੪. ਮਹਾਸੁਦਸ੍ਸਨਸੁਤ੍ਤਵਣ੍ਣਨਾ
ਕੁਸਾਵਤੀਰਾਜਧਾਨੀਵਣ੍ਣਨਾ
੨੪੨. ਸੋਵਣ੍ਣਮਯਾਤਿ ਸੁਵਣ੍ਣਮਯਾ. ਅਯਂ ਪਾਕਾਰੋਤਿ ਸਬ੍ਬਰਤਨਮਯੋ ਪਾਕਾਰੋ. ਤਯੋ ਤਯੋਤਿ ਅਨ੍ਤੋ ਚ ਤਯੋ, ਬਹਿ ਚ ਤਯੋਤਿ ਤਯੋ ਤਯੋ.
ਏਸਿਕਤ੍ਥਮ੍ਭੋ ਇਨ੍ਦਖੀਲੋ ਨਗਰਸੋਭਨੋ ਅਲਙ੍ਕਾਰਤ੍ਥਮ੍ਭੋ. ਅਙ੍ਗੀਯਤਿ ਞਾਯਤਿ ਪੁਥੁਲਭਾਵੋ ਏਤੇਨਾਤਿ ਅਙ੍ਗਂ, ਪਰਿਕ੍ਖੇਪੋ. ਤਿਪੋਰਿਸਂ ਅਙ੍ਗਂ ਏਤਿਸ੍ਸਾਤਿ ਤਿਪੋਰਿਸਙ੍ਗਾ. ਤੇਨਾਹ ‘‘ਤੇਨਾ’’ਤਿਆਦਿ. ਤੇਨ ਪਞ੍ਚਹਤ੍ਥਪ੍ਪਮਾਣੇਨ ਤਿਪੋਰਿਸੇਨ. ਪਣ੍ਣਫਲੇਸੁਪੀਤਿ ਸਬ੍ਬਰਤਨਮਯਾਨਂ ਤਾਲਾਨਂ ਪਣ੍ਣਫਲੇਸੁਪਿ. ਏਸੇਵ ਨਯੋਤਿ ‘‘ਪਣ੍ਣੇਸੁ ਏਕਂ ਪਤ੍ਤਕਂ ਸੋਵਣ੍ਣਮਯਂ, ਏਕਂ ਰੂਪਿਯਮਯਂ. ਫਲੇਸੁਪਿ ਏਕੋ ਲੇਖਾਭਾਵੋ ਸੋਵਣ੍ਣਮਯੋ, ਏਕੋ ਰੂਪਿਯਮਯੋ’’ਤਿਆਦਿਕੋ ਅਯਮਤ੍ਥੋ ਅਤਿਦਿਟ੍ਠੋ. ਪਾਕਾਰਨ੍ਤਰੇਤਿ ਦ੍ਵਿਨ੍ਨਂ ਦ੍ਵਿਨ੍ਨਂ ਪਾਕਾਰਾਨਂ ਅਨ੍ਤਰੇ. ਏਕੇਕਾ ਹੁਤ੍ਵਾ ਠਿਤਾ ਤਾਲਪਨ੍ਤਿ.
ਛੇਕੋਤਿ ਪਟੁ ਸੁਵਿਸਦੋ, ਸੋ ਚਸ੍ਸ ਪਟੁਭਾਵੋ ਮਨੋਸਾਰੋਤਿ ਆਹ ‘‘ਸੁਨ੍ਦਰੋ’’ਤਿ. ਰਞ੍ਜੇਤੁਨ੍ਤਿ ਰਾਗਂ ਉਪ੍ਪਾਦੇਤੁਂ. ਖਮਤੇਵਾਤਿ ਰੋਚਤੇਵ. ਨ ਬੀਭਚ੍ਛੇਤੀਤਿ ਨ ਤਜ੍ਜੇਤਿ, ਸੋਤਸੁਖਭਾਵਤੋ ਪਿਯਾਯਿਤਬ੍ਬੋ ਚ ਹੋਤਿ. ਕੁਮ੍ਭਥੁਣਦਦ੍ਦਰਿਕਾਦਿ ਏਕਤਲਂ ਤੂਰਿਯਂ. ਉਭਯਤਲਂ ਪਾਕਟਮੇਵ. ਸਬ੍ਬਤੋ ਪਰਿਯੋਨਦ੍ਧਂ ਚਤੁਰਸ੍ਸਅਮ੍ਬਣਕਂ, ਪਣਵਾਦਿ ਚ. ਵਂਸਾਦੀਤਿ ਆਦਿ-ਸਦ੍ਦੇਨ ਸਙ੍ਖਾਦਿਕਂ ਸਙ੍ਗਣ੍ਹਾਤਿ. ਸੁਮੁਚ੍ਛਿਤਸ੍ਸਾਤਿ ਸੁਟ੍ਠੁ ਪਰਿਯਤ੍ਤਸ੍ਸ. ਪਮਾਣੇਤਿ ਨਾਤਿਦਲ਼੍ਹਨਾਤਿਸਿਥਿਲਤਾਸਙ੍ਖਾਤੇ ਮਜ੍ਝਿਮੇ ਮੁਚ੍ਛਨਪ੍ਪਮਾਣੇ. ਹਤ੍ਥਂ ਵਾ ਪਾਦਂ ਵਾ ਚਾਲੇਤ੍ਵਾਤਿ ਹਤ੍ਥਲਯਪਾਦਲਯੇ ਸਜ੍ਜੇਤ੍ਵਾ. ਨਚ੍ਚਨ੍ਤਾਤਿ ਸਾਖਾਨਚ੍ਚਂ ਨਚ੍ਚਨ੍ਤਾ.
ਚਕ੍ਕਰਤਨਵਣ੍ਣਨਾ
੨੪੩. ਉਪੋਸਥਂ ਵੁਚ੍ਚਤਿ ਅਟ੍ਠਙ੍ਗਸਮਨ੍ਨਾਗਤਂ ਸਬ੍ਬਦਿਵਸੇਸੁ ਗਹਟ੍ਠੇਹਿ ਰਕ੍ਖਿਤਬ੍ਬਸੀਲਂ, ਸਮਾਦਾਨਵਸੇਨ ਤਂ ਤਸ੍ਸ ਅਤ੍ਥੀਤਿ ਉਪੋਸਥਿਕੋ, ਤਸ੍ਸ ਉਪੋਸਥਿਕਸ੍ਸ. ਤੇਨਾਹ ‘‘ਸਮਾਦਿਨ੍ਨਉਪੋਸਥਙ੍ਗਸ੍ਸਾ’’ਤਿ. ਤਦਾਤਿ ਤਸ੍ਮਿਂ ਕਾਲੇ. ਕਸ੍ਮਿਂ ਪਨ ਕਾਲੇਤਿ? ਯਸ੍ਮਿਂ ਕਾਲੇ ਚਕ੍ਕਵਤ੍ਤਿਭਾਵਸਂਵਤ੍ਤਨਿਯਦਾਨਸੀਲਾਦਿਪੁਞ੍ਞਸਮ੍ਭਾਰਸਮੁਦਾਗਮਸਮ੍ਪਨ੍ਨੋ ਪੂਰਿਤਚਕ੍ਕਵਤ੍ਤਿਵਤ੍ਤੋ ਕਾਲਦੀਪਦੇਸਵਿਸੇਸਪਚ੍ਚਾਜਾਤਿਯਾ ਚੇਵ ਕੁਲਰੂਪਭੋਗਾਧਿਪਤੇਯ੍ਯਾਦਿਗੁਣਵਿਸੇਸਸਮ੍ਪਤ੍ਤਿਯਾ ਚ ਤਦਨੁਰੂਪੇ ਅਤ੍ਤਭਾਵੇ ਠਿਤੋ ਹੋਤਿ, ਤਸ੍ਮਿਂ ਕਾਲੇ. ਤਾਦਿਸੇ ਹਿ ਕਾਲੇ ਚਕ੍ਕਵਤ੍ਤਿਭਾਵੀ ਪੁਰਿਸਵਿਸੇਸੋ ਯਥਾਵੁਤ੍ਤਗੁਣਸਮਨ੍ਨਾਗਤੋ ਰਾਜਾ ਖਤ੍ਤਿਯੋ ਮੁਦ੍ਧਾਵਸਿਤ੍ਤੋ ਵਿਸੁਦ੍ਧਸੀਲੋ ਅਨੁਪੋਸਥਂ ਸਤਸਹਸ੍ਸਵਿਸ੍ਸਜ੍ਜਨਾਦਿਨਾ ਸਮ੍ਮਾਪਟਿਪਤ੍ਤਿਂ ਪਟਿਪਜ੍ਜਤਿ, ਨ ਯਦਾ ਚਕ੍ਕਰਤਨਂ ਉਪ੍ਪਜ੍ਜਤਿ, ਤਦਾ ਏਵ. ਇਮੇ ਚ ਵਿਸੇਸਾ ਸਬ੍ਬਚਕ੍ਕਵਤ੍ਤੀਨਂ ਸਾਧਾਰਣਵਸੇਨ ਵੁਤ੍ਤਾ. ਤੇਨਾਹ ‘‘ਪਾਤੋਵ…ਪੇ… ਧਮ੍ਮਤਾ’’ਤਿ. ਬੋਧਿਸਤ੍ਤਾਨਂ ਪਨ ਚਕ੍ਕਵਤ੍ਤਿਭਾਵਾਵਹਗੁਣਾਪਿ ਚਕ੍ਕਵਤ੍ਤਿਗੁਣਾਪਿ ਸਾਤਿਸਯਾਵ ਹੋਨ੍ਤਿ.
