੬. ਆਰਾਮਵਗ੍ਗੋ

੧. ਆਰਾਮਪਵਿਸਨਸਿਕ੍ਖਾਪਦਵਣ੍ਣਨਾ

ਆਰਾਮਵਗ੍ਗਸ੍ਸ ਪਠਮੇ ਸਭਿਕ੍ਖੁਕਂ ਆਰਾਮਨ੍ਤਿ ਯਤ੍ਥ ਭਿਕ੍ਖੂ ਰੁਕ੍ਖਮੂਲੇਪਿ ਵਸਨ੍ਤਿ, ਤਂ ਪਦੇਸਂ. ਅਨਾਪੁਚ੍ਛਾਤਿ ਏਤ੍ਥ ਭਿਕ੍ਖੁਸਾਮਣੇਰਆਰਾਮਿਕੇਸੁ ਯਂਕਿਞ੍ਚਿ ਅਨਾਪੁਚ੍ਛਾ, ਪਰਿਕ੍ਖਿਤ੍ਤਸ੍ਸ ਆਰਾਮਸ੍ਸ ਪਰਿਕ੍ਖੇਪਂ ਅਤਿਕ੍ਕਮਨ੍ਤਿਯਾ, ਅਪਰਿਕ੍ਖਿਤ੍ਤਸ੍ਸ ਉਪਚਾਰਂ ਓਕ੍ਕਮਨ੍ਤਿਯਾ ਪਠਮਪਾਦੇ ਦੁਕ੍ਕਟਂ, ਦੁਤਿਯਪਾਦੇ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਅਨਾਪੁਚ੍ਛਾ ਆਰਾਮਂ ਪਵਿਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ’’ਤਿ ਚ ‘‘ਜਾਨਂ ਸਭਿਕ੍ਖੁਕ’’ਨ੍ਤਿ ਚ ਇਮਾਨੇਤ੍ਥ ਦ੍ਵੇ ਅਨੁਪਞ੍ਞਤ੍ਤਿਯੋ, ਸਭਿਕ੍ਖੁਕੇ ਵੇਮਤਿਕਾਯ, ਅਭਿਕ੍ਖੁਕੇ ਸਭਿਕ੍ਖੁਕਸਞ੍ਞਾਯ ਚੇਵ ਵੇਮਤਿਕਾਯ ਚ ਦੁਕ੍ਕਟਂ. ਤਸ੍ਮਿਂ ਪਨ ਦੁਵਿਧੇਪਿ ਅਭਿਕ੍ਖੁਕਸਞ੍ਞਾਯ, ਸਨ੍ਤਂ ਭਿਕ੍ਖੁਂ ਆਪੁਚ੍ਛਾ ਪਵਿਸਨ੍ਤਿਯਾ, ਪਠਮਪ੍ਪਵਿਟ੍ਠਾਨਂ ਵਾ ਭਿਕ੍ਖੁਨੀਨਂ ਸੀਸਂਨੁਲੋਕਿਕਾਯ, ਯਤ੍ਥ ਵਾ ਭਿਕ੍ਖੁਨਿਯੋ ਸਨ੍ਨਿਪਤਿਤਾ, ਤਤ੍ਥ ‘‘ਤਾਸਂ ਸਨ੍ਤਿਕਂ ਗਚ੍ਛਾਮੀ’’ਤਿ ਸਞ੍ਞਾਯ, ਆਰਾਮੇਨ ਵਾ ਮਗ੍ਗੋ ਹੋਤਿ, ਤੇਨ ਗਚ੍ਛਨ੍ਤਿਯਾ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸਭਿਕ੍ਖੁਕਾਰਾਮਤਾ, ਸਭਿਕ੍ਖੁਕਸਞ੍ਞਿਤਾ, ਵੁਤ੍ਤਪਰਿਚ੍ਛੇਦਾਤਿਕ੍ਕਮੋ, ਅਨੁਞ੍ਞਾਤਕਾਰਣਾਭਾਵੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮਨੁਭਾਸਨਸਮਉਟ੍ਠਾਨਂ, ਕਿਰਿਯਾਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਆਰਾਮਪਵਿਸਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਭਿਕ੍ਖੁਅਕ੍ਕੋਸਨਸਿਕ੍ਖਾਪਦਵਣ੍ਣਨਾ

ਦੁਤਿਯੇ ਅਕ੍ਕੋਸੇਯ੍ਯਾਤਿ ਦਸਨ੍ਨਂ ਅਕ੍ਕੋਸਵਤ੍ਥੂਨਂ ਅਞ੍ਞਤਰੇਨ ਸਮ੍ਮੁਖਾ ਵਾ ਪਰਮ੍ਮੁਖਾ ਵਾ ਅਕ੍ਕੋਸੇਯ੍ਯ. ਪਰਿਭਾਸੇਯ੍ਯਾਤਿ ਭਯਮਸ੍ਸ ਉਪਦਂਸੇਯ੍ਯ. ਪਾਚਿਤ੍ਤਿਯਨ੍ਤਿ ਤਸ੍ਸਾ ਏਵਂ ਕਰੋਨ੍ਤਿਯਾ ਪਾਚਿਤ੍ਤਿਯਂ.

