੩. ਪਞ੍ਹਪੁਚ੍ਛਕਵਣ੍ਣਨਾ

੭੪੭. ਸਬ੍ਬਞਾਣਾਰਮ੍ਮਣਤਾਯਾਤਿ ਪਟਿਸਮ੍ਭਿਦਾਪਟਿਸਮ੍ਭਿਦਾਞਾਣਾਰਮ੍ਮਣਤਾਯ. ‘‘ਸੁਤ੍ਤਨ੍ਤਭਾਜਨੀਯੇ ਪਨ…ਪੇ… ਸਿਯਾ’’ਤਿ ਇਦਂ ਅਭਿਧਮ੍ਮਭਾਜਨੀਯੇਨ ਵਿਰੁਜ੍ਝਤਿ, ਤਸ੍ਸ ਵਾ ਸਾਵਸੇਸਦੇਸਨਤਾ ਆਪਜ੍ਜਤੀਤਿ ਚੋਦਨਂ ਮਨਸਿ ਕਤ੍ਵਾ ਆਹ ‘‘ਅਭਿਧਮ੍ਮਭਾਜਨੀਯੇ’’ਤਿਆਦਿ. ਨਿਰਵਸੇਸਕਥਨਨ੍ਤਿ ਅਸੇਸੇਤ੍ਵਾ ਕਥਨਂ. ਤੇਨ ਚਿਤ੍ਤੁਪ੍ਪਾਦਸਙ੍ਗਹਿਤੇ ਅਤ੍ਥੇ ਅਸੇਸੇਤ੍ਵਾ ਦੇਸਨਾ ਇਧ ਅਭਿਧਮ੍ਮਭਾਜਨੀਯਸ੍ਸ ਭਾਰੋ, ਨ ਸਬ੍ਬਞੇਯ੍ਯਧਮ੍ਮੇਤਿ ਦਸ੍ਸੇਤਿ. ਯਥਾਦਸ੍ਸਿਤਵਿਸਯਵਚਨਵਸੇਨਾਤਿ ਦਸ੍ਸਿਤਪ੍ਪਕਾਰਵਿਸਯਸ੍ਸ ਕਥਨਵਸੇਨ, ਧਮ੍ਮਤ੍ਥਵਸੇਨ ਦਸ੍ਸਿਤੇ ਤਂਤਂਚਿਤ੍ਤੁਪ੍ਪਾਦੇ ਤਤ੍ਥ ਧਮ੍ਮਨਿਰੁਤ੍ਤਾਭਿਲਾਪੇਨ ਞਾਣਸ੍ਸ ਕਥਨਵਸੇਨਾਤਿ ਅਤ੍ਥੋ. ਅਞ੍ਞਾਰਮ੍ਮਣਤਂ ਨ ਪਟਿਸੇਧੇਤਿ ਅਤਪ੍ਪਰਭਾਵਤੋਤਿ ਅਧਿਪ੍ਪਾਯੋ. ਨ ਨਿਰਵਸੇਸੇਨ ਕਥਨਂ ਅਚਿਤ੍ਤੁਪ੍ਪਾਦਪਰਿਯਾਪਨ੍ਨਸ੍ਸ ਵਿਸਯਸ੍ਸ ਅਕਥਿਤਤ੍ਤਾ. ਏਵਂ ਪਟਿਭਾਨਪਟਿਸਮ੍ਭਿਦਾਵਿਸਯਸ੍ਸਾਪਿ ਨ ਨਿਰਵਸੇਸੇਨ ਕਥਨਨ੍ਤਿ ਸੁਤ੍ਤਨ੍ਤਭਾਜਨੀਯੇ ਅਵਿਸੇਸਵਚਨੇਨ ਸਬ੍ਬਞਾਣਾਰਮ੍ਮਣਤਂਯੇਵ ਪਟਿਭਾਨਪਟਿਸਮ੍ਭਿਦਾਯ ਪਤਿਟ੍ਠਾਪੇਤਿ. ਤਥਾ ਤਿਸ੍ਸੋ ਪਟਿਸਮ੍ਭਿਦਾਤਿਆਦਿਪਞ੍ਹਪੁਚ੍ਛਕਪਾਲ਼ਿਯਾਪਿ. ਤਿਸ੍ਸੋਤਿ ਅਤ੍ਥਧਮ੍ਮਪਟਿਭਾਨਪਟਿਸਮ੍ਭਿਦਾ. ਨਿਰੁਤ੍ਤਿਪਟਿਸਮ੍ਭਿਦਾ ਹਿ ‘‘ਪਰਿਤ੍ਤਾਰਮ੍ਮਣਾ’’ਤੇਵ ਵੁਤ੍ਤਾ.

ਯਦਿਪਿ ਸਿਯਾ ਨ ਤਸ੍ਸਾ ਮਹਗ੍ਗਤਾਰਮ੍ਮਣਤਾਤਿ ਸਮ੍ਬਨ੍ਧੋ. ‘‘ਨ ਹਿ ਮਗ੍ਗੋ ਪਚ੍ਚਯੁਪ੍ਪਨ੍ਨੋ ਨ ਹੋਤੀ’’ਤਿ ਇਮਿਨਾ ‘‘ਅਤ੍ਥਪਟਿਸਮ੍ਭਿਦਾ ਨ ਮਗ੍ਗਾਰਮ੍ਮਣਾ’’ਤਿ ਵਚਨਸ੍ਸ ਯਥਾਵੁਤ੍ਤਤ੍ਥਸਾਧਕਤਂ ਵਿਭਾਵੇਤਿ. ਤਸ੍ਸਾਤਿ ਪਟਿਭਾਨਪਟਿਸਮ੍ਭਿਦਾਯ ਨ ਮਹਗ੍ਗਤਾਰਮ੍ਮਣਤਾ ਸਮ੍ਭਵਤਿ ਨਨੁ ਨਯਂ ਅਨੁਸ੍ਸਰਨ੍ਤਸ੍ਸਾਤਿ ਅਧਿਪ੍ਪਾਯੋ. ਦ੍ਵੇਪੀਤਿ ‘‘ਅਤ੍ਥਪਟਿਸਮ੍ਭਿਦਾ ਨ ਮਗ੍ਗਾਰਮ੍ਮਣਾ, ਤਿਸ੍ਸੋ ਪਟਿਸਮ੍ਭਿਦਾ ਸਿਯਾ ਪਰਿਤ੍ਤਾਰਮ੍ਮਣਾ, ਸਿਯਾ ਮਹਗ੍ਗਤਾਰਮ੍ਮਣਾ, ਸਿਯਾ ਅਪ੍ਪਮਾਣਾਰਮ੍ਮਣਾ’’ਤਿ ਚ ਦ੍ਵੇਪਿ ਏਤਾ ਪਾਲ਼ਿਯੋ. ਤਾਸੁ ਬਲਵਤਰਾਯ ਠਾਨਸ੍ਸ, ਇਤਰਾਯ ਅਧਿਪ੍ਪਾਯਮਗ੍ਗਨਸ੍ਸ ਚ ਉਪਾਯਦਸ੍ਸਨਮੁਖੇਨ ਤਾਸਂ ਅਞ੍ਞਮਞ੍ਞਂ ਅਵਿਰੋਧਂ ਦਸ੍ਸੇਤੁਂ ‘‘ਕੁਸਲਾਕੁਸਲਾਨਂ ਪਨਾ’’ਤਿਆਦਿਮਾਹ. ‘‘ਨਿਪ੍ਪਰਿਯਾਯਾ ਤਤ੍ਥ ਧਮ੍ਮਪਟਿਸਮ੍ਭਿਦਾ’’ਤਿ ਏਤੇਨ ਤਤ੍ਥ ਅਤ੍ਥਪਟਿਸਮ੍ਭਿਦਾਯ ਪਰਿਯਾਯਭਾਵਮਾਹ. ਤਥਾ ਵਿਪਾਕਕਿਰਿਯਾਨਨ੍ਤਿਆਦਿ ਯਥਾਧਿਪ੍ਪੇਤਸ੍ਸ ਅਤ੍ਥਸ੍ਸ ਵਿਸਦਿਸੂਦਾਹਰਣਦਸ੍ਸਨਂ. ਉਭਯੇਨਪਿ ‘‘ਅਤ੍ਥਪਟਿਸਮ੍ਭਿਦਾ ਨ ਮਗ੍ਗਾਰਮ੍ਮਣਾ’’ਤਿ (ਵਿਭ. ੭੪੯) ਵਚਨਂ ਸੁਤ੍ਤਨ੍ਤਨਯਾਨੁਗਤਂ ਨਿਪ੍ਪਰਿਯਾਯਤ੍ਥਸ੍ਸ ਤਤ੍ਥ ਅਧਿਪ੍ਪੇਤਤ੍ਤਾਤਿ ਦੀਪੇਤਿ. ਕਿਞ੍ਚਿ ਪਨ ਞਾਣਨ੍ਤਿਆਦਿ ‘‘ਤਿਸ੍ਸੋ ਪਟਿਸਮ੍ਭਿਦਾ’’ਤਿਆਦਿਪਾਲ਼ਿਯਾ ਸਮਤ੍ਥਕਂ. ਯਥਾਧਿਪ੍ਪੇਤਸ੍ਸ ਅਤ੍ਥਸ੍ਸ ਪਟਿਭਾਨਂ ਦੀਪਨਂ ਪਟਿਭਾਨਂ. ਤੇਨਾਹ ‘‘ਞੇਯ੍ਯਪ੍ਪਕਾਸਨਤੋ’’ਤਿ. ਇਤਿ ਯਾ ‘‘ਤਿਸ੍ਸੋ ਪਟਿਸਮ੍ਭਿਦਾ’’ਤਿ ਪਾਲ਼ਿ, ਤਸ੍ਸਾ ਬਲਵਭਾਵਵਿਭਾਵਨੇਨ ਇਤਰਾਯ ਅਧਿਪ੍ਪਾਯਮਗ੍ਗਨਂ ਕਤਨ੍ਤਿ ਵੇਦਿਤਬ੍ਬਂ. ਨਿਪ੍ਪਰਿਯਾਯਾਤਿ ਪਰਿਯਾਯਰਹਿਤਾ ਉਜੁਕਂ ਸਰੂਪੇਨੇਵ ਪਵਤ੍ਤਾ. ਨਿਪ੍ਪਰਿਯਾਯ…ਪੇ… ਪਵਤ੍ਤਿਯਨ੍ਤਿ ਏਕਨ੍ਤਿਕਅਤ੍ਥਾਰਮ੍ਮਣਂ ਞਾਣਂ ਅਤ੍ਥਪਟਿਸਮ੍ਭਿਦਾ, ਞਾਣਾਰਮ੍ਮਣਂ ਪਟਿਭਾਨਪਟਿਸਮ੍ਭਿਦਾਤਿ ਗਹੇਤ੍ਵਾ ਦੇਸਨਾਯਂ.

ਸੋ ਏਵਾਤਿ ਪਰਸ੍ਸ ਅਭਿਲਾਪਸਦ੍ਦੋ ਏਵ. ਅਨੁਵਤ੍ਤਮਾਨਤਾ ਚਸ੍ਸ ਨਿਰੁਤ੍ਤਿਪਟਿਸਮ੍ਭਿਦਾ ਪਚ੍ਚੁਪ੍ਪਨ੍ਨਮੇਵ ਸਦ੍ਦਂ ਆਰਮ੍ਮਣਂ ਕਰੋਨ੍ਤੀ, ਸਦ੍ਦਂ ਸੁਤ੍ਵਾ ‘‘ਅਯਂ ਸਭਾਵਨਿਰੁਤ੍ਤਿ, ਅਯਂ ਨ ਸਭਾਵਨਿਰੁਤ੍ਤੀ’’ਤਿ ਜਾਨਨ੍ਤੀਤਿ ਚ ਆਦਿਵਚਨਵਸੇਨ ਵੇਦਿਤਬ੍ਬੋ.

ਪਞ੍ਹਪੁਚ੍ਛਕਵਣ੍ਣਨਾ ਨਿਟ੍ਠਿਤਾ.

ਪਟਿਸਮ੍ਭਿਦਾਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.