੪. ਤੁਵਟ੍ਟਵਗ੍ਗੋ
੧. ਏਕਮਞ੍ਚਤੁਵਟ੍ਟਨਸਿਕ੍ਖਾਪਦਵਣ੍ਣਨਾ
ਤੁਵਟ੍ਟਵਗ੍ਗਸ੍ਸ ਪਠਮੇ ਤੁਵਟ੍ਟੇਯ੍ਯੁਨ੍ਤਿ ਨਿਪਜ੍ਜੇਯ੍ਯੁਂ. ਤਾਸੁ ਪਨ ਏਕਾਯ ਵਾ ਨਿਪਨ੍ਨਾਯ ਅਪਰਾ ਨਿਪਜ੍ਜਤੁ, ਦ੍ਵੇਪਿ ਵਾ ਸਹੇਵ ਨਿਪਜ੍ਜਨ੍ਤੁ, ਦ੍ਵਿਨ੍ਨਮ੍ਪਿ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਦ੍ਵਿਨ੍ਨਂ ਏਕਮਞ੍ਚੇ ਤੁਵਟ੍ਟਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਚੇ ਪਨ ਏਕਾਯ ਨਿਪਨ੍ਨਾਯ ਏਕਾ ਨਿਸੀਦਤਿ, ਉਭੋ ਵਾ ਨਿਸੀਦਨ੍ਤਿ, ਤਾਸਂ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਏਕਮਞ੍ਚਤਾ, ਦ੍ਵਿਨ੍ਨਂ ਤੁਵਟ੍ਟਨਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.
ਏਕਮਞ੍ਚਤੁਵਟ੍ਟਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਏਕਤ੍ਥਰਣਤੁਵਟ੍ਟਨਸਿਕ੍ਖਾਪਦਵਣ੍ਣਨਾ
ਦੁਤਿਯੇ ਏਕਂ ਅਤ੍ਥਰਣਞ੍ਚੇਵ ਪਾਵੁਰਣਞ੍ਚ ਏਤਾਸਨ੍ਤਿ ਏਕਤ੍ਥਰਣਪਾਵੁਰਣਾ, ਸਂਹਾਰਿਮਾਨਂ ਪਾਵਾਰਤ੍ਥਰਣਕਟਸਾਰਕਾਦੀਨਂ ਏਕਂ ਅਨ੍ਤਂ ਅਤ੍ਥਰਿਤ੍ਵਾ ਏਕਂ ਪਾਰੁਪਿਤ੍ਵਾ ਤੁਵਟ੍ਟੇਨ੍ਤੀਨਮੇਤਂ ਅਧਿਵਚਨਂ. ਪਾਚਿਤ੍ਤਿਯਨ੍ਤਿ ਤਂਯੇਵ ਅਤ੍ਥਰਿਤ੍ਵਾ ਤਂ ਪਾਰੁਪਿਤ੍ਵਾ ਨਿਪਜ੍ਜਨ੍ਤੀਨਂ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਏਵਂ ਤੁਵਟ੍ਟਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਤ੍ਥਰਣੇ ਵਾ ਪਾਵੁਰਣੇ ਵਾ ਏਕਸ੍ਮਿਂ ਦੁਕ੍ਕਟਂ, ਨਾਨਤ੍ਥਰਣਪਾਵੁਰਣੇ ਦ੍ਵਿਕਦੁਕ੍ਕਟਂ. ਤਸ੍ਮਿਂ ਪਨ ਨਾਨਤ੍ਥਰਣਪਾਵੁਰਣਸਞ੍ਞਾਯ, ਵਵਤ੍ਥਾਨਂ ਦਸ੍ਸੇਤ੍ਵਾ ਨਿਪਜ੍ਜਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸੇਸਂ ਪਠਮਸਦਿਸਮੇਵਾਤਿ.
