(੬) ੧. ਪੁਞ੍ਞਾਭਿਸਨ੍ਦਵਗ੍ਗੋ

੧. ਪਠਮਪੁਞ੍ਞਾਭਿਸਨ੍ਦਸੁਤ੍ਤਵਣ੍ਣਨਾ

੫੧. ਦੁਤਿਯਸ੍ਸ ਪਠਮੇ ਪੁਞ੍ਞਾਭਿਸਨ੍ਦਾਤਿ ਵਾ ਪੁਞ੍ਞਨਦਿਯੋ. ਅਵਿਚ੍ਛੇਦੇਨ ਨਿਚ੍ਚਂ ਪਵਤ੍ਤਿਯਮਾਨਾਨਿ ਹਿ ਪੁਞ੍ਞਾਨਿ ਅਭਿਸਨ੍ਦਨਟ੍ਠੇਨ ‘‘ਪੁਞ੍ਞਾਭਿਸਨ੍ਦਾ’’ਤਿ ਵੁਤ੍ਤਾ. ਅਪਰਿਮਿਤਨ੍ਤਿ ਆਲ਼੍ਹਕਗਣਨਾਯ ਅਪਰਿਮਿਤਂ, ਯੋਜਨਵਸੇਨ ਪਨਸ੍ਸ ਪਰਿਮਾਣਂ ਅਤ੍ਥਿ. ਤਥਾ ਹਿ ਹੇਟ੍ਠਾ ਮਹਾਪਥਵਿਯਾ ਉਪਰਿ ਆਕਾਸੇਨ ਪਰਤੋ ਚਕ੍ਕਵਾਲ਼ਪਬ੍ਬਤੇਨ ਮਜ੍ਝੇ ਤਤ੍ਥ ਤਤ੍ਥ ਠਿਤੇਹਿ ਦੀਪਪਬ੍ਬਤਪਰਿਯਨ੍ਤੇਹਿ ਪਰਿਚ੍ਛਿਨ੍ਨਤ੍ਤਾ ਯੋਜਨਤੋ ਸਕ੍ਕਾ ਪਮਾਣਂ ਕਾਤੁਂ. ਭੇਰਵਾਰਮ੍ਮਣੇਹੀਤਿ ਸਵਿਞ੍ਞਾਣਕਾਵਿਞ੍ਞਾਣਕੇਹਿ ਭੇਰਵਾਰਮ੍ਮਣੇਹਿ. ਤਥਾ ਹਿ ਤਂ ਮਹਾਸਰੀਰਮਚ੍ਛਕੁਮ੍ਭੀਲਯਕ੍ਖਰਕ੍ਖਸਮਹਾਨਾਗਦਾਨਵਾਦੀਨਂ ਸਵਿਞ੍ਞਾਣਕਾਨਂ ਵਲ਼ਵਾਮੁਖਪਾਤਾਲਾਦੀਨਂ ਅਵਿਞ੍ਞਾਣਕਾਨਞ੍ਚ ਭੇਰਵਾਰਮ੍ਮਣਾਨਂ ਵਸੇਨ ‘‘ਬਹੁਭੇਰਵ’’ਨ੍ਤਿ ਵੁਚ੍ਚਤਿ. ਸੇਸਮੇਤ੍ਥ ਉਤ੍ਤਾਨਮੇਵ.

ਪਠਮਪੁਞ੍ਞਾਭਿਸਨ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਦੁਤਿਯਪੁਞ੍ਞਾਭਿਸਨ੍ਦਸੁਤ੍ਤਵਣ੍ਣਨਾ

੫੨. ਦੁਤਿਯੇ ਸੋਤਾਪਨ੍ਨਸ੍ਸ ਸਦ੍ਧਾ ਅਧਿਪ੍ਪੇਤਾਤਿ ਸੋਤਾਪਨ੍ਨਸ੍ਸ ਮਗ੍ਗੇਨਾਗਤਾ ਸਦ੍ਧਾ ਅਧਿਪ੍ਪੇਤਾ.

ਦੁਤਿਯਪੁਞ੍ਞਾਭਿਸਨ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩-੪. ਪਠਮਸਂਵਾਸਸੁਤ੍ਤਾਦਿਵਣ੍ਣਨਾ

੫੩-੫੪. ਤਤਿਯੇ ਯਥਾਕਮ੍ਮਂ ਤਾ ਤਾ ਗਤਿਯੋ ਅਰਨ੍ਤਿ ਉਪਗਚ੍ਛਨ੍ਤੀਤਿ ਅਰਿਯਾ, ਸਤ੍ਤਾ. ਇਮੇ ਪਨ ਕੁਚ੍ਛਿਤਾ ਅਰਿਯਾਤਿ ਕਦਰਿਯਾ. ਥਦ੍ਧਮਚ੍ਛਰਿਨੋ, ਥਦ੍ਧੇਨ ਮਚ੍ਛਰੇਨ ਸਮਨ੍ਨਾਗਤਾਤਿ ਅਤ੍ਥੋ. ਥਦ੍ਧਮਚ੍ਛਰਿਯਸਦਿਸਞ੍ਹਿ ਕੁਚ੍ਛਿਤਂ ਸਬ੍ਬਦਾ ਨਿਹੀਨਂ ਨਤ੍ਥਿ ਸਬ੍ਬਗੁਣਾਨਂ ਆਦਿਭੂਤਸ੍ਸ ਭੋਗਸਮ੍ਪਤ੍ਤਿਆਦਿਸਬ੍ਬਸਮ੍ਪਤ੍ਤੀਨਂ ਮੂਲਭੂਤਸ੍ਸ ਦਾਨਸ੍ਸ ਨਿਸੇਧਨਤੋ. ਤੇਨਾਹ ‘‘ਕਦਰਿਯਾਤਿ ਥਦ੍ਧਮਚ੍ਛਰਿਨੋ’’ਤਿ. ਏਕਚ੍ਚੋ ਹਿ ਅਤ੍ਤਨੋ ਵਸਨਟ੍ਠਾਨੇ ਭਿਕ੍ਖੂ ਹਤ੍ਥਂ ਪਸਾਰੇਤ੍ਵਾਪਿ ਨ ਵਨ੍ਦਤਿ. ਅਞ੍ਞਤ੍ਥ ਗਤੋ ਵਿਹਾਰਂ ਪਵਿਸਿਤ੍ਵਾ ਸਕ੍ਕਚ੍ਚਂ ਵਨ੍ਦਿਤ੍ਵਾ ਮਧੁਰਪ੍ਪਟਿਸਨ੍ਥਾਰਂ ਕਰੋਤਿ ‘‘ਕਿਂ, ਭਨ੍ਤੇ, ਅਮ੍ਹਾਕਂ ਵਸਨਟ੍ਠਾਨਂ ਨਾਗਚ੍ਛਥ, ਸਮ੍ਪਨ੍ਨੋ ਪਦੇਸੋ, ਪਟਿਬਲਾਹਂ ਅਯ੍ਯਾਨਂ ਯਾਗੁਭਤ੍ਤਾਦੀਹਿ ਉਪਟ੍ਠਾਨਂ ਕਾਤੁ’’ਨ੍ਤਿ. ਭਿਕ੍ਖੁ ‘‘ਸਦ੍ਧੋ ਅਯਂ ਉਪਾਸਕੋ’’ਤਿ ਯਾਗੁਭਤ੍ਤਾਦੀਹਿ ਸਙ੍ਗਣ੍ਹਾਤਿ.

ਅਥੇਕੋ ਥੇਰੋ ਤਸ੍ਸ ਗਾਮਂ ਗਨ੍ਤ੍ਵਾ ਪਿਣ੍ਡਾਯ ਚਰਤਿ. ਸੋ ਤਂ ਦਿਸ੍ਵਾ ਅਞ੍ਞੇਨ ਵਾ ਗਚ੍ਛਤਿ, ਘਰਂ ਵਾ ਪਵਿਸਤਿ. ਸਚੇਪਿ ਸਮ੍ਮੁਖੀਭਾਵਂ ਆਗਚ੍ਛਤਿ, ਹਤ੍ਥੇਨ ਵਨ੍ਦਿਤ੍ਵਾ ‘‘ਅਯ੍ਯਸ੍ਸ ਭਿਕ੍ਖਂ ਦੇਥ, ਅਹਂ ਏਕੇਨ ਕਮ੍ਮੇਨ ਗਚ੍ਛਾਮੀ’’ਤਿ ਪਕ੍ਕਮਤਿ. ਥੇਰੋ ਸਕਲਗਾਮਂ ਚਰਿਤ੍ਵਾ ਤੁਚ੍ਛਪਤ੍ਤੋਵ ਨਿਕ੍ਖਮਤਿ. ਇਦਂ ਤਾਵ ਮੁਦੁਮਚ੍ਛਰਿਯਂ ਨਾਮ. ਯੇਨ ਅਦਾਯਕੋਪਿ ਦਾਯਕੋ ਵਿਯ ਪਞ੍ਞਾਯਤਿ. ਇਧ ਪਨ ਥਦ੍ਧਮਚ੍ਛਰਿਯਂ ਅਧਿਪ੍ਪੇਤਂ. ਯੇਨ ਸਮਨ੍ਨਾਗਤੋ ਭਿਕ੍ਖੂਸੁ ਪਿਣ੍ਡਾਯ ਪਵਿਟ੍ਠੇਸੁ ‘‘ਥੇਰਾ ਠਿਤਾ’’ਤਿ ਵੁਤ੍ਤੇ ‘‘ਕਿਂ ਮਯ੍ਹਂ ਪਾਦਾ ਰੁਜ੍ਜਨ੍ਤੀ’’ਤਿਆਦੀਨਿ ਵਤ੍ਵਾ ਸਿਲਾਥਮ੍ਭੋ ਵਿਯ ਖਾਣੁਕੋ ਵਿਯ ਚ ਥਦ੍ਧੋ ਹੁਤ੍ਵਾ ਤਿਟ੍ਠਤਿ, ਸਾਮੀਚਿਮ੍ਪਿ ਨ ਕਰੋਤਿ, ਕੁਤੋ ਦਾਨਂ. ਅਯਮਿਧ ਅਧਿਪ੍ਪੇਤੋ. ਤੇਨ ਵੁਤ੍ਤਂ ‘‘ਥਦ੍ਧਮਚ੍ਛਰਿਨੋਤਿ ਥਦ੍ਧੇਨ ਮਚ੍ਛਰੇਨ ਸਮਨ੍ਨਾਗਤਾਤਿ ਅਤ੍ਥੋ’’ਤਿ. ਮਚ੍ਛਰਂ ਮਚ੍ਛੇਰਂ ਮਚ੍ਛਰਿਯਨ੍ਤਿ ਅਤ੍ਥਤੋ ਏਕਂ.

ਪਰਿਭਾਸਕਾਤਿ ਭਿਕ੍ਖੂ ਘਰਦ੍ਵਾਰੇ ਠਿਤੇ ਦਿਸ੍ਵਾ ‘‘ਕਿਂ ਤੁਮ੍ਹੇ ਕਸਿਤ੍ਵਾ ਆਗਤਾ ਵਪਿਤ੍ਵਾ ਲਾਯਿਤ੍ਵਾ, ਮਯਂ ਅਤ੍ਤਨੋਪਿ ਨ ਲਭਾਮ, ਕੁਤੋ ਤੁਮ੍ਹਾਕਂ, ਸੀਘਂ ਨਿਕ੍ਖਮਥਾ’’ਤਿਆਦੀਹਿ ਸਨ੍ਤਜ੍ਜਕਾ. ਯਾਚਕਾਨਂ ਵਚਨਸ੍ਸ ਅਤ੍ਥਂ ਜਾਨਨ੍ਤੀਤਿ ਏਤ੍ਥ ਕਿਞ੍ਚਾਪਿ ਭਿਕ੍ਖੂ ਘਰਦ੍ਵਾਰੇ ਠਿਤਾ ਤੁਣ੍ਹੀ ਹੋਨ੍ਤਿ, ਅਤ੍ਥਤੋ ਪਨ ‘‘ਭਿਕ੍ਖਂ ਦੇਥਾ’’ਤਿ ਵਦਨ੍ਤਿ ਨਾਮ ਅਰਿਯਾਯ ਯਾਚਨਾਯ. ਵੁਤ੍ਤਞ੍ਹੇਤਂ ‘‘ਉਦ੍ਦਿਸ੍ਸ ਅਰਿਯਾ ਤਿਟ੍ਠਨ੍ਤਿ, ਏਸਾ ਅਰਿਯਾਨ ਯਾਚਨਾ’’ਤਿ (ਮਿ. ਪ. ੪.੫.੯). ਤਤ੍ਰ ਯੇ ‘‘ਮਯਂ ਪਚਾਮ, ਇਮੇ ਨ ਪਚਨ੍ਤਿ, ਪਚਮਾਨੇ ਪਤ੍ਵਾ ਅਲਭਨ੍ਤਾ ਕੁਹਿਂ ਲਭਿਸ੍ਸਤੀ’’ਤਿ ਦੇਯ੍ਯਧਮ੍ਮਂ ਸਂਵਿਭਜਨ੍ਤਿ, ਤੇ ਵਦਞ੍ਞੂ ਯਾਚਕਾਨਂ ਵਚਨਸ੍ਸ ਅਤ੍ਥਂ ਜਾਨਨ੍ਤਿ ਨਾਮ ਞਤ੍ਵਾ ਕਤ੍ਤਬ੍ਬਕਰਣਤੋ. ਚਤੁਤ੍ਥਂ ਉਤ੍ਤਾਨਮੇਵ.

ਪਠਮਸਂਵਾਸਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੫-੬. ਸਮਜੀਵੀਸੁਤ੍ਤਾਦਿਵਣ੍ਣਨਾ

੫੫-੫੬. ਪਞ੍ਚਮੇ ਅਨੁਗ੍ਗਣ੍ਹਨਤ੍ਥਨ੍ਤਿ ਨਕੁਲਮਾਤਾ ਨਕੁਲਪਿਤਾਤਿ ਇਮੇਸਂ ਦ੍ਵਿਨ੍ਨਂ ਸਙ੍ਗਹਤ੍ਥਾਯ. ਨਕੁਲਸ੍ਸ ਦਾਰਕਸ੍ਸ ਪਿਤਾ ਨਕੁਲਪਿਤਾ. ਨਕੁਲਮਾਤਾਤਿ ਏਤ੍ਥਾਪਿ ਏਸੇਵ ਨਯੋ. ਸੇਸਮੇਤ੍ਥ ਉਤ੍ਤਾਨਮੇਵ. ਛਟ੍ਠੇ ਨਤ੍ਥਿ ਵਤ੍ਤਬ੍ਬਂ.

ਸਮਜੀਵੀਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੭-੧੦. ਸੁਪ੍ਪਵਾਸਾਸੁਤ੍ਤਾਦਿਵਣ੍ਣਨਾ

੫੭-੬੦. ਸਤ੍ਤਮੇ ਆਯੁਭਾਗਪਟਿਲਾਭਿਨੀ ਹੋਤੀਤਿ ਆਯੁਕੋਟ੍ਠਾਸਸ੍ਸ ਪਟਿਲਾਭਿਨੀ ਹੋਤਿ. ਤਿਵਿਧਲੋਕਨ੍ਤਿ ਸਤ੍ਤਸਙ੍ਖਾਰਭਾਜਨਸਙ੍ਖਾਤਂ ਤਿਵਿਧਂ ਲੋਕਂ. ਵਿਦਿਤਂ ਕਤ੍ਵਾਤਿ ਵਿਭੂਤਂ ਕਤ੍ਵਾ. ਲੋਕਵਿਦੂਨਨ੍ਤਿ ਕਰਣਤ੍ਥੇ ਸਾਮਿਵਚਨਨ੍ਤਿ ਆਹ ‘‘ਬੁਦ੍ਧੇਹਿ ਪਸਤ੍ਥਾ’’ਤਿ. ਅਟ੍ਠਮਨਵਮਦਸਮਾਨਿ ਉਤ੍ਤਾਨਤ੍ਥਾਨੇਵ.

ਸੁਪ੍ਪਵਾਸਾਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਪੁਞ੍ਞਾਭਿਸਨ੍ਦਵਗ੍ਗਵਣ੍ਣਨਾ ਨਿਟ੍ਠਿਤਾ.