੧. ਪਠਮਪੁਞ੍ਞਾਭਿਸਨ੍ਦਸੁਤ੍ਤਵਣ੍ਣਨਾ

੫੧. ਦੁਤਿਯਸ੍ਸ ਪਠਮੇ ਪੁਞ੍ਞਾਭਿਸਨ੍ਦਾਤਿ ਵਾ ਪੁਞ੍ਞਨਦਿਯੋ. ਅਵਿਚ੍ਛੇਦੇਨ ਨਿਚ੍ਚਂ ਪਵਤ੍ਤਿਯਮਾਨਾਨਿ ਹਿ ਪੁਞ੍ਞਾਨਿ ਅਭਿਸਨ੍ਦਨਟ੍ਠੇਨ ‘‘ਪੁਞ੍ਞਾਭਿਸਨ੍ਦਾ’’ਤਿ ਵੁਤ੍ਤਾ. ਅਪਰਿਮਿਤਨ੍ਤਿ ਆਲ਼੍ਹਕਗਣਨਾਯ ਅਪਰਿਮਿਤਂ, ਯੋਜਨਵਸੇਨ ਪਨਸ੍ਸ ਪਰਿਮਾਣਂ ਅਤ੍ਥਿ. ਤਥਾ ਹਿ ਹੇਟ੍ਠਾ ਮਹਾਪਥਵਿਯਾ ਉਪਰਿ ਆਕਾਸੇਨ ਪਰਤੋ ਚਕ੍ਕਵਾਲ਼ਪਬ੍ਬਤੇਨ ਮਜ੍ਝੇ ਤਤ੍ਥ ਤਤ੍ਥ ਠਿਤੇਹਿ ਦੀਪਪਬ੍ਬਤਪਰਿਯਨ੍ਤੇਹਿ ਪਰਿਚ੍ਛਿਨ੍ਨਤ੍ਤਾ ਯੋਜਨਤੋ ਸਕ੍ਕਾ ਪਮਾਣਂ ਕਾਤੁਂ. ਭੇਰਵਾਰਮ੍ਮਣੇਹੀਤਿ ਸਵਿਞ੍ਞਾਣਕਾਵਿਞ੍ਞਾਣਕੇਹਿ ਭੇਰਵਾਰਮ੍ਮਣੇਹਿ. ਤਥਾ ਹਿ ਤਂ ਮਹਾਸਰੀਰਮਚ੍ਛਕੁਮ੍ਭੀਲਯਕ੍ਖਰਕ੍ਖਸਮਹਾਨਾਗਦਾਨਵਾਦੀਨਂ ਸਵਿਞ੍ਞਾਣਕਾਨਂ ਵਲ਼ਵਾਮੁਖਪਾਤਾਲਾਦੀਨਂ ਅਵਿਞ੍ਞਾਣਕਾਨਞ੍ਚ ਭੇਰਵਾਰਮ੍ਮਣਾਨਂ ਵਸੇਨ ‘‘ਬਹੁਭੇਰਵ’’ਨ੍ਤਿ ਵੁਚ੍ਚਤਿ. ਸੇਸਮੇਤ੍ਥ ਉਤ੍ਤਾਨਮੇਵ.

ਪਠਮਪੁਞ੍ਞਾਭਿਸਨ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.