ਜਾਨਨਂ, ਵੁਟ੍ਠਾਪਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਪਣ੍ਣਤ੍ਤਿਵਜ੍ਜਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.
ਗਬ੍ਭਿਨੀਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਪਾਯਨ੍ਤੀਸਿਕ੍ਖਾਪਦਵਣ੍ਣਨਾ
ਦੁਤਿਯੇ ਪਾਯਨ੍ਤਿਨ੍ਤਿ ਥਞ੍ਞਂ ਪਾਯਮਾਨਂ, ਯਂ ਪਾਯੇਤਿ, ਤਸ੍ਸ ਮਾਤਾ ਵਾ, ਧਾਤਿ ਵਾ. ਇਦਂ ਵਤ੍ਥੁਮਤ੍ਤਮੇਵੇਤ੍ਥ ਵਿਸੇਸੋ, ਸੇਸਂ ਪਠਮਸਿਕ੍ਖਾਪਦਸਦਿਸਮੇਵਾਤਿ.
ਪਾਯਨ੍ਤੀਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਪਠਮਸਿਕ੍ਖਮਾਨਸਿਕ੍ਖਾਪਦਵਣ੍ਣਨਾ
ਤਤਿਯੇ ਦ੍ਵੇ ਵਸ੍ਸਾਨੀਤਿ ਪਵਾਰਣਾਵਸੇਨ ਦ੍ਵੇ ਸਂਵਚ੍ਛਰਾਨਿ. ਛਸੁ ਧਮ੍ਮੇਸੂਤਿ ਪਾਣਾਤਿਪਾਤਾਵੇਰਮਣਿਆਦੀਸੁ ਵਿਕਾਲਭੋਜਨਾਵੇਰਮਣਿਪਰਿਯੋਸਾਨੇਸੁ ਛਸੁ ਸਿਕ੍ਖਾਪਦੇਸੁ. ਅਸਿਕ੍ਖਿਤਸਿਕ੍ਖਨ੍ਤਿ ਪਦਭਾਜਨੇ (ਪਾਚਿ. ੧੦੭੭) ਵੁਤ੍ਤਨਯੇਨੇਵ ਅਦਿਨ੍ਨਸਿਕ੍ਖਂ ਵਾ ਕੁਪਿਤਸਿਕ੍ਖਂ ਵਾ. ਸਿਕ੍ਖਮਾਨਂ ਵੁਟ੍ਠਾਪੇਯ੍ਯਾਤਿ ਤੇਸੁ ਛਸੁ ਧਮ੍ਮੇਸੁ ਸਿਕ੍ਖਨਤੋ, ਤੇ ਵਾ ਸਿਕ੍ਖਾਸਙ੍ਖਾਤੇ ਧਮ੍ਮੇ ਮਾਨਨਤੋ ਏਵਂਲਦ੍ਧਨਾਮਂ ਅਨੁਪਸਮ੍ਪਨ੍ਨਂ ਉਪਸਮ੍ਪਾਦੇਯ੍ਯ. ਪਾਚਿਤ੍ਤਿਯਨ੍ਤਿ ਪਠਮਸਿਕ੍ਖਾਪਦੇ ਵੁਤ੍ਤਨਯੇਨੇਵ ਕਮ੍ਮਵਾਚਾਪਰਿਯੋਸਾਨੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਏਵਰੂਪਂ ਸਿਕ੍ਖਮਾਨਂ ਵੁਟ੍ਠਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਧਮ੍ਮਕਮ੍ਮੇ ਤਿਕਪਾਚਿਤ੍ਤਿਯਂ, ਅਧਮ੍ਮਕਮ੍ਮੇ ਤਿਕਦੁਕ੍ਕਟਂ. ਦ੍ਵੇ ਵਸ੍ਸਾਨਿ ਛਸੁ ਧਮ੍ਮੇਸੁ ਸਿਕ੍ਖਿਤਸਿਕ੍ਖਂ ਸਿਕ੍ਖਮਾਨਂ ਵੁਟ੍ਠਾਪੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਵੁਤ੍ਤਨਯੇਨ ਅਸਿਕ੍ਖਿਤਸਿਕ੍ਖਤਾ, ਧਮ੍ਮਕਮ੍ਮਤਾ, ਕਮ੍ਮਵਾਚਾਪਰਿਯੋਸਾਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮੇ ਵੁਤ੍ਤਨਯਾਨੇਵਾਤਿ.
