੬. ਮਹਾਗੋਵਿਨ੍ਦਸੁਤ੍ਤਵਣ੍ਣਨਾ
੨੯੩. ਪਞ੍ਚਕੁਣ੍ਡਲਿਕੋਤਿ ਵਿਸ੍ਸਟ੍ਠਪਞ੍ਚਵੇਣਿਕੋ. ਚਤੁਮਗ੍ਗਟ੍ਠਾਨੇਸੂਤਿ ਚਤੁਨ੍ਨਂ ਮਗ੍ਗਾਨਂ ਵਿਨਿਵਿਜ੍ਝਿਤ੍ਵਾ ਗਤਟ੍ਠਾਨੇਸੁ. ਤਤ੍ਥ ਹਿ ਕਤਾ ਸਾਲਾਦਯੋ ਚਤੂਹਿ ਦਿਸਾਹਿ ਆਗਤਮਨੁਸ੍ਸਾਨਂ ਉਪਭੋਗਕ੍ਖਮਾ ਹੋਨ੍ਤਿ. ‘‘ਏਵਰੂਪਾਨੀ’’ਤਿ ਇਮਿਨਾ ਰੁਕ੍ਖਮੂਲਸੋਧਨਾਦੀਨਿ ਚੇਵ ਯਥਾਸਤ੍ਤਿ ਅਨ੍ਨਦਾਨਾਦੀਨਿ ਚ ਪੁਞ੍ਞਾਨਿ ਸਙ੍ਗਣ੍ਹਾਤਿ. ‘‘ਸੁਵਣ੍ਣਕ੍ਖਨ੍ਧਸਦਿਸੋ ਅਤ੍ਤਭਾਵੋ ਇਟ੍ਠੋ ਕਨ੍ਤੋ ਮਨਾਪੋ ਅਹੋਸੀ’’ਤਿ ਪਾਠੋ. ਸਕਟਸਹਸ੍ਸਮਤ੍ਤਨ੍ਤਿ ਵਾਹਸਹਸ੍ਸਮਤ੍ਤਂ, ਵਾਹੋ ਪਨ ਵੀਸਤਿ ਖਾਰੀ, ਖਾਰੀ ਸੋਲ਼ਸਦੋਣਮਤ੍ਤਾ, ਦੋਣਂ ਸੋਲ਼ਸ ਨਾਲ਼ਿਯੋ ਵੇਦਿਤਬ੍ਬਾ. ਕੁਮ੍ਭਂ ਦਸਮ੍ਬਣਾਨਿ. ‘‘ਸਹਸ੍ਸਨਾਲ਼ਿਯੋ’’ਤਿ ਕੇਚਿ. ਰਤ੍ਤਸੁਵਣ੍ਣਕਣ੍ਣਿਕਨ੍ਤਿ ਰਤ੍ਤਸੁਵਣ੍ਣਮਯਂ ਵਟਂਸਕਂ.
ਯਸ੍ਮਾ ਮਜ੍ਝਿਮਯਾਮੇ ਏਵ ਦੇਵਤਾ ਸਤ੍ਥਾਰਂ ਉਪਸਙ੍ਕਮਿਤੁਂ ਅਵਸਰਂ ਲਭਨ੍ਤਿ, ਤਸ੍ਮਾ ‘‘ਏਕਕੋਟ੍ਠਾਸਂ ਅਤੀਤਾਯਾ’’ਤਿ ਵੁਤ੍ਤਂ. ਅਤਿਕ੍ਕਨ੍ਤਵਣ੍ਣੋਤਿ ਅਤਿਵਿਯ ਕਮਨੀਯਰੂਪੋ, ਕੇਵਲਕਪ੍ਪਨ੍ਤਿ ਵਾ ਮਨਂ ਊਨਂ ਅਵਸੇਸਂ, ਈਸਕਂ ਅਸਮਤ੍ਤਨ੍ਤਿ ਅਤ੍ਥੋ ਭਗਵਤੋ ਹਿ ਸਮੀਪਟ੍ਠਾਨਂ ਮੁਞ੍ਚਿਤ੍ਵਾ ਸਬ੍ਬੋ ਗਿਜ੍ਝਕੂਟਵਿਹਾਰੋ ਤੇਨ ਓਭਾਸਿਤੋ. ਤੇਨਾਹ ‘‘ਚਨ੍ਦਿਮਾ ਵਿਯਾ’’ਤਿਆਦਿ.
ਦੇਵਸਭਾਵਣ੍ਣਨਾ
੨੯੪. ਰਤਨਮਤ੍ਤਕਣ੍ਣਿਕਰੁਕ੍ਖਨਿਸ੍ਸਨ੍ਦੇਨਾਤਿ ਰਤਨਪ੍ਪਮਾਣਰੁਕ੍ਖਮਯਕੂਟਦਾਨਪੁਞ੍ਞਨਿਸ੍ਸਨ੍ਦੇਨ, ਤਸ੍ਸ ਵਾ ਪੁਞ੍ਞਸ੍ਸ ਨਿਸ੍ਸਨ੍ਦਫਲਭਾਵੇਨ. ਨਿਬ੍ਬਤ੍ਤਸਭਾਯਨ੍ਤਿ ਸਮੁਟ੍ਠਿਤਉਪਟ੍ਠਾਨਸਾਲਾਯਂ. ਮਣਿਮਯਾਤਿ ਪਦੁਮਰਾਗਾਦਿਮਣਿਮਯਾ. ਆਣਿਯੋਤਿ ਥਮ੍ਭਤੁਲਾਸਙ੍ਘਾਟਕਾਦੀਸੁ ਵਾਲ਼ਰੂਪਾਦਿਸਙ੍ਘਾਟਨਕਆਣਿਯੋ.
ਗਨ੍ਧਬ੍ਬਰਾਜਾਤਿ ਗਨ੍ਧਬ੍ਬਕਾਯਿਕਾਨਂ ਦੇਵਤਾਨਂ ਰਾਜਾ. ਯੇ ਤਾਵਤਿਂਸਾਨਂ ਆਸਨ੍ਨਵਾਸਿਨੋ ਚਾਤੁਮਹਾਰਾਜਿਕਾ ਦੇਵਾ, ਤੇ ਪੁਰਤੋ ਕਰੋਨ੍ਤੋ ‘‘ਦ੍ਵੀਸੁ ਦੇਵਲੋਕੇਸੁ ਦੇਵਤਾ ਪੁਰਤੋ ਕਤ੍ਵਾ ਨਿਸਿਨ੍ਨੋ’’ਤਿ ਵੁਤ੍ਤੋ. ਸੇਸੇਸੁਪਿ ਤੀਸੁ ਠਾਨੇਸੁ ਏਸੇਵ ਨਯੋ.
ਨਾਗਰਾਜਾਤਿ ਨਾਗਾਨਂ ਅਧਿਪਤਿ, ਨ ਪਨ ਸਯਂ ਨਾਗਜਾਤਿਕੋ.
ਆਸਤਿ ਨਿਸੀਦਤਿ ਏਤ੍ਥਾਤਿ ਆਸਨਂ, ਨਿਸਜ੍ਜਟ੍ਠਾਨਨ੍ਤਿ ਆਹ ‘‘ਨਿਸੀਦਿਤੁਂ ਓਕਾਸੋ’’ਤਿ. ‘‘ਏਤ੍ਥਾ’’ਤਿ ਪਦਂ ਨਿਪਾਤਮਤ੍ਤਂ, ਏਤ੍ਥਾਤਿ ਵਾ ਏਤਸ੍ਮਿਂ ਪਾਠੇ. ਅਤ੍ਥੁਦ੍ਧਾਰਨਯੇਨ ਵਤ੍ਤਬ੍ਬਂ ਪੁਬ੍ਬੇ ਵੁਤ੍ਤਂ ਚਤੁਬ੍ਬਿਧਮੇਵ. ਤਾਵਤਿਂਸਾ, ਏਕਚ੍ਚੇ ਚ ਚਾਤੁਮਹਾਰਾਜਿਕਾ ਯਥਾਲਦ੍ਧਾਯ ਸਮ੍ਪਤ੍ਤਿਯਾ ਥਾਵਰਭਾਵਾਯ, ਆਯਤਿਂ ਸੋਧਨਾਯ ਚ ਪਞ੍ਚ ਸੀਲਾਨਿ ਰਕ੍ਖਨ੍ਤਿ, ਤੇ ਤਸ੍ਸ ਵਿਸੋਧਨਤ੍ਥਂ ਪਵਾਰਣਾਸਙ੍ਗਹਂ ਕਰੋਨ੍ਤਿ. ਤੇਨ ਵੁਤ੍ਤਂ ‘‘ਮਹਾਪਵਾਰਣਾਯਾ’’ਤਿਆਦਿ.
ਵਸ੍ਸਸਹਸ੍ਸਨ੍ਤਿ ਮਨੁਸ੍ਸਗਣਨਾਯ ਵਸ੍ਸਸਹਸ੍ਸਂ.
ਪਨ੍ਨਪਲਾਸੋਤਿ ਪਤਿਤਪਤ੍ਤੋ. ਖਾਰਕਜਾਤੋਤਿ ਜਾਤਖੁਦ੍ਦਕਮਕੁਲ਼ੋ. ਯੇ ਹਿ ਨੀਲਪਤ੍ਤਕਾ ਅਤਿਵਿਯ ਖੁਦ੍ਦਕਾ ਮਕੁਲ਼ਾ, ਤੇ ‘‘ਖਾਰਕਾ’’ਤਿ ਵੁਚ੍ਚਨ੍ਤਿ. ਜਾਲਕਜਾਤੋਤਿ ਤੇਹਿਯੇਵ ਖੁਦ੍ਦਕਮਕੁਲ਼ੇਹਿ ਜਾਤਜਾਲਕੋ ਸਬ੍ਬਸੋ ਜਾਲੋ ਵਿਯ ਜਾਤੋ. ਕੇਚਿ ਪਨ ‘‘ਜਾਲਕਜਾਤੋਤਿ ਏਕਜਾਲੋ ਵਿਯ ਜਾਤੋ’’ਤਿ ਅਤ੍ਥਂ ਵਦਨ੍ਤਿ. ਪਾਰਿਛਤ੍ਤਕੋ ਕਿਰ ਖਾਰਕਗ੍ਗਹਣਕਾਲੇ ਸਬ੍ਬਤ੍ਥਕਮੇਵ ਪਲ੍ਲਵਿਕੋ ਹੋਤਿ, ਤੇ ਚਸ੍ਸ ਪਲ੍ਲਵਾ ਪਭਸ੍ਸਰਪਵਾਲ਼ਵਣ੍ਣਸਮੁਜ੍ਜਲਾ ਹੋਨ੍ਤਿ, ਤੇਨ ਸੋ ਸਬ੍ਬਸੋ ਸਮੁਜ੍ਜਲਨ੍ਤੋ ਤਿਟ੍ਠਤਿ. ਕੁਟੁਮਲਕਜਾਤੋਤਿ ਸਞ੍ਜਾਤਮਹਾਮਕੁਲ਼ੋ. ਕੋਰਕਜਾਤੋਤਿ ਸਞ੍ਜਾਤਸੂਚਿਭੇਦੋ ਸਮ੍ਪਤਿ ਵਿਕਸਮਾਨਾਵਤ੍ਥੋ. ਸਬ੍ਬਪਾਲਿਫੁਲ੍ਲੋਤਿ ਸਬ੍ਬਸੋ ਫੁਲ੍ਲਿਤਵਿਕਸਿਤੋ.
ਕਨ੍ਤਨਕਵਾਤੋਤਿ ਦੇਵਾਨਂ ਪੁਞ੍ਞਕਮ੍ਮਪਚ੍ਚਯਾ ਪੁਪ੍ਫਾਨਂ ਛਿਨ੍ਦਨਕਵਾਤੋ. ਕਨ੍ਤਤੀਤਿ ਛਿਨ੍ਦਤਿ. ਸਮ੍ਪਟਿਚ੍ਛਨਕਵਾਤੋਤਿ ਛਿਨ੍ਨਾਨਂ ਛਿਨ੍ਨਾਨਂ ਪੁਪ੍ਫਾਨਂ ਸਮ੍ਪਟਿਗ੍ਗਣ੍ਹਨਕਵਾਤੋ. ਨਚ੍ਚਨ੍ਤੋਤਿ ਨਾਨਾਵਿਧਭਤ੍ਤਿਂ ਸਨ੍ਨਿਵੇਸਵਸੇਨ ਨਚ੍ਚਨਂ ਕਰੋਨ੍ਤੋ. ਅਞ੍ਞਤਰਦੇਵਤਾਨਨ੍ਤਿ ਨਾਮਗੋਤ੍ਤਵਸੇਨ ਅਪ੍ਪਞ੍ਞਾਤਦੇਵਤਾਨਂ.
ਰੇਣੁਵਟ੍ਟੀਤਿ ਰੇਣੁਸਙ੍ਘਾਤੋ. ਕਣ੍ਣਿਕਂ ਆਹਚ੍ਚਾਤਿ ਸੁਧਮ੍ਮਾਯ ਕੂਟਂ ਆਹਨ੍ਤ੍ਵਾ.
