੮. ਸਿਙ੍ਗਾਲਸੁਤ੍ਤਵਣ੍ਣਨਾ
ਨਿਦਾਨਵਣ੍ਣਨਾ
੨੪੨. ਪਾਕਾਰੇਨ ਪਰਿਕ੍ਖਿਤ੍ਤਨ੍ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧੋ. ਗੋਪੁਰਟ੍ਟਾਲਕਯੁਤ੍ਤਨ੍ਤਿ ਦ੍ਵਾਰਪਾਸਾਦੇਨ ਚੇਵ ਤਤ੍ਥ ਤਤ੍ਥ ਪਾਕਾਰਮਤ੍ਥਕੇ ਪਤਿਟ੍ਠਾਪਿਤਅਟ੍ਟਾਲਕੇਹਿ ਚ ਯੁਤ੍ਤਂ. ਵੇਲ਼ੂਹਿ ਪਰਿਕ੍ਖਿਤ੍ਤਤ੍ਤਾ, ਅਬ੍ਭਨ੍ਤਰੇ ਪੁਪ੍ਫੂਪਗਫਲੂਪਗਰੁਕ੍ਖਸਞ੍ਛਨ੍ਨਤ੍ਤਾ ਚ ਨੀਲੋਭਾਸਂ. ਛਾਯੂਦਕਸਮ੍ਪਤ੍ਤਿਯਾ, ਭੂਮਿਭਾਗਸਮ੍ਪਤ੍ਤਿਯਾ ਚ ਮਨੋਰਮਂ.
ਕਾਲ਼ਕਵੇਸੇਨਾਤਿ ਕਲਨ੍ਦਕਰੂਪੇਨ. ਨਿਵਾਪਨ੍ਤਿ ਭੋਜਨਂ. ਤਨ੍ਤਿ ਉਯ੍ਯਾਨਂ.
‘‘ਖੋ ਪਨਾ’’ਤਿ ਵਚਨਾਲਙ੍ਕਾਰਮਤ੍ਤਮੇਤਨ੍ਤਿ ਤੇਨ ਸਮਯੇਨਾਤਿ ਅਤ੍ਥਵਚਨਂ ਯੁਤ੍ਤਂ. ਗਹਪਤਿ ਮਹਾਸਾਲੋਤਿ ਗਹਪਤਿਭੂਤੋ ਮਹਾਸਾਰੋ, ਰ-ਕਾਰਸ੍ਸ ਲ-ਕਾਰਂ ਕਤ੍ਵਾ ਅਯਂ ਨਿਦ੍ਦੇਸੋ. ਵਿਭਵਸਮ੍ਪਤ੍ਤਿਯਾ ਮਹਾਸਾਰਪ੍ਪਤ੍ਤੋ ਕੁਟੁਮ੍ਬਿਕੋ. ‘‘ਪੁਤ੍ਤੋ ਪਨਸ੍ਸ ਅਸ੍ਸਦ੍ਧੋ’’ਤਿਆਦਿ ਅਟ੍ਠੁਪ੍ਪਤ੍ਤਿਕੋ ਯਂ ਸੁਤ੍ਤਨਿਕ੍ਖੇਪੋਤਿ ਤਂ ਅਟ੍ਠੁਪ੍ਪਤ੍ਤਿਂ ਦਸ੍ਸੇਤੁਂ ਆਰਦ੍ਧਂ. ਕਮ੍ਮਫਲਸਦ੍ਧਾਯ ਅਭਾਵੇਨ ਅਸ੍ਸਦ੍ਧੋ. ਰਤਨਤ੍ਤਯੇ ਪਸਾਦਾਭਾਵੇਨ ਅਪ੍ਪਸਨ੍ਨੋ. ਏਵਮਾਹਾਤਿ ਏਵਂ ਇਦਾਨਿ ਵੁਚ੍ਚਮਾਨਾਕਾਰੇਨ ਵਦਤਿ.
ਯਾਵਜੀਵਂ ਅਨੁਸ੍ਸਰਣੀਯਾ ਹੋਤਿ ਹਿਤੇਸਿਤਾਯ ਵੁਤ੍ਤਾ ਪਚ੍ਛਿਮਾ ਵਾਚਾਤਿ ਅਧਿਪ੍ਪਾਯੇਨ. ਪੁਥੁਦਿਸਾਤਿ ਵਿਸੁਂ ਵਿਸੁਂ ਦਿਸਾ, ਤਾ ਪਨ ਅਨੇਕਾਤਿ ਆਹ ‘‘ਬਹੁਦਿਸਾ’’ਤਿ.
੨੪੩. ‘‘ਨ ਤਾਵ ਪਵਿਟ੍ਠੋ’’ਤਿਆਦੀਸੁ ਵਤ੍ਤਬ੍ਬਂ ਹੇਟ੍ਠਾ ਵੁਤ੍ਤਮੇਵ. ਨ ਇਦਾਨੇਵਾਤਿ ਨ ਇਮਾਯ ਏਵ ਵੇਲਾਯ. ਕਿਂ ਚਰਹੀਤਿ ਆਹ ‘‘ਪਚ੍ਚੂਸਸਮਯੇਪੀ’’ਤਿਆਦਿ. ਗਿਹਿਵਿਨਯਨ੍ਤਿ ਗਿਹੀਨਂ ਗਹਟ੍ਠਾਨਂ ਵਿਨਯਤਨ੍ਤਿਭੂਤਂ ‘‘ਗਿਹਿਨਾ ਏਵਂ ਵਤ੍ਤਿਤਬ੍ਬ’’ਨ੍ਤਿ ਗਹਟ੍ਠਾਚਾਰਸ੍ਸ ਗਹਟ੍ਠਵਤ੍ਤਸ੍ਸ ਅਨਵਸੇਸਤੋ ਇਮਸ੍ਮਿਂ ਸੁਤ੍ਤੇ ਸਵਿਸੇਸਂ ਕਤ੍ਵਾ ਵੁਤ੍ਤਤ੍ਤਾ. ਤਥੇਵਾਤਿ ਯਥਾ ਬੁਦ੍ਧਚਕ੍ਖੁਨਾ ਦਿਟ੍ਠਂ, ਤਥੇਵ ਪਸ੍ਸਿ. ਨਮਸ੍ਸਤਿ ਵਤ੍ਤਵਸੇਨ ਕਤ੍ਤਬ੍ਬਨ੍ਤਿ ਗਹੇਤ੍ਵਾ ਠਿਤਤ੍ਤਾ.
ਛਦਿਸਾਦਿਵਣ੍ਣਨਾ
੨੪੪. ਵਚਨਂ ਸੁਤ੍ਵਾਵ ਚਿਨ੍ਤੇਸਿ ਬੁਦ੍ਧਾਨੁਭਾਵੇਨ ਅਤ੍ਤਸਮ੍ਮਾਪਣਿਧਾਨਨਿਮਿਤ੍ਤੇਨ ਪੁਞ੍ਞਬਲੇਨ ਚ ਚੋਦਿਯਮਾਨੋ. ਨ ਕਿਰ ਤਾ ਏਤਾਤਿ ਤਾ ਛ ਦਿਸਾ ਏਤਾ ਇਦਾਨਿ ਮਯਾ ਨਮਸ੍ਸਿਯਮਾਨਾ ਪੁਰਤ੍ਥਿਮਾਦਿਕਾ ਨ ਹੋਨ੍ਤਿ ਕਿਰਾਤਿ. ਨਿਪਾਤਮਤ੍ਤਨ੍ਤਿ ਅਨਤ੍ਥਕਭਾਵਂ ਤਸ੍ਸ ਵਦਤਿ. ਪੁਚ੍ਛਾਪਦਨ੍ਤਿ ਪੁਚ੍ਛਾਵਚਨਂ.
ਭਗਵਾ ਗਹਪਤਿਪੁਤ੍ਤੇਨ ਨਮਸ੍ਸਿਤਬ੍ਬਾ ਛ ਦਿਸਾ ਪੁਚ੍ਛਿਤੋ ਦੇਸਨਾਕੁਸਲਤਾਯ ਆਦਿਤੋ ਏਵ ਤਾ ਅਕਥੇਤ੍ਵਾ ਤਸ੍ਸ ਤਾਵ ਪਟਿਪਤ੍ਤਿਯਾ ਨਂ ਭਾਜਨਭੂਤਂ ਕਾਤੁਂ ਵਜ੍ਜਨੀਯਵਜ੍ਜਨਤ੍ਥਞ੍ਚੇਵ ਸੇਵਿਤਬ੍ਬਸੇਵਨਤ੍ਥਞ੍ਚ ਓਵਾਦਂ ਦੇਨ੍ਤੋ ‘‘ਯਤੋ ਖੋ ਗਹਪਤਿਪੁਤ੍ਤਾ’’ਤਿਆਦਿਨਾ ਦੇਸਨਂ ਆਰਭਿ. ਤਤ੍ਥ ਕਮ੍ਮਕਿਲੇਸਾਤਿ ਕਮ੍ਮਭੂਤਾ ਸਂਕਿਲੇਸਾ. ਕਿਲਿਸ੍ਸਨ੍ਤੀਤਿ ਕਿਲਿਟ੍ਠਾ ਮਲੀਨਾ ਵਿਯ ਠਿਤਾ, ਉਪਤਾਪਿਤਾ ਚ ਹੋਨ੍ਤੀਤਿ ਅਤ੍ਥੋ. ਤਸ੍ਮਾਤਿ ਕਿਲਿਸ੍ਸਨਨਿਮਿਤ੍ਤਤ੍ਤਾ. ਯਦਿਪਿ ਸੁਰਾਪਾਨਂ ਪਞ੍ਚਵੇਰਭਾਵੇਨ ਉਪਾਸਕੇਹਿ ਪਰਿਵਜ੍ਜਨੀਯਂ, ਤਸ੍ਸ ਪਨ ਅਪਾਯਮੁਖਭਾਵੇਨ ਪਰਤੋ ਵਤ੍ਤੁਕਾਮਤਾਯ ਪਾਣਾਤਿਪਾਤਾਦਿਕੇ ਏਵ ਸਨ੍ਧਾਯ ‘‘ਚਤ੍ਤਾਰੋ’’ਤਿ ਵੁਤ੍ਤਂ, ਨ ‘‘ਪਞ੍ਚਾ’’ਤਿ. ‘‘ਵਿਸੁਂ ਅਕਮ੍ਮਪਥਭਾਵਤੋ ਚਾ’’ਤਿ ਅਪਰੇ. ‘‘ਸੁਰਾਪਾਨਮ੍ਪਿ ‘ਸੁਰਾਮੇਰਯਪਾਨਂ, ਭਿਕ੍ਖਵੇ, ਆਸੇਵਿਤਂ ਭਾਵਿਤਂ ਬਹੁਲੀਕਤਂ ਨਿਰਯਸਂਵਤ੍ਤਨਿਕ’ਨ੍ਤਿਆਦਿ (ਅ. ਨਿ. ੮.੪੦) ਵਚਨਤੋ ਵਿਸੁਂ ਕਮ੍ਮਪਥਭਾਵੇਨ ਆਗਤਂ. ਤਥਾ ਹਿ ਤਂ ਦੁਚ੍ਚਰਿਤਕਮ੍ਮਂ ਹੁਤ੍ਵਾ ਦੁਗ੍ਗਤਿਗਾਮਿਪਿਟ੍ਠਿਵਤ੍ਤਕਭਾਵੇਨ ਨਿਯਤ’’ਨ੍ਤਿ ਕੇਚਿ, ਤੇਸਂ ਮਤੇਨ ਏਕਾਦਸ ਕਮ੍ਮਪਥਾ ਸਿਯੁਂ. ਤਸ੍ਮਾ ਯਥਾਵੁਤ੍ਤੇਸ੍ਵੇਵ ਕਮ੍ਮਪਥੇਸੁ ਉਪਕਾਰਕਤ੍ਤਸਭਾਗਤ੍ਤਵਸੇਨ ਅਨੁਪ੍ਪਵੇਸੋ ਦਟ੍ਠਬ੍ਬੋਤਿ ‘‘ਵਿਸੁਂ ਅਕਮ੍ਮਪਥਭਾਵਤੋ ਚਾ’’ਤਿ ਸੁਵੁਤ੍ਤਮੇਤਂ. ਸੁਰਾਪਾਨਸ੍ਸ ਭੋਗਾਪਾਯਮੁਖਭਾਵੇਨ ਵਤ੍ਤੁਕਾਮਤਾਯ ‘‘ਚਤ੍ਤਾਰੋ’’ ਤ੍ਵੇਵ ਅਵੋਚ. ਤਿਟ੍ਠਤਿ ਏਤ੍ਥ ਫਲਂ ਤਦਾਯਤ੍ਤਵੁਤ੍ਤਿਤਾਯਾਤਿ ਠਾਨਂ, ਹੇਤੂਤਿ ਆਹ ‘‘ਠਾਨੇਹੀਤਿ ਕਾਰਣੇਹੀ’’ਤਿ. ਅਪੇਨ੍ਤਿ ਅਪਗਚ੍ਛਨ੍ਤਿ, ਅਪੇਤਿ ਵਾ ਏਤੇਹੀਤਿ ਅਪਾਯਾ, ਅਪਾਯਾਨਂ, ਅਪਾਯਾ ਏਵ ਵਾ ਮੁਖਾਨਿ ਦ੍ਵਾਰਾਨੀਤਿ ਅਪਾਯਮੁਖਾਨਿ. ਵਿਨਾਸਮੁਖਾਨੀਤਿ ਏਤ੍ਥਾਪਿ ਏਸੇਵ ਨਯੋ.
ਕਿਞ੍ਚਾਪਿ ‘‘ਅਰਿਯਸਾਵਕਸ੍ਸਾ’’ਤਿ ਪੁਬ੍ਬੇ ਸਾਧਾਰਣਤੋ ਵੁਤ੍ਤਂ, ਵਿਸੇਸਤੋ ਪਨ ਪਠਮਾਯ ਭੂਮਿਯਂ ਠਿਤਸ੍ਸੇਵ ਵਕ੍ਖਮਾਨਨਯੋ ਯੁਜ੍ਜਤੀਤਿ ‘‘ਸੋਤਿ ਸੋ ਸੋਤਾਪਨ੍ਨੋ’’ਤਿ ਵੁਤ੍ਤਂ. ਪਾਪਕ-ਸਦ੍ਦੋ ਨਿਹੀਨਪਰਿਯਾਯੋਤਿ ‘‘ਲਾਮਕੇਹੀ’’ਤਿ ਵੁਤ੍ਤਂ. ਅਪਾਯਦੁਕ੍ਖਂ, ਵਟ੍ਟਦੁਕ੍ਖਞ੍ਚ ਪਾਪੇਨ੍ਤੀਤਿ ਵਾ ਪਾਪਕਾ, ਤੇਹਿ ਪਾਪਕੇਹਿ. ਛ ਦਿਸਾ ਪਟਿਚ੍ਛਾਦੇਨ੍ਤੋਤਿ ਤੇਨ ਤੇਨ ਭਾਗੇਨ ਦਿਸ੍ਸਨ੍ਤੀਤਿ ‘‘ਦਿਸਾ’’ਤਿ ਸਞ੍ਞਿਤੇ ਛ ਭਾਗੇ ਸਤ੍ਤੇ ਯਥਾ ਤੇਹਿ ਸਦ੍ਧਿਂ ਅਤ੍ਤਨੋ ਛਿਦ੍ਦਂ ਨ ਹੋਤਿ, ਏਵਂ ਪਟਿਚ੍ਛਾਦੇਨ੍ਤੋ ਪਟਿਸਨ੍ਧਾਰੇਨ੍ਤੋ. ਵਿਜਿਨਨਤ੍ਥਾਯਾਤਿ ਅਭਿਭਵਨਤ੍ਥਾਯ. ਯੋ ਹਿ ਦਿਟ੍ਠਧਮ੍ਮਿਕਂ, ਸਮ੍ਪਰਾਯਿਕਞ੍ਚ ਅਨਤ੍ਥਂ ਪਰਿਵਜ੍ਜਨਵਸੇਨ ਅਭਿਭਵਤਿ, ਤਤੋ ਏਵ ਤਦੁਭਯਤ੍ਥਂ ਸਮ੍ਪਾਦੇਤਿ, ਸੋ ਉਭਯਲੋਕਵਿਜਯਾਯ ਪਟਿਪਨ੍ਨੋ ਨਾਮ ਹੋਤਿ ਪਚ੍ਚਤ੍ਥਿਕਨਿਗ੍ਗਣ੍ਹਨਤੋ, ਸਕਤ੍ਥਸਮ੍ਪਾਦਨਤੋ ਚ. ਤੇਨਾਹ ‘‘ਅਯਞ੍ਚੇਵ ਲੋਕੋ’’ਤਿਆਦਿ. ਪਾਣਾਤਿਪਾਤਾਦੀਨਿ ਪਞ੍ਚ ਵੇਰਾਨਿ ਵੇਰਪ੍ਪਸਵਨਤੋ. ਆਰਦ੍ਧੋ ਹੋਤੀਤਿ ਸਂਸਾਧਿਤੋ ਹੋਤਿ, ਤਯਿਦਂ ਸਂਸਾਧਨਂ ਕਿਤ੍ਤਿਸਦ੍ਦੇਨ ਇਧ ਸਤ੍ਤਾਨਂ ਚਿਤ੍ਤਤੋਸਨੇਨ, ਵੇਰਾਭਾਵਾਪਾਦਨੇਨ ਚ ਹੋਤੀਤਿ ਆਹ ‘‘ਪਰਿਤੋਸਿਤੋ ਚੇਵ ਨਿਪ੍ਫਾਦਿਤੋ ਚਾ’’ਤਿ. ਪੁਨ ਪਞ੍ਚ ਵੇਰਾਨੀਤਿ ਪਞ੍ਚ ਵੇਰਫਲਾਨਿ ਉਤ੍ਤਰਪਦਲੋਪੇਨ.
ਕਤਮਸ੍ਸਾਤਿ ਕਤਮੇ ਅਸ੍ਸ. ਕਿਲੇਸਸਮ੍ਪਯੁਤ੍ਤਤ੍ਤਾ ਕਿਲੇਸੋਤਿ ਤਂਯੋਗਤੋ ਤਂਸਦਿਸਂ ਵਦਤਿ ਯਥਾ ‘‘ਪੀਤਿਸੁਖਂ ਪਠਮਂ ਝਾਨਂ, (ਦੀ. ਨਿ. ੧.੨੨੬; ਮ. ਨਿ. ੧.੨੭੧, ੨੮੭, ੨੯੭; ਸਂ. ਨਿ. ੨.੧੫੨; ਅ. ਨਿ. ੪.੧੨੩; ੫.੨੮; ਪਾਰਾ. ੧੧; ਧ. ਸ. ੪੯੯; ਵਿਭ. ੫੦੮) ਨੀਲਂ ਵਤ੍ਥ’’ਨ੍ਤਿ ਚ. ਸਮ੍ਪਯੁਤ੍ਤਤਾ ਚੇਤ੍ਥ ਤਦੇਕਟ੍ਠਤਾਯ ਵੇਦਿਤਬ੍ਬਾ, ਨ ਏਕੁਪ੍ਪਾਦਾਦਿਤਾਯ. ਏਵਞ੍ਚ ਕਤ੍ਵਾ ਪਾਣਾਤਿਪਾਤਕਮ੍ਮਸ੍ਸ ਦਿਟ੍ਠਿਮਾਨਲੋਭਾਦੀਹਿਪਿ ਕਿਲਿਟ੍ਠਤਾ ਸਿਦ੍ਧਾ ਹੋਤਿ, ਮਿਚ੍ਛਾਚਾਰਸ੍ਸ ਦੋਸਾਦੀਹਿ ਕਿਲਿਟ੍ਠਤਾ. ਤੇਨਾਹ ‘‘ਸਂਕਿਲੇਸੋਯੇਵਾ’’ਤਿਆਦਿ. ਪੁਬ੍ਬੇ ਵੁਤ੍ਤਅਤ੍ਥਵਸੇਨ ਪਨ ਸਮ੍ਮੁਖੇਨਪਿ ਨੇਸਂ ਕਿਲੇਸਪਰਿਯਾਯੋ ਲਬ੍ਭਤੇਵ. ਏਤਦਤ੍ਥਪਰਿਦੀਪਕਮੇਵਾਤਿ ਯੋ ‘‘ਪਾਣਾਤਿਪਾਤੋ ਖੋ’’ਤਿਆਦਿਨਾ ਵੁਤ੍ਤੋ, ਏਤਸ੍ਸ ਅਤ੍ਥਸ੍ਸ ਪਰਿਦੀਪਕਮੇਵ. ਯਦਿ ਏਵਂ ਕਸ੍ਮਾ ਪੁਨ ਵੁਤ੍ਤਨ੍ਤਿ ਆਹ ‘‘ਗਾਥਾਬਨ੍ਧ’’ਨ੍ਤਿ, ਤਸ੍ਸ ਅਤ੍ਥਸ੍ਸ ਸੁਖਗ੍ਗਹਣਤ੍ਥਂ ਭਗਵਾ ਗਾਥਾਬਨ੍ਧਂ ਅਵੋਚਾਤਿ ਅਧਿਪ੍ਪਾਯੋ.
ਚਤੁਠਾਨਾਦਿਵਣ੍ਣਨਾ
੨੪੬. ‘‘ਪਾਪਕਮ੍ਮਂ ਕਰੋਤੀ’’ਤਿ ਕਸ੍ਮਾ ਅਯਂ ਉਦ੍ਦੇਸਨਿਦ੍ਦੇਸੋ ਪਵਤ੍ਤੋਤਿ ਅਨ੍ਤੋਲੀਨਚੋਦਨਂ ਸਨ੍ਧਾਯ ‘‘ਇਦਂ ਭਗਵਾ’’ਤਿਆਦਿ ਵੁਤ੍ਤਂ. ਸੁਕ੍ਕਪਕ੍ਖਵਸੇਨ ਹਿ ਉਦ੍ਦੇਸੋ ਕਤੋ, ਕਣ੍ਹਪਕ੍ਖਵਸੇਨ ਚ ਨਿਦ੍ਦੇਸੋ ਆਰਦ੍ਧੋ. ਕਾਰਕੇਤਿ ਪਾਪਕਮ੍ਮਸ੍ਸ ਕਾਰਕੇ. ਅਕਾਰਕੋ ਪਾਕਟੋ ਹੋਤਿ ਯਥਾ ਪਟਿਪਜ੍ਜਨ੍ਤੋ ਪਾਪਂ ਕਰੋਤਿ ਨਾਮ, ਤਥਾ ਅਪ੍ਪਟਿਪਜ੍ਜਨਤੋ. ਸਂਕਿਲੇਸਧਮ੍ਮਵਿਵਜ੍ਜਨਪੁਬ੍ਬਕਂ ਵੋਦਾਨਧਮ੍ਮਪਟਿਪਤ੍ਤਿਆਚਿਕ੍ਖਨਂ ਇਧ ਦੇਸਨਾਕੋਸਲ੍ਲਂ. ਪਠਮਤਰਂ ਕਾਰਕਂ ਦਸ੍ਸੇਨ੍ਤੋ ਆਹ ਯਥਾ ‘‘ਵਾਮਂ ਮੁਞ੍ਚ ਦਕ੍ਖਿਣਂ ਗਣ੍ਹਾ’’ਤਿ (ਧ. ਸ. ਅਟ੍ਠ. ੪੯੮) ਤਥਾ ਹਿ ਭਗਵਾ ਅਟ੍ਠਤਿਂਸ ਮਙ੍ਗਲਾਨਿ ਦਸ੍ਸੇਨ੍ਤੋ ‘‘ਅਸੇਵਨਾ ਚ ਬਾਲਾਨ’’ਨ੍ਤਿ (ਖੁ. ਪਾ. ੫.੩; ਸੁ. ਨਿ. ੨੬੨) ਵਤ੍ਵਾ ‘‘ਪਣ੍ਡਿਤਾਨਞ੍ਚ ਸੇਵਨਾ’’ਤਿ (ਖੁ. ਪਾ. ੫.੩; ਸੁ. ਨਿ. ੨੬੨) ਅਵੋਚ. ਛਨ੍ਦਾਗਤਿਨ੍ਤਿ ਏਤ੍ਥ ਸਨ੍ਧਿਵਸੇਨ ਸਰਲੋਪੋਤਿ ਦਸ੍ਸੇਨ੍ਤੋ ਆਹ ‘‘ਛਨ੍ਦੇਨ ਪੇਮੇਨ ਅਗਤਿ’’ਨ੍ਤਿ. ਛਨ੍ਦਾਤਿ ਹੇਤੁਮ੍ਹਿ ਨਿਸ੍ਸਕ੍ਕਵਚਨਨ੍ਤਿ ਆਹ ‘‘ਛਨ੍ਦੇਨਾ’’ਤਿ. ਛਨ੍ਦ-ਸਦ੍ਦੋ ਚੇਤ੍ਥ ਤਣ੍ਹਾਪਰਿਯਾਯੋ, ਨ ਕੁਸਲਚ੍ਛਨ੍ਦਾਦਿਪਰਿਯਾਯੋਤਿ ਆਹ ‘‘ਪੇਮੇਨਾ’’ਤਿ. ਪਰਪਦੇਸੂਤਿ ‘‘ਦੋਸਾਗਤਿਂ ਗਚ੍ਛਨ੍ਤੋ’’ਤਿਆਦੀਸੁ ਵਾਕ੍ਯੇਸੁ. ‘‘ਏਸੇਵ ਨਯੋ’’ਤਿ ਇਮਿਨਾ ‘‘ਦੋਸੇਨ ਕੋਪੇਨਾ’’ਤਿ ਏਵਮਾਦਿ ਅਤ੍ਥਵਚਨਂ ਅਤਿਦਿਸਤਿ. ਮਿਤ੍ਤੋਤਿ ਦਲ਼੍ਹਮਿਤ੍ਤੋ, ਸਮ੍ਭਤ੍ਤੋਤਿ ਅਤ੍ਥੋ. ਸਨ੍ਦਿਟ੍ਠੋਤਿ ਦਿਟ੍ਠਮਤ੍ਤਸਹਾਯੋ. ਪਕਤਿਵੇਰਵਸੇਨਾਤਿ ਪਕਤਿਯਾ ਉਪ੍ਪਨ੍ਨਵੇਰਵਸੇਨ, ਚਿਰਕਾਲਾਨੁਬਨ੍ਧਵਿਰੋਧਵਸੇਨਾਤਿ ਅਤ੍ਥੋ. ਤੇਨੇਵਾਹ ‘‘ਤਙ੍ਖਣੁਪ੍ਪਨ੍ਨਕੋਧਵਸੇਨ ਵਾ’’ਤਿ. ਯਂ ਵਾ ਤਂ ਵਾ ਅਯੁਤ੍ਤਂ ਅਕਾਰਣਂ ਵਤ੍ਵਾ. ਵਿਸਮੇ ਚੋਰਾਦਿਕੇ, ਵਿਸਮਾਨਿ ਵਾ ਕਾਯਦੁਚ੍ਚਰਿਤਾਦੀਨਿ ਸਮਾਦਾਯ ਵਤ੍ਤਨੇਨ ਨਿਸ੍ਸਿਤੋ ਵਿਸਮਨਿਸ੍ਸਿਤੋ.
ਛਨ੍ਦਾਗਤਿਆਦੀਨਿ ਨ ਗਚ੍ਛਤਿ ਮਗ੍ਗੇਨੇਵ ਚਤੁਨ੍ਨਮ੍ਪਿ ਅਗਤਿਗਮਨਾਨਂ ਪਹੀਨਤ੍ਤਾ, ਅਗਤਿਗਮਨਾਨੀਤਿ ਚ ਤਥਾਪਵਤ੍ਤਾ ਅਪਾਯਗਮਨੀਯਾ ਅਕੁਸਲਚਿਤ੍ਤੁਪ੍ਪਾਦਾ ਵੇਦਿਤਬ੍ਬਾ ਅਗਤਿ ਗਚ੍ਛਤਿ ਏਤੇਹੀਤਿ.
ਯਸ੍ਸਤਿ ਤੇਨ ਕਿਤ੍ਤੀਯਤੀਤਿ ਯਸੋ, ਥੁਤਿਘੋਸੋ. ਯਸ੍ਸਤਿ ਤੇਨ ਪੁਰੇਚਰਾਨੁਚਰਭਾਵੇਨ ਪਰਿਵਾਰੀਯਤੀਤਿ ਯਸੋ, ਪਰਿਵਾਰੋਤਿ ਆਹ ‘‘ਕਿਤ੍ਤਿਯਸੋਪਿ ਪਰਿਵਾਰਯਸੋਪੀ’’ਤਿ. ਪਰਿਹਾਯਤੀਤਿ ਪੁਬ੍ਬੇ ਯੋ ਚ ਯਾਵਤਕੇ ਲਬ੍ਭਤਿ, ਤਤੋ ਪਰਿਤੋ ਹਾਯਤਿ ਪਰਿਕ੍ਖਯਂ ਗਚ੍ਛਤਿ.
ਛਅਪਾਯਮੁਖਾਦਿਵਣ੍ਣਨਾ
੨੪੭. ਪੂਵੇ ਭਾਜਨੇ ਪਕ੍ਖਿਪਿਤ੍ਵਾ ਤਜ੍ਜਂ ਉਦਕਂ ਦਤ੍ਵਾ ਮਦ੍ਦਿਤ੍ਵਾ ਕਤਾ ਪੂਵਸੁਰਾ. ਏਵਂ ਸੇਸਸੁਰਾਪਿ. ਕਿਣ੍ਣਾਤਿ ਪਨ ਤਸ੍ਸਾ ਸੁਰਾਯ ਬੀਜਂ ਵੁਚ੍ਚਤਿ, ਯੇ ‘‘ਸੁਰਾਮੋਦਕਾ’’ ਤਿਪਿ ਵੁਚ੍ਚਨ੍ਤਿ, ਤੇ ਪਕ੍ਖਿਪਿਤ੍ਵਾ ਕਤਾ ਕਿਣ੍ਣਪਕ੍ਖਿਤ੍ਤਾ. ਹਰੀਤਕੀਸਾਸਪਾਦਿਨਾਨਾਸਮ੍ਭਾਰੇਹਿ ਸਂਯੋਜਿਤਾ ਸਮ੍ਭਾਰਸਂਯੁਤ੍ਤਾ. ਮਧੁਕਤਾਲਨਾਲ਼ਿਕੇਰਾਦਿਪੁਪ੍ਫਰਸੋ ਚਿਰਪਾਰਿਵਾਸਿਕੋ ਪੁਪ੍ਫਾਸਵੋ. ਪਨਸਾਦਿਫਲਰਸੋ ਫਲਾਸਵੋ. ਮੁਦ੍ਦਿਕਾਰਸੋ ਮਧ੍ਵਾਸਵੋ. ਉਚ੍ਛੁਰਸੋ ਗੁਲ਼ਾਸਵੋ. ਹਰੀਤਕਾਮਲਕਕਟੁਕਭਣ੍ਡਾਦਿਨਾਨਾਸਮ੍ਭਾਰਾਨਂ ਰਸੋ ਚਿਰਪਾਰਿਵਾਸਿਕੋ ਸਮ੍ਭਾਰਸਂਯੁਤ੍ਤੋ. ਤਂ ਸਬ੍ਬਮ੍ਪੀਤਿ ਤਂ ਸਬ੍ਬਂ ਦਸਵਿਧਮ੍ਪਿ. ਮਦਕਰਣਵਸੇਨ ਮਜ੍ਜਂ ਪਿਵਨ੍ਤਂ ਮਦਯਤੀਤਿ ਕਤ੍ਵਾ. ਸੁਰਾਮੇਰਯਮਜ੍ਜੇ ਪਮਾਦਟ੍ਠਾਨਂ ਸੁਰਾਮੇਰਯਮਜ੍ਜਪਮਾਦਟ੍ਠਾਨਂ. ਅਨੁ ਅਨੁ ਯੋਗੋਤਿ ਪੁਨਪ੍ਪੁਨਂ ਤਂਸਮਙ੍ਗਿਤਾ. ਤੇਨਾਹ ‘‘ਪੁਨਪ੍ਪੁਨਂ ਕਰਣ’’ਨ੍ਤਿ, ਅਪਰਾਪਰਂ ਪਵਤ੍ਤਨਨ੍ਤਿ ਅਤ੍ਥੋ. ਉਪ੍ਪਨ੍ਨਾ ਚੇਵ ਭੋਗਾ ਪਰਿਹਾਯਨ੍ਤਿ ਪਾਨਬ੍ਯਸਨੇਨ ਬ੍ਯਸਨਕਰਣਤੋ. ਅਨੁਪ੍ਪਨ੍ਨਾ ਚ ਨੁਪ੍ਪਜ੍ਜਨ੍ਤਿ ਪਮਤ੍ਤਸ੍ਸ ਕਮ੍ਮਨ੍ਤੇਸੁ ਞਾਯਕਰਣਾਭਾਵਤੋ. ਭੋਗਾਨਨ੍ਤਿ ਭੁਞ੍ਜਿਤਬ੍ਬਟ੍ਠੇਨ ‘‘ਭੋਗਾ’’ਤਿ ਲਦ੍ਧਨਾਮਾਨਂ ਕਾਮਗੁਣਾਨਂ. ਅਪਾਯਮੁਖ-ਸਦ੍ਦਸ੍ਸ ਅਤ੍ਥੋ ਹੇਟ੍ਠਾ ਵੁਤ੍ਤੋ ਏਵ. ਅਵੇਲਾਯਾਤਿ ਅਯੁਤ੍ਤਵੇਲਾਯ. ਯਦਾ ਵਿਚਰਤੋ ਅਤ੍ਥਰਕ੍ਖਾਦਯੋ ਨ ਹੋਨ੍ਤਿ. ਵਿਸਿਖਾਸੁ ਚਰਿਯਾਤਿ ਰਚ੍ਛਾਸੁ ਵਿਚਰਣਂ.
ਸਮਜ੍ਜਾ ਵੁਚ੍ਚਤਿ ਮਹੋ, ਯਤ੍ਥ ਨਚ੍ਚਾਨਿਪਿ ਪਯੋਜੀਯਨ੍ਤਿ, ਤੇਸਂ ਦਸ੍ਸਨਾਦਿਅਤ੍ਥਂ ਤਤ੍ਥ ਅਭਿਰਤਿਵਸੇਨ ਚਰਣਂ ਉਪਗਮਨਂ ਸਮਜ੍ਜਾਭਿਚਰਣਂ. ਨਚ੍ਚਾਦਿਦਸ੍ਸਨਵਸੇਨਾਤਿ ਨਚ੍ਚਾਦੀਨਂ ਦਸ੍ਸਨਾਦਿਵਸੇਨਾਤਿ ਆਦਿਸਦ੍ਦਲੋਪੋ ਦਟ੍ਠਬ੍ਬੋ, ਦਸ੍ਸਨੇਨ ਵਾ ਸਵਨਮ੍ਪਿ ਗਹਿਤਂ ਵਿਰੂਪੇਕਸੇਸਨਯੇਨ. ਆਲੋਚਨਸਭਾਵਤਾਯ ਵਾ ਪਞ੍ਚਵਿਞ੍ਞਾਣਾਨਂ ਸਵਨਕਿਰਿਯਾਯਪਿ ਦਸ੍ਸਨਸਙ੍ਖੇਪਸਮ੍ਭਵਤੋ ‘‘ਦਸ੍ਸਨਵਸੇਨ’’ ਇਚ੍ਚੇਵ ਵੁਤ੍ਤਂ. ਇਧ ਚਿਤ੍ਤਾਲਸਿਯਤਾ ਅਕਾਰਣਨ੍ਤਿ ‘‘ਕਾਯਾਲਸਿਯਤਾ’’ਤਿ ਵੁਤ੍ਤਂ. ਯੁਤ੍ਤਪ੍ਪਯੁਤ੍ਤਤਾਤਿ ਤਪ੍ਪਸੁਤਤਾ ਅਤਿਰੇਕਤਰਤਾਯ.
ਸੁਰਾਮੇਰਯਸ੍ਸ ਛਆਦੀਨਵਾਦਿਵਣ੍ਣਨਾ
੨੪੮. ਸਯਂ ਦਟ੍ਠਬ੍ਬਨ੍ਤਿ ਸਨ੍ਦਿਟ੍ਠਂ. ਸਨ੍ਦਿਟ੍ਠਮੇਵ ਸਨ੍ਦਿਟ੍ਠਿਕਂ, ਧਨਜਾਨਿਸਦ੍ਦਾਪੇਕ੍ਖਾਯ ਪਨ ਇਤ੍ਥਿਲਿਙ੍ਗਵਸੇਨ ਨਿਦ੍ਦੇਸੋ, ਦਿਟ੍ਠਧਮ੍ਮਿਕਾਤਿ ਅਯਮੇਤ੍ਥ ਅਤ੍ਥੋਤਿ ਆਹ ‘‘ਇਧਲੋਕਭਾਵਿਨੀ’’ਤਿ. ਸਮਂ, ਸਮ੍ਮਾ ਪਸ੍ਸਿਤਬ੍ਬਾਤਿ ਵਾ ਸਨ੍ਦਿਟ੍ਠਿਕਾ, ਪਾਨਸਮਕਾਲਭਾਵਿਨੀਤਿ ਅਤ੍ਥੋ. ਕਲਹਪ੍ਪਵਡ੍ਢਨੀ ਮਿਤ੍ਤਸ੍ਸ ਕਲਹੇ ਅਨਾਦੀਨਵਦਸ੍ਸਿਭਾਵਤੋ. ਖੇਤ੍ਤਂ ਉਪ੍ਪਤ੍ਤਿਟ੍ਠਾਨਭਾਵਤੋ. ਆਯਤਨਨ੍ਤਿ ਵਾ ਕਾਰਣਂ, ਆਕਰੋ ਵਾਤਿ ਅਤ੍ਥੋ. ਪਰਲੋਕੇ ਅਕਿਤ੍ਤਿਂ ਪਾਪੁਣਨ੍ਤਿ ਅਕਿਤ੍ਤਿਸਂਵਤ੍ਤਨਿਯਸ੍ਸ ਕਮ੍ਮਸ੍ਸ ਪਸਵਨਤੋ. ਕੋਪੀਨਂ ਵਾ ਪਾਕਟਭਾਵੇਨ ਅਕਤ੍ਤਬ੍ਬਰਹਸ੍ਸਕਮ੍ਮਂ. ਸੁਰਾਮਦਮਤ੍ਤਾ ਚ ਪੁਬ੍ਬੇ ਅਤ੍ਤਨਾ ਕਤਂ ਤਾਦਿਸਂ ਕਮ੍ਮਂ ਅਮਤ੍ਤਕਾਲੇ ਛਾਦੇਨ੍ਤਾ ਵਿਚਰਿਤ੍ਵਾ ਮਤ੍ਤਕਾਲੇ ਪਚ੍ਚਤ੍ਥਿਕਾਨਮ੍ਪਿ ਵਿਵਰਨ੍ਤਿ ਪਾਕਟਂ ਕਰੋਨ੍ਤਿ, ਤੇਨ ਤੇਸਂ ਸਾ ਸੁਰਾ ਤਸ੍ਸ ਕੋਪੀਨਸ੍ਸ ਨਿਦਂਸਨਤੋ ‘‘ਕੋਪੀਨਨਿਦਂਸਨੀ’’ਤਿ ਵੁਚ੍ਚਤੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਕਮ੍ਮਸ੍ਸਕਤਾਪਞ੍ਞਨ੍ਤਿ ਨਿਦਸ੍ਸਨਮਤ੍ਤਂ ਦਟ੍ਠਬ੍ਬਂ. ‘‘ਯਂ ਕਿਞ੍ਚਿ ਲੋਕਿਯਂ ਪਞ੍ਞਂ ਦੁਬ੍ਬਲਂ ਕਰੋਤਿਯੇਵਾ’’ਤਿ ਹਿ ਸਕ੍ਕਾ ਵਿਞ੍ਞਾਤੁਂ. ਤਥਾ ਹਿ ਬ੍ਯਤਿਰੇਕਮੁਖੇਨ ਤਮਤ੍ਥਂ ਪਤਿਟ੍ਠਪੇਤੁਂ ‘‘ਮਗ੍ਗਪਞ੍ਞਂ ਪਨਾ’’ਤਿਆਦਿ ਵੁਤ੍ਤਂ. ‘‘ਅਨ੍ਤੋਮੁਖਮੇਵ ਨ ਪਵਿਸਤੀ’’ਤਿ ਇਮਿਨਾ ਸੁਰਾਯ ਮਗ੍ਗਪਞ੍ਞਾਦੁਬ੍ਬਲਕਰਣਸ੍ਸ ਦੁਰਸਮੁਸ੍ਸਾਰਿਤਭਾਵਮਾਹ. ਨਨੁ ਚੇਵਂ ਸੁਰਾਯ ਤਸ੍ਸਾ ਪਞ੍ਞਾਯ ਦੁਬ੍ਬਲੀਕਰਣੇ ਸਾਮਤ੍ਥਿਯਵਿਘਾਤੋ ਅਚੋਦਿਤੋ ਹੋਤਿ ਅਰਿਯਾਨਂ ਅਨੁਪ੍ਪਯੋਗਸ੍ਸੇਵ ਚੋਦਿਤਤ੍ਤਾਤਿ? ਨਯਿਦਂ ਏਵਂ ਉਪਯੋਗੋਪਿ ਨਾਮ ਸਦਾ ਤੇਸਂ ਨਤ੍ਥਿ, ਕੁਤੋ ਕਿਚ੍ਚਕਰਣਨ੍ਤਿ ਇਮਸ੍ਸ ਅਤ੍ਥਸ੍ਸ ਵੁਤ੍ਤਤ੍ਤਾ. ਅਥ ਪਨ ਅਟ੍ਠਾਨਪਰਿਕਪ੍ਪਵਸੇਨਸ੍ਸਾ ਕਦਾਚਿ ਸਿਯਾ ਉਪਯੋਗੋ, ਤਥਾਪਿ ਸੋ ਤਸ੍ਸਾ ਦੁਬ੍ਬਲਿਯਂ ਈਸਕਮ੍ਪਿ ਕਾਤੁਂ ਨਾਲਮੇਵ ਸਮ੍ਮਦੇਵ ਪਟਿਪਕ੍ਖਦੂਰੀਭਾਵੇਨ ਸੁਪ੍ਪਤਿਟ੍ਠਿਤਭਾਵਤੋ. ਤੇਨਾਹ ‘‘ਮਗ੍ਗਪਞ੍ਞਂ ਪਨ ਦੁਬ੍ਬਲਂ ਕਾਤੁਂ ਨ ਸਕ੍ਕੋਤੀ’’ਤਿ. ਮਗ੍ਗਸੀਸੇਨ ਚੇਤ੍ਥ ਅਰਿਯਾਨਂ ਸਬ੍ਬਸ੍ਸਾਪਿ ਲੋਕਿਯਲੋਕੁਤ੍ਤਰਾਯ ਪਞ੍ਞਾਯ ਦੁਬ੍ਬਲਭਾਵਾਪਾਦਾਨੇ ਅਸਮਤ੍ਥਤਾ ਦਸ੍ਸਿਤਾਤਿ ਦਟ੍ਠਬ੍ਬਂ. ਪਜ੍ਜਤਿ ਏਤੇਨ ਫਲਨ੍ਤਿ ਪਦਂ, ਕਾਰਣਂ.
