੪. ਅਗ੍ਗਞ੍ਞਸੁਤ੍ਤਵਣ੍ਣਨਾ
ਵਾਸੇਟ੍ਠਭਾਰਦ੍ਵਾਜਵਣ੍ਣਨਾ
੧੧੧. ਏਤ੍ਥਾਤਿ ‘‘ਪੁਬ੍ਬਾਰਾਮੇ, ਮਿਗਾਰਮਾਤੁਪਾਸਾਦੇ’’ਤਿ ਏਤਸ੍ਮਿਂ ਪਦਦ੍ਵਯੇ. ਕੋਯਂ ਪੁਬ੍ਬਾਰਾਮੋ, ਕਥਞ੍ਚ ਪੁਬ੍ਬਾਰਾਮੋ, ਕਾ ਚ ਮਿਗਾਰਮਾਤਾ, ਕਥਞ੍ਚਸ੍ਸਾ ਪਾਸਾਦੋ ਅਹੋਸੀਤਿ ਏਤਸ੍ਮਿਂ ਅਨ੍ਤੋਲੀਨੇ ਅਨੁਯੋਗੇ. ਅਯਂ ਇਦਾਨਿ ਵੁਚ੍ਚਮਾਨਾ ਅਨੁਪੁਬ੍ਬਿਕਥਾ ਆਦਿਤੋ ਪਟ੍ਠਾਯ ਸਙ੍ਖੇਪੇਨੇਵ ਅਨੁਪੁਬ੍ਬਿਕਥਾ. ਪਦੁਮੁਤ੍ਤਰਂ ਭਗਵਨ੍ਤਂ ਏਕਂ ਉਪਾਸਿਕਂ ਅਗ੍ਗੁਪਟ੍ਠਾਯਿਕਟ੍ਠਾਨੇ ਠਪੇਨ੍ਤਿਂ ਦਿਸ੍ਵਾਨ ਤਤ੍ਥ ਸਞ੍ਜਾਤਗਾਰਵਬਹੁਮਾਨਾ ਤਮੇਵਤ੍ਥਂ ਪੁਰਕ੍ਖਤ੍ਵਾ ਭਗਵਨ੍ਤਂ ਨਿਮਨ੍ਤੇਤ੍ਵਾ. ਮੇਣ੍ਡਕਪੁਤ੍ਤਸ੍ਸਾਤਿ ਮੇਣ੍ਡਕਸੇਟ੍ਠਿਪੁਤ੍ਤਸ੍ਸ. ਸੋਤਾਪਨ੍ਨਾ ਅਹੋਸਿ ਤਥਾ ਕਤਾਧਿਕਾਰਤ੍ਤਾ.
ਮਾਤੁਟ੍ਠਾਨੇ ਠਪੇਸਿ ਅਤ੍ਤਨੋ ਸੀਲਾਚਾਰਸਮ੍ਪਤ੍ਤਿਯਾ ਗਰੁਟ੍ਠਾਨਿਯਤ੍ਤਾ. ਉਪਯੋਗਨ੍ਤਿ ਤਤ੍ਥ ਤਤ੍ਥ ਅਪ੍ਪੇਤਬ੍ਬਟ੍ਠਾਨੇ ਅਪ੍ਪਨਾਵਸੇਨ ਵਿਨਿਯੋਗਂ ਅਗਮਂਸੁ. ਅਞ੍ਞੇਹਿ ਚ ਵੇਲ਼ੁਰਿਯਲੋਹਿਤਙ੍ਕਮਸਾਰਗਲ੍ਲਾਦੀਹਿ. ਭਸ੍ਸਤੀਤਿ ਓਤਰਤਿ. ਸੁਦ੍ਧਪਾਸਾਦੋਵ ਨ ਸੋਭਤੀਤਿ ਕੇਵਲੋ ਏਕਪਾਸਾਦੋ ਏਵ ਵਿਹਾਰੋ ਨ ਸੋਭਤਿ. ਨਿਯੂਹਾਨਿ ਬਹੂਨਿ ਨੀਹਰਿਤ੍ਵਾ ਕਤ੍ਤਬ੍ਬਸੇਨਾਸਨਾਨਿ ‘‘ਦੁਵਡ੍ਢਗੇਹਾਨੀ’’ਤਿ ਵਦਨ੍ਤਿ. ਮਜ੍ਝੇ ਗਬ੍ਭੋ ਸਮਨ੍ਤਤੋ ਅਨੁਪਰਿਯਾਯਤੋਤਿ ਏਵਂ ਦ੍ਵਿਕ੍ਖਤ੍ਤੁਂ ਵਡ੍ਢੇਤ੍ਵਾ ਕਤਸੇਨਾਸਨਾਨਿ ਦੁਵਡ੍ਢਗੇਹਾਨਿ. ਚੂਲ਼ਪਾਸਾਦਾਤਿ ਖੁਦ੍ਦਕਪਾਸਾਦਾ.
ਉਤ੍ਤਰਦੇਵੀਵਿਹਾਰੋ ਨਾਮ ਨਗਰਸ੍ਸ ਪਾਚੀਨਦ੍ਵਾਰਸਮੀਪੇ ਕਤਵਿਹਾਰੋ.
ਤਿਤ੍ਥਿਯਲਿਙ੍ਗਸ੍ਸ ਅਗ੍ਗਹਿਤਤ੍ਤਾ ਨੇਵ ਤਿਤ੍ਥਿਯਪਰਿਵਾਸਂ ਵਸਨ੍ਤਿ. ਅਨੁਪਸਮ੍ਪਨ੍ਨਭਾਵਤੋ ਆਪਤ੍ਤਿਯਾ ਆਪਨ੍ਨਾਯ ਅਭਾਵਤੋ ਨ ਆਪਤ੍ਤਿਪਰਿਵਾਸਂ ਵਸਨ੍ਤਿ. ਭਿਕ੍ਖੁਭਾਵਨ੍ਤਿ ਉਪਸਮ੍ਪਦਂ. ਤੇਵਿਜ੍ਜਸੁਤ੍ਤਨ੍ਤਿ ਇਮਸ੍ਮਿਂ ਦੀਘਨਿਕਾਯੇ ਤੇਵਿਜ੍ਜਸੁਤ੍ਤਂ ਸੁਤ੍ਵਾ.
੧੧੩. ਅਨੁਵਤ੍ਤਮਾਨਾ ਚਙ੍ਕਮਿਂਸੁ ਅਨਨੁਚਙ੍ਕਮਨੇ ਯਥਾਧਿਪ੍ਪੇਤਸ੍ਸ ਅਤ੍ਥਸ੍ਸ ਪੁਚ੍ਛਨਾਦੀਨਂ ਅਸਕ੍ਕੁਣੇਯ੍ਯਤ੍ਤਾ. ਤੇਸਨ੍ਤਿ ਤੇਸਂ ਦ੍ਵਿਨ੍ਨਂ. ਤੇਨਾਹ ‘‘ਪਣ੍ਡਿਤਤਰੋ’’ਤਿ. ਅਤ੍ਥਾਤਿ ਭਵਤ੍ਥ. ਕੁਲਸਮ੍ਪਨ੍ਨਾਤਿ ਸਮ੍ਪਨ੍ਨਕੁਲਾ ਉਦਿਤੋਦਿਤੇ ਬ੍ਰਾਹ੍ਮਣਕੁਲੇ ਉਪ੍ਪਨ੍ਨਾ. ਬ੍ਰਾਹ੍ਮਣਕੁਲਾਤਿ ਕੇਨਚਿ ਪਾਰਿਜੁਞ੍ਞੇਨ ਅਨੁਪਦ੍ਦੁਤਾ ਏਵ ਬ੍ਰਾਹ੍ਮਣਕੁਲਾ. ਤੇਨਾਹ ‘‘ਭੋਗਾਦਿਸਮ੍ਪਨ੍ਨ’’ਨ੍ਤਿਆਦਿ. ਇਮੇ ਬ੍ਰਾਹ੍ਮਣਾ ਉਚ੍ਚਾ ਹੁਤ੍ਵਾ ‘‘ਇਮਂ ਵਸਲਂ ਪਬ੍ਬਜ੍ਜਂ ਪਬ੍ਬਜਿਂਸੂ’’ਤਿਆਦਿਨਾ ਜਾਤਿਆਦੀਨਿ ਘਟ੍ਟੇਨ੍ਤਾ ਅਕ੍ਕੋਸਨ੍ਤਿ. ਪਰਿਭਾਸਨ੍ਤੀਤਿ ਪਰਿਭਵਿਤ੍ਵਾ ਭਾਸਨ੍ਤਿ. ਅਤ੍ਤਨੋ ਅਨੁਰੂਪਾਯਾਤਿ ਅਤ੍ਤਨੋ ਅਜ੍ਝਾਸਯਸ੍ਸ ਅਨੁਰੂਪਾਯ. ਅਨ੍ਤਰਨ੍ਤਰਾ ਵਿਚ੍ਛਿਜ੍ਜ ਪਵਤ੍ਤਿਯਮਾਨਾ ਪਰਿਭਾਸਾ ਪਰਿਪੁਣ੍ਣਾ ਨਾਮ ਨ ਹੋਤਿ ਖਣ੍ਡਭਾਵਤੋ, ਤਬ੍ਬਿਪਰਿਯਾਯਤੋ ਪਰਿਪੁਣ੍ਣਾ ਨਾਮ ਹੋਤੀਤਿ ਆਹ ‘‘ਅਨ੍ਤਰਾ’’ਤਿਆਦਿ.
ਅਪ੍ਪਤਿਟ੍ਠਤਾਯਾਤਿ ਅਪਸ੍ਸਯਰਹਿਤਤ੍ਤਾ. ਵਿਭਿਨ੍ਨੋਤਿ ਵਿਨਟ੍ਠੋ.
ਇਤਰੇ ਤਯੋ ਵਣ੍ਣਾਤਿ ਖਤ੍ਤਿਯਾਦਯੋ ਵਣ੍ਣਾ ਹੀਨਾ. ਨਨੁ ਖਤ੍ਤਿਯਾਵ ਸੇਟ੍ਠਾ ਵਣ੍ਣਾ ਯਥਾ ਬੁਦ੍ਧਾ ਏਤਰਹਿ ਖਤ੍ਤਿਯਕੁਲੇ ਏਵ ਉਪ੍ਪਨ੍ਨਾਤਿ? ਸਚ੍ਚਮੇਤਂ, ਤੇ ਪਨ ਅਤ੍ਤਨੋ ਮਿਚ੍ਛਾਭਿਮਾਨੇਨ, ਮਿਚ੍ਛਾਗਾਹੇਨ ਚ ‘‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ’’ਤਿ ਵਦਨ੍ਤਿ, ਤਂ ਤੇਸਂ ਵਚਨਮਤ੍ਤਂ. ‘‘ਸੁਜ੍ਝਨ੍ਤੀਤਿ ਸੁਦ੍ਧਾ ਹੋਨ੍ਤਿ, ਨ ਨਿਨ੍ਦਂ ਗਰਹਂ ਪਾਪੁਣਨ੍ਤੀ’’ਤਿ ਵਦਨ੍ਤਿ. ਸੁਜ੍ਝਨ੍ਤਿ ਵਾ ਸਂਸਾਰਤੋ ਸੁਜ੍ਝਨ੍ਤਿ, ਨ ਸੇਸਾ ਵਣ੍ਣਾ ਅਸੁਕ੍ਕਜਾਤਿਕਤ੍ਤਾ, ਮਨ੍ਤਜ੍ਝੇਨਾਭਾਵਤੋ ਚਾਤਿ. ਬ੍ਰਹ੍ਮੁਨੋ ਮੁਖਤੋ ਜਾਤਾ ਵੇਦਵਚਨਤੋ ਜਾਤਾਤਿ ਮੁਖਤੋ ਜਾਤਾ. ਤਤੋ ਏਵ ਬ੍ਰਹ੍ਮੁਨੋ ਮਹਾਬ੍ਰਹ੍ਮੁਨੋ ਵੇਦਵਚਨਤੋ ਵਿਜਾਤਾਤਿ ਬ੍ਰਹ੍ਮਜਾ. ਤੇਨ ਦੁਵਿਧੇਨਾਪਿ ਨਿਮ੍ਮਿਤਾਤਿ ਬ੍ਰਹ੍ਮਨਿਮ੍ਮਿਤਾ. ਵੇਦਵੇਦਙ੍ਗਾਦਿਬ੍ਰਹ੍ਮਦਾਯਜ੍ਜਂ ਅਰਹਨ੍ਤੀਤਿ ਬ੍ਰਹ੍ਮਦਾਯਾਦਾ. ਮੁਣ੍ਡਕੇ ਸਮਣਕੇਤਿ ਏਤ੍ਥ ਕ-ਕਾਰੋ ਗਰਹਾਯਨ੍ਤਿ ਆਹ ‘‘ਨਿਨ੍ਦਨ੍ਤਾ ਜਿਗੁਚ੍ਛਨ੍ਤਾ ਵਦਨ੍ਤੀ’’ਤਿ. ਇਬ੍ਭੇਤਿ ਸੁਦ੍ਦੇ, ਤੇ ਪਨ ਘਰਬਨ੍ਧਨੇਨ ਬਦ੍ਧਾ ਨਿਹੀਨਤਰਾਤਿ ਆਹ ‘‘ਗਹਪਤਿਕੇ’’ਤਿ. ਕਣ੍ਹੇਤਿ ਕਣ੍ਹਜਾਤਿਕੇ. ਬਨ੍ਧਨਟ੍ਠੇਨ ਬਨ੍ਧੁ, ਕਸ੍ਸ ਪਨ ਬਨ੍ਧੂਤਿ ਆਹ ‘‘ਮਾਰਸ੍ਸ ਬਨ੍ਧੁਭੂਤੇ’’ਤਿ. ਪਾਦਾਪਚ੍ਚੇਤਿ ਪਾਦਤੋ ਜਾਤਾਪਚ੍ਚੇ. ਅਯਂ ਕਿਰ ਬ੍ਰਾਹ੍ਮਣਾਨਂ ਲਦ੍ਧਿ ‘‘ਬ੍ਰਾਹ੍ਮਣਾ ਬ੍ਰਹ੍ਮੁਨੋ ਮੁਖਤੋ ਜਾਤਾ, ਖਤ੍ਤਿਯਾ ਉਰਤੋ, ਊਰੂਹਿ ਵੇਸ੍ਸਾ, ਪਾਦਤੋ ਸੁਦ੍ਦਾ’’ਤਿ.
