੭. ਪਥਵੀਕਮ੍ਮਵਿਪਾਕੋਤਿਕਥਾਵਣ੍ਣਨਾ

੪੯੨. ਫਸ੍ਸੋ ਸੁਖਵੇਦਨੀਯਾਦਿਭੇਦੋ ਹੋਤੀਤਿ ਫਸ੍ਸੇਨ ਸਬ੍ਬਮ੍ਪਿ ਕਮ੍ਮਵਿਪਾਕਂ ਦਸ੍ਸੇਤ੍ਵਾ ਪੁਨ ਅਤ੍ਤਵਜ੍ਜੇਹਿ ਸਮ੍ਪਯੋਗਦਸ੍ਸਨਤ੍ਥਂ ‘‘ਸੋ ਚ ਸਞ੍ਞਾਦਯੋ ਚਾ’’ਤਿਆਦਿ ਵੁਤ੍ਤਂ. ਅਤ੍ਥਿ ਚ ਨੇਸਨ੍ਤਿ ਸਾਵਜ੍ਜਨੇ ਚਕ੍ਖੁਵਿਞ੍ਞਾਣਾਦਿਸਹਜਾਤਧਮ੍ਮੇ ਸਨ੍ਧਾਯ ਵੁਤ੍ਤਂ. ਯੋ ਤਤ੍ਥ ਇਟ੍ਠਵਿਪਾਕੋ, ਤਸ੍ਸ ਪਤ੍ਥਨਾਤਿ ਇਟ੍ਠਵਿਪਾਕੇ ਏਵ ਪਤ੍ਥਨਂ ਕਤ੍ਵਾ ਕਮ੍ਮਂ ਕਰੋਨ੍ਤੀਤਿ ਕਮ੍ਮੂਪਨਿਸ੍ਸਯਭੂਤਮੇਵ ਪਤ੍ਥਨਂ ਦਸ੍ਸੇਤਿ, ਪਚ੍ਚੁਪ੍ਪਨ੍ਨਵੇਦਨਾਪਚ੍ਚਯਂ ਵਾ ਤਣ੍ਹਂ ਉਪਾਦਾਨਾਦਿਨਿਬ੍ਬਤ੍ਤਨਵਸੇਨ ਦੁਕ੍ਖਸ੍ਸ ਪਭਾਵਿਤਂ. ਮੂਲਤਣ੍ਹਾਤਿ ਪਚ੍ਚੁਪ੍ਪਨ੍ਨਵਿਪਾਕਵਟ੍ਟਨਿਬ੍ਬਤ੍ਤਕਕਮ੍ਮਸ੍ਸ ਉਪਨਿਸ੍ਸਯਭੂਤਂ ਪੁਰਿਮਤਣ੍ਹਂ, ਕਮ੍ਮਸਹਾਯਂ ਵਾ ਵਿਪਾਕਸ੍ਸ ਉਪਨਿਸ੍ਸਯਭੂਤਂ.

੪੯੩. ਸਕਸਮਯਵਸੇਨ ਚ ਚੋਦਨਾਯ ਪਯੁਜ੍ਜਮਾਨਤਂ ਦਸ੍ਸੇਤੁਂ ‘‘ਤੇਸਞ੍ਚ ਲਦ੍ਧਿਯਾ’’ਤਿਆਦਿਮਾਹ.

੪੯੪. ਪਟਿਲਾਭਵਸੇਨਾਤਿ ਕਮ੍ਮੇ ਸਤਿ ਪਥਵਿਯਾਦੀਨਂ ਪਟਿਲਾਭੋ ਹੋਤੀਤਿ ਕਮ੍ਮਂ ਤਂਸਂਵਤ੍ਤਨਿਕਂ ਨਾਮ ਹੋਤੀਤਿ ਦਸ੍ਸੇਤਿ.

ਪਥਵੀਕਮ੍ਮਵਿਪਾਕੋਤਿਕਥਾਵਣ੍ਣਨਾ ਨਿਟ੍ਠਿਤਾ.