(੧੬) ੧. ਇਨ੍ਦ੍ਰਿਯਵਗ੍ਗੋ
੧-੫. ਇਨ੍ਦ੍ਰਿਯਸੁਤ੍ਤਾਦਿਵਣ੍ਣਨਾ
੧੫੧-੧੫੫. ਚਤੁਤ੍ਥਸ੍ਸ ਪਠਮਾਦੀਨਿ ਉਤ੍ਤਾਨਾਨੇਵ.
ਇਨ੍ਦ੍ਰਿਯਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੬-੮. ਕਪ੍ਪਸੁਤ੍ਤਾਦਿਵਣ੍ਣਨਾ
੧੫੬-੧੫੮. ਛਟ੍ਠੇ ਸਂਵਟ੍ਟਨਂ ਵਿਨਸ੍ਸਨਂ ਸਂਵਟ੍ਟੋ, ਸਂਵਟ੍ਟਤੋ ਉਦ੍ਧਂ ਤਥਾ ਠਾਯੀ ਸਂਵਟ੍ਟਟ੍ਠਾਯੀ. ਵਿਵਟ੍ਟਨਂ ਨਿਬ੍ਬਤ੍ਤਨਂ, ਵਡ੍ਢਨਂ ਵਾ ਵਿਵਟ੍ਟੋ. ‘‘ਤੇਜੋਸਂਵਟ੍ਟੋ, ਆਪੋਸਂਵਟ੍ਟੋ, ਵਾਯੋਸਂਵਟ੍ਟੋਤਿ ਏਵਂ ਸਂਵਟ੍ਟਸੀਮਾਨੁਕ੍ਕਮੇਨ ਸਂਵਟ੍ਟੇਸੁ ਵਤ੍ਤਬ੍ਬੇਸੁ ਤਥਾ ਅਵਤ੍ਵਾ ਆਪੋਸਂਵਟ੍ਟੋ, ਤੇਜੋਸਂਵਟ੍ਟੋ, ਵਾਯੋਸਂਵਟ੍ਟੋਤਿ ਵਚਨਂ ਸਂਵਟ੍ਟਮਹਾਭੂਤਦੇਸਨਾਨੁਪੁਬ੍ਬਿਯਾ’’ਤਿ ਕੇਚਿ. ‘‘ਭਾਵੀਸਂਵਟ੍ਟਾਨੁਪੁਬ੍ਬਿਯਾ’’ਤਿ ਅਪਰੇ. ਆਪੇਨ ਸਂਵਟ੍ਟੋ ਆਪੋਸਂਵਟ੍ਟੋ. ਸਂਵਟ੍ਟਸੀਮਾਤਿ ਸਂਵਟ੍ਟਨਮਰਿਯਾਦਾ. ਸਂਵਟ੍ਟਤੀਤਿ ਵਿਨਸ੍ਸਤਿ. ਸਦਾਤਿ ਸਬ੍ਬਕਾਲਂ, ਤੀਸੁਪਿ ਸਂਵਟ੍ਟਕਾਲੇਸੂਤਿ ਅਤ੍ਥੋ. ਏਕਂ ਬੁਦ੍ਧਕ੍ਖੇਤ੍ਤਂ ਵਿਨਸ੍ਸਤੀਤਿ ਏਤ੍ਥ ਬੁਦ੍ਧਕ੍ਖੇਤ੍ਤਂ ਨਾਮ ਤਿਵਿਧਂ ਹੋਤਿ ਜਾਤਿਕ੍ਖੇਤ੍ਤਂ, ਆਣਾਕ੍ਖੇਤ੍ਤਂ, ਵਿਸਯਕ੍ਖੇਤ੍ਤਞ੍ਚ.
ਤਤ੍ਥ ਜਾਤਿਕ੍ਖੇਤ੍ਤਂ ਦਸਸਹਸ੍ਸਚਕ੍ਕਵਾਲ਼ਪਰਿਯਨ੍ਤਂ ਹੋਤਿ, ਤਥਾਗਤਸ੍ਸ ਪਟਿਸਨ੍ਧਿਗ੍ਗਹਣਾਦੀਸੁ ਕਮ੍ਪਤਿ. ਆਣਾਕ੍ਖੇਤ੍ਤਂ ਕੋਟਿਸਤਸਹਸ੍ਸਚਕ੍ਕਵਾਲ਼ਪਰਿਯਨ੍ਤਂ, ਯਤ੍ਥ ਰਤਨਸੁਤ੍ਤਂ (ਖੁ. ਪਾ. ੬.੧ ਆਦਯੋ; ਸੁ. ਨਿ. ੨੨੪ ਆਦਯੋ) ਖਨ੍ਧਪਰਿਤ੍ਤਂ (ਅ. ਨਿ. ੪.੬੭; ਚੂਲ਼ਵ. ੨੫੧) ਧਜਗ੍ਗਪਰਿਤ੍ਤਂ (ਸਂ. ਨਿ. ੧.੨੪੯) ਆਟਾਨਾਟਿਯਪਰਿਤ੍ਤਂ (ਦੀ. ਨਿ. ੩.੨੭੭-੨੭੮) ਮੋਰਪਰਿਤ੍ਤਨ੍ਤਿ (ਜਾ. ੧.੨.੧੭-੧੮) ਇਮੇਸਂ ਪਰਿਤ੍ਤਾਨਂ ਆਨੁਭਾਵੋ ਵਤ੍ਤਤਿ. ਵਿਸਯਕ੍ਖੇਤ੍ਤਂ ਅਨਨ੍ਤਾਪਰਿਮਾਣਂ, ਯਂ ‘‘ਯਾਵਤਾ ਵਾ ਪਨਾਕਙ੍ਖੇਯ੍ਯਾ’’ਤਿ (ਅ. ਨਿ. ੩.੮੧) ਵੁਤ੍ਤਂ. ਤਤ੍ਥ ਯਂ ਯਂ ਤਥਾਗਤੋ ਆਕਙ੍ਖਤਿ, ਤਂ ਤਂ ਜਾਨਾਤਿ. ਏਵਮੇਤੇਸੁ ਤੀਸੁ ਬੁਦ੍ਧਕ੍ਖੇਤ੍ਤੇਸੁ ਏਕਂ ਆਣਾਕ੍ਖੇਤ੍ਤਂ ਵਿਨਸ੍ਸਤਿ, ਤਸ੍ਮਿਂ ਪਨ ਵਿਨਸ੍ਸਨ੍ਤੇ ਜਾਤਿਕ੍ਖੇਤ੍ਤਂ ਵਿਨਟ੍ਠਮੇਵ ਹੋਤਿ, ਵਿਨਸ੍ਸਨ੍ਤਞ੍ਚ ਏਕਤੋਵ ਵਿਨਸ੍ਸਤਿ, ਸਣ੍ਠਹਨ੍ਤਞ੍ਚ ਏਕਤੋਵ ਸਣ੍ਠਹਤਿ. ਸੇਸਮੇਤ੍ਥ ਵਿਸੁਦ੍ਧਿਮਗ੍ਗਸਂਵਣ੍ਣਨਾਸੁ (ਵਿਸੁਦ੍ਧਿ. ਮਹਾਟੀ. ੨.੪੦੪) ਵੁਤ੍ਤਨਯੇਨੇਵ ਗਹੇਤਬ੍ਬਂ. ਸਤ੍ਤਮਟ੍ਠਮਾਨਿ ਉਤ੍ਤਾਨਤ੍ਥਾਨੇਵ.
ਕਪ੍ਪਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੯. ਭਿਕ੍ਖੁਨੀਸੁਤ੍ਤਵਣ੍ਣਨਾ
੧੫੯. ਨਵਮੇ ਏਵਂ ਪਵਤ੍ਤਂ ਪਚ੍ਚੁਪ੍ਪਨ੍ਨਤਣ੍ਹਂ ਨਿਸ੍ਸਾਯਾਤਿ ‘‘ਕੁਦਾਸ੍ਸੁ ਨਾਮਾਹਮ੍ਪਿ ਆਸਵਾਨਂ ਖਯਾ’’ਤਿਆਦਿਨਾ ਨਯੇਨ ਅਨੁਤ੍ਤਰੇ ਵਿਮੋਕ੍ਖੇ ਪਿਹਂ ਉਪ੍ਪਾਦੇਨ੍ਤਸ੍ਸ ਉਪ੍ਪਨ੍ਨਤਣ੍ਹਂ ਨਿਸ੍ਸਾਯ. ਕਥਂ ਪਨ ਲੋਕੁਤ੍ਤਰਧਮ੍ਮੇ ਆਰਬ੍ਭ ਆਸਾ ਉਪ੍ਪਜ੍ਜਤੀਤਿ? ਨ ਖੋ ਪਨੇਤਂ ਏਵਂ ਦਟ੍ਠਬ੍ਬਂ, ਨ ਆਰਮ੍ਮਣਕਰਣਵਸੇਨ ਤਤ੍ਥ ਪਿਹਾ ਪਵਤ੍ਤਤਿ ਅਵਿਸਯਤ੍ਤਾ ਪੁਗ੍ਗਲਸ੍ਸ ਚ ਅਨਧਿਗਤਭਾਵਤੋ. ਅਨੁਸ੍ਸਵੂਪਲਦ੍ਧੇ ਪਨ ਅਨੁਤ੍ਤਰਵਿਮੋਕ੍ਖੇ ਉਦ੍ਦਿਸ੍ਸ ਪਿਹਂ ਉਪ੍ਪਾਦੇਨ੍ਤੋ ਤਤ੍ਥ ਪਿਹਂ ਉਪ੍ਪਾਦੇਤਿ ਨਾਮ. ਨਾਕਡ੍ਢਤੀਤਿ ਕਮ੍ਮਪਥਭਾਵਂ ਅਪ੍ਪਤ੍ਤਤਾਯ ਪਟਿਸਨ੍ਧਿਂ ਨ ਦੇਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਭਿਕ੍ਖੁਨੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਸੁਗਤਵਿਨਯਸੁਤ੍ਤਵਣ੍ਣਨਾ
੧੬੦. ਦਸਮੇ ਵਲ਼ਞ੍ਜੇਨ੍ਤੀਤਿ ਸਜ੍ਝਾਯਨ੍ਤਿ ਚੇਵ ਵਾਚੁਗ੍ਗਤਂ ਕਰੋਨ੍ਤਾ ਧਾਰੇਨ੍ਤਿ ਚ. ਅਵਿਗਤਤਣ੍ਹਤਾਯ ਤਂ ਤਂ ਪਰਿਕ੍ਖਾਰਜਾਤਂ ਬਹੁਮ੍ਪਿ ਆਦਿਯਨ੍ਤੀਤਿ ਬਹੁਲਾ, ਤੇ ਏਵ ਬਾਹੁਲਿਕਾ ਯਥਾ ‘‘ਵੇਨਯਿਕੋ’’ਤਿ (ਮ. ਨਿ. ੧.੨੪੬; ਅ. ਨਿ. ੮.੧੧; ਪਾਰਾ. ੮). ਤੇ ਪਨ ਯਸ੍ਮਾ ਪਚ੍ਚਯਬਹੁਲਭਾਵਾ ਯੁਤ੍ਤਪ੍ਪਯੁਤ੍ਤਾ ਨਾਮ ਹੋਨ੍ਤਿ, ਤਸ੍ਮਾ ਆਹ ‘‘ਪਚ੍ਚਯਬਾਹੁਲ੍ਲਾਯ ਪਟਿਪਨ੍ਨਾ’’ਤਿ. ਸਿਥਿਲਂ ਗਣ੍ਹਨ੍ਤੀਤਿ ਸਾਥਲਿਕਾ, ਸਿਕ੍ਖਾਯ ਆਦਰਗਾਰਵਾਭਾਵੇਨ ਸਿਥਿਲਂ ਅਦਲ਼੍ਹਂ ਗਣ੍ਹਨ੍ਤੀਤਿ ਅਤ੍ਥੋ. ਸਿਥਿਲਨ੍ਤਿ ਚ ਭਾਵਨਪੁਂਸਕਨਿਦ੍ਦੇਸੋ, ਸਿਥਿਲ-ਸਦ੍ਦੇਨ ਵਾ ਸਮਾਨਤ੍ਥਸ੍ਸ ਸਾਥਲਸਦ੍ਦਸ੍ਸ ਵਸੇਨ ਸਾਥਲਿਕਾਤਿ ਪਦਸਿਦ੍ਧਿ ਵੇਦਿਤਬ੍ਬਾ. ਅਵਗਮਨਤੋਤਿ ਅਧੋਗਮਨਤੋ, ਓਰਮ੍ਭਾਗਿਯਭਾਵਤੋਤਿ ਅਤ੍ਥੋ. ਨਿਬ੍ਬੀਰਿਯਾਤਿ ਉਜ੍ਝਿਤੁਸ੍ਸਾਹਾ ਤਦਧਿਗਮਾਯ ਆਰਮ੍ਭਮ੍ਪਿ ਅਕੁਰੁਮਾਨਾ.
ਸੁਗਤਵਿਨਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਇਨ੍ਦ੍ਰਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.