ਵੇਸਾਲਿਯਂ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਆਰਬ੍ਭ ਆਯਸ੍ਮਨ੍ਤਂ ਉਪਾਲਿਂ ਅਕ੍ਕੋਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨੇ ਤਿਕਦੁਕ੍ਕਟਂ, ਅਤ੍ਥਧਮ੍ਮਅਨੁਸਾਸਨਿਪੁਰੇਕ੍ਖਾਰਾਯ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਉਪਸਮ੍ਪਨ੍ਨਤਾ, ਅਕ੍ਕੋਸਨਪਰਿਭਾਸਨਂ, ਅਤ੍ਥਪੁਰੇਕ੍ਖਾਰਤਾਦੀਨਂ ਅਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਨ੍ਤਿ.

ਭਿਕ੍ਖੁਅਕ੍ਕੋਸਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਗਣਪਰਿਭਾਸਨਸਿਕ੍ਖਾਪਦਵਣ੍ਣਨਾ

ਤਤਿਯੇ ਚਣ੍ਡਿਕਤਾਤਿ ਕੁਦ੍ਧਾ. ਗਣਨ੍ਤਿ ਭਿਕ੍ਖੁਨਿਸਙ੍ਘਂ. ਪਰਿਭਾਸੇਯ੍ਯਾਤਿ ਏਤ੍ਥ ‘‘ਬਾਲਾ ਏਤਾ ਅਬ੍ਯਤ੍ਤਾ ਏਤਾ, ਨੇਤਾ ਜਾਨਨ੍ਤਿ ਕਮ੍ਮਂ ਵਾ ਕਮ੍ਮਦੋਸਂ ਵਾ ਕਮ੍ਮਸਮ੍ਪਤ੍ਤਿਂ ਵਾ ਕਮ੍ਮਵਿਪਤ੍ਤਿਂ ਵਾ’’ਤਿ ਏਵਂ ਯਤ੍ਥ ਕਤ੍ਥਚਿ ਪਰਿਭਾਸਨ੍ਤਿਯਾ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਗਣਂ ਪਰਿਭਾਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਮ੍ਬਹੁਲਾ ਵਾ ਏਕਂ ਵਾ ਅਨੁਪਸਮ੍ਪਨ੍ਨਂ ਵਾ ਪਰਿਭਾਸਨ੍ਤਿਯਾ ਦੁਕ੍ਕਟਂ. ਸੇਸਂ ਦੁਤਿਯਸਦਿਸਮੇਵਾਤਿ.

ਗਣਪਰਿਭਾਸਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਪਵਾਰਿਤਸਿਕ੍ਖਾਪਦਵਣ੍ਣਨਾ

