੭. ਮਹਾਸਮਯਸੁਤ੍ਤਵਣ੍ਣਨਾ

ਨਿਦਾਨਵਣ੍ਣਨਾ

੩੩੧. ਉਦਾਨਨ੍ਤਿ ਰਞ੍ਞਾ ਓਕ੍ਕਾਕੇਨ ਜਾਤਿਸਮ੍ਭੇਦਪਰਿਹਾਰਨਿਮਿਤ੍ਤਂ ਪਵਤ੍ਤਿਤਂ ਉਦਾਨਂ ਪਟਿਚ੍ਚ. ਏਕੋਪਿ ਜਨਪਦੋ ਰੁਲ਼੍ਹਿਸਦ੍ਦੇਨ ‘‘ਸਕ੍ਕਾ’’ਤਿ ਵੁਚ੍ਚਤੀਤਿ ਏਤ੍ਥ ਯਂ ਵਤ੍ਤਬ੍ਬਂ, ਤਂ ਮਹਾਨਿਦਾਨਵਣ੍ਣਨਾਯਂ ਵੁਤ੍ਤਨਯੇਨ ਵੇਦਿਤਬ੍ਬਂ. ਅਰੋਪਿਤੇਤਿ ਕੇਨਚਿ ਅਰੋਪਿਤੇ.

ਆਵਰਣੇਨਾਤਿ ਸੇਤੁਨਾ. ਬਨ੍ਧਾਪੇਤ੍ਵਾਤਿ ਪਂਸੁਪਲਾਸਪਾਸਾਣਮਤ੍ਤਿਕਾਖਣ੍ਡਾਦੀਹਿ ਆਲ਼ਿਂ ਥਿਰਂ ਕਾਰਾਪੇਤ੍ਵਾ.

‘‘ਜਾਤਿਂ ਘਟ੍ਟੇਤ੍ਵਾ ਕਲਹਂ ਵਡ੍ਢਯਿਂਸੂ’’ਤਿ ਸਙ੍ਖੇਪੇਨ ਵੁਤ੍ਤਮਤ੍ਥਂ ਪਾਕਟਤਰਂ ਕਾਤੁਂ ‘‘ਕੋਲਿਯਕਮ੍ਮਕਰਾ ਵਦਨ੍ਤੀ’’ਤਿਆਦਿ ਵੁਤ੍ਤਂ.

ਤੀਣਿ ਜਾਤਕਾਨੀਤਿ ਫਨ੍ਦਨਜਾਤਕਪਥਵੀਉਨ੍ਦ੍ਰਿਯਜਾਤਕਲਟੁਕਿਕਜਾਤਕਾਨਿ ਦ੍ਵੇ ਜਾਤਕਾਨੀਤਿ ਰੁਕ੍ਖਧਮ੍ਮ ਵਟ੍ਟਕਜਾਤਕਾਨਿ.

ਤੇਨਾਤਿ ਭਗਵਤਾ. ਕਲਹਕਾਰਣਭਾਵੋਤਿ ਕਲਹਕਾਰਣਸ੍ਸ ਅਤ੍ਥਿਭਾਵੋ.

ਅਟ੍ਠਾਨੇਤਿ ਅਕਾਰਣੇ. ਵੇਰਂ ਕਤ੍ਵਾਤਿ ਵਿਰੋਧਂ ਉਪ੍ਪਾਦੇਤ੍ਵਾ. ‘‘ਕੁਠਾਰਿਹਤ੍ਥੋ ਪੁਰਿਸੋ’’ਤਿਆਦਿਨਾ ਫਨ੍ਦਨਜਾਤਕਂ ਕਥੇਸਿ. ‘‘ਦੁਦ੍ਦੁਭਾਯਤਿ ਭਦ੍ਦਨ੍ਤੇ’’ਤਿਆਦਿਨਾ ਪਥਵੀਉਨ੍ਦ੍ਰਿਯਜਾਤਕਂ ਕਥੇਸਿ. ‘‘ਵਨ੍ਦਾਮਿ ਤਂ ਕੁਞ੍ਜਰਾ’’ਤਿਆਦਿਨਾ ਲਟੁਕਿਕਜਾਤਕਂ ਕਥੇਸਿ.

‘‘ਸਾਧੂ ਸਮ੍ਬਹੁਲਾ ਞਾਤੀ; ਅਪਿ ਰੁਕ੍ਖਾ ਅਰਞ੍ਞਜਾ;

ਵਾਤੋ ਵਹਤਿ ਏਕਟ੍ਠਂ, ਬ੍ਰਹਨ੍ਤਮ੍ਪਿ ਵਨਪ੍ਪਤਿ’’ਨ੍ਤਿ. –

ਆਦਿਨਾ ਰੁਕ੍ਖਧਮ੍ਮਜਾਤਕਂ ਕਥੇਸਿ.

‘‘ਸਮ੍ਮੋਦਮਾਨਾ ਗਚ੍ਛਨ੍ਤਿ, ਜਾਲਂ ਆਦਾਯ ਪਕ੍ਖਿਨੋ;

ਯਦਾ ਤੇ ਵਿਵਦਿਸ੍ਸਨ੍ਤਿ, ਤਦਾ ਏਹਿਨ੍ਤਿ ਮੇ ਵਸ’’ਨ੍ਤਿ. –

ਆਦਿਨਾ ਵਟ੍ਟਕਜਾਤਕਂ ਕਥੇਸਿ.

‘‘ਅਤ੍ਤਦਣ੍ਡਾ ਭਯਂ ਜਾਤਂ, ਜਨਂ ਪਸ੍ਸਥ ਮੇਧਗਂ;

ਸਂਵੇਗਂ ਕਿਤ੍ਤਯਿਸ੍ਸਾਮਿ, ਯਥਾ ਸਂਵਿਜਿਤਂ ਮਯਾ’’ਤਿ. (ਸੁ. ਨਿ. ੧.੯੪੧);

ਆਦਿਨਾ ਅਤ੍ਤਦਣ੍ਡਸੁਤ੍ਤਂ ਕਥੇਸਿ.

ਤਂਤਂਪਲੋਭਨਕਿਰਿਯਾ ਕਾਯਵਾਚਾਹਿ ਪਰਕ੍ਕਮਨ੍ਤਿਯੋ ‘‘ਉਕ੍ਕਣ੍ਠਨ੍ਤੂ’’ਤਿ ਸਾਸਨਂ ਪੇਸੇਨ੍ਤਿ.

ਕੁਣਾਲਦਹੇਤਿ ਕੁਣਾਲਦਹਤੀਰੇ ਪਤਿਟ੍ਠਾਯ. ਪੁਚ੍ਛਿਤਪੁਚ੍ਛਿਤਂ ਕਥੇਸਿ (ਜਾ. ੨.ਕੁਣਾਲਜਾਤਕ) ‘‘ਅਨੁਕ੍ਕਮੇਨ ਕੁਣਾਲਸਕੁਣਰਾਜਸ੍ਸ ਪੁਚ੍ਛਨਪ੍ਪਸਙ੍ਗੇਨ ਕੁਣਾਲਜਾਤਕਂ ਕਥੇਸ੍ਸਾਮੀ’’ਤਿ. ਅਨਭਿਰਤਿਂ ਵਿਨੋਦੇਸਿ ਇਤ੍ਥੀਨਂ ਦੋਸਦਸ੍ਸਨਮੁਖੇਨ ਕਾਮਾਨਂ ਆਦੀਨਵੋਕਾਰਸਂਕਿਲੇਸਵਿਭਾਵਨੇਨ.

ਕੋਸਜ੍ਜਂ ਵਿਧਮਿਤ੍ਵਾ ਪੁਰਿਸਥਾਮਪਰਿਬ੍ਰੂਹਨੇਨ ‘‘ਉਤ੍ਤਮਪੁਰਿਸਸਦਿਸੇਹਿ ਨੋ ਭਵਿਤੁਂ ਵਟ੍ਟਤੀ’’ਤਿ ਉਪ੍ਪਨ੍ਨਚਿਤ੍ਤਾ.

ਅਵਿਸ੍ਸਟ੍ਠਕਮ੍ਮਨ੍ਤਾਤਿ ਅਰਤਿਵਿਨੋਦਨਤੋ ਪਟ੍ਠਾਯ ਅਵਿਸ੍ਸਟ੍ਠਸਮਣਕਮ੍ਮਨ੍ਤਾ, ਅਪਰਿਚਤ੍ਤਕਮ੍ਮਟ੍ਠਾਨਾਤਿ ਅਤ੍ਥੋ. ਨਿਸੀਦਿਤੁਂ ਵਟ੍ਟਤੀਤਿ ਭਗਵਾ ਚਿਨ੍ਤੇਸੀਤਿ ਯੋਜਨਾ.

ਪਦੁਮਿਨਿਯਨ੍ਤਿ ਪਦੁਮਸ੍ਸਰੇ. ਵਿਕਸਿਂਸੁ ਗੁਣਗਣਵਿਬੋਧੇਨ. ‘‘ਅਯਂ ਇਮਸ੍ਸ…ਪੇ… ਨ ਕਥੇਸੀ’’ਤਿ ਇਮਿਨਾ ਸਬ੍ਬੇਪਿ ਤੇ ਭਿਕ੍ਖੂ ਤਾਵਦੇਵ ਪਟਿਪਾਟਿਯਾ ਆਗਤਤ੍ਤਾ ਅਞ੍ਞਮਞ੍ਞਸ੍ਸ ਲਜ੍ਜਮਾਨਾ ਅਤ੍ਤਨਾ ਪਟਿਵਿਦ੍ਧਵਿਸੇਸਂ ਭਗਵਤੋ ਨਾਰੋਚੇਸੁਨ੍ਤਿ ਦਸ੍ਸੇਤਿ. ‘‘ਖੀਣਾਸਵਾਨ’’ਨ੍ਤਿਆਦਿਨਾ ਤਤ੍ਥ ਕਾਰਣਮਾਹ.

ਓਸੀਦਮਤ੍ਤੇਤਿ ਭਗਵਤੋ ਸਨ੍ਤਿਕਂ ਉਪਗਤਮਤ੍ਤੇ. ਅਰਿਯਮਣ੍ਡਲੇਤਿ ਅਰਿਯਸਮੂਹੇ. ਪਾਚੀਨਯੁਗਨ੍ਧਰਪਰਿਕ੍ਖੇਪਤੋਤਿ ਯੁਗਨ੍ਧਰਪਬ੍ਬਤਸ੍ਸ ਪਾਚੀਨਪਰਿਕ੍ਖੇਪਤੋ, ਨ ਬਾਹਿਰਕੇਹਿ ਉਚ੍ਚਮਾਨਉਦਯਪਬ੍ਬਤਤੋ. ਰਾਮਣੇਯ੍ਯਕਦਸ੍ਸਨਤ੍ਥਨ੍ਤਿ ਬੁਦ੍ਧੁਪ੍ਪਾਦਪਟਿਮਣ੍ਡਿਤਤ੍ਤਾ ਵਿਸੇਸਤੋ ਰਮਣੀਯਸ੍ਸ ਲੋਕਸ੍ਸ ਰਮਣੀਯਭਾਵਦਸ੍ਸਨਤ੍ਥਂ. ਉਲ੍ਲਙ੍ਘਿਤ੍ਵਾਤਿ ਉਟ੍ਠਹਿਤ੍ਵਾ. ਏਵਰੂਪੇ ਖਣੇ ਲਯੇ ਮੁਹੁਤ੍ਤੇਤਿ ਯਥਾਵੁਤ੍ਤੇ ਚਨ੍ਦਮਣ੍ਡਲਸ੍ਸ ਉਟ੍ਠਿਤਕ੍ਖਣੇ ਉਟ੍ਠਿਤਵੇਲਾਯਂ ਉਟ੍ਠਿਤਮੁਹੁਤ੍ਤੇਤਿ ਉਪਰੂਪਰਿ ਕਾਲਸ੍ਸ ਵਡ੍ਢਿਤਭਾਵਦਸ੍ਸਨਤ੍ਥਂ ਵੁਤ੍ਤਂ.

