(੭) ੨. ਪਤ੍ਤਕਮ੍ਮਵਗ੍ਗੋ
੧-੪. ਪਤ੍ਤਕਮ੍ਮਸੁਤ੍ਤਾਦਿਵਣ੍ਣਨਾ
੬੧-੬੪. ਦੁਤਿਯਸ੍ਸ ਪਠਮੇ ਯੇ ਅਨਿਟ੍ਠਾ ਨ ਹੋਨ੍ਤਿ, ਤੇ ਇਟ੍ਠਾਤਿ ਅਧਿਪ੍ਪੇਤਾਤਿ ਆਹ ‘‘ਅਨਿਟ੍ਠਪਟਿਕ੍ਖੇਪੇਨ ਇਟ੍ਠਾ’’ਤਿ. ਇਟ੍ਠਾਤਿ ਚ ਪਰਿਯਿਟ੍ਠਾ ਵਾ ਹੋਤੁ ਮਾ ਵਾ, ਇਟ੍ਠਾਰਮ੍ਮਣਭੂਤਾਤਿ ਅਤ੍ਥੋ. ਗਵੇਸਿਤਮ੍ਪਿ ਹਿ ਇਟ੍ਠਨ੍ਤਿ ਵੁਚ੍ਚਤਿ, ਤਂ ਇਧ ਨਾਧਿਪ੍ਪੇਤਂ. ਮਨੇਤਿ ਮਨਸ੍ਮਿਂ. ਕਨ੍ਤਾਤਿ ਵਾ ਕਮਨੀਯਾ, ਕਾਮੇਤਬ੍ਬਾਤਿ ਅਤ੍ਥੋ. ਮਨਂ ਅਪ੍ਪਾਯਨ੍ਤੀਤਿ ਇਟ੍ਠਭਾਵੇਨ ਮਨਂ ਵਡ੍ਢੇਨ੍ਤਿ. ਕਮ੍ਮਸਾਧਨੋ ਇਧ ਭੋਗ-ਸਦ੍ਦੋਤਿ ਆਹ ‘‘ਭੋਗਾਤਿ ਭੁਞ੍ਜਿਤਬ੍ਬਾ’’ਤਿਆਦਿ. ਧਮ੍ਮੂਪਘਾਤਂ ਕਤ੍ਵਾ ਕੁਸਲਧਮ੍ਮਂ ਵਿਨੋਦੇਤ੍ਵਾ. ਉਪਨਿਜ੍ਝਾਯੀਯਨ੍ਤੀਤਿ ਉਪਜ੍ਝਾਯਾਤਿ ਆਹ ‘‘ਸੁਖਦੁਕ੍ਖੇਸੁ ਉਪਨਿਜ੍ਝਾਯਿਤਬ੍ਬਤ੍ਤਾ’’ਤਿ, ਸੁਖਦੁਕ੍ਖੇਸੁ ਉਪ੍ਪਨ੍ਨੇਸੁ ਅਨੁਸ੍ਸਰਿਤਬ੍ਬਤ੍ਤਾਤਿ ਅਤ੍ਥੋ. ਸਨ੍ਦਿਟ੍ਠਸਮ੍ਭਤ੍ਤੇਹੀਤਿ ਏਤ੍ਥ ਤਤ੍ਥ ਤਤ੍ਥ ਸਙ੍ਗਮ੍ਮ ਦਿਟ੍ਠਮਤ੍ਤਾ ਨਾਤਿਦਲ਼੍ਹਮਿਤ੍ਤਾ ਸਨ੍ਦਿਟ੍ਠਾ, ਸੁਟ੍ਠੁ ਭਤ੍ਤਾ ਸਿਨੇਹਵਨ੍ਤੋ ਦਲ਼੍ਹਮਿਤ੍ਤਾ ਸਮ੍ਭਤ੍ਤਾ.
ਵਿਸਮਲੋਭਨ੍ਤਿ ਬਲਵਲੋਭਂ. ਸੁਖਿਤਨ੍ਤਿ ਸਞ੍ਜਾਤਸੁਖਂ. ਪੀਣਿਤਨ੍ਤਿ ਧਾਤਂ ਸੁਹਿਤਂ. ਤਥਾਭੂਤੋ ਪਨ ਯਸ੍ਮਾ ਬਲਸਮ੍ਪਨ੍ਨੋ ਹੋਤਿ, ਤਸ੍ਮਾ ‘‘ਬਲਸਮ੍ਪਨ੍ਨਂ ਕਰੋਤੀ’’ਤਿ ਵੁਤ੍ਤਂ.
ਸੋਭਨੇ ਕਾਯਿਕਵਾਚਸਿਕਕਮ੍ਮੇ ਰਤੋਤਿ ਸੂਰਤੋ ਉਕਾਰਸ੍ਸ ਦੀਘਂ ਕਤ੍ਵਾ, ਤਸ੍ਸ ਭਾਵੋ ਸੋਰਚ੍ਚਂ, ਕਾਯਿਕਵਾਚਸਿਕੋ ਅਵੀਤਿਕ੍ਕਮੋ. ਸੋ ਪਨ ਅਤ੍ਥਤੋ ਸੁਸੀਲਭਾਵੋਤਿ ਆਹ ‘‘ਖਨ੍ਤਿਸੋਰਚ੍ਚੇ ਨਿਵਿਟ੍ਠਾਤਿ ਅਧਿਵਾਸਨਕ੍ਖਨ੍ਤਿਯਞ੍ਚ ਸੁਸੀਲਤਾਯ ਚ ਨਿਵਿਟ੍ਠਾ’’ਤਿ. ਏਕਮਤ੍ਤਾਨਨ੍ਤਿ ਏਕਂ ਚਿਤ੍ਤਨ੍ਤਿ ਅਤ੍ਥੋ. ਰਾਗਾਦੀਨਞ੍ਹਿ ਪੁਬ੍ਬਭਾਗਿਯਂ ਦਮਨਾਦਿ ਪਚ੍ਚੇਕਂ ਇਚ੍ਛਿਤਬ੍ਬਂ, ਨ ਮਗ੍ਗਕ੍ਖਣੇ ਵਿਯ ਏਕਜ੍ਝਂ ਪਟਿਸਙ੍ਖਾਨਮੁਖੇਨ ਪਜਹਨਤੋ. ਏਕਮਤ੍ਤਾਨਨ੍ਤਿ ਵਾ ਵਿਵੇਕਵਸੇਨ ਏਕਂ ਏਕਾਕਿਨਂ ਅਤ੍ਤਾਨਂ. ਤੇਨੇਵਾਹ ‘‘ਏਕਂ ਅਤ੍ਤਨੋਵ ਅਤ੍ਤਭਾਵ’’ਨ੍ਤਿਆਦਿ. ਉਪਰੂਪਰਿਭੂਮੀਸੂਤਿ ਛਕਾਮਸਗ੍ਗਸਙ੍ਖਾਤਾਸੁ ਉਪਰੂਪਰਿਕਾਮਭੂਮੀਸੁ. ਕਮ੍ਮਸ੍ਸ ਫਲਂ ਅਗ੍ਗਂ ਨਾਮ. ਤਂ ਪਨੇਤ੍ਥ ਉਚ੍ਚਗਾਮੀਤਿ ਆਹ ‘‘ਉਦ੍ਧਮਗ੍ਗਮਸ੍ਸਾ’’ਤਿ. ਸੁਵਗ੍ਗੇ ਨਿਯੁਤ੍ਤਾ, ਸੁਵਗ੍ਗਪ੍ਪਯੋਜਨਾਤਿ ਵਾ ਸੋਵਗ੍ਗਿਕਾ. ਦਸਨ੍ਨਂ ਵਿਸੇਸਾਨਨ੍ਤਿ ਦਿਬ੍ਬਆਯੁਵਣ੍ਣਯਸਸੁਖਆਧਿਪਤੇਯ੍ਯਾਨਞ੍ਚੇਵ ਇਟ੍ਠਰੂਪਾਦੀਨਞ੍ਚ ਫਲਵਿਸੇਸਾਨਂ. ਵਣ੍ਣਗ੍ਗਹਣੇਨ ਚੇਤ੍ਥ ਸਕੋ ਅਤ੍ਤਭਾਵਵਣ੍ਣੋ ਗਹਿਤੋ, ਰੂਪਗ੍ਗਹਣੇਨ ਬਹਿਦ੍ਧਾ ਰੂਪਾਰਮ੍ਮਣਂ. ਦੁਤਿਯਤਤਿਯਚਤੁਤ੍ਥਾਨਿ ਉਤ੍ਤਾਨਤ੍ਥਾਨੇਵ.
ਪਤ੍ਤਕਮ੍ਮਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੫. ਰੂਪਸੁਤ੍ਤਵਣ੍ਣਨਾ
੬੫. ਪਞ੍ਚਮੇ ਪਮਿਨੋਤਿ ਉਲ਼ਾਰਤਾਦਿਵਿਸੇਸਂ ਏਤੇਨਾਤਿ ਪਮਾਣਂ, ਰੁਪਕਾਯੋ ਪਮਾਣਂ ਏਤਸ੍ਸਾਤਿ ਰੂਪਪ੍ਪਮਾਣੋ. ਤਤੋ ਏਵ ਰੂਪੇ ਪਸਨ੍ਨੋਤਿ ਰੂਪਪ੍ਪਸਨ੍ਨੋ. ਘੋਸੋਤਿ ਚੇਤ੍ਥ ਥੁਤਿਘੋਸੋ. ਲੂਖਨ੍ਤਿ ਪਚ੍ਚਯਲੂਖਤਾ. ਧਮ੍ਮਾਤਿ ਸੀਲਾਦਯੋ ਗੁਣਧਮ੍ਮਾ ਅਧਿਪ੍ਪੇਤਾ. ਇਮੇਸਂ ਪਨ ਚਤੁਨ੍ਨਂ ਪੁਗ੍ਗਲਾਨਂ ਨਾਨਾਕਰਣਂ ਪਾਲ਼ਿਯਂਯੇਵ ਆਗਤਂ. ਵੁਤ੍ਤਞ੍ਹੇਤਂ –
‘‘ਕਤਮੋ ਚ ਪੁਗ੍ਗਲੋ ਰੂਪਪ੍ਪਮਾਣੋ ਰੂਪਪ੍ਪਸਨ੍ਨੋ? ਇਧੇਕਚ੍ਚੋ ਪੁਗ੍ਗਲੋ ਆਰੋਹਂ ਵਾ ਪਸ੍ਸਿਤ੍ਵਾ ਪਰਿਣਾਹਂ ਵਾ ਪਸ੍ਸਿਤ੍ਵਾ ਸਣ੍ਠਾਨਂ ਵਾ ਪਸ੍ਸਿਤ੍ਵਾ ਪਾਰਿਪੂਰਿਂ ਵਾ ਪਸ੍ਸਿਤ੍ਵਾ ਤਤ੍ਥ ਪਮਾਣਂ ਗਹੇਤ੍ਵਾ ਪਸਾਦਂ ਜਨੇਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਰੂਪਪ੍ਪਮਾਣੋ ਰੂਪਪ੍ਪਸਨ੍ਨੋ.
‘‘ਕਤਮੋ ਚ ਪੁਗ੍ਗਲੋ ਘੋਸਪ੍ਪਮਾਣੋ ਘੋਸਪ੍ਪਸਨ੍ਨੋ? ਇਧੇਕਚ੍ਚੋ ਪੁਗ੍ਗਲੋ ਪਰਵਣ੍ਣਨਾਯ ਪਰਥੋਮਨਾਯ ਪਰਪਸਂਸਨਾਯ ਪਰਵਣ੍ਣਹਾਰਿਕਾਯ ਤਤ੍ਥ ਪਮਾਣਂ ਗਹੇਤ੍ਵਾ ਪਸਾਦਂ ਜਨੇਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਘੋਸਪ੍ਪਮਾਣੋ ਘੋਸਪ੍ਪਸਨ੍ਨੋ.
‘‘ਕਤਮੋ ਚ ਪੁਗ੍ਗਲੋ ਲੂਖਪ੍ਪਮਾਣੋ ਲੂਖਪ੍ਪਸਨ੍ਨੋ? ਇਧੇਕਚ੍ਚੋ ਪੁਗ੍ਗਲੋ ਚੀਵਰਲੂਖਂ ਵਾ ਪਸ੍ਸਿਤ੍ਵਾ ਪਤ੍ਤਲੂਖਂ ਵਾ ਪਸ੍ਸਿਤ੍ਵਾ ਸੇਨਾਸਨਲੂਖਂ ਵਾ ਪਸ੍ਸਿਤ੍ਵਾ ਵਿਵਿਧਂ ਵਾ ਦੁਕ੍ਕਰਕਾਰਿਕਂ ਪਸ੍ਸਿਤ੍ਵਾ ਤਤ੍ਥ ਪਮਾਣਂ ਗਹੇਤ੍ਵਾ ਪਸਾਦਂ ਜਨੇਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਲੂਖਪ੍ਪਮਾਣੋ ਲੂਖਪ੍ਪਸਨ੍ਨੋ.
‘‘ਕਤਮੋ ਚ ਪੁਗ੍ਗਲੋ ਧਮ੍ਮਪ੍ਪਮਾਣੋ ਧਮ੍ਮਪ੍ਪਸਨ੍ਨੋ? ਇਧੇਕਚ੍ਚੋ ਪੁਗ੍ਗਲੋ ਸੀਲਂ ਵਾ ਪਸ੍ਸਿਤ੍ਵਾ ਸਮਾਧਿਂ ਵਾ ਪਸ੍ਸਿਤ੍ਵਾ ਪਞ੍ਞਂ ਵਾ ਪਸ੍ਸਿਤ੍ਵਾ ਤਤ੍ਥ ਪਮਾਣਂ ਗਹੇਤ੍ਵਾ ਪਸਾਦਂ ਜਨੇਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਧਮ੍ਮਪ੍ਪਮਾਣੋ ਧਮ੍ਮਪ੍ਪਸਨ੍ਨੋ’’ਤਿ (ਪੁ. ਪ. ੧੭੧-੧੭੨).
ਤਤ੍ਥ ਆਰੋਹਨ੍ਤਿ ਉਚ੍ਚਤਂ. ਸਾ ਚ ਖੋ ਤਸ੍ਮਿਂ ਤਸ੍ਮਿਂ ਕਾਲੇ ਪਮਾਣਯੁਤ੍ਤਾ ਦਟ੍ਠਬ੍ਬਾ. ਪਰਿਣਾਹਨ੍ਤਿ ਨਾਤਿਕਿਸਥੂਲਤਾਵਸੇਨ ਪੀਣਤਂ. ਸਣ੍ਠਾਨਨ੍ਤਿ ਤੇਸਂ ਤੇਸਂ ਅਙ੍ਗਪਚ੍ਚਙ੍ਗਾਨਂ ਸੁਸਣ੍ਠਿਤਤਂ ਦੀਘਰਸ੍ਸਵਟ੍ਟਾਦਿਯੁਤ੍ਤਟ੍ਠਾਨੇਸੁ ਤਥਾਭਾਵਂ. ਪਾਰਿਪੂਰਿਨ੍ਤਿ ਸਬ੍ਬੇਸਂ ਸਰੀਰਾਵਯਵਾਨਂ ਪਰਿਪੁਣ੍ਣਤਂ ਅਵਿਕਲਤਂ. ਤਤ੍ਥ ਪਮਾਣਂ ਗਹੇਤ੍ਵਾਤਿ ਤਸ੍ਮਿਂ ਰੂਪੇ ਰੂਪਸਮ੍ਪਤ੍ਤਿਯਂ ਪਮਾਣਭਾਵਂ ਉਪਾਦਾਯ. ਪਸਾਦਂ ਜਨੇਤੀਤਿ ਅਧਿਮੋਕ੍ਖਂ ਜਨੇਤਿ ਉਪ੍ਪਾਦੇਤਿ.
ਪਰਵਣ੍ਣਨਾਯਾਤਿ ‘‘ਅਸੁਕੋ ਏਦਿਸੋ ਚ ਏਦਿਸੋ ਚਾ’’ਤਿ ਪਰਸ੍ਸ ਗੁਣਵਚਨੇਨ. ਪਰਥੋਮਨਾਯਾਤਿ ਪਰਮ੍ਮੁਖਾ ਪਰਸ੍ਸ ਸਿਲਾਘੁਪ੍ਪਾਦਕੇਨ ਅਭਿਤ੍ਥਵਨੇਨ ਪਰੇਨ ਥੁਤਿਵਸੇਨ, ਗਾਥਾਦਿਉਪਨਿਬਨ੍ਧਨੇਨ ਵੁਤ੍ਤਾਯ ਥੋਮਨਾਯਾਤਿ ਵੁਤ੍ਤਂ ਹੋਤਿ. ਪਰਪਸਂਸਨਾਯਾਤਿ ਪਰਮ੍ਮੁਖਾ ਪਰਸ੍ਸ ਗੁਣਸਂਕਿਤ੍ਤਨੇਨ. ਪਰਵਣ੍ਣਹਾਰਿਕਾਯਾਤਿ ਪਰਮ੍ਪਰਵਣ੍ਣਹਾਰਿਕਾਯ ਪਰਮ੍ਪਰਾਯ ਪਰਸ੍ਸ ਕਿਤ੍ਤਨਸਦ੍ਦਸ੍ਸ ਉਪਸਂਹਾਰੇਨ. ਤਤ੍ਥਾਤਿ ਤਸ੍ਮਿਂ ਥੁਤਿਘੋਸੇ.
ਚੀਵਰਲੂਖਨ੍ਤਿ ਥੂਲਜਿਣ੍ਣਬਹੁਤੁਨ੍ਨਕਤਾਦਿਚੀਵਰਸ੍ਸ ਲੂਖਭਾਵਂ. ਪਤ੍ਤਲੂਖਨ੍ਤਿ ਅਨੇਕਗਨ੍ਥਿਕਾਹਟਤਾਦਿਪਤ੍ਤਸ੍ਸ ਲੂਖਭਾਵਂ. ਵਿਵਿਧਂ ਵਾ ਦੁਕ੍ਕਰਕਾਰਿਕਨ੍ਤਿ ਧੁਤਙ੍ਗਾਦਿਵਸੇਨ ਪਵਤ੍ਤਨਾਨਾਵਿਧਂ ਦੁਕ੍ਕਰਚਰਿਯਂ. ਸੀਲਂ ਵਾ ਪਸ੍ਸਿਤ੍ਵਾਤਿ ਸੀਲਪਾਰਿਪੂਰਿਵਸੇਨ ਵਿਸੁਦ੍ਧਂ ਕਾਯਵਚੀਸੁਚਰਿਤਂ ਞਾਣਚਕ੍ਖੁਨਾ ਪਸ੍ਸਿਤ੍ਵਾ, ਝਾਨਾਦਿਅਧਿਗਮਸੁਦ੍ਧਿਸਮਾਧਿਂ ਵਾ ਵਿਪਸ੍ਸਨਾਭਿਞ੍ਞਾਸਙ੍ਖਾਤਂ ਪਞ੍ਞਂ ਵਾ ਪਸ੍ਸਿਤ੍ਵਾਤਿ ਅਤ੍ਥੋ.
ਏਵਮੇਤਸ੍ਮਿਂ ਚਤੁਪ੍ਪਮਾਣੇ ਲੋਕਸਨ੍ਨਿਵਾਸੇ ਬੁਦ੍ਧੇਸੁ ਅਪ੍ਪਸਨ੍ਨਾ ਮਨ੍ਦਾ, ਪਸਨ੍ਨਾ ਬਹੁਕਾ. ਰੂਪਪ੍ਪਮਾਣਸ੍ਸ ਹਿ ਬੁਦ੍ਧਰੂਪਤੋ ਉਤ੍ਤਰਿ ਪਸਾਦਾਵਹਂ ਰੂਪਂ ਨਾਮ ਨਤ੍ਥਿ. ਘੋਸਪ੍ਪਮਾਣਸ੍ਸ ਬੁਦ੍ਧਾਨਂ ਕਿਤ੍ਤਿਘੋਸਤੋ ਉਤ੍ਤਰਿ ਪਸਾਦਾਵਹੋ ਘੋਸੋ ਨਾਮ ਨਤ੍ਥਿ. ਲੂਖਪ੍ਪਮਾਣਸ੍ਸ ਕਾਸਿਕਾਨਿ ਵਤ੍ਥਾਨਿ ਮਹਾਰਹਾਨਿ ਕਞ੍ਚਨਭਾਜਨਾਨਿ ਤਿਣ੍ਣਂ ਉਤੂਨਂ ਅਨੁਚ੍ਛਵਿਕੇ ਸਬ੍ਬਸਮ੍ਪਤ੍ਤਿਯੁਤ੍ਤੇ ਪਾਸਾਦਵਰੇ ਪਹਾਯ ਪਂਸੁਕੂਲਚੀਵਰਸੇਲਮਯਪਤ੍ਤਰੁਕ੍ਖਮੂਲਾਦਿਸੇਨਾਸਨਸੇਵਿਨੋ ਬੁਦ੍ਧਸ੍ਸ ਭਗਵਤੋ ਲੂਖਤੋ ਉਤ੍ਤਰਿ ਪਸਾਦਾਵਹਂ ਅਞ੍ਞਂ ਲੂਖਂ ਨਾਮ ਨਤ੍ਥਿ. ਧਮ੍ਮਪ੍ਪਮਾਣਸ੍ਸ ਸਦੇਵਕੇ ਲੋਕੇ ਅਸਾਧਾਰਣਸੀਲਾਦਿਗੁਣਸ੍ਸ ਤਥਾਗਤਸ੍ਸ ਸੀਲਾਦਿਗੁਣਤੋ ਉਤ੍ਤਰਿ ਪਸਾਦਾਵਹੋ ਅਞ੍ਞੋ ਸੀਲਾਦਿਗੁਣੋ ਨਾਮ ਨਤ੍ਥਿ. ਇਤਿ ਭਗਵਾ ਇਮਂ ਚਤੁਪ੍ਪਮਾਣਿਕਂ ਲੋਕਸਨ੍ਨਿਵਾਸਂ ਮੁਟ੍ਠਿਨਾ ਗਹੇਤ੍ਵਾ ਵਿਯ ਠਿਤੋਤਿ.
ਪਮਾਣਿਂਸੂਤਿ ਪਮਾਣਂ ਅਗ੍ਗਹੇਸੁਂ. ਨਿਯਕਜ੍ਝਤ੍ਤੇ ਤਸ੍ਸ ਗੁਣਂ ਨ ਜਾਨਾਤੀਤਿ ਤਸ੍ਸ ਅਬ੍ਭਨ੍ਤਰੇ ਪਵਤ੍ਤਮਾਨਂ ਸੀਲਾਦਿਗੁਣਂ ਨ ਜਾਨਾਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਰੂਪਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੭. ਅਹਿਰਾਜਸੁਤ੍ਤਵਣ੍ਣਨਾ
੬੭. ਸਤ੍ਤਮੇ ਦਟ੍ਠਵਿਸਾਨੇਵਾਤਿ ਅਵਧਾਰਣੇਨ ਦਿਟ੍ਠਵਿਸਾਦਯੋ ਨਿਵਤ੍ਤੇਤਿ. ਕਟ੍ਠਮੁਖਾਦਯੋ ਹਿ ਚਤ੍ਤਾਰੋ ਆਸੀਵਿਸਾ ਦਟ੍ਠਵਿਸੋ, ਦਿਟ੍ਠਵਿਸੋ, ਫੁਟ੍ਠਵਿਸੋ, ਵਾਤਵਿਸੋਤਿ ਪਚ੍ਚੇਕਂ ਚਤੁਬ੍ਬਿਧਾ ਹੋਨ੍ਤੀਤਿ ਵਿਸਵੇਗਵਿਕਾਰਵਸੇਨ ਸੋਲ਼ਸ ਵੁਤ੍ਤਾ. ਤੇਸੁ ਦਟ੍ਠਵਿਸਾਨਂਯੇਵ ਇਧ ਗਹਣਂ, ਨ ਇਤਰੇਸਨ੍ਤਿ ਦਸ੍ਸੇਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਅਹਿਰਾਜਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮. ਦੇਵਦਤ੍ਤਸੁਤ੍ਤਵਣ੍ਣਨਾ
੬੮. ਅਟ੍ਠਮੇ ਕਾਲੇ ਸਮ੍ਪਤ੍ਤੇਤਿ ਗਬ੍ਭਸ੍ਸ ਪਰਿਪਾਕਗਤਤ੍ਤਾ ਵਿਜਾਯਨਕਾਲੇ ਸਮ੍ਪਤ੍ਤੇ. ਪੋਤਕਨ੍ਤਿ ਅਸ੍ਸਤਰਿਯਾ ਪੁਤ੍ਤਂ. ‘‘ਫਲਂ ਵੇ ਕਦਲਿਂ ਹਨ੍ਤੀ’’ਤਿਆਦਿਗਾਥਾਯ ਕੁਕ੍ਕੁਜਕੇਨੇਵ ਪਤ੍ਤਵਟ੍ਟਿਪਸਵਸ੍ਸ ਉਚ੍ਛਿਨ੍ਨਤ੍ਤਾ ਫਲੁਪ੍ਪਤ੍ਤਿ ਕਦਲਿਯਾ ਪਰਾਭਵਾਯ ਹੋਤੀਤਿ ਆਹ ‘‘ਫਲਂ ਵੇ ਕਦਲਿਂ ਹਨ੍ਤੀ’’ਤਿ. ਕੁਕ੍ਕੁਜਕਂ ਨਾਮ ਕਦਲਿਯਾ ਪੁਪ੍ਫਨਾਲ਼ਂ. ਤਥਾ ਫਲਪਾਕਪਰਿਯੋਸਾਨਤ੍ਤਾ ਓਸਧੀਨਂ ‘‘ਫਲਂ ਵੇਲ਼ੁਂ ਨਲ਼’’ਨ੍ਤਿ ਵੁਤ੍ਤਂ. ਅਯਂ ਪਨੇਤ੍ਥ ਪਿਣ੍ਡਤ੍ਥੋ – ਯਥਾ ਅਤ੍ਤਨੋ ਫਲਂ ਕਦਲਿਵੇਲ਼ੁਨਲ਼ੇ ਵਿਨਾਸੇਤਿ, ਗਬ੍ਭੋ ਚ ਅਸ੍ਸਤਰਿਂ, ਏਵਂ ਅਤ੍ਤਨੋ ਕਮ੍ਮਭੂਤੋ ਸਕ੍ਕਾਰੋ ਅਸਪ੍ਪੁਰਿਸਂ ਵਿਨਾਸੇਤੀਤਿ.
ਦੇਵਦਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯. ਪਧਾਨਸੁਤ੍ਤਵਣ੍ਣਨਾ
੬੯. ਨਵਮੇ ਪਦਹਤਿ ਏਤੇਹੀਤਿ ਪਧਾਨਾਨਿ. ਉਤ੍ਤਮਵੀਰਿਯਾਨਿ ਸੇਟ੍ਠਵੀਰਿਯਾਨਿ ਵਿਸਿਟ੍ਠਸ੍ਸ ਅਤ੍ਥਸ੍ਸ ਸਾਧਨਤੋ. ਕਿਲੇਸਾਨਂ ਸਂਵਰਤ੍ਥਾਯਾਤਿ ਯਥਾ ਅਭਿਜ੍ਝਾਦਯੋ ਨ ਉਪ੍ਪਜ੍ਜਨ੍ਤਿ, ਏਵਂ ਸਤਿਯਾ ਉਪਟ੍ਠਾਨੇਨ ਕਿਲੇਸਾਨਂ ਸਂਵਰਣਤ੍ਥਾਯ. ਪਜਹਨਤ੍ਥਾਯਾਤਿ ਕਾਮਵਿਤਕ੍ਕਾਦੀਨਂ ਵਿਨੋਦਨਤ੍ਥਾਯ. ਪਧਾਨਨ੍ਤਿ ਤਸ੍ਸੇਵ ਪਜਹਨਸ੍ਸ ਸਾਧਨਵਸੇਨ ਪਵਤ੍ਤਵੀਰਿਯਂ. ਕੁਸਲਾਨਂ ਧਮ੍ਮਾਨਂ ਬ੍ਰੂਹਨਤ੍ਥਾਯਾਤਿ ਬੋਜ੍ਝਙ੍ਗਸਙ੍ਖਾਤਾਨਂ ਕੁਸਲਧਮ੍ਮਾਨਂ ਵਡ੍ਢਨਤ੍ਥਾਯ. ਪਧਾਨਨ੍ਤਿ ਤਸ੍ਸੇਵ ਵਡ੍ਢਨਸ੍ਸ ਸਾਧਨਵਸੇਨ ਪਵਤ੍ਤਵੀਰਿਯਂ.
ਪਧਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਅਧਮ੍ਮਿਕਸੁਤ੍ਤਵਣ੍ਣਨਾ
੭੦. ਦਸਮੇ ਵਿਸਮਨ੍ਤਿ ਭਾਵਨਪੁਂਸਕਮੇਤਂ. ਤੇਨਾਹ ‘‘ਵਿਸਮਾ ਹੁਤ੍ਵਾ’’ਤਿ. ਅਸਮਯੇਨਾਤਿ ਅਕਾਲੇ. ਭੁਮ੍ਮਤ੍ਥੇ ਹੇਤਂ ਕਰਣਵਚਨਂ. ਪਕਟ੍ਠਂ ਪਧਾਨਂ ਅਞ੍ਜਸਂ ਏਤੇਸਨ੍ਤਿ ਪਞ੍ਜਸਾ, ਅਞ੍ਜਸਂ ਪਗਤਾ ਪਟਿਪਨ੍ਨਾਤਿ ਵਾ ਪਞ੍ਜਸਾ, ਪਕਤਿਮਗ੍ਗਗਾਮਿਨੋ. ਨ ਪਞ੍ਜਸਾ ਅਪਞ੍ਜਸਾ, ਅਮਗ੍ਗਪ੍ਪਟਿਪਨ੍ਨਾ. ਤੇ ਪਨ ਯਸ੍ਮਾ ਮਗ੍ਗਤੋ ਅਪਗਤਾ ਨਾਮ ਹੋਨ੍ਤਿ, ਤਸ੍ਮਾ ਵੁਤ੍ਤਂ ‘‘ਮਗ੍ਗਤੋ ਅਪਗਤਾ’’ਤਿਆਦਿ.
ਗਾਥਾਸੁ ਪਨ ਏਵਮੇਤ੍ਥ ਸਮ੍ਬਨ੍ਧੋ ਵੇਦਿਤਬ੍ਬੋ. ਗੁਨ੍ਨਂ ਚੇ ਤਰਮਾਨਾਨਨ੍ਤਿ ਗਾਵੀਸੁ ਮਹੋਘਂ ਤਰਨ੍ਤੀਸੁ. ਜਿਮ੍ਹਂ ਗਚ੍ਛਤਿ ਪੁਙ੍ਗਵੋਤਿ ਯਦਿ ਯੂਥਪਤਿ ਉਸਭੋ ਕੁਟਿਲਂ ਗਚ੍ਛਤਿ. ਸਬ੍ਬਾ ਤਾ ਜਿਮ੍ਹਂ ਗਚ੍ਛਨ੍ਤੀਤਿ ਸਬ੍ਬਾ ਤਾ ਗਾਵਿਯੋ ਕੁਟਿਲਮੇਵ ਗਚ੍ਛਨ੍ਤਿ. ਕਸ੍ਮਾ? ਨੇਤ੍ਤੇ ਜਿਮ੍ਹਂ ਗਤੇ ਸਤਿ ਤਸ੍ਸ ਕੁਟਿਲਗਤਤ੍ਤਾ. ਸੋ ਹਿ ਤਾਸਂ ਪਚ੍ਚਯਿਕੋ ਉਪਦ੍ਦਵਹਰੋ ਚ. ਏਵਮੇਵਨ੍ਤਿ ਯਥਾ ਚੇਤਂ, ਏਵਮੇਵ ਯੋ ਮਨੁਸ੍ਸੇਸੁ ਪਧਾਨਸਮ੍ਮਤੋ, ਯਦਿ ਸੋ ਅਧਮ੍ਮਚਾਰੀ ਸਿਯਾ, ਯੇ ਤਸ੍ਸ ਅਨੁਜੀਵਿਨੋ, ਸਬ੍ਬੇਪਿ ਅਧਮ੍ਮਿਕਾ ਹੋਨ੍ਤਿ. ਸਾਮਿਸਮ੍ਪਦਾ ਹਿ ਪਕਤਿਸਮ੍ਪਦਂ ਸਮ੍ਪਾਦੇਤਿ. ਯਸ੍ਮਾ ਏਤਦੇਵਂ, ਤਸ੍ਮਾ ਸਬ੍ਬਂ ਰਟ੍ਠਂ ਦੁਕ੍ਖਂ ਸੇਤਿ, ਰਾਜਾ ਚੇ ਹੋਤਿ ਅਧਮ੍ਮਿਕੋ.
ਅਧਮ੍ਮਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਪਤ੍ਤਕਮ੍ਮਵਗ੍ਗਵਣ੍ਣਨਾ ਨਿਟ੍ਠਿਤਾ.