੨.ਪਵਤ੍ਤਿਵਾਰਵਣ੍ਣਨਾ

੧੮੬. ਪਵਤ੍ਤਿਵਾਰੇ ‘‘ਛਯਿਮਾਨਿ, ਭਿਕ੍ਖਵੇ, ਇਨ੍ਦ੍ਰਿਯਾਨਿ. ਕਤਮਾਨਿ ਛ? ਚਕ੍ਖੁਨ੍ਦ੍ਰਿਯਂ…ਪੇ… ਕਾਯਿਨ੍ਦ੍ਰਿਯਂ ਮਨਿਨ੍ਦ੍ਰਿਯ’’ਨ੍ਤਿ (ਸਂ. ਨਿ. ੫.੪੯੫) ਸੁਤ੍ਤੇ ਵੁਤ੍ਤਨਯੇਨ ਇਧ ਉਦ੍ਦਿਟ੍ਠਂ ਮਨਿਨ੍ਦ੍ਰਿਯਂ ਚੁਤਿਪਟਿਸਨ੍ਧਿਪਵਤ੍ਤੀਸੁ ਪਵਤ੍ਤਮਾਨੇਹਿ ਕਮ੍ਮਜਾਕਮ੍ਮਜੇਹਿ ਸਬ੍ਬੇਹਿਪਿ ਯੋਗਂ ਗਚ੍ਛਤਿ, ਨ ਚ ਜੀਵਿਤਿਨ੍ਦ੍ਰਿਯਂ ਵਿਯ ਅਞ੍ਞਧਮ੍ਮਨਿਸ੍ਸਯੇਨ ਗਹੇਤਬ੍ਬਂ, ਪੁਬ੍ਬਙ੍ਗਮਤ੍ਤਾਵ ਪਧਾਨਂ, ਤਸ੍ਮਾ ਕੂਟਂ ਵਿਯ ਗੋਪਾਨਸੀਨਂ ਸਬ੍ਬਿਨ੍ਦ੍ਰਿਯਾਨਂ ਸਮੋਸਰਣਟ੍ਠਾਨਂ ਅਨ੍ਤੇ ਠਪੇਤ੍ਵਾ ਯੋਜਿਤਂ. ਜੀਵਿਤਿਨ੍ਦ੍ਰਿਯਾਦਿਮੂਲਕੇਸੁ ਪਵਤ੍ਤਿਞ੍ਚ ਗਹੇਤ੍ਵਾ ਗਤੇਸੁ ‘‘ਯਸ੍ਸ ਜੀਵਿਤਿਨ੍ਦ੍ਰਿਯਂ ਉਪ੍ਪਜ੍ਜਤਿ, ਤਸ੍ਸ ਸੁਖਿਨ੍ਦ੍ਰਿਯਂ ਉਪ੍ਪਜ੍ਜਤੀਤਿ? ਸਬ੍ਬੇਸਂ ਉਪਪਜ੍ਜਨ੍ਤਾਨਂ, ਪਵਤ੍ਤੇ ਸੁਖਿਨ੍ਦ੍ਰਿਯਵਿਪ੍ਪਯੁਤ੍ਤਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤੇਸਂ ਜੀਵਿਤਿਨ੍ਦ੍ਰਿਯਂ ਉਪ੍ਪਜ੍ਜਤਿ, ਨੋ ਚ ਤੇਸਂ ਸੁਖਿਨ੍ਦ੍ਰਿਯਂ ਉਪ੍ਪਜ੍ਜਤਿ, ਸੁਖਿਨ੍ਦ੍ਰਿਯਸਮ੍ਪਯੁਤ੍ਤਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤੇਸਂ ਜੀਵਿਤਿਨ੍ਦ੍ਰਿਯਞ੍ਚ ਉਪ੍ਪਜ੍ਜਤਿ ਸੁਖਿਨ੍ਦ੍ਰਿਯਞ੍ਚ ਉਪ੍ਪਜ੍ਜਤੀ’’ਤਿਆਦਿਨਾ ਸੁਖਦੁਕ੍ਖਦੋਮਨਸ੍ਸਿਨ੍ਦ੍ਰਿਯੇਹਿ ਲੋਕੁਤ੍ਤਰਿਨ੍ਦ੍ਰਿਯੇਹਿ ਚ ਯੋਜਨਾ ਲਬ੍ਭਤਿ, ਤਥਾ ‘‘ਯਸ੍ਸ ਸੁਖਿਨ੍ਦ੍ਰਿਯਂ ਉਪ੍ਪਜ੍ਜਤਿ, ਤਸ੍ਸ ਦੁਕ੍ਖਿਨ੍ਦ੍ਰਿਯਂ ਉਪ੍ਪਜ੍ਜਤੀਤਿ? ਨੋ’’ਤਿਆਦਿਨਾ ਤਂਮੂਲਕਾ ਚ ਨਯਾ. ਤੇਹਿ ਪਨ ਪਵਤ੍ਤਿਯਂਯੇਵ ਉਪ੍ਪਜ੍ਜਮਾਨੇਹਿ ਯੋਜਨਾ ਤਂਮੂਲਕਾ ਚ ਚੁਤਿਪਟਿਸਨ੍ਧਿਪਵਤ੍ਤੀਸੁ ਪਵਤ੍ਤਮਾਨੇਹਿ ਸੋਮਨਸ੍ਸਿਨ੍ਦ੍ਰਿਯਾਦੀਹਿ ਯੋਜਨਾਯ ਜੀਵਿਤਿਨ੍ਦ੍ਰਿਯਮੂਲਕੇਹਿ ਚ ਨਯੇਹਿ ਪਾਕਟਾਯੇਵਾਤਿ ਕਤ੍ਵਾ ਨ ਵੁਤ੍ਤਾਤਿ ਦਟ੍ਠਬ੍ਬਾ.

‘‘ਸਚਕ੍ਖੁਕਾਨਂ ਵਿਨਾ ਸੋਮਨਸ੍ਸੇਨਾਤਿ ਉਪੇਕ੍ਖਾਸਹਗਤਾਨਂ ਚਤੁਨ੍ਨਂ ਮਹਾਵਿਪਾਕਪਟਿਸਨ੍ਧੀਨਂ ਵਸੇਨ ਵੁਤ੍ਤ’’ਨ੍ਤਿ ਅਟ੍ਠਕਥਾਯਂ ਵੁਤ੍ਤਂ, ਤਂ ਸੋਮਨਸ੍ਸਵਿਰਹਿਤਸਚਕ੍ਖੁਕਪਟਿਸਨ੍ਧਿਨਿਦਸ੍ਸਨਵਸੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਨ ਹਿ ‘‘ਚਤੁਨ੍ਨਂਯੇਵਾ’’ਤਿ ਨਿਯਮੋ ਕਤੋ, ਤੇਨ ਤਂਸਮਾਨਲਕ੍ਖਣਾ ਪਰਿਤ੍ਤਵਿਪਾਕਰੂਪਾਵਚਰਪਟਿਸਨ੍ਧਿਯੋਪਿ ਦਸ੍ਸਿਤਾ ਹੋਨ੍ਤਿ. ਤਤ੍ਥ ਕਾਮਾਵਚਰੇਸੁ ਸੋਮਨਸ੍ਸਪਟਿਸਨ੍ਧਿਸਮਾਨਤਾਯ ਮਹਾਵਿਪਾਕੇਹਿ ਚਤੂਹਿ ਨਿਦਸ੍ਸਨਂ ਕਤਂ, ਤੇਨ ਯਥਾ ਸਸੋਮਨਸ੍ਸਪਟਿਸਨ੍ਧਿਕਾ ਅਚਕ੍ਖੁਕਾ ਨ ਹੋਨ੍ਤਿ, ਏਵਂ ਇਤਰਮਹਾਵਿਪਾਕਪਟਿਸਨ੍ਧਿਕਾਪੀਤਿ ਅਯਮਤ੍ਥੋ ਦਸ੍ਸਿਤੋ ਹੋਤਿ. ਗਬ੍ਭਸੇਯ੍ਯਕਾਨਞ੍ਚ ਅਨੁਪ੍ਪਨ੍ਨੇਸੁ ਚਕ੍ਖਾਦੀਸੁ ਚਵਨ੍ਤਾਨਂ ਅਹੇਤੁਕਪਟਿਸਨ੍ਧਿਕਤਾ ਸਹੇਤੁਕਪਟਿਸਨ੍ਧਿਕਾਨਂ ਕਾਮਾਵਚਰਾਨਂ ਨਿਯਮਤੋ ਸਚਕ੍ਖੁਕਾਦਿਭਾਵਦਸ੍ਸਨੇਨ ਦਸ੍ਸਿਤਾ ਹੋਤਿ. ਗਬ੍ਭਸੇਯ੍ਯਕੇਪਿ ਹਿ ਸਨ੍ਧਾਯ ‘‘ਯਸ੍ਸ ਵਾ ਪਨ ਸੋਮਨਸ੍ਸਿਨ੍ਦ੍ਰਿਯਂ ਉਪ੍ਪਜ੍ਜਤਿ, ਤਸ੍ਸ ਚਕ੍ਖੁਨ੍ਦ੍ਰਿਯਂ ਉਪ੍ਪਜ੍ਜਤੀਤਿ? ਆਮਨ੍ਤਾ’’ਤਿ ਇਦਂ ਵਚਨਂ ਯਥਾ ਯੁਜ੍ਜਤਿ, ਤਥਾ ਆਯਤਨਯਮਕੇ ਦਸ੍ਸਿਤਂ. ਨ ਹਿ ਸਨ੍ਨਿਟ੍ਠਾਨੇਨ ਸਙ੍ਗਹਿਤਾਨਂ ਗਬ੍ਭਸੇਯ੍ਯਕਾਨਂ ਵਜ੍ਜਨੇ ਕਾਰਣਂ ਅਤ੍ਥਿ, ‘‘ਇਤ੍ਥੀਨਂ ਅਘਾਨਕਾਨਂ ਉਪਪਜ੍ਜਨ੍ਤੀਨ’’ਨ੍ਤਿਆਦੀਸੁ (ਯਮ. ੩.ਇਨ੍ਦ੍ਰਿਯਯਮਕ.੧੮੭) ਚ ਤੇ ਏਵ ਵੁਤ੍ਤਾਤਿ.

ਉਪੇਕ੍ਖਾਯ ਅਚਕ੍ਖੁਕਾਨਨ੍ਤਿ ਅਹੇਤੁਕਪਟਿਸਨ੍ਧਿਵਸੇਨ ਵੁਤ੍ਤਨ੍ਤਿ ਏਤ੍ਥ ਚ ਕਾਮਾਵਚਰੇ ਸੋਪੇਕ੍ਖਅਚਕ੍ਖੁਕਪਟਿਸਨ੍ਧਿਯਾ ਤਂਸਮਾਨਲਕ੍ਖਣਂ ਅਰੂਪਪਟਿਸਨ੍ਧਿਞ੍ਚ ਨਿਦਸ੍ਸੇਤੀਤਿ ਦਟ੍ਠਬ੍ਬਂ. ਕੇਸੁਚਿ ਪਨ ਪੋਤ੍ਥਕੇਸੁ ‘‘ਅਹੇਤੁਕਾਰੂਪਪਟਿਸਨ੍ਧਿਵਸੇਨਾ’’ਤਿ ਪਾਠੋ ਦਿਸ੍ਸਤਿ, ਸੋ ਏਵ ਸੇਯ੍ਯੋ.

‘‘ਤਤ੍ਥ ਹਿ ਏਕਨ੍ਤੇਨੇਵ ਸਦ੍ਧਾਸਤਿਪਞ੍ਞਾਯੋ ਨਤ੍ਥਿ, ਸਮਾਧਿਵੀਰਿਯਾਨਿ ਪਨ ਇਨ੍ਦ੍ਰਿਯਪ੍ਪਤ੍ਤਾਨਿ ਨ ਹੋਨ੍ਤੀ’’ਤਿ ਵੁਤ੍ਤਂ, ਯਦਿ ਪਨ ਸਮਾਧਿਵੀਰਿਯਾਨਿ ਸਨ੍ਤਿ, ‘‘ਇਨ੍ਦ੍ਰਿਯਪ੍ਪਤ੍ਤਾਨਿ ਨ ਹੋਨ੍ਤੀ’’ਤਿ ਨ ਸਕ੍ਕਾ ਵਤ੍ਤੁਂ ‘‘ਸਮਾਧਿ ਸਮਾਧਿਨ੍ਦ੍ਰਿਯਨ੍ਤਿ? ਆਮਨ੍ਤਾ’’ਤਿ (ਯਮ. ੩.ਇਨ੍ਦ੍ਰਿਯਯਮਕ.੧੧੩) ‘‘ਵੀਰਿਯਂ ਵੀਰਿਯਿਨ੍ਦ੍ਰਿਯਨ੍ਤਿ? ਆਮਨ੍ਤਾ’’ਤਿ (ਯਮ. ੩.ਇਨ੍ਦ੍ਰਿਯਯਮਕ.੧੧੧) ਵਚਨਤੋ. ਅਹੇਤੁਕਪਟਿਸਨ੍ਧਿਚਿਤ੍ਤੇ ਚ ਯਥਾ ਸਮਾਧਿਲੇਸੋ ਏਕਗ੍ਗਤਾ ਅਤ੍ਥਿ, ਨ ਏਵਂ ਵੀਰਿਯਲੇਸੋ ਅਤ੍ਥਿ, ਤਸ੍ਮਾ ਏਵਮੇਤ੍ਥ ਵਤ੍ਤਬ੍ਬਂ ਸਿਯਾ ‘‘ਤਤ੍ਥ ਹਿ ਏਕਨ੍ਤੇਨੇਵ ਸਦ੍ਧਾਵੀਰਿਯਸਤਿਪਞ੍ਞਾਯੋ ਨਤ੍ਥਿ, ਏਕਗ੍ਗਤਾ ਪਨ ਸਮਾਧਿਲੇਸੋ ਏਵ ਹੋਤੀ’’ਤਿ. ਅਯਂ ਪਨੇਤ੍ਥ ਅਧਿਪ੍ਪਾਯੋ ਸਿਯਾ – ਯਥਾ ਅਞ੍ਞੇਸੁ ਕੇਸੁਚਿ ਅਹੇਤੁਕਚਿਤ੍ਤੇਸੁ ਸਮਾਧਿਵੀਰਿਯਾਨਿ ਹੋਨ੍ਤਿ ਇਨ੍ਦ੍ਰਿਯਪ੍ਪਤ੍ਤਾਨਿ ਚ, ਏਵਮਿਧ ਸਮਾਧਿਵੀਰਿਯਾਨਿ ਇਨ੍ਦ੍ਰਿਯਪ੍ਪਤ੍ਤਾਨਿ ਨ ਹੋਨ੍ਤੀਤਿ. ਸਮਾਧਿਵੀਰਿਯਿਨ੍ਦ੍ਰਿਯਾਨਮੇਵ ਅਭਾਵਂ ਦਸ੍ਸੇਨ੍ਤੋ ਅਹੇਤੁਕਨ੍ਤਰਤੋ ਵਿਸੇਸੇਤਿ. ਤਤ੍ਥ ‘‘ਸਮਾਧਿਵੀਰਿਯਾਨਿ ਪਨ ਨ ਹੋਨ੍ਤੀ’’ਤਿ ਵਤ੍ਤਬ੍ਬੇ ‘‘ਇਨ੍ਦ੍ਰਿਯਪ੍ਪਤ੍ਤਾਨੀ’’ਤਿ ਸਮਾਧਿਲੇਸਸ੍ਸ ਸਮਾਧਿਨ੍ਦ੍ਰਿਯਭਾਵਂ ਅਪ੍ਪਤ੍ਤਸ੍ਸ ਸਬ੍ਭਾਵਤੋ ਵੁਤ੍ਤਂ, ਨ ਵੀਰਿਯਲੇਸਸ੍ਸ. ਵਿਸੇਸਨਞ੍ਹਿ ਵਿਸੇਸਿਤਬ੍ਬੇ ਪਵਤ੍ਤਤਿ. ਯੇਸੁ ਪਨ ਪੋਤ੍ਥਕੇਸੁ ‘‘ਤਤ੍ਥ ਏਕਨ੍ਤੇਨੇਵ ਸਦ੍ਧਾਵੀਰਿਯਸਤਿਪਞ੍ਞਾਯੋ ਨਤ੍ਥੀ’’ਤਿ ਪਾਠੋ, ਸੋ ਏਵ ਸੁਨ੍ਦਰਤਰੋ.

ਯਾਵ ਚਕ੍ਖੁਨ੍ਦ੍ਰਿਯਂ ਨੁਪ੍ਪਜ੍ਜਤਿ, ਤਾਵ ਗਬ੍ਭਗਤਾਨਂ ਅਚਕ੍ਖੁਕਾਨਂ ਭਾਵੋ ਅਤ੍ਥੀਤਿ ਇਮਿਨਾ ਅਧਿਪ੍ਪਾਯੇਨਾਹ ‘‘ਸਹੇਤੁਕਾਨਂ ਅਚਕ੍ਖੁਕਾਨਨ੍ਤਿ ਗਬ੍ਭਸੇਯ੍ਯਕਵਸੇਨ ਚੇਵ ਅਰੂਪੀਵਸੇਨ ਚ ਵੁਤ੍ਤ’’ਨ੍ਤਿ. ਗਬ੍ਭਸੇਯ੍ਯਕਾਪਿ ਪਨ ਅਵਸ੍ਸਂ ਉਪ੍ਪਜ੍ਜਨਕਚਕ੍ਖੁਕਾ ਨ ਲਬ੍ਭਨ੍ਤੀਤਿ ਦਟ੍ਠਬ੍ਬਾ. ਸਚਕ੍ਖੁਕਾਨਂ ਞਾਣਵਿਪ੍ਪਯੁਤ੍ਤਾਨਨ੍ਤਿ ਕਾਮਧਾਤੁਯਂ ਦੁਹੇਤੁਕਪਟਿਸਨ੍ਧਿਕਾਨਂ ਵਸੇਨ ਵੁਤ੍ਤਨ੍ਤਿ ਇਧਾਪਿ ਅਹੇਤੁਕਪਟਿਸਨ੍ਧਿਕਾ ਚ ਅਚਕ੍ਖੁਕਾ ਲਬ੍ਭਨ੍ਤੇਵ. ਇਤ੍ਥਿਪੁਰਿਸਿਨ੍ਦ੍ਰਿਯਸਨ੍ਤਾਨਾਨਮ੍ਪਿ ਉਪਪਤ੍ਤਿਵਸੇਨ ਉਪ੍ਪਾਦੋ, ਚੁਤਿਵਸੇਨ ਨਿਰੋਧੋ ਬਾਹੁਲ੍ਲਵਸੇਨ ਦਸ੍ਸਿਤੋ. ਕਦਾਚਿ ਹਿ ਤੇਸਂ ਪਠਮਕਪ੍ਪਿਕਾਦੀਨਂ ਵਿਯ ਪਵਤ੍ਤਿਯਮ੍ਪਿ ਉਪ੍ਪਾਦਨਿਰੋਧਾ ਹੋਨ੍ਤੀਤਿ. ਏਤ੍ਥ ਪੁਰਿਸਿਨ੍ਦ੍ਰਿਯਾਵਸਾਨੇਸੁ ਇਨ੍ਦ੍ਰਿਯਮੂਲਯਮਕੇਸੁ ਪਠਮਪੁਚ੍ਛਾਸੁ ਸਨ੍ਨਿਟ੍ਠਾਨੇਹਿ ਗਹਿਤੇਹਿ ਉਪਪਤ੍ਤਿਚੁਤਿਵਸੇਨ ਗਚ੍ਛਨ੍ਤੇਹਿ ਚਕ੍ਖੁਨ੍ਦ੍ਰਿਯਾਦੀਹਿ ਨਿਯਮਿਤਤ੍ਤਾ ਜੀਵਿਤਿਨ੍ਦ੍ਰਿਯਾਦੀਨਂ ਪਵਤ੍ਤਿਵਸੇਨਪਿ ਲਬ੍ਭਮਾਨਾਨਂ ਉਪਪਤ੍ਤਿਚੁਤਿਵਸੇਨੇਵ ਦੁਤਿਯਪੁਚ੍ਛਾਸੁ ਸਨ੍ਨਿਟ੍ਠਾਨੇਹਿ ਗਹਣਂ ਵੇਦਿਤਬ੍ਬਂ.

੧੯੦. ਰੂਪਜੀਵਿਤਿਨ੍ਦ੍ਰਿਯਂ ਚਕ੍ਖੁਨ੍ਦ੍ਰਿਯਾਦਿਸਮਾਨਗਤਿਕਂ ਚੁਤਿਪਟਿਸਨ੍ਧਿਵਸੇਨੇਵ ਗਚ੍ਛਤਿ ਸਨ੍ਤਾਨੁਪ੍ਪਤ੍ਤਿਨਿਰੋਧਦਸ੍ਸਨਤੋਤਿ ਆਹ ‘‘ਪਵਤ੍ਤੇ ਸੋਮਨਸ੍ਸਵਿਪ੍ਪਯੁਤ੍ਤਚਿਤ੍ਤਸ੍ਸ ਉਪ੍ਪਾਦਕ੍ਖਣੇਤਿ ਅਰੂਪਜੀਵਿਤਿਨ੍ਦ੍ਰਿਯਂ ਸਨ੍ਧਾਯ ਵੁਤ੍ਤ’’ਨ੍ਤਿ. ਏਤੇਸਞ੍ਚੇਵ ਅਞ੍ਞੇਸਞ੍ਚ ਪਞ੍ਚਿਨ੍ਦ੍ਰਿਯਾਨਂ ਯਥਾਲਾਭਵਸੇਨਾਤਿ ਏਤ੍ਥ ਏਤੇਸਂ ਜੀਵਿਤਿਨ੍ਦ੍ਰਿਯਾਦੀਨਂ ਚੁਤਿਪਟਿਸਨ੍ਧਿਪਵਤ੍ਤੇਸੁ, ਅਞ੍ਞੇਸਞ੍ਚ ਚਕ੍ਖੁਨ੍ਦ੍ਰਿਯਾਦੀਨਂ ਚੁਤਿਪਟਿਸਨ੍ਧੀਸੂਤਿ ਏਵਂ ਯਥਾਲਾਭੋ ਦਟ੍ਠਬ੍ਬੋ. ਅਯਂ ਪਨ ਛੇਦੇਯੇਵਾਤਿ ਏਤ੍ਥ ਤਸ੍ਸ ਤਸ੍ਸ ਪਰਿਪੁਣ੍ਣਪਞ੍ਹਸ੍ਸ ਤਸ੍ਮਿਂ ਤਸ੍ਮਿਂ ਸਰੂਪਦਸ੍ਸਨੇਨ ਵਿਸ੍ਸਜ੍ਜਨੇ ਵਿਸ੍ਸਜ੍ਜਿਤੇ ਪਚ੍ਛਿਮਕੋਟ੍ਠਾਸਸ੍ਸ ਛੇਦੋਤਿ ਨਾਮਂ ਦਟ੍ਠਬ੍ਬਂ.

ਯਸ੍ਸ ਵਾ ਪਨ ਸੋਮਨਸ੍ਸਿਨ੍ਦ੍ਰਿਯਂ ਨ ਉਪ੍ਪਜ੍ਜਤਿ, ਤਸ੍ਸ ਜੀਵਿਤਿਨ੍ਦ੍ਰਿਯਂ ਨ ਉਪ੍ਪਜ੍ਜਤੀਤਿ? ਵਿਨਾ ਸੋਮਨਸ੍ਸੇਨ ਉਪਪਜ੍ਜਨ੍ਤਾਨਂ ਪਵਤ੍ਤੇ ਸੋਮਨਸ੍ਸਵਿਪ੍ਪਯੁਤ੍ਤਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤੇਸਂ ਸੋਮਨਸ੍ਸਿਨ੍ਦ੍ਰਿਯਂ ਨ ਉਪ੍ਪਜ੍ਜਤਿ, ਨੋ ਚ ਤੇਸਂ ਜੀਵਿਤਿਨ੍ਦ੍ਰਿਯਂ ਨ ਉਪ੍ਪਜ੍ਜਤੀਤਿ ਏਤ੍ਥ ‘‘ਨਿਰੋਧਸਮਾਪਨ੍ਨਾਨਂ ਅਸਞ੍ਞਸਤ੍ਤਾਨ’’ਨ੍ਤਿ ਅਵਚਨਂ ਰੂਪਜੀਵਿਤਿਨ੍ਦ੍ਰਿਯਸ੍ਸ ਚਕ੍ਖੁਨ੍ਦ੍ਰਿਯਾਦਿਸਮਾਨਗਤਿਕਤਂ ਦੀਪੇਤਿ. ਤਸ੍ਸ ਹਿ ਉਪਪਤ੍ਤਿਯਂਯੇਵ ਉਪ੍ਪਾਦੋ ਵਤ੍ਤਬ੍ਬੋਤਿ. ‘‘ਵਿਨਾ ਸੋਮਨਸ੍ਸੇਨ ਉਪਪਜ੍ਜਨ੍ਤਾਨ’’ਨ੍ਤਿ ਏਤ੍ਥ ਅਸਞ੍ਞਸਤ੍ਤੇ ਸਙ੍ਗਹੇਤ੍ਵਾ ਪਵਤ੍ਤਿਵਸੇਨ ਤੇ ਚ ਨਿਰੋਧਸਮਾਪਨ੍ਨਾ ਚ ਨ ਵੁਤ੍ਤਾ, ਅਨੁਪ੍ਪਾਦੋਪਿ ਪਨੇਤਸ੍ਸ ਚੁਤਿਉਪਪਤ੍ਤੀਸ੍ਵੇਵ ਵਤ੍ਤਬ੍ਬੋ, ਨ ਪਵਤ੍ਤੇਤਿ. ਪਚ੍ਛਿਮਕੋਟ੍ਠਾਸੇਪਿ ‘‘ਸਬ੍ਬੇਸਂ ਚਵਨ੍ਤਾਨਂ, ਪਵਤ੍ਤੇ ਚਿਤ੍ਤਸ੍ਸ ਭਙ੍ਗਕ੍ਖਣੇ ਤੇਸਂ ਸੋਮਨਸ੍ਸਿਨ੍ਦ੍ਰਿਯਞ੍ਚ ਨ ਉਪ੍ਪਜ੍ਜਤਿ ਜੀਵਿਤਿਨ੍ਦ੍ਰਿਯਞ੍ਚ ਨ ਉਪ੍ਪਜ੍ਜਤੀ’’ਤਿ ਏਵਂ ‘‘ਸਬ੍ਬੇਸਂ ਚਵਨ੍ਤਾਨ’’ਨ੍ਤਿ ਏਤ੍ਥੇਵ ਅਸਞ੍ਞਸਤ੍ਤੇ ਸਙ੍ਗਣ੍ਹਿਤ੍ਵਾ ਪਵਤ੍ਤਿਵਸੇਨ ਤੇ ਚ ਨਿਰੋਧਸਮਾਪਨ੍ਨਾ ਨ ਚ ਵੁਤ੍ਤਾ. ਯਸ੍ਸਯਤ੍ਥਕੇ ਚ ਨਿਰੋਧਸਮਾਪਨ੍ਨਾ ਨ ਦਸ੍ਸੇਤਬ੍ਬਾ ਨ ਗਹੇਤਬ੍ਬਾਤਿ ਅਤ੍ਥੋ. ਨ ਹਿ ‘‘ਨਿਰੋਧਸਮਾਪਨ੍ਨਾਨ’’ਨ੍ਤਿ ਵਚਨਂ ‘‘ਅਸਞ੍ਞਸਤ੍ਤਾਨ’’ਨ੍ਤਿ ਵਚਨਂ ਵਿਯ ਓਕਾਸਦੀਪਕਂ, ਨਾਪਿ ‘‘ਉਪੇਕ੍ਖਾਸਮ੍ਪਯੁਤ੍ਤਚਿਤ੍ਤਸ੍ਸ ਉਪ੍ਪਾਦਕ੍ਖਣੇ, ਸਬ੍ਬੇਸਂ ਚਿਤ੍ਤਸ੍ਸ ਭਙ੍ਗਕ੍ਖਣੇ’’ਤਿਆਦਿਵਚਨਂ ਵਿਯ ਸੋਮਨਸ੍ਸਿਨ੍ਦ੍ਰਿਯਾਦੀਨਂ ਅਨੁਪ੍ਪਾਦਕ੍ਖਣਦੀਪਕਂ, ਅਥ ਖੋ ਪੁਗ੍ਗਲਦੀਪਕਮੇਵਾਤਿ.

ਅਤੀਤਕਾਲਭੇਦੇ ਸੁਦ੍ਧਾਵਾਸਾਨਂ ਉਪਪਤ੍ਤਿਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤੇਸਂ ਤਤ੍ਥ ਸੋਮਨਸ੍ਸਿਨ੍ਦ੍ਰਿਯਞ੍ਚ ਨ ਉਪ੍ਪਜ੍ਜਿਤ੍ਥ ਜੀਵਿਤਿਨ੍ਦ੍ਰਿਯਞ੍ਚ ਨ ਉਪ੍ਪਜ੍ਜਿਤ੍ਥਾਤਿ ਏਤ੍ਥ ‘‘ਉਪਪਤ੍ਤਿਚਿਤ੍ਤਸ੍ਸ ਉਪ੍ਪਾਦਕ੍ਖਣੇ’’ਤਿ ਕਸ੍ਮਾ ਵੁਤ੍ਤਂ, ਨਨੁ ‘‘ਸੁਦ੍ਧਾਵਾਸਂ ਉਪਪਜ੍ਜਨ੍ਤਾਨਂ, ਅਸਞ੍ਞਸਤ੍ਤਾਨਂ ਤੇਸਂ ਤਤ੍ਥ ਸੋਮਨਸ੍ਸਿਨ੍ਦ੍ਰਿਯਞ੍ਚ ਨ ਉਪ੍ਪਜ੍ਜਿਤ੍ਥ ਮਨਿਨ੍ਦ੍ਰਿਯਞ੍ਚ ਨ ਉਪ੍ਪਜ੍ਜਿਤ੍ਥਾ’’ਤਿ (ਯਮ. ੩.ਇਨ੍ਦ੍ਰਿਯਯਮਕ.੨੭੭) ਏਤ੍ਥ ਵਿਯ ‘‘ਉਪਪਜ੍ਜਨ੍ਤਾਨ’’ਨ੍ਤਿ ਵਤ੍ਤਬ੍ਬਨ੍ਤਿ? ਨ ਵਤ੍ਤਬ੍ਬਂ. ਯਥਾ ਹਿ ਸੋਮਨਸ੍ਸਮਨਿਨ੍ਦ੍ਰਿਯਾਨਂ ਵਸੇਨ ਉਪਪਜ੍ਜਨ੍ਤਾ ਪੁਗ੍ਗਲਾ ਉਪਪਤ੍ਤਿਚਿਤ੍ਤਸਮਙ੍ਗਿਨੋ ਹੋਨ੍ਤਿ, ਨ ਏਵਂ ਸੋਮਨਸ੍ਸਜੀਵਿਤਿਨ੍ਦ੍ਰਿਯਾਨਂ ਵਸੇਨ ਉਪਪਤ੍ਤਿਸਮਙ੍ਗਿਨੋਯੇਵ ਹੋਨ੍ਤਿ. ਜੀਵਿਤਿਨ੍ਦ੍ਰਿਯਸ੍ਸ ਹਿ ਵਸੇਨ ਯਾਵ ਪਠਮਰੂਪਜੀਵਿਤਿਨ੍ਦ੍ਰਿਯਂ ਧਰਤਿ, ਤਾਵ ਉਪਪਜ੍ਜਨ੍ਤਾ ਨਾਮ ਹੋਨ੍ਤਿ. ਤਦਾ ਚ ਦੁਤਿਯਚਿਤ੍ਤਤੋ ਪਟ੍ਠਾਯ ‘‘ਜੀਵਿਤਿਨ੍ਦ੍ਰਿਯਞ੍ਚ ਨ ਉਪ੍ਪਜ੍ਜਿਤ੍ਥਾ’’ਤਿ ਨ ਸਕ੍ਕਾ ਵਤ੍ਤੁਂ ਅਰੂਪਜੀਵਿਤਿਨ੍ਦ੍ਰਿਯਸ੍ਸ ਉਪ੍ਪਜ੍ਜਿਤ੍ਵਾ ਨਿਰੁਦ੍ਧਤ੍ਤਾ, ਤਸ੍ਮਾ ਉਭਯਂ ਉਪ੍ਪਾਦਕ੍ਖਣੇਨ ਨਿਦਸ੍ਸਿਤਂ. ਯਥਾ ਹਿ ‘‘ਨ ਨਿਰੁਜ੍ਝਿਤ੍ਥਾ’’ਤਿ ਇਦਂ ਲਕ੍ਖਣਂ ਉਪਪਤ੍ਤਿਚਿਤ੍ਤਸ੍ਸ ਦ੍ਵੀਸੁ ਖਣੇਸੁ ਲਬ੍ਭਮਾਨਂ ਸਬ੍ਬਪਠਮੇਨ ਉਪਪਤ੍ਤਿਚਿਤ੍ਤਸ੍ਸ ਭਙ੍ਗਕ੍ਖਣੇਨ ਨਿਦਸ੍ਸਿਤਂ, ਏਵਮਿਧਾਪਿ ਦਟ੍ਠਬ੍ਬਂ.

ਅਨਾਗਤਕਾਲਭੇਦੇ ਉਪ੍ਪਜ੍ਜਿਸ੍ਸਮਾਨੇ ਸਨ੍ਨਿਟ੍ਠਾਨਂ ਕਤ੍ਵਾ ਅਞ੍ਞਸ੍ਸ ਚ ਉਪ੍ਪਜ੍ਜਿਸ੍ਸਮਾਨਤਾਵ ਪੁਚ੍ਛਿਤਾ. ਤਤ੍ਥ ਯਥਾ ਪਚ੍ਚੁਪ੍ਪਨ੍ਨਕਾਲਭੇਦੇ ਸਨ੍ਨਿਟ੍ਠਾਨਸਂਸਯਭੇਦੇਹਿ ਉਪ੍ਪਜ੍ਜਮਾਨਸ੍ਸੇਵ ਗਹਿਤਤ੍ਤਾ ‘‘ਯਸ੍ਸ ਚਕ੍ਖੁਨ੍ਦ੍ਰਿਯਾਦੀਨਿ ਉਪ੍ਪਜ੍ਜਨ੍ਤਿ, ਉਪਪਜ੍ਜਨ੍ਤਸ੍ਸ ਤਸ੍ਸ ਜੀਵਿਤਿਨ੍ਦ੍ਰਿਯਾਦੀਨਿ ਉਪ੍ਪਜ੍ਜਨ੍ਤੀ’’ਤਿ ਉਪਪਜ੍ਜਨ੍ਤਸ੍ਸੇਵ ਪੁਚ੍ਛਿਤਾਨਂ ਉਪਪਤ੍ਤਿਯਂਯੇਵ ਤੇਸਂ ਉਪ੍ਪਾਦੋ ਸਮ੍ਭਵਤਿ, ਨ ਅਞ੍ਞਤ੍ਥ, ਨ ਏਵਮਿਧ ‘‘ਯਸ੍ਸ ਚਕ੍ਖੁਨ੍ਦ੍ਰਿਯਾਦੀਨਿ ਉਪ੍ਪਜ੍ਜਿਸ੍ਸਨ੍ਤਿ, ਉਪਪਜ੍ਜਨ੍ਤਸ੍ਸ ਤਸ੍ਸ ਜੀਵਿਤਿਨ੍ਦ੍ਰਿਯਾਦੀਨਿ ਉਪ੍ਪਜ੍ਜਿਸ੍ਸਨ੍ਤੀ’’ਤਿ ਉਪਪਜ੍ਜਨ੍ਤਸ੍ਸੇਵ ਪੁਚ੍ਛਿਤਾਨਂ ਤੇਸਂ ਉਪਪਤ੍ਤਿਤੋ ਅਞ੍ਞਤ੍ਥ ਉਪ੍ਪਾਦੋ ਨ ਸਮ੍ਭਵਤਿ, ਤਸ੍ਮਾ ‘‘ਯਸ੍ਸ ਚਕ੍ਖੁਨ੍ਦ੍ਰਿਯਂ ਉਪ੍ਪਜ੍ਜਿਸ੍ਸਤਿ, ਤਸ੍ਸ ਸੋਮਨਸ੍ਸਿਨ੍ਦ੍ਰਿਯਂ ਉਪ੍ਪਜ੍ਜਿਸ੍ਸਤੀਤਿ? ਆਮਨ੍ਤਾ’’ਤਿ ਵੁਤ੍ਤਂ. ਏਵਞ੍ਚ ਕਤ੍ਵਾ ਨਿਰੋਧਵਾਰੇਪਿ ‘‘ਯਸ੍ਸ ਚਕ੍ਖੁਨ੍ਦ੍ਰਿਯਂ ਨਿਰੁਜ੍ਝਿਸ੍ਸਤਿ, ਤਸ੍ਸ ਸੋਮਨਸ੍ਸਿਨ੍ਦ੍ਰਿਯਂ ਨਿਰੁਜ੍ਝਿਸ੍ਸਤੀਤਿ? ਆਮਨ੍ਤਾ’’ਤਿ ਵੁਤ੍ਤਂ. ਨ ਹਿ ਯਸ੍ਸ ਚਕ੍ਖੁਨ੍ਦ੍ਰਿਯਂ ਨਿਰੁਜ੍ਝਿਸ੍ਸਤਿ, ਤਸ੍ਸ ਸੋਮਨਸ੍ਸਿਨ੍ਦ੍ਰਿਯਂ ਨ ਨਿਰੁਜ੍ਝਿਸ੍ਸਤਿ, ਅਪਿ ਪਚ੍ਛਿਮਭਵਿਕਸ੍ਸ ਉਪੇਕ੍ਖਾਸਹਗਤਪਟਿਸਨ੍ਧਿਕਸ੍ਸ. ਨ ਹਿ ਉਪਪਜ੍ਜਨ੍ਤਸ੍ਸ ਤਸ੍ਸ ਚੁਤਿਤੋ ਪੁਬ੍ਬੇਵ ਸੋਮਨਸ੍ਸਿਨ੍ਦ੍ਰਿਯਨਿਰੋਧੋ ਨ ਸਮ੍ਭਵਤੀਤਿ. ਏਤ੍ਥ ਹਿ ਪਠਮਪੁਚ੍ਛਾਸੁ ਸਨ੍ਨਿਟ੍ਠਾਨਤ੍ਥੋ ਪੁਚ੍ਛਿਤਬ੍ਬਤ੍ਥਨਿਸ੍ਸਯੋ ਮਾਦਿਸੋਵ ਉਪਪਤ੍ਤਿਉਪ੍ਪਾਦਿਨ੍ਦ੍ਰਿਯਵਾ ਉਭਯੁਪ੍ਪਾਦਿਨ੍ਦ੍ਰਿਯਵਾ ਅਤ੍ਥੋ ਪਟਿਨਿਵਤ੍ਤਿਤ੍ਵਾਪਿ ਪੁਚ੍ਛਿਤਬ੍ਬਤ੍ਥਸ੍ਸ ਨਿਸ੍ਸਯੋਤਿ ਏਵਂ ਵਿਯ ਦੁਤਿਯਪੁਚ੍ਛਾਸੁ ਸਨ੍ਨਿਟ੍ਠਾਨਤ੍ਥਮੇਵ ਨਿਯਮੇਤਿ, ਨ ਤਤ੍ਥੇਵ ਪੁਚ੍ਛਿਤਬ੍ਬਂ ਅਨਾਗਤਭਾਵਮਤ੍ਤੇਨ ਸਰੂਪਤੋ ਗਹਿਤਂ ਉਪ੍ਪਾਦਂ ਵਾ ਨਿਰੋਧਂ ਵਾ ਸਂਸਯਤ੍ਥਨ੍ਤਿ. ਯਸ੍ਮਾ ਚੇਵਂ ਸਨ੍ਨਿਟ੍ਠਾਨਤ੍ਥਸ੍ਸ ਨਿਯਮੋ ਹੋਤਿ, ਤਸ੍ਮਾ ‘‘ਯਸ੍ਸ ਵਾ ਪਨ ਸੋਮਨਸ੍ਸਿਨ੍ਦ੍ਰਿਯਂ ਉਪ੍ਪਜ੍ਜਿਸ੍ਸਤਿ, ਤਸ੍ਸ ਚਕ੍ਖੁਨ੍ਦ੍ਰਿਯਂ ਉਪ੍ਪਜ੍ਜਿਸ੍ਸਤੀਤਿ? ਆਮਨ੍ਤਾ’’ਤਿ (ਯਮ. ੩.ਇਨ੍ਦ੍ਰਿਯਯਮਕ.੨੮੧) ਵੁਤ੍ਤਂ. ਏਸ ਨਯੋ ਨਿਰੋਧਵਾਰੇਪਿ.

ਪਟਿਲੋਮੇ ਪਨ ਯਥਾ ਅਨੁਲੋਮੇ ‘‘ਉਪ੍ਪਜ੍ਜਿਸ੍ਸਤਿ ਨਿਰੁਜ੍ਝਿਸ੍ਸਤੀ’’ਤਿ ਉਪ੍ਪਾਦਨਿਰੋਧਾ ਅਨਾਗਤਾ ਸਰੂਪਵਸੇਨ ਵੁਤ੍ਤਾ, ਏਵਂ ਅਵੁਤ੍ਤਤ੍ਤਾ ਯਥਾ ਤਤ੍ਥ ਸਂਸਯਪਦੇਨ ਗਹਿਤਸ੍ਸ ਇਨ੍ਦ੍ਰਿਯਸ੍ਸ ਪਵਤ੍ਤਿਯਮ੍ਪਿ ਉਪ੍ਪਾਦਨਿਰੋਧਾ ਚਕ੍ਖੁਨ੍ਦ੍ਰਿਯਾਦਿਮੂਲਕੇਸੁ ਯੋਜਿਤਾ, ਨ ਏਵਂ ਯੋਜੇਤਬ੍ਬਾ. ਯਥਾ ਹਿ ਉਪ੍ਪਾਦਨਿਰੋਧੇ ਅਤਿਕ੍ਕਮਿਤ੍ਵਾ ਅਪ੍ਪਤ੍ਵਾ ਚ ਉਪ੍ਪਾਦਨਿਰੋਧਾ ਸਮ੍ਭਵਨ੍ਤਿ ਯੋਜੇਤੁਂ, ਨ ਏਵਂ ਅਨੁਪ੍ਪਾਦਾਨਿਰੋਧੇ ਅਤਿਕ੍ਕਮਿਤ੍ਵਾ ਅਪ੍ਪਤ੍ਵਾ ਚ ਅਨੁਪ੍ਪਾਦਾਨਿਰੋਧਾ ਸਮ੍ਭਵਨ੍ਤਿ ਅਭੂਤਾਭਾਵਸ੍ਸ ਅਭੂਤਾਭਾਵਂ ਅਤਿਕ੍ਕਮਿਤ੍ਵਾ ਅਪ੍ਪਤ੍ਵਾ ਚ ਸਮ੍ਭਵਾਨੁਪ੍ਪਤ੍ਤਿਤੋ, ਅਭੂਤੁਪ੍ਪਾਦਨਿਰੋਧਾਭਾਵੋ ਚ ਪਟਿਲੋਮੇ ਪੁਚ੍ਛਿਤੋ, ਤਸ੍ਮਾਸ੍ਸ ਵਿਸੇਸਰਹਿਤਸ੍ਸ ਅਭੂਤਾਭਾਵਸ੍ਸ ਵਤ੍ਤਮਾਨਾਨਂ ਉਪ੍ਪਾਦਸ੍ਸ ਵਿਯ ਕਾਲਨ੍ਤਰਯੋਗਾਭਾਵਤੋ ਯਾਦਿਸਾਨਂ ਚਕ੍ਖਾਦੀਨਂ ਉਪ੍ਪਾਦਨਿਰੋਧਾਭਾਵੇਨ ਪੁਚ੍ਛਿਤਬ੍ਬਸ੍ਸ ਨਿਸ੍ਸਯੋ ਸਨ੍ਨਿਟ੍ਠਾਨੇਨ ਸਨ੍ਨਿਚ੍ਛਿਤੋ, ਤਨ੍ਨਿਸ੍ਸਯਾ ਤਾਦਿਸਾਨਂਯੇਵ ਉਪਪਤ੍ਤਿਚੁਤਿਉਪ੍ਪਾਦਨਿਰੋਧਾਨਂ ਜੀਵਿਤਾਦੀਨਮ੍ਪਿ ਅਨੁਪ੍ਪਾਦਾਨਿਰੋਧਾ ਸਂਸਯਪਦੇਨ ਪੁਚ੍ਛਿਤਾ ਹੋਨ੍ਤੀਤਿ ‘‘ਯਸ੍ਸ ਚਕ੍ਖੁਨ੍ਦ੍ਰਿਯਂ ਨੁਪ੍ਪਜ੍ਜਿਸ੍ਸਤਿ, ਤਸ੍ਸ ਸੋਮਨਸ੍ਸਿਨ੍ਦ੍ਰਿਯਂ ਨੁਪ੍ਪਜ੍ਜਿਸ੍ਸਤੀਤਿ? ਆਮਨ੍ਤਾ’’ਤਿ (ਯਮ. ੩.ਇਨ੍ਦ੍ਰਿਯਯਮਕ.੩੦੮) ਚ, ‘‘ਯਸ੍ਸ ਚਕ੍ਖੁਨ੍ਦ੍ਰਿਯਂ ਨ ਨਿਰੁਜ੍ਝਿਸ੍ਸਤਿ, ਤਸ੍ਸ ਸੋਮਨਸ੍ਸਿਨ੍ਦ੍ਰਿਯਂ ਨ ਨਿਰੁਜ੍ਝਿਸ੍ਸਤੀਤਿ? ਆਮਨ੍ਤਾ’’ਤਿ ਚ ਵੁਤ੍ਤਂ, ਨ ਵੁਤ੍ਤਂ ‘‘ਯੇ ਅਰੂਪਂ ਉਪਪਜ੍ਜਿਤ੍ਵਾ ਪਰਿਨਿਬ੍ਬਾਯਿਸ੍ਸਨ੍ਤੀ’’ਤਿਆਦਿਨਾ ਜੀਵਿਤਿਨ੍ਦ੍ਰਿਯਉਪੇਕ੍ਖਿਨ੍ਦ੍ਰਿਯਾਦੀਸੁ ਵਿਯ ਵਿਸ੍ਸਜ੍ਜਨਨ੍ਤਿ.

ਯੇ ਰੂਪਾਵਚਰਂ ਉਪਪਜ੍ਜਿਤ੍ਵਾ ਪਰਿਨਿਬ੍ਬਾਯਿਸ੍ਸਨ੍ਤਿ, ਤੇਸਂ ਘਾਨਿਨ੍ਦ੍ਰਿਯਂ ਨ ਉਪ੍ਪਜ੍ਜਿਸ੍ਸਤਿ, ਨੋ ਚ ਤੇਸਂ ਸੋਮਨਸ੍ਸਿਨ੍ਦ੍ਰਿਯਂ ਨ ਉਪ੍ਪਜ੍ਜਿਸ੍ਸਤੀ’’ਤਿ ਏਤ੍ਥ ਯੇ ਸੋਪੇਕ੍ਖਪਟਿਸਨ੍ਧਿਕਾ ਭਵਿਸ੍ਸਨ੍ਤਿ, ਤੇ ‘‘ਯੇ ਚ ਅਰੂਪਂ ਉਪਪਜ੍ਜਿਤ੍ਵਾ ਪਰਿਨਿਬ੍ਬਾਯਿਸ੍ਸਨ੍ਤੀ’’ਤਿ ਏਤੇਨ ਪਚ੍ਛਿਮਕੋਟ੍ਠਾਸਵਚਨੇਨ ਤਂਸਮਾਨਲਕ੍ਖਣਤਾਯ ਸਙ੍ਗਹਿਤਾਤਿ ਯੇ ਸੋਮਨਸ੍ਸਪਟਿਸਨ੍ਧਿਕਾ ਭਵਿਸ੍ਸਨ੍ਤਿ, ਤੇ ਏਵ ਵੁਤ੍ਤਾਤਿ ਦਟ੍ਠਬ੍ਬਾ.

ਅਟ੍ਠਕਥਾਯਂ ਯੇਸੁ ਆਦਿਮਪੋਤ੍ਥਕੇਸੁ ‘‘ਅਤੀਤਾਨਾਗਤਵਾਰੇ ਸੁਦ੍ਧਾਵਾਸਾਨਂ ਉਪਪਤ੍ਤਿਚਿਤ੍ਤਸ੍ਸ ਭਙ੍ਗਕ੍ਖਣੇ ਮਨਿਨ੍ਦ੍ਰਿਯਞ੍ਚ ਨੁਪ੍ਪਜ੍ਜਿਤ੍ਥਾਤਿ ਧਮ੍ਮਯਮਕੇ ਵਿਯ ਉਪ੍ਪਾਦਕ੍ਖਣਾਤਿਕ੍ਕਮਵਸੇਨ ਅਤ੍ਥਂ ਅਗ੍ਗਹੇਤ੍ਵਾ’’ਤਿ ਲਿਖਿਤਂ, ਤਂ ਪਮਾਦਲਿਖਿਤਂ. ਯੇਸੁ ਪਨ ਪੋਤ੍ਥਕੇਸੁ ‘‘ਪਚ੍ਚੁਪ੍ਪਨ੍ਨਾਤੀਤਵਾਰੇ ਸੁਦ੍ਧਾਵਾਸਾਨਂ ਉਪਪਤ੍ਤਿਚਿਤ੍ਤਸ੍ਸ ਭਙ੍ਗਕ੍ਖਣੇ ਮਨਿਨ੍ਦ੍ਰਿਯਞ੍ਚ ਨੁਪ੍ਪਜ੍ਜਿਤ੍ਥਾਤਿ…ਪੇ… ਤਸ੍ਮਿਂ ਭਵੇ ਅਨੁਪ੍ਪਨ੍ਨਪੁਬ੍ਬਵਸੇਨ ਅਤ੍ਥੋ ਗਹੇਤਬ੍ਬੋ’’ਤਿ ਪਾਠੋ ਦਿਸ੍ਸਤਿ, ਸੋ ਏਵ ਸੁਨ੍ਦਰਤਰੋਤਿ.

ਪਵਤ੍ਤਿਵਾਰਵਣ੍ਣਨਾ ਨਿਟ੍ਠਿਤਾ.