ਚਤੁਤ੍ਥੇ ਗਣਭੋਜਨੇ ਵੁਤ੍ਤਨਯੇਨ ਨਿਮਨ੍ਤਿਤਾ, ਪਵਾਰਣਾਸਿਕ੍ਖਾਪਦੇ ਵੁਤ੍ਤਨਯੇਨ ਪਵਾਰਿਤਾ ਵੇਦਿਤਬ੍ਬਾ. ਪਾਚਿਤ੍ਤਿਯਨ੍ਤਿ ਤਸ੍ਸਾ ਪੁਰੇਭਤ੍ਤਂ ਠਪੇਤ੍ਵਾ ਯਾਗੁਞ੍ਚੇਵ ਸੇਸਾਨਿ ਚ ਤੀਣਿ ਕਾਲਿਕਾਨਿ ਅਞ੍ਞਂ ਯਂਕਿਞ੍ਚਿ ਆਮਿਸਂ ਅਜ੍ਝੋਹਰਣਤ੍ਥਾਯ ਪਟਿਗ੍ਗਣ੍ਹਨ੍ਤਿਯਾ ਗਹਣੇ ਦੁਕ੍ਕਟਂ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਅਞ੍ਞਤ੍ਰ ਭੁਞ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤੀਣਿ ਕਾਲਿਕਾਨਿ ਆਹਾਰਤ੍ਥਾਯ ਪਟਿਗ੍ਗਣ੍ਹਨ੍ਤਿਯਾਪਿ ਅਜ੍ਝੋਹਰਨ੍ਤਿਯਾਪਿ ਦੁਕ੍ਕਟਂ. ਯਾ ਪਨ ਨਿਮਨ੍ਤਿਤਾ ਅਪ੍ਪਵਾਰਿਤਾ ਯਾਗੁਂ ਪਿਵਤਿ, ਸਾਮਿਕੇ ਅਪਲੋਕੇਤ੍ਵਾ ਭੁਞ੍ਜਤਿ, ਤੀਣਿ ਕਾਲਿਕਾਨਿ ਸਤਿ ਪਚ੍ਚਯੇ ਪਰਿਭੁਞ੍ਜਤਿ, ਤਸ੍ਸਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਨਿਮਨ੍ਤਿਤਾ ਵਾ ਪਵਾਰਿਤਾ ਵਾ ਤਂ ਉਭਯਂ ਵਾ, ਪੁਰੇਭਤ੍ਤਂ ਵੁਤ੍ਤਲਕ੍ਖਣਸ੍ਸ ਆਮਿਸਸ੍ਸ ਅਜ੍ਝੋਹਾਰੋ, ਸਾਮਿਕਾਨਂ ਅਨਾਪੁਚ੍ਛਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਅਦ੍ਧਾਨਸਮੁਟ੍ਠਾਨਂ, ਨਿਮਨ੍ਤਿਤਾਯ ਅਨਾਪੁਚ੍ਛਾ ਭੁਞ੍ਜਨ੍ਤਿਯਾ ਆਪਤ੍ਤਿਸਮ੍ਭਵਤੋ ਸਿਯਾ ਕਿਰਿਯਾਕਿਰਿਯਂ, ਪਵਾਰਿਤਾਯ ਕਪ੍ਪਿਯਂ ਕਾਰੇਤ੍ਵਾਪਿ ਅਕਾਰੇਤ੍ਵਾਪਿ ਪਰਿਭੁਞ੍ਜਨ੍ਤਿਯਾ ਆਪਤ੍ਤਿਸਮ੍ਭਵਤੋ ਸਿਯਾ ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਪਵਾਰਿਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਕੁਲਮਚ੍ਛਰਿਨੀਸਿਕ੍ਖਾਪਦਵਣ੍ਣਨਾ

ਪਞ੍ਚਮੇ ਕੁਲੇ ਮਚ੍ਛਰੋ ਕੁਲਮਚ੍ਛਰੋ, ਕੁਲਮਚ੍ਛਰੋ ਏਤਿਸ੍ਸਾ ਅਤ੍ਥਿ, ਕੁਲਂ ਵਾ ਮਚ੍ਛਰਾਯਤੀਤਿ ਕੁਲਮਚ੍ਛਰਿਨੀ. ਅਸ੍ਸਾਤਿ ਯਾ ਈਦਿਸੀ ਭਵੇਯ੍ਯ. ਪਾਚਿਤ੍ਤਿਯਨ੍ਤਿ ਤਸ੍ਸਾ ‘‘ਯਂ ਕੁਲਂ ਭਿਕ੍ਖੁਨੀਨਂ ਪਚ੍ਚਯੇ ਦਾਤੁਕਾਮਂ, ਕਥਂ ਨਾਮ ਤਤ੍ਥ ਭਿਕ੍ਖੁਨਿਯੋ ਨ ਗਚ੍ਛੇਯ੍ਯੁ’’ਨ੍ਤਿ ਭਿਕ੍ਖੁਨੀਨਂ ਵਾ ਸਨ੍ਤਿਕੇ ਕੁਲਸ੍ਸ, ‘‘ਕਥਂ ਨਾਮ ਇਮੇ ਤਾਸਂ ਕਿਞ੍ਚਿ ਨ ਦਜ੍ਜੇਯ੍ਯੁ’’ਨ੍ਤਿ ਕੁਲਸ੍ਸ ਵਾ ਸਨ੍ਤਿਕੇ ਭਿਕ੍ਖੁਨੀਨਂ ਅਵਣ੍ਣਂ ਭਾਸਨ੍ਤਿਯਾ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਕੁਲਮਚ੍ਛਰਾਯਨਵਤ੍ਥੁਸ੍ਮਿਂ ਪਞ੍ਞਤ੍ਤਂ. ਅਮਚ੍ਛਰਾਯਿਤ੍ਵਾ ਸਨ੍ਤਂਯੇਵ ਆਦੀਨਵਂ ਆਚਿਕ੍ਖਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਭਿਕ੍ਖੁਨੀਨਂ ਅਲਾਭਕਾਮਤਾ, ਕੁਲਸ੍ਸ ਵਾ ਸਨ੍ਤਿਕੇ ਭਿਕ੍ਖੁਨੀਨਂ ਭਿਕ੍ਖੁਨੀਨਂ ਵਾ ਸਨ੍ਤਿਕੇ ਕੁਲਸ੍ਸ ਅਵਣ੍ਣਭਣਨਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਨ੍ਤਿ.

