੧੬. ਇਨ੍ਦ੍ਰਿਯਪਚ੍ਚਯਨਿਦ੍ਦੇਸਵਣ੍ਣਨਾ

੧੬. ਅਰੂਪਜੀਵਿਤਿਨ੍ਦ੍ਰਿਯਮ੍ਪਿ ਸਙ੍ਗਹਿਤਨ੍ਤਿ ਮਿਸ੍ਸਕਤ੍ਤਾ ਜੀਵਿਤਿਨ੍ਦ੍ਰਿਯਂ ਨ ਸਬ੍ਬੇਨ ਸਬ੍ਬਂ ਵਜ੍ਜਿਤਬ੍ਬਨ੍ਤਿ ਅਧਿਪ੍ਪਾਯੋ.

ਅਵਿਨਿਬ੍ਭੁਤ੍ਤਧਮ੍ਮਾਨਨ੍ਤਿ ਏਤ੍ਥ ਅਯਂ ਅਧਿਪ੍ਪਾਯੋ – ਰੂਪਾਰੂਪਾਨਂ ਅਞ੍ਞਮਞ੍ਞਂ ਅਵਿਨਿਬ੍ਭੁਤ੍ਤਵੋਹਾਰੋ ਨਤ੍ਥੀਤਿ ਅਰੂਪਾਨਂ ਇਨ੍ਦ੍ਰਿਯਪਚ੍ਚਯਭੂਤਾਨਿ ਪਚ੍ਚਯਨ੍ਤਰਾਪੇਕ੍ਖਾਨਿ ਚਕ੍ਖਾਦੀਨਿ ਅਤ੍ਤਨੋ ਵਿਜ੍ਜਮਾਨਕ੍ਖਣੇ ਅਵਿਨਿਬ੍ਭੁਤ੍ਤਧਮ੍ਮਾਨਂ ਇਨ੍ਦ੍ਰਿਯਪਚ੍ਚਯਤਂ ਅਫਰਨ੍ਤਾਨਿਪਿ ਇਨ੍ਦ੍ਰਿਯਪਚ੍ਚਯਾ ਸਿਯੁਂ. ਯੋ ਪਨ ਨਿਰਪੇਕ੍ਖੋ ਇਨ੍ਦ੍ਰਿਯਪਚ੍ਚਯੋ ਅਵਿਨਿਬ੍ਭੁਤ੍ਤਧਮ੍ਮਾਨਂ ਹੋਤਿ, ਸੋ ਅਤ੍ਤਨੋ ਵਿਜ੍ਜਮਾਨਕ੍ਖਣੇ ਤੇਸਂ ਇਨ੍ਦ੍ਰਿਯਪਚ੍ਚਯਤਂ ਅਫਰਨ੍ਤੋ ਨਾਮ ਨਤ੍ਥਿ. ਯਦਿ ਚ ਇਤ੍ਥਿਨ੍ਦ੍ਰਿਯਪੁਰਿਸਿਨ੍ਦ੍ਰਿਯਾਨਿ ਇਨ੍ਦ੍ਰਿਯਪਚ੍ਚਯੋ ਲਿਙ੍ਗਾਦੀਨਂ ਸਿਯੁਂ, ਅਵਿਨਿਬ੍ਭੁਤ੍ਤਾਨਂ ਤੇਸਮ੍ਪਿ ਸਿਯੁਂ. ਨ ਹਿ ਰੂਪਂ ਰੂਪਸ੍ਸ, ਅਰੂਪਂ ਵਾ ਅਰੂਪਸ੍ਸ ਵਿਨਿਬ੍ਭੁਤ੍ਤਸ੍ਸ ਇਨ੍ਦ੍ਰਿਯਪਚ੍ਚਯੋ ਅਤ੍ਥੀਤਿ. ਸਤਿ ਚੇਵਂ ਇਤ੍ਥਿਪੁਰਿਸਿਨ੍ਦ੍ਰਿਯੇਹਿ ਅਵਿਨਿਬ੍ਭੁਤ੍ਤਤ੍ਤਾ ਕਲਲਾਦਿਕਾਲੇ ਚ ਲਿਙ੍ਗਾਦੀਨਿ ਸਿਯੁਂ, ਯੇਸਂ ਤਾਨਿ ਇਨ੍ਦ੍ਰਿਯਪਚ੍ਚਯਤਂ ਫਰੇਯ੍ਯੁਂ, ਨ ਚ ਫਰਨ੍ਤਿ. ਤਸ੍ਮਾ ਨ ਤੇਹਿ ਤਾਨਿ ਅਵਿਨਿਬ੍ਭੁਤ੍ਤਕਾਨਿ, ਅਵਿਨਿਬ੍ਭੁਤ੍ਤਤ੍ਤਾਭਾਵਤੋ ਚ ਤੇਸਂ ਇਨ੍ਦ੍ਰਿਯਪਚ੍ਚਯਤਂ ਨ ਫਰਨ੍ਤਿ. ਅਞ੍ਞੇਸਂ ਪਨ ਯੇਹਿ ਤਾਨਿ ਸਹਜਾਤਾਨਿ, ਤੇਸਂ ਅਬੀਜਭਾਵਤੋਯੇਵ ਨ ਫਰਨ੍ਤਿ, ਤਸ੍ਮਾ ਆਪਨ੍ਨਵਿਨਿਬ੍ਭੁਤ੍ਤਭਾਵਾਨਂ ਤੇਸਂ ਲਿਙ੍ਗਾਦੀਨਂ ਅਵਿਨਿਬ੍ਭੁਤ੍ਤਾਨਂ ਅਞ੍ਞੇਸਞ੍ਚ ਸਮਾਨਕਲਾਪਧਮ੍ਮਾਨਂ ਇਨ੍ਦ੍ਰਿਯਪਚ੍ਚਯਤਾਯ ਅਫਰਣਤੋ ਤਾਨਿ ਇਨ੍ਦ੍ਰਿਯਪਚ੍ਚਯੋ ਨ ਹੋਨ੍ਤੀਤਿ. ਯੇਸਂ ਬੀਜਭੂਤਾਨਿ ਇਤ੍ਥਿਪੁਰਿਸਿਨ੍ਦ੍ਰਿਯਾਨਿ, ਤੇਸਂ ਲਿਙ੍ਗਾਦੀਨਂ ਅਪਰਮਤ੍ਥਭਾਵਤੋਤਿ ਕੇਚਿ, ਤੇ ਪਨ ਕਲਲਾਦਿਕਾਲੇਪਿ ਲਿਙ੍ਗਾਦੀਨਂ ਤਦਨੁਰੂਪਾਨਂ ਅਤ੍ਥਿਤਂ ਇਚ੍ਛਨ੍ਤਿ.