ਵੁਤ੍ਤਪ੍ਪਕਾਰਪੁਞ੍ਞਕਮ੍ਮਪਚ੍ਚਯਨ੍ਤਿ ਚਕ੍ਕਵਤ੍ਤਿਭਾਵਾਵਹਦਾਨਦਮਸਂਯਮਾਦਿਪੁਞ੍ਞਕਮ੍ਮਹੇਤੁਕਂ. ਨੀਲਮਣਿਸਙ੍ਘਾਤਸਦਿਸਨ੍ਤਿ ਇਨ੍ਦਨੀਲਮਣਿਸਞ੍ਚਯਸਮਾਨਂ. ਦਿਬ੍ਬਾਨੁਭਾਵਯੁਤ੍ਤਤ੍ਤਾਤਿ ਦਸ੍ਸਨੇਯ੍ਯਤਾ, ਮਨੁਞ੍ਞਘੋਸਤਾ, ਆਕਾਸਗਾਮਿਤਾ, ਓਭਾਸਵਿਸ੍ਸਜ੍ਜਨਾ, ਅਪ੍ਪਟਿਘਾਤਤਾ, ਰਞ੍ਞੋ ਇਚ੍ਛਿਤਤ੍ਥਨਿਪ੍ਫਤ੍ਤਿਕਾਰਣਤਾਤਿ ਏਵਮਾਦੀਹਿ ਦਿਬ੍ਬਸਦਿਸੇਹਿ ਆਨੁਭਾਵੇਹਿ ਸਮਨ੍ਨਾਗਤਤ੍ਤਾ, ਏਤੇਨ ਦਿਬ੍ਬਂ ਵਿਯਾਤਿ ਦਿਬ੍ਬਨ੍ਤਿ ਦਸ੍ਸੇਤਿ. ਨ ਹਿ ਤਂ ਦੇਵਲੋਕਪਰਿਯਾਪਨ੍ਨਂ. ਸਹਸ੍ਸਂ ਅਰਾ ਏਤਸ੍ਸਾਤਿ ਵਾ ਸਹਸ੍ਸਾਰਂ. ਸਬ੍ਬੇਹਿ ਆਕਾਰੇਹੀਤਿ ਸਬ੍ਬੇਹਿ ਸੁਨ੍ਦਰੇਹਿ ਪਰਿਪੁਣ੍ਣਾਵਯਵੇ ਲਕ੍ਖਣਸਮ੍ਪਨ੍ਨੇ ਚਕ੍ਕੇ ਇਚ੍ਛਿਤਬ੍ਬੇਹਿ ਆਕਾਰੇਹਿ. ਪਰਿਪੂਰਨ੍ਤਿ ਪਰਿਪੁਣ੍ਣਂ, ਸਾ ਚਸ੍ਸਾ ਪਾਰਿਪੂਰਿਂ ਇਦਾਨੇਵ ਵਿਤ੍ਥਾਰੇਸ੍ਸਤਿ.
ਪਨਾਲ਼ੀਤਿ ਛਿਦ੍ਦਂ. ਸੁਦ੍ਧਸਿਨਿਦ੍ਧਦਨ੍ਤਪਨ੍ਤਿਯਾ ਨਿਬ੍ਬਿਵਰਾਯਾਤਿ ਅਧਿਪ੍ਪਾਯੋ. ਤਸ੍ਸਾ ਪਨ ਪਨਾਲ਼ਿਯਾ ਸਮਨ੍ਤਤੋ ਪਸ੍ਸਸ੍ਸ ਰਜਤਮਯਤ੍ਤਾ ਸਾਰਰਜਤਮਯਾ ਵੁਤ੍ਤਾ. ਯਸ੍ਮਾ ਚਸ੍ਸ ਚਕ੍ਕਸ੍ਸ ਰਥਚਕ੍ਕਸ੍ਸ ਵਿਯ ਅਨ੍ਤੋਭਾਵੋ ਨਾਮ ਨਤ੍ਥਿ, ਤਸ੍ਮਾ ਵੁਤ੍ਤਂ ‘‘ਉਭੋਸੁਪਿ ਬਾਹਿਰਨ੍ਤੇਸੂ’’ਤਿ. ਕਤਪਰਿਕ੍ਖੇਪਾ ਹੋਤਿ ਪਨਾਲ਼ੀਤਿ ਯੋਜਨਾ. ਨਾਭਿਪਨਾਲ਼ਿਪਰਿਕ੍ਖੇਪਪਟ੍ਟੇਸੂਤਿ ਨਾਭਿਪਰਿਕ੍ਖੇਪਪਟ੍ਟੇ ਚੇਵ ਨਾਭਿਯਾ ਪਨਾਲ਼ਿਪਰਿਕ੍ਖੇਪਪਟ੍ਟੇ ਚ.
ਤੇਸਨ੍ਤਿ ਅਰਾਨਂ. ਘਟਕਾ ਨਾਮ ਅਲਙ੍ਕਾਰਭੂਤਾ ਖੁਦ੍ਦਕਪੁਣ੍ਣਘਟਾ. ਤਥਾ ਮਣਿਕਾ ਨਾਮ ਮੁਤ੍ਤਾਵਲ਼ਿਕਾ. ਪਰਿਚ੍ਛੇਦਲੇਖਾ ਤਸ੍ਸ ਤਸ੍ਸ ਪਰਿਚ੍ਛੇਦਦਸ੍ਸਨਵਸੇਨ ਠਿਤਾ ਪਰਿਚ੍ਛਿਨ੍ਨਲੇਖਾ. ਆਦਿ-ਸਦ੍ਦੇਨ ਮਾਲਾਕਮ੍ਮਾਦਿਂ ਸਙ੍ਗਣ੍ਹਾਤਿ. ਸੁਵਿਭਤ੍ਤਾਨੇਵਾਤਿ ਅਞ੍ਞਮਞ੍ਞਂ ਅਸਂਕਿਣ੍ਣਤ੍ਤਾ ਸੁਟ੍ਠੁ ਵਿਭਤ੍ਤਾਨਿ.
‘‘ਸੁਰਤ੍ਤਾ’’ਤਿਆਦੀਸੁ ਸੁਰਤ੍ਤਗ੍ਗਹਣੇਨ ਮਹਾਨਾਮਵਣ੍ਣਤਂ ਪਟਿਕ੍ਖਿਪਤਿ, ਸੁਦ੍ਧਗ੍ਗਹਣੇਨ ਸਂਙ੍ਕਿਲਿਟ੍ਠਤਂ, ਸਿਨਿਦ੍ਧਗ੍ਗਹਣੇਨ ਲੂਖਤਂ. ਕਾਮਂ ਤਸ੍ਸ ਚਕ੍ਕਰਤਨਸ੍ਸ ਨੇਮਿਮਣ੍ਡਲਂ ਅਸਨ੍ਧਿਕਮੇਵ ਨਿਬ੍ਬਤ੍ਤਂ, ਸਬ੍ਬਤ੍ਥਕਮੇਵ ਪਨ ਕੇਵਲਂ ਪਵਾਲ਼ਵਣ੍ਣੇਨ ਚ ਸੋਭਤੀਤਿ ਪਕਤਿਚਕ੍ਕਸ੍ਸ ਸਨ੍ਧਿਯੁਤ੍ਤਟ੍ਠਾਨੇ ਸੁਰਤ੍ਤਸੁਵਣ੍ਣਪਟ੍ਟਾਦਿਮਯਾਹਿ ਵਟ੍ਟਪਰਿਚ੍ਛੇਦਲੇਖਾਹਿ ਪਞ੍ਞਾਯਮਾਨਾਹਿ ਸਸਨ੍ਧਿਕਾ ਵਿਯ ਦਿਸ੍ਸਨ੍ਤੀਤਿ ਆਹ ‘‘ਸਨ੍ਧੀਸੁ ਪਨਸ੍ਸਾ’’ਤਿਆਦਿ.
ਨੇਮਿਮਣ੍ਡਲਪਿਟ੍ਠਿਯਨ੍ਤਿ ਨੇਮਿਮਣ੍ਡਲਸ੍ਸ ਪਿਟ੍ਠਿਪਦੇਸੇ. ਆਕਾਸਚਾਰਿਭਾਵਤੋ ਹਿਸ੍ਸ ਤਤ੍ਥ ਵਾਤਗ੍ਗਾਹੀ ਪਵਾਲ਼ਦਣ੍ਡੋ ਹੋਤਿ. ਦਸਨ੍ਨਂ ਦਸਨ੍ਨਂ ਅਰਾਨਂ ਅਨ੍ਤਰੇਤਿ ਦਸਨ੍ਨਂ ਦਸਨ੍ਨਂ ਅਰਾਨਂ ਅਨ੍ਤਰੇ ਸਮੀਪੇ ਪਦੇਸੇ. ਛਿਦ੍ਦਮਣ੍ਡਲਖਚਿਤੋਤਿ ਮਣ੍ਡਲਸਣ੍ਠਾਨਛਿਦ੍ਦਵਿਚਿਤ੍ਤੋ. ਸੁਕੁਸਲਸਮਨ੍ਨਾਹਤਸ੍ਸਾਤਿ ਸੁਟ੍ਠੁ ਕੁਸਲੇਨ ਸਿਪ੍ਪਿਨਾ ਪਹਤਸ੍ਸ, ਵਾਦਿਤਸ੍ਸਾਤਿ ਅਤ੍ਥੋ. ਵਗ੍ਗੂਤਿ ਮਨੋਰਮੋ. ਰਜਨੀਯੋਤਿ ਸੁਣਨ੍ਤਾਨਂ ਰਾਗੁਪ੍ਪਾਦਕੋ. ਕਮਨੀਯੋਤਿ ਕਨ੍ਤੋ. ਸਮੋਸਰਿਤਕੁਸੁਮਦਾਮਾਤਿ ਓਲਮ੍ਬਿਤਸੁਗਨ੍ਧਕੁਸੁਮਦਾਮਾ. ਨੇਮਿਪਰਿਕ੍ਖੇਪਸ੍ਸਾਤਿ ਨੇਮਿਪਰਿਯਨ੍ਤਪਰਿਕ੍ਖੇਪਸ੍ਸ. ਨਾਭਿਪਨਾਲ਼ਿਯਾ ਦ੍ਵਿਨ੍ਨਂ ਪਸ੍ਸਾਨਂ ਵਸੇਨ ‘‘ਦ੍ਵਿਨ੍ਨਮ੍ਪਿ ਨਾਭਿਪਨਾਲ਼ੀਨ’’ਨ੍ਤਿ ਵੁਤ੍ਤਂ. ਏਕਾ ਏਵ ਹਿ ਸਾ ਪਨਾਲ਼ਿ. ਯੇਹੀਤਿ ਯੇਹਿ ਦ੍ਵੀਹਿ ਮੁਖੇਹਿ. ਪੁਨ ਯੇਹੀਤਿ ਯੇਹਿ ਮੁਤ੍ਤਕਲਾਪੇਹਿ.
ਓਧਾਪਯਮਾਨਨ੍ਤਿ ਸੋਤੁਂ ਅਵਹਿਤਾਨਿ ਕੁਰੁਮਾਨਂ.