ਏਕਤ੍ਥਰਣਤੁਵਟ੍ਟਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਅਫਾਸੁਕਰਣਸਿਕ੍ਖਾਪਦਵਣ੍ਣਨਾ
ਤਤਿਯੇ ਅਫਾਸੁਨ੍ਤਿ ‘‘ਇਮਿਨਾ ਇਮਿਸ੍ਸਾ ਅਫਾਸੁ ਭਵਿਸ੍ਸਤੀ’’ਤਿ ਅਨਾਪੁਚ੍ਛਾ ਪੁਰਤੋ ਚਙ੍ਕਮਨਟ੍ਠਾਨਨਿਸ੍ਸਜ੍ਜਾਦਯੋ ਵਾ ਉਦ੍ਦਿਸਉਦ੍ਦਿਸਾਪਨਪਰਿਪੁਚ੍ਛਨਸਜ੍ਝਾਯਂ ਵਾ ਕਰੋਨ੍ਤਿਯਾ ਚਙ੍ਕਮਨੇ ਨਿਵਤ੍ਤਨਗਣਨਾਯ, ਠਾਨਾਦੀਸੁ ਪਯੋਗਗਣਨਾਯ, ਉਦ੍ਦੇਸਾਦੀਸੁ ਪਦਗਣਨਾਯ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਸਞ੍ਚਿਚ੍ਚ ਅਫਾਸੁਕਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨਾਯ ਤਿਕਦੁਕ੍ਕਟਂ, ਨ ਅਫਾਸੁਕਾਮਤਾਯ, ਆਪੁਚ੍ਛਾ ਪੁਰਤੋ ਚਙ੍ਕਮਨਾਦੀਨਿ ਕਰੋਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਉਪਸਮ੍ਪਨ੍ਨਤਾ, ਅਫਾਸੁਕਾਮਤਾ, ਅਫਾਸੁਕਰਣਂ, ਅਨਾਪੁਚ੍ਛਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਕਿਰਿਯਾਕਿਰਿਯਂ, ਦੁਕ੍ਖਵੇਦਨਨ੍ਤਿ.
ਅਫਾਸੁਕਰਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਨਉਪਟ੍ਠਾਪਨਸਿਕ੍ਖਾਪਦਵਣ੍ਣਨਾ
ਚਤੁਤ੍ਥੇ ਦੁਕ੍ਖਿਤਨ੍ਤਿ ਗਿਲਾਨਂ. ਸਹਜੀਵਿਨਿਨ੍ਤਿ ਸਦ੍ਧਿਵਿਹਾਰਿਨਿਂ. ਨੇਵ ਉਪਟ੍ਠਹੇਯ੍ਯਾਤਿ ਤਸ੍ਸਾ ਉਪਟ੍ਠਾਨਂ ਸਯਂ ਵਾ ਅਕਰੋਨ੍ਤਿਯਾ, ਪਰੇਹਿ ਵਾ ਅਕਾਰੇਨ੍ਤਿਯਾ ਧੁਰਂ ਨਿਕ੍ਖਿਤ੍ਤਮਤ੍ਤੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਦੁਕ੍ਖਿਤਂ ਸਹਜੀਵਿਨਿਂ ਅਨੁਪਟ੍ਠਾਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਨ੍ਤੇਵਾਸਿਨਿਯਾ ਵਾ ਅਨੁਪਸਮ੍ਪਨ੍ਨਾਯ ਵਾ ਦੁਕ੍ਕਟਂ, ਦਸਸੁ ਅਞ੍ਞਤਰਨ੍ਤਰਾਯੇ ਸਤਿ ਪਰਿਯੇਸਿਤ੍ਵਾ ਅਲਭਨ੍ਤਿਯਾ, ਗਿਲਾਨਾਯ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਗਿਲਾਨਤਾ, ਸਦ੍ਧਿਵਿਹਾਰਿਤਾ, ਅਨੁਞ੍ਞਾਤਕਾਰਣਾਭਾਵੋ, ਉਪਟ੍ਠਾਨੇ ਧੁਰਨਿਕ੍ਖੇਪੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਮਨੁਭਾਸਨਸਦਿਸਾਨੀਤਿ.
ਨਉਪਟ੍ਠਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਨਿਕ੍ਕਡ੍ਢਨਸਿਕ੍ਖਾਪਦਵਣ੍ਣਨਾ
ਪਞ੍ਚਮੇ ਉਪਸ੍ਸਯਂ ਦਤ੍ਵਾਤਿ ਸਕਵਾਟਬਦ੍ਧਂ ਅਤ੍ਤਨੋ ਪੁਗ੍ਗਲਿਕਵਿਹਾਰਂ ਦਤ੍ਵਾ. ਨਿਕ੍ਕਡ੍ਢੇਯ੍ਯਾਤਿ ਬਹੂਨਿਪਿ ਦ੍ਵਾਰਾਨਿ ਏਕਪ੍ਪਯੋਗੇਨ ਨਿਕ੍ਕਡ੍ਢੇਨ੍ਤਿਯਾ ਏਕਾ ਆਪਤ੍ਤਿ, ਨਾਨਾਪਯੋਗੇਹਿ ਪਯੋਗਗਣਨਾਯ ਆਪਤ੍ਤਿਯੋ, ਆਣਤ੍ਤਿਯਮ੍ਪਿ ਏਸੇਵ ਨਯੋ. ਸਚੇ ਪਨ ‘‘ਇਮਞ੍ਚਿਮਞ੍ਚ ਦ੍ਵਾਰਂ ਅਤਿਕ੍ਕਾਮੇਹੀ’’ਤਿ ਆਣਾਪੇਤਿ, ਏਕਾਯ ਆਣਤ੍ਤਿਯਾ ਏਵ ਦ੍ਵਾਰਗਣਨਾਯ ਆਪਤ੍ਤਿਯੋ.
ਸਾਵਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਏਤਾਦਿਸੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਕਵਾਟਬਦ੍ਧਤੋ ਦੁਕ੍ਕਟਂ, ਅਨੁਪਸਮ੍ਪਨ੍ਨਾਯ ਤਿਕਦੁਕ੍ਕਟਂ, ਸਕਵਾਟਬਦ੍ਧਤੋ ਵਾ ਅਕਵਾਟਬਦ੍ਧਤੋ ਵਾ ਉਭਿਨ੍ਨਮ੍ਪਿ ਪਰਿਕ੍ਖਾਰਨਿਕ੍ਕਡ੍ਢਨੇ ਦੁਕ੍ਕਟਮੇਵ, ਸੇਸਂ ਸਙ੍ਘਿਕਵਿਹਾਰਨਿਕ੍ਕਡ੍ਢਨਸਿਕ੍ਖਾਪਦੇ ਵੁਤ੍ਤਨਯਮੇਵਾਤਿ.
ਨਿਕ੍ਕਡ੍ਢਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਸਂਸਟ੍ਠਸਿਕ੍ਖਾਪਦਵਣ੍ਣਨਾ
ਛਟ੍ਠਂ ਉਤ੍ਤਾਨਪਦਤ੍ਥਮੇਵ. ਸਾਵਤ੍ਥਿਯਂ ਚਣ੍ਡਕਾਲ਼ਿਂ ਆਰਬ੍ਭ ਸਂਸਟ੍ਠਵਿਹਾਰਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਮੇਤ੍ਥ ਪਠਮਅਰਿਟ੍ਠਸਿਕ੍ਖਾਪਦੇ ਵੁਤ੍ਤਵਿਨਿਚ੍ਛਯਸਦਿਸਮੇਵਾਤਿ.
ਸਂਸਟ੍ਠਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਅਨ੍ਤੋਰਟ੍ਠਸਿਕ੍ਖਾਪਦਵਣ੍ਣਨਾ
ਸਤ੍ਤਮੇ ਅਨ੍ਤੋਰਟ੍ਠੇਤਿ ਯਸ੍ਸ ਵਿਜਿਤੇ ਵਿਹਰਤਿ, ਤਸ੍ਸ ਰਟ੍ਠੇ. ਅਸਤ੍ਥਿਕਾ ਚਾਰਿਕਨ੍ਤਿ ਵਿਨਾ ਸਤ੍ਥੇਨ ਗਚ੍ਛਨ੍ਤਿਯਾ, ਗਾਮਨ੍ਤਰਗਣਨਾਯ, ਅਗਾਮਕੇ ਅਰਞ੍ਞੇ ਅਦ੍ਧਯੋਜਨਗਣਨਾਯ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਵੁਤ੍ਤਨਯੇਨੇਵ ਦੇਸਚਾਰਿਕਂ ਪਕ੍ਕਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ. ਸਤ੍ਥੇਨ ਸਹ ਗਚ੍ਛਨ੍ਤਿਯਾ, ਖੇਮੇ ਅਪ੍ਪਟਿਭਯੇ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਅਨ੍ਤੋਰਟ੍ਠਤਾ, ਅਖੇਮਤਾ, ਅਨੁਞ੍ਞਾਤਕਾਰਣਾਭਾਵੋ, ਚਾਰਿਕਂ ਪਕ੍ਕਮਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.
ਅਨ੍ਤੋਰਟ੍ਠਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਤਿਰੋਰਟ੍ਠਸਿਕ੍ਖਾਪਦਵਣ੍ਣਨਾ
ਅਟ੍ਠਮੇ ਤਿਰੋਰਟ੍ਠੇਤਿ ਯਸ੍ਸ ਵਿਜਿਤੇ ਵਿਹਰਤਿ, ਤਂ ਠਪੇਤ੍ਵਾ ਅਞ੍ਞਸ੍ਸ ਰਟ੍ਠੇ. ਸੇਸਂ ਸਤ੍ਤਮੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ, ਨਗਰਂ ਪਨੇਤ੍ਥ ਰਾਜਗਹਨ੍ਤਿ.
ਤਿਰੋਰਟ੍ਠਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਅਨ੍ਤੋਵਸ੍ਸਸਿਕ੍ਖਾਪਦਵਣ੍ਣਨਾ
ਨਵਮੇ ਅਨ੍ਤੋਵਸ੍ਸਨ੍ਤਿ ਪੁਰਿਮਂ ਵਾ ਤੇਮਾਸਂ, ਪਚ੍ਛਿਮਂ ਵਾ ਤੇਮਾਸਂ ਅਵਸਿਤ੍ਵਾ ਤਸ੍ਸ ਵਸ੍ਸਸ੍ਸ ਅਨ੍ਤੋਯੇਵ. ਇਧ ਸਤ੍ਤਾਹਕਰਣੀਯੇਨ ਵਾ ਕੇਨਚਿ ਉਬ੍ਬਲ਼੍ਹਾਯ ਵਾ ਆਪਦਾਸੁ ਵਾ ਗਚ੍ਛਨ੍ਤਿਯਾ ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਸੇਸਂ ਅਟ੍ਠਮਸਦਿਸਮੇਵਾਤਿ.
ਅਨ੍ਤੋਵਸ੍ਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਚਾਰਿਕਨਪਕ੍ਕਮਨਸਿਕ੍ਖਾਪਦਵਣ੍ਣਨਾ
ਦਸਮੇ ਵਸ੍ਸਂਵੁਟ੍ਠਾਤਿ ਪੁਰਿਮਂ ਵਾ ਤੇਮਾਸਂ, ਪਚ੍ਛਿਮਂ ਵਾ ਤੇਮਾਸਂ ਵੁਟ੍ਠਾ. ਛਪ੍ਪਞ੍ਚਯੋਜਨਾਨੀਤਿ ਏਤ੍ਥ ਪਵਾਰੇਤ੍ਵਾ ਪਞ੍ਚ ਯੋਜਨਾਨਿ ਗਨ੍ਤੁਮ੍ਪਿ ਵਟ੍ਟਤਿ, ਛਸੁ ਵਤ੍ਤਬ੍ਬਮੇਵ ਨਤ੍ਥਿ. ਸਚੇ ਪਨ ਤੀਣਿ ਗਨ੍ਤ੍ਵਾ ਤੇਨੇਵ ਮਗ੍ਗੇਨ ਪਚ੍ਚਾਗਚ੍ਛਤਿ, ਨ ਵਟ੍ਟਤਿ, ਅਞ੍ਞੇਨ ਆਗਨ੍ਤੁਂ ਵਟ੍ਟਤਿ. ‘‘ਵੁਤ੍ਤਪ੍ਪਮਾਣਂ ਅਦ੍ਧਾਨਂ ਨ ਗਚ੍ਛਿਸ੍ਸਾਮੀ’’ਤਿ ਧੁਰੇ ਨਿਕ੍ਖਿਤ੍ਤਮਤ੍ਤੇ ਪਾਚਿਤ੍ਤਿਯਂ.
ਰਾਜਗਹੇ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਵਸ੍ਸਂ ਵਸਿਤ੍ਵਾ ਚਾਰਿਕਂ ਅਪਕ੍ਕਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ. ਅਨ੍ਤਰਾਯੇ ਸਤਿ, ਪਰਿਯੇਸਿਤ੍ਵਾ ਦੁਤਿਯਿਕਂ ਭਿਕ੍ਖੁਨਿਂ ਅਲਭਨ੍ਤਿਯਾ, ਗਿਲਾਨਾਯ, ਆਪਦਾਸੁ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ. ਵਸ੍ਸਂਵੁਟ੍ਠਤਾ, ਅਨੁਞ੍ਞਾਤਕਾਰਣਾਭਾਵੋ, ਪਞ੍ਚਯੋਜਨਾਨਤਿਕ੍ਕਮੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਦਿਸਾਨਿ, ਇਦਂ ਪਨ ਅਕਿਰਿਯਂ, ਦੁਕ੍ਖਵੇਦਨਨ੍ਤਿ.
ਚਾਰਿਕਨਪਕ੍ਕਮਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਤੁਵਟ੍ਟਵਗ੍ਗੋ ਚਤੁਤ੍ਥੋ.