ਅਟ੍ਠ ਦਿਵਸੇਤਿ ਪਞ੍ਚਮਿਯਾ ਸਦ੍ਧਿਂ ਪਕ੍ਖੇ ਚਤ੍ਤਾਰੋ ਦਿਵਸੇ ਸਨ੍ਧਾਯ ਵੁਤ੍ਤਂ. ਯਥਾਵੁਤ੍ਤੇਸੁ ਅਟ੍ਠਸੁ ਦਿਵਸੇਸੁ ਧਮ੍ਮਸ੍ਸਵਨਂ ਨਿਬਦ੍ਧਂ ਤਦਾ ਪਵਤ੍ਤਤੀਤਿ ਤਤੋ ਅਞ੍ਞਦਾ ਕਾਰਿਤਂ ਸਨ੍ਧਾਯਾਹ ‘‘ਅਕਾਲਧਮ੍ਮਸ੍ਸਵਨਂ ਕਾਰਿਤ’’ਨ੍ਤਿ. ਚੇਤਿਯੇ ਛਤ੍ਤਸ੍ਸ ਹੇਟ੍ਠਾ ਕਾਤਬ੍ਬਵੇਦਿਕਾ ਛਤ੍ਤਵੇਦਿਕਾ. ਚੇਤਿਯਂ ਪਰਿਕ੍ਖਿਪਿਤ੍ਵਾ ਪਦਕ੍ਖਿਣਕਰਣਟ੍ਠਾਨਂ ਅਨ੍ਤੋਕਤ੍ਵਾ ਕਾਤਬ੍ਬਵੇਦਿਕਾ ਪੁਟਵੇਦਿਕਾ. ਚੇਤਿਯਸ੍ਸ ਕੁਚ੍ਛਿਂ ਪਰਿਕ੍ਖਿਪਿਤ੍ਵਾ ਤਂ ਸਮ੍ਬਨ੍ਧਮੇਵ ਕਤ੍ਵਾ ਕਾਤਬ੍ਬਵੇਦਿਕਾ ਕੁਚ੍ਛਿਵੇਦਿਕਾ. ਸੀਹਰੂਪਪਾਦਕਂ ਆਸਨਂ ਸੀਹਾਸਨਂ. ਉਭੋਸੁ ਪਸ੍ਸੇਸੁ ਸੀਹਰੂਪਯੁਤ੍ਤਂ ਸੋਪਾਨਂ ਸੀਹਸੋਪਾਨਂ.
ਅਤ੍ਤਮਨਾ ਹੋਨ੍ਤਿ ਅਨਿਯਾਮਨਕਭਾਵਤੋ. ਤੇਨੇਵਾਹ ‘‘ਮਹਾਪੁਞ੍ਞੇ ਪੁਰਕ੍ਖਤ੍ਵਾ’’ਤਿਆਦਿ. ਪਵਾਰਣਾਸਙ੍ਗਹਤ੍ਥਾਯ ਸਨ੍ਨਿਪਤਿਤਾਤਿ ਵੇਦਿਤਬ੍ਬਾ ‘‘ਤਦਹੁਪੋਸਥੇ ਪਨ੍ਨਰਸੇ ਪਵਾਰਣਾਯ ਪੁਣ੍ਣਾਯ ਪੁਣ੍ਣਮਾਯ ਰਤ੍ਤਿਯਾ’’ਤਿ (ਦੀ. ਨਿ. ੨.੨੯੪) ਵਚਨਤੋ.
੨੯੫. ਨਵਹਿ ਕਾਰਣੇਹੀਤਿ ‘‘ਇਤਿਪਿ ਸੋ ਭਗਵਾ ਅਰਹ’’ਨ੍ਤਿਆਦਿਨਾ (ਦੀ. ਨਿ. ੧.੧੫੭, ੨੫੫) ਵੁਤ੍ਤੇਹਿ ਅਰਹਤ੍ਤਾਦੀਹਿ ਨਵਹਿ ਬੁਦ੍ਧਾਨੁਭਾਵਦੀਪਨੇਹਿ ਕਾਰਣੇਹਿ. ਧਮ੍ਮਸ੍ਸ ਚਾਤਿ ਏਤ੍ਥ ਚ-ਸਦ੍ਦੋ ਅਵੁਤ੍ਤਸਮੁਚ੍ਚਯਤ੍ਥੋਤਿ ਤੇਨ ਸਮ੍ਪਿਣ੍ਡਿਤਮਤ੍ਥਂ ਦਸ੍ਸੇਨ੍ਤੋ ‘‘ਉਜੁਪ੍ਪਟਿਪਨ੍ਨਤਾਦਿਭੇਦਂ ਸਙ੍ਘਸ੍ਸ ਚ ਸੁਪ੍ਪਟਿਪਤ੍ਤਿ’’ਨ੍ਤਿ ਆਹ.
ਅਟ੍ਠਯਥਾਭੁਚ੍ਚਵਣ੍ਣਨਾ
੨੯੬. ਯਥਾ ਅਨਨ੍ਤਮੇਵ ਆਨਞ੍ਚਂ, ਭਿਸਕ੍ਕਮੇਵ ਭੇਸਜ੍ਜਂ, ਏਵਂ ਯਥਾਭੂਤਾ ਏਵ ਯਥਾਭੁਚ੍ਚਾਤਿ ਪਾਲ਼ਿਯਂ ਵੁਤ੍ਤਨ੍ਤਿ ਆਹ ‘‘ਯਥਾਭੁਚ੍ਚੇਤਿ ਯਥਾਭੂਤੇ’’ਤਿ. ਵਣ੍ਣੇਤਬ੍ਬਤੋ ਕਿਤ੍ਤੇਤਬ੍ਬਤੋ ਵਣ੍ਣਾ, ਗੁਣਾ. ਕਥਂ ਪਟਿਪਨ੍ਨੋਤਿ ਹੇਤੁਅਵਤ੍ਥਾਯਂ, ਫਲਅਵਤ੍ਥਾਯਂ, ਸਤ੍ਤਾਨਂ ਉਪਕਾਰਾ ਵਤ੍ਥਾਯਨ੍ਤਿ ਤੀਸੁਪਿ ਅਵਤ੍ਥਾਸੁ ਲੋਕਨਾਥਸ੍ਸ ਬਹੁਜਨਹਿਤਾਯ ਪਟਿਪਤ੍ਤਿਯਾ ਕਥੇਤੁਕਮ੍ਯਤਾਪੁਚ੍ਛਾ. ਤਥਾ ਹਿ ਨਂ ਆਦਿਤੋ ਪਟ੍ਠਾਯ ਯਾਵ ਪਰਿਯੋਸਾਨਾ ਸਙ੍ਖੇਪੇਨੇਵ ਦਸ੍ਸੇਨ੍ਤੋ ‘‘ਦੀਪਙ੍ਕਰਪਾਦਮੂਲੇ’’ਤਿਆਦਿਮਾਹ. ਤਤ੍ਥ ਅਭਿਨੀਹਰਮਾਨੋਤਿ ਅਭਿਨੀਹਾਰਂ ਕਰੋਨ੍ਤੋ. ਯਂ ਪਨੇਤ੍ਥ ਮਹਾਭਿਨੀਹਾਰੇ, ਪਾਰਮੀਸੁ ਚ ਵਤ੍ਤਬ੍ਬਂ, ਤਂ ਬ੍ਰਹ੍ਮਜਾਲਟੀਕਾਯਂ (ਦੀ. ਨਿ. ਟੀ. ੧.੭) ਵੁਤ੍ਤਂ ਏਵਾਤਿ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.
‘‘ਖਨ੍ਤਿਵਾਦਿਤਾਪਸਕਾਲੇ’’ਤਿਆਦਿ (ਜਾ. ੧.ਖਨ੍ਤੀਵਾਦੀਜਾਤਕ) ਹੇਤੁਅਵਤ੍ਥਾਯਮੇਵ ਅਨਞ੍ਞਸਾਧਾਰਣਾਯ ਸੁਦੁਕ੍ਕਰਾਯ ਬਹੁਜਨਹਿਤਾਯ ਪਟਿਪਤ੍ਤਿਯਾ ਵਿਭਾਵਨਂ. ਯਥਾਧਿਪ੍ਪੇਤਂ ਹਿਤਸੁਖਂ ਯਾਯ ਕਿਰਿਯਾਯ ਵਿਨਾ ਨ ਇਜ੍ਝਤਿ, ਸਾਪਿ ਤਦਤ੍ਥਾ ਏਵਾਤਿ ਦਸ੍ਸੇਤੁਂ ‘‘ਤੁਸਿਤਪੁਰੇ ਯਾਵਤਾਯੁਕਂ ਤਿਟ੍ਠਨ੍ਤੋਪੀ’’ਤਿਆਦਿ ਵੁਤ੍ਤਂ.
ਧਮ੍ਮਚਕ੍ਕਪ੍ਪਵਤ੍ਤਨਾਦਿ (ਸਂ. ਨਿ. ੫.੧੦੮੧; ਮਹਾਵ. ੧੩; ਪਟਿ. ਮ. ੩.੩੦) ਪਨ ਨਿਬ੍ਬਤ੍ਤਿਤਾ ਬਹੁਜਨਹਿਤਾਯ ਪਟਿਪਤ੍ਤਿ. ਆਯੁਸਙ੍ਖਾਰੋਸ੍ਸਜ੍ਜਨਮ੍ਪਿ ‘‘ਏਤ੍ਤਕਂ ਕਾਲਂ ਤਿਟ੍ਠਾਮੀ’’ਤਿ ਪਵਤ੍ਤਿਯਾ ਬਹੁਜਨਹਿਤਾਯ ਪਟਿਪਤ੍ਤਿ. ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਨਵਸੇਨ ਬਹੁਜਨਹਿਤਾਯ ਪਟਿਪਤ੍ਤਿ. ਤੇਨਾਹ ‘‘ਯਾਵਸ੍ਸਾ’’ਤਿਆਦਿ. ਸੇਸਪਦਾਨੀਤਿ ‘‘ਬਹੁਜਨਸੁਖਾਯਾ’’ਤਿਆਦੀਨਿ ਪਦਾਨਿ. ਪਚ੍ਛਿਮਨ੍ਤਿ ‘‘ਅਤ੍ਥਾਯ ਹਿਤਾਯ ਸੁਖਾਯਾ’’ਤਿ ਪਦਤ੍ਤਯਂ. ਪੁਰਿਮਸ੍ਸਾਤਿ ਤਤੋ ਪੁਰਿਮਸ੍ਸ ਪਦਤ੍ਤਯਸ੍ਸ. ਅਤ੍ਥੋਤਿ ਅਤ੍ਥਨਿਦ੍ਦੇਸੋ.
ਯਦਿਪਿ ਅਤੀਤੇਨਙ੍ਗੇਨ ਸਮਨ੍ਨਾਗਤਾ ਸਤ੍ਥਾਰੋ ਅਹੇਸੁਂ, ਤੇਪਿ ਪਨ ਬੁਦ੍ਧਾ ਏਵਾਤਿ ਅਤ੍ਥਤੋ ਅਮ੍ਹਾਕਂ ਸਤ੍ਥਾ ਅਨਞ੍ਞੋਤਿ ਆਹ ‘‘ਅਤੀਤੇਪਿ ਬੁਦ੍ਧਤੋ ਅਞ੍ਞਂ ਨ ਸਮਨੁਪਸ੍ਸਾਮਾ’’ਤਿ. ਯਥਾ ਚ ਅਤੀਤੇ, ਏਵਂ ਅਨਾਗਤੇ ਚਾਤਿ ਅਯਮਤ੍ਥੋ ਨਯਤੋ ਲਬ੍ਭਤੀਤਿ ਕਤ੍ਵਾ ਵੁਤ੍ਤਂ ‘‘ਅਨਾਗਤੇਪਿ ਨ ਸਮਨੁਪਸ੍ਸਾਮਾ’’ਤਿ. ਸਕ੍ਕੋ ਪਨ ਦੇਵਰਾਜਾ ਤਮਤ੍ਥਂ ਅਤ੍ਥਾਪਨ੍ਨਮੇਵ ਕਤ੍ਵਾ ‘‘ਨ ਪਨੇਤਰਹਿ’’ ਇਚ੍ਚੇਵਾਹ. ਕਿਂ ਸਕ੍ਕੋ ਕਥੇਤੀਤਿ ਵਿਚਾਰੇਤ੍ਵਾਤਿ ‘‘ਨੇਵ ਅਤੀਤਂਸੇ ਸਮਨੁਪਸ੍ਸਮਾ’ਤਿ ਵਦਨ੍ਤੋ ਸਕ੍ਕੋ ਕਿਂ ਕਥੇਤੀ’’ਤਿ ਵਿਚਾਰਣਂ ਸਮੁਟ੍ਠਪੇਤ੍ਵਾ. ਯਸ੍ਮਾ ਅਤੀਤੇ ਬੁਦ੍ਧਾ ਅਹੇਸੁਂ, ਅਨਾਗਤੇ ਭਵਿਸ੍ਸਨ੍ਤੀਤਿ ਨਾਯਮਤ੍ਥੋ ਸਕ੍ਕੇਨ ਦੇਵਰਾਜੇਨ ਪਰਿਞ੍ਞਾਤੋ, ਤੇ ਪਨ ਬੁਦ੍ਧਸਾਮਞ੍ਞੇਨ ਅਮ੍ਹਾਕਂ ਭਗਵਤਾ ਸਦ੍ਧਿਂ ਗਹੇਤ੍ਵਾ ਏਤਰਹਿ ਅਞ੍ਞਸ੍ਸ ਸਬ੍ਬੇਨ ਸਬ੍ਬਂ ਅਭਾਵਤੋ ਤਥਾ ਵੁਤ੍ਤਨ੍ਤਿ ਦਸ੍ਸੇਤੁਂ ‘‘ਏਤਰਹੀ’’ਤਿਆਦਿ ਵੁਤ੍ਤਂ. ਸ੍ਵਾਕ੍ਖਾਤਾਦੀਨੀਤਿ ਸ੍ਵਾਕ੍ਖਾਤਪਦਾਦੀਨਿ. ਕੁਸਲਾਦੀਨੀਤਿ ‘‘ਇਦਂ ਕੁਸਲ’’ਨ੍ਤਿਆਦੀਨਿ ਪਦਾਨਿ.
