੫-੬. ਉਪਵਾਣਸੁਤ੍ਤਾਦਿਵਣ੍ਣਨਾ

੧੭੫-੬. ਪਞ੍ਚਮੇ ਵਿਜ੍ਜਾਯਾਤਿ ਦਿਬ੍ਬਚਕ੍ਖੁਪੁਬ੍ਬੇਨਿਵਾਸਾਨੁਸ੍ਸਤਿਆਸਵਕ੍ਖਯਞਾਣਸਙ੍ਖਾਤਾਯ ਤਿਵਿਧਾਯ ਵਿਜ੍ਜਾਯ, ਅਟ੍ਠਵਿਧਾਯ ਵਾ. ਅਟ੍ਠਵਿਧਾਪਿ ਹਿ ਵਿਜ੍ਜਾ ਵਿਪਸ੍ਸਨਾਞਾਣੇਨ ਮਨੋਮਯਿਦ੍ਧਿਯਾ ਚ ਸਹ ਅਭਿਞ੍ਞਾ ਪਰਿਗ੍ਗਹੇਤ੍ਵਾ ਵੁਤ੍ਤਾ. ਪਨ੍ਨਰਸਧਮ੍ਮਭੇਦੇਨ ਚਰਣੇਨ ਸਮਨ੍ਨਾਗਤੋਤਿ ਸੀਲਸਂਵਰੋ, ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਤਾ, ਭੋਜਨੇ ਮਤ੍ਤਞ੍ਞੁਤਾ, ਜਾਗਰਿਯਾਨੁਯੋਗੋ, ਸਦ੍ਧਾ, ਹਿਰੀ, ਓਤ੍ਤਪ੍ਪਂ, ਬਾਹੁਸਚ੍ਚਂ, ਵੀਰਿਯਂ, ਸਤਿ, ਪਞ੍ਞਾ, ਚਤ੍ਤਾਰਿ ਰੂਪਾਵਚਰਜ੍ਝਾਨਾਨੀਤਿ ਏਵਂ ਪਨ੍ਨਰਸਭੇਦੇਨ ਚਰਣਧਮ੍ਮੇਨ ਸਮਨ੍ਨਾਗਤੋ. ਇਮੇਯੇਵ ਹਿ ਪਨ੍ਨਰਸ ਧਮ੍ਮਾ ਯਸ੍ਮਾ ਏਤੇਹਿ ਚਰਤਿ ਅਰਿਯਸਾਵਕੋ ਗਚ੍ਛਤਿ ਅਮਤਂ ਦਿਸਂ, ਤਸ੍ਮਾ ‘‘ਚਰਣ’’ਨ੍ਤਿ ਵੁਤ੍ਤਾ. ਛਟ੍ਠੇ ਨਤ੍ਥਿ ਵਤ੍ਤਬ੍ਬਂ.

ਉਪਵਾਣਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.