੬. ਸਹਜਾਤਪਚ੍ਚਯਨਿਦ੍ਦੇਸਵਣ੍ਣਨਾ

੬. ‘‘ਅਞ੍ਞਮਞ੍ਞਸ੍ਸਾਤਿ ਅਞ੍ਞੋ ਅਞ੍ਞਸ੍ਸਾ’’ਤਿ ਪੋਰਾਣਪਾਠੋ. ਪਾਲ਼ਿਯਂ ਪਨ ‘‘ਅਞ੍ਞਮਞ੍ਞਂ ਸਹਜਾਤਪਚ੍ਚਯੇਨ ਪਚ੍ਚਯੋ’’ਤਿ ਏਤ੍ਥ ਵੁਤ੍ਤਸ੍ਸ ‘‘ਅਞ੍ਞਮਞ੍ਞ’’ਨ੍ਤਿ ਇਮਸ੍ਸ ਅਤ੍ਥੋ ਵਤ੍ਤਬ੍ਬੋ, ਨ ਅਵੁਤ੍ਤਸ੍ਸ ‘‘ਅਞ੍ਞਮਞ੍ਞਸ੍ਸਾ’’ਤਿ ਇਮਸ੍ਸ, ਨ ਚ ਸਮਾਨਤ੍ਥਸ੍ਸਪਿ ਸਦ੍ਦਨ੍ਤਰਸ੍ਸ ਅਤ੍ਥੇ ਵੁਤ੍ਤੇ ਸਦ੍ਦਨ੍ਤਰਸ੍ਸ ਅਤ੍ਥੋ ਵੁਤ੍ਤੋ ਹੋਤਿ, ਤਸ੍ਮਾ ‘‘ਅਞ੍ਞਮਞ੍ਞਨ੍ਤਿ ਅਞ੍ਞੋ ਅਞ੍ਞਸ੍ਸਾ’’ਤਿ ਪਠਨ੍ਤਿ. ਓਕ੍ਕਨ੍ਤੀਤਿ ਪਞ੍ਚਵੋਕਾਰਪਟਿਸਨ੍ਧਿਯੇਵ ਵੁਚ੍ਚਤਿ, ਨ ਇਤਰਾਤਿ ਇਮਿਨਾ ਅਧਿਪ੍ਪਾਯੇਨਾਹ ‘‘ਪਞ੍ਚਵੋਕਾਰਭਵੇ ਪਟਿਸਨ੍ਧਿਕ੍ਖਣੇ’’ਤਿ. ਰੂਪਿਨੋ ਧਮ੍ਮਾ ਅਰੂਪੀਨਂ ਧਮ੍ਮਾਨਨ੍ਤਿ ਇਦਂ ਯਦਿਪਿ ਪੁਬ੍ਬੇ ‘‘ਓਕ੍ਕਨ੍ਤਿਕ੍ਖਣੇ ਨਾਮਰੂਪ’’ਨ੍ਤਿ ਵੁਤ੍ਤਂ, ਤਥਾਪਿ ਨ ਤੇਨ ਖਣਨ੍ਤਰੇ ਪਚ੍ਚਯਭਾਵੋ ਰੂਪੀਨਂ ਨਿਵਾਰਿਤੋਤਿ ਤਨ੍ਨਿਵਾਰਣਤ੍ਥਂ ਵੁਤ੍ਤਂ. ਕਞ੍ਚਿ ਕਾਲੇਤਿ ਕੇਚਿ ਕਿਸ੍ਮਿਞ੍ਚਿ ਕਾਲੇਤਿ ਵਾ ਅਤ੍ਥੋ. ਤੇਨ ਰੂਪਿਨੋ ਧਮ੍ਮਾ ਕੇਚਿ ਵਤ੍ਥੁਭੂਤਾ ਕਿਸ੍ਮਿਞ੍ਚਿ ਪਟਿਸਨ੍ਧਿਕਾਲੇਤਿ ਰੂਪਨ੍ਤਰਾਨਂ ਵਤ੍ਥੁਸ੍ਸ ਚ ਕਾਲਨ੍ਤਰੇ ਅਰੂਪੀਨਂ ਸਹਜਾਤਪਚ੍ਚਯਂ ਪੁਬ੍ਬੇ ਅਨਿਵਾਰਿਤਂ ਨਿਵਾਰੇਤਿ. ਏਵਞ੍ਚ ਕਤ੍ਵਾ ‘‘ਕਞ੍ਚਿ ਕਾਲ’’ਨ੍ਤਿ ਵਾ ‘‘ਕਿਸ੍ਮਿਞ੍ਚਿ ਕਾਲੇ’’ਤਿ ਵਾ ਵਤ੍ਤਬ੍ਬੇ ਵਿਭਤ੍ਤਿਵਿਪਲ੍ਲਾਸੋ ਕਤੋ. ਤੇਨ ਹਿ ‘‘ਕਞ੍ਚੀ’’ਤਿ ਉਪਯੋਗੇਕਵਚਨਂ ‘‘ਰੂਪਿਨੋ ਧਮ੍ਮਾ’’ਤਿ ਏਤੇਨ ਸਹ ਸਮ੍ਬਨ੍ਧੇਨ ਪਚ੍ਚਤ੍ਤਬਹੁਵਚਨਸ੍ਸ ਆਦੇਸੋ, ‘‘ਕਾਲੇ’’ਤਿ ਇਮਿਨਾ ਸਮ੍ਬਨ੍ਧੇਨ ਭੁਮ੍ਮੇਕਵਚਨਸ੍ਸਾਤਿ ਵਿਞ੍ਞਾਯਤਿ. ਪੁਰਿਮੇਨ ਚ ‘‘ਏਕੋ ਖਨ੍ਧੋ ਵਤ੍ਥੁ ਚ ਤਿਣ੍ਣਨ੍ਨਂ ਖਨ੍ਧਾਨ’’ਨ੍ਤਿਆਦਿਨਾ ਨਾਮਸਹਿਤਸ੍ਸੇਵ ਵਤ੍ਥੁਸ੍ਸ ‘‘ਨਾਮਸ੍ਸ ਪਚ੍ਚਯੋ’’ਤਿ ਵਤ੍ਤਬ੍ਬਤ੍ਤੇ ਆਪਨ੍ਨੇ ਏਤੇਨ ਕੇਵਲਸ੍ਸੇਵ ਤਥਾ ਵਤ੍ਤਬ੍ਬਤਂ ਦਸ੍ਸੇਤਿ.

ਤਯੋ ਨ ਅਞ੍ਞਮਞ੍ਞਵਸੇਨਾਤਿ ਲਬ੍ਭਮਾਨੇਪਿ ਕਤ੍ਥਚਿ ਅਞ੍ਞਮਞ੍ਞਸਹਜਾਤਪਚ੍ਚਯਭਾਵੇ ਵਚਨੇਨ ਅਸਙ੍ਗਹਿਤਤ੍ਤਾ ਤਸ੍ਸ ਏਵਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਚਤੁਸਮੁਟ੍ਠਾਨਿਕਸ੍ਸ ਰੂਪਸ੍ਸ ਏਕਦੇਸਭੂਤੇ ਕਮ੍ਮਸਮੁਟ੍ਠਾਨਰੂਪੇ ਸਮੁਦਾਯੇਕਦੇਸਵਸੇਨ ਸਾਮਿਵਚਨਂ ਦਟ੍ਠਬ੍ਬਂ, ਨਿਦ੍ਧਾਰਣੇ ਵਾ.

ਸਹਜਾਤਪਚ੍ਚਯਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.