(੧੧) ੧. ਵਲਾਹਕਵਗ੍ਗੋ

੧-੨. ਵਲਾਹਕਸੁਤ੍ਤਦ੍ਵਯਵਣ੍ਣਨਾ

੧੦੧-੨. ਤਤਿਯਪਣ੍ਣਾਸਕਸ੍ਸ ਪਠਮੇ ਗਜ੍ਜਿਤਾਤਿ ਥਨਿਤਾ. ਤਤ੍ਥ ਗਜ੍ਜਿਤ੍ਵਾ ਨੋਵਸ੍ਸਨਭਾਵੋ ਨਾਮ ਪਾਪਕੋ. ਮਨੁਸ੍ਸਾ ਹਿ ਯਦਾ ਦੇਵੋ ਗਜ੍ਜਤਿ, ਤਦਾ ‘‘ਸੁਵੁਟ੍ਠਿਤਾ ਭਵਿਸ੍ਸਤੀ’’ਤਿ ਬੀਜਾਨਿ ਨੀਹਰਿਤ੍ਵਾ ਵਪਨ੍ਤਿ. ਅਥ ਦੇਵੇ ਅਵਸ੍ਸਨ੍ਤੇ ਖੇਤ੍ਤੇ ਬੀਜਾਨਿ ਖੇਤ੍ਤੇਯੇਵ ਨਸ੍ਸਨ੍ਤਿ, ਗੇਹੇ ਬੀਜਾਨਿ ਗੇਹੇਯੇਵ ਨਸ੍ਸਨ੍ਤੀਤਿ ਦੁਬ੍ਭਿਕ੍ਖਂ ਹੋਤਿ. ਨੋਗਜ੍ਜਿਤ੍ਵਾ ਵਸ੍ਸਨਭਾਵੋਪਿ ਪਾਪਕੋ. ਮਨੁਸ੍ਸਾ ਹਿ ਇਮਸ੍ਮਿਂ ਕਾਲੇ ‘‘ਦੁਬ੍ਬੁਟ੍ਠਿਕਾ ਭਵਿਸ੍ਸਤੀ’’ਤਿ ਨਿਨ੍ਨਟ੍ਠਾਨੇਸੁਯੇਵ ਵਪ੍ਪਂ ਕਰੋਨ੍ਤਿ. ਅਥ ਦੇਵੋ ਵਸ੍ਸਿਤ੍ਵਾ ਸਬ੍ਬਬੀਜਾਨਿ ਮਹਾਸਮੁਦ੍ਦਂ ਪਾਪੇਤਿ, ਦੁਬ੍ਭਿਕ੍ਖਮੇਵ ਹੋਤਿ. ਗਜ੍ਜਿਤ੍ਵਾ ਵਸ੍ਸਨਭਾਵੋ ਪਨ ਭਦ੍ਦਕੋ. ਤਦਾ ਹਿ ਸੁਭਿਕ੍ਖਂ ਹੋਤਿ. ਨੋਗਜ੍ਜਿਤ੍ਵਾ ਨੋਵਸ੍ਸਨਭਾਵੋ ਏਕਨ੍ਤਪਾਪਕੋਵ. ਭਾਸਿਤਾ ਹੋਤਿ ਨੋ ਕਤ੍ਤਾਤਿ ‘‘ਇਦਾਨਿ ਗਨ੍ਥਧੁਰਂ ਪੂਰੇਸ੍ਸਾਮਿ, ਵਾਸਧੁਰਂ ਪੂਰੇਸ੍ਸਾਮੀ’’ਤਿ ਕਥੇਤਿਯੇਵ, ਨ ਉਦ੍ਦੇਸਂ ਗਣ੍ਹਾਤਿ, ਨ ਕਮ੍ਮਟ੍ਠਾਨਂ ਭਾਵੇਤਿ.