੨੪੯. ਅਤ੍ਤਾਪਿਸ੍ਸ ਅਕਾਲਚਾਰਿਸ੍ਸ ਅਗੁਤ੍ਤੋ ਸਰਸਤੋ ਅਰਕ੍ਖਿਤੋ ਉਪਕ੍ਕਮਤੋਪਿ ਪਰਿਵਜ੍ਜਨੀਯਾਨਂ ਅਪਰਿਵਜ੍ਜਨਤੋ. ਤੇਨਾਹ ‘‘ਅਵੇਲਾਯ ਚਰਨ੍ਤੋ ਹੀ’’ਤਿਆਦਿ. ਕਣ੍ਟਕਾਦੀਨਿਪੀਤਿ ਪਿ-ਸਦ੍ਦੇਨ ਸੋਬ੍ਭਾਦਿਕੇ ਸਙ੍ਗਣ੍ਹਾਤਿ. ਵੇਰਿਨੋਪੀਤਿ ਪਿ-ਸਦ੍ਦੇਨ ਚੋਰਾਦਿਕਾ ਸਙ੍ਗਯ੍ਹਨ੍ਤਿ. ਪੁਤ੍ਤਦਾਰਾਤਿ ਏਤ੍ਥ ਪੁਤ੍ਤਗ੍ਗਹਣੇਨ ਪੁਤ੍ਤੀਪਿ ਗਹਿਤਾਤਿ ਆਹ ‘‘ਪੁਤ੍ਤਧੀਤਰੋ’’ਤਿ. ਬਹਿ ਪਤ੍ਥਨਨ੍ਤਿ ਕਾਮਪਤ੍ਥਨਾਵਸੇਨ ਅਨ੍ਤੋਗੇਹਸ੍ਸਿਤਤੋ ਨਿਬਦ੍ਧਵਤ੍ਥੁਤੋ ਬਹਿਦ੍ਧਾ ਪਤ੍ਥਨਂ ਕਤ੍ਵਾ. ਅਞ੍ਞੇਹਿ ਕਤਪਾਪਕਮ੍ਮੇਸੂਤਿ ਪਰੇਹਿ ਕਤਾਸੁ ਪਾਪਕਿਰਿਯਾਸੁ. ਸਙ੍ਕਿਤਬ੍ਬੋ ਹੋਤਿ ਅਕਾਲੇ ਤਤ੍ਥ ਤਤ੍ਥ ਚਰਣਤੋ. ਰੁਹਤਿ ਯਸ੍ਮਿਂ ਪਦੇਸੇ ਚੋਰਿਕਾ ਪਵਤ੍ਤਾ, ਤਤ੍ਥ ਪਰੇਹਿ ਦਿਟ੍ਠਤ੍ਤਾ. ਵਤ੍ਤੁਂ ਨ ਸਕ੍ਕਾਤਿ ‘‘ਏਤ੍ਤਕਂ ਦੁਕ੍ਖਂ, ਏਤ੍ਤਕਂ ਦੋਮਨਸ੍ਸ’’ਨ੍ਤਿ ਪਰਿਚ੍ਛਿਨ੍ਦਿਤ੍ਵਾ ਵਤ੍ਤੁਂ ਨ ਸਕ੍ਕਾ. ਤਂ ਸਬ੍ਬਮ੍ਪਿ ਵਿਕਾਲਚਾਰਿਮ੍ਹਿ ਪੁਗ੍ਗਲੇ ਆਹਰਿਤਬ੍ਬਂ ਤਸ੍ਸ ਉਪਰਿ ਪਕ੍ਖਿਪਿਤਬ੍ਬਂ ਹੋਤਿ. ਕਥਂ? ਅਞ੍ਞਸ੍ਮਿਂ ਪੁਗ੍ਗਲੇ ਤਥਾਰੂਪੇ ਆਸਙ੍ਕਿਤਬ੍ਬੇ ਅਸਤਿ. ਇਤੀਤਿ ਏਵਂ. ਸੋਤਿ ਵਿਕਾਲਚਾਰੀ. ਪੁਰਕ੍ਖਤੋ ਪੁਰਤੋ ਅਤ੍ਤਨੋ ਉਪਰਿ ਆਸਙ੍ਕਨ੍ਤੇ ਕਤ੍ਵਾ ਚਰਤਿ.
੨੫੦. ਨਟਨਾਟਕਾਦਿਨਚ੍ਚਨ੍ਤਿ ਨਟੇਹਿ ਨਾਟਕੇਹਿ ਨਚ੍ਚਿਤਬ੍ਬਨਾਟਕਾਦਿਨਚ੍ਚਵਿਧਿ. ਆਦਿ-ਸਦ੍ਦੇਨ ਅਵਸਿਟ੍ਠਂ ਸਬ੍ਬਂ ਸਙ੍ਗਣ੍ਹਾਤਿ. ‘‘ਤਤ੍ਥ ਗਨ੍ਤਬ੍ਬਂ ਹੋਤੀ’’ਤਿ ਵਤ੍ਵਾ ਤਤ੍ਥਸ੍ਸ ਗਮਨੇਨ ਯਥਾ ਅਨੁਪ੍ਪਨ੍ਨਾਨਂ ਭੋਗਾਨਂ ਅਨੁਪ੍ਪਾਦੋ, ਉਪ੍ਪਨ੍ਨਾਨਞ੍ਚ ਵਿਨਾਸੋ ਹੋਤਿ, ਤਂ ਦਸ੍ਸੇਤੁਂ ‘‘ਤਸ੍ਸਾ’’ਤਿਆਦਿ ਵੁਤ੍ਤਂ. ਗੀਤਨ੍ਤਿ ਸਰਗਤਂ, ਪਕਰਣਗਤਂ, ਤਾਲ਼ਗਤਂ, ਅਪਧਾਨਗਤਨ੍ਤਿ ਗਨ੍ਧਬ੍ਬਸਤ੍ਥਵਿਹਿਤਂ ਅਞ੍ਞਮ੍ਪਿ ਸਬ੍ਬਂ ਗੀਤਂ ਵੇਦਿਤਬ੍ਬਂ. ਵਾਦਿਤਨ੍ਤਿ ਵੀਣਾਵੇਣੁਮੁਦਿਙ੍ਗਾਦਿਵਾਦਨਂ. ਅਕ੍ਖਾਨਨ੍ਤਿ ਭਾਰਤਯੁਦ੍ਧਸੀਤਾਹਰਣਾਦਿਅਕ੍ਖਾਨਂ. ਪਾਣਿਸ੍ਸਰਨ੍ਤਿ ਕਂਸਤਾਲ਼ਂ, ‘‘ਪਾਣਿਤਾਲ਼’’ਨ੍ਤਿਪਿ ਵਦਨ੍ਤਿ. ਕੁਮ੍ਭਥੂਨਨ੍ਤਿ ਚਤੁਰਸ੍ਸਅਮ੍ਬਣਕਤਾਲ਼ਂ. ‘‘ਕੁਟਭੇਰਿਸਦ੍ਦੋ’’ਤਿ ਕੇਚਿ. ‘‘ਏਸੇਵ ਨਯੋ’’ਤਿ ਇਮਿਨਾ ‘‘ਕਸ੍ਮਿਂ ਠਾਨੇ’’ਤਿਆਦਿਨਾ ਨਚ੍ਚੇ ਵੁਤ੍ਤਮਤ੍ਥਂ ਗੀਤਾਦੀਸੁ ਅਤਿਦਿਸਤਿ.
੨੫੧. ਜਯਨ੍ਤਿ ਜੂਤਂ ਜਿਨਨ੍ਤੋ. ਵੇਰਨ੍ਤਿ ਜਿਤੇਨ ਕੀਲ਼ਕਪੁਰਿਸੇਨ ਜਯਨਿਮਿਤ੍ਤਂ ਅਤ੍ਤਨੋ ਉਪਰਿ ਵੇਰਂ ਵਿਰੋਧਂ ਪਸਵਤਿ ਉਪ੍ਪਾਦੇਤਿ. ਤਞ੍ਹਿਸ੍ਸ ਵੇਰਪਸਵਨਂ ਦਸ੍ਸੇਤੁਂ ‘‘ਜਿਤਂ ਮਯਾ’’ਤਿਆਦਿ ਵੁਤ੍ਤਂ. ਜਿਨੋਤਿ ਜੂਤਪਰਾਜਯਾਪਨ੍ਨਾਯ ਧਨਜਾਨਿਯਾ ਜਿਨੋ. ਤੇਨਾਹ ‘‘ਅਞ੍ਞੇਨ ਜਿਤੋ ਸਮਾਨੋ’’ਤਿਆਦਿ. ਵਿਤ੍ਤਂ ਅਨੁਸੋਚਤੀਤਿ ਤਂ ਜਿਨਂ ਵਿਤ੍ਤਂ ਉਦ੍ਦਿਸ੍ਸ ਅਨੁਤ੍ਥੁਨਤਿ. ਵਿਨਿਚ੍ਛਯਟ੍ਠਾਨੇਤਿ ਯਸ੍ਮਿਂ ਕਿਸ੍ਮਿਞ੍ਚਿ ਅਟ੍ਟਵਿਨਿਚ੍ਛਯਟ੍ਠਾਨੇ. ਸਕ੍ਖਿਪੁਟ੍ਠਸ੍ਸਾਤਿ ਸਕ੍ਖਿਭਾਵੇਨ ਪੁਟ੍ਠਸ੍ਸ. ਅਕ੍ਖਸੋਣ੍ਡੋਤਿ ਅਕ੍ਖਧੁਤ੍ਤੋ. ਜੂਤਕਰੋਤਿ ਜੂਤਪਮਾਦਟ੍ਠਾਨਾਨੁਯੁਤ੍ਤੋ. ਤ੍ਵਮ੍ਪਿ ਨਾਮ ਕੁਲਪੁਤ੍ਤੋਤਿ ਕੁਲਪੁਤ੍ਤੋ ਨਾਮ ਤ੍ਵਂ, ਨ ਮਯਂ ਤਯਿ ਕੋਲਪੁਤ੍ਤਿਯਂ ਇਦਾਨਿ ਪਸ੍ਸਾਮਾਤਿ ਅਧਿਪ੍ਪਾਯੋ. ਛਿਨ੍ਨਭਿਨ੍ਨਕੋਤਿ ਛਿਨ੍ਨਭਿਨ੍ਨਹਿਰੋਤ੍ਤਪ੍ਪੋ, ਅਹਿਰਿਕੋ ਅਨੋਤ੍ਤਪ੍ਪੀਤਿ ਅਤ੍ਥੋ. ਤਸ੍ਸ ਕਾਰਣਾਤਿ ਤਸ੍ਸ ਅਤ੍ਥਾਯ.
ਅਨਿਚ੍ਛਿਤੋਤਿ ਨ ਇਚ੍ਛਿਤੋ. ਪੋਸਿਤਬ੍ਬਾ ਭਵਿਸ੍ਸਤਿ ਜੂਤਪਰਾਜਯੇਨ ਸਬ੍ਬਕਾਲਂ ਰਿਤ੍ਤਤੁਚ੍ਛਭਾਵਤੋ.
ਪਾਪਮਿਤ੍ਤਤਾਯ ਛਆਦੀਨਵਾਦਿਵਣ੍ਣਨਾ
੨੫੨. ਅਕ੍ਖਧੁਤ੍ਤਾਤਿ ਅਕ੍ਖੇਸੁ ਧੁਤ੍ਤਾ, ਅਕ੍ਖਨਿਮਿਤ੍ਤਂ ਅਤ੍ਥਵਿਨਾਸਕਾ. ਇਤ੍ਥਿਸੋਣ੍ਡਾਤਿ ਇਤ੍ਥੀਸੁ ਸੋਣ੍ਡਾ, ਇਤ੍ਥਿਸਮ੍ਭੋਗਨਿਮਿਤ੍ਤਂ ਆਤਪ੍ਪਨਕਾ. ਤਥਾ ਭਤ੍ਤਸੋਣ੍ਡਾਦਯੋ ਵੇਦਿਤਬ੍ਬਾ. ਪਿਪਾਸਾਤਿ ਉਪਰੂਪਰਿ ਸੁਰਾਪਿਪਾਸਾ. ਤੇਨਾਹ ‘‘ਪਾਨਸੋਣ੍ਡਾ’’ਤਿ. ਨੇਕਤਿਕਾਦਯੋ ਹੇਟ੍ਠਾ ਵੁਤ੍ਤਾ ਏਵ. ਮੇਤ੍ਤਿਉਪ੍ਪਤ੍ਤਿਟ੍ਠਾਨਤਾਯ ਮਿਤ੍ਤਾ ਹੋਨ੍ਤਿ. ਤਸ੍ਮਾਤਿ ਪਾਪਮਿਤ੍ਤਤਾਯ.
੨੫੩. ਕਮ੍ਮਨ੍ਤਨ੍ਤਿ ਕਮ੍ਮਂ, ਯਥਾ ਸੁਤ੍ਤਂਯੇਵ ਸੁਤ੍ਤਨ੍ਤੋ, ਏਵਂ ਕਮ੍ਮਂਯੇਵ ਕਮ੍ਮਨ੍ਤੋ, ਤਂ ਕਾਤੁਂ ਗਚ੍ਛਾਮਾਤਿ ਵੁਤ੍ਤੋ. ਕਮ੍ਮਂ ਵਾ ਅਨ੍ਤੋ ਨਿਟ੍ਠਾਨਂ ਗਚ੍ਛਤਿ ਏਤ੍ਥਾਤਿ ਕਮ੍ਮਨ੍ਤੋ, ਕਮ੍ਮਕਰਣਟ੍ਠਾਨਂ, ਤਂ ਗਚ੍ਛਾਮਾਤਿ ਵੁਤ੍ਤੋ.
ਪਨ੍ਨਸਖਾਤਿ ਸੁਰਂ ਪਾਤੁਂ ਪਨ੍ਨੇ ਪਟਿਪਜ੍ਜਨ੍ਤੇ ਏਵ ਸਖਾਤਿ ਪਨ੍ਨਸਖਾ. ਤੇਨਾਹ ‘‘ਅਯਮੇਵਤ੍ਥੋ’’ਤਿ. ‘‘ਸਮ੍ਮਿਯਸਮ੍ਮਿਯੋ’’ਤਿ ਵਚਨਮੇਤ੍ਥ ਅਤ੍ਥੀਤਿ ਸਮ੍ਮਿਯਸਮ੍ਮਿਯੋ. ਤੇਨਾਹ ‘‘ਸਮ੍ਮਸਮ੍ਮਾਤਿ ਵਦਨ੍ਤੋ’’ਤਿ. ਸਹਾਯੋ ਹੋਤੀਤਿ ਸਹਾਯੋ ਵਿਯ ਹੋਤਿ. ਓਤਾਰਮੇਵ ਗਵੇਸਤੀਤਿ ਰਨ੍ਧਮੇਵ ਪਰਿਯੇਸਤਿ ਅਨਤ੍ਥਮਸ੍ਸ ਕਾਤੁਕਾਮੋ. ਵੇਰਪ੍ਪਸਵੋਤਿ ਪਰੇਹਿ ਅਤ੍ਤਨਿ ਵੇਰਸ੍ਸ ਪਸਵਨਂ ਅਨੁਪਵਤ੍ਤਨਂ. ਤੇਨਾਹ ‘‘ਵੇਰਬਹੁਲਤਾ’’ਤਿ. ਪਰੇਸਂ ਕਰਿਯਮਾਨੋ ਅਨਤ੍ਥੋ ਏਤ੍ਥ ਅਤ੍ਥੀਤਿ ਅਨਤ੍ਥੋ, ਤਬ੍ਭਾਵੋ ਅਨਤ੍ਥਤਾਤਿ ਆਹ ‘‘ਅਨਤ੍ਥਕਾਰਿਤਾ’’ਤਿ. ਯੋ ਹਿ ਪਰੇਸਂ ਅਨਤ੍ਥਂ ਕਰੋਤਿ, ਸੋ ਅਤ੍ਥਤੋ ਅਤ੍ਤਨੋ ਅਨਤ੍ਥਕਾਰੋ ਨਾਮ, ਤਸ੍ਮਾ ਅਨਤ੍ਥਤਾਤਿ ਉਭਯਾਨਤ੍ਥਕਾਰਿਤਾ. ਅਰਿਯੋ ਵੁਚ੍ਚਤਿ ਸਤ੍ਤੋ, ਕੁਚ੍ਛਿਤੋ ਅਰਿਯੋ ਕਦਰਿਯੋ. ਯਸ੍ਸ ਧਮ੍ਮਸ੍ਸ ਵਸੇਨ ਸੋ ‘‘ਕਦਰਿਯੋ’’ਤਿ ਵੁਚ੍ਚਤਿ, ਸੋ ਧਮ੍ਮੋ ਕਦਰਿਯਤਾ, ਮਚ੍ਛਰਿਯਂ. ਤਂ ਪਨ ਦੁਬ੍ਬਿਸਜ੍ਜਨੀਯਭਾਵੇ ਠਿਤਂ ਸਨ੍ਧਾਯਾਹ ‘‘ਸੁਟ੍ਠੁ ਕਦਰਿਯਤਾ ਥਦ੍ਧਮਚ੍ਛਰਿਯਭਾ’’ਵੋਤਿ. ਅਵਿਪਣ੍ਣਸਭਾਵਤੋ ਉਟ੍ਠਾਤੁਂ ਅਸਕ੍ਕੋਨ੍ਤੋ ਚ ਇਣਂ ਗਣ੍ਹਨ੍ਤੋ ਸਂਸੀਦਨ੍ਤੋਵ ਇਣਂ ਵਿਗਾਹਤਿ ਨਾਮ. ਸੂਰਿਯੇ ਅਨੁਗ੍ਗਤੇ ਏਵ ਕਮ੍ਮਨ੍ਤੇ ਅਨਾਰਭਨ੍ਤੋ ਰਤ੍ਤਿਂ ਅਨੁਟ੍ਠਾਨਸੀਲੋ.
ਅਤ੍ਥਾਤਿ ਧਨਾਨਿ. ਅਤਿਕ੍ਕਮਨ੍ਤੀਤਿ ਅਪਗਚ੍ਛਨ੍ਤਿ. ਅਥ ਵਾ ਅਤ੍ਥਾਤਿ ਕਿਚ੍ਚਾਨਿ. ਅਤਿਕ੍ਕਮਨ੍ਤੀਤਿ ਅਤਿਕ੍ਕਨ੍ਤਕਾਲਾਨਿ ਹੋਨ੍ਤਿ, ਤੇਸਂ ਅਤਿਕ੍ਕਮੋਪਿ ਅਤ੍ਥਤੋ ਧਨਾਨਮੇਵ ਅਤਿਕ੍ਕਮੋ. ਇਮਿਨਾ ਕਥਾਮਗ੍ਗੇਨਾਤਿ ਇਮਿਨਾ ‘‘ਯਤੋ ਖੋ ਗਹਪਤਿਪੁਤ੍ਤਾ’’ਤਿਆਦਿ (ਦੀ. ਨਿ. ੩.੨੪੪) ਨਯਪ੍ਪਵਤ੍ਤੇਨ ਕਥਾਸਙ੍ਖਾਤੇਨ ਹਿਤਾਧਿਗਮੂਪਾਯੇਨ. ਏਤ੍ਤਕਂ ਕਮ੍ਮਨ੍ਤਿ ਚਤ੍ਤਾਰੋ ਕਮ੍ਮਕਿਲੇਸਾ, ਚਤ੍ਤਾਰਿ ਅਗਤਿਗਮਨਾਨਿ, ਛ ਭੋਗਾਨਂ ਅਪਾਯਮੁਖਾਨੀਤਿ ਏਵਂ ਵੁਤ੍ਤਂ ਚੁਦ੍ਦਸਵਿਧਂ ਪਾਪਕਮ੍ਮਂ.
ਮਿਤ੍ਤਪਤਿਰੂਪਕਵਣ੍ਣਨਾ
੨੫੪. ਅਨਤ੍ਥੋਤਿ ‘‘ਭੋਗਜਾਨਿ, ਆਯਸਕ੍ਯਂ, ਪਰਿਸਮਜ੍ਝੇ ਮਙ੍ਕੁਭਾਵੋ, ਸਮ੍ਮੂਲ਼੍ਹਮਰਣ’’ਨ੍ਤਿ ਏਵਂ ਆਦਿਕੋ ਦਿਟ੍ਠਧਮ੍ਮਿਕੋ ‘‘ਦੁਗ੍ਗਤਿਪਰਿਕਿਲੇਸੋ, ਸੁਗਤਿਯਞ੍ਚ ਅਪ੍ਪਾਯੁਕਤਾ, ਬਹ੍ਵਾਬਾਧਤਾ, ਅਤਿਦਲਿਦ੍ਦਤਾ, ਅਪ੍ਪਨ੍ਨਪਾਨਤਾ’’ਤਿ ਏਵਂ ਆਦਿਕੋ ਚ ਅਨਤ੍ਥੋ ਉਪ੍ਪਜ੍ਜਤਿ. ਯਾਨਿ ਕਾਨਿਚਿ ਭਯਾਨੀਤਿ ਅਤ੍ਤਾਨੁਵਾਦਭਯਪਰਾਨੁਵਾਦਭਯਦਣ੍ਡਭਯਾਦੀਨਿ ਲੋਕੇ ਲਬ੍ਭਮਾਨਾਨਿ ਯਾਨਿ ਕਾਨਿਚਿ ਭਯਾਨਿ. ਉਪਦ੍ਦਵਾਤਿ ਅਨ੍ਤਰਾਯਾ. ਉਪਸਗ੍ਗਾਤਿ ਸਰੀਰੇਨ ਸਂਸਟ੍ਠਾਨਿ ਵਿਯ ਉਪਰੂਪਰਿ ਉਪ੍ਪਜ੍ਜਨਕਾਨਿ ਬ੍ਯਸਨਾਨਿ. ਅਞ੍ਞਦਤ੍ਥੂਤਿ ਏਕਨ੍ਤੇਨਾਤਿ ਏਤਸ੍ਮਿਂ ਅਤ੍ਥੇ ਨਿਪਾਤੋ ‘‘ਅਞ੍ਞਦਤ੍ਥੁਦਸੋ’’ਤਿਆਦੀਸੁ (ਦੀ. ਨਿ. ੧.੪੨) ਵਿਯਾਤਿ ਵੁਤ੍ਤਂ ‘‘ਏਕਂਸੇਨਾ’’ਤਿ. ਯਂ ਕਿਞ੍ਚਿ ਗਹਣਯੋਗ੍ਯਂ ਹਰਤਿਯੇਵ ਗਣ੍ਹਾਤਿਯੇਵ. ਵਾਚਾ ਏਵ ਪਰਮਾ ਏਤਸ੍ਸ ਕਮ੍ਮਨ੍ਤਿ ਵਚੀਪਰਮੋ. ਤੇਨਾਹ ‘‘ਵਚਨਮਤ੍ਤੇਨੇਵਾ’’ਤਿਆਦਿ. ਅਨੁਪ੍ਪਿਯਨ੍ਤਿ ਤਕ੍ਕਨਂ, ਯਂ ਵਾ ‘‘ਰੁਚੀ’’ਤਿ ਵੁਚ੍ਚਤਿ ਯੇਹਿ ਸੁਰਾਪਾਨਾਦੀਹਿ ਭੋਗਾ ਅਪੇਨ੍ਤਿ ਵਿਗਚ੍ਛਨ੍ਤਿ, ਤੇਸੁ ਤੇਸਂ ਅਪਾਯੇਸੁ ਬ੍ਯਸਨਹੇਤੂਸੁ ਸਹਾਯੋ ਹੋਤਿ.
੨੫੫. ਹਾਰਕੋਯੇਵ ਹੋਤਿ, ਨ ਦਾਯਕੋ, ਤਮਸ੍ਸ ਏਕਂਸਤੋ ਹਾਰਕਭਾਵਂ ਦਸ੍ਸੇਤੁਂ ‘‘ਸਹਾਯਸ੍ਸਾ’’ਤਿਆਦਿ ਵੁਤ੍ਤਂ. ਯਂ ਕਿਞ੍ਚਿ ਅਪ੍ਪਕਨ੍ਤਿ ਪੁਪ੍ਫਫਲਾਦਿ ਯਂ ਕਿਞ੍ਚਿ ਪਰਿਤ੍ਤਂ ਵਤ੍ਥੁਂ ਦਤ੍ਵਾ, ਬਹੁਂ ਪਤ੍ਥੇਤਿ ਬਹੁਂ ਮਹਗ੍ਘਂ ਵਤ੍ਥਯੁਗਾਦਿਂ ਪਚ੍ਚਾਸੀਸਤਿ. ਦਾਸੋ ਵਿਯ ਹੁਤ੍ਵਾ ਮਿਤ੍ਤਸ੍ਸ ਤਂ ਤਂ ਕਿਚ੍ਚਂ ਕਰੋਨ੍ਤੋ ਕਥਂ ਅਮਿਤ੍ਤੋ ਨਾਮ ਜਾਤੋਤਿ ਆਹ ‘‘ਅਯ’’ਨ੍ਤਿਆਦਿ. ਯਸ੍ਸ ਕਿਚ੍ਚਂ ਕਰੋਤਿ ਅਨਤ੍ਥਪਰਿਹਾਰਤ੍ਥਂ, ਅਤ੍ਤਨੋ ਮਿਤ੍ਤਭਾਵਦਸ੍ਸਨਤ੍ਥਞ੍ਚ, ਤਂ ਸੇਵਤਿ. ਅਤ੍ਥਕਾਰਣਾਤਿ ਵਡ੍ਢਿਨਿਮਿਤ੍ਤਂ, ਅਯਮੇਤੇਸਂ ਭੇਦੋ.
੨੫੬. ਪਰੇਤਿ ਪਰਦਿਵਸੇ. ਨ ਆਗਤੋ ਸੀਤਿ ਆਗਤੋ ਨਾਹੋਸਿ. ਖੀਣਨ੍ਤਿ ਤਾਦਿਸਸ੍ਸ, ਅਸੁਕਸ੍ਸ ਚ ਦਿਨ੍ਨਤ੍ਤਾ. ਸਸ੍ਸਸਙ੍ਗਹੇਤਿ ਸਸ੍ਸਤੋ ਕਾਤਬ੍ਬਧਞ੍ਞਸਙ੍ਗਹੇ ਕਤੇ.
੨੫੭. ‘‘ਦਾਨਾਦੀਸੁ ਯਂ ਕਿਞ੍ਚਿ ਕਰੋਮਾ’’ਤਿ ਵੁਤ੍ਤੇ ‘‘ਸਾਧੁ ਸਮ੍ਮ ਕਰੋਮਾ’’ਤਿ ਅਨੁਜਾਨਾਤੀਤਿ ਇਮਮਤ੍ਥਂ ‘‘ਕਲ੍ਯਾਣੇਪਿ ਏਸੇਵ ਨਯੋ’’ਤਿ ਅਤਿਦਿਸਤਿ. ਨਨੁ ਏਵਂ ਅਨੁਜਾਨਨ੍ਤੋ ਅਯਂ ਮਿਤ੍ਤੋ ਏਵ, ਨ ਅਮਿਤ੍ਤੋ ਮਿਤ੍ਤਪਤਿਰੂਪਕੋਤਿ? ਅਨੁਪ੍ਪਿਯਭਾਣੀਦਸ੍ਸਨਮਤ੍ਤਮੇਤਂ. ਸਹਾਯੇਨ ਵਾ ਦੇਸਕਾਲਂ, ਤਸ੍ਮਿਂ ਵਾ ਕਤੇ ਉਪ੍ਪਜ੍ਜਨਕਵਿਰੋਧਾਦਿਂ ਅਸਲ੍ਲਕ੍ਖੇਤ੍ਵਾ ‘‘ਕਰੋਮਾ’’ਤਿ ਵੁਤ੍ਤੇ ਯੋ ਤਂ ਜਾਨਨ੍ਤੋ ਏਵ ‘‘ਸਾਧੁ ਸਮ੍ਮ ਕਰੋਮਾ’’ਤਿ ਅਨੁਪ੍ਪਿਯਂ ਭਣਤਿ, ਤਂ ਸਨ੍ਧਾਯ ਵੁਤ੍ਤਂ ‘‘ਕਲ੍ਯਾਣਂ ਪਿਸ੍ਸ ਅਨੁਜਾਨਾਤੀ’’ਤਿ. ਤੇਨ ਵੁਤ੍ਤਂ ‘‘ਕਲ੍ਯਾਣੇਪਿ ਏਸੇਵ ਨਯੋ’’ਤਿ.
੨੫੯. ਮਿਤ੍ਤਪਤਿਰੂਪਕਾ ਏਤੇ ਮਿਤ੍ਤਾਤਿ ਏਵਂ ਜਾਨਿਤ੍ਵਾ.
ਸੁਹਦਮਿਤ੍ਤਵਣ੍ਣਨਾ
੨੬੦. ਸੁਨ੍ਦਰਹਦਯਾਤਿ ਪੇਮਸ੍ਸ ਅਤ੍ਥਿਵਸੇਨ ਭਦ੍ਦਚਿਤ੍ਤਾ.
੨੬੧. ਪਮਤ੍ਤਂ ਰਕ੍ਖਤੀਤਿ ਏਤ੍ਥ ਪਮਾਦਵਸੇਨ ਕਿਞ੍ਚਿ ਅਯੁਤ੍ਤੇ ਕਤੇ ਤਾਦਿਸੇ ਕਾਲੇ ਰਕ੍ਖਣਂ ‘‘ਭੀਤਸ੍ਸ ਸਰਣਂ ਹੋਤੀ’’ਤਿ ਇਮਿਨਾਵ ਤਂ ਗਹਿਤਨ੍ਤਿ ਤਤੋ ਅਞ੍ਞਮੇਵ ਪਮਤ੍ਤਸ੍ਸ ਰਕ੍ਖਣਵਿਧਿਂ ਦਸ੍ਸੇਤੁਂ ‘‘ਮਜ੍ਜਂ ਪਿਵਿਤ੍ਵਾ’’ਤਿਆਦਿ ਵੁਤ੍ਤਂ. ਗੇਹੇ ਆਰਕ੍ਖਂ ਅਸਂਵਿਹਿਤਸ੍ਸ ਬਹਿਗਮਨਮ੍ਪਿ ਪਮਾਦਪਕ੍ਖਿਕਮੇਵਾਤਿ ‘‘ਸਹਾਯੋ ਬਹਿਗਤੋ ਵਾ ਹੋਤੀ’’ਤਿ ਵੁਤ੍ਤਂ. ਭਯਂ ਹਰਨ੍ਤੋਤਿ ਭਯਂ ਪਟਿਬਾਹਨ੍ਤੋ. ਭੋਗਹੇਤੁਤਾਯ ਫਲੂਪਚਾਰੇਨ ਧਨਂ ‘‘ਭੋਗ’’ਨ੍ਤਿ ਵਦਤਿ. ਕਿਚ੍ਚਕਰਣੀਯੇਤਿ ਖੁਦ੍ਦਕੇ, ਮਹਨ੍ਤੇ ਚ ਕਾਤਬ੍ਬੇ ਉਪ੍ਪਨ੍ਨੇ.
੨੬੨. ਨਿਗੂਹਿਤੁਂ ਯੁਤ੍ਤਕਥਨ੍ਤਿ ਨਿਗੂਹਿਤੁਂ ਛਾਦੇਤੁਂ ਯੁਤ੍ਤਕਥਂ, ਨਿਗੂਹਿਤੁਂ ਵਾ ਯੁਤ੍ਤਾ ਕਥਾ ਏਤਸ੍ਸਾਤਿ ਨਿਗੂਹਿਤੁਂ ਯੁਤ੍ਤਕਥਂ, ਅਤ੍ਤਨੋ ਕਮ੍ਮਂ. ਰਕ੍ਖਤੀਤਿ ਅਨਾਵਿਕਰੋਨ੍ਤੋ ਛਾਦੇਤਿ. ਜੀਵਿਤਮ੍ਪੀਤਿ ਪਿ-ਸਦ੍ਦੇਨ ਕਿਮਙ੍ਗਂ ਪਨ ਅਞ੍ਞਂ ਪਰਿਗ੍ਗਹਿਤਵਤ੍ਥੁਨ੍ਤਿ ਦਸ੍ਸੇਤਿ.
੨੬੩. ਪਸ੍ਸਨ੍ਤੇਸੁ ਪਸ੍ਸਨ੍ਤੇਸੂਤਿ ਆਮੇਡਿਤਵਚਨੇਨ ਨਿਵਾਰਿਯਮਾਨਸ੍ਸ ਪਾਪਸ੍ਸ ਪੁਨਪ੍ਪੁਨਂ ਕਰਣਂ ਦੀਪੇਤਿ. ਪੁਨਪ੍ਪੁਨਂ ਕਰੋਨ੍ਤੋ ਹਿ ਪਾਪਤੋ ਵਿਸੇਸੇਨ ਨਿਵਾਰੇਤਬ੍ਬੋ ਹੋਤਿ. ਸਰਣੇਸੂਤਿ ਸਰਣੇਸੁ ਵਤ੍ਤਸ੍ਸੁ ਅਭਿਨ੍ਨਾਨਿ ਕਤ੍ਵਾ ਪਟਿਪਜ੍ਜ, ਸਰਣੇਸੁ ਵਾ ਉਪਾਸਕਭਾਵੇਨ ਵਤ੍ਤਸ੍ਸੁ. ਨਿਪੁਣਨ੍ਤਿ ਸਣ੍ਹਂ. ਕਾਰਣਨ੍ਤਿ ਕਮ੍ਮਸ੍ਸਕਤਾਦਿਭੇਦਯੁਤ੍ਤਂ. ਇਦਂ ਕਮ੍ਮਨ੍ਤਿ ਇਮਂ ਦਾਨਾਦਿਭੇਦਂ ਕੁਸਲਕਮ੍ਮਂ. ‘‘ਕਮ੍ਮ’’ਨ੍ਤਿ ਸਾਧਾਰਣਤੋ ਵੁਤ੍ਤਸ੍ਸਾਪਿ ਤਸ੍ਸ ‘‘ਸਗ੍ਗੇ ਨਿਬ੍ਬਤ੍ਤਨ੍ਤੀ’’ਤਿ ਪਦਨ੍ਤਰਸਨ੍ਨਿਧਾਨੇਨ ਸਦ੍ਧਾਹਿਰੋਤ੍ਤਪ੍ਪਾਲੋਭਾਦਿਗੁਣਧਮ੍ਮਸਮਙ੍ਗਿਤਾ ਵਿਯ ਕੁਸਲਭਾਵੋ ਜੋਤਿਤੋ ਹੋਤਿ. ਸਦ੍ਧਾਦਯੋ ਹਿ ਧਮ੍ਮਾ ਸਗ੍ਗਗਾਮਿਮਗ੍ਗੋ. ਯਥਾਹ –
‘‘ਸਦ੍ਧਾ ਹਿਰਿਯਂ ਕੁਸਲਞ੍ਚ ਦਾਨਂ,
ਧਮ੍ਮਾ ਏਤੇ ਸਪ੍ਪੁਰਿਸਾਨੁਯਾਤਾ;
ਏਤਞ੍ਹਿ ਮਗ੍ਗਂ ਦਿਵਿਯਂ ਵਦਨ੍ਤਿ,
ਏਤੇਨ ਹਿ ਗਚ੍ਛਤਿ ਦੇਵਲੋਕ’’ਨ੍ਤਿ. (ਅ. ਨਿ. ੮.੩੨);
੨੬੪. ਭਵਨਂ ਸਮ੍ਪਤ੍ਤਿਵਡ੍ਢਨਂ ਭਵੋਤਿ ਅਤ੍ਥੋ, ਤਪ੍ਪਟਿਕ੍ਖੇਪੇਨ ਅਭਵੋਤਿ ਆਹ ‘‘ਅਭਵੇਨ ਅਵੁਡ੍ਢਿਯਾ’’ਤਿ. ਪਾਰਿਜੁਞ੍ਞਨ੍ਤਿ ਜਾਨਿ. ਅਨਤ੍ਤਮਨੋ ਹੋਤੀਤਿ ਅਤ੍ਤਮਨੋ ਨ ਹੋਤਿ ਅਨੁਕਮ੍ਪਕਭਾਵਤੋ. ਅਞ੍ਞਦਤ੍ਥੁ ਤਂ ਅਭਵਂ ਅਤ੍ਤਨਿ ਆਪਤਿਤਂ ਵਿਯ ਮਞ੍ਞਤਿ. ਇਦਾਨਿ ਤਂ ਭਵਂ ਸਰੂਪਤੋ ਦਸ੍ਸੇਤੁਂ ‘‘ਤਥਾਰੂਪ’’ਨ੍ਤਿਆਦਿ ਵੁਤ੍ਤਂ. ਵਿਰੂਪੋਤਿ ਬੀਭਚ੍ਛੋ. ਨ ਪਾਸਾਦਿਕੋਤਿ ਤਸ੍ਸੇਵ ਵੇਵਚਨਂ. ਸੁਜਾਤੋਤਿ ਸੁਨ੍ਦਰਜਾਤਿਕੋ ਜਾਤਿਸਮ੍ਪਨ੍ਨੋ.
੨੬੫. ਜਲਨ੍ਤਿ ਜਲਨ੍ਤੋ. ਅਗ੍ਗੀਵਾਤਿ ਅਗ੍ਗਿਕ੍ਖਨ੍ਧੋ ਵਿਯ. ਭਾਸਤੀਤਿ ਵਿਰੋਚਤਿ. ਯਸ੍ਮਾਸ੍ਸ ਭਗਵਤਾ ਸਵਿਸੇਸਂ ਵਿਰੋਚਨਂ ਲੋਕੇ ਪਾਕਟਭਾਵਞ੍ਚ ਦਸ੍ਸੇਤੁਂ ‘‘ਜਲਂ ਅਗ੍ਗੀਵ ਭਾਸਤੀ’’ਤਿ ਵੁਤ੍ਤਂ, ਤਸ੍ਮਾ ਯਦਾ ਅਗ੍ਗਿ ਸਵਿਸੇਸਂ ਵਿਰੋਚਤਿ, ਯਤ੍ਥ ਚ ਠਿਤੋ ਦੂਰੇ ਠਿਤਾਨਮ੍ਪਿ ਪਞ੍ਞਾਯਤਿ, ਤਂ ਦਸ੍ਸਨਾਦਿਵਸੇਨ ਤਮਤ੍ਥਂ ਵਿਭਾਵੇਤੁਂ ‘‘ਰਤ੍ਤਿ’’ਨ੍ਤਿਆਦਿ ਵੁਤ੍ਤਂ.
‘‘ਭਮਰਸ੍ਸੇਵ ਇਰੀਯਤੋ’’ਤਿ ਏਤੇਨੇਵਸ੍ਸ ਭੋਗਸਂਹਰਣਂ ਧਮ੍ਮਿਕਂ ਞਾਯੋਪੇਤਨ੍ਤਿ ਦਸ੍ਸੇਨ੍ਤੋ ‘‘ਅਤ੍ਤਾਨਮ੍ਪੀ’’ਤਿਆਦਿਮਾਹ. ਰਾਸਿਂ ਕਰੋਨ੍ਤਸ੍ਸਾਤਿ ਯਥਾਸ੍ਸ ਧਨਧਞ੍ਞਾਦਿਭੋਗਜਾਤਂ ਸਮ੍ਪਿਣ੍ਡਿਤਂ ਰਾਸਿਭੂਤਂ ਹੁਤ੍ਵਾ ਤਿਟ੍ਠਤਿ, ਏਵਂ ਇਰੀਯਤੋ ਆਯੂਹਨ੍ਤਸ੍ਸ ਚ. ਚਕ੍ਕਪ੍ਪਮਾਣਨ੍ਤਿ ਰਥਚਕ੍ਕਪ੍ਪਮਾਣਂ. ਨਿਚਯਨ੍ਤਿ ਵੁਡ੍ਢਿਂ ਪਰਿਵੁਡ੍ਢਿਂ. ‘‘ਭੋਗਾ ਸਨ੍ਨਿਚਯਂ ਯਨ੍ਤੀ’’ਤਿ ਕੇਚਿ ਪਠਨ੍ਤਿ.
ਸਮਾਹਤ੍ਵਾਤਿ ਸਂਹਰਿਤ੍ਵਾ. ਅਲਂ-ਸਦ੍ਦੋ ‘‘ਅਲਮੇਵ ਸਬ੍ਬਸਙ੍ਖਾਰੇਸੁ ਨਿਬ੍ਬਿਨ੍ਦਿਤੁਂ, ਅਲਂ ਵਿਰਜ੍ਜਿਤੁ’’ਨ੍ਤਿਆਦੀਸੁ (ਦੀ. ਨਿ. ੨.੨੭੨; ਸਂ. ਨਿ. ੨.੧੨੪, ੧੨੯, ੧੩੪, ੧੪੩) ਯੁਤ੍ਤਨ੍ਤਿ ਇਮਮਤ੍ਥਂ ਜੋਤੇਤਿ, ‘‘ਅਲਮਰਿਯਞਾਣਦਸ੍ਸਨਵਿਸੇਸ’’ਨ੍ਤਿਆਦੀਸੁ (ਮ. ਨਿ. ੧.੩੨੮) ਪਰਿਯਤ੍ਤਨ੍ਤਿ. ਯੋ ਵੇਠਿਤਤ੍ਤੋਤਿਆਦੀਸੁ (ਸੁ. ਨਿ. ੨੧੭) ਵਿਯ ਅਤ੍ਤ-ਸਦ੍ਦੋ ਸਭਾਵਪਰਿਯਾਯੋਤਿ ਤਂ ਸਬ੍ਬਂ ਦਸ੍ਸੇਨ੍ਤੋ ‘‘ਯੁਤ੍ਤਸਭਾਵੋ’’ਤਿਆਦਿਮਾਹ. ਸਣ੍ਠਪੇਤੁਨ੍ਤਿ ਸਮ੍ਮਾ ਠਪੇਤੁਂ, ਸਮ੍ਮਦੇਵ ਪਵਤ੍ਤੇਤੁਨ੍ਤਿ ਅਤ੍ਥੋ.
ਏਵਂ ਵਿਭਜਨ੍ਤੋਤਿ ਏਵਂ ਵੁਤ੍ਤਨਯੇਨ ਅਤ੍ਤਨੋ ਧਨਂ ਚਤੁਧਾ ਵਿਭਜਨ੍ਤੋ ਵਿਭਜਨਹੇਤੁ ਮਿਤ੍ਤਾਨਿ ਗਨ੍ਥਤਿ ਸੋਲ਼ਸ ਕਲ੍ਯਾਣਮਿਤ੍ਤਾਨਿ ਮੇਤ੍ਤਾਯ ਅਜੀਰਾਪਨੇਨ ਪਬਨ੍ਧਤਿ. ਤੇਨਾਹ ‘‘ਅਭੇਜ੍ਜਮਾਨਾਨਿ ਠਪੇਤੀ’’ਤਿ. ਕਥਂ ਪਨ ਵੁਤ੍ਤਨਯੇਨ ਚਤੁਧਾ ਭੋਗਾਨਂ ਵਿਭਜਨੇਨ ਮਿਤ੍ਤਾਨਿ ਗਨ੍ਥਤੀਤਿ ਆਹ ‘‘ਯਸ੍ਸ ਹੀ’’ਤਿਆਦਿ. ਤੇਨਾਹ ਭਗਵਾ ‘‘ਦਦਂ ਮਿਤ੍ਤਾਨਿ ਗਨ੍ਥਤੀ’’ਤਿ (ਸਂ. ਨਿ. ੧.੨੪੬). ਭੁਞ੍ਜੇਯ੍ਯਾਤਿ ਉਪਭੁਞ੍ਜੇਯ੍ਯ, ਉਪਯੁਞ੍ਜੇਯ੍ਯ ਚਾਤਿ ਅਤ੍ਥੋ. ਸਮਣਬ੍ਰਾਹ੍ਮਣਕਪਣਦ੍ਧਿਕਾਦੀਨਂ ਦਾਨਵਸੇਨ ਚੇਵ ਅਧਿਵਤ੍ਥਦੇਵਤਾਦੀਨਂ ਪੇਤਬਲਿਵਸੇਨ, ਨ੍ਹਾਪਿਤਾਦੀਨਂ ਵੇਤਨਵਸੇਨ ਚ ਵਿਨਿਯੋਗੋਪਿ ਉਪਯੋਗੋ ਏਵ. ਤਥਾ ਹਿ ਵਕ੍ਖਤਿ ‘‘ਇਮੇਸੁ ਪਨਾ’’ਤਿਆਦਿ ਆਯੋ ਨਾਮ ਹੇਟ੍ਠਿਮਨ੍ਤੇਨ ਵਯਤੋ ਚਤੁਗ੍ਗੁਣੋ ਇਚ੍ਛਿਤਬ੍ਬੋ, ਅਞ੍ਞਥਾ ਵਯੋ ਅਵਿਚ੍ਛੇਦਵਸੇਨ ਨ ਸਨ੍ਤਾਨੇਯ੍ਯ, ਨਿਧੇਯ੍ਯ, ਭਾਜੇਯ੍ਯ ਚ ਅਸਮ੍ਭਤੇਤਿ ਵੁਤ੍ਤਂ ‘‘ਦ੍ਵੀਹਿ ਕਮ੍ਮਂ ਪਯੋਜਯੇ’’ਤਿ. ਨਿਧੇਤ੍ਵਾਤਿ ਨਿਦਹਿਤ੍ਵਾ, ਭੂਮਿਗਤਂ ਕਤ੍ਵਾਤਿ ਅਤ੍ਥੋ. ਰਾਜਾਦਿਵਸੇਨਾਤਿ ਆਦਿ-ਸਦ੍ਦੇਨ ਅਗ੍ਗਿਉਦਕਚੋਰਦੁਬ੍ਭਿਕ੍ਖਾਦਿਕੇ ਸਙ੍ਗਣ੍ਹਾਤਿ. ਨ੍ਹਾਪਿਤਾਦੀਨਨ੍ਤਿ ਆਦਿ-ਸਦ੍ਦੇਨ ਕੁਲਾਲਰਜਕਾਦੀਨਂ ਸਙ੍ਗਹੋ.
ਛਦ੍ਦਿਸਾਪਟਿਚ੍ਛਾਦਨਕਣ੍ਡਵਣ੍ਣਨਾ
੨੬੬. ਚਤੂਹਿ ਕਾਰਣੇਹੀਤਿ ਨ ਛਨ੍ਦਗਮਨਾਦੀਹਿ ਚਤੂਹਿ ਕਾਰਣੇਹਿ. ਅਕੁਸਲਂ ਪਹਾਯਾਤਿ ‘‘ਚਤ੍ਤਾਰੋ ਕਮ੍ਮਕਿਲੇਸਾ’’ਤਿ ਵੁਤ੍ਤਂ ਅਕੁਸਲਞ੍ਚੇਵ ਅਗਤਿਗਮਨਾਕੁਸਲਞ੍ਚ ਪਜਹਿਤ੍ਵਾ. ਛਹਿ ਕਾਰਣੇਹੀਤਿ ਸੁਰਾਪਾਨਾਦੀਸੁ ਆਦੀਨਵਦਸ੍ਸਨਸਙ੍ਖਾਤੇਹਿ ਛਹਿ ਕਾਰਣੇਹਿ. ਸੁਰਾਪਾਨਾਨੁਯੋਗਾਦਿਭੇਦਂ ਛਬ੍ਬਿਧਂ ਭੋਗਾਨਂ ਅਪਾਯਮੁਖਂ ਵਿਨਾਸਮੁਖਂ ਵਜ੍ਜੇਤ੍ਵਾ. ਸੋਲ਼ਸ ਮਿਤ੍ਤਾਨੀਤਿ ਉਪਕਾਰਾਦਿਵਸੇਨ ਚਤ੍ਤਾਰੋ, ਪਮਤ੍ਤਰਕ੍ਖਣਾਦਿਕਿਚ੍ਚਵਿਸੇਸਵਸੇਨ ਪਚ੍ਚੇਕਂ ਚਤ੍ਤਾਰੋ ਚਤ੍ਤਾਰੋ ਕਤ੍ਵਾ ਸੋਲ਼ਸਵਿਧੇ ਕਲ੍ਯਾਣਮਿਤ੍ਤੇ ਸੇਵਨ੍ਤੋ ਭਜਨ੍ਤੋ. ਸਤ੍ਥਵਾਣਿਜ੍ਜਾਦਿਮਿਚ੍ਛਾਜੀਵਂ ਪਹਾਯ ਞਾਯੇਨੇਵ ਵਤ੍ਤਨਤੋ ਧਮ੍ਮਿਕੇਨ ਆਜੀਵੇਨ ਜੀਵਤਿ. ਨਮਸ੍ਸਿਤਬ੍ਬਾਤਿ ਉਪਕਾਰਵਸੇਨ, ਗੁਣਵਸੇਨ ਚ ਨਮਸ੍ਸਿਤਬ੍ਬਾ ਸਬ੍ਬਦਾ ਨਤੇਨ ਹੁਤ੍ਵਾ ਵਤ੍ਤਿਤਬ੍ਬਾ. ਦਿਸਾ-ਸਦ੍ਦਸ੍ਸ ਅਤ੍ਥੋ ਹੇਟ੍ਠਾ ਵੁਤ੍ਤੋ ਏਵ. ਆਗਮਨਭਯਨ੍ਤਿ ਤਤ੍ਥ ਸਮ੍ਮਾ ਅਪ੍ਪਟਿਪਤ੍ਤਿਯਾ, ਮਿਚ੍ਛਾਪਟਿਪਤ੍ਤਿਯਾ ਚ ਉਪ੍ਪਜ੍ਜਨਕਅਨਤ੍ਥੋ. ਸੋ ਹਿ ਭਾਯਨ੍ਤਿ ਏਤਸ੍ਮਾਤਿ ‘‘ਭਯ’’ਨ੍ਤਿ ਵੁਚ੍ਚਤਿ. ਯੇਨ ਕਾਰਣੇਨ ਮਾਤਾਪਿਤੁਆਦਯੋ ਪੁਰਤ੍ਥਿਮਾਦਿਭਾਵੇਨ ਅਪਦਿਟ੍ਠਾ, ਤਂ ਦਸ੍ਸੇਤੁਂ ‘‘ਪੁਬ੍ਬੁਪਕਾਰਿਤਾਯਾ’’ਤਿਆਦਿ ਵੁਤ੍ਤਂ, ਤੇਨ ਅਤ੍ਥਸਰਿਕ੍ਖਤਾਯ ਨੇਸਂ ਪੁਰਤ੍ਥਿਮਾਦਿਭਾਵੋਤਿ ਦਸ੍ਸੇਤਿ. ਤਥਾ ਹਿ ਮਾਤਾਪਿਤਰੋ ਪੁਤ੍ਤਾਨਂ ਪੁਰਤ੍ਥਿਮਭਾਵੇਨ ਤਾਵ ਉਪਕਾਰਿਭਾਵੇਨ ਦਿਸ੍ਸਨਤੋ, ਅਪਦਿਸ੍ਸਨਤੋ ਚ ਪੁਰਤ੍ਥਿਮਾ ਦਿਸਾ. ਆਚਰਿਯਾ ਅਨ੍ਤੇਵਾਸਿਕਸ੍ਸ ਦਕ੍ਖਿਣਭਾਵੇਨ, ਹਿਤਾਹਿਤਂ ਪਤਿਕੁਸਲਭਾਵੇਨ ਦਕ੍ਖਿਣਾਰਹਤਾਯ ਚ ਵੁਤ੍ਤਨਯੇਨ ਦਕ੍ਖਿਣਾ ਦਿਸਾ. ਇਮਿਨਾ ਨਯੇਨ ‘‘ਪਚ੍ਛਿਮਾ ਦਿਸਾ’’ਤਿਆਦੀਸੁ ਯਥਾਰਹਂ ਅਤ੍ਥੋ ਵੇਦਿਤਬ੍ਬੋ. ਘਰਾਵਾਸਸ੍ਸ ਦੁਕ੍ਖਬਹੁਲਤਾਯ ਤੇ ਤੇ ਚ ਕਿਚ੍ਚਵਿਸੇਸਾ ਯਥਾਉਪ੍ਪਤਿਤਦੁਕ੍ਖਨਿਤ੍ਥਰਣਤ੍ਥਾਤਿ ਵੁਤ੍ਤਂ ‘‘ਤੇ ਤੇ ਦੁਕ੍ਖਵਿਸੇਸੇ ਉਤ੍ਤਰਤੀ’’ਤਿ. ਯਸ੍ਮਾ ਦਾਸਕਮ੍ਮਕਰਾ ਸਾਮਿਕਸ੍ਸ ਪਾਦਾਨਂ ਪਯਿਰੁਪਾਸਨਵਸੇਨ ਚੇਵ ਤਦਨੁਚ੍ਛਵਿਕਕਿਚ੍ਚਸਾਧਨਵਸੇਨ ਚ ਯੇਭੁਯ੍ਯੇਨ ਸਨ੍ਤਿਕਾਵਚਰਾ, ਤਸ੍ਮਾ ਵੁਤ੍ਤਂ ‘‘ਪਾਦਮੂਲੇ ਪਤਿਟ੍ਠਾਨਵਸੇਨਾ’’ਤਿ. ਗੁਣੇਹੀਤਿ ਉਪਰਿਭਾਵਾਵਹੇਹਿ ਗੁਣੇਹਿ. ਉਪਰਿ ਠਿਤਭਾਵੇਨਾਤਿ ਸਗ੍ਗਮਗ੍ਗੇ ਮੋਕ੍ਖਮਗ੍ਗੇ ਚ ਪਤਿਟ੍ਠਿਤਭਾਵੇਨ.
੨੬੭. ਭਤੋਤਿ ਪੋਸਿਤੋ, ਤਂ ਪਨ ਭਰਣਂ ਜਾਤਕਾਲਤੋ ਪਟ੍ਠਾਯ ਸੁਖਪਚ੍ਚਯੂਪਹਰਣੇਨ ਦੁਕ੍ਖਪਚ੍ਚਯਾਪਹਰਣੇਨ ਚ ਤੇਹਿ ਪਵਤ੍ਤਿਤਨ੍ਤਿ ਦਸ੍ਸੇਤੁਂ ‘‘ਥਞ੍ਞਂ ਪਾਯੇਤ੍ਵਾ’’ਤਿਆਦਿ ਵੁਤ੍ਤਂ. ਜਗ੍ਗਿਤੋਤਿ ਪਟਿਜਗ੍ਗਿਤੋ. ਤੇਤਿ ਮਾਤਾਪਿਤਰੋ.
ਮਾਤਾਪਿਤੂਨਂ ਸਨ੍ਤਕਂ ਖੇਤ੍ਤਾਦਿਂ ਅਵਿਨਾਸੇਤ੍ਵਾ ਰਕ੍ਖਿਤਂ ਤੇਸਂ ਪਰਮ੍ਪਰਾਯ ਠਿਤਿਯਾ ਕਾਰਣਂ ਹੋਤੀਤਿ ‘‘ਤਂ ਰਕ੍ਖਨ੍ਤੋ ਕੁਲਵਂਸਂ ਸਣ੍ਠਪੇਤਿ ਨਾਮਾ’’ਤਿ ਵੁਤ੍ਤਂ. ਅਧਮ੍ਮਿਕਵਂਸਤੋਤਿ ‘‘ਕੁਲਪ੍ਪਦੇਸਾਦਿਨਾ ਅਤ੍ਤਨਾ ਸਦਿਸਂ ਏਕਂ ਪੁਰਿਸਂ ਘਟੇਤ੍ਵਾ ਵਾ ਗੀਵਾਯਂ ਵਾ ਹਤ੍ਥੇ ਵਾ ਬਨ੍ਧਮਣਿਯਂ ਵਾ ਹਾਰੇਤਬ੍ਬ’’ਨ੍ਤਿ ਏਵਂ ਆਦਿਨਾ ਪਵਤ੍ਤਅਧਮ੍ਮਿਕਪਵੇਣਿਤੋ. ਹਾਰੇਤ੍ਵਾਤਿ ਅਪਨੇਤ੍ਵਾ ਤਂ ਗਾਹਂ ਵਿਸ੍ਸਜ੍ਜਾਪੇਤ੍ਵਾ. ਮਾਤਾਪਿਤਰੋ ਤਤੋ ਗਾਹਤੋ ਵਿਵੇਚਨੇਨੇਵ ਹਿ ਆਯਤਿਂ ਤੇਸਂ ਪਰਮ੍ਪਰਾਹਾਰਿਕਾ ਸਿਯਾ. ਧਮ੍ਮਿਕਵਂਸੇਤਿ ਹਿਂਸਾਦਿਵਿਰਤਿਯਾ ਧਮ੍ਮਿਕੇ ਵਂਸੇ ਧਮ੍ਮਿਕਾਯ ਪਵੇਣਿਯਂ. ਠਪੇਨ੍ਤੋਤਿ ਪਤਿਟ੍ਠਪੇਨ੍ਤੋ. ਸਲਾਕਭਤ੍ਤਾਦੀਨਿ ਅਨੁਪਚ੍ਛਿਨ੍ਦਿਤ੍ਵਾਤਿ ਸਲਾਕਭਤ੍ਤਦਾਨਾਦੀਨਿ ਅਵਿਚ੍ਛਿਨ੍ਦਿਤ੍ਵਾ.
ਦਾਯਜ੍ਜਂ ਪਟਿਪਜ੍ਜਾਮੀਤਿ ਏਤ੍ਥ ਯਸ੍ਮਾ ਦਾਯਪਟਿਲਾਭਸ੍ਸ ਯੋਗ੍ਯਭਾਵੇਨ ਵਤ੍ਤਮਾਨੋਯੇਵ ਦਾਯਜ੍ਜਂ ਪਟਿਪਜ੍ਜਤਿ ਨਾਮ, ਨ ਇਤਰੋ, ਤਸ੍ਮਾ ਤਮਤ੍ਥਂ ਦਸ੍ਸੇਤੁਂ ‘‘ਮਾਤਾਪਿਤਰੋ’’ਤਿਆਦਿ ਵੁਤ੍ਤਂ. ਦਾਰਕੇਤਿ ਪੁਤ੍ਤੇ. ਵਿਨਿਚ੍ਛਯਂ ਪਤ੍ਵਾਤਿ ‘‘ਪੁਤ੍ਤਸ੍ਸ ਚਜਵਿਸ੍ਸਜ੍ਜਨ’’ਨ੍ਤਿ ਏਵਂ ਆਗਤਂ ਵਿਨਿਚ੍ਛਯਂ ਆਗਮ੍ਮ. ਦਾਯਜ੍ਜਂ ਪਟਿਪਜ੍ਜਾਮੀਤਿ ਵੁਤ੍ਤਨ੍ਤਿ ‘‘ਦਾਯਜ੍ਜਂ ਪਟਿਪਜ੍ਜਾਮੀ’’ ਤਿ ਇਦਂ ਚਤੁਤ੍ਥਂ ਵਤ੍ਤਨਟ੍ਠਾਨਂ ਵੁਤ੍ਤਂ. ਤੇਸਨ੍ਤਿ ਮਾਤਾਪਿਤੂਨਂ. ਤਤਿਯਦਿਵਸਤੋ ਪਟ੍ਠਾਯਾਤਿ ਮਤਦਿਵਸਤੋ ਤਤਿਯਦਿਵਸਤੋ ਪਟ੍ਠਾਯ.
ਪਾਪਤੋ ਨਿਵਾਰਣਂ ਨਾਮ ਅਨਾਗਤਵਿਸਯਂ. ਸਮ੍ਪਤ੍ਤਵਤ੍ਥੁਤੋਪਿ ਹਿ ਨਿਵਾਰਣਂ ਵੀਤਿਕ੍ਕਮੇ ਅਨਾਗਤੇ ਏਵ ਸਿਯਾ, ਨ ਵਤ੍ਤਮਾਨੇ. ਨਿਬ੍ਬਤ੍ਤਿਤਾ ਪਨ ਪਾਪਕਿਰਿਯਾ ਗਰਹਣਮਤ੍ਤਪਟਿਕਾਰਾਤਿ ਆਹ ‘‘ਕਤਮ੍ਪਿ ਗਰਹਨ੍ਤੀ’’ਤਿ. ਨਿਵੇਸੇਨ੍ਤੀਤਿ ਪਤਿਟ੍ਠਪੇਨ੍ਤਿ. ਵੁਤ੍ਤਪ੍ਪਕਾਰਾ ਮਾਤਾਪਿਤਰੋ ਅਨਵਜ੍ਜਮੇਵ ਸਿਪ੍ਪਂ ਸਿਕ੍ਖਾਪੇਨ੍ਤੀਤਿ ਵੁਤ੍ਤਂ ‘‘ਮੁਦ੍ਦਾਗਣਨਾਦਿਸਿਪ੍ਪ’’ਨ੍ਤਿ. ਰੂਪਾਦੀਹੀਤਿ ਆਦਿ-ਸਦ੍ਦੇਨ ਭੋਗਪਰਿਵਾਰਾਦਿਂ ਸਙ੍ਗਣ੍ਹਾਤਿ. ਅਨੁਰੂਪੇਨਾਤਿ ਅਨੁਚ੍ਛਵਿਕੇਨ.
ਨਿਚ੍ਚਭੂਤੋ ਸਮਯੋ ਅਭਿਣ੍ਹਕਰਣਕਾਲੋ. ਅਭਿਣ੍ਹਤ੍ਥੋ ਹਿ ਅਯਂ ਨਿਚ੍ਚ-ਸਦ੍ਦੋ ‘‘ਨਿਚ੍ਚਪਹਂਸਿਤੋ ਨਿਚ੍ਚਪਹਟ੍ਠੋ’’ਤਿਆਦੀਸੁ ਵਿਯ. ਯੁਤ੍ਤਪਤ੍ਤਕਾਲੋ ਏਵ ਸਮਯੋ ਕਾਲਸਮਯੋ. ‘‘ਉਟ੍ਠਾਯ ਸਮੁਟ੍ਠਾਯਾ’’ਤਿ ਇਮਿਨਾਸ੍ਸ ਨਿਚ੍ਚਮੇਵ ਦਾਨੇ ਤੇਸਂ ਯੁਤ੍ਤਪਯੁਤ੍ਤਤਂ ਦਸ੍ਸੇਤਿ. ਸਿਖਾਠਪਨਂ ਦਾਰਕਕਾਲੇ. ਆਵਾਹਵਿਵਾਹਂ ਪੁਤ੍ਤਧੀਤੂਨਂ ਯੋਬ੍ਬਨਪ੍ਪਤ੍ਤਕਾਲੇ.
ਤਂ ਭਯਂ ਯਥਾ ਨਾਗਚ੍ਛਤਿ, ਏਵਂ ਪਿਹਿਤਾ ਹੋਤਿ ‘‘ਪੁਰਤ੍ਥਿਮਾ ਦਿਸਾ’’ਤਿ ਵਿਭਤ੍ਤਿਂ ਪਰਿਣਾਮੇਤ੍ਵਾ ਯੋਜਨਾ. ਯਥਾ ਪਨ ਤਂ ਭਯਂ ਆਗਚ੍ਛੇਯ੍ਯ, ਯਥਾ ਚ ਨਾਗਚ੍ਛੇਯ੍ਯ, ਤਦੁਭਯਂ ਦਸ੍ਸੇਤੁਂ ‘‘ਸਚੇ ਹੀ’’ਤਿਆਦਿ ਵੁਤ੍ਤਂ. ਵਿਪ੍ਪਟਿਪਨ੍ਨਾਤਿ ‘‘ਭਤੋ ਨੇ ਭਰਿਸ੍ਸਾਮੀ’’ਤਿਆਦਿਨਾ ਉਤ੍ਤਸਮ੍ਮਾਪਟਿਪਤ੍ਤਿਯਾ ਅਕਾਰਣੇਨ ਚੇਵ ਤਪ੍ਪਟਿਪਕ੍ਖਮਿਚ੍ਛਾਪਟਿਪਤ੍ਤਿਯਾ ਅਕਰਣੇਨ ਚ ਵਿਪ੍ਪਟਿਪਨ੍ਨਾ ਪੁਤ੍ਤਾ ਅਸ੍ਸੁ. ਏਤਂ ਭਯਨ੍ਤਿ ਏਤਂ ‘‘ਮਾਤਾਪਿਤੂਨਂ ਅਪ੍ਪਤਿਰੂਪਾਤਿ ਵਿਞ੍ਞੂਨਂ ਗਰਹਿਤਬ੍ਬਤਾਭਯਂ, ਪਰਵਾਦਭਯ’’ਨ੍ਤਿ ਏਵਮਾਦਿ ਆਗਚ੍ਛੇਯ੍ਯ ਪੁਤ੍ਤੇਸੁ. ਪੁਤ੍ਤਾਨਂ ਨਾਨੁਰੂਪਾਤਿ ਏਤ੍ਥ ‘‘ਪੁਤ੍ਤਾਨ’’ਨ੍ਤਿ ਪਦਂ ਏਤਂ ਭਯਂ ਪੁਤ੍ਤਾਨਂ ਆਗਚ੍ਛੇਯ੍ਯਾਤਿ ਏਵਂ ਇਧਾਪਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਤਾਦਿਸਾਨਞ੍ਹਿ ਮਾਤਾਪਿਤੂਨਂ ਪੁਤ੍ਤਾਨਂ ਓਵਾਦਾਨੁਸਾਸਨਿਯੋ ਦਾਤੁਂ ਸਮਤ੍ਥਕਾਲਤੋ ਪਟ੍ਠਾਯ ਤਾ ਤੇਸਂ ਦਾਤਬ੍ਬਾ ਏਵਾਤਿ ਕਤ੍ਵਾ ਤਥਾ ਵੁਤ੍ਤਂ. ਪੁਤ੍ਤਾਨਞ੍ਹਿ ਵਸੇਨਾਯਂ ਦੇਸਨਾ ਅਨਾਗਤਾ ਸਮ੍ਮਾਪਟਿਪਨ੍ਨੇਸੁ ਉਭੋਸੁ ਅਤ੍ਤਨੋ, ਮਾਤਾਪਿਤੂਨਞ੍ਚ ਵਸੇਨ ਉਪ੍ਪਜ੍ਜਨਕਤਾਯ ਸਬ੍ਬਂ ਭਯਂ ਨ ਹੋਤਿ ਸਮ੍ਮਾਪਟਿਪਨ੍ਨਤ੍ਤਾ. ਏਵਂ ਪਟਿਪਨ੍ਨਤ੍ਤਾ ਏਵ ਪਟਿਚ੍ਛਨ੍ਨਾ ਹੋਤਿ ਤਤ੍ਥ ਕਾਤਬ੍ਬਪਟਿਸਨ੍ਥਾਰਸ੍ਸ ਸਮ੍ਮਦੇਵ ਕਤਤ੍ਤਾ. ਖੇਮਾਤਿ ਅਨੁਪਦ੍ਦਵਾ. ਯਥਾਵੁਤ੍ਤਸਮ੍ਮਾਪਟਿਪਤ੍ਤਿਯਾ ਅਕਰਣੇਨ ਹਿ ਉਪ੍ਪਜ੍ਜਨਕਉਪਦ੍ਦਵਾ ਕਰਣੇਨ ਨ ਹੋਨ੍ਤੀਤਿ.
‘‘ਨ ਖੋ ਤੇ’’ਤਿਆਦਿਨਾ ਵੁਤ੍ਤੋ ਸਙ੍ਗੀਤਿਅਨਾਰੁਲ਼੍ਹੋ ਭਗਵਤਾ ਤਦਾ ਤਸ੍ਸ ਵੁਤ੍ਤੋ ਪਰਮ੍ਪਰਾਗਤੋ ਅਤ੍ਥੋ ਵੇਦਿਤਬ੍ਬੋ. ਤੇਨਾਹ ‘‘ਭਗਵਾ ਸਿਙ੍ਗਾਲਕਂ ਏਤਦਵੋਚਾ’’ਤਿ. ਅਯਞ੍ਹੀਤਿ ਏਤ੍ਥ ਹਿ-ਸਦ੍ਦੋ ਅਵਧਾਰਣੇ. ਤਥਾ ਹਿ ‘‘ਨੋ ਅਞ੍ਞਾ’’ਤਿ ਅਞ੍ਞਦਿਸਂ ਨਿਵਤ੍ਤੇਤਿ.
੨੬੮. ਆਚਰਿਯਂ ਦੂਰਤੋਵ ਦਿਸ੍ਵਾ ਉਟ੍ਠਾਨਵਚਨੇਨੇਵ ਤਸ੍ਸ ਪਚ੍ਚੁਗ੍ਗਮਨਾਦਿਸਾਮੀਚਿਕਿਰਿਯਾ ਅਵੁਤ੍ਤਸਿਦ੍ਧਾਤਿ ਤਂ ਦਸ੍ਸੇਨ੍ਤੋ ‘‘ਪਚ੍ਚੁਗ੍ਗਮਨਂ ਕਤ੍ਵਾ’’ਤਿਆਦਿਮਾਹ. ਉਪਟ੍ਠਾਨੇਨਾਤਿ ਪਯਿਰੁਪਾਸਨੇਨ. ਤਿਕ੍ਖਤ੍ਤੁਂਉਪਟ੍ਠਾਨਗਮਨੇਨਾਤਿ ਪਾਤੋ, ਮਜ੍ਝਨ੍ਹਿਕੇ, ਸਾਯਨ੍ਤਿ ਤੀਸੁ ਕਾਲੇਸੁ ਉਪਟ੍ਠਾਨਤ੍ਥਂ ਉਪਗਮਨੇਨ. ਸਿਪ੍ਪੁਗ੍ਗਹਣਤ੍ਥਂ ਪਨ ਉਪਗਮਨਂ ਉਪਟ੍ਠਾਨਨ੍ਤੋਗਧਂ ਪਯੋਜਨਵਸੇਨ ਗਮਨਭਾਵਤੋਤਿ ਆਹ ‘‘ਸਿਪ੍ਪੁਗ੍ਗਹਣ…ਪੇ… ਹੋਤੀ’’ਤਿ. ਸੋਤੁਂ ਇਚ੍ਛਾ ਸੁਸ੍ਸੂਸਾ, ਸਾ ਪਨ ਆਚਰਿਯੇ ਸਿਕ੍ਖਿਤਬ੍ਬਸਿਕ੍ਖੇ ਚ ਆਦਰਗਾਰਵਪੁਬ੍ਬਿਕਾ ਇਚ੍ਛਿਤਬ੍ਬਾ ‘‘ਅਦ੍ਧਾ ਇਮਿਨਾ ਸਿਪ੍ਪੇਨ ਸਿਕ੍ਖਿਤੇਨ ਏਵਰੂਪਂਗੁਣਂ ਪਟਿਲਭਿਸ੍ਸਾਮੀ’’ਤਿ. ਤਥਾਭੂਤਞ੍ਚ ਤਂ ਸਵਨਂ ਸਦ੍ਧਾਪੁਬ੍ਬਙ੍ਗਮਂ ਹੋਤੀਤਿ ਆਹ ‘‘ਸਦ੍ਦਹਿਤ੍ਵਾ ਸਵਨੇਨਾ’’ਤਿ. ਵੁਤ੍ਤਮੇਵਤ੍ਥਂ ਬ੍ਯਤਿਰੇਕਵਸੇਨ ਦਸ੍ਸੇਤੁਂ ‘‘ਅਸਦ੍ਦਹਿਤ੍ਵਾ…ਪੇ… ਨਾਧਿਗਚ੍ਛਤੀ’’ਤਿ ਵੁਤ੍ਤਂ. ਤਸ੍ਮਾ ਤਸ੍ਸਤ੍ਥੋ ਵੁਤ੍ਤਪਟਿਪਕ੍ਖਨਯੇਨ ਵੇਦਿਤਬ੍ਬੋ. ਯਂ ਸਨ੍ਧਾਯ ‘‘ਅਵਸੇਸਖੁਦ੍ਦਕਪਾਰਿਚਰਿਯਾਯਾ’’ਤਿ ਵੁਤ੍ਤਂ, ਤਂ ਵਿਭਜਨਂ ਅਨਵਸੇਸਤੋ ਦਸ੍ਸੇਤੁਂ ‘‘ਅਨ੍ਤੇਵਾਸਿਕੇਨ ਹੀ’’ਤਿਆਦਿ ਵੁਤ੍ਤਂ. ਪਚ੍ਚੁਪਟ੍ਠਾਨਾਦੀਨੀਤਿ ਆਦਿ-ਸਦ੍ਦੇਨ ਆਸਨਪਞ੍ਞਾਪਨਂ ਬੀਜਨਨ੍ਤਿ ਏਵਮਾਦਿਂ ਸਙ੍ਗਣ੍ਹਾਤਿ. ਅਨ੍ਤੇਵਾਸਿਕਵਤ੍ਤਨ੍ਤਿ ਅਨ੍ਤੇਵਾਸਿਕੇਨ ਆਚਰਿਯਮ੍ਹਿ ਸਮ੍ਮਾਵਤ੍ਤਿਤਬ੍ਬਵਤ੍ਤਂ. ਸਿਪ੍ਪਪਟਿਗ੍ਗਹਣੇਨਾਤਿ ਸਿਪ੍ਪਗਨ੍ਥਸ੍ਸ ਸਕ੍ਕਚ੍ਚਂ ਉਗ੍ਗਹਣੇਨ. ਤਸ੍ਸ ਹਿ ਸੁਟ੍ਠੁ ਉਗ੍ਗਹਣੇਨ ਤਦਨੁਸਾਰੇਨਸ੍ਸ ਪਯੋਗੋਪਿ ਸਮ੍ਮਦੇਵ ਉਗ੍ਗਹਿਤੋ ਹੋਤੀਤਿ. ਤੇਨਾਹ ‘‘ਥੋਕਂ ਗਹੇਤ੍ਵਾ’’ਤਿਆਦਿ.
ਸੁਵਿਨੀਤਂ ਵਿਨੇਨ੍ਤੀਤਿ ਇਧ ਆਚਾਰਵਿਨਯੋ ਅਧਿਪ੍ਪੇਤੋ. ਸਿਪ੍ਪਸ੍ਮਿਂ ਪਨ ਸਿਕ੍ਖਾਪਨਵਿਨਯੋ ‘‘ਸੁਗ੍ਗਹਿਤਂ ਗਾਹਾਪੇਨ੍ਤੀ’’ਤਿ ਇਮਿਨਾਵ ਸਙ੍ਗਹਿਤੋਤਿ ਵੁਤ੍ਤਂ ‘‘ਏਵਂ ਤੇ ਨਿਸੀਦਿਤਬ੍ਬ’’ਨ੍ਤਿਆਦਿ. ਆਚਰਿਯਾ ਹਿ ਨਾਮ ਅਨ੍ਤੇਵਾਸਿਕੇ ਨ ਦਿਟ੍ਠਧਮ੍ਮਿਕੇ ਏਵ ਵਿਨੇਨ੍ਤਿ, ਅਥ ਖੋ ਸਮ੍ਪਰਾਯਿਕੇਪੀਤਿ ਆਹ ‘‘ਪਾਪਮਿਤ੍ਤਾ ਵਜ੍ਜੇਤਬ੍ਬਾ’’ਤਿ. ਸਿਪ੍ਪਗਨ੍ਥਸ੍ਸ ਉਗ੍ਗਣ੍ਹਨਂ ਨਾਮ ਯਾਵਦੇਵ ਪਯੋਗਸਮ੍ਪਾਦਨਤ੍ਥਨ੍ਤਿ ਆਹ ‘‘ਪਯੋਗਂ ਦਸ੍ਸੇਤ੍ਵਾ ਗਣ੍ਹਾਪੇਨ੍ਤੀ’’ਤਿ. ਮਿਤ੍ਤਾਮਚ੍ਚੇਸੂਤਿ ਅਤ੍ਤਨੋ ਮਿਤ੍ਤਾਮਚ੍ਚੇਸੁ. ਪਟਿਯਾਦੇਨ੍ਤੀਤਿ ਪਰਿਗ੍ਗਹੇਤ੍ਵਾ ਨਂ ਮਮਤ੍ਤਵਸੇਨ ਪਟਿਯਾਦੇਨ੍ਤਿ. ‘‘ਅਯਂ ਅਮ੍ਹਾਕਂ ਅਨ੍ਤੇਵਾਸਿਕੋ’’ਤਿਆਦਿਨਾ ਹਿ ਅਤ੍ਤਨੋ ਪਰਿਗ੍ਗਹਿਤਦਸ੍ਸਨਮੁਖੇਨ ਚੇਵ ‘‘ਬਹੁਸ੍ਸੁਤੋ’’ਤਿਆਦਿਨਾ ਤਸ੍ਸ ਗੁਣਪਰਿਗ੍ਗਣ੍ਹਨਮੁਖੇ ਚ ਤਂ ਤੇਸਂ ਪਟਿਯਾਦੇਨ੍ਤਿ. ਸਬ੍ਬਦਿਸਾਸੁ ਰਕ੍ਖਂ ਕਰੋਨ੍ਤਿ ਚਾਤੁਦ੍ਦਿਸਭਾਵਸਮ੍ਪਾਦਨੇਨਸ੍ਸ ਸਬ੍ਬਤ੍ਥ ਸੁਖਜੀਵਿਭਾਵਸਾਧਨਤੋ. ਤੇਨਾਹ ‘‘ਉਗ੍ਗਹਿਤਸਿਪ੍ਪੋ ਹੀ’’ਤਿਆਦਿ. ਸਤ੍ਤਾਨਞ੍ਹਿ ਦੁਵਿਧਾ ਸਰੀਰਰਕ੍ਖਾ ਅਬ੍ਭਨ੍ਤਰਪਰਿਸ੍ਸਯਪਟਿਘਾਤੇਨ, ਬਾਹਿਰਪਰਿਸ੍ਸਯਪਟਿਘਾਤੇਨ ਚ. ਤਤ੍ਥ ਅਬ੍ਭਨ੍ਤਰਪਰਿਸ੍ਸਯੋ ਖੁਪ੍ਪਿਪਾਸਾਦਿਭੇਦੋ, ਸੋ ਲਾਭਸਿਦ੍ਧਿਯਾ ਪਟਿਹਞ੍ਞਤਿ ਤਾਯ ਤਜ੍ਜਾਪਰਿਹਾਰਸਂਵਿਧਾਨਤੋ. ਬਾਹਿਰਪਰਿਸ੍ਸਯੋ ਚੋਰਅਮਨੁਸ੍ਸਾਦਿਹੇਤੁਕੋ, ਸੋ ਵਿਜ੍ਜਾਸਿਦ੍ਧਿਯਾ ਪਟਿਹਞ੍ਞਤਿ ਤਾਯ ਤਜ੍ਜਾਪਰਿਹਾਰਸਂਵਿਧਾਨਤੋ. ਤੇਨ ਵੁਤ੍ਤਂ ‘‘ਯਂ ਯਂ ਦਿਸ’’ਨ੍ਤਿਆਦਿ.
ਪੁਬ੍ਬੇ ‘‘ਉਗ੍ਗਹਿਤਸਿਪ੍ਪੋ ਹੀ’’ਤਿਆਦਿਨਾ ਸਿਪ੍ਪਸਿਕ੍ਖਾਪਨੇਨੇਵ ਲਾਭੁਪ੍ਪਤ੍ਤਿਯਾ ਦਿਸਾਸੁ ਪਰਿਤ੍ਤਾਣਕਰਣਂ ਦਸ੍ਸਿਤਂ, ਇਦਾਨਿ ‘‘ਯਂ ਵਾ ਸੋ’’ਤਿਆਦਿਨਾ ਤਸ੍ਸ ਉਗ੍ਗਹਿਤਸਿਪ੍ਪਸ੍ਸ ਨਿਪ੍ਫਤ੍ਤਿਵਸੇਨ ਗੁਣਕਿਤ੍ਤਨਮੁਖੇਨ ਪਗ੍ਗਣ੍ਹਨੇਨਪਿ ਲਾਭੁਪ੍ਪਤ੍ਤਿਯਾਤਿ ਅਯਮੇਤੇਸਂ ਵਿਕਪ੍ਪਾਨਂ ਭੇਦੋ. ਸੇਸਨ੍ਤਿ ‘‘ਪਟਿਚ੍ਛਨ੍ਨਾ ਹੋਤੀ’’ਤਿਆਦਿਕਂ ਪਾਲ਼ਿਆਗਤਂ, ‘‘ਏਵਞ੍ਚ ਪਨ ਵਤ੍ਵਾ’’ਤਿਆਦਿਕਂ ਅਟ੍ਠਕਥਾਗਤਞ੍ਚ. ਏਤ੍ਥਾਤਿ ਏਤਸ੍ਮਿਂ ਦੁਤਿਯਦਿਸਾਵਾਰੇ. ਪੁਰਿਮਨਯੇਨੇਵਾਤਿ ਪੁਬ੍ਬੇ ਪਠਮਦਿਸਾਵਾਰੇ ਵੁਤ੍ਤਨਯੇਨੇਵ.
੨੬੯. ਸਮ੍ਮਾਨਨਾ ਨਾਮ ਸਮ੍ਭਾਵਨਾ, ਸਾ ਪਨ ਅਤ੍ਥਚਰਿਯਾਲਕ੍ਖਣਾ ਚ ਦਾਨਲਕ੍ਖਣਾ ਚ ਚਤੁਤ੍ਥਪਞ੍ਚਮਟ੍ਠਾਨੇਹੇਵ ਸਙ੍ਗਹਿਤਾਤਿ ਪਿਯਵਚਨਲਕ੍ਖਣਂ ਤਂ ਦਸ੍ਸੇਤੁਂ ‘‘ਸਮ੍ਭਾਵਿਤਕਥਾਕਥਨੇਨਾ’’ਤਿ ਵੁਤ੍ਤਂ. ਵਿਗਤਮਾਨਨਾ ਵਿਮਾਨਨਾ, ਨ ਵਿਮਾਨਨਾ ਅਵਿਮਾਨਨਾ, ਵਿਮਾਨਨਾਯ ਅਕਰਣਂ. ਤੇਨਾਹ ‘‘ਯਥਾ ਦਾਸਕਮ੍ਮਕਰਾਦਯੋ’’ਤਿਆਦਿ. ਸਾਮਿਕੇਨ ਹਿ ਵਿਮਾਨਿਤਾਨਂ ਇਤ੍ਥੀਨਂ ਸਬ੍ਬੋ ਪਰਿਜਨੋ ਵਿਮਾਨੇਤਿਯੇਵ. ਪਰਿਚਰਨ੍ਤੋਤਿ ਇਨ੍ਦ੍ਰਿਯਾਨਿ ਪਰਿਚਰਨ੍ਤੋ. ਤਂ ਅਤਿਚਰਤਿ ਨਾਮ ਤਂ ਅਤ੍ਤਨੋ ਗਿਹਿਨਿਂ ਅਤਿਮਞ੍ਞਿਤ੍ਵਾ ਅਗਣੇਤ੍ਵਾ ਵਤ੍ਤਨਤੋ. ਇਸ੍ਸਰਿਯਵੋਸ੍ਸਗ੍ਗੇਨਾਤਿ ਏਤ੍ਥ ਯਾਦਿਸੋ ਇਸ੍ਸਰਿਯਵੋਸ੍ਸਗ੍ਗੋ ਗਿਹਿਨਿਯਾ ਅਨੁਚ੍ਛਵਿਕੋ, ਤਂ ਦਸ੍ਸੇਨ੍ਤੋ ‘‘ਭਤ੍ਤਗੇਹੇ ਵਿਸ੍ਸਟ੍ਠੇ’’ਤਿ ਆਹ. ਗੇਹੇ ਏਵ ਠਤ੍ਵਾ ਵਿਚਾਰੇਤਬ੍ਬਮ੍ਪਿ ਹਿ ਕਸਿਵਾਣਿਜ੍ਜਾਦਿਕਮ੍ਮਂ ਕੁਲਿਤ੍ਥਿਯਾ ਭਾਰੋ ਨ ਹੋਤਿ, ਸਾਮਿਕਸ੍ਸੇਵ ਭਾਰੋ, ਤਤੋ ਆਗਤਸਾਪਤੇਯ੍ਯਂ ਪਨ ਤਾਯ ਸੁਗੁਤ੍ਤਂ ਕਤ੍ਵਾ ਠਪੇਤਬ੍ਬਂ ਹੋਤਿ. ‘‘ਸਬ੍ਬਂ ਇਸ੍ਸਰਿਯਂ ਵਿਸ੍ਸਟ੍ਠਂ ਨਾਮ ਹੋਤੀ’’ਤਿ ਏਤਾ ਮਞ੍ਞਨ੍ਤੀਤਿ ਅਧਿਪ੍ਪਾਯੋ. ਇਤ੍ਥਿਯੋ ਨਾਮ ਪੁਤ੍ਤਲਾਭੇਨ ਵਿਯ ਮਹਗ੍ਘਵਿਪੁਲਾਲਙ੍ਕਾਰਲਾਭੇਨਪਿ ਨ ਸਨ੍ਤੁਸ੍ਸਨ੍ਤੇਵਾਤਿ ਤਾਸਂ ਤੋਸਨਂ ਅਲਙ੍ਕਾਰਦਾਨਨ੍ਤਿ ਆਹ ‘‘ਅਤ੍ਤਨੋ ਵਿਭਵਾਨੁਰੂਪੇਨਾ’’ਤਿ.
ਕੁਲਿਤ੍ਥਿਯਾ ਸਂਵਿਹਿਤਬ੍ਬਕਮ੍ਮਨ੍ਤਾ ਨਾਮ ਆਹਾਰਸਮ੍ਪਾਦਨਵਿਚਾਰਪ੍ਪਕਾਰਾਤਿ ਆਹ ‘‘ਯਾਗੁਭਤ੍ਤਪਚਨਕਾਲਾਦੀਨੀ’’ਤਿਆਦਿ. ਸਮ੍ਮਾਨਨਾਦੀਹਿ ਯਥਾਰਹਂ ਪਿਯਵਚਨੇਹਿ ਚੇਵ ਭੋਜਨਦਾਨਾਦੀਹਿ ਚ ਪਹੇਣਕਪੇਸਨਾਦੀਹਿ ਅਞ੍ਞਤੋ, ਤਤ੍ਥੇਵ ਵਾ ਉਪ੍ਪਨ੍ਨਸ੍ਸ ਪਣ੍ਣਾਕਾਰਸ੍ਸ ਛਣਦਿਵਸਾਦੀਸੁ ਪੇਸੇਤਬ੍ਬਪਿਯਭਣ੍ਡੇਹਿ ਚ ਸਙ੍ਗਹਿਤਪਰਿਜਨਾ. ਗੇਹਸਾਮਿਨਿਯਾ ਅਨ੍ਤੋਗੇਹਜਨੋ ਨਿਚ੍ਚਂ ਸਙ੍ਗਹਿਤੋ ਏਵਾਤਿ ਵੁਤ੍ਤਂ ‘‘ਇਧ ਪਰਿਜਨੋ ਨਾਮ…ਪੇ… ਞਾਤਿਜਨੋ’’ਤਿ. ਆਭਤਧਨਨ੍ਤਿ ਬਾਹਿਰਤੋ ਅਨ੍ਤੋਗੇਹਂ ਪਵੇਸਿਤਧਨਂ. ਗਿਹਿਨਿਯਾ ਨਾਮ ਪਠਮਂ ਆਹਾਰਸਮ੍ਪਾਦਨੇ ਕੋਸਲ੍ਲਂ ਇਚ੍ਛਿਤਬ੍ਬਂ, ਤਤ੍ਥ ਚ ਯੁਤ੍ਤਪਯੁਤ੍ਤਤਾ, ਤਤੋ ਸਾਮਿਕਸ੍ਸ ਇਤ੍ਥਿਜਨਾਯਤ੍ਤੇਸੁ ਕਿਚ੍ਚਾਕਿਚ੍ਚੇਸੁ, ਤਤੋ ਪੁਤ੍ਤਾਨਂ ਪਰਿਜਨਸ੍ਸ ਕਾਤਬ੍ਬਕਿਚ੍ਚੇਸੂਤਿ ਆਹ ‘‘ਯਾਗੁਭਤ੍ਤਸਮ੍ਪਾਦਨਾਦੀਸੂ’’ਤਿਆਦਿ. ‘‘ਨਿਕ੍ਕੋਸਜ੍ਜਾ’’ਤਿ ਵਤ੍ਵਾ ਤਮੇਵ ਨਿਕ੍ਕੋਸਜ੍ਜਤਂ ਬ੍ਯਤਿਰੇਕਤੋ, ਅਨ੍ਵਯਤੋ ਚ ਵਿਭਾਵੇਤੁਂ ‘‘ਯਥਾ’’ਤਿਆਦਿ ਵੁਤ੍ਤਂ. ਇਧਾਤਿ ਇਮਸ੍ਮਿਂ ਤਤਿਯਦਿਸਾਵਾਰੇ. ਪੁਰਿਮਨਯੇਨੇਵਾਤਿ ਪਠਮਦਿਸਾਵਾਰੇ ਵੁਤ੍ਤਨਯੇਨੇਵ. ਇਤਿ ਭਗਵਾ ‘‘ਪਚ੍ਛਿਮਾ ਦਿਸਾ ਪੁਤ੍ਤਦਾਰਾ’’ਤਿ ਉਦ੍ਦਿਸਿਤ੍ਵਾਪਿ ਦਾਰਵਸੇਨੇਵ ਪਚ੍ਛਿਮਂ ਦਿਸਂ ਵਿਸ੍ਸਜ੍ਜੇਸਿ, ਨ ਪੁਤ੍ਤਵਸੇਨ. ਕਸ੍ਮਾ? ਪੁਤ੍ਤਾ ਹਿ ਦਾਰਕਕਾਲੇ ਅਤ੍ਤਨੋ ਮਾਤੁ ਅਨੁਗ੍ਗਣ੍ਹਨੇਨੇਵ ਅਨੁਗ੍ਗਹਿਤਾ ਹੋਨ੍ਤਿ ਅਨੁਕਮ੍ਪਿਤਾ, ਵਿਞ੍ਞੁਤਂ ਪਤ੍ਤਕਾਲੇ ਪਨ ਯਥਾ ਤੇਪਿ ਤਦਾ ਅਨੁਗ੍ਗਹੇਤਬ੍ਬਾ, ਸ੍ਵਾਯਂ ਵਿਧਿ ‘‘ਪਾਪਾ ਨਿਵਾਰੇਨ੍ਤੀ’’ਤਿਆਦਿਨਾ ਪਠਮਦਿਸਾਵਾਰੇ ਦਸ੍ਸਿਤੋ ਏਵਾਤਿ ਕਿਂ ਪੁਨ ਵਿਸ੍ਸਜ੍ਜਨੇਨਾਤਿ. ਦਾਨਾਦਿਸਙ੍ਗਹਵਤ੍ਥੂਸੁ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵਾਤਿ.
੨੭੦. ਚਤ੍ਤਾਰਿਪਿ ਠਾਨਾਨਿ ਲਙ੍ਘਿਤ੍ਵਾ ਪਞ੍ਚਮਮੇਵ ਠਾਨਂ ਵਿਵਰਿਤੁਂ ‘‘ਅਵਿਸਂਵਾਦਨਤਾਯਾ’’ਤਿਆਦਿ ਵੁਤ੍ਤਂ. ਤਤ੍ਥ ਯਸ੍ਸ ਯਸ੍ਸ ਨਾਮਂ ਗਣ੍ਹਾਤੀਤਿ ਸਹਾਯੋ ਅਤ੍ਥਿਕਭਾਵੇਨ ਯਸ੍ਸ ਯਸ੍ਸ ਵਤ੍ਥੁਨੋ ਨਾਮਂ ਕਥੇਤਿ. ਅਵਿਸਂਵਾਦੇਤ੍ਵਾਤਿ ਏਤ੍ਥ ਦੁਵਿਧਂ ਅਵਿਸਂਵਾਦਨਂ ਵਾਚਾਯ, ਪਯੋਗੇਨ ਚਾਤਿ ਤਂ ਦੁਵਿਧਮ੍ਪਿ ਦਸ੍ਸੇਤੁਂ ‘‘ਇਦਮ੍ਪੀ’’ਤਿਆਦਿ ਵੁਤ੍ਤਂ. ‘‘ਦਾਨੇਨਾ’’ਤਿ ਚ ਇਦਂ ਨਿਦਸ੍ਸਨਮਤ੍ਤਂ ਦਟ੍ਠਬ੍ਬਂ ਇਤਰਸਙ੍ਗਹਵਤ੍ਥੁਵਸੇਨਪਿ ਅਵਿਸਂਵਾਦੇਤ੍ਵਾ ਸਙ੍ਗਣ੍ਹਨਸ੍ਸ ਲਬ੍ਭਨਤੋ, ਇਚ੍ਛਿਤਬ੍ਬਤੋ ਚ. ਅਪਰਾ ਪਚ੍ਛਿਮਾ ਪਜਾ ਅਪਰਪਜਾ, ਅਪਰਾਪਰਂ ਉਪ੍ਪਨ੍ਨਾ ਵਾ ਪਜਾ ਅਪਰਪਜਾ. ਪਟਿਪੂਜਨਾ ਨਾਮ ਮਮਾਯਨਾ, ਸਕ੍ਕਾਰਕਿਰਿਯਾ ਚਾਤਿ ਤਦੁਭਯਂ ਦਸ੍ਸੇਤੁਂ ‘‘ਕੇਲਾਯਨ੍ਤੀ’’ਤਿਆਦਿ ਵੁਤ੍ਤਂ. ਮਮਾਯਨ੍ਤੀਤਿ ਮਮਤ੍ਤਂ ਕਰੋਨ੍ਤਿ.
੨੭੧. ਯਥਾਬਲਂ ਕਮ੍ਮਨ੍ਤਸਂਵਿਧਾਨੇਨਾਤਿ ਦਾਸਕਮ੍ਮਕਰਾਨਂ ਯਥਾਬਲਂ ਬਲਾਨੁਰੂਪਂ ਤੇਸਂ ਤੇਸਂ ਕਮ੍ਮਨ੍ਤਾਨਂ ਸਂਵਿਦਹਨੇਨ ਵਿਚਾਰਣੇਨ, ਕਾਰਾਪਨੇਨਾਤਿ ਅਤ੍ਥੋ. ਤੇਨਾਹ ‘‘ਦਹਰੇਹੀ’’ਤਿਆਦਿ. ਭਤ੍ਤਵੇਤਨਾਨੁਪ੍ਪਦਾਨੇਨਾਤਿ ਤਸ੍ਸ ਤਸ੍ਸ ਦਾਸਕਮ੍ਮਕਰਸ੍ਸ ਅਨੁਰੂਪਂ ਭਤ੍ਤਸ੍ਸ, ਵੇਤਨਸ੍ਸ ਚ ਪਦਾਨੇਨ. ਤੇਨੇਵਾਹ ‘‘ਅਯਂ ਖੁਦ੍ਦਕਪੁਤ੍ਤੋ’’ਤਿਆਦਿ. ਭੇਸਜ੍ਜਾਦੀਨੀਤਿ ਆਦਿ-ਸਦ੍ਦੇਨ ਸਪ੍ਪਾਯਾਹਾਰਵਸਨਟ੍ਠਾਨਾਦਿਂ ਸਙ੍ਗਣ੍ਹਾਤਿ. ਸਾਤਭਾਵੋ ਏਵ ਰਸਾਨਂ ਅਚ੍ਛਰਿਯਤਾਤਿ ਆਹ ‘‘ਅਚ੍ਛਰਿਯੇ ਮਧੁਰਰਸੇ’’ਤਿ. ਤੇਸਨ੍ਤਿ ਦਾਸਕਮ੍ਮਕਰਾਨਂ. ਵੋਸ੍ਸਜ੍ਜਨੇਨਾਤਿ ਕਮ੍ਮਕਰਣਤੋ ਵਿਸ੍ਸਜ੍ਜਨੇਨ. ਵੇਲਂ ਞਤ੍ਵਾਤਿ ‘‘ਪਹਾਰਾਵਸੇਸੋ, ਉਪਡ੍ਢਪਹਾਰਾਵਸੇਸੋ ਵਾ ਦਿਵਸੋ’’ਤਿ ਵੇਲਂ ਜਾਨਿਤ੍ਵਾ. ਯੋ ਕੋਚਿ ਮਹੁਸ੍ਸਵੋ ਛਣੋ ਨਾਮ. ਕਤ੍ਤਿਕੁਸ੍ਸਵੋ, ਫਗ੍ਗੁਣੁਸ੍ਸਵੋਤਿ ਏਵਂ ਨਕ੍ਖਤ੍ਤਸਲ੍ਲਕ੍ਖਿਤੋ ਮਹੁਸ੍ਸਵੋ ਨਕ੍ਖਤ੍ਤਂ.ਪੁਬ੍ਬੁਟ੍ਠਾਯਿਤਾ, ਪਚ੍ਛਾਨਿਪਾਤਿਤਾ ਚ ਮਹਾਸੁਦਸ੍ਸਨੇ ਵੁਤ੍ਤਾ ਏਵਾਤਿ ਇਧ ਅਨਾਮਟ੍ਠਾ.
ਦਿਨ੍ਨਾਦਾਯਿਨੋਤਿ ਪੁਬ੍ਬਪਦਾਵਧਾਰਣਵਸੇਨ ਸਾਵਧਾਰਣਵਚਨਨ੍ਤਿ ਅਵਧਾਰਣੇਨ ਨਿਵਤ੍ਤਿਤਂ ਦਸ੍ਸੇਤੁਂ ‘‘ਚੋਰਿਕਾਯ ਕਿਞ੍ਚਿ ਅਗ੍ਗਹੇਤ੍ਵਾ’’ਤਿ ਵੁਤ੍ਤਂ. ਤੇਨਾਹ ‘‘ਸਾਮਿਕੇਹਿ ਦਿਨ੍ਨਸ੍ਸੇਵ ਆਦਾਯਿਨੋ’’ਤਿ. ਨ ਮਯਂ ਕਿਞ੍ਚਿ ਲਭਾਮਾਤਿ ਅਨੁਜ੍ਝਾਯਿਤ੍ਵਾਤਿ ਪਟਿਸੇਧਦ੍ਵਯੇਨ ਤੇਹਿ ਲਦ੍ਧਬ੍ਬਸ੍ਸ ਲਾਭਂ ਦਸ੍ਸੇਤਿ. ‘‘ਕਿਂ ਏਤਸ੍ਸ ਕਮ੍ਮੇਨ ਕਤੇਨਾਤਿ ਅਨੁਜ੍ਝਾਯਿਤ੍ਵਾ’’ਤਿ ਇਦਂ ਤੁਟ੍ਠਹਦਯਤਾਯ ਕਾਰਣਦਸ੍ਸਨਂ ਪਟਿਪਕ੍ਖਦੂਰੀਭਾਵਤੋ. ਤੁਟ੍ਠਹਦਯਤਾਦਸ੍ਸਨਮ੍ਪਿ ਕਮ੍ਮਸ੍ਸ ਸੁਕਤਕਾਰਿਤਾਯ ਕਾਰਣਦਸ੍ਸਨਂ. ਕਿਤ੍ਤਿ ਏਵ ਵਣ੍ਣੋ ਕਿਤ੍ਤਿਵਣ੍ਣੋ, ਤਂ ਕਿਤ੍ਤਿਵਣ੍ਣਂ ਗੁਣਕਥਂ ਹਰਨ੍ਤਿ, ਤਂ ਤਂ ਦਿਸਂ ਉਪਾਹਰਨ੍ਤੀਤਿ ਕਿਤ੍ਤਿਵਣ੍ਣਹਰਾ. ਤਥਾ ਤਥਾ ਕਿਤ੍ਤੇਤਬ੍ਬਤੋ ਹਿ ਕਿਤ੍ਤਿ, ਗੁਣੋ, ਤੇਸਂ ਵਣ੍ਣਨਂ ਕਥਨਂ ਵਣ੍ਣੋ. ਤੇਨਾਹ ‘‘ਗੁਣਕਥਾਹਾਰਕਾ’’ਤਿ.
੨੭੨. ਕਾਰਣਭੂਤਾ ਮੇਤ੍ਤਾ ਏਤੇਸਂ ਅਤ੍ਥੀਤਿ ਮੇਤ੍ਤਾਨਿ, ਕਾਯਕਮ੍ਮਾਦੀਨਿ. ਯਾਨਿ ਪਨ ਤਾਨਿ ਯਥਾ ਯਥਾ ਚ ਸਮ੍ਭਵਨ੍ਤਿ, ਤਂ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿ ਵੁਤ੍ਤਂ. ‘‘ਵਿਹਾਰਗਮਨ’’ਨ੍ਤਿਆਦੀਸੁ ‘‘ਮੇਤ੍ਤਚਿਤ੍ਤਂ ਪਚ੍ਚੁਪਟ੍ਠਾਪੇਤ੍ਵਾ’’ਤਿ ਪਦਂ ਆਹਰਿਤ੍ਵਾ ਯੋਜੇਤਬ੍ਬਂ. ਅਨਾਵਟਦ੍ਵਾਰਤਾਯਾਤਿ ਏਤ੍ਥ ਦ੍ਵਾਰਂ ਨਾਮ ਅਲੋਭਜ੍ਝਾਸਯਤਾ ਦਾਨਸ੍ਸ ਮੁਖਭਾਵਤੋ. ਤਸ੍ਸ ਸਤੋ ਦੇਯ੍ਯਧਮ੍ਮਸ੍ਸ ਦਾਤੁਕਾਮਤਾ ਅਨਾਵਟਤਾ ਏਵਞ੍ਹਿ ਘਰਮਾਵਸਨ੍ਤੋ ਕੁਲਪੁਤ੍ਤੋ ਗੇਹਦ੍ਵਾਰੇ ਪਿਹਿਤੇਪਿ ਅਨਾਵਟਦ੍ਵਾਰੋ ਏਵ, ਅਞ੍ਞਥਾ ਅਪਿਹਿਤੇਪਿ ਘਰਦ੍ਵਾਰੇ ਆਵਟਦ੍ਵਾਰੋ ਏਵਾਤਿ. ਤੇਨ ਵੁਤ੍ਤਂ ‘‘ਤਤ੍ਥਾ’’ਤਿਆਦਿ. ਵਿਵਰਿਤ੍ਵਾਪਿ ਵਸਨ੍ਤੋਤਿ ਵਚਨਸੇਸੋ. ਪਿਦਹਿਤ੍ਵਾਪੀਤਿ ਏਤ੍ਥਾਪਿ ਏਸੇਵ ਨਯੋ. ‘‘ਸੀਲਵਨ੍ਤੇਸੂ’’ਤਿ ਇਦਂ ਪਟਿਗ੍ਗਾਹਕਤੋ ਦਕ੍ਖਿਣਵਿਸੁਦ੍ਧਿਦਸ੍ਸਨਤ੍ਥਂ ਵੁਤ੍ਤਂ. ਕਰੁਣਾਖੇਤ੍ਤੇਪਿ ਦਾਨੇਨ ਅਨਾਵਟਦ੍ਵਾਰਤਾ ਏਵ. ‘‘ਸਨ੍ਤਞ੍ਞੇਵਾ’’ਤਿ ਇਮਿਨਾ ਅਸਨ੍ਤਂ ਨਤ੍ਥਿਵਚਨਂ ਪੁਚ੍ਛਿਤਪਟਿਵਚਨਂ ਵਿਯ ਇਚ੍ਛਿਤਬ੍ਬਂ ਏਵਾਤਿ ਦਸ੍ਸੇਤਿ ਵਿਞ੍ਞੂਨਂ ਅਤ੍ਥਿਕਾਨਂ ਚਿਤ੍ਤਮਦ੍ਦਵਕਰਣਤੋ. ‘‘ਪੁਰੇਭਤ੍ਤਂ ਪਰਿਭੁਞ੍ਜਿਤਬ੍ਬਕ’’ਨ੍ਤਿ ਇਦਂ ਯਾਵਕਾਲਿਕੇ ਏਵ ਆਮਿਸਭਾਵਸ੍ਸ ਨਿਰੁਲ਼੍ਹਤਾਯ ਵੁਤ੍ਤਂ.
‘‘ਸਬ੍ਬੇ ਸਤ੍ਤਾ’’ਤਿ ਇਦਂ ਤੇਸਂ ਸਮਣਬ੍ਰਾਹ੍ਮਣਾਨਂ ਅਜ੍ਝਾਸਯਸਮ੍ਪਤ੍ਤਿਦਸ੍ਸਨਂ ਪਕ੍ਖਪਾਤਾਭਾਵਦੀਪਨਤੋ, ਓਧਿਸੋ ਫਰਣਾਯਪਿ ਮੇਤ੍ਤਾਭਾਵਨਾਯ ਲਬ੍ਭਨਤੋ. ਯਾਯ ਕੁਸਲਾਭਿਵਡ੍ਢਿਆਕਙ੍ਖਾਯ ਤੇਸਂ ਉਪਟ੍ਠਾਕਾਨਂ, ਤਥਾ ਨੇਸਂ ਗੇਹਪਵਿਸਨਂ, ਤਂ ਸਨ੍ਧਾਯਾਹ ‘‘ਪਵਿਸਨ੍ਤਾਪਿ ਕਲ੍ਯਾਣੇਨ ਚੇਤਸਾ ਅਨੁਕਮ੍ਪਨ੍ਤਿ ਨਾਮਾ’’ਤਿ. ਸੁਤਸ੍ਸ ਪਰਿਯੋਦਾਪਨਂ ਨਾਮ ਤਸ੍ਸ ਯਾਥਾਵਤੋ ਅਤ੍ਥਂ ਵਿਭਾਵੇਤ੍ਵਾ ਵਿਚਿਕਿਚ੍ਛਾਤਮਵਿਧਮਨੇਨ ਵਿਸੋਧਨਨ੍ਤਿ ਆਹ ‘‘ਅਤ੍ਥਂ ਕਥੇਤ੍ਵਾ ਕਙ੍ਖਂ ਵਿਨੋਦੇਨ੍ਤੀ’’ਤਿ. ਸਵਨਂ ਨਾਮ ਧਮ੍ਮਸ੍ਸ ਯਾਵਦੇਵ ਸਮ੍ਮਾਪਟਿਪਜ੍ਜਨਾਯ ਅਸਤਿ ਤਸ੍ਮਿਂ ਤਸ੍ਸ ਨਿਰਤ੍ਥਕਭਾਵਤੋ, ਤਸ੍ਮਾ ਸੁਤਸ੍ਸ ਪਰਿਯੋਦਾਪਨਂ ਨਾਮ ਸਮ੍ਮਾਪਟਿਪਜ੍ਜਾਪਨਨ੍ਤਿ ਆਹ ‘‘ਤਥਤ੍ਤਾਯ ਵਾ ਪਟਿਪਜ੍ਜਾਪੇਨ੍ਤੀ’’ਤਿ.
੨੭੩. ਅਲਮਤ੍ਤੋਤਿ ਸਮਤ੍ਥਸਭਾਵੋ, ਸੋ ਚ ਅਤ੍ਥਤੋ ਸਮਤ੍ਥੋ ਏਵਾਤਿ ‘‘ਅਗਾਰਂ ਅਜ੍ਝਾਵਸਨਸਮਤ੍ਥੋ’’ਤਿ ਵੁਤ੍ਤਂ. ਦਿਸਾਨਮਸ੍ਸਨਟ੍ਠਾਨੇਤਿ ਯਥਾਵੁਤ੍ਤਦਿਸਾਨਂ ਪਚ੍ਚੁਪਟ੍ਠਾਨਸਞ੍ਞਿਤੇ ਨਮਸ੍ਸਨਕਾਰਣੇ. ਪਣ੍ਡਿਤੋ ਹੁਤ੍ਵਾ ਕੁਸਲੋ ਛੇਕੋ ਲਭਤੇ ਯਸਨ੍ਤਿ ਯੋਜਨਾ. ਸਣ੍ਹਗੁਣਯੋਗਤੋ ਸਣ੍ਹੋ, ਸਣ੍ਹਗੁਣੋਤਿ ਪਨੇਤ੍ਥ ਸੁਖੁਮਨਿਪੁਣਪਞ੍ਞਾ, ਮੁਦੁਵਾਚਾਤਿ ਦਸ੍ਸੇਨ੍ਤੋ ‘‘ਸੁਖੁਮ…ਪੇ… ਭਣਨੇਨ ਵਾ’’ਤਿ ਵੁਤ੍ਤਂ. ਦਿਸਾਨਮਸ੍ਸਨਟ੍ਠਾਨੇਨਾਤਿ ਯੇਨ ਞਾਣੇਨ ਯਥਾਵੁਤ੍ਤਾ ਛ ਦਿਸਾ ਵੁਤ੍ਤਨਯੇਨ ਪਟਿਪਜ੍ਜਨ੍ਤੋ ਨਮਸ੍ਸਤਿ ਨਾਮ, ਤਂ ਞਾਣਂ ਦਿਸਾਨਮਸ੍ਸਨਟ੍ਠਾਨਂ, ਤੇਨ ਪਟਿਭਾਨਵਾ. ਤੇਨ ਹਿ ਤਂਤਂਕਿਚ੍ਚਯੁਤ੍ਤਪਤ੍ਤਵਸੇਨ ਪਟਿਪਜ੍ਜਨ੍ਤੋ ਇਧ ‘‘ਪਟਿਭਾਨਵਾ’’ਤਿ ਵੁਤ੍ਤੋ. ਨਿਵਾਤਵੁਤ੍ਤੀਤਿ ਪਣਿਪਾਤਸੀਲੋ. ਅਤ੍ਥਦ੍ਧੋਤਿ ਨ ਥਦ੍ਧੋ ਥਮ੍ਭਰਹਿਤੋਤਿ ਚਿਤ੍ਤਸ੍ਸ ਉਦ੍ਧੁਮਾਤਲਕ੍ਖਣੇਨ ਥਮ੍ਭਿਤਭਾਵੇਨ ਵਿਰਹਿਤੋ. ਉਟ੍ਠਾਨਵੀਰਿਯਸਮ੍ਪਨ੍ਨੋਤਿ ਕਾਯਿਕੇਨ ਵੀਰਿਯੇਨ ਸਮਨ੍ਨਾਗਤੋ. ਨਿਰਨ੍ਤਰਕਰਣਵਸੇਨਾਤਿ ਆਰਦ੍ਧਸ੍ਸ ਕਮ੍ਮਸ੍ਸ ਸਤਤਕਾਰਿਤਾਵਸੇਨ. ਠਾਨੁਪ੍ਪਤ੍ਤਿਯਾ ਪਞ੍ਞਾਯਾਤਿ ਤਸ੍ਮਿਂ ਤਸ੍ਮਿਂ ਅਤ੍ਥਕਿਚ੍ਚੇ ਉਪਟ੍ਠਿਤੇ ਠਾਨਸੋ ਤਙ੍ਖਣੇ ਏਵ ਉਪ੍ਪਜ੍ਜਨਕਪਞ੍ਞਾਯ.
ਸਙ੍ਗਹਕਰੋਤਿ ਯਥਾਰਹਂ ਸਤ੍ਤਾਨਂ ਸਙ੍ਗਣ੍ਹਨਕੋ. ਮਿਤ੍ਤਕਰੋਤਿ ਮਿਤ੍ਤਭਾਵਕਰੋ, ਸੋ ਪਨ ਅਤ੍ਥਤੋ ਮਿਤ੍ਤੇ ਪਰਿਯੇਸਨਕੋ ਨਾਮ ਹੋਤੀਤਿ ਵੁਤ੍ਤਂ ‘‘ਮਿਤ੍ਤਗਵੇਸਨੋ’’ਤਿ. ਯਥਾਵੁਤ੍ਤਂ ਵਦਂ ਵਚਨਂ ਜਾਨਾਤੀਤਿ ਵਦਞ੍ਞੂਤਿ ਆਹ ‘‘ਪੁਬ੍ਬਕਾਰਿਨਾ ਵੁਤ੍ਤਵਚਨਂ ਜਾਨਾਤੀ’’ਤਿ. ਇਦਾਨਿ ਤਮੇਵਤ੍ਥਂ ਸਙ੍ਖੇਪੇਨ ਵੁਤ੍ਤਂ ਵਿਤ੍ਥਾਰਵਸੇਨ ਦਸ੍ਸੇਤੁਂ ‘‘ਸਹਾਯਕਸ੍ਸਾ’’ਤਿਆਦਿ ਵੁਤ੍ਤਂ. ਪੁਬ੍ਬੇ ਯਥਾਪਵਤ੍ਤਾਯ ਵਾਚਾਯ ਜਾਨਨੇ ਵਦਞ੍ਞੁਤਂ ਦਸ੍ਸੇਤ੍ਵਾ ਇਦਾਨਿ ਆਕਾਰਸਲ੍ਲਕ੍ਖਣੇਨ ਅਪ੍ਪਵਤ੍ਤਾਯ ਵਾਚਾਯ ਜਾਨਨੇਪਿ ਵਦਞ੍ਞੁਤਂ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿ ਵੁਤ੍ਤਂ. ‘‘ਯੇਨ ਯੇਨ ਵਾ ਪਨਾ’’ਤਿਆਦਿਨਾ ਵਚਨੀਯਤ੍ਥਤਂ ਵਦਞ੍ਞੂ-ਸਦ੍ਦਸ੍ਸ ਦਸ੍ਸੇਤਿ. ਨੇਤਾਤਿ ਯਥਾਧਿਪ੍ਪੇਤਮਤ੍ਥਂ ਪਚ੍ਚਕ੍ਖਤੋ ਪਾਪੇਤਾ. ਤੇਨਾਹ ‘‘ਤਂ ਤਮਤ੍ਥਂ ਦਸ੍ਸੇਨ੍ਤੋ ਪਞ੍ਞਾਯ ਨੇਤਾ’’ਤਿ. ਨੇਤਿ ਤਂ ਤਮਤ੍ਥਨ੍ਤਿ ਆਨੇਤ੍ਵਾ ਸਮ੍ਬਨ੍ਧੋ. ਪੁਨਪ੍ਪੁਨਂ ਨੇਤੀਤਿ ਅਨੁ ਅਨੁ ਨੇਤਿ, ਤਂ ਤਮਤ੍ਥਨ੍ਤਿ ਆਨੇਤ੍ਵਾ ਯੋਜਨਾ.
ਤਸ੍ਮਿਂ ਤਸ੍ਮਿਨ੍ਤਿ ਤਸ੍ਮਿਂ ਤਸ੍ਮਿਂ ਦਾਨਾਦੀਹਿ ਸਙ੍ਗਹੇਹਿ ਸਙ੍ਗਹੇਤਬ੍ਬੇ ਪੁਗ੍ਗਲੇ. ਆਣਿਯਾਤਿ ਅਕ੍ਖਸੀਸਗਤਾਯ ਆਣਿਯਾ. ਯਾਯਤੋਤਿ ਗਚ੍ਛਤੋ. ਪੁਤ੍ਤਕਾਰਣਾਤਿ ਪੁਤ੍ਤਨਿਮਿਤ੍ਤਂ. ਪੁਤ੍ਤਹੇਤੁਕਞ੍ਹਿ ਪੁਤ੍ਤੇਨ ਕਤ੍ਤਬ੍ਬਂ ਮਾਨਂ ਵਾ ਪੂਜਂ ਵਾ.
ਉਪਯੋਗਵਚਨੇਤਿ ਉਪਯੋਗਤ੍ਥੇ. ਵੁਚ੍ਚਤੀਤਿ ਵਚਨਂ, ਅਤ੍ਥੋ. ਉਪਯੋਗਵਚਨੇ ਵਾ ਵਤ੍ਤਬ੍ਬੇ. ਪਚ੍ਚਤ੍ਤਨ੍ਤਿ ਪਚ੍ਚਤ੍ਤਵਚਨਂ. ਸਮ੍ਮਾ ਪੇਕ੍ਖਨ੍ਤੀਤਿ ਸਮ੍ਮਦੇਵ ਕਾਤਬ੍ਬੇ ਪੇਕ੍ਖਨ੍ਤਿ. ਪਸਂਸਨੀਯਾਤਿ ਪਸਂਸਿਤਬ੍ਬਾ. ਭਵਨ੍ਤਿ ਏਤੇ ਸਙ੍ਗਹੇਤਬ੍ਬੇ ਤਤ੍ਥ ਪੁਗ੍ਗਲੇ ਯਥਾਰਹਂ ਪਵਤ੍ਤੇਨ੍ਤਾਤਿ ਅਧਿਪ੍ਪਾਯੋ.
੨੭੪. ‘‘ਇਤਿ ਭਗਵਾ’’ਤਿਆਦਿ ਨਿਗਮਨਂ. ਯਾ ਦਿਸਾਤਿ ਯਾ ਮਾਤਾਪਿਤੁਆਦਿਲਕ੍ਖਣਾ ਪੁਰਤ੍ਥਿਮਾਦਿਦਿਸਾ. ਨਮਸ੍ਸਾਤਿ ਨਮਸ੍ਸੇਯ੍ਯਾਸੀਤਿ ਅਤ੍ਥੋ ‘‘ਯਥਾ ਕਥਂ ਪਨਾ’’ਤਿਆਦਿਕਾਯ ਗਹਪਤਿਪੁਤ੍ਤਸ੍ਸ ਪੁਚ੍ਛਾਯ ਵਸੇਨ ਦੇਸਨਾਯ ਆਰਦ੍ਧਤ੍ਤਾ ‘‘ਪੁਚ੍ਛਾਯ ਠਤ੍ਵਾ’’ਤਿ ਵੁਤ੍ਤਂ. ਅਕਥਿਤਂ ਨਤ੍ਥਿ ਗਿਹੀਹਿ ਕਤ੍ਤਬ੍ਬਕਮ੍ਮੇ ਅਪ੍ਪਮਾਦਪਟਿਪਤ੍ਤਿਯਾ ਅਨਵਸੇਸਤੋ ਕਥਿਤਤ੍ਤਾ. ਮਾਤਾਪਿਤੁਆਦੀਸੁ ਹਿ ਤੇਹਿ ਚ ਪਟਿਪਜ੍ਜਿਤਬ੍ਬਪਟਿਪਤ੍ਤਿਯਾ ਨਿਰਵਸੇਸਤੋ ਕਥਨੇਨੇਵ ਰਾਜਾਦੀਸੁਪਿ ਪਟਿਪਜ੍ਜਿਤਬ੍ਬਵਿਧਿ ਅਤ੍ਥਤੋ ਕਥਿਤੋ ਏਵ ਹੋਤੀਤਿ. ਗਿਹਿਨੋ ਵਿਨੀਯਨ੍ਤਿ, ਵਿਨਯਂ ਉਪੇਨ੍ਤਿ ਏਤੇਨਾਤਿ ਗਿਹਿਵਿਨਯੋ. ਯਥਾਨੁਸਿਟ੍ਠਨ੍ਤਿ ਯਥਾ ਇਧ ਸਤ੍ਥਾਰਾ ਅਨੁਸਿਟ੍ਠਂ ਗਿਹਿਚਾਰਿਤ੍ਤਂ, ਤਥਾ ਤੇਨ ਪਕਾਰੇਨ ਤਂ ਅਵਿਰਾਧੇਤ੍ਵਾ. ਪਟਿਪਜ੍ਜਮਾਨਸ੍ਸ ਵੁਦ੍ਧਿਯੇਵ ਪਾਟਿਕਙ੍ਖਾਤਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥੇਹਿ ਵੁਦ੍ਧਿਯੇਵ ਇਚ੍ਛਿਤਬ੍ਬਾ ਅਵਸ੍ਸਮ੍ਭਾਵਿਨੀਤਿ.
ਸਿਙ੍ਗਾਲਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ.