(੭) ੨. ਸਞ੍ਞਾਵਗ੍ਗੋ

੧-੫. ਸਞ੍ਞਾਸੁਤ੍ਤਾਦਿਵਣ੍ਣਨਾ

੬੧-੬੫. ਦੁਤਿਯਸ੍ਸ ਪਠਮੇ ‘‘ਮਹਪ੍ਫਲਾ ਮਹਾਨਿਸਂਸਾ’’ਤਿ ਉਭਯਮ੍ਪੇਤਂ ਅਤ੍ਥਤੋ ਏਕਂ, ਬ੍ਯਞ੍ਜਨਮੇਵ ਨਾਨਨ੍ਤਿ ਆਹ ‘‘ਮਹਪ੍ਫਲਾ’’ਤਿਆਦਿ. ‘‘ਪਞ੍ਚਿਮੇ ਗਹਪਤਯੋ ਆਨਿਸਂਸਾ’’ਤਿਆਦੀਸੁ (ਉਦਾ. ੭੬) ਆਨਿਸਂਸ-ਸਦ੍ਦੋ ਫਲਪਰਿਯਾਯੋਪਿ ਹੋਤਿ. ਮਹਤੋ ਲੋਕੁਤ੍ਤਰਸ੍ਸ ਸੁਖਸ੍ਸ ਪਚ੍ਚਯਾ ਹੋਨ੍ਤੀਤਿ ਮਹਾਨਿਸਂਸਾ. ਅਮਤੋਗਧਾਤਿ ਅਮਤਬ੍ਭਨ੍ਤਰਾ ਅਮਤਂ ਅਨੁਪ੍ਪਵਿਟ੍ਠਾ ਨਿਬ੍ਬਾਨਦਿਟ੍ਠਤ੍ਤਾ, ਤਤੋ ਪਰਂ ਨ ਗਚ੍ਛਨ੍ਤਿ. ਤੇਨ ਵੁਤ੍ਤਂ ‘‘ਅਮਤਪਰਿਯੋਸਾਨਾ’’ਤਿ. ਅਮਤਂ ਪਰਿਯੋਸਾਨਂ ਅਵਸਾਨਂ ਏਤਾਸਨ੍ਤਿ ਅਮਤਪਰਿਯੋਸਾਨਾ. ਮਰਣਸਞ੍ਞਾਤਿ ਮਰਣਾਨੁਪਸ੍ਸਨਾਞਾਣੇਨ ਸਞ੍ਞਾ. ਆਹਾਰੇ ਪਟਿਕੂਲਸਞ੍ਞਾਤਿ ਆਹਾਰਂ ਗਮਨਾਦਿਵਸੇਨ ਪਟਿਕੂਲਤੋ ਪਰਿਗ੍ਗਣ੍ਹਨ੍ਤਸ੍ਸ ਉਪ੍ਪਨ੍ਨਸਞ੍ਞਾ. ਉਕ੍ਕਣ੍ਠਿਤਸ੍ਸਾਤਿ ਨਿਬ੍ਬਿਨ੍ਦਨ੍ਤਸ੍ਸ ਕਤ੍ਥਚਿਪਿ ਅਸਜ੍ਜਨ੍ਤਸ੍ਸ. ਦੁਤਿਯਾਦੀਨਿ ਉਤ੍ਤਾਨਤ੍ਥਾਨੇਵ.

ਸਞ੍ਞਾਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੬-੧੦. ਸਾਜੀਵਸੁਤ੍ਤਾਦਿਵਣ੍ਣਨਾ

੬੬-੭੦. ਛਟ੍ਠੇ ਸਹ ਆਜੀਵਨ੍ਤਿ ਏਤ੍ਥਾਤਿ ਸਾਜੀਵੋ, ਪਞ੍ਹਸ੍ਸ ਪੁਚ੍ਛਨਂ ਵਿਸ੍ਸਜ੍ਜਨਞ੍ਚ. ਤੇਨਾਹ ‘‘ਸਾਜੀਵੋਤਿ ਪਞ੍ਹਪੁਚ੍ਛਨਞ੍ਚੇਵ ਪਞ੍ਹਵਿਸ੍ਸਜ੍ਜਨਞ੍ਚਾ’’ਤਿਆਦਿ. ਅਭਿਸਙ੍ਖਤਨ੍ਤਿ ਚਿਤਂ. ਸਤ੍ਤਮਾਦੀਨਿ ਉਤ੍ਤਾਨਤ੍ਥਾਨੇਵ.

ਸਾਜੀਵਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਸਞ੍ਞਾਵਗ੍ਗਵਣ੍ਣਨਾ ਨਿਟ੍ਠਿਤਾ.