੩. ਅਧਿਪਤਿਪਚ੍ਚਯਨਿਦ੍ਦੇਸਵਣ੍ਣਨਾ

੩. ਧੁਰਨ੍ਤਿ ਧੁਰਗ੍ਗਾਹਂ. ਜੇਟ੍ਠਕਨ੍ਤਿ ਸੇਟ੍ਠਂ. ਛਨ੍ਦਾਧਿਪਤਿ ਛਨ੍ਦਸਮ੍ਪਯੁਤ੍ਤਕਾਨਨ੍ਤਿ ਏਤ੍ਥ ਪੁਰਿਮਛਨ੍ਦਸ੍ਸ ਸਮਾਨਰੂਪੇਨ ਤਦਨਨ੍ਤਰਂ ਨਿਦ੍ਦਿਟ੍ਠੇਨ ਤਂਸਮ੍ਬਨ੍ਧੇਨ ਛਨ੍ਦਸਦ੍ਦੇਨੇਵ ਪਚ੍ਚਯਭੂਤਸ੍ਸ ਛਨ੍ਦਸ੍ਸ ਸਮ੍ਪਯੁਤ੍ਤਕਵਿਸੇਸਨਭਾਵੋ ਦਸ੍ਸਿਤੋ ਹੋਤੀਤਿ ‘‘ਛਨ੍ਦਾਧਿਪਤਿ ਸਮ੍ਪਯੁਤ੍ਤਕਾਨ’’ਨ੍ਤਿ ਅਵਤ੍ਵਾ ‘‘ਛਨ੍ਦਸਮ੍ਪਯੁਤ੍ਤਕਾਨ’’ਨ੍ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਏਸ ਨਯੋ ਇਤਰੇਸੁਪਿ.

ਗਰੁਕਾਰਚਿਤ੍ਤੀਕਾਰਵਸੇਨ ਵਾਤਿ ਕੁਸਲਾਬ੍ਯਾਕਤਾਨਂ ਪਵਤ੍ਤਿਂ ਦਸ੍ਸੇਤਿ. ਅਲਦ੍ਧਂ ਲਦ੍ਧਬ੍ਬਂ, ਲਦ੍ਧਂ ਅਵਿਜਹਿਤਬ੍ਬਂ. ਯੇਨ ਵਾ ਵਿਨਾ ਨ ਭਵਿਤਬ੍ਬਂ, ਤਂ ਲਦ੍ਧਬ੍ਬਂ, ਤਸ੍ਸੇਵਤ੍ਥੋ ਅਵਿਜਹਿਤਬ੍ਬਨ੍ਤਿ. ਅਨਵਞ੍ਞਾਤਨ੍ਤਿ ਅਵਞ੍ਞਾਤਮ੍ਪਿ ਅਦੋਸਦਸ੍ਸਿਤਾਯ ਅਸ੍ਸਾਦਨੇਨ ਅਨਵਞ੍ਞਾਤਂ ਕਤ੍ਵਾ.

ਮਿਚ੍ਛਤ੍ਤਨਿਯਤਾ ਅਪ੍ਪਨਾਸਦਿਸਾ ਮਹਾਬਲਾ ਵਿਨਾ ਅਧਿਪਤਿਨਾ ਨੁਪ੍ਪਜ੍ਜਨ੍ਤੀਤਿ ‘‘ਏਕਨ੍ਤੇਨੇਵਾ’’ਤਿ ਆਹ. ਕਮ੍ਮਕਿਲੇਸਾਵਰਣਭੂਤਾ ਚ ਤੇ ਸਗ੍ਗਾਵਰਣਾ ਚ ਮਗ੍ਗਾਵਰਣਾ ਚ ਪਚ੍ਚਕ੍ਖਸਗ੍ਗਾਨਂ ਕਾਮਾਵਚਰਦੇਵਾਨਮ੍ਪਿ ਉਪ੍ਪਜ੍ਜਿਤੁਂ ਨ ਅਰਹਨ੍ਤਿ, ਕੋ ਪਨ ਵਾਦੋ ਰੂਪਾਰੂਪੀਨਨ੍ਤਿ.

ਕਾਮਾਵਚਰਾਦਿਭੇਦਤੋ ਪਨ ਤਿਵਿਧੋ ਕਿਰਿਯਾਰਮ੍ਮਣਾਧਿਪਤਿ ਲੋਭਸਹਗਤਾਕੁਸਲਸ੍ਸੇਵ ਆਰਮ੍ਮਣਾਧਿਪਤਿਪਚ੍ਚਯੋ ਹੋਤੀਤਿ ਇਦਂ ਪਰਸਨ੍ਤਾਨਗਤਾਨਂ ਸਾਰਮ੍ਮਣਧਮ੍ਮਾਨਂ ‘‘ਅਜ੍ਝਤ੍ਤਾਰਮ੍ਮਣੋ ਧਮ੍ਮੋ ਬਹਿਦ੍ਧਾਰਮ੍ਮਣਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ’’ਤਿ ਏਤਸ੍ਸ ਅਭਾਵਤੋ ‘‘ਬਹਿਦ੍ਧਾਰਮ੍ਮਣੋ ਧਮ੍ਮੋ ਬਹਿਦ੍ਧਾਰਮ੍ਮਣਸ੍ਸਾ’’ਤਿ ਏਤ੍ਥ ਚ ਆਰਮ੍ਮਣਾਧਿਪਤਿਨੋ ਅਨੁਦ੍ਧਟਤ੍ਤਾ ਅਧਿਪਤਿਪਚ੍ਚਯਤਾ ਨਤ੍ਥੀਤਿ ਵਿਞ੍ਞਾਯਮਾਨੇਪਿ ‘‘ਬਹਿਦ੍ਧਾ ਖਨ੍ਧੇ ਗਰੁਂ ਕਤ੍ਵਾ ਅਸ੍ਸਾਦੇਤੀ’’ਤਿਆਦਿਵਚਨਂ (ਪਟ੍ਠਾ. ੨.੨੦.੩੧) ਨਿਸ੍ਸਾਯ ਅਰਹਤੋ ਕਿਰਿਯਧਮ੍ਮਾ ਪੁਥੁਜ੍ਜਨਾਦੀਹਿ ਗਰੁਂ ਕਤ੍ਵਾ ਅਸ੍ਸਾਦਿਯਨ੍ਤੀਤਿ ਇਮਿਨਾ ਅਧਿਪ੍ਪਾਯੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ‘‘ਸਨਿਦਸ੍ਸਨਸਪ੍ਪਟਿਘਾ ਖਨ੍ਧਾ’’ਤਿਆਦੀਸੁ (ਪਟ੍ਠਾ. ੨.੨੨.੩੦) ਵਿਯ ਖਨ੍ਧਸਦ੍ਦੋ ਰੂਪੇ ਏਵ ਭਵਿਤੁਂ ਅਰਹਤੀਤਿ ਵਿਚਾਰਿਤਮੇਤਂ. ਪੁਥੁਜ੍ਜਨਾਦਿਕਾਲੇ ਵਾ ਅਨਾਗਤੇ ਕਿਰਿਯਧਮ੍ਮੇ ਗਰੁਂ ਕਤ੍ਵਾ ਅਸ੍ਸਾਦਨਂ ਸਨ੍ਧਾਯੇਤਂ ਵੁਤ੍ਤਂ. ‘‘ਨੇਵਵਿਪਾਕਨਵਿਪਾਕਧਮ੍ਮਧਮ੍ਮੇ ਖਨ੍ਧੇ ਗਰੁਂ ਕਤ੍ਵਾ ਅਸ੍ਸਾਦੇਤਿ ਅਭਿਨਨ੍ਦਤੀ’’ਤਿਆਦਿਵਚਨਤੋ (ਪਟ੍ਠਾ. ੧.੩.੯੬) ਕਿਰਿਯਧਮ੍ਮਾ ਰਾਗਦਿਟ੍ਠੀਨਂ ਅਧਿਪਤਿਪਚ੍ਚਯੋ ਹੋਨ੍ਤੇਵ, ਤੇ ਚ ‘‘ਅਤੀਤਾਰਮ੍ਮਣੇ ਅਨਾਗਤੇ ਖਨ੍ਧੇ ਗਰੁਂ ਕਤ੍ਵਾ ਅਸ੍ਸਾਦੇਤੀ’’ਤਿਆਦਿਵਚਨਤੋ (ਪਟ੍ਠਾ. ੨.੧੯.੨੩) ਅਨਾਗਤਾ ਤੇਭੂਮਕਾਪਿ ਅਧਿਪਤਿਪਚ੍ਚਯੋ ਹੋਨ੍ਤੀਤਿ. ਆਵਜ੍ਜਨਕਿਰਿਯਸਬ੍ਭਾਵਤੋ ਪਨ ਇਦਮ੍ਪਿ ਵਿਚਾਰੇਤਬ੍ਬਂ.

ਅਧਿਪਤਿਪਚ੍ਚਯਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.