ਗਙ੍ਗਾਯਮੁਨਾਨਂ ਅਸਮਾਗਮਟ੍ਠਾਨੇ ਉਦਕਂ ਭਿਨ੍ਨਵਣ੍ਣਂ ਹੋਨ੍ਤਮ੍ਪਿ ਸਮਾਗਮਟ੍ਠਾਨੇ ਅਭਿਨ੍ਨਵਣ੍ਣਂ ਏਵਾਤਿ ਆਹ ‘‘ਵਣ੍ਣੇਨਪਿ ਸਂਸਨ੍ਦਤਿ ਸਮੇਤੀ’’ਤਿ. ਤਤ੍ਥ ਕਿਰ ਗਙ੍ਗੋਦਕਸਦਿਸਮੇਵ ਯਮੁਨੋਦਕਂ. ਯਥਾ ਨਿਬ੍ਬਾਨਂ ਕੇਨਚਿ ਕਿਲੇਸੇਨ ਅਨੁਪਕ੍ਕਿਲਿਟ੍ਠਤਾਯ ਪਰਿਸੁਦ੍ਧਂ, ਏਵਂ ਨਿਬ੍ਬਾਨਗਾਮਿਨਿਪਟਿਪਦਾਪਿ ਕੇਨਚਿ ਕਿਲੇਸੇਨ ਅਨੁਪਕ੍ਕਿਲਿਟ੍ਠਤਾਯ ਪਰਿਸੁਦ੍ਧਾਵ ਇਚ੍ਛਿਤਬ੍ਬਾ. ਤੇਨਾਹ ‘‘ਨ ਹੀ’’ਤਿਆਦਿ. ਯੇਨ ਪਰਿਸੁਦ੍ਧਤ੍ਥੇਨ ਨਿਬ੍ਬਾਨਸ੍ਸ, ਨਿਬ੍ਬਾਨਗਾਮਿਨਿਯਾ ਪਟਿਪਦਾਯ ਚ ਆਕਾਸੂਪਮਤਾ, ਸੋ ਕੇਨਚਿ ਅਨੁਪਲੇਪੋ, ਅਨੁਪਕ੍ਕਿਲੇਸੋ ਚਾਤਿ ਆਹ ‘‘ਆਕਾਸਮ੍ਪਿ ਅਲਗ੍ਗਂ ਪਰਿਸੁਦ੍ਧ’’ਨ੍ਤਿ. ਇਦਾਨਿ ਤਮਤ੍ਥਂ ਨਿਦਸ੍ਸਨੇਨ ਵਿਭੂਤਂ ਕਤ੍ਵਾ ਦਸ੍ਸੇਤੁਂ ‘‘ਚਨ੍ਦਿਮਸੂਰਿਯਾਨ’’ਨ੍ਤਿਆਦਿ ਵੁਤ੍ਤਂ. ਸਂਸਨ੍ਦਤਿ ਯੁਜ੍ਜਤਿ ਪਟਿਪਜ੍ਜਿਤਬ੍ਬਤਾਪਟਿਪਜ੍ਜਨੇਹਿ ਅਞ੍ਞਮਞ੍ਞਾਨੁਚ੍ਛਵਿਕਤਾਯ.
ਪਟਿਪਦਾਯ ਠਿਤਾਨਨ੍ਤਿ ਪਟਿਪਦਂ ਮਗ੍ਗਪਟਿਪਤ੍ਤਿਂ ਪਟਿਪਜ੍ਜਮਾਨਾਨਂ. ਵੁਸਿਤਵਤਨ੍ਤਿ ਬ੍ਰਹ੍ਮਚਰਿਯਵਾਸਂ ਵੁਸਿਤਵਨ੍ਤਾਨਂ ਏਤੇਸਂ. ਲਦ੍ਧਸਹਾਯੋਤਿ ਏਤਾਸਂ ਪਟਿਪਦਾਨਂ ਵਸੇਨ ਲਦ੍ਧਸਹਾਯੋ. ਤਤ੍ਥ ਤਤ੍ਥ ਸਾਵਕੇਹਿ ਸਤ੍ਥੁ ਕਾਤਬ੍ਬਕਿਚ੍ਚੇ. ਇਦਂ ਪਨ ‘‘ਅਦੁਤਿਯੋ’’ਤਿਆਦਿ ਸੁਤ੍ਤਨ੍ਤਰੇ ਆਗਤਵਚਨਂ ਅਞ੍ਞੇਹਿ ਅਸਦਿਸਟ੍ਠੇਨ ਵੁਤ੍ਤਂ, ਨ ਯਥਾਵੁਤ੍ਤਸਹਾਯਾਭਾਵਤੋ. ਅਪਨੁਜ੍ਜਾਤਿ ਅਪਨੀਯ ਵਿਵਜ੍ਜੇਤ੍ਵਾ. ‘‘ਅਪਨੁਜ੍ਜਾ’’ਤਿ ਚ ਅਨ੍ਤੋਗਧਾਵਧਾਰਣਂ ਇਦਂ ਵਚਨਂ ਏਕਨ੍ਤਿਕਤ੍ਤਾ ਤਸ੍ਸ ਅਪਨੋਦਸ੍ਸਾਤਿ ਵੁਤ੍ਤਂ ‘‘ਅਪਨੁਜ੍ਜੇਵਾ’’ਤਿ.
ਲਬ੍ਭਤੀਤਿ ਲਾਭੋ, ਸੋ ਪਨ ਉਕ੍ਕਂਸਗਤਿਵਿਜਾਨਨੇਨ ਸਾਤਿਸਯੋ, ਵਿਪੁਲੋ ਏਵ ਚ ਇਧਾਧਿਪ੍ਪੇਤੋਤਿ ਆਹ ‘‘ਮਹਾਲਾਭੋ ਉਪ੍ਪਨ੍ਨੋ’’ਤਿ. ਉਸ੍ਸਨ੍ਨਪੁਞ੍ਞਨਿਸ੍ਸਨ੍ਦਸਮੁਪ੍ਪਨ੍ਨੋਤਿ ਯਥਾਵੁਤ੍ਤਕਾਲਂ ਸਮ੍ਭਤਸੁਵਿਪੁਲਉਲ਼ਾਰਤਰਪੁਞ੍ਞਾਭਿਸਨ੍ਦਤੋ ਨਿਬ੍ਬਤ੍ਤੋ.‘‘ਇਮੇ ਨਿਬ੍ਬਤ੍ਤਾ, ਇਤੋ ਪਰਂ ਮਯ੍ਹਂ ਓਕਾਸੋ ਨਤ੍ਥੀ’’ਤਿ ਉਸ੍ਸਾਹਜਾਤੋ ਵਿਯ ਉਪਰੂਪਰਿ ਵਡ੍ਢਮਾਨੋ ਉਦਪਾਦਿ. ਸਬ੍ਬਦਿਸਾਸੁ ਹਿ ਯਮਕਮਹਾਮੇਘੋ ਉਟ੍ਠਹਿਤ੍ਵਾ ਮਹਾਮੇਘਂ ਵਿਯ ਸਬ੍ਬਪਾਰਮਿਯੋ ‘‘ਏਕਸ੍ਮਿਂ ਅਤ੍ਤਭਾਵੇ ਵਿਪਾਕਂ ਦਸ੍ਸਾਮਾ’’ਤਿ ਸਮ੍ਪਿਣ੍ਡਿਤਾ ਵਿਯ ਭਗਵਤੋ ਇਦਂ ਲਾਭਸਕ੍ਕਾਰਸਿਲੋਕਂ ਨਿਬ੍ਬਤ੍ਤਯਿਂਸੁ, ਤਤੋ ਅਨ੍ਨਪਾਨਵਤ੍ਥਯਾਨਮਾਲਾਗਨ੍ਧਵਿਲੇਪਨਾਦਿਹਤ੍ਥਾ ਖਤ੍ਤਿਯਬ੍ਰਾਹ੍ਮਣਾਦਯੋ ਉਪਗਨ੍ਤ੍ਵਾ ‘‘ਕਹਂ ਬੁਦ੍ਧੋ, ਕਹਂ ਭਗਵਾ, ਕਹਂ ਦੇਵਦੇਵੋ, ਕਹਂ ਨਰਾਸਭੋ, ਕਹਂ ਪੁਰਿਸਸੀਹੋ’’ਤਿ ਭਗਵਨ੍ਤਂ ਪਰਿਯੇਸਨ੍ਤਿ, ਸਕਟਸਤੇਹਿਪਿ ਪਚ੍ਚਯੇ ਆਹਰਿਤ੍ਵਾ ਓਕਾਸਂ ਅਲਭਮਾਨਾ ਸਮਨ੍ਤਾ ਗਾਵੁਤਪ੍ਪਮਾਣਮ੍ਪਿ ਸਕਟਧੁਰੇਨ ਸਕਟਧੁਰਂ ਆਹਚ੍ਚ ਤਿਟ੍ਠਨ੍ਤਿ ਚੇਵ ਅਨੁਬਨ੍ਧਨ੍ਤਿ ਚ ਅਨ੍ਧਕਵਿਨ੍ਦਬ੍ਰਾਹ੍ਮਣਾਦਯੋ ਵਿਯ. ਸਬ੍ਬਂ ਖਨ੍ਧਕੇ, ਤੇਸੁ ਤੇਸੁ ਚ ਸੁਤ੍ਤੇਸੁ ਆਗਤਨਯੇਨ ਵੇਦਿਤਬ੍ਬਂ. ਤੇਨਾਹ ‘‘ਲਾਭਸਕ੍ਕਾਰੋ ਮਹੋਘੋ ਵਿਯਾ’’ਤਿਆਦਿ.
ਪਟਿਪਾਟਿਭਤ੍ਤਨ੍ਤਿ ਬਹੂਸੁ ‘‘ਦਾਨਂ ਦਸ੍ਸਾਮਾ’’ਤਿ ਆਹਟਪਟਿਪਾਟਿਕਾਯ ਉਟ੍ਠਿਤੇਸੁ ਅਨੁਪਟਿਪਾਟਿਯਾ ਦਾਤਬ੍ਬ ਭਤ੍ਤਂ.
ਮਤ੍ਥਕਂ ਪਤ੍ਤੋ ਅਨਞ੍ਞਸਾਧਾਰਣਤ੍ਤਾ ਤਸ੍ਸ ਦਾਨਸ੍ਸ. ਉਪਾਯਂ ਆਚਿਕ੍ਖਿ ਨਾਗਰਾਨਂ ਅਸਕ੍ਕੁਣੇਯ੍ਯਰੂਪੇਨ ਦਾਨਂ ਦਾਪੇਤੁਂ. ਸਾਲਕਲ੍ਯਾਣਿਰੁਕ੍ਖਾ ਰਾਜਪਰਿਗ੍ਗਹਾ ਅਞ੍ਞੇਹਿ ਅਸਾਧਾਰਣਾ, ਤਸ੍ਮਾ ਤੇਸਂ ਪਦਰੇਹਿ ਮਣ੍ਡਪੋ ਕਾਰਿਤੋ, ਹਤ੍ਥਿਨੋ ਚ ਰਾਜਭਣ੍ਡਭੂਤਾ ਨਾਗਰੇਹਿ ਨ ਸਕ੍ਕਾ ਲਦ੍ਧੁਨ੍ਤਿ ਤੇਹਿ ਛਤ੍ਤਂ ਧਾਰਾਪਿਤਂ, ਤਥਾ ਖਤ੍ਤਿਯਧੀਤਾਹਿ ਵੇਯ੍ਯਾਵਚ੍ਚਂ ਕਾਰਿਤਂ. ‘‘ਪਞ੍ਚ ਆਸਨਸਤਾਨੀ’’ਤਿ ਇਦਂ ਸਾਲਕਲ੍ਯਾਣਿਮਣ੍ਡਪੇ ਪਞ੍ਞਤ੍ਤੇ ਸਨ੍ਧਾਯ ਵੁਤ੍ਤਂ, ਤਤੋ ਬਹਿ ਪਨ ਬਹੂਨਿ ਪਞ੍ਞਤ੍ਤਾਨਿ ਅਹੇਸੁਂ. ਚਤੁਜ੍ਜਾਤਿਯਗਨ੍ਧਂ ਪਿਸਤਿ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਪੂਜਨਤ੍ਥਞ੍ਚੇਵ ਪਤ੍ਤਸ੍ਸ ਉਬ੍ਬਟਨਤ੍ਥਞ੍ਚ. ਉਦਕਨ੍ਤਿ ਪਤ੍ਤਧੋਵਨਉਦਕਂ. ਅਨਗ੍ਘਾਨਿ ਅਹੇਸੁਂ ਅਨਗ੍ਘਰਤਨਾਭਿਸਙ੍ਖਤਤ੍ਤਾ.
