(੧੯) ੪. ਬ੍ਰਾਹ੍ਮਣਵਗ੍ਗੋ

੧-੩. ਯੋਧਾਜੀਵਸੁਤ੍ਤਾਦਿਵਣ੍ਣਨਾ

੧੮੧-੧੮੩. ਚਤੁਤ੍ਥਸ੍ਸ ਪਠਮਾਦੀਨਿ ਉਤ੍ਤਾਨਤ੍ਥਾਨੇਵ.

੪. ਅਭਯਸੁਤ੍ਤਵਣ੍ਣਨਾ

੧੮੪. ਚਤੁਤ੍ਥੇ ਸੋਚਤੀਤਿ ਚਿਤ੍ਤੇ ਉਪ੍ਪਨ੍ਨਬਲਵਸੋਕੇਨ ਸੋਚਤਿ, ਚਿਤ੍ਤਸਨ੍ਤਾਪੇਨ ਅਨ੍ਤੋ ਨਿਜ੍ਝਾਯਤੀਤਿ ਅਤ੍ਥੋ. ਕਿਲਮਤੀਤਿ ਤਸ੍ਸੇਵ ਸੋਕਸ੍ਸ ਵਸੇਨ ਕਾਯੇ ਚ ਉਪ੍ਪਨ੍ਨਦੁਕ੍ਖੇਨ ਕਿਲਮਤਿ. ਪਰਿਦੇਵਤੀਤਿ ਸੋਕੁਦ੍ਦੇਹਕਵਸੇਨ ਤਂ ਤਂ ਵਿਪ੍ਪਲਪਨ੍ਤੋ ਵਾਚਾਯ ਪਰਿਦੇਵਤਿ. ਉਰਤ੍ਤਾਲ਼ਿਨ੍ਤਿ ਉਰਤ੍ਤਾਲ਼ਂ, ਉਰਂ ਤਾਲ਼ੇਤ੍ਵਾਤਿ ਅਤ੍ਥੋ. ਤੇਨਾਹ ‘‘ਉਰਂ ਤਾਲ਼ੇਤ੍ਵਾ’’ਤਿ. ਕਙ੍ਖਾਵਿਚਿਕਿਚ੍ਛਾਤਿ ਏਤ੍ਥ ‘‘ਏਕਮੇਵਿਦਂ ਪਞ੍ਚਮਂ ਨੀਵਰਣਂ. ਕਿਂ ਨੁ ਖੋ ਇਦ’’ਨ੍ਤਿ ਆਰਮ੍ਮਣਂ ਕਙ੍ਖਨਤੋ ਕਙ੍ਖਾ, ‘‘ਇਦਮੇਵ ਵਰ’’ਨ੍ਤਿ ਨਿਚ੍ਛੇਤੁਂ ਅਸਮਤ੍ਥਭਾਵਤੋ ‘‘ਵਿਚਿਕਿਚ੍ਛਾ’’ਤਿ ਵੁਚ੍ਚਤਿ – ‘‘ਧਮ੍ਮਸਭਾਵਂ ਵਿਚਿਨਨ੍ਤੋ ਕਿਚ੍ਛਤਿ, ਵਿਗਤਾ ਚਿਕਿਚ੍ਛਾ’’ਤਿ ਵਾ ਕਤ੍ਵਾ.

ਅਭਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਬ੍ਰਾਹ੍ਮਣਸਚ੍ਚਸੁਤ੍ਤਵਣ੍ਣਨਾ

੧੮੫. ਪਞ੍ਚਮੇ ਏਤ੍ਥਾਤਿ ਏਤਸ੍ਮਿਂ ਸੁਞ੍ਞਤਾਨੁਪਸ੍ਸਨਾਧਿਕਾਰੇ. ਕ੍ਵਚੀਤਿ ਕਤ੍ਥਚਿ ਠਾਨੇ, ਕਾਲੇ, ਧਮ੍ਮੇ ਵਾ. ਅਥ ਵਾ ਕ੍ਵਚੀਤਿ ਅਜ੍ਝਤ੍ਤਂ ਬਹਿਦ੍ਧਾ ਵਾ. ਅਤ੍ਤਨੋ ਅਤ੍ਤਾਨਨ੍ਤਿ ਸਕਤ੍ਤਾਨਂ ‘‘ਅਯਂ ਖੋ, ਭੋ ਬ੍ਰਹ੍ਮਾ, ਮਹਾਬ੍ਰਹ੍ਮਾ…ਪੇ… ਵਸੀ ਪਿਤਾ ਭੂਤਭਬ੍ਯਾਨ’’ਨ੍ਤਿਆਦਿਨਾ (ਦੀ. ਨਿ. ੧.੪੨) ਪਰੇਹਿ ਪਰਿਕਪ੍ਪਿਤਂ ਅਤ੍ਤਾਨਞ੍ਚ ਕਸ੍ਸਚਿ ਕਿਞ੍ਚਨਭੂਤਂ ਨ ਪਸ੍ਸਤੀਤਿ ਦਸ੍ਸੇਨ੍ਤੋ ‘‘ਕਸ੍ਸਚੀ’’ਤਿਆਦਿਮਾਹ. ਤਤ੍ਥ ਪਰਸ੍ਸਾਤਿ ਪਰਜਾਤਿ ਪਰੋ ਪੁਰਿਸੋਤਿ ਵਾ ਏਵਂ ਗਹਿਤਸ੍ਸ. ਨ ਚ ਮਮ ਕ੍ਵਚਨੀਤਿ ਏਤ੍ਥ ਮਮ-ਸਦ੍ਦੋ ਅਟ੍ਠਾਨਪ੍ਪਯੁਤ੍ਤੋਤਿ ਆਹ ‘‘ਮਮ-ਸਦ੍ਦਂ ਤਾਵ ਠਪੇਤ੍ਵਾ’’ਤਿ. ਪਰਸ੍ਸ ਚਾਤਿ ਅਤ੍ਤਨੋ ਅਞ੍ਞਸ੍ਸ. ਪਰੋ ਪੁਰਿਸੋ ਨਾਮ ਅਤ੍ਥਿ ਮਮਤ੍ਥਾਯ ਠਿਤੋ. ਤਸ੍ਸ ਵਸੇਨ ਮਯ੍ਹਂ ਸਬ੍ਬਂ ਇਜ੍ਝਤੀਤਿ ਏਕਚ੍ਚਦਿਟ੍ਠਿਗਤਿਕਪਰਿਕਪ੍ਪਿਤਵਸੇਨ ਪਰਂ ਅਤ੍ਤਾਨਂ ਤਞ੍ਚ ਅਤ੍ਤਨੋ ਕਿਞ੍ਚਨਭੂਤਂ ਨ ਪਸ੍ਸਤੀਤਿ ਦਸ੍ਸੇਨ੍ਤੋ ‘‘ਨ ਚ ਕ੍ਵਚਨੀ’’ਤਿਆਦਿਮਾਹ. ਏਤ੍ਥ ਚ ਨਾਹਂ ਕ੍ਵਚਨੀਤਿ ਸਕਅਤ੍ਤਨੋ ਸਬ੍ਭਾਵਂ ਨ ਪਸ੍ਸਤਿ. ਨ ਕਸ੍ਸਚਿ ਕਿਞ੍ਚਨਤਸ੍ਮਿਨ੍ਤਿ ਸਕਅਤ੍ਤਨੋ ਏਵ ਕਸ੍ਸਚਿ ਅਤ੍ਤਨਿਯਤਂ ਨ ਪਸ੍ਸਤਿ. ਨ ਚ ਮਮਾਤਿ ਏਤਂ ਦ੍ਵਯਂ ਯਥਾਰਹਂ ਸਮ੍ਬਨ੍ਧਿਤਬ੍ਬਂ, ਅਤ੍ਥਿ-ਪਦਂ ਪਚ੍ਚੇਕਂ. ਨ ਚ ਕ੍ਵਚਨਿ ਪਰਸ੍ਸ ਅਤ੍ਤਾ ਅਤ੍ਥੀਤਿ ਪਰਸ੍ਸ ਅਤ੍ਤਨੋ ਅਭਾਵਂ ਪਸ੍ਸਤਿ. ਤਸ੍ਸ ਪਰਸ੍ਸ ਅਤ੍ਤਨੋ ਮਮ ਕਿਞ੍ਚਨਤਾ ਨਤ੍ਥੀਤਿ ਪਰਸ੍ਸ ਅਤ੍ਤਨੋ ਅਨਤ੍ਤਨਿਯਤਂ ਪਸ੍ਸਤਿ. ਏਵਂ ਅਜ੍ਝਤ੍ਤਂ ਬਹਿਦ੍ਧਾ ਖਨ੍ਧਾਨਂ ਅਤ੍ਤਤ੍ਤਨਿਯਸੁਞ੍ਞਤਾ-ਸੁਦ੍ਧਸਙ੍ਖਾਰਪੁਞ੍ਜਤਾ-ਚਤੁਕੋਟਿਕਸੁਞ੍ਞਤਾਪਰਿਗ੍ਗਣ੍ਹਨੇਨ ਨਿਟ੍ਠਾ ਹੋਤਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਬ੍ਰਾਹ੍ਮਣਸਚ੍ਚਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਉਮ੍ਮਗ੍ਗਸੁਤ੍ਤਵਣ੍ਣਨਾ

੧੮੬. ਛਟ੍ਠੇ ਆਕਡ੍ਢੀਯਤੀਤਿ ਚਿਤ੍ਤਵਸਿਕੋ ਲੋਕੋ ਤਤ੍ਥ ਤਤ੍ਥ ਉਪਕਡ੍ਢੀਯਤਿ. ਤੇਸਂਯੇਵੇਤ੍ਥ ਗਹਣਂ ਵੇਦਿਤਬ੍ਬਨ੍ਤਿ ਯੇ ਅਪਰਿਞ੍ਞਾਤਵਤ੍ਥੁਕਾ ਚਿਤ੍ਤਸ੍ਸ ਵਸਂ ਗਚ੍ਛਨ੍ਤਿ, ਤੇਸਂਯੇਵ ਗਹਣਂ. ਨ ਹਿ ਪਰਿਞ੍ਞਾਤਕ੍ਖਨ੍ਧਾ ਪਹੀਨਕਿਲੇਸਾ ਚਿਤ੍ਤਸ੍ਸ ਵਸਂ ਗਚ੍ਛਨ੍ਤਿ, ਚਿਤ੍ਤਂ ਪਨ ਅਤ੍ਤਨੋ ਵਸੇ ਵਤ੍ਤੇਨ੍ਤਿ. ਸਹ ਸੀਲੇਨਾਤਿ ਚਾਰਿਤ੍ਤਵਾਰਿਤ੍ਤਸੀਲੇਨ ਸਦ੍ਧਿਂ. ਪੁਬ੍ਬਭਾਗਪਟਿਪਦਨ੍ਤਿ ਧੁਤਙ੍ਗਮਾਦਿਂ ਕਤ੍ਵਾ ਯਾਵ ਗੋਤ੍ਰਭੁਞਾਣਂ, ਤਾਵ ਪਵਤ੍ਤੇਤਬ੍ਬਂ ਸਮਥਵਿਪਸ੍ਸਨਾਸਙ੍ਖਾਤਂ ਸਮ੍ਮਾਪਟਿਪਦਂ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਉਮ੍ਮਗ੍ਗਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਵਸ੍ਸਕਾਰਸੁਤ੍ਤਵਣ੍ਣਨਾ

੧੮੭. ਸਤ੍ਤਮੇ ਵਸ੍ਸਕਾਰੋ ਬ੍ਰਾਹ੍ਮਣੋ ਮਗਧਮਹਾਮਤ੍ਤੋਤਿ ਏਤ੍ਥ ਵਸ੍ਸਕਾਰੋਤਿ ਤਸ੍ਸ ਬ੍ਰਾਹ੍ਮਣਸ੍ਸ ਨਾਮਂ. ਮਹਤਿਯਾ ਇਸ੍ਸਰਿਯਮਤ੍ਤਾਯ ਸਮਨ੍ਨਾਗਤੋ ਮਹਾਮਤ੍ਤੋ. ਇਸ੍ਸਰਿਯਮਤ੍ਤਾਯਾਤਿ ਚ ਇਸ੍ਸਰਿਯਪ੍ਪਮਾਣੇਨਾਤਿ ਅਤ੍ਥੋ, ਇਸ੍ਸਰਿਯੇਨ ਚੇਵ ਵਿਤ੍ਤੂਪਕਰਣੇਨ ਚਾਤਿ ਏਵਂ ਵਾ ਏਤ੍ਥ ਅਤ੍ਥੋ ਦਟ੍ਠਬ੍ਬੋ, ਉਪਭੋਗੂਪਕਰਣਾਨਿਪਿ ਹਿ ਲੋਕੇ ‘‘ਮਤ੍ਤਾ’’ਤਿ ਵੁਚ੍ਚਨ੍ਤਿ. ਮਗਧਰਞ੍ਞੋ, ਮਗਧਰਟ੍ਠੇ ਵਾ ਮਹਾਮਤ੍ਤੋਤਿ ਮਗਧਮਹਾਮਤ੍ਤੋ. ਤੁਦਿਸਞ੍ਞਿਤੋ ਗਾਮੋ ਨਿਵਾਸੋ ਏਤਸ੍ਸਾਤਿ ਤੋਦੇਯ੍ਯੋ. ਤੇਨੇਵਾਹ ‘‘ਤੁਦਿਗਾਮਵਾਸਿਕਸ੍ਸਾ’’ਤਿ. ਤੁਦਿਗਾਮਵਾਸਿਤਾ ਚਸ੍ਸ ਤਤ੍ਥ ਅਧਿਪਤਿਭਾਵੇਨਾਤਿ ਦਟ੍ਠਬ੍ਬਾ. ਸੋ ਹਿ ਤਂ ਗਾਮਂ ਸੋਣਦਣ੍ਡੋ ਵਿਯ, ਚਮ੍ਪਂ ਕੂਟਦਨ੍ਤੋ ਵਿਯ, ਖਾਣੁਮਤਂ ਅਧਿਪਤਿਭਾਵੇਨ ਅਜ੍ਝਾਵਸਤਿ. ਮਹਦ੍ਧਨੋ ਹੋਤਿ ਪਞ੍ਚਚਤ੍ਤਾਲੀਸਕੋਟਿਵਿਭਵੋ. ਪਰਿਸਤੀਤਿ ਪਰਿਸਾਯਂ, ਜਨਸਮੂਹੇਤਿ ਅਤ੍ਥੋ. ਤੇਨਾਹ ‘‘ਸਨ੍ਨਿਪਤਿਤਾਯ ਪਰਿਸਾਯਾ’’ਤਿ. ਅਭਿਪ੍ਪਸਨ੍ਨੋਤਿ ਏਤ੍ਥ ਅਭਿਕ੍ਕਮਨਤ੍ਥੋ ਅਭਿ-ਸਦ੍ਦੋਤਿ ਆਹ ‘‘ਅਤਿਕ੍ਕਮ੍ਮ ਪਸਨ੍ਨੋ’’ਤਿ, ਪਸਾਦਨੀਯਂ ਠਾਨਂ ਅਤਿਕ੍ਕਮਿਤ੍ਵਾ ਅਪ੍ਪਸਾਦਨੀਯਟ੍ਠਾਨੇ ਪਸਨ੍ਨੋਤਿ ਅਧਿਪ੍ਪਾਯੋ. ਤਂ ਤਂ ਕਿਚ੍ਚਂ ਅਤ੍ਥਂ ਪਸ੍ਸਤੀਤਿ ਅਤ੍ਥਦਸਾ, ਅਲਂ ਸਮਤ੍ਥਾ ਪਟਿਬਲਾ ਅਤ੍ਥਦਸਾ ਅਲਮਤ੍ਥਦਸਾ, ਅਲਮਤ੍ਥਦਸੇ ਅਤਿਸਯਨ੍ਤੀਤਿ ਅਲਮਤ੍ਥਦਸਤਰਾ. ਤੇਨਾਹ ‘‘ਅਤ੍ਥੇ ਪਸ੍ਸਿਤੁਂ ਸਮਤ੍ਥਾ’’ਤਿਆਦਿ. ਨੇਵ ਸਪ੍ਪੁਰਿਸਂ ਨ ਅਸਪ੍ਪੁਰਿਸਂ ਜਾਨਾਤਿ ਸਪ੍ਪੁਰਿਸਧਮ੍ਮਾਨਂ ਅਸਪ੍ਪੁਰਿਸਧਮ੍ਮਾਨਞ੍ਚ ਯਾਥਾਵਤੋ ਅਜਾਨਨਤੋ. ਸੇਸਮੇਤ੍ਥ ਉਤ੍ਤਾਨਮੇਵ.

ਵਸ੍ਸਕਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਉਪਕਸੁਤ੍ਤਵਣ੍ਣਨਾ

੧੮੮. ਅਟ੍ਠਮੇ ਨਿਬ੍ਬਤ੍ਤਿਵਸੇਨ ਨਿਰਯਂ ਅਰਹਤਿ, ਨਿਰਯਸਂਵਤ੍ਤਨਿਯੇਨ ਵਾ ਕਮ੍ਮੁਨਾ ਨਿਰਯੇ ਨਿਯੁਤ੍ਤੋਤਿ ਨੇਰਯਿਕੋ. ਅਵੀਚਿਮ੍ਹਿ ਉਪ੍ਪਜ੍ਜਿਤ੍ਵਾ ਤਤ੍ਥ ਆਯੁਕਪ੍ਪਸਞ੍ਞਿਤਂ ਅਨ੍ਤਰਕਪ੍ਪਂ ਤਿਟ੍ਠਤੀਤਿ ਕਪ੍ਪਟ੍ਠੋ. ਨਿਰਯੂਪਪਤ੍ਤਿਂ ਪਰਿਹਰਣਵਸੇਨ ਤਿਕਿਚ੍ਛਿਤੁਂ ਅਸਕ੍ਕੁਣੇਯ੍ਯੋਤਿ ਅਤੇਕਿਚ੍ਛੋ. ਅਪਰਿਯਾਦਿਨ੍ਨਾਵਾਤਿ ਅਪਰਿਕ੍ਖੀਣਾਯੇਵ. ਸਚੇ ਹਿ ਏਕੋ ਭਿਕ੍ਖੁ ਕਾਯਾਨੁਪਸ੍ਸਨਂ ਪੁਚ੍ਛਤਿ, ਅਞ੍ਞੋ ਵੇਦਨਾਨੁਪਸ੍ਸਨਂ…ਪੇ… ਚਿਤ੍ਤਾਨੁਪਸ੍ਸਨਂ. ‘‘ਇਮਿਨਾ ਪੁਟ੍ਠੇ ਅਹਂ ਪੁਚ੍ਛਾਮੀ’’ਤਿ ਏਕੋ ਏਕਂ ਨ ਓਲੋਕੇਤਿ, ਏਵਂ ਸਨ੍ਤੇਪਿ ਤੇਸਂ ਵਾਰੋ ਪਞ੍ਞਾਯਤਿ ਏਵ, ਬੁਦ੍ਧਾਨਂ ਪਨ ਵਾਰੋ ਨ ਪਞ੍ਞਾਯਤਿ. ਵਿਦਤ੍ਥਿਚਤੁਰਙ੍ਗੁਲਂ ਛਾਯਂ ਅਤਿਕ੍ਕਮਨਤੋ ਪੁਰੇਤਰਂਯੇਵ ਭਗਵਾ ਚੁਦ੍ਦਸਵਿਧੇਨ ਕਾਯਾਨੁਪਸ੍ਸਨਂ, ਨਵਵਿਧੇਨ ਵੇਦਨਾਨੁਪਸ੍ਸਨਂ, ਸੋਲ਼ਸਵਿਧੇਨ ਚਿਤ੍ਤਾਨੁਪਸ੍ਸਨਂ, ਪਞ੍ਚਵਿਧੇਨ ਧਮ੍ਮਾਨੁਪਸ੍ਸਨਂ ਕਥੇਤਿ. ਤਿਟ੍ਠਨ੍ਤੁ ਵਾ ਏਵਂ ਚਤ੍ਤਾਰੋ. ਸਚੇ ਹਿ ਅਞ੍ਞੇ ਚਤ੍ਤਾਰੋ ਸਮ੍ਮਪ੍ਪਧਾਨੇਸੁ, ਅਞ੍ਞੇ ਇਦ੍ਧਿਪਾਦੇਸੁ, ਅਞ੍ਞੇ ਪਞ੍ਚਿਨ੍ਦ੍ਰਿਯੇਸੁ, ਅਞ੍ਞੇ ਪਞ੍ਚਬਲੇਸੁ, ਅਞ੍ਞੇ ਸਤ੍ਤਬੋਜ੍ਝਙ੍ਗੇਸੁ, ਅਞ੍ਞੇ ਅਟ੍ਠਮਗ੍ਗਙ੍ਗੇਸੁ ਪਞ੍ਹੇ ਪੁਚ੍ਛੇਯ੍ਯੁਂ, ਤਮ੍ਪਿ ਭਗਵਾ ਕਥੇਯ੍ਯ. ਤਿਟ੍ਠਨ੍ਤੁ ਵਾ ਏਤੇ ਅਟ੍ਠ. ਸਚੇ ਅਞ੍ਞੇ ਸਤ੍ਤਤਿਂਸ ਜਨਾ ਬੋਧਿਪਕ੍ਖਿਯੇਸੁ ਪਞ੍ਹੇ ਪੁਚ੍ਛੇਯ੍ਯੁਂ, ਤਮ੍ਪਿ ਭਗਵਾ ਤਾਵਦੇਵ ਕਥੇਯ੍ਯ. ਕਸ੍ਮਾ? ਯਾਵਤਾ ਹਿ ਲੋਕਿਯਮਹਾਜਨੇ ਏਕਂ ਪਦਂ ਕਥੇਨ੍ਤੇ ਤਾਵ ਆਨਨ੍ਦਤ੍ਥੇਰੋ ਅਟ੍ਠ ਪਦਾਨਿ ਕਥੇਤਿ. ਆਨਨ੍ਦਤ੍ਥੇਰੇ ਪਨ ਏਕਂ ਪਦਂ ਕਥੇਨ੍ਤੇਯੇਵ ਭਗਵਾ ਸੋਲ਼ਸ ਪਦਾਨਿ ਕਥੇਤਿ. ਕਸ੍ਮਾ? ਭਗਵਤੋ ਹਿ ਜਿਵ੍ਹਾ ਮੁਦੁ, ਦਨ੍ਤਾਵਰਣਂ ਸੁਫੁਸਿਤਂ, ਵਚਨਂ ਅਗਲ਼ਿਤਂ, ਭਵਙ੍ਗਪਰਿਵਾਸੋ ਲਹੁਕੋ. ਤੇਨ ਵੁਤ੍ਤਂ – ‘‘ਅਪਰਿਯਾਦਿਨ੍ਨਾਵਸ੍ਸ ਤਥਾਗਤਸ੍ਸ ਧਮ੍ਮਦੇਸਨਾ, ਅਪਰਿਯਾਦਿਨ੍ਨਂ ਧਮ੍ਮਪਦਬ੍ਯਞ੍ਜਨ’’ਨ੍ਤਿ.

ਤਤ੍ਥ ਧਮ੍ਮਦੇਸਨਾਤਿ ਤਨ੍ਤਿਟ੍ਠਪਨਾ. ਧਮ੍ਮਪਦਬ੍ਯਞ੍ਜਨਨ੍ਤਿ ਏਤ੍ਥ ਧਮ੍ਮੋਤਿ ਪਾਲ਼ਿ. ਪਜ੍ਜਤਿ ਅਤ੍ਥੋ ਏਤੇਨਾਤਿ ਪਦਂ. ਵਾਕ੍ਯਞ੍ਚ ਪਦੇਨੇਵ ਸਙ੍ਗਹਿਤਂ. ਅਤ੍ਥਂ ਬ੍ਯਞ੍ਜੇਤੀਤਿ ਬ੍ਯਞ੍ਜਨਂ, ਅਕ੍ਖਰਂ. ਤਞ੍ਹਿ ਪਦਵਾਕ੍ਯਂ ਪਰਿਚ੍ਛਿਜ੍ਜਮਾਨਂ ਤਂ ਤਂ ਅਤ੍ਥਂ ਬ੍ਯਞ੍ਜੇਤਿ ਪਕਾਸੇਤਿ. ਏਤੇਨ ਅਪਰਾਪਰੇਹਿ ਪਦਬ੍ਯਞ੍ਜਨੇਹਿ ਸੁਚਿਰਮ੍ਪਿ ਕਾਲਂ ਕਥੇਨ੍ਤਸ੍ਸ ਤਥਾਗਤਸ੍ਸ ਨ ਕਦਾਚਿ ਤੇਸਂ ਪਰਿਯਾਦਾਨਂ ਅਤ੍ਥੀਤਿ ਦਸ੍ਸੇਤਿ. ਗੁਣਧਂਸੀਤਿ ਗੁਣਧਂਸਨਸੀਲੋ. ਪਗਬ੍ਬੋਤਿ ਵਾਚਾਪਾਗਬ੍ਬਿਯੇਨ ਸਮਨ੍ਨਾਗਤੋ.

ਉਪਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਸਚ੍ਛਿਕਰਣੀਯਸੁਤ੍ਤਵਣ੍ਣਨਾ

੧੮੯. ਨਵਮੇ ਨਾਮਕਾਯੇਨਾਤਿ ਸਹਜਾਤਨਾਮਕਾਯੇਨ. ਸੇਸਮੇਤ੍ਥ ਉਤ੍ਤਾਨਮੇਵ.

ਸਚ੍ਛਿਕਰਣੀਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਉਪੋਸਥਸੁਤ੍ਤਵਣ੍ਣਨਾ

੧੯੦. ਦਸਮੇ ਤੁਣ੍ਹੀਭੂਤਂ ਤੁਣ੍ਹੀਭੂਤਨ੍ਤਿ ਆਮੇਡਿਤਵਚਨਂ ਬ੍ਯਾਪਨਿਚ੍ਛਾਵਸੇਨ ਵੁਤ੍ਤਨ੍ਤਿ ਆਹ ‘‘ਯਤੋ ਯਤੋ ਅਨੁਵਿਲੋਕੇਤੀ’’ਤਿ. ਅਨੁਵਿਲੋਕੇਤ੍ਵਾਤਿ ਏਤ੍ਥ ਅਨੁ-ਸਦ੍ਦੋਪਿ ਬ੍ਯਾਪਨਿਚ੍ਛਾਵਚਨਮੇਵਾਤਿ ਅਨੁ ਅਨੁ ਵਿਲੋਕੇਤ੍ਵਾਤਿ ਅਤ੍ਥੋ, ਪਞ੍ਚਪਸਾਦਪ੍ਪਟਿਮਣ੍ਡਿਤਾਨਿ ਅਕ੍ਖੀਨਿ ਉਮ੍ਮੀਲੇਤ੍ਵਾ ਤਤੋ ਤਤੋ ਵਿਲੋਕੇਤ੍ਵਾਤਿ ਵੁਤ੍ਤਂ ਹੋਤਿ. ਅਲਨ੍ਤਿ ਯੁਤ੍ਤਂ, ਓਪਾਯਿਕਨ੍ਤਿ ਅਤ੍ਥੋ ‘‘ਅਲਮੇਵ ਨਿਬ੍ਬਿਨ੍ਦਿਤੁ’’ਨ੍ਤਿਆਦੀਸੁ (ਦੀ. ਨਿ. ੨.੨੭੨; ਸਂ. ਨਿ. ੨.੧੨੪-੧੨੬) ਵਿਯ. ਪੁਟਬਨ੍ਧਨੇਨ ਪਰਿਹਰਿਤ੍ਵਾ ਅਸਿਤਬ੍ਬਂ ਪੁਟੋਸਂ ਸਮ੍ਬਲਂ ਅ-ਕਾਰਸ੍ਸ ਓ-ਕਾਰਂ ਕਤ੍ਵਾ. ਤੇਨਾਹ ‘‘ਪਾਥੇਯ੍ਯ’’ਨ੍ਤਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਉਪੋਸਥਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਬ੍ਰਾਹ੍ਮਣਵਗ੍ਗਵਣ੍ਣਨਾ ਨਿਟ੍ਠਿਤਾ.