ਪਠਮਸਿਕ੍ਖਮਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਦੁਤਿਯਸਿਕ੍ਖਮਾਨਸਿਕ੍ਖਾਪਦਵਣ੍ਣਨਾ
ਚਤੁਤ੍ਥੇ ਸਙ੍ਘੇਨ ਅਸਮ੍ਮਤਨ੍ਤਿ ਯਸ੍ਸਾ ਸਙ੍ਘੇਨ ਅਨ੍ਤਮਸੋ ਉਪਸਮ੍ਪਦਾਮਾਲ਼ਕੇਪਿ ਪਦਭਾਜਨੇ (ਪਾਚਿ. ੧੦੮੬) ਵੁਤ੍ਤਾ ਉਪਸਮ੍ਪਦਾਸਮ੍ਮੁਤਿ ਨ ਦਿਨ੍ਨਾ ਹੋਤਿ, ਤਂ ਇਮਾ ਦ੍ਵੇਪਿ ਮਹਾਸਿਕ੍ਖਮਾਨਾ ਨਾਮ. ਇਧ ਸਙ੍ਘੇਨ ਸਮ੍ਮਤਂ ਵੁਟ੍ਠਾਪੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸੇਸਂ ਤਤਿਯੇ ਵੁਤ੍ਤਸਦਿਸਮੇਵ, ਇਦਂ ਪਨ ਕਿਰਿਯਾਕਿਰਿਯਂ ਹੋਤੀਤਿ.
ਦੁਤਿਯਸਿਕ੍ਖਮਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਪਠਮਗਿਹਿਗਤਸਿਕ੍ਖਾਪਦਵਣ੍ਣਨਾ
ਪਞ੍ਚਮੇ ਗਿਹਿਗਤਨ੍ਤਿ ਪੁਰਿਸਨ੍ਤਰਗਤਂ, ਇਧਾਪਿ ਇਦਂ ਵਤ੍ਥੁਮਤ੍ਤਮੇਵ ਵਿਸੇਸੋ. ਊਨਦ੍ਵਾਦਸਵਸ੍ਸਞ੍ਚ ਪਰਿਪੁਣ੍ਣਸਞ੍ਞਾਯ ਵੁਟ੍ਠਾਪੇਨ੍ਤਿਯਾ ਕਿਞ੍ਚਾਪਿ ਅਨਾਪਤ੍ਤਿ, ਸਾ ਪਨ ਅਨੁਪਸਮ੍ਪਨ੍ਨਾਵ ਹੋਤਿ. ਸੇਸਂ ਪਠਮਸਿਕ੍ਖਾਪਦਸਦਿਸਮੇਵਾਤਿ.
ਪਠਮਗਿਹਿਗਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬-੭. ਦੁਤਿਯਤਤਿਯਗਿਹਿਗਤਸਿਕ੍ਖਾਪਦਵਣ੍ਣਨਾ
ਛਟ੍ਠੇ ਸਬ੍ਬਂ ਤਤਿਯੇ ਵੁਤ੍ਤਨਯੇਨ. ਸਤ੍ਤਮੇਪਿ ਸਬ੍ਬਂ ਚਤੁਤ੍ਥੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.
ਦੁਤਿਯਤਤਿਯਗਿਹਿਗਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਪਠਮਸਹਜੀਵਿਨਿਸਿਕ੍ਖਾਪਦਵਣ੍ਣਨਾ
ਅਟ੍ਠਮੇ ਸਹਜੀਵਿਨਿਨ੍ਤਿ ਸਦ੍ਧਿਵਿਹਾਰਿਨਿਂ. ਨੇਵ ਅਨੁਗ੍ਗਣ੍ਹੇਯ੍ਯਾਤਿ ਸਯਂ ਉਦ੍ਦੇਸਾਦੀਹਿ ਨਾਨੁਗ੍ਗਣ੍ਹੇਯ੍ਯ. ਨ ਅਨੁਗ੍ਗਣ੍ਹਾਪੇਯ੍ਯਾਤਿ ‘‘ਇਮਿਸ੍ਸਾ, ਅਯ੍ਯੇ, ਉਦ੍ਦੇਸਾਦੀਨਿ ਦੇਹੀ’’ਤਿ ਏਵਂ ਨ ਅਞ੍ਞਾਯ ਅਨੁਗ੍ਗਣ੍ਹਾਪੇਯ੍ਯ. ਪਾਚਿਤ੍ਤਿਯਨ੍ਤਿ ਧੁਰੇ ਨਿਕ੍ਖਿਤ੍ਤਮਤ੍ਤੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਏਵਰੂਪੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਮੇਤ੍ਥ ਤੁਵਟ੍ਟਵਗ੍ਗੇ ਦੁਕ੍ਖਿਤਸਹਜੀਵਿਨਿਸਿਕ੍ਖਾਪਦੇ ਵੁਤ੍ਤਸਦਿਸਮੇਵਾਤਿ.
ਪਠਮਸਹਜੀਵਿਨਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਨਾਨੁਬਨ੍ਧਨਸਿਕ੍ਖਾਪਦਵਣ੍ਣਨਾ
ਨਵਮੇ ਵੁਟ੍ਠਾਪਿਤਂ ਪਵਤ੍ਤਿਨਿਨ੍ਤਿ ਵੁਟ੍ਠਾਪਿਤਂ ਪਵਤ੍ਤਿਨਿਂ ਯਾਯ ਉਪਸਮ੍ਪਾਦਿਤਾ, ਤਂ ਉਪਜ੍ਝਾਯਿਨਿਨ੍ਤਿ ਅਤ੍ਥੋ. ਨਾਨੁਬਨ੍ਧੇਯ੍ਯਾਤਿ ਚੁਣ੍ਣੇਨ ਮਤ੍ਤਿਕਾਯ ਦਨ੍ਤਕਟ੍ਠੇਨ ਮੁਖੋਦਕੇਨਾਤਿ ਏਵਂ ਤੇਨ ਤੇਨ ਕਰਣੀਯੇਨ ਨ ਉਪਟ੍ਠਹੇਯ੍ਯ. ਪਾਚਿਤ੍ਤਿਯਨ੍ਤਿ ਨਾਨੁਬਨ੍ਧਿਸ੍ਸਨ੍ਤਿ ਧੁਰੇ ਨਿਕ੍ਖਿਤ੍ਤਮਤ੍ਤੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਨਾਨੁਬਨ੍ਧਨਵਤ੍ਥੁਸ੍ਮਿਂ ਪਞ੍ਞਤ੍ਤਂ. ਬਾਲਂ ਪਨ ਅਲਜ੍ਜਿਨਿਂ ਵਾ ਅਨਨੁਬਨ੍ਧਨ੍ਤਿਯਾ, ਗਿਲਾਨਾਯ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਵੁਟ੍ਠਾਪਿਤਪ੍ਪਵਤ੍ਤਿਨਿਤਾ, ਦ੍ਵੇ ਵਸ੍ਸਾਨਿ ਅਨਨੁਬਨ੍ਧਨੇ ਧੁਰਨਿਕ੍ਖੇਪੋ, ਅਨੁਞ੍ਞਾਤਕਾਰਣਾਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਦਿਸਾਨਿ, ਇਦਂ ਪਨ ਅਕਿਰਿਯਂ, ਦੁਕ੍ਖਵੇਦਨਨ੍ਤਿ.
ਨਾਨੁਬਨ੍ਧਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਦੁਤਿਯਸਹਜੀਵਿਨਿਸਿਕ੍ਖਾਪਦਵਣ੍ਣਨਾ
ਦਸਮੇ ਨੇਵ ਵੂਪਕਾਸੇਯ੍ਯਾਤਿ ਨ ਗਹੇਤ੍ਵਾ ਗਚ੍ਛੇਯ੍ਯ. ਨ ਵੂਪਕਾਸਾਪੇਯ੍ਯਾਤਿ ‘‘ਇਮਂ, ਅਯ੍ਯੇ, ਗਹੇਤ੍ਵਾ ਗਚ੍ਛਾਹੀ’’ਤਿ ਅਞ੍ਞਂ ਨ ਆਣਾਪੇਯ੍ਯ. ਪਾਚਿਤ੍ਤਿਯਨ੍ਤਿ ਧੁਰੇ ਨਿਕ੍ਖਿਤ੍ਤਮਤ੍ਤੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਸਹਜੀਵਿਨਿਯਾ ਅਵੂਪਕਾਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ. ਸਤਿ ਪਨ ਅਨ੍ਤਰਾਯੇ, ਪਰਿਯੇਸਿਤ੍ਵਾ ਦੁਤਿਯਿਕਂ ਅਲਭਨ੍ਤਿਯਾ, ਗਿਲਾਨਾਯ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸਹਜੀਵਿਨਿਤਾ, ਵੂਪਕਾਸਵੂਪਕਾਸਾਪਨੇ ਧੁਰਨਿਕ੍ਖੇਪੋ, ਅਨੁਞ੍ਞਾਤਕਾਰਣਾਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਮਨੁਭਾਸਨਸਦਿਸਾਨੀਤਿ.
ਦੁਤਿਯਸਹਜੀਵਿਨਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਗਬ੍ਭਿਨੀਵਗ੍ਗੋ ਸਤ੍ਤਮੋ.