੭. ਧਮ੍ਮਕਥਾਵਣ੍ਣਨਾ

੮੮੭-੮੮੮. ਧਮ੍ਮਕਥਾਯਂ ਰੂਪਟ੍ਠਤੋ ਅਞ੍ਞਸ੍ਸ ਰੂਪਸ੍ਸ ਅਭਾਵਾਤਿ ਯੋ ਰੂਪਸ੍ਸ ਨਿਯਾਮੋ ਵੁਚ੍ਚੇਯ੍ਯ, ਸੋ ਰੂਪਟ੍ਠੋ ਨਾਮ ਕੋਚਿ ਰੂਪਤੋ ਅਞ੍ਞੋ ਨਤ੍ਥੀਤਿ ਰੂਪਟ੍ਠਤੋ ਅਞ੍ਞਂ ਰੂਪਞ੍ਚ ਨ ਹੋਤਿ, ਤਸ੍ਮਾ ਰੂਪਂ ਰੂਪਮੇਵ, ਨ ਵੇਦਨਾਦਿਸਭਾਵਨ੍ਤਿ ਅਧਿਪ੍ਪਾਯੇਨ ‘‘ਰੂਪਂ ਰੂਪਟ੍ਠੇਨ ਨਿਯਤ’’ਨ੍ਤਿ ਵਤ੍ਤਬ੍ਬਂ, ਨ ਅਞ੍ਞਥਾ ਰੂਪਟ੍ਠੇਨ ਨਿਯਾਮੇਨਾਤਿ ਅਧਿਪ੍ਪਾਯੋ. ਤਤ੍ਥ ਰੂਪਤੋ ਅਞ੍ਞਸ੍ਸ ਰੂਪਟ੍ਠਸ੍ਸ ਅਭਾਵੇ ਦਸ੍ਸਿਤੇ ਰੂਪਟ੍ਠਤੋ ਅਞ੍ਞਸ੍ਸ ਰੂਪਸ੍ਸ ਅਭਾਵੋ ਦਸ੍ਸਿਤੋਯੇਵ ਨਾਮ ਹੋਤੀਤਿ ਤਮੇਵ ਰੂਪਤੋ ਅਞ੍ਞਸ੍ਸ ਰੂਪਟ੍ਠਸ੍ਸ ਅਭਾਵਂ ਦਸ੍ਸੇਨ੍ਤੋ ‘‘ਰੂਪਸਭਾਵੋ ਹੀ’’ਤਿਆਦਿਮਾਹ. ਏਸ ਵੋਹਾਰੋਤਿ ਰੂਪਸ੍ਸ ਸਭਾਵੋ ਰੂਪਸਭਾਵੋ, ਰੂਪਸ੍ਸ ਅਤ੍ਥੋ ਰੂਪਟ੍ਠੋਤਿ ਏਵਂ ਅਞ੍ਞਤ੍ਤਂ ਗਹੇਤ੍ਵਾ ਵਿਯ ਪਵਤ੍ਤੋ ਰੂਪਸਭਾਵਵੋਹਾਰੋ ਰੂਪਟ੍ਠਵੋਹਾਰੋ ਵਾ ਵੇਦਨਾਦੀਹਿ ਨਾਨਤ੍ਤਮੇਵ ਸੋ ਸਭਾਵੋਤਿ ਨਾਨਤ੍ਤਸਞ੍ਞਾਪਨਤ੍ਥਂ ਹੋਤੀਤਿ ਅਤ੍ਥੋ. ਤਸ੍ਮਾਤਿ ਰੂਪਸ੍ਸ ਰੂਪਟ੍ਠੇਨ ਅਨਞ੍ਞਤ੍ਤਾ. ‘‘ਰੂਪਂ ਰੂਪਮੇਵ, ਨ ਵੇਦਨਾਦਿਸਭਾਵ’’ਨ੍ਤਿ ਅਵਤ੍ਵਾ ‘‘ਰੂਪਂ ਰੂਪਟ੍ਠੇਨ ਨਿਯਤ’’ਨ੍ਤਿ ਵਦਤੋ ਤਞ੍ਚ ਵਚਨਂ ਵੁਤ੍ਤਪ੍ਪਕਾਰੇਨ ਸਦੋਸਂ, ਅਥ ਕਸ੍ਮਾ ‘‘ਰੂਪਞ੍ਹਿ ਰੂਪਟ੍ਠੇਨ ਨਿਯਤਨ੍ਤਿ ਰੂਪਂ ਰੂਪਮੇਵ, ਨ ਵੇਦਨਾਦਿਸਭਾਵਨ੍ਤਿ ਅਧਿਪ੍ਪਾਯੇਨ ਵਤ੍ਤਬ੍ਬ’’ਨ੍ਤਿ ਵਦਨ੍ਤੋ ‘‘ਰੂਪਂ ਰੂਪਟ੍ਠੇਨ ਨਿਯਤ’’ਨ੍ਤਿ ਪਟਿਜਾਨਾਤੀਤਿ ਅਤ੍ਥੋ ਦਟ੍ਠਬ੍ਬੋ. ਨਨੁ ਚੇਤਂ ਅਤ੍ਤਨਾਵ ਵੁਤ੍ਤਂ, ਨ ਪਰੇਨਾਤਿ ਪਟਿਜਾਨਾਤੀਤਿ ਨ ਵਤ੍ਤਬ੍ਬਨ੍ਤਿ? ਨ, ਅਤ੍ਤਾਨਮ੍ਪਿ ਪਰਂ ਵਿਯ ਵਚਨਤੋ. ਵਤ੍ਤਬ੍ਬਨ੍ਤਿ ਵਾ ਸਕਵਾਦਿਨਾ ਵਤ੍ਤਬ੍ਬਨ੍ਤਿ ਵੁਤ੍ਤਂ ਹੋਤਿ. ਯਦਿ ਚ ਤੇਨ ਵਤ੍ਤਬ੍ਬਂ ਪਟਿਜਾਨਾਤਿ ਚ ਸੋ ਏਤਮਤ੍ਥਨ੍ਤਿ, ਅਥ ਕਸ੍ਮਾ ਪਟਿਜਾਨਾਤਿ ਸਕਵਾਦੀਤਿ ਅਯਮੇਤ੍ਥ ਅਤ੍ਥੋ. ਅਤ੍ਥਨ੍ਤਰਵਸੇਨਾਤਿ ਤਤ੍ਥ ਵੁਤ੍ਤਮੇਵ ਕਾਰਣਂ ਨਿਗੂਹਿਤ੍ਵਾ ਪਰੇਨ ਚੋਦਿਤਨ੍ਤਿ ਤਮੇਵ ਕਾਰਣਂ ਦਸ੍ਸੇਤ੍ਵਾ ਚੋਦਨਂ ਨਿਵਤ੍ਤੇਤਿ. ਇਤੋ ਅਞ੍ਞਥਾਤਿ ਰੂਪਾਦਿਸਭਾਵਮਤ੍ਤਂ ਮੁਞ੍ਚਿਤ੍ਵਾ ਤੇਨ ਪਰਿਕਪ੍ਪਿਤਂ ਨਿਯਤਂ ਨਤ੍ਥੀਤਿ ਤਸ੍ਸ ਪਰਿਕਪ੍ਪਿਤਸ੍ਸ ਨਿਵਤ੍ਤਨਤ੍ਥਂ ਪੁਨ ਤੇਨੇਵ ਨਯੇਨ ਚੋਦੇਤੁਂ ‘‘ਮਿਚ੍ਛਤ੍ਤਨਿਯਤ’’ਨ੍ਤਿਆਦਿਮਾਹਾਤਿ ਅਤ੍ਥੋ.

ਧਮ੍ਮਕਥਾਵਣ੍ਣਨਾ ਨਿਟ੍ਠਿਤਾ.

ਏਕਵੀਸਤਿਮਵਗ੍ਗਵਣ੍ਣਨਾ ਨਿਟ੍ਠਿਤਾ.