ਕੁਲਮਚ੍ਛਰਿਨੀਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਅਭਿਕ੍ਖੁਕਾਵਾਸਸਿਕ੍ਖਾਪਦਵਣ੍ਣਨਾ

ਛਟ੍ਠੇ ਸਚੇ ਭਿਕ੍ਖੁਨੁਪਸ੍ਸਯਤੋ ਅਦ੍ਧਯੋਜਨਬ੍ਭਨ੍ਤਰੇ ਓਵਾਦਦਾਯਕਾ ਭਿਕ੍ਖੂ ਨ ਵਸਨ੍ਤਿ, ਮਗ੍ਗੋ ਵਾ ਅਖੇਮੋ ਹੋਤਿ ਨ ਸਕ੍ਕਾ ਅਨਨ੍ਤਰਾਯੇਨ ਗਨ੍ਤੁਂ, ਅਯਂ ਅਭਿਕ੍ਖੁਕੋ ਨਾਮ ਆਵਾਸੋ. ਤਤ੍ਥ ‘‘ਵਸ੍ਸਂ ਵਸਿਸ੍ਸਾਮੀ’’ਤਿ ਸੇਨਾਸਨਪਞ੍ਞਾਪਨਪਾਨੀਯਉਪਟ੍ਠਾਪਨਾਦੀਨਿ ਕਰੋਨ੍ਤਿਯਾ ਦੁਕ੍ਕਟਂ, ਸਹ ਅਰੁਣੁਗ੍ਗਮਨਾ ਪਾਚਿਤ੍ਤਿਯਂ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯਂ (ਪਾਚਿ. ਅਟ੍ਠ. ੧੪੪ ਆਦਯੋ) ਵੁਤ੍ਤੋ.

ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਅਭਿਕ੍ਖੁਕੇ ਆਵਾਸੇ ਵਸ੍ਸਂ ਵਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਯਤ੍ਥ ਪਨ ਵਸ੍ਸੂਪਗਤਾ ਭਿਕ੍ਖੂ ਪਕ੍ਕਨ੍ਤਾ ਵਾ ਹੋਨ੍ਤਿ ਵਿਬ੍ਭਨ੍ਤਾ ਵਾ ਕਾਲਙ੍ਕਤਾ ਵਾ ਪਕ੍ਖਸਙ੍ਕਨ੍ਤਾ ਵਾ ਤਤ੍ਥ ਵਸਨ੍ਤਿਯਾ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਅਭਿਕ੍ਖੁਕਾਵਾਸਤਾ, ਵਸ੍ਸੂਪਗਮਨਂ, ਅਰੁਣੁਗ੍ਗਮਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੇਵਾਤਿ.

ਅਭਿਕ੍ਖੁਕਾਵਾਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਅਪਵਾਰਣਾਸਿਕ੍ਖਾਪਦਵਣ੍ਣਨਾ

ਸਤ੍ਤਮੇ ਵਸ੍ਸਂਵੁਟ੍ਠਾਤਿ ਪੁਰਿਮਂ ਵਾ ਪਚ੍ਛਿਮਂ ਵਾ ਤੇਮਾਸਂ ਵੁਟ੍ਠਾ. ਉਭਤੋਸਙ੍ਘੇਤਿ ਭਿਕ੍ਖੁਨਿਸਙ੍ਘੇ ਚੇਵ ਭਿਕ੍ਖੁਸਙ੍ਘੇ ਚ. ਅਯਂ ਪਨੇਤ੍ਥ ਵਿਨਿਚ੍ਛਯਕਥਾ – ਭਿਕ੍ਖੁਨੀਹਿ ਚਾਤੁਦ੍ਦਸੇਯੇਵ ਸਨ੍ਨਿਪਤਿਤ੍ਵਾ ‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ, ਅਜ੍ਜ ਪਵਾਰਣਾ ਚਾਤੁਦ੍ਦਸੀ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਪਵਾਰੇਯ੍ਯਾ’’ਤਿ ਏਵਂ ਸਬ੍ਬਸਙ੍ਗਾਹਿਕਞਤ੍ਤਿਂ ਵਾ, ‘‘ਤੇਵਾਚਿਕਂ ਪਵਾਰੇਯ੍ਯਾ’’ਤਿ ਏਵਂ ਤੇਵਾਚਿਕਞਤ੍ਤਿਂ ਵਾ, ਸਤਿ ਅਨ੍ਤਰਾਯੇ ‘‘ਦ੍ਵੇਵਾਚਿਕਂ, ਏਕਵਾਚਿਕਂ, ਸਮਾਨਵਸ੍ਸਿਕਂ ਪਵਾਰੇਯ੍ਯਾ’’ਤਿ ਏਵਂ ਦ੍ਵੇਵਾਚਿਕਾਦਿਞਤ੍ਤਿਂ ਵਾ ਠਪੇਤ੍ਵਾ ਸਬ੍ਬਸਙ੍ਗਾਹਿਕਞਤ੍ਤਿ ਚੇ ਠਪਿਤਾ, ‘‘ਸਙ੍ਘਂ, ਅਯ੍ਯੇ, ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ, ਵਦਨ੍ਤੁ ਮਂ ਅਯ੍ਯਾਯੋ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੀ ਪਟਿਕਰਿਸ੍ਸਾਮੀ’’ਤਿ (ਚੂਲ਼ਵ. ੪੨੭) ਏਵਂ ਸਕਿਂ ਵਾ, ‘‘ਦੁਤਿਯਮ੍ਪਿ, ਅਯ੍ਯੇ, ਸਙ੍ਘਂ…ਪੇ… ਤਤਿਯਮ੍ਪਿ, ਅਯ੍ਯੇ, ਸਙ੍ਘਂ…ਪੇ… ਪਟਿਕਰਿਸ੍ਸਾਮੀ’’ਤਿ ਏਵਂ ਦ੍ਵਤ੍ਤਿਕ੍ਖਤ੍ਤੁਂ ਵਾ ਵਤ੍ਵਾ ਪਟਿਪਾਟਿਯਾ ਪਵਾਰੇਤਬ੍ਬਂ. ਤੇਵਾਚਿਕਾਯ ਞਤ੍ਤਿਯਾ ਵਚਨਂ ਨ ਹਾਪੇਤਬ੍ਬਂ, ਦ੍ਵੇਵਾਚਿਕਾਦੀਸੁ ਵਡ੍ਢੇਤੁਂ ਵਟ੍ਟਤਿ, ਹਾਪੇਤੁਂ ਨ ਵਟ੍ਟਤਿ. ਏਵਂ ਭਿਕ੍ਖੁਨਿਸਙ੍ਘੇ ਪਵਾਰੇਤ੍ਵਾ ਤਤ੍ਥੇਵ ਏਕਾ ਭਿਕ੍ਖੁਨੀ ਭਿਕ੍ਖੁਨਿਕ੍ਖਨ੍ਧਕੇ (ਚੂਲ਼ਵ. ੪੨੭) ਵੁਤ੍ਤੇਨ ਞਤ੍ਤਿਦੁਤਿਯਕਮ੍ਮੇਨ ਭਿਕ੍ਖੁਨਿਸਙ੍ਘਸ੍ਸਤ੍ਥਾਯ ਭਿਕ੍ਖੁਸਙ੍ਘਂ ਪਵਾਰੇਤੁਂ ਸਮ੍ਮਨ੍ਨਿਤਬ੍ਬਾ. ਤਾਯ ਸਮ੍ਮਤਾਯ ਭਿਕ੍ਖੁਨਿਯਾ ਪਨ੍ਨਰਸੇ ਭਿਕ੍ਖੁਨਿਸਙ੍ਘਂ ਆਦਾਯ ਭਿਕ੍ਖੁਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ ‘‘ਭਿਕ੍ਖੁਨਿਸਙ੍ਘੋ ਅਯ੍ਯ ਭਿਕ੍ਖੁਸਙ੍ਘਂ ਪਵਾਰੇਤਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ, ਵਦਤਾਯ੍ਯ ਭਿਕ੍ਖੁਸਙ੍ਘੋ ਭਿਕ੍ਖੁਨਿਸਙ੍ਘਂ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੋ ਪਟਿਕਰਿਸ੍ਸਤਿ, ਦੁਤਿਯਮ੍ਪਿ ਅਯ੍ਯ…ਪੇ… ਤਤਿਯਮ੍ਪਿ ਅਯ੍ਯ…ਪੇ… ਪਸ੍ਸਨ੍ਤੋ ਪਟਿਕਰਿਸ੍ਸਤੀ’’ਤਿ ਏਵਂ ਪਵਾਰੇਤਬ੍ਬਂ.

ਸਚੇ ਪਞ੍ਚਵਗ੍ਗੋ ਭਿਕ੍ਖੁਨਿਸਙ੍ਘੋ ਨ ਪੂਰਤਿ, ਚਤੂਹਿ ਵਾ ਤੀਹਿ ਵਾ ਗਣਞਤ੍ਤਿਂ ਠਪੇਤ੍ਵਾ, ਦ੍ਵੀਹਿ ਵਿਨਾ ਞਤ੍ਤਿਯਾ ਅਞ੍ਞਮਞ੍ਞਂ ਪਵਾਰੇਤਬ੍ਬਂ. ਏਕਾਯ ‘‘ਅਜ੍ਜ ਮੇ ਪਵਾਰਣਾ’’ਤਿ ਅਧਿਟ੍ਠਾਤਬ੍ਬਂ.

ਵਿਹਾਰਂ ਪਨ ਗਨ੍ਤ੍ਵਾ ‘‘ਭਿਕ੍ਖੁਨਿਯੋ, ਅਯ੍ਯ, ਭਿਕ੍ਖੁਸਙ੍ਘਂ ਪਵਾਰੇਨ੍ਤਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ, ਵਦਤਾਯ੍ਯ ਭਿਕ੍ਖੁਸਙ੍ਘੋ ਭਿਕ੍ਖੁਨਿਯੋ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤਿਯੋ ਪਟਿਕਰਿਸ੍ਸਨ੍ਤੀ’’ਤਿ ਚ, ‘‘ਅਹਂ, ਅਯ੍ਯ, ਭਿਕ੍ਖੁਸਙ੍ਘਂ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ, ਵਦਤੁ ਮਂ, ਅਯ੍ਯ, ਭਿਕ੍ਖੁਸਙ੍ਘੋ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੀ ਪਟਿਕਰਿਸ੍ਸਾਮੀ’’ਤਿ ਚ ਏਵਂ ਤਿਕ੍ਖਤ੍ਤੁਂ ਵਤ੍ਤਬ੍ਬਂ.

ਸਚੇ ਭਿਕ੍ਖੁਸਙ੍ਘੋ ਨ ਪੂਰਤਿ, ‘‘ਭਿਕ੍ਖੁਨਿਸਙ੍ਘੋ, ਅਯ੍ਯ, ਅਯ੍ਯੇ ਪਵਾਰੇਤਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ, ਵਦਨ੍ਤੁ ਅਯ੍ਯਾ ਭਿਕ੍ਖੁਨਿਸਙ੍ਘਂ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੋ ਪਟਿਕਰਿਸ੍ਸਤੀ’’ਤਿ ਚ, ‘‘ਭਿਕ੍ਖੁਨਿਸਙ੍ਘੋ, ਅਯ੍ਯ, ਅਯ੍ਯਂ ਪਵਾਰੇਤਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ, ਵਦਤਾਯ੍ਯੋ ਭਿਕ੍ਖੁਨਿਸਙ੍ਘਂ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੋ ਪਟਿਕਰਿਸ੍ਸਤੀ’’ਤਿ ਚ ਏਵਂ ਤਿਕ੍ਖਤ੍ਤੁਂ ਵਤ੍ਤਬ੍ਬਂ.

ਉਭਿਨ੍ਨਂ ਅਪਰਿਪੂਰਿਯਾ ‘‘ਭਿਕ੍ਖੁਨਿਯੋ, ਅਯ੍ਯਾ, ਅਯ੍ਯੇ ਪਵਾਰੇਨ੍ਤਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ, ਵਦਨ੍ਤਾਯ੍ਯਾ ਭਿਕ੍ਖੁਨਿਯੋ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤਿਯੋ ਪਟਿਕਰਿਸ੍ਸਨ੍ਤੀ’’ਤਿ ਚ, ‘‘ਭਿਕ੍ਖੁਨਿਯੋ, ਅਯ੍ਯ, ਅਯ੍ਯਂ ਪਵਾਰੇਨ੍ਤਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ, ਵਦਤਾਯ੍ਯੋ ਭਿਕ੍ਖੁਨਿਯੋ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤਿਯੋ ਪਟਿਕਰਿਸ੍ਸਨ੍ਤੀ’’ਤਿ ਚ, ‘‘ਅਹਂ, ਅਯ੍ਯਾ, ਅਯ੍ਯੇ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ…ਪੇ… ਵਦਨ੍ਤੁ ਮਂ, ਅਯ੍ਯਾ, ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੀ ਪਟਿਕਰਿਸ੍ਸਾਮੀ’’ਤਿ ਚ, ‘‘ਅਹਂ, ਅਯ੍ਯ, ਅਯ੍ਯਂ ਪਵਾਰੇਮਿ ਦਿਟ੍ਠੇਨ ਵਾ ਸੁਤੇਨ ਵਾ…ਪੇ… ਵਦਤੁ ਮਂ, ਅਯ੍ਯੋ, ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੀ ਪਟਿਕਰਿਸ੍ਸਾਮੀ’’ਤਿ ਚ ਏਵਂ ਤਿਕ੍ਖਤ੍ਤੁਂ ਵਤ੍ਤਬ੍ਬਂ. ਸਬ੍ਬਾਹੇਵ ਹਿ ਇਮਿਨਾ ਨਯੇਨ ਉਭਤੋਸਙ੍ਘੇ ਪਵਾਰਿਤਾ ਹੋਤਿ, ਯਾ ਪਨ ਵਸ੍ਸਂਵੁਟ੍ਠਾ ‘‘ਉਭਤੋਸਙ੍ਘੇ ਏਵਂ ਨ ਪਵਾਰੇਸ੍ਸਾਮੀ’’ਤਿ ਧੁਰਂ ਨਿਕ੍ਖਿਪਤਿ, ਤਸ੍ਸਾ ਸਹ ਧੁਰਨਿਕ੍ਖੇਪੇਨ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਵਸ੍ਸਂ ਵਸਿਤ੍ਵਾ ਨ ਪਵਾਰਣਾਵਤ੍ਥੁਸ੍ਮਿਂ ਪਞ੍ਞਤ੍ਤਂ. ਅਨ੍ਤਰਾਯੇ ਪਨ ਸਤਿ, ਪਰਿਯੇਸਿਤ੍ਵਾ ਭਿਕ੍ਖੂ ਅਲਭਨ੍ਤਿਯਾ, ਗਿਲਾਨਾਯ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਵਸ੍ਸਂਵੁਟ੍ਠਤਾ, ਨ ਉਭਤੋਸਙ੍ਘੇ ਪਵਾਰਣਾ, ਅਨੁਞ੍ਞਾਤਕਾਰਣਾਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਮਨੁਭਾਸਨਸਦਿਸਾਨੀਤਿ.

ਅਪਵਾਰਣਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਓਵਾਦਸਿਕ੍ਖਾਪਦਵਣ੍ਣਨਾ

ਅਟ੍ਠਮੇ ਓਵਾਦਾਯਾਤਿ ਗਰੁਧਮ੍ਮਸ੍ਸਵਨਤ੍ਥਾਯ. ਸਂਵਾਸਾਯਾਤਿ ਉਪੋਸਥਪੁਚ੍ਛਨਤ੍ਥਾਯ ਚੇਵ ਪਵਾਰਣਤ੍ਥਾਯ ਚ. ਪਾਚਿਤ੍ਤਿਯਨ੍ਤਿ ‘‘ਏਤੇਸਂ ਅਤ੍ਥਾਯ ਨ ਗਚ੍ਛਾਮੀ’’ਤਿ ਧੁਰਂ ਨਿਕ੍ਖਿਤ੍ਤਮਤ੍ਤੇ ਪਾਚਿਤ੍ਤਿਯਂ.

ਸਕ੍ਕੇਸੁ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਆਰਬ੍ਭ ਓਵਾਦਾਯ ਅਗਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ. ਅਨ੍ਤਰਾਯੇ ਪਨ ਸਤਿ, ਪਰਿਯੇਸਿਤ੍ਵਾ ਦੁਤਿਯਿਕਂ ਅਲਭਨ੍ਤਿਯਾ, ਗਿਲਾਨਾਯ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਓਵਾਦਸਂਵਾਸਾਨਂ ਅਤ੍ਥਾਯ ਅਗਮਨਂ, ਅਨੁਞ੍ਞਾਤਕਾਰਣਾਭਾਵੋਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਦਿਸਾਨਿ, ਇਦਂ ਪਨ ਅਕਿਰਿਯਂ, ਦੁਕ੍ਖਵੇਦਨਨ੍ਤਿ.

ਓਵਾਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਓਵਾਦੂਪਸਙ੍ਕਮਨਸਿਕ੍ਖਾਪਦਵਣ੍ਣਨਾ

ਨਵਮੇ ਅਨ੍ਵਦ੍ਧਮਾਸਨ੍ਤਿ ਅਦ੍ਧਮਾਸੇ ਅਦ੍ਧਮਾਸੇ. ਉਪੋਸਥਪੁਚ੍ਛਕਨ੍ਤਿ ਉਪੋਸਥਪੁਚ੍ਛਨਂ. ਓਵਾਦੂਪਸਙ੍ਕਮਨਨ੍ਤਿ ਓਵਾਦਤ੍ਥਾਯ ਉਪਸਙ੍ਕਮਨਂ. ਤਂ ਅਤਿਕ੍ਕਾਮੇਨ੍ਤਿਯਾਤਿ ਏਤ੍ਥ ਭਿਕ੍ਖੁਨੀਹਿ ਤੇਰਸੇ ਵਾ ਚਾਤੁਦ੍ਦਸੇ ਵਾ ਆਰਾਮਂ ਗਨ੍ਤ੍ਵਾ ‘‘ਅਯਂ ਉਪੋਸਥੋ ਚਾਤੁਦ੍ਦਸੋ ਪਨ੍ਨਰਸੋ’’ਤਿ ਪੁਚ੍ਛਿਤਬ੍ਬਂ, ਉਪੋਸਥਦਿਵਸੇ ਨਿਦਾਨਵਣ੍ਣਨਾਯਂ ਵੁਤ੍ਤਨਯੇਨ ਓਵਾਦੂਪਸਙ੍ਕਮਨਂ ਯਾਚਿਤਬ੍ਬਂ. ਯਾ ਭਿਕ੍ਖੁਨੀ ਵੁਤ੍ਤਪ੍ਪਕਾਰੇ ਕਾਲੇ ਤਦੁਭਯਂ ਨ ਕਰੋਤਿ, ਸਾ ਤਂ ਅਤਿਕ੍ਕਾਮੇਤਿ ਨਾਮ, ਤਸ੍ਸਾ ‘‘ਉਪੋਸਥਮ੍ਪਿ ਨ ਪੁਚ੍ਛਿਸ੍ਸਾਮਿ, ਓਵਾਦਮ੍ਪਿ ਨ ਯਾਚਿਸ੍ਸਾਮੀ’’ਤਿ ਧੁਰਂ ਨਿਕ੍ਖਿਤ੍ਤਮਤ੍ਤੇ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਉਪੋਸਥਓਵਾਦਾਨਂ ਅਪੁਚ੍ਛਨਅਯਾਚਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਨਾਪਤ੍ਤਿ ਅਟ੍ਠਮਸਦਿਸਾਯੇਵ. ਉਪੋਸਥੋਵਾਦਾਨਂ ਅਪੁਚ੍ਛਨਅਯਾਚਨਾਯਂ ਧੁਰਨਿਕ੍ਖੇਪੋ, ਅਨੁਞ੍ਞਾਤਕਾਰਣਾਭਾਵੋਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਮਨੁਭਾਸਨਸਦਿਸਾਨੀਤਿ.

ਓਵਾਦੂਪਸਙ੍ਕਮਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਪਸਾਖੇਜਾਤਸਿਕ੍ਖਾਪਦਵਣ੍ਣਨਾ

ਦਸਮੇ ਪਸਾਖੇਤਿ ਨਾਭਿਯਾ ਹੇਟ੍ਠਾ ਜਾਣੁਮਣ੍ਡਲਾਨਂ ਉਪਰਿਪਦੇਸੇ. ਤਤੋ ਹਿ ਯਸ੍ਮਾ ਰੁਕ੍ਖਸ੍ਸ ਸਾਖਾ ਵਿਯ ਉਭੋ ਊਰੂ ਪਭਿਜ੍ਜਿਤ੍ਵਾ ਗਤਾ, ਤਸ੍ਮਾ ਸੋ ‘‘ਪਸਾਖੋ’’ਤਿ ਵੁਚ੍ਚਤਿ, ਤਸ੍ਮਿਂ ਪਸਾਖੇ. ਗਣ੍ਡਨ੍ਤਿ ਯਂਕਿਞ੍ਚਿ ਗਣ੍ਡਂ. ਰੁਧਿਤਨ੍ਤਿ ਵਣਂ. ਭੇਦਾਪੇਯ੍ਯ ਵਾਤਿਆਦੀਸੁ ਸਚੇ ‘‘ਭਿਨ੍ਦ ਫਾਲੇਹੀ’’ਤਿ ਸਬ੍ਬਾਨਿ ਆਣਾਪੇਤਿ, ਸੋ ਚ ਤਥੇਵ ਕਰੋਤਿ, ਛ ਦੁਕ੍ਕਟਾਨਿ ਛ ਚ ਪਾਚਿਤ੍ਤਿਯਾਨਿ. ਅਥਾਪਿ ‘‘ਯਂਕਿਞ੍ਚਿ ਏਤ੍ਥ ਕਤ੍ਤਬ੍ਬਂ, ਤਂ ਸਬ੍ਬਂ ਕਰੋਹੀ’’ਤਿ ਏਵਂ ਆਣਾਪੇਤਿ, ਸੋ ਚ ਸਬ੍ਬਾਨਿਪਿ ਭੇਦਨਾਦੀਨਿ ਕਰੋਤਿ, ਏਕਵਾਚਾਯ ਛ ਦੁਕ੍ਕਟਾਨਿ ਛ ਚ ਪਾਚਿਤ੍ਤਿਯਾਨਿ. ਸਚੇ ਪਨ ਭੇਦਨਾਦੀਸੁ ਏਕਂਯੇਵ ‘‘ਇਦਂ ਨਾਮ ਕਰੋਹੀ’’ਤਿ ਆਣਾਪੇਤਿ, ਸੋ ਚ ਸਬ੍ਬਾਨਿ ਕਰੋਤਿ. ਯਂ ਆਣਤ੍ਤਂ, ਤਸ੍ਸੇਵ ਕਰਣੇ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਪਸਾਖੇ ਜਾਤਂ ਗਣ੍ਡਂ ਪੁਰਿਸੇਨ ਭੇਦਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਪਲੋਕੇਤ੍ਵਾ ਵਾ ਵਿਞ੍ਞੁਂ ਵਾ ਯਂਕਞ੍ਚਿ ਦੁਤਿਯਿਕਂ ਗਹੇਤ੍ਵਾ ਏਵਂ ਕਰੋਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਪਸਾਖੇ ਜਾਤਤਾ, ਅਨਪਲੋਕਨਂ, ਦੁਤਿਯਿਕਾਭਾਵੋ, ਪੁਰਿਸੇਨ ਭੇਦਾਦੀਨਂ ਕਾਰਾਪਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਕਥਿਨਸਦਿਸਾਨਿ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.

ਪਸਾਖੇਜਾਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਆਰਾਮਵਗ੍ਗੋ ਛਟ੍ਠੋ.