(੨੫) ੫. ਆਪਤ੍ਤਿਭਯਵਗ੍ਗੋ

੧. ਸਙ੍ਘਭੇਦਕਸੁਤ੍ਤਵਣ੍ਣਨਾ

੨੪੩. ਪਞ੍ਚਮਸ੍ਸ ਪਠਮੇ ਵਿਵਾਦਾਧਿਕਰਣਾਦੀਸੂਤਿ ਵਿਵਾਦਾਧਿਕਰਣਂ ਅਨੁਵਾਦਾਧਿਕਰਣਂ ਆਪਤ੍ਤਾਧਿਕਰਣਂ ਕਿਚ੍ਚਾਧਿਕਰਣਨ੍ਤਿ ਇਮੇਸੁ ਚਤੂਸੁ. ਤਤ੍ਥ ਧਮ੍ਮੋਤਿ ਵਾ ਅਧਮ੍ਮੋਤਿ ਵਾ ਅਟ੍ਠਾਰਸਹਿ ਵਤ੍ਥੂਹਿ ਵਿਵਦਨ੍ਤਾਨਂ ਭਿਕ੍ਖੂਨਂ ਯੋ ਵਿਵਾਦੋ, ਇਦਂ ਵਿਵਾਦਾਧਿਕਰਣਂ ਨਾਮ. ਸੀਲਵਿਪਤ੍ਤਿਯਾ ਵਾ ਆਚਾਰਦਿਟ੍ਠਿਆਜੀਵਵਿਪਤ੍ਤਿਯਾ ਵਾ ਅਨੁਵਦਨ੍ਤਾਨਂ ਯੋ ਅਨੁਵਾਦੋ ਉਪਵਦਨਾ ਚੇਵ ਚੋਦਨਾ ਚ, ਇਦਂ ਅਨੁਵਾਦਾਧਿਕਰਣਂ ਨਾਮ. ਮਾਤਿਕਾਯ ਆਗਤਾ ਪਞ੍ਚ, ਵਿਭਙ੍ਗੇ ਦ੍ਵੇਤਿ ਸਤ੍ਤਪਿ ਆਪਤ੍ਤਿਕ੍ਖਨ੍ਧਾ, ਇਦਂ ਆਪਤ੍ਤਾਧਿਕਰਣਂ ਨਾਮ. ਸਙ੍ਘਸ੍ਸ ਅਪਲੋਕਨਾਦੀਨਂ ਚਤੁਨ੍ਨਂ ਕਮ੍ਮਾਨਂ ਕਰਣਂ, ਇਦਂ ਕਿਚ੍ਚਾਧਿਕਰਣਂ ਨਾਮ. ਸੇਸਮੇਤ੍ਥ ਉਤ੍ਤਾਨਮੇਵ.

ਸਙ੍ਘਭੇਦਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨-੩. ਆਪਤ੍ਤਿਭਯਸੁਤ੍ਤਾਦਿਵਣ੍ਣਨਾ

੨੪੪-੫. ਦੁਤਿਯੇ ਭਸ੍ਸਤਿ ਨਿਰਤ੍ਥਕਭਾਵੇਨ ਖਿਪੀਯਤੀਤਿ ਭਸ੍ਮਂ, ਛਾਰਿਕਾ. ਤਸ੍ਸ ਪੁਟਂ ਭਣ੍ਡਿਕਾ ਭਸ੍ਮਪੁਟਂ. ਤੇਨਾਹ ‘‘ਭਸ੍ਮਪੁਟਨ੍ਤਿ ਛਾਰਿਕਾਭਣ੍ਡਿਕ’’ਨ੍ਤਿ. ਤਤਿਯਂ ਉਤ੍ਤਾਨਤ੍ਥਮੇਵ.

ਆਪਤ੍ਤਿਭਯਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੪-੭. ਸੇਯ੍ਯਾਸੁਤ੍ਤਾਦਿਵਣ੍ਣਨਾ

੨੪੬-੯. ਚਤੁਤ੍ਥੇ ਪੇਤਾਤਿ ਪੇਚ੍ਚਭਾਵਂ ਗਤਾ. ਤੇ ਪਨ ਯਸ੍ਮਾ ਇਧ ਕਤਕਾਲਕਿਰਿਯਾ ਕਾਲੇਨ ਕਤਜੀਵਿਤੁਚ੍ਛੇਦਾ ਹੋਨ੍ਤਿ, ਤਸ੍ਮਾ ਵੁਤ੍ਤਂ ‘‘ਕਾਲਕਤਾ ਵੁਚ੍ਚਨ੍ਤੀ’’ਤਿ, ਮਤਾਤਿ ਅਤ੍ਥੋ. ਅਥ ਵਾ ਪੇਚ੍ਚਭਵਂ ਗਤਾ, ਪੇਤੂਪਪਤ੍ਤਿਵਸੇਨ ਨਿਬ੍ਬਤ੍ਤਿਂ ਉਪਗਤਾਤਿ ਅਤ੍ਥੋ. ਤੇਨਾਹ ‘‘ਅਥ ਵਾ ਪੇਤਵਿਸਯੇ ਨਿਬ੍ਬਤ੍ਤਾ ਪੇਤਾ ਨਾਮਾ’’ਤਿ. ਏਕੇਨ ਪਸ੍ਸੇਨ ਸਯਿਤੁਂ ਨ ਸਕ੍ਕੋਨ੍ਤਿ ਦੁਕ੍ਖੁਪ੍ਪਤ੍ਤਿਤੋ.

ਤੇਜੁਸ੍ਸਦਤ੍ਤਾਤਿ ਇਮਿਨਾ ਸੀਹਸ੍ਸ ਅਭੀਰੁਕਭਾਵਂ ਦਸ੍ਸੇਤਿ. ਭੀਰੁਕਾ ਸੇਸਮਿਗਾ ਅਤ੍ਤਨੋ ਆਸਯਂ ਪਵਿਸਿਤ੍ਵਾ ਸਨ੍ਤਾਸਪੁਬ੍ਬਕਂ ਯਥਾ ਤਥਾ ਸਯਨ੍ਤਿ, ਸੀਹੋ ਪਨ ਅਭੀਰੁਕੋ ਸਭਾਵਤੋ ਸਤੋਕਾਰੀ ਭਿਕ੍ਖੁ ਵਿਯ ਸਤਿਂ ਉਪਟ੍ਠਪੇਤ੍ਵਾਵ ਸਯਤਿ. ਤੇਨਾਹ ‘‘ਦ੍ਵੇ ਪੁਰਿਮਪਾਦੇ’’ਤਿਆਦਿ. ਦਕ੍ਖਿਣੇ ਪੁਰਿਮਪਾਦੇ ਵਾਮਸ੍ਸ ਪੁਰਿਮਪਾਦਸ੍ਸ ਠਪਨਵਸੇਨ ਦ੍ਵੇ ਪੁਰਿਮਪਾਦੇ ਏਕਸ੍ਮਿਂ ਠਾਨੇ ਠਪੇਤ੍ਵਾ. ਪਚ੍ਛਿਮਪਾਦੇ ਵੁਤ੍ਤਨਯੇਨੇਵ ਇਧਾਪਿ ਏਕਸ੍ਮਿਂ ਠਾਨੇ ਠਪਨਂ ਵੇਦਿਤਬ੍ਬਂ, ਠਿਤੋਕਾਸਸਲ੍ਲਕ੍ਖਣਂ ਅਭੀਰੁਕਵਸੇਨੇਵ. ਸੀਸਂ ਪਨ ਉਕ੍ਖਿਪਿਤ੍ਵਾਤਿਆਦਿਨਾ ਵੁਤ੍ਤਸੀਹਕਿਰਿਯਾ ਅਨੁਤ੍ਰਸ੍ਤਪ੍ਪਬੁਜ੍ਝਨਾ ਵਿਯ ਅਭੀਰੁਭਾਵਸਿਦ੍ਧਧਮ੍ਮਤਾਵਸੇਨੇਵਾਤਿ ਵੇਦਿਤਬ੍ਬਾ. ਸੀਹਵਿਜਮ੍ਭਨਂ ਅਤਿਵੇਲਂ ਏਕਾਕਾਰੇ ਠਪਿਤਾਨਂ ਸਰੀਰਾਵਯਵਾਨਂ ਗਮਨਾਦਿਕਿਰਿਯਾਸੁ ਯੋਗ੍ਯਭਾਵਾਪਾਦਨਤ੍ਥਂ. ਤਿਕ੍ਖਤ੍ਤੁਂ ਸੀਹਨਾਦਨਦਨਂ ਅਪ੍ਪੇਸਕ੍ਖਮਿਗਰਾਜੇਹਿ ਪਰਿਤ੍ਤਾਸਪਰਿਹਰਣਤ੍ਥਂ.

ਅਯਂ ਵੁਚ੍ਚਤਿ, ਭਿਕ੍ਖਵੇ, ਤਥਾਗਤਸੇਯ੍ਯਾਤਿ ਇਮਿਨਾ ਚਤੁਤ੍ਥਜ੍ਝਾਨਸੇਯ੍ਯਾ ਤਥਾਗਤਸੇਯ੍ਯਾ ਨਾਮਾਤਿ ਦਸ੍ਸੇਤਿ. ਸੇਤਿ ਅਬ੍ਯਾਵਟਭਾਵੇਨ ਪਵਤ੍ਤਤਿ ਏਤ੍ਥਾਤਿ ਸੇਯ੍ਯਾ, ਚਤੁਤ੍ਥਜ੍ਝਾਨਮੇਵ ਸੇਯ੍ਯਾ ਚਤੁਤ੍ਥਜ੍ਝਾਨਸੇਯ੍ਯਾ. ਕਿਂ ਪਨ ਤਂ ਚਤੁਤ੍ਥਜ੍ਝਾਨਨ੍ਤਿ? ਆਨਾਪਾਨਚਤੁਤ੍ਥਜ੍ਝਾਨਂ. ਤਤ੍ਥ ਹਿ ਠਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਭਗਵਾ ਅਨੁਕ੍ਕਮੇਨ ਅਗ੍ਗਮਗ੍ਗਂ ਅਧਿਗਨ੍ਤ੍ਵਾ ਤਥਾਗਤੋ ਜਾਤੋਤਿ. ਤਯਿਦਂ ਪਦਟ੍ਠਾਨਂ ਨਾਮ ਨ ਸੇਯ੍ਯਾ, ਤਥਾਪਿ ਯਸ੍ਮਾ ‘‘ਚਤੁਤ੍ਥਜ੍ਝਾਨਸਮਨਨ੍ਤਰਾ ਭਗਵਾ ਪਰਿਨਿਬ੍ਬਾਯੀ’’ਤਿ ਮਹਾਪਰਿਨਿਬ੍ਬਾਨੇ (ਦੀ. ਨਿ. ੨.੨੧੯) ਆਗਤਂ, ਤਸ੍ਮਾ ਲੋਕਿਯਚਤੁਤ੍ਥਜ੍ਝਾਨਸਮਾਪਤ੍ਤਿ ਏਵ ਤਥਾਗਤਸੇਯ੍ਯਾਤਿ ਕੇਚਿ. ਏਵਂ ਸਤਿ ਪਰਿਨਿਬ੍ਬਾਨਕਾਲਿਕਾਵ ਤਥਾਗਤਸੇਯ੍ਯਾ ਆਪਜ੍ਜਤਿ, ਨ ਚ ਭਗਵਾ ਲੋਕਿਯਚਤੁਤ੍ਥਜ੍ਝਾਨਸਮਾਪਜ੍ਜਨਬਹੁਲੋ ਵਿਹਾਸਿ. ਅਗ੍ਗਫਲਵਸੇਨ ਪਵਤ੍ਤਂ ਪਨੇਤ੍ਥ ਚਤੁਤ੍ਥਜ੍ਝਾਨਂ ਵੇਦਿਤਬ੍ਬਂ. ਤਤ੍ਥ ਯਥਾ ਸਤ੍ਤਾਨਂ ਨਿਦ੍ਦੂਪਗਮਲਕ੍ਖਣਾ ਸੇਯ੍ਯਾ ਭਵਙ੍ਗਚਿਤ੍ਤਵਸੇਨ ਹੋਤਿ, ਸਾ ਪਨ ਨੇਸਂ ਪਠਮਜਾਤਿਸਮਨ੍ਵਯਾ ਯੇਭੁਯ੍ਯਵੁਤ੍ਤਿਕਾ, ਏਵਂ ਭਗਵਤੋ ਅਰਿਯਜਾਤਿਸਮਨ੍ਵਯਂ ਯੇਭੁਯ੍ਯਵੁਤ੍ਤਿਕਂ ਅਗ੍ਗਫਲਭੂਤਂ ਚਤੁਤ੍ਥਜ੍ਝਾਨਂ ਤਥਾਗਤਸੇਯ੍ਯਾਤਿ ਵੇਦਿਤਬ੍ਬਂ. ਪਞ੍ਚਮਾਦੀਨਿ ਉਤ੍ਤਾਨਤ੍ਥਾਨਿ.

ਸੇਯ੍ਯਾਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੮. ਪਠਮਵੋਹਾਰਸੁਤ੍ਤਵਣ੍ਣਨਾ

੨੫੦-੨੫੩. ਅਟ੍ਠਮੇ ਅਨਰਿਯਾਨਨ੍ਤਿ ਅਸਾਧੂਨਂ ਨਿਹੀਨਾਨਂ. ਵੋਹਾਰਾਤਿ ਸਂਵੋਹਾਰਾ ਅਭਿਲਾਪਾ ਵਾ, ‘‘ਦਿਟ੍ਠਂ ਮਯਾ’’ਤਿ ਏਵਂਵਾਦਿਤਾ. ਏਤ੍ਥ ਚ ਤਂਤਂਸਮੁਟ੍ਠਾਪਕਚੇਤਨਾਵਸੇਨ ਅਤ੍ਥੋ ਵੇਦਿਤਬ੍ਬੋ. ਨਵਮਾਦੀਸੁ ਨਤ੍ਥਿ ਵਤ੍ਤਬ੍ਬਂ.

ਪਠਮਵੋਹਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਆਪਤ੍ਤਿਭਯਵਗ੍ਗਵਣ੍ਣਨਾ ਨਿਟ੍ਠਿਤਾ.

ਪਞ੍ਚਮਪਣ੍ਣਾਸਕਂ ਨਿਟ੍ਠਿਤਂ.