ਤਥਾ ਤੇਸਂ ਭਿਕ੍ਖੂਨਂ ਜਾਤਿਆਦਿਵਸੇਨ ਭਗਵਤੋ ਅਨੁਰੂਪਪਰਿਵਾਰਿਤਂ ਦਸ੍ਸੇਨ੍ਤੋ ‘‘ਤਤ੍ਥਾ’’ਤਿ ਆਦਿਮਾਹ.

ਸਮਾਪਨ੍ਨਦੇਵਤਾਤਿ ਆਸਨ੍ਨਟ੍ਠਾਨੇ ਝਾਨਸਮਾਪਤ੍ਤਿ ਸਮਾਪਨ੍ਨਦੇਵਤਾ. ਚਲਿਂਸੂਤਿ ਉਟ੍ਠਹਿਂਸੁ. ਕੋਸਮਤ੍ਤਂ ਠਾਨਂ ਸਦ੍ਦਨ੍ਤਰਂ. ਜਮ੍ਬੁਦੀਪੇ ਕਿਰ ਆਦਿਤੋ ਤੇਸਟ੍ਠਿਮਤ੍ਤਾਨਿ ਨਗਰਸਹਸ੍ਸਾਨਿ ਉਪ੍ਪਨ੍ਨਾਨਿ, ਤਥਾ ਦੁਤਿਯਂ, ਤਥਾ ਤਤਿਯਂ, ਤਂ ਸਨ੍ਧਾਯਾਹ ‘‘ਤਿਕ੍ਖਤ੍ਤੁਂ ਤੇਸਟ੍ਠਿਯਾ ਨਗਰਸਹਸ੍ਸੇਸੂ’’ਤਿ. ਤੇ ਪਨ ਸਮ੍ਪਿਣ੍ਡੇਤ੍ਵਾ ਸਤਸਹਸ੍ਸਤੋ ਪਰਂ ਅਸੀਤਿਸਹਸ੍ਸਾਨਿ, ਨਵਸਹਸ੍ਸਾਨਿ ਚ ਹੋਨ੍ਤਿ. ਨਵਨਵੁਤਿਯਾ ਦੋਣਮੁਖਸਤਸਹਸ੍ਸੇਸੂਤਿ ਨਵਸਤਸਹਸ੍ਸਾਧਿਕੇਸੁ ਨਵੁਤਿਸਤਸਹਸ੍ਸੇਸੁ ਦੋਣਮੁਖੇਸੁ. ਦੋਣਮੁਖਨ੍ਤਿ ਚ ਮਹਾਨਗਰਸ੍ਸ ਆਯੁਪ੍ਪਤ੍ਤਿਟ੍ਠਾਨਭੂਤਂ ਪਾਦਨਗਰਂ ਵੁਚ੍ਚਤਿ. ਛਨ੍ਨਵੁਤਿਯਾ ਪਟ੍ਟਨਕੋਟਿਸਤਸਹਸ੍ਸੇਸੂਤਿ ਛਕੋਟਿਅਧਿਕਨਵੁਤਿਕੋਟਿਸਤਸਹਸ੍ਸਪਟ੍ਟਨੇਸੁ. ਤਮ੍ਬਪਣ੍ਣਿਦੀਪਾਦੀਸੁ ਛਪਣ੍ਣਾਸਾਯ ਰਤਨਾਕਰੇਸੁ. ਏਵਂ ਪਨ ਨਗਰਦੋਣਿਮੁਖਪਟ੍ਟਨਰਤਨਾਕਰਾਦਿਵਿਭਾਗੇਨ ਕਥਨਂ ਤਂਤਂਅਧਿਵਤ੍ਥਾਯ ਵਸਨ੍ਤੀਨਂ ਦੇਵਤਾਨਂ ਬਹੁਭਾਵਦਸ੍ਸਨਤ੍ਥਂ. ਯਦਿ ਦਸਸਹਸ੍ਸਚਕ੍ਕਵਾਲ਼ੇਸੁ ਦੇਵਤਾ ਸਨ੍ਨਿਪਤਿਤਾ, ਅਥ ਕਸ੍ਮਾ ਪਾਲ਼ਿਯਂ ‘‘ਦਸਹਿ ਚ ਲੋਕਧਾਤੂਹੀ’’ਤਿ ਵੁਤ੍ਤਨ੍ਤਿ ਆਹ ‘‘ਦਸਸਹਸ੍ਸ…ਪੇ… ਅਧਿਪ੍ਪੇਤਾ’’ਤਿ, ਤੇਨ ਸਹਸ੍ਸਿਲੋਕਧਾਤੁ ਇਧ ‘‘ਏਕਾ ਲੋਕਧਾਤੂ’’ਤਿ ਵੁਤ੍ਤਾਤਿ ਵੇਦਿਤਬ੍ਬਂ.

ਲੋਹਪਾਸਾਦੇਤਿ ਆਦਿਤੋ ਕਤੇ ਲੋਹਪਾਸਾਦੇ. ਬ੍ਰਹ੍ਮਲੋਕੇਤਿ ਹੇਟ੍ਠਿਮੇ ਬ੍ਰਹ੍ਮਲੋਕੇ. ਯਦਿ ਤਾ ਦੇਵਤਾ ਏਵਂ ਨਿਰਨ੍ਤਰਾ, ਪਚ੍ਛਾ ਆਗਤਾਨਂ ਓਕਾਸੋ ਏਵ ਨ ਭਵੇਯ੍ਯਾਤਿ ਚੋਦਨਂ ਸਨ੍ਧਾਯਾਹ ‘‘ਯਥਾ ਖੋ ਪਨਾ’’ਤਿਆਦਿ. ਸੁਦ੍ਧਾਵਾਸਕਾਯਂ ਉਪਪਨ੍ਨਾ ਸੁਦ੍ਧਾਵਾਸਕਾਯਿਕਾ, ਤਾਸਂ ਪਨ ਯਸ੍ਮਾ ਸੁਦ੍ਧਾਵਾਸਭੂਮਿ ਨਿਵਾਸਟ੍ਠਾਨਂ, ਤਸ੍ਮਾ ਵੁਤ੍ਤਂ ‘‘ਸੁਦ੍ਧਾਵਾਸਵਾਸੀਨ’’ਨ੍ਤਿ. ਆਵਾਸਾਤਿ ਆਵਾਸਨਟ੍ਠਾਨਭੂਤਾ, ਦੇਵਤਾ ਪਨ ਓਰਮ੍ਭਾਗਿਯਾਨਂ, ਇਤਰੇਸਞ੍ਚ ਸਂਯੋਜਨਾਨਂ ਸਮੁਚ੍ਛਿਨ੍ਦਨੇਨ ਸੁਦ੍ਧੋ ਆਵਾਸੋ ਏਤੇਸਨ੍ਤਿ ਸੁਦ੍ਧਾਵਾਸਾ.

੩੩੨. ਪੁਰਤ੍ਥਿਮਚਕ੍ਕਵਾਲ਼ਮੁਖਵਟ੍ਟਿਯਂ ਓਤਰਿ ਅਞ੍ਞਤ੍ਥ ਓਕਾਸਂ ਅਲਭਮਾਨੋ. ਏਵਂ ਸੇਸਾਪਿ. ਬੁਦ੍ਧਾਨਂ ਅਭਿਮੁਖਮਗ੍ਗੋ ਬੁਦ੍ਧਵੀਥਿ. ਯਾਵ ਚਕ੍ਕਵਾਲ਼ਾ ਓਤ੍ਥਰਿਤੁਂ ਓਵਰਿਤੁਂ ਨ ਸਕ੍ਕਾ. ਪਹਟਬੁਦ੍ਧਵੀਥਿਯਾਵਾਤਿ ਬੁਦ੍ਧਾਨਂ ਸਨ੍ਤਿਕਂ ਉਪਸਙ੍ਕਮਨ੍ਤੇਹਿ ਤੇਹਿ ਦੇਵਬ੍ਰਹ੍ਮੇਹਿ ਵਲ਼ਞ੍ਜਿਤਵੀਥਿਯਾਵ. ਸਮਿਤਿ ਸਙ੍ਗਤਿ ਸਨ੍ਨਿਪਾਤੋ ਸਮਯੋ, ਮਹਨ੍ਤੋ ਸਮਯੋ ਮਹਾਸਮਯੋਤਿ ਆਹ ‘‘ਮਹਾਸਮੂਹੋ’’ਤਿ. ਪਵਦ੍ਧਂ ਵਨਂ ਪਵਨਨ੍ਤਿ ਆਹ ‘‘ਵਨਸਣ੍ਡੋ’’ਤਿ. ਦੇਵਘਟਾਤਿ ਦੇਵਸਮੂਹਾ.

ਸਮਾਦਹਂਸੂਤਿ ਸਮਾਦਹਿਤਂ ਲੋਕੁਤ੍ਤਰਸਮਾਧਿਨਾ ਸੁਟ੍ਠੁ ਅਪ੍ਪਿਤਂ ਅਕਂਸੁ, ਯਥਾਸਮਾਹਿਤਂ ਪਨ ਸਮਾਧਿਨਾ ਯੋਜਿਤਂ ਨਾਮ ਹੋਤੀਤਿ ਵੁਤ੍ਤਂ ‘‘ਸਮਾਧਿਨਾ ਯੋਜੇਸੁ’’ਨ੍ਤਿ. ਸਬ੍ਬੇਸਂ ਗੋਮੁਤ੍ਤਵਙ੍ਕਾਦੀਨਂ ਦੂਰਸਮੂਹਨਿਤਤ੍ਤਾ ਸਬ੍ਬੇ…ਪੇ… ਅਕਰਿਂਸੁ. ਨਯਤਿ ਅਸ੍ਸੇ ਏਤੇਹੀਤਿ ਨੇਤ੍ਤਾਨਿ, ਯੋਤ੍ਤਾਨਿ. ਅਵੀਥਿਪਟਿਪਨ੍ਨਾਨਂ ਅਸ੍ਸਾਨਂ ਵੀਥਿਪਟਿਪਾਦਨਂ ਰਸ੍ਮਿਗ੍ਗਹਣੇਨ ਪਹੋਤੀਤਿ ‘‘ਸਬ੍ਬਯੋਤ੍ਤਾਨਿ ਗਹੇਤ੍ਵਾ ਅਚੋਦੇਨ੍ਤੋ’’ਤਿ ਵਤ੍ਵਾ ਤਂ ਪਨ ਅਚੋਦਨਂ ਅਵਾਰਣਂ ਏਵਾਤਿ ਆਹ ‘‘ਅਚੋਦੇਨ੍ਤੋ ਅਵਾਰੇਨ੍ਤੋ’’ਤਿ.

ਯਥਾ ਖੀਲਂ ਭਿਤ੍ਤਿਯਂ ਵਾ ਭੂਮਿਯਂ ਵਾ ਆਕੋਟਿਤਂ ਦੁਨ੍ਨੀਹਰਣਂ, ਯਥਾ ਚ ਪਲਿਘਂ ਨਗਰਪ੍ਪਵੇਸਨਿਵਾਰਣਂ, ਯਥਾ ਚ ਇਨ੍ਦਖੀਲਂ ਗਮ੍ਭੀਰਨੇਮਿ ਸੁਨਿਖਾਤਂ ਦੁਨ੍ਨੀਹਰਣਂ, ਏਵਂ ਰਾਗਾਦਯੋ ਸਤ੍ਤਸਨ੍ਤਾਨਤੋ ਦੁਨ੍ਨੀਹਰਣਾ, ਨਿਬ੍ਬਾਨਨਗਰਪ੍ਪਵੇਸਨਿਵਾਰਣਾ ਚਾਤਿ ਤੇ ‘‘ਖੀਲਂ, ਪਲਿਘਂ, ਇਨ੍ਦਖੀਲ’’ਨ੍ਤਿ ਚ ਵੁਤ੍ਤਾ. ਤਣ੍ਹਾਏਜਾਯ ਅਭਾਵੇਨ ਅਨੇਜਾ ਪਰਮਸਨ੍ਤੁਟ੍ਠਭਾਵੇਨ ਚਾਤੁਦ੍ਦਿਸਤ੍ਤਾ ਅਪ੍ਪਟਿਹਤਚਾਰਿਕਂ ਚਰਨ੍ਤਿ.

ਗਤਾਸੇਤਿ ਗਤਾ ਏਵ, ਨ ਪਨ ਗਮਿਸ੍ਸਨ੍ਤਿ ਪਰਿਨਿਟ੍ਠਿਤਸਰਣਗਮਨਤ੍ਤਾਤਿ. ਲੋਕੁਤ੍ਤਰਸਰਣਗਮਨਂ ਅਧਿਪ੍ਪੇਤਨ੍ਤਿ ਆਹ ‘‘ਨਿਬ੍ਬੇਮਤਿਕਸਰਣਗਮਨੇਨ ਗਤਾ’’ਤਿ. ਤੇ ਹਿ ਨਿਯਮੇਨ ਅਪਾਯਭੂਮਿਂ ਨ ਗਮਿਸ੍ਸਨ੍ਤਿ, ਦੇਵਕਾਯਞ੍ਚ ਪਰਿਪੂਰੇਸ੍ਸਨ੍ਤਿ. ਯੇ ਪਨ ਲੋਕਿਯੇਨ ਸਰਣਗਮਨੇਨ ਬੁਦ੍ਧਂ ਸਰਣਂ ਗਤਾਸੇ, ਨ ਤੇ ਗਮਿਸ੍ਸਨ੍ਤਿ ਅਪਾਯਭੂਮਿਂ, ਸਤਿ ਚ ਪਚ੍ਚਯਨ੍ਤਰਸਮਵਾਯੇ ਪਹਾਯ ਮਾਨੁਸਂ ਦੇਹਂ, ਦੇਵਕਾਯਂ ਪਰਿਪੂਰੇਸ੍ਸਨ੍ਤੀਤਿ ਅਯਮੇਤ੍ਥ ਅਤ੍ਥੋ.

ਦੇਵਤਾਸਨ੍ਨਿਪਾਤਵਣ੍ਣਨਾ

੩੩੩. ਏਤੇਸਨ੍ਤਿ ਦੇਵਤਾਸਨ੍ਨਿਪਾਤਾਨਂ. ਇਦਾਨੀਤਿ ਇਮਸ੍ਮਿਂ ਕਾਲੇ. ਬੁਦ੍ਧਾਨਨ੍ਤਿ ਅਞ੍ਞੇਸਂ ਬੁਦ੍ਧਾਨਂ ਅਭਾਵਾ. ਚਿਤ੍ਤਕਲ੍ਲਤਾ ਚਿਤ੍ਤਮਦ੍ਦਵਂ.

ਕਿਂ ਪਨ ਭਗਵਤਾਵ ਮਹਨ੍ਤੇ ਦੇਵਤਾਸਮਾਗਮੇ ਤੇਸਂ ਨਾਮਗੋਤ੍ਤਂ ਕਥੇਤੁਂ ਸਕ੍ਕਾਤਿ? ਆਮ ਸਕ੍ਕਾਤਿ ਦਸ੍ਸੇਤੁਂ ‘‘ਬੁਦ੍ਧਾ ਨਾਮ ਮਹਨ੍ਤਾ’’ਤਿਆਦਿ ਵੁਤ੍ਤਂ. ਤਤ੍ਥ ਦਿਟ੍ਠਨ੍ਤਿ ਰੂਪਾਯਤਨਮਾਹ, ਸੁਤਨ੍ਤਿ ਸਦ੍ਦਾਯਤਨਂ, ਮੁਤਨ੍ਤਿ ਸਮ੍ਪਤ੍ਤਗ੍ਗਾਹਿਇਨ੍ਦ੍ਰਿਯਵਿਸਯਂ ਗਨ੍ਧਰਸਫੋਟ੍ਠਬ੍ਬਾਯਤਨਂ, ਵਿਞ੍ਞਾਤਨ੍ਤਿ ਵੁਤ੍ਤਾਵਸੇਸਂ ਸਬ੍ਬਂ ਞੇਯ੍ਯਂ, ਪਤ੍ਤਨ੍ਤਿ ਪਰਿਯੇਸਿਤ੍ਵਾ, ਅਪਰਿਯੇਸਿਤ੍ਵਾ ਵਾ ਸਮ੍ਪਤ੍ਤਂ, ਪਰਿਯੇਸਿਤਨ੍ਤਿ ਪਤ੍ਤਂ, ਅਪ੍ਪਤ੍ਤਂ ਵਾ ਪਰਿਯਿਟ੍ਠਂ. ਅਨੁਵਿਚਰਿਤਂ ਮਨਸਾਤਿ ਕੇਵਲਂ ਮਨਸਾ ਆਲੋਚਿਤਂ. ਕਤ੍ਥਚਿ ਨੀਲਾਦਿਵਸੇਨ ਵਿਭਤ੍ਤਰੂਪਾਰਮ੍ਮਣੇਤਿ ਅਭਿਧਮ੍ਮੇ (ਧ. ਸ. ੬੧੫) ‘‘ਨੀਲਂ ਪੀਤਕ’’ਨ੍ਤਿਆਦਿਨਾ ਵਿਭਤ੍ਤੇ ਯਤ੍ਥ ਕਤ੍ਥਚਿ ਰੂਪਾਰਮ੍ਮਣੇ ਕਿਞ੍ਚਿ ਰੂਪਾਰਮ੍ਮਣਂ ਵਾ ਨ ਅਤ੍ਥੀਤਿ ਯੋਜਨਾ. ਭੇਰਿਸਦ੍ਦਾਦਿਵਸੇਨਾਤਿ ਏਤ੍ਥਾਪਿ ਏਸੇਵ ਨਯੋ. ਯਨ੍ਤਿ ਯਂ ਆਰਮ੍ਮਣਂ. ਏਤੇਸਨ੍ਤਿ ਬੁਦ੍ਧਾਨਂ.

ਇਦਾਨਿ ਯਥਾਵੁਤ੍ਤਮਤ੍ਥਂ ਪਾਲ਼ਿਯਾ ਸਮਤ੍ਥੇਤੁਂ ‘‘ਯਥਾਹਾ’’ਤਿਆਦਿ ਵੁਤ੍ਤਂ. ਤਦਾ ਜਾਨਨਕਿਰਿਯਾਯ ਅਪਰਿਯੋਸਿਤਭਾਵਦਸ੍ਸਨਤ੍ਥਂ ‘‘ਜਾਨਾਮੀ’’ਤਿ ਵਤ੍ਵਾ ਯਸ੍ਮਾ ਯਂ ਕਿਞ੍ਚਿ ਨੇਯ੍ਯਂ ਨਾਮ, ਸਬ੍ਬਂ ਤਂ ਭਗਵਤਾ ਅਞ੍ਞਾਤਂ ਨਾਮ ਨਤ੍ਥਿ, ਤਸ੍ਮਾ ਵੁਤ੍ਤਂ ‘‘ਤਮਹਂ ਅਬ੍ਭਞ੍ਞਾਸਿ’’ਨ੍ਤਿ.

ਨ ਓਲੋਕੇਨ੍ਤਿ ਪਯੋਜਨਾਭਾਵਤੋ. ਵਿਪਰੀਤਾ ‘‘ਨ ਕਮ੍ਮਾਵਰਣੇਨ ਸਮਨ੍ਨਾਗਤਾ’’ਤਿਆਦਿਨਾ ਨਯੇਨ ਵੁਤ੍ਤਾ. ‘‘ਯਸ੍ਸ ਮਙ੍ਗਲਾ ਸਮੂਹਤਾ’’ਤਿ (ਸੁ. ਨਿ. ੩੬੨) ਆਰਭਿਤ੍ਵਾ ‘‘ਰਾਗਂ ਵਿਨਯੇਥ ਮਾਨੁਸੇਸੁ ਦਿਬ੍ਬੇਸੁ ਕਾਮੇਸੁ ਚਾ’’ਤਿਆਦਿਨਾ (ਸੁ. ਨਿ. ੩੬੩) ਚ ਰਾਗਨਿਗ੍ਗਹਕਥਾਬਾਹੁਲ੍ਲਤੋ ਸਮ੍ਮਾਪਰਿਬ੍ਬਾਜਨੀਯਸੁਤ੍ਤਂ ਰਾਗਚਰਿਤਾਨਂ ਸਪ੍ਪਾਯਂ, ‘‘ਪਿਯਮਪ੍ਪਿਯਭੂਤਾ ਕਲਹ ਵਿਵਾਦਾ ਪਰਿਦੇਵਸੋਕਾ ਸਹਮਚ੍ਛਰਾ ਚਾ’’ਤਿਆਦਿਨਾ (ਸੁ. ਨਿ. ੮੬੯; ਮਹਾਨਿ. ੯੮) ਕਲਹਾਦਯੋ ਯਤੋ ਦੋਸਤੋ ਸਮੁਟ੍ਠਹਨ੍ਤਿ, ਸੋ ਚ ਦੋਸੋ ਯਤੋ ਪਿਯਭਾਵਤੋ, ਸੋ ਚ ਪਿਯਭਾਵੋ ਯਤੋ ਛਨ੍ਦਤੋ ਸਮੁਟ੍ਠਹਨ੍ਤਿ, ਇਤਿ ਫਲਤੋ, ਕਾਰਣਪਰਮ੍ਪਰਤੋ ਚ ਦੋਸੇ ਆਦੀਨਵਵਿਭਾਵਨਬਾਹੁਲ੍ਲਤੋ ਕਲਹਵਿਵਾਦਸੁਤ੍ਤਂ (ਸੁ. ਨਿ. ੮੬੯; ਮਹਾਨਿ. ੯੮) ਦੋਸਚਰਿਤਾਨਂ ਸਪ੍ਪਾਯਂ –

‘‘ਅਪ੍ਪਞ੍ਹਿ ਏਤਂ ਨ ਅਲਂ ਸਮਾਯ,

ਦੁਵੇ ਵਿਵਾਦਸ੍ਸ ਫਲਾਨਿ ਬ੍ਰੂਮਿ;

ਏਤਮ੍ਪਿ ਦਿਸ੍ਵਾ ਨ ਵਿਵਾਦਯੇਥ,

ਖੇਮਾਭਿਪਸ੍ਸਂ ਅਵਿਵਾਦਭੂਮਿ’’ਨ੍ਤਿ. (ਸੁ. ਨਿ. ੯੦੨; ਮਹਾਨਿ. ੧੩੧) –

ਆਦਿਨਾ ਨਯੇਨ ਸਮ੍ਮੋਹਵਿਧਮਨਤੋ, ਪਞ੍ਞਾਪਰਿਬ੍ਰੂਹਨਤੋ ਚ ਮਹਾਬ੍ਯੂਹਸੁਤ੍ਤਂ ਮੋਹਚਰਿਤਾਨਂ ਸਪ੍ਪਾਯਂ –

‘‘ਪਰਸ੍ਸ ਚੇ ਧਮ੍ਮਂ ਅਨਾਨੁਜਾਨਂ,

ਬਾਲੋ, ਮਗੋ ਹੋਤਿ ਨਿਹੀਨਪਞ੍ਞੋ;

ਸਬ੍ਬੇਵ ਬਾਲਾ ਸੁਨਿਹੀਨਪਞ੍ਞਾ,

ਸਬ੍ਬੇਵਿਮੇ ਦਿਟ੍ਠਿਪਰਿਬ੍ਬਸਾਨਾ’’ਤਿ. (ਸੁ. ਨਿ. ੮੮੬; ਮਹਾਨਿ. ੧੧੫) –

ਆਦਿਨਾ ਨਯੇਨ ਸਨ੍ਦਿਟ੍ਠਿਪਰਾਮਾਸਿਤਾਪਨਯਨਮੁਖੇਨ ਸਵਿਸਯੇਸੁ ਦਿਟ੍ਠਿਗ੍ਗਹਣੇਸੁ ਵਿਸਟਵਿਤਕ੍ਕਵਿਚ੍ਛਿਨ੍ਦਨਵਸੇਨ ਪਵਤ੍ਤਤ੍ਤਾ ਚੂਲ਼ਬ੍ਯੂਹਸੁਤ੍ਤਂ ਵਿਤਕ੍ਕਚਰਿਤਾਨਂ ਸਪ੍ਪਾਯਂ –

‘‘ਮੂਲਂ ਪਪਞ੍ਚਸਙ੍ਖਾਯ (ਇਤਿ ਭਗਵਾ),

ਮਨ੍ਤਾ ਅਸ੍ਮੀਤਿ ਸਬ੍ਬਂ ਉਪਰੁਨ੍ਧੇ;

ਯਾ ਕਾਚਿ ਤਣ੍ਹਾ ਅਜ੍ਝਤ੍ਤਂ,

ਤਾਸਂ ਵਿਨਯਾ ਸਦਾ ਸਤੋ ਸਿਕ੍ਖੇ’’ਤਿ. (ਸੁ. ਨਿ. ੯੨੨; ਮਹਾਨਿ. ੧੫੧) –

ਪਪਞ੍ਚਸਙ੍ਖਾਯ ਮੂਲਂ ਅਵਿਜ੍ਜਾਦਿਕਿਲੇਸਜਾਤਂ ਅਸ੍ਮੀਤਿ ਪਵਤ੍ਤਮਾਨਞ੍ਚਾਤਿ ਸਬ੍ਬਂ ਮਨ੍ਤਾ ਪਞ੍ਞਾਯ ਉਪਰੁਨ੍ਧੇਯ੍ਯ. ਯਾ ਕਾਚਿ ਅਜ੍ਝਤ੍ਤਂ ਰੂਪਤਣ੍ਹਾਦਿਭੇਦਾ ਤਣ੍ਹਾ ਉਪ੍ਪਜ੍ਜੇਯ੍ਯ, ਤਾਸਂ ਵਿਨਯਾ ਵੂਪਸਮਾਯ ਸਦਾ ਸਤੋ ਉਪਟ੍ਠਿਤਸ੍ਸਤਿ ਹੁਤ੍ਵਾ ਸਿਕ੍ਖੇਯ੍ਯਾਤਿ ਏਵਮਾਦਿ ਉਪਦੇਸਸ੍ਸ ਸਦ੍ਧੋਵ ਭਾਜਨਂ. ਤਸ੍ਸ ਹਿ ਸੋ ਅਤ੍ਥਾਵਹੋਤਿ ਤੁਵਟ੍ਟਕਸੁਤ੍ਤਂ ਸਦ੍ਧਾਚਰਿਤਾਨਂ ਸਪ੍ਪਾਯਂ –

‘‘ਵੀਤਤਣ੍ਹੋ ਪੁਰਾ ਭੇਦਾ (ਇਤਿ ਭਗਵਾ),

ਪੁਬ੍ਬਮਨ੍ਤਮਨਿਸ੍ਸਿਤੋ;

ਵੇਮਜ੍ਝੇ ਨੁਪਸਙ੍ਖੇਯ੍ਯੋ,

ਤਸ੍ਸ ਨਤ੍ਥਿ ਪੁਰਕ੍ਖਤ’’ਨ੍ਤਿ. (ਸੁ. ਨਿ. ੮੫੫; ਮਹਾਨਿ. ੮੪) –

ਯੋ ਸਰੀਰਭੇਦਤੋ ਪੁਬ੍ਬੇਵ ਪਹੀਨਤਣ੍ਹੋ, ਤਤੋ ਏਵ ਅਤੀਤਦ੍ਧਸਞ੍ਞਿਤਂ ਪੁਰਿਮਕੋਟ੍ਠਾਸਂ ਤਣ੍ਹਾਨਿਸ੍ਸਯੇਨ ਅਨਿਸ੍ਸਿਤੋ, ਵੇਮਜ੍ਝੇ ਪਚ੍ਚੁਪ੍ਪਨ੍ਨੇਪਿ ਅਦ੍ਧਨਿ ‘‘ਰਤ੍ਤੋ’’ਤਿਆਦਿਨਾ ਉਪਸਙ੍ਖਾਤਬ੍ਬੋ, ਤਸ੍ਸ ਅਰਹਤੋ ਤਣ੍ਹਾਦਿਟ੍ਠਿਪੁਰਕ੍ਖਾਰਾਨਂ ਅਭਾਵਾ ਅਨਾਗਤੇ ਅਦ੍ਧਨਿ ਕਿਞ੍ਚਿ ਪੁਰਕ੍ਖਤਂ ਨਤ੍ਥੀਤਿ ਆਦਿਨਾ ਏਵਂ ਗਮ੍ਭੀਰਕਥਾਬਾਹੁਲ੍ਲਤੋ ਪੂਰਾਭੇਦਸੁਤ੍ਤਂ (ਸੁ. ਨਿ. ੮੫੫; ਮਹਾਨਿ. ੮੪) ਬੁਦ੍ਧਿਚਰਿਤਾਨਂ ਸਪ੍ਪਾਯਨ੍ਤਿ ਕਤ੍ਵਾ ਵੁਤ੍ਤਂ ‘‘ਅਥ ਨੇਸਂ ਸਪ੍ਪਾਯਂ …ਪੇ… ਵਵਤ੍ਥਪੇਤ੍ਵਾ’’ਤਿ. ਮਨਸਾਕਾਸੀਤਿ ਏਵਂ ਚਰਿਯਾਯ ਵਸੇਨ ਮਨਸਿ ਕਤ੍ਵਾ ਪੁਨ ਤਂ ਸਦਿਸਂ ਅਤ੍ਤਨੋ ਦੇਸਨਾਨਿਕ੍ਖੇਪਯੋਗ੍ਯਤਾਵਸੇਨ ਮਨਸਿ ਅਕਾਸਿ. ਅਤ੍ਤਜ੍ਝਾਸਯੇਨ ਨੁ ਖੋ ਜਾਨੇਯ੍ਯਾਤਿ ਪਰਜ੍ਝਾਸਯਾਦਿਂ ਅਨਪੇਕ੍ਖਿਤ੍ਵਾ ਮਯ੍ਹਂਯੇਵ ਅਜ੍ਝਾਸਯੇਨ ਆਰਦ੍ਧ ਦੇਸਨਂ ਜਾਨੇਯ੍ਯ ਨੁ ਖੋ. ਪਰਜ੍ਝਾਸਯੇਨਾਤਿ ਸਨ੍ਨਿਪਤਿਤਾਯ ਪਰਿਸਾਯ ਕਸ੍ਸਚਿ ਅਜ੍ਝਾਸਯੇਨ. ਅਟ੍ਠੁਪ੍ਪਤ੍ਤਿਕੇਨਾਤਿ ਇਧ ਸਮੁਟ੍ਠਿਤਅਟ੍ਠੁਪ੍ਪਤ੍ਤਿਯਾ. ਪੁਚ੍ਛਾਵਸੇਨਾਤਿ ਕਸ੍ਸਚਿ ਪੁਚ੍ਛਨ੍ਤਸ੍ਸ ਪੁਚ੍ਛਾਵਸੇਨ. ਆਰਦ੍ਧਦੇਸਨਂ ਜਾਨੇਯ੍ਯਾਤਿ. ‘‘ਸਚੇ ਪਚ੍ਚੇਕਬੁਦ੍ਧੋ ਭਵੇਯ੍ਯਾ’’ਤਿ ਇਦਂ ਇਮੇਸਂ ਸੁਤ੍ਤਾਨਂ ਦੇਸਨਾਯ ਪੁਚ੍ਛਾ ਪਚ੍ਚੇਕਬੁਦ੍ਧਾਨਂ ਭਾਰਿਯਾ, ਅਵਿਸਯਾ ਚਾਤਿ ਦਸ੍ਸਨਤ੍ਥਂ ਵੁਤ੍ਤਂ. ਤੇਨਾਹ ‘‘ਸੋਪਿ ਨ ਸਕ੍ਕੁਣੇਯ੍ਯਾ’’ਤਿ.

ਏਤ੍ਥ ਚ ਯਸ੍ਮਾ ਨ ਅਨੁਮਤਿਪੁਚ੍ਛਾ, ਕਥੇਤੁਕਮ੍ਯਤਾਪੁਚ੍ਛਾ ਵਾ ਯੁਤ੍ਤਾ, ਅਥ ਖੋ ਦਿਟ੍ਠਸਂਸਨ੍ਦਨਪੁਚ੍ਛਾਸਦਿਸੀ ਵਾ ਵਿਮਤਿਚ੍ਛੇਦਨਪੁਚ੍ਛਾਸਦਿਸੀ ਵਾ ਪੁਚ੍ਛਾ ਯੁਤ੍ਤਾ, ਤਾਵ ਪੁਗ੍ਗਲਜ੍ਝਾਸਯਵਸੇਨ ਪਵਤ੍ਤਿਤਾ ਨਾਮ ਹੋਨ੍ਤਿ, ਨ ਯਥਾਧਮ੍ਮਵਸੇਨ, ਤਤ੍ਥ ਯਦਿ ਭਗਵਾ ਤਥਾ ਸਯਮੇਵ ਪੁਚ੍ਛਿਤ੍ਵਾ ਸਯਮੇਵ ਵਿਸ੍ਸਜ੍ਜੇਯ੍ਯ, ਸੁਣਨ੍ਤੀਨਂ ਦੇਵਤਾਨਂ ਸਮ੍ਮੋਹੋ ਭਵੇਯ੍ਯ ‘‘ਕਿਂ ਨਾਮੇਤਂ ਭਗਵਾ ਪਠਮਂ ਏਵਮਾਹ, ਪੁਨਪਿ ਏਵਮਾਹਾ’’ਤਿ, ਅਨ੍ਧਕਾਰਂ ਪਵਿਟ੍ਠਾ ਵਿਯ ਹੋਨ੍ਤਿ, ਤਸ੍ਮਾ ਵੁਤ੍ਤਂ ‘‘ਏਵਂ ਪੇਤਾ ਦੇਵਤਾ ਨ ਸਕ੍ਖਿਸ੍ਸਨ੍ਤਿ ਪਟਿਵਿਜ੍ਝਿਤੁ’’ਨ੍ਤਿ. ਯਥਾਧਮ੍ਮਦੇਸਨਾਯਂ ਪਨ ਕਥੇਤੁਕਮ੍ਯਤਾਵਸੇਨ ਪੁਚ੍ਛਨੇਨ ਸਮ੍ਮੋਹੋ ਹੋਤੀਤਿ. ਸੂਰਿਯੋ ਉਗ੍ਗਤੋਤਿ ਆਹ ਦੇਵਸਙ੍ਘੋ ਆਸਨ੍ਨਤਰਭਾਵੇਨ ਓਭਾਸਸ੍ਸ ਵਿਪੁਲਉਲ਼ਾਰਭਾਵਤੋ. ਏਕਿਸ੍ਸਾ ਲੋਕਧਾਤੁਯਾਤਿ ਸੁਤ੍ਤੇ (ਦੀ. ਨਿ. ੩.੧੬੧; ਮ. ਨਿ. ੩.੧੨੯; ਅ. ਨਿ. ੧.੨੭੭; ਵਿਭ. ੮੦੯; ਨੇਤ੍ਤਿ. ੫੭; ਮਿ. ਪ. ੫.੧.੧) ਆਗਤਨਯੇਨ ਸਬ੍ਬਤ੍ਥੇਵ ਪਨ ਅਪੁਬ੍ਬਂ ਅਚਰਿਮਂ ਦ੍ਵੇ ਬੁਦ੍ਧਾ ਨ ਹੋਨ੍ਤੇਵ. ਤੇਨੇਵਾਹ – ‘‘ਅਨਨ੍ਤਾਸੁ…ਪੇ… ਅਦ੍ਦਸਾ’’ਤਿ.

ਗਾਥਾਯਂ ਪੁਚ੍ਛਾਮੀਤਿ ਨਿਮ੍ਮਿਤਬੁਦ੍ਧੋ ਭਗਵਨ੍ਤਂ ਪੁਚ੍ਛਿਤੁਂ ਓਕਾਸਂ ਕਾਰਾਪੇਸਿ. ਮੁਨਿਨ੍ਤਿ ਬੁਦ੍ਧਮੁਨਿਂ. ਪਹੂਤਪਞ੍ਞਨ੍ਤਿ ਮਹਾਪਞ੍ਞਂ. ਤਿਣ੍ਣਨ੍ਤਿ ਚਤੁਰੋਘਤਿਣ੍ਣਂ. ਪਾਰਙ੍ਗਤਨ੍ਤਿ ਨਿਬ੍ਬਾਨਪ੍ਪਤ੍ਤਂ, ਸਬ੍ਬਸ੍ਸ ਵਾ ਞੇਯ੍ਯਸ੍ਸ ਪਾਰਂ ਪਰਿਯਨ੍ਤਂ ਗਤਂ. ਪਰਿਨਿਬ੍ਬੁਤਂ ਸਉਪਾਦਿਸੇਸਨਿਬ੍ਬਾਨਵਸੇਨ. ਠਿਤਤ੍ਤਨ੍ਤਿ ਅਵਟ੍ਠਿਤਚਿਤ੍ਤਂ ਲੋਕਧਮ੍ਮੇਹਿ ਅਕਮ੍ਪਨੇਯ੍ਯਤਾਯ. ਨਿਕ੍ਖਮ੍ਮ ਘਰਾ ਪਨੁਜ੍ਜ ਕਾਮੇਤਿ ਵਤ੍ਥੁਕਾਮੇ ਪਨੂਦਿਤ੍ਵਾ ਘਰਾਵਾਸਾ ਨਿਕ੍ਖਮ੍ਮ. ਕਥਂ ਭਿਕ੍ਖੁ ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯਾਤਿ ਸੋ ਭਿਕ੍ਖੁ ਕਥਂ ਸਮ੍ਮਾ ਪਰਿਬ੍ਬਜੇਯ੍ਯ ਗਚ੍ਛੇਯ੍ਯ ਵਿਹਰੇਯ੍ਯ, ਅਨੁਪਲਿਤ੍ਤੋ ਹੁਤ੍ਵਾ ਲੋਕਂ ਅਤਿਕ੍ਕਮੇਯ੍ਯਾਤਿ ਅਤ੍ਥੋ.

੩੩੪. ਸਿਲੋਕਂ ਅਨੁਕਸ੍ਸਾਮੀਤਿ ਏਤ੍ਥ ਸਿਲੋਕੋ ਨਾਮ ਪਾਦਸਮੁਦਯੋ, ਇਸੀਹਿ ਵੁਚ੍ਚਮਾਨਾ ਗਾਥਾਤਿਪਿ ਵੁਚ੍ਚਤਿ. ਪਾਦੋਵ ਨਿਯਤਵਣ੍ਣਾਨੁਪੁਬ੍ਬਿਕਾਨਂ ਪਦਾਨਂ ਸਮੂਹੋ, ਤਂ ਸਿਲੋਕਂ ਅਨੁਕਸ੍ਸਾਮਿ ਪਵਤ੍ਤਯਿਸ੍ਸਾਮੀਤਿ ਅਤ੍ਥੋਤਿ ਆਹ ‘‘ਅਕ੍ਖਰ…ਪੇ… ਪਵਤ੍ਤਯਿਸ੍ਸਾਮੀ’’ਤਿ. ਯਤ੍ਥਾਤਿ ਅਧਿਕਰਣੇ ਭੁਮ੍ਮਂ. ਆਮੇਡਿਤਲੋਪੇਨਾਯਂ ਨਿਦ੍ਦੇਸੋਤਿ ਆਹ ‘‘ਯੇਸੁ ਯੇਸੁ ਠਾਨੇਸੂ’’ਤਿ. ਭੁਮ੍ਮਾਤਿ ਭੂਮਿਪਟਿਬਦ੍ਧਨਿਵਾਸਾ. ਤਂ ਤਂ ਨਿਸ੍ਸਿਤਾ ਤਂ ਤਂ ਠਾਨਂ ਨਿਸ੍ਸਿਤਵਨ੍ਤੋ ਨਿਸ੍ਸਾਯ ਵਸਮਾਨਾ, ਤੇਹਿ ਸਦ੍ਧਿਂ ਸਿਲੋਕਂ ਅਨੁਕਸ੍ਸਾਮੀਤਿ ਅਧਿਪ੍ਪਾਯੋ. ‘‘ਯੇ ਸਿਤਾ ਗਿਰਿਗਬ੍ਭਰ’’ਨ੍ਤਿ ਇਮਿਨਾ ਤੇਸਂ ਵਿਵੇਕਵਾਸਂ ਦਸ੍ਸੇਤਿ, ‘‘ਪਹਿਤਤ੍ਤਾ ਸਮਾਹਿਤਾ’’ਤਿ ਇਮਿਨਾ ਭਾਵਨਾਭਿਯੋਗਂ.

ਬਹੁਜਨਾ ਪਞ੍ਚਸਤਸਙ੍ਖ੍ਯਤ੍ਤਾ. ਪਟਿਪਕ੍ਖਾਭਿਭਵਨਤੋ, ਤੇਜੁਸ੍ਸਦਤਾਯ ਚ ਸੀਹਾ ਵਿਯ ਪਵਿਵਿਤ੍ਤਤਾਯ ਨਿਲੀਨਾ. ਏਕਤ੍ਤਨ੍ਤਿ ਏਕੀਭਾਵਂ. ਓਦਾਤਚਿਤ੍ਤਾ ਹੁਤ੍ਵਾ ਸੁਦ੍ਧਾਤਿ ਅਰਹਤ੍ਤਮਗ੍ਗਾਧਿਗਮੇਨ ਪਰਿਯੋਦਾਤਚਿਤ੍ਤਾ ਹੁਤ੍ਵਾ ਸੁਦ੍ਧਾ, ਨ ਕੇਵਲਂ ਸਰੀਰਸੁਦ੍ਧਿਯਾਵ. ਵਿਪ੍ਪਸਨ੍ਨਾਤਿ ਅਰਿਯਮਗ੍ਗਪ੍ਪਸਾਦੇਨ ਵਿਸੇਸਤੋ ਪਸਨ੍ਨਾ. ਚਿਤ੍ਤਸ੍ਸ ਆਵਿਲਭਾਵਕਰਾਨਂ ਕਿਲੇਸਾਨਂ ਅਭਾਵੇਨ ਅਨਾਵਿਲਾ.

ਭਿਕ੍ਖੂ ਜਾਨਿਤ੍ਵਾਤਿ ਭਿਨ੍ਨਕਿਲੇਸੇ ਭਿਕ੍ਖੂ ‘‘ਇਮੇ ਦਿਬ੍ਬਚਕ੍ਖੁਨਾ ਏਤੇ ਦੇਵਕਾਯੇ ਪਸ੍ਸਨ੍ਤੀਤਿ ਜਾਨਿਤ੍ਵਾ. ਸਵਨਨ੍ਤੇ ਜਾਤਤ੍ਤਾਤਿ ਧਮ੍ਮਸ੍ਸਵਨਪਰਿਯੋਸਾਨੇ ਅਰਿਯਜਾਤਿਯਾ ਜਾਤਤ੍ਤਾ. ਇਦਂ ਸਬ੍ਬਨ੍ਤਿ ਇਦਂ ‘‘ਭਿਯ੍ਯੋ ਪਞ੍ਚਸਤੇ’’ਤਿਆਦਿਕਂ ਸਬ੍ਬਂ.

ਤਦਤ੍ਥਾਯ ਵੀਰਿਯਂ ਕਰਿਂਸੂਤਿ ਦਿਬ੍ਬਚਕ੍ਖੁਞਾਣਾਭਿਨੀਹਾਰਵਸੇਨ ਵੀਰਿਯਂ ਉਸ੍ਸਾਹਂ ਅਕਂਸੁ. ਤੇਨਾਹ ‘‘ਨ ਤਂ ਤੇਹੀ’’ਤਿਆਦਿ. ਸਤ੍ਤਰਿਨ੍ਤਿ ਤ-ਕਾਰਸ੍ਸ ਰ-ਕਾਰਾਦੇਸਂ ਕਤ੍ਵਾ ਵੁਤ੍ਤਂ, ਸਤ੍ਤਤਿਨ੍ਤਿ ਅਤ੍ਥੋ. ‘‘ਸਹਸ੍ਸ’’ਨ੍ਤਿ ਪਨ ਅਨੁਵਤ੍ਤਤਿ, ਸਤ੍ਤਤਿਯੋਗੇਨ ਬਹੁਵਚਨਂ. ਤੇਨਾਹ ‘‘ਏਕੇ ਸਹਸ੍ਸਂ. ਏਕੇ ਸਤ੍ਤਤਿਸਹਸ੍ਸਾਨੀ’’ਤਿ.

ਅਨਨ੍ਤਨ੍ਤਿ ਅਨ੍ਤਰਹਿਤਂ, ਤਂ ਪਨ ਅਤਿਵਿਯ ਮਹਨ੍ਤਂ ਨਾਮ ਹੋਤੀਤਿ ਆਹ ‘‘ਵਿਪੁਲ’’ਨ੍ਤਿ.

ਅਵੇਕ੍ਖਿਤ੍ਵਾਤਿ ਞਾਣਚਕ੍ਖੁਨਾ ਵਿਸੁਂ ਵਿਸੁਂ ਅਵੇਕ੍ਖਿਤ੍ਵਾ ‘‘ਵਵਤ੍ਥਿਤ੍ਵਾਨਾ’’ਤਿਪਿ ਪਠਨ੍ਤਿ, ਸੋ ਏਵਤ੍ਥੋ. ਤਂ ਅਵੇਕ੍ਖਨਂ ਨਿਚ੍ਛਯਕਰਣਂ ਹੋਤੀਤਿ ਆਹ ‘‘ਵਵਤ੍ਥਪੇਤ੍ਵਾ’’ਤਿ. ਪੁਬ੍ਬੇ ਵੁਤ੍ਤਗਾਥਾਸੁ ਤਤਿਯਗਾਥਾਯ ਪਚ੍ਛਿਮਦ੍ਧਂ, ਚਤੁਤ੍ਥਗਾਥਾਯ ਪੁਰਿਮਦ੍ਧਞ੍ਚ ਸਨ੍ਧਾਯਾਹ ‘‘ਪੁਬ੍ਬੇ ਵੁਤ੍ਤਗਾਥਮੇਵਾ’’ਤਿ.

ਵਿਜਾਨਨਮ੍ਪਿ ਦਸ੍ਸਨਂ ਏਵਾਤਿ ਆਹ ‘‘ਪਸ੍ਸਥ ਓਲੋਕੇਥਾ’’ਤਿ. ਵਾਚਾਯਤਪਵਤ੍ਤਿਤਭਾਵਤੋ ‘‘ਅਨੁਪਟਿਪਾਟਿਯਾਵ ਕਿਤ੍ਤਯਿਸ੍ਸਾਮੀ’’ਤਿ ਵਦਤਿ.

੩੩੫. ਸਤ੍ਤ ਸਹਸ੍ਸਾਨਿ ਸਙ੍ਖਾਯਾਤਿ ਸਤ੍ਤ ਸਹਸ੍ਸਾ. ਯਕ੍ਖਾਯੇਵਾਤਿ ਯਕ੍ਖਜਾਤਿਕਾ ਏਵ. ਆਨੁਭਾਵਸਮ੍ਪਨ੍ਨਾਤਿ ਮਹੇਸਕ੍ਖਾ. ਇਦ੍ਧਿਮਨ੍ਤੋਤਿ ਵਾ ਮਹਾਨੁਭਾਵਾ. ਜੁਤਿਮਨ੍ਤੋਤਿ ਮਹਪ੍ਪਭਾ. ਵਣ੍ਣਵਨ੍ਤੋਤਿ ਅਤਿਕ੍ਕਨ੍ਤਵਣ੍ਣਾ. ਯਸਸ੍ਸਿਨੋਤਿ ਮਹਾਪਰਿਵਾਰਾ ਚੇਵ ਪਤ੍ਥਟਕਿਤ੍ਤਿਸਦ੍ਦਾ ਚ. ਸਮਿਤਿ-ਸਦ੍ਦੋ ਸਮੀਪਤ੍ਥੋਤਿ ਅਧਿਪ੍ਪਾਯੇਨਾਹ ‘‘ਭਿਕ੍ਖੂਨਂ ਸਨ੍ਤਿਕ’’ਨ੍ਤਿ.

ਹੇਮਵਤਪਬ੍ਬਤੇਤਿ ਹਿਮਵਤੋ ਸਮੀਪੇ ਠਿਤਪਬ੍ਬਤੇ.

ਏਤੇ ਸਬ੍ਬੇਪੀਤਿ ਏਤੇ ਸਤ੍ਤਸਹਸ੍ਸਾ ਕਾਪਿਲਵਤ੍ਥਵਾ, ਛਸਹਸ੍ਸਾ ਹੇਮਵਤਾ, ਤਿਸਹਸ੍ਸਾ ਸਾਤਾਗਿਰਾਤਿ ਯਥਾਵੁਤ੍ਤਾ ਸਬ੍ਬੇਪਿ ਸੋਲ਼ਸਸਹਸ੍ਸਾ.

ਰਾਜਗਹਨਗਰੇਤਿ ਰਾਜਗਹਨਗਰਸ੍ਸ ਸਮੀਪੇ. ਤਨ੍ਤਿ ਕੁਮ੍ਭੀਰਂ.

੩੩੬. ਕਾਮਂ ਪਾਚੀਨਦਿਸਂ ਪਸਾਸਤਿ, ਤਥਾਪਿ ਚਤੂਸੁਪਿ ਦਿਸਾਸੁ ਸਪਰਿਵਾਰਦੀਪੇਸੁ ਚਤੂਸੁਪਿ ਮਹਾਦੀਪੇਸੁ ਗਨ੍ਧਬ੍ਬਾਨਂ ਜੇਟ੍ਠਕੋ, ਕਥਂ? ਸਬ੍ਬੇ ਤੇ ਤਸ੍ਸ ਵਸੇ ਵਤ੍ਤਨ੍ਤਿ.ਕੁਮ੍ਭਣ੍ਡਾਨਂ ਅਧਿਪਤੀਤਿਆਦੀਸੁਪਿ ਏਸੇਵ ਨਯੋ.

ਤਸ੍ਸਾਪਿ ਵਿਰੁਲ਼੍ਹਸ੍ਸ. ਤਾਦਿਸਾਯੇਵਾਤਿ ਧਤਰਟ੍ਠਸ੍ਸ ਪੁਤ੍ਤਸਦਿਸਾ ਏਵ ਪੁਥੁਤ੍ਥਤੋ, ਨਾਮਤੋ, ਬਲਤੋ, ਇਦ੍ਧਿਆਦਿਵਿਸੇਸਤੋ ਚ.

ਸਬ੍ਬਸਙ੍ਗਾਹਿਕਵਸੇਨਾਤਿ ਦਸਸਹਸ੍ਸਿਲੋਕਧਾਤੁਯਾ ਪਚ੍ਚੇਕਂ ਚਤ੍ਤਾਰੋ ਚਤ੍ਤਾਰੋ ਮਹਾਰਾਜਾਨੋਤਿ ਤੇਸਂ ਸਬ੍ਬੇਸਂ ਸਙ੍ਗਣ੍ਹਨਵਸੇਨ. ਤੇਨਾਹ ‘‘ਅਯਞ੍ਚੇਤ੍ਥਾ’’ਤਿਆਦਿ.

ਚਤੁਰੋ ਦਿਸਾਤਿ ਚਤੂਸੁ ਦਿਸਾਸੁ. ਚਤੁਰੋ ਦਿਸਾ ਜਲਮਾਨਾ ਸਮੁਜ੍ਜਲਨ੍ਤਾ ਓਭਾਸੇਨ੍ਤਾ. ਯਦਿ ਏਵਂ ਮਹਤਿਯਾ ਪਰਿਸਾਯ ਆਗਤਾਨਂ ਕਥਂ ਕਾਪਿਲਵਤ੍ਥਵੇ ਵਨੇ ਠਿਤਾਤਿ ਆਹ ‘‘ਤੇ ਪਨਾ’’ਤਿਆਦਿ.

੩੩੭. ਤੇਸਂ ਮਹਾਰਾਜਾਨਂ ਦਾਸਾਤਿ ਯੋਜਨਾ. ਮਾਯਾਯ ਯੁਤ੍ਤਾ, ਤਸ੍ਮਾ ਮਾਯਾਵਿਨੋ. ਵਞ੍ਚਨਂ ਏਤੇਸੁ ਅਤ੍ਥਿ, ਵਞ੍ਚਨੇ ਵਾ ਨਿਯੁਤ੍ਤਾਤਿ ਵਞ੍ਚਨਿਕਾ. ਕੇਰਾਟਿਯਸਾਠੇਯ੍ਯੇਨਾਤਿ ਨਿਹੀਨਸਠੇਨ ਕਮ੍ਮੇਨ. ਮਾਯਾ ਏਤੇਸਂ ਅਤ੍ਥੀਤਿ ਮਾਯਾ, ਤੇ ਚ ਪਰੇਸਂ ਵਞ੍ਚਨਤ੍ਥਂ ਯੇਨ ਮਾਯਾਕਰਣੇਨ ‘‘ਮਾਯਾ’’ਤਿ ਵੁਤ੍ਤਾ, ਤਂ ਦਸ੍ਸੇਨ੍ਤੋ ‘‘ਮਾਯਾਕਾਰਕਾ’’ਤਿ ਆਹ.

ਏਤ੍ਤਕਾ ਦਾਸਾਤਿ ਏਤ੍ਤਕਾ ਕੁਟੇਣ੍ਡੁਆਦਿਕਾ ਨਿਘਣ੍ਡੁਪਰਿਯੋਸਾਨਾ ਅਟ੍ਠਮਹਾਰਾਜਾਨਂ ਦਾਸਾ.

ਦੇਵਰਾਜਾਨੋਤਿ ਦੇਵਾ ਹੁਤ੍ਵਾ ਤਂਤਂਦੇਵਕਾਯਸ੍ਸ ਰਾਜਾਨੋ. ਚਿਤ੍ਤੋ ਚ ਸੇਨੋ ਚ ਚਿਤ੍ਤਸੇਨੋ ਚਾਤਿ ਤਯੋ ਏਤੇ ਦੇਵਪੁਤ੍ਤਾ ਪਾਲ਼ਿਯਂ ਏਕਸੇਸਨਯੇਨ ਵੁਤ੍ਤਾਤਿ ਆਹ ‘‘ਚਿਤ੍ਤੋ ਚਾ’’ਤਿਆਦਿ.

ਭਿਕ੍ਖੁਸਙ੍ਘੋ ਸਮਿਤੋ ਸਨ੍ਨਿਪਤਿਤੋ ਏਤ੍ਥਾਤਿ ਭਿਕ੍ਖੁਸਙ੍ਘਸਮਿਤਿ, ਇਮਂ ਵਨਂ.

੩੩੮. ਨਾਗਸਦਹਵਾਸਿਕਾਤਿ ਨਾਗਸਦਹਨਿਵਾਸਿਨੋ. ਤਤ੍ਥੇਕੋ ਕਿਰ ਨਾਗਰਾਜਾ, ਚਿਰਕਾਲਂ ਵਸਤੋ ਤਸ੍ਸ ਪਰਿਸਾ ਮਹਤੀ ਪਰਮ੍ਪਰਾਗਤਾ ਅਤ੍ਥਿ, ਤਂ ਸਨ੍ਧਾਯਾਹ ‘‘ਤਚ੍ਛਕਨਾਗਪਰਿਸਾਯਾ’’ਤਿ.

ਯਮੁਨਵਾਸਿਨੋਤਿ ਯਮੁਨਾਯਂ ਵਸਨਕਨਾਗਾ. ਨਾਗਵੋਹਾਰੇਨਾਤਿ ਹਤ੍ਥਿਨਾਗਵੋਹਾਰੇਨ.

ਵੁਤ੍ਤਪ੍ਪਕਾਰੇਤਿ ਕਮ੍ਬਲਸ੍ਸਤਰੇ ਠਪੇਤ੍ਵਾ ਇਤਰੇ ਵੁਤ੍ਤਪ੍ਪਕਾਰਨਾਗਾ. ਲੋਭਾਭਿਭੂਤਾਤਿ ਆਹਾਰਲੋਭੇਨ ਅਭਿਭੂਤਾ. ਦਿਬ੍ਬਾਨੁਭਾਵਤਾਤਿ ਦਿਬ੍ਬਾਨੁਭਾਵਤੋ, ਦਿਬ੍ਬਾਨੁਭਾਵਹੇਤੁ ਵਾ ਦਿਬ੍ਬਾ. ‘‘ਚਿਤ੍ਰਸੁਪਣ੍ਣਾ’’ਤਿ ਨਾਮਂ ਵਿਚਿਤ੍ਰਸੁਨ੍ਦਰਪਤ੍ਤਵਨ੍ਤਤਾਯ.

ਉਪਵ੍ਹਯਨ੍ਤਾਤਿ ਉਪੇਚ੍ਚ ਕਥੇਨ੍ਤਾ. ਕਾਕੋਲੂਕਅਹਿਨਕੁਲਾਦਯੋ ਵਿਯ ਅਞ੍ਞਮਞ੍ਞਂ ਜਾਤਿਸਮੁਦਾਗਤਵੇਰਾਪਿ ਸਮਾਨਾ ਮਿਤ੍ਤਾ ਵਿਯ…ਪੇ… ਹਟ੍ਠਤੁਟ੍ਠਚਿਤ੍ਤਾ ਅਞ੍ਞਮਞ੍ਞਸ੍ਮਿਨ੍ਤਿ ਅਧਿਪ੍ਪਾਯੋ. ਬੁਦ੍ਧਂਯੇਵ ਤੇ ਸਰਣਂ ਗਤਾ ‘‘ਬੁਦ੍ਧਾਨੁਭਾਵੇਨੇਵ ਮਯਂ ਅਞ੍ਞਮਞ੍ਞਸ੍ਮਿਂ ਮੇਤ੍ਤਿਂ ਪਟਿਲਭਿਮ੍ਹਾ’’ਤਿ.

੩੩੯. ਭਾਤਰੋਤਿ ਮੇਥੁਨਭਾਤਰੋ. ਤੇਨਾਹ ‘‘ਸੁਜਾਯ ਅਸੁਰਕਞ੍ਞਾਯ ਕਾਰਣਾ’’ਤਿ.

ਤੇਸੂਤਿ ਅਸੁਰੇਸੁ. ਕਾਲਕਞ੍ਚਾਤਿ ਏਵਂ ਨਾਮਾ. ਮਹਾਭਿਸ੍ਮਾਤਿ ਭਿਂਸਨਕਮਹਾਸਰੀਰਾ. ਅਭਬ੍ਬਾਤਿ ਸਮ੍ਮਤ੍ਤਨਿਯਾਮਂ ਓਕ੍ਕਮਿਤੁਂ ਨ ਭਬ੍ਬਾ ਅਚ੍ਛਨ੍ਦਿਕਤ੍ਤਾ ਤਾਦਿਸਸ੍ਸ ਛਨ੍ਦਸ੍ਸੇਵ ਅਭਾਵਤੋ.

ਬਲਿਨੋ ਮਹਾਅਸੁਰਸ੍ਸ ਅਬ੍ਭਤੀਤਤ੍ਤਾ ਤਸ੍ਸ ਪੁਤ੍ਤੇ ਏਵ ਕਿਤ੍ਤੇਨ੍ਤੋ ਭਗਵਾ ‘‘ਸਤਞ੍ਚ ਬਲਿਪੁਤ੍ਤਾਨ’’ਨ੍ਤਿ ਆਦਿਮਾਹ. ਸੋ ਕਿਰ ਸੁਖੁਮਂ ਅਤ੍ਤਭਾਵਂ ਮਾਪੇਤ੍ਵਾ ਉਪਗਚ੍ਛਿ.

੩੪੦. ਕਮ੍ਮਂ ਕਤ੍ਵਾਤਿ ਪਰਿਕਮ੍ਮਂ ਕਤ੍ਵਾ. ਨਿਬ੍ਬਤ੍ਤਾਤਿ ਉਪਚਾਰਜ੍ਝਾਨੇਨ ਨਿਬ੍ਬਤ੍ਤਾ. ਅਪ੍ਪਨਾਝਾਨੇਨ ਪਨ ਨਿਬ੍ਬਤ੍ਤਾ ਬ੍ਰਹ੍ਮਾਨੋ ਹੋਨ੍ਤਿ, ਤੇ ਪਰਤੋ ਵਕ੍ਖਤਿ ‘‘ਸੁਬ੍ਰਹ੍ਮਾ’’ਤਿਆਦਿਨਾ (ਦੀ. ਨਿ. ੨.੩੪੧), ਅਯਞ੍ਚ ਕਾਮਾਵਚਰਦੇਵਤਾ ਵੁਚ੍ਚਤਿ. ਤੇਨੇਵਾਹ – ‘‘ਮੇਤ੍ਤਾਕਰੁਣਾਕਾਯਿਕਾਤਿ ਮੇਤ੍ਤਾਝਾਨੇ ਚ ਕਰੁਣਾਝਾਨੇ ਚ ਪਰਿਕਮ੍ਮਂ ਕਤ੍ਵਾ ਨਿਬ੍ਬਤ੍ਤਦੇਵਾ’’ਤਿ. ਮੇਤ੍ਤਾਝਾਨੇ ਕਰੁਣਾਝਾਨੇਤਿ ਮੇਤ੍ਤਾਝਾਨਨਿਮਿਤ੍ਤਂ ਕਰੁਣਾਝਾਨਨਿਮਿਤ੍ਤਂ, ਤਦਤ੍ਥਨ੍ਤਿ ਅਤ੍ਥੋ.

ਤੇ ਆਪੋਦੇਵਾਦਯੋ ਯਥਾਸਕਂ ਵਗ੍ਗਵਸੇਨ ਠਿਤਤ੍ਤਾ ਦਸਧਾ ਠਿਤਾ. ਯਾਵ ਕਰੁਣਾਕਾਯਿਕਾ ਦਸ ਦੇਵਕਾਯਾ.ਨਾਨਤ੍ਤਵਣ੍ਣਾਤਿ ਨਾਨਾਸਭਾਵਵਣ੍ਣਵਨ੍ਤੋ.

ਵੇਣ੍ਡੁਦੇਵਤਾਤਿ ਵੇਣ੍ਡੁ ਨਾਮ ਦੇਵਤਾ, ਏਵਂ ਸਹਲਿ ਦੇਵਤਾ. ਅਸਮਦੇਵਤਾ, ਯਮਕਦੇਵਤਾਤਿ ‘‘ਦ੍ਵੇ ਅਯਨਿਯੋ’’ਤਿ ਵਦਨ੍ਤਿ, ਤਪ੍ਪਮੁਖਾ ਦ੍ਵੇ ਦੇਵਨਿਕਾਯਾਤਿ. ਚਨ੍ਦਸ੍ਸੂਪਨਿਸਾ ਦੇਵਾ ਚਨ੍ਦਸ੍ਸ ਉਪਨਿਸ੍ਸਯਤੋ ਵਤ੍ਤਮਾਨਾ ਤਸ੍ਸ ਪੁਰਤੋ ਚ ਪਚ੍ਛਤੋ ਚ ਪਸ੍ਸਤੋ ਚ ਧਾਵਨਕਦੇਵਾ. ਤੇਨਾਹ ‘‘ਚਨ੍ਦਨਿਸ੍ਸਿਤਕਾ ਦੇਵਾ’’ਤਿ. ਸੂਰਿਯਸ੍ਸੂਪਨਿਸਾ, ਨਕ੍ਖਤ੍ਤਨਿਸ੍ਸਿਤਾਤਿ ਏਤ੍ਥਾਪਿ ਏਸੇਵ ਨਯੋ. ਕੇਵਲਂ ਵਾਤਵਾਯਨਹੇਤਵੋ ਦੇਵਤਾ ਵਾਤਵਲਾਹਕਾ. ਤਥਾ ਕੇਵਲਂ ਅਬ੍ਭਪਟਲਸਞ੍ਚਰਣਹੇਤਵੋ ਅਬ੍ਭਵਲਾਹਕਾ. ਉਣ੍ਹਪ੍ਪਵਤ੍ਤਿਹੇਤਵੋ ਉਣ੍ਹਵਲਾਹਕਾ. ਵਸ੍ਸਵਲਾਹਕਾ ਪਨ ਪਜ੍ਜੁਨ੍ਨਸਦਿਸਾਤਿ. ਤੇ ਇਧ ਨ ਵੁਤ੍ਤਾ. ਵਸੁਦੇਵਤਾ ਨਾਮ ਏਕੋ ਦੇਵਨਿਕਾਯੋ, ਤੇਸਂ ਪੁਬ੍ਬਙ੍ਗਮਤ੍ਤਾ ਵਾਸਵੋ, ਸਕ੍ਕੋ.

ਦਸੇਤੇਤਿ ਏਤੇ ਵੇਣ੍ਡੁਦੇਵਤਾਦਯੋ ਵਾਸਵਪਰਿਯੋਸਾਨਾ ਦਸ ਦੇਵਕਾਯਾ.

ਇਮਾਨੀਤਿ ‘‘ਜਲਮਗ੍ਗੀ’’ਤਿ ਚ ‘‘ਸਿਖਾਰਿਵਾ’’ਤਿ ਚ ਇਮਾਨਿ ਤੇਸਂ ਨਾਮਾਨਿ. ਕੇਚਿ ਪਨ ਮ-ਕਾਰੋ ਪਦਸਨ੍ਧਿਕਰੋ ‘‘ਜਲਾ’’ਤਿ ਚ ‘‘ਅਗ੍ਗੀ’’ਤਿ ਚ ‘‘ਸਿਖਾਰਿਵਾ’’ਤਿ ਚ ਇਮਾਨਿ ਤੇਸਂ ਨਾਮਾਨੀਤਿ ਵਦਨ੍ਤਿ. ਏਤੇਤਿ ਤੇਸੁ ਏਵ ‘‘ਅਰਿਟ੍ਠਕਾ, ਰੋਜਾ’’ਤਿ ਚ ਵੁਤ੍ਤਦੇਵੇਸੁ ਏਕਚ੍ਚੇ,ਉਮਾਪੁਪ੍ਫਨਿਭਾਸਿਨੋ ਵਣ੍ਣਤੋ ਉਮਾਪੁਪ੍ਫਸਦਿਸਾਤਿ ਏਵਮਤ੍ਥੋ ਗਹੇਤਬ੍ਬੋ, ਅਞ੍ਞਥਾ ਏਕਾਦਸ ਦੇਵਕਾਯਾ ਸਿਯੁਂ.

ਦਸੇਤੇਤਿ ਏਤੇ ਦਸ ਸਹਭੂਦੇਵਾਦਯੋ ਵਾਸਵਨੇਸਿਪਰਿਯੋਸਾਨਾ ਦਸ ਦੇਵਕਾਯਾ. ਤੇਨੇਵ ਨਿਕਾਯਭੇਦਵਸੇਨ ਦਸਧਾਵ ਆਗਤਾ.

‘‘ਸਮਾਨਾ’’ਤਿਆਦਿ ਤੇਸਂ ਦੇਵਾਨਂ ਨਿਕਾਯਸਮੁਦਾਯਗਤਂ ਨਾਮਂ. ਏਵਂ ਸੇਸਾਨਮ੍ਪਿ.

ਦਸੇਤੇਤਿ ਏਤੇ ਸਮਾਨਾਦਿਕਾ ਮਹਾਪਾਰਗਪਰਿਯੋਸਾਨਾ ਦਸ ਦੇਵਕਾਯਾ. ਤੇਨੇਵ ਨਿਕਾਯਭੇਦੇਨ ਦਸਧਾ ਆਗਤਾ.

ਸੁਕ੍ਕਾਦਯੋ ਤਯੋ ਦੇਵਕਾਯਾ. ਪਾਮੋਕ੍ਖਦੇਵਾਤਿ ਪਮੁਖਾ ਪਧਾਨਭੂਤਾ ਦੇਵਾ.

ਦਿਸਾਤਿ ਦਿਸਾਸੁ. ਦੇਵੋਤਿ ਮੇਘੋ. ਦਸੇਤੇਤਿ ਏਤੇ ਸੁਕ੍ਕਾਦਯੋ ਪਜ੍ਜੁਨ੍ਨਪਰਿਯੋਸਾਨਾ ਦਸ ਦੇਵਕਾਯਾ, ਤੇ ਦੇਵਨਿਕਾਯਭੇਦੇਨ ਦਸਧਾ ਆਗਤਾ.

ਦਸੇਤੇਤਿ ਏਤੇ ਖੇਮਿਯਾਦਯੋ ਪਰਨਿਮ੍ਮਿਤਪਰਿਯੋਸਾਨਾ ਦਸ ਦੇਵਕਾਯਾ, ਤੇ ਦੇਵਨਿਕਾਯਭੇਦੇਨ ਦਸਧਾਵ ਆਗਤਾ. ਤਤ੍ਥ ‘‘ਖੇਮਿਯਾ, ਕਟ੍ਠਕਾਦਯੋ ਚ ਪਞ੍ਚਾਪਿ ਸਦੇਵਕਾਯਾ ਤਾਵਤਿਂਸਕਾਯਿਕਾ’’ਤਿ ਵਦਨ੍ਤਿ. ਨਾਮਨ੍ਵਯੇਨਾਤਿ ਨਾਮਾਨੁਗਮੇਨ ‘‘ਆਪੋਦੇਵਤਾ’’ਤਿਆਦਿਨਾਮਸਭਾਗੇਨ. ਤੇਨੇਵਾਹ ‘‘ਨਾਮਭਾਗੇਨ ਨਾਮਕੋਟ੍ਠਾਸੇਨਾ’’ਤਿ. ਸਬ੍ਬਾ ਦੇਵਤਾਤਿ ਦਸਸਹਸ੍ਸਿਲੋਕਧਾਤੂਸੁ ਸਬ੍ਬਾਪਿ ਦੇਵਤਾ. ਨਿਦ੍ਦਿਸਤਿ ਤਂਤਂਨਾਮਸਭਾਗੇਨ ਏਕਜ੍ਝਂ ਕਤ੍ਵਾ.

ਪਵੁਤ੍ਥਾਤਿ ਪਵਾਸਂ ਗਤਾ ਵਿਯ ਅਪੇਤਾਤਿ ਆਹ ‘‘ਵਿਗਤਾ’’ਤਿ. ਪਵੁਤ੍ਥਾ ਵਾ ਪਕਾਰਤੋ ਵੁਤ੍ਥਾ ਵੁਸਿਤਾ, ਤੇਨ ਜਾਤਿ ਵੁਸਿਤਬ੍ਬਾ ਅਸ੍ਸਾਤਿ ਪਵੁਟ੍ਠਜਾਤਿ. ਕਾਲ਼ਕਭਾਵਾ ਸਂਕਿਲੇਸਧਮ੍ਮਾ, ਸਬ੍ਬਸੋ ਤਦਭਾਵਤੋ ਕਾਲ਼ਕਭਾਵਾਤੀਤਂ ਦਸਬਲਂ. ਲਞ੍ਚਨਾਭਾਵੇਨ ਵਾ ਅਸਿਤਾਤਿਗੋ ਕਾਲ਼ਕਭਾਵਾਤੀਤਾਯ ਸਿਰਿਯਾ ਚਨ੍ਦੋ, ਤਾਦਿਸਂ ਚਨ੍ਦਂ ਵਿਯ ਸਿਰਿਯਾ ਵਿਰੋਚਮਾਨਂ.

੩੪੧. ਏਕੋ ਬ੍ਰਹ੍ਮਾਤਿ ਸਗਾਥਕਵਗ੍ਗੇ (ਸਂ. ਨਿ. ੧.੯੮) ਆਗਤੋ ਸੁਬ੍ਰਹ੍ਮਦੇਵਪੁਤ੍ਤੋ. ਬ੍ਰਹ੍ਮਲੋਕੇ ਨਿਬ੍ਬਤ੍ਤਿਤ੍ਵਾ ਹੇਟ੍ਠਿਮੇਸੁ ਪਤਿਟ੍ਠਿਤਾ ਅਰਿਯਬ੍ਰਹ੍ਮਾਨੋ, ਨ ਸੁਦ੍ਧਾਵਾਸਬ੍ਰਹ੍ਮਾਨੋ. ਤਿਸ੍ਸਮਹਾਬ੍ਰਹ੍ਮਾ ਪੁਥੁਜ੍ਜਨੋ, ਯੋ ਅਪਰਭਾਗੇ ਮਨੁਸ੍ਸੇਸੁ ਨਿਬ੍ਬਤ੍ਤਿਤ੍ਵਾ ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਜਾਤੋ.

ਸਹਸ੍ਸਂ ਬ੍ਰਹ੍ਮਲੋਕਾਨਨ੍ਤਿ ਬ੍ਰਹ੍ਮਲੋਕੋ ਏਤੇਸਨ੍ਤਿ ਬ੍ਰਹ੍ਮਲੋਕਾ, ਬ੍ਰਹ੍ਮਾਨੋ, ਤੇਸਂ ਬ੍ਰਹ੍ਮਲੋਕਾਨਂ ਸਹਸ੍ਸਂ ਸਤ੍ਤਲੋਕਪਰਿਯਾਯੋ ਚਾਯਂ ਲੋਕਸਦ੍ਦੋਤਿ ਆਹ ‘‘ਮਹਾਬ੍ਰਹ੍ਮਾਨਂ ਸਹਸ੍ਸਂ ਆਗਤ’’ਨ੍ਤਿ. ਅਨਨ੍ਤਰਗਾਥਾਯਂ ‘‘ਆਗਤਾ’’ਤਿ ਵੁਤ੍ਤਪਦਮੇਵ ਅਤ੍ਥਵਸੇਨ ਵਦਤਿ. ਯਤ੍ਥਾਤਿ ਯਸ੍ਮਿਂ ਬ੍ਰਹ੍ਮਸਹਸ੍ਸੇ. ਅਞ੍ਞੇ ਬ੍ਰਹ੍ਮੇਤਿ ਤਦਞ੍ਞੇ ਬ੍ਰਹ੍ਮਾਨੋ. ਅਭਿਭਵਿਤ੍ਵਾ ਤਿਟ੍ਠਤਿ ਵਣ੍ਣੇਨ, ਯਸਸਾ ਆਯੁਨਾ ਚ.

ਇਸ੍ਸਰਾਤਿ ਤੇਨੇਵ ਵਸਪਵਤ੍ਤਨੇਨ ਸੇਸਬ੍ਰਹ੍ਮਾਨਂ ਅਧਿਪਤਿਨੋ.

੩੪੨. ਕਾਲ਼ਕਧਮ੍ਮਸਮਨ੍ਨਾਗਤੋ ਕਾਲ਼ਕਸ੍ਸ ਪਾਪਿਮਸ੍ਸ ਮਾਰਸ੍ਸ ਬਾਲਭਾਵਂ ਪਸ੍ਸਥ, ਯੋ ਅਤ੍ਤਨੋ ਅਵਿਸਯੇ ਨਿਰਤ੍ਥਕਂ ਪਰਕ੍ਕਮਿਤੁਂ ਵਾਯਮਤਿ.

ਵੀਤਰਾਗਭਾਵਾਵਹਸ੍ਸ ਧਮ੍ਮਸ੍ਸਵਨਸ੍ਸ ਅਨ੍ਤਰਾਯਕਰਣੇਨ ਅਵੀਤਰਾਗਾ ਰਾਗੇਨ ਬਦ੍ਧਾ ਏਵ ਨਾਮ ਹੋਨ੍ਤੀਤਿ ਵੁਤ੍ਤਂ ‘‘ਰਾਗੇਨ ਬਦ੍ਧਂ ਹੋਤੂ’’ਤਿ.

ਭਯਾਨਕਂ ਸਰਞ੍ਚ ਕਤ੍ਵਾਤਿ ਭੇਰਵਂ ਮਹਨ੍ਤਂ ਸਦ੍ਦਂ ਸਮੁਟ੍ਠਪੇਤ੍ਵਾ.

ਇਦਾਨਿ ਤਂ ਸਦ੍ਦਂ ਉਪਮਾਯ ਦਸ੍ਸੇਨ੍ਤੋ ‘‘ਯਥਾ’’ਤਿ ਆਦਿਮਾਹ. ਕਞ੍ਚੀਤਿ ਤਸ੍ਮਿਂ ਸਮਾਗਮੇ ਕਞ੍ਚਿ ਦੇਵਤਂ, ਮਾਨੁਸਕਂ ਵਾ ਅਤ੍ਤਨੋ ਵਸੇ ਵਤ੍ਤੇਤੁਂ ਅਸਕ੍ਕੋਨ੍ਤੋ ਅਸਯਂਵਸੇ ਸਯਞ੍ਚ ਨ ਅਤ੍ਤਨੋ ਵਸੇ ਠਿਤੋ. ਤੇਨਾਹ ‘‘ਅਸਯਂਵਸੀ’’ਤਿਆਦਿ.

੩੪੩. ‘‘ਵੀਤਰਾਗੇਹੀ’’ਤਿ ਦੇਸਨਾਸੀਸਮੇਤਂ. ਸਬ੍ਬਾਯਪਿ ਹਿ ਤਤ੍ਥ ਸਮਾਗਤਪਰਿਸਾਯ ਮਾਰਸੇਨਾ ਅਪਕ੍ਕਨ੍ਤਾਵ. ਨੇਸਂ ਲੋਮਮ੍ਪਿ ਇਞ੍ਜਯੁਂ ਤੇਸਂ ਲੋਮਮਤ੍ਤਮ੍ਪਿ ਨ ਚਾਲੇਸੁਂ, ਕੁਤੋ ਅਨ੍ਤਰਾਯਕਰਣਂ. ਇਤਿ ਯਤ੍ਤਕਾ ਤਤ੍ਥ ਵਿਸੇਸਂ ਅਧਿਗਚ੍ਛਿਂਸੁ, ਤੇਸਂ ਸਬ੍ਬੇਸਮ੍ਪਿ ਅਨ੍ਤਰਾਯਾਕਰਣਵਸੇਨ ਅਤ੍ਥੋ ਵਿਭਾਵੇਤਬ੍ਬੋ, ਵੀਤਰਾਗਗ੍ਗਹਣੇਨ ਵਾ ਸਰਾਗਵੀਤਰਾਗਵਿਭਾਵਿਨੋ ਚ ਤਤ੍ਥ ਸਙ੍ਗਹਿਤਾਤਿ ਵੇਦਿਤਬ੍ਬਂ. ਮਾਰੋ ਇਮਂ ਗਾਥਂ ਅਭਾਸਿ ਅਚ੍ਛਰਿਯਬ੍ਭੁਤਚਿਤ੍ਤਜਾਤੋ. ਕਥਞ੍ਹਿ ਨਾਮ ਤਾਵ ਘੋਰਤਰਂ ਮਹਤਿਂ ਵਿਭਿਂਸਕਂ ਮਯਿ ਕਰੋਨ੍ਤੇਪਿ ਸਬ੍ਬੇ ਪਿਮੇ ਨਿਬ੍ਬਿਕਾਰਾ ਸਮਾਹਿਤਾ ਏਵ. ਕਸ੍ਮਾ? ਵਿਜਿਤਾਵਿਨੋ ਇਮੇ ਉਤ੍ਤਮਪੁਰਿਸਾਤਿ. ਤੇਨਾਹ ‘‘ਸਬ੍ਬੇ’’ਤਿਆਦਿ. ਯਾਦਿਸੋ ਅਰਿਯਾਨਂ ਧਮ੍ਮਨਿਸ੍ਸਿਤੋ ਪਮੋਦੋ, ਨ ਕਦਾਚਿ ਤਾਦਿਸੋ ਅਨਰਿਯਾਨਂ ਹੋਤੀਤਿ ‘‘ਸਾਸਨੇ ਭੂਤੇਹਿ ਅਰਿਯੇਹਿ’’ ਇਚ੍ਚੇਤਂ ਵੁਤ੍ਤਂ. ਵਿ-ਸਦ੍ਦੇਨ ਵਿਨਾ ਕੇਵਲੋਪਿ ਸੁਤ-ਸਦ੍ਦੋ ਵਿਖ੍ਯਾਤਤ੍ਥਵਚਨੋ ਹੋਤਿ ‘‘ਸੁਤਧਮ੍ਮਸ੍ਸਾ’’ਤਿਆਦੀਸੁ (ਮਹਾਵ. ੫; ਉਦਾ. ੧੧) ਵਿਯਾਤਿ ਆਹ ‘‘ਜਨੇ ਵਿਸ੍ਸੁਤਾ’’ਤਿ.

ਦੂਰੇਤਿ ਦੂਰੇ ਪਦੇਸੇ. ਦਹਰਸ੍ਸ ਅਨ੍ਤਰਾਯਂ ਪਰਿਹਰਨ੍ਤੀ ‘‘ਨ ਸਕ੍ਕਾ ਭਨ੍ਤੇ ਸਕਲਂ ਕਾਯਂ ਦਸ੍ਸੇਤੁ’’ਨ੍ਤਿ ਅਵੋਚਾਤਿ.

ਮਹਾਸਮਯਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ.