੬. ਪਾਸਾਦਿਕਸੁਤ੍ਤਵਣ੍ਣਨਾ

ਨਿਗਣ੍ਠਨਾਟਪੁਤ੍ਤਕਾਲਙ੍ਕਿਰਿਯਵਣ੍ਣਨਾ

੧੬੪. ਲਕ੍ਖਸ੍ਸ ਸਰਵੇਧਂ ਅਵਿਰਜ੍ਝਿਤ੍ਵਾਨ ਵਿਜ੍ਝਨਵਿਧਿਂ ਜਾਨਨ੍ਤੀਤਿ ਵੇਧਞ੍ਞਾ. ਤੇਨਾਹ ‘‘ਧਨੁਮ੍ਹਿ ਕਤਸਿਕ੍ਖਾ’’ਤਿ. ਸਿਪ੍ਪਂ ਉਗ੍ਗਹਣਤ੍ਥਾਯਾਤਿ ਧਨੁਸਿਪ੍ਪਾਦਿਸਿਪ੍ਪਸ੍ਸ ਉਗ੍ਗਹਣਤ੍ਥਾਯ. ਮਜ੍ਝਿਮੇਨ ਪਮਾਣੇਨ ਸਰਪਾਤਯੋਗ੍ਯਤਾਵਸੇਨ ਕਤਤ੍ਤਾ ਦੀਘਪਾਸਾਦੋ.

ਸਮ੍ਪਤਿ ਕਾਲਂ ਕਤੋਤਿ ਅਚਿਰਕਾਲਂ ਕਤੋ. ਦ੍ਵੇਧਿਕਜਾਤਾਤਿ ਜਾਤਦ੍ਵੇਧਿਕਾ ਸਞ੍ਜਾਤਭੇਦਾ. ਦ੍ਵੇਜ੍ਝਜਾਤਾਤਿ ਦੁਵਿਧਭਾਵਪ੍ਪਤ੍ਤਾ. ਭਣ੍ਡਨ੍ਤਿ ਪਰਿਭਾਸਨ੍ਤਿ ਏਤੇਨਾਤਿ ਭਣ੍ਡਨਂ, ਵਿਰੁਦ੍ਧਚਿਤ੍ਤਂ. ਤਨ੍ਤਿ ਭਣ੍ਡਨਂ. ‘‘ਇਦਂ ਨਹਾਨਾਦਿ ਨ ਕਤ੍ਤਬ੍ਬ’’ਨ੍ਤਿ ਪਞ੍ਞਤ੍ਤਵਤ੍ਤਂ ਪਣ੍ਣਤ੍ਤਿ. ਧਮ੍ਮਵਿਨਯਨ੍ਤਿ ਪਾਵਚਨਂ ਸਿਦ੍ਧਨ੍ਤਂ. ਵਿਜ੍ਝਨ੍ਤਾ ਮੁਖਸਤ੍ਤੀਹਿ. ਸਹਿਤਂ ਮੇਤਿ ਮਯ੍ਹਂ ਵਚਨਂ ਸਹਿਤਂ ਸਿਲਿਟ੍ਠਂ ਪੁਬ੍ਬਾਪਰਸਮ੍ਬਨ੍ਧਂ ਅਤ੍ਥਯੁਤ੍ਤਂ ਕਾਰਣਯੁਤ੍ਤਂ. ਤੇਨਾਹ ‘‘ਅਤ੍ਥਸਂਹਿਤ’’ਨ੍ਤਿ. ਅਧਿਚਿਣ੍ਣਨ੍ਤਿ ਆਚਿਣ੍ਣਂ. ਵਿਪਰਾਵਤ੍ਤਨ੍ਤਿ ਵਿਰੋਧਦਸ੍ਸਨਵਸੇਨ ਪਰਾਵਤ੍ਤਿਤਂ, ਪਰਾਵਤ੍ਤਂ ਦੂਸਿਤਨ੍ਤਿ ਅਤ੍ਥੋ. ਤੇਨਾਹ ‘‘ਚਿਰਕਾਲਵਸੇਨ ਪਗੁਣਂ, ਤਂ ਮਮ ਵਾਦਂ ਆਗਮ੍ਮ ਨਿਵਤ੍ਤ’’ਨ੍ਤਿ. ਪਰਿਯੇਸਮਾਨੋ ਵਿਚਰ ਤਤ੍ਥ ਗਨ੍ਤ੍ਵਾ ਸਿਕ੍ਖਾਤਿ ਅਤ੍ਥੋ. ਸਚੇ ਸਕ੍ਕੋਸਿ, ਇਦਾਨਿਯੇਵ ਮਯਾ ਵੇਠਿਤਂ ਦੋਸਂ ਨਿਬ੍ਬੇਠੇਹਿ. ਮਰਣਮੇਵਾਤਿ ਅਞ੍ਞਮਞ੍ਞਘਾਤਨਵਸੇਨ ਮਰਣਮੇਵ. ਨਾਟਪੁਤ੍ਤਸ੍ਸ ਇਮੇਤਿ ਨਾਟਪੁਤ੍ਤਿਯਾ, ਤੇ ਪਨ ਤਸ੍ਸ ਸਿਸ੍ਸਾਤਿ ਆਹ ‘‘ਅਨ੍ਤੇਵਾਸਿਕੇਸੂ’’ਤਿ. ਪੁਰਿਮਪਟਿਪਤ੍ਤਿਤੋ ਪਟਿਨਿਵਤ੍ਤਨਂ ਪਟਿਵਾਨਂ, ਤਂ ਰੂਪਂ ਸਭਾਵੋ ਏਤੇਸਨ੍ਤਿ ਪਟਿਵਾਨਰੂਪਾ. ਤੇਨਾਹ ‘‘ਨਿਵਤ੍ਤਨਸਭਾਵਾ’’ਤਿ. ਕਥਨਂ ਅਤ੍ਥਸ੍ਸ ਆਚਿਕ੍ਖਨਂ. ਪਵੇਦਨਂ ਹੇਤੁਦਾਹਰਣਾਨਿ ਆਹਰਿਤ੍ਵਾ ਬੋਧਨਂ. ਤੇਨਾਹ ‘‘ਦੁਪ੍ਪਵੇਦਿਤੇਤਿ ਦੁਵਿਞ੍ਞਾਪਿਤੇ’’ਤਿ. ਨ ਉਪਸਮਾਯ ਸਂਵਤ੍ਤਤੀਤਿ ਅਨੁਪਸਮਸਂਵਤ੍ਤਨਂ, ਤਦੇਵ ਅਨੁਪਸਮਸਂਵਤ੍ਤਨਿਕਂ, ਤਸ੍ਮਿਂ. ਸਮੁਸ੍ਸਿਤਂ ਹੁਤ੍ਵਾ ਪਤਿਟ੍ਠਾਹੇਤੁਭਾਵਤੋ ਥੂਪਂ, ਪਤਿਟ੍ਠਾਤਿ ਆਹ ‘‘ਭਿਨ੍ਨਥੂਪੇਤਿ ਭਿਨ੍ਨਪਤਿਟ੍ਠੇ’’ਤਿ, ਥੂਪੋਤਿ ਵਾ ਧਮ੍ਮਸ੍ਸ ਨਿਯ੍ਯਾਨਭਾਵੋ ਵੇਦਿਤਬ੍ਬੋ ਅਞ੍ਞੇ ਧਮ੍ਮੇ ਅਭਿਭੁਯ੍ਯ ਸਮੁਸ੍ਸਿਤਟ੍ਠੇਨ, ਸੋ ਨਿਗਣ੍ਠਸ੍ਸ ਸਮਯੇ. ਕੇਹਿਚਿ ਅਭਿਨ੍ਨਸਮ੍ਮਤੋਪਿ ਭਿਨ੍ਨੋ ਵਿਨਟ੍ਠੋ ਏਵ ਸਬ੍ਬੇਨ ਸਬ੍ਬਂ ਅਭਾਵਤੋਤਿ ਸੋ ਭਿਨ੍ਨਥੂਪੋ, ਸੋ ਏਵ ਨਿਯ੍ਯਾਨਭਾਵੋ ਵਟ੍ਟਦੁਕ੍ਖਤੋ ਮੁਚ੍ਚਿਤੁਕਾਮਾਨਂ ਪਟਿਸਰਣਂ, ਤਮੇਤ੍ਥ ਨਤ੍ਥੀਤਿ ਅਪ੍ਪਟਿਸਰਣੋ, ਤਸ੍ਮਿਂ ਭਿਨ੍ਨਥੂਪੇ ਅਪ੍ਪਟਿਸਰਣੇਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ.

ਆਚਰਿਯਪ੍ਪਮਾਣਨ੍ਤਿ ਆਚਰਿਯਮੁਟ੍ਠਿ ਹੁਤ੍ਵਾ ਪਮਾਣਭੂਤਂ. ਨਾਨਾਨੀਹਾਰੇਨਾਤਿ ਨਾਨਾਕਾਰੇਨ.

੧੬੫. ਤਥੇਵ ਸਮੁਦਾਚਰਿਂਸੁ ਭੂਤਪੁਬ੍ਬਗਤਿਯਾ. ਸਾਮਾਕਾਨਨ੍ਤਿ ਸਾਮਾਕਧਞ੍ਞਾਨਂ.

‘‘ਯੇਨਸ੍ਸ ਉਪਜ੍ਝਾਯੋ’’ਤਿ ਵਤ੍ਵਾ ਯਥਾਸ੍ਸ ਆਯਸ੍ਮਤੋ ਚੁਨ੍ਦਸ੍ਸ ਧਮ੍ਮਭਣ੍ਡਾਗਾਰਿਕੋ ਉਪਜ੍ਝਾਯੋ ਅਹੋਸਿ, ਤਂ ਵਿਤ੍ਥਾਰੇਨ ਦਸ੍ਸੇਤੁਂ ‘‘ਬੁਦ੍ਧਕਾਲੇ ਕਿਰਾ’’ਤਿਆਦਿ ਵੁਤ੍ਤਂ. ਤਤ੍ਥ ਬੁਦ੍ਧਕਾਲੇਤਿ ਭੂਤਕਥਨਮੇਤਂ, ਨ ਵਿਸੇਸਨਂ. ਸਤ੍ਥੁ ਪਰਿਨਿਬ੍ਬਾਨਤੋ ਪੁਰੇਤਰਮੇਵ ਹਿ ਧਮ੍ਮਸੇਨਾਪਤਿ ਪਰਿਨਿਬ੍ਬੁਤੋ.

ਧਮ੍ਮਰਤਨਪੂਜਾਵਣ੍ਣਨਾ

ਸਦ੍ਧਿਵਿਹਾਰਿਕਂ ਅਦਾਸੀਤਿ ਸਦ੍ਧਿਵਿਹਾਰਿਕਂ ਕਤ੍ਵਾ ਅਦਾਸਿ.

ਕਥਾਯ ਮੂਲਨ੍ਤਿ ਭਗਵਤੋ ਸਨ੍ਤਿਕਾ ਲਭਿਤਬ੍ਬਧਮ੍ਮਕਥਾਯ ਕਾਰਣਂ. ਸਮੁਟ੍ਠਾਪੇਤੀਤਿ ਉਟ੍ਠਾਪੇਤਿ, ਦਾਲਿਦ੍ਦਿਯਪਙ੍ਕਤੋ ਉਦ੍ਧਰਤੀਤਿ ਅਧਿਪ੍ਪਾਯੋ. ਸਨ੍ਧਮਨ੍ਤਿ ਸਮ੍ਮਦੇਵ ਧਮਨ੍ਤੋ. ਏਕੇਕਸ੍ਮਿਂ ਪਹਾਰੇਯੇਵ ਤਯੋ ਤਯੋ ਵਾਰੇ ਕਤ੍ਵਾ ਦਿਵਾ ਨਵਵਾਰੇ ਰਤ੍ਤਿਂ ਨਵਵਾਰੇ.ਉਪਟ੍ਠਾਨਮੇਵ ਗਚ੍ਛਤਿ ਬੁਦ੍ਧੁਪਟ੍ਠਾਨਵਸੇਨ, ਪਞ੍ਹਾਪੁਚ੍ਛਨਾਦਿਵਸੇਨ ਪਨ ਅਨ੍ਤਰਨ੍ਤਰਾਪਿ ਗਚ੍ਛਤੇਵ, ਗਚ੍ਛਨ੍ਤੋ ਚ ਦਿਵਸਸ੍ਸ…ਪੇ… ਗਚ੍ਛਤਿ. ਞਾਤੁਂ ਇਚ੍ਛਿਤਸ੍ਸ ਅਤ੍ਥਸ੍ਸ ਉਦ੍ਧਰਣਭਾਵਤੋ ਪਞ੍ਹੋਵ ਪਞ੍ਹੁਦ੍ਧਾਰੋ, ਤਂ ਗਹੇਤ੍ਵਾਵ ਗਚ੍ਛਤਿ ਅਤ੍ਤਨੋ ਮਹਾਪਞ੍ਞਤਾਯ, ਸਤ੍ਥੁ ਚ ਧਮ੍ਮਦੇਸਨਾਯਂ ਅਕਿਲਾਸੁਭਾਵਤੋ.

ਅਸਮ੍ਮਾਸਮ੍ਬੁਦ੍ਧਪ੍ਪਵੇਦਿਤਧਮ੍ਮਵਿਨਯਵਣ੍ਣਨਾ

੧੬੬. ਆਰੋਚਿਤੇਪਿ ਤਸ੍ਮਿਂ ਅਤ੍ਥੇ. ਸਾਮਿਕੋ ਹੋਤਿ, ਤਸ੍ਸ ਸਾਮਿਕਭਾਵਂ ਦਸ੍ਸੇਤੁਂ ‘‘ਸੋਵ ਤਸ੍ਸਾ ਆਦਿਮਜ੍ਝਪਰਿਯੋਸਾਨਂ ਜਾਨਾਤੀ’’ਤਿ ਆਹ. ਏਵਨ੍ਤਿ ਵਚਨਸਮ੍ਪਟਿਚ੍ਛਨਂ. ਚੁਨ੍ਦਤ੍ਥੇਰੇਨ ਹਿ ਆਨੀਤਂ ਕਥਾਪਾਭਤਂ ਭਗਵਾ ਸਮ੍ਪਟਿਚ੍ਛਨ੍ਤੋ ‘‘ਏਵ’’ਨ੍ਤਿ ਆਹ. ‘‘ਏਵ’’ਨ੍ਤਿ ਦੁਰਕ੍ਖਾਤੇ ਧਮ੍ਮਵਿਨਯੇ ਸਾਵਕਾਨਂ ਦ੍ਵੇਧਿਕਾਦਿਭਾਵੇਨ ਵਿਹਰਣਕਿਰਿਯਾਪਰਾਮਸਨਞ੍ਹੇਤਂ.

ਯਸ੍ਮਾ …ਪੇ… ਪਾਕਟਂ ਹੋਤਿ ਬ੍ਯਤਿਰੇਕਮੁਖੇਨ ਚ ਨੇਯ੍ਯਸ੍ਸ ਅਤ੍ਥਸ੍ਸ ਵਿਭੂਤਭਾਵਾਪਤ੍ਤਿਤੋ. ਅਥ ਵਾ ਯਸ੍ਮਾ…ਪੇ… ਪਾਕਟਂ ਹੋਤਿ ਦੋਸੇਸੁ ਆਦੀਨਵਦਸ੍ਸਨੇਨ ਤਪ੍ਪਟਿਪਕ੍ਖੇਸੁ ਗੁਣੇਸੁ ਆਨਿਸਂਸਸ੍ਸ ਵਿਭੂਤਭਾਵਾਪਤ੍ਤਿਤੋ. ਵੋਕ੍ਕਮ੍ਮਾਤਿ ਅਪਸਕ੍ਕੇਤ੍ਵਾ. ਆਮੇਡਿਤਲੋਪੇਨ ਚਾਯਂ ਨਿਦ੍ਦੇਸੋ, ਵੋਕ੍ਕਮ੍ਮ ਵੋਕ੍ਕਮ੍ਮਾਤਿ ਵੁਤ੍ਤਂ ਹੋਤਿ, ਤੇਨ ਤਸ੍ਸ ਵੋਕ੍ਕਮਨਸ੍ਸ ਅਨ੍ਤਰਨ੍ਤਰਾਤਿ ਅਯਮਤ੍ਥੋ ਲਬ੍ਭਤੀਤਿ ਆਹ ‘‘ਨ ਨਿਰਨ੍ਤਰ’’ਨ੍ਤਿਆਦਿ. ਧਮ੍ਮਾਨੁਧਮ੍ਮਪਟਿਪਤ੍ਤਿਆਦਯੋਤਿ ਤੇਨ ਸਤ੍ਥਾਰਾ ਵੁਤ੍ਤਮੁਤ੍ਤਿਧਮ੍ਮਸ੍ਸ ਅਨੁਧਮ੍ਮਂ ਅਪ੍ਪਟਿਪਜ੍ਜਨਾਦਯੋ. ਆਦਿ-ਸਦ੍ਦੇਨ ਪਾਲ਼ਿਯਂ ਆਗਤਾ ਅਸਾਮੀਚਿਪਟਿਪਦਾਦਯੋ ਚ ਸਙ੍ਗਯ੍ਹਨ੍ਤਿ. ਮਨੁਸ੍ਸਤ੍ਤਮ੍ਪੀਤਿ ਪਿ-ਸਦ੍ਦੇਨ ‘‘ਵਿਚਾਰਣਪਞ੍ਞਾਯ ਅਸਮ੍ਭਵੋ, ਦੋਸੇਸੁ ਅਨਭਿਨਿਵੇਸਿਤਾ, ਅਸਨ੍ਦਿਟ੍ਠਿਪਰਾਮਾਸਿਤਾ’’ਤਿ ਏਵਮਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ‘‘ਤਥਾ ਏਵ’’ਨ੍ਤਿ ਪਦੇਹਿ ਯਥਾਕ੍ਕਮਂ ਪਕਾਰਸ੍ਸ ਕਾਮਂ ਤਿਰੋਕ੍ਖਤਾ, ਪਚ੍ਚਕ੍ਖਤਾ ਵੁਚ੍ਚਤਿ, ਤਥਾਪਿ ਯਥਾ ‘‘ਤਥਾ ਪਟਿਪਜ੍ਜਤੂ’’ਤਿ ਪਦੇਨ ਪਟਿਪਜ੍ਜਨਾਕਾਰੋ ਨਿਯਮੇਤ੍ਵਾ ਵਿਹਿਤੋ, ਤਥਾ ‘‘ਏਵਂ ਪਟਿਪਜ੍ਜਤੂ’’ਤਿ ਇਮਿਨਾਪੀਤਿ ਇਦਂ ਤਸ੍ਸ ਅਤ੍ਥਦਸ੍ਸਨਭਾਵੇਨ ਵੁਤ੍ਤਂ. ਸਮਾਦਪਿਤਤ੍ਤਾ ਮਿਚ੍ਛਾਪਟਿਪਦਾਯ ਅਪੁਞ੍ਞਂ ਪਸਵਤਿ.

੧੬੭. ਞਾਯਤਿ ਮੁਤ੍ਤਿਧਮ੍ਮੋ ਏਤੇਨਾਤਿ ਞਾਯੋ, ਤੇਨ ਸਤ੍ਥਾਰਾ ਵੁਤ੍ਤੋ ਧਮ੍ਮਾਨੁਧਮ੍ਮੋ, ਤਂ ਪਟਿਪਨ੍ਨੋਤਿ ਞਾਯਪ੍ਪਟਿਪਨ੍ਨੋ, ਸੋ ਪਨ ਯਸ੍ਮਾ ਤਸ੍ਸ ਮੁਤ੍ਤਿਧਮ੍ਮਸ੍ਸ ਅਧਿਗਮੇ ਕਾਰਣਸਮ੍ਮਤੋ, ਤਸ੍ਮਾ ਵੁਤ੍ਤਂ ‘‘ਕਾਰਣਪ੍ਪਟਿਪਨ੍ਨੋ’’ਤਿ. ਨਿਪ੍ਫਾਦੇਸ੍ਸਤੀਤਿ ਸਾਧੇਸ੍ਸਤਿ, ਸਿਦ੍ਧਿਂ ਗਮਿਸ੍ਸਤੀਤਿ ਵੁਤ੍ਤਂ ਹੋਤਿ. ਦੁਕ੍ਖਨਿਬ੍ਬਤ੍ਤਕਨ੍ਤਿ ਸਮ੍ਪਤਿ, ਆਯਤਿਞ੍ਚ ਦੁਕ੍ਖਸ੍ਸ ਨਿਬ੍ਬਤ੍ਤਕਂ. ਵੀਰਿਯਂ ਕਰੋਤਿ ਮਿਚ੍ਛਾਪਟਿਪਨ੍ਨਤ੍ਤਾ.

ਸਮ੍ਮਾਸਮ੍ਬੁਦ੍ਧਪ੍ਪਵੇਦਿਤਧਮ੍ਮਵਿਨਯਾਦਿਵਣ੍ਣਨਾ

੧੬੮. ਨਿਯ੍ਯਾਤੀਤਿ ਵਤ੍ਤਤਿ, ਸਂਵਤ੍ਤਤੀਤਿ ਵਾ ਅਤ੍ਥੋ.

੧੭੦. ਇਧ ਸਾਵਕਸ੍ਸ ਸਮ੍ਮਾਪਟਿਪਤ੍ਤਿਯਾ ਏਕਨ੍ਤਿਕਅਪਸ੍ਸਯਦਸ੍ਸਨਤ੍ਥਂ ਸਤ੍ਥੁ ਸਮ੍ਮਾਸਮ੍ਬੁਦ੍ਧਤਾ, ਧਮ੍ਮਸ੍ਸ ਚ ਸ੍ਵਾਕ੍ਖਾਤਤਾ ਕਿਤ੍ਤਿਤਾਤਿ ‘‘ਸਮ੍ਮਾਪਟਿਪਨ੍ਨਸ੍ਸ ਕੁਲਪੁਤ੍ਤਸ੍ਸ ਪਸਂਸਂ ਦਸ੍ਸੇਤ੍ਵਾ’’ਤਿ ਵੁਤ੍ਤਂ. ਏਵਞ੍ਹਿ ਇਮਿਸ੍ਸਾ ਦੇਸਨਾਯ ਸਂਕਿਲੇਸਭਾਗਿਯਭਾਵੇਨ ਉਟ੍ਠਿਤਾਯ ਵੋਦਾਨਭਾਗਿਯਭਾਵੇਨ ਯਥਾਨੁਸਨ੍ਧਿਨਾ ਪਵਤ੍ਤਿ ਦੀਪਿਤਾ ਹੋਤਿ. ਅਬੋਧਿਤਤ੍ਥਾਤਿ ਅਪ੍ਪਵੇਦਿਤਤ੍ਥਾ, ਪਰਮਤ੍ਥਂ ਚਤੁਤ੍ਥਸਚ੍ਚਪਟਿਵੇਧਂ ਅਪਾਪਿਤਾਤਿ ਅਤ੍ਥੋ. ਪਾਲ਼ਿਯਂ ‘‘ਅਸ੍ਸਾ’’ਤਿ ਪਦਂ ‘‘ਸਾਵਕਾ ਸਦ੍ਧਮ੍ਮੇ’’ਤਿ ਦ੍ਵੀਹਿ ਪਦੇਹਿ ਯੋਜੇਤਬ੍ਬਂ ‘‘ਅਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਸਾਵਕਾ, ਅਸ੍ਸ ਸਦ੍ਧਮ੍ਮੇ’’ਤਿ. ਸਬ੍ਬਸਙ੍ਗਹਪਦੇਹਿ ਕਤਨ੍ਤਿ ਸਬ੍ਬਸ੍ਸ ਸਾਸਨਤ੍ਥਸ੍ਸ ਸਙ੍ਗਣ੍ਹਨਪਦੇਹਿ ਏਕਜ੍ਝਂ ਕਤਂ. ਤੇਨਾਹ ‘‘ਸਬ੍ਬਸਙ੍ਗਾਹਿਕਂ ਕਤਂ ਨ ਹੋਤੀਤਿ ਅਤ੍ਥੋ’’ਤਿ. ਪੁਬ੍ਬੇਨਾਪਰਂ ਸਮ੍ਬਨ੍ਧਤ੍ਥਭਾਵੇਨ ਸਙ੍ਗਹੇਤਬ੍ਬਤਾਯ ਵਾ ਸਙ੍ਗਹਾਨਿ ਪਦਾਨਿ ਕਤਾਨਿ ਏਤਸ੍ਸਾਤਿ ਸਙ੍ਗਹਪਦਕਤਂ, ਬ੍ਰਹ੍ਮਚਰਿਯਂ. ਤਪ੍ਪਟਿਕ੍ਖੇਪੇਨ ਨ ਚ ਸਙ੍ਗਹਪਦਕਤਨ੍ਤਿ ਯੋਜਨਾ. ਰਾਗਾਦਿਪਟਿਪਕ੍ਖਹਰਣਂ, ਯਥਾਨੁਸਿਟ੍ਠਂ ਵਾ ਪਟਿਪਜ੍ਜਮਾਨਾਨਂ ਵਟ੍ਟਦੁਕ੍ਖਤੋ ਪਟਿਹਰਣਂ ਨਿਬ੍ਬਾਨਪਾਪਨਂ ਪਟਿਹਾਰੋ, ਸੋ ਏਵ ਆ-ਕਾਰਸ੍ਸ ਇ-ਕਾਰਂ ਕਤ੍ਵਾ ਪਟਿਹਿਰੋ, ਪਟਿਹਿਰੋ ਏਵ ਪਾਟਿਹਿਰੋ, ਸਹ ਪਾਟਿਹਿਰੇਨਾਤਿ ਸਪ੍ਪਾਟਿਹਿਰਂ, ਤਥਾ ਸੁਪ੍ਪਵੇਦਿਤਤਾਯ ਸਪ੍ਪਾਟਿਹਿਰਂ ਕਤਨ੍ਤਿ ਸਪ੍ਪਾਟਿਹਿਰਕਤਂ. ਤਾਦਿਸਂ ਪਨ ਵਟ੍ਟਤੋ ਨਿਯ੍ਯਾਨੇ ਨਿਯੁਤ੍ਤਂ, ਨਿਯ੍ਯਾਨਪ੍ਪਯੋਜਨਞ੍ਚ ਹੋਤੀਤਿ ਆਹ ‘‘ਨਿਯ੍ਯਾਨਿਕ’’ਨ੍ਤਿ. ਦੇਵਲੋਕਤੋਤਿ ਦੇਵਲੋਕਤੋ ਪਟ੍ਠਾਯ ਰੂਪੀਦੇਵਨਿਕਾਯਤੋ ਪਭੁਤਿ. ਸੁਪ੍ਪਕਾਸਿਤਨ੍ਤਿ ਸੁਟ੍ਠੁ ਪਕਾਸਿਤਂ. ਯਾਵ ਦੇਵਮਨੁਸ੍ਸੇਹੀਤਿ ਵਾ ਯਾਵ ਦੇਵਮਨੁਸ੍ਸੇਹਿ ਯਤ੍ਤਕਾ ਦੇਵਾ ਮਨੁਸ੍ਸਾ ਚ, ਤਾਵ ਤੇ ਸਬ੍ਬੇ ਅਭਿਬ੍ਯਾਪੇਤ੍ਵਾ ਸੁਪ੍ਪਕਾਸਿਤਂ. ਅਨੁਤਾਪਾਯ ਹੋਤੀਤਿ ਅਨੁਤਪ੍ਪੋ, ਸੋ ਪਨ ਅਨੁਤਾਪਂ ਕਰੋਨ੍ਤੋ ਵਿਯ ਹੋਤੀਤਿ ਵੁਤ੍ਤਂ ‘‘ਅਨੁਤਾਪਕਰੋ ਹੋਤੀ’’ਤਿ.

੧੭੨. ਥਿਰੋਤਿ ਠਿਤਧਮ੍ਮੋ ਕੇਨਚਿ ਅਸਂਹਾਰਿਯੋ, ਅਸੇਕ੍ਖਾ ਸੀਲਕ੍ਖਨ੍ਧਾਦਯੋ ਥੇਰਕਾਰਕਾ ਧਮ੍ਮਾ.

੧੭੩. ਯੋਗੇਹਿ ਖੇਮਤ੍ਤਾਤਿ ਯੋਗੇਹਿ ਅਨੁਪਦ੍ਦੁਤਤ੍ਤਾ. ਸਦ੍ਧਮ੍ਮਸ੍ਸਾਤਿ ਅਸ੍ਸ ਸਦ੍ਧਮ੍ਮਸ੍ਸ. ਅਸ੍ਸਾਤਿ ਚ ਅਸ੍ਸ ਸਤ੍ਥੁਨੋ.

੧੭੪. ਉਪਾਸਕਾ ਬ੍ਰਹ੍ਮਚਾਰਿਨੋ ਨਾਮ ਵਿਸੇਸਤੋ ਅਨਾਗਾਮਿਨੋ. ਸੋਤਾਪਨ੍ਨਸਕਦਾਗਾਮਿਨੋਪਿ ਤਾਦਿਸਾ ਤਥਾ ਵੁਚ੍ਚਨ੍ਤੀਤਿ ‘‘ਬ੍ਰਹ੍ਮਚਰਿਯਵਾਸਂ ਵਸਮਾਨਾ ਅਰਿਯਸਾਵਕਾ’’ ਇਚ੍ਚੇਵ ਵੁਤ੍ਤਂ.

੧੭੬. ਸਬ੍ਬਕਾਰਣਸਮ੍ਪਨ੍ਨਨ੍ਤਿ ਯਤ੍ਤਕੇਹਿ ਕਾਰਣੇਹਿ ਸਮ੍ਪਨ੍ਨਂ ਨਾਮ ਹੋਤਿ, ਤੇਹਿ ਸਬ੍ਬੇਹਿ ਕਾਰਣੇਹਿ ਸਮ੍ਪਨ੍ਨਂ ਸਮ੍ਪਤ੍ਤਂ ਉਪਗਤਂ ਪਰਿਪੁਣ੍ਣਂ, ਸਮਨ੍ਨਾਗਤਂ ਵਾ. ਇਮਮੇਵ ਧਮ੍ਮਨ੍ਤਿ ਇਮਮੇਵ ਸਾਸਨਧਮ੍ਮਂ.

ਉਦਕੇਨ ਪਦੇਸਞ੍ਞੁਨਾ ਅਤ੍ਤਨੋ ਪਞ੍ਞਾਵੇਯ੍ਯਤ੍ਤਿਯਤਂ ਦਸ੍ਸੇਤੁਂ ਅਨਿਯ੍ਯਾਨਿਕੇ ਅਤ੍ਥੇ ਪਯੁਤ੍ਤਂ ਪਹੇਲ਼ਿਕਸਦਿਸਂ ਵਚਨਂ, ਭਗਵਤਾ ਅਤ੍ਤਨੋ ਸਬ੍ਬਞ੍ਞੁਤਾਯ ਨਿਯ੍ਯਾਨਿਕੇ ਅਤ੍ਥੇ ਯੋਜੇਤ੍ਵਾ ਦਸ੍ਸੇਤੁਂ ‘‘ਉਦਕੋ ਸੁਦ’’ਨ੍ਤਿਆਦਿ ਵੁਤ੍ਤਨ੍ਤਿ ਤਂ ਦਸ੍ਸੇਤੁਂ ‘‘ਸੋ ਕਿਰਾ’’ਤਿਆਦਿਮਾਹ.

ਸਙ੍ਗਾਯਿਤਬ੍ਬਧਮ੍ਮਾਦਿਵਣ੍ਣਨਾ

੧੭੭. ਸਙ੍ਗਮ੍ਮ ਸਮਾਗਮ੍ਮਾਤਿ ਤਸ੍ਮਿਂਯੇਵ ਠਾਨੇ ਲਬ੍ਭਮਾਨਾਨਂ ਗਤਿਵਸੇਨ ਸਙ੍ਗਮ੍ਮ ਠਾਨਨ੍ਤਰਤੋ ਪਕ੍ਕੋਸਨੇਨ ਸਮਾਗਤਾਨਂ ਵਸੇਨ ਸਮਾਗਮ੍ਮ. ਤੇਨਾਹ ‘‘ਸਙ੍ਗਨ੍ਤ੍ਵਾ ਸਮਾਗਨ੍ਤ੍ਵਾ’’ਤਿ. ਅਤ੍ਥੇਨ ਅਤ੍ਥਨ੍ਤਿ ਪਦਨ੍ਤਰੇ ਆਗਤਅਤ੍ਥੇਨ ਸਹ ਤਤ੍ਥ ਤਤ੍ਥ ਆਗਤਮਤ੍ਥਂ. ਬ੍ਯਞ੍ਜਨੇਨ ਬ੍ਯਞ੍ਜਨਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਸਮਾਨੇਨ੍ਤੇਹੀਤਿ ਸਮਾਨਂ ਕਰੋਨ੍ਤੇਹਿ, ਓਪਮ੍ਮਂ ਵਾ ਆਨੇਨ੍ਤੇਹਿ. ਸਙ੍ਗਾਯਿਤਬ੍ਬਨ੍ਤਿ ਸਮ੍ਮਦੇਵ ਗਾਯਿਤਬ੍ਬਂ ਕਥੇਤਬ੍ਬਂ, ਤਂ ਪਨ ਸਙ੍ਗਾਯਨਂ ਵਾਚਨਾਮਗ੍ਗੋਤਿ ਆਹ ‘‘ਵਾਚੇਤਬ੍ਬ’’ਨ੍ਤਿ.

੧੭੮. ਤਸ੍ਸ ਵਾ ਭਾਸਿਤੇਤਿ ਤਸ੍ਸ ਭਿਕ੍ਖੁਨੋ ਭਾਸਿਤੇ ਅਤ੍ਥੇ ਚੇਵ ਬ੍ਯਞ੍ਜਨੇ ਚ. ਅਤ੍ਥਮਿਚ੍ਛਾਗਹਣਰੋਪਨਾਨਿ ਯਥਾ ਹੋਨ੍ਤਿ, ਤਂ ਦਸ੍ਸੇਤੁਂ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿਆਦਿ ਵੁਤ੍ਤਂ. ਆਰਮ੍ਮਣਂ ‘‘ਸਤਿਪਟ੍ਠਾਨ’’ਨ੍ਤਿ ਗਣ੍ਹਾਤਿ, ਨ ਸਤਿਯੇਵ ‘‘ਸਤਿਪਟ੍ਠਾਨ’’ਨ੍ਤਿ. ‘‘ਸਤਿਪਟ੍ਠਾਨਾਨੀ’’ਤਿ ਬ੍ਯਞ੍ਜਨਂ ਰੋਪੇਤਿ ਤਸ੍ਮਿਂ ਅਤ੍ਥੇ, ਨ ‘‘ਸਤਿਪਟ੍ਠਾਨਾ’’ਤਿ. ਉਪਪਨ੍ਨਤਰਾਨੀਤਿ ਯੁਤ੍ਤਤਰਾਨਿ. ਅਲ੍ਲੀਨਤਰਾਨੀਤਿ ਸਿਲਿਟ੍ਠਤਰਾਨਿ. ਯਾ ਚੇਵਾਤਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ, ਵਿਭਤ੍ਤਿਲੋਪੇਨ ਵਾ. ਪੁਨ ਯਾ ਚੇਵਾਤਿ ਲਿਙ੍ਗਵਿਪਲ੍ਲਾਸੇਨੇਵ ਨਿਦ੍ਦੇਸੋ. ਨੇਵ ਉਸ੍ਸਾਦੇਤਬ੍ਬੋਤਿ ਨ ਉਕ੍ਕਂਸੇਤਬ੍ਬੋ ਵਿਰਜ੍ਝਿਤ੍ਵਾ ਵੁਤ੍ਤਤ੍ਤਾ. ਨ ਅਪਸਾਦੇਤਬ੍ਬੋਤਿ ਨ ਸਨ੍ਤਜ੍ਜੇਤਬ੍ਬੋ ਵਿਵਾਦਪਰਿਹਰਣਤ੍ਥਂ. ਧਾਰਣਤ੍ਥਨ੍ਤਿ ਉਪਧਾਰਣਤ੍ਥਂ ਸਲ੍ਲਕ੍ਖਣਤ੍ਥਂ.

੧੮੧. ਅਤ੍ਥੇਨ ਉਪੇਤਨ੍ਤਿ ਅਵਿਪਰੀਤੇਨ ਅਤ੍ਥੇਨ ਉਪੇਤਂ ਤਂ ‘‘ਅਯਮੇਤ੍ਥ ਅਤ੍ਥੋ’’ਤਿ ਉਪੇਚ੍ਚ ਪਟਿਜਾਨਿਤ੍ਵਾ ਠਿਤਂ. ਤਥਾਰੂਪੋ ਚ ਤਸ੍ਸ ਬੁਜ੍ਝਿਤਾ ਨਾਮ ਹੋਤੀਤਿ ਆਹ ‘‘ਅਤ੍ਥਸ੍ਸ ਵਿਞ੍ਞਾਤਾਰ’’ਨ੍ਤਿ. ਏਵਮੇਤਂ ਭਿਕ੍ਖੁਂ ਪਸਂਸਥਾਤਿ ਵੁਤ੍ਤਨਯੇਨ ਧਮ੍ਮਭਾਣਕਂ ਅਮੁਂ ਭਿਕ੍ਖੁਂ ‘‘ਏਵਂ ਲਾਭਾ ਨੋ ਆਵੁਸੋ’’ਤਿਆਦਿਆਕਾਰੇਨ ਪਸਂਸਥ. ਇਦਾਨਿਸ੍ਸ ਪਸਂਸਭਾਵਂ ਦਸ੍ਸੇਤੁਂ ‘‘ਏਸੋ ਹੀ’’ਤਿਆਦਿ ਵੁਤ੍ਤਂ. ਏਸਾਤਿ ਪਰਿਯਤ੍ਤਿਧਮ੍ਮਸ੍ਸ ਸਤ੍ਥੁਕਿਚ੍ਚਕਰਣਤੋ, ਤਤ੍ਥ ਚਸ੍ਸ ਸਮ੍ਮਦੇਵ ਅਵਟ੍ਠਿਤਭਾਵਤੋ ‘‘ਬੁਦ੍ਧੋ ਨਾਮ ਏਸਾ’’ਤਿ ਵੁਤ੍ਤੋ. ‘‘ਲਾਭਾ ਨੋ’’ਤਿਆਦਿਨਾ ਚਸ੍ਸ ਭਿਕ੍ਖੂਨਂ ਪਿਯਗਰੁਭਾਵਂ ਵਿਭਾਵੇਨ੍ਤੋ ਸਤ੍ਥਾ ਤਂ ਅਤ੍ਤਨੋ ਠਾਨੇ ਠਪੇਸੀਤਿ ਵੁਤ੍ਤੋ.

ਪਚ੍ਚਯਾਨੁਞ੍ਞਾਤਕਾਰਣਾਦਿਵਣ੍ਣਨਾ

੧੮੨. ਤਤੋਪਿ ਉਤ੍ਤਰਿਤਰਨ੍ਤਿ ਯਾ ਪੁਬ੍ਬੇ ਸਮ੍ਮਾਪਟਿਪਨ੍ਨਸ੍ਸ ਭਿਕ੍ਖੁਨੋ ਪਸਂਸਨਵਸੇਨ ‘‘ਇਧ ਪਨ ਚੁਨ੍ਦ ਸਤ੍ਥਾ ਚ ਹੋਤਿ ਸਮ੍ਮਾਸਮ੍ਬੁਦ੍ਧੋ’’ਤਿਆਦਿਨਾ (ਦੀ. ਨਿ. ੩.੧੬੭, ੧੬੯) ਪਵਤ੍ਤਿਤਦੇਸਨਾਯ ਉਪਰਿ ‘‘ਇਧ ਚੁਨ੍ਦ ਸਤ੍ਥਾ ਚ ਲੋਕੇ ਉਦਪਾਦੀ’’ਤਿਆਦਿਨਾ (ਦੀ. ਨਿ. ੩.੧੭੦, ੧੭੧) ਦੇਸਨਾ ਵਡ੍ਢਿਤਾ. ਤਤੋਪਿ ਉਤ੍ਤਰਿਤਰਂ ਸਵਿਸੇਸਂ ਦੇਸਨਂ ਵਡ੍ਢੇਨ੍ਤੋ ‘‘ਪਚ੍ਚਯਹੇਤੂ’’ਤਿਆਦਿਮਾਹ. ਤਤ੍ਥ ਪਚ੍ਚਯਹੇਤੂਤਿ ਪਚ੍ਚਯਸਂਵਤ੍ਤਨਹੇਤੁ. ਉਪ੍ਪਜ੍ਜਨਕਾ ਆਸਵਾਤਿ ਪਚ੍ਚਯਾਨਂ ਪਰਿਯੇਸਨਹੇਤੁ ਚੇਵ ਪਰਿਭੋਗਹੇਤੁ ਚ ਉਪ੍ਪਜ੍ਜਨਕਾ ਕਾਮਾਸਵਾਦਯੋ. ਤੇਸਂ ਦਿਟ੍ਠਧਮ੍ਮਿਕਾਨਂ ਆਸਵਾਨਂ ‘‘ਇਧ, ਭਿਕ੍ਖਵੇ, ਅਰਿਯਸਾਵਕੋ ਮਿਚ੍ਛਾਆਜੀਵਂ ਪਹਾਯ ਸਮ੍ਮਾਆਜੀਵੇਨ ਜੀਵਿਤਂ ਕਪ੍ਪੇਤੀ’’ਤਿ (ਸਂ. ਨਿ. ੫.੮) ‘‘ਇਧ, ਭਿਕ੍ਖਵੇ, ਭਿਕ੍ਖੁ ਪਟਿਸਙ੍ਖਾ ਯੋਨਿਸੋ ਚੀਵਰਂ ਪਟਿਸੇਵਤੀ’’ਤਿਆਦਿਨਾ (ਮ. ਨਿ. ੧.੨੩; ਅ. ਨਿ. ੬.੫੮) ਚ ਸਮ੍ਮਾਪਟਿਪਤ੍ਤਿਂ ਉਪਦਿਸਨ੍ਤੋ ਭਗਵਾ ਪਟਿਘਾਤਾਯ ਧਮ੍ਮਂ ਦੇਸੇਤਿ ਨਾਮ. ‘‘ਯੋ ਤੁਮ੍ਹੇਸੁ ਪਾਲ਼ਿਯਾ ਅਤ੍ਥਬ੍ਯਞ੍ਜਨਾਨਿ ਮਿਚ੍ਛਾ ਗਣ੍ਹਾਤਿ, ਸੋ ਨੇਵ ਉਸ੍ਸਾਦੇਤਬ੍ਬੋ, ਨ ਅਪਸਾਦੇਤਬ੍ਬੋ, ਸਾਧੁਕਂ ਸਞ੍ਞਾਪੇਤਬ੍ਬੋ ਤਸ੍ਸੇਵ ਅਤ੍ਥਸ੍ਸ ਨਿਸਨ੍ਤਿਯਾ’’ਤਿ ਏਵਂ ਪਰਿਯਤ੍ਤਿਧਮ੍ਮੇ ਮਿਚ੍ਛਾਪਟਿਪਨ੍ਨੇ ਸਮ੍ਮਾਪਟਿਪਤ੍ਤਿਯਂ ਭਿਕ੍ਖੂ ਨਿਯੋਜੇਨ੍ਤੋ ਭਗਵਾ ਭਣ੍ਡਨਹੇਤੁ ਉਪ੍ਪਜ੍ਜਨਕਾਨਂ ਸਮ੍ਪਰਾਯਿਕਾਨਂ ਆਸਵਾਨਂ ਪਟਿਘਾਤਾਯ ਧਮ੍ਮਂ ਦੇਸੇਤਿ ਨਾਮ. ਯਥਾ ਤੇ ਨ ਪਵਿਸਨ੍ਤੀਤਿ ਤੇ ਆਸਵਾ ਅਤ੍ਤਨੋ ਚਿਤ੍ਤਸਨ੍ਤਾਨਂ ਯਥਾ ਨ ਓਤਰਨ੍ਤਿ. ਮੂਲਘਾਤੇਨ ਪਟਿਹਨਨਾਯਾਤਿ ਯਥਾ ਮੂਲਘਾਤੋ ਹੋਤਿ, ਏਵਂ ਮੂਲਘਾਤਵਸੇਨ ਪਜਹਨਾਯ. ਤਨ੍ਤਿ ਚੀਵਰਂ. ਯਥਾ ਚੀਵਰਂ ਇਦਮਤ੍ਥਿਕਤਮੇਵ ਉਪਾਦਾਯ ਅਨੁਞ੍ਞਾਤਂ, ਏਵਂ ਪਿਣ੍ਡਪਾਤਾਦਯੋਪਿ.

ਸੁਖਲ੍ਲਿਕਾਨੁਯੋਗਾਦਿਵਣ੍ਣਨਾ

੧੮੩. ਸੁਖਿਤਨ੍ਤਿ ਸਞ੍ਜਾਤਸੁਖਂ. ਪੀਣਿਤਨ੍ਤਿ ਧਾਤਂ ਸੁਹਿਤਂ. ਤਥਾਭੂਤੋ ਪਨ ਯਸ੍ਮਾ ਥੂਲਸਰੀਰੋ ਹੋਤਿ, ਤਸ੍ਮਾ ‘‘ਥੂਲਂ ਕਰੋਤੀ’’ਤਿ ਵੁਤ੍ਤਂ.

੧੮੬. ਨਠਿਤਸਭਾਵਾਤਿ ਅਨਵਟ੍ਠਿਤਸਭਾਵਾ, ਏਵਰੂਪਾਯ ਕਥਾਯ ਅਨਵਟ੍ਠਾਨਭਾਵਤੋ ਸਭਾਵੋਪਿ ਤੇਸਂ ਅਨਵਟ੍ਠਿਤੋਤਿ ਅਧਿਪ੍ਪਾਯੋ. ਤੇਨਾਹ ‘‘ਜਿਵ੍ਹਾ ਨੋ ਅਤ੍ਥੀ’’ਤਿਆਦਿ. ਕਾਮਂ ‘‘ਪਞ੍ਚਹਿ ਚਕ੍ਖੂਹੀ’’ਤਿ ਵੁਤ੍ਤਂ, ਅਗ੍ਗਹਿਤਗ੍ਗਹਣੇਨ ਪਨ ਚਤ੍ਤਾਰਿ ਚਕ੍ਖੂਨਿ ਵੇਦਿਤਬ੍ਬਾਨਿ. ਸਬ੍ਬਞ੍ਞੁਤਞ੍ਞਾਣਞ੍ਹਿ ਸਮਨ੍ਤਚਕ੍ਖੂਤਿ. ਤਸ੍ਸ ਵਾ ਞੇਯ੍ਯਧਮ੍ਮੇਸੁ ਜਾਨਨਵਸੇਨ ਪਵਤ੍ਤਿਂ ਉਪਾਦਾਯ ‘‘ਜਾਨਤਾ’’ਤਿ ਵੁਤ੍ਤਂ. ਹਤ੍ਥਾਮਲਕਂ ਵਿਯ ਪਚ੍ਚਕ੍ਖਤੋ ਦਸ੍ਸਨਵਸੇਨ ਪਵਤ੍ਤਿਂ ਉਪਾਦਾਯ ‘‘ਪਸ੍ਸਤਾ’’ਤਿ ਵੁਤ੍ਤਂ. ਨੇਮਂ ਵੁਚ੍ਚਤਿ ਥਮ੍ਭਾਦੀਹਿ ਅਨੁਪਵਿਟ੍ਠਭੂਮਿਪ੍ਪੇਦੇਸੋਤਿ ਆਹ ‘‘ਗਮ੍ਭੀਰਭੂਮਿਂ ਅਨੁਪਵਿਟ੍ਠੋ’’ਤਿ. ਸੁਟ੍ਠੁ ਨਿਖਾਤੋਤਿ ਭੂਮਿਂ ਨਿਖਨਿਤ੍ਵਾ ਸਮ੍ਮਦੇਵ ਠਪਿਤੋ. ਤਸ੍ਮਿਨ੍ਤਿ ਖੀਣਾਸਵੇ. ਅਨਜ੍ਝਾਚਾਰੋ ਅਚਲੋ ਅਸਮ੍ਪਵੇਧੀ, ਯਸ੍ਮਾ ਅਜ੍ਝਾਚਾਰੋ ਸੇਤੁਘਾਤੋ ਖੀਣਾਸਵਾਨਂ. ਸੋਤਾਪਨ੍ਨਾਦਯੋਤਿ ਏਤ੍ਥ ਆਦਿ-ਸਦ੍ਦੇਨ ਗਹਿਤੇਸੁ ਅਨਾਗਾਮਿਨੋ ਤਾਵ ਨਵਸੁਪਿ ਠਾਨੇਸੁ ਖੀਣਾਸਵਾ ਵਿਯ ਅਭਬ੍ਬਾ, ਸੋਤਾਪਨ੍ਨਸਕਦਾਗਾਮਿਨੋ ਪਨ ‘‘ਤਤਿਯਪਞ੍ਚਮਟ੍ਠਾਨੇਸੁ ਅਭਬ੍ਬਾ’’ਤਿ ਨ ਵਤ੍ਤਬ੍ਬਾ, ਇਤਰੇਸੁ ਸਤ੍ਤਸੁ ਠਾਨੇਸੁ ਅਭਬ੍ਬਾਵ.

ਪਞ੍ਹਬ੍ਯਾਕਰਣਵਣ੍ਣਨਾ

੧੮੭. ਗਿਹਿਬ੍ਯਞ੍ਜਨੇਨਾਤਿ ਗਿਹਿਲਿਙ੍ਗੇਨ. ਖੀਣਾਸਵੋ ਪਨ ਗਿਹਿਬ੍ਯਞ੍ਜਨੇਨ ਅਰਹਤ੍ਤਂ ਪਤ੍ਤੋਪਿ ਨ ਤਿਟ੍ਠਤਿ ਵਿਵੇਕਟ੍ਠਾਨਸ੍ਸ ਅਭਾਵਾਤਿ ਅਧਿਪ੍ਪਾਯੋ. ਤਸ੍ਸ ਵਸੇਨਾਤਿ ਭੁਮ੍ਮਦੇਵਤ੍ਤਭਾਵੇ ਠਤ੍ਵਾ ਅਰਹਤ੍ਤਪ੍ਪਤ੍ਤਸ੍ਸ ਵਸੇਨ. ਅਯਂ ਪਞ੍ਹੋਤਿ ‘‘ਅਭਬ੍ਬੋ ਸੋ ਨਵ ਠਾਨਾਨਿ ਅਜ੍ਝਾਚਰਿਤੁ’’ਨ੍ਤਿ ਅਯਂ ਪਞ੍ਹੋ ਆਗਤੋ ਇਤਰਸ੍ਸ ਪਬ੍ਬਜ੍ਜਾਯ, ਪਰਿਨਿਬ੍ਬਾਨੇਨ ਵਾ ਅਭਬ੍ਬਤਾਯ ਅਵੁਤ੍ਤਸਿਦ੍ਧਤ੍ਤਾ. ਯਦਿ ਏਵਂ ਕਥਂ ਭਿਕ੍ਖੁਗਹਣਨ੍ਤਿ ਆਹ ‘‘ਭਿਨ੍ਨਦੋਸਤ੍ਤਾ’’ਤਿਆਦਿ. ਅਪਰਿਚ੍ਛੇਦਨ੍ਤਿ ਅਪਰਿਯਨ੍ਤਂ, ਤਯਿਦਂ ਸੁਵਿਪੁਲਨ੍ਤਿ ਆਹ ‘‘ਮਹਨ੍ਤ’’ਨ੍ਤਿ. ਞੇਯ੍ਯਸ੍ਸ ਹਿ ਵਿਪੁਲਤਾਯ ਞਾਣਸ੍ਸ ਵਿਪੁਲਤਾ ਵੇਦਿਤਬ੍ਬਾ, ਏਤੇਨ ‘‘ਅਪਰਿਚ੍ਛੇਦ’’ਨ੍ਤਿ ਵੁਚ੍ਚਮਾਨਮ੍ਪਿ ਞੇਯ੍ਯਂ ਸਤ੍ਥੁ ਞਾਣਸ੍ਸ ਵਸੇਨ ਪਰਿਚ੍ਛੇਦਮੇਵਾਤਿ ਦਸ੍ਸਿਤਂ ਹੋਤਿ. ਵੁਤ੍ਤਞ੍ਹੇਤਂ ‘‘ਞਾਣਪਰਿਯਨ੍ਤਿਕਂ ਨੇਯ੍ਯ’’ਨ੍ਤਿ (ਮਹਾਨਿ. ੬੯, ੧੫੬; ਚੂਲ਼ਨਿ. ੮੫; ਪਟਿ. ਮ. ੩.੫) ਅਨਾਗਤੇ ਅਪਞ੍ਞਾਪਨਨ੍ਤਿ ਅਨਾਗਤੇ ਵਿਸਯੇ ਞਾਣਸ੍ਸ ਅਪਞ੍ਞਾਪਨਂ. ‘‘ਪਚ੍ਚਕ੍ਖਂ ਵਿਯ ਕਤ੍ਵਾ’’ਤਿ ਕਸ੍ਮਾ ਵਿਯ-ਸਦ੍ਦਗ੍ਗਹਣਂ ਕਤਂ, ਨਨੁ ਬੁਦ੍ਧਾਨਂ ਸਬ੍ਬਮ੍ਪਿ ਞਾਣਂ ਅਤ੍ਤਨੋ ਵਿਸਯਂ ਪਚ੍ਚਕ੍ਖਮੇਵ ਕਤ੍ਵਾ ਪਵਤ੍ਤਤਿ ਏਕਪ੍ਪਮਾਣਭਾਵਤੋਤਿ? ਸਚ੍ਚਮੇਤਂ, ‘‘ਅਕ੍ਖ’’ਨ੍ਤਿ ਪਨ ਚਕ੍ਖਾਦਿਇਨ੍ਦ੍ਰਿਯਂ ਵੁਚ੍ਚਤਿ, ਤਂ ਅਕ੍ਖਂ ਪਤਿ ਵਤ੍ਤਤੀਤਿ ਚਕ੍ਖਾਦਿਨਿਸ੍ਸਿਤਂ ਵਿਞ੍ਞਾਣਂ, ਤਸ੍ਸ ਚ ਆਰਮ੍ਮਣਂ ‘‘ਪਚ੍ਚਕ੍ਖ’’ਨ੍ਤਿ ਲੋਕੇ ਨਿਰੁਲ਼੍ਹਮੇਤਨ੍ਤਿ ਤਂ ਨਿਦਸ੍ਸਨਂ ਕਤ੍ਵਾ ਦਸ੍ਸੇਨ੍ਤੋ ‘‘ਪਚ੍ਚਕ੍ਖਂ ਵਿਯ ਕਤ੍ਵਾ’’ਤਿ ਅਵੋਚ, ਨ ਪਨ ਭਗਵਤੋ ਞਾਣਸ੍ਸ ਅਪ੍ਪਚ੍ਚਕ੍ਖਾਕਾਰੇਨ ਪਵਤ੍ਤਨਤੋ. ਤਥਾ ਹਿ ਵਦਨ੍ਤਿ –

‘‘ਆਵਿਭੂਤਂ ਪਕਾਸਨਂ, ਅਨੁਪਦ੍ਦੁਤਚੇਤਸਂ;

ਅਤੀਤਾਨਾਗਤੇ ਞਾਣਂ, ਪਚ੍ਚਕ੍ਖਾਨਂ ਵਸਿਸ੍ਸਤੀ’’ਤਿ.

ਅਞ੍ਞਤ੍ਥ ਵਿਹਿਤਕੇਨਾਤਿ ਅਞ੍ਞਸ੍ਮਿਂ ਵਿਸਯੇ ਪਵਤ੍ਤਿਤੇਨ. ਸਙ੍ਗਾਹੇਤਬ੍ਬਨ੍ਤਿ ਸਮਂ ਕਤ੍ਵਾ ਕਥਯਿਤਬ੍ਬਂ, ਕਥਨਂ ਪਨ ਪਞ੍ਞਾਪਨਂ ਨਾਮ ਹੋਤੀਤਿ ਪਞ੍ਞਾਪੇਤਬ੍ਬਨ੍ਤਿ ਅਤ੍ਥੋ ਵੁਤ੍ਤੋ. ਤਾਦਿਸਨ੍ਤਿ ਸਤਤਂ ਸਮਿਤਂ ਪਵਤ੍ਤਕਂ. ਞਾਣਂ ਨਾਮ ਨਤ੍ਥੀਤਿ ਆਵਜ੍ਜਨੇਨ ਵਿਨਾ ਞਾਣੁਪ੍ਪਤ੍ਤਿਯਾ ਅਸਮ੍ਭਵਤੋ. ਏਕਾਕਾਰੇਨ ਚ ਞਾਣੇ ਪਵਤ੍ਤਮਾਨੇ ਨਾਨਾਕਾਰਸ੍ਸ ਵਿਸਯਸ੍ਸ ਅਵਬੋਧੋ ਨ ਸਿਯਾ. ਅਥਾਪਿ ਸਿਯਾ, ਅਨਿਰੁਪਿਤਰੂਪੇਨੇਵ ਅਵਬੋਧੋ ਸਿਯਾ, ਤੇਨ ਚ ਞਾਣਂ ਞੇਯ੍ਯਂ ਅਞ੍ਞਾਤਸਦਿਸਮੇਵ ਸਿਯਾ. ਨ ਹਿ ‘‘ਇਦਂ ਤ’’ਨ੍ਤਿ ਵਿਵੇਕੇਨ ਅਨਵਬੁਦ੍ਧੋ ਅਤ੍ਥੋ ਞਾਤੋ ਨਾਮ ਹੋਤਿ, ਤਸ੍ਮਾ ‘‘ਚਰਤੋ ਚ ਤਿਟ੍ਠਤੋ ਚਾ’’ਤਿਆਦਿ ਬਾਲਲਾਪਨਮਤ੍ਤਂ. ਤੇਨਾਹ ‘‘ਯਥਰਿਵ ਬਾਲਾ ਅਬ੍ਯਤ੍ਤਾ, ਏਵਂ ਮਞ੍ਞਨ੍ਤੀ’’ਤਿ.

ਸਤਿਂ ਅਨੁਸ੍ਸਰਤੀਤਿ ਸਤਾਨੁਸਾਰਿ, ਸਤਿਯਾਨੁਵਤ੍ਤਨਵਸੇਨ ਪਵਤ੍ਤਞਾਣਂ. ਤੇਨਾਹ ‘‘ਪੁਬ੍ਬੇਨਿਵਾਸਾਨੁਸ੍ਸਤਿਸਮ੍ਪਯੁਤ੍ਤਕ’’ਨ੍ਤਿ. ਞਾਣਂ ਪੇਸੇਸੀਤਿ ਞਾਣਂ ਪਵਤ੍ਤੇਸਿ. ਸਬ੍ਬਤ੍ਥਕਮੇਵ ਞੇਯ੍ਯਾਵਰਣਸ੍ਸ ਸੁਪ੍ਪਹੀਨਤ੍ਤਾ ਅਪ੍ਪਟਿਹਤਂ ਅਨਿਵਾਰਿਤਂ ਞਾਣਂ ਗਚ੍ਛਤਿ ਪਵਤ੍ਤਤਿਚ੍ਚੇਵ ਅਤ੍ਥੋ. ‘‘ਬੋਧਿ ਵੁਚ੍ਚਤਿ ਚਤੂਸੁ ਮਗ੍ਗੇਸੁ ਞਾਣ’’ਨ੍ਤਿ (ਚੂਲ਼ਨਿ. ੨੧੧) ਵਚਨਤੋ ਚਤੁਮਗ੍ਗਞਾਣਂ ਬੋਧਿ, ਤਤੋ ਤਸ੍ਸ ਅਧਿਗਤਤ੍ਤਾ ਉਪ੍ਪਜ੍ਜਨਕਂ ਪਚ੍ਚਵੇਕ੍ਖਣਞਾਣਂ ‘‘ਬੋਧਿਜਂ ਞਾਣਂ ਉਪ੍ਪਜ੍ਜਤੀ’’ਤਿ ਵੁਤ੍ਤਂ. ਬੋਧਿਜਂ ਬੋਧਿਮੂਲੇ ਜਾਤਂ ਚਤੁਮਗ੍ਗਞਾਣਂ, ਤਞ੍ਚ ਖੋ ਅਨਾਗਤਂ ਆਰਬ੍ਭ ਉਦ੍ਦਿਸ੍ਸ ਤਸ੍ਸ ਅਪ੍ਪਵਤ੍ਤਿਅਤ੍ਥਂ ਤਥਾਗਤਸ੍ਸ ਉਪ੍ਪਜ੍ਜਤਿ ਤਸ੍ਸ ਉਪ੍ਪਨ੍ਨਤ੍ਤਾ ਆਯਤਿਂ ਪੁਨਬ੍ਭਵਾਭਾਵਤੋ. ਕਥਂ ਤਥਾਗਤੋ ਅਨਾਗਤਮਦ੍ਧਾਨਂ ਆਰਬ੍ਭ ਅਤੀਰਕਂ ਞਾਣਦਸ੍ਸਨਂ ਪਞ੍ਞਾਪੇਤੀਤਿ? ਅਤੀਤਸ੍ਸ ਪਨ ਅਦ੍ਧੁਨੋ ਮਹਨ੍ਤਤਾਯ ਅਤੀਰਕਂ ਞਾਣਦਸ੍ਸਨਂ ਤਤ੍ਥ ਪਞ੍ਞਾਪੇਤੀਤਿ ਕੋ ਏਤ੍ਥ ਵਿਰੋਧੋ. ਤਿਤ੍ਥਿਯਾ ਪਨ ਇਮਮਤ੍ਥਂ ਯਾਥਾਵਤੋ ਅਜਾਨਨ੍ਤਾ – ‘‘ਤਯਿਦਂ ਕਿਂ ਸੁ, ਤਯਿਦਂ ਕਥਂਸੂ’’ਤਿ ਅਤ੍ਤਨੋ ਅਞ੍ਞਾਣਮੇਵ ਪਾਕਟਂ ਕਰੋਨ੍ਤਿ. ਤਸ੍ਮਾ ਭਗਵਤਾ ਸਸਨ੍ਤਤਿਪਰਿਯਾਪਨ੍ਨਧਮ੍ਮਪ੍ਪਵਤ੍ਤਿਂ ਸਨ੍ਧਾਯ ‘‘ਅਞ੍ਞਵਿਹਿਤਕਂ ਞਾਣਦਸ੍ਸਨ’’ਨ੍ਤਿਆਦਿ ਵੁਤ੍ਤਂ. ਇਤਰਂ ਪਨ ਸਨ੍ਧਾਯ ਵੁਚ੍ਚਮਾਨੇ ਸਤਿ ਤਥਾਰੂਪੇ ਪਯੋਜਨੇ ਅਨਾਗਤਮ੍ਪਿ ਅਦ੍ਧਾਨਂ ਆਰਬ੍ਭ ਅਤੀਰਕਮੇਵ ਞਾਣਦਸ੍ਸਨਂ ਪਞ੍ਞਾਪੇਯ੍ਯ ਭਗਵਾਤਿ ਅਨਤ੍ਥਸਂਹਿਤਨ੍ਤਿ ਅਯਮੇਤ੍ਥ ਅਤ੍ਥੋਤਿ ਆਹ ‘‘ਨ ਇਧਲੋਕਤ੍ਥਂ ਵਾ ਪਰਲੋਕਤ੍ਥਂ ਵਾ ਨਿਸ੍ਸਿਤ’’ਨ੍ਤਿ. ਯਂ ਪਨ ਸਤ੍ਤਾਨਂ ਅਨਤ੍ਥਾਵਹਤ੍ਤਾ ਅਨਤ੍ਥਸਂਹਿਤਂ, ਤਤ੍ਥ ਸੇਤੁਘਾਤੋ ਤਥਾਗਤਸ੍ਸ. ‘‘ਭਾਰਤਯੁਦ੍ਧਸੀਤਾਹਰਣਸਦਿਸ’’ਨ੍ਤਿ ਇਮਿਨਾ ਤਸ੍ਸਾ ਕਥਾਯ ਯੇਭੁਯ੍ਯੇਨ ਅਭੂਤਤ੍ਥਤਂ ਦੀਪੇਤਿ. ਸਹੇਤੁਕਨ੍ਤਿ ਞਾਪਕੇਨ ਹੇਤੁਨਾ ਸਹੇਤੁਕਂ. ਸੋ ਪਨ ਹੇਤੁ ਯੇਨ ਨਿਦਸ੍ਸਨੇਨ ਸਾਧੀਯਤਿ, ਤਂ ਤਸ੍ਸ ਕਾਰਣਨ੍ਤਿ ਤੇਨ ਸਕਾਰਣਂ ਕਤ੍ਵਾ. ਯਥਾ ਹਿ ਪਟਿਞ੍ਞਾਤਤ੍ਥਸਾਧਨਤੋ ਹੇਤੁ, ਏਵਂ ਸਾਧਕਂ ਨਿਦਸ੍ਸਨਨ੍ਤਿ. ਯੁਤ੍ਤਪਤ੍ਤਕਾਲੇਯੇਵਾਤਿ ਯੁਤ੍ਤਾਨਂ ਪਤ੍ਤਕਾਲੇ ਏਵ. ਯੇ ਹਿ ਵੇਨੇਯ੍ਯਾ ਤਸ੍ਸਾ ਕਥਾਯ ਯੁਤ੍ਤਾ ਅਨੁਚ੍ਛਵਿਕਾ, ਤੇਸਂਯੇਵ ਯੋਜਨੇ ਸਨ੍ਧਾਯ ਵਾ ਕਥਾਯ ਪਤ੍ਤੋ ਉਪਕਾਰਾਵਹੋ ਕਾਲੋ, ਤਦਾ ਏਵ ਕਥੇਤੀਤਿ ਅਤ੍ਥੋ.

੧੮੮. ‘‘ਤਥਾ ਤਥੇਵ ਗਦਨਤੋ’’ਤਿ ਇਮਿਨਾ ‘‘ਤਥਾਗਤੋ’’ਤਿ ਆਮੇਡਿਤਲੋਪੇਨਾਯਂ ਨਿਦ੍ਦੇਸੋਤਿ ਦਸ੍ਸੇਤਿ. ਤਥਾ ਤਥੇਵਾਤਿ ਚ ਧਮ੍ਮਅਤ੍ਥਸਭਾਵਾਨੁਰੂਪਂ, ਵੇਨੇਯ੍ਯਜ੍ਝਾਸਯਾਨੁਰੂਪਞ੍ਚਾਤਿ ਅਧਿਪ੍ਪਾਯੋ. ਦਿਟ੍ਠਨ੍ਤਿ ਰੂਪਾਯਤਨਂ ਦਟ੍ਠਬ੍ਬਤੋ, ਤੇਨ ਯਂ ਦਿਟ੍ਠਂ, ਯਂ ਦਿਸ੍ਸਤਿ, ਯਂ ਦਕ੍ਖਤਿ, ਯਂ ਸਤਿ ਸਮਵਾਯੇ ਪਸ੍ਸੇਯ੍ਯਂ, ਤਂ ਸਬ੍ਬਂ ‘‘ਦਿਟ੍ਠਂ’’ ਤ੍ਵੇਵ ਗਹਿਤਂ ਕਾਲਵਿਸੇਸਸ੍ਸ ਅਨਾਮਟ੍ਠਭਾਵਤੋ. ‘‘ਸੁਤ’’ਨ੍ਤਿਆਦੀਸੁਪਿ ਏਸੇਵ ਨਯੋ. ਸੁਤਨ੍ਤਿ ਸਦ੍ਦਾਯਤਨਂ ਸੋਤਬ੍ਬਤੋ. ਮੁਤਨ੍ਤਿ ਸਨਿਸ੍ਸਯੇਨ ਘਾਨਾਦਿਇਨ੍ਦ੍ਰਿਯੇਨ ਸਯਂ ਪਤ੍ਵਾ ਪਾਪੁਣਿਤ੍ਵਾ ਗਹੇਤਬ੍ਬਂ. ਤੇਨਾਹ ‘‘ਪਤ੍ਵਾ ਗਹੇਤਬ੍ਬਤੋ’’ਤਿ. ਵਿਞ੍ਞਾਤਨ੍ਤਿ ਵਿਜਾਨਿਤਬ੍ਬਂ, ਤਂ ਪਨ ਦਿਟ੍ਠਾਦਿਵਿਨਿਮੁਤ੍ਤਂ ਵਿਞ੍ਞੇਯ੍ਯਨ੍ਤਿ ਆਹ ‘‘ਸੁਖਦੁਕ੍ਖਾਦਿਧਮ੍ਮਾਯਤਨ’’ਨ੍ਤਿ. ਪਤ੍ਤਨ੍ਤਿ ਯਥਾ ਤਥਾ ਪਤ੍ਤਂ, ਹਤ੍ਥਗਤਂ ਅਧਿਗਤਨ੍ਤਿ ਅਤ੍ਥੋ. ਤੇਨਾਹ ‘‘ਪਰਿਯੇਸਿਤ੍ਵਾ ਵਾ ਅਪਰਿਯੇਸਿਤ੍ਵਾ ਵਾ’’ਤਿ. ਪਰਿਯੇਸਿਤਨ੍ਤਿ ਪਤ੍ਤਿਯਾਮਤ੍ਥਂ ਪਰਿਯਿਟ੍ਠਂ, ਤਂ ਪਨ ਪਤ੍ਤਂ ਵਾ ਸਿਯਾ ਅਪ੍ਪਤ੍ਤਂ ਵਾ ਉਭਯਥਾਪਿ ਪਰਿਯੇਸਿਤਮੇਵਾਤਿ ਆਹ ‘‘ਪਤ੍ਤਂ ਵਾ ਅਪ੍ਪਤ੍ਤਂ ਵਾ’’ਤਿ. ਪਦਦ੍ਵਯੇਨਾਪਿ ਦ੍ਵਿਪ੍ਪਕਾਰਮ੍ਪਿ ਪਤ੍ਤਂ, ਦ੍ਵਿਪ੍ਪਕਾਰਮ੍ਪਿ ਪਰਿਯੇਸਿਤਂ, ਤੇਨ ਤੇਨ ਪਕਾਰੇਨ ਤਥਾਗਤੇਨ ਅਭਿਸਮ੍ਬੁਦ੍ਧਨ੍ਤਿ ਦਸ੍ਸੇਤਿ. ਚਿਤ੍ਤੇਨ ਅਨੁਸਞ੍ਚਰਿਤਨ੍ਤਿ ਚੋਪਨਂ ਅਪਾਪੇਤ੍ਵਾ ਚਿਤ੍ਤੇਨੇਵ ਅਨੁਸਂਚਰਿਤਂ, ਪਰਿਵਿਤਕ੍ਕਿਤਨ੍ਤਿ ਅਤ੍ਥੋ. ਪੀਤਕਨ੍ਤਿ ਆਦੀਤਿ ਆਦਿ-ਸਦ੍ਦੇਨ ਲੋਹਿਤਕਓਦਾਤਾਦਿ ਸਬ੍ਬਂ ਰੂਪਾਰਮ੍ਮਣਵਿਭਾਗਂ ਸਙ੍ਗਣ੍ਹਾਤਿ. ਸੁਮਨੋਤਿ ਰਾਗਵਸੇਨ, ਲੋਭਵਸੇਨ, ਸਦ੍ਧਾਦਿਵਸੇਨ ਵਾ ਸੁਮਨੋ. ਦੁਮ੍ਮਨੋਤਿ ਬ੍ਯਾਪਾਦਵਿਤਕ੍ਕਵਸੇਨ, ਵਿਹਿਂਸਾਵਿਤਕ੍ਕਵਸੇਨ ਵਾ ਦੁਮ੍ਮਨੋ. ਮਜ੍ਝਤ੍ਤੋਤਿ ਅਞ੍ਞਾਣਵਸੇਨ ਵਾ ਞਾਣਵਸੇਨ ਵਾ ਮਜ੍ਝਤ੍ਤੋ. ਏਸੇਵ ਨਯੋ ਸਬ੍ਬਤ੍ਥ. ਤਤ੍ਥ ਤਤ੍ਥ ਆਦਿ-ਸਦ੍ਦੇਨ ਸਙ੍ਖਸਦ੍ਦੋ ਪਣਵਸਦ੍ਦੋ, ਪਤ੍ਤਗਨ੍ਧੋ ਪੁਪ੍ਫਗਨ੍ਧੋ, ਪਤ੍ਤਰਸੋ ਫਲਰਸੋ, ਉਪਾਦਿਨ੍ਨਂ ਅਨੁਪਾਦਿਨ੍ਨਂ, ਮਜ੍ਝਤ੍ਤਵੇਦਨਾ ਕੁਸਲਕਮ੍ਮਂ ਅਕੁਸਲਕਮ੍ਮਨ੍ਤਿ ਏਵਂ ਆਦੀਨਂ ਸਙ੍ਗਹੋ ਦਟ੍ਠਬ੍ਬੋ.

ਅਪ੍ਪਤ੍ਤਨ੍ਤਿ ਞਾਣੇਨ ਅਸਮ੍ਪਤ੍ਤਂ, ਅਵਿਦਿਤਨ੍ਤਿ ਅਤ੍ਥੋ. ਤੇਨਾਹ ‘‘ਞਾਣੇਨ ਅਸਚ੍ਛਿਕਤ’’ਨ੍ਤਿ. ਤਥੇਵ ਗਤਤ੍ਤਾਤਿ ਤਥੇਵ ਞਾਤਤ੍ਤਾ ਅਭਿਸਮ੍ਬੁਦ੍ਧਤ੍ਤਾ. ਗਤ-ਸਦ੍ਦੇਨ ਏਕਤ੍ਥਂ ਬੁਦ੍ਧਿਅਤ੍ਥਨ੍ਤਿ ਅਤ੍ਥੋ. ‘‘ਗਤਿਅਤ੍ਥਾ ਹਿ ਧਾਤਵੋ ਬੁਦ੍ਧਿਅਤ੍ਥਾ ਭਵਨ੍ਤੀ’’ਤਿ ਅਕ੍ਖਰਚਿਨ੍ਤਕਾ.

ਅਬ੍ਯਾਕਤਟ੍ਠਾਨਾਦਿਵਣ੍ਣਨਾ

੧੮੯. ‘‘ਅਸਮਤਂ ਕਥੇਤ੍ਵਾ’’ਤਿ ਵਤ੍ਵਾ ਸਮੋਪਿ ਨਾਮ ਕੋਚਿ ਨਤ੍ਥਿ, ਕੁਤੋ ਉਤ੍ਤਰਿਤਰੋਤਿ ਦਸ੍ਸੇਤੁਂ ‘‘ਅਨੁਤ੍ਤਰਤ’’ਨ੍ਤਿ ਵੁਤ੍ਤਂ. ਸਾ ਪਨਾਯਂ ਅਸਮਤਾ, ਅਨੁਤ੍ਤਰਤਾ ਚ ਸਬ੍ਬਞ੍ਞੁਤਂ ਪੂਰੇਤ੍ਵਾ ਠਿਤਾਤਿ ਦਸ੍ਸੇਤੁਂ ‘‘ਸਬ੍ਬਞ੍ਞੁਤ’’ਨ੍ਤਿ ਵੁਤ੍ਤਂ. ਸਾ ਸਬ੍ਬਞ੍ਞੁਤਾ ਸਦ੍ਧਮ੍ਮਵਰਚਕ੍ਕਵਤ੍ਤਿਭਾਵੇਨ ਲੋਕੇ ਪਾਕਟਾ ਜਾਤਾਤਿ ਦਸ੍ਸੇਤੁਂ ‘‘ਧਮ੍ਮਰਾਜਭਾਵਂ ਕਥੇਤ੍ਵਾ’’ਤਿ ਵੁਤ੍ਤਂ. ਤਥਾ ਸਬ੍ਬਞ੍ਞੁਭਾਵੇਨ ਚ ਸਤ੍ਥਾ ਇਮੇਸੁ ਦਿਟ੍ਠਿਗਤਵਿਪਲ੍ਲਾਸੇਸੁ ਏਵਂ ਪਟਿਪਜ੍ਜਤੀਤਿ ਦਸ੍ਸੇਨ੍ਤੋ ‘‘ਇਦਾਨੀ’’ਤਿਆਦਿਮਾਹ. ਤਤ੍ਥ ਸੀਹਨਾਦਨ੍ਤਿ ਅਭੀਤਨਾਦਂ ਸੇਟ੍ਠਨਾਦਂ. ਸੇਟ੍ਠਨਾਦੋ ਹੇਸ, ਯਦਿਦਂ ਠਪਨੀਯਸ੍ਸ ਪਞ੍ਹਸ੍ਸ ਠਪਨੀਯਭਾਵਦਸ੍ਸਨਂ. ਠਪਨੀਯਤਾ ਚਸ੍ਸ ਪਾਲ਼ਿਆਰੁਲ਼੍ਹਾ ਏਵ ‘‘ਨ ਹੇਤ’’ਨ੍ਤਿਆਦਿਨਾ. ਯਥਾ ਉਪਚਿਤਕਮ੍ਮਕਿਲੇਸੇਨ ਇਤ੍ਥਤ੍ਤਂ ਆਗਨ੍ਤਬ੍ਬਂ, ਤਥਾ ਨਂ ਆਗਤੋਤਿ ਤਥਾਗਤੋ, ਸਤ੍ਤੋ. ਤਥਾ ਹਿ ਸੋ ਰੂਪਾਦੀਸੁ ਸਤ੍ਤੋ ਵਿਸਤ੍ਤੋਤਿ ਕਤ੍ਵਾ ‘‘ਸਤ੍ਤੋ’’ਤਿ ਚ ਵੁਚ੍ਚਤਿ. ਇਤ੍ਥਤ੍ਤਨ੍ਤਿ ਚ ਪਟਿਲਦ੍ਧਤ੍ਤਾ ਤਥਾ ਪਚ੍ਚਕ੍ਖਭੂਤੋ ਅਤ੍ਤਭਾਵੋਤਿ ਵੇਦਿਤਬ੍ਬੋ.

‘‘ਅਤ੍ਥਸਂਹਿਤਂ ਨ ਹੋਤੀ’’ਤਿ ਇਮਿਨਾ ਉਭਯਤ੍ਥ ਵਿਧੁਰਤਾਦਸ੍ਸਨੇਨ ਨਿਰਤ੍ਥਕਵਿਪ੍ਪਲਾਪਤਂ ਤਸ੍ਸ ਵਾਦਸ੍ਸ ਵਿਭਾਵੇਤਿ, ਉਭਯਲੋਕਤ੍ਥਵਿਧੁਰਮ੍ਪਿ ਸਮਾਨਂ ‘‘ਕਿਂ ਨੁ ਖੋ ਵਿਵਟ੍ਟਨਿਸ੍ਸਿਤ’’ਨ੍ਤਿ ਕੋਚਿ ਆਸਙ੍ਕੇਯ੍ਯਾਤਿ ਤਦਾਸਙ੍ਕਾਨਿਵਤ੍ਤਨਤ੍ਥਂ ‘‘ਨ ਚ ਧਮ੍ਮਸਂਹਿਤ’’ਨ੍ਤਿ ਵੁਤ੍ਤਂ. ਤੇਨਾਹ ‘‘ਨਵਲੋਕੁਤ੍ਤਰਧਮ੍ਮਨਿਸ੍ਸਿਤਂ ਨ ਹੋਤੀ’’ਤਿ. ਯਦਿਪਿ ਤਂ ਨ ਵਿਵਟ੍ਟੋਗਤਂ ਹੋਤਿ, ਵਿਵਟ੍ਟਸ੍ਸ ਪਨ ਅਧਿਟ੍ਠਾਨਭੂਤਂ ਨੁ ਖੋਤਿ ਕੋਚਿ ਆਸਙ੍ਕੇਯ੍ਯਾਤਿ ਤਦਾਸਙ੍ਕਾਨਿਵਤ੍ਤਨਤ੍ਥਂ ‘‘ਨ ਆਦਿਬ੍ਰਹ੍ਮਚਰਿਯਕ’’ਨ੍ਤਿਆਦਿ ਵੁਤ੍ਤਂ.

੧੯੦. ਕਾਮਂ ਤਣ੍ਹਾਪਿ ਦੁਕ੍ਖਸਭਾਵਤ੍ਤਾ ‘‘ਦੁਕ੍ਖ’’ਨ੍ਤਿ ਬ੍ਯਾਕਾਤਬ੍ਬਾ, ਪਭਵਭਾਵੇਨ ਪਨ ਸਾ ਤਤੋ ਵਿਸੁਂ ਕਾਤਬ੍ਬਾਤਿ ‘‘ਤਣ੍ਹਂ ਠਪੇਤ੍ਵਾ’’ਤਿ ਵੁਤ੍ਤਂ. ਤੇਨਾਹ ‘‘ਤਸ੍ਸੇਵ ਦੁਕ੍ਖਸ੍ਸ ਪਭਾਵਿਕਾ’’ਤਿਆਦਿ. ਨਨੁ ਚ ਅਵਿਜ੍ਜਾਦਯੋਪਿ ਦੁਕ੍ਖਸ੍ਸ ਸਮੁਦਯੋਤਿ? ਸਚ੍ਚਂ ਸਮੁਦਯੋ, ਤਸ੍ਸਾ ਪਨ ਕਮ੍ਮਸ੍ਸ ਵਿਚਿਤ੍ਤਭਾਵਹੇਤੁਤੋ, ਦੁਕ੍ਖੁਪ੍ਪਾਦਨੇ ਵਿਸੇਸਪਚ੍ਚਯਭਾਵਤੋ ਚ ਸਾਤਿਸਯੋ ਸਮੁਦਯਟ੍ਠੋਤਿ ਸਾ ਏਵ ਸੁਤ੍ਤੇਸੁ ਤਥਾ ਵੁਤ੍ਤਾ. ਤੇਨਾਹ ‘‘ਤਣ੍ਹਾ ਦੁਕ੍ਖਸਮੁਦਯੋਤਿ ਬ੍ਯਾਕਤ’’ਨ੍ਤਿ. ਉਭਿਨ੍ਨਂ ਅਪ੍ਪਵਤ੍ਤੀਤਿ ਦੁਕ੍ਖਸਮੁਦਯਾਨਂ ਅਪ੍ਪਵਤ੍ਤਿਨਿਮਿਤ੍ਤਂ. ‘‘ਦੁਕ੍ਖਪਰਿਜਾਨਨੋ’’ਤਿਆਦਿ ਮਗ੍ਗਕਿਚ੍ਚਦਸ੍ਸਨਂ, ਤੇਨ ਮਗ੍ਗਸ੍ਸ ਭਾਵਨਤ੍ਥੋਪਿ ਅਤ੍ਥਤੋ ਦਸ੍ਸਿਤੋਵਾਤਿ ਦਟ੍ਠਬ੍ਬਂ. ਨ ਹਿ ਭਾਵਨਾਭਿਸਮਯੇਨ ਵਿਨਾ ਪਰਿਞ੍ਞਾਭਿਸਮਯਾਦਯੋ ਸਮ੍ਭਵਨ੍ਤੀਤਿ. ਸਚ੍ਚਵਵਤ੍ਥਾਪਨਂ ਅਪ੍ਪਮਾਦਪਟਿਪਤ੍ਤਿਭਾਵਤੋ ਅਸਮ੍ਮੋਹਕਲ੍ਯਾਣਕਿਤ੍ਤਿਸਦ੍ਦਾਦਿਨਿਮਿਤ੍ਤਤਾਯ ਯਥਾ ਸਾਤਿਸਯਂ ਇਧਲੋਕਤ੍ਥਾਵਹਂ, ਏਵਂ ਯਾਵ ਞਾਣਸ੍ਸ ਤਿਕ੍ਖਵਿਸਦਭਾਵਪ੍ਪਤ੍ਤਿਯਾ ਅਭਾਵੇਨ ਨਵਲੋਕੁਤ੍ਤਰਧਮ੍ਮਸਮ੍ਪਾਪਕਂ ਨ ਹੋਤਿ, ਤਾਵ ਤਤ੍ਥ ਤਤ੍ਥ ਸਮ੍ਪਤ੍ਤਿਭਵੇ ਅਬ੍ਭੁਦਯਸਮ੍ਪਤ੍ਤਿ ਅਨੁਗਤਮੇਵ ਸਿਯਾਤਿ ਵੁਤ੍ਤਂ ‘‘ਏਤਂ ਇਧਲੋਕਪਰਲੋਕਤ੍ਥਨਿਸ੍ਸਿਤ’’ਨ੍ਤਿ. ਨਵਲੋਕੁਤ੍ਤਰਧਮ੍ਮਨਿਸ੍ਸਿਤਨ੍ਤਿ ਨਵਵਿਧਮ੍ਪਿ ਲੋਕੁਤ੍ਤਰਧਮ੍ਮਂ ਨਿਸ੍ਸਾਯ ਪਵਤ੍ਤਂ ਤਦਧਿਗਮੂਪਾਯਭਾਵਤੋ. ਯਸ੍ਮਾ ਸਚ੍ਚਸਮ੍ਬੋਧਂ ਉਦ੍ਦਿਸ੍ਸ ਸਾਸਨਬ੍ਰਹ੍ਮਚਰਿਯਂ ਵੁਸ੍ਸਤਿ, ਨ ਅਞ੍ਞਦਤ੍ਥਂ, ਤਸ੍ਮਾ ਏਤਂ ਸਚ੍ਚਵਵਤ੍ਥਾਪਨਂ ‘‘ਆਦਿਪਧਾਨ’’ਨ੍ਤਿ ਵੁਤ੍ਤਂ ਪਠਮਤਰਂ ਚਿਤ੍ਤੇ ਆਦਾਤਬ੍ਬਤੋ.

ਪੁਬ੍ਬਨ੍ਤਸਹਗਤਦਿਟ੍ਠਿਨਿਸ੍ਸਯਵਣ੍ਣਨਾ

੧੯੧. ਤਂ ਮਯਾ ਬ੍ਯਾਕਤਮੇਵਾਤਿ ਤਂ ਮਯਾ ਤਥਾ ਬ੍ਯਾਕਤਮੇਵ, ਬ੍ਯਾਕਾਤਬ੍ਬਂ ਨਾਮ ਮਯਾ ਅਬ੍ਯਾਕਤਂ ਨਤ੍ਥੀਤਿ ਬ੍ਯਾਕਰਣਾਵੇਕਲ੍ਲੇਨ ਅਤ੍ਤਨੋ ਧਮ੍ਮਸੁਧਮ੍ਮਤਾਯ ਬੁਦ੍ਧਸੁਬੁਦ੍ਧਤਂ ਵਿਭਾਵੇਤਿ. ਤੇਨਾਹ ‘‘ਸੀਹਨਾਦਂ ਨਦਨ੍ਤੋ’’ਤਿ. ਪੁਰਿਮੁਪ੍ਪਨ੍ਨਾ ਦਿਟ੍ਠਿਯੋ ਅਪਰਾਪਰੁਪ੍ਪਨ੍ਨਾਨਂ ਦਿਟ੍ਠੀਨਂ ਅਵਸ੍ਸਯਾ ਹੋਨ੍ਤੀਤਿ ‘‘ਦਿਟ੍ਠਿਯੋਵ ਦਿਟ੍ਠਿਨਿਸ੍ਸਯਾ’’ਤਿ ਵੁਤ੍ਤਂ. ਦਿਟ੍ਠਿਗਤਿਕਾਤਿ ਦਿਟ੍ਠਿਗਤਿਯੋ, ਦਿਟ੍ਠਿਪ੍ਪਵਤ੍ਤਿਯੋਤਿ ਅਤ੍ਥੋ. ਇਦਮੇਵ ਦਸ੍ਸਨਂ ਸਚ੍ਚਨ੍ਤਿ ‘‘ਸਸ੍ਸਤੋ ਅਤ੍ਤਾ ਚ ਲੋਕੋ ਚਾ’’ਤਿ ਇਦਮੇਵ ਦਸ੍ਸਨਂ ਸਚ੍ਚਂ ਅਮੋਘਂ ਅਵਿਪਰੀਤਂ. ਅਞ੍ਞੇਸਂ ਵਚਨਂ ਮੋਘਨ੍ਤਿ ‘‘ਅਸਸ੍ਸਤੋ ਅਤ੍ਤਾ ਚ ਲੋਕੋ ਚਾ’’ਤਿ ਏਵਮਾਦਿਕਂ ਅਞ੍ਞੇਸਂ ਸਮਣਬ੍ਰਾਹ੍ਮਣਾਨਂ ਵਚਨਂ ਮੋਘਂ ਤੁਚ੍ਛਂ, ਮਿਚ੍ਛਾਤਿ ਅਤ੍ਥੋ. ਨ ਸਯਂ ਕਾਤਬ੍ਬੋਤਿ ਅਸਯਂਕਾਰੋਤਿ ਆਹ ‘‘ਅਸਯਂਕਤੋ’’ਤਿ, ਯਾਦਿਚ੍ਛਿਕਤ੍ਤਾਤਿ ਅਧਿਪ੍ਪਾਯੋ.

੧੯੨. ਅਤ੍ਥਿ ਖੋਤਿ ਏਤ੍ਥ ਖੋ-ਸਦ੍ਦੋ ਪੁਚ੍ਛਾਯਂ, ਅਤ੍ਥਿ ਨੂਤਿ ਅਯਮੇਤ੍ਥ ਅਤ੍ਥੋਤਿ ਆਹ ‘‘ਅਤ੍ਥਿ ਖੋ ਇਦਂ ਆਵੁਸੋ ਵੁਚ੍ਚਤੀ’’ਤਿਆਦਿ. ਆਵੁਸੋ ਯਂ ਤੁਮ੍ਹੇਹਿ ‘‘ਸਸ੍ਸਤੋ ਅਤ੍ਤਾ ਚ ਲੋਕੋ ਚਾ’’ਤਿ ਵੁਚ੍ਚਤਿ, ਇਦਮਤ੍ਥਿ ਖੋ ਇਦਂ ਵਾਚਾਮਤ੍ਤਂ, ਨੋ ਨਤ੍ਥਿ, ਤਸ੍ਮਾ ਵਾਚਾਵਤ੍ਥੁਮਤ੍ਤਤੋ ਤਸ੍ਸ ਯਂ ਖੋ ਤੇ ਏਵਮਾਹਂਸੁ ‘‘ਇਦਮੇਵ ਸਚ੍ਚਂ ਮੋਘਂ ਅਞ੍ਞ’’ਨ੍ਤਿ, ਤਂ ਤੇਸਂ ਨਾਨੁਜਾਨਾਮੀਤਿ ਏਵਮੇਤ੍ਥ ਅਤ੍ਥੋ ਚ ਯੋਜਨਾ ਚ ਵੇਦਿਤਬ੍ਬਾ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਬ੍ਰਹ੍ਮਜਾਲਟੀਕਾਯਂ (ਦੀ. ਨਿ. ਟੀ. ੧.੩੦) ਵੁਤ੍ਤਮੇਵ. ਦਿਟ੍ਠਿਪਞ੍ਞਤ੍ਤਿਯਾਤਿ ਦਿਟ੍ਠਿਯਾ ਪਞ੍ਞਾਪਨੇ ‘‘ਏਵਂ ਏਸਾ ਦਿਟ੍ਠਿ ਉਪ੍ਪਨ੍ਨਾ’’ਤਿ ਤਸ੍ਸਾ ਦਿਟ੍ਠਿਯਾ ਸਮੁਦਯਤੋ, ਅਤ੍ਥਙ੍ਗਮਤੋ, ਅਸ੍ਸਾਦਤੋ, ਆਦੀਨਵਤੋ, ਨਿਸ੍ਸਰਣਤੋ ਚ ਯਾਥਾਵਤੋ ਪਞ੍ਞਾਪਨੇ. ਅਵਿਪਰੀਤਵੁਤ੍ਤਿਯਾ ਸਮੇਨ ਞਾਣੇਨ ਸਮਂ ਕਞ੍ਚਿ ਨੇਵ ਸਮਨੁਪਸ੍ਸਾਮਿ. ਅਧਿਪਞ੍ਞਤ੍ਤੀਤਿ ਅਭਿਞ੍ਞੇਯ੍ਯਧਮ੍ਮਪਞ੍ਞਾਪਨਾ. ਯਂ ਅਜਾਨਨ੍ਤਾ ਬਾਹਿਰਕਾ ਦਿਟ੍ਠਿਪਞ੍ਞਤ੍ਤਿਯੇਵ ਅਲ੍ਲੀਨਾਤਿ ਤਞ੍ਚ ਪਞ੍ਞਤ੍ਤਿਤੋ ਅਜਾਨਨ੍ਤਾ ਥਾਮਸਾ ਪਰਾਮਾਸਾ ਅਭਿਨਿਵਿਸ੍ਸ ਵੋਹਰਨ੍ਤਿ. ਏਤ੍ਥ ਚ ਯਾਯਂ ‘‘ਦਿਟ੍ਠਿਪਞ੍ਞਤ੍ਤਿ ਨਾਮਾ’’ਤਿ ਵੁਤ੍ਤਾ ਦਿਟ੍ਠਿਯਾ ਦਿਟ੍ਠਿਗਤਿਕੇਹਿ ਏਵਂ ਗਹਿਤਤਾਯ ਵਿਭਾਵਨਾ, ਤਤ੍ਥ ਚ ਭਗਵਤੋ ਉਤ੍ਤਰਿਤਰੋ ਨਾਮ ਕੋਚਿ ਨਤ੍ਥਿ, ਸ੍ਵਾਯਮਤ੍ਥੋ ਬ੍ਰਹ੍ਮਜਾਲੇ (ਦੀ. ਨਿ. ਅਟ੍ਠ. ੧.੩੦) ਵਿਭਾਵਿਤੋ ਏਵ. ‘‘ਅਧਿਪਞ੍ਞਤ੍ਤੀ’’ਤਿ ਵੁਤ੍ਤਾ ਪਨ ਵਿਭਾਵਿਯਮਾਨਾ ਲੋਕਸ੍ਸ ਨਿਬ੍ਬਿਦਾਹੇਤੁਭਾਵੇਨ ਬਹੁਲੀਕਾਰਾਤਿ ਤਸ੍ਸਾ ਵਸੇਨ ਭਗਵਾ ਅਨੁਤ੍ਤਰਭਾਵਂ ਪਵੇਦੇਨ੍ਤੋ ‘ਨੇਵ ਅਤ੍ਤਨਾ ਸਮਸਮਂ ਸਮਨੁਪਸ੍ਸਾਮੀ’ਤਿ ਸੀਹਨਾਦਂ ਨਦੀ’’ਤਿ ਕੇਚਿ. ਅਟ੍ਠਕਥਾਯਂ (ਦੀ. ਨਿ. ਅਟ੍ਠ. ੩.੧੯੨) ਪਨ ‘‘ਯਞ੍ਚ ਵੁਤ੍ਤਂ ‘ਪਞ੍ਞਤ੍ਤਿਯਾ’ਤਿ ਯਞ੍ਚ ‘ਅਧਿਪਞ੍ਞਤ੍ਤੀ’ਤਿ, ਉਭਯਮੇਤਂ ਅਤ੍ਥਤੋ ਏਕ’’ਨ੍ਤਿ ‘‘ਇਧ ਪਨ ਪਞ੍ਞਤ੍ਤਿਯਾਤਿ ਏਤ੍ਥਾਪਿ ਪਞ੍ਞਤ੍ਤਿ ਚੇਵ ਅਧਿਪਞ੍ਞਤ੍ਤਿ ਚ ਅਧਿਪ੍ਪੇਤਾ, ਅਧਿਪਞ੍ਞਤ੍ਤੀਤਿ ਏਤ੍ਥਾਪੀ’’ਤਿ ਚ ਵੁਤ੍ਤਾ, ਉਭਯਸ੍ਸਪਿ ਵਸੇਨੇਤ੍ਥ ਭਗਵਾ ਸੀਹਨਾਦਂ ਨਦੀਤਿ ਵਿਞ੍ਞਾਯਤਿ. ਉਭਯਂ ਪੇਤਂ ਅਤ੍ਥਤੋ ਏਕਨ੍ਤਿ ਚ ਪਞ੍ਞਤ੍ਤਿਭਾਵਸਾਮਞ੍ਞਂ ਸਨ੍ਧਾਯ ਵੁਤ੍ਤਂ, ਨ ਭੇਦਾਭਾਵਤੋ. ਤੇਨਾਹ ‘‘ਭੇਦਤੋ ਹੀ’’ਤਿਆਦਿ. ਖਨ੍ਧਪਞ੍ਞਤ੍ਤੀਤਿ ਖਨ੍ਧਾਨਂ ‘‘ਖਨ੍ਧਾ’’ਤਿ ਪਞ੍ਞਾਪਨਾ ਦਸ੍ਸਨਾ ਪਕਾਸਨਾ ਠਪਨਾ ਨਿਕ੍ਖਿਪਨਾ. ‘‘ਆਚਿਕ੍ਖਤਿ ਦਸ੍ਸੇਤਿ ਪਞ੍ਞਾਪੇਤਿ ਪਟ੍ਠਪੇਤੀ’’ਤਿ (ਸਂ. ਨਿ. ੨.੨੦, ੯੭) ਆਗਤਟ੍ਠਾਨੇ ਹਿ ਪਞ੍ਞਾਪਨਾ ਦਸ੍ਸਨਾ ਪਕਾਸਨਾ ਪਞ੍ਞਤ੍ਤਿ ਨਾਮ, ‘‘ਸੁਪਞ੍ਞਤ੍ਤਂ ਮਞ੍ਚਪੀਠ’’ਨ੍ਤਿ (ਪਾਰਾ. ੨੬੯) ਆਗਤਟ੍ਠਾਨੇ ਠਪਨਾ ਨਿਕ੍ਖਿਪਨਾ ਪਞ੍ਞਤ੍ਤਿ ਨਾਮ, ਇਧ ਉਭਯਮ੍ਪਿ ਯੁਜ੍ਜਤਿ.

ਦਿਟ੍ਠਿਨਿਸ੍ਸਯਪ੍ਪਹਾਨਵਣ੍ਣਨਾ

੧੯੬. ਪਜਹਨਤ੍ਥਨ੍ਤਿ ਅਚ੍ਚਨ੍ਤਾਯ ਪਟਿਨਿਸ੍ਸਜ੍ਜਨਤ੍ਥਂ. ਯਸ੍ਮਾ ਤੇਨ ਪਜਹਨੇਨ ਸਬ੍ਬੇ ਦਿਟ੍ਠਿਨਿਸ੍ਸਯਾ ਸਮ੍ਮਦੇਵ ਅਤਿਕ੍ਕਨ੍ਤਾ ਹੋਨ੍ਤਿ ਵੀਤਿਕ੍ਕਨ੍ਤਾ, ਤਸ੍ਮਾ ‘‘ਸਮਤਿਕ੍ਕਮਾਯਾਤਿ ਤਸ੍ਸੇਵ ਵੇਵਚਨ’’ਨ੍ਤਿ ਅਵੋਚ. ਨ ਕੇਵਲਂ ਸਤਿਪਟ੍ਠਾਨਾ ਕਥਿਤਮਤ੍ਤਾ, ਅਥ ਖੋ ਵੇਨੇਯ੍ਯਸਨ੍ਤਾਨੇ ਪਤਿਟ੍ਠਾਪਿਤਾਤਿ ਦਸ੍ਸੇਤੁਂ ‘‘ਦੇਸਿਤਾ’’ਤਿ ਵਤ੍ਵਾ ‘‘ਪਞ੍ਞਤ੍ਤਾ’’ਤਿ ਵੁਤ੍ਤਨ੍ਤਿ ਆਹ ‘‘ਦੇਸਿਤਾਤਿ ਕਥਿਤਾ. ਪਞ੍ਞਤ੍ਤਾਤਿ ਠਪਿਤਾ’’ਤਿ. ਇਦਾਨਿ ਸਤਿਪਟ੍ਠਾਨਦੇਸਨਾਯ ਦਿਟ੍ਠਿਨਿਸ੍ਸਯਾਨਂ ਏਕਨ੍ਤਿਕਂ ਪਹਾਨਾਵਹਭਾਵਂ ਦਸ੍ਸੇਤੁਂ ‘‘ਸਤਿਪਟ੍ਠਾਨਭਾਵਨਾਯ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਸਤਿਪਟ੍ਠਾਨਭਾਵਨਾਯਾਤਿ ਇਮਿਨਾ ਤੇਸਂ ਭਾਵਨਾਯ ਏਵ ਨੇਸਂ ਪਹਾਨਂ, ਦੇਸਨਾ ਪਨ ਤਦੁਪਨਿਸ੍ਸਯਭਾਵਤੋ ਤਥਾ ਵੁਤ੍ਤਾਤਿ ਦਸ੍ਸੇਤਿ. ਸੇਸਂ ਸਬ੍ਬਂ ਸੁਵਿਞ੍ਞੇਯ੍ਯਮੇਵਾਤਿ.

ਪਾਸਾਦਿਕਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ.