੨. ਅਭਿਧਮ੍ਮਭਾਜਨੀਯਵਣ੍ਣਨਾ

੭੨੫. ਸਾਮਞ੍ਞੇਨ ਵਤ੍ਵਾ ਵਿਸੇਸੇਨ ਅਵੁਤ੍ਤਤ੍ਤਾਤਿ ‘‘ਤੇਸਂ ਵਿਪਾਕੇ’’ਤਿ ਯਥਾਵੁਤ੍ਤਕੁਸਲਵਿਪਾਕਤਾਦਿਸਾਮਞ੍ਞੇਨ ਵਤ੍ਵਾ ਸਹੇਤੁਕਾਹੇਤੁਕਾਦਿਵਿਸੇਸੇਨ ਅਵੁਤ੍ਤਤ੍ਤਾ, ਸਰੂਪੇਨ ਨਿਦ੍ਧਾਰੇਤ੍ਵਾ ਅਵੁਤ੍ਤਤ੍ਤਾਤਿ ਅਤ੍ਥੋ. ਅਵਿਪਾਕਤ੍ਤਾਤਿ ਅਵਿਪਾਕਧਮ੍ਮਤ੍ਤਾ. ਯਦਿ ਏਵਨ੍ਤਿ ਪਚ੍ਚਯਭਾਵਤੋ ਲਬ੍ਭਮਾਨੋਪਿ ਧਮ੍ਮਭਾਵੋ ਅਵਿਪਾਕਧਮ੍ਮਤਾਯ ਕਿਰਿਯਾਨਂ ਯਦਿ ਨ ਵੁਤ੍ਤੋ, ਏਵਂ ਸਤਿ. ਸਤਿਪਿ ਪਚ੍ਚਯੁਪ੍ਪਨ੍ਨਭਾਵੇ ਅਵਿਪਾਕਭਾਵਤੋ ਅਤ੍ਥਭਾਵੋਪਿ ਨ ਵਤ੍ਤਬ੍ਬੋ. ਤੇਨਾਹ ‘‘ਵਿਪਾਕਾ ਨ ਹੋਨ੍ਤੀਤਿ ਅਤ੍ਥਭਾਵੋ ਚ ਨ ਵਤ੍ਤਬ੍ਬੋ’’ਤਿ. ਏਵਞ੍ਚੇਤਿ ਯਦਿ ਪਚ੍ਚਯੁਪ੍ਪਨ੍ਨਤ੍ਤਾ ਕਿਰਿਯਾਨਂ ਅਤ੍ਥਭਾਵੋ ਵੁਤ੍ਤੋ. ਨਪ੍ਪਟਿਸਿਦ੍ਧੋ ਇਚ੍ਛਿਤੋਵਾਤਿ ਅਤ੍ਥੋ. ਯਦਿ ਏਵਂ ਕਸ੍ਮਾ ਨ ਵੁਤ੍ਤੋਤਿ ਆਹ ‘‘ਵਿਪਾਕਸ੍ਸ ਪਨਾ’’ਤਿਆਦਿ. ਤੇਸਨ੍ਤਿ ਕੁਸਲਾਕੁਸਲਾਨਂ, ਵਿਪਾਕਕਿਰਿਯਧਮ੍ਮਾਨਞ੍ਚ. ਅਤ੍ਥਧਮ੍ਮਤਾਤਿ ਵੁਤ੍ਤਨਯੇਨ ਲਬ੍ਭਮਾਨੋਪਿ ਯਥਾਕ੍ਕਮਂ ਅਤ੍ਥਭਾਵੋ, ਧਮ੍ਮਭਾਵੋ ਚ ਨ ਵੁਤ੍ਤੋ. ਪਚ੍ਚਯਭਾਵਂ ਸਤ੍ਤਿਵਿਸੇਸਂ ਸਨਿਪ੍ਫਾਦੇਤਬ੍ਬਤਨ੍ਤਿ ਪਦਤ੍ਤਯੇਨਾਪਿ ਵਿਪਾਕਧਮ੍ਮਤਮੇਵਾਹ. ਸਾ ਹਿ ਵਿਪਾਕਾਨਂ ਹੇਤੁਭਾਵਤੋ ਪਚ੍ਚਯਭਾਵੋ, ਤਦੁਪ੍ਪਾਦਨਸਮਤ੍ਥਤਾਯ ਸਤ੍ਤਿਵਿਸੇਸੋ, ਤੇਹਿ ਸਗਬ੍ਭਾ ਵਿਯ ਹੋਤੀਤਿ ‘‘ਸਨਿਪ੍ਫਾਦੇਤਬ੍ਬਤਾ’’ਤਿ ਚ ਵੁਚ੍ਚਤਿ. ਤਂ ਪਸ੍ਸਨ੍ਤੀ ਨਿਪ੍ਫਾਦਕਵਿਸੇਸਾਪਿ ਨਿਪ੍ਫਾਦੇਤਬ੍ਬਾਪੇਕ੍ਖਾ ਹੋਤਿ ਧਮ੍ਮਪਟਿਸਮ੍ਭਿਦਾ. ਤਂਸਮ੍ਬਨ੍ਧੇਨਾਤਿ ਨਿਪ੍ਫਾਦੇਤਬ੍ਬਸਮ੍ਬਨ੍ਧੇਨ. ਧਮ੍ਮਪਟਿਸਮ੍ਭਿਦਂ ਵਦਨ੍ਤੇਨ ਅਤ੍ਥਪਟਿਸਮ੍ਭਿਦਾਪਿ ਵੁਤ੍ਤਾ.

ਸਭਾਵਧਮ੍ਮੇ ਪਞ੍ਞਤ੍ਤਿ ਸਭਾਵਪਞ੍ਞਤ੍ਤੀਤਿ ਆਹ ‘‘ਨ ਸਤ੍ਤਾਦਿਪਞ੍ਞਤ੍ਤਿਯਾ’’ਤਿ. ਸਭਾਵੇਨ, ਨਿਰੁਤ੍ਤਿਯੇਵ ਵਾ ਸਭਾਵਪਞ੍ਞਤ੍ਤੀਤਿ ਵੁਤ੍ਤਾਤਿ ਆਹ ‘‘ਅਵਿਪਰੀਤਪਞ੍ਞਤ੍ਤਿਯਾ ਵਾ’’ਤਿ.

੭੪੬. ਵੋਹਾਰਭੂਮਿਂ, ਅਧਿਗਮਭੂਮਿਞ੍ਚ ਏਕਜ੍ਝਂ ਕਤ੍ਵਾ ਆਹ ‘‘ਕਾਮਾਵਚਰਾ, ਲੋਕੁਤ੍ਤਰਾ ਚ ਭੂਮਿ ਭੂਮੀ’’ਤਿ. ਚਿਤ੍ਤੁਪ੍ਪਾਦਾ ਵਾ ਪਵਤ੍ਤਿਟ੍ਠਾਨਭਾਵਤੋ ਭੂਮਿ.

ਅਭਿਧਮ੍ਮਭਾਜਨੀਯਵਣ੍ਣਨਾ ਨਿਟ੍ਠਿਤਾ.