੩. ਨਗ੍ਗਵਗ੍ਗੋ
੧. ਨਗ੍ਗਸਿਕ੍ਖਾਪਦਵਣ੍ਣਨਾ
ਨਗ੍ਗਵਗ੍ਗਸ੍ਸ ਪਠਮੇ ਨਗ੍ਗਾਤਿ ਅਨਿਵਤ੍ਥਾ ਵਾ ਅਪਾਰੁਤਾ ਵਾ. ਏਵਞ੍ਹਿ ਨਹਾਯਨ੍ਤਿਯਾ ਸਬ੍ਬਪ੍ਪਯੋਗੇਸੁ ਦੁਕ੍ਕਟਂ, ਨਹਾਨਪਰਿਯੋਸਾਨੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਏਵਂ ਨਹਾਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਉਦਕਸਾਟਿਕਚੀਵਰੇ ਅਚ੍ਛਿਨ੍ਨੇ ਵਾ ਨਟ੍ਠੇ ਵਾ, ‘‘ਮਹਗ੍ਘਂ ਇਦਂ ਦਿਸ੍ਵਾ ਚੋਰਾਪਿ ਹਰੇਯ੍ਯੁ’’ਨ੍ਤਿ ਏਵਰੂਪਾਸੁ ਆਪਦਾਸੁ ਵਾ ਨਹਾਯਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਨਗ੍ਗਤਾ, ਅਨੁਞ੍ਞਾਤਕਾਰਣਾਭਾਵੋ, ਨਹਾਨਪਰਿਯੋਸਾਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.
ਨਗ੍ਗਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਉਦਕਸਾਟਿਕਸਿਕ੍ਖਾਪਦਵਣ੍ਣਨਾ
ਦੁਤਿਯੇ ਸਾਵਤ੍ਥਿਯਂ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਆਰਬ੍ਭ ਅਪ੍ਪਮਾਣਿਕਾਯੋ ਉਦਕਸਾਟਿਕਾਯੋ ਧਾਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਮੇਤ੍ਥ ਸਬ੍ਬਂ ਰਤਨਵਗ੍ਗੇ ਨਿਸੀਦਨਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.
ਉਦਕਸਾਟਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਚੀਵਰਸਿਬ੍ਬਨਸਿਕ੍ਖਾਪਦਵਣ੍ਣਨਾ
ਤਤਿਯੇ ਵਿਸਿਬ੍ਬੇਤ੍ਵਾਤਿ ਦੁਸ੍ਸਿਬ੍ਬਿਤਂ ਪੁਨਸਿਬ੍ਬਨਤ੍ਥਾਯ ਵਿਸਿਬ੍ਬੇਤ੍ਵਾ. ਅਨਨ੍ਤਰਾਯਿਕਿਨੀਤਿ ਦਸਸੁ ਅਨ੍ਤਰਾਯੇਸੁ ਏਕੇਕਸ੍ਮਿਮ੍ਪਿ ਅਸਤਿ. ਅਞ੍ਞਤ੍ਰ ਚਤੂਹਪਞ੍ਚਾਹਾਤਿ ਵਿਸਿਬ੍ਬਿਤਦਿਵਸਤੋ ਪਞ੍ਚ ਦਿਵਸੇ ਅਤਿਕ੍ਕਾਮੇਤ੍ਵਾ ‘‘ਨੇਵ ਸਿਬ੍ਬਿਸ੍ਸਾਮਿ, ਨ ਸਿਬ੍ਬਾਪਨਾਯ ਉਸ੍ਸੁਕ੍ਕਂ ਕਰਿਸ੍ਸਾਮੀ’’ਤਿ ਧੁਰਂ ਨਿਕ੍ਖਿਤ੍ਤਮਤ੍ਤੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਚੀਵਰਂ ਵਿਸਿਬ੍ਬੇਤ੍ਵਾ ਨ ਸਿਬ੍ਬਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨਾਯ ਤਿਕਦੁਕ੍ਕਟਂ, ਤਥਾ ਉਭਿਨ੍ਨਮ੍ਪਿ ਅਞ੍ਞਸ੍ਮਿਂ ਪਰਿਕ੍ਖਾਰੇ. ਯਾ ਪਨ ਅਨ੍ਤਰਾਯਿਕਿਨੀ ਵਾ ਹੋਤਿ, ਪਰਿਯੇਸਿਤ੍ਵਾ ਵਾ ਕਿਞ੍ਚਿ ਨ ਲਭਤਿ, ਕਰੋਨ੍ਤੀ ਵਾ ਪਞ੍ਚਾਹਂ ਅਤਿਕ੍ਕਾਮੇਤਿ, ਤਸ੍ਸਾ ਚ, ਗਿਲਾਨਾਯ ਚ, ਆਪਦਾਸੁ ਚ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਨਿਵਾਸਨਪਾਰੁਪਨੁਪਗਚੀਵਰਤਾ, ਉਪਸਮ੍ਪਨ੍ਨਾਯ ਸਨ੍ਤਕਤਾ, ਸਿਬ੍ਬਨਤ੍ਥਾਯ ਵਿਸਿਬ੍ਬਨਂ ਵਾ ਵਿਸਿਬ੍ਬਾਪਨਂ ਵਾ, ਅਞ੍ਞਤ੍ਰ ਅਨੁਞ੍ਞਾਤਕਾਰਣਾ ਪਞ੍ਚਾਹਾਤਿਕ੍ਕਮੋ, ਧੁਰਨਿਕ੍ਖੇਪੋਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਮਨੁਭਾਸਨਸਦਿਸਾਨੀਤਿ.
ਚੀਵਰਸਿਬ੍ਬਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਸਙ੍ਘਾਟਿਚਾਰਸਿਕ੍ਖਾਪਦਵਣ੍ਣਨਾ
ਚਤੁਤ੍ਥੇ ਪਞ੍ਚ ਅਹਾਨਿ ਪਞ੍ਚਾਹਂ, ਪਞ੍ਚਾਹਮੇਵ ਪਞ੍ਚਾਹਿਕਂ. ਸਙ੍ਘਾਟੀਨਂ ਚਾਰੋ ਸਙ੍ਘਾਟਿਚਾਰੋ, ਪਰਿਭੋਗਵਸੇਨ ਵਾ ਓਤਾਪਨਵਸੇਨ ਵਾ ਸਙ੍ਘਟਿਤਟ੍ਠੇਨ ‘ਸਙ੍ਘਾਟੀ’ਤਿ ਲਦ੍ਧਨਾਮਂ ਤਿਚੀਵਰਂ, ਉਦਕਸਾਟਿਕਾ, ਸਂਕਚ੍ਚਿਕਾਤਿ ਇਮੇਸਂ ਪਞ੍ਚਨ੍ਨਂ ਚੀਵਰਾਨਂ ਪਰਿਵਤ੍ਤਨਨ੍ਤਿ ਅਤ੍ਥੋ. ਅਤਿਕ੍ਕਾਮੇਯ੍ਯ ਪਾਚਿਤ੍ਤਿਯਨ੍ਤਿ ਛਟ੍ਠੇ ਅਰੁਣੁਗ੍ਗਮਨੇ ਏਕਸ੍ਮਿਂ ਚੀਵਰੇ ਵੁਤ੍ਤਨਯੇਨ ਅਪਰਿਵਤ੍ਤਿਤੇ ਏਕਾ ਆਪਤ੍ਤਿ, ਪਞ੍ਚਸੁ ਪਞ੍ਚ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਚੀਵਰਂ ਨਿਕ੍ਖਿਪਿਤ੍ਵਾ ਸਨ੍ਤਰੁਤ੍ਤਰੇਨ ਜਨਪਦਚਾਰਿਕਂ ਪਕ੍ਕਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਪਞ੍ਚਾਹਾਨਤਿਕ੍ਕਨ੍ਤੇ ਦ੍ਵਿਕਦੁਕ੍ਕਟਂ. ਤਸ੍ਮਿਂ ਪਨ ਅਨਤਿਕ੍ਕਨ੍ਤਸਞ੍ਞਾਯ, ਪਞ੍ਚਮਂ ਦਿਵਸਂ ਪਞ੍ਚ ਚੀਵਰਾਨਿ ਨਿਵਾਸੇਨ੍ਤਿਯਾ ਵਾ ਪਾਰੁਪਨ੍ਤਿਯਾ ਵਾ ਓਤਾਪੇਨ੍ਤਿਯਾ ਵਾ, ਗਿਲਾਨਾਯ, ‘‘ਇਦਂ ਮੇ ਚੀਵਰਂ ਮਹਗ੍ਘਂ ਈਦਿਸੇ ਚੋਰਭਯੇ ਨ ਸਕ੍ਕਾ ਧਾਰੇਤੁ’’ਨ੍ਤਿ ਏਵਰੂਪਾਸੁ ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਪਞ੍ਚਨ੍ਨਂ ਚੀਵਰਾਨਂ ਅਞ੍ਞਤਰਤਾ, ਪਞ੍ਚਾਹਾਤਿਕ੍ਕਮੋ, ਅਨੁਞ੍ਞਾਤਕਾਰਣਾਭਾਵੋ, ਅਪਰਿਵਤ੍ਤਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਕਥਿਨਸਦਿਸਾਨੀਤਿ.