੧੧੪. ਯਸ੍ਮਾ ਪਠਮਕਪ੍ਪਿਕਕਾਲੇ ਚਤੁਵਣ੍ਣਵਵਤ੍ਥਾਨਂ ਨਤ੍ਥਿ, ਸਬ੍ਬੇਵ ਸਤ੍ਤਾ ਏਕਸਦਿਸਾ, ਅਪਰਭਾਗੇ ਪਨ ਤੇਸਂ ਪਯੋਗਭੇਦਵਸੇਨ ਅਹੋਸਿ, ਤਸ੍ਮਾ ਵੁਤ੍ਤਂ ‘‘ਪੋਰਾਣਂ…ਪੇ… ਅਜਾਨਨ੍ਤਾ’’ਤਿ. ਲਦ੍ਧਿਭਿਨ੍ਦਨਤ੍ਥਾਯਾਤਿ ‘‘ਬ੍ਰਾਹ੍ਮਣਾ ਬ੍ਰਹ੍ਮੁਨੋ ਪੁਤ੍ਤਾ ਓਰਸਾ ਮੁਖਤੋ ਜਾਤਾ’’ਤਿ ਏਵਂ ਪਵਤ੍ਤਾਯ ਲਦ੍ਧਿਯਾ ਵਿਨਿਵੇਠਨਤ੍ਥਂ. ਪੁਤ੍ਤਪ੍ਪਟਿਲਾਭਤ੍ਥਾਯਾਤਿ ‘‘ਏਵਂ ਮਯਂ ਪੇਤ੍ਤਿਕਂ ਇਣਂ ਸੋਧੇਸ੍ਸਾਮਾ’’ਤਿ ਲਦ੍ਧਿਯਂ ਠਤ੍ਵਾ ਪੁਤ੍ਤਪ੍ਪਟਿਲਾਭਾਯ. ਅਯਞ੍ਹੇਤ੍ਥ ਧਮ੍ਮਿਕਾਨਂ ਬ੍ਰਾਹ੍ਮਣਾਨਂ ਅਜ੍ਝਾਸਯੋ. ਸਞ੍ਜਾਤਪੁਪ੍ਫਾਤਿ ਰਜਸ੍ਸਲਾ. ਇਤ੍ਥੀਨਞ੍ਹਿ ਕੁਮਾਰਿਭਾਵਪ੍ਪਤ੍ਤਿਤੋ ਪਟ੍ਠਾਯ ਪਚ੍ਛਿਮਵਯਤੋ ਓਰਂ ਅਸਤਿ ਵਿਬਨ੍ਧੇ ਅਟ੍ਠਮੇ ਅਟ੍ਠਮੇ ਸਤ੍ਤਾਹੇ ਗਬ੍ਭਾਸਯਸਞ੍ਞਿਤੇ ਤਤਿਯੇ ਆਵਤ੍ਤੇ ਕਤਿਪਯਾ ਲੋਹਿਤਪੀਲ਼ਕਾ ਸਣ੍ਠਹਿਤ੍ਵਾ ਅਗ੍ਗਹਿਤਪੁਪ੍ਫਾ ਏਵ ਭਿਜ੍ਜਨ੍ਤਿ, ਤਤੋ ਲੋਹਿਤਂ ਪਗ੍ਘਰਤਿ, ਤਤ੍ਥ ਉਤੁਸਮਞ੍ਞਾ, ਪੁਪ੍ਫਸਮਞ੍ਞਾ ਚ. ਨੇਸਨ੍ਤਿ ਬ੍ਰਾਹ੍ਮਣਾਨਂ. ਸਚ੍ਚਵਚਨਂ ਸਿਯਾਤਿ ‘‘ਬ੍ਰਹ੍ਮੁਨੋ ਪੁਤ੍ਤਾ’’ਤਿਆਦਿਵਚਨਂ ਸਚ੍ਚਂ ਯਦਿ ਸਿਯਾ, ਬ੍ਰਾਹ੍ਮਣੀਨਂ…ਪੇ… ਮੁਖਂ ਭਵੇਯ੍ਯ, ਨ ਚੇਤਂ ਅਤ੍ਥਿ.
ਚਤੁਵਣ੍ਣਸੁਦ੍ਧਿਵਣ੍ਣਨਾ
੧੧੫. ਮੁਖਚ੍ਛੇਦਕਵਾਦਨ੍ਤਿ ‘‘ਬ੍ਰਾਹ੍ਮਣਾ ਮਹਾਬ੍ਰਹ੍ਮੁਨੋ ਮੁਖਤੋ ਜਾਤਾ’’ਤਿ ਵਾਦਸ੍ਸ ਛੇਦਕਵਾਦਂ. ਅਰਿਯਭਾਵੇ ਅਸਮਤ੍ਥਾਤਿ ਅਨਰਿਯਭਾਵਾਵਹਾ. ਪਕਤਿਕਾਲ਼ਕਾਤਿ ਸਭਾਵੇਨੇਵ ਨ ਸੁਦ੍ਧਾ. ਕਣ੍ਹੋਤਿ ਕਿਲਿਟ੍ਠੋ ਉਪਤਾਪਕੋ. ਤੇਨਾਹ ‘‘ਦੁਕ੍ਖੋਤਿ ਅਤ੍ਥੋ’’ਤਿ.
ਸੁਕ੍ਕਭਾਵੋ ਨਾਮ ਪਰਿਸੁਦ੍ਧਤਾਤਿ ਆਹ ‘‘ਨਿਕ੍ਕਿਲੇਸਭਾਵੇਨ ਪਣ੍ਡਰਾ’’ਤਿ. ਸੁਕ੍ਕੋਤਿ ਨ ਕਿਲਿਟ੍ਠੋ ਅਨੁਪਤਾਪਕੋਤਿ ਵੁਤ੍ਤਂ ‘‘ਸੁਖੋਤਿ ਅਤ੍ਥੋ’’ਤਿ.
੧੧੬. ਉਭਯਵੋਕਿਣ੍ਣੇਤਿ ਵਚਨਵਿਪਲ੍ਲਾਸੇਨ ਵੁਤ੍ਤਨ੍ਤਿ ਆਹ ‘‘ਉਭਯੇਸੁ ਵੋਕਿਣ੍ਣੇਸੂ’’ਤਿ. ਮਿਸ੍ਸੀਭੂਤੇਸੂਤਿ ‘‘ਕਦਾਚਿ ਕਣ੍ਹਾ ਧਮ੍ਮਾ, ਕਦਾਚਿ ਸੁਕ੍ਕਾ ਧਮ੍ਮਾ’’ਤਿ ਏਵਂ ਏਕਸ੍ਮਿਂ ਸਨ੍ਤਾਨੇ, ਏਕਸ੍ਮਿਂਯੇਵ ਚ ਅਤ੍ਤਭਾਵੇ ਪਵਤ੍ਤਿਯਾ ਮਿਸ੍ਸੀਭੂਤੇਸੁ, ਨ ਪਨ ਏਕਜ੍ਝਂ ਪਵਤ੍ਤਿਯਾ. ਏਤ੍ਥਾਤਿ ਅਨਨ੍ਤਰਵੁਤ੍ਤਧਮ੍ਮਾਵ ਅਨ੍ਵਾਧਿਟ੍ਠਾਤਿ ਆਹ ‘‘ਕਣ੍ਹਸੁਕ੍ਕਧਮ੍ਮੇਸੂ’’ਤਿ. ਯਸ੍ਮਾ ਚ ਤੇ ਬ੍ਰਾਹ੍ਮਣਾ ਨ ਚੇਵ ਤੇ ਧਮ੍ਮੇ ਅਤਿਕ੍ਕਨ੍ਤਾ, ਯਾਯ ਚ ਪਟਿਪਦਾਯ ਅਤਿਕ੍ਕਮੇਯ੍ਯੁਂ, ਸਾਪਿ ਤੇਸਂ ਪਟਿਪਦਾ ਨਤ੍ਥਿ, ਤਸ੍ਮਾ ਵੁਤ੍ਤਂ ‘‘ਵਤ੍ਤਮਾਨਾਪੀ’’ਤਿ. ਨਾਨੁਜਾਨਨ੍ਤਿ ਅਯਥਾਭੁਚ੍ਚਵਾਦਭਾਵਤੋ. ਅਨੁਜਾਨਨਞ੍ਚ ਨਾਮ ਅਬ੍ਭਨੁਮੋਦਨਨ੍ਤਿ ਤਦਭਾਵਂ ਦਸ੍ਸੇਨ੍ਤੇਨ ‘‘ਨਾਨੁਮੋਦਨ੍ਤਿ, ਨ ਪਸਂਸਨ੍ਤੀ’’ਤਿ ਵੁਤ੍ਤਂ. ਚਤੁਨ੍ਨਂ ਵਣ੍ਣਾਨਨ੍ਤਿ ਨਿਦ੍ਧਾਰਣੇ ਸਾਮਿਵਚਨਂ. ਤੇਸਨ੍ਤਿ ਪਨ ਸਮ੍ਬਨ੍ਧੇਪਿ ਵਾ ਸਾਮਿਵਚਨਂ. ਤੇ ਚ ਬ੍ਰਾਹ੍ਮਣਾ ਨ ਏਵਰੂਪਾ ਨ ਏਦਿਸਾ, ਯਾਦਿਸੋ ਅਰਹਾ ਏਕਦੇਸੇਨਾਪਿ ਤੇਨ ਤੇਸਂ ਸਦਿਸਤਾਭਾਵਤੋ, ਤਸ੍ਮਾ ਤੇਨ ਕਾਰਣੇਨ ਨੇਸਂ ਬ੍ਰਾਹ੍ਮਣਾਨਂ ‘‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ’’ਤਿ ਵਾਦਂ ਵਿਞ੍ਞੂ ਯਥਾਭੂਤਵਾਦਿਨੋ ਬੁਦ੍ਧਾਦਯੋ ਅਰਿਯਾ ਨਾਨੁਜਾਨਨ੍ਤਿ.
ਆਰਕਤ੍ਤਾਦੀਹੀਤਿ ਏਤ੍ਥ ਕਿਲੇਸਾਨਂ ਆਰਕਤ੍ਤਾ ਪਹੀਨਭਾਵਤੋ ਦੂਰਤ੍ਤਾ ਅਰਹਂ, ਕਿਲੇਸਾਰੀਨਂ ਹਤਤ੍ਤਾ ਅਰਹਂ, ਸਂਸਾਰਚਕ੍ਕਸ੍ਸ ਅਰਾਨਂ ਹਤਤ੍ਤਾ ਅਰਹਂ, ਪਚ੍ਚਯਾਦੀਨਂ ਅਰਹਤ੍ਤਾ ਅਰਹਂ, ਪਾਪਕਰਣੇ ਰਹਾਭਾਵੇਨ ਅਰਹਨ੍ਤਿ ਏਵਮਤ੍ਥੋ ਵੇਦਿਤਬ੍ਬੋ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੨੫ ਆਦਯੋ), ਤਂ ਸਂਵਣ੍ਣਨਾਸੁ (ਵਿਸੁਦ੍ਧਿ. ਟੀ. ੧.੧੨੪) ਚ ਵੁਤ੍ਤਨਯੇਨ ਵੇਦਿਤਬ੍ਬੋ. ਆਸਵਾਨਂ ਖੀਣਤ੍ਤਾਤਿ ਚਤੁਨ੍ਨਮ੍ਪਿ ਆਸਵਾਨਂ ਅਨਵਸੇਸਤੋ ਪਹੀਨਤ੍ਤਾ. ਬ੍ਰਹ੍ਮਚਰਿਯਵਾਸਨ੍ਤਿ ਮਗ੍ਗਬ੍ਰਹ੍ਮਚਰਿਯਵਾਸਂ. ਤਸ੍ਸ ਵਾਸਸ੍ਸ ਪਰਿਯੋਸਿਤਤ੍ਤਾ ਵੁਤ੍ਥਵਾਸੋ, ਦਸਨ੍ਨਮ੍ਪਿ ਵਾ ਅਰਿਯਵਾਸਾਨਂ ਵੁਤ੍ਥਤ੍ਤਾ ਵੁਤ੍ਥਵਾਸੋ. ਵੁਤ੍ਤਞ੍ਹੇਤਂ –
‘‘ਦਸਯਿਮੇ, ਭਿਕ੍ਖਵੇ, ਅਰਿਯਾਵਾਸਾ, ਯਦਰਿਯਾ ਆਵਸਿਂਸੁ ਵਾ ਆਵਸਨ੍ਤਿ ਵਾ ਆਵਸਿਸ੍ਸਨ੍ਤਿ ਵਾ. ਕਤਮੇ ਦਸ? ਇਧ, ਭਿਕ੍ਖਵੇ, ਭਿਕ੍ਖੁ ਪਞ੍ਚਙ੍ਗਵਿਪ੍ਪਹੀਨੋ ਹੋਤਿ ਛਲ਼ਙ੍ਗਸਮਨ੍ਨਾਗਤੋ ਏਕਾਰਕ੍ਖੋ ਚਤੁਰਾਪਸ੍ਸੇਨੋ ਪਨੁਣ੍ਣਪਚ੍ਚੇਕਸਚ੍ਚੋ ਸਮਵਯਸਠੇਸਨੋ ਅਨਾਵਿਲਸਙ੍ਕਪ੍ਪੋ ਪਸ੍ਸਦ੍ਧਕਾਯਸਙ੍ਖਾਰੋ ਸੁਵਿਮੁਤ੍ਤਚਿਤ੍ਤੋ ਸੁਵਿਮੁਤ੍ਤਪਞ੍ਞੋ. ਇਮੇ ਖੋ, ਭਿਕ੍ਖਵੇ, ਦਸ ਅਰਿਯਾਵਾਸਾ’’ਤਿ (ਅ. ਨਿ. ੧੦.੧੯).
ਵੁਸ੍ਸਤੀਤਿ ਵਾ ਵੁਸਿਤਂ, ਅਰਿਯਮਗ੍ਗੋ, ਅਰਿਯਫਲਞ੍ਚ, ਤਂ ਏਤਸ੍ਸ ਅਤ੍ਥੀਤਿ ਅਤਿਸਯਵਚਨਿਚ੍ਛਾਵਸੇਨ ਅਰਹਾ ‘‘ਵੁਸਿਤਵਾ’’ਤਿ ਵੁਤ੍ਤੋ. ਕਰਣੀਯਂ ਨਾਮ ਪਰਿਞ੍ਞਾਪਹਾਨਸਚ੍ਛਿਕਿਰਿਯਾਭਾਵਨਾ ਦੁਕ੍ਖਸ੍ਸਨ੍ਤਂ ਕਾਤੁਕਾਮੇਹਿ ਏਕਨ੍ਤਤੋ ਕਤ੍ਤਬ੍ਬਤ੍ਤਾ, ਤਂ ਪਨ ਯਸ੍ਮਾ ਚਤੂਹਿ ਮਗ੍ਗੇਹਿ ਪਚ੍ਚੇਕਂ ਚਤੂਸੁ ਸਚ੍ਚੇਸੁ ਕਾਤਬ੍ਬਂ ਕਤਂ, ਤਸ੍ਮਾ ਵੁਤ੍ਤਂ ‘‘ਚਤੂਹਿ…ਪੇ… ਕਤਕਰਣੀਯੋ’’ਤਿ. ਓਸੀਦਾਪਨਟ੍ਠੇਨ ਭਾਰਾ ਵਿਯਾਤਿ ਭਾਰਾ, ਕਿਲੇਸਾ, ਖਨ੍ਧਾ ਚ. ਵੁਤ੍ਤਞ੍ਹਿ ‘‘ਭਾਰਾ ਹਵੇ ਪਞ੍ਚਕ੍ਖਨ੍ਧਾ’’ਤਿ (ਸਂ. ਨਿ. ੩.੨੨) ਓਹਾਰਿਤੋਤਿ ਅਪਨੀਤੋ. ਸਕੋ ਅਤ੍ਥੋ ਸਦਤ੍ਥੋਤਿ ਏਤ੍ਥ ਦ-ਕਾਰੋ ਪਦਸਨ੍ਧਿਕਰੋ. ਕਾਮਂ ਦਿਟ੍ਠਿਆਦਯੋਪਿ ਸਂਯੋਜਨਾਨਿ ਏਵ, ਤਥਾਪਿ ਤਣ੍ਹਾਯ ਭਵਸਂਯੋਜਨਟ੍ਠੋ ਸਾਤਿਸਯੋ. ਯਥਾਹ ‘‘ਅਵਿਜ੍ਜਾਨੀਵਰਣਾਨਂ ਸਤ੍ਤਾਨਂ ਤਣ੍ਹਾਸਂਯੋਜਨਾਨ’’ਨ੍ਤਿ. (ਸਂ. ਨਿ. ੨.੧੨੫, ੧੨੬, ੧੨੭, ੧੩੨, ੧੩੪, ੧੩੬, ੧੪੨; ੩.੫.੫੨੦; ਕਥਾ. ੭੫) ਤਤੋ ਸਾ ਏਵ ਸੁਤ੍ਤੇ (ਦੀ. ਨਿ. ੨.੪੦੦; ਮ. ਨਿ. ੧.੯੩, ੧੩੩; ੩.੩੭੩; ਸਂ. ਨਿ. ੩.੧੦੮੧; ਪਟਿ. ਮ. ੧.੩੪ ਆਦਯੋ) ਸਮੁਦਯਸਚ੍ਚਭਾਵੇਨ ਵੁਤ੍ਤਾ, ਤਸ੍ਮਾ ਵੁਤ੍ਤਂ ‘‘ਭਵਸਂਯੋਜਨਂ ਵੁਚ੍ਚਤਿ ਤਣ੍ਹਾ’’ਤਿ. ਸਮ੍ਮਦਞ੍ਞਾ ਵਿਮੁਤ੍ਤੋਤਿ ਸਮ੍ਮਾ ਅਞ੍ਞਾਯ ਜਾਨਨਭੂਤਾਯ ਅਗ੍ਗਮਗ੍ਗਪਞ੍ਞਾਯ ਸਮ੍ਮਾ ਯਥਾਭੂਤਂ ਯਂ ਯਥਾ ਜਾਨਿਤਬ੍ਬਂ, ਤਂ ਤਥਾ ਜਾਨਿਤ੍ਵਾ ਵਿਮੁਤ੍ਤੋ. ਇਮਸ੍ਮਿਂ ਲੋਕੇਤਿ ਇਮਸ੍ਮਿਂ ਸਤ੍ਤਲੋਕੇ. ਇਧਤ੍ਤਭਾਵੇਤਿ ਇਮਸ੍ਮਿਂ ਅਤ੍ਤਭਾਵੇ, ਪਰਤ੍ਤਭਾਵੇਤਿ ਪਰਸ੍ਮਿਂ ਅਤ੍ਤਭਾਵੇ, ਇਧਲੋਕੇ, ਪਰਲੋਕੇ ਚਾਤਿ ਅਤ੍ਥੋ.
੧੧੭. ਅਨ੍ਤਰਵਿਰਹਿਤਾਤਿ ਵਿਭਾਗਵਿਰਹਿਤਾ. ਤੇਨਾਹ ‘‘ਅਤ੍ਤਨੋ ਕੁਲੇਨ ਸਦਿਸਾ’’ਤਿ. ਅਨੁਯਨ੍ਤੀਤਿ ਅਨੁਯਨ੍ਤਾ, ਅਨੁਯਨ੍ਤਾ ਏਵ ਆਨੁਯਨ੍ਤਾ, ਅਨੁਵਤ੍ਤਕਾ. ਤੇਨਾਹ ‘‘ਵਸਵਤ੍ਤਿਨੋ’’ਤਿ.
੧੧੮. ਨਿਵਿਟ੍ਠਾਤਿ ਸਦ੍ਧੇਯ੍ਯਵਤ੍ਥੁਸ੍ਮਿਂ ਅਨੁਪਵਿਸਨਵਸੇਨ ਨਿਵਿਟ੍ਠਾ. ਤਤੋ ਏਵ ਤਸ੍ਮਿਂ ਅਧਿਕਂ ਨਿਵਿਸਨਤੋ ਅਭਿਨਿਵਿਟ੍ਠਾ. ਅਚਲਟ੍ਠਿਤਾਤਿ ਅਚਲਭਾਵੇ ਠਿਤਾ.
ਯਨ੍ਤਿ ਯਂ ਕਥੇਤਬ੍ਬਧਮ੍ਮਂ ਅਨੁਪਧਾਰੇਤ੍ਵਾ, ਤਦਤ੍ਥਞ੍ਚ ਅਪ੍ਪਚ੍ਚਕ੍ਖਂ ਕਤ੍ਵਾ ਕਥਨਂ, ਏਤਂ ਅਟ੍ਠਾਨਂ ਅਕਾਰਣਂ ਤਸ੍ਸ ਬੋਧਿਮੂਲੇਯੇਵ ਸਮੁਚ੍ਛਿਨ੍ਨਤ੍ਤਾ. ਵਿਚ੍ਛਿਨ੍ਦਜਨਨਤ੍ਥਨ੍ਤਿ ਰਤਨਤ੍ਤਯਸਦ੍ਧਾਯ ਵਿਚ੍ਛਿਨ੍ਦਸ੍ਸ ਉਪ੍ਪਾਦਨਤ੍ਥਂ, ਅਞ੍ਞਥਤ੍ਤਾਯਾਤਿ ਅਤ੍ਥੋ. ਸੋਤਿ ਮਾਰੋ. ਮੁਸਾਵਾਦਂ ਕਾਤੁਂ ਨਾਸਕ੍ਖੀਤਿ ਆਗਤਫਲਸ੍ਸ ਅਰਿਯਸਾਵਕਸ੍ਸ ਪੁਰਤੋ ਮੁਸਾ ਵਤ੍ਤੁਂ ਨ ਵਿਸਹਿ, ਤਸ੍ਮਾ ਆਮ ਮਾਰੋਸ੍ਮੀਤਿ ਪਟਿਜਾਨਿ. ਸਿਲਾਪਥਵਿਯਨ੍ਤਿ ਰਤਨਮਯਸਿਲਾਪਥਵਿਯਂ. ਸਿਨੇਰੁਂ ਕਿਰ ਪਰਿਵਾਰੇਤ੍ਵਾ ਠਿਤੋ ਭੂਮਿਪ੍ਪਦੇਸੋ ਸਤ੍ਤਰਤਨਮਯੋ, ‘‘ਸੁਵਣ੍ਣਮਯੋ’’ਤਿ ਕੇਚਿ, ਸਾ ਵਿਤ੍ਥਾਰਤੋ, ਉਬ੍ਬੇਧਤੋ ਅਨੇਕਯੋਜਨਸਹਸ੍ਸਪਰਿਮਾਣਾ ਅਤਿਵਿਯ ਨਿਚ੍ਚਲਾ. ਕਿਂ ਤ੍ਵਂ ਏਤ੍ਥਾਤਿ ਕਿਂ ਕਾਰਣਾ ਤ੍ਵਂ ਏਤ੍ਥ. ‘‘ਠਿਤੋ’’ਤਿ ਅਚ੍ਛਰਂ ਪਹਰਿ. ਠਾਤੁਂ ਅਸਕ੍ਕੋਨ੍ਤੋਤਿ ਅਰਿਯਸਾਵਕਸ੍ਸ ਪੁਰਤੋ ਠਾਤੁਂ ਅਸਕ੍ਕੋਨ੍ਤੋ. ਅਯਞ੍ਹਿ ਅਰਿਯਧਮ੍ਮਾਧਿਗਮਸ੍ਸ ਆਨੁਭਾਵੋ, ਯਂ ਮਾਰੋਪਿ ਨਾਮ ਮਹਾਨੁਭਾਵੋ ਉਜੁਕਂ ਪਟਿਪ੍ਪਰਿਤੁਂ ਨ ਸਕ੍ਕੋਤਿ.
ਮਗ੍ਗੋ ਏਵ ਮੂਲਂ ਮਗ੍ਗਮੂਲਂ, ਤਸ੍ਸ. ਸਞ੍ਜਾਤਤ੍ਤਾ ਉਪ੍ਪਨ੍ਨਤ੍ਤਾ. ਤੇਨ ਮਗ੍ਗਮੂਲੇਨ ਪਤਿਟ੍ਠਿਤਸਨ੍ਤਾਨੇ ਲਦ੍ਧਪਤਿਟ੍ਠਾ. ਭਗਵਤੋ ਦੇਸਨਾਧਮ੍ਮਂ ਨਿਸ੍ਸਾਯ ਅਰਿਯਾਯ ਜਾਤਿਯਾ ਜਾਤੋ ‘‘ਭਗਵਨ੍ਤਂ ਨਿਸ੍ਸਾਯ ਅਰਿਯਭੂਮਿਯਂ ਜਾਤੋ’’ਤਿ ਵੁਤ੍ਤੋ. ‘‘ਉਰੇ ਵਸਿਤ੍ਵਾ’’ਤਿ ਇਦਂ ਧਮ੍ਮਘੋਸਸ੍ਸ ਉਰਤੋ ਸਮੁਟ੍ਠਾਨਤਾਯ ਵੁਤ੍ਤਂ. ਉਰੇ ਵਾਯਾਮਜਨਿਤਾਭਿਜਾਤਿਤਾਯ ਵਾ ਓਰਸੋ. ਮੁਖਤੋ ਜਾਤੇਨ ਜਾਤੋ ‘‘ਮੁਖਤੋ ਜਾਤੋ’’ਤਿ ਵੁਤ੍ਤੋ. ਕਾਰਣਕਾਰਣੇਪਿ ਹਿ ਕਾਰਣੇ ਵਿਯ ਵੋਹਾਰੋ ਹੋਤਿ ‘‘ਤਿਣੇਹਿ ਭਤ੍ਤਂ ਸਿਦ੍ਧ’’ਨ੍ਤਿ. ਕੇਚਿ ਪਨ ‘‘ਵਿਮੋਕ੍ਖਮੁਖਸ੍ਸ ਵਸੇਨ ਜਾਤਤ੍ਤਾ ਮੁਖਤੋ ਜਾਤੋ’’ਤਿ ਵਦਨ੍ਤਿ, ਤਤ੍ਥਾਪਿ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਪੁਰਿਮੇਨਤ੍ਥੇਨ ਯੋਨਿਜੋ, ਸੇਦਜੋ, ਮੁਖਜੋਤਿ ਤੀਸੁ ਸਮ੍ਬਨ੍ਧੇਸੁ ਮੁਖਜੇਨ ਸਮ੍ਬਨ੍ਧੇਨ ਭਗਵਤੋ ਪੁਤ੍ਤਭਾਵੋ ਵਿਭਾਵਿਤੋ. ਅਤ੍ਥਦ੍ਵਯੇਨਾਪਿ ਧਮ੍ਮਜਭਾਵੋਯੇਵ ਦੀਪਿਤੋ. ਅਰਿਯਧਮ੍ਮਪ੍ਪਤ੍ਤਿਤੋ ਲਦ੍ਧਵਿਸੇਸੋ ਹੁਤ੍ਵਾ ਪਵਤ੍ਤੋ ਤਦੁਤ੍ਤਰਕਾਲਿਕੋ ਖਨ੍ਧਸਨ੍ਤਾਨੋ ‘‘ਅਰਿਯਧਮ੍ਮਤੋ ਜਾਤੋ’’ਤਿ ਵੇਦਿਤਬ੍ਬੋ, ਅਰਿਯਧਮ੍ਮਂ ਵਾ ਮਗ੍ਗਫਲਂ ਨਿਸ੍ਸਾਯ, ਉਪਨਿਸ੍ਸਾਯ ਚ ਜਾਤੋ ਸਬ੍ਬੋਪਿ ਧਮ੍ਮਪ੍ਪਬਨ੍ਧੋ ‘‘ਅਰਿਯਧਮ੍ਮਤੋ ਜਾਤੋ’’ਤਿ ਗਹੇਤਬ੍ਬੋ. ਤੇਸਂ ਪਨ ਅਰਿਯਧਮ੍ਮਾਨਂ ਅਪਰਿਯੋਸਿਤਕਿਚ੍ਚਤਾਯ ਅਰਿਯਭਾਵੇਨ ਅਭਿਨਿਬ੍ਬਤ੍ਤਿਮਤ੍ਤਂ ਉਪਾਦਾਯ ‘‘ਅਰਿਯਧਮ੍ਮਤੋ ਜਾਤਤ੍ਤਾ’’ਤਿ ਵੁਤ੍ਤਂ. ਪਰਿਯੋਸਿਤਕਿਚ੍ਚਤਾਯ ਤਥਾ ਨਿਬ੍ਬਤ੍ਤਿਪਾਰਿਪੂਰਿਂ ਉਪਾਦਾਯ ‘‘ਨਿਮ੍ਮਿਤਤ੍ਤਾ’’ਤਿ ਵੁਤ੍ਤਂ, ਯਤੋ ‘‘ਧਮ੍ਮਜੋ ਧਮ੍ਮਨਿਮ੍ਮਿਤੋ’’ਤਿ ਵੁਤ੍ਤਂ. ‘‘ਨਵਲੋਕੁਤ੍ਤਰਧਮ੍ਮਦਾਯਂ ਆਦਿਯਤੀਤਿ ਧਮ੍ਮਦਾਯਾਦੋ’’ ਤਿਪਿ ਪਾਠੋ. ਅਸ੍ਸਾਤਿ ‘‘ਭਗਵਤੋਮ੍ਹਿਪੁਤ੍ਤੋ’’ਤਿਆਦਿਨਾ ਵੁਤ੍ਤਸ੍ਸ ਵਾਕ੍ਯਸ੍ਸ. ਅਤ੍ਥਂ ਦਸ੍ਸੇਨ੍ਤੋਤਿ ਭਾਵਤ੍ਥਂ ਪਕਾਸੇਨ੍ਤੋ. ਤਥਾਗਤਸ੍ਸ ਅਨਞ੍ਞਸਾਧਾਰਣਸੀਲਾਦਿਧਮ੍ਮਕ੍ਖਨ੍ਧਸ੍ਸ ਸਮੂਹਨਿਵੇਸਵਸੇਨ ਧਮ੍ਮਕਾਯਤਾਯ ਨ ਕਿਞ੍ਚਿ ਵਤ੍ਤਬ੍ਬਂ ਅਤ੍ਥਿ, ਸਤ੍ਥੁਟ੍ਠਾਨਿਯਸ੍ਸ ਪਨ ਧਮ੍ਮਕਾਯਤਂ ਦਸ੍ਸੇਤੁਂ ‘‘ਕਸ੍ਮਾ ਤਥਾਗਤੋ ਧਮ੍ਮਕਾਯੋਤਿ ਵੁਤ੍ਤੋ’’ਤਿ ਸਯਮੇਵ ਪੁਚ੍ਛਂ ਸਮੁਟ੍ਠਾਪੇਤ੍ਵਾ ‘‘ਤਥਾਗਤੋ ਹੀ’’ਤਿਆਦਿਨਾ ਤਮਤ੍ਥਂ ਵਿਸ੍ਸਜ੍ਜੇਤਿ. ਹਦਯੇਨ ਚਿਨ੍ਤੇਤ੍ਵਾਤਿ ‘‘ਇਮਂ ਧਮ੍ਮਂ ਇਮਸ੍ਸ ਦੇਸੇਸ੍ਸਾਮੀ’’ਤਿ ਤਸ੍ਸ ਉਪਗਤਸ੍ਸ ਵੇਨੇਯ੍ਯਜਨਸ੍ਸ ਬੋਧਨਤ੍ਥਂ ਚਿਤ੍ਤੇਨ ਚਿਨ੍ਤੇਤ੍ਵਾ. ਵਾਚਾਯ ਅਭਿਨੀਹਰੀਤਿ ਸਦ੍ਧਮ੍ਮਦੇਸਨਾਵਾਚਾਯ ਕਰਵੀਕਰੁਤਮਞ੍ਜੁਨਾ ਬ੍ਰਹ੍ਮਸ੍ਸਰੇਨ ਵੇਨੇਯ੍ਯਸਨ੍ਤਾਨਾਭਿਮੁਖਂ ਤਦਜ੍ਝਾਸਯਾਨੁਰੂਪਂ ਹਿਤਮਤ੍ਥਂ ਨੀਹਰਿ ਉਪਨੇਸਿ. ਤੇਨਾਤਿ ਤੇਨ ਕਾਰਣੇਨ ਏਵਂਸਦ੍ਧਮ੍ਮਾਧਿਮੁਤ੍ਤਿਭਾਵੇਨ. ਅਸ੍ਸਾਤਿ ਤਥਾਗਤਸ੍ਸ. ਧਮ੍ਮਮਯਤ੍ਤਾਤਿ ਧਮ੍ਮਭੂਤਤ੍ਤਾ. ਇਧਾਧਿਪ੍ਪੇਤਧਮ੍ਮੋ ਸੇਟ੍ਠਟ੍ਠੇਨ ਬ੍ਰਹ੍ਮਭੂਤੋਤਿ ਆਹ ‘‘ਧਮ੍ਮਕਾਯਤ੍ਤਾ ਏਵ ਬ੍ਰਹ੍ਮਕਾਯੋ’’ਤਿ. ਸਬ੍ਬਸੋ ਅਧਮ੍ਮਂ ਪਜਹਿਤ੍ਵਾ ਅਨਵਸੇਸਤੋ ਧਮ੍ਮੋ ਏਵ ਭੂਤੋਤਿ ਧਮ੍ਮਭੂਤੋ. ਤਥਾਰੂਪੋ ਚ ਯਸ੍ਮਾ ਸਭਾਵਤੋ ਧਮ੍ਮੋ ਏਵਾਤਿ ਵਤ੍ਤਬ੍ਬਤਂ ਅਰਹਤੀਤਿ ਆਹ ‘‘ਧਮ੍ਮਸਭਾਵੋ’’ਤਿ.
੧੧੯. ਸੇਟ੍ਠਚ੍ਛੇਦਕਵਾਦਨ੍ਤਿ ‘‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ’’ਤਿ (ਦੀ. ਨਿ. ੩.੧੧੬) ਏਵਂ ਵੁਤ੍ਤਸੇਟ੍ਠਭਾਵਚ੍ਛੇਦਕਵਾਦਂ. ਅਪਰੇਨਪਿ ਨਯੇਨਾਤਿ ਯਥਾਵੁਤ੍ਤਸੇਟ੍ਠਚ੍ਛੇਦਕਵਾਦਤੋ ਅਪਰੇਨਪਿ ਪੋਰਾਣਕਲੋਕੁਪ੍ਪਤ੍ਤਿਦਸ੍ਸਨਨਯੇਨ. ਸੇਟ੍ਠਚ੍ਛੇਦ…ਪੇ… ਦਸ੍ਸੇਤੁਨ੍ਤਿ ਸੋਪਿ ਹਿ ‘‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨਾ ਅਞ੍ਞੇ ਵਣ੍ਣਾ’’ਤਿ, ‘‘ਬ੍ਰਾਹ੍ਮਣਾ ਬ੍ਰਹ੍ਮੁਨੋ ਪੁਤ੍ਤਾ ਓਰਸਾ ਮੁਖਤੋ ਜਾਤਾ ਬ੍ਰਹ੍ਮਜਾ’’ਤਿ (ਦੀ. ਨਿ. ੩.੧੧੪) ਚ ਏਵਂ ਪਵਤ੍ਤਾਯ ਮਿਚ੍ਛਾਦਿਟ੍ਠਿਯਾ ਵਿਨਿਵੇਠਨੋ ਜਾਤਿਬ੍ਰਾਹ੍ਮਣਾਨਂ ਸੇਟ੍ਠਭਾਵਸ੍ਸ ਛੇਦਨਤੋ ਸੇਟ੍ਠਚ੍ਛੇਦਨਵਾਦੋ ਨਾਮ ਹੋਤੀਤਿ ਦਸ੍ਸੇਤੁਨ੍ਤਿ ਅਤ੍ਥੋ.
ਇਤ੍ਥਭਾਵਨ੍ਤਿ ਇਮਂ ਪਕਾਰਤਂ ਮਨੁਸ੍ਸਭਾਵਂ. ਸਾਮਞ੍ਞਜੋਤਨਾ ਹਿ ਵਿਸੇਸੇ ਅਵਤਿਟ੍ਠਤਿ, ਪਕਰਣਵਸੇਨ ਵਾ ਅਯਮਤ੍ਥੋ ਅਵਚ੍ਛਿਨ੍ਨੋ ਦਟ੍ਠਬ੍ਬੋ. ਮਨੇਨੇਵ ਨਿਬ੍ਬਤ੍ਤਾਤਿ ਬਾਹਿਰਪਚ੍ਚਯੇਨ ਵਿਨਾ ਕੇਵਲਂ ਉਪਚਾਰਝਾਨਮਨਸਾਵ ਨਿਬ੍ਬਤ੍ਤਾ. ਯਾਯ ਉਪਚਾਰਜ੍ਝਾਨਚੇਤਨਾਯ ਤੇ ਤਤ੍ਥ ਨਿਬ੍ਬਤ੍ਤਾ, ਨੀਵਰਣਵਿਕ੍ਖਮ੍ਭਨਾਦਿਨਾ ਉਲ਼ਾਰੋ ਤਸ੍ਸਾ ਪਵਤ੍ਤਿਵਿਸੇਸੋ, ਤਸ੍ਮਾ ਝਾਨਫਲਕਪ੍ਪੋ ਤਸ੍ਸਾ ਫਲਵਿਸੇਸੋਤਿ ਆਹ ‘‘ਬ੍ਰਹ੍ਮਲੋਕੇ ਵਿਯਾ’’ਤਿਆਦਿ. ‘‘ਸਯਂਪਭਾ’’ਤਿ ਪਦਾਨਂ ਤਤ੍ਥ ਸੂਰਿਯਾਲੋਕਾਦੀਹਿ ਵਿਨਾ ਅਨ੍ਧਕਾਰਂ ਵਿਧਮਨ੍ਤਾ ਸਯਮੇਵ ਪਭਾਸਨ੍ਤੀਤਿ ਸਯਂਪਭਾ, ਅਨ੍ਤਲਿਕ੍ਖੇ ਆਕਾਸੇ ਚਰਨ੍ਤੀਤਿ ਅਨ੍ਤਲਿਕ੍ਖਚਰਾ, ਤਦਞ੍ਞਕਾਮਾਵਚਰਸਤ੍ਤਾਨਂ ਵਿਯ ਸਰੀਰਸ੍ਸ ਵਿਚਰਣਟ੍ਠਾਨਸ੍ਸ ਅਸੁਭਤਾਭਾਵਤੋ ਸੁਭਂ, ਸੁਭੇਵ ਤਿਟ੍ਠਨ੍ਤੀਤਿ ਸੁਭਟ੍ਠਾਯਿਨੋਤਿ ਅਤ੍ਥੋ ਵੇਦਿਤਬ੍ਬੋ.
ਰਸਪਥਵਿਪਾਤੁਭਾਵਵਣ੍ਣਨਾ
੧੨੦. ਸਬ੍ਬਂ ਚਕ੍ਕਵਾਲ਼ਨ੍ਤਿ ਅਨਵਸੇਸਂ ਕੋਟਿਸਤਸਹਸ੍ਸਂ ਚਕ੍ਕਵਾਲ਼ਂ. ਸਮਤਨੀਤਿ ਸਞ੍ਛਾਦੇਨ੍ਤੀ ਵਿਪ੍ਫਰਿ, ਸਾ ਪਨ ਤਸ੍ਮਿਂ ਉਦਕੇ ਪਤਿਟ੍ਠਿਤਾ ਅਹੋਸੀਤਿ ਆਹ ‘‘ਪਤਿਟ੍ਠਹੀ’’ਤਿ. ਵਣ੍ਣੇਨ ਸਮ੍ਪਨ੍ਨਾਤਿ ਸਮ੍ਪਨ੍ਨਵਣ੍ਣਾ. ਮਕ੍ਖਿਕਣ੍ਡਕਰਹਿਤਨ੍ਤਿ ਮਕ੍ਖਿਕਾਹਿ ਚ ਤਾਸਂ ਅਣ੍ਡਕੇਹਿ ਚ ਰਹਿਤਂ.
ਅਤੀਤਾਨਨ੍ਤਰੇਪਿ ਕਪ੍ਪੇ ਲੋਲੋਯੇਵ. ਕਸ੍ਮਾ? ਏਵਂ ਚਿਰਪਰਿਚਿਤਲੋਲਤਾਵਸੇਨ ਸਬ੍ਬਪਠਮਂ ਤਥਾ ਅਕਾਸੀਤਿ ਦਸ੍ਸੇਤਿ. ਕਿਮੇਵਿਦਨ੍ਤਿ ‘‘ਵਣ੍ਣਤੋ, ਗਨ੍ਧਤੋ ਚ ਤਾਵ ਞਾਤਂ, ਰਸਤੋ ਪਨ ਕਿਮੇਵਿਦਂ ਭਵਿਸ੍ਸਤੀ’’ਤਿ ਸਂਸਯਜਾਤੋ ਵਦਤਿ. ਤਿਟ੍ਠਤੀਤਿ ਅਟ੍ਠਾਸਿ.
ਚਨ੍ਦਿਮਸੂਰਿਯਾਦਿਪਾਤੁਭਾਵਵਣ੍ਣਨਾ
੧੨੧. ਆਲੁਪ੍ਪਕਾਰਕਨ੍ਤਿ ਏਤ੍ਥ ਆਲੋਪਪਰਿਯਾਯੋ ਆਲੁਪ੍ਪ-ਸਦ੍ਦੋਤਿ ਆਹ ‘‘ਆਲੋਪਂ ਕਤ੍ਵਾ’’ਤਿ. ਪਚ੍ਚਕ੍ਖਭੂਤਾਨਮ੍ਪਿ ਚਨ੍ਦਿਮਸੂਰਿਯਾਨਂ ਪਵਤ੍ਤਿਯਂ ਲੋਕਿਯਾਨਂ ਸਮ੍ਮੋਹੋ ਹੋਤਿ, ਤਂ ਵਿਧਮਿਤੁਂ ‘‘ਕੋ ਪਨ ਤੇਸ’’ਨ੍ਤਿਆਦਿਨਾ ਅਟ੍ਠ ਪਞ੍ਹਾਵਿਸ੍ਸਜ੍ਜਨਾਨਿ ਗਹਿਤਾਨਿ. ਤਤ੍ਥ ਤੇਸਨ੍ਤਿ ਚਨ੍ਦਿਮਸੂਰਿਯਾਨਂ. ਕਸ੍ਮਿਨ੍ਤਿ ਕਸ੍ਮਿਂ ਠਾਨੇ. ‘‘ਕੋ ਉਪਰੀ’’ਤਿ ਏਤੇਨੇਵ ਕੋ ਹੇਟ੍ਠਾਤਿ ਅਯਮਤ੍ਥੋ ਵੁਤ੍ਤੋਯੇਵ. ਤਥਾ ‘‘ਕੋ ਸੀਘਂ ਗਚ੍ਛਤੀ’’ਤਿ ਇਮਿਨਾ ਕੋ ਸਣਿਕਂ ਗਚ੍ਛਤੀਤਿ ਅਯਮ੍ਪਿ ਅਤ੍ਥੋ ਵੁਤ੍ਤੋਯੇਵ. ਵੀਥਿਯੋਤਿ ਗਮਨਵੀਥਿਯੋ. ਏਕਤੋਤਿ ਏਕਸ੍ਮਿਂ ਖਣੇ ਪਾਤੁਭਵਨ੍ਤਿ. ਸੂਰਿਯਮਣ੍ਡਲੇ ਪਨ ਅਤ੍ਥਙ੍ਗਤੇ ਚਨ੍ਦਮਣ੍ਡਲਂ ਪਞ੍ਞਾਯਿਤ੍ਥ. ਛਨ੍ਦਂ ਞਤ੍ਵਾ ਵਾਤਿ ਰੁਚਿਂ ਞਤ੍ਵਾ ਵਿਯ.
ਉਭਯਨ੍ਤਿ ਅਨ੍ਤੋ, ਬਹਿ ਚ.
ਉਜੁਕਨ੍ਤਿ ਆਯਾਮਤੋ, ਵਿਤ੍ਥਾਰਤੋ, ਉਬ੍ਬੇਧਤੋ ਚ. ਪਰਿਮਣ੍ਡਲਤੋਤਿ ਪਰਿਕ੍ਖੇਪਤੋ.
ਉਜੁਕਂ ਸਣਿਕਂ ਗਚ੍ਛਤਿ ਅਮਾਵਾਸਿਯਂ ਸੂਰਿਯੇਨ ਸਦ੍ਧਿਂ ਗਚ੍ਛਨ੍ਤੋ ਦਿਵਸੇ ਦਿਵਸੇ ਥੋਕਂ ਥੋਕਂ ਓਹੀਯਨ੍ਤੋ ਪੁਣ੍ਣਮਾਸਿਯਂ ਉਪਡ੍ਢਮਗ੍ਗਮੇਵ ਓਹੀਯਨਤੋ. ਤਿਰਿਯਂ ਸੀਘਂ ਗਚ੍ਛਤਿ ਏਕਸ੍ਮਿਮ੍ਪਿ ਮਾਸੇ ਕਦਾਚਿ ਦਕ੍ਖਿਣਤੋ, ਕਦਾਚਿ ਉਤ੍ਤਰਤੋ ਦਸ੍ਸਨਤੋ. ‘‘ਦ੍ਵੀਸੁ ਪਸ੍ਸੇਸੂ’’ਤਿ ਇਦਂ ਯੇਭੁਯ੍ਯਵਸੇਨ ਵੁਤ੍ਤਂ. ਚਨ੍ਦਸ੍ਸ ਪੁਰਤੋ, ਪਚ੍ਛਤੋ, ਸਮਞ੍ਚ ਤਾਰਕਾ ਗਚ੍ਛਨ੍ਤਿਯੇਵ. ਅਤ੍ਤਨੋ ਠਾਨਨ੍ਤਿ ਅਤ੍ਤਨੋ ਗਮਨਟ੍ਠਾਨਂ. ਨ ਵਿਜਹਨ੍ਤਿ ਅਤ੍ਤਨੋ ਵੀਥਿਯਾਵ ਗਚ੍ਛਨਤੋ. ਸੂਰਿਯਸ੍ਸ ਉਜੁਕਂ ਗਮਨਸ੍ਸ ਸੀਘਤਾ ਚਨ੍ਦਸ੍ਸ ਗਮਨਂ ਉਪਾਦਾਯ ਵੇਦਿਤਬ੍ਬਾ. ਤਿਰਿਯਂ ਗਮਨਂ ਦਕ੍ਖਿਣਦਿਸਤੋ ਉਤ੍ਤਰਦਿਸਾਯ, ਉਤ੍ਤਰਦਿਸਤੋ ਚ ਦਕ੍ਖਿਣਦਿਸਾਯ ਗਮਨਂ ਦਨ੍ਧਂ ਛਹਿ ਛਹਿ ਮਾਸੇਹਿ ਇਜ੍ਝਨਤੋ. ਸੋਤਿ ਸੂਰਿਯੋ. ਕਾਲ਼ਪਕ੍ਖਉਪੋਸਥਤੋਤਿ ਕਾਲ਼ਪਕ੍ਖੇ ਉਪੋਸਥੇ ਚਨ੍ਦੇਨ ਸਹੇਵ ਗਨ੍ਤ੍ਵਾ ਤਤੋ ਪਰਂ. ਪਾਟਿਪਦਦਿਵਸੇਤਿ ਸੁਕ੍ਕਪਕ੍ਖਪਾਟਿਪਦਦਿਵਸੇ. ਓਹਾਯ ਗਚ੍ਛਤਿ ਅਤ੍ਤਨੋ ਸੀਘਗਾਮਿਤਾਯ, ਤਸ੍ਸ ਚ ਦਨ੍ਧਗਾਮਿਤਾਯ. ਲੇਖਾ ਵਿਯ ਪਞ੍ਞਾਯਤਿ ਪਚ੍ਛਿਮਦਿਸਾਯਂ. ਯਾਵ ਉਪੋਸਥਦਿਵਸਾਤਿ ਯਾਵ ਸੁਕ੍ਕਪਕ੍ਖਉਪੋਸਥਦਿਵਸਾ. ‘‘ਚਨ੍ਦੋ ਅਨੁਕ੍ਕਮੇਨ ਵਡ੍ਢਿਤ੍ਵਾ’’ਤਿ ਇਦਂ ਉਪਰਿਭਾਗਤੋ ਪਤਿਤਸੂਰਿਯਾਲੋਕਤਾਯ ਹੇਟ੍ਠਤੋ ਪਵਤ੍ਤਾਯ ਸੂਰਿਯਸ੍ਸ ਦੂਰਭਾਵੇਨ ਦਿਵਸੇ ਦਿਵਸੇ ਅਨੁਕ੍ਕਮੇਨ ਪਰਿਹਾਯਮਾਨਾਯ ਅਤ੍ਤਨੋ ਛਾਯਾਯ ਵਸੇਨ ਅਨੁਕ੍ਕਮੇਨ ਚਨ੍ਦਮਣ੍ਡਲਪ੍ਪਦੇਸਸ੍ਸ ਵਡ੍ਢਮਾਨਸ੍ਸ ਵਿਯ ਦਿਸ੍ਸਮਾਨਤਾਯ ਵੁਤ੍ਤਂ, ਤਸ੍ਮਾ ਅਨੁਕ੍ਕਮੇਨ ਵਡ੍ਢਿਤ੍ਵਾ ਵਿਯ. ਉਪੋਸਥਦਿਵਸੇ ਪੁਣ੍ਣਮਾਯਂ ਪਰਿਪੁਣ੍ਣੋ ਹੋਤਿ, ਪਰਿਪੁਣ੍ਣਮਣ੍ਡਲੋ ਹੁਤ੍ਵਾ ਦਿਸ੍ਸਤੀਤਿ ਅਤ੍ਥੋ. ਧਾਵਿਤ੍ਵਾ ਗਣ੍ਹਾਤਿ ਚਨ੍ਦਸ੍ਸ ਦਨ੍ਧਗਤਿਤਾਯ, ਅਤ੍ਤਨੋ ਚ ਸੀਘਗਤਿਤਾਯ. ਅਨੁਕ੍ਕਮੇਨ ਹਾਯਿਤ੍ਵਾਤਿ ਏਤ੍ਥ ‘‘ਅਨੁਕ੍ਕਮੇਨ ਵਡ੍ਢਿਤ੍ਵਾ’’ਤਿ ਏਤ੍ਥ ਵੁਤ੍ਤਨਯੇਨ ਅਤ੍ਥੋ ਵੇਦਿਤਬ੍ਬੋ. ਤਤ੍ਥ ਪਨ ਛਾਯਾਯ ਹਾਯਮਾਨਤਾਯ ਮਣ੍ਡਲਂ ਵਡ੍ਢਮਾਨਂ ਵਿਯ ਦਿਸ੍ਸਤਿ, ਇਧ ਛਾਯਾਯ ਵਡ੍ਢਮਾਨਤਾਯ ਮਣ੍ਡਲਂ ਹਾਯਮਾਨਂ ਵਿਯ ਦਿਸ੍ਸਤਿ.
ਯਾਯ ਵੀਥਿਯਾ ਸੂਰਿਯੇ ਗਚ੍ਛਨ੍ਤੇ ਵਸ੍ਸਵਲਾਹਕਾ ਦੇਵਪੁਤ੍ਤਾ ਸੂਰਿਯਾਭਿਤਾਪਸਨ੍ਤਤ੍ਤਾ ਅਤ੍ਤਨੋ ਵਿਮਾਨਤੋ ਨ ਨਿਕ੍ਖਮਨ੍ਤਿ, ਕੀਲ਼ਾਪਸੁਤਾ ਹੁਤ੍ਵਾ ਨ ਵਿਚਰਨ੍ਤਿ, ਤਦਾ ਕਿਰ ਸੂਰਿਯਸ੍ਸ ਵਿਮਾਨਂ ਪਕਤਿਮਗ੍ਗਤੋ ਅਧੋ ਓਤਰਿਤ੍ਵਾ ਵਿਚਰਤਿ, ਤਸ੍ਸ ਓਰੁਯ੍ਹ ਚਰਣੇਨੇਵ ਚਨ੍ਦਵਿਮਾਨਮ੍ਪਿ ਅਧੋ ਓਰੁਯ੍ਹ ਚਰਤਿ ਤਗ੍ਗਤਿਕਤ੍ਤਾ, ਤਸ੍ਮਾ ਸਾ ਵੀਥਿ ਉਦਕਾਭਾਵੇਨ ਅਜਾਨੁਰੂਪਤਾਯ ‘‘ਅਜਵੀਥੀ’’ਤਿ ਸਮਞ੍ਞਂ ਗਤਾ. ਯਾਯ ਪਨ ਵੀਥਿਯਾ ਸੂਰਿਯੇ ਗਚ੍ਛਨ੍ਤੇ ਵਸ੍ਸਵਲਾਹਕਾ ਦੇਵਪੁਤ੍ਤਾ ਸੂਰਿਯਾਭਿਤਾਪਾਭਾਵਤੋ ਅਭਿਣ੍ਹਂ ਅਤ੍ਤਨੋ ਵਿਮਾਨਤੋ ਬਹਿ ਨਿਕ੍ਖਮਿਤ੍ਵਾ ਕੀਲ਼ਾਪਸੁਤਾ ਇਤੋ ਚਿਤੋ ਚ ਵਿਚਰਨ੍ਤਿ, ਤਦਾ ਕਿਰ ਸੂਰਿਯਵਿਮਾਨਂ ਪਕਤਿਮਗ੍ਗਤੋ ਉਦ੍ਧਂ ਆਰੁਹਿਤ੍ਵਾ ਵਿਚਰਤਿ, ਤਸ੍ਸ ਉਦ੍ਧਂ ਆਰੁਯ੍ਹ ਚਰਣੇਨੇਵ ਚਨ੍ਦਵਿਮਾਨਮ੍ਪਿ ਉਦ੍ਧਂ ਆਰੁਯ੍ਹ ਚਰਤਿ ਤਗ੍ਗਤਿਕਤ੍ਤਾ, ਤਗ੍ਗਤਿਕਤਾ ਚ ਸਮਾਨਗਤਿਨਾ ਵਾਤਮਣ੍ਡਲੇਨ ਵਿਮਾਨਸ੍ਸ ਫੇਲ੍ਲਿਤਬ੍ਬਤ੍ਤਾ, ਤਸ੍ਮਾ ਸਾ ਵੀਥਿ ਉਦਕਬਹੁਭਾਵੇਨ ਨਾਗਾਨੁਰੂਪਤਾਯ ‘‘ਨਾਗਵੀਥੀ’’ਤਿ ਸਮਞ੍ਞਂ ਗਤਾ. ਯਦਾ ਸੂਰਿਯੋ ਉਦ੍ਧਮਨਾਰੁਹਨ੍ਤੋ, ਅਧੋ ਚ ਅਨੋਤਰਨ੍ਤੋ ਪਕਤਿਮਗ੍ਗੇਨੇਵ ਗਚ੍ਛਤਿ, ਤਦਾ ਵਸ੍ਸਵਲਾਹਕਾ ਯਥਾਕਾਲਂ, ਯਥਾਰੁਚਿ ਚ ਵਿਮਾਨਤੋ ਨਿਕ੍ਖਮਿਤ੍ਵਾ ਸੁਖੇਨ ਵਿਚਰਨ੍ਤਿ, ਤੇਨ ਕਾਲੇਨ ਕਾਲਂ ਵਸ੍ਸਨਤੋ ਲੋਕੇ ਉਤੁਸਮਤਾ ਹੋਤਿ, ਤਾਯ ਉਤੁਸਮਤਾਯ ਹੇਤੁਭੂਤਾਯ ਸਾ ਚਨ੍ਦਿਮਸੂਰਿਯਾਨਂ ਗਤਿ ਗਵਾਨੁਰੂਪਤਾਯ ‘‘ਗੋਵੀਥੀ’’ਤਿ ਸਮਞ੍ਞਂ ਗਤਾ. ਤੇਨ ਵੁਤ੍ਤਂ ‘‘ਅਜਵੀਥੀ’’ਤਿਆਦਿ.
ਏਵਂ ‘‘ਕਤਿ ਨੇਸਂ ਵੀਥਿਯੋ’’ਤਿ ਪਞ੍ਹਂ ਵਿਸ੍ਸਜ੍ਜੇਤ੍ਵਾ ‘‘ਕਥਂ ਵਿਚਰਨ੍ਤੀ’’ਤਿ ਪਞ੍ਹਂ ਵਿਸ੍ਸਜ੍ਜੇਤੁਂ ‘‘ਚਨ੍ਦਿਮਸੂਰਿਯਾ’’ਤਿਆਦਿ ਵੁਤ੍ਤਂ. ਤਤ੍ਥ ਸਿਨੇਰੁਤੋ ਬਹਿ ਨਿਕ੍ਖਮਨ੍ਤੀਤਿ ਸਿਨੇਰੁਸਮੀਪੇਨ ਤਂ ਪਦਕ੍ਖਿਣਂ ਕਤ੍ਵਾ ਗਚ੍ਛਨ੍ਤਾ ਤਤੋ ਗਮਨਵੀਥਿਤੋ ਬਹਿ ਅਤ੍ਤਨੋ ਤਿਰਿਯਗਮਨੇਨ ਚਕ੍ਕਵਾਲ਼ਾਭਿਮੁਖਾ ਨਿਕ੍ਖਮਨ੍ਤਿ. ਅਨ੍ਤੋ ਵਿਚਰਨ੍ਤੀਤਿ ਏਵਂ ਛ ਮਾਸੇ ਖਣੇ ਖਣੇ ਸਿਨੇਰੁਤੋ ਅਪਸਕ੍ਕਨਵਸੇਨ ਤਤੋ ਨਿਕ੍ਖਮਿਤ੍ਵਾ ਚਕ੍ਕਵਾਲ਼ਸਮੀਪਂ ਪਤ੍ਤਾ, ਤਤੋਪਿ ਛ ਮਾਸੇ ਖਣੇ ਖਣੇ ਅਪਸਕ੍ਕਨਵਸੇਨ ਨਿਕ੍ਖਮਿਤ੍ਵਾ ਸਿਨੇਰੁਸਮੀਪਂ ਪਾਪੁਣਨ੍ਤਾ ਅਨ੍ਤੋ ਵਿਚਰਨ੍ਤਿ. ਇਦਾਨਿ ਤਮੇਵਤ੍ਥਂ ਸਙ੍ਖੇਪੇਨ ਵੁਤ੍ਤਂ ਵਿਵਰਿਤੁਂ ‘‘ਤੇਹੀ’’ਤਿਆਦਿ ਵੁਤ੍ਤਂ. ਸਿਨੇਰੁਸ੍ਸ, ਚਕ੍ਕਵਾਲ਼ਸ੍ਸ ਚ ਯਂ ਠਾਨਂ ਵੇਮਜ੍ਝਂ, ਤਸ੍ਸ, ਸਿਨੇਰੁਸ੍ਸ ਚ ਯਂ ਠਾਨਂ ਵੇਮਜ੍ਝਂ, ਤੇਨ ਗਚ੍ਛਨ੍ਤਾ ‘‘ਸਿਨੇਰੁਸਮੀਪੇਨ ਵਿਚਰਨ੍ਤੀ’’ਤਿ ਵੁਤ੍ਤਾ, ਨ ਸਿਨੇਰੁਸ੍ਸ ਅਗ੍ਗਾਲ਼ਿਨ੍ਦਅਲ੍ਲੀਨਾ. ਚਕ੍ਕਵਾਲ਼ਸਮੀਪੇਨ ਚਰਿਤ੍ਵਾਤਿ ਏਤ੍ਥਾਪਿ ਏਸੇਵ ਨਯੋ. ਮਜ੍ਝੇਨਾਤਿ ਸਿਨੇਰੁਸ੍ਸ, ਚਕ੍ਕਵਾਲ਼ਸ੍ਸ ਚ ਉਜੁਕਂ ਵੇਮਜ੍ਝੇਨ ਮਗ੍ਗੇਨ. ਚਿਤ੍ਰਮਾਸੇ ਮਜ੍ਝੇਨਾਤਿ ਏਤ੍ਥਾਪਿ ਏਸੇਵ ਨਯੋ.
ਏਕਪ੍ਪਹਾਰੇਨਾਤਿ ਏਕਵੇਲਾਯ, ਏਕੇਨੇਵ ਵਾ ਅਤ੍ਤਨੋ ਏਕਪ੍ਪਹਾਰੇਨ. ਮਜ੍ਝਨ੍ਹਿਕੋਤਿ ਠਿਤਮਜ੍ਝਨ੍ਹਿਕੋ ਕਾਲੋ ਹੋਤਿ. ਤਦਾ ਹਿ ਸੂਰਿਯਮਣ੍ਡਲਂ ਉਗ੍ਗਚ੍ਛਨ੍ਤਂ ਹੁਤ੍ਵਾਪਿ ਇਮਸ੍ਮਿਂ ਦੀਪੇ ਠਿਤਸ੍ਸ ਉਪਡ੍ਢਮੇਵ ਦਿਸ੍ਸਤਿ, ਉਤ੍ਤਰਕੁਰੂਸੁ ਠਿਤਸ੍ਸ ਓਗਚ੍ਛਨ੍ਤਂ ਹੁਤ੍ਵਾ. ਏਵਞ੍ਹਿ ਏਕਵੇਲਾਯਮੇਵ ਤੀਸੁ ਦੀਪੇਸੁ ਆਲੋਕਕਰਣਂ.
ਯੇਸੁ ਕਤ੍ਤਿਕਾਦਿਨਕ੍ਖਤ੍ਤਸਮਞ੍ਞਾ, ਤਾਨਿਪਿ ਤਾਰਕਰੂਪਾਨਿ ਯੇਵਾਤਿ ਵੁਤ੍ਤਂ ‘‘ਸੇਸਤਾਰਕਰੂਪਾਨਿ ਚਾ’’ਤਿ, ਨਕ੍ਖਤ੍ਤਸਞ੍ਞਿਤਤਾਰਕਰੂਪਤੋ ਅਵਸਿਟ੍ਠਤਾਰਕਰੂਪਾਨੀਤਿ ਅਤ੍ਥੋ. ਉਭਯਾਨਿਪਿ ਤਾਨਿ ਦੇਵਤਾਨਂ ਵਸਨਕਵਿਮਾਨਾਨੀਤਿ ਵੇਦਿਤਬ੍ਬਾਨਿ. ਰਾ-ਸਦ੍ਦੋ ਤਿਯਤਿ ਛਿਜ੍ਜਤਿ ਏਤ੍ਥਾਤਿ ਰਤ੍ਤਿ, ਸਤ੍ਤਾਨਂ ਸਦ੍ਦਸ੍ਸ ਵੂਪਸਮਨਕਾਲੋਤਿ ਅਤ੍ਥੋ. ਦਿਬ੍ਬਨ੍ਤਿ ਸਤ੍ਤਾ ਕੀਲ਼ਨ੍ਤਿ ਜੋਤਨ੍ਤਿ ਏਤ੍ਥਾਤਿ ਦਿਵਾ. ਸਤ੍ਤਾਨਂ ਆਯੁਂ ਮਿਨਨ੍ਤੋ ਵਿਯ ਸਿਯਤਿ ਅਨ੍ਤਂ ਕਰੋਤੀਤਿ ਮਾਸੋ. ਤਂ ਤਂ ਕਿਰਿਯਂ ਅਰਤਿ ਵਤ੍ਤੇਤੀਤਿ ਉਤੁ. ਤਂ ਤਂ ਸਤ੍ਤਂ, ਧਮ੍ਮਪ੍ਪਵਤ੍ਤਿਞ੍ਚ ਸਙ੍ਗਮ੍ਮ ਵਦਨ੍ਤੋ ਵਿਯ ਸਰਤਿ ਵਤ੍ਤੇਤੀਤਿ ਸਂਵਚ੍ਛਰੋ.
੧੨੨. ਵਿਵਜ੍ਜਨਂ ਵਿਵਜ੍ਜੋ, ਸੋ ਏਵ ਵੇਵਜ੍ਜਂ, ਵਣ੍ਣਸ੍ਸ ਵੇਵਜ੍ਜਂ ਵਣ੍ਣਵੇਵਜ੍ਜਂ, ਵਣ੍ਣਸਮ੍ਪਤ੍ਤਿਯਾ ਵਿਗਮੋ, ਤਸ੍ਸ ਪਨ ਅਤ੍ਥਿਤਾ ‘‘ਵਣ੍ਣਵੇਵਜ੍ਜਤਾ’’ਤਿ ਵੁਤ੍ਤਾ. ਤੇਨਾਹ ‘‘ਵਿਵਜ੍ਜਭਾਵੋ’’ਤਿ. ਤੇਸਨ੍ਤਿ ਵਣ੍ਣਵਨ੍ਤਾਨਂ ਸਤ੍ਤਾਨਂ. ਅਤਿਮਾਨਪ੍ਪਚ੍ਚਯਾਤਿ ਦੁਬ੍ਬਣ੍ਣਵਮ੍ਭਨਵਸੇਨ ਅਤਿਕ੍ਕਮ੍ਮ ਅਤ੍ਤਨੋ ਵਣ੍ਣਂ ਪਟਿਚ੍ਚ ਮਾਨਪਚ੍ਚਯਾ, ਮਾਨਸਮ੍ਪਗ੍ਗਣ੍ਹਨਨਿਮਿਤ੍ਤਨ੍ਤਿ ਅਤ੍ਥੋ. ਸਾਤਿਸਯੋ ਰਸੋ ਏਤਿਸ੍ਸਾ ਅਤ੍ਥੀਤਿ ਰਸਾਤਿ ਲਦ੍ਧਮਾਨਾਯ, ਅਨੁਭਾਸਿਂਸੂਤਿ ਅਨੁਰੋਧਵਸੇਨ ਭਾਸਿਂਸੁ. ਲੋਕੁਪ੍ਪਤ੍ਤਿਵਂਸਕਥਨ੍ਤਿ ਲੋਕੁਪ੍ਪਤ੍ਤਿਵਂਸਜਂ ਪਵੇਣੀਕਥਂ, ਆਦਿਕਾਲੇ ਉਪ੍ਪਨ੍ਨਂ ਪਵੇਣੀਆਗਤਕਥਨ੍ਤਿ ਅਤ੍ਥੋ. ‘‘ਅਨੁਪਤਨ੍ਤੀ’’ਤਿਪਿ ਪਾਠੋ, ਸੋ ਏਵਤ੍ਥੋ.
ਭੂਮਿਪਪ੍ਪਟਕਪਾਤੁਭਾਵਾਦਿਵਣ੍ਣਨਾ
੧੨੩. ਏਦਿਸੋ ਹੁਤ੍ਵਾਤਿ ਅਹਿਚ੍ਛਤ੍ਤਕਸਦਿਸੋ ਹੁਤ੍ਵਾ.
੧੨੪. ਪਦਾਲਤਾਤਿ ‘‘ਪਦਾ’’ਤਿ ਏਵਂਨਾਮਾ ਏਕਾ ਲਤਾ, ਸਾ ਪਨ ਯਸ੍ਮਾ ਸਮ੍ਪਨ੍ਨਵਣ੍ਣਗਨ੍ਧਰਸਾ, ਤਸ੍ਮਾ ‘‘ਭਦ੍ਦਲਤਾ’’ਤਿ ਵੁਤ੍ਤਾ. ਨਾਲ਼ਿਕਾਤਿ ਨਾਲ਼ਿਵਲ੍ਲਿ. ਅਹਾਯੀਤਿ ਨਸ੍ਸਿ.
੧੨੫. ਅਕਟ੍ਠਪਾਕੋਤਿ ਅਕਟ੍ਠੇਯੇਵ ਠਾਨੇ ਉਪ੍ਪਜ੍ਜਿਤ੍ਵਾ ਪਚ੍ਚਨਕੋ, ਨੀਵਾਰੋ ਵਿਯ ਸਞ੍ਜਾਤੋ ਹੁਤ੍ਵਾ ਨਿਪ੍ਪਜ੍ਜਨਕੋਤਿ ਅਤ੍ਥੋ. ਕਣੋ ‘‘ਕੁਣ੍ਡਕ’’ਨ੍ਤਿ ਚ ਵੁਚ੍ਚਤਿ. ਥੁਸਨ੍ਤਿ ਤਣ੍ਡੁਲਂ ਪਰਿਯੋਨਨ੍ਧਿਤ੍ਵਾ ਠਿਤਤ੍ਤਚੋ, ਤਦਭਾਵਤੋ ‘‘ਅਕਣੋ, ਅਥੁਸੋ’’ਤਿ ਸਾਲਿ ਵੁਤ੍ਤੋ. ‘‘ਪਟਿਵਿਰੂਲ਼੍ਹ’’ਨ੍ਤਿ ਇਦਂ ਪਕ੍ਕਭਾਵਸ੍ਸ ਕਾਰਣਵਚਨਂ. ਪਟਿਵਿਰੂਲ਼੍ਹਤੋ ਹਿ ਤਂ ਪਕ੍ਕਨ੍ਤਿ. ਯਸ੍ਮਿਂ ਠਾਨੇ ਸਾਯਂ ਪਕ੍ਕੋ ਸਾਲਿ ਗਹਿਤੋ, ਤਦੇਵ ਠਾਨਂ ਦੁਤਿਯਦਿਵਸੇ ਪਾਤੋ ਪਕ੍ਕੇਨ ਸਾਲਿਨਾ ਪਰਿਪੁਣ੍ਣਂ ਹੁਤ੍ਵਾ ਤਿਟ੍ਠਤੀਤਿ ਆਹ ‘‘ਸਾਯਂ ਗਹਿਤਟ੍ਠਾਨਂ ਪਾਤੋ ਪਕ੍ਕਂ ਹੋਤੀ’’ਤਿਆਦਿ. ਅਲਾਯਿਤਨ੍ਤਿ ਲਾਯਿਤਟ੍ਠਾਨਮ੍ਪਿ ਤੇਸਂ ਕਮ੍ਮਪ੍ਪਚ੍ਚਯਾ ਅਲਾਯਿਤਮੇਵ ਹੁਤ੍ਵਾ ਅਨੂਨਂ ਪਰਿਪੁਣ੍ਣਮੇਵ ਪਞ੍ਞਾਯਤਿ, ਨ ਕੇਵਲਂ ਪਞ੍ਞਾਯਨਮੇਵ, ਅਥ ਖੋ ਤਥਾਭੂਤਮੇਵ ਹੁਤ੍ਵਾ ਤਿਟ੍ਠਤਿ.
ਇਤ੍ਥਿਪੁਰਿਸਲਿਙ੍ਗਾਦਿਪਾਤੁਭਾਵਵਣ੍ਣਨਾ
੧੨੬. ‘‘ਮਨੁਸ੍ਸਕਾਲੇ’’ਤਿ ਇਦਂ ਪੁਬ੍ਬੇ ਮਨੁਸ੍ਸਭੂਤਾਨਂਯੇਵ ਤਤ੍ਥ ਇਦਾਨਿ ਨਿਕਨ੍ਤਿਵਸੇਨ ਉਪ੍ਪਤ੍ਤਿ ਹੋਤੀਤਿ ਕਤ੍ਵਾ ਵੁਤ੍ਤਂ, ਦੇਵਤਾਨਮ੍ਪਿ ਪੁਰਿਮਜਾਤਿਯਂ ਇਤ੍ਥਿਭਾਵੇ ਠਿਤਾਨਂ ਤਤ੍ਥ ਵਿਰਾਗਾਦਿਪੁਰਿਸਤ੍ਤਪ੍ਪਚ੍ਚਯੇ ਅਸਤਿ ਤਦਾ ਇਤ੍ਥਿਲਿਙ੍ਗਮੇਵ ਪਾਤੁਭਵਤਿ. ਪੁਰਿਸਤ੍ਤਪਚ੍ਚਯੇਤਿ ‘‘ਅਤ੍ਤਨੋਪਿ ਅਨਿਸ੍ਸਰਤਾ, ਸਬ੍ਬਕਾਲਂ ਪਰਾਯਤ੍ਤਵੁਤ੍ਤਿਤਾ, ਰਜਸ੍ਸਲਤਾ ਵਞ੍ਚਤਾ, ਗਬ੍ਭਧਾਰਣਂ, ਪਠਮਾਯ ਪਕਤਿਯਾ ਨਿਹੀਨਪਕਤਿਤਾ, ਸੂਰਵੀਰਤਾਭਾਵੋ, ‘ਅਪ੍ਪਕਾ ਜਨਾ’ਤਿ ‘ਹੀਲ਼ੇਤਬ੍ਬਤਾ’ਤਿ ਏਵਮਾਦਿ ਆਦੀਨਵਪਚ੍ਚਵੇਕ੍ਖਣਪੁਬ੍ਬਕਮ੍ਪਿ ਇਤ੍ਥਿਭਾਵੇ ‘ਅਲਂ ਇਤ੍ਥਿਭਾਵੇਨ, ਨ ਹਿ ਇਤ੍ਥਿਭਾਵੇ ਠਤ੍ਵਾ ਚਕ੍ਕਵਤ੍ਤਿਸਿਰਿਂ, ਨ ਸਕ੍ਕਮਾਰਬ੍ਰਹ੍ਮਸਿਰਿਯੋ ਪਚ੍ਚਨੁਭਵਿਤੁਂ, ਨ ਪਚ੍ਚੇਕਬੋਧਿਂ, ਨ ਸਮ੍ਮਾਸਮ੍ਬੋਧਿਂ ਅਧਿਗਨ੍ਤੁਂ ਸਕ੍ਕਾ’ਤਿ ਏਵਂ ਇਤ੍ਥਿਭਾਵਵਿਰਜ੍ਜਨਂ, ‘ਯਥਾਵੁਤ੍ਤਆਦੀਨਵਵਿਰਹਤੋ ਉਤ੍ਤਮਪਕਤਿਭਾਵਤੋ ਸਮ੍ਪਦਮਿਦਂ ਪੁਰਿਸਤ੍ਤਂ ਨਾਮ ਸੇਟ੍ਠਂ ਉਤ੍ਤਮਂ, ਏਤ੍ਥ ਠਤ੍ਵਾ ਸਕ੍ਕਾ ਏਤਾ ਸਮ੍ਪਤ੍ਤਿਯੋ ਸਮ੍ਪਾਪੁਣਿਤੁ’ਨ੍ਤਿ ਏਵਂ ਪੁਰਿਸਤ੍ਤਭਾਵੇ ਸਮ੍ਭਾਵਨਾਪੁਬ੍ਬਕਂ ਪਤ੍ਥਨਾਠਪਨਂ, ‘ਤਤ੍ਥ ਨਿਨ੍ਨਪੋਣਪਬ੍ਭਾਰਚਿਤ੍ਤਤਾ’ਤਿ’’ ਏਵਮਾਦਿਕੇ ਪੁਰਿਸਭਾਵਸ੍ਸ ਪਚ੍ਚਯਭੂਤੇ ਧਮ੍ਮੇ. ਪੂਰੇਤ੍ਵਾ ਵਡ੍ਢੇਤ੍ਵਾ. ਪਚ੍ਚਕ੍ਖਂ ਭੂਤਂ, ਸਦਿਸਞ੍ਚ ਦਿਟ੍ਠਧਮ੍ਮਿਕਂ, ਸਮ੍ਪਰਾਯਿਕਞ੍ਚ ਸੁਵਿਪੁਲਂ ਅਨਤ੍ਥਂ ਅਚਿਨ੍ਤੇਤ੍ਵਾ ਪੁਰਿਸਸ੍ਸ ਕਾਮੇਸੁ ਮਿਚ੍ਛਾਚਰਣਂ ਕੇਵਲਂ ਇਤ੍ਥਿਯਂ ਆਸਾਪਤ੍ਤਿ ਫਲੇਨੇਵਾਤਿ ਆਸਾਆਪਤ੍ਤਿ ਇਤ੍ਥਿਭਾਵਾਵਹਾਪਿ ਹੋਤਿਯੇਵ. ਤਨ੍ਨਿਨ੍ਨਪੋਣਪਬ੍ਭਾਰਭਾਵੇਨ ਤਨ੍ਨਿਕਨ੍ਤਿਯਾ ਨਿਮਿਤ੍ਤਭਾਵਾਪਤ੍ਤਿਤੋਤਿ ਵੁਤ੍ਤਂ ‘‘ਪੁਰਿਸੋ ਇਤ੍ਥਤ੍ਤਭਾਵਂ ਲਭਨ੍ਤੋ ਕਾਮੇਸੁਮਿਚ੍ਛਾਚਾਰਂ ਨਿਸ੍ਸਾਯ ਲਭਤੀ’’ਤਿ. ਤਦਾਤਿ ਯਥਾਵੁਤ੍ਤੇ ਪਠਮਕਪ੍ਪਿਕਕਾਲੇ. ਪਕਤਿਯਾਤਿ ਸਭਾਵੇਨ. ਮਾਤੁਗਾਮਸ੍ਸਾਤਿ ਪੁਰਿਮਤ੍ਤਭਾਵੇ ਮਾਤੁਗਾਮਭੂਤਸ੍ਸ. ਪੁਰਿਸਸ੍ਸਾਤਿ ਏਤ੍ਥਾਪਿ ‘‘ਪਕਤਿਯਾ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਉਪਨਿਜ੍ਝਾਯਤਨ੍ਤਿ ਉਪੇਚ੍ਚ ਨਿਜ੍ਝਾਯਨ੍ਤਾਨਂ. ਯਥਾ ਅਞ੍ਞਮਞ੍ਞਸ੍ਮਿਂ ਸਾਰਾਗੋ ਉਪ੍ਪਜ੍ਜਤਿ, ਏਵਂ ਸਾਪੇਕ੍ਖਭਾਵੇਨ ਓਲੋਕੇਨ੍ਤਾਨਂ. ਰਾਗਪਰਿਲ਼ਾਹੋਤਿ ਰਾਗਜੋ ਪਰਿਲ਼ਾਹੋ.
ਨਿਬ੍ਬੁਯ੍ਹਮਾਨਾਯਾਤਿ ਪਰਿਣਤਾ ਹੁਤ੍ਵਾ ਨਿਯ੍ਯਮਾਨਾਯ.
ਮੇਥੁਨਧਮ੍ਮਸਮਾਚਾਰਵਣ੍ਣਨਾ
੧੨੭. ਗੋਮਯਪਿਣ੍ਡਮਤ੍ਤਮ੍ਪਿ ਨਾਲਤ੍ਥਾਤਿ ਸਮ੍ਮਦੇਵ ਵਿਵਾਹਕਮ੍ਮਂ ਨਾਲਤ੍ਥਾਤਿ ਅਧਿਪ੍ਪਾਯੇਨ ਵਦਨ੍ਤਿ. ਪਾਤਬ੍ਯਤਨ੍ਤਿ ਤਸ੍ਮਿਂ ਅਸਦ੍ਧਮ੍ਮੇ ਕਿਲੇਸਕਾਮੇਨ ਪਿਵਿਤਬ੍ਬਤਂ ਕਿਞ੍ਚਿ ਪਿਵਿਤਬ੍ਬਵਤ੍ਥੁਂ ਪਿਵਨ੍ਤਾ ਵਿਯ ਅਤਿਵਿਯ ਤੋਸੇਤ੍ਵਾ ਪਰਿਭੁਞ੍ਜਿਤਬ੍ਬਤਂ ਆਪਜ੍ਜਿਂਸੁ, ਪਾਤਬ੍ਯਤਨ੍ਤਿ ਵਾ ਪਰਿਭੁਞ੍ਜਨਕਤਂ ਆਪਜ੍ਜਿਂਸੁ ਉਪਗਚ੍ਛਿਂਸੁ. ਪਰਿਭੋਗਤ੍ਥੋ ਹਿ ਅਯਂ ਪਾ-ਸਦ੍ਦੋ, ਕਤ੍ਤੁਸਾਧਨੋ ਚ ਤਬ੍ਯ-ਸਦ੍ਦੋ, ਯਥਾਰੁਚਿ ਪਰਿਭੁਞ੍ਜਿਂਸੂਤਿ ਅਤ੍ਥੋ.
ਸਨ੍ਨਿਧਿਕਾਰਕਨ੍ਤਿ ਸਨ੍ਨਿਧਿਕਾਰਂ, ਕ-ਕਾਰੋ ਪਦਵਡ੍ਢਨਮਤ੍ਤਨ੍ਤਿ ਆਹ ‘‘ਸਨ੍ਨਿਧਿਂ ਕਤ੍ਵਾ’’ਤਿ. ਅਪਦਾਨਨ੍ਤਿ ਅਵਖਣ੍ਡਨਂ. ਏਕੇਕਸ੍ਮਿਂ ਠਾਨੇਤਿ ਯਤ੍ਥ ਯਤ੍ਥ ਵਹਿਤਂ, ਤਸ੍ਮਿਂ ਤਸ੍ਮਿਂ ਏਕੇਕਸ੍ਮਿਂ ਠਾਨੇ. ਗੁਮ੍ਬਗੁਮ੍ਬਾਤਿ ਪੁਞ੍ਜਪੁਞ੍ਜਾ.
ਸਾਲਿਵਿਭਾਗਵਣ੍ਣਨਾ
੧੨੮. ਸੀਮਂ ਠਪੇਯ੍ਯਾਮਾਤਿ ‘‘ਅਯਂ ਭੂਮਿਭਾਗੋ ਅਸੁਕਸ੍ਸ, ਅਯਂ ਭੂਮਿਭਾਗੋ ਅਸੁਕਸ੍ਸਾ’’ਤਿ ਏਵਂ ਪਰਿਚ੍ਛੇਦਂ ਕਰੇਯ੍ਯਾਮ. ਤਂ ਅਗ੍ਗਂ ਕਤ੍ਵਾਤਿ ਤਂ ਆਦਿਂ ਕਤ੍ਵਾ.
ਮਹਾਸਮ੍ਮਤਰਾਜਵਣ੍ਣਨਾ
੧੩੦. ਪਕਾਸੇਤਬ੍ਬਨ੍ਤਿ ਦੋਸਵਸੇਨ ਪਕਾਸੇਤਬ੍ਬਂ. ਖਿਪਿਤਬ੍ਬਨ੍ਤਿ ਖੇਪਂ ਕਾਤਬ੍ਬਂ. ਤੇਨਾਹ ‘‘ਹਾਰੇਤਬ੍ਬ’’ਨ੍ਤਿ, ਸਤ੍ਤਨਿਕਾਯਤੋ ਨੀਹਰਿਤਬ੍ਬਂ.
ਨੇਸਨ੍ਤਿ ਨਿਦ੍ਧਾਰਣੇ ਸਾਮਿਵਚਨਂ.
੧੩੧. ਅਕ੍ਖਰਨ੍ਤਿ ਨਿਰੁਤ੍ਤਿਂ. ਸਾ ਹਿ ਮਹਾਜਨੇਨ ਸਮ੍ਮਤੋਤਿ ਨਿਦ੍ਧਾਰੇਤ੍ਵਾ ਵਤ੍ਤਬ੍ਬਤੋ ਨਿਰੁਤ੍ਤਿ, ਤਸ੍ਮਿਂਯੇਵ ਨਿਰੂਲ਼੍ਹਭਾਵਤੋ, ਅਞ੍ਞਤ੍ਥ ਅਸਞ੍ਚਰਣਤੋ ਅਕ੍ਖਰਨ੍ਤਿ ਚ ਵੁਚ੍ਚਤਿ, ਤਥਾ ਸਙ੍ਖਾਤਬ੍ਬਤੋ ਸਙ੍ਖਾ, ਸਮਞ੍ਞਾਯਤੀਤਿ ਸਮਞ੍ਞਾ, ਪਞ੍ਞਾਪਨਤੋ ਪਞ੍ਞਤ੍ਤਿ, ਵੋਹਰਣਤੋ ਵੋਹਾਰੋ. ਉਪ੍ਪਨ੍ਨੋਤਿ ਪਵਤ੍ਤੋ. ਨ ਕੇਵਲਂ ਅਕ੍ਖਰਮੇਵਾਤਿ ਨ ਕੇਵਲਂ ਸਮਞ੍ਞਾਕਰਣਮੇਵ. ਖੇਤ੍ਤਸਾਮਿਨੋਤਿ ਤਂ ਤਂ ਭੂਮਿਭਾਗਂ ਪਰਿਗ੍ਗਹੇਤ੍ਵਾ ਠਿਤਸਤ੍ਤਾ. ਤੀਹਿ ਸਙ੍ਖੇਹੀਤਿ ਤਿਵਿਧਕਿਰਿਯਾਭਿਸਙ੍ਖਤੇਹਿ ਤੀਹਿ ਸਙ੍ਖੇਹਿ ਖਤ੍ਤਿਯਾਦੀਹਿ ਤੀਹਿ ਵਣ੍ਣੇਹਿ ਪਰਿਗ੍ਗਹਿਤੇਹਿ. ‘‘ਖਤ੍ਤਿਯਾਨੁਯਨ੍ਤਬ੍ਰਾਹ੍ਮਣਗਹਪਤਿਕਨੇਗਮਜਾਨਪਦੇਹਿ ਤੀਹਿ ਗਹਪਤੀਹਿ ਪਰਿਗ੍ਗਹਿਤੇਹੀ’’ਤਿ ਚ ਵਦਨ੍ਤਿ. ਅਗ੍ਗਨ੍ਤਿ ਞਾਤੇਨਾਤਿ ਅਗ੍ਗਂ ਕੁਲਨ੍ਤਿ ਞਾਤੇਨ. ਖਤ੍ਤਿਯਕੁਲਞ੍ਹਿ ਲੋਕੇ ਸਬ੍ਬਸੇਟ੍ਠਂ. ਯਥਾਹ ‘‘ਖਤ੍ਤਿਯੋ ਸੇਟ੍ਠੋ ਜਨੇਤਸ੍ਮਿਂ, ਯੇ ਗੋਤ੍ਤਪਟਿਸਾਰਿਨੋ’’ਤਿ, (ਦੀ. ਨਿ. ੧.੨੭੭; ੩.੧੪੦; ਮ. ਨਿ. ੨.੩੦; ਸਂ. ਨਿ. ੧.੧੮੨, ੨੪੫) ਅਭੇਦੋਪਚਾਰੇਨ ਪਨ ਅਕ੍ਖਰਸ੍ਸ ਖਤ੍ਤਿਯਸਦ੍ਦਸ੍ਸਪਿ ਸੇਟ੍ਠਤਾਤਿ ਪਾਲ਼ਿਯਂ ‘‘ਅਗ੍ਗਞ੍ਞੇਨ ਅਕ੍ਖਰੇਨਾ’’ਤਿ ਵੁਤ੍ਤਂ. ਇਦਾਨਿ ਅਭੇਦੋਪਚਾਰੇਨ ਵਿਨਾ ਏਵ ਅਤ੍ਥਂ ਦਸ੍ਸੇਤੁਂ ‘‘ਅਗ੍ਗੇ ਵਾ’’ਤਿਆਦਿ ਵੁਤ੍ਤਂ.
ਬ੍ਰਾਹ੍ਮਣਮਣ੍ਡਲਾਦਿਵਣ੍ਣਨਾ
੧੩੨. ਯੇਨ ਅਨਾਰਮ੍ਭਭਾਵੇਨ ਬਾਹਿਤਾਕੁਸਲਾ ‘‘ਬ੍ਰਾਹ੍ਮਣਾ’’ਤਿ ਵੁਤ੍ਤਾ, ਤਮੇਵ ਤਾਵ ਦਸ੍ਸੇਤੁਂ ਪਾਲ਼ਿਯਂ ‘‘ਵੀਤਙ੍ਗਾਰਾ’’ਤਿਆਦਿ ਵੁਤ੍ਤਨ੍ਤਿ ਤਦਤ੍ਥਂ ਦਸ੍ਸੇਨ੍ਤੋ ‘‘ਪਚਿਤ੍ਵਾ’’ਤਿਆਦਿਮਾਹ. ਤਮੇਨਨ੍ਤਿ ਵਚਨਵਿਪਲ੍ਲਾਸੇਨ ਨਿਦ੍ਦੇਸੋਤਿ ਆਹ ‘‘ਤੇ ਏਤੇ’’ਤਿ. ਅਭਿਸਙ੍ਖਰੋਨ੍ਤਾਤਿ ਚਿਤ੍ਤਮਨ੍ਤਭਾਵੇਨ ਅਞ੍ਞਮਞ੍ਞਂ ਅਭਿਵਿਸਿਟ੍ਠੇ ਕਰੋਨ੍ਤਾ, ਬ੍ਰਾਹ੍ਮਣਾਕਪ੍ਪਭਾਵੇਨ ਸਙ੍ਖਰੋਨ੍ਤਾ ਚ. ਵਾਚੇਨ੍ਤਾਤਿ ਪਰੇਸਂ ਕਥੇਨ੍ਤਾ, ਯੇ ਤਥਾ ਗਨ੍ਥੇ ਕਾਤੁਂ ਨ ਜਾਨਨ੍ਤਿ. ਅਚ੍ਛਨ੍ਤੀਤਿ ਆਸਨ੍ਤਿ, ਉਪਵਿਸਨ੍ਤੀਤਿ ਅਤ੍ਥੋ. ਤੇਨਾਹ ‘‘ਵਸਨ੍ਤੀ’’ਤਿ. ਅਚ੍ਛੇਨ੍ਤੀਤਿ ਕਾਲਂ ਖੇਪੇਨ੍ਤਿ. ਹੀਨਸਮ੍ਮਤਂ ਝਾਨਭਾਵਨਾਨੁਯੋਗਂ ਛਡ੍ਡੇਤ੍ਵਾ ਗਨ੍ਥੇ ਪਸੁਤਤਾਦੀਪਨਤੋ. ਸੇਟ੍ਠਸਮ੍ਮਤਂ ਜਾਤਂ ‘‘ਵੇਦਧਰਾ ਸੋਤ੍ਤਿਯਾ ਸੁਬ੍ਰਾਹ੍ਮਣਾਤਿ ਏਵਂ ਸੇਟ੍ਠਸਮ੍ਮਤਂ ਜਾਤਂ.
੧੩੩. ਮੇਥੁਨਧਮ੍ਮਂ ਸਮਾਦਿਯਿਤ੍ਵਾਤਿ ਜਾਯਾਪਤਿਕਭਾਵੇਨ ਦ੍ਵਯਂ ਦ੍ਵਯਂ ਨਿਵਾਸਂ ਅਜ੍ਝੁਪਗਨ੍ਤ੍ਵਾ. ਵਾਣਿਜਕਮ੍ਮਾਦਿਕੇਤਿ ਆਦਿ-ਸਦ੍ਦੇਨ ਕਸਿਕਮ੍ਮਾਦਿਂ ਸਙ੍ਗਣ੍ਹਾਤਿ.
੧੩੪. ਲੁਦ੍ਦਾਚਾਰਕਮ੍ਮਖੁਦ੍ਦਾਚਾਰਕਮ੍ਮੁਨਾਤਿ ਪਰਵਿਹੇਠਨਾਦਿਲੁਦ੍ਦਾਚਾਰਕਮ੍ਮੁਨਾ, ਨਲ਼ਕਾਰਦਾਰੁਕਮ੍ਮਾਦਿਖੁਦ੍ਦਾਚਾਰਕਮ੍ਮੁਨਾ ਚ. ਸੁਦ੍ਦਨ੍ਤਿ ਏਤ੍ਥ ਸੁ-ਇਤਿ ਸੀਘਤ੍ਥੇ ਨਿਪਾਤੋ. ਦਾ-ਇਤਿ ਗਰਹਣਤ੍ਥੇਤਿ ਆਹ ‘‘ਸੁਦ੍ਦਂ ਸੁਦ੍ਦਂ ਲਹੁਂ ਲਹੁਂ ਕੁਚ੍ਛਿਤਂ ਗਚ੍ਛਨ੍ਤੀ’’ਤਿ.
੧੩੫. ਅਹੂਤਿ ਕਾਲਵਿਪਲ੍ਲਾਸਵਸੇਨ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਹੋਤਿ ਖੋ’’ਤਿ ਆਹ. ਇਮਿਨਾਤਿ ‘‘ਇਮੇਹਿ ਖੋ, ਵਾਸੇਟ੍ਠ, ਚਤੂਹਿ ਮਣ੍ਡਲੇਹਿ ਸਮਣਮਣ੍ਡਲਸ੍ਸ ਅਭਿਨਿਬ੍ਬਤ੍ਤਿ ਹੋਤੀ’’ਤਿ ਇਮਿਨਾ ਵਚਨੇਨ. ਇਮਂ ਦਸ੍ਸੇਤੀਤਿ ਸਮਣਮਣ੍ਡਲਂ ਨਾਮ…ਪੇ… ਸੁਦ੍ਧਿਂ ਪਾਪੁਣਨ੍ਤੀਤਿ ਇਮਂ ਅਤ੍ਥਜਾਤਂ ਦਸ੍ਸੇਤਿ. ਯਦਿ ਇਮੇਹਿ…ਪੇ… ਅਭਿਨਿਬ੍ਬਤ੍ਤਿ ਹੋਤਿ, ਏਵਂ ਸਨ੍ਤੇ ਇਮਾਨੇਵ ਚਤ੍ਤਾਰਿ ਮਣ੍ਡਲਾਨਿ ਪਧਾਨਾਨਿ, ਸਮਣਮਣ੍ਡਲਂ ਅਪ੍ਪਧਾਨਂ ਤਤੋ ਅਭਿਨਿਬ੍ਬਤ੍ਤਤ੍ਤਾਤਿ? ਨਯਿਦਮੇਵਨ੍ਤਿ ਦਸ੍ਸੇਤੁਂ ‘‘ਇਮਾਨੀ’’ਤਿਆਦਿ ਵੁਤ੍ਤਂ. ਸਮਣਮਣ੍ਡਲਂ ਅਨੁਵਤ੍ਤਨ੍ਤਿ ਗੁਣੇਹਿ ਵਿਸਿਟ੍ਠਭਾਵਤੋ. ਗੁਣੋ ਹਿ ਵਿਞ੍ਞੂਨਂ ਅਨੁਵਤ੍ਤਨਹੇਤੁ, ਨ ਕੋਲਪੁਤ੍ਤਿਯਂ, ਵਣ੍ਣਪੋਕ੍ਖਰਤਾ, ਵਾਕ੍ਕਰਣਮਤ੍ਤਂ ਵਾ. ਤੇਨਾਹ ‘‘ਧਮ੍ਮੇਨੇਵ ਅਨੁਵਤ੍ਤਨ੍ਤਿ, ਨੋ ਅਧਮ੍ਮੇਨਾ’’ਤਿ. ਸੋ ਧਮ੍ਮੋ ਚ ਲੋਕੁਤ੍ਤਰੋਵ ਅਧਿਪ੍ਪੇਤੋ, ਯੇਨ ਸਂਸਾਰਤੋ ਵਿਸੁਜ੍ਝਤਿ, ਤਸ੍ਮਾ ਸਮਣਮਣ੍ਡਲਨ੍ਤਿ ਚ ਸਾਸਨਿਕਮੇਵ ਸਮਣਗਣਂ ਵਦਤੀਤਿ ਦਟ੍ਠਬ੍ਬਂ. ਤੇਨਾਹ ‘‘ਸਮਣਮਣ੍ਡਲਞ੍ਹੀ’’ਤਿਆਦਿ.
ਦੁਚ੍ਚਰਿਤਾਦਿਕਥਾਵਣ੍ਣਨਾ
੧੩੬. ਮਿਚ੍ਛਾਦਿਟ੍ਠਿਵਸੇਨ ਸਮਾਦਿਨ੍ਨਕਮ੍ਮਂ ਨਾਮ ‘‘ਕੋ ਅਨੁਬਨ੍ਧਿਤਬ੍ਬੋ. ਅਜੋਤਗ੍ਗਿਸੋਟ੍ਠਿਮਿਸੋ’’ਤਿਆਦਿਨਾ ਯਞ੍ਞਵਿਧਾਨਾਦਿਵਸੇਨ ਪਵਤ੍ਤਿਤਂ ਹਿਂਸਾਦਿਪਾਪਕਮ੍ਮਂ. ਮਿਚ੍ਛਾਦਿਟ੍ਠਿਕਮ੍ਮਸ੍ਸਾਤਿ ‘‘ਏਸ ਸਦ੍ਧਾਧਿਗਤੋ ਦੇਵਯਾਨੋ, ਯੇਨ ਯਨ੍ਤਿ ਪੁਤ੍ਤਿਨੋ ਵਿਸੋਕਾ’’ਤਿਆਦਿਨਾ ਪਵਤ੍ਤਿਤਸ੍ਸ ਮਿਚ੍ਛਾਦਿਟ੍ਠਿਸਹਗਤਕਮ੍ਮਸ੍ਸ. ਸਮਾਦਾਨਂ ਤਸ੍ਸ ਤਥਾ ਪਵਤ੍ਤਨਂ, ਤਸ੍ਸਾ ਵਾ ਦਿਟ੍ਠਿਯਾ ਉਪਗਮਨਂ.
੧੩੭. ਦ੍ਵਯਕਾਰੀਤਿ ਕੁਸਲਾਕੁਸਲਦ੍ਵਯਸ੍ਸ ਕਤ੍ਤਾ. ਤਯਿਦਂ ਦ੍ਵਯਂ ਯਸ੍ਮਾ ਏਕਜ੍ਝਂ ਨਪ੍ਪਵਤ੍ਤਤਿ, ਤਸ੍ਮਾ ਆਹ ‘‘ਕਾਲੇਨਾ’’ਤਿਆਦਿ. ਏਕਕ੍ਖਣੇ ਉਭਯਵਿਪਾਕਦਾਨਟ੍ਠਾਨਂ ਨਾਮ ਨਤ੍ਥਿ ਏਕਸ੍ਮਿਂ ਖਣੇ ਚਿਤ੍ਤਦ੍ਵਯੂਪਸਞ੍ਹਿਤਾਯ ਸਤ੍ਤਸਨ੍ਤਤਿਯਾ ਅਭਾਵਤੋ. ਯਥਾ ਪਨ ਦ੍ਵਯਕਾਰਿਨੋ ਸੁਖਦੁਕ੍ਖਪਟਿਸਂਵੇਦਿਤਾ ਸਮ੍ਭਵਤਿ, ਤਂ ਦਸ੍ਸੇਤੁਂ ‘‘ਯੇਨ ਪਨਾ’’ਤਿਆਦਿ ਵੁਤ੍ਤਂ. ਏਵਂਭੂਤੋਤਿ ਵਿਕਲਾਵਯਵੋ. ਦ੍ਵੇਪਿਹਿ ਕੁਸਲਾਕੁਸਲਕਮ੍ਮਾਨਿ ਕਤੂਪਚਿਤਾਨਿ ਸਭਾਵਤੋ ਬਲਵਨ੍ਤਾਨੇਵ ਹੋਨ੍ਤਿ, ਤਸ੍ਮਾ ਮਰਣਕਾਲੇ ਉਪਟ੍ਠਹਨ੍ਤਿ. ਤੇਸੁ ਅਕੁਸਲਂ ਬਲਵਤਰਂ ਹੋਤਿ ਪਚ੍ਚਯਲਾਭਤੋ. ਨਿਕਨ੍ਤਿਆਦਯੋ ਹਿ ਪਚ੍ਚਯਵਿਸੇਸਾ ਅਕੁਸਲਸ੍ਸੇਵ ਸਭਾਗਾ, ਨ ਕੁਸਲਸ੍ਸ, ਤਸ੍ਮਾ ਕਤੂਪਚਿਤਭਾਵੇਨ ਸਮਾਨਬਲੇਸੁਪਿ ਕੁਸਲਾਕੁਸਲੇਸੁ ਪਚ੍ਚਯਲਾਭੇਨ ਵਿਪਚ੍ਚਿਤੁਂ ਲਦ੍ਧੋਕਾਸਤਾਯ ਕੁਸਲਤੋ ਅਕੁਸਲਂ ਬਲਵਤਰਂ ਹੋਤੀਤਿ, ਤਥਾਭੂਤਮ੍ਪਿ ਤਂ ਯਥਾ ਵਿਪਾਕਦਾਨੇ ਲਦ੍ਧੋਕਾਸਸ੍ਸ ਕੁਸਲਸ੍ਸਾਪਿ ਅਵਸਰੋ ਹੋਤਿ, ਤਥਾ ਲਦ੍ਧਪਚ੍ਚਯਂ ਪਟਿਸਨ੍ਧਿਦਾਨਾਭਿਮੁਖਂ ਕੁਸਲਂ ਪਟਿਬਾਹਿਤ੍ਵਾ ਪਟਿਸਨ੍ਧਿਂ ਦੇਨ੍ਤਂ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤਾਪੇਤੀਤਿ. ‘‘ਅਕੁਸਲਂ ਬਲਵਤਰਂ ਹੋਤੀ’’ਤਿ ਏਤ੍ਥ ‘‘ਅਕੁਸਲਂ ਚੇ ਬਲਵਤਰਂ ਹੋਤਿ, ਤਂ ਕੁਸਲਂ ਪਟਿਬਾਹਿਤ੍ਵਾ’’ਤਿ ਵੁਤ੍ਤਨਯੇਨੇਵ ਅਤ੍ਥਂ ਵਤ੍ਵਾ ਤੇਸੁ ਕੁਸਲਂ ਚੇ ਬਲਵਤਰਂ ਹੋਤਿ, ਤਞ੍ਚ ਅਕੁਸਲਂ ਪਟਿਬਾਹਿਤ੍ਵਾ ਮਨੁਸ੍ਸਯੋਨਿਯਂ ਨਿਬ੍ਬਤ੍ਤਾਪੇਤਿ, ਅਕੁਸਲਂ ਪਵਤ੍ਤਿਵੇਦਨੀਯਂ ਹੋਤਿ, ਅਥ ਨਂ ਤਂ ਕਾਣਮ੍ਪਿ ਕਰੋਤਿ ਖੁਜ੍ਜਮ੍ਪਿ ਪੀਠਸਪ੍ਪਿਮ੍ਪਿ ਕੁਚ੍ਛਿਰੋਗਾਦੀਹਿ ਵਾ ਉਪਦ੍ਦੁਤਂ. ਏਵਂ ਸੋ ਪਵਤ੍ਤਿਯਂ ਨਾਨਪ੍ਪਕਾਰਂ ਦੁਕ੍ਖਂ ਪਚ੍ਚਨੁਭਵਤੀਤਿ ਇਦਂ ਸਨ੍ਧਾਯ ਵੁਤ੍ਤਂ ‘‘ਸੁਖਦੁਕ੍ਖਪ੍ਪਟਿਸਂਵੇਦੀ ਹੋਤੀ’’ਤਿ. ਤਤ੍ਰਾਯਂ ਵਿਨਿਚ੍ਛਯੋ – ਵੁਤ੍ਤਕਾਲੇ ਵਾ ਕਾਰੇਨ ਸਮਾਨਬਲੇਸੁ ਕੁਸਲਾਕੁਸਲਕਮ੍ਮੇਸੁ ਉਪਟ੍ਠਹਨ੍ਤੇਸੁ ਮਰਣਸ੍ਸ ਆਸਨ੍ਨਵੇਲਾਯਂ ਯਦਿ ਬਲਵਤਰਾਨਿ ਕੁਸਲਜਵਨਾਨਿ ਜਵਨ੍ਤਿ, ਯਥਾਉਪਟ੍ਠਿਤਂ ਅਕੁਸਲਂ ਪਟਿਬਾਹਿਤ੍ਵਾ ਕੁਸਲਂ ਵੁਤ੍ਤਨਯੇਨ ਪਟਿਸਨ੍ਧਿਂ ਦੇਤਿ. ਅਥ ਬਲਵਤਰਾਨਿ ਅਕੁਸਲਜਵਨਾਨਿ ਜਵਨ੍ਤਿ, ਯਥਾਉਪਟ੍ਠਿਤਂ ਕੁਸਲਂ ਪਟਿਬਾਹਿਤ੍ਵਾ ਅਕੁਸਲਂ ਵੁਤ੍ਤਨਯੇਨੇਵ ਪਟਿਸਨ੍ਧਿਂ ਦੇਤਿ. ਤਂ ਕਿਸ੍ਸ ਹੇਤੁ? ਉਭਿਨ੍ਨਂ ਕਮ੍ਮਾਨਂ ਸਮਾਨਬਲਵਭਾਵਤੋ, ਪਚ੍ਚਯਨ੍ਤਰਸਾਪੇਕ੍ਖਤੋ ਚਾਤਿ, ਸਬ੍ਬਂ ਵੀਮਂਸਿਤ੍ਵਾ ਗਹੇਤਬ੍ਬਂ.
ਬੋਧਿਪਕ੍ਖਿਯਭਾਵਨਾਵਣ੍ਣਨਾ
੧੩੮. ਬੋਧਿ ਵੁਚ੍ਚਤਿ ਮਗ੍ਗਸਮ੍ਮਾਦਿਟ੍ਠਿ, ਚਤ੍ਤਾਰਿ ਅਰਿਯਸਚ੍ਚਾਨਿ ਬੁਜ੍ਝਤੀਤਿ ਕਤ੍ਵਾ, ਸਭਾਵਤੋ, ਤਂਸਭਾਵਤੋ ਚ ਤਸ੍ਸਾ ਪਕ੍ਖੇ ਭਵਾਤਿ ਬੋਧਿਪਕ੍ਖਿਯਾ, ਸਤਿਵੀਰਿਯਾਦਯੋ ਧਮ੍ਮਾ, ਤੇਸਂ ਬੋਧਿਪਕ੍ਖਿਯਾਨਂ. ਪਟਿਪਾਟਿਯਾਤਿ ਬੋਧਿਪਕ੍ਖਿਯਦੇਸਨਾਪਟਿਪਾਟਿਯਾ. ਭਾਵਨਂ ਅਨੁਗਨ੍ਤ੍ਵਾਤਿ ਅਨੁਕ੍ਕਮੇਨ ਪਵਤ੍ਤਂ ਭਾਵਨਂ ਪਤ੍ਵਾ. ਤੇਨਾਹ ‘‘ਪਟਿਪਜ੍ਜਿਤ੍ਵਾ’’ਤਿ. ਸਉਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਵਸੇਨ ਖੀਣਾਸਵਸ੍ਸ ਸੇਟ੍ਠਭਾਵਂ ਲੋਕਸ੍ਸ ਪਾਕਟਂ ਕਤ੍ਵਾ ਦਸ੍ਸੇਤੁਂ ਸਕ੍ਕਾ, ਨ ਇਤਰਾਯ ਸਬ੍ਬਸੋ ਅਪਞ੍ਞਤ੍ਤਿਭਾਵੂਪਗਮਨੇ ਤਸ੍ਸ ਅਦਸ੍ਸਨਤੋਤਿ ਵੁਤ੍ਤਂ ‘‘ਪਰਿਨਿਬ੍ਬਾਤੀਤਿ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਤੀ’’ਤਿ. ਵਿਨਿਵਤ੍ਤੇਤ੍ਵਾਤਿ ਤਤੋ ਚਤੁਵਣ੍ਣਤੋ ਨੀਹਰਿਤ੍ਵਾ.
੧੪੦. ਤਮੇਵਤ੍ਥਨ੍ਤਿ ‘‘ਖੀਣਾਸਵੋਵ ਦੇਵਮਨੁਸ੍ਸੇਸੁ ਸੇਟ੍ਠੋ’’ਤਿ ਵੁਤ੍ਤਮੇਵਤ੍ਥਂ.
ਸੇਟ੍ਠਚ੍ਛੇਦਕਵਾਦਮੇਵਾਤਿ ਜਾਤਿਬ੍ਰਾਹ੍ਮਣਾਨਂ ਸੇਟ੍ਠਭਾਵਸਮੁਚ੍ਛੇਦਕਮੇਵ ਕਥਂ. ਦਸ੍ਸੇਤ੍ਵਾ ਭਾਸਿਤ੍ਵਾ. ਸੁਤ੍ਤਨ੍ਤਂ ਵਿਨਿਵਤ੍ਤੇਤ੍ਵਾਤਿ ਪੁਬ੍ਬੇ ਲੋਕਿਯਧਮ੍ਮਸਨ੍ਦਸ੍ਸਨਵਸੇਨ ਪਵਤ੍ਤਂ ਅਗ੍ਗਞ੍ਞਸੁਤ੍ਤਂ ‘‘ਸਤ੍ਤਨ੍ਨਂ ਬੋਧਿਪਕ੍ਖਿਯਾਨਂ ਧਮ੍ਮਾਨਂ ਭਾਵਨਮਨ੍ਵਾਯਾ’’ਤਿਆਦਿਨਾ ਤਤੋ ਵਿਨਿਵਤ੍ਤੇਤ੍ਵਾ ਨੀਹਰਿਤ੍ਵਾ ਤੇਨ ਅਸਂਸਟ੍ਠਂ ਕਤ੍ਵਾ. ਆਵਜ੍ਜਨ੍ਤਾਤਿ ਸਮਨ੍ਨਾਹਰਨ੍ਤਾ. ਅਨੁਮਜ੍ਜਨ੍ਤਾਤਿ ਪੁਬ੍ਬੇਨਾਪਰਂ ਅਤ੍ਥਤੋ ਵਿਚਰਨ੍ਤਾਤਿ.
ਅਗ੍ਗਞ੍ਞਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ.