੧੦. ਵੋਹਾਰਕਥਾਵਣ੍ਣਨਾ

੩੪੭. ਵੋਹਾਰਕਥਾਯਂ ਉਦਾਹੁ ਸੋਤਾਦੀਨਿਪੀਤਿ ਏਕਨ੍ਤਲੋਕਿਯੇਸੁ ਵਿਸਯਵਿਸਯੀਸੁ ਵਿਸਯਸ੍ਸੇਵ ਲੋਕੁਤ੍ਤਰਭਾਵੋ, ਨ ਵਿਸਯੀਨਨ੍ਤਿ ਨਤ੍ਥੇਤ੍ਥ ਕਾਰਣਂ. ਯਥਾ ਚ ਵਿਸਯੀਨਂ ਲੋਕੁਤ੍ਤਰਭਾਵੋ ਅਸਿਦ੍ਧੋ, ਤਥਾ ਵਿਸਯਸ੍ਸ ਸਦ੍ਦਾਯਤਨਸ੍ਸ. ਤਤ੍ਥ ਯਥਾ ਅਸਿਦ੍ਧਲੋਕੁਤ੍ਤਰਭਾਵਸ੍ਸ ਤਸ੍ਸ ਲੋਕੁਤ੍ਤਰਤਾ, ਏਵਂ ਸੋਤਾਦੀਨਂ ਆਪਨ੍ਨਾਤਿ ਕਿਨ੍ਤਿ ਤਾਨਿਪਿ ਲੋਕੁਤ੍ਤਰਾਨੀਤਿ ਅਤ੍ਥੋ ਦਟ੍ਠਬ੍ਬੋ.

ਯਦਿ ਲੋਕੁਤ੍ਤਰੇ ਪਟਿਹਞ੍ਞੇਯ੍ਯ, ਲੋਕੁਤ੍ਤਰੋ ਸਿਯਾਤਿ ਅਤ੍ਥੋ ਨ ਗਹੇਤਬ੍ਬੋ. ਨ ਹਿ ਲੋਕੁਤ੍ਤਰੇ ਪਟਿਹਞ੍ਞਤੀਤਿ ਪਰਿਕਪ੍ਪਿਤੇਪਿ ਸਦ੍ਦਸ੍ਸ ਲੋਕੁਤ੍ਤਰਭਾਵੋ ਅਤ੍ਥੀਤਿ ਅਧਿਪ੍ਪਾਯੋ. ‘‘ਲੋਕਿਯੇਨ ਞਾਣੇਨਾ’’ਤਿ ਉਦ੍ਧਟਂ, ‘‘ਵਿਞ੍ਞਾਣੇਨਾ’’ਤਿ ਪਨ ਪਾਲ਼ਿ, ਤਞ੍ਚ ਵਿਞ੍ਞਾਣਂ ਸੋਤਸਮ੍ਬਨ੍ਧੇਨ ਸੋਤਵਿਞ੍ਞਾਣਨ੍ਤਿ ਵਿਞ੍ਞਾਯਤੀਤਿ. ਅਨੇਕਨ੍ਤਤਾਤਿ ਲੋਕਿਯੇਨ ਞਾਣੇਨ ਜਾਨਿਤਬ੍ਬਤੋ ਲੋਕਿਯੋਤਿ ਏਤਸ੍ਸ ਹੇਤੁਸ੍ਸ ਲੋਕਿਯੇ ਲੋਕੁਤ੍ਤਰੇ ਚ ਸਮ੍ਭਵਤੋ ਅਨੇਕਨ੍ਤਭਾਵੋ ਸਿਯਾਤਿ ਅਧਿਪ੍ਪਾਯੋ.

ਵੋਹਾਰਕਥਾਵਣ੍ਣਨਾ ਨਿਟ੍ਠਿਤਾ.