੨. ਅਨ੍ਤਰਾਭਵਕਥਾਵਣ੍ਣਨਾ

੫੦੫. ਅਤਿਦੂਰਸ੍ਸ ਅਨ੍ਤਰਿਤਸ੍ਸ ਪਤ੍ਤਬ੍ਬਸ੍ਸ ਦੇਸਸ੍ਸ ਦਸ੍ਸਨਤੋ ਦਿਬ੍ਬਚਕ੍ਖੁਕੋ ਵਿਯ. ਆਕਾਸੇਨ ਪਥਵਨ੍ਤਰਟ੍ਠਾਨਾਨਿ ਭਿਨ੍ਦਿਤ੍ਵਾ ਗਮਨਤੋ ਇਦ੍ਧਿਮਾ ਵਿਯ. ਨ ਸਹਧਮ੍ਮੇਨਾਤਿ ਯਦਿ ਸੋ ਭਵਾਨਂ ਅਨ੍ਤਰਾ ਨ ਸਿਯਾ, ਨ ਨਾਮ ਅਨ੍ਤਰਾਭਵੋਤਿ ਪਟਿਕ੍ਖੇਪੇ ਕਰਣਂ ਨਤ੍ਥੀਤਿ ਅਧਿਪ੍ਪਾਯੋ.

੫੦੬. ਤਤ੍ਥ ਜਾਤਿਜਰਾਮਰਣਾਨਿ ਚੇਵ ਚੁਤਿਪਟਿਸਨ੍ਧਿਪਰਮ੍ਪਰਞ੍ਚ ਅਨਿਚ੍ਛਨ੍ਤੋਤਿ ਏਤੇਨ ਚੁਤਿਅਨਨ੍ਤਰਂ ਅਨ੍ਤਰਾਭਵਂ ਖਨ੍ਧਾਤਿ, ਵਤ੍ਤਮਾਨਾ ਜਾਤੀਤਿ, ਮਾਤੁਕੁਚ੍ਛਿਮੇਵ ਪਵਿਟ੍ਠਾ ਅਨ੍ਤਰਧਾਯਮਾਨਾ ਮਰਣਨ੍ਤਿ ਨ ਇਚ੍ਛਤਿ.

੫੦੭. ਯਥਾ ਕਾਮਭਵਾਦੀਸੁ ਤਤ੍ਥ ਤਤ੍ਥੇਵ ਪੁਨਪ੍ਪੁਨਂ ਚਵਿਤ੍ਵਾ ਉਪਪਤ੍ਤਿਵਸੇਨ ਚੁਤਿਪਟਿਸਨ੍ਧਿਪਰਮ੍ਪਰਾ ਹੋਤਿ, ਏਵਂ ਤਂ ਤਤ੍ਥ ਨ ਇਚ੍ਛਤੀਤਿ ਦਸ੍ਸੇਤਿ.

ਅਨ੍ਤਰਾਭਵਕਥਾਵਣ੍ਣਨਾ ਨਿਟ੍ਠਿਤਾ.