ਕਤ੍ਤਾ ਹੋਤਿ ਨੋ ਭਾਸਿਤਾਤਿ ‘‘ਗਨ੍ਥਧੁਰਂ ਪੂਰੇਸ੍ਸਾਮਿ, ਵਾਸਧੁਰਂ ਵਾ’’ਤਿ ਨ ਭਾਸਤਿ, ਸਮ੍ਪਤ੍ਤੇ ਪਨ ਕਾਲੇ ਸਮਤ੍ਤਂ ਸਮ੍ਪਾਦੇਤਿ. ਇਮਿਨਾ ਨਯੇਨ ਇਤਰੇਪਿ ਵੇਦਿਤਬ੍ਬਾ. ਅਥ ਵਾ ਸਬ੍ਬਂ ਪਨੇਤਂ ਪਚ੍ਚਯਦਾਯਕੇਹੇਵ ਕਥਿਤਂ. ਏਕੋ ਹਿ ‘‘ਅਸੁਕਦਿਵਸੇ ਨਾਮ ਦਾਨਂ ਦਸ੍ਸਾਮੀ’’ਤਿ ਸਙ੍ਘਂ ਨਿਮਨ੍ਤੇਤਿ, ਸਮ੍ਪਤ੍ਤੇ ਕਾਲੇ ਨੋ ਕਰੋਤਿ. ਅਯਂ ਪੁਗ੍ਗਲੋ ਪੁਞ੍ਞੇਨ ਪਰਿਹਾਯਤਿ, ਭਿਕ੍ਖੁਸਙ੍ਘੋ ਪਨ ਲਾਭੇਨ ਪਰਿਹਾਯਤਿ. ਅਪਰੋ ਸਙ੍ਘਂ ਅਨਿਮਨ੍ਤੇਤ੍ਵਾ ਸਕ੍ਕਾਰਂ ਕਤ੍ਵਾ ‘‘ਭਿਕ੍ਖੂ ਆਨੇਸ੍ਸਾਮੀ’’ਤਿ ਨ ਲਭਿ, ਸਬ੍ਬੇ ਅਞ੍ਞਤ੍ਥ ਨਿਮਨ੍ਤਿਤਾ ਹੋਨ੍ਤਿ. ਅਯਮ੍ਪਿ ਪੁਞ੍ਞੇਨ ਪਰਿਹਾਯਤਿ, ਸਙ੍ਘੋਪਿ ਲਾਭੇਨ ਪਰਿਹਾਯਤਿ. ਅਪਰੋ ਪਠਮਂ ਸਙ੍ਘਂ ਨਿਮਨ੍ਤੇਤ੍ਵਾ ਪਚ੍ਛਾ ਸਕ੍ਕਾਰਂ ਕਤ੍ਵਾ ਦਾਨਂ ਦੇਤਿ, ਅਯਂ ਕਿਚ੍ਚਕਾਰੀ ਹੋਤਿ. ਅਪਰੋ ਨੇਵ ਸਙ੍ਘਂ ਨਿਮਨ੍ਤੇਤਿ, ਨ ਦਾਨਂ ਦੇਤਿ, ਅਯਂ ਪਾਪਪੁਗ੍ਗਲੋਤਿ ਵੇਦਿਤਬ੍ਬੋ. ਦੁਤਿਯਂ ਉਤ੍ਤਾਨਮੇਵ.

ਵਲਾਹਕਸੁਤ੍ਤਦ੍ਵਯਵਣ੍ਣਨਾ ਨਿਟ੍ਠਿਤਾ.

੩. ਕੁਮ੍ਭਸੁਤ੍ਤਵਣ੍ਣਨਾ

੧੦੩. ਤਤਿਯੇ ਰਿਤ੍ਤਕੋਤਿ ਅਨ੍ਤੋ ਰਿਤ੍ਤੋ. ਪਿਹਿਤਮੁਖੋਤਿ ਪਿਦਹਿਤ੍ਵਾ ਠਪਿਤੋ. ਅਪਾਰੁਤਮੁਖੋਤਿ ਵਿਵਰਿਤ੍ਵਾ ਠਪਿਤੋ, ਉਪਮਿਤਪੁਗ੍ਗਲੇਸੁ ਪਨੇਤ੍ਥ ਅਨ੍ਤੋਗੁਣਸਾਰਵਿਰਹਿਤੋ ਚ ਤੁਚ੍ਛੋ, ਬਾਹਿਰਸੋਭਨਤਾਯ ਪਿਹਿਤੋ ਪੁਗ੍ਗਲੋਤਿ ਵੇਦਿਤਬ੍ਬੋ. ਸੇਸੇਸੁਪਿ ਏਸੇਵ ਨਯੋ.

ਕੁਮ੍ਭਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਉਦਕਰਹਦਸੁਤ੍ਤਵਣ੍ਣਨਾ

੧੦੪. ਚਤੁਤ੍ਥੇ ਉਦਕਰਹਦੋ ਜਣ੍ਣੁਕਮਤ੍ਤੇਪਿ ਉਦਕੇ ਸਤਿ ਪਣ੍ਣਰਸਸਮ੍ਭਿਨ੍ਨਵਣ੍ਣਤ੍ਤਾ ਵਾ ਬਹਲਤ੍ਤਾ ਵਾ ਉਦਕਸ੍ਸ ਅਪਞ੍ਞਾਯਮਾਨਤਲੋ ਉਤ੍ਤਾਨੋ ਗਮ੍ਭੀਰੋਭਾਸੋ ਨਾਮ ਹੋਤੀਤਿ ਆਹ ‘‘ਪੁਰਾਣਪਣ੍ਣਰਸ…ਪੇ… ਗਮ੍ਭੀਰੋਭਾਸੋ ਨਾਮਾ’’ਤਿ. ਤਿਪੋਰਿਸਚਤੁਪੋਰਿਸੇ ਪਨ ਉਦਕੇ ਸਤਿ ਅਚ੍ਛਤ੍ਤਾ ਉਦਕਸ੍ਸ ਪਞ੍ਞਾਯਮਾਨਤਲੋ ਗਮ੍ਭੀਰੋ ਉਤ੍ਤਾਨੋਭਾਸੋ ਨਾਮ ਹੋਤੀਤਿ ਆਹ ‘‘ਅਚ੍ਛਵਿਪ੍ਪਸਨ੍ਨਮਣਿਵਣ੍ਣਉਦਕੋ ਉਤ੍ਤਾਨੋਭਾਸੋ ਨਾਮਾ’’ਤਿ. ਉਭਯਕਾਰਣਸਮ੍ਭਵਤੋ ਪਨ ਇਤਰੇ ਦ੍ਵੇ ਵੇਦਿਤਬ੍ਬਾ. ਪੁਗ੍ਗਲੇਪਿ ਕਿਲੇਸੁਸ੍ਸਦਭਾਵਤੋ ਗੁਣਗਮ੍ਭੀਰਤਾਯ ਚ ਅਭਾਵਤੋ ਗੁਣਗਮ੍ਭੀਰਾਨਂ ਸਦਿਸੇਹਿ ਅਭਿਕ੍ਕਮਨਾਦੀਹਿ ਯੁਤ੍ਤੋ ਉਤ੍ਤਾਨੋ ਗਮ੍ਭੀਰੋਭਾਸੋ ਨਾਮ. ਇਮਿਨਾ ਨਯੇਨ ਸੇਸਾ ਵੇਦਿਤਬ੍ਬਾ.

ਉਦਕਰਹਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫-੬. ਅਮ੍ਬਸੁਤ੍ਤਾਦਿਵਣ੍ਣਨਾ

੧੦੫-੬. ਪਞ੍ਚਮੇ ਆਮਕਂ ਹੁਤ੍ਵਾਤਿ ਅਨ੍ਤੋ ਆਮਂ ਹੁਤ੍ਵਾ. ਪਕ੍ਕਂ ਆਮਵਣ੍ਣੀਤਿ ਅਨ੍ਤੋ ਪਕ੍ਕਂ ਬਹਿ ਆਮਸਦਿਸਂ. ਤਤ੍ਥ ਯਥਾ ਅਮ੍ਬੇ ਅਪਕ੍ਕਭਾਵੋ ਆਮਤਾ ਹੋਤਿ, ਏਵਂ ਪੁਗ੍ਗਲੇਪਿ ਪੁਥੁਜ੍ਜਨਤਾ. ਯਥਾ ਚ ਤਤ੍ਥ ਪਕ੍ਕਸਦਿਸਤਾ ਪਕ੍ਕਵਣ੍ਣਿਤਾ, ਏਵਂ ਪੁਗ੍ਗਲੇਪਿ ਅਰਿਯਾਨਂ ਅਭਿਕ੍ਕਮਨਾਦਿਸਦਿਸਤਾ ਪਕ੍ਕਵਣ੍ਣਿਤਾਤਿ ਇਮਿਨਾ ਨਯੇਨ ਸੇਸਾ ਵੇਦਿਤਬ੍ਬਾ. ਛਟ੍ਠਂ ਉਤ੍ਤਾਨਮੇਵ.

ਅਮ੍ਬਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੭. ਮੂਸਿਕਸੁਤ੍ਤਵਣ੍ਣਨਾ

੧੦੭. ਸਤ੍ਤਮੇ ਆਵਾਟਂ ਖਨਤੀਤਿ ਅਤ੍ਤਨੋ ਆਸਯਂ ਬਿਲਕੂਪਂ ਖਨਤਿ. ਨ ਚ ਤਤ੍ਥ ਵਸਤੀਤਿ ਤਤ੍ਥ ਅਵਸਿਤ੍ਵਾ ਕਿਸ੍ਮਿਞ੍ਚਿਦੇਵ ਠਾਨੇ ਵਸਤਿ, ਏਵਂ ਬਿਲ਼ਾਰਾਦਿਅਮਿਤ੍ਤਵਸਂ ਗਚ੍ਛਤਿ. ਵਸਿਤਾ ਨੋ ਗਾਧਂ ਕਤ੍ਤਾਤਿ ਸਯਂ ਨ ਖਨਤਿ, ਪਰੇਨ ਕਤੇ ਬਿਲੇ ਵਸਤਿ, ਏਵਂ ਜੀਵਿਤਂ ਰਕ੍ਖਤਿ. ਤਤਿਯਾ ਦ੍ਵੇਪਿ ਕਰੋਨ੍ਤੀ ਜੀਵਿਤਂ ਰਕ੍ਖਤਿ. ਚਤੁਤ੍ਥੀ ਦ੍ਵੇਪਿ ਅਕਰੋਨ੍ਤੀ ਅਮਿਤ੍ਤਵਸਂ ਗਚ੍ਛਤਿ. ਇਮਾਯ ਪਨ ਉਪਮਾਯ ਉਪਮਿਤੇਸੁ ਪੁਗ੍ਗਲੇਸੁ ਪਠਮੋ ਯਥਾ ਸਾ ਮੂਸਿਕਾ ਗਾਧਂ ਖਨਤਿ, ਏਵਂ ਨਵਙ੍ਗਂ ਸਤ੍ਥੁਸਾਸਨਂ ਉਗ੍ਗਣ੍ਹਾਤਿ. ਯਥਾ ਪਨ ਸਾ ਤਤ੍ਥ ਨ ਵਸਤਿ, ਕਿਸ੍ਮਿਞ੍ਚਿਦੇਵ ਠਾਨੇ ਵਸਨ੍ਤੀ ਅਮਿਤ੍ਤਵਸਂ ਗਚ੍ਛਤਿ, ਤਥਾ ਅਯਮ੍ਪਿ ਪਰਿਯਤ੍ਤਿਵਸੇਨ ਞਾਣਂ ਪੇਸੇਤ੍ਵਾ ਚਤੁਸਚ੍ਚਧਮ੍ਮਂ ਨ ਪਟਿਵਿਜ੍ਝਤਿ, ਲੋਕਾਮਿਸਟ੍ਠਾਨੇਸੁ ਵਿਚਰਨ੍ਤੋ ਮਚ੍ਚੁਮਾਰਕਿਲੇਸਮਾਰਦੇਵਪੁਤ੍ਤਮਾਰਸਙ੍ਖਾਤਾਨਂ ਵਸਂ ਗਚ੍ਛਤਿ. ਦੁਤਿਯੋ ਯਥਾ ਮੂਸਿਕਾ ਗਾਧਂ ਨ ਖਨਤਿ, ਏਵਂ ਨਵਙ੍ਗਂ ਸਤ੍ਥੁਸਾਸਨਂ ਨ ਉਗ੍ਗਣ੍ਹਾਤਿ. ਯਥਾ ਪਨ ਪਰੇਨ ਖਨਿਤੇ ਬਿਲੇ ਵਸਨ੍ਤੀ ਜੀਵਿਤਂ ਰਕ੍ਖਤਿ, ਏਵਂ ਪਰਸ੍ਸ ਕਥਂ ਸੁਤ੍ਵਾ ਚਤੁਸਚ੍ਚਧਮ੍ਮਂ ਪਟਿਵਿਜ੍ਝਿਤ੍ਵਾ ਤਿਣ੍ਣਂ ਮਾਰਾਨਂ ਵਸਂ ਅਤਿਕ੍ਕਮਤਿ. ਇਮਿਨਾ ਨਯੇਨ ਤਤਿਯਚਤੁਤ੍ਥੇਸੁਪਿ ਓਪਮ੍ਮਸਂਸਨ੍ਦਨਂ ਵੇਦਿਤਬ੍ਬਂ.

ਮੂਸਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਬਲੀਬਦ੍ਦਸੁਤ੍ਤਵਣ੍ਣਨਾ

੧੦੮. ਅਟ੍ਠਮੇ ਬਲੀਬਦ੍ਦੋ ਤਾਵ ਯੋ ਅਤ੍ਤਨੋ ਗੋਗਣਂ ਘਟ੍ਟੇਤਿ ਉਬ੍ਬੇਜੇਤਿ, ਪਰਗੋਣੇ ਪਨ ਸੂਰਤੋ ਸੁਖਸੀਲੋ ਹੋਤਿ, ਅਯਂ ਸਗਵਚਣ੍ਡੋ ਨੋ ਪਰਗਵਚਣ੍ਡੋ ਨਾਮ. ਪੁਗ੍ਗਲੋਪਿ ਅਤ੍ਤਨੋ ਪਰਿਸਂ ਘਟ੍ਟੇਨ੍ਤੋ ਵਿਜ੍ਝਨ੍ਤੋ ਫਰੁਸੇ ਸਮੁਦਾਚਰਨ੍ਤੋ, ਪਰਪਰਿਸਾਯ ਪਨ ਸੋਰਚ੍ਚਂ ਨਿਵਾਤਵੁਤ੍ਤਿਤਂ ਆਪਜ੍ਜਨ੍ਤੋ ਸਗਵਚਣ੍ਡੋ ਨਾਮਾਤਿ ਇਮਿਨਾ ਨਯੇਨ ਸੇਸਾਪਿ ਵੇਦਿਤਬ੍ਬਾ.

ਬਲੀਬਦ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਰੁਕ੍ਖਸੁਤ੍ਤਵਣ੍ਣਨਾ

੧੦੯. ਨਵਮੇ ਰੁਕ੍ਖੋ ਤਾਵ ਫੇਗ੍ਗੁ ਸਾਰਪਰਿਵਾਰੋਤਿ ਵਨਜੇਟ੍ਠਕਰੁਕ੍ਖੋ ਸਯਂ ਫੇਗ੍ਗੁ ਹੋਤਿ, ਪਰਿਵਾਰਰੁਕ੍ਖਾ ਪਨਸ੍ਸ ਸਾਰਾ ਹੋਨ੍ਤਿ. ਇਮਿਨਾ ਨਯੇਨ ਸੇਸਾ ਵੇਦਿਤਬ੍ਬਾ. ਪੁਗ੍ਗਲੇਸੁ ਪਨ ਸੀਲਸਾਰਵਿਰਹਿਤਤੋ ਫੇਗ੍ਗੁਤਾ, ਸੀਲਾਚਾਰਸਮਨ੍ਨਾਗਮੇਨ ਚ ਸਾਰਤਾ ਵੇਦਿਤਬ੍ਬਾ.

ਰੁਕ੍ਖਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਆਸੀਵਿਸਸੁਤ੍ਤਵਣ੍ਣਨਾ

੧੧੦. ਦਸਮੇ ਯਸ੍ਸ ਵਿਸਂ ਪਜ੍ਜਲਿਤਤਿਣੁਕ੍ਕਾਯ ਅਗ੍ਗਿ ਵਿਯ ਸੀਘਂ ਅਭਿਰੁਹਿਤ੍ਵਾ ਅਕ੍ਖੀਨਿ ਗਹੇਤ੍ਵਾ ਖਨ੍ਧਂ ਗਹੇਤ੍ਵਾ ਸੀਸਂ ਗਹੇਤ੍ਵਾ ਠਿਤਨ੍ਤਿ ਵਤ੍ਤਬ੍ਬਤਂ ਆਪਜ੍ਜਤਿ ਮਣਿਸਪ੍ਪਾਦੀਨਂ ਵਿਸਂ ਵਿਯ, ਮਨ੍ਤਂ ਪਨ ਪਰਿਵਤ੍ਤੇਤ੍ਵਾ ਕਣ੍ਣਵਾਤਂ ਦਤ੍ਵਾ ਦਣ੍ਡਕੇਨ ਪਹਟਮਤ੍ਤੇ ਓਤਰਿਤ੍ਵਾ ਦਟ੍ਠਟ੍ਠਾਨੇਯੇਵ ਤਿਟ੍ਠਤਿ, ਅਯਂ ਆਗਤਵਿਸੋ ਨ ਘੋਰਵਿਸੋ ਨਾਮ. ਯਸ੍ਸ ਪਨ ਵਿਸਂ ਸਣਿਕਂ ਅਭਿਰੁਹਤਿ, ਆਰੁਲ਼੍ਹਾਰੁਲ਼੍ਹਟ੍ਠਾਨੇ ਪਨ ਆਸਿਤ੍ਤਉਦਕਂ ਵਿਯ ਹੋਤਿ ਉਦਕਸਪ੍ਪਾਦੀਨਂ ਵਿਯ, ਦ੍ਵਾਦਸਵਸ੍ਸਚ੍ਚਯੇਨਪਿ ਕਣ੍ਣਵਿਦ੍ਧਖਨ੍ਧਪਿਟ੍ਠਿਕਾਦੀਸੁ ਪਞ੍ਞਾਯਤਿ, ਮਨ੍ਤਪਰਿਵਤ੍ਤਨਾਦੀਸੁ ਚ ਕਰਿਯਮਾਨੇਸੁ ਸੀਘਂ ਨ ਓਤਰਤਿ, ਅਯਂ ਘੋਰਵਿਸੋ ਨ ਆਗਤਵਿਸੋ ਨਾਮ. ਯਸ੍ਸ ਪਨ ਵਿਸਂ ਸੀਘਂ ਅਭਿਰੁਹਤਿ, ਨ ਸੀਘਂ ਓਤਰਤਿ ਅਨੇਲ਼ਕਸਪ੍ਪਾਦੀਨਂ ਵਿਸਂ ਵਿਯ, ਅਯਂ ਆਗਤਵਿਸੋ ਚ ਘੋਰਵਿਸੋ ਚ. ਅਨੇਲ਼ਕਸਪ੍ਪੋ ਨਾਮ ਮਹਾਆਸੀਵਿਸੋ. ਯਸ੍ਸ ਵਿਸਂ ਮਨ੍ਦਂ ਹੋਤਿ, ਓਹਾਰਿਯਮਾਨਮ੍ਪਿ ਸੁਖੇਨੇਵ ਓਤਰਤਿ ਨੀਲਸਪ੍ਪਧਮਨਿਸਪ੍ਪਾਦੀਨਂ ਵਿਸਂ ਵਿਯ, ਅਯਂ ਨੇਵ ਆਗਤਵਿਸੋ ਨ ਘੋਰਵਿਸੋ. ਨੀਲਸਪ੍ਪੋ ਨਾਮ ਸਾਖਵਣ੍ਣੋ ਰੁਕ੍ਖਗ੍ਗਾਦੀਸੁ ਵਿਚਰਣਸਪ੍ਪੋ.

ਆਸੀਵਿਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਵਲਾਹਕਵਗ੍ਗਵਣ੍ਣਨਾ ਨਿਟ੍ਠਿਤਾ.