੫. ਰੋਹਿਤਸ੍ਸਵਗ੍ਗੋ
੧. ਸਮਾਧਿਭਾਵਨਾਸੁਤ੍ਤਵਣ੍ਣਨਾ
੪੧. ਪਞ੍ਚਮਸ੍ਸ ਪਠਮੇ ਦਿਟ੍ਠਧਮ੍ਮਸੁਖਵਿਹਾਰਾਯਾਤਿ ਇਮਸ੍ਮਿਂਯੇਵ ਅਤ੍ਤਭਾਵੇ ਸੁਖਵਿਹਾਰਤ੍ਥਾਯ, ਨਿਕ੍ਕਿਲੇਸਤਾਯ ਨਿਰਾਮਿਸੇਨ ਸੁਖੇਨ ਵਿਹਰਣਤ੍ਥਾਯਾਤਿ ਅਤ੍ਥੋ. ਇਮਿਨਾ ਚਤ੍ਤਾਰਿ ਫਲਸਮਾਪਤ੍ਤਿਜ੍ਝਾਨਾਨਿ ਖੀਣਾਸਵਸ੍ਸ ਆਸਵਕ੍ਖਯਾਧਿਗਮਤੋ ਅਪਰਭਾਗੇ ਅਧਿਗਤਰੂਪਾਰੂਪਜ੍ਝਾਨਾਨਿ ਚ ਕਥਿਤਾਨਿ. ਦਿਬ੍ਬਚਕ੍ਖੁਞਾਣਦਸ੍ਸਨਪ੍ਪਟਿਲਾਭਾਯਾਤਿ ਦਿਬ੍ਬਚਕ੍ਖੁਞਾਣਪ੍ਪਟਿਲਾਭਤ੍ਥਾਯ. ਦਿਬ੍ਬਚਕ੍ਖੁਞਾਣਞ੍ਹਿ ਰੂਪਗਤਸ੍ਸ ਦਿਬ੍ਬਸ੍ਸ ਇਤਰਸ੍ਸ ਚ ਦਸ੍ਸਨਟ੍ਠੇਨ ਇਧ ‘‘ਞਾਣਦਸ੍ਸਨ’’ਨ੍ਤਿ ਅਧਿਪ੍ਪੇਤਂ. ਆਲੋਕਸਞ੍ਞਂ ਮਨਸਿ ਕਰੋਤੀਤਿ ਦਿਵਾ ਵਾ ਰਤ੍ਤਿਂ ਵਾ ਸੂਰਿਯਦੀਪਚਨ੍ਦਮਣਿਉਕ੍ਕਾਵਿਜ੍ਜੁਲਤਾਦੀਨਂ ਆਲੋਕੋ ਦਿਵਾ ਰਤ੍ਤਿਞ੍ਚ ਉਪਲਦ੍ਧੋ, ਯਥਾਲਦ੍ਧਵਸੇਨੇਵ ਆਲੋਕਂ ਮਨਸਿ ਕਰੋਤਿ ਚਿਤ੍ਤੇ ਠਪੇਤਿ, ਤਥਾ ਚ ਨਂ ਮਨਸਿ ਕਰੋਤਿ, ਯਥਾਸ੍ਸ ਸੁਭਾਵਿਤਾਲੋਕਕਸਿਣਸ੍ਸ ਵਿਯ ਕਸਿਣਾਲੋਕੋ ਯਥਿਚ੍ਛਕਂ ਯਾਵਦਿਚ੍ਛਕਞ੍ਚ ਸੋ ਆਲੋਕੋ ਰਤ੍ਤਿਯਂ ਉਪਤਿਟ੍ਠਤਿ, ਯੇਨ ਤਤ੍ਥ ਦਿਵਾਸਞ੍ਞਂ ਠਪੇਤਿ, ਦਿਵਾ ਵਿਯ ਵਿਗਤਥਿਨਮਿਦ੍ਧੋ ਹੋਤਿ. ਤੇਨਾਹ ‘‘ਯਥਾ ਦਿਵਾ ਤਥਾ ਰਤ੍ਤਿ’’ਨ੍ਤਿ.
ਯਥਾ ਦਿਵਾ ਆਲੋਕਸਞ੍ਞਾ ਮਨਸਿ ਕਤਾ, ਤਥੇਵ ਨਂ ਰਤ੍ਤਿਮ੍ਪਿ ਮਨਸਿ ਕਰੋਤੀਤਿ ਯਥਾ ਦਿਵਾ ਦਿਟ੍ਠੋ ਆਲੋਕੋ, ਤਥੇਵ ਤਂ ਰਤ੍ਤਿਂ ਮਨਸਿ ਕਰੋਤਿ. ਦੁਤਿਯਪਦੇਤਿ ‘‘ਯਥਾ ਰਤ੍ਤਿਂ ਤਥਾ ਦਿਵਾ’’ਤਿ ਇਮਸ੍ਮਿਂ ਵਾਕ੍ਯੇ. ਏਸ ਨਯੋਤਿ ਇਮਿਨਾ ਯਥਾ ਰਤ੍ਤਿਯਂ ਚਨ੍ਦਾਲੋਕਾਦਿ ਆਲੋਕੋ ਦਿਟ੍ਠੋ, ਏਵਮੇਵ ਰਤ੍ਤਿਂ ਦਿਟ੍ਠਾਕਾਰੇਨੇਵ ਦਿਵਾ ਤਂ ਆਲੋਕਂ ਮਨਸਿ ਕਰੋਤਿ ਚਿਤ੍ਤੇ ਠਪੇਤੀਤਿ ਇਮਮਤ੍ਥਂ ਅਤਿਦਿਸਤਿ. ਇਤਿ ਵਿਵਟੇਨ ਚੇਤਸਾਤਿ ਏਵਂ ਅਪਿਹਿਤੇਨ ਚਿਤ੍ਤੇਨ, ਥਿਨਮਿਦ੍ਧਾਪਿਧਾਨੇਨ ਅਪਿਹਿਤਚਿਤ੍ਤੇਨਾਤਿ ਵੁਤ੍ਤਂ ਹੋਤਿ. ਅਪਰਿਯੋਨਦ੍ਧੇਨਾਤਿ ਸਮਨ੍ਤਤੋ ਅਨਦ੍ਧੇਨ ਅਸਞ੍ਛਾਦਿਤੇਨ. ਕਿਞ੍ਚਾਪੀਤਿਆਦਿਨਾ ਅਤ੍ਤਨਾ ਵੁਤ੍ਤਮੇਵਤ੍ਥਂ ਸਮਤ੍ਥੇਤਿ. ਆਲੋਕਸਦਿਸਂ ਕਤਂ ‘‘ਯਥਾ ਦਿਵਾ ਤਥਾ ਰਤ੍ਤਿ’’ਨ੍ਤਿਆਦਿਨਾ.
ਸਤ੍ਤਟ੍ਠਾਨਿਕਸ੍ਸਾਤਿ ‘‘ਅਭਿਕ੍ਕਨ੍ਤੇ ਪਟਿਕ੍ਕਨ੍ਤੇ ਸਮ੍ਪਜਾਨਕਾਰੀ ਹੋਤੀ’’ਤਿਆਦਿਨਾ (ਦੀ. ਨਿ. ੧.੨੧੪; ੨.੩੭੬; ਮ. ਨਿ. ੧.੧੦੯) ਵੁਤ੍ਤਸ੍ਸ ਸਤ੍ਤਟ੍ਠਾਨਿਕਸ੍ਸ ਸਤਿਸਮ੍ਪਜਞ੍ਞਸ੍ਸ ਅਤ੍ਥਾਯ. ਪਰਿਗ੍ਗਹਿਤਵਤ੍ਥਾਰਮ੍ਮਣਤਾਯਾਤਿ ਵਤ੍ਥੁਨੋ ਆਰਮ੍ਮਣਸ੍ਸ ਚ ਯਾਥਾਵਤੋ ਵਿਦਿਤਭਾਵੇਨ. ਯਥਾ ਹਿ ਸਪ੍ਪਂ ਪਰਿਯੇਸਨ੍ਤੇਨ ਤਸ੍ਸ ਆਸਯੇ ਵਿਦਿਤੇ ਸੋਪਿ ਵਿਦਿਤੋ ਗਹਿਤੋ ਏਵ ਚ ਹੋਤਿ ਮਨ੍ਤਾਗਦਬਲੇਨ ਤਸ੍ਸ ਗਹਣਸ੍ਸ ਸੁਕਰਤ੍ਤਾ, ਏਵਂ ਵੇਦਨਾਯ ਆਸਯਭੂਤੇ ਵਤ੍ਥੁਮ੍ਹਿ ਆਰਮ੍ਮਣੇ ਚ ਵਿਦਿਤੇ ਆਦਿਕਮ੍ਮਿਕਸ੍ਸਪਿ ਵੇਦਨਾ ਵਿਦਿਤਾ ਗਹਿਤਾ ਏਵ ਹੋਤਿ ਸਲਕ੍ਖਣਤੋ ਸਾਮਞ੍ਞਲਕ੍ਖਣਤੋ ਚ ਤਸ੍ਸਾ ਗਹਣਸ੍ਸ ਸੁਕਰਤ੍ਤਾ. ਪਗੇਵ ਪਰਿਞ੍ਞਾਤਵਤ੍ਥੁਕਸ੍ਸ ਖੀਣਾਸਵਸ੍ਸ. ਤਸ੍ਸ ਹਿ ਉਪ੍ਪਾਦਕ੍ਖਣੇਪਿ ਠਿਤਿਕ੍ਖਣੇਪਿ ਭਙ੍ਗਕ੍ਖਣੇਪਿ ਵੇਦਨਾ ਵਿਦਿਤਾ ਪਾਕਟਾ ਹੋਨ੍ਤਿ ‘‘ਤਾ ਵੇਦਨਾ ਏਵਂ ਉਪ੍ਪਜ੍ਜਿਤ੍ਵਾ’’ਤਿਆਦਿਨਾ. ਨ ਕੇਵਲਞ੍ਚ ਵੇਦਨਾ ਏਵ, ਇਧ ਵੁਤ੍ਤਾ ਸਞ੍ਞਾਦਯੋਪਿ ਅਵੁਤ੍ਤਾ ਚੇਤਨਾਦਯੋਪਿ ਵਿਦਿਤਾਵ ਉਪ੍ਪਜ੍ਜਨ੍ਤਿ ਚੇਵ ਤਿਟ੍ਠਨ੍ਤਿ ਚ ਨਿਰੁਜ੍ਝਨ੍ਤਿ ਚ. ਨਿਦਸ੍ਸਨਮਤ੍ਤਞ੍ਹੇਤਂ, ਯਦਿਦਂ ਪਾਲ਼ਿਯਂ ਵੇਦਨਾਸਞ੍ਞਾਵਿਤਕ੍ਕਗ੍ਗਹਣਂ. ਤੇਨ ਅਨਵਸੇਸਤੋ ਸਬ੍ਬਧਮ੍ਮਾਨਮ੍ਪਿ ਉਪ੍ਪਾਦਾਦਿਤੋ ਵਿਦਿਤਭਾਵਂ ਦਸ੍ਸੇਤਿ.
ਅਪਿਚ ਵੇਦਨਾਯ ਉਪ੍ਪਾਦੋ ਵਿਦਿਤੋ ਹੋਤਿ, ਉਪਟ੍ਠਾਨਂ ਵਿਦਿਤਂ ਹੋਤਿ, ਅਤ੍ਥਙ੍ਗਮੋ ਵਿਦਿਤੋ ਹੋਤਿ. ਕਥਂ ਵੇਦਨਾਯ ਉਪ੍ਪਾਦੋ ਵਿਦਿਤੋ ਹੋਤਿ? ਅਵਿਜ੍ਜਾਸਮੁਦਯਾ ਵੇਦਨਾਸਮੁਦਯੋ, ਤਣ੍ਹਾਸਮੁਦਯਾ ਕਮ੍ਮਸਮੁਦਯੋ, ਫਸ੍ਸਸਮੁਦਯਾ ਵੇਦਨਾਸਮੁਦਯੋਤਿ ਨਿਬ੍ਬਤ੍ਤਿਲਕ੍ਖਣਂ ਪਸ੍ਸਨ੍ਤੋਪਿ ਵੇਦਨਾਕ੍ਖਨ੍ਧਸ੍ਸ ਸਮੁਦਯਂ ਪਸ੍ਸਤਿ. ਏਵਂ ਵੇਦਨਾਯ ਉਪ੍ਪਾਦੋ ਵਿਦਿਤੋ ਹੋਤਿ. ਕਥਂ ਵੇਦਨਾਯ ਉਪਟ੍ਠਾਨਂ ਵਿਦਿਤਂ ਹੋਤਿ? ਅਨਿਚ੍ਚਤੋ ਮਨਸਿਕਰੋਤੋ ਖਯਤੁਪਟ੍ਠਾਨਂ ਵਿਦਿਤਂ ਹੋਤਿ, ਦੁਕ੍ਖਤੋ ਮਨਸਿਕਰੋਤੋ ਭਯਤੁਪਟ੍ਠਾਨਂ ਵਿਦਿਤਂ ਹੋਤਿ, ਅਨਤ੍ਤਤੋ ਮਨਸਿਕਰੋਤੋ ਸੁਞ੍ਞਤੁਪਟ੍ਠਾਨਂ ਵਿਦਿਤਂ ਹੋਤਿ. ਏਵਂ ਵੇਦਨਾਯ ਉਪਟ੍ਠਾਨਂ ਵਿਦਿਤਂ ਹੋਤਿ. ਇਤਿ ਖਯਤੋ ਭਯਤੋ ਸੁਞ੍ਞਤੋ ਜਾਨਾਤਿ. ਕਥਂ ਵੇਦਨਾਯ ਅਤ੍ਥਙ੍ਗਮੋ ਵਿਦਿਤੋ ਹੋਤਿ? ਅਵਿਜ੍ਜਾਨਿਰੋਧਾ ਵੇਦਨਾਨਿਰੋਧੋ…ਪੇ… ਏਵਂ ਵੇਦਨਾਯ ਅਤ੍ਥਙ੍ਗਮੋ ਵਿਦਿਤੋ ਹੋਤਿ. ਇਮਿਨਾਪਿ ਨਯੇਨੇਤ੍ਥ ਅਤ੍ਥੋ ਵੇਦਿਤਬ੍ਬੋ.
ਇਤਿ ਰੂਪਨ੍ਤਿ ਏਤ੍ਥ ਇਤਿਸਦ੍ਦੋ ਅਨਵਸੇਸਤੋ ਰੂਪਸ੍ਸ ਸਰੂਪਨਿਦਸ੍ਸਨਤ੍ਥੋਤਿ ਤਸ੍ਸ ਇਦਂ ਰੂਪਨ੍ਤਿ ਏਤੇਨ ਸਾਧਾਰਣਤੋ ਸਰੂਪਨਿਦਸ੍ਸਨਮਾਹ, ਏਤ੍ਤਕਂ ਰੂਪਨ੍ਤਿ ਏਤੇਨ ਅਨਵਸੇਸਤੋ, ਨ ਇਤੋ ਪਰਂ ਰੂਪਂ ਅਤ੍ਥੀਤਿ ਤਬ੍ਬਿਨਿਮੁਤ੍ਤਸ੍ਸ ਅਞ੍ਞਸ੍ਸ ਅਭਾਵਂ. ਇਤਿ ਵੇਦਨਾਤਿਆਦੀਸੁਪਿ ਅਯਂ ਵੇਦਨਾ, ਏਤ੍ਤਕਾ ਵੇਦਨਾ, ਇਤੋ ਪਰਂ ਵੇਦਨਾ ਨਤ੍ਥਿ. ਅਯਂ ਸਞ੍ਞਾ…ਪੇ… ਇਮੇ ਸਙ੍ਖਾਰਾ…ਪੇ… ਇਦਂ ਵਿਞ੍ਞਾਣਂ, ਏਤ੍ਤਕਂ ਵਿਞ੍ਞਾਣਂ, ਇਤੋ ਪਰਂ ਵਿਞ੍ਞਾਣਂ ਨਤ੍ਥੀਤਿ ਏਵਮਤ੍ਥੋ ਦਟ੍ਠਬ੍ਬੋਤਿ ਆਹ ‘‘ਵੇਦਨਾਦੀਸੁਪਿ ਏਸੇਵ ਨਯੋ’’ਤਿ.
ਞਾਣੇਨ ਜਾਨਿਤ੍ਵਾ ਪਰੋਪਰਾਨਿ. ਪਰੋਪਰਾਨੀਤਿ ਪਰਾਨਿ ਚ ਓਪਰਾਨਿ ਚ. ਉਤ੍ਤਮਾਧਮਾਨੀਤਿ ਪਰਤ੍ਤਭਾਵਸਕਤ੍ਤਭਾਵਾਦੀਨਿ ਉਤ੍ਤਮਾਧਮਾਨਿ. ਚਲਿਤਨ੍ਤਿ ਤਣ੍ਹਾਦਿਟ੍ਠਿਵਿਪ੍ਫਨ੍ਦਿਤਂ. ਅਨੀਘੋਤਿ ਰਾਗਾਦਿਈਘਰਹਿਤੋ. ਅਤਾਰਿ ਸੋਤਿ ਸੋ ਏਵਰੂਪੋ ਅਰਹਾ ਜਾਤਿਜਰਂ ਅਤਰਿ.
ਸਮਾਧਿਭਾਵਨਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨-੪. ਪਞ੍ਹਬ੍ਯਾਕਰਣਸੁਤ੍ਤਾਦਿਵਣ੍ਣਨਾ
੪੨-੪੪. ਦੁਤਿਯੇ ਏਤੇਸਂ ਪਞ੍ਹਾਨਨ੍ਤਿ ਏਕਂਸਬ੍ਯਾਕਰਣਾਦੀਨਂ ਚਤੁਨ੍ਨਂ ਪਞ੍ਹਾਨਂ. ਤਸ੍ਮਿਂ ਤਸ੍ਮਿਂ ਠਾਨੇ ਬ੍ਯਾਕਰਣਂ ਜਾਨਾਤੀਤਿ ‘‘ਚਕ੍ਖੁਂ ਅਨਿਚ੍ਚ’’ਨ੍ਤਿ ਪੁਟ੍ਠੇ ‘‘ਅਨਿਚ੍ਚ’’ਨ੍ਤਿ ਏਕਂਸੇਨੇਵ ਬ੍ਯਾਕਾਤਬ੍ਬਂ. ‘‘ਅਨਿਚ੍ਚਾ ਨਾਮ ਚਕ੍ਖੁ’’ਨ੍ਤਿ ਪੁਟ੍ਠੇ ਪਨ ‘‘ਨ ਕੇਵਲਂ ਚਕ੍ਖੁਮੇਵ, ਸੋਤਮ੍ਪਿ ਅਨਿਚ੍ਚ’’ਨ੍ਤਿ ਏਵਂ ਵਿਭਜਿਤ੍ਵਾ ਬ੍ਯਾਕਾਤਬ੍ਬਂ. ‘‘ਯਥਾ ਚਕ੍ਖੁਂ ਤਥਾ ਸੋਤਂ, ਯਥਾ ਸੋਤਂ ਤਥਾ ਚਕ੍ਖੁ’’ਨ੍ਤਿ ਪੁਟ੍ਠੇ ‘‘ਕੇਨਟ੍ਠੇਨ ਪੁਚ੍ਛਸੀ’’ਤਿ ਪਟਿਪੁਚ੍ਛਿਤ੍ਵਾ ‘‘ਦਸ੍ਸਨਟ੍ਠੇਨ ਪੁਚ੍ਛਾਮੀ’’ਤਿ ਵੁਤ੍ਤੇ ‘‘ਨ ਹੀ’’ਤਿ ਬ੍ਯਾਕਾਤਬ੍ਬਂ. ‘‘ਅਨਿਚ੍ਚਟ੍ਠੇਨ ਪੁਚ੍ਛਾਮੀ’’ਤਿ ਵੁਤ੍ਤੇ ‘‘ਆਮਾ’’ਤਿ ਬ੍ਯਾਕਾਤਬ੍ਬਂ. ‘‘ਤਂ ਜੀਵਂ ਤਂ ਸਰੀਰ’’ਨ੍ਤਿਆਦੀਨਿ ਪੁਟ੍ਠੇਨ ਪਨ ‘‘ਅਬ੍ਯਾਕਤਮੇਤਂ ਭਗਵਤਾ’’ਤਿ ਠਪੇਤਬ੍ਬੋ, ਏਸ ਪਞ੍ਹੋ ਨ ਬ੍ਯਾਕਾਤਬ੍ਬੋਤਿ ਏਵਂ ਜਾਨਾਤੀਤਿ ਅਤ੍ਥੋ. ਅਤ੍ਥਸਮਾਗਮੇਨਾਤਿ ਅਤ੍ਥਸ੍ਸ ਪਟਿਲਾਭੇਨ ਲਦ੍ਧਬ੍ਬੇਨ. ਸਮਿਤਿ ਸਙ੍ਗਤਿ ਸਮੋਧਾਨਨ੍ਤਿ ਸਮਯੋ, ਪਟਿਲਾਭੋ. ਸਮਯੋ ਏਵ ਅਭਿਸਮਯੋ, ਅਭਿਮੁਖਭਾਵੇਨ ਵਾ ਸਮਯੋ ਅਭਿਸਮਯੋਤਿ ਏਵਮੇਤ੍ਥ ਪਦਤ੍ਥੋ ਵੇਦਿਤਬ੍ਬੋ. ਸੇਸਂ ਸੁਵਿਞ੍ਞੇਯ੍ਯਮੇਵ. ਤਤਿਯਚਤੁਤ੍ਥਾਨਿ ਉਤ੍ਤਾਨਤ੍ਥਾਨੇਵ.
ਪਞ੍ਹਬ੍ਯਾਕਰਣਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੫-੬. ਰੋਹਿਤਸ੍ਸਸੁਤ੍ਤਾਦਿਵਣ੍ਣਨਾ
੪੫-੪੬. ਪਞ੍ਚਮੇ (ਸਂ. ਨਿ. ਟੀ. ੧.੧.੧੦੭) ਏਕੋਕਾਸੇਤਿ ਚਕ੍ਕਵਾਲ਼ਸ੍ਸ ਪਰਿਯਨ੍ਤਸਞ੍ਞਿਤੇ ਏਕਸ੍ਮਿਂ ਓਕਾਸੇ. ਭੁਮ੍ਮਨ੍ਤਿ ‘‘ਯਤ੍ਥਾ’’ਤਿ ਇਦਂ ਭੁਮ੍ਮਵਚਨਂ. ਸਾਮਞ੍ਞਤੋ ਵੁਤ੍ਤਮ੍ਪਿ ‘‘ਸੋ ਲੋਕਸ੍ਸ ਅਨ੍ਤੋ’’ਤਿ ਵਚਨਤੋ ਵਿਸਿਟ੍ਠਵਿਸਯਮੇਵ ਹੋਤਿ. ‘‘ਨ ਜਾਯਤਿ, ਨ ਮੀਯਤੀ’’ਤਿ ਵਤ੍ਵਾ ਪੁਨ ‘‘ਨ ਚਵਤਿ, ਨ ਉਪਪਜ੍ਜਤੀ’’ਤਿ ਕਸ੍ਮਾ ਵੁਤ੍ਤਨ੍ਤਿ ਆਹ ‘‘ਇਦਂ ਅਪਰਾਪਰਂ…ਪੇ… ਗਹਿਤ’’ਨ੍ਤਿ. ਪਦਗਮਨੇਨਾਤਿ ਪਦਸਾ ਗਮਨੇਨ. ਸਤ੍ਥਾ ਸਙ੍ਖਾਰਲੋਕਸ੍ਸ ਅਨ੍ਤਂ ਸਨ੍ਧਾਯ ਵਦਤਿ ਉਪਰਿ ਸਬ੍ਬਾਨਿ ਪਕਾਸੇਤੁਕਾਮੋ. ਸਙ੍ਖਾਰਲੋਕਸ੍ਸ ਹਿ ਅਨ੍ਤੋ ਨਿਬ੍ਬਾਨਂ.
ਦਲ਼੍ਹਂ ਥਿਰਂ ਧਨੁ ਏਤਸ੍ਸਾਤਿ ਦਲ਼੍ਹਧਨ੍ਵਾ, ਸੋ ਏਵ ‘‘ਦਲ਼੍ਹਧਮ੍ਮਾ’’ਤਿ ਵੁਤ੍ਤੋ. ਤੇਨਾਹ ‘‘ਦਲ਼੍ਹਧਨੂ’’ਤਿ. ਉਤ੍ਤਮਪ੍ਪਮਾਣਂ ਨਾਮ ਸਹਸ੍ਸਥਾਮਧਨੁ. ਧਨੁਗ੍ਗਣ੍ਹਨਸਿਪ੍ਪਚਿਤ੍ਤਕਤਾਯ ਧਨੁਗ੍ਗਹੋ, ਨ ਧਨੁਗ੍ਗਹਣਮਤ੍ਤੇਨਾਤਿ ਆਹ ‘‘ਧਨੁਗ੍ਗਹੋਤਿ ਧਨੁਆਚਰਿਯੋ’’ਤਿ. ‘‘ਧਨੁਗ੍ਗਹੋ’’ਤਿ ਵਤ੍ਵਾ ‘‘ਸਿਕ੍ਖਿਤੋ’’ਤਿ ਵੁਤ੍ਤੇ ਧਨੁਸਿਕ੍ਖਾਯ ਸਿਕ੍ਖਿਤੋਤਿ ਵਿਞ੍ਞਾਯਤਿ. ਸਿਕ੍ਖਾ ਚ ਏਤ੍ਤਕੇਨ ਕਾਲੇਨ ਸਿਕ੍ਖਨ੍ਤਸ੍ਸ ਉਕ੍ਕਂਸਗਤਾ ਹੋਤੀਤਿ ਆਹ ‘‘ਦ੍ਵਾਦਸ ਵਸ੍ਸਾਨਿ ਧਨੁਸਿਪ੍ਪਂ ਸਿਕ੍ਖਿਤੋ’’ਤਿ. ਉਸਭਪ੍ਪਮਾਣੇਤਿ ਵੀਸਤਿ ਯਟ੍ਠਿਯੋ ਉਸਭਂ, ਤਸ੍ਮਿਂ ਉਸਭਪ੍ਪਮਾਣੇ ਪਦੇਸੇ. ਵਾਲਗ੍ਗਨ੍ਤਿ ਵਾਲਕੋਟਿਂ. ਕਤਹਤ੍ਥੋਤਿ ਪਰਿਚਿਤਹਤ੍ਥੋ. ਕਤਸਰਕ੍ਖੇਪੋਤਿ ਥਿਰਲਕ੍ਖੇ ਚ ਚਲਲਕ੍ਖੇ ਚ ਪਰੇਸਂ ਦਸ੍ਸਨਵਸੇਨ ਸਰਕ੍ਖੇਪਸ੍ਸ ਕਤਾਪੀ. ਤੇਨਾਹ ‘‘ਦਸ੍ਸਿਤਸਿਪ੍ਪੋ’’ਤਿ, ‘‘ਕਤਯੋਗ੍ਗੋ’’ਤਿ ਕੇਚਿ. ਅਸਨ੍ਤਿ ਏਤੇਨਾਤਿ ਅਸਨਂ, ਕਣ੍ਡੋ. ਤਾਲਚ੍ਛਾਦਿਨ੍ਤਿ ਤਾਲਚ੍ਛਾਯਂ. ਸਾ ਪਨ ਰਤਨਮਤ੍ਤਾ ਵਿਦਤ੍ਥਿਚਤੁਰਙ੍ਗੁਲਾ.
ਪੁਰਤ੍ਥਿਮਾ ਸਮੁਦ੍ਦਾਤਿ ਏਕਸ੍ਮਿਂ ਚਕ੍ਕਵਾਲ਼ੇ ਪੁਰਤ੍ਥਿਮਾ ਸਮੁਦ੍ਦਾ. ਸਮੁਦ੍ਦਸੀਸੇਨ ਪੁਰਤ੍ਥਿਮਚਕ੍ਕਵਾਲ਼ਮੁਖਵਟ੍ਟਿਂ ਵਦਤਿ. ਪਚ੍ਛਿਮਸਮੁਦ੍ਦੋਤਿ ਏਤ੍ਥਾਪਿ ਏਸੇਵ ਨਯੋ. ਨਿਪ੍ਪਪਞ੍ਚਤਨ੍ਤਿ ਅਦਨ੍ਤਕਾਰਿਤਂ. ਸਮ੍ਪਤ੍ਤੇਤਿ ਤਾਦਿਸੇਨ ਜਵੇਨ ਗਚ੍ਛਨ੍ਤੇਨ ਸਮ੍ਪਤ੍ਤੇ. ਅਨੋਤਤ੍ਤੇਤਿ ਏਤ੍ਥਾਪਿ ‘‘ਸਮ੍ਪਤ੍ਤੇ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧੋ, ਤਥਾ ‘‘ਨਾਗਲਤਾਦਨ੍ਤਕਟ੍ਠ’’ਨ੍ਤਿ ਏਤ੍ਥਾਪਿ. ਤਦਾਤਿ ਯਦਾ ਸੋ ਲੋਕਨ੍ਤਗਵੇਸਕੋ ਅਹੋਸਿ, ਤਦਾ. ਦੀਘਾਯੁਕਕਾਲੋਤਿ ਅਨੇਕਵਸ੍ਸਸਹਸ੍ਸਾਯੁਕਕਾਲੋ. ਚਕ੍ਕਵਾਲ਼ਲੋਕਸ੍ਸਾਤਿ ਸਾਮਞ੍ਞਵਸੇਨ ਏਕਵਚਨਂ, ਚਕ੍ਕਵਾਲ਼ਲੋਕਾਨਨ੍ਤਿ ਅਤ੍ਥੋ. ਇਮਸ੍ਮਿਂਯੇਵ ਚਕ੍ਕਵਾਲ਼ੇ ਨਿਬ੍ਬਤ੍ਤਿਪੁਬ੍ਬਪਰਿਚਯਸਿਦ੍ਧਾਯ ਨਿਕਨ੍ਤਿਯਾ.
ਸਸਞ੍ਞਿਮ੍ਹਿ ਸਮਨਕੇਤਿ ਨ ਰੂਪਧਮ੍ਮਮਤ੍ਤਕੇ, ਅਥ ਖੋ ਪਞ੍ਚਕ੍ਖਨ੍ਧਸਮੁਦਾਯੇਤਿ ਦਸ੍ਸੇਤਿ. ਸਮਿਤਪਾਪੋਤਿ ਸਮੁਚ੍ਛਿਨ੍ਨਸਂਕਿਲੇਸਧਮ੍ਮੋ. ਛਟ੍ਠਂ ਉਤ੍ਤਾਨਮੇਵ.
ਰੋਹਿਤਸ੍ਸਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੭. ਸੁਵਿਦੂਰਸੁਤ੍ਤਵਣ੍ਣਨਾ
੪੭. ਸਤ੍ਤਮੇ ਸੁਵਿਦੂਰਵਿਦੂਰ-ਸਦ੍ਦਾਨਂ ਸਮਾਨਤ੍ਥਾਨਂਯੇਵ ਏਕਤ੍ਥ ਗਹਣਂ ਇਧ ਨਿਦ੍ਦੇਸੋ ਦੂਰਾਸਨ੍ਨਭਾਵਸ੍ਸ ਅਪੇਕ੍ਖਾਸਿਦ੍ਧਤ੍ਤਾ ਇਧਾਧਿਪ੍ਪੇਤਸ੍ਸ ਦੂਰਭਾਵਸ੍ਸ ਕੇਨਚਿ ਪਰਿਯਾਯੇਨ ਅਨਾਸਨ੍ਨਭਾਵਦਸ੍ਸਨਤ੍ਥਂ ਕਤਨ੍ਤਿ ਆਹ ‘‘ਕੇਨਚਿ ਪਰਿਯਾਯੇਨ ਅਨਾਸਨ੍ਨਾਨਿ ਹੁਤ੍ਵਾ’’ਤਿਆਦਿ. ਸੇਸਮੇਤ੍ਥ ਉਤ੍ਤਾਨਮੇਵ.
ਸੁਵਿਦੂਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮. ਵਿਸਾਖਸੁਤ੍ਤਵਣ੍ਣਨਾ
੪੮. ਅਟ੍ਠਮੇ ਵਾਕ੍ਕਰਣਚਾਤੁਰਿਯਤੋ ਵਚਨਗੁਣਹੇਤੂਨਂ ਪੂਰਿਯਾ ਪੋਰੀ, ਪੋਰਿਯਂ ਭਵਾਤਿ ਪੋਰੀ, ਤਾਯ ਪੋਰਿਯਾ. ਤੇਨਾਹ ‘‘ਪਰਿਪੁਣ੍ਣਵਾਚਾਯਾ’’ਤਿ, ਅਕ੍ਖਰਪਦਪਰਿਪੁਣ੍ਣਾਯ ਵਾਚਾਯਾਤਿ ਅਤ੍ਥੋ. ਅਪਲਿਬੁਦ੍ਧਾਯਾਤਿ ਪਿਤ੍ਤਾਦੀਹਿ ਨ ਵਿਬਦ੍ਧਾਯ ਅਨਨੁਬੁਨ੍ਧਿਤਾਯ. ਅਨੇਲਗਲਾਯਾਤਿ ਅਨੇਲਾਯ ਅਗਲਾਯ ਨਿਦ੍ਦੋਸਾਯ ਅਗਲ਼ਿਤਪਦਬ੍ਯਞ੍ਜਨਾਯ ਚ. ਥੇਰਸ੍ਸ ਹਿ ਕਥਯਤੋ ਪਦਂ ਵਾ ਬ੍ਯਞ੍ਜਨਂ ਵਾ ਨ ਪਰਿਹਾਯਤਿ. ਤੇਨਾਹ ‘‘ਅਨੇਲਗਲਾਯਾਤਿ ਨਿਦ੍ਦੋਸਾਯ ਚੇਵ ਅਗਲ਼ਿਤਾਯ ਚਾ’’ਤਿਆਦਿ. ਤਤ੍ਥ ਨਿਦ੍ਦੋਸਾਯਾਤਿ ਅਤ੍ਥਤੋ ਚ ਬ੍ਯਞ੍ਜਨਤੋ ਚ ਵਿਗਤਦੋਸਾਯ. ਅਪਤਿਤਪਦਬ੍ਯਞ੍ਜਨਾਯਾਤਿ ਅਵਿਰਹਿਤਪਦਬ੍ਯਞ੍ਜਨਾਯ. ਅਥ ਵਾ ਅਨੇਲਗਲਾਯਾਤਿ ਨ ਏਲਂ ਦੋਸਂ ਗਲਤੀਤਿ ਅਨੇਲਗਲਾ. ਅਵਿਚ੍ਛਿਨ੍ਨਵਾਚਾਯ ਅਨੇਲਗਲਾਯ ਯਥਾ ਦਨ੍ਧਮਨੁਸ੍ਸਾ ਮੁਖੇਨ ਖੇਲ਼ਂ ਗਲ਼ਨ੍ਤੇਨ ਵਾਚਂ ਭਾਸਨ੍ਤਿ, ਨ ਏਵਰੂਪਾਯ. ਅਥ ਖੋ ਨਿਦ੍ਦੋਸਾਯ ਵਿਸਦਵਾਚਾਯਾਤਿ ਅਤ੍ਥੋ. ਵਿਵਟ੍ਟਪ੍ਪਕਾਸਿਨੀ ਵਾਚਾ ਨ ਕਦਾਚਿ ਵਿਵਟ੍ਟਮੁਤ੍ਤਾਤਿ ਕਤ੍ਵਾ ਆਹ ‘‘ਵਿਵਟ੍ਟਪਰਿਯਾਪਨ੍ਨਾਯਾ’’ਤਿ, ਵਿਵਟ੍ਟਂ ਅਮੁਞ੍ਚਿਤ੍ਵਾ ਪਵਤ੍ਤਾਯਾਤਿ ਅਤ੍ਥੋ. ਵਿਵਟ੍ਟਪ੍ਪਕਾਸਿਨੀ ਹਿ ਵਾਚਾ ਵਿਵਟ੍ਟਂ ਪਰਿਚ੍ਛਿਜ੍ਜ ਆਪਾਦੇਨ੍ਤੀ ਪਵਤ੍ਤਤਿ. ਨਵਲੋਕੁਤ੍ਤਰਧਮ੍ਮੋ ਸਬ੍ਬਧਮ੍ਮੇਹਿ ਸਮੁਸ੍ਸਿਤਟ੍ਠੇਨ ਅਬ੍ਭੁਗ੍ਗਤਟ੍ਠੇਨ ਚ ਧਜੋ ਨਾਮਾਤਿ ਆਹ ‘‘ਅਬ੍ਭੁਗ੍ਗਤਟ੍ਠੇਨਾ’’ਤਿਆਦਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.
ਵਿਸਾਖਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯. ਵਿਪਲ੍ਲਾਸਸੁਤ੍ਤਵਣ੍ਣਨਾ
੪੯. ਨਵਮੇ ਅਨਿਚ੍ਚਾਦੀਨਿ ਵਤ੍ਥੂਨਿ ਨਿਚ੍ਚਨ੍ਤਿਆਦਿਨਾ ਵਿਪਰੀਤਤੋ ਅਸਨ੍ਤੀਤਿ ਵਿਪਲ੍ਲਾਸਾ, ਸਞ੍ਞਾਯ ਵਿਪਲ੍ਲਾਸੋ ਸਞ੍ਞਾਵਿਪਲ੍ਲਾਸੋ. ਇਤਰੇਸੁਪਿ ਤੀਸੁ ਏਸੇਵ ਨਯੋ. ਏਵਮੇਤੇ ਚਤੁਨ੍ਨਂ ਵਤ੍ਥੂਨਂ ਵਸੇਨ ਚਤ੍ਤਾਰੋ, ਤੇਸੁ ਵਤ੍ਥੂਸੁ ਸਞ੍ਞਾਦੀਨਂ ਵਸੇਨ ਦ੍ਵਾਦਸ ਹੋਨ੍ਤਿ. ਤੇਸੁ ਅਟ੍ਠ ਸੋਤਾਪਤ੍ਤਿਮਗ੍ਗੇਨ ਪਹੀਯਨ੍ਤਿ. ਅਸੁਭੇ ਸੁਭਨ੍ਤਿ ਸਞ੍ਞਾਚਿਤ੍ਤਵਿਪਲ੍ਲਾਸਾ ਸਕਦਾਗਾਮਿਮਗ੍ਗੇਨ ਤਨੁਕਾ ਹੋਨ੍ਤਿ, ਅਨਾਗਾਮਿਮਗ੍ਗੇਨ ਪਹੀਯਨ੍ਤਿ. ਦੁਕ੍ਖੇ ਸੁਖਨ੍ਤਿ ਸਞ੍ਞਾਚਿਤ੍ਤਵਿਪਲ੍ਲਾਸਾ ਅਰਹਤ੍ਤਮਗ੍ਗੇਨ ਪਹੀਯਨ੍ਤੀਤਿ ਵੇਦਿਤਬ੍ਬਾ. ਸੇਸਮੇਤ੍ਥ ਉਤ੍ਤਾਨਮੇਵ.
ਵਿਪਲ੍ਲਾਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਉਪਕ੍ਕਿਲੇਸਸੁਤ੍ਤਵਣ੍ਣਨਾ
੫੦. ਦਸਮੇ ਉਪਕ੍ਕਿਲਿਟ੍ਠਭਾਵਕਰਣੇਨਾਤਿ ਮਲੀਨਭਾਵਕਰਣੇਨ. ਪਞ੍ਚਵਿਧਾਯ ਸੁਰਾਯ ਚਤੁਬ੍ਬਿਧਸ੍ਸ ਚ ਮੇਰਯਸ੍ਸਾਤਿ ਏਤ੍ਥ ਪੂਵਸੁਰਾ, ਪਿਟ੍ਠਸੁਰਾ, ਓਦਨਸੁਰਾ, ਕਿਣ੍ਣਪਕ੍ਖਿਤ੍ਤਾ, ਸਮ੍ਭਾਰਸਂਯੁਤ੍ਤਾਤਿ ਪਞ੍ਚ ਸੁਰਾ. ਪੁਪ੍ਫਾਸਵੋ, ਫਲਾਸਵੋ, ਮਧ੍ਵਾਸਵੋ, ਗੁਲ਼ਾਸਵੋਤਿ ਚਤ੍ਤਾਰੋ ਆਸਵਾ, ਚਤੁਬ੍ਬਿਧਂ ਮੇਰਯਂ ਨਾਮ. ਤਤ੍ਥ ਪੂਵੇ ਭਾਜਨੇ ਪਕ੍ਖਿਪਿਤ੍ਵਾ ਤਜ੍ਜਂ ਉਦਕਂ ਦਤ੍ਵਾ ਮਦ੍ਦਿਤ੍ਵਾ ਕਤਾ ਪੂਵਸੁਰਾ. ਏਵਂ ਸੇਸਸੁਰਾਪਿ. ਕਿਣ੍ਣਾਤਿ ਪਨ ਤਸ੍ਸਾ ਸੁਰਾਯ ਬੀਜਂ ਵੁਚ੍ਚਤਿ. ਯੇ ਸੁਰਾ ‘‘ਮੋਦਕਾ’’ਤਿਪਿ ਵੁਚ੍ਚਨ੍ਤਿ, ਤੇ ਪਕ੍ਖਿਪਿਤ੍ਵਾ ਕਤਾ ਕਿਣ੍ਣਪਕ੍ਖਿਤ੍ਤਾ. ਧਾਤਕਿਆਸਵਾਦਿਨਾਨਾਸਮ੍ਭਾਰੇਹਿ ਸਂਯੋਜਿਤਾ ਸਮ੍ਭਾਰਸਂਯੁਤ੍ਤਾ.ਮਧੁਕਤਾਲਨਾਲ਼ਿਕੇਰਾਦਿਪੁਪ੍ਫਰਸੋ ਚਿਰਪਰਿਵਾਸਿਤੋ ਪੁਪ੍ਫਾਸਵੋ. ਪਨਸਾਦਿਫਲਰਸੋ ਫਲਾਸਵੋ. ਮੁਦ੍ਦਿਕਾਰਸੋ ਮਧ੍ਵਾਸਵੋ. ਉਚ੍ਛੁਰਸੋ ਗੁਲ਼ਾਸਵੋ.
ਉਪਕ੍ਕਿਲੇਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਰੋਹਿਤਸ੍ਸਵਗ੍ਗਵਣ੍ਣਨਾ ਨਿਟ੍ਠਿਤਾ.
ਪਠਮਪਣ੍ਣਾਸਕਂ ਨਿਟ੍ਠਿਤਂ.