(੯) ੪. ਮਚਲਵਗ੍ਗੋ

੧-੬. ਪਾਣਾਤਿਪਾਤਸੁਤ੍ਤਾਦਿਵਣ੍ਣਨਾ

੮੧-੮੬. ਚਤੁਤ੍ਥਸ੍ਸ ਪਠਮਾਦੀਨਿ ਉਤ੍ਤਾਨਤ੍ਥਾਨੇਵ. ਪਞ੍ਚਮੇ (ਸਂ. ਨਿ. ਟੀ. ੧.੧.੧੩੨) ‘‘ਨੀਚੇ ਕੁਲੇ ਪਚ੍ਚਾਜਾਤੋ’’ਤਿਆਦਿਕੇਨ ਅਪ੍ਪਕਾਸਭਾਵੇਨ ਤਮਤੀਤਿ ਤਮੋ, ਤੇਨ ਤਮੇਨ ਯੁਤ੍ਤੋਤਿ ਤਮੋ ਪੁਗ੍ਗਲੋ ਵੁਚ੍ਚਤਿ. ਤਥਾ ਹਿ ਤਂਯੋਗਤੋ ਪੁਗ੍ਗਲਸ੍ਸ ਤਬ੍ਬੋਹਾਰੋ ਯਥਾ ‘‘ਮਚ੍ਛੇਰਯੋਗਤੋ ਮਚ੍ਛਰੋ’’ਤਿ, ਤਸ੍ਮਾ ਤਮੋਤਿ ਅਪ੍ਪਕਾਸਭਾਵੇਨ ਤਮੋ ਤਮਭੂਤੋ ਅਨ੍ਧਕਾਰਂ ਵਿਯ ਜਾਤੋ, ਅਨ੍ਧਕਾਰਤ੍ਤਂ ਵਾ ਪਤ੍ਤੋਤਿ ਅਤ੍ਥੋ. ਵੁਤ੍ਤਲਕ੍ਖਣਂ ਤਮਮੇਵ ਪਰਮ੍ਪਰਤੋ ਅਯਨਂ ਗਤਿ ਨਿਟ੍ਠਾ ਏਤਸ੍ਸਾਤਿ ਤਮਪਰਾਯਣੋ. ਉਭਯੇਨਪਿ ਤਮਗ੍ਗਹਣੇਨ ਖਨ੍ਧਤਮੋ ਕਥਿਤੋ, ਨ ਅਨ੍ਧਕਾਰਤਮੋ. ਖਨ੍ਧਤਮੋਤਿ ਚ ਸਮ੍ਪਤ੍ਤਿਰਹਿਤਾ ਖਨ੍ਧਪਵਤ੍ਤਿਯੇਵ ਦਟ੍ਠਬ੍ਬਾ. ‘‘ਉਚ੍ਚੇ ਕੁਲੇ ਪਚ੍ਚਾਜਾਤੋ’’ਤਿਆਦਿਕੇਨ ਪਕਾਸਭਾਵੇਨ ਜੋਤੇਤੀਤਿ ਜੋਤਿ, ਤੇਨ ਜੋਤਿਨਾਯੁਤ੍ਤੋਤਿਆਦਿ ਸਬ੍ਬਂ ਵੁਤ੍ਤਨਯੇਨ ਵੇਦਿਤਬ੍ਬਂ. ਇਤਰੇ ਦ੍ਵੇਤਿ ਜੋਤਿਤਮਪਰਾਯਣੋ, ਜੋਤਿਜੋਤਿਪਰਾਯਣੋਤਿ ਇਤਰੇ ਦ੍ਵੇ ਪੁਗ੍ਗਲੇ.

ਵੇਣੁਵੇਤ੍ਤਾਦਿਵਿਲੀਵੇਹਿ ਪੇਲ਼ਭਾਜਨਾਦਿਕਾਰਕਾ ਵਿਲੀਵਕਾਰਕਾ. ਮਿਗਮਚ੍ਛਾਦੀਨਂ ਨਿਸਾਦਨਤੋ ਨੇਸਾਦਾ, ਮਾਗਵਿਕਮਚ੍ਛਬਨ੍ਧਾਦਯੋ. ਰਥੇਸੁ ਚਮ੍ਮੇਨ ਨਹਣਕਰਣਤੋ ਰਥਕਾਰਾ, ਚਮ੍ਮਕਾਰਾ. ਪੁਇਤਿ ਕਰੀਸਸ੍ਸ ਨਾਮਂ, ਤਂ ਕੁਸੇਨ੍ਤਿ ਅਪਨੇਨ੍ਤੀਤਿ ਪੁਕ੍ਕੁਸਾ, ਪੁਪ੍ਫਛਡ੍ਡਕਾ. ਦੁਬ੍ਬਣ੍ਣੋਤਿ ਵਿਰੂਪੋ. ਓਕੋਟਿਮਕੋਤਿ ਆਰੋਹਾਭਾਵੇਨ ਹੇਟ੍ਠਿਮਕੋ, ਰਸ੍ਸਕਾਯੋਤਿ ਅਤ੍ਥੋ. ਤੇਨਾਹ ‘‘ਲਕੁਣ੍ਡਕੋ’’ਤਿ. ਲਕੁ ਵਿਯ ਘਟਿਕਾ ਵਿਯ ਡੇਤਿ ਪਵਤ੍ਤਤੀਤਿ ਲਕੁਣ੍ਡਕੋ, ਰਸ੍ਸੋ. ਕਣਤਿ ਨਿਮੀਲਤੀਤਿ ਕਾਣੋ. ਤਂ ਪਨਸ੍ਸ ਨਿਮੀਲਨਂ ਏਕੇਨ ਅਕ੍ਖਿਨਾ ਦ੍ਵੀਹਿਪਿ ਵਾਤਿ ਆਹ ‘‘ਏਕਚ੍ਛਿਕਾਣੋ ਵਾ ਉਭਯਚ੍ਛਿਕਾਣੋ ਵਾ’’ਤਿ. ਕੁਣਨਂ ਕੁਣੋ, ਹਤ੍ਥਵੇਕਲ੍ਲਂ, ਸੋ ਏਤਸ੍ਸ ਅਤ੍ਥੀਤਿ ਕੁਣੀ. ਖਞ੍ਜੋ ਵੁਚ੍ਚਤਿ ਪਾਦਵਿਕਲੋ. ਹੇਟ੍ਠਿਮਕਾਯਸਙ੍ਖਾਤੋ ਸਰੀਰਸ੍ਸ ਪਕ੍ਖੋ ਪਦੇਸੋ ਹਤੋ ਅਸ੍ਸਾਤਿ ਪਕ੍ਖਹਤੋ. ਤੇਨਾਹ ‘‘ਪੀਠਸਪ੍ਪੀ’’ਤਿ. ਪਦੀਪੇ ਪਦੀਪਨੇ ਏਤਬ੍ਬਂ ਨੇਤਬ੍ਬਨ੍ਤਿ ਪਦੀਪੇਯ੍ਯਂ, ਤੇਲਕਪਾਲਾਦਿਉਪਕਰਣਂ. ਵੁਤ੍ਤਨ੍ਤਿ ਅਟ੍ਠਕਥਾਯਂ ਵੁਤ੍ਤਂ.

ਆਗਮਨਵਿਪਤ੍ਤੀਤਿ ਆਗਮਨਟ੍ਠਾਨਵਸੇਨ ਵਿਪਤ੍ਤਿ ‘‘ਆਗਮੋ ਏਤ੍ਥਾ’’ਤਿ ਕਤ੍ਵਾ. ਪੁਬ੍ਬੁਪ੍ਪਨ੍ਨਪਚ੍ਚਯਵਿਪਤ੍ਤੀਤਿ ਪਠਮੁਪ੍ਪਨ੍ਨਪਚ੍ਚਯਵਸੇਨ ਵਿਪਰਾਵਤ੍ਤਿ. ਚਣ੍ਡਾਲਾਦਿਸਭਾਵਾ ਹਿਸ੍ਸ ਮਾਤਾਪਿਤਰੋ ਪਠਮੁਪ੍ਪਨ੍ਨਪਚ੍ਚਯੋ. ਪਵਤ੍ਤਪਚ੍ਚਯਵਿਪਤ੍ਤੀਤਿ ਪਵਤ੍ਤੇ ਸੁਖਪਚ੍ਚਯਵਿਪਤ੍ਤਿ. ਤਾਦਿਸੇ ਨਿਹੀਨਕੁਲੇ ਉਪ੍ਪਨ੍ਨੋਪਿ ਕੋਚਿ ਵਿਭਵਸਮ੍ਪਨ੍ਨੋ ਸਿਯਾ, ਅਯਂ ਪਨ ਦੁਗ੍ਗਤੋ ਦੁਰੂਪੋ. ਆਜੀਵੁਪਾਯਵਿਪਤ੍ਤੀਤਿ ਆਜੀਵਨੁਪਾਯਵਸੇਨ ਵਿਪਤ੍ਤਿ. ਸੁਖੇਨ ਹਿ ਜੀਵਿਕਂ ਪਵਤ੍ਤੇਤੁਂ ਉਪਾਯਭੂਤਾ ਹਤ੍ਥਿਸਿਪ੍ਪਾਦਯੋ ਇਮਸ੍ਸ ਨਤ੍ਥਿ, ਪੁਪ੍ਫਛਡ੍ਡਨਸਿਲਾਕੋਟ੍ਟਨਾਦਿਕਮ੍ਮਂ ਪਨ ਕਤ੍ਵਾ ਜੀਵਿਕਂ ਪਵਤ੍ਤੇਤਿ. ਤੇਨਾਹ ‘‘ਕਸਿਰਵੁਤ੍ਤਿਕੇ’’ਤਿ. ਅਤ੍ਤਭਾਵਵਿਪਤ੍ਤੀਤਿ ਉਪਧਿਵਿਪਤ੍ਤਿ. ਦੁਕ੍ਖਕਾਰਣਸਮਾਯੋਗੋਤਿ ਕਾਯਿਕਚੇਤਸਿਕਦੁਕ੍ਖੁਪ੍ਪਤ੍ਤਿਯਾ ਪਚ੍ਚਯਸਮੋਧਾਨਂ. ਸੁਖਕਾਰਣਵਿਪਤ੍ਤੀਤਿ ਸੁਖਪਚ੍ਚਯਪਰਿਹਾਨਿ. ਉਪਭੋਗਵਿਪਤ੍ਤੀਤਿ ਉਪਭੋਗਸੁਖਸ੍ਸ ਵਿਨਾਸੋ ਅਨੁਪਲਦ੍ਧਿ. ਜੋਤਿ ਚੇਵ ਜੋਤਿਪਰਾਯਣਭਾਵੋ ਚ ਸੁਕ੍ਕਪਕ੍ਖੋ. ਛਟ੍ਠਂ ਉਤ੍ਤਾਨਮੇਵ.

ਪਾਣਾਤਿਪਾਤਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੭. ਪੁਤ੍ਤਸੁਤ੍ਤਵਣ੍ਣਨਾ

੮੭. ਸਤ੍ਤਮੇ ਮ-ਕਾਰੋ ਪਦਸਨ੍ਧਿਕਰੋ ‘‘ਅਞ੍ਞਮਞ੍ਞ’’ਨ੍ਤਿਆਦੀਸੁ ਵਿਯ. ਨਿਚ੍ਚਲਸਮਣੋਤਿ ਥਿਰਸਮਣੋ. ਅਭਿਸਿਞ੍ਚਿਤਬ੍ਬੋਤਿ ਅਭਿਸੇਕੋਤਿ ਕਮ੍ਮਸਾਧਨੋ ਅਭਿਸੇਕਸਦ੍ਦੋ. ਤੇਨਾਹ ‘‘ਅਭਿਸੇਕਂ ਕਾਤੁਂ ਯੁਤ੍ਤੋ’’ਤਿ.

ਬਾਕੁਲਤ੍ਥੇਰੋ ਵਿਯਾਤਿ ਥੇਰੋ ਹਿ ਮਹਾਯਸਸ੍ਸੀ, ਤਸ੍ਸ ਪੁਤ੍ਤਧੀਤਰੋ ਨਤ੍ਤੁਪਨਤ੍ਤਕਾ ਸੁਖੁਮਸਾਟਕੇਹਿ ਚੀਵਰਾਨਿ ਕਾਰੇਤ੍ਵਾ ਰਜਾਪੇਤ੍ਵਾ ਸਮੁਗ੍ਗੇ ਪਕ੍ਖਿਪਿਤ੍ਵਾ ਪਹਿਣਨ੍ਤਿ. ਥੇਰਸ੍ਸ ਨਹਾਨਕਾਲੇ ਨਹਾਨਕੋਟ੍ਠਕੇ ਠਪੇਨ੍ਤਿ. ਥੇਰੋ ਤਾਨਿ ਨਿਵਾਸੇਤਿ ਚੇਵ ਪਾਰੁਪਤਿ ਚ. ਤੇਨੇਵੇਤਂ ਵੁਤ੍ਤਂ.

ਖਦਿਰਵਨਮਗ੍ਗੇ ਸੀਵਲਿਤ੍ਥੇਰੋ ਵਿਯਾਤਿ ਸਤ੍ਥਰਿ ਕਿਰ ਤਂ ਮਗ੍ਗਂ ਪਟਿਪਨ੍ਨੇ ਦੇਵਤਾ ‘‘ਅਮ੍ਹਾਕਂ ਅਯ੍ਯਸ੍ਸ ਸੀਵਲਿਤ੍ਥੇਰਸ੍ਸ ਸਕ੍ਕਾਰਂ ਕਰਿਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ਏਕੇਕਯੋਜਨੇ ਵਿਹਾਰਂ ਕਾਰੇਤ੍ਵਾ ਏਕਯੋਜਨਤੋ ਉਦ੍ਧਂ ਗਨ੍ਤੁਂ ਅਦਤ੍ਵਾ ਪਾਤੋਵ ਉਟ੍ਠਾਯ ਦਿਬ੍ਬਾਨਿ ਯਾਗੁਆਦੀਨਿ ਗਹੇਤ੍ਵਾ ‘‘ਅਮ੍ਹਾਕਂ ਅਯ੍ਯੋ ਸੀਵਲਿਤ੍ਥੇਰੋ ਕਹਂ ਨਿਸਿਨ੍ਨੋ’’ਤਿ ਵਿਚਰਨ੍ਤਿ. ਥੇਰੋ ਅਤ੍ਤਨੋ ਅਭਿਹਟਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਾਪੇਸਿ. ਏਵਂ ਸਤ੍ਥਾ ਸਪਰਿਵਾਰੋ ਤਿਂਸਯੋਜਨਿਕਂ ਕਨ੍ਤਾਰਂ ਸੀਵਲਿਤ੍ਥੇਰਸ੍ਸ ਪੁਞ੍ਞਫਲਂ ਅਨੁਭਵਮਾਨੋਵ ਅਗਮਾਸਿ. ਤੇਨੇਵੇਤਂ ਵੁਤ੍ਤਂ.

ਅਟ੍ਠਕਨਾਗਰਸੁਤ੍ਤੇ ਆਨਨ੍ਦਤ੍ਥੇਰੋ ਵਿਯਾਤਿ ਅਟ੍ਠਕਨਾਗਰਕੋ ਕਿਰ ਗਹਪਤਿ ਥੇਰਸ੍ਸ ਧਮ੍ਮਦੇਸਨਾਯ ਪਸੀਦਿਤ੍ਵਾ ਪਞ੍ਚਸਤਗ੍ਘਨਕਂ ਵਿਹਾਰਂ ਕਾਰੇਤ੍ਵਾ ਅਦਾਸਿ. ਤਂ ਸਨ੍ਧਾਯੇਤਂ ਵੁਤ੍ਤਂ.

ਪਿਲਿਨ੍ਦਵਚ੍ਛਤ੍ਥੇਰੋ ਵਿਯਾਤਿ ਥੇਰਸ੍ਸ ਕਿਰ ਇਦ੍ਧਾਨੁਭਾਵੇਨ ਪਸਨ੍ਨਾ ਮਨੁਸ੍ਸਾ ਸਪ੍ਪਿਆਦੀਨਿ ਬਹੂਨਿ ਭੇਸਜ੍ਜਾਨਿ ਅਭਿਹਰਿਂਸੁ. ਪਕਤਿਯਾਪਿ ਚ ਆਯਸ੍ਮਾ ਪਿਲਿਨ੍ਦਵਚ੍ਛੋ ਲਾਭੀ ਹੋਤਿ ਪਞ੍ਚਨ੍ਨਂ ਭੇਸਜ੍ਜਾਨਂ, ਲਦ੍ਧਂ ਲਦ੍ਧਂ ਪਰਿਸਾਯ ਵਿਸ੍ਸਜ੍ਜੇਤਿ. ਤੇਨੇਤਂ ਵੁਤ੍ਤਂ ‘‘ਗਿਲਾਨਪਚ੍ਚਯਂ ਪਿਲਿਨ੍ਦਵਚ੍ਛਤ੍ਥੇਰੋ ਵਿਯਾ’’ਤਿ.

ਤਿਣ੍ਣਮ੍ਪਿ ਸਨ੍ਨਿਪਾਤੇਨ ਨਿਬ੍ਬਤ੍ਤਾਨੀਤਿ ਪਿਤ੍ਤਾਦੀਨਂ ਤਿਣ੍ਣਮ੍ਪਿ ਵਿਸਮਾਨਂ ਸਨ੍ਨਿਪਾਤੇਨ ਜਾਤਾਨਿ. ਅਤਿਸੀਤਾਦਿਭਾਵੇਨ ਉਤੂਨਂ ਪਰਿਣਾਮੋਤਿ ਆਹ ‘‘ਅਤਿਸੀਤਅਤਿਉਣ੍ਹਉਤੁਤੋ ਜਾਤਾਨੀ’’ਤਿ. ਪੁਰਿਮਉਤੁਤੋ ਵਿਸਦਿਸੋ ਉਤੁ ਉਤੁਪਰਿਣਾਮੋ, ਤਤੋ ਜਾਤਾਨਿ ਉਤੁਪਰਿਣਾਮਜਾਨਿ, ਵਿਸਭਾਗਉਤੁਤੋ ਜਾਤਾਨੀਤਿ ਅਤ੍ਥੋ. ਜਙ੍ਗਲਦੇਸਵਾਸੀਨਞ੍ਹਿ ਅਨੂਪਦੇਸੇ ਵਸਨ੍ਤਾਨਂ ਵਿਸਭਾਗੋਵ ਉਤੁ ਉਪ੍ਪਜ੍ਜਤਿ, ਅਨੂਪਦੇਸਵਾਸੀਨਞ੍ਚ ਜਙ੍ਗਲਦੇਸੇਤਿ. ਏਵਂ ਮਲਯਸਮੁਦ੍ਦਤੀਰਾਦਿਵਸੇਨਪਿ ਉਤੁਵਿਸਭਾਗਤਾ ਉਪ੍ਪਜ੍ਜਤਿਯੇਵ. ਤਤੋ ਜਾਤਾਨਿ ਉਤੁਪਰਿਣਾਮਜਾਨਿ ਨਾਮ.

ਅਤ੍ਤਨੋ ਪਕਤਿਚਰਿਯਾਨਂ ਵਿਸਮਂ ਕਾਯਸ੍ਸ ਪਰਿਹਰਣਵਸੇਨ ਵਿਸਮਪਰਿਹਾਰਜਾਨਿ. ਤਾਨਿ ਪਨ ਅਚ੍ਚਾਸਨਅਤਿਟ੍ਠਾਨਾਦਿਨਾ ਵੇਦਿਤਬ੍ਬਾਨੀਤਿ ਆਹ ‘‘ਅਚ੍ਚਾਸਨਅਤਿਟ੍ਠਾਨਾਦਿਕਾ’’ਤਿ. ਆਦਿ-ਸਦ੍ਦੇਨ ਮਹਾਭਾਰਵਹਣਸੁਧਾਕੋਟ੍ਟਨਅਦੇਸਕਾਲਚਰਣਾਦੀਨਿ ਸਙ੍ਗਣ੍ਹਾਤਿ. ਪਰਸ੍ਸ ਉਪਕ੍ਕਮਤੋ ਨਿਬ੍ਬਤ੍ਤਾਨਿ ਓਪਕ੍ਕਮਿਕਾਨਿ, ਅਯਂ ਚੋਰੋਤਿ ਵਾ ਪਾਰਦਾਰਿਕੋਤਿ ਵਾ ਗਹੇਤ੍ਵਾ ਜਣ੍ਣੁਕਕਪ੍ਪਰਮੁਗ੍ਗਰਾਦੀਹਿ ਨਿਪ੍ਪੋਥਨਉਪਕ੍ਕਮਂ ਪਚ੍ਚਯਂ ਕਤ੍ਵਾ ਉਪ੍ਪਨ੍ਨਾਨੀਤਿ ਅਤ੍ਥੋ. ਤੇਨਾਹ ‘‘ਵਧਬਨ੍ਧਨਾਦਿਉਪਕ੍ਕਮੇਨ ਨਿਬ੍ਬਤ੍ਤਾਨੀ’’ਤਿ. ਕੇਵਲਨ੍ਤਿ ਬਾਹਿਰਂ ਪਚ੍ਚਯਂ ਅਨਪੇਕ੍ਖਿਤ੍ਵਾ ਕੇਵਲਂ, ਤੇਨ ਵਿਨਾਤਿ ਅਤ੍ਥੋ. ਤੇਨਾਹ ‘‘ਪੁਬ੍ਬੇਕਤਕਮ੍ਮਵਿਪਾਕਵਸੇਨੇਵ ਜਾਤਾਨੀ’’ਤਿ.

ਪੁਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮-੧੦. ਸਂਯੋਜਨਸੁਤ੍ਤਾਦਿਵਣ੍ਣਨਾ

੮੮-੯੦. ਅਟ੍ਠਮੇ ਸੋਤਾਪਨ੍ਨੋ ਚਤੂਹਿ ਵਾਤੇਹਿ ਇਨ੍ਦਖੀਲੋ ਵਿਯ ਪਰਪ੍ਪਵਾਦੇਹਿ ਅਕਮ੍ਪਿਯੋ ਅਚਲਸਦ੍ਧਾਯ ਸਮਨ੍ਨਾਗਤਤ੍ਤਾ ਸਾਸਨੇ ਲਦ੍ਧਪ੍ਪਤਿਟ੍ਠੋ ਸਮਣਮਚਲੋ ਨਾਮਾਤਿ ਆਹ ‘‘ਸਾਸਨੇ ਲਦ੍ਧਪ੍ਪਤਿਟ੍ਠਤ੍ਤਾ’’ਤਿਆਦਿ. ਥਦ੍ਧਭਾਵਕਰਾਨਂ ਕਿਲੇਸਾਨਂ ਸਬ੍ਬਸੋ ਸਮੁਚ੍ਛਿਨ੍ਨਤ੍ਤਾਤਿ ਚਿਤ੍ਤਸ੍ਸ ਥਦ੍ਧਭਾਵਕਰਾਨਂ ਉਦ੍ਧਮ੍ਭਾਗਿਯਕਿਲੇਸਾਨਂ ਸਬ੍ਬਸੋ ਅਭਾਵਾ ਸਮਣਸੁਖੁਮਾਲੋ ਨਾਮ ਸੁਖੁਮਾਲਭਾਵਪ੍ਪਤ੍ਤਿਤੋ. ਨਵਮਦਸਮਾਨਿ ਸੁਵਿਞ੍ਞੇਯ੍ਯਾਨੇਵ.

ਸਂਯੋਜਨਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਮਚਲਵਗ੍ਗਵਣ੍ਣਨਾ ਨਿਟ੍ਠਿਤਾ.