ਸਙ੍ਘਾਟਿਚਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਚੀਵਰਸਙ੍ਕਮਨੀਯਸਿਕ੍ਖਾਪਦਵਣ੍ਣਨਾ
ਪਞ੍ਚਮੇ ਚੀਵਰਸਙ੍ਕਮਨੀਯਨ੍ਤਿ ਸਙ੍ਕਮੇਤਬ੍ਬਂ ਚੀਵਰਂ, ਅਞ੍ਞਿਸ੍ਸਾ ਸਨ੍ਤਕਂ ਅਨਾਪੁਚ੍ਛਾ ਗਹਿਤਂ ਪੁਨ ਪਟਿਦਾਤਬ੍ਬਂ ਪਞ੍ਚਨ੍ਨਂ ਅਞ੍ਞਤਰਂ ਚੀਵਰਨ੍ਤਿ ਅਤ੍ਥੋ. ਧਾਰੇਯ੍ਯਾਤਿ ਸਚੇ ਤਂ ਨਿਵਾਸੇਤਿ ਵਾ ਪਾਰੁਪਤਿ ਵਾ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ ਭਿਕ੍ਖੁਨਿਯਾ ਚੀਵਰਂ ਆਦਾਯ ਅਨਾਪੁਚ੍ਛਾ ਪਾਰੁਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨਾਯ ਤਿਕਦੁਕ੍ਕਟਂ. ਯਾ ਪਨ ਤਾਯ ਵਾ ਦਿਨ੍ਨਂ, ਤਂ ਵਾ ਆਪੁਚ੍ਛਾ, ਅਚ੍ਛਿਨ੍ਨਨਟ੍ਠਚੀਵਰਿਕਾ ਵਾ ਹੁਤ੍ਵਾ, ‘‘ਇਦਂ ਮੇ ਚੀਵਰਂ ਮਹਗ੍ਘਂ ਈਦਿਸੇ ਚੋਰਭਯੇ ਨ ਸਕ੍ਕਾ ਧਾਰੇਤੁ’’ਨ੍ਤਿ ਏਵਰੂਪਾਸੁ ਆਪਦਾਸੁ ਵਾ ਧਾਰੇਤਿ, ਤਸ੍ਸਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਚੀਵਰਸਙ੍ਕਮਨੀਯਤਾ, ਉਪਸਮ੍ਪਨ੍ਨਾਯ ਸਨ੍ਤਕਤਾ, ਅਨੁਞ੍ਞਾਤਕਾਰਣਾਭਾਵੋ, ਧਾਰਣਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਕਥਿਨਸਦਿਸਾਨਿ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.