ਜਾਤਿਭੂਮਿਵਸੇਨ ਵੁਤ੍ਤੇਸੁ ਭੇਦੇਸੁ ਕੁਸਲਜਾਤਿਯਂ ਰੂਪਾਵਚਰਕੁਸਲਮੇਵ ਆਰੁਪ੍ਪੇ ਠਪੇਤਬ੍ਬਨ੍ਤਿ ‘‘ਠਪੇਤ੍ਵਾ ਪਨ ਰੂਪਾਵਚਰਕੁਸਲਂ ਅਵਸੇਸਾ ਕੁਸਲਾਕੁਸਲਾ’’ਤਿ ਵੁਤ੍ਤਂ. ਪਠਮਲੋਕੁਤ੍ਤਰਂ ਪਨ ਦੋਮਨਸ੍ਸਯੁਤ੍ਤਞ੍ਚ ਵਿਸੁਂ ਏਕਾ ਜਾਤਿ ਭੂਮਿ ਵਾ ਨ ਹੋਤੀਤਿ ਆਰੁਪ੍ਪੇ ਅਲਬ੍ਭਮਾਨਮ੍ਪਿ ਨ ਠਪਿਤਂ. ਹੇਤੁਆਦੀਸੁਪਿ ‘‘ਤਥਾ ਅਪਰਿਯਾਪਨ੍ਨਕੁਸਲਹੇਤੁ, ਤਥਾ ਅਕੁਸਲਹੇਤੂ’’ਤਿਆਦੀਸੁ (ਪਟ੍ਠਾ. ਅਟ੍ਠ. ੧.੧) ਏਸ ਨਯੋ ਯੋਜੇਤਬ੍ਬੋ.

ਠਿਤਿਕ੍ਖਣੇਤਿ ਇਦਂ ਰੂਪਜੀਵਿਤਿਨ੍ਦ੍ਰਿਯਸ੍ਸ ਸਹਜਾਤਪਚ੍ਚਯਤ੍ਤਾਭਾਵਂ ਸਨ੍ਧਾਯ ਵੁਤ੍ਤਂ. ਉਪ੍ਪਾਦਕ੍ਖਣੇਪਿ ਪਨ ਤਸ੍ਸ ਇਨ੍ਦ੍ਰਿਯਪਚ੍ਚਯਤਾ ਨ ਸਕ੍ਕਾ ਨਿਵਾਰੇਤੁਂ. ਵਕ੍ਖਤਿ ਹਿ ‘‘ਅਬ੍ਯਾਕਤਂ ਧਮ੍ਮਂ ਪਟਿਚ੍ਚ…ਪੇ… ਅਸਞ੍ਞਸਤ੍ਤਾਨਂ ਏਕਂ ਮਹਾਭੂਤਂ ਪਟਿਚ੍ਚ…ਪੇ… ਇਨ੍ਦ੍ਰਿਯਪਚ੍ਚਯਂ ਕਮ੍ਮਪਚ੍ਚਯਸਦਿਸ’’ਨ੍ਤਿ (ਪਟ੍ਠਾ. ੧.੧.੬੬). ਨ ਹਿ ਅਸਞ੍ਞਸਤ੍ਤਾਨਂ ਇਨ੍ਦ੍ਰਿਯਪਚ੍ਚਯਾ ਉਪ੍ਪਜ੍ਜਮਾਨਸ੍ਸ ਰੂਪਸ੍ਸ ਰੂਪਜੀਵਿਤਿਨ੍ਦ੍ਰਿਯਤੋ ਅਞ੍ਞੋ ਇਨ੍ਦ੍ਰਿਯਪਚ੍ਚਯੋ ਅਤ੍ਥਿ, ਪਞ੍ਚਵੋਕਾਰੇ ਪਵਤ੍ਤੇ ਚ ਕਟਤ੍ਤਾਰੂਪਸ੍ਸ. ਪਟਿਚ੍ਚਵਾਰਾਦਯੋ ਚ ਛ ਉਪ੍ਪਾਦਕ੍ਖਣਮੇਵ ਗਹੇਤ੍ਵਾ ਪਵਤ੍ਤਾ, ਏਵਞ੍ਚ ਕਤ੍ਵਾ ਪਚ੍ਛਾਜਾਤਪਚ੍ਚਯੋ ਏਤੇਸੁ ਅਨੁਲੋਮਤੋ ਨ ਤਿਟ੍ਠਤੀਤਿ.

ਇਨ੍ਦ੍ਰਿਯਪਚ੍ਚਯਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.