(੮) ੩. ਅਪਣ੍ਣਕਵਗ੍ਗੋ
੧-੨. ਪਧਾਨਸੁਤ੍ਤਾਦਿਵਣ੍ਣਨਾ
੭੧-੭੨. ਤਤਿਯਵਗ੍ਗਸ੍ਸ ਪਠਮੇ ਯਵਤਿ ਤੇਨ ਫਲਂ ਮਿਸ੍ਸਿਤਂ ਵਿਯ ਹੋਤੀਤਿ ਯੋਨਿ, ਏਕਨ੍ਤਿਕਂ ਕਾਰਣਂ. ਅਸ੍ਸਾਤਿ ਯਥਾਵੁਤ੍ਤਸ੍ਸ ਭਿਕ੍ਖੁਨੋ. ਪਰਿਪੁਣ੍ਣਨ੍ਤਿ ਅਵਿਕਲਂ ਅਨਵਸੇਸਂ. ਆਸਵੇ ਖੇਪੇਤੀਤਿ ਆਸਵਕ੍ਖਯੋ, ਅਗ੍ਗਮਗ੍ਗੋ. ਇਧ ਪਨ ਅਰਹਤ੍ਤਫਲਂ ਅਧਿਪ੍ਪੇਤਨ੍ਤਿ ਆਹ ‘‘ਅਰਹਤ੍ਤਤ੍ਥਾਯਾ’’ਤਿ. ਦੁਤਿਯਂ ਉਤ੍ਤਾਨਮੇਵ.
ਪਧਾਨਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੩-੫. ਸਪ੍ਪੁਰਿਸਸੁਤ੍ਤਾਦਿਵਣ੍ਣਨਾ
੭੩-੭੫. ਤਤਿਯੇ ਪਞ੍ਹਤ੍ਥਾਯ ਅਭਿਨੀਤੋਤਿ ਪਞ੍ਹਕਰਣਤ੍ਥਾਯ ਅਭਿਮੁਖਂ ਨੀਤੋ. ਅਲਮ੍ਬਿਤਂ ਕਤ੍ਵਾਤਿ ਅਲਮ੍ਬਂ ਕਤ੍ਵਾ, ਅਯਮੇਵ ਵਾ ਪਾਠੋ, ਵਿਪਲਮ੍ਬਂ ਅਕਤ੍ਵਾਤਿ ਅਤ੍ਥੋ. ਅਵਜਾਨਾਤੀਤਿ ਅਵਞ੍ਞਂ ਕਰੋਤਿ, ਨਿਨ੍ਦਤੀਤਿ ਅਤ੍ਥੋ. ਚਤੁਤ੍ਥਪਞ੍ਚਮੇ ਨਤ੍ਥਿ ਵਤ੍ਤਬ੍ਬਂ.
ਸਪ੍ਪੁਰਿਸਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੬. ਕੁਸਿਨਾਰਸੁਤ੍ਤਵਣ੍ਣਨਾ
੭੬. ਛਟ੍ਠੇ ਨਗਰਂ ਪਵਿਸਿਤੁਕਾਮਾ ਉਯ੍ਯਾਨਤੋ ਉਪੇਚ੍ਚ ਵਤ੍ਤਨ੍ਤਿ ਗਚ੍ਛਨ੍ਤਿ ਏਤੇਨਾਤਿ ਉਪਵਤ੍ਤਨਂ. ਯਥੇਵ ਹਿ ਕਲਮ੍ਬਨਦਿਤੀਰਤੋ ਰਾਜਮਾਤੁਵਿਹਾਰਦ੍ਵਾਰੇਨ ਥੂਪਾਰਾਮਂ ਗਨ੍ਤਬ੍ਬਂ ਹੋਤਿ, ਏਵਂ ਹਿਰਞ੍ਞਵਤਿਕਾਯ ਪਾਰਿਮਤੀਰਤੋ ਸਾਲਵਨਂ ਉਯ੍ਯਾਨਂ, ਯਥਾ ਅਨੁਰਾਧਪੁਰਸ੍ਸ ਥੂਪਾਰਾਮੋ ਦਕ੍ਖਿਣਪਚ੍ਛਿਮਦਿਸਾਯ, ਏਵਂ ਤਂ ਉਯ੍ਯਾਨਂ ਕੁਸਿਨਾਰਾਯ ਦਕ੍ਖਿਣਪਚ੍ਛਿਮਦਿਸਾਯ ਹੋਤਿ. ਯਥਾ ਥੂਪਾਰਾਮਤੋ ਦਕ੍ਖਿਣਦ੍ਵਾਰੇਨ ਨਗਰਂ ਪਵਿਸਨਮਗ੍ਗੋ ਪਾਚੀਨਮੁਖੋ ਗਨ੍ਤ੍ਵਾ ਉਤ੍ਤਰੇਨ ਨਿਵਤ੍ਤਤਿ, ਏਵਂ ਉਯ੍ਯਾਨਤੋ ਸਾਲਪਨ੍ਤਿ ਪਾਚੀਨਮੁਖਾ ਗਨ੍ਤ੍ਵਾ ਉਤ੍ਤਰੇਨ ਨਿਵਤ੍ਤਾ, ਤਸ੍ਮਾ ਤਂ ‘‘ਉਪਵਤ੍ਤਨ’’ਨ੍ਤਿ ਵੁਚ੍ਚਤਿ. ਅਨ੍ਤਰੇਤਿ ਦ੍ਵਿਨ੍ਨਂ ਸਾਲਰੁਕ੍ਖਾਨਂ ਵੇਮਜ੍ਝੇ. ਤਤ੍ਥ ਹਿ ਪਞ੍ਞਾਪਿਯਮਾਨਸ੍ਸ ਮਞ੍ਚਸ੍ਸ ਏਕਾ ਸਾਲਪਨ੍ਤਿ ਸੀਸਭਾਗੇ ਹੋਤਿ, ਏਕਾ ਪਾਦਭਾਗੇ. ਤਤ੍ਰਪਿ ਏਕੋ ਤਰੁਣਸਾਲੋ ਸੀਸਭਾਗਸ੍ਸ ਆਸਨ੍ਨੋ ਹੋਤਿ, ਏਕੋ ਪਾਦਭਾਗਸ੍ਸ. ਅਪਿਚ ਯਮਕਸਾਲਾ ਨਾਮ ਮੂਲਖਨ੍ਧਵਿਟਪਪਤ੍ਤੇਹਿ ਅਞ੍ਞਮਞ੍ਞਂ ਸਂਸਿਬ੍ਬਿਤ੍ਵਾ ਠਿਤਸਾਲਾਤਿਪਿ ਵਦਨ੍ਤਿ.
ਦ੍ਵੇਲ਼੍ਹਕਨ੍ਤਿ ਦ੍ਵਿਧਾਗਾਹੋ, ਅਨੇਕਂਸਗ੍ਗਾਹੋਤਿ ਅਤ੍ਥੋ. ਵਿਮਤੀਤਿ ਸਂਸਯਾਪਤ੍ਤੀਤਿ ਆਹ ‘‘ਵਿਨਿਚ੍ਛਿਤੁਂ ਅਸਮਤ੍ਥਤਾ’’ਤਿ. ਤਂ ਵੋ ਵਦਾਮੀਤਿ ਤਂ ਸਂਸਯਵਨ੍ਤਂ ਭਿਕ੍ਖੁਂ ਸਨ੍ਧਾਯ ਵੋ ਤੁਮ੍ਹੇ ਵਦਾਮੀਤਿ. ਨਿਕ੍ਕਙ੍ਖਭਾਵਪਚ੍ਚਕ੍ਖਕਰਣਨ੍ਤਿ ਬੁਦ੍ਧਾਦੀਸੁ ਤੇਸਂ ਭਿਕ੍ਖੂਨਂ ਨਿਕ੍ਕਙ੍ਖਭਾਵਸ੍ਸ ਪਚ੍ਚਕ੍ਖਕਾਰਿਯਾ ਯਾਥਾਵਤੋ ਤਮਤ੍ਥਂ ਪਟਿਵਿਜ੍ਝਿਤ੍ਵਾ ਠਿਤਂ ਸਬ੍ਬਞ੍ਞੁਤਞ੍ਞਾਣਮੇਵ. ਏਤ੍ਥਾਤਿ ਏਤਸ੍ਮਿਂ ਅਤ੍ਥੇ.
ਕੁਸਿਨਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੭. ਅਚਿਨ੍ਤੇਯ੍ਯਸੁਤ੍ਤਵਣ੍ਣਨਾ
੭੭. ਸਤ੍ਤਮੇ ਲੋਕਚਿਨ੍ਤਾਤਿ ਲੋਕਸਨ੍ਨਿਵੇਸਪ੍ਪਟਿਸਂਯੁਤ੍ਤਾ ਵੀਮਂਸਾ. ਤੇਨਾਹ ‘‘ਕੇਨ ਨੁ ਖੋ ਚਨ੍ਦਿਮਸੂਰਿਯਾ’’ਤਿਆਦਿ. ਨਾਲ਼ਿਕੇਰਾਦਯੋਤਿ ਆਦਿ-ਸਦ੍ਦੇਨ ਅਵੁਤ੍ਤਾਨਂ ਓਸਧਿਤਿਣਵਨਪ੍ਪਤਿਆਦੀਨਂ ਸਙ੍ਗਹੋ. ਏਵਰੂਪਾ ਲੋਕਚਿਨ੍ਤਾਤਿ ਏਦਿਸਾ ਵੁਤ੍ਤਸਦਿਸਾ ਅਞ੍ਞਾਪਿ ਸਾ ਲੋਕਚਿਨ੍ਤਾ.
ਅਚਿਨ੍ਤੇਯ੍ਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮. ਦਕ੍ਖਿਣਸੁਤ੍ਤਵਣ੍ਣਨਾ
੭੮. ਅਟ੍ਠਮੇ ਦਾਨਸਙ੍ਖਾਤਾਯ ਦਕ੍ਖਿਣਾਯਾਤਿ ਦੇਯ੍ਯਧਮ੍ਮਸਙ੍ਖਾਤਾਯ ਦਕ੍ਖਿਣਾਯ. ਵਿਸੁਦ੍ਧਿ ਨਾਮ ਮਹਾਜੁਤਿਕਤਾ. ਸਾ ਪਨ ਮਹਪ੍ਫਲਤਾਯ ਵੇਦਿਤਬ੍ਬਾਤਿ ਆਹ ‘‘ਮਹਪ੍ਫਲਭਾਵੇਨਾ’’ਤਿ. ਵਿਸੁਜ੍ਝਤੀਤਿ ਨ ਕਿਲਿਸ੍ਸਤਿ, ਅਮਲਿਨਾ ਮਹਾਜੁਤਿਕਾ ਮਹਾਵਿਪ੍ਫਾਰਾ ਹੋਤੀਤਿ ਅਤ੍ਥੋ. ਸੁਚਿਧਮ੍ਮੋਤਿ ਰਾਗਾਦਿਅਸੁਚਿਵਿਧਮਨੇਨ ਸੁਚਿਸਭਾਵੋ. ਲਾਮਕਧਮ੍ਮੋਤਿ ਹੀਨਸਭਾਵੋ ਪਾਪਕਿਰਿਯਾਯ. ਅਕੁਸਲਧਮ੍ਮਾ ਹਿ ਏਕਨ੍ਤਨਿਹੀਨਾ. ਜੂਜਕੋ ਸੀਲਵਾ ਕਲ੍ਯਾਣਧਮ੍ਮੋ ਨ ਹੋਤਿ, ਤਸ੍ਸ ਮਹਾਬੋਧਿਸਤ੍ਤਸ੍ਸ ਅਤ੍ਤਨੋ ਪੁਤ੍ਤਦਾਨਂ ਦਾਨਪਾਰਮਿਯਾ ਮਤ੍ਥਕਂ ਗਣ੍ਹਨ੍ਤਂ ਮਹਾਪਥਵਿਕਮ੍ਪਨਸਮਤ੍ਥਂ ਜਾਤਂ. ਸ੍ਵਾਯਂ ਦਾਯਕਗੁਣੋਤਿ ਆਹ ‘‘ਵੇਸ੍ਸਨ੍ਤਰਮਹਾਰਾਜਾ ਕਥੇਤਬ੍ਬੋ’’ਤਿਆਦਿ. ਉਦ੍ਧਰਤੀਤਿ ਬਹੁਲਂ ਪਾਪਕਮ੍ਮਵਸੇਨ ਲਦ੍ਧਬ੍ਬਵਿਨਿਪਾਤਤੋ ਉਦ੍ਧਰਤਿ, ਤਸ੍ਮਾ ਨਤ੍ਥਿ ਮਯ੍ਹਂ ਕਿਞ੍ਚਿ ਚਿਤ੍ਤਸ੍ਸ ਅਞ੍ਞਤ੍ਥਤ੍ਤਨ੍ਤਿ ਅਧਿਪ੍ਪਾਯੋ.
ਪੇਤਦਕ੍ਖਿਣਨ੍ਤਿ ਪੇਤੇ ਉਦ੍ਦਿਸ੍ਸ ਦਾਤਬ੍ਬਦਕ੍ਖਿਣਂ. ਪਾਪਿਤਕਾਲੇਯੇਵਾਤਿ ‘‘ਇਦਂ ਦਾਨਂ ਅਸੁਕਸ੍ਸ ਪੇਤਸ੍ਸ ਹੋਤੂ’’ਤਿ ਤਂਉਦ੍ਦਿਸਨਵਸੇਨ ਪਤ੍ਤਿਯਾ ਪਾਪਿਤਕਾਲੇਯੇਵ. ਅਸ੍ਸਾਤਿ ਪੇਤਸ੍ਸ. ਪਾਪੁਣੀਤਿ ਫਲਸਮ੍ਪਤ੍ਤਿਲਭਾਪਨਵਸੇਨ ਪਾਪੁਣਿ. ਅਯਞ੍ਹਿ ਪੇਤੇ ਉਦ੍ਦਿਸ੍ਸ ਦਾਨੇ ਧਮ੍ਮਤਾ. ਤਦਾ ਕੋਸਲਰਞ੍ਞੋ ਪਰਿਚ੍ਚਾਗਵਸੇਨ ਅਤਿਵਿਯ ਦਾਨਜ੍ਝਾਸਯਤਂ ਬੁਦ੍ਧਪ੍ਪਮੁਖਸ੍ਸ ਚ ਸਙ੍ਘਸ੍ਸ ਉਕ੍ਕਂਸਗਤਗੁਣਵਿਸਿਟ੍ਠਤਂ ਸਨ੍ਧਾਯਾਹ ‘‘ਅਸਦਿਸਦਾਨਂ ਕਥੇਤਬ੍ਬ’’ਨ੍ਤਿ.
ਦਕ੍ਖਿਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯-੧੦. ਵਣਿਜ੍ਜਸੁਤ੍ਤਾਦਿਵਣ੍ਣਨਾ
੭੯-੮੦. ਨਵਮੇ ਤਂਸਦਿਸਾਤਿ ਯਾਦਿਸਾ ਵਣਿਜ੍ਜਾ ਪਯੁਤ੍ਤਾ ਅਯਥਾਧਿਪ੍ਪਾਯਾ ਅਞ੍ਞਾ ਵਾ ਸਮ੍ਪਜ੍ਜਤਿ, ਤਾਦਿਸਾਵਾਤਿ ਅਤ੍ਥੋ. ਛੇਦਂ ਗਚ੍ਛਤੀਤਿ ਵਿਨਾਸਂ ਪਾਪੁਣਾਤਿ. ਅਧਿਪ੍ਪਾਯਤੋ ਪਰਾ ਵਿਸਿਟ੍ਠਾਤਿ ਪਰਾਧਿਪ੍ਪਾਯੋ. ਤੇਨੇਵਾਹ ‘‘ਅਜ੍ਝਾਸਯਤੋ ਅਧਿਕਤਰਫਲਾ ਹੋਤੀ’’ਤਿ. ਚੀਵਰਾਦਿਨਾ ਪਚ੍ਚਯੇਨ ਵਦੇਯ੍ਯਾਸੀਤਿ ਚੀਵਰਾਦਿਪਚ੍ਚਯਹੇਤੁ ਮਂ ਵਦੇਯ੍ਯਾਸਿ ਪਤ੍ਥੇਯ੍ਯਾਸਿ. ਅਥ ਵਾ ਯਦਾ ਚੀਵਰਾਦਿਨਾ ਪਚ੍ਚਯੇਨ ਅਤ੍ਥੋ ਹੋਤਿ, ਤਦਾ ਮਂ ਯਾਚੇਯ੍ਯਾਸੀਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵ. ਦਸਮਂ ਉਤ੍ਤਾਨਮੇਵ.
ਵਣਿਜ੍ਜਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
ਅਪਣ੍ਣਕਵਗ੍ਗਵਣ੍ਣਨਾ ਨਿਟ੍ਠਿਤਾ.