ਚੀਵਰਸਙ੍ਕਮਨੀਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਗਣਚੀਵਰਸਿਕ੍ਖਾਪਦਵਣ੍ਣਨਾ
ਛਟ੍ਠੇ ਗਣਸ੍ਸਾਤਿ ਭਿਕ੍ਖੁਨਿਸਙ੍ਘਸ੍ਸ. ਚੀਵਰਲਾਭਨ੍ਤਿ ਵਿਕਪ੍ਪਨੁਪਗਮ੍ਪਿ ਪਚ੍ਛਿਮਂ ਲਭਿਤਬ੍ਬਂ ਚੀਵਰਂ. ਅਨ੍ਤਰਾਯਂ ਕਰੇਯ੍ਯਾਤਿ ਯਥਾ ਤੇ ਦਾਤੁਕਾਮਾ ਨ ਦੇਨ੍ਤਿ, ਏਵਂ ਪਰਕ੍ਕਮੇਯ੍ਯ. ਪਾਚਿਤ੍ਤਿਯਨ੍ਤਿ ਸਚੇ ਤਸ੍ਸਾ ਵਚਨੇਨ ਤੇ ਨ ਦੇਨ੍ਤਿ, ਭਿਕ੍ਖੁਨਿਯਾ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਗਣਸ੍ਸ ਚੀਵਰਲਾਭਨ੍ਤਰਾਯਕਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਞ੍ਞਸ੍ਮਿਂ ਪਰਿਕ੍ਖਾਰੇ ਦੁਕ੍ਕਟਂ, ਸਮ੍ਬਹੁਲਾਨਂ ਪਨ ਏਕਭਿਕ੍ਖੁਨਿਯਾ ਵਾ ਚੀਵਰਲਾਭੇਪਿ ਦੁਕ੍ਕਟਮੇਵ. ‘‘ਸਮਗ੍ਘਕਾਲੇ ਦਸ੍ਸਥਾ’’ਤਿ ਏਵਂ ਆਨਿਸਂਸਂ ਦਸ੍ਸੇਤ੍ਵਾ ਨਿਵਾਰੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਵਿਕਪ੍ਪਨੁਪਗਪਚ੍ਛਿਮਤਾ, ਸਙ੍ਘਸ੍ਸ ਪਰਿਣਤਭਾਵੋ, ਵਿਨਾ ਆਨਿਸਂਸਦਸ੍ਸਨੇਨ ਅਨ੍ਤਰਾਯਕਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੀਤਿ.
ਗਣਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਪਟਿਬਾਹਨਸਿਕ੍ਖਾਪਦਵਣ੍ਣਨਾ
ਸਤ੍ਤਮੇ ਧਮ੍ਮਿਕਂ ਚੀਵਰਵਿਭਙ੍ਗਨ੍ਤਿ ਸਮਗ੍ਗੇਨ ਸਙ੍ਘੇਨ ਸਨ੍ਨਿਪਤਿਤ੍ਵਾ ਕਰੀਯਮਾਨਂ ਚੀਵਰਵਿਭਙ੍ਗ. ਪਟਿਬਾਹੇਯ੍ਯਾਤਿ ਪਟਿਸੇਧੇਯ੍ਯ, ਏਵਂ ਪਟਿਸੇਧੇਨ੍ਤਿਯਾ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਧਮ੍ਮਿਕਂ ਚੀਵਰਵਿਭਙ੍ਗਂ ਪਟਿਬਾਹਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਧਮ੍ਮਿਕੇ ਵੇਮਤਿਕਾਯ, ਅਧਮ੍ਮਿਕੇ ਧਮ੍ਮਿਕਸਞ੍ਞਾਯ ਚੇਵ ਵੇਮਤਿਕਾਯ ਚ ਦੁਕ੍ਕਟਂ. ਉਭਯਤ੍ਥ ਅਧਮ੍ਮਿਕਸਞ੍ਞਾਯ, ਆਨਿਸਂਸਂ ਦਸ੍ਸੇਤ੍ਵਾ ਪਟਿਬਾਹਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਚੀਵਰਵਿਭਙ੍ਗਸ੍ਸ ਧਮ੍ਮਿਕਤਾ, ਧਮ੍ਮਿਕਸਞ੍ਞਿਤਾ, ਵਿਨਾ ਆਨਿਸਂਸੇਨ ਪਟਿਬਾਹਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੇਵਾਤਿ.
ਪਟਿਬਾਹਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਚੀਵਰਦਾਨਸਿਕ੍ਖਾਪਦਵਣ੍ਣਨਾ
ਅਟ੍ਠਮੇ ਸਮਣਚੀਵਰਨ੍ਤਿ ਕਪ੍ਪਕਤਂ ਨਿਵਾਸਨਪਾਰੁਪਨੁਪਗਂ, ਏਵਰੂਪਂ ਠਪੇਤ੍ਵਾ ਪਞ੍ਚ ਸਹਧਮ੍ਮਿਕੇ ਮਾਤਾਪਿਤਰੋ ਚ ਯਸ੍ਸ ਕਸ੍ਸਚਿ ਗਹਟ੍ਠਸ੍ਸ ਵਾ ਪਬ੍ਬਜਿਤਸ੍ਸ ਵਾ ਪਰਿਚ੍ਚਜਿਤ੍ਵਾ ਦੇਨ੍ਤਿਯਾ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਅਗਾਰਿਕਸ੍ਸ ਸਮਣਚੀਵਰਦਾਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਭਿਕ੍ਖੁਨੋ ਦੁਕ੍ਕਟਂ. ਮਾਤਾਪਿਤੂਨਂ ਪਰਿਚ੍ਚਜਿਤ੍ਵਾਪਿ, ਅਞ੍ਞੇਸਂ ਤਾਵਕਾਲਿਕਮੇਵ ਦੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸਮਣਚੀਵਰਤਾ, ਠਪੇਤ੍ਵਾ ਸਹਧਮ੍ਮਿਕੇ ਚ ਮਾਤਾਪਿਤਰੋ ਚ ਅਞ੍ਞੇਸਂ ਦਾਨਂ, ਅਤਾਵਕਾਲਿਕਤਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤਸਦਿਸਾਨੀਤਿ.
ਚੀਵਰਦਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਕਾਲਅਤਿਕ੍ਕਮਨਸਿਕ੍ਖਾਪਦਵਣ੍ਣਨਾ
ਨਵਮੇ ਦੁਬ੍ਬਲਚੀਵਰਪਚ੍ਚਾਸਾਯਾਤਿ ਦੁਬ੍ਬਲਾਯ ਚੀਵਰਪਚ੍ਚਾਸਾਯ, ‘‘ਸਚੇ ਸਕ੍ਕੋਮ ਦਸ੍ਸਾਮਾ’’ਤਿ ਏਤ੍ਤਕਮਤ੍ਤਂ ਸੁਤ੍ਵਾ ਉਪ੍ਪਾਦਿਤਾਯ ਆਸਾਯਾਤਿ ਅਤ੍ਥੋ. ਚੀਵਰਕਾਲਸਮਯਂ ਅਤਿਕ੍ਕਾਮੇਯ੍ਯਾਤਿ ਵਸ੍ਸਂਵੁਟ੍ਠਭਿਕ੍ਖੁਨੀਹਿ ਕਾਲਚੀਵਰੇ ਭਾਜਿਯਮਾਨੇ ‘‘ਆਗਮੇਯ੍ਯਾਥ, ਅਯ੍ਯੇ, ਅਤ੍ਥਿ ਸਙ੍ਘਸ੍ਸ ਚੀਵਰਪਚ੍ਚਾਸਾ’’ਤਿ ਵਤ੍ਵਾ ਤਂ ਚੀਵਰਵਿਭਙ੍ਗਂ ਚੀਵਰਕਾਲਂ ਅਤਿਕ੍ਕਾਮੇਯ੍ਯ, ਤਸ੍ਸਾ ਅਨਤ੍ਥਤੇ ਕਥਿਨੇ ਵਸ੍ਸਾਨਸ੍ਸ ਪਚ੍ਛਿਮਮਾਸਂ, ਅਤ੍ਥਤੇ ਕਥਿਨੇ ਕਥਿਨੁਬ੍ਭਾਰਦਿਵਸਂ ਅਤਿਕ੍ਕਾਮੇਨ੍ਤਿਯਾ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਦੁਬ੍ਬਲਚੀਵਰਪਚ੍ਚਾਸਾਯ ਚੀਵਰਕਾਲਸਮਯਂ ਅਤਿਕ੍ਕਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਦੁਬ੍ਬਲਚੀਵਰੇ ਵੇਮਤਿਕਾਯ, ਅਦੁਬ੍ਬਲਚੀਵਰੇ ਦੁਬ੍ਬਲਚੀਵਰਸਞ੍ਞਾਯ ਚੇਵ ਵੇਮਤਿਕਾਯ ਚ ਦੁਕ੍ਕਟਂ. ਉਭਯਤ੍ਥ ਅਦੁਬ੍ਬਲਚੀਵਰਸਞ੍ਞਾਯ, ਕਿਞ੍ਚਾਪਿ ‘ਨ ਸਕ੍ਕੋਮਾ’ਤਿ ਵਦਨ੍ਤਿ, ‘‘ਇਦਾਨਿ ਪਨ ਤੇਸਂ ਕਪ੍ਪਾਸੋ ਵਾ ਉਪ੍ਪਜ੍ਜਿਸ੍ਸਤਿ, ਸਦ੍ਧੋ ਵਾ ਪੁਰਿਸੋ ਆਗਮਿਸ੍ਸਤਿ, ਤਸ੍ਮਿਂ ਆਗਤੇ ਅਦ੍ਧਾ ਦਸ੍ਸਨ੍ਤੀ’’ਤਿ ਏਵਂ ਆਨਿਸਂਸਂ ਦਸ੍ਸੇਤ੍ਵਾ ਨਿਵਾਰੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਦੁਬ੍ਬਲਚੀਵਰਤਾ, ਦੁਬ੍ਬਲਸਞ੍ਞਿਤਾ, ਵਿਨਾ ਆਨਿਸਂਸੇਨ ਨਿਵਾਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੀਤਿ.
ਕਾਲਅਤਿਕ੍ਕਮਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਕਥਿਨੁਦ੍ਧਾਰਸਿਕ੍ਖਾਪਦਵਣ੍ਣਨਾ
ਦਸਮੇ ਧਮ੍ਮਿਕਂ ਕਥਿਨੁਦ੍ਧਾਰਨ੍ਤਿ ਸਬ੍ਬਾਸਂ ਭਿਕ੍ਖੁਨੀਨਂ ਅਕਾਲਚੀਵਰਂ ਦਾਤੁਕਾਮੇਨ ਉਪਾਸਕੇਨ ਯਤ੍ਤਕੋ ਅਤ੍ਥਾਰਮੂਲਿਕੋ ਆਨਿਸਂਸੋ, ਤਤੋ ਅਧਿਕਂ ਵਾ ਸਮਕਂ ਵਾ ਦਤ੍ਵਾ ਯਾਚਿਤੇਨ ਸਮਗ੍ਗੇਨ ਭਿਕ੍ਖੁਨਿਸਙ੍ਘੇਨ ਯਂ ਕਥਿਨਂ ਞਤ੍ਤਿਦੁਤਿਯਕਮ੍ਮੇਨ ਅਨ੍ਤਰਾ ਉਦ੍ਧਰੀਯਤਿ, ਤਸ੍ਸ ਸੋ ਉਦ੍ਧਾਰੋ ‘ਧਮ੍ਮਿਕੋ’ਤਿ ਵੁਚ੍ਚਤਿ, ਏਵਰੂਪਂ ਕਥਿਨੁਦ੍ਧਾਰਨ੍ਤਿ ਅਤ੍ਥੋ. ਪਟਿਬਾਹੇਯ੍ਯਾਤਿ ਨਿਵਾਰੇਯ੍ਯ, ਤਸ੍ਸ ਏਵਰੂਪਂ ਕਥਿਨੁਦ੍ਧਾਰਂ ਨਿਵਾਰੇਨ੍ਤਿਯਾ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਕਥਿਨੁਦ੍ਧਾਰਂ ਪਟਿਬਾਹਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਂ ਸਤ੍ਤਮੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.
ਕਥਿਨੁਦ੍ਧਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਨਗ੍ਗਵਗ੍ਗੋ ਤਤਿਯੋ.