(੧੦) ੫. ਅਸੁਰਵਗ੍ਗੋ
੧-੨. ਅਸੁਰਸੁਤ੍ਤਾਦਿਵਣ੍ਣਨਾ
੯੧-੯੨. ਪਞ੍ਚਮਸ੍ਸ ਪਠਮਦੁਤਿਯਾਨਿ ਉਤ੍ਤਾਨਤ੍ਥਾਨੇਵ.
ਅਸੁਰਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੩. ਦੁਤਿਯਸਮਾਧਿਸੁਤ੍ਤਵਣ੍ਣਨਾ
੯੩. ਤਤਿਯੇ ਅਪ੍ਪਟਿਵਾਨੀਤਿ ਭਾਵਪ੍ਪਧਾਨੋ ਨਿਦ੍ਦੇਸੋਤਿ ਆਹ ‘‘ਅਨਿਵਤ੍ਤਨਤਾ’’ਤਿ. ‘‘ਅਪ੍ਪਟਿਵਾਨਿਤਾ’’ਤਿ ਵਤ੍ਤਬ੍ਬੇ ‘‘ਅਪ੍ਪਟਿਵਾਨੀ’’ਤਿ ਵੁਤ੍ਤਂ. ਤਥਾ ਹਿ ਵੀਰਿਯਪ੍ਪਵਾਹੇ ਵਤ੍ਤਮਾਨੇ ਅਨ੍ਤਰਾ ਏਵ ਪਟਿਗਮਨਂ ਨਿਵਤ੍ਤਨਂ ਪਟਿਵਾਨਂ, ਤਂ ਅਸ੍ਸ ਅਤ੍ਥੀਤਿ ਪਟਿਵਾਨੀ, ਨ ਪਟਿਵਾਨੀ ਅਪ੍ਪਟਿਵਾਨੀ, ਤਸ੍ਸ ਭਾਵੋ ਅਪ੍ਪਟਿਵਾਨਿਤਾ, ਅਨਿਵਤ੍ਤਨਾਤਿ ਅਤ੍ਥੋ. ਅਪ੍ਪਟਿਵਾਨੀਤਿ ਵਾ ਇਤ੍ਥਿਲਿਙ੍ਗਵਸੇਨੇਵਾਯਂ ਨਿਦ੍ਦੇਸੋ. ਅਨ੍ਤਰਾਯੇਵ ਪਟਿਗਮਨਂ ਨਿਵਤ੍ਤਨਂ ਪਟਿਵਾਨੀ, ਨ ਪਟਿਵਾਨੀ ਅਪ੍ਪਟਿਵਾਨੀ, ਅਨਿਵਤ੍ਤਨਾਤਿ ਅਤ੍ਥੋ.
ਦੁਤਿਯਸਮਾਧਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਤਤਿਯਸਮਾਧਿਸੁਤ੍ਤਵਣ੍ਣਨਾ
੯੪. ਚਤੁਤ੍ਥੇ ਸਣ੍ਠਪੇਤਬ੍ਬਨ੍ਤਿ ਸਮ੍ਮਦੇਵ ਠਪੇਤਬ੍ਬਂ. ਯਥਾ ਪਨ ਠਪਿਤਂ ਸਣ੍ਠਪਿਤਂ ਹੋਤਿ, ਤਂ ਦਸ੍ਸੇਤੁਂ ‘‘ਸਨ੍ਨਿਸਾਦੇਤਬ੍ਬ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਸਨ੍ਨਿਸਾਦੇਤਬ੍ਬਨ੍ਤਿ ਸਮਾਧਿਪ੍ਪਟਿਪਕ੍ਖੇ ਕਿਲੇਸੇ ਸਨ੍ਨਿਸੀਦਾਪੇਨ੍ਤੇਨ ਚਿਤ੍ਤਂ ਗੋਚਰਜ੍ਝਤ੍ਤੇ ਸਨ੍ਨਿਸੀਦਾਪੇਤਬ੍ਬਨ੍ਤਿ. ਏਕੋਦਿ ਕਾਤਬ੍ਬਨ੍ਤਿ ਅਬ੍ਯਗ੍ਗਭਾਵਾਪਾਦਨੇਨ ਏਕਗ੍ਗਂ ਕਾਤਬ੍ਬਂ. ਸਮਾਦਹਿਤਬ੍ਬਨ੍ਤਿ ਯਥਾ ਆਰਮ੍ਮਣੇ ਸੁਟ੍ਠੁ ਅਪ੍ਪਿਤਂ ਹੋਤਿ, ਏਵਂ ਸਮ੍ਮਾ ਸਮ੍ਮਦੇਵ ਆਦਹਿਤਬ੍ਬਂ, ਸੁਟ੍ਠੁ ਆਰੋਪੇਤਬ੍ਬਂ ਸਮਾਹਿਤਂ ਕਾਤਬ੍ਬਨ੍ਤਿ ਅਤ੍ਥੋ.
ਤਤਿਯਸਮਾਧਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫-੬. ਛਵਾਲਾਤਸੁਤ੍ਤਾਦਿਵਣ੍ਣਨਾ
੯੫-੯੬. ਪਞ੍ਚਮੇ ਛਵਾਲਾਤਨ੍ਤਿ ਛਵਾਨਂ ਦਡ੍ਢਟ੍ਠਾਨੇ ਅਲਾਤਂ. ਤੇਨੇਵਾਹ ‘‘ਸੁਸਾਨੇ ਅਲਾਤ’’ਨ੍ਤਿ. ਮਜ੍ਝਟ੍ਠਾਨੇ ਗੂਥਮਕ੍ਖਿਤਨ੍ਤਿ ਪਮਾਣੇਨ ਅਟ੍ਠਙ੍ਗੁਲਮਤ੍ਤਂ ਦ੍ਵੀਸੁ ਠਾਨੇਸੁ ਆਦਿਤ੍ਤਂ ਮਜ੍ਝੇ ਗੂਥਮਕ੍ਖਿਤਂ. ਕਟ੍ਠਤ੍ਥਨ੍ਤਿ ਕਟ੍ਠੇਨ ਕਾਤਬ੍ਬਕਿਚ੍ਚਂ. ਸੇਸਮੇਤ੍ਥ ਉਤ੍ਤਾਨਮੇਵ. ਛਟ੍ਠਂ ਉਤ੍ਤਾਨਮੇਵ.
ਛਵਾਲਾਤਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੭-੧੦. ਖਿਪ੍ਪਨਿਸਨ੍ਤਿਸੁਤ੍ਤਾਦਿਵਣ੍ਣਨਾ
੯੭-੧੦੦. ਸਤ੍ਤਮੇ ਖਿਪ੍ਪਨਿਸਨ੍ਤੀਤਿ ਖਿਪ੍ਪਪਞ੍ਞੋ. ਤੇਨਾਹ ‘‘ਖਿਪ੍ਪਨਿਸਾਮਨੋ’’ਤਿਆਦਿ. ਅਨੁਰੂਪਧਮ੍ਮਨ੍ਤਿ ਲੋਕੁਤ੍ਤਰਾਧਿਗਮਸ੍ਸ ਅਨੁਚ੍ਛਵਿਕਸਭਾਵਂ. ਕਲ੍ਯਾਣਾ ਸੁਨ੍ਦਰਾ ਪਰਿਮਣ੍ਡਲਪਦਬ੍ਯਞ੍ਜਨਾ ਵਾਚਾ ਅਸ੍ਸਾਤਿ ਕਲ੍ਯਾਣਵਾਚੋ. ਤੇਨਾਹ ‘‘ਸੁਨ੍ਦਰਵਚਨੋ’’ਤਿ. ਕਲ੍ਯਾਣਂ ਮਧੁਰਂ ਵਾਕ੍ਕਰਣਂ ਉਦਾਹਾਰਘੋਸੋ ਅਸ੍ਸਾਤਿ ਕਲ੍ਯਾਣਵਾਕ੍ਕਰਣੋ. ਗੁਣਪਰਿਪੁਣ੍ਣਭਾਵੇਨ ਪੂਰੇ ਪੁਣ੍ਣਭਾਵੇ ਭਵਾਤਿ ਪੋਰੀ, ਤਾਯ ਪੋਰਿਯਾ. ਤੇਨਾਹ ‘‘ਗੁਣਪਰਿਪੁਣ੍ਣਾਯਾ’’ਤਿ. ਪੁਰੇ ਭਵਤ੍ਤਾ ਪੋਰਿਯਾ ਨਾਗਰਿਕਿਤ੍ਥਿਯਾ ਸੁਖੁਮਾਲਤ੍ਤਨੇਨ ਸਦਿਸਾਤਿ ਪੋਰੀ, ਤਾਯ ਪੋਰਿਯਾ. ‘‘ਸੁਖੁਮਾਲਤ੍ਤਨੇਨਾ’’ਤਿ ਇਮਿਨਾ ਤਸ੍ਸਾ ਵਾਚਾਯ ਮੁਦੁਸਣ੍ਹਭਾਵੋ ਵੁਤ੍ਤੋ. ਅਪਲਿਬੁਦ੍ਧਾਯਾਤਿ ਪਿਤ੍ਤਸੇਮ੍ਹਾਦੀਹਿ ਨ ਪਲਿਵੇਠਿਤਾਯ. ਅਦੋਸਾਯਾਤਿ ਸਨ੍ਦਿਦ੍ਧਵਿਲਮ੍ਬਿਤਾਦਿਦੋਸਰਹਿਤਾਯ ਅਗਲ਼ਿਤਪਦਬ੍ਯਞ੍ਜਨਾਯਾਤਿ ਅਪਤਿਤਪਦਬ੍ਯਞ੍ਜਨਾਯ ਅਵਿਰਹਿਤਪਦਬ੍ਯਞ੍ਜਨਾਯ. ਉਭਯਮੇਤਂ ਅਨੇਲਗਲਾਯਾਤਿ ਇਮਸ੍ਸੇਵ ਅਤ੍ਥਵਚਨਂ. ਅਨੇਲਗਲਾਯਾਤਿ ਹਿ ਅਨੇਲਾਯ ਚੇਵ ਅਗਲਾਯ ਚਾਤਿ ਅਤ੍ਥੋ. ਅਤ੍ਥਂ ਵਿਞ੍ਞਾਪੇਤੁਂ ਸਮਤ੍ਥਾਯਾਤਿ ਆਦਿਮਜ੍ਝਪਰਿਯੋਸਾਨਂ ਪਾਕਟਂ ਕਤ੍ਵਾ ਭਾਸਿਤਤ੍ਥਸ੍ਸ ਵਿਞ੍ਞਾਪਨਸਤ੍ਥਾਯ. ਅਟ੍ਠਮਨਵਮਦਸਮਾਨਿ ਉਤ੍ਤਾਨਤ੍ਥਾਨੇਵ.
ਖਿਪ੍ਪਨਿਸਨ੍ਤਿਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
ਅਸੁਰਵਗ੍ਗਵਣ੍ਣਨਾ ਨਿਟ੍ਠਿਤਾ.
ਦੁਤਿਯਪਣ੍ਣਾਸਕਂ ਨਿਟ੍ਠਿਤਂ.