੧੮. ਮਗ੍ਗਪਚ੍ਚਯਨਿਦ੍ਦੇਸਵਣ੍ਣਨਾ

੧੮. ਪਞ੍ਞਾ ਵਿਤਕ੍ਕੋ ਸਮ੍ਮਾਵਾਚਾਕਮ੍ਮਨ੍ਤਾਜੀਵਾ ਵੀਰਿਯਂ ਸਤਿ ਸਮਾਧਿ ਮਿਚ੍ਛਾਦਿਟ੍ਠਿ ਮਿਚ੍ਛਾਵਾਚਾਕਮ੍ਮਨ੍ਤਾਜੀਵਾਤਿ ਇਮਾਨਿ ਦ੍ਵਾਦਸਙ੍ਗਾਨੀਤਿ ਏਤ੍ਥ ਦੁਵਿਧਮ੍ਪਿ ਸਙ੍ਕਪ੍ਪਂ ਵੀਰਿਯਂ ਸਮਾਧਿਞ੍ਚ ਵਿਤਕ੍ਕਵੀਰਿਯਸਮਾਧਿਵਚਨੇਹਿ ਸਙ੍ਗਣ੍ਹਿਤ੍ਵਾ ‘‘ਅਯਮੇਵ ਖੋ, ਆਵੁਸੋ, ਅਟ੍ਠਙ੍ਗਿਕੋ ਮਿਚ੍ਛਾਮਗ੍ਗੋ ਅਬ੍ਰਹ੍ਮਚਰਿਯਂ. ਸੇਯ੍ਯਥਿਦਂ – ਮਿਚ੍ਛਾਦਿਟ੍ਠਿ…ਪੇ… ਮਿਚ੍ਛਾਸਮਾਧੀ’’ਤਿਆਦੀਹਿ (ਸਂ. ਨਿ. ੫.੧੮) ਸੁਤ੍ਤਵਚਨੇਹਿ ਮਿਚ੍ਛਾਵਾਚਾਕਮ੍ਮਨ੍ਤਾਜੀਵੇਸੁਪਿ ਮਗ੍ਗਙ੍ਗਵੋਹਾਰਸਿਦ੍ਧਿਤੋ ਤੇਹਿ ਸਹ ਦ੍ਵਾਦਸਙ੍ਗਾਨਿ ਇਧ ਲਬ੍ਭਮਾਨਾਨਿ ਚ ਅਲਬ੍ਭਮਾਨਾਨਿ ਚ ਮਗ੍ਗਙ੍ਗਵਚਨਸਾਮਞ੍ਞੇਨ ਸਙ੍ਗਣ੍ਹਿਤ੍ਵਾ ਵੁਤ੍ਤਾਨਿ. ਏਵਞ੍ਹਿ ਸੁਤ੍ਤਨ੍ਤਵੋਹਾਰੋਪਿ ਦਸ੍ਸਿਤੋ ਹੋਤਿ, ਏਵਂ ਪਨ ਦਸ੍ਸੇਨ੍ਤੇਨ ‘‘ਮਗ੍ਗਪਚ੍ਚਯਨਿਦ੍ਦੇਸੇ ਮਗ੍ਗਙ੍ਗਾਨੀ’’ਤਿ ਏਵਂ ਉਦ੍ਧਰਿਤ੍ਵਾ ਤਸ੍ਸ ਪਾਠਗਤਸ੍ਸ ਮਗ੍ਗਙ੍ਗਸਦ੍ਦਸ੍ਸ ਅਤ੍ਥਭਾਵੇਨ ਇਮਾਨਿ ਦ੍ਵਾਦਸਙ੍ਗਾਨਿ ਨ ਦਸ੍ਸੇਤਬ੍ਬਾਨਿ. ਨ ਹਿ ਪਾਲ਼ਿਯਂ ਮਗ੍ਗਙ੍ਗਸਦ੍ਦਸ੍ਸ ਮਿਚ੍ਛਾਵਾਚਾਕਮ੍ਮਨ੍ਤਾਜੀਵੋਤਿ ਅਤ੍ਥੋ ਵਤ੍ਤਬ੍ਬੋ. ਤੇਹਿ ਸਮ੍ਮਾਵਾਚਾਦੀਹਿ ਪਟਿਪਕ੍ਖਾ ਚੇਤਨਾਧਮ੍ਮਾ ਤਪ੍ਪਟਿਪਕ੍ਖਭਾਵਤੋਯੇਵ ‘‘ਮਿਚ੍ਛਾਮਗ੍ਗਙ੍ਗਾਨੀ’’ਤਿ ਸੁਤ੍ਤੇ ਵੁਤ੍ਤਾਨਿ, ਨ ਪਨ ਮਗ੍ਗਪਚ੍ਚਯਭਾਵੇਨ. ਮਗ੍ਗਙ੍ਗਾਨਿ ਮਗ੍ਗਪਚ੍ਚਯਭੂਤਾਨਿ ਚ ਇਧ ਪਾਲ਼ਿਯਂ ‘‘ਮਗ੍ਗਙ੍ਗਾਨੀ’’ਤਿ ਵੁਤ੍ਤਾਨਿ, ਨ ਚ ਅਞ੍ਞਂ ਉਦ੍ਧਰਿਤ੍ਵਾ ਅਞ੍ਞਸ੍ਸ ਅਤ੍ਥੋ ਵਤ੍ਤਬ੍ਬੋ. ਪਰਿਯਾਯਨਿਪ੍ਪਰਿਯਾਯਮਗ੍ਗਙ੍ਗਦਸ੍ਸਨਤ੍ਥਂ ਪਨ ਇਚ੍ਛਨ੍ਤੇਨ ਪਾਲ਼ਿਗਤਮਗ੍ਗਙ੍ਗਸਦ੍ਦਪਤਿਰੂਪਕੋ ਅਞ੍ਞੋ ਮਗ੍ਗਙ੍ਗਸਦ੍ਦੋ ਉਭਯਪਦਤ੍ਥੋ ਉਦ੍ਧਰਿਤਬ੍ਬੋ ਯਥਾ ‘‘ਅਧਿਕਰਣਂ ਨਾਮ ਚਤ੍ਤਾਰਿ ਅਧਿਕਰਣਾਨੀ’’ਤਿ (ਪਾਰਾ. ੩੮੬, ੪੦੫). ਇਧ ਪਨ ‘‘ਮਗ੍ਗਪਚ੍ਚਯਨਿਦ੍ਦੇਸੇ ਮਗ੍ਗਙ੍ਗਾਨੀ’’ਤਿ ਪਾਲ਼ਿਗਤੋਯੇਵ ਮਗ੍ਗਙ੍ਗਸਦ੍ਦੋ ਉਦ੍ਧਟੋ, ਨ ਚ ਅਤ੍ਥੁਦ੍ਧਰਣਵਸੇਨ ਦਸ੍ਸੇਤ੍ਵਾ ਅਧਿਪ੍ਪੇਤਤ੍ਥਨਿਯਮਨਂ ਕਤਂ, ਤਸ੍ਮਾ ਪਾਲ਼ਿਯਂ ਮਗ੍ਗਙ੍ਗਸਦ੍ਦਸ੍ਸ ਮਿਚ੍ਛਾਵਾਚਾਦੀਨਂ ਅਤ੍ਥਭਾਵੋ ਮਾ ਹੋਤੂਤਿ ‘‘ਸਮ੍ਮਾਦਿਟ੍ਠਿਸਙ੍ਕਪ੍ਪਵਾਚਾਕਮ੍ਮਨ੍ਤਾਜੀਵਵਾਯਾਮਸਤਿਸਮਾਧਿਮਿਚ੍ਛਾਦਿਟ੍ਠਿਸਙ੍ਕਪ੍ਪਵਾਯਾਮਸਮਾਧਯੋਤਿ ਇਮਾਨਿ ਦ੍ਵਾਦਸਙ੍ਗਾਨੀ’’ਤਿ ਪਠਨ੍ਤਿ. ਨਨੁ ਏਵਂ ‘‘ਅਹੇਤੁਕਚਿਤ੍ਤੁਪ੍ਪਾਦਵਜ੍ਜੇਸੂ’’ਤਿ ਨ ਵਤ੍ਤਬ੍ਬਂ. ਨ ਹਿ ਤੇਸੁ ਸਮ੍ਮਾਦਿਟ੍ਠਿਆਦਯੋ ਯਥਾਵੁਤ੍ਤਾ ਸਨ੍ਤਿ, ਯੇ ਵਜ੍ਜੇਤਬ੍ਬਾ ਸਿਯੁਨ੍ਤਿ? ਨ, ਉਪ੍ਪਤ੍ਤਿਟ੍ਠਾਨਨਿਯਮਨਤ੍ਥਤ੍ਤਾ. ਅਹੇਤੁਕਚਿਤ੍ਤੁਪ੍ਪਾਦਵਜ੍ਜੇਸ੍ਵੇਵ ਏਤਾਨਿ ਉਪ੍ਪਜ੍ਜਨ੍ਤਿ, ਨਾਹੇਤੁਕਚਿਤ੍ਤੁਪ੍ਪਾਦੇਸੁ. ਤਤ੍ਥੁਪ੍ਪਨ੍ਨਾਨਿ ਦ੍ਵਾਦਸਙ੍ਗਾਨੀਤਿ ਅਯਞ੍ਹੇਤ੍ਥ ਅਤ੍ਥੋ.

ਮਗ੍ਗਪਚ੍ਚਯਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.