ਸਤ੍ਤਧਾ ਮੁਦ੍ਧਾ ਫਲਿਸ੍ਸਤਿ ਅਨਾਦਰਕਾਰਣਾਦਿਨਾ. ਕਾਲ਼ਂ ਓਲੋਕੇਸ੍ਸਾਮੀਤਿ ਕਾਲ਼ਂ ਏਵਂ ਅਨੁਪੇਕ੍ਖਿਸ੍ਸਾਮਿ, ਤਸ੍ਸ ਉਪ੍ਪਜ੍ਜਨਕਂ ਅਨਤ੍ਥਂ ਪਰਿਹਰਿਸ੍ਸਾਮੀਤਿ ਅਤ੍ਥੋ.
ਕਦਰਿਯਾਤਿ ਥਦ੍ਧਮਚ੍ਛਰਿਨੋ ਪੁਞ੍ਞਕਮ੍ਮਵਿਮੁਖਾ. ਦੇਵਲੋਕਂ ਨ ਵਜਨ੍ਤਿ ਪੁਞ੍ਞਸ੍ਸ ਅਕਤਤ੍ਤਾ, ਮਚ੍ਛਰਿਭਾਵੇਨ ਚ ਪਾਪਸ੍ਸ ਪਸੁਤਤ੍ਤਾ. ਬਾਲਾਤਿ ਦੁਚ੍ਚਿਨ੍ਤਿਤਚਿਨ੍ਤਨਾਦਿਨਾ ਬਾਲਲਕ੍ਖਣਯੁਤ੍ਤਾ. ਨਪ੍ਪਸਂਸਨ੍ਤਿ ਦਾਨਂ ਪਸਂਸਿਤੁਮ੍ਪਿ ਨ ਵਿਸਹਨ੍ਤਿ. ਧੀਰੋਤਿ ਧੀਤਿਸਮ੍ਪਨ੍ਨੋ ਉਲ਼ਾਰਪਞ੍ਞੋ ਪਰੇਹਿ ਕਤਂ ਦਾਨਂ ਅਨੁਮੋਦਮਾਨੋਪਿ, ਤੇਨੇਵ ਦਾਨਾਨੁਮੋਦਨੇਨੇਵ. ਸੁਖੀ ਪਰਤ੍ਥਾਤਿ ਪਰਲੋਕੇ ਕਾਯਿਕਚੇਤਸਿਕਸੁਖਸਮਙ੍ਗੀ ਹੋਤਿ.
ਵਰਰੋਜੋ ਨਾਮ ਤਸ੍ਮਿਂ ਕਾਲੇ ਏਕੋ ਖਤ੍ਤਿਯੋ, ਤਸ੍ਸ ਵਰਰੋਜਸ੍ਸ. ਅਨਵਜ੍ਜ…ਪੇ… ਫਲੇਯ੍ਯ ਅਭੂਤਵਾਦਿਭਾਵਤੋਤਿ ਅਧਿਪ੍ਪਾਯੋ. ਅਤਿਰੇਕਪਦਸਹਸ੍ਸੇਨ ਤਿਂਸਾਧਿਕੇਨ ਅਡ੍ਢਤੇਯ੍ਯਗਾਥਾਸਤੇਨ ਵਣ੍ਣਮੇਵ ਕਥੇਸਿ ਰੂਪਪ੍ਪਸਨ੍ਨਤਾਯ ਚ.
ਯਾਵ ਮਞ੍ਞੇ ਖਤ੍ਤਿਯਾਤਿ ਏਤ੍ਥ ਯਾਵਾਤਿ ਅਵਧਿਪਰਿਚ੍ਛੇਦਵਚਨਂ, ਅਞ੍ਞੇਤਿ ਨਿਪਾਤਮਤ੍ਤਂ, ਯਾਵ ਖਤ੍ਤਿਯਾ ਖਤ੍ਤਿਯੇ ਅਵਧਿਂ ਕਤ੍ਵਾ ਸਬ੍ਬੇ ਦੇਵਮਨੁਸ੍ਸਾਤਿ ਅਧਿਪ੍ਪਾਯੋ. ਤੇਨਾਹ ‘‘ਖਤ੍ਤਿਯਾ ਬ੍ਰਾਹ੍ਮਣਾ’’ਤਿਆਦਿ. ਮਦਪਮਤ੍ਤੋਤਿ ਲਾਭਸਕ੍ਕਾਰਸਿਲੋਕਮਦੇਨ ਪਮਤ੍ਤੋ ਚੇਵ ਤਦਨ੍ਵਯੇਨ ਪਮਾਦੇਨ ਪਮਤ੍ਤੋ ਚ ਹੁਤ੍ਵਾ.
ਤਦਨ੍ਵਯਮੇਵਾਤਿ ਤਦਨੁਗਤਮੇਵ. ਵਾਚਾ…ਪੇ… ਸਮੇਤੀਤਿ ਵਚੀਕਮ੍ਮਕਾਯਕਮ੍ਮਾਨਿ ਅਞ੍ਞਮਞ੍ਞਂ ਅਵਿਰੁਦ੍ਧਾਨਿ, ਅਞ੍ਞਦਤ੍ਥੁ ਸਂਸਨ੍ਦਨ੍ਤਿ. ਅਜਾ ਏਵ ਮਿਗਾਤਿ ਅਜਾਮਿਗਾ, ਤੇ ਅਜਾਮਿਗੇ.
ਤਿਣ੍ਣਵਿਚਿਕਿਚ੍ਛੋ ਸਬ੍ਬਸੋ ਅਤਿਕ੍ਕਨ੍ਤਵਿਚਿਕਿਚ੍ਛਾਕਨ੍ਤਾਰੋ. ਨਨੁ ਚ ਸਬ੍ਬੇਪਿ ਸੋਤਾਪਨ੍ਨਾ ਤਿਣ੍ਣਵਿਚਿਕਿਚ੍ਛਾ, ਵਿਗਤਕਥਂਕਥਾ ਚ? ਸਚ੍ਚਮੇਤਂ, ਇਦਂ ਪਨ ਨ ਤਾਦਿਸਂ ਤਿਣ੍ਣਵਿਚਿਕਿਚ੍ਛਤਂ ਸਨ੍ਧਾਯ ਵੁਤ੍ਤਂ, ਅਥ ਖੋ ਸਬ੍ਬਸ੍ਮਿਂ ਞੇਯ੍ਯਧਮ੍ਮੇ ਸਬ੍ਬਾਕਾਰਾਵਬੋਧਸਙ੍ਖਾਤਸਨ੍ਨਿਟ੍ਠਾਨਵਸੇਨ ਸਬ੍ਬਸੋ ਨਿਰਾਕਤਂ ਸਨ੍ਧਾਯਾਤਿ ਦਸ੍ਸੇਨ੍ਤੋ ‘‘ਯਥਾ ਹੀ’’ਤਿ ਆਦਿਮਾਹ. ਉਸ੍ਸਨ੍ਨੁਸ੍ਸਨ੍ਨਤ੍ਤਾਤਿ ਪਰੋਪਰਭਾਵਤੋ, ਅਯਞ੍ਚ ਅਤ੍ਥੋ ਭਗਵਤੋ ਅਨੇਕਧਾਤੁਨਾਨਾਧਾਤੁਞਾਣਬਲੇਨਪਿ ਇਜ੍ਝਤਿ. ਸਬ੍ਬਤ੍ਥ ਵਿਗਤਕਥਂਕਥੋ ਸਬ੍ਬਦਸ੍ਸਾਵਿਭਾਵਤੋ. ਸਬ੍ਬੇਸਂ ਪਰਮਤ੍ਥਧਮ੍ਮਾਨਂ ਸਚ੍ਚਾਭਿਸਮਯਵਸੇਨ ਪਟਿਵਿਦ੍ਧਤ੍ਤਾ ਵੁਤ੍ਤਂ ‘‘ਵੋਹਾਰਵਸੇਨਾ’’ਤਿ ਵਾ ਨਾਮਗੋਤ੍ਤਾਦਿਵਸੇਨਾਤਿ ਅਤ੍ਥੋ.
ਪਰਿਯੋਸਿਤਸਙ੍ਕਪ੍ਪੋਤਿ ਸਬ੍ਬਸੋ ਨਿਟ੍ਠਿਤਮਨੋਰਥੋ. ਨਨੁ ਚ ਅਰਿਯਮਗ੍ਗੇਨ ਪਰਿਯੋਸਿਤਸਙ੍ਕਪ੍ਪਤਾ ਨਾਮ ਸੋਲ਼ਸਕਿਚ੍ਚਸਿਦ੍ਧਿਯਾ ਕਤਕਰਣੀਯਭਾਵੇਨ, ਨ ਸਬ੍ਬਞੇਯ੍ਯਧਮ੍ਮਾਵਬੋਧੇਨਾਤਿ ਚੋਦਨਂ ਸਨ੍ਧਾਯਾਹ ‘‘ਪੁਬ੍ਬੇ ਅਨਨੁਸ੍ਸੁਤੇਸੂ’’ਤਿਆਦਿ. ਸਾਵਕਾਨਂ ਸਾਵਕਪਾਰਮਿਞਾਣਂ ਵਿਯ, ਹਿ ਪਚ੍ਚੇਕਬੁਦ੍ਧਾਨਂ ਪਚ੍ਚੇਕਬੋਧਿਞਾਣਂ ਵਿਯ ਚ ਸਮ੍ਮਾਸਮ੍ਬੁਦ੍ਧਾਨਂ ਸਬ੍ਬਞ੍ਞੁਤਞ੍ਞਾਣਂ ਚਤੁਸਚ੍ਚਾਭਿਸਮ੍ਬੋਧਪੁਬ੍ਬਕਮੇਵਾਤਿ. ਅਨਨੁਸ੍ਸੁਤੇਸੂਤਿ ਨ ਅਨੁਸ੍ਸੁਤੇਸੁ. ਸਾਮਨ੍ਤਿ ਸਯਮੇਵ. ਪਦਦ੍ਵਯੇਨਾਪਿ ਪਰਤੋ ਘੋਸੇਨ ਵਿਨਾਤਿ ਦਸ੍ਸੇਤਿ. ਤਤ੍ਥਾਤਿ ਨਿਮਿਤ੍ਤਤ੍ਥੇ ਭੁਮ੍ਮਂ, ਸਚ੍ਚਾਭਿਸਮ੍ਬੋਧਨਿਮਿਤ੍ਤਨ੍ਤਿ ਅਤ੍ਥੋ. ਸਚ੍ਚਾਭਿਸਮ੍ਬੋਧੋ ਚ ਅਗ੍ਗਮਗ੍ਗਵਸੇਨਾਤਿ ਦਟ੍ਠਬ੍ਬਂ. ਬਲੇਸੁ ਚ ਵਸੀਭਾਵਨ੍ਤਿ ਦਸਨ੍ਨਂ ਬਲਞਾਣਾਨਂ ਯਥਾਰੁਚਿ ਪਵਤ੍ਤਿ. ਜਾਤਤ੍ਤਾ ਜਾਤਾਤਿ ਸਮ੍ਮਾਸਮ੍ਬੁਦ੍ਧੇ ਵਦਤਿ.
੨੯੭. ਤਤ੍ਥ ਤਤ੍ਥ ਰਾਜਧਾਨਿਆਦਿਕੇ ਨਿਬਦ੍ਧਵਾਸਂ ਵਸਨ੍ਤੋ. ਤੀਸੁ ਮਣ੍ਡਲੇਸੁ ਯਥਾਕਾਲਂ ਚਾਰਿਕਂ ਚਰਨ੍ਤੋ.
੨੯੮. ਅਸ੍ਸਾਤਿ ਫਲਸ੍ਸ. ਤਨ੍ਤਿ ਕਾਰਣਂ. ਦ੍ਵਿਨ੍ਨਮ੍ਪਿ ਏਕਤੋ ਉਪ੍ਪਤ੍ਤਿਯਾ ਕਾਰਣਂ ਨਤ੍ਥਿ, ਪਗੇਵ ਤਿਣ੍ਣਂ, ਚਤੁਨ੍ਨਂ ਵਾਤਿ. ‘‘ਏਤ੍ਥ ਚਾ’’ਤਿਆਦਿ ‘‘ਏਕਿਸ੍ਸਾ ਲੋਕਧਾਤੁਯਾ’’ਤਿ ਵੁਤ੍ਤਲੋਕਧਾਤੁਯਾ ਪਮਾਣਪਰਿਚ੍ਛੇਦਦਸ੍ਸਨਤ੍ਥਂ ਆਰਦ੍ਧਂ.
ਯਾਵਤਾਤਿ ਯਤ੍ਤਕੇਨ ਠਾਨੇਨ. ਪਰਿਹਰਨ੍ਤੀਤਿ ਸਿਨੇਰੁਂ ਪਰਿਕ੍ਖਿਪਨ੍ਤਾ ਪਰਿਵਤ੍ਤਨ੍ਤਿ. ਦਿਸਾਤਿ ਦਿਸਾਸੁ, ਭੁਮ੍ਮਤ੍ਥੇ ਏਤਂ ਪਚ੍ਚਤ੍ਤਵਚਨਂ. ਭਨ੍ਤਿ ਦਿਬ੍ਬਨ੍ਤਿ. ਵਿਰੋਚਨਾਤਿ ਓਭਾਸਨ੍ਤਾ, ਵਿਰੋਚਨਾ ਵਾ ਸੋਭਮਾਨਾ ਚਨ੍ਦਿਮਸੂਰਿਯਾ ਭਨ੍ਤਿ, ਤਤੋ ਏਵ ਦਿਸਾ ਚ ਭਨ੍ਤਿ.ਤਾਵ ਸਹਸ੍ਸਧਾਤਿ ਤਤ੍ਤਕੋ ਸਹਸ੍ਸਲੋਕੋ.
ਏਤ੍ਤਕਨ੍ਤਿ ਇਮਂ ਚਕ੍ਕਵਾਲ਼ਂ ਮਜ੍ਝੇ ਕਤ੍ਵਾ ਇਮਿਨਾਵ ਸਦ੍ਧਿਂ ਚਕ੍ਕਵਾਲ਼ਂ ਦਸਸਹਸ੍ਸਂ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਮਹਾਪਦਾਨਵਣ੍ਣਨਾਯਂ ਵੁਤ੍ਤਮੇਵ. ਨ ਪਞ੍ਞਾਯਤੀਤਿ ਤੀਸੁ ਪਿਟਕੇਸੁ ਅਨਾਗਤਤ੍ਤਾ.
ਸਨਙ੍ਕੁਮਾਰਕਥਾਵਣ੍ਣਨਾ
੩੦੦. ਵਣ੍ਣੇਨਾਤਿ ਰੂਪਸਮ੍ਪਤ੍ਤਿਯਾ. ਸੁਵਿਞ੍ਞੇਯ੍ਯਤ੍ਤਾ ਤਂ ਅਨਾਮਸਿਤ੍ਵਾ ਯਸਸਦ੍ਦਸ੍ਸੇਵ ਅਤ੍ਥਮਾਹ. ਅਲਙ੍ਕਾਰਪਰਿਵਾਰੇਨਾਤਿ ਅਲਙ੍ਕਾਰੇਨ ਚ ਪਰਿਵਾਰੇਨ ਚ. ਪੁਞ੍ਞਸਿਰਿਯਾਤਿ ਪੁਞ੍ਞਿਦ੍ਧਿਯਾ.
੩੦੧. ਸਮ੍ਪਸਾਦਨੇਤਿ ਸਮ੍ਪਸਾਦਜਨਨੇ. ਸਂਪੁਬ੍ਬੋ ਖਾ-ਸਦ੍ਦੋ ਜਾਨਨਤ੍ਥੋ ‘‘ਸਙ੍ਖਾਯੇਤਂ ਪਟਿਸੇਵਤੀ’’ਤਿਆਦੀਸੁ (ਮ. ਨਿ. ੨.੧੬੮) ਵਿਯਾਤਿ ਆਹ ‘‘ਜਾਨਿਤ੍ਵਾ ਮੋਦਾਮਾ’’ਤਿ.
ਗੋਵਿਨ੍ਦਬ੍ਰਾਹ੍ਮਣਵਤ੍ਥੁਵਣ੍ਣਨਾ
੩੦੪. ਯਾਵ ਦੀਘਰਤ੍ਤਨ੍ਤਿ ਯਾਵ ਪਰਿਮਾਣਤੋ, ਅਪਰਿਮਿਤਕਾਲਪਰਿਦੀਪਨਮੇਤਨ੍ਤਿ ਆਹ ‘‘ਏਤ੍ਤਕਨ੍ਤਿ…ਪੇ… ਅਤਿਚਿਰਰਤ੍ਤ’’ਨ੍ਤਿ. ਮਹਾਪਞ੍ਞੋਵ ਸੋ ਭਗਵਾਤਿ ਤੇਨ ਬ੍ਰਹ੍ਮੁਨਾ ਅਨੁਮਤਿਪੁਚ੍ਛਾਵਸੇਨ ਦੇਵਾਨਂ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਮਹਾਪਞ੍ਞੋਵ ਸੋ ਭਗਵਾ. ਨੋਤਿ ਕਥਂ ਤੁਮ੍ਹੇ ਮਞ੍ਞਥਾ’’ਤਿ ਆਹ. ਸਯਮੇਵੇਤਂ ਪਞ੍ਹਂ ਬ੍ਯਾਕਾਤੁਕਾਮੋ ‘‘ਭੂਤਪੁਬ੍ਬਂ ਭੋ’’ਤਿ ਆਦਿਂ ਆਹਾਤਿ ਸਮ੍ਬਨ੍ਧੋ. ਏਵਂ ਪਨ ਬ੍ਯਾਕਰੋਨ੍ਤੇਨ ਅਤ੍ਥਤੋ ਅਯਮ੍ਪਿ ਅਤ੍ਥੋ ਵੁਤ੍ਤੋ ਨਾਮ ਹੋਤੀਤਿ ਦਸ੍ਸੇਨ੍ਤੋ ‘‘ਅਨਚ੍ਛਰਿਯਮੇਤ’’ਨ੍ਤਿ ਆਦਿਮਾਹ. ਤਿਣ੍ਣਂ ਮਾਰਾਨਨ੍ਤਿ ਕਿਲੇਸਾਭਿਸਙ੍ਖਾਰਦੇਵਪੁਤ੍ਤਮਾਰਾਨਂ. ‘‘ਅਨਚ੍ਛਰਿਯਮੇਤ’’ਨ੍ਤਿ ਵੁਤ੍ਤਮੇਵਤ੍ਥਂ ਨਿਗਮਨਵਸੇਨ ‘‘ਕਿਮੇਤ੍ਥ ਅਚ੍ਛਰਿਯ’’ਨ੍ਤਿ ਪੁਨਪਿ ਵੁਤ੍ਤਂ.
ਰਞ੍ਞੋ ਦਿਟ੍ਠਧਮ੍ਮਿਕਸਮ੍ਪਰਾਯਿਕਅਤ੍ਥਾਨਂ ਪੁਰੋ ਧਾਨਤੋ ਪੁਰੇ ਪੁਰੇ ਸਂਵਿਧਾਨਤੋ ਪੁਰੋਹਿਤੋਤਿ ਆਹ ‘‘ਸਬ੍ਬਕਿਚ੍ਚਾਨਿਅਨੁਸਾਸਨਪੁਰੋਹਿਤੋ’’ਤਿ. ਗੋਵਿਨ੍ਦਿਯਾਭਿਸੇਕੇਨਾਤਿ ਗੋਵਿਨ੍ਦਸ੍ਸ ਠਾਨੇ ਠਪਨਾਭਿਸੇਕੇਨ. ਤਂ ਕਿਰ ਤਸ੍ਸ ਬ੍ਰਾਹ੍ਮਣਸ੍ਸ ਕੁਲਪਰਮ੍ਪਰਾਗਤਂ ਠਾਨਨ੍ਤਰਂ. ਜੋਤਿਤਤ੍ਤਾਤਿ ਆਵੁਧਾਨਂ ਜੋਤਿਤਤ੍ਤਾ. ਪਾਲਨਸਮਤ੍ਥਤਾਯਾਤਿ ਰਞ੍ਞੋ, ਅਪਰਿਮਿਤਸ੍ਸ ਚ ਸਤ੍ਤਕਾਯਸ੍ਸ ਅਨਤ੍ਥਤੋ ਪਰਿਪਾਲਨਸਮਤ੍ਥਤਾਯ.
ਸਮ੍ਮਾ ਵੋਸ੍ਸਜ੍ਜਿਤ੍ਵਾਤਿ ਸੁਟ੍ਠੁ ਤਸ੍ਸੇਵਾਗਾਰਵਭਾਵੇਨ ਵਿਸ੍ਸਜ੍ਜਿਤ੍ਵਾ ਨਿਯ੍ਯਾਤੇਤ੍ਵਾ. ਤਂ ਤਮਤ੍ਥਂ ਕਿਚ੍ਚਂ ਪਸ੍ਸਤੀਤਿ ਅਤ੍ਥਦਸੋ.
੩੦੫. ਭਵਨਂ ਵਡ੍ਢਨਂ ਭਵੋ, ਭਵਤਿ ਏਤੇਨਾਤਿ ਵਾ ਭਵੋ, ਵਡ੍ਢਿਕਾਰਣਂ ਸਨ੍ਧਿਵਸੇਨ ਮ-ਕਾਰਾਗਮੋ, ਓ-ਕਾਰਸ੍ਸ ਚ ਅ-ਕਾਰਾਦੇਸਂ ਕਤ੍ਵਾ ‘‘ਭਵਮਤ੍ਥੂ’’ਤਿ ਵੁਤ੍ਤਂ. ਭਵਨ੍ਤਂ ਜੋਤਿਪਾਲਨ੍ਤਿ ਪਨ ਸਾਮਿਅਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਭੋਤੋ’’ਤਿ. ਮਾ ਪਚ੍ਚਬ੍ਯਾਹਾਸੀਤਿ ਮਾ ਪਟਿਕ੍ਖਿਪੀਤਿ ਅਤ੍ਥੋ. ਸੋ ਪਨ ਪਟਿਕ੍ਖੇਪੋ ਪਟਿਵਚਨਂ ਹੋਤੀਤਿ ਆਹ ‘‘ਮਾ ਪਟਿਬ੍ਯਾਹਾਸੀ’’ਤਿ. ਅਭਿਸਮ੍ਭੋਸੀਤਿ ਕਮ੍ਮਨ੍ਤਾਨਂ ਸਂਵਿਧਾਨੇ ਸਮਤ੍ਥੋ ਹੋਤੀਤਿ ਆਹ ‘‘ਸਂਵਿਦਹਿਤ੍ਵਾ’’ਤਿ. ਭਵਾਭਵਂ, ਪਞ੍ਞਞ੍ਚ ਵਿਨ੍ਦਿ ਪਟਿਲਭੀਤਿ ਗੋਵਿਨ੍ਦੋ, ਮਹਨ੍ਤੋ ਗੋਵਿਨ੍ਦੋ ਮਹਾਗੋਵਿਨ੍ਦੋ. ‘‘ਗੋ’’ਤਿ ਹਿ ਪਞ੍ਞਾਯੇਤਂ ਅਧਿਵਚਨਂ ਗਚ੍ਛਤਿ ਅਤ੍ਥੇ ਬੁਜ੍ਝਤੀਤਿ.
ਰਜ੍ਜਸਂਵਿਭਜਨਵਣ੍ਣਨਾ
੩੦੬. ਏਕਪਿਤਿਕਾ ਵੇਮਾਤੁਕਾ ਕਨਿਟ੍ਠਭਾਤਰੋ. ਅਯਂ ਅਭਿਸਿਤ੍ਤੋਤਿ ਅਯਂ ਰੇਣੁ ਰਾਜਕੁਮਾਰੋ ਪਿਤੁ ਅਚ੍ਚਯੇਨ ਰਜ੍ਜੇ ਅਭਿਸਿਤ੍ਤੋ. ਰਾਜਕਾਰਕਾਤਿ ਰਾਜਪੁਤ੍ਤਂ ਰਜ੍ਜੇ ਪਤਿਟ੍ਠਾਪੇਤਾਰੋ.
੩੦੭. ਮਦੇਨ੍ਤੀਤਿ ਮਦਨੀਯਾਤਿ ਕਤ੍ਤੁਸਾਧਨਤਂ ਦਸ੍ਸੇਨ੍ਤੋ ‘‘ਮਦਕਰਾ’’ਤਿ ਆਹ. ਮਦਕਰਣਂ ਪਨ ਪਮਾਦਸ੍ਸ ਵਿਸੇਸਕਾਰਣਨ੍ਤਿ ਵੁਤ੍ਤਂ ‘‘ਪਮਾਦਕਰਾ’’ਤਿ.
੩੦੮. ਰੇਣੁਸ੍ਸ ਰਜ੍ਜਸਮੀਪੇ ਦਸਗਾਵੁਤਮਤ੍ਤਵਿਤ੍ਥਤਾਨਿ ਹੁਤ੍ਵਾ ਅਪਰਭਾਗੇ ਤਿਯੋਜਨਸਤਂ ਵਿਤ੍ਥਤਤ੍ਤਾ ਸਬ੍ਬਾਨਿ ਛ ਰਜ੍ਜਾਨਿ ਸਕਟਮੁਖਾਨਿ ਪਟ੍ਠਪੇਸਿ. ਵਿਤਾਨਸਦਿਸਂ ਚਤੁਰਸ੍ਸਭਾਵਤੋ.
੩੧੦. ਸਹਾਤਿ ਗਾਥਾਯ ਪਦਪਰਿਪੂਰਣਤ੍ਥਂ ਵੁਤ੍ਤਂ. ਤਸ੍ਸ ਅਤ੍ਥਂ ਦਸ੍ਸੇਨ੍ਤੋ ‘‘ਤੇਨੇਵ ਸਹਾ’’ਤਿ ਆਹ. ਸਹਾਤਿ ਵਾ ਅਵਿਨਾਭਾਵਤ੍ਥੇ ਨਿਪਾਤੋ, ਸੋ ਸਹ ਆਸੁਂ ਸਤ੍ਤ ਭਾਰਧਾਤਿ ਯੋਜੇਤਬ੍ਬੋ, ਤੇਨ ਤੇ ਦੇਸਨ੍ਤਰੇ ਵਸਨ੍ਤਾ ਵਿਚਿਤ੍ਤੇਨ ਸਹਭਾਵਿਨੋ ਅਵਿਨਾਭਾਵਿਨੋਤਿ ਦੀਪੇਤਿ. ਰਜ੍ਜਭਾਰਂ ਧਾਰੇਨ੍ਤਿ ਅਤ੍ਤਨਿ ਆਰੋਪੇਨ੍ਤਿ ਵਹਨ੍ਤੀਤਿ ਭਾਰਧਾ.
ਪਠਮਭਾਣਵਾਰਵਣ੍ਣਨਾ ਨਿਟ੍ਠਿਤਾ.
ਕਿਤ੍ਤਿਸਦ੍ਦਅਬ੍ਭੁਗ੍ਗਮਨਵਣ੍ਣਨਾ
੩੧੧. ਅਨੁਪੁਰੋਹਿਤੇ ਠਪੇਸੀਤਿ ਅਨੁਪੁਰੋਹਿਤੇ ਕਤ੍ਵਾ ਠਪੇਸਿ, ਅਨੁਪੁਰੋਹਿਤੇ ਵਾ ਠਾਨੇ ਠਪੇਸਿ. ਤਿਸਵਨਂ ਕਰੋਨ੍ਤੇ ਸਨ੍ਧਾਯ ‘‘ਦਿਵਸਸ੍ਸ ਤਿਕ੍ਖਤ੍ਤੁ’’ਨ੍ਤਿ ਵੁਤ੍ਤਂ. ਦ੍ਵੀਸੁ ਸਨ੍ਧੀਸੁ ਸਵਨਂ ਕਰੋਨ੍ਤੇ ਸਨ੍ਧਾਯ ‘‘ਸਾਯਂ, ਪਾਤੋ ਵਾ’’ਤਿ ਵੁਤ੍ਤਂ. ਤਤੋ ਪਟ੍ਠਾਯਾਤਿ ਵਤਚਰਿਯਂ ਮਤ੍ਥਕਂ ਪਾਪੇਤ੍ਵਾ ਨ੍ਹਾਤਕਾਲਤੋ ਪਭੁਤਿ.
੩੧੨. ਅਭਿਉਗ੍ਗਚ੍ਛੀਤਿ ਉਟ੍ਠਹਿ ਉਦਪਾਦਿ. ਅਚਿਨ੍ਤੇਤ੍ਵਾਤਿ ‘‘ਕਥਂ ਖੋ ਅਹਂ ਬ੍ਰਹ੍ਮੁਨਾ ਸਦ੍ਧਿਂ ਮਨ੍ਤੇਯ੍ਯ’’ਨ੍ਤਿ ਅਚਿਨ੍ਤੇਤ੍ਵਾ ਏਵਂ ਚਿਤ੍ਤਮ੍ਪਿ ਅਨੁਪ੍ਪਾਦੇਤ੍ਵਾ. ਤੇਨ ਸਮਾਗਮਨਸ੍ਸੇਵ ਅਭਾਵਤੋ ਅਮਨ੍ਤੇਤ੍ਵਾ. ਤਂ ਦਿਸ੍ਵਾਤਿ ਤਂ ਕਰੁਣਾਬ੍ਰਹ੍ਮਵਿਹਾਰਭਾਵਨਂ ਬ੍ਰਹ੍ਮਦਸ੍ਸਨੂਪਾਯਂ ਦਿਸ੍ਵਾ ਞਾਣਚਕ੍ਖੁਨਾ.
੩੧੩. ਏਵਨ੍ਤਿ ਏਵਂ ਰਞ੍ਞੋ ਆਰੋਚੇਤ੍ਵਾ ਪਟਿਸਲ੍ਲਾਨਂ ਉਪਗਤੇ. ਸਬ੍ਬਤ੍ਥਾਤਿ ਸਬ੍ਬੇਸੁ ਛਨ੍ਨਂ ਖਤ੍ਤਿਯਾਨਂ, ਸਤ੍ਤਨ੍ਨਂ ਬ੍ਰਾਹ੍ਮਣਮਹਾਸਾਲਾਨਂ, ਸਤ੍ਤਨ੍ਨਂ ਨਾਟਕਸਤਾਨਂ, ਚਤ੍ਤਾਰੀਸਾਯ ਚ ਭਰਿਯਾਨਂ ਆਪੁਚ੍ਛਨਵਾਰੇਸੁ.
੩੧੬. ਸਾਦਿਸਿਯੋਤਿ ਜਾਤਿਯਾ ਸਾਦਿਸਿਯੋਤਿ ਆਹ ‘‘ਸਮਵਣ੍ਣਾ ਸਮਜਾਤਿਕਾ’’ਤਿ.
੩੧੭. ਸਨ੍ਥਾਗਾਰਨ੍ਤਿ ਝਾਨਮਨਸਿਕਾਰੇਨ ਬਹਿ ਵਿਸਟਵਿਤਕ੍ਕਵੂਪਸਮਨੇਨ ਚਿਤ੍ਤਸ੍ਸ ਸਨ੍ਥਮ੍ਭਨਂ ਅਗਾਰਂ, ਝਾਨਸਾਲਨ੍ਤਿ ਅਤ੍ਥੋ. ਗਹਿਤਾਵਾਤਿ ਭਾਵਨਾਨੁਯੋਗੇਨ ਮਹਾਸਤ੍ਤੇਨ ਅਤ੍ਤਨੋ ਚਿਤ੍ਤਸਨ੍ਤਾਨੇ ਉਪ੍ਪਾਦਨਵਸੇਨ ਗਹਿਤਾ ਏਵ. ਨਤ੍ਥਿ ਝਾਨੇਨੇਵ ਵਿਕ੍ਖਮ੍ਭਿਤਤ੍ਤਾ. ਵਿਸੇਸਤੋ ਹਿਸ੍ਸ ਕਰੁਣਾਯ ਭਾਵਿਤਤ੍ਤਾ ਅਨਭਿਰਤਿ ਉਕ੍ਕਣ੍ਠਨਾ ਨਤ੍ਥਿ, ਮੇਤ੍ਤਾਯ ਭਾਵਿਤਤ੍ਤਾ ਭਯਪਰਿਤਸ੍ਸਨਾ ਨਤ੍ਥਿ. ਉਕ੍ਕਣ੍ਠਨਾਤਿ ਪਨ ਬ੍ਰਹ੍ਮਦਸ੍ਸਨੇ ਉਸ੍ਸੁਕ੍ਕਂ, ਪਰਿਤਸ੍ਸਨਾਤਿ ਤਦਭਿਪਤ੍ਥਨਾਤਿ ਆਹ ‘‘ਬ੍ਰਹ੍ਮੁਨੋ ਪਨਾ’’ਤਿਆਦਿ.
ਬ੍ਰਹ੍ਮੁਨਾਸਾਕਚ੍ਛਾਵਣ੍ਣਨਾ
੩੧੮. ਚਿਤ੍ਤੁਤ੍ਰਾਸੋਤਿ ਚਿਤ੍ਤਸ੍ਸ ਉਤ੍ਰਾਸਨਮਤ੍ਤਂ. ਕਥਨ੍ਤਿ ਸਤ੍ਤਨਿਕਾਯਨਿਵਾਸਟ੍ਠਾਨਨਾਮਗੋਤ੍ਤਾਦੀਨਂ ਵਸੇਨ ਕੇਨ ਪਕਾਰੇਨ. ਤੇਨਾਹ ‘‘ਕਿ’’ਨ੍ਤਿਆਦਿ.
ਸੋਤਿ ਯੇ ਤੇ ਪਨਕਨਸਨਨ੍ਤਬਨ੍ਧਸਤਨਸਨਙ੍ਕੁਮਾਰਕਾਲਨਾਮਕਾ ਲੋਕੇ ਪਾਕਟਾ ਪਞ੍ਞਾਤਾ ਬ੍ਰਹ੍ਮਾਨੋ, ਤੇਸੁ ਸਨਙ੍ਕੁਮਾਰੋ ਨਾਮਾਹਨ੍ਤਿ ਦਸ੍ਸੇਤਿ.
ਅਗ੍ਘਨ੍ਤਿ ਗਰੁਟ੍ਠਾਨਿਯਾਨਂ ਦਾਤਬ੍ਬਂਆਹਾਰਂ. ਮਧੁਸਾਕਨ੍ਤਿ ਮਧੁਰਾਹਾਰਂ, ਯਂ ਕਿਞ੍ਚਿ ਅਤਿਥਿਨੋ ਦਾਤਬ੍ਬਂ ਆਹਾਰਂ ਉਪਚਾਰਵਸੇਨ ਏਵਂ ਵਦਤਿ. ਤੇਨਾਹ ‘‘ਮਧੁਸਾਕਂ ਪਨਾ’’ਤਿਆਦਿ. ਪੁਚ੍ਛਾਮਾਤਿ ਨਿਮਨ੍ਤਨਵਸੇਨ ਪੁਚ੍ਛਾਮ.
੩੧੯. ਮਹਾਸਤ੍ਤੋ ਚਤ੍ਤਾਰੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਠਿਤੋਪਿ ਤੇਸੁ ‘‘ਬ੍ਰਹ੍ਮਸਹਬ੍ਯਤਾਯ ਮਗ੍ਗੋ’’ਤਿ ਅਨਿਬ੍ਬੇਮਤਿਕਤਾਯ ‘‘ਕਙ੍ਖੀ’’ਤਿ ਅਵੋਚ. ਕੇਚਿ ਪਨ ‘‘ਤਪੋਕਮ੍ਮੇਨ ਪਰਿਕ੍ਖੀਣਸਰੀਰਤਾਯ, ਬ੍ਰਹ੍ਮਸਮਾਗਮੇਨ ਭਯਾਦਿਸਮੁਪ੍ਪਤ੍ਤਿਯਾ ਚ ਪਟਿਲਦ੍ਧਮਤ੍ਤੇਹਿ ਬ੍ਰਹ੍ਮਵਿਹਾਰੇਹਿ ਪਰਿਹੀਨੋ ਅਹੋਸਿ, ਤਸ੍ਮਾ ਅਵਿਕ੍ਖਮ੍ਭਿਤਵਿਚਿਕਿਚ੍ਛਤਾਯ ‘ਕਙ੍ਖੀ’ਤਿ ਅਵੋਚਾ’’ਤਿ ਵਦਨ੍ਤਿ. ਪਰਸ੍ਸ ਵੇਦਿਯਾ ਵਿਦਿਤਾ ਪਰਵੇਦਿਯਾ, ਤੇ ਪਨ ਤਸ੍ਸ ਪਾਕਟਾ ਵਿਭੂਤਾਤਿ ਆਹ ‘‘ਪਰਸ੍ਸ ਪਾਕਟੇਸੁ ਪਰਵੇਦਿਯੇਸੂ’’ਤਿ. ਤਤ੍ਥ ਕਾਰਣਮਾਹ ‘‘ਪਰੇਨ ਸਯਂ ਅਭਿਸਙ੍ਖਤਤ੍ਤਾ’’ਤਿ. ਮਮਾਤਿ ਕਮ੍ਮਂ ਮਮਂਕਾਰੋ, ਮਮਤ੍ਤਨ੍ਤਿ ਆਹ ‘‘ਇਦਂ ਮਮ…ਪੇ… ਤਣ੍ਹ’’ਨ੍ਤਿ. ‘‘ਮਮ’’ਨ੍ਤਿ ਕਰੋਤਿ ਏਤੇਨਾਤਿ ਹਿ ਮਮਂਕਾਰੋ, ਤਥਾਪਵਤ੍ਤਾ ਤਣ੍ਹਾ. ਮਨੁਜੇਸੂਤਿ ਨਿਦ੍ਧਾਰਣੇ ਭੁਮ੍ਮਂ, ਨ ਵਿਸਯੇਤਿ ਆਹ ‘‘ਮਨੁਜੇਸੁ ਯੋ ਕੋਚੀ’’ਤਿ. ‘‘ਏਕੋਦਿਭੂਤੋ’’ਤਿ ਪਦਸ੍ਸ ਭਾਵਤ੍ਥਂ ਤਾਵ ਦਸ੍ਸੇਨ੍ਤੋ ‘‘ਏਕੀਭੂਤੋ’’ਤਿ ਵਤ੍ਵਾ ਪੁਨ ਤਂ ਵਿਵਰਨ੍ਤੋ ‘‘ਏਕੋ ਤਿਟ੍ਠਨ੍ਤੋ ਏਕੋ ਨਿਸੀਦਨ੍ਤੋ’’ਤਿ ਆਹ. ਤਾਦਿਸੋਤਿ ਏਕੋ ਹੁਤ੍ਵਾ ਪਵਤ੍ਤਨਕੋ. ਭੂਤੋਤਿ ਜਾਤੋ. ਝਾਨੇ ਅਧਿਮੁਤ੍ਤਿ ਨਾਮ ਤਸ੍ਮਿਂ ਨਿਬ੍ਬਤ੍ਤਿਤੇ, ਅਨਿਬ੍ਬਤ੍ਤਿਤੇ ਕੁਤੋ ਅਧਿਮੁਤ੍ਤੀਤਿ ਆਹ ‘‘ਝਾਨਂ ਨਿਬ੍ਬਤ੍ਤੇਤ੍ਵਾਤਿ ਅਤ੍ਥੋ’’ਤਿ. ਵਿਸ੍ਸਗਨ੍ਧੋ ਨਾਮ ਕੋਧਾਦਿਕਿਲੇਸਪਰਿਭਾਵਨਾਤਿ ਤੇਸਂ ਵਿਕ੍ਖਮ੍ਭਨੇਨ ਵਿਸ੍ਸਗਨ੍ਧਵਿਰਹਿਤੋ. ਏਤੇਸੁ ਧਮ੍ਮੇਸੂਤਿ ਪਬ੍ਬਜ੍ਜਾਨਂ ਵਿਵੇਕਵਾਸਕਰੁਣਾਬ੍ਰਹ੍ਮਵਿਹਾਰਾਦਿਧਮ੍ਮੇਸੁ.
੩੨੦. ਅਵਿਦ੍ਵਾਤਿ ਨ ਵਿਦਿਤਵਾ. ਆਵਰਿਤਾਤਿ ਕੁਸਲਾਨਂ ਉਤ੍ਤਰਿਮਨੁਸ੍ਸਧਮ੍ਮਾਨਂ ਉਪ੍ਪਤ੍ਤਿਨਿਵਾਰਣੇਨ ਆਵਰਿਤਾ. ਪੂਤਿਕਾਤਿ ਬ੍ਯਾਪਨ੍ਨਚਿਤ੍ਤਤਾਦਿਨਾ ਪੂਤਿਭੂਤਾ. ਕਿਲੇਸਵਸੇਨ ਦੁਗ੍ਗਨ੍ਧਂ ਵਿਸ੍ਸਗਨ੍ਧਂ ਵਾਯਤਿ. ਨਿਰਯਾਦਿਅਪਾਯੇਸੁ ਨਿਬ੍ਬਤ੍ਤਨਸੀਲਤਾਯ ਆਪਾਯਿਕਾਤਿ ਆਹ ‘‘ਅਪਾਯੂਪਗਾ’’ਤਿ. ਚੋਰਾਦੀਹਿ ਉਪਦ੍ਦੁਤਸ੍ਸ ਪਵਿਸਿਤੁਕਾਮਸ੍ਸ ਪਾਕਾਰਕਵਾਟਪਰਿਖਾਦੀਹਿ ਵਿਯ ਨਗਰਂ ਕੋਧਾਦੀਹਿ ਨਿਵੁਤੋ ਪਿਹਿਤੋ ਬ੍ਰਹ੍ਮਲੋਕੋ ਅਸ੍ਸਾਤਿ ਨਿਵੁਤਬ੍ਰਹ੍ਮਲੋਕੋ. ਪੁਚ੍ਛਤਿ ‘‘ਕੇਨਾਵਟਾ’’ਤਿ ਵਦਨ੍ਤੋ.
ਮੁਸਾਵਾਦੋਵ ਮੋਸਵਜ੍ਜਂ ਯਥਾ ਭਿਸਕ੍ਕਮੇਵ ਭੇਸਜ੍ਜਂ. ਕੁਜ੍ਝਨਂ ਦੁਸ੍ਸਨਂ. ਦਿਟ੍ਠਾਦੀਸੁ ਅਦਿਟ੍ਠਾਦਿਵਾਦਿਤਾਵਸੇਨ ਪਰੇਸਂ ਵਿਸਂਵਾਦਨਂ ਪਰਵਿਸਂਵਾਦਨਂ. ਸਦਿਸਂ ਪਤਿਰੂਪਂ ਦਸ੍ਸੇਤ੍ਵਾ ਪਲੋਭਨਂ ਸਦਿਸਂ ਦਸ੍ਸੇਤ੍ਵਾ ਵਞ੍ਚਨਂ. ਮਿਤ੍ਤਾਨਂ ਵਿਹਿਂਸਨਂ ਮੇਤ੍ਤਿਭੇਦੋ ਮਿਤ੍ਤਦੁਬ੍ਭਨਂ. ਦਲ਼੍ਹਮਚ੍ਛਰਿਤਾ ਥਦ੍ਧਮਚ੍ਛਰਿਯਂ. ਅਤ੍ਤਨਿ ਵਿਜ੍ਜਮਾਨਂ ਨਿਹੀਨਤਂ, ਸਦਿਸਤਂ ਵਾ ਅਤਿਕ੍ਕਮਿਤ੍ਵਾ ਮਞ੍ਞਨਂ. ਪਰੇਸਂ ਸਮ੍ਪਤ੍ਤਿਯਾ ਅਸਹਨਂ ਖੀਯਨਂ. ਅਤ੍ਤਸਮ੍ਪਤ੍ਤਿਯਾ ਨਿਗੂਹਨਵਸੇਨ, ਪਰੇਹਿ ਸਾਧਾਰਣਭਾਵਾਸਹਨਵਸੇਨ ਚ ਵਿਵਿਧਾ ਇਚ੍ਛਾ ਰੁਚਿ ਏਤਸ੍ਸਾਤਿ ਵਿਵਿਚ੍ਛਾ. ਕਦਰਿਯਤਾਯ ਮੁਦੁਕਂ ਮਚ੍ਛਰਿਯਂ. ਯਤ੍ਥ ਕਤ੍ਥਚੀਤਿ ਸਕਸਨ੍ਤਕੇ, ਪਰਸਨ੍ਤਕੇ, ਹੀਨਾਤਿਕੇ ਚਾਤਿ ਯਤ੍ਥ ਕਤ੍ਥਚਿ ਆਰਮ੍ਮਣੇ. ਲੁਬ੍ਭਨਂ ਆਰਮ੍ਮਣਸ੍ਸ ਗਹਣਂ ਅਭਿਗਿਜ੍ਝਨਂ. ਮਜ੍ਜਨਂ ਸੇਯ੍ਯਾਦਿਵਸੇਨ ਮਦਨਂ ਸਮ੍ਪਗ੍ਗਹੋ. ਮੁਯ੍ਹਨਂ ਆਰਮ੍ਮਣਸ੍ਸ ਅਨਵਬੋਧੋ. ਏਤੇਸੂਤਿ ਏਤੇਸੁ ਯਥਾਵੁਤ੍ਤੇਸੁ ਕੋਧਾਦੀਸੁ ਸਤ੍ਤਸਨ੍ਤਾਨਸ੍ਸ ਕਿਲਿਸ੍ਸਨਤੋ ਵਿਬਾਧਨਤੋ, ਉਪਤਾਪਨਤੋ ਚ ਕਿਲੇਸਸਞ੍ਞਿਤੇਸੁ ਪਾਪਧਮ੍ਮੇਸੁ. ਯੁਤ੍ਤਾ ਪਯੁਤ੍ਤਾ ਸਮ੍ਪਯੁਤ੍ਤਾ ਅਵਿਰਹਿਤਾ.
ਏਤ੍ਥ ਚਾਯਂ ਬ੍ਰਹ੍ਮਾ ਮਹਾਸਤ੍ਤੇਨ ਆਮਗਨ੍ਧੇ ਸੁਪੁਟ੍ਠੋ ਅਤ੍ਤਨੋ ਯਥਾਉਪਟ੍ਠਿਤੇ ਪਾਪਧਮ੍ਮੇ ਚੁਦ੍ਦਸਹਿ ਪਦੇਹਿ ਵਿਭਜਿਤ੍ਵਾ ਕਥੇਸਿ, ਤੇ ਪਨ ਤਾਦਿਸਂ ਪਵਤ੍ਤਿਵਿਸੇਸਂ ਉਪਾਦਾਯ ਵੁਤ੍ਤਾਪਿ ਕੇਚਿ ਪੁਨ ਵੁਤ੍ਤਾ, ਆਮਗਨ੍ਧਸੁਤ੍ਤੇ (ਸੁ. ਨਿ. ੨੪੨) ਪਨ ਵੁਤ੍ਤਾਪਿ ਕੇਚਿ ਇਧ ਸਬ੍ਬਸੋ ਨ ਵੁਤ੍ਤਾ, ਏਵਂ ਸਨ੍ਤੇਪਿ ਲਕ੍ਖਣਹਾਰਨਯੇਨ, ਤਦੇਕਟ੍ਠਤਾਯ ਵਾ ਤੇਸਂ ਪੇਤ੍ਥ ਸਙ੍ਗਹੋ ਦਟ੍ਠਬ੍ਬੋ. ਤੇਨਾਹ ‘‘ਇਦਂ ਪਨ ਸੁਤ੍ਤ’’ਨ੍ਤਿਆਦਿ. ਤਤ੍ਥ ਆਮਗਨ੍ਧਸੁਤ੍ਤੇਨ ਦੀਪੇਤ੍ਵਾਤਿ ਇਧ ਸਰੂਪਤੋ ਅਵੁਤ੍ਤੇ ਆਮਗਨ੍ਧੇਪਿ ਵੁਤ੍ਤੇਹਿ ਏਕਲਕ੍ਖਣਤਾਦਿਨਾ ਆਮਗਨ੍ਧਸੁਤ੍ਤੇਨ ਪਕਾਸੇਤ੍ਵਾ ਕਥੇਤਬ੍ਬਂ ਤਤ੍ਥ ਨੇਸਂ ਸਰੂਪਤੋ ਕਥਿਤਤ੍ਤਾ. ਆਮਗਨ੍ਧਸੁਤ੍ਤਮ੍ਪਿ ਇਮਿਨਾ ਦੀਪੇਤਬ੍ਬਂ ਇਧ ਵੁਤ੍ਤਾਨਮ੍ਪਿ ਕੇਸਞ੍ਚਿ ਆਮਗਨ੍ਧਾਨਂ ਤਤ੍ਥ ਅਵੁਤ੍ਤਭਾਵਤੋ. ਯਸ੍ਮਾ ਆਮਗਨ੍ਧਸੁਤ੍ਤੇ ਵੁਤ੍ਤਾਪਿ ਆਮਗਨ੍ਧਾ ਅਤ੍ਥਤੋ ਇਧ ਸਙ੍ਗਹਂ ਸਮੋਸਰਣਂ ਗਚ੍ਛਨ੍ਤਿ, ਤਸ੍ਮਾ ਇਧ ਵੁਤ੍ਤੇ ਪਰਿਹਰਣਵਸੇਨ ਦਸ੍ਸੇਨ੍ਤੇਨ ਯਸ੍ਮਾ ਚੇਤ੍ਥ ਕੇਚਿ ਅਭਿਧਮ੍ਮਨਯੇਨ ਅਕਿਲੇਸਸਭਾਵਾਪਿ ਸਤ੍ਤਸਨ੍ਤਾਨਸ੍ਸ ਵਿਬਾਧਨਟ੍ਠੇਨ ‘‘ਕਿਲੇਸਾ’’ਤਿ ਵਤ੍ਤਬ੍ਬਤਂ ਅਰਹਨ੍ਤਿ, ਤਸ੍ਮਾ ‘‘ਚੁਦ੍ਦਸਸੁ ਕਿਲੇਸੇਸੂ’’ਤਿ ਵੁਤ੍ਤਂ.
ਨਿਮ੍ਮਾਦਂ ਮਿਲਾਪਨਂ ਖੇਪਨਨ੍ਤਿ ਆਹ ‘‘ਨਿਮ੍ਮਾਦੇਤਬ੍ਬਾ ਪਹਾਤਬ੍ਬਾ’’ਤਿ. ਬੁਦ੍ਧਤਨ੍ਤੀਤਿ ਬੁਦ੍ਧਭਾਵੀਨਂ ਪਵੇਣੀ, ਬੁਦ੍ਧਭਾਵਿਨੋਪਿ ‘‘ਬੁਦ੍ਧਾ’’ਤਿ ਵੁਚ੍ਚਨ੍ਤਿ ਯਥਾ ‘‘ਅਗਮਾ ਰਾਜਗਹਂ ਬੁਦ੍ਧੋ’’ਤਿ. ਮਹਾਪੁਰਿਸਸ੍ਸ ਦਲ਼੍ਹੀਕਮ੍ਮਂ ਕਤ੍ਵਾਤਿ ਮਹਾਪੁਰਿਸਸ੍ਸ ‘‘ਪਬ੍ਬਜਿਸ੍ਸਾਮਹ’’ਨ੍ਤਿ ਪਵਤ੍ਤਚਿਤ੍ਤੁਪ੍ਪਾਦਸ੍ਸ ਦਲ਼੍ਹੀਕਮ੍ਮਂ ਕਤ੍ਵਾ.
