੯. ਆਟਾਨਾਟਿਯਸੁਤ੍ਤਵਣ੍ਣਨਾ

ਪਠਮਭਾਣਵਾਰਵਣ੍ਣਨਾ

੨੭੫. ‘‘ਚਤੁਦ੍ਦਿਸਂ ਰਕ੍ਖਂ ਠਪੇਤ੍ਵਾ’’ਤਿ ਇਦਂ ਦ੍ਵੀਸੁ ਠਾਨੇਸੁ ਚਤੂਸੁ ਦਿਸਾਸੁ ਠਪਿਤਂ ਰਕ੍ਖਂ ਸਨ੍ਧਾਯ ਵੁਤ੍ਤਨ੍ਤਿ ਤਦੁਭਯਂ ਦਸ੍ਸੇਤੁਂ ‘‘ਅਸੁਰਸੇਨਾਯਾ’’ਤਿਆਦਿ ਵੁਤ੍ਤਂ. ਅਤ੍ਤਨੋ ਹਿ ਅਧਿਕਾਰੇ, ਅਤ੍ਤਨੋ ਰਕ੍ਖਾਯ ਚ ਅਪ੍ਪਮਜ੍ਜਨੇਨ ਤੇਸਂ ਇਦਂ ਦ੍ਵੀਸੁ ਠਾਨੇਸੁ ਚਤੂਸੁ ਦਿਸਾਸੁ ਆਰਕ੍ਖਟ੍ਠਪਨਂ. ਯਞ੍ਹਿ ਤਂ ਅਸੁਰਸੇਨਾਯ ਪਟਿਸੇਧਨਤ੍ਥਂ ਦੇਵਪੁਰੇ ਚਤੂਸੁ ਦਿਸਾਸੁ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਆਰਕ੍ਖਟ੍ਠਪਨਂ, ਤਂ ਅਤ੍ਤਨੋ ਅਧਿਕਾਰੇ ਅਪ੍ਪਮਜ੍ਜਨਂ. ਯਂ ਪਨ ਨੇਸਂ ਭਗਵਤੋ ਸਨ੍ਤਿਕਂ ਉਪਸਙ੍ਕਮਨੇ ਚਤੂਸੁ ਦਿਸਾਸੁ ਆਰਕ੍ਖਟ੍ਠਪਨਂ, ਤਂ ਅਤ੍ਤਨੋ ਕਤਾ ਰਕ੍ਖਾਯ ਅਪ੍ਪਮਜ੍ਜਨਂ. ਤੇਨ ਵੁਤ੍ਤਂ ‘‘ਅਸੁਰਸੇਨਾਯ ਨਿਵਾਰਣਤ੍ਥ’’ਨ੍ਤਿਆਦਿ. ਪਾਲ਼ਿਯਂ ਚਤੁਦ੍ਦਿਸਨ੍ਤਿ ਭੁਮ੍ਮਤ੍ਥੇ ਉਪਯੋਗਵਚਨਨ੍ਤਿ ਭੁਮ੍ਮਵਸੇਨ ਤਦਤ੍ਥਂ ਦਸ੍ਸੇਨ੍ਤੋ ‘‘ਚਤੂਸੁ ਦਿਸਾਸੂ’’ਤਿ ਆਹ. ਆਰਕ੍ਖਂ ਠਪੇਤ੍ਵਾਤਿ ਵੇਸ੍ਸਵਣਾਦਯੋ ਚਤ੍ਤਾਰੋ ਮਹਾਰਾਜਾਨੋ ਅਤ੍ਤਨਾ ਅਤ੍ਤਨਾ ਰਕ੍ਖਿਤਬ੍ਬਦਿਸਾਸੁ ਆਰਕ੍ਖਂ ਠਪੇਤ੍ਵਾ ਗੁਤ੍ਤਿਂ ਸਮ੍ਮਦੇਵ ਵਿਦਹਿਤ੍ਵਾ. ਬਲਗੁਮ੍ਬਂ ਠਪੇਤ੍ਵਾਤਿ ਯਕ੍ਖਸੇਨਾਦਿਸੇਨਾਬਲਸਮੂਹਂ ਠਪੇਤ੍ਵਾ. ਓਵਰਣਂ ਠਪੇਤ੍ਵਾਤਿ ਪਟਿਪਕ੍ਖਨਿਸੇਧਨਸਮਤ੍ਥਂ ਆਵਰਣਂ ਠਪੇਤ੍ਵਾ. ਇਤਿ ਤੀਹਿ ਪਦੇਹਿ ਯਥਾਕ੍ਕਮਂ ਪਚ੍ਚੇਕਂ ਦੇਵਨਗਰਦ੍ਵਾਰਸ੍ਸ ਅਨ੍ਤੋ, ਦ੍ਵਾਰਸਮੀਪੇ, ਦ੍ਵਾਰਤੋ ਬਹਿ, ਦਿਸਾਰਕ੍ਖਾਵਸਨੋਤਿ ਤਿਵਿਧਾਯ ਰਕ੍ਖਾਯ ਠਪਿਤਭਾਵੋ ਵਾ ਦੀਪਿਤੋ. ਤੇਨਾਹ ‘‘ਏਵਂ ਸਕ੍ਕਸ੍ਸ…ਪੇ… ਕਤ੍ਵਾ’’ਤਿ. ਸਤ੍ਤ ਬੁਦ੍ਧੇ ਆਰਬ੍ਭਾਤਿ ਏਤ੍ਥ ਸਤ੍ਤੇਵ ਬੁਦ੍ਧੇ ਆਰਬ੍ਭ ਪਰਿਬਨ੍ਧਨਕਾਰਣਂ ਮਹਾਪਦਾਨਟੀਕਾਯਂ (ਦੀ. ਨਿ. ਟੀ. ੨.੧੨) ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਧਮ੍ਮਆਣਨ੍ਤਿ ਧਮ੍ਮਮਯਂ ਆਣਂ, ਸਤ੍ਥੁ ਧਮ੍ਮਚਕ੍ਕਨ੍ਤਿ ਅਤ੍ਥੋ. ‘‘ਪਰਿਸਤੋ ਬਾਹਿਰਭਾਵੋ, ਅਸਮ੍ਭੋਗੋ’’ਤਿ ਏਵਮਾਦਿਂ ਇਦਞ੍ਚਿਦਞ੍ਚ ਵਿਵਜ੍ਜਨਕਰਣਂ ਕਰਿਸ੍ਸਾਮਾਤਿ. ਸਾਵਨਨ੍ਤਿ ਚਤੁਨ੍ਨਮ੍ਪਿ ਪਰਿਸਾਨਂ ਤਿਕ੍ਖਤ੍ਤੁਂ ਪਰਿਵਾਰੇਨ ਅਨੁਸਾਵਨਂ, ਯਥਾ ਸਕ੍ਕੋ ਦੇਵਾਨਮਿਨ੍ਦੋ ਅਸੁਰਸੇਨਾਯ ਨਿਵਾਰਣਤ੍ਥਂ ਚਤੂਸੁ ਦਿਸਾਸੁ ਆਰਕ੍ਖਂ ਠਪਾਪੇਤਿ, ਏਵਂ ਮਹਾਰਾਜਾਨੋਪਿ ਤਾਦਿਸੇ ਕਿਚ੍ਚਵਿਸੇਸੇ ਅਤ੍ਤਨੋ ਆਰਕ੍ਖਂ ਠਪੇਨ੍ਤਿ. ਇਮੇਸਮ੍ਪਿ ਹਿ ਤਤੋ ਸਾਸਙ੍ਕਂ ਸਪ੍ਪਟਿਭਯਨ੍ਤਿ. ਤੇਨ ਵੁਤ੍ਤਂ ‘‘ਅਤ੍ਤਨੋਪੀ’’ਤਿਆਦਿ.

ਅਭਿਕ੍ਕਨ੍ਤਾਤਿ ਅਤਿਕ੍ਕਨ੍ਤਾ, ਵਿਗਤਾਤਿ ਅਤ੍ਥੋਤਿ ਆਹ ‘‘ਖਯੇ ਦਿਸ੍ਸਤੀ’’ਤਿ. ਤੇਨੇਵ ਹਿ ‘‘ਨਿਕ੍ਖਨ੍ਤੋ ਪਠਮੋ ਯਾਮੋ’’ਤਿ ਅਨਨ੍ਤਰਂ ਵੁਤ੍ਤਂ. ਅਭਿਕ੍ਕਨ੍ਤਤਰੋਤਿ ਅਤਿਵਿਯ ਕਨ੍ਤਤਰੋ. ਤਾਦਿਸੋ ਚ ਸੁਨ੍ਦਰੋ ਭਦ੍ਦਕੋ ਨਾਮ ਹੋਤੀਤਿ ਆਹ ‘‘ਸੁਨ੍ਦਰੇ ਦਿਸ੍ਸਤੀ’’ਤਿ.

ਕੋਤਿ ਦੇਵਨਾਗਯਕ੍ਖਗਨ੍ਧਬ੍ਬਾਦੀਸੁ ਕੋ ਕਤਮੋ. ਮੇਤਿ ਮਮ. ਪਾਦਾਨੀਤਿ ਪਾਦੇ. ਇਦ੍ਧਿਯਾਤਿ ਇਮਾਯ ਏਵਰੂਪਾਯ ਦੇਵਿਦ੍ਧਿਯਾ. ‘‘ਯਸਸਾ’’ਤਿ ਇਮਿਨਾ ਏਦਿਸੇਨ ਪਰਿਵਾਰੇਨ, ਪਰਿਚ੍ਛੇਦੇਨ ਚ. ਜਲਨ੍ਤਿ ਵਿਜ੍ਜੋਤਮਾਨੋ. ਅਭਿਕ੍ਕਨ੍ਤੇਨਾਤਿ ਅਤਿਵਿਯ ਕਨ੍ਤੇਨ ਕਮਨੀਯੇਨ ਅਭਿਰੂਪੇਨ. ਵਣ੍ਣੇਨਾਤਿ ਸਰੀਰਵਣ੍ਣਨਿਭਾਯ. ਸਬ੍ਬਾ ਓਭਾਸਯਂ ਦਿਸਾਤਿ ਦਸਪਿ ਦਿਸਾ ਪਭਾਸੇਨ੍ਤੋ ਚਨ੍ਦੋ ਵਿਯ, ਸੂਰਿਯੋ ਵਿਯ ਚ ਏਕੋਭਾਸਂ ਏਕਾਲੋਕਂ ਕਰੋਨ੍ਤੋਤਿ ਗਾਥਾਯ ਅਤ੍ਥੋ. ਅਭਿਰੂਪੇਤਿ ਉਲ਼ਾਰਰੂਪੇ ਸਮ੍ਪਨ੍ਨਰੂਪੇ. ਅਬ੍ਭਨੁਮੋਦਨੇਤਿ ਸਮ੍ਪਹਂਸਨੇ. ਇਧ ਪਨਾਤਿ ‘‘ਅਭਿਕ੍ਕਨ੍ਤਾਯ ਰਤ੍ਤਿਯਾ’’ਤਿ ਏਤਸ੍ਮਿਂ ਪਦੇ. ਤੇਨਾਤਿ ਖਯਪਰਿਯਾਯਤ੍ਤਾ.

ਰੂਪਾਯਤਨਾਦੀਸੂਤਿ ਆਦਿ-ਸਦ੍ਦੇਨ ਅਕ੍ਖਰਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਸੁਵਣ੍ਣਵਣ੍ਣੋਤਿ ਸੁਵਣ੍ਣਚ੍ਛਵੀਤਿ ਅਯਮੇਤ੍ਥ ਅਤ੍ਥੋਤਿ ਆਹ ‘‘ਛਵਿਯ’’ਨ੍ਤਿ. ਤਥਾ ਹਿ ਵੁਤ੍ਤਂ ‘‘ਕਞ੍ਚਨਸਨ੍ਨਿਭਤ੍ਤਚੋ’’ਤਿ (ਦੀ. ਨਿ. ੨.੩੫; ੩.੨੦੦, ੨੧੮; ਮ. ਨਿ. ੨.੩੮੬) ਸਞ੍ਞੂਲ਼੍ਹਾਤਿ ਸਙ੍ਗਨ੍ਥਿਤਾ. ਵਣ੍ਣਾਤਿ ਗੁਣਵਣ੍ਣਨਾਤਿ ਆਹ ‘‘ਥੁਤਿਯ’’ਨ੍ਤਿ, ਥੋਮਨਾਯਨ੍ਤਿ ਅਤ੍ਥੋ. ਕੁਲਵਗ੍ਗੇਤਿ ਖਤ੍ਤਿਯਾਦਿਕੁਲਕੋਟ੍ਠਾਸੇ. ਤਤ੍ਥ ‘‘ਅਚ੍ਛੋ ਵਿਪ੍ਪਸਨ੍ਨੋ’’ਤਿਆਦਿਨਾ ਵਣ੍ਣਿਤਬ੍ਬਟ੍ਠੇਨ ਵਣ੍ਣੋ, ਛਵਿ. ਵਣ੍ਣਨਟ੍ਠੇਨ ਵਣ੍ਣੋ, ਥੁਤਿ. ਅਭਿਤ੍ਥਵਨਟ੍ਠੇਨ ਵਣ੍ਣੋ, ਥੁਤਿ, ਅਞ੍ਞਮਞ੍ਞਂ ਅਸਙ੍ਕਰਤੋ ਵਣ੍ਣਿਤਬ੍ਬਤੋ ਠਪੇਤਬ੍ਬਤੋ ਵਣ੍ਣੋ, ਖਤ੍ਤਿਯਾਦਿਕੁਲਵਗ੍ਗੋ. ਵਣ੍ਣੀਯਤਿ ਞਾਪੀਯਤਿ ਏਤੇਨਾਤਿ ਵਣ੍ਣੋ, ਞਾਪਕਂ ਕਾਰਣਂ. ਵਣ੍ਣਨਤੋ ਥੂਲਰਸ੍ਸਾਦਿਭਾਵੇਨ ਉਪਟ੍ਠਾਨਤੋ ਵਣ੍ਣੋ, ਸਣ੍ਠਾਨਂ. ‘‘ਮਹਨ੍ਤਂ ਖੁਦ੍ਦਕਂ, ਮਜ੍ਝਿਮ’’ਨ੍ਤਿ ਵਣ੍ਣੇਤਬ੍ਬਤੋ ਪਮਾਣੇਤਬ੍ਬਤੋ ਵਣ੍ਣੋ, ਪਮਾਣਂ. ਵਣ੍ਣੀਯਤਿ ਚਕ੍ਖੁਨਾ ਵਿਵਰੀਯਤੀਤਿ ਵਣ੍ਣੋ, ਰੂਪਾਯਤਨਨ੍ਤਿ ਏਵਂ ਤਸ੍ਮਿਂ ਤਸ੍ਮਿਂ ਅਤ੍ਥੇ ਵਣ੍ਣ-ਸਦ੍ਦਸ੍ਸ ਪਵਤ੍ਤਿ ਵੇਦਿਤਬ੍ਬਾ. ਸੋਤਿ ਵਣ੍ਣਸਦ੍ਦੋ. ਛਵਿਯਂ ਦਟ੍ਠਬ੍ਬੋ ਰੂਪਾਯਤਨੇ ਗਯ੍ਹਮਾਨਸ੍ਸ ਛਵਿਮੁਖੇਨੇਵ ਗਹੇਤਬ੍ਬਤੋ. ‘‘ਛਵਿਗਤਾ ਪਨ ਵਣ੍ਣਧਾਤੁ ਏਵ ਸੁਵਣ੍ਣਵਣ੍ਣੋਤਿ ਏਤ੍ਥ ਵਣ੍ਣਗ੍ਗਹਣੇਨ ਗਹਿਤਾ’’ਤਿ ਅਪਰੇ.

ਕੇਵਲਪਰਿਪੁਣ੍ਣਨ੍ਤਿ ਏਕਦੇਸਮ੍ਪਿ ਅਸੇਸੇਤ੍ਵਾ ਨਿਰਵਸੇਸਤੋਵ ਪਰਿਪੁਣ੍ਣਨ੍ਤਿ ਅਯਮੇਤ੍ਥ ਅਤ੍ਥੋਤਿ ਆਹ ‘‘ਅਨਵਸੇਸਤਾ ਅਤ੍ਥੋ’’ਤਿ. ਕੇਵਲਕਪ੍ਪਾਤਿ ਕਪ੍ਪ-ਸਦ੍ਦੋ ਨਿਪਾਤੋ ਪਦਪੂਰਣਮਤ੍ਤਂ, ਕੇਵਲਂ ਇਚ੍ਚੇਵ ਅਤ੍ਥੋ. ਕੇਵਲ-ਸਦ੍ਦੋ ਬਹੁਲਵਾਚੀਤਿ ਆਹ ‘‘ਯੇਭੁਯ੍ਯਤਾ ਅਤ੍ਥੋ’’ਤਿ. ਕੇਚਿ ਪਨ ‘‘ਈਸਕਂ ਅਸਮਤ੍ਤਾ ਕੇਵਲਕਪ੍ਪਾ’’ਤਿ ਵਦਨ੍ਤਿ. ਏਵਂ ਸਤਿ ਅਨਵਸੇਸਤ੍ਥੋ ਏਵ ਕੇਵਲ-ਸਦ੍ਦਤ੍ਥੋ ਸਿਯਾ, ਅਨਤ੍ਥਨ੍ਤਰੇਨ ਪਨ ਕਪ੍ਪ-ਸਦ੍ਦੇਨ ਪਦਵਡ੍ਢਨਂ ਕਤਂ ਕੇਵਲਮੇਵ ਕੇਵਲਕਪ੍ਪਨ੍ਤਿ. ਅਥ ਵਾ ਕਪ੍ਪਨੀਯਤਾ, ਪਞ੍ਞਾਪੇਤਬ੍ਬਤਾ ਕੇਵਲਕਪ੍ਪਾ. ਅਬ੍ਯਾਮਿਸ੍ਸਤਾ ਵਿਜਾਤਿਯੇਨ ਅਸਙ੍ਕਰਾ ਸੁਦ੍ਧਤਾ. ਅਨਤਿਰੇਕਤਾ ਤਂਪਰਮਤਾ ਵਿਸੇਸਾਭਾਵੋ. ਕੇਵਲਕਪ੍ਪਨ੍ਤਿ ਕੇਵਲਂ ਦਲ਼੍ਹਂ ਕਤ੍ਵਾਤਿ ਅਤ੍ਥੋ. ਕੇਵਲਂ ਵੁਚ੍ਚਤਿ ਨਿਬ੍ਬਾਨਂ ਸਬ੍ਬਸਙ੍ਖਤਵਿਵਿਤ੍ਤਤ੍ਤਾ. ਤਂ ਏਤਸ੍ਸ ਅਧਿਗਤਂ ਅਤ੍ਥੀਤਿ ਕੇਵਲੀ, ਸਚ੍ਛਿਕਤਨਿਰੋਧੋ ਖੀਣਾਸਵੋ.

ਕਪ੍ਪ-ਸਦ੍ਦੋ ਪਨਾਯਂ ਸ-ਉਪਸਗ੍ਗੋ, ਅਨੁਪਸਗ੍ਗੋ ਚਾਤਿ ਅਧਿਪ੍ਪਾਯੇਨ ਓਕਪ੍ਪਨਿਯਪਦੇ ਲਬ੍ਭਮਾਨਂ ਕਪ੍ਪਨਿਯਸਦ੍ਦਮਤ੍ਤਂ ਨਿਦਸ੍ਸੇਤਿ, ਅਞ੍ਞਥਾ ਕਪ੍ਪ-ਸਦ੍ਦਸ੍ਸ ਅਤ੍ਥੁਦ੍ਧਾਰੇ ਓਕਪ੍ਪਨਿਯਪਦਂ ਅਨਿਦਸ੍ਸਨਮੇਵ ਸਿਯਾ. ਸਮਣਕਪ੍ਪੇਹੀਤਿ ਵਿਨਯਕ੍ਕਮਸਿਦ੍ਧੇਹਿ ਸਮਣਵੋਹਾਰੇਹਿ. ਨਿਚ੍ਚਕਪ੍ਪਨ੍ਤਿ ਨਿਚ੍ਚਕਾਲਂ. ਪਞ੍ਞਤ੍ਤੀਤਿ ਨਾਮਞ੍ਹੇਤਂ ਤਸ੍ਸ ਆਯਸ੍ਮਤੋ, ਯਦਿਦਂ ਕਪ੍ਪੋਤਿ. ਕਪ੍ਪਿਤਕੇਸਮਸ੍ਸੂਤਿ ਕਤ੍ਤਰਿਯਾ ਛੇਦਿਤਕੇਸਮਸ੍ਸੁ. ਦ੍ਵਙ੍ਗੁਲਕਪ੍ਪੋਤਿ ਮਜ੍ਝਨ੍ਹਿਕਵੇਲਾਯ ਵੀਤਿਕ੍ਕਨ੍ਤਾਯ ਦ੍ਵਙ੍ਗੁਲਤਾਵਿਕਪ੍ਪੋ. ਲੇਸੋਤਿ ਅਪਦੇਸੋ. ਅਨਵਸੇਸਂ ਫਰਿਤੁਂ ਸਮਤ੍ਥਸ੍ਸ ਓਭਾਸਸ੍ਸ ਕੇਨਚਿ ਕਾਰਣੇਨ ਏਕਦੇਸਫਰਣਮ੍ਪਿ ਸਿਯਾ, ਅਯਂ ਪਨ ਸਬ੍ਬਸੋਵ ਫਰੀਤਿ ਦਸ੍ਸੇਤੁਂ ਸਮਨ੍ਤਤ੍ਥੋ ਕਪ੍ਪ-ਸਦ੍ਦੋ ਗਹਿਤੋਤਿ ਆਹ ‘‘ਅਨਵਸੇਸਂ ਸਮਨ੍ਤਤੋ’’ਤਿ.

ਯਸ੍ਮਾ ਦੇਵਤਾਨਂ ਸਰੀਰਪ੍ਪਭਾ ਦ੍ਵਾਦਸਯੋਜਨਮਤ੍ਤਂ ਠਾਨਂ, ਤਤੋ ਭਿਯ੍ਯੋਪਿ ਫਰਿਤ੍ਵਾ ਤਿਟ੍ਠਤਿ, ਤਥਾ ਵਤ੍ਥਾਭਰਣਾਦੀਹਿ ਸਮੁਟ੍ਠਿਤਾ ਪਭਾ, ਤਸ੍ਮਾ ਵੁਤ੍ਤਂ ‘‘ਚਨ੍ਦਿਮਾ ਵਿਯ, ਸੂਰਿਯੋ ਵਿਯ ਚ ਏਕੋਭਾਸਂ ਏਕਂ ਪਜ੍ਜੋਤਂ ਕਰਿਤ੍ਵਾ’’ਤਿ. ਕਸ੍ਮਾ ਏਤੇ ਮਹਾਰਾਜਾਨੋ ਭਗਵਤੋ ਸਨ੍ਤਿਕੇ ਨਿਸੀਦਿਂਸੁ? ਨਨੁ ਯੇਭੁਯ੍ਯੇਨ ਦੇਵਤਾ ਭਗਵਤੋ ਸਨ੍ਤਿਕਂ ਉਪਗਤਾ ਠਤ੍ਵਾਵ ਕਥੇਤਬ੍ਬਂ ਕਥੇਨ੍ਤਾ ਗਚ੍ਛਨ੍ਤੀਤਿ? ਸਚ੍ਚਮੇਤਂ, ਇਧ ਪਨ ਨਿਸੀਦਨੇ ਕਾਰਣਂ ਅਤ੍ਥਿ, ਤਂ ਦਸ੍ਸੇਤੁਂ ‘‘ਦੇਵਤਾਨ’’ਨ੍ਤਿਆਦਿ ਵੁਤ੍ਤਂ. ‘‘ਇਦਂ ਪਰਿਤ੍ਤਂ ਨਾਮ ਸਤ੍ਤਬੁਦ੍ਧਪਟਿਸਂਯੁਤ੍ਤਂ ਗਰੁ, ਤਸ੍ਮਾ ਨ ਅਮ੍ਹੇਹਿ ਠਤ੍ਵਾ ਗਹੇਤਬ੍ਬ’’ਨ੍ਤਿ ਚਿਨ੍ਤੇਤ੍ਵਾ ਪਰਿਤ੍ਤਗਾਰਵਵਸੇਨ ਨਿਸੀਦਿਂਸੁ.

੨੭੬. ਕਸ੍ਮਾ ਪਨੇਤ੍ਥ ਵੇਸ੍ਸਵਣੋ ਏਵ ਕਥੇਸਿ, ਨ ਇਤਰੇਸੁ ਯੋ ਕੋਚੀਤਿ? ਤਤ੍ਥ ਕਾਰਣਂ ਦਸ੍ਸੇਤੁਂ ‘‘ਕਿਞ੍ਚਾਪੀ’’ਤਿਆਦਿ ਵੁਤ੍ਤਂ. ਵਿਸ੍ਸਾਸਿਕੋ ਅਭਿਣ੍ਹਂ ਉਪਸਙ੍ਕਮਨੇਨ. ਬ੍ਯਤ੍ਤੋਤਿ ਵਿਸਾਰਦੋ, ਤਞ੍ਚਸ੍ਸ ਵੇਯ੍ਯਤ੍ਤਿਯਂ ਸੁਟ੍ਠੁ ਸਿਕ੍ਖਿਤਭਾਵੇਨਾਤਿ ਆਹ ‘‘ਸੁਸਿਕ੍ਖਿਤੋ’’ਤਿ. ਮਨੁਸ੍ਸੇਸੁ ਵਿਯ ਹਿ ਦੇਵੇਸੁਪਿ ਕੋਚਿਦੇਵ ਪੁਰਿਮਜਾਤਿਪਰਿਚਯੇਨ ਸੁਸਿਕ੍ਖਿਤੋ ਹੋਤਿ, ਤਤ੍ਰਾਪਿ ਕੋਚਿਦੇਵ ਯਥਾਧਿਪ੍ਪੇਤਮਤ੍ਥਂ ਵਤ੍ਤੁਂ ਸਮਤ੍ਥੋ ਪਰਿਪੁਣ੍ਣਪਦਬ੍ਯਞ੍ਜਨਾਯ ਪੋਰਿਯਾ ਵਾਚਾਯ ਸਮਨ੍ਨਾਗਤੋ. ‘‘ਮਹੇਸਕ੍ਖਾ’’ਤਿ ਇਮਸ੍ਸ ਅਤ੍ਥਵਚਨਂ ‘‘ਆਨੁਭਾਵਸਮ੍ਪਨ੍ਨਾ’’ਤਿ, ਮਹੇਸਕ੍ਖਾਤਿ ਵਾ ਮਹਾਪਰਿਵਾਰਾਤਿ ਅਤ੍ਥੋ. ਪਾਣਾਤਿਪਾਤੇ ਆਦੀਨਵਦਸ੍ਸਨੇਨੇਵ ਤਂ ਵਿਪਰਿਯਾਯਤੋ ਤਤੋ ਵੇਰਮਣਿਯਂ ਆਨਿਸਂਸੋ ਪਾਕਟੋ ਹੋਤੀਤਿ ‘‘ਆਦੀਨਵਂ ਦਸ੍ਸੇਤ੍ਵਾ’’ ਇਚ੍ਚੇਵ ਵੁਤ੍ਤਂ. ਤੇਸੁ ਸੇਨਾਸਨੇਸੂਤਿ ਯਾਨਿ ‘‘ਅਰਞ੍ਞਵਨਪ੍ਪਤ੍ਥਾਨੀ’’ਤਿਆਦਿਨਾ (ਮ. ਨਿ. ੧.੩੪-੪੫) ਵੁਤ੍ਤਾਨਿ ਭਿਕ੍ਖੂਨਂ ਵਸਨਟ੍ਠਾਨਭੂਤਾਨਿ ਅਰਞ੍ਞਾਯਤਨਾਨਿ, ਤੇਸੁ ਭਿਕ੍ਖੂਹਿ ਸਯਿਤਬ੍ਬਤੋ, ਆਸਿਤਬ੍ਬਤੋ ਚ ਸੇਨਾਸਨਸਞ੍ਞਿਤੇਸੁ. ਨਿਬਦ੍ਧਵਾਸਿਨੋਤਿ ਰੁਕ੍ਖਪਬ੍ਬਤਪਟਿਬਦ੍ਧੇਸੁ ਵਿਮਾਨੇਸੁ ਨਿਚ੍ਚਵਾਸਿਤਾਯ ਨਿਬਦ੍ਧਵਾਸਿਨੋ. ਬਦ੍ਧਤ੍ਤਾਤਿ ਗਾਥਾਭਾਵੇਨ ਗਨ੍ਥਿਤਤ੍ਤਾ ਸਮ੍ਬਨ੍ਧਿਤਤ੍ਤਾ.

‘‘ਉਗ੍ਗਣ੍ਹਾਤੁ ਭਨ੍ਤੇ ਭਗਵਾ’’ਤਿ ਅਤ੍ਤਨਾ ਵੁਚ੍ਚਮਾਨਂ ਪਰਿਤ੍ਤਂ ਭਗਵਨ੍ਤਂ ਉਗ੍ਗਣ੍ਹਾਪੇਤੁਕਾਮੋ ਵੇਸ੍ਸਵਣੋ ਅਵੋਚਾਤਿ ਅਧਿਪ੍ਪਾਯੇਨ ਚੋਦਕੋ ‘‘ਕਿਂ ਪਨ ਭਗਵਤੋ ਅਪ੍ਪਚ੍ਚਕ੍ਖਧਮ੍ਮੋ ਨਾਮ ਅਤ੍ਥੀ’’ਤਿ ਚੋਦੇਸਿ. ਆਚਰਿਯੋ ਸਬ੍ਬਤ੍ਥ ਅਪ੍ਪਟਿਹਤਞਾਣਚਾਰਸ੍ਸ ਭਗਵਤੋ ਨ ਕਿਞ੍ਚਿ ਅਪ੍ਪਚ੍ਚਕ੍ਖਨ੍ਤਿ ਦਸ੍ਸੇਨ੍ਤੋ ‘‘ਨਤ੍ਥੀ’’ਤਿ ਵਤ੍ਵਾ ‘‘ਉਗ੍ਗਣ੍ਹਾਤੁ ਭਨ੍ਤੇ ਭਗਵਾ’’ਤਿ ਵਦਤੋ ਵੇਸ੍ਸਵਣਸ੍ਸ ਅਧਿਪ੍ਪਾਯਂ ਵਿਵਰਨ੍ਤੋ ‘‘ਓਕਾਸਕਰਣਤ੍ਥ’’ਨ੍ਤਿਆਦਿਮਾਹ. ਯਥਾ ਹਿ ਪਞ੍ਚਸਿਖੋ ਗਨ੍ਧਬ੍ਬਦੇਵਪੁਤ੍ਤੋ ਦੇਵਾਨਂ ਤਾਵਤਿਂਸਾਨਂ, ਬ੍ਰਹ੍ਮੁਨੋ ਚ ਸਨਙ੍ਕੁਮਾਰਸ੍ਸ ਸਮ੍ਮੁਖਾ ਅਤ੍ਤਨੋ ਯਥਾਸੁਤਂ ਧਮ੍ਮਂ ਭਗਵਤੋ ਸਨ੍ਤਿਕਂ ਉਪਗਨ੍ਤ੍ਵਾ ਪਵੇਦੇਤਿ, ਏਵਮਯਮ੍ਪਿ ਮਹਾਰਾਜਾ ਇਤਰੇਹਿ ਸਦ੍ਧਿਂ ਆਟਾਨਾਟਨਗਰੇ ਗਾਥਾਵਸੇਨ ਬਨ੍ਧਿਤਂ ਪਰਿਤ੍ਤਂ ਭਗਵਤੋ ਪਵੇਦੇਤੁਂ ਓਕਾਸਂ ਕਾਰੇਨ੍ਤੋ ‘‘ਉਗ੍ਗਣ੍ਹਾਤੁ ਭਨ੍ਤੇ ਭਗਵਾ’’ਤਿ ਆਹ, ਨ ਨਂ ਤਸ੍ਸ ਪਰਿਯਾਪੁਣਨੇ ਨਿਯੋਜੇਨ੍ਤੋ. ਤਸ੍ਮਾ ਉਗ੍ਗਣ੍ਹਾਤੂਤਿ ਯਥਿਦਂ ਪਰਿਤ੍ਤਂ ਮਯਾ ਪਵੇਦਿਤਮਤ੍ਤਮੇਵ ਹੁਤ੍ਵਾ ਚਤੁਨ੍ਨਂ ਪਰਿਸਾਨਂ ਚਿਰਕਾਲਂ ਹਿਤਾਵਹਂ ਹੋਤਿ, ਏਵਂ ਉਦ੍ਧਂ ਆਰਕ੍ਖਾਯ ਗਣ੍ਹਾਤੁ, ਸਮ੍ਪਟਿਚ੍ਛਤੂਤਿ ਅਤ੍ਥੋ. ਸਤ੍ਥੁ ਕਥਿਤੇਤਿ ਸਤ੍ਥੁ ਆਰੋਚਿਤੇ, ਚਤੁਨ੍ਨਂ ਪਰਿਸਾਨਂ ਸਤ੍ਥੁ ਕਥਨੇ ਵਾਤਿ ਅਤ੍ਥੋ. ਸੁਖਵਿਹਾਰਾਯਾਤਿ ਯਕ੍ਖਾਦੀਹਿ ਅਵਿਹਿਂਸਾਯ ਲਦ੍ਧਬ੍ਬਸੁਖਵਿਹਾਰਾਯ.

੨੭੭. ਸਤ੍ਤਪਿ ਬੁਦ੍ਧਾ ਚਕ੍ਖੁਮਨ੍ਤੋ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਭਾਵੇ ਵਿਸੇਸਾਭਾਵਤੋ. ਤਸ੍ਮਾਤਿ ਯਸ੍ਮਾ ਚਕ੍ਖੁਮਭਾਵੋ ਵਿਯ ਸਬ੍ਬਭੂਤਾਨੁਕਮ੍ਪਿਤਾਦਯੋ ਸਬ੍ਬੇਪਿ ਵਿਸੇਸਾ ਸਤ੍ਤਨ੍ਨਮ੍ਪਿ ਬੁਦ੍ਧਾਨਂ ਸਾਧਾਰਣਾ, ਤਸ੍ਮਾ, ਗੁਣਨੇਮਿਤ੍ਤਕਾਨੇਵ ਵਾ ਯਸ੍ਮਾ ਬੁਦ੍ਧਾਨਂ ਨਾਮਾਨਿ ਨਾਮ, ਨ ਲਿਙ੍ਗਿਕਾਵਤ੍ਥਿਕਯਾਦਿਚ੍ਛਕਾਨਿ, ਤਸ੍ਮਾ ਬੁਦ੍ਧਾਨਂ ਗੁਣਵਿਸੇਸਦੀਪਨਾਨਿ ‘‘ਚਕ੍ਖੁਮਨ੍ਤਸ੍ਸਾ’’ਤਿਆਦਿਨਾ (ਦੀ. ਨਿ. ੩.੨੭੭) ਵੁਤ੍ਤਾਨਿ ਏਤਾਨਿ ਏਕੇਕਸ੍ਸ ਸਤ੍ਤ ਸਤ੍ਤ ਨਾਮਾਨਿ ਹੋਨ੍ਤਿ. ਤੇਸਂ ਨਾਮਾਨਂ ਸਾਧਾਰਣਭਾਵਂ ਅਤ੍ਥਵਸੇਨ ਯੋਜੇਤਬ੍ਬਾਤਿ ਦਸ੍ਸੇਤੁਂ ‘‘ਸਬ੍ਬੇਪੀ’’ਤਿਆਦਿ ਵੁਤ੍ਤਂ. ਸਬ੍ਬਭੂਤਾਨੁਕਮ੍ਪਿਨੋਤਿ ਅਨਞ੍ਞਸਾਧਾਰਣਮਹਾਕਰੁਣਾਯ ਸਬ੍ਬਸਤ੍ਤਾਨਂ ਅਨੁਕਮ੍ਪਿਕਾ. ਨ੍ਹਾਤਕਿਲੇਸਤ੍ਤਾਤਿ ਅਟ੍ਠਙ੍ਗਿਕੇਨ ਅਰਿਯਮਗ੍ਗਜਲੇਨ ਸਪਰਸਨ੍ਤਾਨੇਸੁ ਨਿਰਵਸੇਸਤੋ ਧੋਤਕਿਲੇਸਮਲਤ੍ਤਾ. ਮਾਰਸੇਨਾਪਮਦ੍ਦਿਨੋਤਿ ਸਪਰਿਵਾਰੇ ਪਞ੍ਚਪਿ ਮਾਰੇ ਪਮਦ੍ਦਿਤਵਨ੍ਤੋ. ਵੁਸਿਤਵਨ੍ਤੋਤਿ ਮਗ੍ਗਬ੍ਰਹ੍ਮਚਰਿਯਵਾਸਂ, ਦਸਵਿਧਂ ਅਰਿਯਵਾਸਞ੍ਚ ਵੁਸਿਤਵਨ੍ਤੋ. ਵੁਸਿਤਵਨ੍ਤਤਾਯ ਏਵ ਬਾਹਿਤਪਾਪਤਾ ਵੁਤ੍ਤਾ ਹੋਤੀਤਿ ‘‘ਬ੍ਰਾਹ੍ਮਣਸ੍ਸਾ’’ਤਿ ਪਦਂ ਅਨਾਮਟ੍ਠਂ. ਵਿਮੁਤ੍ਤਾਤਿ ਅਨਞ੍ਞਸਾਧਾਰਣਾਨਂ ਪਞ੍ਚਨ੍ਨਮ੍ਪਿ ਵਿਮੁਤ੍ਤੀਨਂ ਵਸੇਨ ਨਿਰਵਸੇਸਤੋ ਮੁਤ੍ਤਾ. ਅਙ੍ਗਤੋਤਿ ਸਰੀਰਙ੍ਗਤੋ, ਞਾਣਙ੍ਗਤੋ ਚ, ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣ- (ਦੀ. ਨਿ. ੨.੩੩; ੩.੨੦੦; ਮ. ਨਿ. ੨.੩੮੫) ਅਸੀਤਿਅਨੁਬ੍ਯਞ੍ਜਨੇਹਿ ਨਿਕ੍ਖਮਨਪ੍ਪਭਾ, ਬ੍ਯਾਮਪ੍ਪਭਾ, ਕੇਤੁਮਾਲਾਉਣ੍ਹੀਸਪ੍ਪਭਾ ਚ ਸਰੀਰਙ੍ਗਤੋ ਨਿਕ੍ਖਮਨਕਰਸ੍ਮਿਯੋ, ਯਮਕਮਹਾਪਾਟਿਹਾਰਿਯਾਦੀਸੁ ਉਪ੍ਪਜ੍ਜਨਕਪ੍ਪਭਾ ਞਾਣਙ੍ਗਤੋ ਨਿਕ੍ਖਮਨਕਰਸ੍ਮਿਯੋ. ਨ ਏਤਾਨੇਵ ‘‘ਚਕ੍ਖੁਮਾ’’ਤਿਆਦਿਨਾ (ਦੀ. ਨਿ. ੩.੨੭੭) ਵੁਤ੍ਤਾਨਿ ਸਤ੍ਤ ਨਾਮਾਨਿ, ਅਥ ਖੋ ਅਞ੍ਞਾਨਿਪਿ ਬਹੂਨਿ ਅਪਰਿਮਿਤਾਨਿ ਨਾਮਾਨਿ. ਕਥਨ੍ਤਿ ਆਹ ‘‘ਅਸਙ੍ਖ੍ਯੇਯ੍ਯਾਨਿ ਨਾਮਾਨਿ ਸਗੁਣੇਨ ਮਹੇਸਿਨੋਤਿ ਵੁਤ੍ਤ’’ਨ੍ਤਿ (ਧ. ਸ. ਅਟ੍ਠ. ੧੩੧੩; ਉਦਾ. ਅਟ੍ਠ. ੫੩; ਪਟਿ. ਅਟ੍ਠ. ੭੬). ਕੇਨ ਵੁਤ੍ਤਂ? ਧਮ੍ਮਸੇਨਾਪਤਿਨਾ.

ਯਦਿ ਏਵਂ ਕਸ੍ਮਾ ਵੇਸ੍ਸਵਣੋ ਏਤਾਨੇਵ ਗਣ੍ਹੀਤਿ ਆਹ ‘‘ਅਤ੍ਤਨੋ ਪਾਕਟਨਾਮਵਸੇਨਾ’’ਤਿ. ਖੀਣਾਸਵਾ ਜਨਾਤਿ ਅਧਿਪ੍ਪੇਤਾ. ਤੇ ਹਿ ਕਮ੍ਮਕਿਲੇਸੇਹਿ ਜਾਤਾਪਿ ਏਵਂ ਨ ਪੁਨ ਜਾਯਿਸ੍ਸਨ੍ਤੀਤਿ ਇਮਿਨਾ ਅਤ੍ਥੇਨ ਜਨਾ. ਯਥਾਹ ‘‘ਯੋ ਚ ਕਾਲਘਸੋ ਭੂਤੋ’’ਤਿ (ਜਾ. ੧.੨.੧੯੦) ਦੇਸਨਾਸੀਸਮਤ੍ਤਨ੍ਤਿ ਨਿਦਸ੍ਸਨਮਤ੍ਤਨ੍ਤਿ ਅਤ੍ਥੋ, ਅਵਯਵੇਨ ਵਾ ਸਮੁਦਾਯੁਪਲਕ੍ਖਣਮੇਤਂ. ਸਤਿ ਚ ਪਿਸੁਣਵਾਚਪ੍ਪਹਾਨੇ ਫਰੁਸਵਾਚਾ ਪਹੀਨਾਵ ਹੋਤਿ, ਪਗੇਵ ਚ ਮੁਸਾਵਾਦੋਤਿ ‘‘ਅਪਿਸੁਣਾ’’ ਇਚ੍ਚੇਵ ਵੁਤ੍ਤਾ. ਮਹਤ੍ਤਾਤਿ ਮਹਾ ਅਤ੍ਤਾ ਸਭਾਵੋ ਏਤੇਸਨ੍ਤਿ ਮਹਤ੍ਤਾ. ਤੇਨਾਹ ‘‘ਮਹਨ੍ਤਭਾਵਂ ਪਤ੍ਤਾ’’ਤਿ. ਮਹਨ੍ਤਾਤਿ ਵਾ ਮਹਾ ਅਨ੍ਤਾ, ਪਰਿਨਿਬ੍ਬਾਨਪਰਿਯੋਸਾਨਾਤਿ ਵੁਤ੍ਤਂ ਹੋਤਿ. ਮਹਨ੍ਤੇਹਿ ਵਾ ਸੀਲਾਦੀਹਿ ਸਮਨ੍ਨਾਗਤਾ. ਅਯਂ ਤਾਵ ਅਟ੍ਠਕਥਾਯਂ ਆਗਤਨਯੇਨ ਅਤ੍ਥੋ. ਇਤਰੇਸਂ ਪਨ ਮਤੇਨ ਬੁਦ੍ਧਾਦੀਹਿ ਅਰਿਯੇਹਿ ਮਹਨੀਯਤੋ ਪੂਜਨੀਯਤੋ ਮਹਂ ਨਾਮ ਨਿਬ੍ਬਾਨਂ, ਮਹਮਨ੍ਤੋ ਏਤੇਸਨ੍ਤਿ ਮਹਨ੍ਤਾ, ਨਿਬ੍ਬਾਨਦਿਟ੍ਠਾਤਿ ਅਤ੍ਥੋ. ਨਿਸ੍ਸਾਰਦਾਤਿ ਸਾਰਜ੍ਜਰਹਿਤਾ, ਨਿਬ੍ਭਯਾਤਿ ਅਤ੍ਥੋ. ਤੇਨਾਹ ‘‘ਵਿਗਤਲੋਮਹਂਸਾ’’ਤਿ.

ਹਿਤਨ੍ਤਿ ਹਿਤਚਿਤ੍ਤਂ, ਸਤ੍ਤਾਨਂ ਹਿਤੇਸੀਤਿ ਅਤ੍ਥੋ. ਯਥਾਭੂਤਂ ਵਿਪਸ੍ਸਿਸੁਨ੍ਤਿ ਪਞ੍ਚੁਪਾਦਾਨਕ੍ਖਨ੍ਧੇਸੁ ਸਮੁਦਯਾਦਿਤੋ ਯਾਥਾਵਤੋ ਵਿਵਿਧੇਨਾਕਾਰੇਨ ਪਸ੍ਸਿਂਸੁ. ‘‘ਯੇ ਚਾਪੀ’’ਤਿ ਪੁਬ੍ਬੇ ਪਚ੍ਚਤ੍ਤਬਹੁਵਚਨੇਨ ਅਨਿਯਮਤੋ ਵੁਤ੍ਤੇ ਤੇਸਮ੍ਪੀਤਿ ਅਤ੍ਥਂ ਸਮ੍ਪਦਾਨਬਹੁਵਚਨਵਸੇਨ ਨਿਯਮੇਤ੍ਵਾ ‘‘ਨਮਤ੍ਥੂ’’ਤਿ ਚ ਪਦਂ ਆਨੇਤ੍ਵਾ ਯੋਜੇਤਿ ਯਂ ਤਂ-ਸਦ੍ਦਾਨਂ ਅਬ੍ਯਭਿਚਾਰਿਤਸਮ੍ਬਨ੍ਧਭਾਵਤੋ. ਵਿਪਸ੍ਸਿਂਸੁ ਨਮਸ੍ਸਨ੍ਤੀਤਿ ਵਾ ਯੋਜਨਾ. ਪਠਮਗਾਥਾਯਾਤਿ ‘‘ਯੇ ਚਾਪਿ ਨਿਬ੍ਬੁਤਾ ਲੋਕੇ’’ਤਿ ਏਵਂ ਵੁਤ੍ਤਗਾਥਾਯ. ਦੁਤਿਯਗਾਥਾਯਾਤਿ ਤਦਨ੍ਤਰਗਾਥਾਯ. ਤਤ੍ਥ ਦੇਸਨਾਮੁਖਮਤ੍ਤਨ੍ਤਿ ਇਤਰੇਸਮ੍ਪਿ ਬੁਦ੍ਧਾਨਂ ਨਾਮਗ੍ਗਹਣੇ ਪਤ੍ਤੇ ਇਮਸ੍ਸੇਵ ਭਗਵਤੋ ਨਾਮਗ੍ਗਹਣਂ ਤਥਾ ਦੇਸਨਾਯ ਮੁਖਮਤ੍ਤਂ, ਤਸ੍ਮਾ ਤੇਪਿ ਅਤ੍ਥਤੋ ਗਹਿਤਾ ਏਵਾਤਿ ਅਧਿਪ੍ਪਾਯੋ. ਤੇਨਾਹ ‘‘ਅਯਮ੍ਪਿ ਹੀ’’ਤਿਆਦਿ. ਤਤ੍ਥ ਅਯਨ੍ਤਿ ਅਯਂ ਗਾਥਾ. ਪੁਰਿਮਯੋਜਨਾਯਂ ਤਸ੍ਸਾਤਿ ਵਿਸੇਸਿਤਬ੍ਬਤਾਯ ਅਭਾਵਤੋ ‘‘ਯਨ੍ਤਿ ਨਿਪਾਤਮਤ੍ਤ’’ਨ੍ਤਿ ਵੁਤ੍ਤਂ, ਇਧ ਪਨ ‘‘ਤਸ੍ਸ ਨਮਤ੍ਥੂ’’ਤਿ ਏਵਂ ਸਮ੍ਬਨ੍ਧਸ੍ਸ ਚ ਇਚ੍ਛਿਤਤ੍ਤਾ ‘‘ਯ’’ਨ੍ਤਿ ਨਾਮਪਦਂ ਉਪਯੋਗੇਕਵਚਨਨ੍ਤਿ ਦਸ੍ਸੇਨ੍ਤੋ ‘‘ਯਂ ਨਮਸ੍ਸਨ੍ਤਿ ਗੋਤਮ’’ਨ੍ਤਿ ਆਹ.

੨੭੮. ‘‘ਯਤੋ ਉਗ੍ਗਚ੍ਛਤਿ ਸੂਰਿਯੋ’’ਤਿਆਦਿਕਂ ਕਸ੍ਮਾ ਆਰਦ੍ਧਂ? ਯਂ ਯੇ ਯਕ੍ਖਾਦਯੋ ਸਤ੍ਥੁ ਧਮ੍ਮਆਣਂ, ਅਤ੍ਤਨੋ ਚ ਰਾਜਾਣਂ ਨਾਦਿਯਨ੍ਤਿ, ਤੇਸਂ ‘‘ਇਦਞ੍ਚਿਦਞ੍ਚ ਨਿਗ੍ਗਹਂ ਕਰਿਸ੍ਸਾਮਾ’’ਤਿ ਸਾਵਨਂ ਕਾਤੁਕਾਮਾ ਤਤ੍ਥ ਤਤ੍ਥ ਦ੍ਵਿਸਹਸ੍ਸਪਰਿਤ੍ਤਦੀਪਪਰਿਵਾਰੇਸੁ ਚਤੂਸੁ ਮਹਾਦੀਪੇਸੁ ਅਤ੍ਤਨੋ ਆਣਾਯ ਵਤ੍ਤਾਨਂ ਅਤ੍ਤਨੋ ਪੁਤ੍ਤਾਨਂ, ਅਟ੍ਠਵੀਸਤਿਯਾ ਯਕ੍ਖਸੇਨਾਪਤਿਆਦੀਨਞ੍ਚ ਸਤ੍ਥਰਿ ਪਸਾਦਗਾਰਵਬਹੁਮਾਨਞ੍ਚ ਪਵੇਦੇਤ੍ਵਾ ਨਿਗ੍ਗਹਾਰਹਾਨਂ ਸਨ੍ਤਜ੍ਜਨਤ੍ਥਂ ਆਰਦ੍ਧਂ. ਤਤ੍ਥ ‘‘ਯਤੋ ਉਗ੍ਗਚ੍ਛਤੀ’’ਤਿਆਦੀਸੁ ‘‘ਯਤੋ ਠਾਨਤੋ ਉਦੇਤੀ’’ਤਿ ਵੁਚ੍ਚਤਿ, ਕੁਤੋ ਪਨ ਠਾਨਤੋ ਉਦੇਤੀਤਿ ਵੁਚ੍ਚਤਿ? ਪੁਬ੍ਬਵਿਦੇਹਵਾਸੀਨਂ ਤਾਵ ਮਜ੍ਝਨ੍ਹਿਕਟ੍ਠਾਨੇ ਠਿਤੋ ਜਮ੍ਬੁਦੀਪਵਾਸੀਨਂ ਉਦੇਤੀਤਿ ਵੁਚ੍ਚਤਿ, ਉਤ੍ਤਰਕੁਰੁਕਾਨਂ ਪਨ ਓਗ੍ਗਚ੍ਛਤੀਤਿ ਇਮਿਨਾ ਨਯੇਨ ਸੇਸਦੀਪੇਸੁਪਿ ਸੂਰਿਯਸ੍ਸ ਉਗ੍ਗਚ੍ਛਨੋਗ੍ਗਚ੍ਛਨਪਰਿਯਾਯੋ ਵੇਦਿਤਬ੍ਬੋ. ਅਯਞ੍ਚ ਅਤ੍ਥੋ ਹੇਟ੍ਠਾ ਅਗ੍ਗਞ੍ਞਸੁਤ੍ਤਵਣ੍ਣਨਾਯਂ (ਦੀ. ਨਿ. ਅਟ੍ਠ. ੩.੧੨੧) ਪਕਾਸਿਤੋ ਏਵ. ਅਦਿਤਿਯਾ ਪੁਤ੍ਤੋਤਿ ਲੋਕਸਮੁਦਾਚਾਰਵਸੇਨ ਵੁਤ੍ਤਂ. ਲੋਕਿਯਾ ਹਿ ਦੇਵੇ ਅਦਿਤਿਯਾ ਪੁਤ੍ਤਾ, ਅਸੁਰੇ ਅਤਿਥਿਯਾ ਪੁਤ੍ਤਾਤਿ ਵਦਨ੍ਤਿ. ਆਦਿਪ੍ਪਨਤੋ ਪਨ ਆਦਿਚ੍ਚੋ, ਏਕਪ੍ਪਹਾਰੇਨੇਵ ਤੀਸੁ ਦੀਪੇਸੁ ਆਲੋਕਵਿਦਂਸਨੇਨ ਸਮੁਜ੍ਜਲਨਤੋਤਿ ਅਤ੍ਥੋ. ਮਣ੍ਡਲੀਤਿ ਏਤ੍ਥ ਈ-ਕਾਰੋ ਭੁਸਤ੍ਥੋਤਿ ਆਹ ‘‘ਮਹਨ੍ਤਂ ਮਣ੍ਡਲਂ ਅਸ੍ਸਾਤਿ ਮਣ੍ਡਲੀ’’ਤਿ. ਮਹਨ੍ਤਂ ਹਿਸ੍ਸ ਵਿਮਾਨਮਣ੍ਡਲਂ ਪਞ੍ਞਾਸਯੋਜਨਾਯਾਮਵਿਤ੍ਥਾਰਤੋ. ‘‘ਸਂਵਰੀਪਿ ਨਿਰੁਜ੍ਝਤੀ’’ਤਿ ਇਮਿਨਾਵ ਦਿਵਸੋਪਿ ਜਾਯਤੀਤਿ ਅਯਮ੍ਪਿ ਅਤ੍ਥੋ ਵੁਤ੍ਤੋਤਿ ਵੇਦਿਤਬ੍ਬੋ. ਰਤ੍ਤਿ ਅਨ੍ਤਰਧਾਯਤੀਤਿ ਸਿਨੇਰੁਪਚ੍ਛਾਯਾਲਕ੍ਖਣਸ੍ਸ ਅਨ੍ਧਕਾਰਸ੍ਸ ਵਿਗਚ੍ਛਨਤੋ.

ਉਦਕਰਹਦੋਤਿ ਜਲਧਿ. ‘‘ਤਸ੍ਮਿਂ ਠਾਨੇ’’ਤਿ ਇਦਂ ਪੁਰਤ੍ਥਿਮਸਮੁਦ੍ਦਸ੍ਸ ਉਪਰਿਭਾਗੇਨ ਸੂਰਿਯਸ੍ਸ ਗਮਨਂ ਸਨ੍ਧਾਯ ਵੁਤ੍ਤਂ. ਤਥਾ ਹਿ ਜਮ੍ਬੁਦੀਪੇ ਠਿਤਾਨਂ ਪੁਰਤ੍ਥਿਮਸਮੁਦ੍ਦਤੋ ਸੂਰਿਯੋ ਉਗ੍ਗਚ੍ਛਨ੍ਤੋ ਵਿਯ ਉਪਟ੍ਠਾਤਿ. ਤੇਨਾਹ ‘‘ਯਤੋ ਉਗ੍ਗਚ੍ਛਤਿ ਸੂਰਿਯੋ’’ਤਿ. ਸਮੁਦ੍ਦਨਟ੍ਠੇਨ ਅਤ੍ਤਨਿ ਪਤਿਤਸ੍ਸ ਸਮ੍ਮਦੇਵ, ਸਬ੍ਬਸੋ ਚ ਉਨ੍ਦਨਟ੍ਠੇਨ ਕਿਲੇਦਨਟ੍ਠੇਨ ਸਮੁਦ੍ਦੋ. ਸਮੁਦ੍ਦੋ ਹਿ ਕਿਲੇਦਨਟ੍ਠੋ ਰਹਦੋ. ਸਾਰਿਤੋਦਕੋਤਿ ਅਨੇਕਾਨਿ ਯੋਜਨਸਹਸ੍ਸਾਨਿ ਵਿਤ੍ਥਿਣ੍ਣੋਦਕੋ, ਸਰਿਤਾ ਨਦਿਯੋ ਉਦਕੇ ਏਤਸ੍ਸਾਤਿ ਵਾ ਸਰਿਤੋਦਕੋ.

ਸਿਨੇਰੁਪਬ੍ਬਤਰਾਜਾ ਚਕ੍ਕਵਾਲ਼ਸ੍ਸ ਵੇਮਜ੍ਝੇ ਠਿਤੋ, ਤਂ ਪਧਾਨਂ ਕਤ੍ਵਾ ਵਤ੍ਤਬ੍ਬਨ੍ਤਿ ਅਧਿਪ੍ਪਾਯੇਨ ‘‘ਇਤੋਤਿ ਸਿਨੇਰੁਤੋ’’ਤਿ ਵਤ੍ਵਾ ਤਥਾ ਪਨ ਦਿਸਾਵਵਤ੍ਥਾਨਂ ਅਨਵਟ੍ਠਿਤਨ੍ਤਿ ‘‘ਤੇਸਂ ਨਿਸਿਨ੍ਨਟ੍ਠਾਨਤੋ ਵਾ’’ਤਿ ਵੁਤ੍ਤਂ. ਤੇਸਨ੍ਤਿ ਚਤੁਨ੍ਨਂ ਮਹਾਰਾਜਾਨਂ. ਨਿਸਿਨ੍ਨਟ੍ਠਾਨਂ ਆਟਾਨਾਟਨਗਰਂ. ਤਤ੍ਥ ਹਿ ਨਿਸਿਨ੍ਨਾ ਤੇ ਇਮਂ ਪਰਿਤ੍ਤਂ ਬਨ੍ਧਿਂਸੁ. ਤੇਸਂ ਨਿਸਿਨ੍ਨਟ੍ਠਾਨਤੋਤਿ ਵਾ ਸਤ੍ਥੁ ਸਨ੍ਤਿਕੇ ਤੇਸਂ ਨਿਸਿਨ੍ਨਟ੍ਠਾਨਤੋ. ਉਭਯਥਾਪਿ ਸੂਰਿਯਸ੍ਸ ਉਦਯਟ੍ਠਾਨਾ ਪੁਰਤ੍ਥਿਮਾ ਦਿਸਾ ਨਾਮ ਹੋਤਿ. ਪੁਰਿਮਪਕ੍ਖਂਯੇਵੇਤ੍ਥ ਵਣ੍ਣੇਨ੍ਤਿ. ਤੇਨ ਵੁਤ੍ਤਂ ‘‘ਇਤੋ ਸਾ ਪੁਰਿਮਾ ਦਿਸਾ’’ਤਿ. ਸੂਰਿਯੋ, ਪਨ ਚਨ੍ਦਨਕ੍ਖਤ੍ਤਾਦਯੋ ਚ ਸਿਨੇਰੁਂ ਦਕ੍ਖਿਣਤੋ, ਚਕ੍ਕਵਾਲ਼ਪਬ੍ਬਤਞ੍ਚ ਵਾਮਤੋ ਕਤ੍ਵਾ ਪਰਿਵਤ੍ਤੇਨ੍ਤਿ. ਯਤ੍ਥ ਚ ਨੇਸਂ ਉਗ੍ਗਮਨਂ ਪਞ੍ਞਾਯਤਿ, ਸਾ ਪੁਰਤ੍ਥਿਮਾ ਦਿਸਾ. ਯਤ੍ਥ ਓਕ੍ਕਮਨਂ ਪਞ੍ਞਾਯਤਿ, ਸਾ ਪਚ੍ਛਿਮਾ ਦਿਸਾ. ਦਕ੍ਖਿਣਪਸ੍ਸੇ ਉਤ੍ਤਰਾ ਦਿਸਾ, ਵਾਮਪਸ੍ਸੇ ਦਕ੍ਖਿਣਾ ਦਿਸਾਤਿ ਚਤੁਮਹਾਦੀਪਵਾਸੀਨਂ ਪਚ੍ਚੇਕਂ ਸਿਨੇਰੁ ਉਤ੍ਤਰਾਦਿਸਾਯਮੇਵ, ਤਸ੍ਮਾ ਅਨਵਟ੍ਠਿਤਾ ਦਿਸਾਵਵਤ੍ਥਾਤਿ ਆਹ ‘‘ਇਤਿ ਨਂ ਆਚਿਕ੍ਖਤਿ ਜਨੋ’’ਤਿ. ਯਂ ਦਿਸਨ੍ਤਿ ਯਂ ਪੁਰਤ੍ਥਿਮਦਿਸਂ ਯਸਸ੍ਸੀਤਿ ਮਹਾਪਰਿਵਾਰੋ. ਕੋਟਿਸਤਸਹਸ੍ਸਪਰਿਮਾਣਾ ਹਿ ਦੇਵਤਾ ਅਭਿਣ੍ਹਂ ਪਰਿਵਾਰੇਨ੍ਤਿ. ਚਨ੍ਦਨਨਾਗਰੁਕ੍ਖਾਦੀਸੁ ਓਸਧਿਤਿਣਵਨਪ੍ਪਤਿਸੁਗਨ੍ਧਾਨਂ ਅਬ੍ਬਨਤੋ, ਤੇਹਿ ਦਿਤ੍ਤਭਾਵੂਪਗਮਨਤੋ ‘‘ਗਨ੍ਧਬ੍ਬਾ’’ਤਿ ਲਦ੍ਧਨਾਮਾਨਂ ਚਾਤੁਮਹਾਰਾਜਿਕਦੇਵਾਨਂ ਅਧਿਪਤਿ ਭਾਵਤੋ. ਮੇ ਸੁਤਨ੍ਤਿ ਏਤ੍ਥ ਮੇਤਿ ਨਿਪਾਤਮਤ੍ਤਂ. ਸੁਤਨ੍ਤਿ ਵਿਸ੍ਸੁਤਨ੍ਤਿ ਅਤ੍ਥੋ. ਅਯਞ੍ਹੇਤ੍ਥ ਯੋਜਨਾ – ਤਸ੍ਸ ਧਤਰਟ੍ਠਮਹਾਰਾਜਸ੍ਸ ਪੁਤ੍ਤਾਪਿ ਬਹਵੋ. ਕਿਤ੍ਤਕਾ? ਅਸੀਤਿ, ਦਸ ਏਕੋ ਚ. ਏਕਨਾਮਾ. ਕਥਂ? ਇਨ੍ਦਨਾਮਾ. ‘‘ਮਹਪ੍ਫਲਾ’’ਤਿ ਚ ਸੁਤਂ ਵਿਸ੍ਸੁਤਮੇਤਂ ਲੋਕੇਤਿ.

ਆਦਿਚ੍ਚੋ ਗੋਤਮਗੋਤ੍ਤੋ, ਭਗਵਾਪਿ ਗੋਤਮਗੋਤ੍ਤੋ, ਆਦਿਚ੍ਚੇਨ ਸਮਾਨਗੋਤ੍ਤਤਾਯ ਆਦਿਚ੍ਚੋ ਬਨ੍ਧੁ ਏਤਸ੍ਸਾਤਿਪਿ ਆਦਿਚ੍ਚਬਨ੍ਧੁ, ਆਦਿਚ੍ਚਸ੍ਸ ਵਾ ਬਨ੍ਧੂਤਿ ਆਦਿਚ੍ਚਬਨ੍ਧੁ, ਤਂ ਆਦਿਚ੍ਚਬਨ੍ਧੁਨਂ.ਅਨਵਜ੍ਜੇਨਾਤਿ ਅਵਜ੍ਜਪਟਿਪਕ੍ਖੇਨ ਬ੍ਰਹ੍ਮਵਿਹਾਰੇਨ. ਸਮੇਕ੍ਖਸਿ ਓਧਿਸੋ, ਅਨੋਧਿਸੋ ਚ ਫਰਣੇਨ ਓਲੋਕੇਸਿਆਸਯਾਨੁਸਯਚਰਿਯਾਧਿਮੁਤ੍ਤਿਆਦਿਵਿਭਾਗਾਵਬੋਧਵਸੇਨ. ਵਤ੍ਵਾ ਵਨ੍ਦਨ੍ਤੀਤਿ ‘‘ਲੋਕਸ੍ਸ ਅਨੁਕਮ੍ਪਕੋ’’ਤਿ ਕਿਤ੍ਤੇਤ੍ਵਾ ਵਨ੍ਦਨ੍ਤਿ. ਸੁਤਂ ਨੇਤਨ੍ਤਿ ਸੁਤਂ ਨਨੂਤਿ ਏਤਸ੍ਮਿਂ ਅਤ੍ਥੇ ਨੁ-ਸਦ੍ਦੋ. ਅਟ੍ਠਕਥਾਯਂ ਪਨ ਨੋਕਾਰੋਯਨ੍ਤਿ ਅਧਿਪ੍ਪਾਯੇਨ ਅਮ੍ਹੇਹੀਤਿ ਅਤ੍ਥੋ ਵੁਤ੍ਤੋ. ਏਤਨ੍ਤਿ ਏਤਂ ਤਥਾ ਪਰਿਕਿਤ੍ਤੇਤ੍ਵਾ ਅਮਨੁਸ੍ਸਾਨਂ ਦੇਵਤਾਨਂ ਵਨ੍ਦਨਂ. ਵਦਨ੍ਤਿ ਧਤਰਟ੍ਠਮਹਾਰਾਜਸ੍ਸ ਪੁਤ੍ਤਾ.

੨੭੯. ਯੇਨ ਪੇਤਾ ਪਵੁਚ੍ਚਨ੍ਤੀਤਿ ਏਤ੍ਥ ਵਚਨਸੇਸੇਨ ਅਤ੍ਥੋ ਵੇਦਿਤਬ੍ਬੋ, ਨ ਯਥਾਰੁਤਵਸੇਨੇਵਾਤਿ ਦਸ੍ਸੇਨ੍ਤੋ ‘‘ਯੇਨ ਦਿਸਾਭਾਗੇਨ ਨੀਹਰੀਯਨ੍ਤੂਤਿ ਵੁਚ੍ਚਨ੍ਤੀ’’ਤਿ ਆਹ. ਡਯ੍ਹਨ੍ਤੁ ਵਾਤਿ ਪੇਤੇ ਸਨ੍ਧਾਯ ਵਦਤਿ. ਛਿਜ੍ਜਨ੍ਤੁ ਵਾ ਹਤ੍ਥਪਾਦਾਦਿਕੇ ਪਿਸੁਣਾ ਪਿਟ੍ਠਿਮਂਸਿਕਾ. ਹਞ੍ਞਨ੍ਤੁ ਪਾਣਾਤਿਪਾਤਿਨੋਤਿਆਦਿਕਾ. ਪਵੁਚ੍ਚਨ੍ਤੀਤਿ ਵਾ ਸਮੁਚ੍ਚਨ੍ਤਿ, ‘‘ਅਲਂ ਤੇਸ’’ਨ੍ਤਿ ਸਮਾਚਿਨੀਯਨ੍ਤੀਤਿ ਅਤ੍ਥੋ. ਏਵਞ੍ਹਿ ਵਚਨਸੇਸੇਨ ਵਿਨਾ ਏਵ ਅਤ੍ਥੋ ਸਿਦ੍ਧੋ ਹੋਤਿ. ਰਹਸ੍ਸਙ੍ਗਨ੍ਤਿ ਬੀਜਂ ਸਨ੍ਧਾਯ ਵਦਤਿ.

੨੮੦. ਯਸ੍ਮਿਂ ਦਿਸਾਭਾਗੇ ਸੂਰਿਯੋ ਅਤ੍ਥਂ ਗਚ੍ਛਤੀਤਿ ਏਤ੍ਥ ‘‘ਯਤੋ ਠਾਨਤੋ ਉਦੇਤੀ’’ਤਿ ਏਤ੍ਥ ਵੁਤ੍ਤਨਯਾਨੁਸਾਰੇਨ ਅਤ੍ਥੋ ਵੇਦਿਤਬ੍ਬੋ.

੨੮੧. ਯੇਨ ਦਿਸਾਭਾਗੇਨ ਉਤ੍ਤਰਕੁਰੁ ਰਮ੍ਮੋ ਅਵਟ੍ਠਿਤੋ, ਇਤੋ ਸਾ ਉਤ੍ਤਰਾ ਦਿਸਾਤਿ ਯੋਜਨਾ. ਮਹਾਨੇਰੂਤਿ ਮਹਨ੍ਤੋ, ਮਹਨੀਯੋ ਚ ਨੇਰੁਸਙ੍ਖਾਤੋ ਪਬ੍ਬਤੋ. ਤੇਨਾਹ ‘‘ਮਹਾਸਿਨੇਰੁ ਪਬ੍ਬਤਰਾਜਾ’’ਤਿ. ਰਜਤਮਯਂ. ਤਥਾ ਹਿ ਤਸ੍ਸ ਪਭਾਯ ਅਜ੍ਝੋਤ੍ਥਤਂ ਤਸ੍ਸਂ ਦਿਸਾਯਂ ਸਮੁਦ੍ਦੋਦਕਂ ਖੀਰਂ ਵਿਯ ਪਞ੍ਞਾਯਤਿ. ਮਣਿਮਯਨ੍ਤਿ ਇਨ੍ਦਨੀਲਮਯਂ. ਤਥਾ ਹਿ ਦਕ੍ਖਿਣਦਿਸਾਯ ਸਮੁਦ੍ਦੋਦਕਂ ਯੇਭੁਯ੍ਯੇਨ ਨੀਲਵਣ੍ਣਂ ਹੁਤ੍ਵਾ ਪਞ੍ਞਾਯਤਿ, ਤਥਾ ਆਕਾਸਂ. ਮਨੁਸ੍ਸਾ ਜਾਯਨ੍ਤਿ. ਕਥਂ ਜਾਯਨ੍ਤਿ? ਅਮਮਾ ਅਪਰਿਗ੍ਗਹਾਤਿ ਯੋਜਨਾ. ਮਮਤ੍ਤਵਿਰਹਿਤਾਤਿ ‘‘ਇਦਂ ਮਮ ਇਦਂ ਮਮਾ’’ਤਿ ਮਮਙ੍ਕਾਰਵਿਰਹਿਤਾਤਿ ਅਧਿਪ੍ਪਾਯੋ. ਯਦਿ ਤੇਸਂ ‘‘ਅਯਂ ਮਯ੍ਹਂ ਭਰਿਯਾ’’ਤਿ ਪਰਿਗ੍ਗਹੋ ਨਤ੍ਥਿ, ‘‘ਅਯਂ ਮੇ ਮਾਤਾ, ਅਯਂ ਭਗਿਨੀ’’ਤਿ ਏਵਰੂਪਾ ਇਧ ਵਿਯ ਮਰਿਯਾਦਾਪਿ ਨ ਸਿਯਾ ਮਾਤੁਆਦਿਭਾਵਸ੍ਸ ਅਜਾਨਨਤੋਤਿ ਚੋਦਨਂ ਸਨ੍ਧਾਯਾਹ ‘‘ਮਾਤਰਂ ਵਾ’’ਤਿਆਦਿ. ਛਨ੍ਦਰਾਗੋ ਨੁਪ੍ਪਜ੍ਜਤੀਤਿ ਏਤ੍ਥ ‘‘ਧਮ੍ਮਤਾਸਿਦ੍ਧਸ੍ਸ ਸੀਲਸ੍ਸ ਆਨੁਭਾਵੇਨ ਪੁਤ੍ਤੇ ਦਿਟ੍ਠਮਤ੍ਤੇ ਏਵ ਮਾਤੁ ਥਨਤੋ ਥਞ੍ਞਂ ਪਗ੍ਘਰਤਿ, ਤੇਨ ਸਞ੍ਞਾਣੇਨ ਨੇਸਂ ਮਾਤਰਿ ਪੁਤ੍ਤਸ੍ਸ ਮਾਤੁਸਞ੍ਞਾ, ਮਾਤੁ ਚ ਪੁਤ੍ਤੇ ਪੁਤ੍ਤਸਞ੍ਞਾ ਪਚ੍ਚੁਪਟ੍ਠਿਤਾ’’ਤਿ ਕੇਚਿ.

ਨਙ੍ਗਲਾਤਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਨ੍ਤਿ ਆਹ ‘‘ਨਙ੍ਗਲਾਨਿਪੀ’’ਤਿ. ਅਕਟ੍ਠੇਤਿ ਅਕਸਿਤੇ ਅਕਤਕਸਿਕਮ੍ਮੇ.

ਤਣ੍ਡੁਲਾਵ ਤਸ੍ਸ ਫਲਨ੍ਤਿ ਸਤ੍ਤਾਨਂ ਪੁਞ੍ਞਾਨੁਭਾਵਹੇਤੁਕਾ ਥੁਸਾਦਿਅਭਾਵੇਨ ਤਣ੍ਡੁਲਾ ਏਵ ਤਸ੍ਸ ਸਾਲਿਸ੍ਸ ਫਲਂ. ਤੁਣ੍ਡਿਕਿਰਨ੍ਤਿ ਪਚਨਭਾਜਨਸ੍ਸ ਨਾਮਨ੍ਤਿ ਵੁਤ੍ਤਂ ‘‘ਉਕ੍ਖਲਿਯ’’ਨ੍ਤਿ. ਆਕਿਰਿਤ੍ਵਾਤਿ ਤਣ੍ਡੁਲਾਨਿ ਪਕ੍ਖਿਪਿਤ੍ਵਾ. ਨਿਦ੍ਧੂਮਙ੍ਗਾਰੇਨਾਤਿ ਧੂਮਙ੍ਗਾਰਰਹਿਤੇਨ ਕੇਵਲੇਨ ਅਗ੍ਗਿਨਾ. ਜੋਤਿਕਪਾਸਾਣਤੋ ਅਗ੍ਗਿਮ੍ਹਿ ਉਟ੍ਠਹਨ੍ਤੇ ਕੁਤੋ ਧੂਮਙ੍ਗਾਰਾਨਂ ਸਮ੍ਭਵੋ. ਭੋਜਨਨ੍ਤਿ ਓਦਨਮੇਵਾਧਿਪ੍ਪੇਤਨ੍ਤਿ ‘‘ਭੋਜਨਮੇਵਾ’’ਤਿ ਅਵਧਾਰਣਂ ਕਤ੍ਵਾ ਤੇਨ ਨਿਵਤ੍ਤੇਤਬ੍ਬਂ ਦਸ੍ਸੇਨ੍ਤੋ ‘‘ਅਞ੍ਞੋ ਸੂਪੋ ਵਾ ਬ੍ਯਞ੍ਜਨਂ ਵਾ ਨ ਹੋਤੀ’’ਤਿ ਆਹ. ਯਦਿ ਏਵਂ ਰਸਵਿਸੇਸਯੁਤ੍ਤੋ ਤੇਸਂ ਆਹਾਰੋ ਨ ਹੋਤੀਤਿ? ਨੋਤਿ ਦਸ੍ਸੇਨ੍ਤੋ ‘‘ਭੁਞ੍ਜਨ੍ਤਾਨਂ…ਪੇ… ਰਸੋ ਹੋਤੀ’’ਤਿ ਆਹ. ਮਚ੍ਛਰਿਯਚਿਤ੍ਤਂ ਨਾਮ ਨ ਹੋਤੀਤਿ ਧਮ੍ਮਤਾਸਿਦ੍ਧਸ੍ਸ ਸੀਲਸ੍ਸ ਆਨੁਭਾਵੇਨ. ਤਥਾ ਹਿ ਤੇ ਕਤ੍ਥਚਿਪਿ ਅਮਮਾ ਪਰਿਗ੍ਗਹਾਵ ਹੁਤ੍ਵਾ ਵਸਨ੍ਤਿ.

ਅਪਿਚ ਤਤ੍ਥ ਉਤ੍ਤਰਕੁਰੁਕਾਨਂ ਪੁਞ੍ਞਾਨੁਭਾਵਸਿਦ੍ਧੋ ਅਯਮ੍ਪਿ ਵਿਸੇਸੋ ਵੇਦਿਤਬ੍ਬੋ – ਤਤ੍ਥ ਕਿਰ ਤੇਸੁ ਤੇਸੁ ਪਦੇਸੇਸੁ ਘਨਚਿਤਪਤ੍ਤਸਞ੍ਛਨ੍ਨਸਾਖਾਪਸਾਖਾ ਕੂਟਾਗਾਰੂਪਮਾ ਮਨੋਰਮਾ ਰੁਕ੍ਖਾ ਤੇਸਂ ਮਨੁਸ੍ਸਾਨਂ ਨਿਵੇਸਨਕਿਚ੍ਚਂ ਸਾਧੇਨ੍ਤਿ, ਯਤ੍ਥ ਸੁਖਂ ਨਿਵਸਨ੍ਤਿ, ਅਞ੍ਞੇਪਿ ਤਤ੍ਥ ਰੁਕ੍ਖਾ ਸੁਜਾਤਾ ਸਬ੍ਬਦਾਪਿ ਪੁਪ੍ਫਿਤਗ੍ਗਾ ਤਿਟ੍ਠਨ੍ਤਿ, ਜਲਾਸਯਾਪਿ ਵਿਕਸਿਤਕਮਲਕੁਵਲਯਪੁਣ੍ਡਰੀਕਸੋਗਨ੍ਧਿਕਾਦਿਪੁਪ੍ਫਸਞ੍ਛਨ੍ਨਾ ਸਬ੍ਬਕਾਲਂ ਪਰਮਸੁਗਨ੍ਧਂ ਸਮਨ੍ਤਤੋ ਪਵਾਯਨ੍ਤਾ ਤਿਟ੍ਠਨ੍ਤਿ. ਸਰੀਰਮ੍ਪਿ ਤੇਸਂ ਅਤਿਦੀਘਤਾਦਿਦੋਸਰਹਿਤਂ ਆਰੋਹਪਰਿਣਾਹਸਮ੍ਪਨ੍ਨਂ ਜਰਾਯ ਅਨਭਿਭੂਤਤ੍ਤਾ ਵਲਿਪਲਿਤਾਦਿਦੋਸਰਹਿਤਂ ਯਾਵਤਾਯੁਕਂ ਅਪਰਿਕ੍ਖੀਣਜਵਬਲਪਰਕ੍ਕਮਸੋਭਮੇਵ ਹੁਤ੍ਵਾ ਤਿਟ੍ਠਤਿ. ਅਨੁਟ੍ਠਾਨਫਲੂਪਜੀਵਿਤਾਯ ਨ ਚ ਨੇਸਂ ਕਸਿਵਾਣਿਜ੍ਜਾਦਿਵਸੇਨ, ਆਹਾਰਪਰਿਯੇਟ੍ਠਿਵਸੇਨ ਦੁਕ੍ਖਂ ਅਤ੍ਥਿ, ਤਤੋ ਏਵ ਨ ਦਾਸਦਾਸਿਕਮ੍ਮਕਰਾਦਿਪਰਿਗ੍ਗਹੋ ਅਤ੍ਥਿ, ਨ ਚ ਤਤ੍ਥ ਸੀਤੁਣ੍ਹਡਂਸਮਕਸਵਾਤਾਤਪਸਰੀਸਪਵਾਲ਼ਾਦਿਪਰਿਸ੍ਸਯੋ ਅਤ੍ਥਿ. ਯਥਾ ਨਾਮੇਤ੍ਥ ਗਿਮ੍ਹਾਨਂ ਪਚ੍ਛਿਮੇ ਮਾਸੇ ਪਚ੍ਚੂਸਵੇਲਾਯਂ ਸਮਸੀਤੁਣ੍ਹਉਤੁ ਹੋਤਿ, ਏਵਮੇਵ ਸਬ੍ਬਕਾਲਂ ਸਮਸੀਤੁਣ੍ਹੋਵ ਉਤੁ ਹੋਤਿ, ਨ ਚ ਤੇਸਂ ਕੋਚਿ ਉਪਘਾਤੋ, ਵਿਹੇਸਾ ਵਾ ਉਪ੍ਪਜ੍ਜਤਿ. ਅਕਟ੍ਠਪਾਕਿਮਮੇਵ ਸਾਲਿਂ ਅਕਣਂ ਅਥੁਸਂ ਸੁਗਨ੍ਧਂ ਤਣ੍ਡੁਲਫਲਂ ਪਰਿਭੁਞ੍ਜਨ੍ਤਾਨਂ ਨੇਸਂ ਕੁਟ੍ਠਂ, ਗਣ੍ਡੋ, ਕਿਲਾਸੋ, ਸੋਸੋ, ਕਾਸੋ, ਸਾਸੋ, ਅਪਮਾਰੋ, ਜਰੋਤਿ ਏਵਮਾਦਿਕੋ ਨ ਕੋਚਿ ਰੋਗੋ ਉਪ੍ਪਜ੍ਜਤਿ. ਨ ਤੇ ਖੁਜ੍ਜਾ ਵਾ ਵਾਮਨਕਾ ਵਾ ਕਾਣਾ ਵਾ ਕੁਣੀ ਵਾ ਖਞ੍ਜਾ ਵਾ ਪਕ੍ਖਹਤਾ ਵਾ ਵਿਕਲਙ੍ਗਾ ਵਾ ਵਿਕਲਿਨ੍ਦ੍ਰਿਯਾ ਵਾ ਹੋਨ੍ਤਿ. ਇਤ੍ਥਿਯੋਪਿ ਤਤ੍ਥ ਨਾਤਿਦੀਘਾ ਨਾਤਿਰਸ੍ਸਾ ਨਾਤਿਕਿਸਾ ਨਾਤਿਥੂਲਾ ਨਾਤਿਕਾਲ਼ਾ ਨਾਚ੍ਚੋਦਾਤਾ ਸੋਭਗ੍ਗਪ੍ਪਤ੍ਤਰੂਪਾ ਹੋਨ੍ਤਿ. ਤਥਾ ਹਿ ਦੀਘਙ੍ਗੁਲੀ ਤਮ੍ਬਨਖੀ ਲਮ੍ਬਤ੍ਥਨਾ ਤਨੁਮਜ੍ਝਾ ਪੁਣ੍ਣਚਨ੍ਦਮੁਖੀ ਵਿਸਾਲਕ੍ਖੀ ਮੁਦੁਗਤ੍ਤਾ ਸਂਹਿਤੂਰੂ ਓਦਾਤਦਨ੍ਤਾ ਗਮ੍ਭੀਰਨਾਭੀ ਤਨੁਜਙ੍ਘਾ ਦੀਘਨੀਲਵੇਲ੍ਲਿਤਕੇਸੀ ਪੁਥੁਲਸੁਸੋਣੀ ਨਾਤਿਲੋਮਾਨਾਲੋਮਾ ਸੁਭਗਾ ਉਤੁਸੁਖਸਮ੍ਫਸ੍ਸਾ ਸਣ੍ਹਾ ਸਖਿਲਸਮ੍ਭਾਸਾ ਨਾਨਾਭਰਣਵਿਭੂਸਿਤਾ ਵਿਚਰਨ੍ਤਿ. ਸਬ੍ਬਦਾ ਹਿ ਸੋਲ਼ਸਵਸ੍ਸੁਦ੍ਦੇਸਿਕਾ ਵਿਯ ਹੋਨ੍ਤਿ. ਪੁਰਿਸਾ ਚ ਪਞ੍ਚਵੀਸਤਿਵਸ੍ਸੁਦ੍ਦੇਸਿਕਾ ਵਿਯ, ਨ ਪੁਤ੍ਤਦਾਰੇਸੁ ਰਜ੍ਜਨ੍ਤਿ. ਅਯਂ ਤਤ੍ਥ ਧਮ੍ਮਤਾ.

ਸਤ੍ਤਾਹਿਕਮੇਵ ਚ ਤਤ੍ਥ ਇਤ੍ਥਿਪੁਰਿਸਾ ਕਾਮਰਤਿਯਾ ਵਿਹਰਨ੍ਤਿ, ਤਤੋ ਵੀਤਰਾਗਾ ਯਥਾਸਕਂ ਗਚ੍ਛਨ੍ਤਿ. ਨ ਤਤ੍ਥ ਇਧ ਵਿਯ ਗਬ੍ਭੋਕ੍ਕਨ੍ਤਿਮੂਲਕਂ, ਗਬ੍ਭਪਰਿਹਰਣਮੂਲਕਂ, ਵਿਜਾਯਨਮੂਲਕਂ ਵਾ ਦੁਕ੍ਖਂ ਹੋਤਿ. ਰਤ੍ਤਕਞ੍ਚੁਕਤੋ ਕਞ੍ਚਨਪਟਿਮਾ ਵਿਯ ਦਾਰਕਾ ਮਾਤੁਕੁਚ੍ਛਿਤੋ ਅਮਕ੍ਖਿਤਾ ਏਵ ਸੇਮ੍ਹਾਦਿਨਾ ਸੁਖੇਨੇਵ ਨਿਕ੍ਖਮਨ੍ਤਿ, ਅਯਂ ਤਤ੍ਥ ਧਮ੍ਮਤਾ.

ਮਾਤਾ ਪਨ ਪੁਤ੍ਤਂ ਵਾ ਧੀਤਰਂ ਵਾ ਵਿਜਾਯਿਤ੍ਵਾ ਤੇਸਂ ਵਿਚਰਣਪ੍ਪਦੇਸੇ ਠਪੇਤ੍ਵਾ ਅਨਪੇਕ੍ਖਾ ਯਥਾਰੁਚਿ ਗਚ੍ਛਤਿ. ਤੇਸਂ ਤਤ੍ਥ ਸਯਿਤਾਨਂ ਯੇ ਪਸ੍ਸਨ੍ਤਿ ਪੁਰਿਸਾ, ਇਤ੍ਥਿਯੋ ਵਾ, ਤੇ ਅਤ੍ਤਨੋ ਅਙ੍ਗੁਲਿਯੋ ਉਪਨਾਮੇਨ੍ਤਿ, ਤੇਸਂ ਕਮ੍ਮਬਲੇਨ ਤਤੋ ਖੀਰਂ ਪਵਤ੍ਤਤਿ, ਤੇਨ ਦਾਰਕਾ ਯਾਪੇਨ੍ਤਿ. ਏਵਂ ਪਨ ਵਡ੍ਢਨ੍ਤਾ ਕਤਿਪਯਦਿਵਸੇਹੇਵ ਲਦ੍ਧਬਲਾ ਹੁਤ੍ਵਾ ਦਾਰਿਕਾ ਇਤ੍ਥਿਯੋ ਉਪਗਚ੍ਛਨ੍ਤਿ, ਦਾਰਕਾ ਪੁਰਿਸੇ. ਕਪ੍ਪਰੁਕ੍ਖਤੋ ਏਵ ਚ ਤੇਸਂ ਤਤ੍ਥ ਤਤ੍ਥ ਵਤ੍ਥਾਭਰਣਾਨਿ ਨਿਪ੍ਪਜ੍ਜਨ੍ਤਿ. ਨਾਨਾਵਿਰਾਗਵਣ੍ਣਵਿਚਿਤ੍ਤਾਨਿ ਹਿ ਸੁਖੁਮਾਨਿ ਮੁਦੁਸੁਖਸਮ੍ਫਸ੍ਸਾਨਿ ਵਤ੍ਥਾਨਿ ਤਤ੍ਥ ਤਤ੍ਥ ਕਪ੍ਪਰੁਕ੍ਖੇਸੁ ਓਲਮ੍ਬਨ੍ਤਾਨਿ ਇਟ੍ਠਨ੍ਤਿ. ਨਾਨਾਵਿਧਰਂਸਿਜਾਲਸਮੁਜ੍ਜਲਵਿਵਿਧਵਣ੍ਣਰਤਨਵਿਨਦ੍ਧਾਨਿ ਅਨੇਕਵਿਧਮਾਲਾਕਮ੍ਮਲਤਾਕਮ੍ਮਭਿਤ੍ਤਿਕਮ੍ਮਵਿਚਿਤ੍ਤਾਨਿ ਸੀਸੂਪਗਗੀਵੂਪਗਹਤ੍ਥੂਪਗਕਟੂਪਗਪਾਦੂਪਗਾਨਿ ਸੋਵਣ੍ਣਮਯਾਨਿ ਆਭਰਣਾਨਿ ਚ ਕਪ੍ਪਰੁਕ੍ਖਤੋ ਓਲਮ੍ਬਨ੍ਤਿ. ਤਥਾ ਵੀਣਾਮੁਦਿਙ੍ਗਪਣਵਸਮ੍ਮਤਾਲ਼ਸਙ੍ਖਵਂਸਵੇਤਾਲ਼ਪਰਿਵਾਨਿਵਲ੍ਲਕੀਪਭੁਤਿਕਾ ਤੂਰਿਯਭਣ੍ਡਾਪਿ ਤਤੋ ਤਤੋ ਓਲਮ੍ਬਨ੍ਤਿ. ਤਤ੍ਥ ਚ ਬਹੂ ਫਲਰੁਕ੍ਖਾ ਕੁਮ੍ਭਮਤ੍ਤਾਨਿ ਫਲਾਨਿ ਫਲਨ੍ਤਿ ਮਧੁਰਰਸਾਨਿ, ਯਾਨਿ ਪਰਿਭੁਞ੍ਜਿਤ੍ਵਾ ਤੇ ਸਤ੍ਤਾਹਮ੍ਪਿ ਖੁਪ੍ਪਿਪਾਸਾਹਿ ਨ ਬਾਧੀਯਨ੍ਤਿ. ਨਜ੍ਜੋਪਿ ਤਤ੍ਥ ਸੁਵਿਸੁਦ੍ਧਜਲਾ ਸੁਪਤਿਤ੍ਥਾ ਰਮਣੀਯਾ ਅਕਦ੍ਦਮਾ ਵਾਲੁਕਤਲਾ ਨਾਤਿਸੀਤਾ ਨਾਚ੍ਚੁਣ੍ਹਾ ਸੁਰਭਿਗਨ੍ਧੀਹਿ ਜਲਜਪੁਪ੍ਫੇਹਿ ਸਞ੍ਛਨ੍ਨਾ ਸਬ੍ਬਕਾਲਂ ਸੁਰਭਿਂ ਵਾਯਨ੍ਤਿਯੋ ਸਨ੍ਦਨ੍ਤਿ. ਨ ਤਤ੍ਥ ਕਣ੍ਟਕਤਿਣਕਕ੍ਖਲ਼ਗਚ੍ਛਲਤਾ ਹੋਨ੍ਤਿ, ਅਕਣ੍ਟਕਾ ਪੁਪ੍ਫਫਲਸਮ੍ਪਨ੍ਨਾ ਏਵ ਹੋਨ੍ਤਿ. ਚਨ੍ਦਨਨਾਗਰੁਕ੍ਖਾ ਸਯਮੇਵ ਰਸਂ ਪਗ੍ਘਰਨ੍ਤਿ. ਨ੍ਹਾਯਿਤੁਕਾਮਾ ਚ ਨਦੀਤਿਤ੍ਥੇ ਏਕਜ੍ਝਂ ਵਤ੍ਥਾਭਰਣਾਨਿ ਠਪੇਤ੍ਵਾ ਨਦਿਂ ਓਤਰਿਤ੍ਵਾ ਨ੍ਹਤ੍ਵਾ ਉਤ੍ਤਿਣ੍ਣੁਤ੍ਤਿਣ੍ਣਾ ਉਪਰਿਟ੍ਠਿਮਂ ਵਤ੍ਥਾਭਰਣਂ ਗਣ੍ਹਨ੍ਤਿ, ਨ ਤੇਸਂ ਏਵਂ ਹੋਤਿ ‘‘ਇਦਂ ਮਮ, ਇਦਂ ਪਰਸ੍ਸਾ’’ਤਿ, ਤਤੋ ਏਵ ਨ ਤੇਸਂ ਕੋਚਿ ਵਿਗ੍ਗਹੋ ਵਾ ਵਿਵਾਦੋ ਵਾ. ਸਤ੍ਤਾਹਿਕਾ ਏਵ ਚ ਨੇਸਂ ਕਾਮਰਤਿਕੀਲ਼ਾ ਹੋਤਿ, ਤਤੋ ਵੀਤਰਾਗਾ ਵਿਯ ਵਿਚਰਨ੍ਤਿ. ਯਤ੍ਥ ਚ ਰੁਕ੍ਖੇ ਸਯਿਤੁਕਾਮਾ ਹੋਨ੍ਤਿ, ਤਤ੍ਥੇਵ ਸਯਨਂ ਉਪਲਭਨ੍ਤਿ. ਮਤੇ ਚ ਸਤ੍ਤੇ ਦਿਸ੍ਵਾ ਨ ਰੋਦਨ੍ਤਿ, ਨ ਸੋਚਨ੍ਤਿ, ਤਞ੍ਚ ਮਣ੍ਡਯਿਤ੍ਵਾ ਨਿਕ੍ਖਿਪਨ੍ਤਿ. ਤਾਵਦੇਵ ਚ ਨੇਸਂ ਤਥਾਰੂਪਾ ਸਕੁਣਾ ਉਪਗਨ੍ਤ੍ਵਾ ਮਤਂ ਦੀਪਨ੍ਤਰਂ ਨੇਨ੍ਤਿ. ਤਸ੍ਮਾ ਸੁਸਾਨਂ ਵਾ ਅਸੁਚਿਟ੍ਠਾਨਂ ਵਾ ਤਤ੍ਥ ਨਤ੍ਥਿ. ਨ ਚ ਤਤੋ ਮਤਾ ਨਿਰਯਂ ਵਾ ਤਿਰਚ੍ਛਾਨਯੋਨਿਂ ਵਾ ਪੇਤ੍ਤਿਵਿਸਯਂ ਵਾ ਉਪਪਜ੍ਜਨ੍ਤਿ. ‘‘ਧਮ੍ਮਤਾਸਿਦ੍ਧਸ੍ਸ ਪਞ੍ਚਸੀਲਸ੍ਸ ਆਨੁਭਾਵੇਨ ਤੇ ਦੇਵਲੋਕੇ ਨਿਬ੍ਬਤ੍ਤਨ੍ਤੀ’’ਤਿ ਵਦਨ੍ਤਿ. ਵਸ੍ਸਸਹਸ੍ਸਮੇਵ ਚ ਨੇਸਂ ਸਬ੍ਬਕਾਲਂ ਆਯੁਪ੍ਪਮਾਣਂ. ਸਬ੍ਬਮੇਤਂ ਤੇਸਂ ਪਞ੍ਚਸੀਲਂ ਵਿਯ ਧਮ੍ਮਤਾਸਿਦ੍ਧਂ ਏਵਾਤਿ ਵੇਦਿਤਬ੍ਬਂ. ਤਤ੍ਥਾਤਿ ਤਸ੍ਮਿਂ ਉਤ੍ਤਰਕੁਰੁਦੀਪੇ.

ਏਕਖੁਰਂ ਕਤ੍ਵਾਤਿ ਅਨੇਕਸਫਮ੍ਪਿ ਏਕਸਫਂ ਵਿਯ ਕਤ੍ਵਾ, ਅਸ੍ਸਂ ਵਿਯ ਕਤ੍ਵਾਤਿ ਅਤ੍ਥੋ. ‘‘ਗਾਵਿ’’ਨ੍ਤਿ ਵਤ੍ਵਾ ਪੁਨ ‘‘ਪਸੁ’’ਨ੍ਤਿ ਵੁਤ੍ਤਤ੍ਤਾ ਗਾਵਿਤੋ ਇਤਰੋ ਸਬ੍ਬੋ ਚਤੁਪ੍ਪਦੋ ਇਧ ‘‘ਪਸੂ’’ਤਿ ਅਧਿਪ੍ਪੇਤੋਤਿ ਆਹ ‘‘ਠਪੇਤ੍ਵਾ ਗਾਵਿ’’ਨ੍ਤਿ.

ਤਸ੍ਸਾਤਿ ਗਬ੍ਭਿਨਿਤ੍ਥਿਯਾ. ਪਿਟ੍ਠਿ ਓਨਮਿਤੁਂ ਸਹਤੀਤਿ ਕੁਚ੍ਛਿਯਾ ਗਰੁਭਾਰਤਾਯ ਤੇਸਂ ਆਰੁਲ਼੍ਹਕਾਲੇ ਪਿਟ੍ਠਿ ਓਨਮਤਿ, ਤੇਸਂ ਨਿਸਜ੍ਜਂ ਸਹਤਿ ਪਲ੍ਲਙ੍ਕੇ ਨਿਸਿਨ੍ਨਾ ਵਿਯ ਹੋਨ੍ਤਿ. ਸਮ੍ਮਾਦਿਟ੍ਠਿਕੇਤਿ ਕਮ੍ਮਪਥਸਮ੍ਮਾਦਿਟ੍ਠਿਯਾ ਸਮ੍ਮਾਦਿਟ੍ਠਿਕੇ. ਏਤ੍ਥਾਤਿ ਜਮ੍ਬੁਦੀਪੇ. ਏਤ੍ਥ ਹਿ ਜਨਪਦਵੋਹਾਰੋ, ਨ ਉਤ੍ਤਰਕੁਰੁਮ੍ਹਿ. ਤਥਾ ਹਿ ‘‘ਪਚ੍ਚਨ੍ਤਿਮਮਿਲਕ੍ਖੁਵਾਸਿਕੇ’’ਤਿ ਚ ਵੁਤ੍ਤਂ.

ਤਸ੍ਸ ਰਞ੍ਞੋਤਿ ਵੇਸ੍ਸਵਣਮਹਾਰਾਜਸ੍ਸ. ਇਤਿ ਸੋ ਅਤ੍ਤਾਨਮੇਵ ਪਰਂ ਵਿਯ ਕਤ੍ਵਾ ਵਦਤਿ. ਏਸੇਵ ਨਯੋ ਪਰਤੋਪਿ. ਬਹੁਵਿਧਂ ਨਾਨਾਰਤਨਵਿਚਿਤ੍ਤਂ ਨਾਨਾਸਣ੍ਠਾਨਂ ਰਥਾਦਿ ਦਿਬ੍ਬਯਾਨਂ ਉਪਟ੍ਠਿਤਮੇਵ ਹੋਤਿ ਸੁਦਨ੍ਤਵਾਹਨਯੁਤ੍ਤਂ, ਨ ਨੇਸਂ ਯਾਨਾਨਂ ਉਪਟ੍ਠਾਪਨੇ ਉਸ੍ਸੁਕ੍ਕਂ ਆਪਜ੍ਜਿਤਬ੍ਬਂ ਅਤ੍ਥਿ. ਏਤਾਨੀਤਿ ਹਤ੍ਥਿਯਾਨਾਦੀਨਿ. ਨੇਸਨ੍ਤਿ ਵੇਸ੍ਸਵਣਪਰਿਚਾਰਿਕਾਨਂ. ਕਪ੍ਪਿਤਾਨਿ ਹੁਤ੍ਵਾ ਉਟ੍ਠਿਤਾਨਿ ਆਰੁਹਿਤੁਂ ਉਪਕਪ੍ਪਨਯਾਨਾਨਿ. ਨਿਪਨ੍ਨਾਪਿ ਨਿਸਿਨ੍ਨਾਪਿ ਵਿਚਰਨ੍ਤਿ ਚਨ੍ਦਿਮਸੂਰਿਯਾ ਵਿਯ ਯਥਾਸਕਂ ਵਿਮਾਨੇਸੁ.

ਨਗਰਾ ਅਹੂਤਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਨ੍ਤਿ ਆਹ ‘‘ਨਗਰਾਨਿ ਭਵਿਂਸੂਤਿ ਅਤ੍ਥੋ’’ਤਿ. ਆਟਾਨਾਟਾ ਨਾਮਾਤਿ ਇਤ੍ਥਿਲਿਙ੍ਗਵਸੇਨ ਲਦ੍ਧਨਾਮਂ ਨਗਰਂ ਆਸਿ.

ਤਸ੍ਮਿਂ ਠਤ੍ਵਾਤਿ ਤਸ੍ਮਿਂ ਪਦੇਸੇ ਪਰਕੁਸਿਟਨਾਟਾਨਾਮਕੇ ਨਗਰੇ ਠਤ੍ਵਾ. ਤਤੋ ਉਜੁਂ ਉਤ੍ਤਰਦਿਸਾਯਂ. ਏਤਸ੍ਸਾਤਿ ਕਸਿਵਨ੍ਤਨਗਰਸ੍ਸ. ਅਪਰਭਾਗੇ ਅਪਰਕੋਟ੍ਠਾਸੇ, ਪਰਤੋ ਇਚ੍ਚੇਵ ਅਤ੍ਥੋ.

ਕੁਵੇਰੋਤਿ ਤਸ੍ਸ ਪੁਰਿਮਜਾਤਿਸਮੁਦਾਗਤਂ ਨਾਮਨ੍ਤਿ ਤੇਨੇਵ ਪਸਙ੍ਗੇਨ ਯੇਨਾਯਂ ਸਮ੍ਪਤ੍ਤਿ ਅਧਿਗਤਾ, ਤਦਸ੍ਸ ਪੁਬ੍ਬਕਮ੍ਮਂ ਆਚਿਕ੍ਖਿਤੁਂ ‘‘ਅਯਂ ਕਿਰਾ’’ਤਿਆਦਿ ਵੁਤ੍ਤਂ. ਉਚ੍ਛੁਵਪ੍ਪਨ੍ਤਿ ਉਚ੍ਛੁਸਸ੍ਸਂ. ਅਵਸੇਸਸਾਲਾਹੀਤਿ ਅਵਸੇਸਯਨ੍ਤਸਾਲਾਹਿ, ਨਿਸ੍ਸਕ੍ਕਵਚਨਞ੍ਚੇਤਂ. ਤਤ੍ਥੇਵਾਤਿ ਪੁਞ੍ਞਤ੍ਥਂ ਦਿਨ੍ਨਸਾਲਾਯਮੇਵ.

ਪਟਿਏਸਨ੍ਤੋਤਿ ਪਤਿ ਪਤਿ ਅਤ੍ਥੇ ਏਸਨ੍ਤੋ ਵੀਮਂਸਨ੍ਤੋ. ਨ ਕੇਵਲਂ ਤੇ ਵੀਮਂਸਨ੍ਤਿ ਏਵ, ਅਥ ਖੋ ਤਮਤ੍ਥਂ ਪਤਿਟ੍ਠਾਪੇਨ੍ਤੀਤਿ ਆਹ ‘‘ਵਿਸੁਂ ਵਿਸੁਂ ਅਤ੍ਥੇ ਉਪਪਰਿਕ੍ਖਮਾਨਾ ਅਨੁਸਾਸਮਾਨਾ’’ਤਿ. ਯਕ੍ਖਰਟ੍ਠਿਕਾਤਿ ਯਕ੍ਖਰਟ੍ਠਾਧਿਪਤਿਨੋ. ਯਕ੍ਖਾ ਚ ਵੇਸ੍ਸਵਣਸ੍ਸ ਰਞ੍ਞੋ ਨਿਵੇਸਨਦ੍ਵਾਰੇ ਨਿਯੁਤ੍ਤਾ ਚਾਤਿ ਯਕ੍ਖਦੋਵਾਰਿਕਾ, ਤੇਸਂ ਯਕ੍ਖਦੋਵਾਰਿਕਾਨਂ.

ਯਸ੍ਮਾ ਧਰਣੀਪੋਰਕ੍ਖਣਿਤੋ ਪੁਰਾਣੋਦਕਂ ਭਸ੍ਸਯਨ੍ਤਂ ਹੇਟ੍ਠਾ ਵੁਟ੍ਠਿ ਹੁਤ੍ਵਾ ਨਿਕ੍ਖਮਤਿ, ਤਸ੍ਮਾ ਤਂ ਤਤੋ ਗਹੇਤ੍ਵਾ ਮੇਘੇਹਿ ਪਵੁਟ੍ਠਂ ਵਿਯ ਹੋਤੀਤਿ ਵੁਤ੍ਤਂ ‘‘ਯਤੋ ਪੋਕ੍ਖਰਣਿਤੋ ਉਦਕਂ ਗਹੇਤ੍ਵਾ ਮੇਘਾ ਪਵਸ੍ਸਨ੍ਤੀ’’ਤਿ. ਯਤੋਤਿ ਯਤੋ ਧਰਣੀਪੋਕ੍ਖਰਣਿਤੋ. ਸਭਾਤਿ ਯਕ੍ਖਾਨਂ ਉਪਟ੍ਠਾਨਸਭਾ.

ਤਸ੍ਮਿਂ ਠਾਨੇਤਿ ਤਸ੍ਸਾ ਪੋਕ੍ਖਰਣਿਯਾ ਤੀਰੇ ਯਕ੍ਖਾਨਂ ਵਸਨਵਨੇ. ਸਦਾ ਫਲਿਤਾਤਿ ਨਿਚ੍ਚਕਾਲਂ ਸਞ੍ਜਾਤਫਲਾ. ਨਿਚ੍ਚਪੁਪ੍ਫਿਤਾਤਿ ਨਿਚ੍ਚਂ ਸਞ੍ਜਾਤਪੁਪ੍ਫਾ. ਨਾਨਾਦਿਜਗਣਾਯੁਤਾਤਿ ਨਾਨਾਵਿਧੇਹਿ ਦਿਜਗਣੇਹਿ ਯੁਤ੍ਤਾ. ਤੇਹਿ ਪਨ ਸਕੁਣਸਙ੍ਘੇਹਿ ਇਤੋ ਚਿਤੋ ਚ ਸਮ੍ਪਤਨ੍ਤੇਹਿ ਪਰਿਬ੍ਭਮਨ੍ਤੇਹਿ ਯਸ੍ਮਾ ਸਾ ਪੋਕ੍ਖਰਣੀ ਆਕੁਲਾ ਵਿਯ ਹੋਤਿ, ਤਸ੍ਮਾ ਵੁਤ੍ਤਂ ‘‘ਵਿਵਿਧਪਕ੍ਖਿਸਙ੍ਘਸਮਾਕੁਲਾ’’ਤਿ. ਕੋਞ੍ਚਸਕੁਣੇਹੀਤਿ ਸਾਰਸਸਕੁਨ੍ਤੇਹਿ.

‘‘ਏਵਂ ਵਿਰਵਨ੍ਤਾਨ’’ਨ੍ਤਿ ਇਮਿਨਾ ਤਥਾ ਵਸ੍ਸਿਤਵਸੇਨ ‘‘ਜੀਵਞ੍ਜੀਵਕਾ’’ਤਿ ਅਯਂ ਤੇਸਂ ਸਮਞ੍ਞਾਤਿ ਦਸ੍ਸੇਤਿ. ਉਟ੍ਠਵਚਿਤ੍ਤਕਾਤਿ ਏਤ੍ਥਾਪਿ ਏਸੇਵ ਨਯੋ. ਤੇਨਾਹ ‘‘ਏਵਂ ਵਸ੍ਸਮਾਨਾ’’ਤਿ. ਪੋਕ੍ਖਰਸਾਤਕਾਤਿ ਪੋਕ੍ਖਰਸਣ੍ਠਾਨਤਾਯ ‘‘ਪੋਕ੍ਖਰਸਾਤਕਾ’’ਤਿ ਏਵਂ ਲਦ੍ਧਨਾਮਾ.

ਸਬ੍ਬਕਾਲਂ ਸੋਭਤੀਤਿ ਸਬ੍ਬਉਤੂਸੁ ਸੋਭਤਿ, ਨ ਤਸ੍ਸਾ ਹੇਮਨ੍ਤਾਦਿਵਸੇਨ ਸੋਭਾਵਿਰਤੋ ਅਤ੍ਥਿ. ਏਵਂਭੂਤਾ ਚ ਨਿਚ੍ਚਂ ਪੁਪ੍ਫਿਤਜਲਜਥਲਜਪੁਪ੍ਫਤਾਯ, ਫਲਭਾਰਭਰਿਤਰੁਕ੍ਖਪਰਿਵਾਰਿਤਤਾਯ, ਅਟ੍ਠਙ੍ਗਸਮਨ੍ਨਾਗਤਸਲਿਲਤਾਯ ਚ ਨਿਰਨ੍ਤਰਂ ਸੋਭਤਿ.

੨੮੨. ਪਰਿਕਮ੍ਮਨ੍ਤਿ ਪੁਬ੍ਬੁਪਚਾਰਂ. ਪਰਿਸੋਧੇਤ੍ਵਾਤਿ ਏਕਕ੍ਖਰਸ੍ਸਾਪਿ ਅਵਿਰਾਧਨਵਸੇਨ ਆਚਰਿਯਸਨ੍ਤਿਕੇ ਸਬ੍ਬਂ ਸੋਧੇਤ੍ਵਾ. ਸੁਟ੍ਠੁ ਉਗ੍ਗਹਿਤਾਤਿ ਪਰਿਮਣ੍ਡਲਪਦਬ੍ਯਞ੍ਜਨਾਯ ਪੋਰਿਯਾ ਵਾਚਾਯ ਵਿਸ੍ਸਟ੍ਠਾਯ ਅਨੇਲਗਲ਼ਾਯ ਅਤ੍ਥਸ੍ਸ ਵਿਞ੍ਞਾਪਨੀਯਾ ਸਮ੍ਮਦੇਵ ਉਗ੍ਗਹਿਤਾ. ਤਥਾ ਹਿ ‘‘ਅਤ੍ਥਞ੍ਚ ਬ੍ਯਞ੍ਜਨਞ੍ਚ ਪਰਿਸੋਧੇਤ੍ਵਾ’’ਤਿ ਵੁਤ੍ਤਂ. ਅਤ੍ਥਂ ਜਾਨਤੋ ਏਵ ਹਿ ਬ੍ਯਞ੍ਜਨਂ ਪਰਿਸੁਜ੍ਝਤਿ, ਨੋ ਅਜਾਨਤੋ. ਪਦਬ੍ਯਞ੍ਜਨਾਨੀਤਿ ਪਦਞ੍ਚੇਵ ਬ੍ਯਞ੍ਜਨਞ੍ਚ ਅਹਾਪੇਤ੍ਵਾ. ਏਵਞ੍ਹਿ ਪਰਿਪੁਣ੍ਣਾ ਨਾਮ ਹੋਤੀਤਿ. ਵਿਸਂਵਾਦੇਤ੍ਵਾਤਿ ਅਞ੍ਞਥਾ ਕਤ੍ਵਾ. ਤੇਜਵਨ੍ਤਂ ਨ ਹੋਤਿ ਵਿਰਜ੍ਝਨਤੋ ਚੇਵ ਵਿਮ੍ਹਯਤ੍ਥਭਾਵਤੋ ਚ. ਸਬ੍ਬਸੋਤਿ ਅਨਵਸੇਸਤੋ ਆਦਿਮਜ੍ਝਪਰਿਯੋਸਾਨਤੋ. ਤੇਜਵਨ੍ਤਂ ਹੋਤੀਤਿ ਸਭਾਵਨਿਰੁਤ੍ਤਿਂ ਅਵਿਰਾਧੇਤ੍ਵਾ ਸੁਪ੍ਪਵਤ੍ਤਿਭਾਵੇਨ ਸਾਧਨਤੋ. ਏਵਂ ਪਯੋਗਵਿਪਤ੍ਤਿਂ ਪਹਾਯ ਪਯੋਗਸਮ੍ਪਤ੍ਤਿਯਾ ਸਤਿ ਪਰਿਤ੍ਤਸ੍ਸ ਅਤ੍ਥਸਾਧਕਤਂ ਦਸ੍ਸੇਤ੍ਵਾ ਇਦਾਨਿ ਅਜ੍ਝਾਸਯਵਿਪਤ੍ਤਿਂ ਪਹਾਯ ਅਜ੍ਝਾਸਯਸਮ੍ਪਤ੍ਤਿਯਾ ਅਤ੍ਥਸਾਧਕਤਂ ਦਸ੍ਸੇਤੁਂ ‘‘ਲਾਭਹੇਤੂ’’ਤਿਆਦਿ ਵੁਤ੍ਤਂ. ਇਦਂ ਪਰਿਤ੍ਤਭਣਨਂ ਸਤ੍ਤਾਨਂ ਅਨਤ੍ਥਪਟਿਬਾਹਨਹੇਤੂਤਿ ਤਸ੍ਸ ਞਾਣਕਰੁਣਾਪੁਬ੍ਬਕਤਾ ਨਿਸ੍ਸਰਣਪਕ੍ਖੋ. ਮੇਤ੍ਤਂ ਪੁਰੇਚਾਰਿਕਂ ਕਤ੍ਵਾਤਿ ਮੇਤ੍ਤਾਮਨਸਿਕਾਰੇਨ ਸਤ੍ਤੇਸੁ ਹਿਤਫਰਣਂ ਪੁਰਕ੍ਖਤ੍ਵਾ.

‘‘ਵਤ੍ਥੁਂ ਵਾ’’ਤਿਆਦਿ ਪੁਬ੍ਬੇ ਚਤੁਪਰਿਸਮਜ੍ਝੇ ਕਤਾਯ ਸਾਧਨਾਯ ਭਗਵਤੋ ਪਵੇਦਨਂ. ਘਰਵਤ੍ਥੁਨ੍ਤਿ ਵਸਨਗੇਹਂ. ਨਿਬਦ੍ਧਵਾਸਨ੍ਤਿ ਪਰਗੇਹੇਪਿ ਨੇਵਾਸਿਕਭਾਵੇਨ ਵਾਸਂ ਨ ਲਭੇਯ੍ਯ, ਯਂ ਪਨ ਮਹਾਰਾਜਾਨਂ, ਯਕ੍ਖਸੇਨਾਪਤੀਨਞ੍ਚ ਅਜਾਨਨ੍ਤਾਨਂਯੇਵ ਕਦਾਚਿ ਵਸਿਤ੍ਵਾ ਗਮਨਂ, ਤਂ ਅਪ੍ਪਮਾਣਨ੍ਤਿ ਅਧਿਪ੍ਪਾਯੋ. ਸਮਿਤਿਨ੍ਤਿ ਯਕ੍ਖਾਦਿਸਮਾਗਮਂ. ਕਾਮਂ ਪਾਲ਼ਿਯਂ ‘‘ਨ ਮੇ ਸੋ’’ਤਿ ਆਗਤਂ, ਇਤਰੇਸਮ੍ਪਿ ਪਨ ਮਹਾਰਾਜਾਨਮਤ੍ਤਨਾ ਏਕਜ੍ਝਾਸਯਤਾਯ ਤੇਸਮ੍ਪਿ ਅਜ੍ਝਾਸਯਂ ਹਦਯੇ ਠਪੇਤ੍ਵਾ ਵੇਸ੍ਸਵਣੋ ਤਥਾ ਅਵੋਚ. ਕਞ੍ਞਂ ਅਨੁ ਅਨੁ ਵਹਿਤੁਂ ਅਯੁਤ੍ਤੋ ਅਨਾਵਯ੍ਹੋ, ਸਬ੍ਬਕਾਲਂ ਕਞ੍ਞਂ ਲਦ੍ਧੁਂ ਅਯੁਤ੍ਤੋਤਿ ਅਤ੍ਥੋ, ਤਂ ਅਨਾਵਯ੍ਹਂ. ਤੇਨਾਹ ‘‘ਨ ਆਵਾਹਯੁਤ੍ਤ’’ਨ੍ਤਿ. ਨ ਵਿਵਯ੍ਹਨ੍ਤਿ ਅਵਿਵਯ੍ਹਂ, ਕਞ੍ਞਂ ਗਹੇਤੁਮਯੁਤ੍ਤਨ੍ਤਿ ਅਤ੍ਥੋ. ਤੇਨਾਹ ‘‘ਨ ਵਿਵਾਹਯੁਤ੍ਤ’’ਨ੍ਤਿ. ਆਹਿਤੋ ਅਹਂਮਾਨੋ ਏਤ੍ਥਾਤਿ ਅਤ੍ਤਾ, ਅਤ੍ਤਭਾਵੋ. ਅਤ੍ਤਾ ਵਿਸਯਭੂਤੋ ਏਤਾਸਂ ਅਤ੍ਥੀਤਿ ਅਤ੍ਤਾ, ਪਰਿਭਾਸਾ, ਤਾਹਿ. ਪਰਿਯਤ੍ਤਂ ਕਤ੍ਵਾ ਵਚਨੇਨ ਪਰਿਪੁਣ੍ਣਾਹਿ. ਯਥਾ ਯਕ੍ਖਾ ਅਕ੍ਕੋਸਿਤਬ੍ਬਾ, ਏਵਂ ਪਵਤ੍ਤਾ ਅਕ੍ਕੋਸਾ ਯਕ੍ਖਅਕ੍ਕੋਸਾ ਨਾਮ, ਤੇਹਿ. ਤੇ ਪਨ ‘‘ਕਲ਼ਾਰਕ੍ਖਿ ਕਲ਼ਾਰਦਨ੍ਤਾ ਕਾਲ਼ਵਣ੍ਣਾ’’ਤਿ ਏਵਂ ਆਦਯੋ.

ਵਿਰੁਦ੍ਧਾਤਿ ਵਿਰੁਜ੍ਝਨਕਾ ਪਰੇਹਿ ਵਿਰੋਧਿਨੋ. ਰਭਸਾਤਿ ਸਾਰਮ੍ਭਕਾਤਿ ਅਧਿਪ੍ਪਾਯੋ. ਤੇਨਾਹ ‘‘ਕਰਣੁਤ੍ਤਰਿਯਾ’’ਤਿ. ਰਭਸਾਤਿ ਵਾ ਸਾਹਸਿਕਾ. ਸਾਮਿਨੋ ਮਨਸੋ ਅਸ੍ਸਵਾਤਿ ਮਨਸ੍ਸਾ, ਕਿਙ੍ਕਰਾ. ਯੇ ਹਿ ‘‘ਕਿਂ ਕਰੋਮਿ ਭਦ੍ਦਨ੍ਤੇ’’ਤਿ ਸਾਮਿਕਸ੍ਸ ਵਸੇ ਵਤ੍ਤਨ੍ਤਿ, ਤੇ ਏਵਂ ਵੁਚ੍ਚਨ੍ਤਿ. ਤੇਨ ਵੁਤ੍ਤਂ ‘‘ਯਕ੍ਖਸੇਨਾਪਤੀਨਂ ਯੇ ਮਨਸ੍ਸਾ, ਤੇਸ’’ਨ੍ਤਿ. ਆਣਾਯ ਅਵਰੋਧਿਤੁਪਚਾਰਾ ਅਵਰੁਦ੍ਧਾ, ਤੇ ਪਨ ਆਣਾਵਤੋ ਪਚ੍ਚਤ੍ਥਿਕਾ ਨਾਮ ਹੋਨ੍ਤੀਤਿ ‘‘ਪਚ੍ਚਾਮਿਤ੍ਤਾ ਵੇਰਿਨੋ’’ਤਿ ਵੁਤ੍ਤਂ. ਉਜ੍ਝਾਪੇਤਬ੍ਬਨ੍ਤਿ ਹੇਟ੍ਠਾ ਕਤ੍ਵਾ ਚਿਨ੍ਤਾਪੇਤਬ੍ਬਂ, ਤਂ ਪਨ ਉਜ੍ਝਾਪਨਂ ਤੇਸਂ ਨੀਚਕਿਰਿਯਾਯ ਜਾਨਾਪਨਂ ਹੋਤੀਤਿ ਆਹ ‘‘ਜਾਨਾਪੇਤਬ੍ਬਾ’’ਤਿ.

ਪਰਿਤ੍ਤਪਰਿਕਮ੍ਮਕਥਾਵਣ੍ਣਨਾ

ਪਰਿਤ੍ਤਸ੍ਸ ਪਰਿਕਮ੍ਮਂ ਕਥੇਤਬ੍ਬਨ੍ਤਿ ਆਟਾਨਾਟਿਯਪਰਿਤ੍ਤਸ੍ਸ ਪਰਿਕਮ੍ਮਂ ਪੁਬ੍ਬੁਪਚਾਰਟ੍ਠਾਨਿਯਂ ਮੇਤ੍ਤਸੁਤ੍ਤਾਦਿ ਕਥੇਤਬ੍ਬਂ. ਏਵਞ੍ਹਿ ਤਂ ਲਦ੍ਧਾਸੇਵਨਂ ਹੁਤ੍ਵਾ ਤੇਜਵਨ੍ਤਂ ਹੋਤਿ. ਤੇਨਾਹ ‘‘ਪਠਮਮੇਵ ਹੀ’’ਤਿਆਦਿ. ਪਿਟ੍ਠਂ ਵਾ ਮਂਸਂ ਵਾਤਿ ਵਾ-ਸਦ੍ਦੋ ਅਨਿਯਮਤ੍ਥੋ, ਤੇਨ ਮਚ੍ਛਘਤਸੂਪਾਦਿਂ ਸਙ੍ਗਣ੍ਹਾਤਿ. ਓਤਾਰਂ ਲਭਨ੍ਤਿ ਅਤ੍ਤਨਾ ਪਿਯਾਯਿਤਬ੍ਬਆਹਾਰਵਸੇਨ ਪਿਯਾਯਿਤਬ੍ਬਟ੍ਠਾਨਵਸੇਨ ਚ. ‘‘ਪਰਿਤ੍ਤ…ਪੇ… ਨਿਸੀਦਿਤਬ੍ਬ’’ਨ੍ਤਿ ਇਮਿਨਾਵ ਪਰਿਤ੍ਤਕਾਰਕਸ੍ਸ ਭਿਕ੍ਖੁਨੋ ਪਰਿਸੁਦ੍ਧਿਪਿ ਇਚ੍ਛਿਤਬ੍ਬਾਤਿ ਦਸ੍ਸੇਤਿ.

‘‘ਪਰਿਤ੍ਤਕਾਰਕੋ…ਪੇ… ਸਮ੍ਪਰਿਵਾਰਿਤੇਨਾ’’ਤਿ ਇਦਂ ਪਰਿਤ੍ਤਕਰਣੇ ਬਾਹਿਰਰਕ੍ਖਾਸਂਵਿਧਾਨਂ. ‘‘ਮੇਤ੍ਤਚਿਤ੍ਤਂ …ਪੇ… ਕਾਤਬ੍ਬ’’ਨ੍ਤਿ ਇਦਂ ਅਬ੍ਭਨ੍ਤਰਰਕ੍ਖਾ ਉਭਯਤੋ ਰਕ੍ਖਾਸਂਵਿਧਾਨਂ. ਏਵਞ੍ਹਿ ਅਮਨੁਸ੍ਸਾ ਪਰਿਤ੍ਤਕਰਣਸ੍ਸ ਅਨ੍ਤਰਾਯਂ ਕਾਤੁਂ ਨ ਵਿਸਹਨ੍ਤਿ. ਮਙ੍ਗਲਕਥਾ ਵਤ੍ਤਬ੍ਬਾ ਪੁਬ੍ਬੁਪਚਾਰਵਸੇਨ. ਸਬ੍ਬਸਨ੍ਨਿਪਾਤੋਤਿ ਤਸ੍ਮਿਂ ਵਿਹਾਰੇ, ਤਸ੍ਮਿਂ ਵਾ ਗਾਮਖੇਤ੍ਤੇ ਸਬ੍ਬੇਸਂ ਭਿਕ੍ਖੂਨਂ ਸਨ੍ਨਿਪਾਤੋ. ਘੋਸੇਤਬ੍ਬੋ,‘‘ਚੇਤਿਯਙ੍ਗਣੇ ਸਬ੍ਬੇਹਿ ਸਨ੍ਨਿਪਤਿਤਬ੍ਬ’’ਨ੍ਤਿ. ਅਨਾਗਨ੍ਤੁਂ ਨਾਮ ਨ ਲਬ੍ਭਤਿ ਅਮਨੁਸ੍ਸੇਨ ਬੁਦ੍ਧਾਣਾਭਯੇਨ, ਰਾਜਾਣਾਭਯੇਨ ਚ. ਗਹਿਤਕਾਪਦੇਸੇਨ ਅਮਨੁਸ੍ਸੋਵ ਪੁਚ੍ਛਿਤੋ ਹੋਤੀਤਿ ਆਹ ‘‘ਅਮਨੁਸ੍ਸਗ੍ਗਹਿਤਕੋ ‘ਤ੍ਵਂ ਕੋ ਨਾਮਾ’ਤਿ ਪੁਚ੍ਛਿਤਬ੍ਬੋ’’ਤਿ. ਮਾਲਾਗਨ੍ਧਾਦੀਸੁ ਪੂਜਨਤ੍ਥਂ ਵਿਨਿਯੁਞ੍ਜਿਯਮਾਨੇਸੁ. ਪਤ੍ਤੀਤਿ ਤੁਯ੍ਹਂ ਪਤ੍ਤਿਦਾਨਂ. ਪਿਣ੍ਡਪਾਤੇ ਪਤ੍ਤੀਤਿ ਪਿਣ੍ਡਪਾਤੇ ਦਿਯ੍ਯਮਾਨੇ ਪਤ੍ਤਿਦਾਨਂ. ਦੇਵਤਾਨਨ੍ਤਿ ਯਕ੍ਖਸੇਨਾਪਤੀਨਂ. ਪਰਿਤ੍ਤਂ ਭਣਿਤਬ੍ਬਨ੍ਤਿ ਏਤ੍ਥਾਪਿ ‘‘ਮੇਤ੍ਤਚਿਤ੍ਤਂ ਪੁਰੇਚਾਰਿਕਂ ਕਤ੍ਵਾ’’ਤਿ ਚ ‘‘ਮਙ੍ਗਲਕਥਾ ਵਤ੍ਤਬ੍ਬਾ’’ਤਿ ਚ ‘‘ਵਿਹਾਰਸ੍ਸ ਉਪਵਨੇ’’ਤਿ ਏਵਮਾਦਿ ਚ ਸਬ੍ਬਂ ਗਿਹੀਨਂ ਪਰਿਤ੍ਤਕਰਣੇ ਵੁਤ੍ਤਂ ਪਰਿਕਮ੍ਮਂ ਕਾਤਬ੍ਬਮੇਵ.

ਸਰੀਰੇ ਅਧਿਮੁਚ੍ਚਤੀਤਿ ਸਰੀਰਂ ਅਨੁਪਵਿਸਿਤ੍ਵਾ ਵਿਯ ਆਵਿਸਨ੍ਤੋ ਯਥਾ ਗਹਿਤਕਸ੍ਸ ਵਸੇਨ ਨ ਵਤ੍ਤਤਿ, ਅਤ੍ਤਨੋ ਏਵ ਵਸੇਨ ਵਤ੍ਤਤਿ, ਏਵਂ ਅਧਿਮੁਚ੍ਚਤਿ ਅਧਿਟ੍ਠਹਿਤ੍ਵਾ ਤਿਟ੍ਠਤਿ. ਤੇਨਾਹ ‘‘ਆਵਿਸਤੀਤਿ ਤਸ੍ਸੇਵ ਵੇਵਚਨ’’ਨ੍ਤਿ. ਲਗ੍ਗਤੀਤਿ ਤਤ੍ਥੇਵ ਲਗ੍ਗੋ ਅਲ੍ਲੀਨੋ ਹੋਤਿ. ਤੇਨਾਹ ‘‘ਨ ਅਪੇਤੀ’’ਤਿ. ਰੋਗਂ ਵਡ੍ਢੇਨ੍ਤੋਤਿ ਧਾਤੂਨਂ ਸਮਭਾਵੇਨ ਵਤ੍ਤਿਤੁਂ ਅਪ੍ਪਦਾਨਵਸੇਨ ਉਪ੍ਪਨ੍ਨਂ ਰੋਗਂ ਵਡ੍ਢੇਨ੍ਤੋ. ਧਾਤੂਨਂ ਵਿਸਮਭਾਵਾਪਤ੍ਤਿਯਾ ਚ ਆਹਾਰਸ੍ਸ ਚ ਅਰੁਚ੍ਚਨੇਨ ਗਹਿਤਕਸ੍ਸ ਸਰੀਰੇ ਲੋਹਿਤਂ ਸੁਸ੍ਸਤਿ, ਮਂਸਂ ਮਿਲਾਯਤਿ, ਤਂ ਪਨਸ੍ਸ ਯਕ੍ਖੋ ਧਾਤੁਕ੍ਖੋਭਨਿਮਿਤ੍ਤਤਾਯ ਕਰੋਨ੍ਤੋ ਵਿਯ ਹੋਤੀਤਿ ਵੁਤ੍ਤਂ ‘‘ਅਪ੍ਪਮਂਸਲੋਹਿਤਂ ਕਰੋਨ੍ਤੋ’’ਤਿ.

੨੮੩. ਤੇਸਂ ਨਾਮਾਨਿ ਇਨ੍ਦਾਦਿਨਾਮਭਾਵੇਨ ਵੋਹਰਿਤਬ੍ਬਤੋ. ਤਤੋਤਿ ਤਤੋ ਆਰੋਚਨਤੋ ਪਰਂ. ਤੇਤਿ ਯਕ੍ਖਸੇਨਾਪਤਯੋ. ਓਕਾਸੋ ਨ ਭਵਿਸ੍ਸਤੀਤਿ ਭਿਕ੍ਖੁਭਿਕ੍ਖੁਨਿਯੋ, ਉਪਾਸਕਉਪਾਸਿਕਾਯੋ ਵਿਹੇਠੇਤੁਂ ਅਵਸਰੋ ਨ ਭਵਿਸ੍ਸਤਿ ਸਮ੍ਮਦੇਵ ਆਰਕ੍ਖਾਯ ਵਿਹਿਤਤ੍ਤਾਤਿ.

ਆਟਾਨਾਟਿਯਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ.