੯. ਧਮ੍ਮਤਣ੍ਹਾਅਬ੍ਯਾਕਤਾਤਿਕਥਾਵਣ੍ਣਨਾ

੬੭੬-੬੮੦. ਯਸ੍ਮਾ ਧਮ੍ਮਤਣ੍ਹਾਤਿ ਵੁਤ੍ਤਾ, ਤਸ੍ਮਾ ਅਬ੍ਯਾਕਤਾਤਿ ਕੁਸਲੇਸੁ ਧਮ੍ਮੇਸੁ ਲੋਕੁਤ੍ਤਰੇਸੁ ਵਾ ਸਬ੍ਬੇਸੁ ਤਣ੍ਹਾ ‘‘ਧਮ੍ਮਤਣ੍ਹਾ’’ਤਿ ਗਹੇਤ੍ਵਾ ਯਸ੍ਮਾ ਸਾ ਤਣ੍ਹਾ, ਤਸ੍ਮਾ ਕੁਸਲਾ ਨ ਹੋਤਿ, ਯਸ੍ਮਾ ਪਨ ਧਮ੍ਮੇ ਪਵਤ੍ਤਾ, ਤਸ੍ਮਾ ਅਕੁਸਲਾ ਨ ਹੋਤੀਤਿ ਅਬ੍ਯਾਕਤਾਤਿ ਲਦ੍ਧੀਤਿ ਦਸ੍ਸੇਤਿ. ਤੀਹਿ ਕੋਟ੍ਠਾਸੇਹਿ ਛਪਿ ਤਣ੍ਹਾ ਸਂਖਿਪਿਤ੍ਵਾ ਦਸ੍ਸਿਤਾ, ਤਸ੍ਮਾ ਧਮ੍ਮਤਣ੍ਹਾਪਿ ਕਾਮਤਣ੍ਹਾਦਿਭਾਵਤੋ ਨ ਅਬ੍ਯਾਕਤਾਤਿ ਅਧਿਪ੍ਪਾਯੋ.

ਧਮ੍ਮਤਣ੍ਹਾਅਬ੍ਯਾਕਤਾਤਿਕਥਾਵਣ੍ਣਨਾ ਨਿਟ੍ਠਿਤਾ.

ਤੇਰਸਮਵਗ੍ਗਵਣ੍ਣਨਾ ਨਿਟ੍ਠਿਤਾ.