੧. ਅਨੁਲੋਮਪਚ੍ਚਨੀਕਵਣ੍ਣਨਾ

੧. ਮਾਯਾਯ ਅਮਣਿਆਦਯੋ ਮਣਿਆਦਿਆਕਾਰੇਨ ਦਿਸ੍ਸਮਾਨਾ ‘‘ਮਾਯਾ’’ਤਿ ਵੁਤ੍ਤਾ. ਅਭੂਤੇਨ ਮਣਿਉਦਕਾਦਿਆਕਾਰੇਨ ਗਯ੍ਹਮਾਨਾ ਮਾਯਾਮਰੀਚਿਆਦਯੋ ਅਭੂਤਞ੍ਞੇਯ੍ਯਾਕਾਰਤ੍ਤਾ ਅਸਚ੍ਚਿਕਟ੍ਠਾ. ਯੋ ਤਥਾ ਨ ਹੋਤਿ, ਸੋ ਸਚ੍ਚਿਕਟ੍ਠੋਤਿ ਦਸ੍ਸੇਨ੍ਤੋ ਆਹ ‘‘ਮਾਯਾ…ਪੇ… ਭੂਤਤ੍ਥੋ’’ਤਿ. ਅਨੁਸ੍ਸਵਾਦਿਵਸੇਨ ਗਯ੍ਹਮਾਨੋ ਤਥਾਪਿ ਹੋਤਿ ਅਞ੍ਞਥਾਪੀਤਿ ਤਾਦਿਸੋ ਞੇਯ੍ਯੋ ਨ ਪਰਮਤ੍ਥੋ, ਅਤ੍ਤਪਚ੍ਚਕ੍ਖੋ ਪਨ ਪਰਮਤ੍ਥੋਤਿ ਦਸ੍ਸੇਨ੍ਤੋ ਆਹ ‘‘ਅਨੁਸ੍ਸਵਾ…ਪੇ… ਉਤ੍ਤਮਤ੍ਥੋ’’ਤਿ.

ਛਲਵਾਦਸ੍ਸਾਤਿ ਅਤ੍ਥੀਤਿ ਵਚਨਸਾਮਞ੍ਞੇਨ ਅਤ੍ਥੀਤਿ ਵੁਤ੍ਤੇਹਿ ਰੂਪਾਦੀਹਿ ਸਾਮਞ੍ਞਵਚਨਸ੍ਸਾਤਿ ਅਧਿਪ੍ਪਾਯੋ. ‘‘ਸੋ ਸਚ੍ਚਿ…ਪੇ… ਲਦ੍ਧਿਂ ਗਹੇਤ੍ਵਾ ਆਮਨ੍ਤਾਤਿ ਪਟਿਜਾਨਾਤੀ’’ਤਿ ਵਚਨਤੋ ਪਨ ‘‘ਛਲਵਾਦਸ੍ਸਾ’’ਤਿ ਨ ਸਕ੍ਕਾ ਵਤ੍ਤੁਂ. ਨ ਹਿ ਲਦ੍ਧਿ ਛਲਨ੍ਤਿ. ਓਕਾਸਂ ਅਦਦਮਾਨੋਤਿ ਪਤਿਟ੍ਠਂ ਪਚ੍ਛਿਨ੍ਦਨ੍ਤੋ. ਯਦਿ ਸਚ੍ਚਿਕਟ੍ਠੇਨ ਉਪਲਬ੍ਭਤਿ, ਰੂਪਾਦਯੋ ਵਿਯ ਉਪਲਬ੍ਭੇਯ੍ਯ, ਤਥਾ ਅਨੁਪਲਬ੍ਭਨੀਯਤੋ ਨ ਤਵ ਵਾਦੋ ਤਿਟ੍ਠਤੀਤਿ ਨਿਵਤ੍ਤੇਨ੍ਤੋਤਿ ਅਧਿਪ੍ਪਾਯੋ. ਤਂ ਸਨ੍ਧਾਯਾਤਿ ‘‘ਯੋ ਸਚ੍ਚਿਕਟ੍ਠੋ’’ਤਿ ਏਤ੍ਥ ਵੁਤ੍ਤੋ ਯੋ ਸਚ੍ਚਿਕਟ੍ਠੋ, ਸੋ ਸਪ੍ਪਚ੍ਚਯਾਦਿਭਾਵੇਨ ਦੀਪਿਤੋ ‘‘ਰੂਪਞ੍ਚ ਉਪਲਬ੍ਭਤੀ’’ਤਿਆਦੀਸੁ ਆਗਤੋ ਧਮ੍ਮਪ੍ਪਭੇਦੋਤਿ ਦਸ੍ਸੇਤਿ.

‘‘ਤੇਨ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ ਵਤ੍ਵਾ ‘‘ਤੇਨਾਕਾਰੇਨਾ’’ਤਿ ਵਦਤੋ ਅਯਮਧਿਪ੍ਪਾਯੋ – ਸਚ੍ਚਿਕਟ੍ਠਪਰਮਤ੍ਥਾਕਾਰੇਨ ਉਪਲਬ੍ਭਮਾਨਂ ਸਚ੍ਚਿਕਟ੍ਠਪਰਮਤ੍ਥੇਨ ਉਪਲਬ੍ਭਮਾਨਂ ਨਾਮ ਹੋਤੀਤਿ. ਅਞ੍ਞਥਾ ਤਤੋਤਿ ਤਸ੍ਸ ਤੇਨਾਕਾਰੇਨਾਤਿ ਵਤ੍ਤਬ੍ਬਂ ਸਿਯਾ. ਕੋ ਪਨੇਤਿਸ੍ਸਾ ਪੁਰਿਮਪੁਚ੍ਛਾਯ ਚ ਵਿਸੇਸੋਤਿ? ਪੁਰਿਮਪੁਚ੍ਛਾਯ ਸਤ੍ਤਪਞ੍ਞਾਸਵਿਧੋ ਧਮ੍ਮਪ੍ਪਭੇਦੋ ਯਥਾ ਭੂਤੇਨ ਸਭਾਵਤ੍ਥੇਨ ਉਪਲਬ੍ਭਤਿ, ਏਵਂ ਪੁਗ੍ਗਲੋ ਉਪਲਬ੍ਭਤੀਤਿ ਵੁਤ੍ਤਂ. ਇਧ ਪਨ ਭੂਤਸਭਾਵਤ੍ਥੇਨ ਉਪਲਬ੍ਭਮਾਨੋ ਸੋ ਧਮ੍ਮਪ੍ਪਭੇਦੋ ਯੇਨ ਰੁਪ੍ਪਨਾਦਿਸਪ੍ਪਚ੍ਚਯਾਦਿਆਕਾਰੇਨ ਉਪਲਬ੍ਭਤਿ, ਕਿਂ ਤੇਨਾਕਾਰੇਨ ਪੁਗ੍ਗਲੋਪਿ ਉਪਲਬ੍ਭਤੀਤਿ ਏਸ ਵਿਸੇਸੋ. ਯਥਾ ਪਨ ਰੂਪਂ ਵਿਯ ਭੂਤਸਭਾਵਤ੍ਥੇਨ ਉਪਲਬ੍ਭਮਾਨਾ ਵੇਦਨਾ ਨ ਰੁਪ੍ਪਨਾਕਾਰੇਨ ਉਪਲਬ੍ਭਤਿ, ਏਵਂ ਧਮ੍ਮਪ੍ਪਭੇਦੋ ਵਿਯ ਭੂਤਸਭਾਵਤ੍ਥੇਨ ਉਪਲਬ੍ਭਮਾਨੋ ਪੁਗ੍ਗਲੋ ਨ ਰੁਪ੍ਪਨਾਦਿਸਪ੍ਪਚ੍ਚਯਾਦਿਆਕਾਰੇਨ ਉਪਲਬ੍ਭਤੀਤਿ ਸਕ੍ਕਾ ਪਰਵਾਦਿਨਾ ਵਤ੍ਤੁਨ੍ਤਿ ਅਚੋਦਨੀਯਂ ਏਤਂ ਸਿਯਾ. ਅਵਜਾਨਨਞ੍ਚ ਤਸ੍ਸ ਯੁਤ੍ਤਨ੍ਤਿ ਨਿਗ੍ਗਹੋ ਚ ਨ ਕਾਤਬ੍ਬੋ. ਧਮ੍ਮਪ੍ਪਭੇਦਤੋ ਪਨ ਅਞ੍ਞਸ੍ਸ ਸਚ੍ਚਿਕਟ੍ਠਸ੍ਸ ਅਸਿਦ੍ਧਤ੍ਤਾ ਧਮ੍ਮਪ੍ਪਭੇਦਾਕਾਰੇਨੇਵ ਚੋਦੇਤਿ. ਅਵਜਾਨਨੇਨੇਵ ਨਿਗ੍ਗਹਂ ਦਸ੍ਸੇਤਿ. ਅਨੁਜਾਨਨਾਵਜਾਨਨਪਕ੍ਖਾ ਸਾਮਞ੍ਞਵਿਸੇਸੇਹਿ ਪਟਿਞ੍ਞਾਪਟਿਕ੍ਖੇਪਪਕ੍ਖਾ ਅਨੁਲੋਮਪਟਿਲੋਮਪਕ੍ਖਾ ਪਠਮਦੁਤਿਯਨਯਾਤਿ ਅਯਮੇਤੇਸਂ ਵਿਸੇਸੋ ਵੇਦਿਤਬ੍ਬੋ.

‘‘ਤੇਨ ਵਤ ਰੇ ਵਤ੍ਤਬ੍ਬੇ’’ਤਿ ਵਦਨ੍ਤੋ ਵਤ੍ਤਬ੍ਬਸ੍ਸ ਅਵਚਨੇ ਦੋਸਂ ਪਾਪੇਤੀਤਿ ਇਮਿਨਾ ਅਧਿਪ੍ਪਾਯੇਨ ‘‘ਨਿਗ੍ਗਹਸ੍ਸ ਪਾਪਿਤਤ੍ਤਾ’’ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ‘‘ਏਵਮੇਤਂ ਨਿਗ੍ਗਹਸ੍ਸ ਚ ਅਨੁਲੋਮਪਟਿਲੋਮਤੋ ਚਤੁਨ੍ਨਂ ਪਾਪਨਾਰੋਪਨਞ੍ਚ ਵੁਤ੍ਤਤ੍ਤਾ ਉਪਲਬ੍ਭਤੀਤਿਆਦਿਕਂ ਅਨੁਲੋਮਪਞ੍ਚਕਂ ਨਾਮਾ’’ਤਿ ਵੁਤ੍ਤਂ, ਅਨੁਲੋਮਪਟਿਲੋਮਤੋ ਪਨ ਦ੍ਵੀਹਿ ਠਪਨਾਹਿ ਸਹ ਸਤ੍ਤਕੇਨ ਭਵਿਤਬ੍ਬਂ, ਤਂਵਜ੍ਜਨੇ ਵਾ ਕਾਰਣਂ ਵਤ੍ਤਬ੍ਬਂ. ਯਂ ਪਨ ਵਕ੍ਖਤਿ ‘‘ਠਪਨਾ ਨਾਮ ਪਰਵਾਦੀਪਕ੍ਖਸ੍ਸ ਠਪਨਤੋ ‘ਅਯਂ ਤਵ ਦੋਸੋ’ਤਿ ਦਸ੍ਸੇਤੁਂ ਠਪਨਮਤ੍ਤਮੇਵ ਹੋਤਿ, ਨ ਨਿਗ੍ਗਹਸ੍ਸ ਵਾ ਪਟਿਕਮ੍ਮਸ੍ਸ ਵਾ ਪਾਕਟਭਾਵਕਰਣ’’ਨ੍ਤਿ (ਕਥਾ. ਅਟ੍ਠ. ੨). ਤੇਨਾਧਿਪ੍ਪਾਯੇਨ ਇਧਾਪਿ ਠਪਨਾਦ੍ਵਯਂ ਵਜ੍ਜੇਤਿ. ਯਥਾ ਪਨ ਤਤ੍ਥ ਪਟਿਕਮ੍ਮਪਞ੍ਚਕਭਾਵਂ ਅਵਤ੍ਵਾ ਪਟਿਕਮ੍ਮਚਤੁਕ੍ਕਭਾਵਂ ਵਕ੍ਖਤਿ, ਏਵਮਿਧਾਪਿ ਨਿਗ੍ਗਹਚਤੁਕ੍ਕਭਾਵੋ ਵਤ੍ਤਬ੍ਬੋ ਸਿਯਾ. ਸੁਦ੍ਧਿਕਨਿਗ੍ਗਹਸ੍ਸ ਪਨ ਨਿਗ੍ਗਹਪ੍ਪਧਾਨਤ੍ਤਾ ਉਦ੍ਦੇਸਭਾਵੇਨ ਵੁਤ੍ਤੋ ਨਿਗ੍ਗਹੋਵ ਵਿਸੁਂ ਵੁਤ੍ਤੋਤਿ ਦਟ੍ਠਬ੍ਬੋ. ਯੇ ਪਨ ‘‘ਅਯਥਾਭੂਤਨਿਗ੍ਗਹਤ੍ਤਾ ਤਤ੍ਥ ਪਟਿਕਮ੍ਮਂ ਵਿਸੁਂ ਨ ਵੁਤ੍ਤ’’ਨ੍ਤਿ ਵਦਨ੍ਤਿ, ਤੇਸਂ ਦੁਤਿਯੇ ਵਾਦਮੁਖੇ ਨਿਗ੍ਗਹਚਤੁਕ੍ਕਭਾਵੋ ਪਟਿਕਮ੍ਮਪਞ੍ਚਕਭਾਵੋ ਚ ਆਪਜ੍ਜਤਿ.

੨. ਅਤ੍ਤਨਾ ਅਧਿਪ੍ਪੇਤਂ ਸਚ੍ਚਿਕਟ੍ਠਮੇਵਾਤਿ ਸਮ੍ਮੁਤਿਸਚ੍ਚਂ ਸਨ੍ਧਾਯਾਤਿ ਅਧਿਪ੍ਪਾਯੋ. ਵਕ੍ਖਤਿ ਹਿ ‘‘ਸੁਦ੍ਧਸਮ੍ਮੁਤਿਸਚ੍ਚਂ ਵਾ ਪਰਮਤ੍ਥਮਿਸ੍ਸਕਂ ਵਾ ਸਮ੍ਮੁਤਿਸਚ੍ਚਂ ਸਨ੍ਧਾਯ ‘ਯੋ ਸਚ੍ਚਿਕਟ੍ਠੋ’ਤਿ ਪੁਨ ਅਨੁਯੋਗੋ ਪਰਵਾਦਿਸ੍ਸਾ’’ਤਿ (ਕਥਾ. ਅਟ੍ਠ. ੬). ਤਤ੍ਥ ਯਦਿ ਪਰਵਾਦਿਨਾ ਅਤ੍ਤਨਾ ਅਧਿਪ੍ਪੇਤਸਚ੍ਚਿਕਟ੍ਠੋ ਸਮ੍ਮੁਤਿਸਚ੍ਚਂ, ਸਮ੍ਮੁਤਿਸਚ੍ਚਾਕਾਰੇਨ ਪੁਗ੍ਗਲੋ ਉਪਲਬ੍ਭਤੀਤਿ ਵਦਨ੍ਤੇਨ ਸਮਾਨਲਦ੍ਧਿਕੋ ਨਪ੍ਪਟਿਸੇਧਿਤਬ੍ਬੋ, ਕਥਾ ਏਵਾਯਂ ਨਾਰਭਿਤਬ੍ਬਾ. ਅਥ ਸਕਵਾਦਿਨਾ ਅਤ੍ਤਨਾ ਚ ਅਧਿਪ੍ਪੇਤਸਚ੍ਚਿਕਟ੍ਠਂਯੇਵ ਸਨ੍ਧਾਯ ਪਰਵਾਦੀ ‘‘ਯੋ ਸਚ੍ਚਿਕਟ੍ਠੋ’’ਤਿਆਦਿਮਾਹਾਤਿ ਅਯਮਤ੍ਥੋ. ਸਕਵਾਦਿਨਾ ਸਮ੍ਮੁਤਿਸਚ੍ਚਂਯੇਵ ਸਚ੍ਚਿਕਟ੍ਠੋਤਿ ਅਧਿਪ੍ਪੇਤਨ੍ਤਿ ਆਪਜ੍ਜਤਿ. ਯਦਿ ਉਭਯਂ ਅਧਿਪ੍ਪੇਤਂ, ਪੁਨ ‘‘ਸਮ੍ਮੁਤਿਸਚ੍ਚਪਰਮਤ੍ਥਸਚ੍ਚਾਨਿ ਵਾ ਏਕਤੋ ਕਤ੍ਵਾਪਿ ਏਵਮਾਹਾ’’ਤਿ ਨ ਵਤ੍ਤਬ੍ਬਂ ਸਿਯਾਤਿ. ਯਦਿ ਚ ਦ੍ਵੇਪਿ ਸਚ੍ਚਾਨਿ ਸਚ੍ਚਿਕਟ੍ਠਪਰਮਤ੍ਥਾ, ਸਚ੍ਚਿਕਟ੍ਠੇਕਦੇਸੇਨ ਉਪਲਦ੍ਧਿਂ ਇਚ੍ਛਨ੍ਤੇਨ ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿਆਦਿ ਅਨੁਯੋਗੋ ਨ ਕਾਤਬ੍ਬੋ, ਨ ਚ ਸਚ੍ਚਿਕਟ੍ਠੇਕਦੇਸੇਨ ਅਨੁਯੋਗੋ ਯੁਤ੍ਤੋ. ਨ ਹਿ ਵੇਦਯਿਤਾਕਾਰੇਨ ਉਪਲਬ੍ਭਮਾਨਾ ਵੇਦਨਾ ਰੁਪ੍ਪਨਾਕਾਰੇਨ ਉਪਲਬ੍ਭਤੀਤਿ ਅਨੁਯੁਞ੍ਜਿਤਬ੍ਬਾ, ਨ ਚ ਪਰਵਾਦੀ ਰੁਪ੍ਪਨਾਦਿਸਭਾਵਂ ਪੁਗ੍ਗਲਂ ਇਚ੍ਛਤਿ, ਅਥ ਖੋ ਸਚ੍ਚਿਕਟ੍ਠਪਰਮਤ੍ਥਮੇਵਾਤਿ. ਪਰਮਤ੍ਥਸਚ੍ਚਤੋ ਅਞ੍ਞਸ੍ਮਿਂ ਸਚ੍ਚਿਕਟ੍ਠੇ ਵਿਜ੍ਜਮਾਨੇ ਨਾਸ੍ਸ ਪਰਮਤ੍ਥਸਚ੍ਚਤਾ ਅਨੁਯੁਞ੍ਜਿਤਬ੍ਬਾ. ਅਸਚ੍ਚਿਕਟ੍ਠੇ ਸਚ੍ਚਿਕਟ੍ਠਵੋਹਾਰਂ ਆਰੋਪੇਤ੍ਵਾ ਤਂ ਸਨ੍ਧਾਯ ਪੁਚ੍ਛਤੀਤਿ ਵਦਨ੍ਤਾਨਂ ਵੋਹਰਿਤਸਚ੍ਚਿਕਟ੍ਠਸ੍ਸ ਅਤ੍ਤਨਾ ਅਧਿਪ੍ਪੇਤਸਚ੍ਚਿਕਟ੍ਠਤਾ ਨ ਯੁਤ੍ਤਾ. ਵੋਹਰਿਤਪਰਮਤ੍ਥਸਚ੍ਚਿਕਟ੍ਠਾਨਞ੍ਚ ਦ੍ਵਿਨ੍ਨਂ ਸਚ੍ਚਿਕਟ੍ਠਭਾਵੇ ਵੁਤ੍ਤਨਯੋਵ ਦੋਸੋ. ਸਮ੍ਮੁਤਿਸਚ੍ਚਾਕਾਰੇਨ ਉਪਲਬ੍ਭਮਾਨਞ੍ਚ ਭੂਤਸਭਾਵਤ੍ਥੇਨ ਉਪਲਬ੍ਭੇਯ੍ਯ ਵਾ ਨ ਵਾ. ਯਦਿ ਭੂਤਸਭਾਵਤ੍ਥੇਨ ਉਪਲਬ੍ਭਤਿ, ਪੁਗ੍ਗਲੋਪਿ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾਤਿ ਅਨੁਜਾਨਨ੍ਤੋ ਨਾਨੁਯੁਞ੍ਜਿਤਬ੍ਬੋ. ਅਥ ਨ ਭੂਤਸਭਾਵਤ੍ਥੇਨ, ਤਂਵਿਨਿਮੁਤ੍ਤੋ ਸਮ੍ਮੁਤਿਸਚ੍ਚਸ੍ਸ ਸਚ੍ਚਿਕਟ੍ਠਪਰਮਤ੍ਥਾਕਾਰੋ ਨ ਵਤ੍ਤਬ੍ਬੋ ਅਸਿਦ੍ਧਤ੍ਤਾ. ਵਕ੍ਖਤਿ ਚ ‘‘ਯਥਾ ਰੂਪਾਦਯੋ ਪਚ੍ਚਤ੍ਤਲਕ੍ਖਣਸਾਮਞ੍ਞਲਕ੍ਖਣਵਸੇਨ ਅਤ੍ਥਿ, ਨ ਏਵਂ ਪੁਗ੍ਗਲੋ’’ਤਿ. ਤਸ੍ਮਾ ਮਗ੍ਗਿਤਬ੍ਬੋ ਏਤ੍ਥ ਅਧਿਪ੍ਪਾਯੋ.

ਦ੍ਵਿਨ੍ਨਂ ਸਚ੍ਚਾਨਨ੍ਤਿ ਏਤ੍ਥ ਸਚ੍ਚਦ੍ਵਯਾਕਾਰੇਨ ਅਨੁਪਲਬ੍ਭਨੀਯਤੋ ਅਨੁਞ੍ਞੇਯ੍ਯਮੇਤਂ ਸਿਯਾ, ਨ ਵਾ ਕਿਞ੍ਚਿ ਵਤ੍ਤਬ੍ਬਂ. ਯਥਾ ਹਿ ਏਕਦੇਸੇਨ ਪਰਮਤ੍ਥਾਕਾਰੇਨ ਅਨੁਪਲਬ੍ਭਨੀਯਤਾ ਅਨੁਜਾਨਨਸ੍ਸ ਨ ਕਾਰਣਂ, ਏਵਂ ਏਕਦੇਸੇਨ ਸਮ੍ਮੁਤਿਯਾਕਾਰੇਨ ਉਪਲਬ੍ਭਨੀਯਤਾ ਪਟਿਕ੍ਖੇਪਸ੍ਸ ਚਾਤਿ ਮਗ੍ਗਿਤਬ੍ਬੋ ਏਤ੍ਥਾਪਿ ਅਧਿਪ੍ਪਾਯੋ. ਨੁਪਲਬ੍ਭਤੀਤਿ ਵਚਨਸਾਮਞ੍ਞਮਤ੍ਤਨ੍ਤਿ ਨੁਪਲਬ੍ਭਤੀਤਿ ਇਦਮੇਵ ਵਚਨਂ ਅਨੁਞ੍ਞਾਤਂ ਪਟਿਕ੍ਖਿਤ੍ਤਞ੍ਚਾਤਿ ਏਤਂ ਛਲਵਾਦਂ ਨਿਸ੍ਸਾਯਾਤਿ ਅਧਿਪ੍ਪਾਯੋ. ਯਥਾ ਉਪਲਬ੍ਭਤੀਤਿ ਏਤਸ੍ਸੇਵ ਅਨੁਜਾਨਨਪਟਿਕ੍ਖੇਪੇਹਿ ਅਹਂ ਨਿਗ੍ਗਹੇਤਬ੍ਬੋ, ਏਵਂ ਨੁਪਲਬ੍ਭਤੀਤਿ ਏਤਸ੍ਸੇਵ ਅਨੁਜਾਨਨਪਟਿਕ੍ਖੇਪੇਹਿ ਤ੍ਵਨ੍ਤਿ ਏਵਂ ਸਮ੍ਭਵਨ੍ਤਸ੍ਸ ਸਾਮਞ੍ਞੇਨ ਅਸਮ੍ਭਵਨ੍ਤਸ੍ਸ ਕਪ੍ਪਨਂ ਪਨੇਤ੍ਥ ਛਲਵਾਦੋ ਭਵਿਤੁਂ ਅਰਹਤਿ. ਤੇਨ ਨੁਪਲਬ੍ਭਤੀਤਿ ਵਚਨਸਾਮਞ੍ਞਮਤ੍ਤਂ ਛਲਵਾਦਸ੍ਸ ਕਾਰਣਤ੍ਤਾ ‘‘ਛਲਵਾਦੋ’’ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਵਚਨਸਾਮਞ੍ਞਮਤ੍ਤਞ੍ਚ ਛਲਵਾਦਞ੍ਚ ਨਿਸ੍ਸਾਯਾਤਿ ਵਾ ਅਤ੍ਥੋ. ਠਪਨਾ ਨਿਗ੍ਗਹਪ੍ਪਟਿਕਮ੍ਮਾਨਂ ਪਾਕਟਭਾਵਕਰਣਂ ਨ ਹੋਤੀਤਿ ਇਦਂ ਵਿਚਾਰੇਤਬ੍ਬਂ. ਨ ਹਿ ਪਕ੍ਖਟ੍ਠਪਨੇਨ ਵਿਨਾ ਪੁਰਿਮਂ ਅਨੁਜਾਨਿਤ੍ਵਾ ਪਚ੍ਛਿਮਸ੍ਸ ਅਵਜਾਨਨਂ, ਪਚ੍ਛਿਮਂ ਵਾ ਅਵਜਾਨਨ੍ਤਸ੍ਸ ਪੁਰਿਮਾਨੁਜਾਨਨਂ ਮਿਚ੍ਛਾਤਿ ਸਕ੍ਕਾ ਆਰੋਪੇਤੁਨ੍ਤਿ.

੩. ਤਵਾਤਿ, ਪਟਿਜਾਨਨ੍ਤਨ੍ਤਿ ਚ ਪਚ੍ਚਤ੍ਤੇ ਸਾਮਿਉਪਯੋਗਵਚਨਾਨੀਤਿ ਅਧਿਪ੍ਪਾਯੇਨ ‘‘ਤ੍ਵਂਯੇਵ ਪਟਿਜਾਨਨ੍ਤੋ’’ਤਿ ਆਹ.

੪-੫. ਚਤੂਹਿ ਪਾਪਨਾਰੋਪਨਾਹਿ ਨਿਗ੍ਗਹਸ੍ਸ ਉਪਨੀਤਤ੍ਤਾਤਿ ‘‘ਦੁਨ੍ਨਿਗ੍ਗਹਿਤਾ ਚ ਹੋਮ, ਹਞ੍ਚੀ’’ਤਿਆਦਿਨਾ ਤਯਾ ਮਮ ਕਤੋ ਨਿਗ੍ਗਹੋ, ਮਯਾ ਤਵ ਕਤੋ ਨਿਗ੍ਗਹੋ ਵਿਯ ਮਿਚ੍ਛਾਤਿ ਏਵਂ ਤੇਨ ਅਨੁਲੋਮਪਞ੍ਚਕੇ ਚਤੂਹਿ ਪਾਪਨਾਰੋਪਨਾਹਿ ਕਤਸ੍ਸ ਨਿਗ੍ਗਹਸ੍ਸ ਤੇਨ ਨਿਯਾਮੇਨ ਦੁਕ੍ਕਟਭਾਵਸ੍ਸ ਅਤ੍ਤਨਾ ਕਤਨਿਗ੍ਗਹੇਨ ਸਹ ਉਪਨੀਤਤ੍ਤਾ ਅਨਿਗ੍ਗਹਭਾਵਸ੍ਸ ਵਾ ਉਪਗਮਿਤਤ੍ਤਾਤਿ ਅਤ੍ਥੋ ਦਟ੍ਠਬ੍ਬੋ. ਏਵਮੇਵ ਤੇਨ ਹਿ ਯਂ ਨਿਗ੍ਗਣ੍ਹਾਸਿ ਹਞ੍ਚਿ…ਪੇ… ਇਦਂ ਤੇ ਮਿਚ੍ਛਾਤਿ ਏਤਸ੍ਸ ਅਨਿਗ੍ਗਹਭਾਵਨਿਗਮਨਸ੍ਸੇਵ ਨਿਗ੍ਗਮਨਚਤੁਕ੍ਕਤਾ ਵੇਦਿਤਬ੍ਬਾ.

ਅਨੁਲੋਮਪਚ੍ਚਨੀਕਵਣ੍ਣਨਾ ਨਿਟ੍ਠਿਤਾ.

੨. ਪਚ੍ਚਨੀਕਾਨੁਲੋਮਵਣ੍ਣਨਾ

੭-੧੦. ‘‘ਅਤ੍ਤਨੋ ਲਦ੍ਧਿਂ ਨਿਸ੍ਸਾਯ ਪਟਿਞ੍ਞਾ ਪਰਵਾਦਿਸ੍ਸਾ’’ਤਿ ਵਤ੍ਵਾ ਪੁਨ ‘‘ਪਰਮਤ੍ਥਵਸੇਨ ਪੁਗ੍ਗਲਸ੍ਸ ਅਭਾਵਤੋ ਪਟਿਕ੍ਖੇਪੋ ਪਰਵਾਦਿਸ੍ਸਾ’’ਤਿ ਵੁਤ੍ਤਂ. ਤਤ੍ਰਾਯਂ ਪਟਿਕ੍ਖੇਪੋ ਅਤ੍ਤਨੋ ਲਦ੍ਧਿਯਾ ਯਦਿ ਕਤੋ, ਪਰਮਤ੍ਥਤੋ ਅਞ੍ਞੇਨ ਸਚ੍ਚਿਕਟ੍ਠਪਰਮਤ੍ਥੇਨ ਪੁਗ੍ਗਲੋ ਉਪਲਬ੍ਭਤੀਤਿ ਅਯਮਸ੍ਸ ਲਦ੍ਧੀਤਿ ਆਪਜ੍ਜਤਿ. ਤਥਾ ਚ ਸਤਿ ਨਾਯਂ ਸਮ੍ਮੁਤਿਸਚ੍ਚਵਸੇਨ ਉਪਲਦ੍ਧਿਂ ਇਚ੍ਛਨ੍ਤੇਨ ਨਿਗ੍ਗਹੇਤਬ੍ਬੋ. ਅਥ ਅਤ੍ਤਨੋ ਲਦ੍ਧਿਂ ਨਿਗ੍ਗੂਹਿਤ੍ਵਾ ਪਰਸ੍ਸ ਲਦ੍ਧਿਵਸੇਨ ਪਟਿਕ੍ਖਿਪਤਿ, ਪੁਰਿਮਪਟਿਞ੍ਞਾਯ ਅਵਿਰੋਧਿਤਤ੍ਤਾ ਨ ਨਿਗ੍ਗਹੇਤਬ੍ਬੋ. ਨ ਹਿ ਅਤ੍ਤਨੋ ਚ ਪਰਸ੍ਸ ਚ ਲਦ੍ਧਿਂ ਵਦਨ੍ਤਸ੍ਸ ਦੋਸੋ ਆਪਜ੍ਜਤੀਤਿ. ਅਤ੍ਤਨੋ ਪਨ ਲਦ੍ਧਿਯਾ ਪਟਿਜਾਨਿਤ੍ਵਾ ਪਰਲਦ੍ਧਿਯਾ ਪਟਿਕ੍ਖਿਪਨ੍ਤੇਨ ਅਤ੍ਤਨੋ ਲਦ੍ਧਿਂ ਛਡ੍ਡੇਤ੍ਵਾ ਪਰਲਦ੍ਧਿ ਗਹਿਤਾ ਹੋਤੀਤਿ ਨਿਗ੍ਗਹੇਤਬ੍ਬੋਤਿ ਅਯਮੇਤ੍ਥ ਅਧਿਪ੍ਪਾਯੋ ਸਿਯਾ.

ਪਚ੍ਚਨੀਕਾਨੁਲੋਮਵਣ੍ਣਨਾ ਨਿਟ੍ਠਿਤਾ.

ਸੁਦ੍ਧਸਚ੍ਚਿਕਟ੍ਠਵਣ੍ਣਨਾ ਨਿਟ੍ਠਿਤਾ.

੨. ਓਕਾਸਸਚ੍ਚਿਕਟ੍ਠੋ

੧. ਅਨੁਲੋਮਪਚ੍ਚਨੀਕਵਣ੍ਣਨਾ

੧੧. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਸਰੀਰੇਤਿ ਅਯਮਤ੍ਥੋਤਿ ਦਸ੍ਸੇਨ੍ਤੋ ਆਹ ‘‘ਸਰੀਰਂ ਸਨ੍ਧਾਯਾ’’ਤਿ. ਤਤ੍ਥਾਤਿ ਤਸ੍ਮਿਂ ਸਂਖਿਤ੍ਤਪਾਠੇ. ਯਸ੍ਮਾ ਸਰੀਰਂ ਸਨ੍ਧਾਯ ‘‘ਸਬ੍ਬਤ੍ਥ ਨ ਉਪਲਬ੍ਭਤੀ’’ਤਿ ਵੁਤ੍ਤੇ ਸਰੀਰਤੋ ਬਹਿ ਉਪਲਬ੍ਭਤੀਤਿ ਆਪਜ੍ਜਤਿ, ਤਸ੍ਮਾ ਪਚ੍ਚਨੀਕੇ ਪਟਿਕ੍ਖੇਪੋ ਸਕਵਾਦਿਸ੍ਸਾਤਿ ਏਤੇਨ ਨ ਕੇਨਚਿ ਸਭਾਵੇਨ ਪੁਗ੍ਗਲੋ ਉਪਲਬ੍ਭਤੀਤਿ ਅਯਮਤ੍ਥੋ ਵੁਤ੍ਤੋ ਹੋਤਿ. ਨ ਹਿ ਕੇਨਚਿ ਸਭਾਵੇਨ ਉਪਲਬ੍ਭਮਾਨਸ੍ਸ ਸਰੀਰਤਦਞ੍ਞਾਵਿਮੁਤ੍ਤੋ ਉਪਲਦ੍ਧਿਓਕਾਸੋ ਅਤ੍ਥੀਤਿ.

੩. ਕਾਲਸਚ੍ਚਿਕਟ੍ਠੋ

੧. ਅਨੁਲੋਮਪਚ੍ਚਨੀਕਵਣ੍ਣਨਾ

੧੨. ਪੁਰਿਮਪਚ੍ਛਿਮਜਾਤਿਕਾਲਞ੍ਚਾਤਿ ਮਜ੍ਝਿਮਜਾਤਿਕਾਲੇ ਉਪਲਬ੍ਭਮਾਨਸ੍ਸ ਤਸ੍ਸੇਵ ਪੁਰਿਮਪਚ੍ਛਿਮਜਾਤਿਕਾਲੇਸੁ ਉਪਲਦ੍ਧਿਂ ਸਨ੍ਧਾਯਾਤਿ ਅਧਿਪ੍ਪਾਯੋ. ਸੇਸਂ ਪਠਮਨਯੇ ਵੁਤ੍ਤਸਦਿਸਮੇਵਾਤਿ ਇਮੇਸੁ ਤੀਸੁ ਪਠਮੇ ‘‘ਸਬ੍ਬਤ੍ਥਾ’’ਤਿ ਏਤਸ੍ਮਿਂ ਨਯੇ ਵੁਤ੍ਤਸਦਿਸਮੇਵ, ਕਿਂ ਤਂ? ਪਾਠਸ੍ਸ ਸਂਖਿਤ੍ਤਤਾਤਿ ਅਤ੍ਥੋ. ਇਧਾਪਿ ਹਿ ਯਸ੍ਮਾ ‘‘ਸਬ੍ਬਦਾ ਨ ਉਪਲਬ੍ਭਤੀ’’ਤਿ ਵੁਤ੍ਤੇ ਏਕਦਾ ਉਪਲਬ੍ਭਤੀਤਿ ਆਪਜ੍ਜਤਿ, ਤਸ੍ਮਾ ਪਚ੍ਚਨੀਕੇ ਪਟਿਕ੍ਖੇਪੋ ਸਕਵਾਦਿਸ੍ਸਾਤਿ ਯੋਜੇਤਬ੍ਬਨ੍ਤਿ.

੪. ਅਵਯਵਸਚ੍ਚਿਕਟ੍ਠੋ

੧. ਅਨੁਲੋਮਪਚ੍ਚਨੀਕਵਣ੍ਣਨਾ

੧੩. ਤਤਿਯਨਯੇ ਚ ਯਸ੍ਮਾ ‘‘ਸਬ੍ਬੇਸੁ ਨ ਉਪਲਬ੍ਭਤੀ’’ਤਿ ਵੁਤ੍ਤੇ ਏਕਸ੍ਮਿਂ ਉਪਲਬ੍ਭਤੀਤਿ ਆਪਜ੍ਜਤਿ, ਤਸ੍ਮਾ ਪਚ੍ਚਨੀਕੇ ਪਟਿਕ੍ਖੇਪੋ ਸਕਵਾਦਿਸ੍ਸਾਤਿ ਯੋਜੇਤਬ੍ਬਂ. ਤੇਨਾਹ ‘‘ਤਾਦਿਸਮੇਵਾ’’ਤਿ.

ਓਕਾਸਾਦਿਸਚ੍ਚਿਕਟ੍ਠੋ

੨. ਪਚ੍ਚਨੀਕਾਨੁਲੋਮਵਣ੍ਣਨਾ

੧੪. ਤਤ੍ਥ ਅਨੁਲੋਮਪਞ੍ਚਕਸ੍ਸਾਤਿਆਦਿਮ੍ਹਿ ਅਨੁਲੋਮਪਞ੍ਚਕਨ੍ਤਿ ਨਿਗ੍ਗਹਪਞ੍ਚਕਂ, ਪਚ੍ਚਨੀਕਨ੍ਤਿ ਚ ਪਟਿਕਮ੍ਮਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਤਤ੍ਥ ਅਨੁਲੋਮਪਞ੍ਚਕਸ੍ਸ ‘‘ਸਬ੍ਬਤ੍ਥ ਪੁਗ੍ਗਲੋ ਨੁਪਲਬ੍ਭਤੀ’’ਤਿਆਦਿਕਸ੍ਸ ਅਤ੍ਥੋ ‘‘ਸਬ੍ਬਤ੍ਥ ਪੁਗ੍ਗਲੋ ਨੁਪਲਬ੍ਭਤੀ’’ਤਿਆਦਿਪਾਲ਼ਿਂ ਸਂਖਿਪਿਤ੍ਵਾ ਆਗਤੇ ਸਰੂਪੇਨ ਅਵੁਤ੍ਤੇ ‘‘ਯਸ੍ਮਾ ਸਰੀਰਂ ਸਨ੍ਧਾਯਾ’’ਤਿਆਦਿਨਾ (ਕਥਾ. ਅਟ੍ਠ. ੧੧) ਵੁਤ੍ਤਨਯੇਨ ਵੇਦਿਤਬ੍ਬੋ, ਪਚ੍ਚਨੀਕਸ੍ਸ ਚ ‘‘ਸਬ੍ਬਤ੍ਥ ਪੁਗ੍ਗਲੋ ਉਪਲਬ੍ਭਤੀ’’ਤਿਆਦਿਕਸ੍ਸ ਪਟਿਕਮ੍ਮਕਰਣਵਸੇਨ ਵੁਤ੍ਤਸ੍ਸ ਅਤ੍ਥੋ ਪਟਿਕਮ੍ਮਾਦਿਪਾਲ਼ਿਂ ਸਂਖਿਪਿਤ੍ਵਾ ਆਦਿਮਤ੍ਤਦਸ੍ਸਨੇਨ ਆਗਤੇ ‘‘ਪੁਗ੍ਗਲੋ ਉਪਲਬ੍ਭਤੀ’’ਤਿਆਦਿਮ੍ਹਿ ਅਨੁਲੋਮੇ ‘‘ਸਬ੍ਬਤ੍ਥਾਤਿ ਸਰੀਰਂ ਸਨ੍ਧਾਯ ਅਨੁਯੋਗੋ ਸਕਵਾਦਿਸ੍ਸਾ’’ਤਿਆਦਿਨਾ (ਕਥਾ. ਅਟ੍ਠ. ੧੧) ਵੁਤ੍ਤਨਯੇਨ ਵੇਦਿਤਬ੍ਬੋਤਿ ਏਵਮਤ੍ਥੋ ਦਟ੍ਠਬ੍ਬੋ. ਅਥ ਵਾ ਤਤ੍ਥਾਤਿ ਯਂ ਆਰਦ੍ਧਂ, ਤਸ੍ਮਿਨ੍ਤਿ ਏਵਂ ਅਤ੍ਥਂ ਅਗ੍ਗਹੇਤ੍ਵਾ ਤਤ੍ਥ ਤੇਸੁ ਤੀਸੁ ਮੁਖੇਸੂਤਿ ਅਤ੍ਥੋ ਗਹੇਤਬ੍ਬੋ. ਅਨੁਲੋਮਪਞ੍ਚਕਮੂਲਕਾ ਚੇਤ੍ਥ ਸਬ੍ਬਾਨੁਲੋਮਪਚ੍ਚਨੀਕਪਞ੍ਚਕਪਾਲ਼ਿ ਅਨੁਲੋਮਪਞ੍ਚਕਸ੍ਸ ਪਾਲ਼ੀਤਿ ਵੁਤ੍ਤਾ, ਤਥਾ ਪਚ੍ਚਨੀਕਾਨੁਲੋਮਪਞ੍ਚਕਪਾਲ਼ਿ ਚ ਪਚ੍ਚਨੀਕਸ੍ਸ ਪਾਲ਼ੀਤਿ. ਤਂ ਸਂਖਿਪਿਤ੍ਵਾ ਪਟਿਕਮ੍ਮਵਸੇਨ ਆਗਤੇ ਸਰੂਪੇਨ ਅਵੁਤ੍ਤੇ ‘‘ਪੁਗ੍ਗਲੋ ਨੁਪਲਬ੍ਭਤੀ’’ਤਿਆਦਿਕੇ ਪਚ੍ਚਨੀਕੇ ‘‘ਉਪਲਬ੍ਭਤੀ’’ਤਿਆਦਿਕੇ ਅਨੁਲੋਮੇ ਚ ਅਤ੍ਥੋ ਹੇਟ੍ਠਾ ਸੁਦ੍ਧਿਕਸਚ੍ਚਿਕਟ੍ਠੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋਤਿ ਵੁਤ੍ਤਂ ਹੋਤਿ.

ਸਚ੍ਚਿਕਟ੍ਠਵਣ੍ਣਨਾ ਨਿਟ੍ਠਿਤਾ.

੫. ਸੁਦ੍ਧਿਕਸਂਸਨ੍ਦਨਵਣ੍ਣਨਾ

੧੭-੨੭. ਰੂਪਾਦੀਹਿ ਸਦ੍ਧਿਂ ਸਚ੍ਚਿਕਟ੍ਠਸਂਸਨ੍ਦਨਨ੍ਤਿ ਸਚ੍ਚਿਕਟ੍ਠਸ੍ਸ ਪੁਗ੍ਗਲਸ੍ਸ ਰੂਪਾਦੀਹਿ ਸਦ੍ਧਿਂ ਸਂਸਨ੍ਦਨਂ, ਸਚ੍ਚਿਕਟ੍ਠੇ ਵਾ ਰੂਪਾਦੀਹਿ ਸਦ੍ਧਿਂ ਪੁਗ੍ਗਲਸ੍ਸ ਸਂਸਨ੍ਦਨਨ੍ਤਿ ਅਧਿਪ੍ਪਾਯੋ. ਪੁਗ੍ਗਲੋ ਰੂਪਞ੍ਚਾਤਿ ਚ-ਕਾਰਸ੍ਸ ਸਮੁਚ੍ਚਯਤ੍ਥਤ੍ਤਾ ਯਥਾ ਰੂਪਨ੍ਤਿ ਏਵਂ ਨਿਦਸ੍ਸਨਵਸੇਨ ਵੁਤ੍ਤੋ ਅਤ੍ਥੋ ਵਿਚਾਰੇਤਬ੍ਬੋ. ਰੂਪਾਦੀਹਿ ਅਞ੍ਞੋ ਅਨਞ੍ਞੋ ਚ ਪੁਗ੍ਗਲੋ ਨ ਵਤ੍ਤਬ੍ਬੋਤਿ ਲਦ੍ਧਿ ਸਮਯੋ. ‘‘ਅਞ੍ਞਂ ਜੀਵਂ ਅਞ੍ਞਂ ਸਰੀਰਨ੍ਤਿ ਅਬ੍ਯਾਕਤਮੇਤਂ ਭਗਵਤਾ’’ਤਿਆਦਿਕਂ (ਸਂ. ਨਿ. ੪.੪੧੬) ਸੁਤ੍ਤਂ. ਅਨੁਞ੍ਞਾਯਮਾਨੇ ਤਦੁਭਯਵਿਰੋਧੋ ਆਪਜ੍ਜਤੀਤਿ ਇਮਮਤ੍ਥਂ ਸਨ੍ਧਾਯਾਹ ‘‘ਸਮਯਸੁਤ੍ਤਵਿਰੋਧਂ ਦਿਸ੍ਵਾ’’ਤਿ.

ਧਮ੍ਮਤੋਤਿ ਪਾਲ਼ਿਤੋ. ‘‘ਪਟਿਕਮ੍ਮਚਤੁਕ੍ਕਾਦੀਨਿ ਸਂਖਿਤ੍ਤਾਨਿ. ਪਰਵਾਦੀ…ਪੇ… ਦਸ੍ਸਿਤਾਨੀ’’ਤਿ ਵਦਨ੍ਤੇਹਿ ਪੁਗ੍ਗਲੋ ਨੁਪਲਬ੍ਭਤਿ…ਪੇ… ਆਜਾਨਾਹਿ ਪਟਿਕਮ੍ਮਨ੍ਤਿ ਏਤ੍ਥ ਆਜਾਨਾਹਿ ਨਿਗ੍ਗਹਨ੍ਤਿ ਪਾਠੋ ਦਿਟ੍ਠੋ ਭਵਿਸ੍ਸਤਿ. ਅਞ੍ਞਤ੍ਤਂ ਪਟਿਜਾਨਾਪਨਤ੍ਥਨ੍ਤਿ ਯਥਾ ਮਯਾ ਅਞ੍ਞਤ੍ਤਂ ਵਤ੍ਤਬ੍ਬਂ, ਤਥਾ ਚ ਤਯਾਪਿ ਤਂ ਵਤ੍ਤਬ੍ਬਨ੍ਤਿ ਅਞ੍ਞਤ੍ਤਪਟਿਞ੍ਞਾਯ ਚੋਦਨਤ੍ਥਨ੍ਤਿ ਅਤ੍ਥੋ. ਸਮ੍ਮੁਤਿਪਰਮਤ੍ਥਾਨਂ ਏਕਤ੍ਤਨਾਨਤ੍ਤਪਞ੍ਹਸ੍ਸ ਠਪਨੀਯਤ੍ਤਾਤਿ ਅਬ੍ਯਾਕਤਤ੍ਤਾਤਿ ਅਤ੍ਥੋ. ਯਦਿ ਠਪਨੀਯਤ੍ਤਾ ਪਟਿਕ੍ਖਿਪਿਤਬ੍ਬਂ, ਪਰੇਨਪਿ ਠਪਨੀਯਤ੍ਤਾ ਲਦ੍ਧਿਮੇਵ ਨਿਸ੍ਸਾਯ ਪਟਿਕ੍ਖੇਪੋ ਕਤੋਤਿ ਸੋਪਿ ਨ ਨਿਗ੍ਗਹੇਤਬ੍ਬੋ ਸਿਯਾ. ਪਰੋ ਪਨ ਪੁਗ੍ਗਲੋਤਿ ਕਞ੍ਚਿ ਸਭਾਵਂ ਗਹੇਤ੍ਵਾ ਤਸ੍ਸ ਠਪਨੀਯਤ੍ਤਂ ਇਚ੍ਛਤਿ, ਸਤਿ ਚ ਸਭਾਵੇ ਠਪਨੀਯਤਾ ਨ ਯੁਤ੍ਤਾਤਿ ਨਿਗ੍ਗਹੇਤਬ੍ਬੋ. ਸਮ੍ਮੁਤਿ ਪਨ ਕੋਚਿ ਸਭਾਵੋ ਨਤ੍ਥਿ. ਤੇਨੇਵਸ੍ਸ ਏਕਤ੍ਤਨਾਨਤ੍ਤਪਞ੍ਹਸ੍ਸ ਠਪਨੀਯਤਂ ਵਦਨ੍ਤੋ ਨ ਨਿਗ੍ਗਹੇਤਬ੍ਬੋਤਿ ਸਕਵਾਦਿਨਾ ਪਟਿਕ੍ਖੇਪੋ ਕਤੋਤਿ ਅਯਮੇਤ੍ਥ ਅਧਿਪ੍ਪਾਯੋ ਯੁਤ੍ਤੋ.

ਸੁਦ੍ਧਿਕਸਂਸਨ੍ਦਨਵਣ੍ਣਨਾ ਨਿਟ੍ਠਿਤਾ.

੬. ਓਪਮ੍ਮਸਂਸਨ੍ਦਨਵਣ੍ਣਨਾ

੨੮-੩੬. ਉਪਲਦ੍ਧਿਸਾਮਞ੍ਞੇਨ ਅਞ੍ਞਤ੍ਤਪੁਚ੍ਛਾ ਚਾਤਿ ਇਦਞ੍ਚ ਦ੍ਵਿਨ੍ਨਂ ਸਮਾਨਤਾ ਨੋ ਅਞ੍ਞਤ੍ਤਸ੍ਸ ਕਾਰਣਂ ਯੁਤ੍ਤਂ, ਅਥ ਖੋ ਵਿਸੁਂ ਅਤ੍ਤਨੋ ਸਭਾਵੇਨ ਸਚ੍ਚਿਕਟ੍ਠਪਰਮਤ੍ਥੇਨ ਉਪਲਬ੍ਭਨੀਯਤਾਤਿ ਵਿਚਾਰੇਤਬ੍ਬਂ. ‘‘ਏਕਵੀਸਾਧਿਕਾਨੀ’’ਤਿ ਪੁਰਿਮਪਾਠੋ, ਵੀਸਾਧਿਕਾਨੀਤਿ ਪਨ ਪਠਿਤਬ੍ਬਂ.

੩੭-੪੫. ‘‘ਅਤ੍ਥਿ ਪੁਗ੍ਗਲੋ’’ਤਿ ਸੁਤ੍ਤਂ ਅਨੁਜਾਨਾਪੇਨ੍ਤੇਨ ਉਪਲਦ੍ਧਿ ਅਨੁਜਾਨਿਤਾ ਹੋਤੀਤਿ ਮਞ੍ਞਮਾਨੋ ਆਹ ‘‘ਉਪਲਦ੍ਧਿਸਾਮਞ੍ਞਂ ਆਰੋਪੇਤ੍ਵਾ’’ਤਿ. ਵੀਸਾਧਿਕਾਨਿ ਨਵ ਪਟਿਕਮ੍ਮਪਞ੍ਚਕਸਤਾਨਿ ਦਸ੍ਸਿਤਾਨੀਤਿ ਏਤੇਨ ਸੁਦ੍ਧਿਕਸਂਸਨ੍ਦਨੇਪਿ ‘‘ਆਜਾਨਾਹਿ ਪਟਿਕਮ੍ਮ’’ਮਿਚ੍ਚੇਵ ਪਾਠੋਤਿ ਵਿਞ੍ਞਾਯਤਿ. ਯਞ੍ਚ ਵਾਦਮੁਖੇਸੁ ਸੁਦ੍ਧਿਕਸਚ੍ਚਿਕਟ੍ਠੇ ‘‘ਪਟਿਕਮ੍ਮਚਤੁਕ੍ਕ’’ਨ੍ਤਿ ਵੁਤ੍ਤਂ, ਤਮ੍ਪਿ ‘‘ਪਟਿਕਮ੍ਮਪਞ੍ਚਕ’’ਨ੍ਤਿ.

ਓਪਮ੍ਮਸਂਸਨ੍ਦਨਵਣ੍ਣਨਾ ਨਿਟ੍ਠਿਤਾ.

੭. ਚਤੁਕ੍ਕਨਯਸਂਸਨ੍ਦਨਵਣ੍ਣਨਾ

੪੬-੫੨. ਏਕਧਮ੍ਮਤੋਪਿ ਅਞ੍ਞਤ੍ਤਂ ਅਨਿਚ੍ਛਨ੍ਤੋ ਰੂਪਾਦਿਏਕੇਕਧਮ੍ਮਵਸੇਨ ਨਾਨੁਯੁਞ੍ਜਿਤਬ੍ਬੋ. ਸਮੁਦਾਯਤੋ ਹਿ ਅਯਂ ਅਞ੍ਞਤ੍ਤਂ ਅਨਿਚ੍ਛਨ੍ਤੋ ਏਕਦੇਸਤੋ ਅਨਞ੍ਞਤ੍ਤਂ ਪਟਿਕ੍ਖਿਪਨ੍ਤੋ ਨ ਨਿਗ੍ਗਹਾਰਹੋ ਸਿਯਾਤਿ ਏਤਂ ਵਚਨੋਕਾਸਂ ਨਿਵਤ੍ਤੇਤੁਂ ‘‘ਅਯਞ੍ਚ ਅਨੁਯੋਗੋ’’ਤਿਆਦਿਮਾਹ. ਸਕਲਨ੍ਤਿ ਸਤ੍ਤਪਞ੍ਞਾਸਵਿਧੋ ਧਮ੍ਮਪ੍ਪਭੇਦੋ ਪੁਗ੍ਗਲੋਤਿ ਵਾ ਪਰਮਤ੍ਥਸਚ੍ਚਂ ਪੁਗ੍ਗਲੋਤਿ ਵਾ ਏਵਂ ਸਕਲਂ ਸਨ੍ਧਾਯਾਤਿ ਅਤ੍ਥੋ. ਏਵਂ ਸਕਲਂ ਪਰਮਤ੍ਥਂ ਚਿਨ੍ਤੇਤ੍ਵਾ ਤਨ੍ਤਿਵਸੇਨ ਅਨੁਯੋਗਲਕ੍ਖਣਸ੍ਸ ਠਪਿਤਤ੍ਤਾ ਸਕਲਪਰਮਤ੍ਥਤੋ ਚ ਅਞ੍ਞਸ੍ਸ ਸਚ੍ਚਿਕਟ੍ਠਸ੍ਸ ਅਭਾਵਾ ਸਚ੍ਚਿਕਟ੍ਠੇਨ ਪੁਗ੍ਗਲੇਨ ਤਤੋ ਅਞ੍ਞੇਨ ਨ ਭਵਿਤਬ੍ਬਨ੍ਤਿ ‘‘ਰੂਪਂ ਪੁਗ੍ਗਲੋ’’ਤਿ ਇਮਂ ਪਞ੍ਹਂ ਪਟਿਕ੍ਖਿਪਨ੍ਤਸ੍ਸ ਨਿਗ੍ਗਹਾਰੋਪਨਂ ਯੁਤ੍ਤਨ੍ਤਿ ਅਤ੍ਥੋ.

ਸਭਾਗਵਿਨਿਬ੍ਭੋਗਤੋਤਿ ਰੂਪਤੋ ਅਞ੍ਞਸਭਾਗਤ੍ਤਾਤਿ ਵੁਤ੍ਤਂ ਹੋਤਿ. ਸਬ੍ਬਧਮ੍ਮਾਤਿ ਰੂਪਵਜ੍ਜੇ ਸਬ੍ਬਧਮ੍ਮੇ ਵਦਤਿ. ‘‘ਰੂਪਸ੍ਮਿਂ ਪੁਗ੍ਗਲੋ’’ਤਿ ਏਤ੍ਥ ਨਿਸ੍ਸਯਵਿਨਾਸੇ ਵਿਨਾਸਾਪਤ੍ਤਿਭਯੇਨ ਪਟਿਕ੍ਖਿਪਤੀਤਿ ਅਧਿਪ੍ਪਾਯੇਨਾਹ ‘‘ਉਚ੍ਛੇਦਦਿਟ੍ਠਿਭਯੇਨ ਚੇਵਾ’’ਤਿ. ਤੀਸੁ ਪਨ ਸਮਯਵਿਰੋਧੇਨ ਪਟਿਕ੍ਖੇਪੋ ਅਧਿਪ੍ਪੇਤੋ. ਨ ਹਿ ਸੋ ਸਕ੍ਕਾਯਦਿਟ੍ਠਿਂ ਇਚ੍ਛਤਿ, ਅਪਿਚ ਸਸ੍ਸਤਦਿਟ੍ਠਿਭਯੇਨ ਪਟਿਕ੍ਖਿਪਤੀਤਿ ਯੁਤ੍ਤਂ ਵਤ੍ਤੁਂ. ਸਕ੍ਕਾਯਦਿਟ੍ਠੀਸੁ ਹਿ ਪਞ੍ਚੇਵ ਉਚ੍ਛੇਦਦਿਟ੍ਠਿਯੋ, ਸੇਸਾਸਸ੍ਸਤਦਿਟ੍ਠਿਯੋਤਿ. ਅਞ੍ਞਤ੍ਰ ਰੂਪਾਤਿ ਏਤ੍ਥ ਚ ਰੂਪਵਾ ਪੁਗ੍ਗਲੋਤਿ ਅਯਮਤ੍ਥੋ ਸਙ੍ਗਹਿਤੋਤਿ ਵੇਦਿਤਬ੍ਬੋ.

ਚਤੁਕ੍ਕਨਯਸਂਸਨ੍ਦਨਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤਾ ਚ ਸਂਸਨ੍ਦਨਕਥਾਵਣ੍ਣਨਾ.

੮. ਲਕ੍ਖਣਯੁਤ੍ਤਿਵਣ੍ਣਨਾ

੫੪. ਪਚ੍ਚਨੀਕਾਨੁਲੋਮੇਤਿ ਇਦਂ ਯਂ ਵਕ੍ਖਤਿ ‘‘ਛਲਵਸੇਨ ਪਨ ਵਤ੍ਤਬ੍ਬਂ ‘ਆਜਾਨਾਹਿ ਪਟਿਕਮ੍ਮ’ਨ੍ਤਿਆਦੀ’’ਤਿ (ਕਥਾ. ਅਟ੍ਠ. ੫੪), ਤੇਨ ਪਨ ਨ ਸਮੇਤਿ. ਪਚ੍ਚਨੀਕਾਨੁਲੋਮੇ ਹਿ ਪਚ੍ਚਨੀਕੇ ‘‘ਆਜਾਨਾਹਿ ਨਿਗ੍ਗਹ’’ਨ੍ਤਿ ਵਤ੍ਤਬ੍ਬਂ, ਨ ਪਨ ‘‘ਪਟਿਕਮ੍ਮ’’ਨ੍ਤਿ.

ਲਕ੍ਖਣਯੁਤ੍ਤਿਵਣ੍ਣਨਾ ਨਿਟ੍ਠਿਤਾ.

੯. ਵਚਨਸੋਧਨਵਣ੍ਣਨਾ

੫੫-੫੯. ਪੁਗ੍ਗਲੋ ਉਪਲਬ੍ਭਤੀਤਿ ਪਦਦ੍ਵਯਸ੍ਸ ਅਤ੍ਥਤੋ ਏਕਤ੍ਤੇਤਿ ਏਤ੍ਥ ਤਦੇਵ ਏਕਤ੍ਤਂ ਪਰੇਨ ਸਮ੍ਪਟਿਚ੍ਛਿਤਂ ਅਸਮ੍ਪਟਿਚ੍ਛਿਤਨ੍ਤਿ ਵਿਚਾਰੇਤਬ੍ਬਮੇਤਂ. ਪੁਗ੍ਗਲਸ੍ਸ ਹਿ ਅਵਿਭਜਿਤਬ੍ਬਤਂ, ਉਪਲਬ੍ਭਤੀਤਿ ਏਤਸ੍ਸ ਵਿਭਜਿਤਬ੍ਬਤਂ ਵਦਨ੍ਤੋ ਵਿਭਜਿਤਬ੍ਬਾਵਿਭਜਿਤਬ੍ਬਤ੍ਥਾਨਂ ਉਪਲਬ੍ਭਤਿਪੁਗ੍ਗਲ-ਸਦ੍ਦਾਨਂ ਕਥਂ ਅਤ੍ਥਤੋ ਏਕਤ੍ਤਂ ਸਮ੍ਪਟਿਚ੍ਛੇਯ੍ਯਾਤਿ? ਯਥਾ ਚ ਵਿਭਜਿਤਬ੍ਬਾਵਿਭਜਿਤਬ੍ਬਤ੍ਥਾਨਂ ਉਪਲਬ੍ਭਤਿ-ਰੂਪ-ਸਦ੍ਦਾਨਂ ਤਂ ਵਿਭਾਗਂ ਵਦਤੋ ਰੂਪਂ ਕਿਞ੍ਚਿ ਉਪਲਬ੍ਭਤਿ, ਕਿਞ੍ਚਿ ਨ ਉਪਲਬ੍ਭਤੀਤਿ ਅਯਂ ਪਸਙ੍ਗੋ ਨਾਪਜ੍ਜਤਿ, ਏਵਂ ਏਤਸ੍ਸਪਿ ਯਥਾਵੁਤ੍ਤਵਿਭਾਗਂ ਵਦਤੋ ਯਥਾਆਪਾਦਿਤੇਨ ਪਸਙ੍ਗੇਨ ਨ ਭਵਿਤਬ੍ਬਨ੍ਤਿ ਮਗ੍ਗਿਤਬ੍ਬੋ ਏਤ੍ਥ ਅਧਿਪ੍ਪਾਯੋ.

੬੦. ‘‘ਸੁਞ੍ਞਤੋ ਲੋਕਂ ਅਵੇਕ੍ਖਸ੍ਸੂ’’ਤਿ (ਸੁ. ਨਿ. ੧੧੨੫) ਏਤੇਨ ਅਤ੍ਥਤੋ ਪੁਗ੍ਗਲੋ ਨਤ੍ਥੀਤਿ ਵੁਤ੍ਤਂ ਹੋਤੀਤਿ ਆਹ ‘‘ਨਤ੍ਥੀਤਿਪਿ ਵੁਤ੍ਤ’’ਨ੍ਤਿ.

ਵਚਨਸੋਧਨਵਣ੍ਣਨਾ ਨਿਟ੍ਠਿਤਾ.

੧੦. ਪਞ੍ਞਤ੍ਤਾਨੁਯੋਗਵਣ੍ਣਨਾ

੬੧-੬੬. ਰੂਪਕਾਯਾਵਿਰਹਂ ਸਨ੍ਧਾਯ ‘‘ਰੂਪਕਾਯਸਬ੍ਭਾਵਤੋ’’ਤਿ ਆਹ. ‘‘ਰੂਪਿਨੋ ਵਾ ਅਰੂਪਿਨੋ ਵਾ’’ਤਿ (ਇਤਿਵੁ. ੯੦) ਸੁਤ੍ਤੇ ਆਗਤਪਞ੍ਞਤ੍ਤਿਂ ਸਨ੍ਧਾਯ ‘‘ਤਥਾਰੂਪਾਯ ਚ ਪਞ੍ਞਤ੍ਤਿਯਾ ਅਤ੍ਥਿਤਾਯਾ’’ਤਿ. ਵੀਤਰਾਗਸਬ੍ਭਾਵਤੋਤਿ ਕਾਮੀਭਾਵਸ੍ਸ ਅਨੇਕਨ੍ਤਿਕਤ੍ਤਾ ਕਾਮਧਾਤੁਯਾ ਆਯਤ੍ਤਤ੍ਤਾਭਾਵਤੋ ਚ ‘‘ਕਾਮੀ’’ਤਿ ਨ ਵਤ੍ਤਬ੍ਬੋਤਿ ਪਟਿਕ੍ਖਿਪਤੀਤਿ ਅਧਿਪ੍ਪਾਯੋ.

੬੭. ਕਾਯਾਨੁਪਸ੍ਸਨਾਯਾਤਿ ਕਾਰਣਵਚਨਮੇਤਂ, ਕਾਯਾਨੁਪਸ੍ਸਨਾਯ ਕਾਰਣਭੂਤਾਯ ਏਵਂਲਦ੍ਧਿਕਤ੍ਤਾਤਿ ਅਤ੍ਥੋ. ਆਹਚ੍ਚ ਭਾਸਿਤਨ੍ਤਿ ‘‘ਅਞ੍ਞਂ ਜੀਵਂ ਅਞ੍ਞਂ ਸਰੀਰਨ੍ਤਿ ਅਬ੍ਯਾਕਤਮੇਤਂ ਮਯਾ’’ਤਿ (ਮ. ਨਿ. ੨.੧੨੮) ਆਹਚ੍ਚ ਭਾਸਿਤਂ.

ਪਞ੍ਞਤ੍ਤਾਨੁਯੋਗਵਣ੍ਣਨਾ ਨਿਟ੍ਠਿਤਾ.

੧੧. ਗਤਿਅਨੁਯੋਗਵਣ੍ਣਨਾ

੬੯-੭੨. ‘‘ਦਸ੍ਸੇਨ੍ਤੋ ‘ਤੇਨ ਹਿ ਪੁਗ੍ਗਲੋ ਸਨ੍ਧਾਵਤੀ’ਤਿਆਦਿਮਾਹਾ’’ਤਿ ਵੁਤ੍ਤਂ, ‘‘ਦਸ੍ਸੇਨ੍ਤੋ ‘ਨ ਵਤ੍ਤਬ੍ਬਂ ਪੁਗ੍ਗਲੋ ਸਨ੍ਧਾਵਤੀ’ਤਿਆਦਿਮਾਹਾ’’ਤਿ ਪਨ ਭਵਿਤਬ੍ਬਂ, ਦਸ੍ਸੇਤ੍ਵਾਤਿ ਵਾ ਵਤ੍ਤਬ੍ਬਂ.

੯੧. ਯੇਨ ਰੂਪਸਙ੍ਖਾਤੇਨ ਸਰੀਰੇਨ ਸਦ੍ਧਿਂ ਗਚ੍ਛਤੀਤਿ ਏਤ੍ਥ ‘‘ਰੂਪੇਨ ਸਦ੍ਧਿਂ ਗਚ੍ਛਤੀ’’ਤਿ ਵਦਨ੍ਤੇਨ ‘‘ਰੂਪਂ ਪੁਗ੍ਗਲੋ’’ਤਿ ਅਨਨੁਞ੍ਞਾਤਤ੍ਤਾ ਯੇਨਾਕਾਰੇਨ ਤਂ ਜੀਵਂ ਤਂ ਸਰੀਰਨ੍ਤਿ ਇਦਂ ਆਪਜ੍ਜਤਿ, ਸੋ ਵਤ੍ਤਬ੍ਬੋ. ਅਸਞ੍ਞੂਪਪਤ੍ਤਿਂ ਸਨ੍ਧਾਯਾਤਿ ਨਿਰਯੂਪਗਸ੍ਸ ਪੁਗ੍ਗਲਸ੍ਸ ਅਸਞ੍ਞੂਪਗਸ੍ਸ ਅਰੂਪੂਪਗਸ੍ਸ ਚ ਅਨ੍ਤਰਾਭਵਂ ਨ ਇਚ੍ਛਤੀਤਿ ਚੁਤਿਤੋ ਅਨਨ੍ਤਰਂ ਉਪਪਤ੍ਤਿਂ ਸਨ੍ਧਾਯਾਤਿ ਅਤ੍ਥੋ ਦਟ੍ਠਬ੍ਬੋ. ਯੇ ਪਨ ਚੁਤਿਕਾਲੇ ਉਪਪਤ੍ਤਿਕਾਲੇ ਚ ਅਸਞ੍ਞੂਪਪਤ੍ਤਿਕਾਲੇ ਚ ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥੀਤਿ ਗਹੇਤ੍ਵਾ ਅਸਞ੍ਞੂਪਗਸ੍ਸ ਚ ਅਨ੍ਤਰਾਭਵਂ ਇਚ੍ਛੇਯ੍ਯੁਂ, ਤੇਸਂ ਅਨ੍ਤਰਾਭਵਭਾਵਤੋ ‘‘ਅਸਞ੍ਞੂਪਪਤ੍ਤਿ ਅਵੇਦਨਾ’’ਤਿ ਨ ਸਕ੍ਕਾ ਵਤ੍ਤੁਨ੍ਤਿ.

੯੨. ਅਵੇਦਨੋਤਿਆਦੀਸੁ ਤਦਞ੍ਞਨ੍ਤਿ ਸਞ੍ਞਭਵਤੋ ਅਞ੍ਞਂ ਅਸਞ੍ਞਾਨੇਵਸਞ੍ਞਾਨਾਸਞ੍ਞਾਯਤਨੁਪਪਤ੍ਤਿਂ. ਨੇਵਸਞ੍ਞਾਨਾਸਞ੍ਞਾਯਤਨੇਪਿ ਹਿ ਨ ਵਤ੍ਤਬ੍ਬਂ ਸਞ੍ਞਾ ਅਤ੍ਥੀਤਿ ਇਚ੍ਛਨ੍ਤਿ.

੯੩. ਯਸ੍ਮਾ ਰੂਪਾਦਿਧਮ੍ਮੇ ਵਿਨਾ ਪੁਗ੍ਗਲੋ ਨਤ੍ਥੀਤਿ ਇਨ੍ਧਨੁਪਾਦਾਨੋ ਅਗ੍ਗਿ ਵਿਯ ਇਨ੍ਧਨੇਨ ਰੂਪਾਦਿਉਪਾਦਾਨੋ ਪੁਗ੍ਗਲੋ ਰੂਪਾਦਿਨਾ ਵਿਨਾ ਨਤ੍ਥੀਤਿ ਲਦ੍ਧਿਵਸੇਨ ਵਦਤਿ.

ਗਤਿਅਨੁਯੋਗਵਣ੍ਣਨਾ ਨਿਟ੍ਠਿਤਾ.

੧੨. ਉਪਾਦਾਪਞ੍ਞਤ੍ਤਾਨੁਯੋਗਵਣ੍ਣਨਾ

੯੭. ਨੀਲਂ ਰੂਪਂ ਉਪਾਦਾਯ ਨੀਲੋਤਿਆਦੀਸੂਤਿ ‘‘ਨੀਲਂ ਰੂਪਂ ਉਪਾਦਾਯ ਨੀਲਕਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀ’’ਤਿ ਏਤ੍ਥ ਯੋ ਪੁਟ੍ਠੋ ਨੀਲਂ ਉਪਾਦਾਯ ਨੀਲੋਤਿ, ਤਦਾਦੀਸੂਤਿ ਅਤ੍ਥੋ.

੯੮. ਛੇਕਟ੍ਠਂ ਸਨ੍ਧਾਯਾਤਿ ਛੇਕਟ੍ਠਂ ਸਨ੍ਧਾਯ ਵੁਤ੍ਤਂ, ਨ ਕੁਸਲਪਞ੍ਞਤ੍ਤਿਂ. ‘‘ਕੁਸਲਂ ਵੇਦਨਂ ਉਪਾਦਾਯਾ’’ਤਿ ਮਞ੍ਞਮਾਨੋ ਪਟਿਜਾਨਾਤੀਤਿ ਅਤ੍ਥੋ ਦਟ੍ਠਬ੍ਬੋ.

੧੧੨. ਇਦਾਨਿ …ਪੇ… ਦਸ੍ਸੇਤੁਂ ‘‘ਯਥਾ ਰੁਕ੍ਖ’’ਨ੍ਤਿਆਦਿਮਾਹਾਤਿ ਪੁਬ੍ਬਪਕ੍ਖਂ ਦਸ੍ਸੇਤ੍ਵਾ ਉਤ੍ਤਰਮਾਹਾਤਿ ਵੁਤ੍ਤਂ ਹੋਤਿ.

੧੧੫. ‘‘ਯਸ੍ਸ ਰੂਪਂ ਸੋ ਰੂਪਵਾ’’ਤਿ ਉਤ੍ਤਰਪਕ੍ਖੇ ਵੁਤ੍ਤਂ ਵਚਨਂ ਉਦ੍ਧਰਿਤ੍ਵਾ ‘‘ਯਸ੍ਮਾ’’ਤਿਆਦਿਮਾਹ.

੧੧੬. ਚਿਤ੍ਤਾਨੁਪਸ੍ਸਨਾਵਸੇਨਾਤਿ ਚਿਤ੍ਤਾਨੁਪਸ੍ਸਨਾਵਸੇਨ ਪਰਿਦੀਪਿਤਸ੍ਸ ਸਰਾਗਾਦਿਚਿਤ੍ਤਯੋਗਸ੍ਸ ਵਸੇਨਾਤਿ ਅਧਿਪ੍ਪਾਯੋ.

੧੧੮. ਯੇਨਾਤਿ ਚਕ੍ਖੁਨ੍ਤਿ ‘‘ਯੇਨਾ’’ਤਿ ਵੁਤ੍ਤਂ ਕਰਣਂ ਚਕ੍ਖੁਨ੍ਤਿ ਅਤ੍ਥੋ. ਚਕ੍ਖੁਮੇਵ ਰੂਪਂ ਪਸ੍ਸਤੀਤਿ ਵਿਞ੍ਞਾਣਨਿਸ੍ਸਯਭਾਵੂਪਗਮਨਮੇਵ ਚਕ੍ਖੁਸ੍ਸ ਦਸ੍ਸਨਂ ਨਾਮ ਹੋਤੀਤਿ ਸਨ੍ਧਾਯ ਵਦਤਿ.

ਉਪਾਦਾਪਞ੍ਞਤ੍ਤਾਨੁਯੋਗਵਣ੍ਣਨਾ ਨਿਟ੍ਠਿਤਾ.

੧੩. ਪੁਰਿਸਕਾਰਾਨੁਯੋਗਵਣ੍ਣਨਾ

੧੨੩. ਕਰਣਮਤ੍ਤਨ੍ਤਿ ਕਮ੍ਮਾਨਂ ਨਿਪ੍ਫਾਦਕਪ੍ਪਯੋਜਕਭਾਵੇਨ ਪਵਤ੍ਤਾ ਖਨ੍ਧਾ.

੧੨੪. ਪੁਰਿਮਕਮ੍ਮੇਨ ਵਿਨਾ ਪੁਗ੍ਗਲਸ੍ਸ ਜਾਤਿ, ਜਾਤਸ੍ਸ ਚ ਵਿਜ੍ਜਟ੍ਠਾਨਾਦੀਸੁ ਸਮ੍ਮਾ ਮਿਚ੍ਛਾ ਵਾ ਪਵਤ੍ਤਿ ਨਤ੍ਥੀਤਿ ਸਨ੍ਧਾਯ ‘‘ਪੁਰਿਮਕਮ੍ਮਮੇਵ ਤਸ੍ਸਾ’’ਤਿਆਦਿਮਾਹ.

੧੨੫. ਕਮ੍ਮਵਟ੍ਟਸ੍ਸਾਤਿ ਏਤ੍ਥ ਕਮ੍ਮਕਾਰਕਸ੍ਸ ਯੋ ਕਾਰਕੋ, ਤੇਨਪਿ ਅਞ੍ਞਂ ਕਮ੍ਮਂ ਕਾਤਬ੍ਬਂ, ਤਸ੍ਸ ਕਾਰਕੇਨਪਿ ਅਞ੍ਞਨ੍ਤਿ ਏਵਂ ਕਮ੍ਮਵਟ੍ਟਸ੍ਸ ਅਨੁਪਚ੍ਛੇਦਂ ਵਦਨ੍ਤਿ. ਪੁਗ੍ਗਲਸ੍ਸ ਕਾਰਕੋ ਕਮ੍ਮਸ੍ਸ ਕਾਰਕੋ ਆਪਜ੍ਜਤੀਤਿ ਵਿਚਾਰੇਤਬ੍ਬਮੇਤਂ. ਮਾਤਾਪਿਤੂਹਿ ਜਨਿਤਤਾਦਿਨਾ ਤਸ੍ਸ ਕਾਰਕਂ ਇਚ੍ਛਨ੍ਤਸ੍ਸ ਕਮ੍ਮਕਾਰਕਾਨਂ ਕਾਰਕਪਰਮ੍ਪਰਾ ਆਪਜ੍ਜਤੀਤਿ ਇਦਞ੍ਚ ਵਿਚਾਰੇਤਬ੍ਬਂ.

੧੭੦. ਸੁਤ੍ਤਵਿਰੋਧਭਯੇਨਾਤਿ ‘‘ਸੋ ਕਰੋਤਿ ਸੋ ਪਟਿਸਂਵੇਦਯਤੀਤਿ ਖੋ, ਬ੍ਰਾਹ੍ਮਣ, ਅਯਮੇਕੋ ਅਨ੍ਤੋ’’ਤਿਆਦੀਹਿ (ਸਂ. ਨਿ. ੨.੪੬) ਵਿਰੋਧਭਯਾ.

੧੭੧. ‘‘ਇਧ ਨਨ੍ਦਤਿ ਪੇਚ੍ਚ ਨਨ੍ਦਤੀ’’ਤਿ (ਧ. ਪ. ੧੮) ਵਚਨਤੋ ਕਮ੍ਮਕਰਣਕਾਲੇ ਵਿਪਾਕਪਟਿਸਂਵੇਦਨਕਾਲੇ ਚ ਸੋਯੇਵਾਤਿ ਪਟਿਜਾਨਾਤੀਤਿ ਅਧਿਪ੍ਪਾਯੋ. ਸਯਂਕਤਂ ਸੁਖਦੁਕ੍ਖਨ੍ਤਿ ਚ ਪੁਟ੍ਠੋ ‘‘ਕਿਂ ਨੁ ਖੋ, ਭੋ ਗੋਤਮ, ਸਯਂਕਤਂ ਸੁਖਂ ਦੁਕ੍ਖਨ੍ਤਿ? ਮਾ ਹੇਵਂ ਕਸ੍ਸਪਾ’’ਤਿਆਦਿਸੁਤ੍ਤਵਿਰੋਧਾ (ਸਂ. ਨਿ. ੨.੧੮) ਪਟਿਕ੍ਖਿਪਤਿ.

੧੭੬. ਲਦ੍ਧਿਮਤ੍ਤਮੇਵੇਤਨ੍ਤਿ ਸੋਯੇਵੇਕੋ ਨੇਵ ਸੋ ਹੋਤਿ ਨ ਅਞ੍ਞੋਤਿ ਇਦਂ ਪਨ ਨਤ੍ਥੇਵ, ਤਸ੍ਮਾ ਏਵਂਵਾਦਿਨੋ ਅਸਯਂਕਾਰਨ੍ਤਿਆਦਿ ਆਪਜ੍ਜਤੀਤਿ ਅਧਿਪ੍ਪਾਯੋ. ਅਪਿਚਾਤਿਆਦਿਨਾ ਇਦਂ ਦਸ੍ਸੇਤਿ – ਨ ਪਰਸ੍ਸ ਇਚ੍ਛਾਵਸੇਨੇਵ ‘‘ਸੋ ਕਰੋਤੀ’’ਤਿਆਦਿ ਅਨੁਯੋਗੋ ਵੁਤ੍ਤੋ, ਅਥ ਖੋ ‘‘ਸੋ ਕਰੋਤੀ’’ਤਿਆਦੀਸੁ ਏਕਂ ਅਨਿਚ੍ਛਨ੍ਤਸ੍ਸ ਇਤਰਂ, ਤਞ੍ਚ ਅਨਿਚ੍ਛਨ੍ਤਸ੍ਸ ਅਞ੍ਞਂ ਆਪਨ੍ਨਨ੍ਤਿ ਏਵਂ ਕਾਰਕਵੇਦਕਿਚ੍ਛਾਯ ਠਤ੍ਵਾ ‘‘ਸੋ ਕਰੋਤੀ’’ਤਿਆਦੀਸੁ ਤਂ ਤਂ ਅਨਿਚ੍ਛਾਯ ਆਪਨ੍ਨਵਸੇਨਾਪੀਤਿ. ਅਥ ਵਾ ਨ ਕੇਵਲਂ ‘‘ਸੋ ਕਰੋਤੀ’’ਤਿਆਦੀਨਂ ਸਬ੍ਬੇਸਂ ਆਪਨ੍ਨਤ੍ਤਾ, ਅਥ ਖੋ ਏਕੇਕਸ੍ਸੇਵ ਚ ਆਪਨ੍ਨਤ੍ਤਾ ਅਯਂ ਅਨੁਯੋਗੋ ਕਤੋਤਿ ਦਸ੍ਸੇਤਿ. ਪੁਰਿਮਨਯੇਨੇਵਾਤਿ ਏਤੇਨ ‘‘ਇਧ ਨਨ੍ਦਤੀ’’ਤਿਆਦਿ ਸਬ੍ਬਂ ਪਟਿਜਾਨਨਾਦਿਕਾਰਣਂ ਏਕਤੋ ਯੋਜੇਤਬ੍ਬਨ੍ਤਿ ਦਸ੍ਸੇਤਿ.

ਪੁਰਿਸਕਾਰਾਨੁਯੋਗਵਣ੍ਣਨਾ ਨਿਟ੍ਠਿਤਾ.

ਕਲ੍ਯਾਣਵਗ੍ਗੋ ਨਿਟ੍ਠਿਤੋ.

੧੪. ਅਭਿਞ੍ਞਾਨੁਯੋਗਵਣ੍ਣਨਾ

੧੯੩. ਅਭਿਞ੍ਞਾਨੁਯੋਗਾਦਿਵਸੇਨ ਅਰਹਤ੍ਤਸਾਧਨਾਤਿ ਏਤ੍ਥ ‘‘ਨਨੁ ਅਤ੍ਥਿ ਕੋਚਿ ਇਦ੍ਧਿਂ ਵਿਕੁਬ੍ਬਤੀ’’ਤਿ ਅਭਿਞ੍ਞਾਅਨੁਯੋਗੋ ਚ ‘‘ਹਞ੍ਚਿ ਅਤ੍ਥਿ ਕੋਚਿ ਇਦ੍ਧਿਂ ਵਿਕੁਬ੍ਬਤੀ’’ਤਿ ਠਪਨਾ ਚ ‘‘ਤੇਨ ਵਤ ਰੇ’’ਤਿਆਦਿ ਪਾਪਨਾ ਚ ਆਦਿਸਦ੍ਦਸਙ੍ਗਹਿਤੋ ਅਤ੍ਥੋਵ ਦਟ੍ਠਬ੍ਬੋ. ਆਸਵਕ੍ਖਯਞਾਣਂ ਪਨੇਤ੍ਥ ਅਭਿਞ੍ਞਾ ਵੁਤ੍ਤਾਤਿ ਤਦਭਿਞ੍ਞਾਵਤੋ ਅਰਹਤੋ ਸਾਧਨਂ ‘‘ਅਰਹਤ੍ਤਸਾਧਨਾ’’ਤਿ ਆਹ. ਅਰਹਤੋ ਹਿ ਸਾਧਨਾ ਤਬ੍ਭਾਵਸ੍ਸ ਚ ਸਾਧਨਾ ਹੋਤਿਯੇਵਾਤਿ.

ਅਭਿਞ੍ਞਾਨੁਯੋਗਵਣ੍ਣਨਾ ਨਿਟ੍ਠਿਤਾ.

੧੫-੧੮. ਞਾਤਕਾਨੁਯੋਗਾਦਿਵਣ੍ਣਨਾ

੨੦੯. ਤਥਾਰੂਪਸ੍ਸਾਤਿ ਤਤਿਯਕੋਟਿਭੂਤਸ੍ਸ ਸਚ੍ਚਿਕਟ੍ਠਸ੍ਸ ਅਭਾਵਾਤਿ ਅਧਿਪ੍ਪਾਯੋ. ਏਵਂ ਪਨ ਪਟਿਕ੍ਖਿਪਨ੍ਤੋ ਅਸਚ੍ਚਿਕਟ੍ਠਂ ਤਤਿਯਕੋਟਿਭੂਤਂ ਪੁਗ੍ਗਲਂ ਵਦੇਯ੍ਯਾਤਿ ਤਾਦਿਸਂ ਪੁਗ੍ਗਲਂ ਇਚ੍ਛਨ੍ਤੋ ਹਿ ਸੁਤ੍ਤੇਨ ਨਿਗ੍ਗਹੇਤਬ੍ਬੋ ਸਿਯਾ. ਕਸ੍ਮਾ? ਤਥਾਰੂਪਸ੍ਸ ਸਚ੍ਚਿਕਟ੍ਠਸ੍ਸ ਅਭਾਵਤੋਤਿ, ਤਥਾਰੂਪਸ੍ਸ ਕਸ੍ਸਚਿ ਸਭਾਵਸ੍ਸ ਅਭਾਵਤੋ ਪਟਿਕ੍ਖੇਪਾਰਹਤ੍ਤਾ ਅਤ੍ਤਨੋ ਲਦ੍ਧਿਂ ਨਿਗੂਹਿਤ੍ਵਾ ਪਟਿਕ੍ਖੇਪੋ ਪਰਵਾਦਿਸ੍ਸਾਤਿ ਅਯਮਤ੍ਥੋ ਦਟ੍ਠਬ੍ਬੋ.

ਞਾਤਕਾਨੁਯੋਗਾਦਿਵਣ੍ਣਨਾ ਨਿਟ੍ਠਿਤਾ.

੧੯. ਪਟਿਵੇਧਾਨੁਯੋਗਾਦਿਵਣ੍ਣਨਾ

੨੧੮. ਪਰਿਗ੍ਗਹਿਤਵੇਦਨੋਤਿ ਵਚਨੇਨ ਅਪਰਿਗ੍ਗਹਿਤਵੇਦਨਸ੍ਸ ‘‘ਸੁਖਿਤੋਸ੍ਮਿ, ਦੁਕ੍ਖਿਤੋਸ੍ਮੀ’’ਤਿ ਜਾਨਨਂ ਪਜਾਨਨਂ ਨਾਮ ਨ ਹੋਤੀਤਿ ਦਸ੍ਸੇਤਿ ਯੋਗਾਵਚਰਸ੍ਸ ਸੁਖੁਮਾਨਮ੍ਪਿ ਵੇਦਨਾਨਂ ਪਰਿਚ੍ਛੇਦਨਸਮਤ੍ਥਤਞ੍ਚ.

੨੨੮. ਲਕ੍ਖਣਵਚਨਨ੍ਤਿ ਰੂਪਬ੍ਭਨ੍ਤਰਗਮਨਂ ਸਹਰੂਪਭਾਵੋ, ਬਹਿਦ੍ਧਾ ਨਿਕ੍ਖਮਨਂ ਵਿਨਾਰੂਪਭਾਵੋਤਿ ਅਧਿਪ੍ਪਾਯੋ.

੨੩੭. ਇਮਾ ਖੋਤਿ ਓਲ਼ਾਰਿਕੋ ਅਤ੍ਤਪਟਿਲਾਭੋ ਮਨੋਮਯੋ ਅਤ੍ਤਪਟਿਲਾਭੋ ਅਰੂਪੋ ਅਤ੍ਤਪਟਿਲਾਭੋਤਿ ਇਮਾ ਲੋਕਸ੍ਸ ਸਮਞ੍ਞਾ, ਯਾਹਿ ਤਥਾਗਤੋ ਵੋਹਰਤਿ ਅਪਰਾਮਸਂ, ਯੋ ਸਚ੍ਚੋ ਮੋਘੋ ਵਾ ਸਿਯਾ, ਤਸ੍ਮਿਂ ਅਨੁਪਲਬ੍ਭਮਾਨੇਪਿ ਅਤ੍ਤਨਿ ਤਦਨੁਪਲਬ੍ਭਤੋਯੇਵ ਪਰਾਮਾਸਂ ਅਤ੍ਤਦਿਟ੍ਠਿਂ ਅਨੁਪ੍ਪਾਦੇਨ੍ਤੋ ਲੋਕੇ ਅਤ੍ਤਪਟਿਲਾਭੋਤਿ ਪਵਤ੍ਤਵੋਹਾਰਵਸੇਨੇਵ ਵੋਹਰਤੀਤਿ ਅਯਮੇਤ੍ਥ ਅਤ੍ਥੋ. ਏਤ੍ਥ ਚ ਪਚ੍ਚਤ੍ਤਸਾਮਞ੍ਞਲਕ੍ਖਣਵਸੇਨ ਪੁਗ੍ਗਲਸ੍ਸ ਅਤ੍ਥਿਤਂ ਪਟਿਕ੍ਖਿਪਿਤ੍ਵਾ ਲੋਕਵੋਹਾਰੇਨ ਅਤ੍ਥਿਤਂ ਵਦਨ੍ਤੇਨ ਪੁਗ੍ਗਲੋਤਿ ਕੋਚਿ ਸਭਾਵੋ ਨਤ੍ਥੀਤਿ ਵੁਤ੍ਤਂ ਹੋਤਿ. ਸਤਿ ਹਿ ਤਸ੍ਮਿਂ ਅਤ੍ਤਨੋ ਸਭਾਵੇਨੇਵ ਅਤ੍ਥਿਤਾ ਵਤ੍ਤਬ੍ਬਾ ਸਿਯਾ, ਨ ਲੋਕਵੋਹਾਰੇਨਾਤਿ. ਇਮਿਨਾ ਪਨ ਯਥਾ ਸਮੇਤਿ, ਯਥਾ ਚ ਪਰਾਮਾਸੋ ਨ ਹੋਤਿ, ਏਵਂ ਇਤੋ ਪੁਰਿਮਾ ਚ ਅਤ੍ਥਵਣ੍ਣਨਾ ਯੋਜੇਤਬ੍ਬਾ.

ਲੋਕਸਮ੍ਮੁਤਿਕਾਰਣਨ੍ਤਿ ਯਸ੍ਮਾ ਲੋਕਸਮ੍ਮੁਤਿਵਸੇਨ ਪਵਤ੍ਤਂ, ਤਸ੍ਮਾ ਸਚ੍ਚਨ੍ਤਿ ਵੁਤ੍ਤਂ ਹੋਤਿ. ਤਥਲਕ੍ਖਣਨ੍ਤਿ ਤਥਕਾਰਣਂ. ਯਸ੍ਮਾ ਧਮ੍ਮਾਨਂ ਤਥਤਾਯ ਪਵਤ੍ਤਂ, ਤਸ੍ਮਾ ਸਚ੍ਚਨ੍ਤਿ ਦਸ੍ਸੇਤਿ.

ਪਟਿਵੇਧਾਨੁਯੋਗਾਦਿਵਣ੍ਣਨਾ ਨਿਟ੍ਠਿਤਾ.

ਪੁਗ੍ਗਲਕਥਾਵਣ੍ਣਨਾ ਨਿਟ੍ਠਿਤਾ.

੨. ਪਰਿਹਾਨਿਕਥਾ

੧. ਵਾਦਯੁਤ੍ਤਿਪਰਿਹਾਨਿਕਥਾਵਣ੍ਣਨਾ

੨੩੯. ‘‘ਦ੍ਵੇਮੇ, ਭਿਕ੍ਖਵੇ, ਧਮ੍ਮਾ ਸੇਕ੍ਖਸ੍ਸ ਭਿਕ੍ਖੁਨੋ ਪਰਿਹਾਨਾਯ ਸਂਵਤ੍ਤਨ੍ਤੀ’’ਤਿ (ਅ. ਨਿ. ੨.੧੮੫) ਇਦਂ ਸੁਤ੍ਤਂ ਅਰਹਤੋ ਪਰਿਹਾਨਿਲਦ੍ਧਿਯਾ ਨ ਨਿਸ੍ਸਯੋ, ਅਥ ਖੋ ਅਨਾਗਾਮਿਆਦੀਨਂ ਪਰਿਹਾਨਿਲਦ੍ਧਿਯਾ, ਤਸ੍ਮਾ ਅਰਹਤੋਪਿ ਪਰਿਹਾਨਿਂ ਇਚ੍ਛਨ੍ਤੀਤਿ ਏਤ੍ਥ ਪਿ-ਸਦ੍ਦੇਨ ਅਨਾਗਾਮਿਸ੍ਸਪਿ ਸਕਦਾਗਾਮਿਸ੍ਸਪੀਤਿ ਯੋਜੇਤਬ੍ਬਂ.

‘‘ਤਤਿਯਸ੍ਮਿਮ੍ਪਿ ਮੁਦਿਨ੍ਦ੍ਰਿਯਾਵ ਅਧਿਪ੍ਪੇਤਾ. ਤੇਸਞ੍ਹਿ ਸਬ੍ਬੇਸਮ੍ਪਿ ਪਰਿਹਾਨਿ ਨ ਹੋਤੀਤਿ ਤਸ੍ਸ ਲਦ੍ਧੀ’’ਤਿ ਪੁਰਿਮਪਾਠੋ, ਮੁਦਿਨ੍ਦ੍ਰਿਯੇਸ੍ਵੇਵ ਪਨ ਅਧਿਪ੍ਪੇਤੇਸੁ ਪਰਿਕ੍ਖੇਪੋ ਨ ਕਾਤਬ੍ਬੋ ਸਿਯਾ, ਕਤੋ ਚ, ਤਸ੍ਮਾ ‘‘ਤਤਿਯਸ੍ਮਿਮ੍ਪਿ ਤਿਕ੍ਖਿਨ੍ਦ੍ਰਿਯਾਵ ਅਧਿਪ੍ਪੇਤਾ. ਤੇਸਞ੍ਹਿ ਸਬ੍ਬੇਸਮ੍ਪਿ ਪਰਿਹਾਨਿ ਨ ਹੋਤੀਤਿ ਤਸ੍ਸ ਲਦ੍ਧੀ’’ਤਿ ਪਠਨ੍ਤਿ.

ਅਯੋਨਿਸੋ ਅਤ੍ਥਂ ਗਹੇਤ੍ਵਾਤਿ ਸੋਤਾਪਨ੍ਨੋਯੇਵ ਨਿਯਤੋਤਿ ਵੁਤ੍ਤੋਤਿ ਸੋਯੇਵ ਨ ਪਰਿਹਾਯਤਿ, ਨ ਇਤਰੇਤਿ ਅਤ੍ਥਂ ਗਹੇਤ੍ਵਾ. ‘‘ਉਪਰਿਮਗ੍ਗਤ੍ਥਾਯਾ’’ਤਿ ਵੁਤ੍ਤਂ ਅਤ੍ਥਂ ਅਗ੍ਗਹੇਤ੍ਵਾ ਨਿਯਤੋਤਿ ਸੋਤਾਪਤ੍ਤਿਫਲਾ ਨ ਪਰਿਹਾਯਤੀਤਿ ਏਤਮਤ੍ਥਂ ਗਣ੍ਹੀਤਿ ਪਨ ਵਦਨ੍ਤਿ.

ਵਾਦਯੁਤ੍ਤਿਪਰਿਹਾਨਿਕਥਾਵਣ੍ਣਨਾ ਨਿਟ੍ਠਿਤਾ.

੨. ਅਰਿਯਪੁਗ੍ਗਲਸਂਸਨ੍ਦਨਪਰਿਹਾਨਿਵਣ੍ਣਨਾ

੨੪੧. ਯਂ ਪਨੇਤ੍ਥਾਤਿਆਦਿਮ੍ਹਿ ਦਸ੍ਸਨਮਗ੍ਗਫਲੇ ਠਿਤਸ੍ਸ ਅਨਨ੍ਤਰਂ ਅਰਹਤ੍ਤਪ੍ਪਤ੍ਤਿਂ, ਤਤੋ ਪਰਿਹਾਯਿਤ੍ਵਾ ਤਤ੍ਥ ਚ ਠਾਨਂ ਇਚ੍ਛਨ੍ਤੋ ਪੁਨ ਵਾਯਾਮੇਨ ਤਦਨਨ੍ਤਰਂ ਅਰਹਤ੍ਤਪ੍ਪਤ੍ਤਿਂ ਨ ਇਚ੍ਛਤੀਤਿ ਵਿਚਾਰੇਤਬ੍ਬਮੇਤਂ.

੨੬੨. ਅਵਸਿਪ੍ਪਤ੍ਤੋ ਝਾਨਲਾਭੀਤਿ ਸੇਕ੍ਖੋ ਵੁਤ੍ਤੋਤਿ ਦਟ੍ਠਬ੍ਬੋ. ਪੁਥੁਜ੍ਜਨੋ ਪਨ ਵਸਿਪ੍ਪਤ੍ਤੋ ਅਵਸਿਪ੍ਪਤ੍ਤੋ ਚ ਸਮਯਵਿਮੁਤ੍ਤਅਸਮਯਵਿਮੁਤ੍ਤਤਨ੍ਤਿਯਾ ਅਗ੍ਗਹਿਤੋ, ਭਜਾਪਿਯਮਾਨੋ ਪਨ ਸਮਾਪਤ੍ਤਿਵਿਕ੍ਖਮ੍ਭਿਤਾਨਂ ਕਿਲੇਸਾਨਂ ਵਸੇਨ ਸਮਯਵਿਮੁਤ੍ਤਭਾਵਂ ਭਜੇਯ੍ਯਾਤਿ ਵੁਤ੍ਤੋਤਿ.

ਅਰਿਯਪੁਗ੍ਗਲਸਂਸਨ੍ਦਨਪਰਿਹਾਨਿਵਣ੍ਣਨਾ ਨਿਟ੍ਠਿਤਾ.

੩. ਸੁਤ੍ਤਸਾਧਨਪਰਿਹਾਨਿਵਣ੍ਣਨਾ

੨੬੫. ਉਤ੍ਤਮਹੀਨਭੇਦੋ ‘‘ਤਤ੍ਰ ਯਾਯਂ ਪਟਿਪਦਾ ਸੁਖਾ ਖਿਪ੍ਪਾਭਿਞ੍ਞਾ, ਸਾ ਉਭਯੇਨੇਵ ਪਣੀਤਾ ਅਕ੍ਖਾਯਤੀ’’ਤਿਆਦਿਸੁਤ੍ਤਵਸੇਨ (ਦੀ. ਨਿ. ੩.੧੫੨) ਵੁਤ੍ਤੋ. ‘‘ਦਿਟ੍ਠਂ ਸੁਤਂ ਮੁਤ’’ਨ੍ਤਿ ਏਤ੍ਥ ਵਿਯ ਮੁਤਸਦ੍ਦੋ ਪਤ੍ਤਬ੍ਬਂ ਵਦਤੀਤਿ ਆਹ ‘‘ਫੁਸਨਾਰਹ’’ਨ੍ਤਿ.

੨੬੭. ਅਪ੍ਪਤ੍ਤਪਰਿਹਾਨਾਯ ਚੇਵ ਸਂਵਤ੍ਤਨ੍ਤਿ ਯਥਾਕਤਸਨ੍ਨਿਟ੍ਠਾਨਸ੍ਸ ਸਮਯਵਿਮੁਤ੍ਤਸ੍ਸਾਤਿ ਅਧਿਪ੍ਪਾਯੋ.

ਸੁਤ੍ਤਸਾਧਨਪਰਿਹਾਨਿਵਣ੍ਣਨਾ ਨਿਟ੍ਠਿਤਾ.

ਪਰਿਹਾਨਿਕਥਾਵਣ੍ਣਨਾ ਨਿਟ੍ਠਿਤਾ.

੩. ਬ੍ਰਹ੍ਮਚਰਿਯਕਥਾ

੧. ਸੁਦ੍ਧਬ੍ਰਹ੍ਮਚਰਿਯਕਥਾਵਣ੍ਣਨਾ

੨੬੯. ‘‘ਪਰਨਿਮ੍ਮਿਤਵਸਵਤ੍ਤਿਦੇਵੇ ਉਪਾਦਾਯ ਤਦੁਪਰੀ’’ਤਿ ਵੁਤ੍ਤਂ, ‘‘ਤੀਹਿ, ਭਿਕ੍ਖਵੇ, ਠਾਨੇਹੀ’’ਤਿ (ਅ. ਨਿ. ੯.੨੧) ਪਨ ਸੁਤ੍ਤਸ੍ਸ ਵਚਨੇਨ ਹੇਟ੍ਠਾਪਿ ਮਗ੍ਗਭਾਵਨਮ੍ਪਿ ਨ ਇਚ੍ਛਨ੍ਤੀਤਿ ਵਿਞ੍ਞਾਯਤਿ.

੨੭੦. ‘‘ਗਿਹੀਨਞ੍ਚੇਵ ਏਕਚ੍ਚਾਨਞ੍ਚ ਦੇਵਾਨਂ ਮਗ੍ਗਪਟਿਲਾਭਂ ਸਨ੍ਧਾਯ ਪਟਿਕ੍ਖੇਪੋ ਤਸ੍ਸੇਵਾ’’ਤਿ ਵੁਤ੍ਤਂ, ‘‘ਯਤ੍ਥ ਨਤ੍ਥੀ’’ਤਿ ਪਨ ਓਕਾਸਵਸੇਨ ਪੁਟ੍ਠੋ ਪੁਗ੍ਗਲਵਸੇਨ ਤਸ੍ਸ ਪਟਿਕ੍ਖੇਪੋ ਨ ਯੁਤ੍ਤੋ. ਯਦਿ ਚ ਤਸ੍ਸਾਯਂ ਅਧਿਪ੍ਪਾਯੋ, ਸਕਵਾਦਿਨਾ ਸਮਾਨਾਧਿਪ੍ਪਾਯਤ੍ਤਾ ਨ ਨਿਗ੍ਗਹੇਤਬ੍ਬੋ.

੨੭੧. ਏਕਨ੍ਤਰਿਕਪਞ੍ਹਾਤਿ ਪਰਵਾਦੀਸਕਵਾਦੀਨਂ ਅਞ੍ਞਮਞ੍ਞਂ ਪਞ੍ਹਨ੍ਤਰਿਕਾ ਪਞ੍ਹਾ.

ਸੁਦ੍ਧਬ੍ਰਹ੍ਮਚਰਿਯਕਥਾਵਣ੍ਣਨਾ ਨਿਟ੍ਠਿਤਾ.

੨. ਸਂਸਨ੍ਦਨਬ੍ਰਹ੍ਮਚਰਿਯਕਥਾਵਣ੍ਣਨਾ

੨੭੩. ਰੂਪਾਵਚਰਮਗ੍ਗੇਨ ਹਿ ਸੋ ਇਧਵਿਹਾਯਨਿਟ੍ਠੋ ਨਾਮ ਜਾਤੋਤਿ ਇਦਂ ‘‘ਇਧ ਭਾਵਿਤਮਗ੍ਗੋ ਹਿ ਅਨਾਗਾਮੀ ਇਧਵਿਹਾਯਨਿਟ੍ਠੋ ਨਾਮ ਹੋਤੀ’’ਤਿਆਦਿਕੇਨ ਲਦ੍ਧਿਕਿਤ੍ਤਨੇਨ ਕਥਂ ਸਮੇਤੀਤਿ ਵਿਚਾਰੇਤਬ੍ਬਂ. ਪੁਬ੍ਬੇ ਪਨ ਅਨਾਗਾਮੀ ਏਵ ਅਨਾਗਾਮੀਤਿ ਵੁਤ੍ਤੋ, ਇਧ ਝਾਨਾਨਾਗਾਮਿਸੋਤਾਪਨ੍ਨਾਦਿਕੋਤਿ ਅਧਿਪ੍ਪਾਯੋ. ਇਧ ਅਰਹਤ੍ਤਮਗ੍ਗਂ ਭਾਵੇਤ੍ਵਾ ਇਧੇਵ ਫਲਂ ਸਚ੍ਛਿਕਰੋਨ੍ਤਂ ‘‘ਇਧਪਰਿਨਿਬ੍ਬਾਯੀ’’ਤਿ ਵਦਤਿ, ਇਧ ਪਨ ਮਗ੍ਗਂ ਭਾਵੇਤ੍ਵਾ ਤਤ੍ਥ ਫਲਂ ਸਚ੍ਛਿਕਰੋਨ੍ਤਂ ‘‘ਤਤ੍ਥਪਰਿਨਿਬ੍ਬਾਯੀ ਅਰਹਾ’’ਤਿ.

ਸਂਸਨ੍ਦਨਬ੍ਰਹ੍ਮਚਰਿਯਕਥਾਵਣ੍ਣਨਾ ਨਿਟ੍ਠਿਤਾ.

ਬ੍ਰਹ੍ਮਚਰਿਯਕਥਾਵਣ੍ਣਨਾ ਨਿਟ੍ਠਿਤਾ.

੪. ਓਧਿਸੋਕਥਾਵਣ੍ਣਨਾ

੨੭੪. ਓਧਿਸੋ ਓਧਿਸੋਤਿ ਏਤਸ੍ਸ ਅਤ੍ਥਂ ਦਸ੍ਸੇਨ੍ਤੋ ‘‘ਏਕਦੇਸੇਨ ਏਕਦੇਸੇਨਾ’’ਤਿ ਆਹ.

ਓਧਿਸੋਕਥਾਵਣ੍ਣਨਾ ਨਿਟ੍ਠਿਤਾ.

੪. ਜਹਤਿਕਥਾਵਣ੍ਣਨਾ

੧. ਨਸੁਤ੍ਤਾਹਰਣਕਥਾਵਣ੍ਣਨਾ

੨੮੦. ਕਿਚ੍ਚਸਬ੍ਭਾਵਨ੍ਤਿ ਤੀਹਿ ਪਹਾਤਬ੍ਬਸ੍ਸ ਪਹੀਨਤਂ. ਤਂ ਪਨ ਕਿਚ੍ਚਂ ਯਦਿ ਤੇਨੇਵ ਮਗ੍ਗੇਨ ਸਿਜ੍ਝਤੀਤਿ ਲਦ੍ਧਿ, ਪੁਥੁਜ੍ਜਨਕਾਲੇ ਏਵ ਕਾਮਰਾਗਬ੍ਯਾਪਾਦਾ ਪਹੀਨਾਤਿ ਲਦ੍ਧੀਤਿ ਏਤਂ ਨ ਸਮੇਤਿ, ਤਸ੍ਮਾ ਪੁਥੁਜ੍ਜਨਕਾਲੇ ਪਹੀਨਾਨਮ੍ਪਿ ਦਸ੍ਸਨਮਗ੍ਗੇ ਉਪ੍ਪਨ੍ਨੇ ਪੁਨ ਕਦਾਚਿ ਅਨੁਪ੍ਪਤ੍ਤਿਤੋ ਤਿਣ੍ਣਂ ਮਗ੍ਗਾਨਂ ਕਿਚ੍ਚਂ ਸਮ੍ਭਵਤੀਤਿ ਅਧਿਪ੍ਪਾਯੋ.

ਨਸੁਤ੍ਤਾਹਰਣਕਥਾਵਣ੍ਣਨਾ ਨਿਟ੍ਠਿਤਾ.

ਜਹਤਿਕਥਾਵਣ੍ਣਨਾ ਨਿਟ੍ਠਿਤਾ.

੫. ਸਬ੍ਬਮਤ੍ਥੀਤਿਕਥਾ

੧. ਵਾਦਯੁਤ੍ਤਿਵਣ੍ਣਨਾ

੨੮੨. ਸਬ੍ਬਸ੍ਮਿਂ ਸਰੀਰੇ ਸਬ੍ਬਨ੍ਤਿ ਸਿਰਸਿ ਪਾਦਾ ਪਚ੍ਛਤੋ ਚਕ੍ਖੂਨੀਤਿ ਏਵਂ ਸਬ੍ਬਂ ਸਬ੍ਬਤ੍ਥ ਅਤ੍ਥੀਤਿ ਅਤ੍ਥੋ. ਸਬ੍ਬਸ੍ਮਿਂ ਕਾਲੇਤਿ ਬਾਲਕਾਲੇ ਯੁਵਤਾ, ਵੁਡ੍ਢਕਾਲੇ ਬਾਲਤਾ, ਏਵਂ ਸਬ੍ਬਸ੍ਮਿਂ ਕਾਲੇ ਸਬ੍ਬਂ. ਸਬ੍ਬੇਨਾਕਾਰੇਨਾਤਿ ਨੀਲਾਕਾਰੇਨ ਪੀਤਂ, ਪੀਤਾਕਾਰੇਨ ਲੋਹਿਤਨ੍ਤਿ ਏਵਂ. ਸਬ੍ਬੇਸੁ ਧਮ੍ਮੇਸੂਤਿ ਚਕ੍ਖੁਸ੍ਮਿਂ ਸੋਤਂ, ਸੋਤਸ੍ਮਿਂ ਘਾਨਨ੍ਤਿ ਏਵਂ. ਅਯੁਤ੍ਤਨ੍ਤਿ ਯੋਗਰਹਿਤਂ ਵਦਤਿ, ਤਂ ਪਨ ਏਕਸਭਾਵਂ. ਕਥਂ ਪਨ ਏਕਸਭਾਵਸ੍ਸ ਯੋਗਰਹਿਤਤਾਤਿ ਤਂ ਦਸ੍ਸੇਨ੍ਤੋ ‘‘ਨਾਨਾਸਭਾਵਾਨਞ੍ਹੀ’’ਤਿਆਦਿਮਾਹ. ਦ੍ਵਿਨ੍ਨਞ੍ਹਿ ਨਾਨਾਸਭਾਵਾਨਂ ਅਙ੍ਗੁਲੀਨਂ ਮੇਣ੍ਡਕਾਨਂ ਵਾ ਅਞ੍ਞਮਞ੍ਞਯੋਗੋ ਹੋਤਿ, ਨ ਏਕਸ੍ਸੇਵ ਸਤੋ, ਤਸ੍ਮਾ ਯੋ ਨਾਨਾਸਭਾਵੇਸੁ ਹੋਤਿ ਯੋਗੋ, ਤੇਨ ਰਹਿਤਂ ਏਕਸਭਾਵਂ ਅਯੋਗਨ੍ਤਿ ਵੁਤ੍ਤਂ. ਇਦਂ ਪੁਚ੍ਛਤੀਤਿ ਪਰਵਾਦੀਦਿਟ੍ਠਿਯਾ ਮਿਚ੍ਛਾਦਿਟ੍ਠਿਭਾਵਂ ਗਹੇਤ੍ਵਾ ਉਪ੍ਪਨ੍ਨਾਯ ਅਤ੍ਤਨੋ ਦਿਟ੍ਠਿਯਾ ਸਮ੍ਮਾਦਿਟ੍ਠਿਭਾਵੋ ਅਤ੍ਥੀਤਿ ਵੁਤ੍ਤਂ ਹੋਤਿ.

ਵਾਦਯੁਤ੍ਤਿਵਣ੍ਣਨਾ ਨਿਟ੍ਠਿਤਾ.

੨. ਕਾਲਸਂਸਨ੍ਦਨਵਣ੍ਣਨਾ

੨੮੫. ਅਤੀਤਾਨਾਗਤਂ ਪਹਾਯ ਪਚ੍ਚੁਪ੍ਪਨ੍ਨਰੂਪਮੇਵ ਅਪ੍ਪਿਯਂ ਅਵਿਭਜਿਤਬ੍ਬਂ ਕਰਿਤ੍ਵਾਤਿ ਪਚ੍ਚੁਪ੍ਪਨ੍ਨਸਦ੍ਦੇਨ ਰੂਪਸਦ੍ਦੇਨ ਚਾਤਿ ਉਭੋਹਿਪਿ ਪਚ੍ਚੁਪ੍ਪਨ੍ਨਰੂਪਮੇਵ ਵਤ੍ਤਬ੍ਬਂ ਕਤ੍ਵਾਤਿ ਵੁਤ੍ਤਂ ਹੋਤਿ. ਪਞ੍ਞਤ੍ਤਿਯਾ ਅਵਿਗਤਤ੍ਤਾਤਿ ਏਤੇਨ ਇਦਂ ਵਿਞ੍ਞਾਯਤਿ ‘‘ਨ ਰੂਪਪਞ੍ਞਤ੍ਤਿ ਵਿਯ ਵਤ੍ਥਪਞ੍ਞਤ੍ਤਿ ਸਭਾਵਪਰਿਚ੍ਛਿਨ੍ਨੇ ਪਵਤ੍ਤਾ ਵਿਜ੍ਜਮਾਨਪਞ੍ਞਤ੍ਤਿ, ਅਥ ਖੋ ਪੁਬ੍ਬਾਪਰਿਯਵਸੇਨ ਪਵਤ੍ਤਮਾਨਂ ਰੂਪਸਮੂਹਂ ਉਪਾਦਾਯ ਪਵਤ੍ਤਾ ਅਵਿਜ੍ਜਮਾਨਪਞ੍ਞਤ੍ਤਿ, ਤਸ੍ਮਾ ਵਤ੍ਥਭਾਵਸ੍ਸ ਓਦਾਤਭਾਵਵਿਗਮੇ ਵਿਗਮਾਵਤ੍ਤਬ੍ਬਤਾ ਯੁਤ੍ਤਾ, ਨ ਪਨ ਰੂਪਭਾਵਸ੍ਸ ਪਚ੍ਚੁਪ੍ਪਨ੍ਨਭਾਵਵਿਗਮੇ’’ਤਿ.

ਕਾਲਸਂਸਨ੍ਦਨਵਣ੍ਣਨਾ ਨਿਟ੍ਠਿਤਾ.

ਵਚਨਸੋਧਨਵਣ੍ਣਨਾ

੨੮੮. ਅਨਾਗਤਂ ਵਾ ਪਚ੍ਚੁਪ੍ਪਨ੍ਨਂ ਵਾ ਹੁਤ੍ਵਾ ਹੋਤੀਤਿ ਵੁਤ੍ਤਨ੍ਤਿ ਏਤ੍ਥ ਅਨਾਗਤਂ ਅਨਾਗਤਂ ਹੁਤ੍ਵਾ ਪੁਨ ਪਚ੍ਚੁਪ੍ਪਨ੍ਨਂ ਹੋਨ੍ਤਂ ਹੁਤ੍ਵਾ ਹੋਤੀਤਿ, ਤਥਾ ਪਚ੍ਚੁਪ੍ਪਨ੍ਨਂ ਪਚ੍ਚੁਪ੍ਪਨ੍ਨਂ ਹੋਨ੍ਤਂ ਪੁਬ੍ਬੇ ਅਨਾਗਤਂ ਹੁਤ੍ਵਾ ਪਚ੍ਚੁਪ੍ਪਨ੍ਨਂ ਹੋਤੀਤਿ ਹੁਤ੍ਵਾ ਹੋਤੀਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਕਿਂ ਤੇ ਤਮ੍ਪਿ ਹੁਤ੍ਵਾ ਹੋਤੀਤਿ ਤਬ੍ਭਾਵਾਵਿਗਮਤੋ ਹੁਤ੍ਵਾਹੋਤਿਭਾਵਾਨੁਪਰਮਂ ਅਨੁਪਚ੍ਛੇਦਂ ਪੁਚ੍ਛਤੀਤਿ ਅਧਿਪ੍ਪਾਯੋ ਯੁਤ੍ਤੋ. ਹੁਤ੍ਵਾ ਭੂਤਸ੍ਸ ਪੁਨ ਹੁਤ੍ਵਾ ਅਭਾਵਤੋਤਿ ਅਨਾਗਤਂ ਹੁਤ੍ਵਾ ਪਚ੍ਚੁਪ੍ਪਨ੍ਨਭੂਤਸ੍ਸ ਪੁਨ ਅਨਾਗਤਂ ਹੁਤ੍ਵਾ ਪਚ੍ਚੁਪ੍ਪਨ੍ਨਾਭਾਵਤੋ.

ਯਸ੍ਮਾ ਤਨ੍ਤਿ ਤਂ ਹੁਤ੍ਵਾ ਭੂਤਂ ਪਚ੍ਚੁਪ੍ਪਨ੍ਨਂ ਯਸ੍ਮਾ ਅਨਾਗਤਂ ਹੁਤ੍ਵਾ ਪਚ੍ਚੁਪ੍ਪਨ੍ਨਂ ਹੋਨ੍ਤਂ ‘‘ਹੁਤ੍ਵਾ ਹੋਤੀ’’ਤਿ ਸਙ੍ਖ੍ਯਂ ਗਤਂ, ਤਸ੍ਮਾ ਦੁਤਿਯਮ੍ਪਿ ‘‘ਹੁਤ੍ਵਾ ਹੋਤੀ’’ਤਿ ਵਚਨਂ ਅਰਹਤੀਤਿ ਪਟਿਜਾਨਾਤੀਤਿ ਅਧਿਪ੍ਪਾਯੋ. ਏਵਂ ਪਨ ਧਮ੍ਮੇ ਹੁਤ੍ਵਾਹੋਤਿਭਾਵਾਨੁਪਰਮਂ ਵਦਨ੍ਤਸ੍ਸ ਅਧਮ੍ਮੇ ਸਸਵਿਸਾਣੇ ਨਹੁਤ੍ਵਾਨ ਹੋਤਿਭਾਵਾਨੁਪਰਮੋ ਆਪਜ੍ਜਤੀਤਿ ਅਧਿਪ੍ਪਾਯੇਨ ‘‘ਅਥ ਨ’’ਨ੍ਤਿਆਦਿਮਾਹ.

ਪਟਿਕ੍ਖਿਤ੍ਤਨਯੇਨਾਤਿ ਕਾਲਨਾਨਤ੍ਤੇਨ. ਪਟਿਞ੍ਞਾਤਨਯੇਨਾਤਿ ਅਤ੍ਥਾਨਾਨਤ੍ਤੇਨ. ਅਤ੍ਥਾਨਾਨਤ੍ਤਂ ਇਚ੍ਛਨ੍ਤੋਪਿ ਪਨ ਅਨਾਗਤਸ੍ਸ ਪਚ੍ਚੁਪ੍ਪਨ੍ਨੇ ਵੁਤ੍ਤਂ ਹੋਤਿਭਾਵਂ, ਪਚ੍ਚੁਪ੍ਪਨ੍ਨਸ੍ਸ ਚ ਅਨਾਗਤੇ ਵੁਤ੍ਤਂ ਹੁਤ੍ਵਾਭਾਵਂ ਕਥਂ ਪਟਿਜਾਨਾਤੀਤਿ ਵਿਚਾਰੇਤਬ੍ਬਂ. ਅਤ੍ਥਾਨਾਨਤ੍ਤਮੇਵ ਹਿ ਤੇਨ ਅਨੁਞ੍ਞਾਯਤਿ, ਨ ਅਨਾਗਤੇ ਪਚ੍ਚੁਪ੍ਪਨ੍ਨਭਾਵੋ, ਪਚ੍ਚੁਪ੍ਪਨ੍ਨੇ ਵਾ ਅਨਾਗਤਭਾਵੋਤਿ. ਪੁਰਿਮਂ ਪਟਿਕ੍ਖਿਤ੍ਤਪਞ੍ਹਂ ਪਰਿਵਤ੍ਤਿਤ੍ਵਾਤਿ ਅਨੁਞ੍ਞਾਤਪਞ੍ਹਸ੍ਸ ਹੁਤ੍ਵਾ ਹੋਤਿ ਹੁਤ੍ਵਾ ਹੋਤੀਤਿ ਦੋਸੋ ਵੁਤ੍ਤੋਤਿ ਅਵੁਤ੍ਤਦੋਸਂ ਅਤਿਕ੍ਕਮ੍ਮ ਪਟਿਕ੍ਖਿਤ੍ਤਪਞ੍ਹਂ ਪੁਨ ਗਹੇਤ੍ਵਾ ਤੇਨ ਚੋਦੇਤੀਤਿ ਅਤ੍ਥੋ. ਏਤ੍ਥ ਚ ਅਤ੍ਥਾਨਾਨਤ੍ਤੇਨ ਹੁਤ੍ਵਾਹੋਤੀਤਿ ਅਨੁਜਾਨਨ੍ਤਸ੍ਸ ਦੋਸੋ ਕਾਲਨਾਨਤ੍ਤਾਯੇਵ ਅਨਾਗਤਂ ਪਚ੍ਚੁਪ੍ਪਨ੍ਨਨ੍ਤਿ ਪਟਿਕ੍ਖੇਪੇਨ ਕਥਂ ਹੋਤੀਤਿ? ਤਸ੍ਸੇਵ ਅਨੁਜਾਨਨਪਟਿਕ੍ਖੇਪਤੋਤਿ ਅਧਿਪ੍ਪਾਯੋ.

ਏਕੇਕਨ੍ਤਿ ਅਨਾਗਤਮ੍ਪਿ ਨ ਹੁਤ੍ਵਾ ਨ ਹੋਤਿ ਪਚ੍ਚੁਪ੍ਪਨ੍ਨਮ੍ਪੀਤਿ ਤਦੁਭਯਂ ਗਹੇਤ੍ਵਾ ‘‘ਏਕੇਕਂ ਨ ਹੁਤ੍ਵਾ ਨ ਹੋਤਿ ਨ ਹੁਤ੍ਵਾ ਨ ਹੋਤੀ’’ਤਿ ਵੁਤ੍ਤਂ, ਨ ਏਕੇਕਮੇਵ ਨ ਹੁਤ੍ਵਾ ਨ ਹੋਤਿ ਨ ਹੁਤ੍ਵਾ ਨ ਹੋਤੀਤਿ. ਏਸ ਨਯੋ ਪੁਰਿਮਸ੍ਮਿਂ ‘‘ਏਕੇਕਂ ਹੁਤ੍ਵਾ ਹੋਤਿ ਹੁਤ੍ਵਾ ਹੋਤੀ’’ਤਿ ਵਚਨੇਪਿ. ਅਨਾਗਤਸ੍ਸ ਹਿ ‘‘ਹੁਤ੍ਵਾ ਹੋਤੀ’’ਤਿ ਨਾਮਂ ਪਚ੍ਚੁਪ੍ਪਨ੍ਨਸ੍ਸ ਚਾਤਿ ਦ੍ਵੇਪਿ ਨਾਮਾਨਿ ਸਙ੍ਗਹੇਤ੍ਵਾ ‘‘ਹੁਤ੍ਵਾ ਹੋਤਿ ਹੁਤ੍ਵਾ ਹੋਤੀ’’ਤਿ ਚੋਦਿਤਂ, ਤਥਾ ‘‘ਨ ਹੁਤ੍ਵਾ ਨ ਹੋਤਿ ਨ ਹੁਤ੍ਵਾ ਨ ਹੋਤੀ’’ਤਿ ਚਾਤਿ ਅਧਿਪ੍ਪਾਯੋ. ਸਬ੍ਬਤੋ ਅਨ੍ਧਕਾਰੇਨ ਪਰਿਯੋਨਦ੍ਧੋ ਵਿਯਾਤਿ ਏਤੇਨ ਅਪਰਿਯੋਨਦ੍ਧੇਨ ਪਟਿਜਾਨਿਤਬ੍ਬਂ ਸਿਯਾਤਿ ਦਸ੍ਸੇਤਿ. ਏਤ੍ਥ ਚ ਪੁਰਿਮਨਯੇ ਹੁਤ੍ਵਾ ਭੂਤਸ੍ਸ ਪੁਨ ਹੁਤ੍ਵਾਹੋਤਿਭਾਵੋ ਚੋਦਿਤੋ, ਦੁਤਿਯਨਯੇ ਅਨਾਗਤਾਦੀਸੁ ਏਕੇਕਸ੍ਸ ਹੁਤ੍ਵਾਹੋਤਿਨਾਮਤਾਤਿ ਅਯਂ ਵਿਸੇਸੋ.

ਵਚਨਸੋਧਨਵਣ੍ਣਨਾ ਨਿਟ੍ਠਿਤਾ.

ਅਤੀਤਞਾਣਾਦਿਕਥਾਵਣ੍ਣਨਾ

੨੯੦. ਪੁਨ ਪੁਟ੍ਠੋ…ਪੇ… ਅਤ੍ਥਿਤਾਯ ਪਟਿਜਾਨਾਤੀਤਿ ਏਤ੍ਥ ਪਚ੍ਚੁਪ੍ਪਨ੍ਨਂ ਞਾਣਂ ਤੇਨਾਤਿ ਏਤੇਨ ਅਨੁਵਤ੍ਤਮਾਨਾਪੇਕ੍ਖਨਵਚਨੇਨ ਕਥਂ ਵੁਚ੍ਚਤੀਤਿ ਵਿਚਾਰੇਤਬ੍ਬਂ.

ਅਤੀਤਞਾਣਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਅਰਹਨ੍ਤਾਦਿਕਥਾਵਣ੍ਣਨਾ

੨੯੧. ਯੁਤ੍ਤਿਵਿਰੋਧੋ ਅਰਹਤੋ ਸਰਾਗਾਦਿਭਾਵੇ ਪੁਥੁਜ੍ਜਨੇਨ ਅਨਾਨਤ੍ਤਂ ਬ੍ਰਹ੍ਮਚਰਿਯਵਾਸਸ੍ਸ ਅਫਲਤਾਤਿ ਏਵਮਾਦਿਕੋ ਦਟ੍ਠਬ੍ਬੋ.

ਅਰਹਨ੍ਤਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਪਦਸੋਧਨਕਥਾਵਣ੍ਣਨਾ

੨੯੫. ਤੇਨ ਕਾਰਣੇਨਾਤਿ ਅਤੀਤਅਤ੍ਥਿਸਦ੍ਦਾਨਂ ਏਕਤ੍ਥਤ੍ਤਾ ਅਤ੍ਥਿਸਦ੍ਦਤ੍ਥਸ੍ਸ ਚ ਨ੍ਵਾਤੀਤਭਾਵਤੋ ‘‘ਅਤੀਤਂ ਨ੍ਵਾਤੀਤਂ, ਨ੍ਵਾਤੀਤਞ੍ਚ ਅਤੀਤਂ ਹੋਤੀ’’ਤਿ ਵੁਤ੍ਤਂ ਹੋਤਿ. ਏਤ੍ਥ ਪਨ ਅਤੀਤਾਦੀਨਂ ਅਤ੍ਥਿਤਂ ਵਦਨ੍ਤਸ੍ਸ ਪਰਵਾਦਿਸ੍ਸੇਵਾਯਂ ਦੋਸੋ ਯਥਾ ਆਪਜ੍ਜਤਿ, ਨ ਪਨ ‘‘ਨਿਬ੍ਬਾਨਂ ਅਤ੍ਥੀ’’ਤਿ ਵਦਨ੍ਤਸ੍ਸ ਸਕਵਾਦਿਸ੍ਸ, ਤਥਾ ਪਟਿਪਾਦੇਤਬ੍ਬਂ.

ਪਦਸੋਧਨਕਥਾਵਣ੍ਣਨਾ ਨਿਟ੍ਠਿਤਾ.

ਸਬ੍ਬਮਤ੍ਥੀਤਿਕਥਾਵਣ੍ਣਨਾ ਨਿਟ੍ਠਿਤਾ.

੭. ਏਕਚ੍ਚਂਅਤ੍ਥੀਤਿਕਥਾ

੧. ਅਤੀਤਾਦਿਏਕਚ੍ਚਕਥਾਵਣ੍ਣਨਾ

੨੯੯. ਤਿਣ੍ਣਂ ਰਾਸੀਨਨ੍ਤਿ ਅਵਿਪਕ੍ਕਵਿਪਾਕਵਿਪਕ੍ਕਵਿਪਾਕਅਵਿਪਾਕਾਨਂ. ਵੋਹਾਰਵਸੇਨ ਅਵਿਪਕ੍ਕਵਿਪਾਕਾਨਂ ਅਤ੍ਥਿਤਂ ਵਦਨ੍ਤੋ ਕਥਂ ਚੋਦੇਤਬ੍ਬੋਤਿ ਵਿਚਾਰੇਤਿ ‘‘ਕਮ੍ਮੁਪਚਯਂ ਚਿਤ੍ਤਵਿਪ੍ਪਯੁਤ੍ਤਂ ਸਙ੍ਖਾਰਂ ਇਚ੍ਛਨ੍ਤੀ’’ਤਿ.

ਏਕਚ੍ਚਂਅਤ੍ਥੀਤਿਕਥਾਵਣ੍ਣਨਾ ਨਿਟ੍ਠਿਤਾ.

੮. ਸਤਿਪਟ੍ਠਾਨਕਥਾਵਣ੍ਣਨਾ

੩੦੧. ਲੋਕੁਤ੍ਤਰਭਾਵਂ ਪੁਚ੍ਛਨਤ੍ਥਾਯਾਤਿ ਲੋਕਿਯਲੋਕੁਤ੍ਤਰਾਯ ਸਮ੍ਮਾਸਤਿਯਾ ਸਤਿਪਟ੍ਠਾਨਤ੍ਤਾ, ਲੋਕੁਤ੍ਤਰਾਯਯੇਵ ਵਾ ਪਰਮਤ੍ਥਸਤਿਪਟ੍ਠਾਨਤ੍ਤਾ ਤਸ੍ਸਾ ਵਸੇਨ ਲੋਕੁਤ੍ਤਰਭਾਵਂ ਪੁਚ੍ਛਨਤ੍ਥਾਯਾਤਿ ਅਤ੍ਥੋ. ਪਭੇਦਪੁਚ੍ਛਾਵਸੇਨਾਤਿ ਲੋਕਿਯਲੋਕੁਤ੍ਤਰਸਤਿਪਟ੍ਠਾਨਸਮੁਦਾਯਭੂਤਸ੍ਸ ਸਤਿਪਟ੍ਠਾਨਸ੍ਸ ਪਭੇਦਾਨਂ ਪੁਚ੍ਛਾਵਸੇਨ.

ਸਤਿਪਟ੍ਠਾਨਕਥਾਵਣ੍ਣਨਾ ਨਿਟ੍ਠਿਤਾ.