ਰੇਣੁਰਾਜਆਮਨ੍ਤਨਾਵਣ੍ਣਨਾ
੩੨੧. ਮਮ ਮਨਂ ਹਰਿਤ੍ਵਾਤਿ ਮਮ ਚਿਤ੍ਤਂ ਅਪਨੇਤ੍ਵਾ ਤਸ੍ਸ ਵਸੇਨ ਅਵਤ੍ਤਿਤ੍ਵਾ.
ਏਕੀਭਾਵਂ ਉਪਗਨ੍ਤ੍ਵਾ ਵੁਤ੍ਥਸ੍ਸਾਤਿ ਕਾਯਵਿਵੇਕਪਰਿਬ੍ਰੂਹਨੇਨ ਏਕੀਭਾਵਂ ਉਪਗਨ੍ਤ੍ਵਾ ਤਪੋਕਮ੍ਮਵਸੇਨ ਵੁਤ੍ਥਸ੍ਸ. ਕੁਸਪਤ੍ਤੇਹਿ ਪਰਿਤ੍ਥਤੋਤਿ ਬਰਿਹਿਸੇਹਿ ਵੇਦਿਯਾ ਸਮਨ੍ਤਤੋ ਸਨ੍ਥਰਿਤੋ. ਅਕਾਚੋਤਿ ਵਣੋ ਵਣਸਦਿਸਖਣ੍ਡਿਚ੍ਚਵਿਰਹਿਤੋ. ਤੇਨਾਹ ‘‘ਅਕਕ੍ਕਸੋ’’ਤਿ.
ਛਖਤ੍ਤਿਯਆਮਨ੍ਤਨਾਵਣ੍ਣਨਾ
੩੨੨. ਸਿਕ੍ਖੇਯ੍ਯਾਮਾਤਿ ਸਿਕ੍ਖਾਪੇਯ੍ਯਾਮ, ਸਿਕ੍ਖਾਪਨਞ੍ਚੇਤ੍ਥ ਅਤ੍ਥਿਭਾਵਾਪਾਦਨਨ੍ਤਿ ਆਹ ‘‘ਉਪਲਾਪੇਯ੍ਯਾਮਾ’’ਤਿ.
੩੨੩. ਯਸ੍ਸ ਵੀਰਿਯਾਰਮ੍ਭਸ੍ਸ, ਖਨ੍ਤਿਬਲਸ੍ਸ ਚ ਅਭਾਵੇਨ ਪਬ੍ਬਜਿਤਾਨਂ ਸਮਣਧਮ੍ਮੋ ਪਰਿਪੁਣ੍ਣੋ, ਪਰਿਸੁਦ੍ਧੋ ਚ ਨ ਹੋਤਿ, ਤੇਸੁ ਵੀਰਿਯਾਰਮ੍ਭਖਨ੍ਤਿਬਲੇਸੁ ਤੇ ਤੇ ਨਿਯੋਜੇਤੁਂ ‘‘ਆਰਮ੍ਭਵ੍ਹੋ’’ਤਿਆਦਿ ਵੁਤ੍ਤਂ.
ਕਰੁਣਾਝਾਨਮਗ੍ਗੋਤਿ ਕਰੁਣਾਝਾਨਸਙ੍ਖਾਤੋ ਮਗ੍ਗੋ. ਉਜੁਮਗ੍ਗੋਤਿ ਬ੍ਰਹ੍ਮਲੋਕਗਮਨੇ ਉਜੁਭੂਤੋ ਮਗ੍ਗੋ. ਅਨੁਤ੍ਤਰੋਤਿ ਸੇਟ੍ਠੋ ਬ੍ਰਹ੍ਮਵਿਹਾਰਸਭਾਵਤੋ. ਤੇਨਾਹ ‘‘ਉਤ੍ਤਮਮਗ੍ਗੋ ਨਾਮਾ’’ਤਿ. ਸਬ੍ਭਿ ਰਕ੍ਖਿਤੋ ਸਾਧੂਹਿ ਯਥਾ ਪਰਿਹਾਨਿ ਨ ਹੋਤਿ, ਏਵਂ ਪਟਿਪਕ੍ਖਦੂਰੀਕਰਣੇਨ ਰਕ੍ਖਿਤੋ ਗੋਪਿਤੋ. ‘‘ਸਦ੍ਧਮ੍ਮੋ ਸਬ੍ਭਿ ਵਕ੍ਖਿਤੋ’’ਤਿ ਕੇਚਿ ਪਠਨ੍ਤਿ, ਤੇਸਂ ਸਪਰਹਿਤਸਾਧਨੇਨ ਸਾਧੂਹਿ ਬੁਦ੍ਧਾਦੀਹਿ ਕਥਿਤੋ ਪਵੇਦਿਤੋਤਿ ਅਤ੍ਥੋ.
ਤਙ੍ਖਣਵਿਦ੍ਧਂਸਨਧਮ੍ਮਨ੍ਤਿ ਯਸ੍ਮਿਂ ਖਣੇ ਵਿਰੋਧਿਧਮ੍ਮਸਮਾਯੋਗੋ, ਤਸ੍ਮਿਂਯੇਵ ਖਣੇ ਵਿਨਸ੍ਸਨਸਭਾਵਂ, ਯੋ ਵਾ ਸੋ ਗਮਨਸ੍ਸਾਦਾਨਂ ਦੇਵਪੁਤ੍ਤਾਨਂ ਹੇਟ੍ਠੁਪਰਿਯੇਨ ਪਟਿਮੁਖਂ ਧਾਵਨ੍ਤਾਨਂ ਸਿਰਸਿ, ਪਾਦੇ ਚ ਬਦ੍ਧਖੁਰਧਾਰਾਸਮਾਗਮਨਤੋਪਿ ਸੀਘਤਰਤਾਯ ਅਤਿਇਤ੍ਤਰੋ ਪਵਤ੍ਤਿਕ੍ਖਣੋ, ਤੇਨੇਵ ਵਿਨਸ੍ਸਨਸਭਾਵਂ. ਤਸ੍ਸ ਜੀਵਿਤਸ੍ਸ. ਗਤਿਨ੍ਤਿ ਨਿਟ੍ਠਂ. ਮਨ੍ਤਾਯਨ੍ਤਿ ਮਨ੍ਤੇਯ੍ਯਨ੍ਤਿ ਵੁਤ੍ਤਂ ਹੋਤੀਤਿ ਆਹ ‘‘ਮਨ੍ਤੇਤਬ੍ਬ’’ਨ੍ਤਿ. ਕਰਣਤ੍ਥੇ ਵਾ ਭੁਮ੍ਮਨ੍ਤਿ ‘‘ਮਨ੍ਤਾਯ’’ਨ੍ਤਿ ਇਦਂ ਭੁਮ੍ਮਂ ਕਰਣਤ੍ਥੇ ਦਟ੍ਠਬ੍ਬਂ ਯਥਾ ‘‘ਞਾਤਾਯ’’ਨ੍ਤਿ. ਸਬ੍ਬਪਲਿਬੋਧੇਤਿ ਸਬ੍ਬੇਪਿ ਕੁਸਲਕਿਰਿਯਾਯ ਵਿਬਨ੍ਧੇ ਉਪਰੋਧੇ.
ਬ੍ਰਾਹ੍ਮਣਮਹਾਸਾਲਾਦੀਨਂ ਆਮਨ੍ਤਨਾਵਣ੍ਣਨਾ
੩੨੪. ਅਪ੍ਪੇਸਕ੍ਖਾਤਿ ਅਪ੍ਪਾਨੁਭਾਵਾਤਿ ਆਹ ‘‘ਪਬ੍ਬਜਿਤਕਾਲਤੋ ਪਟ੍ਠਾਯਾ’’ਤਿਆਦਿ.
ਚਕ੍ਕਵਤ੍ਤਿ ਰਾਜਾ ਵਿਯ ਸਮ੍ਭਾਵਿਤੋ.
ਮਹਾਗੋਵਿਨ੍ਦਪਬ੍ਬਜ੍ਜਾਵਣ੍ਣਨਾ
੩੨੮. ਸਮਾਪਤ੍ਤੀਨਂ ਆਜਾਨਨਂ ਨਾਮ ਅਤ੍ਤਪਚ੍ਚਕ੍ਖਤਾ, ਸਚ੍ਛਿਕਿਰਿਯਾਤਿ ਆਹ ‘‘ਨ ਸਕ੍ਖਿਂਸੁ ਨਿਬ੍ਬਤ੍ਤੇਤੁ’’ਨ੍ਤਿ.
੩੨੯. ਇਮਿਨਾਤਿ ‘‘ਸਰਾਮਹ’’ਨ੍ਤਿ ਇਮਿਨਾ ਪਦੇਨ. ‘‘ਸਰਾਮਹ’’ਨ੍ਤਿ ਹਿ ਵਦਨ੍ਤੇਨ ਭਗਵਤੋ ਮਹਾਬ੍ਰਹ੍ਮੁਨਾ ਕਥਿਤਂ ‘‘ਤਥੇਵ ਤ’’ਨ੍ਤਿ ਭਗਵਤਾ ਪਟਿਞ੍ਞਾਤਮੇਵ ਜਾਤਨ੍ਤਿ. ਨ ਵਟ੍ਟੇ ਨਿਬ੍ਬਿਨ੍ਦਨਤ੍ਥਾਯ ਚਤੁਸਚ੍ਚਕਮ੍ਮਟ੍ਠਾਨਕਥਾਯ ਅਭਾਵਤੋ. ਅਸਤਿ ਪਨ ਵਟ੍ਟੇ ਨਿਬ੍ਬਿਦਾਯ ਵਿਰਾਗਾਨਂ ਅਸਮ੍ਭਵੋ ਏਵਾਤਿ ਆਹ ‘‘ਨ ਵਿਰਾਗਾਯਾ’’ਤਿਆਦਿ. ਏਕਨ੍ਤਮੇਵ ਵਟ੍ਟੇ ਨਿਬ੍ਬਿਨ੍ਦਨਤ੍ਥਾਯ ਅਨੇਕਾਕਾਰਵੋਕਾਰਵਟ੍ਟੇ ਆਦੀਨਵਵਿਭਾਵਨਤੋ.
‘‘ਨਿਬ੍ਬਿਦਾਯਾ’’ਤਿ ਇਮਿਨਾ ਪਦੇਨ ਵਿਪਸ੍ਸਨਾ ਵੁਤ੍ਤਾ. ਏਸ ਨਯੋ ਸੇਸੇਸੁਪਿ. ਵਵਤ੍ਥਾਨਕਥਾਤਿ ਵਿਪਸ੍ਸਨਾਮਗ੍ਗਨਿਬ੍ਬਾਨਾਨਂ ਤਂਤਂਪਦੇਹਿ ਵਵਤ੍ਥਪੇਤ੍ਵਾ ਕਥਾ. ਅਯਮੇਤ੍ਥ ਨਿਪ੍ਪਰਿਯਾਯਕਥਾਤਿ ਆਹ ‘‘ਪਰਿਯਾਯੇਨ ਪਨਾ’’ਤਿਆਦਿ.
੩੩੦. ਪਰਿਪੂਰੇਤੁਨ੍ਤਿ ਭਾਵਨਾਪਾਰਿਪੂਰਿਵਸੇਨ ਪਰਿਪੁਣ੍ਣੇ ਕਾਤੁਂ, ਨਿਬ੍ਬਤ੍ਤੇਤੁਨ੍ਤਿ ਅਤ੍ਥੋ. ਬ੍ਰਹ੍ਮਚਰਿਯਚਿਣ੍ਣਕੁਲਪੁਤ੍ਤਾਨਨ੍ਤਿ ਚਿਣ੍ਣਮਗ੍ਗਬ੍ਰਹ੍ਮਚਰਿਯਾਨਂ ਕੁਲਪੁਤ੍ਤਾਨਨ੍ਤਿ ਉਕ੍ਕਟ੍ਠਨਿਦ੍ਦੇਸੇਨ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਪੇਸਿ.
ਅਭਿਨਨ੍ਦਨਂ ਨਾਮ ਸਮ੍ਪਟਿਚ੍ਛਨਂ ‘‘ਅਭਿਨਨ੍ਦਨ੍ਤਿ ਆਗਤ’’ਨ੍ਤਿਆਦੀਸੁ ਵਿਯ, ਤਞ੍ਚੇਤ੍ਥ ਅਤ੍ਥਤੋ ਚਿਤ੍ਤਸ੍ਸ ਅਤ੍ਤਮਨਤਾਤਿ ਆਹ ‘‘ਚਿਤ੍ਤੇਨ ਸਮ੍ਪਟਿਚ੍ਛਨ੍ਤੋ ਅਭਿਨਨ੍ਦਿਤ੍ਵਾ’’ਤਿ. ‘‘ਸਾਧੁ ਸਾਧੂ’’ਤਿ ਵਾਚਾਯ ਸਮ੍ਪਹਂਸਨਾ ਅਨੁਮੋਦਨਾਤਿ ਆਹ ‘‘ਵਾਚਾਯ ਸਮ੍ਪਹਂਸਮਾਨੋ ਅਨੁਮੋਦਿਤ੍ਵਾ’’ਤਿ.
ਮਹਾਗੋਵਿਨ੍ਦਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ.