(੮) ੩. ਯੋਧਾਜੀਵਵਗ੍ਗੋ

੧-੨. ਪਠਮਚੇਤੋਵਿਮੁਤ੍ਤਿਫਲਸੁਤ੍ਤਾਦਿਵਣ੍ਣਨਾ

੭੧-੭੨. ਤਤਿਯਸ੍ਸ ਪਠਮੇ ਅਵਿਜ੍ਜਾਪਲਿਘਨ੍ਤਿ ਏਤ੍ਥ ਅਵਿਜ੍ਜਾਤਿ ਵਟ੍ਟਮੂਲਿਕਾ ਅਵਿਜ੍ਜਾ, ਅਯਂ ਪਚੁਰਜਨੇਹਿ ਉਕ੍ਖਿਪਿਤੁਂ ਅਸਕ੍ਕੁਣੇਯ੍ਯਭਾਵਤੋ ਦੁਕ੍ਖਿਪਨਟ੍ਠੇਨ ਨਿਬ੍ਬਾਨਦ੍ਵਾਰਪ੍ਪਵੇਸਵਿਬਨ੍ਧਨੇਨ ਚ ‘‘ਪਲਿਘੋ ਵਿਯਾਤਿ ਪਲਿਘੋ’’ਤਿ ਵੁਚ੍ਚਤਿ. ਤੇਨੇਸ ਤਸ੍ਸਾ ਉਕ੍ਖਿਤ੍ਤਤ੍ਤਾ ‘‘ਉਕ੍ਖਿਤ੍ਤਪਲਿਘੋ’’ਤਿ ਵੁਤ੍ਤੋ. ਪੁਨਬ੍ਭਵਸ੍ਸ ਕਰਣਸੀਲੋ, ਪੁਨਬ੍ਭਵਂ ਵਾ ਫਲਂ ਅਰਹਤੀਤਿ ਪੋਨੋਭਵਿਕਾ, ਪੁਨਬ੍ਭਵਦਾਯਿਕਾਤਿ ਅਤ੍ਥੋ. ਜਾਤਿਸਂਸਾਰੋਤਿ ਜਾਯਨਵਸੇਨ ਚੇਵ ਸਂਸਰਣਵਸੇਨ ਚ ਏਵਂਲਦ੍ਧਨਾਮਾਨਂ ਪੁਨਬ੍ਭਵਕ੍ਖਨ੍ਧਾਨਂ ਪਚ੍ਚਯੋ ਕਮ੍ਮਾਭਿਸਙ੍ਖਾਰੋ. ਜਾਤਿਸਂਸਾਰੋਤਿ ਹਿ ਫਲੂਪਚਾਰੇਨ ਕਾਰਣਂ ਵੁਤ੍ਤਂ. ਤਞ੍ਹਿ ਪੁਨਪ੍ਪੁਨਂ ਉਪ੍ਪਤ੍ਤਿਕਾਰਣਵਸੇਨ ਪਰਿਕ੍ਖਿਪਿਤ੍ਵਾ ਠਿਤਤ੍ਤਾ ‘‘ਪਰਿਖਾ’’ਤਿ ਵੁਚ੍ਚਤਿ ਸਨ੍ਤਾਨਸ੍ਸ ਪਰਿਕ੍ਖਿਪਨਤੋ. ਤੇਨੇਸ ਤਸ੍ਸ ਸਂਕਿਣ੍ਣਤ੍ਤਾ ਵਿਕਿਣ੍ਣਤ੍ਤਾ ਸਬ੍ਬਸੋ ਖਿਤ੍ਤਤ੍ਤਾ ਵਿਨਾਸਿਤਤ੍ਤਾ ‘‘ਸਂਕਿਣ੍ਣਪਰਿਖੋ’’ਤਿ ਵੁਤ੍ਤੋ.

ਤਣ੍ਹਾਸਙ੍ਖਾਤਨ੍ਤਿ ਏਤ੍ਥ ਤਣ੍ਹਾਤਿ ਵਟ੍ਟਮੂਲਿਕਾ ਤਣ੍ਹਾ. ਅਯਞ੍ਹਿ ਗਮ੍ਭੀਰਾਨੁਗਤਟ੍ਠੇਨ ‘‘ਏਸਿਕਾ’’ਤਿ ਵੁਚ੍ਚਤਿ. ਲੁਞ੍ਚਿਤ੍ਵਾ ਉਦ੍ਧਰਿਤ੍ਵਾ. ਓਰਮ੍ਭਾਗਿਯਾਨੀਤਿ ਓਰਮ੍ਭਾਗਜਨਕਾਨਿ ਕਾਮਭਵੇ ਉਪਪਤ੍ਤਿਪਚ੍ਚਯਾਨਿ ਕਾਮਰਾਗਸਂਯੋਜਨਾਦੀਨਿ. ਏਤਾਨਿ ਹਿ ਕਵਾਟਂ ਵਿਯ ਨਗਰਦ੍ਵਾਰਂ ਚਿਤ੍ਤਂ ਪਿਦਹਿਤ੍ਵਾ ਠਿਤਤ੍ਤਾ ‘‘ਅਗ੍ਗਲ਼ਾ’’ਤਿ ਵੁਚ੍ਚਨ੍ਤਿ. ਤੇਨੇਸ ਤੇਸਂ ਨਿਗ੍ਗਤਤ੍ਤਾ ਭਿਨ੍ਨਤ੍ਤਾ ‘‘ਨਿਰਗ੍ਗਲ਼ੋ’’ਤਿ ਵੁਤ੍ਤੋਤਿ. ਅਗ੍ਗਮਗ੍ਗੇਨ ਪਨ੍ਨੋ ਅਪਚਿਤੋ ਮਾਨਦ੍ਧਜੋ ਏਤਸ੍ਸਾਤਿ ਪਨ੍ਨਦ੍ਧਜੋ. ਪਨ੍ਨਭਾਰੋਤਿ ਖਨ੍ਧਭਾਰਕਿਲੇਸਭਾਰਅਭਿਸਙ੍ਖਾਰਭਾਰਾ ਓਰੋਪਿਤਾ ਅਸ੍ਸਾਤਿ ਪਨ੍ਨਭਾਰੋ. ਵਿਸਂਯੁਤ੍ਤੋਤਿ ਚਤੂਹਿ ਯੋਗੇਹਿ ਸਬ੍ਬਕਿਲੇਸੇਹਿ ਚ ਵਿਸਂਯੁਤ੍ਤੋ. ਅਸ੍ਮਿਮਾਨੋਤਿ ਰੂਪੇ ਅਸ੍ਮੀਤਿ ਮਾਨੋ, ਵੇਦਨਾਯ, ਸਞ੍ਞਾਯ, ਸਙ੍ਖਾਰੇਸੁ, ਵਿਞ੍ਞਾਣੇ ਅਸ੍ਮਿਮਾਨੋ. ਏਤ੍ਥ ਹਿ ਪਞ੍ਚਪਿ ਖਨ੍ਧੇ ਅਵਿਸੇਸਤੋ ‘‘ਅਸ੍ਮੀ’’ਤਿ ਗਹੇਤ੍ਵਾ ਪਵਤ੍ਤਮਾਨੋ ਅਸ੍ਮਿਮਾਨੋਤਿ ਅਧਿਪ੍ਪੇਤੋ.

ਨਗਰਦ੍ਵਾਰਸ੍ਸ ਪਰਿਸ੍ਸਯਪਟਿਬਾਹਨਤ੍ਥਞ੍ਚੇਵ ਸੋਧਨਤ੍ਥਞ੍ਚ ਉਭੋਸੁ ਪਸ੍ਸੇਸੁ ਏਸਿਕਾਥਮ੍ਭੇ ਨਿਖਣਿਤ੍ਵਾ ਠਪੇਤੀਤਿ ਆਹ ‘‘ਨਗਰਦ੍ਵਾਰੇ ਉਸ੍ਸਾਪਿਤੇ ਏਸਿਕਾਥਮ੍ਭੇ’’ਤਿ. ਪਾਕਾਰਵਿਦ੍ਧਂਸਨੇਨੇਵ ਪਰਿਖਾਭੂਮਿਸਮਕਰਣਂ ਹੋਤੀਤਿ ਆਹ ‘‘ਪਾਕਾਰਂ ਭਿਨ੍ਦਿਤ੍ਵਾ ਪਰਿਖਂ ਵਿਕਿਰਿਤ੍ਵਾ’’ਤਿ. ‘‘ਏਵ’’ਨ੍ਤਿਆਦਿ ਉਪਮਾਸਂਸਨ੍ਦਨਂ. ਸਨ੍ਤੋ ਸਂਵਿਜ੍ਜਮਾਨੋ ਕਾਯੋ ਧਮ੍ਮਸਮੂਹੋਤਿ ਸਕ੍ਕਾਯੋ, ਉਪਾਦਾਨਕ੍ਖਨ੍ਧਪਞ੍ਚਕਂ. ਦ੍ਵਤ੍ਤਿਂਸਕਮ੍ਮਕਾਰਣਾ ਦੁਕ੍ਖਕ੍ਖਨ੍ਧੇ ਆਗਤਦੁਕ੍ਖਾਨਿ. ਅਕ੍ਖਿਰੋਗਸੀਸਰੋਗਾਦਯੋ. ਅਟ੍ਠਨਵੁਤਿ ਰੋਗਾ, ਰਾਜਭਯਾਦੀਨਿ ਪਞ੍ਚਵੀਸਤਿਮਹਾਭਯਾਨਿ. ਦੁਤਿਯਂ ਉਤ੍ਤਾਨਮੇਵ.

ਪਠਮਚੇਤੋਵਿਮੁਤ੍ਤਿਫਲਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੩-੪. ਪਠਮਧਮ੍ਮਵਿਹਾਰੀਸੁਤ੍ਤਾਦਿਵਣ੍ਣਨਾ

੭੩-੭੪. ਤਤਿਯੇ ਨਿਯਕਜ੍ਝਤ੍ਤੇਤਿ ਅਤ੍ਤਨੋ ਸਨ੍ਤਾਨੇ. ਮੇਤ੍ਤਾਯ ਉਪਸਂਹਰਣਵਸੇਨ ਹਿਤਂ ਏਸਨ੍ਤੇਨ. ਕਰੁਣਾਯ ਵਸੇਨ ਅਨੁਕਮ੍ਪਮਾਨੇਨ. ਪਰਿਗ੍ਗਹੇਤ੍ਵਾਤਿ ਪਰਿਤੋ ਗਹੇਤ੍ਵਾ, ਫਰਿਤ੍ਵਾਤਿ ਅਤ੍ਥੋ. ਪਰਿਚ੍ਚਾਤਿ ਪਰਿਤੋ ਕਤ੍ਵਾ, ਸਮਨ੍ਤਤੋ ਫਰਿਤ੍ਵਾ ਇਚ੍ਚੇਵ ਅਤ੍ਥੋ. ‘‘ਪਟਿਚ੍ਚਾ’’ਤਿਪਿ ਪਾਠੋ. ਮਾ ਪਮਜ੍ਜਿਤ੍ਥਾਤਿ ‘‘ਝਾਯਥਾ’’ਤਿ ਵੁਤ੍ਤਸਮਥਵਿਪਸ੍ਸਨਾਨਂ ਅਨਨੁਯੁਞ੍ਜਨੇਨ ਅਞ੍ਞੇਨ ਵਾ ਕੇਨਚਿ ਪਮਾਦਕਾਰਣੇਨ ਮਾ ਪਮਾਦਂ ਆਪਜ੍ਜਿਤ੍ਥ. ਨਿਯ੍ਯਾਨਿਕਸਾਸਨੇ ਅਕਤ੍ਤਬ੍ਬਕਰਣਂ ਵਿਯ ਕਤ੍ਤਬ੍ਬਾਕਰਣਮ੍ਪਿ ਪਮਾਦੋਤਿ. ਵਿਪਤ੍ਤਿਕਾਲੇਤਿ ਸਤ੍ਤਅਸਪ੍ਪਾਯਾਦਿਵਿਪਤ੍ਤਿਯੁਤ੍ਤੇ ਕਾਲੇ. ਸਬ੍ਬੇਪਿ ਸਾਸਨੇ ਗੁਣਾ ਇਧੇਵ ਸਙ੍ਗਹਂ ਗਚ੍ਛਨ੍ਤੀਤਿ ਆਹ ‘‘ਝਾਯਥ ਮਾ ਪਮਾਦਤ੍ਥ…ਪੇ… ਅਨੁਸਾਸਨੀ’’ਤਿ. ਚਤੁਤ੍ਥੇ ਨਤ੍ਥਿ ਵਤ੍ਤਬ੍ਬਂ.

ਪਠਮਧਮ੍ਮਵਿਹਾਰੀਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੫. ਪਠਮਯੋਧਾਜੀਵਸੁਤ੍ਤਵਣ੍ਣਨਾ

੭੫. ਪਞ੍ਚਮੇ ਯੁਜ੍ਝਨਂ ਯੋਧੋ, ਸੋ ਆਜੀਵੋ ਏਤੇਸਨ੍ਤਿ ਯੋਧਾਜੀਵਾ. ਤੇਨਾਹ ‘‘ਯੁਦ੍ਧੂਪਜੀਵਿਨੋ’’ਤਿ. ਸਨ੍ਥਮ੍ਭਿਤ੍ਵਾ ਠਾਤੁਂ ਨ ਸਕ੍ਕੋਤੀਤਿ ਬਦ੍ਧੋ ਧਿਤਿਸਮ੍ਪਨ੍ਨੋ ਠਾਤੁਂ ਨ ਸਕ੍ਕੋਤਿ. ਸਮਾਗਤੇਤਿ ਸਮ੍ਪਤ੍ਤੇ. ਬ੍ਯਾਪਜ੍ਜਤੀਤਿ ਵਿਕਾਰਮਾਪਜ੍ਜਤਿ. ਤੇਨਾਹ ‘‘ਪਕਤਿਭਾਵਂ ਜਹਤੀ’’ਤਿ.

ਰਜਗ੍ਗਸ੍ਮਿਨ੍ਤਿ ਪਚ੍ਚਤ੍ਤੇ ਭੁਮ੍ਮਵਚਨਨ੍ਤਿ ਆਹ ‘‘ਕਿਂ ਤਸ੍ਸ ਪੁਗ੍ਗਲਸ੍ਸ ਰਜਗ੍ਗਂ ਨਾਮਾ’’ਤਿ. ਵਿਨਿਬ੍ਬੇਠੇਤ੍ਵਾਤਿ ਗਹਿਤਗ੍ਗਹਣਂ ਵਿਸ੍ਸਜ੍ਜਾਪੇਤ੍ਵਾ. ਮੋਚੇਤ੍ਵਾਤਿ ਸਰੀਰਤੋ ਅਪਨੇਤ੍ਵਾ.

ਪਠਮਯੋਧਾਜੀਵਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਦੁਤਿਯਯੋਧਾਜੀਵਸੁਤ੍ਤਵਣ੍ਣਨਾ

੭੬. ਛਟ੍ਠੇ ਚਮ੍ਮਨ੍ਤਿ ਇਮਿਨਾ ਚਮ੍ਮਮਯਂ ਚਮ੍ਮਮਿਤਿ ਸਿਬ੍ਬਿਤਂ, ਅਞ੍ਞਂ ਵਾ ਕੇਟਕਫਲਕਾਦਿਂ ਸਙ੍ਗਣ੍ਹਾਤਿ. ਧਨੁਕਲਾਪਂ ਸਨ੍ਨਯ੍ਹਿਤ੍ਵਾਤਿ ਧਨੁਞ੍ਚੇਵ ਤੂਣਿਰਞ੍ਚ ਸਨ੍ਨਯ੍ਹਿਤ੍ਵਾ ਸਜ੍ਜੇਤ੍ਵਾ. ਧਨੁਦਣ੍ਡਸ੍ਸ ਜਿਯਾਯਤ੍ਤਭਾਵਕਰਣਾਦਿਪਿ ਹਿ ਧਨੁਨੋ ਸਨ੍ਨਯ੍ਹਨਂ. ਤੇਨੇਵਾਹ ‘‘ਧਨੁਞ੍ਚ ਸਰਕਲਾਪਞ੍ਚ ਸਨ੍ਨਯ੍ਹਿਤ੍ਵਾ’’ਤਿ. ਯੁਦ੍ਧਸਨ੍ਨਿਵੇਸੇਨ ਠਿਤਨ੍ਤਿ ਦ੍ਵਿਨ੍ਨਂ ਸੇਨਾਨਂ ਬ੍ਯੂਹਨਸਂਵਿਧਾਨਨਯੇਨ ਕਤੋ ਯੋ ਸਨ੍ਨਿਵੇਸੋ, ਤਸ੍ਸ ਵਸੇਨ ਠਿਤਂ, ਸੇਨਾਬ੍ਯੂਹਸਂਵਿਧਾਨਵਸੇਨ ਸਨ੍ਨਿਵਿਟ੍ਠਨ੍ਤਿ ਵੁਤ੍ਤਂ ਹੋਤਿ. ਉਸ੍ਸਾਹਞ੍ਚ ਵਾਯਾਮਞ੍ਚ ਕਰੋਤੀਤਿ ਯੁਜ੍ਝਨਵਸੇਨ ਉਸ੍ਸਾਹਂ ਵਾਯਾਮਞ੍ਚ ਕਰੋਤਿ. ਪਰਿਯਾਪਾਦੇਨ੍ਤੀਤਿ ਮਰਣਪਰਿਯਨ੍ਤਿਕਂ ਅਪਰਂ ਪਾਪੇਨ੍ਤਿ. ਤੇਨਾਹ ‘‘ਪਰਿਯਾਪਾਦਯਨ੍ਤੀ’’ਤਿ, ਜੀਵਿਤਂ ਪਰਿਯਾਪਾਦਯਨ੍ਤਿ ਮਰਣਂ ਪਟਿਪਜ੍ਜਾਪੇਨ੍ਤੀਤਿ ਵੁਤ੍ਤਂ ਹੋਤਿ.

ਅਰਕ੍ਖਿਤੇਨੇਵ ਕਾਯੇਨਾਤਿਆਦੀਸੁ ਹਤ੍ਥਪਾਦੇ ਕੀਲ਼ਾਪੇਨ੍ਤੋ ਗੀਵਂ ਵਿਪਰਿਵਤ੍ਤੇਨ੍ਤੋ ਕਾਯਂ ਨ ਰਕ੍ਖਤਿ ਨਾਮ. ਨਾਨਪ੍ਪਕਾਰਂ ਦੁਟ੍ਠੁਲ੍ਲਂ ਕਰੋਨ੍ਤੋ ਵਾਚਂ ਨ ਰਕ੍ਖਤਿ ਨਾਮ. ਕਾਮਵਿਤਕ੍ਕਾਦਯੋ ਵਿਤਕ੍ਕੇਨ੍ਤੋ ਚਿਤ੍ਤਂ ਨ ਰਕ੍ਖਤਿ ਨਾਮ. ਅਨੁਪਟ੍ਠਿਤਾਯ ਸਤਿਯਾਤਿ ਕਾਯਗਤਾਯ ਸਤਿਯਾ ਅਨੁਪਟ੍ਠਿਤਾਯ. ਰਾਗੇਨ ਅਨੁਗਤੋਤਿ ਰਾਗੇਨ ਅਨੁਪਹਤੋ. ਰਾਗਪਰੇਤੋਤਿ ਵਾ ਰਾਗੇਨ ਫੁਟ੍ਠੋ ਫੁਟ੍ਠਵਿਸੇਨ ਵਿਯ ਸਪ੍ਪੇਨ.

ਅਨੁਦਹਨਟ੍ਠੇਨਾਤਿ ਅਨੁਪਾਯਪ੍ਪਟਿਪਤ੍ਤਿਯਾ. ਸਮ੍ਪਤਿ ਆਯਤਿਞ੍ਚ ਮਹਾਭਿਤਾਪਟ੍ਠੇਨ. ਅਨਵਤ੍ਥਿਤਸਭਾਵਤਾਯ ਇਤ੍ਤਰਪਚ੍ਚੁਪਟ੍ਠਾਨਟ੍ਠੇਨ. ਮੁਹੁਤ੍ਤਰਮਣੀਯਤਾਯ ਤਾਵਕਾਲਿਕਟ੍ਠੇਨ. ਬ੍ਯਤ੍ਤੇਹਿ ਅਭਿਭਵਨੀਯਤਾਯ ਸਬ੍ਬਙ੍ਗਪਚ੍ਚਙ੍ਗਪਲਿਭਞ੍ਜਨਟ੍ਠੇਨ. ਛੇਦਨਭੇਦਨਾਦਿਅਧਿਕਰਣਭਾਵੇਨ ਉਗ੍ਘਟ੍ਟਨਸਦਿਸਤਾਯ ਅਧਿਕੁਟ੍ਟਨਟ੍ਠੇਨ. ਅਵਣੇ ਵਣਂ ਉਪ੍ਪਾਦੇਤ੍ਵਾ ਅਨ੍ਤੋ ਅਨੁਪਵਿਸਨਸਭਾਵਤਾਯ ਵਿਨਿਵਿਜ੍ਝਨਟ੍ਠੇਨ. ਦਿਟ੍ਠਧਮ੍ਮਿਕਸਮ੍ਪਰਾਯਿਕ ਅਨਤ੍ਥਨਿਮਿਤ੍ਤਤਾਯ ਸਾਸਙ੍ਕਸਪ੍ਪਟਿਭਯਟ੍ਠੇਨ.

ਦੁਤਿਯਯੋਧਾਜੀਵਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭-੮. ਪਠਮਅਨਾਗਤਭਯਸੁਤ੍ਤਾਦਿਵਣ੍ਣਨਾ

੭੭-੭੮. ਸਤ੍ਤਮੇ ਵਿਸੇਸਸ੍ਸ ਪਤ੍ਤਿਯਾ ਵਿਸੇਸਸ੍ਸ ਪਾਪੁਣਨਤ੍ਥਂ. ਵੀਰਿਯਨ੍ਤਿ ਪਧਾਨਵੀਰਿਯਂ. ਤਂ ਪਨ ਚਙ੍ਕਮਨਵਸੇਨ ਕਰਣੇ ‘‘ਕਾਯਿਕ’’ਨ੍ਤਿਪਿ ਵਤ੍ਤਬ੍ਬਤਂ ਲਭਤੀਤਿ ਆਹ – ‘‘ਦੁਵਿਧਮ੍ਪੀ’’ਤਿ. ਸਤ੍ਥਕਵਾਤਾਤਿ ਸਨ੍ਧਿਬਨ੍ਧਨਾਨਿ ਕਤ੍ਤਰਿਯਾ ਛਿਨ੍ਦਨ੍ਤਾ ਵਿਯ ਪਵਤ੍ਤਵਾਤਾ. ਤੇਨਾਹ – ‘‘ਸਤ੍ਥਂ ਵਿਯਾ’’ਤਿਆਦਿ. ਕਤਕਮ੍ਮੇਹੀਤਿ ਕਤਚੋਰਕਮ੍ਮੇਹਿ. ਤੇ ਕਿਰ ਕਤਕਮ੍ਮਾ ਯਂ ਨੇਸਂ ਦੇਵਤਂ ਆਯਾਚਿਤ੍ਵਾ ਕਮ੍ਮਂ ਨਿਪ੍ਫਨ੍ਨਂ, ਤਸ੍ਸ ਉਪਕਾਰਤ੍ਥਾਯ ਮਨੁਸ੍ਸੇ ਮਾਰੇਤ੍ਵਾ ਗਲਲੋਹਿਤਾਨਿ ਗਣ੍ਹਨ੍ਤਿ. ਤੇ ‘‘ਅਞ੍ਞੇਸੁ ਮਨੁਸ੍ਸੇਸੁ ਮਾਰਿਯਮਾਨੇਸੁ ਕੋਲਾਹਲਂ ਉਪ੍ਪਜ੍ਜਿਸ੍ਸਤਿ, ਪਬ੍ਬਜਿਤਂ ਪਰਿਯੇਸਨ੍ਤੋ ਨਾਮ ਨਤ੍ਥੀ’’ਤਿ ਮਞ੍ਞਮਾਨਾ ਭਿਕ੍ਖੂ ਗਹੇਤ੍ਵਾ ਮਾਰੇਨ੍ਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਅਕਤਕਮ੍ਮੇਹੀਤਿ ਅਟਵਿਤੋ ਗਾਮਂ ਆਗਮਨਕਾਲੇ ਕਮ੍ਮਨਿਪ੍ਫਤ੍ਤਤ੍ਥਂ ਪੁਰੇਤਰਂ ਬਲਿਕਮ੍ਮਂ ਕਾਤੁਕਾਮੇਹਿ. ਤੇਨੇਵਾਹ – ‘‘ਚੋਰਿਕਂ ਕਤ੍ਵਾ ਨਿਕ੍ਖਨ੍ਤਾ ਕਤਕਮ੍ਮਾ ਨਾਮਾ’’ਤਿਆਦਿ. ਅਟ੍ਠਮੇ ਨਤ੍ਥਿ ਵਤ੍ਤਬ੍ਬਂ.

ਪਠਮਅਨਾਗਤਭਯਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੯. ਤਤਿਯਅਨਾਗਤਭਯਸੁਤ੍ਤਵਣ੍ਣਨਾ

੭੯. ਨਵਮੇ ਪਾਲ਼ਿਗਮ੍ਭੀਰਾਤਿ (ਸਂ. ਨਿ. ਟੀ. ੨.੨.੨੨੯) ਪਾਲ਼ਿਵਸੇਨ ਗਮ੍ਭੀਰਾ ਅਗਾਧਾ ਦੁਕ੍ਖੋਗਾਹਾ ਸਲ੍ਲਸੁਤ੍ਤਸਦਿਸਾ. ਸਲ੍ਲਸੁਤ੍ਤਞ੍ਹਿ (ਸੁ. ਨਿ. ੫੭੯) ‘‘ਅਨਿਮਿਤ੍ਤਮਨਞ੍ਞਾਤ’’ਨ੍ਤਿਆਦਿਨਾ ਪਾਲ਼ਿਵਸੇਨ ਗਮ੍ਭੀਰਂ, ਨ ਅਤ੍ਥਗਮ੍ਭੀਰਂ. ਤਥਾ ਹਿ ਤਤ੍ਥ ਤਾ ਤਾ ਗਾਥਾ ਦੁਵਿਞ੍ਞੇਯ੍ਯਰੂਪਾ ਤਿਟ੍ਠਨ੍ਤਿ. ਦੁਵਿਞ੍ਞੇਯ੍ਯਞ੍ਹਿ ਞਾਣੇਨ ਦੁਕ੍ਖੋਗਾਹਨ੍ਤਿ ਕਤ੍ਵਾ ‘‘ਗਮ੍ਭੀਰ’’ਨ੍ਤਿ ਵੁਚ੍ਚਤਿ. ਪੁਬ੍ਬਾਪਰਂਪੇਤ੍ਥ ਕਾਸਞ੍ਚਿ ਗਾਥਾਨਂ ਦੁਵਿਞ੍ਞੇਯ੍ਯਤਾਯ ਦੁਕ੍ਖੋਗਾਹਮੇਵ, ਤਸ੍ਮਾ ਪਾਲ਼ਿਵਸੇਨ ਗਮ੍ਭੀਰਂ. ਅਤ੍ਥਗਮ੍ਭੀਰਾਤਿ ਅਤ੍ਥਵਸੇਨ ਗਮ੍ਭੀਰਾ ਮਹਾਵੇਦਲ੍ਲਸੁਤ੍ਤਸਦਿਸਾ, ਮਹਾਵੇਦਲ੍ਲਸੁਤ੍ਤਸ੍ਸ (ਮ. ਨਿ. ੧.੪੪੯ ਆਦਯੋ) ਅਤ੍ਥਵਸੇਨ ਗਮ੍ਭੀਰਤਾ ਪਾਕਟਾਯੇਵ. ਲੋਕਂ ਉਤ੍ਤਰਤੀਤਿ ਲੋਕੁਤ੍ਤਰੋ, ਸੋ ਅਤ੍ਥਭੂਤੋ ਏਤੇਸਂ ਅਤ੍ਥੀਤਿ ਲੋਕੁਤ੍ਤਰਾ. ਤੇਨਾਹ – ‘‘ਲੋਕੁਤ੍ਤਰਧਮ੍ਮਦੀਪਕਾ’’ਤਿ. ਸੁਞ੍ਞਤਾਪਟਿਸਂਯੁਤ੍ਤਾਤਿ ਸਤ੍ਤਸੁਞ੍ਞਧਮ੍ਮਪ੍ਪਕਾਸਕਾ. ਤੇਨਾਹ ‘‘ਖਨ੍ਧਧਾਤੁਆਯਤਨਪਚ੍ਚਯਾਕਾਰਪ੍ਪਟਿਸਂਯੁਤ੍ਤਾ’’ਤਿ. ਉਗ੍ਗਹੇਤਬ੍ਬਂ ਪਰਿਯਾਪੁਣਿਤਬ੍ਬਨ੍ਤਿ ਚ ਲਿਙ੍ਗਵਚਨਵਿਪਲ੍ਲਾਸੇਨ ਵੁਤ੍ਤਨ੍ਤਿ ਆਹ ‘‘ਉਗ੍ਗਹੇਤਬ੍ਬੇ ਚੇਵ ਵਲ਼ਞ੍ਜੇਤਬ੍ਬੇ ਚਾ’’ਤਿ. ਕਵਿਨੋ ਕਮ੍ਮਂ ਕਵਿਤਾ. ਯਸ੍ਸ ਪਨ ਯਂ ਕਮ੍ਮਂ, ਤਂ ਤੇਨ ਕਤਨ੍ਤਿ ਵੁਚ੍ਚਤੀਤਿ ਆਹ ‘‘ਕਵਿਤਾਤਿ ਕਵੀਹਿ ਕਤਾ’’ਤਿ. ਕਾਵੇਯ੍ਯਨ੍ਤਿ ਕਬ੍ਯਂ, ਕਬ੍ਯਨ੍ਤਿ ਚ ਕਵਿਨਾ ਵੁਤ੍ਤਨ੍ਤਿ ਅਤ੍ਥੋ. ਤੇਨਾਹ ‘‘ਤਸ੍ਸੇਵ ਵੇਵਚਨ’’ਨ੍ਤਿ. ਚਿਤ੍ਤਕ੍ਖਰਾਤਿ ਚਿਤ੍ਰਾਕਾਰਅਕ੍ਖਰਾ. ਇਤਰਂ ਤਸ੍ਸੇਵ ਵੇਵਚਨਂ. ਸਾਸਨਤੋ ਬਹਿਦ੍ਧਾ ਠਿਤਾਤਿ ਨ ਸਾਸਨਾਵਚਰਾ. ਬਾਹਿਰਕਸਾਵਕੇਹੀਤਿ ‘‘ਬੁਦ੍ਧਾ’’ਤਿ ਅਪ੍ਪਞ੍ਞਾਤਾਨਂ ਯੇਸਂ ਕੇਸਞ੍ਚਿ ਸਾਵਕੇਹਿ. ਸੁਸ੍ਸੂਸਿਸ੍ਸਨ੍ਤੀਤਿ ਅਕ੍ਖਰਚਿਤ੍ਤਤਾਯ ਚੇਵ ਸਰਸਮ੍ਪਤ੍ਤਿਯਾ ਚ ਅਤ੍ਤਮਨਾ ਹੁਤ੍ਵਾ ਸਾਮਣੇਰਦਹਰਭਿਕ੍ਖੁਮਾਤੁਗਾਮਮਹਾਗਹਪਤਿਕਾਦਯੋ ‘‘ਏਸ ਧਮ੍ਮਕਥਿਕੋ’’ਤਿ ਸਨ੍ਨਿਪਤਿਤ੍ਵਾ ਸੋਤੁਕਾਮਾ ਭਵਿਸ੍ਸਨ੍ਤਿ.

ਤਤਿਯਅਨਾਗਤਭਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਚਤੁਤ੍ਥਅਨਾਗਤਭਯਸੁਤ੍ਤਵਣ੍ਣਨਾ

੮੦. ਦਸਮੇ ਪਞ੍ਚਵਿਧੇਨ ਸਂਸਗ੍ਗੇਨਾਤਿ ‘‘ਸਵਨਸਂਸਗ੍ਗੋ, ਦਸ੍ਸਨਸਂਸਗ੍ਗੋ, ਸਮੁਲ੍ਲਾਪਸਂਸਗ੍ਗੋ, ਸਮ੍ਭੋਗਸਂਸਗ੍ਗੋ, ਕਾਯਸਂਸਗ੍ਗੋ’’ਤਿ ਏਵਂ ਵੁਤ੍ਤੇਨ ਪਞ੍ਚਵਿਧੇਨ ਸਂਸਗ੍ਗੇਨ. ਸਂਸਜ੍ਜਤਿ ਏਤੇਨਾਤਿ ਸਂਸਗ੍ਗੋ, ਰਾਗੋ. ਸਵਨਹੇਤੁਕੋ, ਸਵਨਵਸੇਨ ਵਾ ਪਵਤ੍ਤੋ ਸਂਸਗ੍ਗੋ ਸਵਨਸਂਸਗ੍ਗੋ. ਏਸ ਨਯੋ ਸੇਸੇਸੁਪਿ. ਕਾਯਸਂਸਗ੍ਗੋ ਪਨ ਕਾਯਪਰਾਮਾਸੋ. ਤੇਸੁ ਪਰੇਹਿ ਵਾ ਕਥਿਯਮਾਨਂ ਰੂਪਾਦਿਸਮ੍ਪਤ੍ਤਿਂ ਅਤ੍ਤਨਾ ਵਾ ਸਿਤਲਪਿਤਗੀਤਸਦ੍ਦਂ ਸੁਣਨ੍ਤਸ੍ਸ ਸੋਤਵਿਞ੍ਞਾਣਵੀਥਿਵਸੇਨ ਉਪ੍ਪਨ੍ਨੋ ਰਾਗੋ ਸਵਨਸਂਸਗ੍ਗੋ ਨਾਮ. ਵਿਸਭਾਗਰੂਪਂ ਓਲੋਕੇਨ੍ਤਸ੍ਸ ਪਨ ਚਕ੍ਖੁਵਿਞ੍ਞਾਣਵੀਥਿਵਸੇਨ ਉਪ੍ਪਨ੍ਨੋ ਰਾਗੋ ਦਸ੍ਸਨਸਂਸਗ੍ਗੋ ਨਾਮ. ਅਞ੍ਞਮਞ੍ਞਆਲਾਪਸਲ੍ਲਾਪਵਸੇਨ ਉਪ੍ਪਨ੍ਨਰਾਗੋ ਸਮੁਲ੍ਲਾਪਸਂਸਗ੍ਗੋ ਨਾਮ. ਭਿਕ੍ਖੁਨੋ ਭਿਕ੍ਖੁਨਿਯਾ ਸਨ੍ਤਕਂ, ਭਿਕ੍ਖੁਨਿਯਾ ਭਿਕ੍ਖੁਸ੍ਸ ਸਨ੍ਤਕਂ ਗਹੇਤ੍ਵਾ ਪਰਿਭੋਗਕਰਣਵਸੇਨ ਉਪ੍ਪਨ੍ਨਰਾਗੋ ਸਮ੍ਭੋਗਸਂਸਗ੍ਗੋ ਨਾਮ. ਹਤ੍ਥਗ੍ਗਾਹਾਦਿਵਸੇਨ ਉਪ੍ਪਨ੍ਨੋ ਰਾਗੋ ਕਾਯਸਂਸਗ੍ਗੋ ਨਾਮ.

ਅਨੇਕਵਿਹਿਤਨ੍ਤਿ ਅਨ੍ਨਸਨ੍ਨਿਧਿਪਾਨਸਨ੍ਨਿਧਿਵਤ੍ਥਸਨ੍ਨਿਧਿਯਾਨਸਨ੍ਨਿਧਿਸਯਨਸਨ੍ਨਿਧਿਗਨ੍ਧਸਨ੍ਨਿਧਿ- ਆਮਿਸਸਨ੍ਨਿਧਿਵਸੇਨ ਅਨੇਕਪ੍ਪਕਾਰਂ. ਸਨ੍ਨਿਧਿਕਤਸ੍ਸਾਤਿ ਏਤੇਨ ‘‘ਸਨ੍ਨਿਧਿਕਾਰਪਰਿਭੋਗ’’ਨ੍ਤਿ (ਧ. ਸ. ਤਿਕਮਾਤਿਕਾ ੧੦) ਏਤ੍ਥ ਕਾਰ-ਸਦ੍ਦਸ੍ਸ ਕਮ੍ਮਤ੍ਥਤਂ ਦਸ੍ਸੇਤਿ. ਯਥਾ ਵਾ ‘‘ਆਚਯਂ ਗਾਮਿਨੋ’’ਤਿ ਵਤ੍ਤਬ੍ਬੇ ਅਨੁਨਾਸਿਕਲੋਪੇਨ ‘‘ਆਚਯਗਾਮਿਨੋ’’ਤਿ ਨਿਦ੍ਦੇਸੋ ਕਤੋ, ਏਵਂ ‘‘ਸਨ੍ਨਿਧਿਕਾਰਂ ਪਰਿਭੋਗ’’ਨ੍ਤਿ ਵਤ੍ਤਬ੍ਬੇ ਅਨੁਨਾਸਿਕਲੋਪੇਨ ‘‘ਸਨ੍ਨਿਧਿਕਾਰਪਰਿਭੋਗ’’ਨ੍ਤਿ ਵੁਤ੍ਤਂ, ਸਨ੍ਨਿਧਿਂ ਕਤ੍ਵਾ ਪਰਿਭੋਗਨ੍ਤਿ ਅਤ੍ਥੋ.

‘‘ਸਨ੍ਨਿਧਿਕਤਸ੍ਸ ਪਰਿਭੋਗ’’ਨ੍ਤਿ ਏਤ੍ਥ (ਦੀ. ਨਿ. ਅਟ੍ਠ. ੧.੧੨) ਪਨ ਦੁਵਿਧਾ ਕਥਾ ਵਿਨਯਵਸੇਨ ਸਲ੍ਲੇਖਵਸੇਨ ਚ. ਵਿਨਯਵਸੇਨ ਤਾਵ ਯਂ ਕਿਞ੍ਚਿ ਅਨ੍ਨਂ ਅਜ੍ਜ ਪਟਿਗ੍ਗਹਿਤਂ ਅਪਰਜ੍ਜੁ ਸਨ੍ਨਿਧਿਕਾਰਂ ਹੋਤਿ, ਤਸ੍ਸ ਪਰਿਭੋਗੇ ਪਾਚਿਤ੍ਤਿਯਂ. ਅਤ੍ਤਨਾ ਲਦ੍ਧਂ ਪਨ ਸਾਮਣੇਰਾਨਂ ਦਤ੍ਵਾ ਤੇਹਿ ਲਦ੍ਧਂ ਵਾ ਪਾਪੇਤ੍ਵਾ ਦੁਤਿਯਦਿਵਸੇ ਭੁਞ੍ਜਿਤੁਂ ਵਟ੍ਟਤਿ, ਸਲ੍ਲੇਖੋ ਪਨ ਨ ਹੋਤਿ. ਪਾਨਸਨ੍ਨਿਧਿਮ੍ਹਿਪਿ ਏਸੇਵ ਨਯੋ. ਵਤ੍ਥਸਨ੍ਨਿਧਿਮ੍ਹਿ ਅਨਧਿਟ੍ਠਿਤਾਵਿਕਪ੍ਪਿਤਂ ਸਨ੍ਨਿਧਿ ਚ ਹੋਤਿ, ਸਲ੍ਲੇਖਞ੍ਚ ਕੋਪੇਤਿ. ਅਯਂ ਨਿਪ੍ਪਰਿਯਾਯਕਥਾ. ਪਰਿਯਾਯਤੋ ਪਨ ਤਿਚੀਵਰਸਨ੍ਤੁਟ੍ਠੇਨ ਭਵਿਤਬ੍ਬਂ, ਚਤੁਤ੍ਥਂ ਲਭਿਤ੍ਵਾ ਅਞ੍ਞਸ੍ਸ ਦਾਤਬ੍ਬਂ. ਸਚੇ ਯਸ੍ਸ ਕਸ੍ਸਚਿ ਦਾਤੁਂ ਨ ਸਕ੍ਕੋਤਿ, ਯਸ੍ਸ ਪਨ ਦਾਤੁਕਾਮੋ ਹੋਤਿ, ਸੋ ਉਦ੍ਦੇਸਤ੍ਥਾਯ ਵਾ ਪਰਿਪੁਚ੍ਛਤ੍ਥਾਯ ਵਾ ਗਤੋ, ਆਗਤਮਤ੍ਤੇ ਦਾਤਬ੍ਬਂ, ਅਦਾਤੁਂ ਨ ਵਟ੍ਟਤਿ. ਚੀਵਰੇ ਪਨ ਅਪ੍ਪਹੋਨ੍ਤੇ, ਸਤਿਯਾ ਵਾ ਪਚ੍ਚਾਸਾਯ ਅਨੁਞ੍ਞਾਤਕਾਲਂ ਠਪੇਤੁਂ ਵਟ੍ਟਤਿ. ਸੂਚਿਸੁਤ੍ਤਚੀਵਰਕਾਰਕਾਨਂ ਅਲਾਭੇ ਤਤੋਪਿ ਵਿਨਯਕਮ੍ਮਂ ਕਤ੍ਵਾ ਠਪੇਤੁਂ ਵਟ੍ਟਤਿ ‘‘ਇਮਸ੍ਮਿਂ ਜਿਣ੍ਣੇ ਪੁਨ ਈਦਿਸਂ ਕੁਤੋ ਲਭਿਸ੍ਸਾਮੀ’’ਤਿ ਪਨ ਠਪੇਤੁਂ ਨ ਵਟ੍ਟਤਿ, ਸਨ੍ਨਿਧਿ ਚ ਹੋਤਿ, ਸਲ੍ਲੇਖਞ੍ਚ ਕੋਪੇਤਿ.

ਯਾਨਸਨ੍ਨਿਧਿਮ੍ਹਿ ਯਾਨਂ ਨਾਮ ਵਯ੍ਹਂ ਰਥੋ ਸਕਟਂ ਸਨ੍ਦਮਾਨਿਕਾ ਪਾਟਙ੍ਕੀਤਿ. ਨ ਪਨੇਤਂ ਪਬ੍ਬਜਿਤਸ੍ਸ ਯਾਨਂ, ਉਪਾਹਨਂ ਪਨ ਯਾਨਂ. ਏਕਭਿਕ੍ਖੁਸ੍ਸ ਹਿ ਏਕੋ ਅਰਞ੍ਞਵਾਸਤ੍ਥਾਯ, ਏਕੋ ਧੋਤਪਾਦਕਤ੍ਥਾਯਾਤਿ ਉਕ੍ਕਂਸਤੋ ਦ੍ਵੇ ਉਪਾਹਨਸਙ੍ਘਾਟਕਾ ਵਟ੍ਟਨ੍ਤਿ, ਤਤਿਯਂ ਲਭਿਤ੍ਵਾ ਅਞ੍ਞਸ੍ਸ ਦਾਤਬ੍ਬੋ. ‘‘ਇਮਸ੍ਮਿਂ ਜਿਣ੍ਣੇ ਅਞ੍ਞਂ ਕੁਤੋ ਲਭਿਸ੍ਸਾਮੀ’’ਤਿ ਠਪੇਤੁਂ ਨ ਵਟ੍ਟਤਿ, ਸਨ੍ਨਿਧਿ ਚ ਹੋਤਿ, ਸਲ੍ਲੇਖਞ੍ਚ ਕੋਪੇਤਿ. ਸਯਨਸਨ੍ਨਿਧਿਮ੍ਹਿ ਸਯਨਨ੍ਤਿ ਮਞ੍ਚੋ. ਏਕਸ੍ਸ ਭਿਕ੍ਖੁਨੋ ਏਕੋ ਸਯਨਗਬ੍ਭੇ, ਏਕੋ ਦਿਵਾਟ੍ਠਾਨੇਤਿ ਉਕ੍ਕਂਸਤੋ ਦ੍ਵੇ ਮਞ੍ਚਾ ਵਟ੍ਟਨ੍ਤਿ. ਤਤੋ ਉਤ੍ਤਰਿਂ ਲਭਿਤ੍ਵਾ ਅਞ੍ਞਸ੍ਸ ਭਿਕ੍ਖੁਨੋ, ਗਣਸ੍ਸ ਵਾ ਦਾਤਬ੍ਬੋ, ਅਦਾਤੁਂ ਨ ਵਟ੍ਟਤਿ, ਸਨ੍ਨਿਧਿ ਚੇਵ ਹੋਤਿ, ਸਲ੍ਲੇਖੋ ਚ ਕੁਪ੍ਪਤਿ. ਗਨ੍ਧਸਨ੍ਨਿਧਿਮ੍ਹਿ ਭਿਕ੍ਖੁਨੋ ਕਣ੍ਡੁਕਚ੍ਛੁਛਵਿਦੋਸਾਦਿਆਬਾਧੇ ਸਤਿ ਗਨ੍ਧਾ ਵਟ੍ਟਨ੍ਤਿ. ਗਨ੍ਧਤ੍ਥਿਕੇਨ ਗਨ੍ਧਞ੍ਚ ਆਹਰਾਪੇਤ੍ਵਾ ਤਸ੍ਮਿਂ ਰੋਗੇ ਵੂਪਸਨ੍ਤੇ ਅਞ੍ਞੇਸਂ ਵਾ ਆਬਾਧਿਕਾਨਂ ਦਾਤਬ੍ਬਂ, ਦ੍ਵਾਰੇ ਪਞ੍ਚਙ੍ਗੁਲਿਘਰਧੂਪਨਾਦੀਸੁ ਵਾ ਉਪਨੇਤਬ੍ਬਂ. ‘‘ਪੁਨ ਰੋਗੇ ਸਤਿ ਭਵਿਸ੍ਸਤੀ’’ਤਿ ਠਪੇਤੁਂ ਨ ਵਟ੍ਟਤਿ, ਗਨ੍ਧਸਨ੍ਨਿਧਿ ਚ ਹੋਤਿ, ਸਲ੍ਲੇਖਞ੍ਚ ਕੋਪੇਤਿ.

ਆਮਿਸਨ੍ਤਿ ਵੁਤ੍ਤਾਵਸੇਸਂ ਦਟ੍ਠਬ੍ਬਂ. ਸੇਯ੍ਯਥਿਦਂ – ਇਧੇਕਚ੍ਚੋ ਭਿਕ੍ਖੁ ‘‘ਤਥਾਰੂਪੇ ਕਾਲੇ ਉਪਕਾਰਾਯ ਭਵਿਸ੍ਸਨ੍ਤੀ’’ਤਿ ਤਿਲਤਣ੍ਡੁਲਮੁਗ੍ਗਮਾਸਨਾਲ਼ਿਕੇਰਲੋਣਮਚ੍ਛਸਪ੍ਪਿਤੇਲਕੁਲਾਲਭਾਜਨਾਦੀਨਿ ਆਹਰਾਪੇਤ੍ਵਾ ਠਪੇਤਿ. ਸੋ ਵਸ੍ਸਕਾਲੇ ਕਾਲਸ੍ਸੇਵ ਸਾਮਣੇਰੇਹਿ ਯਾਗੁਂ ਪਚਾਪੇਤ੍ਵਾ ਪਰਿਭੁਞ੍ਜਿਤ੍ਵਾ ‘‘ਸਾਮਣੇਰ ਉਦਕਕਦ੍ਦਮੇ ਦੁਕ੍ਖਂ ਗਾਮਂ ਪਵਿਸਿਤੁਂ, ਗਚ੍ਛ ਅਸੁਕਕੁਲਂ ਗਨ੍ਤ੍ਵਾ ਮਯ੍ਹਂ ਵਿਹਾਰੇ ਨਿਸਿਨ੍ਨਭਾਵਂ ਆਰੋਚੇਹਿ, ਅਸੁਕਕੁਲਤੋ ਦਧਿਆਦੀਨਿ ਆਹਰਾ’’ਤਿ ਪੇਸੇਤਿ. ਭਿਕ੍ਖੂਹਿ ‘‘ਕਿਂ, ਭਨ੍ਤੇ, ਗਾਮਂ ਪਵਿਸਿਸ੍ਸਾਮਾ’’ਤਿ ਵੁਤ੍ਤੇਪਿ ‘‘ਦੁਪ੍ਪਵੇਸੋ, ਆਵੁਸੋ, ਇਦਾਨਿ ਗਾਮੋ’’ਤਿ ਵਦਤਿ. ਤੇ ‘‘ਹੋਤੁ, ਭਨ੍ਤੇ, ਅਚ੍ਛਥ ਤੁਮ੍ਹੇ, ਮਯਂ ਭਿਕ੍ਖਂ ਪਰਿਯੇਸਿਤ੍ਵਾ ਆਹਰਿਸ੍ਸਾਮਾ’’ਤਿ ਗਚ੍ਛਨ੍ਤਿ. ਅਥ ਸਾਮਣੇਰੋ ਦਧਿਆਦੀਨਿ ਆਹਰਿਤ੍ਵਾ ਭਤ੍ਤਞ੍ਚ ਬ੍ਯਞ੍ਜਨਞ੍ਚ ਸਮ੍ਪਾਦੇਤ੍ਵਾ ਉਪਨੇਤਿ, ਤਂ ਭੁਞ੍ਜਨ੍ਤਸ੍ਸੇਵ ਉਪਟ੍ਠਾਕਾ ਭਤ੍ਤਂ ਪਹਿਣਨ੍ਤਿ, ਤਤੋਪਿ ਮਨਾਪਮਨਾਪਂ ਭੁਞ੍ਜਤਿ. ਅਥ ਭਿਕ੍ਖੂ ਪਿਣ੍ਡਪਾਤਂ ਗਹੇਤ੍ਵਾ ਆਗਚ੍ਛਨ੍ਤਿ, ਤਤੋਪਿ ਮਨਾਪਮਨਾਪਂ ਭੁਞ੍ਜਤਿਯੇਵ. ਏਵਂ ਚਤੁਮਾਸਮ੍ਪਿ ਵੀਤਿਨਾਮੇਤਿ. ਅਯਂ ਵੁਚ੍ਚਤਿ ਭਿਕ੍ਖੁ ਮੁਣ੍ਡਕੁਟੁਮ੍ਬਿਕਜੀਵਿਕਂ ਜੀਵਤਿ, ਨ ਸਮਣਜੀਵਿਕਨ੍ਤਿ. ਏਵਰੂਪੋ ਆਮਿਸਸਨ੍ਨਿਧਿ ਨਾਮ ਹੋਤਿ. ਭਿਕ੍ਖੁਨੋ ਪਨ ਵਸਨਟ੍ਠਾਨੇ ਏਕਾ ਤਣ੍ਡੁਲਨਾਲ਼ਿ ਏਕੋ ਗੁਲ਼ਪਿਣ੍ਡੋ ਕੁਡੁਵਮਤ੍ਤਂ ਸਪ੍ਪੀਤਿ ਏਤ੍ਤਕਂ ਨਿਧੇਤੁਂ ਵਟ੍ਟਤਿ ਅਕਾਲੇ ਸਮ੍ਪਤ੍ਤਚੋਰਾਨਂ ਅਤ੍ਥਾਯ. ਤੇ ਹਿ ਏਤ੍ਤਕਂ ਆਮਿਸਪਟਿਸਨ੍ਥਾਰਂ ਅਲਭਨ੍ਤਾ ਜੀਵਿਤਾ ਵੋਰੋਪੇਯ੍ਯੁਂ, ਤਸ੍ਮਾ ਸਚੇ ਹਿ ਏਤ੍ਤਕਂ ਨਤ੍ਥਿ, ਆਹਰਾਪੇਤ੍ਵਾਪਿ ਠਪੇਤੁਂ ਵਟ੍ਟਤਿ. ਅਫਾਸੁਕਕਾਲੇ ਚ ਯਦੇਤ੍ਥ ਕਪ੍ਪਿਯਂ, ਤਂ ਅਤ੍ਤਨਾਪਿ ਪਰਿਭੁਞ੍ਜਿਤੁਂ ਵਟ੍ਟਤਿ. ਕਪ੍ਪਿਯਕੁਟਿਯਂ ਪਨ ਬਹੁਂ ਠਪੇਨ੍ਤਸ੍ਸਪਿ ਸਨ੍ਨਿਧਿ ਨਾਮ ਨਤ੍ਥਿ.

ਚਤੁਤ੍ਥਅਨਾਗਤਭਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਯੋਧਾਜੀਵਵਗ੍ਗਵਣ੍ਣਨਾ ਨਿਟ੍ਠਿਤਾ.