ਚਨ੍ਦੋ ਪੁਰਤੋ ਚਕ੍ਕਰਤਨਂ ਪਚ੍ਛਾਤਿ ਏਵਂ ਪੁਬ੍ਬਾਪਰਿਯੇਨ ਪੁਬ੍ਬਾਪਰਭਾਵੇਨ.
ਅਨ੍ਤੇਪੁਰਸ੍ਸਾਤਿ ਅਨੁਰਾਧਪੁਰੇ ਰਞ੍ਞੋ ਅਨ੍ਤੇਪੁਰਸ੍ਸ. ਉਤ੍ਤਰਸੀਹਪਞ੍ਜਰਸਦਿਸੇਤਿ ਤਦਾ ਰਞ੍ਞੋ ਪਾਸਾਦੇ ਤਾਦਿਸਸ੍ਸ ਉਤ੍ਤਰਦਿਸਾਯ ਸੀਹਪਞ੍ਜਰਸ੍ਸ ਲਬ੍ਭਮਾਨਤ੍ਤਾ ਵੁਤ੍ਤਂ. ਸੁਖੇਨ ਸਕ੍ਕਾਤਿ ਕਿਞ੍ਚਿ ਅਨਾਰੁਹਿਤ੍ਵਾ, ਸਰੀਰਞ੍ਚ ਅਨੁਲ੍ਲਙ੍ਘਿਤ੍ਵਾ ਯਥਾਠਿਤੇਨੇਵ ਹਤ੍ਥੇਨ ਪੁਪ੍ਫਮੁਟ੍ਠਿਯੋ ਖਿਪਿਤ੍ਵਾ ਸੁਖੇਨ ਸਕ੍ਕਾ ਹੋਤਿ ਪੂਜੇਤੁਂ.
ਨਾਨਾਵਿਰਾਗਰਤਨਪ੍ਪਭਾਸਮੁਜ੍ਜਲਨ੍ਤਿ ਨਾਨਾਵਿਧਵਿਚਿਤ੍ਤਵਣ੍ਣਰਤਨੋਭਾਸਪਭਸ੍ਸਰਂ. ਆਕਾਸਂ ਅਬ੍ਭੁਗ੍ਗਨ੍ਤ੍ਵਾ ਪਵਤ੍ਤੇਤਿ ਆਗਨ੍ਤ੍ਵਾ ਠਿਤਟ੍ਠਾਨਤੋ ਉਪਰਿ ਆਕਾਸਂ ਅਬ੍ਭੁਗ੍ਗਨ੍ਤ੍ਵਾ ਪਵਤ੍ਤੇ.
੨੪੪. ਰਾਜਾਯੁਤ੍ਤਾਤਿ ਰਞ੍ਞੋ ਕਿਚ੍ਚੇ ਆਯੁਤ੍ਤਕਪੁਰਿਸਾ.
ਸਿਨੇਰੁਂ ਵਾਮਪਸ੍ਸੇਨ ਕਤ੍ਵਾ ਤਸ੍ਸ ਧੁਰਤਰਂ ਗਚ੍ਛਨ੍ਤੋ ‘‘ਵਾਮਪਸ੍ਸੇਨ ਸਿਨੇਰੁਂ ਪਹਾਯਾ’’ਤਿ ਵੁਤ੍ਤਂ.
ਵਿਨਿਬ੍ਬੇਧੇਨਾਤਿ ਤਿਰਿਯਂ ਵਿਨਿਵਿਜ੍ਝਨਵਸੇਨ. ਸਨ੍ਨਿਵੇਸਕ੍ਖਮੋਤਿ ਖਨ੍ਧਾਵਾਰਸਨ੍ਨਿਵੇਸਯੋਗ੍ਯੋ. ਸੁਲਭਾਹਾਰੁਪਕਰਣੋਤਿ ਸੁਖੇਨੇਵ ਲਦ੍ਧਬ੍ਬਧਞ੍ਞਗੋਰਸਦਾਰੁਤਿਣਾਦਿਭੋਜਨਸਾਧਨੋ.
ਪਰਚਕ੍ਕਨ੍ਤਿ ਪਰਸ੍ਸ ਰਞ੍ਞੋ ਸੇਨਾ, ਆਣਾ ਵਾ.
ਆਗਮਨਨਨ੍ਦਨੋਤਿ ਆਗਮਨੇਨ ਨਨ੍ਦਿਜਨਨੋ. ਗਮਨੇਨ ਸੋਚੇਤੀਤਿ ਗਮਨਸੋਚਨੋ. ਉਪਕਪ੍ਪੇਥਾਤਿ ਉਪਰੂਪਰਿ ਕਪ੍ਪੇਥ, ਸਂਵਿਦਹਥ ਉਪਨੇਥਾਤਿ ਅਤ੍ਥੋ. ਉਪਪਰਿਕ੍ਖਿਤ੍ਵਾਤਿ ਹੇਤੁਤੋਪਿ ਸਭਾਵਤੋਪਿ ਫਲਤੋਪਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕਾਦਿਆਦੀਨਵਤੋਪਿ ਵੀਮਂਸਿਤ੍ਵਾ. ਵਿਭਾਵੇਨ੍ਤਿ ਪਞ੍ਞਾਯ ਅਤ੍ਥਂ ਵਿਭੂਤਂ ਕਰੋਨ੍ਤੀਤਿ ਵਿਭਾਵਿਨੋ, ਪਞ੍ਞਵਨ੍ਤੋ. ਅਨੁਯਨ੍ਤਾਤਿ ਅਨੁਵਤ੍ਤਕਾ, ਅਨੁਵਤ੍ਤਕਭਾਵੇਨੇਵ, ਪਨ ਰਞ੍ਞੋ ਚ ਮਹਾਨੁਭਾਵੇਨ ਤੇ ਜਿਗੁਚ੍ਛਨਵਸੇਨ ਪਾਪਤੋ ਅਨੋਰਮਨ੍ਤਾਪਿ ਏਕਚ੍ਚੇ ਓਤ੍ਤਪ੍ਪਵਸੇਨ ਓਰਮਨ੍ਤੀਤਿ ਵੇਦਿਤਬ੍ਬਂ.
ਓਗਚ੍ਛਮਾਨਨ੍ਤਿ ਓਸੀਦਨ੍ਤਂ. ਯੋਜਨਮਤ੍ਤਨ੍ਤਿ ਵਿਤ੍ਥਾਰਤੋ ਯੋਜਨਮਤ੍ਤਂ ਪਦੇਸਂ. ਗਮ੍ਭੀਰਭਾਵੇਨ ਪਨ ਯਥਾ ਭੂਮਿ ਦਿਸ੍ਸਤਿ, ਏਵਂ ਓਗਚ੍ਛਤਿ. ਤੇਨਾਹ ‘‘ਮਹਾਸਮੁਦ੍ਦਤਲ’’ਨ੍ਤਿਆਦਿ. ਅਨ੍ਤੇ ਚਕ੍ਕਰਤਨਂ ਉਦਕੇਨ ਸੇਨਾਯ ਅਨਜ੍ਝੋਤ੍ਥਰਣਤ੍ਥਂ. ਪੁਰਤ੍ਥਿਮੋ ਮਹਾਸਮੁਦ੍ਦੋ ਪਰਿਯਨ੍ਤੋ ਏਤਸ੍ਸਾਤਿ ਪੁਰਤ੍ਥਿਮਮਹਾਸਮੁਦ੍ਦਪਰਿਯਨ੍ਤੋ, ਤਂ ਪੁਰਤ੍ਥਿਮਮਹਾਸਮੁਦ੍ਦਪਰਿਯਨ੍ਤਂ, ਪੁਰਤ੍ਥਿਮਮਹਾਸਮੁਦ੍ਦਂ ਪਰਿਯਨ੍ਤਂ ਕਤ੍ਵਾਤਿ ਅਤ੍ਥੋ.
ਚਾਤੁਰਨ੍ਤਾਯਾਤਿ ਚਤੁਸਮੁਦ੍ਦਨ੍ਤਾਯ, ਪੁਰਤ੍ਥਿਮਦਿਸਾਦਿਚਤੁਕੋਟ੍ਠਾਸਨ੍ਤਾਯ ਵਾ. ਸੋਭਯਮਾਨਂ ਵਿਯਾਤਿ ਵਿਯ-ਸਦ੍ਦੋ ਨਿਪਾਤਮਤ੍ਤਂ. ਅਤ੍ਤਨੋ ਅਚ੍ਛਰਿਯਗੁਣੇਹਿ ਸੋਭਨ੍ਤਮੇਵ ਹਿ ਤਂ ਤਿਟ੍ਠਤਿ. ਪਾਲ਼ਿਯਮ੍ਪਿ ਹਿ ‘‘ਉਪਸੋਭਯਮਾਨਂ’’ ਤ੍ਵੇਵ ਵੁਤ੍ਤਂ.
ਹਤ੍ਥਿਰਤਨਵਣ੍ਣਨਾ
੨੪੬. ਹਰਿਚਨ੍ਦਨਾਦੀਹੀਤਿ ਆਦਿ-ਸਦ੍ਦੇਨ ਚਤੁਜ੍ਜਾਤਿਯਗਨ੍ਧਾਦਿਂ ਸਙ੍ਗਣ੍ਹਾਤਿ. ਆਗਮਨਂ ਚਿਨ੍ਤੇਥਾਤਿ ਵਦਨ੍ਤਿ ਚਕ੍ਕਵਤ੍ਤਿਵਤ੍ਤਸ੍ਸ ਪੂਰਿਤਤਾਯ ਪਰਿਚਿਤਤ੍ਤਾ. ਕਾਲ਼ਤਿਲਕਾਦੀਨਂ ਅਭਾਵੇਨ ਵਿਸੁਦ੍ਧਸੇਤਸਰੀਰੋ. ਸਤ੍ਤਪਤਿਟ੍ਠੋਤਿ ਭੂਮਿਫੁਸਨਕੇਹਿ ਵਾਲਧਿ, ਵਰਙ੍ਗਂ, ਹਤ੍ਥੋਤਿ ਇਮੇਹਿ ਚ ਤੀਹਿ, ਚਤੂਹਿ ਪਾਦੇਹਿ ਚਾਤਿ ਸਤ੍ਤਹਿ ਅਵਯਵੇਹਿ ਪਤਿਟ੍ਠਿਤਤ੍ਤਾ ਸਤ੍ਤਪਤਿਟ੍ਠੋ. ਸਬ੍ਬਕਨਿਟ੍ਠੋਤਿ ਸਬ੍ਬੇਹਿ ਛਦ੍ਦਨ੍ਤਕੁਲਹਤ੍ਥੀਹਿ ਹੀਨੋ. ਉਪੋਸਥਕੁਲਾ ਸਬ੍ਬਜੇਟ੍ਠੋਤਿ ਉਪੋਸਥਕੁਲਤੋ ਆਗਚ੍ਛਨ੍ਤੋ ਤਤ੍ਥ ਸਬ੍ਬਪ੍ਪਧਾਨੋ ਆਗਚ੍ਛਤੀਤਿ ਯੋਜਨਾ. ਵੁਤ੍ਤਨਯੇਨਾਤਿ ‘‘ਮਹਾਦਾਨਂ ਦਤ੍ਵਾ’’ਤਿਆਦਿਨਾ ਵੁਤ੍ਤੇਨ ਨਯੇਨ. ਚਕ੍ਕਵਤ੍ਤੀਨਂ, ਚਕ੍ਕਵਤ੍ਤਿਪੁਤ੍ਤਾਨਞ੍ਚ ਚਕ੍ਕਵਤ੍ਤਿਂ ਉਦ੍ਦਿਸ੍ਸ ਚਿਨ੍ਤਯਨ੍ਤਾਨਂ ਆਗਚ੍ਛਤਿ. ਅਪਨੇਤ੍ਵਾਤਿ ਅਤ੍ਤਨੋ ਆਨੁਭਾਵੇਨ ਅਪਨੇਤ੍ਵਾ. ਗਨ੍ਧਮੇਵ ਹਿ ਤਸ੍ਸ ਇਤਰੇ ਹਤ੍ਥੀ ਨ ਸਹਨ੍ਤਿ.
ਘਰਧੇਨੁਵਚ੍ਛਕੋ ਵਿਯਾਤਿ ਘਰੇ ਪਰਿਚਿਤਧੇਨੁਯਾ ਤਤ੍ਥੇਵ ਜਾਤਸਂਵਦ੍ਧਵਚ੍ਛਕੋ ਵਿਯ. ਸਕਲਪਥਵਿਨ੍ਤਿ ਸਕਲਂ ਜਮ੍ਬੁਦੀਪਸਞ੍ਞਿਤਂ ਪਥਵਿਂ.
ਅਸ੍ਸਰਤਨਵਣ੍ਣਨਾ
੨੪੭. ਸਿਨ੍ਧਵਕੁਲਤੋਤਿ ਸਿਨ੍ਧਵਸ੍ਸਾਜਾਨੀਯਕੁਲਤੋ.
ਮਣਿਰਤਨਵਣ੍ਣਨਾ
੨੪੮. ਸਕਟਨਾਭਿਸਮਪਰਿਣਾਹਨ੍ਤਿ ਪਰਿਣਾਹਤੋ ਮਹਾਸਕਟਸ੍ਸ ਨਾਭਿਯਾ ਸਮਪ੍ਪਮਾਣਂ. ਉਭੋਸੁ ਅਨ੍ਤੇਸੂਤਿ ਹੇਟ੍ਠਾ, ਉਪਰਿ ਚਾਤਿ ਦ੍ਵੀਸੁ ਅਨ੍ਤੇਸੁ. ਕਣ੍ਣਿਕਪਰਿਯਨ੍ਤਤੋਤਿ ਦ੍ਵਿਨ੍ਨਂ ਕਞ੍ਚਨਪਦੁਮਾਨਂ ਕਣ੍ਣਿਕਾਯ ਪਰਿਯਨ੍ਤਤੋ. ਮੁਤ੍ਤਾਜਾਲਕੇ ਠਪੇਤ੍ਵਾਤਿ ਸੁਵਿਸੁਦ੍ਧੇ ਮੁਤ੍ਤਮਯੇ ਜਾਲਕੇ ਪਤਿਟ੍ਠਾਪੇਤ੍ਵਾ. ਅਰੁਣੁਗ੍ਗਮਨਵੇਲਾ ਵਿਯਾਤਿ ਅਰੁਣੁਗ੍ਗਮਨਸੀਸੇਨ ਸੂਰਿਯਉਦਯਕ੍ਖਣਂ ਉਪਲਕ੍ਖੇਤਿ.
ਇਤ੍ਥਿਰਤਨਵਣ੍ਣਨਾ
੨੪੯. ‘‘ਇਤ੍ਥਿਰਤਨਂ ਪਾਤੁਭਵਤੀ’’ਤਿ ਵਤ੍ਵਾ ਕੁਤਸ੍ਸਾ ਪਾਤੁਭਾਵੋਤਿ ਦਸ੍ਸੇਤੁਂ ‘‘ਮਦ੍ਦਰਾਜਕੁਲਤੋ’’ਤਿਆਦਿ ਵੁਤ੍ਤਂ. ਮਦ੍ਦਰਟ੍ਠਂ ਕਿਰ ਜਮ੍ਬੁਦੀਪੇ ਅਭਿਰੂਪਾਨਂ ਇਤ੍ਥੀਨਂ ਉਪ੍ਪਤ੍ਤਿਟ੍ਠਾਨਂ. ਤਥਾ ਹਿ ‘‘ਸਿਞ੍ਚਯਮਹਾਰਾਜਸ੍ਸ ਦੇਵੀ, ਵੇਸ੍ਸਨ੍ਤਰਮਹਾਰਾਜਸ੍ਸ ਦੇਵੀ, ਭਦ੍ਦਕਾਪਿਲਾਨੀ’’ਤਿ ਏਵਮਾਦਿ ਇਤ੍ਥਿਰਤਨਂ ਮਦ੍ਦਰਟ੍ਠੇ ਏਵ ਉਪ੍ਪਨ੍ਨਂ. ਪੁਞ੍ਞਾਨੁਭਾਵੇਨਾਤਿ ਚਕ੍ਕਵਤ੍ਤਿਰਞ੍ਞੋ ਪੁਞ੍ਞਤੇਜੇਨ.
ਸਣ੍ਠਾਨਪਾਰਿਪੂਰਿਯਾਤਿ ਹਤ੍ਥਪਾਦਾਦਿਸਰੀਰਾਵਯਵਾਨਂ ਸੁਸਣ੍ਠਿਤਾਯ. ਅਵਯਵਪਾਰਿਪੂਰਿਯਾ ਹਿ ਸਮੁਦਾਯਪਾਰਿਪੂਰਿਸਿਦ੍ਧਿ. ਰੂਪਨ੍ਤਿ ਸਰੀਰਂ ‘‘ਰੂਪਂ ਤ੍ਵੇਵ ਸਙ੍ਖਂ ਗਚ੍ਛਤੀ’’ਤਿਆਦੀਸੁ (ਮ. ਨਿ. ੧.੩੦੬) ਵਿਯ. ਦਸ੍ਸਨੀਯਾਤਿ ਸੁਰੂਪਭਾਵੇਨ ਪਸ੍ਸਿਤਬ੍ਬਯੁਤ੍ਤਾ. ਤੇਨਾਹ ‘‘ਦਿਸ੍ਸਮਾਨਾਵਾ’’ਤਿਆਦਿ. ਸੋਮਨਸ੍ਸਵਸੇਨ ਚਿਤ੍ਤਂ ਪਸਾਦੇਤਿ ਯੋਨਿਸੋ ਚਿਨ੍ਤੇਨ੍ਤਾਨਂ ਕਮ੍ਮਫਲਸਦ੍ਧਾਯ ਵਸੇਨ. ਪਸਾਦਾਵਹਤ੍ਤਾਤਿ ਕਾਰਣਵਚਨੇਨ ਯਥਾ ਪਾਸਾਦਿਕਤਾਯ ਵਣ੍ਣਪੋਕ੍ਖਰਤਾਸਿਦ੍ਧਿ ਵੁਤ੍ਤਾ, ਏਵਂ ਦਸ੍ਸਨੀਯਤਾਯ ਪਾਸਾਦਿਕਤਾਸਿਦ੍ਧਿ, ਅਭਿਰੂਪਤਾਯ ਚ ਦਸ੍ਸਨੀਯਤਾਸਿਦ੍ਧਿ ਵਤ੍ਤਬ੍ਬਾਤਿ ਨਯਂ ਦਸ੍ਸੇਤਿ. ਪਟਿਲੋਮਤੋ ਵਾ ਵਣ੍ਣਪੋਕ੍ਖਰਤਾਯ ਪਾਸਾਦਿਕਤਾਸਿਦ੍ਧਿ, ਪਾਸਾਦਿਕਤਾਯ ਦਸ੍ਸਨੀਯਤਾਸਿਦ੍ਧਿ, ਦਸ੍ਸਨੀਯਤਾਯ ਅਭਿਰੂਪਤਾਸਿਦ੍ਧਿ ਯੋਜੇਤਬ੍ਬਾ. ਏਵਂ ਸਰੀਰਸਮ੍ਪਤ੍ਤਿਵਸੇਨ ਅਭਿਰੂਪਤਾਦਿਕੇ ਦਸ੍ਸੇਤ੍ਵਾ ਇਦਾਨਿ ਸਰੀਰੇ ਦੋਸਾਭਾਵਵਸੇਨਪਿ ਤੇ ਦਸ੍ਸੇਤੁਂ ‘‘ਅਭਿਰੂਪਾ ਵਾ’’ਤਿਆਦਿ ਵੁਤ੍ਤਂ. ਤਤ੍ਥ ਯਥਾ ਪਮਾਣਯੁਤ੍ਤਾ, ਏਵਂ ਆਰੋਹਪਰਿਣਾਹਯੋਗਤੋ ਚ ਪਾਸਾਦਿਕਾ ਨਾਤਿਦੀਘਤਾਦਯੋ, ਏਵਂ ਮਨੁਸ੍ਸਾਨਂ ਦਿਬ੍ਬਰੂਪਤਾਸਮ੍ਪਤ੍ਤਿਪੀਤਿ ‘‘ਅਪ੍ਪਤ੍ਤਾ ਦਿਬ੍ਬਵਣ੍ਣ’’ਨ੍ਤਿ ਵੁਤ੍ਤਂ.
ਆਰੋਹਸਮ੍ਪਤ੍ਤਿ ਵੁਤ੍ਤਾ ਉਬ੍ਬੇਧੇਨ ਪਾਸਾਦਿਕਭਾਵਤੋ. ਪਰਿਣਾਹਸਮ੍ਪਤ੍ਤਿ ਵੁਤ੍ਤਾ ਕਿਸਥੂਲਦੋਸਾਭਾਵਤੋ. ਵਣ੍ਣਸਮ੍ਪਤ੍ਤਿ ਵੁਤ੍ਤਾ ਵਿਵਣ੍ਣਤਾਭਾਵਤੋ. ਕਾਯਵਿਪਤ੍ਤਿਯਾਤਿ ਸਰੀਰਦੋਸਸ੍ਸ. ਸਤਵਾਰਵਿਹਤਸ੍ਸਾਤਿ ਸਤ੍ਤਕ੍ਖਤ੍ਤੁਂ ਵਿਹਤਸ੍ਸ, ‘‘ਸਤਵਾਰਵਿਹਤਸ੍ਸਾ’’ਤਿ ਚ ਇਦਂ ਕਪ੍ਪਾਸਪਿਚੁਵਸੇਨ ਵੁਤ੍ਤਂ, ਤੂਲਪਿਚੁਨੋ ਪਨ ਵਿਹਨਨਮੇਵ ਨਤ੍ਥਿ. ਕੁਙ੍ਕੁਮਤਗਰਤੁਰੁਕ੍ਖਯਵਨਪੁਪ੍ਫਾਨਿ ਚਤੁਜ੍ਜਾਤਿ. ‘‘ਤਮਾਲਤਗਰਤੁਰੁਕ੍ਖਯਵਨਪੁਪ੍ਫਾਨੀ’’ਤਿ ਅਪਰੇ.
ਅਗ੍ਗਿਦਡ੍ਢਾ ਵਿਯਾਤਿ ਆਸਨਗਤੇਨ ਅਗ੍ਗਿਨਾ ਦਡ੍ਢਾ ਵਿਯ. ਪਠਮਮੇਵਾਤਿ ਰਾਜਾਨਂ ਦਿਸ੍ਵਾਪਿ ਕਿਚ੍ਚਨ੍ਤਰਪ੍ਪਸੁਤਾ ਅਹੁਤ੍ਵਾ ਕਿਚ੍ਚਨ੍ਤਰਤੋ ਪਠਮਮੇਵ, ਦਸ੍ਸਨਸਮਕਾਲਂ ਏਵਾਤਿ ਅਤ੍ਥੋ. ਰਞ੍ਞੋ ਨਿਸਜ੍ਜਾਯ ਪਚ੍ਛਾ ਨਿਪਾਤਨਂ ਨਿਸੀਦਨਂ ਸੀਲਂ ਏਤਿਸ੍ਸਾਤਿ ਪਚ੍ਛਾਨਿਪਾਤਿਨੀ. ਤਂ ਤਂ ਅਤ੍ਤਨਾ ਰਞ੍ਞੋ ਕਾਤਬ੍ਬਕਿਚ੍ਚਂ ‘‘ਕਿਂ ਕਰੋਮੀ’’ਤਿ ਪੁਚ੍ਛਿਤਬ੍ਬਤਾਯ ਕਿਂ ਕਰਣਂ ਪਟਿਸਾਵੇਤੀਤਿ ਕਿਂਕਾਰਪਟਿਸ੍ਸਾਵਿਨੀ.
ਮਾਤੁਗਾਮੋ ਨਾਮ ਯੇਭੁਯ੍ਯੇਨ ਸਠਜਾਤਿਕੋ, ਇਤ੍ਥਿਰਤਨਸ੍ਸ ਪਨ ਤਂ ਨਤ੍ਥੀਤਿ ਦਸ੍ਸੇਤੁਂ ‘‘ਸ੍ਵਾਸ੍ਸਾ’’ਤਿਆਦਿ ਵੁਤ੍ਤਂ.
ਗੁਣਾਤਿ ਰੂਪਗੁਣਾ ਚੇਵ ਆਚਾਰਗੁਣਾ ਚ. ਪੁਰਿਮਕਮ੍ਮਾਨੁਭਾਵੇਨਾਤਿ ਕਤਸ੍ਸ ਪੁਰਿਮਕਮ੍ਮਸ੍ਸਾਨੁਭਾਵੇਨ ਇਤ੍ਥਿਰਤਨਸ੍ਸ ਤਬ੍ਭਾਵਸਂਵਤ੍ਤਨਿਯਸ੍ਸ ਪੁਰਿਮਕਮ੍ਮਸ੍ਸ ਆਨੁਭਾਵੇਨ. ਚਕ੍ਕਵਤ੍ਤਿਨੋਪਿ ਪਰਿਵਾਰਸਮ੍ਪਤ੍ਤਿਸਂਵਤ੍ਤਨਿਯਂ ਪੁਞ੍ਞਕਮ੍ਮਂ ਤਾਦਿਸਸ੍ਸ ਫਲਵਿਸੇਸਸ੍ਸ ਉਪਨਿਸ੍ਸਯੋ ਹੋਤਿਯੇਵ. ਤੇਨਾਹ ‘‘ਚਕ੍ਕਵਤ੍ਤਿਨੋ ਪੁਞ੍ਞਂ ਉਪਨਿਸ੍ਸਾਯਾ’’ਤਿ, ਏਤੇਨ ਸੇਸੇਸੁਪਿ ਸਵਿਞ੍ਞਾਣਕਰਤਨੇਸੁ ਅਤ੍ਤਨੋ ਕਮ੍ਮਵਸੇਨ ਨਿਬ੍ਬਤ੍ਤੇਸੁਪਿ ਤੇਸਂ ਤੇਸਂ ਵਿਸੇਸਾਨਂ ਤਦੁਪਨਿਸ੍ਸਯਤਾ ਵਿਭਾਵਿਤਾ ਏਵਾਤਿ ਦਟ੍ਠਬ੍ਬਾ. ਪੁਬ੍ਬੇ ਏਕਦੇਸਵਸੇਨ ਲਬ੍ਭਮਾਨਾ ਪਾਰਿਪੂਰੀ ਰਞ੍ਞੋ ਚਕ੍ਕਵਤ੍ਤਿਭਾਵੂਪਗਮਨਤੋ ਪਟ੍ਠਾਯ ਸਬ੍ਬਾਕਾਰਪਰਿਪੂਰਾ ਜਾਤਾ.
ਗਹਪਤਿਰਤਨਵਣ੍ਣਨਾ
੨੫੦. ਪਕਤਿਯਾ ਵਾਤਿ ਸਭਾਵੇਨੇਵ ਚਕ੍ਕਰਤਨਪਾਤੁਭਾਵਤੋ ਪੁਬ੍ਬੇਪਿ. ਯਾਦਿਸਂ ਰਞ੍ਞੋ ਚਕ੍ਕਵਤ੍ਤਿਸ੍ਸ ਪੁਞ੍ਞਬਲਂ ਨਿਸ੍ਸਾਯ ਯਥਾਵੁਤ੍ਤਾ ਚਕ੍ਕਰਤਨਾਨੁਭਾਵਨਿਬ੍ਬਤ੍ਤਿ, ਤਾਦਿਸਂ ਏਤਸ੍ਸ ਪੁਞ੍ਞਬਲਂ ਨਿਸ੍ਸਾਯ ਗਹਪਤਿਰਤਨਸ੍ਸ ਕਮ੍ਮਵਿਪਾਕਜਂ ਦਿਬ੍ਬਚਕ੍ਖੁਂ ਨਿਬ੍ਬਤ੍ਤੇਤੀਤਿ ਆਹ ‘‘ਚਕ੍ਕਰਤਨਾਨੁਭਾਵਸਹਿਤ’’ਨ੍ਤਿ. ਕਾਰਣਸ੍ਸ ਹਿ ਏਕਸਨ੍ਤਤਿਪਤਿਤਤਾਯ, ਫਲਸ੍ਸ ਚ ਸਮਾਨਕਾਲਿਕਤਾਯ ਤਥਾਵਚਨਂ.
ਪਰਿਣਾਯਕਰਤਨਵਣ੍ਣਨਾ
੨੫੧. ‘‘ਅਯਂ ਧਮ੍ਮੋ, ਅਯਂ ਅਧਮ੍ਮੋ’’ਤਿਆਦਿਨਾ ਕਮ੍ਮਸ੍ਸਕਤਾਵਬੋਧਨਸਙ੍ਖਾਤਸ੍ਸ ਪਣ੍ਡਿਤਭਾਵਸ੍ਸ ਅਤ੍ਥਿਤਾਯ ਪਣ੍ਡਿਤੋ. ਬਾਹੁਸਚ੍ਚਬ੍ਯਤ੍ਤਿਯਾ ਬ੍ਯਤ੍ਤੋ. ਸਭਾਵਸਿਦ੍ਧਾਯ ਮੇਧਾਸਙ੍ਖਾਤਾਯ ਪਕਤਿਪਞ੍ਞਾਯ ਅਤ੍ਥਿਤਾਯ ਮੇਧਾਵੀ. ਅਤ੍ਤਨੋ ਯਾਥਾਵਬੁਦ੍ਧਮਤ੍ਥਂ ਪਰੇਸਂ ਵਿਭਾਵੇਤੁਂ ਪਕਾਸੇਤੁਂ ਸਮਤ੍ਥਤਾਯ ਵਿਭਾਵੀ. ਵਵਤ੍ਥਪੇਤੁਨ੍ਤਿ ਨਿਚ੍ਛਿਤੁਂ.
ਚਤੁਇਦ੍ਧਿਸਮਨ੍ਨਾਗਤਵਣ੍ਣਨਾ
੨੫੨. ਵਿਪਚ੍ਚਨਂ ਵਿਪਾਕੋ, ਵਿਪਾਕੋ ਏਵ ਵੇਪਾਕੋ ਯਥਾ ‘‘ਵਿਕਤਮੇਵ ਵੇਕਤ’’ਨ੍ਤਿ. ਸਮਂ ਨਾਤਿਸੀਤਨਾਚ੍ਚੁਣ੍ਹਤਾਯ ਅਵਿਸਮਂ ਭੁਤ੍ਤਸ੍ਸ ਵੇਪਾਕੋ ਏਤਿਸ੍ਸਾ ਅਤ੍ਥੀਤਿ ਸਮਵੇਪਾਕਿਨੀ, ਤਾਯ ਸਮਵੇਪਾਕਿਨਿਯਾ.
ਧਮ੍ਮਪਾਸਾਦਪੋਕ੍ਖਰਣਿਵਣ੍ਣਨਾ
੨੫੩. ਜਨਰਾਸਿਂ ਕਾਰੇਤ੍ਵਾ ਤੇਨ ਜਨਰਾਸਿਨਾ ਖਣਿਤ੍ਵਾ ਨ ਮਾਪੇਸਿ. ਕਿਞ੍ਚਰਹੀਤਿ ਆਹ ‘‘ਰਞ੍ਞੋ ਪਨਾ’’ਤਿਆਦਿ. ਤਤ੍ਥ ਕਾਰਣਂ ਪਰਤੋ ਆਗਮਿਸ੍ਸਤਿ. ਏਕਾਯ ਵੇਦਿਕਾਯ ਪਰਿਕ੍ਖਿਤ੍ਤਾ ਪੋਕ੍ਖਰਣਿਯੋ. ਪਰਿਵੇਣਪਰਿਚ੍ਛੇਦਪਰਿਯਨ੍ਤੇਤਿ ਏਤ੍ਥ ਪਰਿਵੇਣਂ ਨਾਮ ਸਮਨ੍ਤਤੋ ਵਿਵਟਙ੍ਗਣਭੂਤਂ ਪੋਕ੍ਖਰਣਿਯਾ ਤੀਰਂ, ਤਸ੍ਸ ਪਰਿਚ੍ਛੇਦਭੂਤੇ ਪਰਿਯਨ੍ਤੇ ਏਕਾਯ ਵੇਦਿਕਾਯ ਪਰਿਕ੍ਖਿਤ੍ਤਾ ਪੋਕ੍ਖਰਣਿਯੋ. ਏਤਦਹੋਸੀਤਿ ਏਤਂ ‘‘ਯਂਨੂਨਾਹਂ ਇਮਾਸੁ ਪੋਕ੍ਖਰਣੀਸੂ’’ਤਿਆਦਿਕਂ ਅਹੋਸੀਤਿ. ਸਬ੍ਬੋਤੁਕਨ੍ਤਿ ਸਬ੍ਬੇਸੁ ਉਤੂਸੁ ਪੁਪ੍ਫਨਕਂ. ਨਾਨਾਵਣ੍ਣਉਪ੍ਪਲਬੀਜਾਦੀਨੀਤਿ ਰਤ੍ਤਨੀਲਾਦਿਨਾਨਾਵਣ੍ਣਪੁਪ੍ਫੇਨ ਪੁਪ੍ਫਨਕਉਪ੍ਪਲਬੀਜਾਦੀਨਿ. ਜਲਜਥਲਜਮਾਲਨ੍ਤਿ ਜਲਜਥਲਜਪੁਪ੍ਫਮਾਲਂ.
੨੫੪. ਪਰਿਚਾਰਵਸੇਨਾਤਿ ਤਙ੍ਖਣਿਕਪਰਿਚਾਰਵਸੇਨ, ਇਦਞ੍ਚ ਪਠਮਂ ਪਟ੍ਠਪਿਤਨਿਯਾਮੇਨੇਵ ਵੁਤ੍ਤਂ, ਪਚ੍ਛਾ ਪਨ ਯਾਨਸਯਨਾਦੀਨਿ ਵਿਯ ਇਤ੍ਥਿਯੋਪਿ ਅਤ੍ਥਿਕਾਨਂ ਪਰਿਚ੍ਚਤ੍ਤਾ ਏਵ. ਤੇਨਾਹ ‘‘ਇਤ੍ਥੀਹਿਪੀ’’ਤਿਆਦਿ. ਪਰਿਚ੍ਚਾਗਵਸੇਨਾਤਿ ਨਿਰਪੇਕ੍ਖਪਰਿਚ੍ਚਾਗਵਸੇਨ. ਦੀਯਤੀਤਿ ਦਾਨਂ, ਦੇਯ੍ਯਵਤ੍ਥੁ. ਤਂ ਅਗ੍ਗੀਯਤਿ ਨਿਸ੍ਸਜ੍ਜੀਯਤਿ ਏਤ੍ਥਾਤਿ ਦਾਨਗ੍ਗਂ, ਪਰਿਵੇਸਨਟ੍ਠਾਨਂ. ਤਾਦਿਸਾਨਿ ਅਤ੍ਥੀਤਿ ਯਾਦਿਸਾਨਿ ਰਞ੍ਞੋ ਦਾਨਗ੍ਗੇ ਖੋਮਸੁਖੁਮਾਦੀਨਿ ਵਤ੍ਥਾਨਿ, ਤਾਦਿਸਾਨਿ ਯੇਸਂ ਅਤ੍ਤਨੋ ਸਨ੍ਤਕਾਨਿ ਸਨ੍ਤਿ. ਓਹਾਯਾਤਿ ਪਹਾਯ ਤਤ੍ਥੇਵ ਠਪੇਤ੍ਵਾ. ਅਤ੍ਥੋ ਅਤ੍ਥਿ ਯੇਸਂ ਤੇਤਿ ਅਤ੍ਥਿਕਾ. ਏਵਂ ਅਨਤ੍ਥਿਕਾਪਿ ਦਟ੍ਠਬ੍ਬਾ.
੨੫੫. ਕਲਹਸਦ੍ਦੋਪੀਤਿ ਪਿ-ਸਦ੍ਦੇਨ ਦਾਨਾਧਿਪ੍ਪਾਯੇਨ ਗੇਹਤੋ ਨੀਹਤਂ ਪੁਨ ਗੇਹਂ ਪਵੇਸੇਤੁਂ ਨ ਯੁਤ੍ਤਨ੍ਤਿ ਇਮਮਤ੍ਥਂ ਸਮੁਚ੍ਚੇਤਿ. ਤੇਨਾਹ ‘‘ਨ ਖੋ ਏਤਂ ਅਮ੍ਹਾਕਂ ਪਤਿਰੂਪ’’ਨ੍ਤਿਆਦਿ (ਦੀ. ਨਿ. ੨.੨੫੫).
੨੫੭. ਉਣ੍ਹੀਸਮਤ੍ਥਕੇਤਿ ਸਿਖਾਪਰਿਯਨ੍ਤਮਤ੍ਥਕੇ. ਪਰਿਚ੍ਛੇਦਮਤ੍ਥਕੇਤਿ ਪਾਸਾਦਙ੍ਗਣਪਰਿਚ੍ਛੇਦਸ੍ਸ ਮਤ੍ਥਕੇ.
੨੫੮. ਹਰਤੀਤਿ ਅਤਿਵਿਯ ਪਭਸ੍ਸਰਭਾਵੇਨ ਚਕ੍ਖੂਨਿ ਪਟਿਹਰਨ੍ਤਂ ਦੁਦ੍ਦਿਕ੍ਖਤਾਯ ਦਿਟ੍ਠਿਯੋ ਹਰਤਿ ਅਪਨੇਨ੍ਤਂ ਵਿਯ ਹੋਤਿ. ਤਂ ਪਨ ਹਰਣਂ ਨੇਸਂ ਪਰਿਪ੍ਫਨ੍ਦਨੇਨਾਤਿ ਆਹ ‘‘ਫਨ੍ਦਾਪੇਤੀ’’ਤਿ.
ਪਠਮਭਾਣਵਾਰਵਣ੍ਣਨਾ ਨਿਟ੍ਠਿਤਾ.
ਝਾਨਸਮ੍ਪਤ੍ਤਿਵਣ੍ਣਨਾ
੨੬੦. ਮਹਤਿਯਾ ਇਦ੍ਧਿਯਾਤਿ ਮਹਨ੍ਤੇਨ ਇਚ੍ਛਿਤਤ੍ਥਸਮਿਜ੍ਝਨੇਨ. ਤੇਸਂਯੇਵ ਇਚ੍ਛਿਤਿਚ੍ਛਿਤਤ੍ਥਾਨਂ. ‘‘ਅਨੁਭਵਿਤਬ੍ਬਾਨ’’ਨ੍ਤਿ ਇਮਿਨਾ ਆਨੁਭਾਵ-ਸਦ੍ਦਸ੍ਸ ਕਮ੍ਮਸਾਧਨਤਂ ਦਸ੍ਸੇਤਿ. ਪੁਬ੍ਬੇ ਸਮ੍ਪਨ੍ਨਂ ਕਤ੍ਵਾ ਦੇਯ੍ਯਧਮ੍ਮਪਰਿਚ੍ਚਾਗਸ੍ਸ ਕਤਭਾਵਂ ਦਸ੍ਸੇਨ੍ਤੋ ‘‘ਸਮ੍ਪਤ੍ਤਿਪਰਿਚ੍ਚਾਗਸ੍ਸਾ’’ਤਿ ਆਹ. ਅਤ੍ਤਾਨਂ ਦਮੇਤਿ ਏਤੇਨਾਤਿ ਦਮੋ.
ਬੋਧਿਸਤ੍ਤਪੁਬ੍ਬਯੋਗਵਣ੍ਣਨਾ
ਅਸ੍ਸਾਤਿ ਮਹਾਸੁਦਸ੍ਸਨਰਞ੍ਞੋ. ਏਕੋ ਥੇਰੋਤਿ ਅਪ੍ਪਞ੍ਞਾਤੋ ਨਾਮਗੋਤ੍ਤਤੋ ਅਞ੍ਞਤਰੋ ਪੁਥੁਜ੍ਜਨੋ ਥੇਰੋ. ਥੇਰਂ ਦਿਸ੍ਵਾਤਿ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸਿਨ੍ਨਂ ਦਿਸ੍ਵਾ. ਕਟ੍ਠਤ੍ਥਰਣਨ੍ਤਿ ਕਟ੍ਠਮਯਂ ਅਤ੍ਥਰਣਂ, ਦਾਰੁਫਲਕਨ੍ਤਿ ਅਤ੍ਥੋ.
ਪਰਿਭੋਗਭਾਜਨਨ੍ਤਿ ਪਾਨੀਯਪਰਿਭੋਜਨੀਯਾਦਿਪਰਿਭੋਗਯੋਗ੍ਯਂ ਭਾਜਨਂ. ਆਰਕਣ੍ਟਕਨ੍ਤਿ ਸੂਚਿਵਿਜ੍ਝਨਕਕਣ੍ਟਕਂ. ਪਿਪ੍ਫਲਿਕਨ੍ਤਿ ਖੁਦ੍ਦਕਸਤ੍ਥਕਂ. ਉਦਕਤੁਮ੍ਬਕਨ੍ਤਿ ਕੁਣ੍ਡਿਕਂ.
ਕੂਟਾਗਾਰਦ੍ਵਾਰੇਯੇਵ ਨਿਵਤ੍ਤੇਸੀਤਿ ਕੂਟਾਗਾਰਂ ਪਵਿਟ੍ਠਕਾਲਤੋ ਪਟ੍ਠਾਯ ਤੇਸਂ ਮਿਚ੍ਛਾਵਿਤਕ੍ਕਾਨਂ ਪਵਤ੍ਤਿਯਾ ਓਕਾਸਂ ਨਾਦਾਸਿ.
੨੬੧. ਕਸਿਣਮੇਵ ਪਞ੍ਞਾਯਤਿ ਮਹਾਪੁਰਿਸਸ੍ਸ ਤਤ੍ਥ ਤਤ੍ਥ ਕਤਾਧਿਕਾਰਤ੍ਤਾ, ਤੇਸਞ੍ਚ ਪਦੇਸਾਨਂ ਸੁਪਰਿਕਮ੍ਮਕਤਕਸਿਣਸਦਿਸਤ੍ਤਾ.
੨੬੨. ਚਤ੍ਤਾਰਿ ਝਾਨਾਨੀਤਿ ਚਤ੍ਤਾਰਿ ਕਸਿਣਜ੍ਝਾਨਾਨਿ. ਕਸਿਣਜ੍ਝਾਨਪ੍ਪਮਞ੍ਞਾਨਂਯੇਵ ਵਚਨਂ ਤਾਸਂ ਤਦਾ ਆਦਰਗਾਰਵਵਸੇਨ ਨਿਬ੍ਬਤ੍ਤਿਤਤ੍ਤਾ. ਮਹਾਬੋਧਿਸਤ੍ਤਾਨਞ੍ਹਿ ਅਰੂਪਜ੍ਝਾਨੇਸੁ ਆਦਰੋ ਨਤ੍ਥਿ, ਅਭਿਞ੍ਞਾਪਦਟ੍ਠਾਨਤਂ ਪਨ ਸਨ੍ਧਾਯ ਤਾਨਿਪਿ ਨਿਬ੍ਬਤ੍ਤੇਨ੍ਤਿ, ਤਸ੍ਮਾ ਮਹਾਸਤ੍ਤੋ ਤਾਪਸਪਰਿਬ੍ਬਾਜਕਕਾਲੇ ਯਤ੍ਤਕੇ ਲੋਕਿਯਗੁਣੇ ਨਿਬ੍ਬਤ੍ਤੇਤਿ, ਤੇ ਸਬ੍ਬੇਪਿ ਤਦਾ ਨਿਬ੍ਬਤ੍ਤੇਸਿਯੇਵ. ਤੇਨਾਹ ‘‘ਮਹਾਪੁਰਿਸੋ ਪਨਾ’’ਤਿਆਦਿ.
ਚਤੁਰਾਸੀਤਿਨਗਰਸਹਸ੍ਸਾਦਿਵਣ੍ਣਨਾ
੨੬੩. ਅਭਿਹਰਿਤਬ੍ਬਭਤ੍ਤਨ੍ਤਿ ਉਪਨੇਤਬ੍ਬਭਤ੍ਤਂ.
੨੬੪. ਨਿਬਦ੍ਧਵਤ੍ਤਨ੍ਤਿ ਪੁਬ੍ਬੇ ਉਪਨਿਬਦ੍ਧਂ ਪਾਕਵਤ੍ਤਂ.
ਸੁਭਦ੍ਦਾਦੇਵਿਉਪਸਙ੍ਕਮਨਵਣ੍ਣਨਾ
੨੬੫. ਆਵਟ੍ਟੇਤ੍ਵਾਤਿ ਅਤਿਵਿਸਿਤ੍ਵਾ. ਯਂ ਯਂ ਰਞ੍ਞੋ ਇਚ੍ਛਿਤਂ ਦਾਨੂਪਕਰਣਞ੍ਚੇਵ ਭੋਗੂਪਕਰਣਞ੍ਚ, ਤਸ੍ਸ ਤਸ੍ਸ ਤਥੇਵ ਸਮਿਦ੍ਧਭਾਵਂ ਵਿਤ੍ਥਵਤਿ.
੨੬੬. ਸਚੇ ਪਨ ਰਾਜਾ ਜੀਵਿਤੇ ਛਨ੍ਦਂ ਜਨੇਯ੍ਯ, ਇਤੋ ਪਰਮ੍ਪਿ ਚਿਰਂ ਕਾਲਂ ਤਿਟ੍ਠੇਯ੍ਯ ਮਹਿਦ੍ਧਿਕੋ ਮਹਾਨੁਭਾਵੋਤਿ ਏਵਂ ਮਹਜ੍ਝਾਸਯਾ ਦੇਵੀ ਭੋਗੇਸੁ, ਜੀਵਿਤੇ ਚ ਰਾਜਾਨਂ ਸਾਪੇਕ੍ਖਂ ਕਾਤੁਂ ਵਾਯਮਿ. ਤੇਨ ਵੁਤ੍ਤਂ ‘‘ਮਾ ਹੇਵ ਖੋ ਰਾਜਾ’’ਤਿਆਦਿ. ਤੇਨੇਵਾਹ ‘‘ਤਸ੍ਸ ਕਾਲਙ੍ਕਿਰਿਯਂ ਅਨਿਚ੍ਛਮਾਨਾ’’ਤਿਆਦਿ. ਛਨ੍ਦਂ ਜਨੇਹੀਤਿ ਏਤ੍ਥ ਛਨ੍ਦ-ਸਦ੍ਦੋ ਤਣ੍ਹਾਪਰਿਯਾਯੋਤਿ ਆਹ ‘‘ਪੇਮਂ ਉਪ੍ਪਾਦੇਹੀ’’ਤਿ. ਅਪੇਕ੍ਖਤਿ ਆਰਮ੍ਮਣਂ ਏਤਾਯ ਨ ਵਿਸ੍ਸਜ੍ਜੇਤੀਤਿ ਅਪੇਕ੍ਖਾ, ਤਣ੍ਹਾ.
੨੬੭. ਗਰਹਿਤਾਤਿ ਏਤ੍ਥ ਕੇਹਿ ਗਰਹਿਤਾ, ਕਸ੍ਮਾ ਚ ਗਰਹਿਤਾਤਿ ਅਨ੍ਤੋਲੀਨਂ ਚੋਦਨਂ ਵਿਸ੍ਸਜ੍ਜੇਨ੍ਤੋ ‘‘ਬੁਦ੍ਧੇਹੀ’’ਤਿਆਦਿਮਾਹ, ਤੇਨ ਵਿਞ੍ਞੁਗਰਹਿਤਤ੍ਤਾ, ਦੁਗ੍ਗਤਿਸਂਵਤ੍ਤਨਿਯਤੋ ਚ ਸਾਪੇਕ੍ਖਕਾਲਕਿਰਿਯਾ ਪਰਿਵਜ੍ਜੇਤਬ੍ਬਾਤਿ ਦਸ੍ਸੇਤਿ.
੨੬੮. ਏਕਮਨ੍ਤਂ ਗਨ੍ਤ੍ਵਾਤਿ ਰਞ੍ਞੋ ਚਕ੍ਖੁਪਥਂ ਵਿਜਹਿਤ੍ਵਾ.
ਬ੍ਰਹ੍ਮਲੋਕੂਪਗਮਨਵਣ੍ਣਨਾ
੨੬੯. ਸੋਣਸ੍ਸਾਤਿ ਕੋਲ਼ਿਵੀਸਸ੍ਸ ਸੋਣਸ੍ਸ. ਏਕਾ ਭਤ੍ਤਪਾਤੀਤਿ ਏਕਂ ਭਤ੍ਤਵਡ੍ਢਿਤਕਂ. ਤਾਦਿਸਂ ਭਤ੍ਤਨ੍ਤਿ ਤਥਾਰੂਪਂ ਗਰੁਂ ਮਧੁਰਂ ਸਿਨਿਦ੍ਧਂ ਭਤ੍ਤਂ. ਭੁਤ੍ਤਾਨਨ੍ਤਿ ਭੁਤ੍ਤਵਨ੍ਤਾਨਂ.
੨੭੧. ਦਾਸਮਨੁਸ੍ਸਾਤਿ ਦਾਸਾ ਚੇਵ ਆਯੁਤ੍ਤਕਮਨੁਸ੍ਸਾ ਚ.
ਇਦਾਨਿ ਯਥਾਵੁਤ੍ਤਾਯ ਰਞ੍ਞੋ ਮਹਾਸੁਦਸ੍ਸਨਸ੍ਸ ਭੋਗਸਮ੍ਪਤ੍ਤਿਯਾ ਕਮ੍ਮਸਰਿਕ੍ਖਤਂ ਉਦ੍ਧਰਨ੍ਤੋ ‘‘ਏਤਾਨਿ ਪਨਾ’’ਤਿਆਦਿਮਾਹ, ਤਂ ਸੁਵਿਞ੍ਞੇਯ੍ਯਮੇਵ.
੨੭੨. ਆਦਿਤੋ ਪਟ੍ਠਾਯਾਤਿ ਸਮੁਦਾਗਮਨਤੋ ਪਟ੍ਠਾਯ. ਯਤ੍ਥ ਤਂ ਪੁਞ੍ਞਂ ਆਯੂਹਿਤਂ, ਯਤੋ ਸਾ ਸਮ੍ਪਤ੍ਤਿ ਨਿਬ੍ਬਤ੍ਤਾ, ਤਤੋ ਤਤਿਯਤ੍ਤਭਾਵਤੋ ਪਭੁਤਿ. ਮਹਾਸੁਦਸ੍ਸਨਸ੍ਸ ਜਾਤਕਦੇਸਨਾ ਹਿ ਤਦਾ ਸਮੁਦਾਗਮਨਤੋ ਪਟ੍ਠਾਯ ਭਗਵਤਾ ਦੇਸਿਤਾਤਿ. ਪਂਸ੍ਵਾਗਾਰਕੀਲ਼ਂ ਵਿਯਾਤਿ ਯਥਾ ਨਾਮ ਦਾਰਕਾ ਪਂਸੂਹਿ ਵਾਪਿਗੇਹਭੋਜਨਾਦੀਨਿ ਦਸ੍ਸੇਨ੍ਤਾ ਯਥਾਰੁਚਿ ਕੀਲ਼ਿਤ੍ਵਾ ਗਮਨਕਾਲੇ ਸਬ੍ਬਂ ਤਂ ਵਿਧਂਸੇਨ੍ਤਾ ਗਚ੍ਛਨ੍ਤਿ, ਏਵਮੇਵ ਭਗਵਾ ਮਹਾਸੁਦਸ੍ਸਨਕਾਲੇ ਅਤ੍ਤਨਾ ਅਨੁਭੂਤਂ ਦਿਬ੍ਬਸਮ੍ਪਤ੍ਤਿਸਦਿਸਂ ਅਚਿਨ੍ਤੇਯ੍ਯਾਨੁਭਾਵਸਮ੍ਪਤ੍ਤਿਂ ਵਿਤ੍ਥਾਰਤੋ ਦਸ੍ਸੇਤ੍ਵਾ ਪੁਨ ਅਤ੍ਤਨੋ ਦੇਸਨਂ ਆਦੀਨਵਨਿਸ੍ਸਰਣਦਸ੍ਸਨਵਸੇਨ ਵਿਵਟ੍ਟਾਭਿਮੁਖਂ ਵਿਪਰਿਵਤ੍ਤੇਨ੍ਤੋ ‘‘ਸਬ੍ਬਾ ਸਾ ਸਮ੍ਪਤ੍ਤਿ ਅਨਿਚ੍ਚਤਾਯ ਵਿਪਰਿਣਤਾ ਵਿਧਂਸਿਤਾ’’ਤਿ ਦਸ੍ਸੇਨ੍ਤੋ ‘‘ਪਸ੍ਸਾਨਨ੍ਦਾ’’ਤਿਆਦਿਮਾਹ. ਵਿਪਰਿਣਤਾਤਿ ਵਿਪਰਿਣਾਮਂ ਸਭਾਵਵਿਗਮਂ ਗਤਾ. ਤੇਨਾਹ ‘‘ਪਕਤਿਵਿਜਹਨੇਨਾ’’ਤਿਆਦਿ. ਪਕਤੀਤਿ ਸਭਾਵਧਮ੍ਮਾਨਂ ਉਦਯਵਯਪਰਿਚ੍ਛਿਨ੍ਨੋ ਕਕ੍ਖਲ਼ਫੁਸਨਾਦਿਸਭਾਵੋ, ਸੋ ਭਙ੍ਗਕ੍ਖਣਤੋ ਪਟ੍ਠਾਯ ਜਹਿਤੋ, ਪਰਿਚ੍ਚਜਨ੍ਤੋ ਸਬ੍ਬਸੋ ਨਤ੍ਥੇਵ. ਤੇਨਾਹ ‘‘ਨਿਬ੍ਬੁਤਪਦੀਪੋ ਵਿਯ ਅਪਞ੍ਞਤ੍ਤਿਕਭਾਵਂ ਗਤਾ’’ਤਿ.
ਏਤ੍ਤਾਵਤਾਤਿ ਆਦਿਤੋ ਪਟ੍ਠਾਯ ਪਵਤ੍ਤੇਨ ਏਤ੍ਤਕੇਨ ਦੇਸਨਾਮਗ੍ਗੇਨ. ਅਨੇਕਾਨਿ ਵਸ੍ਸਕੋਟਿਸਤਸਹਸ੍ਸਾਨਿਯੇਵ ਉਬ੍ਬੇਧੋ ਏਤਿਸ੍ਸਾਤਿ ਅਨੇਕਵਸ੍ਸਕੋਟਿਸਤਸਹਸ੍ਸੁਬ੍ਬੇਧਾ. ਅਨਿਚ੍ਚਲਕ੍ਖਣਂ ਆਦਾਯਾਤਿ ਤਂ ਸਮ੍ਪਤ੍ਤਿਗਤਂ ਅਨਿਚ੍ਚਲਕ੍ਖਣਂ ਦੇਸਨਾਯ ਗਹੇਤ੍ਵਾ ਵਿਭਾਵੇਤ੍ਵਾ. ਯਥਾ ਨਿਸ੍ਸੇਣਿਮੁਚ੍ਚਨੇ ਤਾਦਿਸਂ ਸਤਹਤ੍ਥੁਬ੍ਬੇਧਂ ਰੁਕ੍ਖਂ ਪਕਤਿਪੁਰਿਸੇਨ ਆਰੋਹਿਤੁਂ ਨ ਸਕ੍ਕਾ, ਏਵਂ ਅਨਿਚ੍ਚਤਾਵਿਭਾਵਨੇਨ ਤਸ੍ਸਾ ਸਮ੍ਪਤ੍ਤਿਯਾ ਅਪੇਕ੍ਖਾਨਿਸ੍ਸੇਣਿਮੁਚ੍ਚਨੇ ਕੇਨਚਿ ਆਰੋਹਿਤੁਂ ਨ ਸਕ੍ਕਾਤਿ ਆਹ ‘‘ਅਨਿਚ੍ਚਲਕ੍ਖਣਂ ਆਦਾਯ ਨਿਸ੍ਸੇਣਿਂ ਮੁਞ੍ਚਨ੍ਤੋ ਵਿਯਾ’’ਤਿ. ਤੇਨੇਵਾਤਿ ਯਥਾਵੁਤ੍ਤਕਾਰਣੇਨੇਵ, ਆਦਿਤੋ ਸਾਤਿਸਯਂ ਕਾਮੇਸੁ ਅਸ੍ਸਾਦਂ ਦਸ੍ਸੇਤ੍ਵਾਪਿ ਉਪਰਿ ਨੇਸਂ ‘‘ਪਸ੍ਸਾਨਨ੍ਦਾ’’ਤਿਆਦਿਨਾ ਆਦੀਨਵਂ, ਓਕਾਰਂ, ਸਂਕਿਲੇਸਂ, ਨੇਕ੍ਖਮ੍ਮੇ ਆਨਿਸਂਸਞ੍ਚ ਵਿਭਾਵੇਤ੍ਵਾ ਦੇਸਨਾਯ ਨਿਟ੍ਠਾਪਿਤਤ੍ਤਾ. ਪੁਬ੍ਬੇਤਿ ਅਤੀਤਕਾਲੇ. ਵਸਭਰਾਜਾਤਿ ਵਸਭਨਾਮਕੋ ਸੀਹਲ਼ਮਹਾਰਾਜਾ.
ਉਦਕਪੁਪ੍ਫੁਲ਼ਾਦਯੋਤਿ ਆਦਿ-ਸਦ੍ਦੇਨ ਤਿਣਗ੍ਗੇ ਉਸ੍ਸਾਵਬਿਨ੍ਦੁਆਦਿਕੇ ਸਙ੍ਗਣ੍ਹਾਤਿ.
ਮਹਾਸੁਦਸ੍ਸਨਸ੍ਸ ਪਨਾਤਿ ਪਨ-ਸਦ੍ਦੋ ਵਿਸੇਸਤ੍ਥਜੋਤਨੋ, ਤੇਨ ਮਹਾਸੁਦਸ੍ਸਨਮਹਾਰਾਜਾ ਝਾਨਾਭਿਞ੍ਞਾਸਮਾਪਤ੍ਤਿਯੋ ਨਿਬ੍ਬਤ੍ਤੇਸਿ, ਤਦਗ੍ਗੇਨ ਪਰਿਸੁਦ੍ਧੇ ਚ ਸਮਣਭਾਵੇ ਪਤਿਟ੍ਠਿਤੋ, ਯਤੋ ਵਿਧੁਯ ਏਵ ਕਾਮਵਿਤਕ੍ਕਾਦਿਸਮਣਭਾਵਸਂਕਿਲੇਸਂ ਸੁਞ੍ਞਾਗਾਰਂ ਪਾਵਿਸਿ, ਏਵਂਭੂਤਸ੍ਸਾਪਿ ਤਸ੍ਸ ਕਾਲਂ ਕਿਰਿਯਤੋ ਸਤ੍ਤਮੇ ਦਿਵਸੇ ਸਬ੍ਬਾ ਚਕ੍ਕਵਤ੍ਤਿਸਮ੍ਪਤ੍ਤਿ ਅਨ੍ਤਰਹਿਤਾ, ਨ ਤਤੋ ਪਰਂ, ਅਹੋ ਅਚ੍ਛਰਿਯਮਨੁਸ੍ਸੋ ਅਨਞ੍ਞਸਾਧਾਰਣਗੁਣਵਿਸੇਸੋਤਿ ਇਮਂ ਵਿਸੇਸਂ ਦਸ੍ਸੇਤਿ.
ਅਨਾਰੁਲ਼੍ਹਨ੍ਤਿ ‘‘ਰਾਜਾ ਕਿਰ ਪੁਬ੍ਬੇ ਗਹਪਤਿਕੁਲੇ ਨਿਬ੍ਬਤ੍ਤੀ’’ਤਿਆਦਿਨਾ, (ਦੀ. ਨਿ. ਅਟ੍ਠ. ੨.੨੬੦) ‘‘ਪੁਨ ਥੇਰਂ ਆਮਨ੍ਤੇਸੀ’’ਤਿਆਦਿਨਾ (ਦੀ. ਨਿ. ਅਟ੍ਠ. ੨.੨੭੨) ਚ ਵੁਤ੍ਤਮਤ੍ਥਂ ਸਨ੍ਧਾਯਾਹ. ਸੋ ਹਿ ਇਮਸ੍ਮਿਂ ਸੁਤ੍ਤੇ ਸਙ੍ਗੀਤਿਂ ਅਨਾਰੁਲ਼੍ਹੋ, ਅਞ੍ਞਤ੍ਥ ਪਨ ਆਗਤੋ ਇਮਿਸ੍ਸਾ ਦੇਸਨਾਯ ਪਿਟ੍ਠਿਵਤ੍ਤਕਭਾਵੇਨ. ਯਂ ਪਨੇਤ੍ਥ ਅਤ੍ਥਤੋ ਨ ਵਿਭਤ੍ਤਂ, ਤਂ ਸੁਵਿਞ੍ਞੇਯ੍ਯਂ ਏਵਾਤਿ.
ਮਹਾਸੁਦਸ੍ਸਨਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ.