੨੨-੨੩-੨੪. ਨਤ੍ਥਿਵਿਗਤਅਵਿਗਤਪਚ੍ਚਯਨਿਦ੍ਦੇਸਵਣ੍ਣਨਾ

੨੨-੨੩. ਪਚ੍ਚਯਲਕ੍ਖਣਮੇਵ ਹੇਤ੍ਥ ਨਾਨਨ੍ਤਿ ਏਤੇਨ ਨਤ੍ਥਿਵਿਗਤਪਚ੍ਚਯੇਸੁ ਅਤ੍ਥਿਅਵਿਗਤਪਚ੍ਚਯੇਸੁ ਚ ਬ੍ਯਞ੍ਜਨਮਤ੍ਤੇਯੇਵ ਨਾਨਤ੍ਤਂ, ਨ ਅਤ੍ਥੇਤਿ ਇਦਂ ਯੋ ਪਚ੍ਚਯੋਤਿ ਅਤ੍ਥੋ, ਤਸ੍ਮਿਂ ਨਾਨਤ੍ਤਂ ਨਤ੍ਥਿ, ਬ੍ਯਞ੍ਜਨਸਙ੍ਗਹਿਤੇ ਪਚ੍ਚਯਲਕ੍ਖਣਮਤ੍ਤੇਯੇਵ ਨਾਨਤ੍ਤਨ੍ਤਿ ਇਮਮਤ੍ਥਂ ਸਨ੍ਧਾਯ ਵੁਤ੍ਤਨ੍ਤਿ ਵਿਞ੍ਞਾਯਤਿ.

ਨਤ੍ਥਿਵਿਗਤਅਵਿਗਤਪਚ੍ਚਯਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਪਚ੍ਚਯਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਪਚ੍ਚਯਨਿਦ੍ਦੇਸਪਕਿਣ੍ਣਕਵਿਨਿਚ੍ਛਯਕਥਾਵਣ੍ਣਨਾ

‘‘ਲੋਭਦੋਸਮੋਹਾ ਵਿਪਾਕਪਚ੍ਚਯਾਪਿ ਨ ਹੋਨ੍ਤਿ, ਸੇਸਾਨਂ ਸਤ੍ਤਰਸਨ੍ਨਂ ਪਚ੍ਚਯਾਨਂ ਵਸੇਨ ਪਚ੍ਚਯਾ ਹੋਨ੍ਤੀ’’ਤਿਆਦਿਮਪਾਠੋ. ਏਤ੍ਥ ਚ ਲੋਭਦੋਸਮੋਹਾਨਂ ਪਚ੍ਚੇਕਂ ਸਤ੍ਤਰਸਹਿ ਪਚ੍ਚਯੇਹਿ ਪਚ੍ਚਯਭਾਵੋ ਵੁਤ੍ਤੋ, ਸਬ੍ਬੇ ਹੇਤੂ ਸਹ ਅਗ੍ਗਹੇਤ੍ਵਾ ਏਕਧਮ੍ਮਸ੍ਸ ਅਨੇਕਪਚ੍ਚਯਭਾਵਦਸ੍ਸਨਤ੍ਥਂ ਅਮੋਹਾਦੀਨਂ ਵਿਸੁਂ ਗਹਿਤਤ੍ਤਾਤਿ ਦੋਸਸ੍ਸਪਿ ਸਤ੍ਤਰਸਹਿ ਪਚ੍ਚਯਭਾਵੋ ਆਪਜ੍ਜਤਿ, ਤਥਾ ਚ ਸਤਿ ਦੋਸਸ੍ਸਪਿ ਗਰੁਕਰਣਂ ਪਾਲ਼ਿਯਂ ਵਤ੍ਤਬ੍ਬਂ ਸਿਯਾ. ‘‘ਅਕੁਸਲੋ ਪਨ ਆਰਮ੍ਮਣਾਧਿਪਤਿ ਨਾਮ ਲੋਭਸਹਗਤਚਿਤ੍ਤੁਪ੍ਪਾਦੋ ਵੁਚ੍ਚਤੀ’’ਤਿ (ਪਟ੍ਠਾ. ਅਟ੍ਠ. ੧.੪) ਏਤ੍ਥਾਪਿ ਲੋਭਦੋਸਸਹਗਤਚਿਤ੍ਤੁਪ੍ਪਾਦਾਤਿ ਵਤ੍ਤਬ੍ਬਂ ਸਿਯਾ, ਨ ਪਨ ਵੁਤ੍ਤਂ, ਤਸ੍ਮਾ ਦੋਸਸ੍ਸ ਅਧਿਪਤਿਪਚ੍ਚਯਤਾਪਿ ਨਿਵਾਰੇਤਬ੍ਬਾ. ਨ ਚ ‘‘ਸੇਸਾਨ’’ਨ੍ਤਿ ਵਚਨੇਨ ਅਧਿਪਤਿਪਚ੍ਚਯੋ ਨਿਵਾਰਿਤੋ, ਅਥ ਖੋ ਸਙ੍ਗਹਿਤੋ ਪੁਰੇਜਾਤਾਦੀਹਿ ਯਥਾਵੁਤ੍ਤੇਹਿ ਸੇਸਤ੍ਤਾਤਿ ਤਨ੍ਨਿਵਾਰਣਤ੍ਥਂ ਦੋਸਂ ਲੋਭਮੋਹੇਹਿ ਸਹ ਅਗ੍ਗਹੇਤ੍ਵਾ ਵਿਸੁਞ੍ਚ ਅਗ੍ਗਹੇਤ੍ਵਾ ‘‘ਦੋਸੋ ਅਧਿਪਤਿਪਚ੍ਚਯੋਪਿ ਨ ਹੋਤਿ, ਸੇਸਾਨਂ ਪਚ੍ਚਯਾਨਂ ਵਸੇਨ ਪਚ੍ਚਯੋ ਹੋਤੀ’’ਤਿ ਪਠਨ੍ਤਿ. ਇਮਿਨਾ ਨਯੇਨਾਤਿ ਏਤੇਨ ਫੋਟ੍ਠਬ੍ਬਾਯਤਨਸ੍ਸ ਸਹਜਾਤਾਦਿਪਚ੍ਚਯਭਾਵਂ, ਸਬ੍ਬਧਮ੍ਮਾਨਂ ਯਥਾਯੋਗਂ ਹੇਤਾਦਿਪਚ੍ਚਯਭਾਵਞ੍ਚ ਦਸ੍ਸੇਤਿ. ਨ ਹਿ ਏਤਂ ਏਕਪਚ੍ਚਯਸ੍ਸ ਅਨੇਕਪਚ੍ਚਯਭਾਵਦਸ੍ਸਨਨ੍ਤਿ ਰੂਪਾਦੀਨਂ ਪਕਤੂਪਨਿਸ੍ਸਯਭਾਵੋ ਚ ਏਤੇਨ ਦਸ੍ਸਿਤੋਤਿ ਦਟ੍ਠਬ੍ਬੋ.

ਚਤੁਨ੍ਨਂ ਖਨ੍ਧਾਨਂ ਭੇਦਾ ਚਕ੍ਖੁਵਿਞ੍ਞਾਣਧਾਤੁਆਦਯੋਤਿ ਭੇਦਂ ਅਨਾਮਸਿਤ੍ਵਾ ਤੇ ਏਵ ਗਹੇਤ੍ਵਾ ਆਹ ‘‘ਚਤੂਸੁ ਖਨ੍ਧੇਸੂ’’ਤਿ. ਮਿਚ੍ਛਾਵਾਚਾਕਮ੍ਮਨ੍ਤਾਜੀਵਾ ਤੇਹਿ ਚੇਵ ਕਮ੍ਮਾਹਾਰਪਚ੍ਚਯੇਹਿ ਚਾਤਿ ਏਕੂਨਵੀਸਤਿਧਾਤਿ ਇਦਮੇਵਂ ਨ ਸਕ੍ਕਾ ਵਤ੍ਤੁਂ. ਨ ਹਿ ਮਿਚ੍ਛਾਵਾਚਾਦਯੋ ਮਿਚ੍ਛਾਦਿਟ੍ਠਿ ਵਿਯ ਮਗ੍ਗਪਚ੍ਚਯਾ ਹੋਨ੍ਤਿ ਚੇਤਨਾਯ ਮਗ੍ਗਪਚ੍ਚਯਤ੍ਤਾਭਾਵਤੋ. ਯਦਿ ਚ ਭਵੇਯ੍ਯ, ਪਞ੍ਹਾਵਾਰੇ ‘‘ਕਮ੍ਮਪਚ੍ਚਯਾ ਮਗ੍ਗੇ ਤੀਣੀ’’ਤਿ ਵਤ੍ਤਬ੍ਬਂ ਸਿਯਾ, ਤਸ੍ਮਾ ਮਿਚ੍ਛਾਵਾਚਾਦੀਨਂ ਮਗ੍ਗਪਚ੍ਚਯਭਾਵੋ ਨ ਵਤ੍ਤਬ੍ਬੋ. ਪਟ੍ਠਾਨਸਂਵਣ੍ਣਨਾ ਹੇਸਾ. ਸੇਸਪਚ੍ਚਯਭਾਵੋ ਚ ਚੇਤਨਾਯ ਅਨੇਕਪਚ੍ਚਯਭਾਵਵਚਨੇਨ ਵੁਤ੍ਤੋਯੇਵਾਤਿ ਨ ਇਦਂ ਪਠਿਤਬ੍ਬਨ੍ਤਿ ਨ ਪਠਨ੍ਤਿ. ‘‘ਅਹਿਰਿਕਂ…ਪੇ… ਮਿਦ੍ਧਂ ਉਦ੍ਧਚ੍ਚਂ ਵਿਚਿਕਿਚ੍ਛਾ’’ਤਿਆਦਿਮਪਾਠੋ, ਵਿਚਿਕਿਚ੍ਛਾ ਪਨ ਅਧਿਪਤਿਪਚ੍ਚਯੋ ਨ ਹੋਤੀਤਿ ਤਂ ਤਤ੍ਥ ਅਪਠਿਤ੍ਵਾ ‘‘ਵਿਚਿਕਿਚ੍ਛਾਇਸ੍ਸਾਮਚ੍ਛਰਿਯਕੁਕ੍ਕੁਚ੍ਚਾਨਿ ਤਤੋ ਅਧਿਪਤਿਪਚ੍ਚਯਂ ਅਪਨੇਤ੍ਵਾ’’ਤਿ ਏਵਮੇਤ੍ਥ ਪਠਨ੍ਤਿ.

‘‘ਚਤ੍ਤਾਰਿ ਮਹਾਭੂਤਾਨਿ ਆਰਮ੍ਮਣ…ਪੇ… ਪੁਰੇਜਾਤਵਿਪ੍ਪਯੁਤ੍ਤਅਤ੍ਥਿਅਵਿਗਤਵਸੇਨ ਦਸਧਾ ਪਚ੍ਚਯਾ ਹੋਨ੍ਤਿ, ਪੁਨ ਤਥਾ ਹਦਯਵਤ੍ਥੂ’’ਤਿ ਪੁਰਿਮਪਾਠੋ, ਮਹਾਭੂਤਾਨਿ ਪਨ ਵਿਪ੍ਪਯੁਤ੍ਤਪਚ੍ਚਯਾ ਨ ਹੋਨ੍ਤੀਤਿ ‘‘ਪੁਰੇਜਾਤਅਤ੍ਥਿਅਵਿਗਤਵਸੇਨ ਨਵਧਾ ਪਚ੍ਚਯਾ ਹੋਨ੍ਤਿ, ਵਿਪ੍ਪਯੁਤ੍ਤਪਚ੍ਚਯਂ ਪਕ੍ਖਿਪਿਤ੍ਵਾ ਦਸਧਾ ਵਤ੍ਥੁ’’ਨ੍ਤਿ ਪਠਨ੍ਤਿ. ਏਤ੍ਤਕਮੇਵੇਤ੍ਥ ਅਪੁਬ੍ਬਨ੍ਤਿ ਏਤਸ੍ਮਿਂ ਪੁਰੇਜਾਤਪਚ੍ਚਯੇ ਸਹਜਾਤਨਿਸ੍ਸਯੇਹਿ ਅਪੁਬ੍ਬਂ ਰੂਪਸਦ੍ਦਗਨ੍ਧਰਸਾਯਤਨਮਤ੍ਤਮੇਵਾਤਿ ਅਤ੍ਥੋ, ਆਰਮ੍ਮਣਾਨਿ ਪਨੇਤਾਨਿ ਆਰਮ੍ਮਣਪਚ੍ਚਯਧਮ੍ਮਾਨਂ ਅਨੇਕਪਚ੍ਚਯਭਾਵੇ ਵੁਤ੍ਤਾਨੀਤਿ ਸਬ੍ਬਾਤਿਕ੍ਕਨ੍ਤਪਚ੍ਚਯਾਪੇਕ੍ਖਾ ਏਤੇਸਂ ਅਪੁਬ੍ਬਤਾ ਨਤ੍ਥੀਤਿ. ਇਨ੍ਦ੍ਰਿਯਾਦੀਸੁ ਅਪੁਬ੍ਬਂ ਨਤ੍ਥੀਤਿ ਰੂਪਜੀਵਿਤਿਨ੍ਦ੍ਰਿਯਸ੍ਸਪਿ ਅਰੂਪਜੀਵਿਤਿਨ੍ਦ੍ਰਿਯਤੋ ਅਪੁਬ੍ਬਸ੍ਸ ਪਚ੍ਚਯਭਾਵਸ੍ਸ ਅਭਾਵਂ ਮਞ੍ਞਮਾਨੇਨ ਅਪੁਬ੍ਬਤਾ ਨ ਵੁਤ੍ਤਾ. ਤਸ੍ਸ ਪਨ ਪੁਰੇਜਾਤਪਚ੍ਚਯਭਾਵਤੋ ਅਪੁਬ੍ਬਤਾ. ਕਬਲ਼ੀਕਾਰਾਹਾਰਸ੍ਸ ਚ ਪੁਰੇਜਾਤੇਨ ਸਦ੍ਧਿਂ ਸਤ੍ਤਧਾ ਪਚ੍ਚਯਭਾਵੋ ਯੋਜੇਤਬ੍ਬੋ.

ਆਕਾਰੋਤਿ ਮੂਲਾਦਿਆਕਾਰੋ. ਅਤ੍ਥੋਤਿ ਤੇਨਾਕਾਰੇਨ ਉਪਕਾਰਕਤਾ. ‘‘ਯੇਨਾਕਾਰੇਨਾ’’ਤਿ ਏਤਸ੍ਸ ਵਾ ਅਤ੍ਥਵਚਨਂ ‘‘ਯੇਨਤ੍ਥੇਨਾ’’ਤਿ. ਵਿਪਾਕਹੇਤੂਸੁਯੇਵ ਲਬ੍ਭਤੀਤਿ ਏਤ੍ਥ ਅਮੋਹਵਿਪਾਕਹੇਤੁਸ੍ਸ ਅਧਿਪਤਿਪਚ੍ਚਯਭਾਵੋ ਚ ਲੋਕੁਤ੍ਤਰਵਿਪਾਕੇਯੇਵ ਲਬ੍ਭਤੀਤਿ. ਏਵਂ ਸਬ੍ਬਤ੍ਥ ਲਬ੍ਭਮਾਨਾਲਬ੍ਭਮਾਨਂ ਸਲ੍ਲਕ੍ਖੇਤਬ੍ਬਂ. ਵਿਪ੍ਪਯੁਤ੍ਤਂ ਅਪਠਿਤ੍ਵਾ ‘‘ਛਹਾਕਾਰੇਹੀ’’ਤਿ ਪੁਰਿਮਪਾਠੋ, ਤਂ ਪਨ ਪਠਿਤ੍ਵਾ ‘‘ਸਤ੍ਤਹਾਕਾਰੇਹੀ’’ਤਿ ਪਠਨ੍ਤਿ. ਉਕ੍ਕਟ੍ਠਪਰਿਚ੍ਛੇਦੋ ਹੇਤ੍ਥ ਵੁਚ੍ਚਤਿ, ਨ ਚ ਯਂ ਆਰਮ੍ਮਣਂ ਨਿਸ੍ਸਯੋ ਹੋਤਿ, ਤਂ ਵਿਪ੍ਪਯੁਤ੍ਤਂ ਨ ਹੋਤੀਤਿ.

ਅਨਨ੍ਤਰਸਮਨਨ੍ਤਰੇਸੁ ਯਂ ਕਮ੍ਮਪਚ੍ਚਯੋ ਹੋਤਿ, ਤਂ ਨ ਆਸੇਵਨਪਚ੍ਚਯੋ. ਯਞ੍ਚ ਆਸੇਵਨਪਚ੍ਚਯੋ ਹੋਤਿ, ਨ ਤਂ ਕਮ੍ਮਪਚ੍ਚਯੋਤਿ ਦਟ੍ਠਬ੍ਬਂ. ‘‘ਪਕਤੂਪਨਿਸ੍ਸਯੋ ਪਕਤੂਪਨਿਸ੍ਸਯੋਵਾ’’ਤਿ ਵੁਤ੍ਤਂ, ਕਮ੍ਮਪਚ੍ਚਯੋਪਿ ਪਨ ਸੋ ਹੋਤਿ, ਤਸ੍ਮਾ ‘‘ਕਮ੍ਮਪਚ੍ਚਯੋ ਚਾ’’ਤਿ ਪਠਨ੍ਤਿ. ਅਯਂ ਪਨੇਤ੍ਥ ਅਤ੍ਥੋ – ਪਕਤੂਪਨਿਸ੍ਸਯੋ ਯੇਭੁਯ੍ਯੇਨ ਪਕਤੂਪਨਿਸ੍ਸਯੋਵ ਹੋਤਿ, ਕੋਚਿ ਪਨੇਤ੍ਥ ਕਮ੍ਮਪਚ੍ਚਯੋ ਚ ਹੋਤੀਤਿ. ‘‘ਆਰਮ੍ਮਣਪੁਰੇਜਾਤੇ ਪਨੇਤ੍ਥ ਇਨ੍ਦ੍ਰਿਯਵਿਪ੍ਪਯੁਤ੍ਤਪਚ੍ਚਯਤਾ ਨ ਲਬ੍ਭਤੀ’’ਤਿ ਵੁਤ੍ਤਂ. ਤਤ੍ਥ ਆਰਮ੍ਮਣਪੁਰੇਜਾਤਨ੍ਤਿ ਯਦਿ ਕਞ੍ਚਿ ਆਰਮ੍ਮਣਭੂਤਂ ਪੁਰੇਜਾਤਂ ਵੁਤ੍ਤਂ, ਆਰਮ੍ਮਣਭੂਤਸ੍ਸ ਵਤ੍ਥੁਸ੍ਸ ਵਿਪ੍ਪਯੁਤ੍ਤਪਚ੍ਚਯਤਾ ਲਬ੍ਭਤੀਤਿ ਸਾ ਨ ਲਬ੍ਭਤੀਤਿ ਨ ਵਤ੍ਤਬ੍ਬਾ. ਅਥ ਪਨ ਵਤ੍ਥੁਪੁਰੇਜਾਤਤੋ ਅਞ੍ਞਂ ਵਤ੍ਥੁਭਾਵਰਹਿਤਾਰਮ੍ਮਣਮੇਵ ‘‘ਆਰਮ੍ਮਣਪੁਰੇਜਾਤ’’ਨ੍ਤਿ ਵੁਤ੍ਤਂ, ਤਸ੍ਸ ਨਿਸ੍ਸਯਪਚ੍ਚਯਤਾ ਨ ਲਬ੍ਭਤੀਤਿ ‘‘ਨਿਸ੍ਸਯਿਨ੍ਦ੍ਰਿਯਵਿਪ੍ਪਯੁਤ੍ਤਪਚ੍ਚਯਤਾ ਨ ਲਬ੍ਭਤੀ’’ਤਿ ਵਤ੍ਤਬ੍ਬਂ. ਇਤੋ ਉਤ੍ਤਰਿਪੀਤਿ ਪੁਰੇਜਾਤਤੋ ਪਰਤੋਪੀਤਿ ਅਤ੍ਥੋ, ਇਤੋ ਵਾ ਇਨ੍ਦ੍ਰਿਯਵਿਪ੍ਪਯੁਤ੍ਤਤੋ ਨਿਸ੍ਸਯਿਨ੍ਦ੍ਰਿਯਵਿਪ੍ਪਯੁਤ੍ਤਤੋ ਵਾ ਉਤ੍ਤਰਿ ਆਰਮ੍ਮਣਾਧਿਪਤਿਆਦਿ ਚ ਲਬ੍ਭਮਾਨਾਲਬ੍ਭਮਾਨਂ ਵੇਦਿਤਬ੍ਬਨ੍ਤਿ ਅਤ੍ਥੋ ਵਤ੍ਤਬ੍ਬੋ. ਕਮ੍ਮਾਦੀਸੁ ਪਨ ਲਬ੍ਭਮਾਨਾਲਬ੍ਭਮਾਨਂ ਨ ਵਕ੍ਖਤੀਤਿ ਪੁਰਿਮੋਯੇਵੇਤ੍ਥ ਅਤ੍ਥੋ ਅਧਿਪ੍ਪੇਤੋ.

‘‘ਕਬਲ਼ੀਕਾਰੋ ਆਹਾਰੋ ਆਹਾਰਪਚ੍ਚਯੋਵਾ’’ਤਿ ਪੁਰਿਮਪਾਠੋ, ਅਤ੍ਥਿਅਵਿਗਤਪਚ੍ਚਯੋਪਿ ਪਨ ਸੋ ਹੋਤਿ, ਤੇਨ ‘‘ਕਬਲ਼ੀਕਾਰੋ ਆਹਾਰੋ ਆਹਾਰਪਚ੍ਚਯਤ੍ਤਂ ਅਵਿਜਹਨ੍ਤੋਵ ਅਤ੍ਥਿਅਵਿਗਤਾਨਂ ਵਸੇਨ ਅਪਰੇਹਿਪਿ ਦ੍ਵੀਹਾਕਾਰੇਹਿ ਅਨੇਕਪਚ੍ਚਯਭਾਵਂ ਗਚ੍ਛਤੀ’’ਤਿ ਪਠਨ੍ਤਿ.

‘‘ਯਥਾਨੁਰੂਪਂ ਝਾਨਪਚ੍ਚਯੇ ਵੁਤ੍ਤਾਨਂ ਦਸਨ੍ਨਂ ਹੇਤੁਅਧਿਪਤੀਨਞ੍ਚਾਤਿ ਇਮੇਸਂ ਵਸੇਨਾ’’ਤਿ ਪੁਰਿਮਪਾਠੋ, ‘‘ਯਥਾਨੁਰੂਪਂ ਝਾਨਪਚ੍ਚਯੇ ਵੁਤ੍ਤਾਨਂ ਮਗ੍ਗਵਜ੍ਜਾਨਂ ਨਵਨ੍ਨਂ ਹੇਤੁਅਧਿਪਤਿਝਾਨਾਨਞ੍ਚਾਤਿ ਇਮੇਸਂ ਵਸੇਨਾ’’ਤਿ ਪਚ੍ਛਿਮਪਾਠੋ, ਤੇਸੁ ਵਿਚਾਰੇਤ੍ਵਾ ਯੁਤ੍ਤੋ ਗਹੇਤਬ੍ਬੋ.

ਸਮਨਨ੍ਤਰਨਿਰੁਦ੍ਧਤਾਯ ਆਰਮ੍ਮਣਭਾਵੇਨ ਚ ਸਦਿਸੋ ਪਚ੍ਚਯਭਾਵੋ ਪਚ੍ਚਯਸਭਾਗਤਾ, ਵਿਰੁਦ੍ਧਪਚ੍ਚਯਤਾ ਪਚ੍ਚਯਵਿਸਭਾਗਤਾ. ‘‘ਇਮਿਨਾ ਉਪਾਯੇਨਾ’’ਤਿ ਵਚਨਤੋ ਹੇਤੁਆਦੀਨਂ ਸਹਜਾਤਾਨਂ ਸਹਜਾਤਭਾਵੇਨ ਸਭਾਗਤਾ, ਸਹਜਾਤਾਸਹਜਾਤਾਨਂ ਹੇਤੁਆਰਮ੍ਮਣਾਦੀਨਂ ਅਞ੍ਞਮਞ੍ਞਵਿਸਭਾਗਤਾਤਿ ਏਵਮਾਦਿਨਾ ਉਪਾਯੇਨ ਸਭਾਗਤਾ ਵਿਸਭਾਗਤਾ ਯੋਜੇਤਬ੍ਬਾ.

ਜਨਕਾਯੇਵ, ਨ ਅਜਨਕਾਤਿ ਜਨਕਭਾਵਪ੍ਪਧਾਨਾਯੇਵ ਹੁਤ੍ਵਾ ਪਚ੍ਚਯਾ ਹੋਨ੍ਤਿ, ਨ ਉਪਤ੍ਥਮ੍ਭਕਭਾਵਪ੍ਪਧਾਨਾਤਿ ਅਤ੍ਥੋ ਦਟ੍ਠਬ੍ਬੋ. ਯੇਸਂ ਹੇਤੁਆਦਯੋ ਪਚ੍ਚਯਾ ਹੋਨ੍ਤਿ, ਤੇ ਤੇਹਿ ਵਿਨਾ ਨੇਵ ਉਪ੍ਪਜ੍ਜਨ੍ਤਿ, ਨ ਚ ਪਵਤ੍ਤਨ੍ਤੀਤਿ ਤੇਸਂ ਉਭਯਪ੍ਪਧਾਨਤਾ ਵੁਤ੍ਤਾ. ਨ ਹਿ ਤੇ ਅਨਨ੍ਤਰਾਦਯੋ ਵਿਯ ਜਨਨੇਨੇਵ ਪਵਤ੍ਤਿਂ ਕਰੋਨ੍ਤੀਤਿ.

ਸਬ੍ਬੇਸਂ ਠਾਨਂ ਕਾਰਣਭਾਵੋ ਸਬ੍ਬਟ੍ਠਾਨਂ, ਤਂ ਏਤੇਸਂ ਅਤ੍ਥੀਤਿ ਸਬ੍ਬਟ੍ਠਾਨਿਕਾ. ਉਪਨਿਸ੍ਸਯਂ ਭਿਨ੍ਦਨ੍ਤੇਨ ਤਯੋਪਿ ਉਪਨਿਸ੍ਸਯਾ ਵਤ੍ਤਬ੍ਬਾ, ਅਭਿਨ੍ਦਿਤ੍ਵਾ ਵਾ ਉਪਨਿਸ੍ਸਯਗ੍ਗਹਣਮੇਵ ਕਾਤਬ੍ਬਂ. ਤਤ੍ਥ ਭਿਨ੍ਦਨਂ ਪਕਤੂਪਨਿਸ੍ਸਯਸ੍ਸ ਰੂਪਾਨਂ ਪਚ੍ਚਯਤ੍ਤਾਭਾਵਦਸ੍ਸਨਤ੍ਥਂ, ਆਰਮ੍ਮਣਾਨਨ੍ਤਰੂਪਨਿਸ੍ਸਯਾਨਂ ਪਨ ਪੁਬ੍ਬੇ ਆਰਮ੍ਮਣਾਧਿਪਤਿਅਨਨ੍ਤਰਗ੍ਗਹਣੇਹਿ ਗਹਿਤਤ੍ਤਾ ਤੇਸੁ ਏਕਦੇਸੇਨ ਅਨਨ੍ਤਰੂਪਨਿਸ੍ਸਯੇਨ ਇਤਰਮ੍ਪਿ ਦਸ੍ਸੇਤੀਤਿ ਦਟ੍ਠਬ੍ਬਂ. ਪੁਰੇਜਾਤਪਚ੍ਛਾਜਾਤਾਪਿ ਅਸਬ੍ਬਟ੍ਠਾਨਿਕਾ ਅਰੂਪਰੂਪਾਨਞ੍ਞੇਵ ਯਥਾਕ੍ਕਮੇਨ ਪਚ੍ਚਯਭਾਵਤੋਤਿ ਏਤ੍ਥ ਪੁਰੇਜਾਤਪਚ੍ਚਯੋ ਅਨਨ੍ਤਰਾਦੀਸੁ ਏਵ ਵਤ੍ਤਬ੍ਬੋ ਤਂਸਮਾਨਗਤਿਕਤ੍ਤਾ, ਨ ਚ ਯੁਗਲ਼ਭਾਵੋ ਪਚ੍ਛਾਜਾਤੇਨ ਸਹ ਕਥਨੇ ਕਾਰਣਂ ਅਸਬ੍ਬਟ੍ਠਾਨਿਕਦਸ੍ਸਨਮਤ੍ਤਸ੍ਸ ਅਧਿਪ੍ਪੇਤਤ੍ਤਾਤਿ ਤਂ ਤਤ੍ਥ ਪਠਿਤ੍ਵਾ ‘‘ਪਚ੍ਛਾਜਾਤੋਪਿ ਅਸਬ੍ਬਟ੍ਠਾਨਿਕੋ ਰੂਪਾਨਂਯੇਵ ਪਚ੍ਚਯਭਾਵਤੋ’’ਤਿ ਪਠਨ੍ਤਿ.

ਪਚ੍ਚਯਨਿਦ੍ਦੇਸਪਕਿਣ੍ਣਕਵਿਨਿਚ੍ਛਯਕਥਾਵਣ੍ਣਨਾ ਨਿਟ੍ਠਿਤਾ.